المخرج عايز كده

انا جيت، رحت الساعة اربعة النقابة، بصراحة ما انبسطش، العدد كان قليل، ومش كل الهتافات عجبتني، فيه شاب بتاع ستة ابريل، مش عارفة تقريبا اسمه حاجة عواد، عجبني فيه انه مركز على موضوع الوقفة بس، هو دعم المقاومة ودعم غزة، ودي كانت كل هتافاته وعجبني فيه الحكاية دي، لكن التشعب بقى من البعض الاخر مش عاجبني بصراحة

المهم

انا مش فاهمة حاجة

اقصد فاتحة النشرة دلوقت ومش فاهمة حاجة، كان فيه زمان برنامج رمضاني اسمه المخرج عايز كده، كان بياخد مشهد من فيلم تراجيدي ويعمله بشكل كوميدي، اكتر مشهد فاكراه، المشهد بتاع عبد الحليم حافظ لما كان عيان وامه (فردوس محمد) عميا، وكان مسافر وبيودعها وبيبوس ايدها ومسافر في رحلة علاج وبيقول لها: انا مسافر يا امي...ادعي لي يا امي وبيمشي من قدامها وبعدين هي بترفع ايديها وتدعي له: يا رب اشفيه ورجعه بالسلامة يااااااااااارب

قاموا عملوا نفس المشهد وجابوا حسين الشربيني الله يرحمه مكان عبد الحليم حافظ، ولبسوه برنيطة، وامه كانت هالة فاخر وبدل ما هو مسافر في رحلة علاج عاملينه مسافر الخليج يشتغل وبيدور بينهم حوار طبعا يفطس من الضحك مش فاكرة منه غير انه لما بيمشي هالة فاخر بترفع ايديها وتقول: يا رب يعرف يهرب الفيديو ياااااااااااااااااا رب

اهو انا حاسة اننا في برنامج المخرج عايز كده

مصر: قافلة المعبر وحسني مبارك بيقول اسرائيل من حقها تحمي حدودها ما تقوليش بقى فلسطين دي ارض محتلة

قطر: الامير القطري بيقول يجب ان يتوحد العرب والا ينتظروا قرار مجلس الامن وهم يعلمون انه لا يجدي نفعا مع حق الفيتو الذي تحتفظ به الولايات المتحدة الامريكية....ويجب عدم المساواة بين الجاني والضحية

تركيا: رجب حوش صاحبك عني طيب يا صبر طيب اردوغان (دي مالهاش اغنية) بيقول: ستغرق اسرائيل في دماء غزة، واسرائيل ح تدفع تمن دم اطفال غزة

مصر وسوريا: مش عارفين يتكلموا مع بعض

تصدقوا؟ الاختين الحلوين هناء وشرين اللي طول عمرهم زي اللب والسوداني مصاحبين لبعض في الرايحة والجاية

مش عارفين يكلموا بعض

وبيوسطوا تركيا بينهم

يعني مثلا فيلم نهر الحب

اللي بيقوم بدور زكي رستم هو احمد عز

واللي بتقوم بدور فاتن حمامة هي عبلة كامل

واللي بيقوم بدور عمر الشريف هو محمد سعد

وبدل ما زكي رستم يقول لها: يا زانية...اللي زيك، كانوا زمان بيرجموها بالحجارة...انا سبت لكم الحبل على الغارب لحد ما شنقتم بيه نفسكم وفاتن حمامة ترد عليه: ارحمني يا طاهر..سيبني اعيش تحت رجلين ابني ولو خدامة

يبقى احمد عز يقول لعبلة كامل: يا نتنة... اللي زيك كان زمانها منغنغة جوزها...سافرتي مع الواد لبنان وقلبتيه في الفلوس وما شفتنيش انا وابنك بحاجة؟ تقول له عبلة كامل: ارحمني يا طاهر وحل عن سمايا انت وابنك الزنان ده...انت ح تبص لي في الحسنة اللي طلعت لي من شقايا؟ ما تظبط نفسك في شروتين بانجو توزعهم في الساحل الشمالي وسرح الواد معاك بدل ما انتوا قاعدين زي خيبتها كده

----

الحمد لله المقاومة بتعمل لحد دلوقت شغل كويس وصامدة، واللي بيتريق على صمود المقاومة احب اقول له: هم بيموتوا وهم شايلين سلاح، وانت الابعد ح تموت في جلدك