هيهيهي انا مش قلت لكوا ده دلع الحبيب على حبيبه

انا مش قلت لكوا ولا موقف عوكل تحول ولا نيلة كل الحكاية انه مقموص من الحبايب، ومدام ما بقتش تحبني زي الاول يبقى طلقني طلقني طلقني طلقني...انت طالق..هيييييه اهئ اهئ اهئ..يا خاين

اهو اولمرت طلع يصالحه اهو ويقول هو انا ليا بركة غيره؟ ده هو اللية والعين الجوانية، وبكرة قمة شرم الشيخ ح تحاول تنقذ اسرائيل من نجاحها في تحقيق "انجازاتها" الا وهي......الله اعلم ايه بالظبط، غير انهم قتلوا اطفال وستات، والحمد لله حماس زي الفل، والصواريخ زي الفل ومافيش اي حاجة، الموكوس كان بيتكلم والصواريخ نازلة على المستوطنات ويقول لهم الحمد لله قضينا على الصواريخ

على فكرة بقى احنا ما عندناش ثقة في نفسنا وتصورنا عن نفسنا اقل من الحقيقة، يعني دايما نقول على نفسنا كدابين، طب والله اكدب الكدابين، ومافيش داعي لذكر اسماءهم وهم في دار الحق، ما كانش عندهم البجاحة دي، اقصد يعني كانوا يخبوا ويكدبوا، مش تبقى الحاجة عيني عينك كده ويكدبوا على الناس في وشهم:

احنا بنحترم حياة كل انسان، وبنتعاطف مع المدنيين وبنقول لهم ان اللي قتلهم حماس!

اصل حماس مستخبية في المدنيين في غزة (اللي هي بلد حماس يعني)، والحمد لله احنا حققنا اهداف الحملة، اللي هم نفسهم مش عارفين هي ايه، ايه اهداف الحملة؟ انهم يقللوا الصواريخ، ما قلتش، ان ايه؟ اننا نحاصر وصول السلاح لحماس وذلك عبر اتفاقية مع مصر وامريكا؟ طب والاتفاقية دي ما كانش ينفع يوقعوها من غير ما يموتوا كل دول؟

مش دي الاتفاقية اللي ابو الغيظ النهاردة قال احنا مش ملزمين فليفعلوا بالمحيط ما يريدون لكن مصر لن تلتزم الا بامنها القومي؟

طب والله العظيم، والله العظيم والله العظيم تلاتة انه اول ما قال مصر لا تلتزم الا بامنها القومي قلت ده بيفتح الباب على الالتزام بالاتفاقية دي، اصل كلمة امنها القومي كلمة مطاطة قوي، وبقت مش مفهومة بصراحة، وكان باين انها قمصة: انا مخصماك

وطبعا استشفاف الموقف المصري مش محتاج نباهة، وذلك لان النباهة الناس بيحتاجولها مع اصحاب النباهة

انا بس مش صعبان عليا غير عبد الله الاشعل يا عيني

عموما يا عوكل خلي الخواجات ينفعوك، ادي اخرة المشي وراهم، اهم خلوا رقبتك قد السمسمة اهو

وربنا ينصر المقاومة ويثبتهم يارب، الحمد لله الاقنعة عمالة تـ...اقنعة ايه، دي الهدوم، وحتى الملابس الداخلية سقطت

حتى النهاردة في الخطبة قال: انت مصر سوف تمضي متجردة

اه يا عيني، في البرد ده