لو يطلع كل ده كابوس

واصحى الصبح يبقى كل ده ما حصلش

مافيش حاجة من دي حصلت

مافيش مراقبين امريكان على الانفاق في مصر

ولو يطلع الكلام ده ما اتقالش

ولو يطلع ان ابو الغيط امبارح ما قالش: احنا مش بنسرب لهم اسلحة، كل اللي بيجيلهم بيجيلهم من البحر

!!!

كأنه عيل في مدرسة بيفتن على زميله

ولو يطلع مافيش حاجة من دي، كل ده ما حصلش، انا باحلم، حلم بايخ ومزعج وح اصحى منه ان شاء الله على خير

اقول لكوا حاجة انانية شوية؟

انا زعلانة على مصر اكتر ما زعلانة على غزة، في غزة اهم بيموتوا شهدا وح يدخلوا الجنة ان شاء الله وبيقاوموا بكل طاقتهم واكتر من طاقتهم شوية

لكن انا زعلانة علينا قوي، والكل زعلان علينا ومننا

العالم دلوقت مقسوم لنصين

نص بيحتقرنا زي جورج بوش اللي جه في وش الرئيس بتاعنا يقول له في شرم الشيخ: في البلاد المتخلفة التي يظل الرئيس يحكم فيها لما يقرب من ثلاثين عاما بينما منافسيه في السجن

او زي روبرت فيسك اللي قال على ريسنا: الحاكم الاقليمي القائم على مصالح امريكا في مصر، وقال على الشعب المصري بيصلوا ويرتشوا ويصلوا ويزوروا ويصلوا ويعذبوا بعض، ومهما حسن نصر الله نادى عليهم من هنا للصبح مش ح يتحركوا لان الفساد متغلغل فيهم

او زي اوباما اللي الريس اتصل بيه عشان يهنيه فما ردش المكالمة وتعمد بقى ان كل الناس تعرف ويتنشر الكلام ده في الجرايد عندهم وفي الصحف العربية، وطبعا مصر ما جابتش سيرة

والنص التاني زعلان مننا من منطلق: ماكانش والله العشم، تعمل كده يا حسين، واللي بنيته اتهدم، وراح في غمضة عين

اللي هم العرب يعني

ومافيش حد بيدافع عننا ومبسوط مننا غير اتنين: اسرائيل والسعودية

والله وباضت لك في القفص يا اوووووووووووووسسسسسسسااااااااااااااااا

واللي مزعلني اكتر واكتر ان فيه ناس، بعض ناس مش كل الناس (على فكرة اتضح ان بتوع مؤامرة شتيمة مصر دول عددهم قليل وصوتهم عالي)

فرحوا قوي لما بوش هزأ الريس بتاعنا، وفرحوا قوي لما اوباما ما ردلوش المكالمة ولا حتى عبره، وفرحوا قوي لما روبرت فيسك شتم المصريين باتهامات انا شايفة انها مجحفة وتلخيص مخل وتعميم كمان

وزعلوا قوي لما العرب قالوا لنا: ليه كده؟ بقى هي دي مصر ام الدنيا؟ ما كانش العشم

وده ينم عن مرض اضافي، يعني ما عندهمش مانع ان حد يعاملنا باحتقار مدام خواجة وبيدينا معونة، شبشبه على راسنا وينسله كمان على وشنا لو حب

لكن عندهم مانع ان العرب يتعشموا فينا، ولما يجيلهم احباط ويعبروا عن غضبهم واحباطهم فجأة يبقوا بيدافعوا عن سمعة مصر!

يعني ما يدافعوش عن سمعة مصر قصاد الناس اللي بتقول: دول فسدانين ومافيهمش امل

ويدافعوا عن سمعة مصر قصاد الناس اللي بتقول: انتوا احسن من كده، واحنا كنا فاكرين انكوا احسن من كده، وكنا عشمانين انكوا احسن من كده

لا ويبقى ردهم ايه؟: يا اخي واحنا مالنا؟ يعني بيأكدوا اتهامات روبرت فيسك ان احنا مافيناش امل

وردح بقى وشرشحة ومعايرة...اعوذ بالله، ايه روح المنوفية اللي سيطرت على البلد دي؟

يعني كده لا كرامة جوة البلد ولا براها، ووفقا لكلام فيسك، لا دنيا ولا آخرة كمان

طب انا بقى مش حسنة النية، ومش شايفة ان الناس اللي قالت واحنا مالنا واحنا ياما عملنا لكوا واحنا ياما سوينا لكوا دول ناس بريئة ولا ناس مش فاهمة بتقول ايه ولا بتعمل لمصلحة مين؟

بجد بقى، ماهو مش ممكن كل ده مصادفة وحسن نية، لا

مؤامرة مؤامرة، ونظرية مؤامرة صح مية في المية بقى

عشان تمثيلية الغيرة على سمعة مصر دي تمثيلية اصلا مش لايقة عليهم اولا (لو ح نعتبر ان مصر ليها سمعة زي البت اللي مستنية عدلها يبقى هم اول ناس بوظوا سمعة مصر وهم اللي اوحوا لفيسك بالكلام ده)، ثانيا بتحمل ضمنيا تشويه حقيقي لصورة المصريين، وتأكيد لكلام روبرت فيسك وتبرير لاحتقار بوش واوباما، وتاني انا مش شايفة ان بوش واوباما وفيسك غلطوا بشأن الحكومة المصرية، بس فيسك فعلا كان متجني على الشعب المصري

ماهو لما فيسك يقول: ما تتعبش نفسك يا نصر الله دول مافيهمش امل

وبتوع سمعة مصر يقولوا: واحنا مالنا سيبوا الشعب المصري في حاله، ويزيدوا من الشعر بيتا بردود تنم عن انعدام الذكاء وعدم وجود الحد الادنى لاي تسلسل منطقي في التفكير زي:

- ما تفتحوا المعبر

- يا سلاااااااااااام طب ما ايران تحارب

ويخلوا الناس تقول لهم: ايه الغباوة دي؟ انتوا اغبيا وللا ايه؟

يبقى فيسك بيغني وهم بيردوا عليه، وحسن الظن مش من حسن الفطن

انا متضايقة، انا عارفة ان دي قلة ادب مني، اقصد يعني الناس عمالة تموت وانا عمالة اقول انا زعلانة علينا احنا، بس ما كلنا ح نموت، وكلنا لنا معاد، ماحدش ح يقدم عن معاده ولا ح يتأخر، والستمية اللي ماتوا في حداشر يوم احنا بالصلاة ع النبي نعمل قدهم مرتين في نص ساعة بعبارة وللا قطر وللا عمارة، بس الستمية اللي ماتوا في غزة معاهم ناس بتنتقم لهم وبتاخد لهم حقهم والمقاومة واللي بيساندوها مش محتاجين حد يعلمهم الحساب ولا حاجة زي ما جيمي بيقول، عشان احنا بروح اهلنا بنموت بضعف العدد ده في اقل من عشر الوقت ده وماحدش بياخد حقنا ولا حتى بيسجن المتسبب في قتل كل دول، ولا حتى بيخسره فلوس، بالعكس ده بيكسب فلوس، طب على الاقل المقاومة بتكبدهم فزع نفسي، بتكبدهم فلوس، بتكبدهم قطن وشاش يعالجوا جرحاهم بيه، لكن احنا ولا اي حاجة من دي، دلو كل ما يموتوا مننا كل ما يكسبوا اكتر على كل المستويات، وفوق ده كله، هم الوحيدين اللي حاسين بالامان هنا، ومتهيالي الخوارزمي وارسطو كمان لو بعثوا ح يسألوا عن عنوان اللي بيسفه من انجازات المقاومة، وح يعلموه ببلاش عشان ياخدوا فيه ثواب، خدمة له وللانسانية

وزي ما قلت امبارح: فيه واحد بيموت بكرامة، وواحد بيموت في جلده

وكلنا ميت

وانا مش عايزة اموت في جلدي....انا متضايقة