لا انا لسة ملوية

مش ملوية قوي زي في الاول، بس ملوية برضه، ما اعتذرش على انهم احتلونا، لسة بيقول: اسرائيل حليف مهم لامريكا وده مش ح يتغير، لسة محتل افغانستان وبيضرب المدنيين في باكستان، وبعدين بيغالط، هو بيقول الظواهري بيهاجمني قبل ما اتولى الرئاسة، لا، دي مغالطة، الظواهري هاجمة عشان راح باس الاعتاب في اسرائيل، وبعدين هو ماله ومال ايمن الظواهري؟ ما يسيبه في حاله ويخليه في السفاحة اللي حتى الصحفيين الامريكان هزأوها وقالوا لها يا ارهابية يا سفاحة وهو قابلها من قبل ما يبقى رئيس وما تفش على وشها وقال عليها بتدافع عن نفسها، هو له عين يشتم الظواهري...اممم، هو ما شتموش، بس ما ريحش برضه، ما بيريحش الواد ده، وبعدين البادي لانجويدج بتاعه غريب قوي، يبتسم ابتسامة ساخرة في جملة مافيش مجال فيها للسخرية ويتنح تتنيحة معينة كده في جمل تانية كأنه عايز يقول حاجة تانية واللفتات دي شكلها مقصود مش عفوي، هو فلاح وللا ايه؟ وبعدين كل شوية يرقعنا على وشنا: مش معنى كده اني ح اوافق على كل اللي بتقولوه

بيفكرني بـ: لت مي بي كلير

يا عم هو حد كلمك؟ يا عم هو حد جه ناحيتكوا اساسا؟ مش انتوا اللي عمالين تعوموا في دم الناس؟ هو احنا فينا حيل نقول حاجة لحد؟  

مش عارفة، برضه متبع الطريقة النصابة بتاعته دي انه يضرب ويلاقي يضرب ويلاقي، ده منوفي مش كيني

على العموم النصب في حد ذاته مش حاجة وحشة، اهداف النصب هي اللي بتحدد اذا كانت وحشة وللا كويسة، ومادخلش مخي في حواره غير جملة واحدة: الناس ح تحكم عليا باللي باعمله مش باللي باقوله

انا تعبت من حل مربع السودوكو بتاع اوباما على فكرة ده ليفيل تمانية، ما كناش ناقصين غير عم البازل ده كل يوم يطلع يحيرنا، انا باقول اسيبه في حاله شوية واريح دماغي لحد ما الميت يوم يخلصوا ولو كان ح يبان

بس سلام مع اسرائيل؟

ده عند امه يا ادهم
حد فاهم الواد ده ايه بالظبط؟