Sunday 28 December 2008

اخي القاتل اختي القاتلة

تعرف اخي القاتل اختي القاتلة انك بتدفع ما يزيد عن اربعين في المية من دخلك ضرائب للحكومة المصرية ما بين مستنقعات من الاساسي وضريبة مبيعات وضريبة شمط وخلافه؟
اخي القاتل اختي القاتلة: تعرف ان الضرايب دي مش بتتلقى بيها خدمات ولا حاجة؟ اظن واضح الا اذا كنت البعيد اعمى
اخي القاتل اختي القاتلة: تعرف ان الضرايب دي بتروح للحكومة المصرية ايشي مرتبات وانتقالات وبدل واجتماعات وخلافه؟
اخي القاتل اختي القاتلة: تعرف ان الحاجة سيبني ليف مي وهو اسم مستخرج من من قاموس المورد عربي انجليزي لما جات مصر نزلت على حسابك؟ واتكلمت في قاعة مبنية ومتأسسة على حسابك؟ كل فولت في كهرباء الميكروفون اللي اعلنت منه الحرب على فلسطين انت اللي دافع تمنه؟
اخي القاتل اختي القاتلة: ياريت تفتكر ان الغاز بتاعك بيروح لاسرائيل حاجة ببلاش كده، يعني كمان بيطبخوا ويمونوا على حسابك
اخي القاتل اختي القاتلة: انا وانت وانتي ايدينا متلطخة بدم الفلسطينيين
اخي القاتل اختي القاتلة: احنا قتلناهم بدم بارد وعلى حسابنا
وانا كمواطنة بادفع ضرايب ولي الاجر والثواب عند الله، مش طالبة من الحكومة المصرية انها تجيش الجيوش لا سمح الله، ولا تاخد صف الفلسطينيين لا قدر الله
استغفر الله العظيم، انا برضه واحدة مؤمنة وموحدة بالله ومش ممكن اكفر واقول الكلام الفارغ ده
انا كل اللي طالباه من الحكومة المصرية اللي كل مليم واخدينه من ضرايبي انهم يقفوا موقف سلبي من مذبحة غزة
ما يتدخلوش لحساب اسرائيل
يقولوا مالناش دعوة
سيبكوا بقى من بالروح بالدم نفديك يا بتنجان
هو ده منظر شعب عنده دم؟ ولو البتنجان استنى دمنا عشان نفديه بيه يبقى اتركن على حيطة مايلة، وح يستنى كتير، والتور ح يحلب واحنا لسة ما ظهرلناش دم في الافق
انا باقول لكوا الكلام اللي بيأكل عيش مش فض المجالس:
احنا مش ممكن نصدق ابدا ان الحكومة المصرية تعاونت مع اسرائيل واتفقت معاها على سحق حماس لما الولية سيبني ليف مي كانت هنا، وطبعا مش ممكن ابدا تكون الحكومة المصرية خدعت حماس وقالت لها اطمني مافيش ضربة
ابدا ابدا ابدا
ولعلمكوا لما سيبني ليف مي قالت احنا سوف نمحو حماس ابو الغيظ ما سمعش، لانه كان بينادي الواد الساعي عشان يجيب له كوباية مية لانه ريقه نشف من كسر الرجول وهي سهته وقالت الكلمتين دول من وراه، ولجل البخت هو بقى تاني يوم ما قراش الجرايد عشان البت الخدامة لمعت الازاز بيها
وعشان كده احنا مش عايزين اكتر من ان الحكومة تطلع بيان وتقول ان اسرائيل خدعت مصر وقالت لها ان مافيش ضربة جوية تفتح باب الشعرية وعلى هاذوها الاساش قامت مصر بابلاغ حماس بالاخبار اللي وصلتها وان مصر نفسها انخدعت
وبعدين تستدعي السفير المصري
مش عشان اسرائيل كيان استيطاني عنصري استعماري لا سمح الله
اسرائيل دولة صديقة شقيقة رفيقة لصيقة مضيقة رشيقة رقيقة
وانما عشان اسرائيل احرجتنا، قالت لنا كلام كدب وضحكت علينا وخلت رقبتنا قد السمسمة والعالم كله نازل تف علينا واحنا مش عارفين نرد ولا حتى نبجح، تخيل يا مواطن لما المصريين اساتذة البجاحة في العالم ده اسقط في يدهم ومش عارفين يبجحوا؟
يستدعوا السفير شوية كده يعني مش على طول، كام يوم يقضي اجازة الكريشماس مع الاسرة والكراسي، برو عتب يعني عشان منظرنا قدام الناس
وقبل ما يطلعوا البيان ده يتصلوا بسيبني او يبعتوا لها رسالة على الموبايل ويرسوها على الموضوع عشان ما تطلعش تكدبهم قدام الناس وتبقى فضيحتنا فضحتين، وللا اقول لكوا، احنا ممكن مثلا نقول ان دي اسرائيلية وانها عايزة توقع ما بين مصر والعرب وكدهون، وهنا يبقى فيه مساحة للبجاحة مش بطالة، كلمتين كده بس يعني
عشان يبقى عندنا فرصة نتحجج قدام الناس
ادونا فرصة نختلق اعذار انتوا كده بتزنقونا في الحيطة وبتقطعوا اعذارنا وبتحرجونا احراج ولا ابجح منوفي ولا مرتزق فيكي يا محروسة يعرف يتصرف فيه، ده ولا حتى مأمون فندي يسلك في المزنق اللي حطتونا فيه، واحنا ناس كويسين بندفع الضرايب ومش بنسألكوا الفلوس بتروح فين
ومش بنعترض على حاجة احنا ناس زي الفل واي حكومة في الدنيا تتمنانا وكتير كانوا متكلمين علينا بس النصيب بقى
انا رايحة بكرة ان شاء الله على سلم النقابة، مش عشان اتضامن مع الفلسطينيين، يعني ناس دمها سايح اطنان وقفتي ع السلم ح تعمل لهم ايه؟ انا بس كل اللي عايزاه ان الحكومة المصرية الطيبة الرشيدة اللي انا بادفع لها ضرايب انها تغسل وشي قدام الناس، انا كده وشي مش باين من القذارة والدبان اللي عليه، اي مية تسد، انشالله بمية الترعة ام بلهارسيا،
طب مثلا، كان ماله التآمر من غير الفضايح؟ ليه كده؟ يعني ما يعملوا اللي هم عايزينه من غير ما يخلونا متففة العالم بالطريقة دي
يا عمي الخروف يندبح بعيد عني، وانا قلت ما يندبحش لا سمح الله؟
لكن ما ادفعش تمن السكينة وتجيبه يندبح على بابي وتمسك ايدي بالعافية وتحطها في الدم، انا مش عايزة خمسة وخميسة هنا على الباب، مين ح يحسدنا بلا وكسة
لكن تعملوا مني قاتلة ليه؟ انا ماليش مزاج اقتل حد وماشية جوة الحيطة اهو وباقول يا حيطة داريني
انام  وانا قاتلة 300 قابلين للزيادة ليه؟
يعني صابرين على الدنيا عشان الاخرة، كمان مافيش اخرة؟ هو احنا اجوزنا امكوا؟ احنا كده بقينا زي الامريكان، طب الامريكان عندهم فلوس، احنا عندنا ايه؟ فشل كلوي
ماهو يا تبطلوا تقتلوا الناس بفلوسنا علنا، يا تقتلوهم بس في السر، يا ما تاخدوش مننا فلوس يا توفروا لنا الكلة

15 comments:

Eskenderllawy said...

نواره ادخلى اسمعى عمرو اديب دلوقتى.....

mahy said...

ونسيتي يعني وقوفنا ضد طيور الظلام
مش دي اصل المشكلة
الاخت هوايدا كانت بتقول الطيور دي متعرفش يعني ايه وطن خلاص سيبي الغراب المنوفي يعجنهم
عالم متعرفش الفرق بين الحج تامر امين
والاخ-وانجيييي-احمد منصور

سيبك مني انا بهرتل

كيكى عوووووو said...

مش عارفة اكتب
لان اايدى متلوثة من الدم
**********************
*************************
**********************
عوووووووووووووووووووووووو

مواطن مصري said...

العرب كلامجية و الامجاد لا تبنى على توجية الشتائم لبعض

اين ايران و ماذا قدمت لماذا لم تضرب صواريخ ولا نجاد بتاع كلام و بس
اين صواريخ حزب الله في الجنوب
اين السورين الي شتمو مصر و الجولان محتلة

اين الاردن الي مطبعة مع اسرائيل


انا لم اعد عربيبعد الان
انا مصري و احب اقول
ل كلامجية حماس و الاخوانجية انتو بتوع كلام و عاوزين جنازة و تمشو فيها و الاوطان لا تبنى على الشتائم او المزايدات


بصراحة العرب بس فالحين في الشتيمة يا نوارة


الي عاوز يحارب يحارب

و الحرب مش كلام

Ahmed Mohamed said...

اختي الفاضله
لسنا وحدنا في ام العرب دول
بلا حماس بلا بتاع
لو قدرتي تقنعيني ان كل لبنان بيحب حزب الله
هصدق ان كل فلسطين بتحب حماس
بل وهصدق ان مصر مشتركه في بيحصل
اقولك انا الي قتلت الفلسطينين
راحوو فين الي بيجلدونا
عملو ايه الي بيشتمونا
كانو فين من زمان
الله يرحمك يا جمال
ويسامحك
انت الي علمتهم يعني ايه عروبه
يااااااااختي نننننننننه

مواطن مصري said...

اة الي عاوز يقدم مساعدات يقدم

دة شىء ايجابي و جيد و يا ريت كل العرب و بما فيهم سماحة السيد حسن نصر الله

نجمع كلنا و المليارات الي عند السعودية نشتري بيها بضائع و نتبرع بيهاا بدل الشتيمة في مصر عشان

العرب من غير مصر ولا حاجة

Empress appy said...

ردي عليكي عندي يمكن يخفف الدم اللى على ايدينا تفتكري هينفع تفتكري

احمد العربي said...

والله العظيم انو حيجي وقت نطلب من الجميع عدم حتى تأييدنا , لانو ده بيفتح المجال لبعض الاشخاص لمهاجمة أطفال أبرياء يقتلون, يا عم الشعب المصري مش خاين , الشعب المصري حبيبنا و دم الأمن المركزي و الجيش المصري غالي علينا زي ما دم اطفالنا غالي, ,و إذا إحنا زعلنا بعض الاشخاص من الشعب المصري , إحنا آسفين بلاش دعم لنا , خيركم شابق يا جامعة و كتر الله خيركم و بارك لكم في حياتكم و أولادكم و أموالكم , و لنا رب يحمينا و دمتم
تحياتي

Unknown said...

احنا اسفين يا احمد

انا ح امسح التعليقات اللي ضايقتك دلوقت

حقك على راسي
ومش ح انزل اي تعليقات جارحة في الوقت ده

ده انا مش فاهمة والله

واحد واقع ميت على الارض وواحد تاني واقف يتفرج على جثته ويقول له تستاهل انت اللي عملت في نفسك كده

ده ايه المرجلة دي؟

Yasmine Madkour said...

حراااااااااااام بجد :(

حفيدة عرابى said...

البنى ادم احيانا عدو نفسه بقلب فى التلفزيون الشيطان غوانى وخلانى ابص على البيت بيتك ايه الحقارة دى هى الناس دى بتقبض اد ايه هو مراكزهم ومناصبهم هتنفعهم يوم القيامة هى الناس دى بتكلم مين هما فاكرين نفسهم لسه فى الستينات مو لسه فى حد عاقل ممكن يصدقهم وبعدين الاخوة اللى بيتكلموا عن تضحيات مصر العظيمة لفلسطين ياناس حرام عليكم مصر الحروب اللى خاضتها كانت لمصلحتها علشان ياظلمة امن مصر القومى يبدا من حدودها الشرقية طيب اسالوا اى عيل خايب فى سنة اولى اعدادى هيشرح لكم ازاى مصر تحافظ على امنها القومى يا اغبياء والاجمل ان الناس بتتكلم على ابو الغيط ياناس ده موظف بس المصيبة زى ماقال حمدين صباحى دلوقت مش بيسوق لموقف مصر ده بكلامه المستفز بيسوء موقفها

Empress appy said...

احمد العربى
============
بجد احنا بنتاسف ليك كلنا والله وللشعب كله انتم اخواتنا بجد ومش هنزايد على ده اعذر البعض لاننا فعلا مضغوطين خارجيا واداخليا واحنا كشعب مش موافقين ومش عارفين نروح فين ولا نيجي منين والصهاينه نجحوا انهم يفرقونا والله وده اللى بيخططوا ليه
وده اللى بقوله هما اذكياء بالقدر الكافى انهم يشككونا فى بعض ويخلونا نضايق من بعض وده اللى مكنتش انا او غيري بنتمناه احنا كمصرين صح وشعب محترم
تقبلوا عزائنا فى الشهداء وقولبنا معاكوا بجد

سنابل said...

عايزة أتأسف وأعتذر لكل فلسطيني وابوس راسه
شكلي صحيح انا القاتلة بس والله أنا مخطوفة واللي خاطفني شرييك اللي بيقتلكم والإتنين بيقتلوا ويحطوا السكينة ف ايدى
حد يقول لي أعمل ايه عشان اشيل الذل والعار ده ؟

احمد العربي said...

شكراً جزيلاً يا أخت نوارة على خطوتك , أنا والله ما قصدي أي حاجة ضد اللي بيتكلموا أي حاجة , إحنا عارفين في تقصير من جانب قاداتنا و لكن الهجمة شرسة و القادم أعظم ورب الكعبة , يضربون المساجد و البيوت الآمنة و الآن قد ضربوا الجامعة الإسلامية , و بعدين اللي بيسمع ضرب مواقع عسكرية بعتقد أنو فعلا في مواقع عسكرية , مواقعنا العسكرية هي عبارة عن مراكز شرطة ليس إلا !!! للأسف سيستمر الدم المراق أمامنا, ولن أحمل أي شخص المسئولية إلا من يحمل نفسة بنفسة فكلنا نعلم عندما نقصر في أمر ما, كل لحظة تحمل المزيد من الدم , و السيد حسن نصر الله كان واضحاً في تحليلاتة و مطالبة و هو حسب علم الجميع أدري منا ببواطن الأمور و أثبت أنه أقدر منا جميعاً على قراءة الواقع بوضوح , و دمتم لنا تحياتي

حسن على said...

العار يغطى كارتيل المنتفعين بالحكم فى مصر من اكبر بغل فيهم حتى اصغرهم.فقدت السلطة سراويلهاوهى على السجاد الاحمر اثناء عزف السلام واستعراض حرس الشرف...والتقط الجميع الصور للفضيحة وشاع الخبر فى كل مكان...وابناء الزنا هؤلاء لم يعد يسترهم شىء...الكل يعرف الان انهم مجرد قوادين اذلاءو جبناء.وان علاقتهم بأسرائيل وتواطئهم معها ضد الفلسطينين ما هو الا جزء من نشاطهم فى دعارة المثليين