هي كده اتعشت؟

خلاص كده؟ والناس اللي ماتت والناس اللي اتصابت وجرائم الحرب

خلاص كده؟ معلش على راسي كل الناس، بس ماحدش يكلمنا عن انتصار دلوقت، الولد اللي اتعمى، والمصابين بالقنابل الفسفورية، والاطفال اللي ماتت، متهيالي لسة المعركة ما خلصتش، ودلوقت المعركة المفروض تبقى بان اللي عمل كده يترفع عليهم قضية ويتوجه اليهم تهم جرائم الحرب

الاطباء موجودين، والمصابين موجودين، والشهود موجودين، واحنا موجودين لو عايزين يجمعوا توقيعاتنا، وتوقيعات عالمية لتقديم الحكومة الاسرائيلية الحالية بتهمة جرائم الحرب

حالا دلوقت، محمود عباس مش عايز يمضي؟ طظ فيه، هو فترة رئاسته انتهت اساسا

شوفوا نعمل ايه؟ نبعت خطابات، نعمل بانرات، الموضوع ماخلصش كده، لازم كل المنظمات الحقوقية في العالم مع الاطباء اللي هناك، محمد غنيم عنده ادلة، مع الناس العادية، لازم كلنا نتحرك

ملف الصور كامل هنا

ومصطفى عنده كل الفيديوهات، ياريت يعمل ملف فيديوهات هو كمان خاصة بجرائم الحرب،

واحنا في انتظار تقرير مكتوب من الدكتور محمد غنيم كمان

ونبعت للعالم كله وكل المنظمات الحقوقية

احنا ح نسكت؟

انا ان شاء الله ح احاول اعمل صيغة جواب، بس الم نفسي شوية، وانزل العناوين اللي مفروض نبعت لها مرفق معاها الصور والفيديوهات

بس ما تكسلوش بقى زي كل مرة، مش ممكن يدخل تلاتلاف واحد على المدونة وما يبعتش جوابات غير عشرة

واللي عنده فكرة يقول لنا، انا دماغي ممشة