Wednesday 31 December 2008

عاجل للتأثير على الرأي العام العالمي

احنا بنعمل على اليوتيوب فيديوهات عربي ليه؟ احنا محتاجين فيديوهات بالانجليزي وتكون مختصر ومؤثرة وفيها رسالة واضحة
يعني مثلا ده فيديو بيعرض وجهة النظر الاسرائيلية
بصوا كام فكرة عرضوها في دقيقة ونص؟
اولا عملوا توحد ما بين اطفال اوروبا وامريكا وما بين اطفالهم
وبعدين بينوا حماس على انهم ارهابيين
وبعدين جابوا صور (بصراحة تفطس من الضحك، قال ايه السقف مخروم، يا جمالي ياختي)
وبعدين قارنوها بحداشر سبتمبر
بصوا بقى
طيب دي صور ابلغ من اي كلام، صحيح
بس مافيش رسالة، الرسالة ان الاطفال بتموت، بس هم لسة فاكرين ان اسرائيل بتدافع عن نفسها، بس اتكت علينا شوية
لكن احنا لازم نوصل لهم رسالة ان حماس مش ارهابية، لان ده ح يقسم اللوم ما بين اسرائيل وحماس
وبعدين اللي عامل الفيديو ده مش عربي، اسم الله علينا ما بنعرفش انجليزي وللا ايه؟ بصوا الفيديوهات اللي احنا عاملينها
بالذمة ده اسمه كلام؟ ده على ما يخلص رغيه تكون الناس قالت: يارب كل الغزاوية والعرب يموتوا وللا تجيلهم قنبلة نووية تخلصنا من مللهم
طيب ازاي؟
بصوا، حماس مش بتضرب اسرائيل، حماس بتضرب المستوطنات في الاراضي المحتلة (عارفة ان فلسطين كلها بتاعتنا وان اسرائيل كلها احتلال وكيان استيطاني بس معلش خدوهم على قد عقلهم) احنا نكلمهم بقانون الامم المتحدة
يبقى لازم يفهموا ان الصواريخ دي بتنزل على الاراضي المحتلة، ووفقا لقوانين الامم المتحدة ده اسمه كفاح مشروع ضد الاحتلال
وتقدروا تجيبوا المادة دي من موقع الامم المتحدة، بالتحديد: الحقوق المدنية والسياسية
تقدروا تستعينوا بخريطة المستوطنات من الموقع ده
ولازم يفهموا ان الصواريخ دي على المستوطنات هدفها تطفيش المحتلين مش الحاق الضرر بيهم (ماشي انا عارفة انهم ما بيلحقوش الضرر بيهم من خيبتهم مش تكتيك يعني، بس خلينا نعملها بجميلة) ونجيب ادلة على الكلام ده بالصور
صورهم هم على الاقل، اي هبل
وبعدين اطفال غزة بقى، على قفا من يشيل، والدمار والموت، عادي ده منه كتير
زي ماهم بيعتمدوا على تكنيك توحيد المشاعر، يعني كأنهم بيقولوا حطوا نفسكوا مكانا، احنا لازم نعمل كده، ونحاول نقرب، يعني مثلا: جورج واشنطن لما حرق الاسطول الانجليزي في حرب الاستقلال كان ارهابي؟ (انا عارفة انها مش بلدهم ولا بلد الانجليز وانها ما كانتش حرب استقلال ولا نيلة دي حرب على فلوس بس خدوهم على عقلهم) او مثلا: مقاومة فرنسا ضد النازي بما في ذلك ضرب المطارات وخطف الجنود كانت ارهاب؟ ( هم نفسهم كانوا محتلين وكلاب بس خدوهم على قد عقلهم، هم معاتيه اصلا، اللي يأثر فيهم اسرائيل يبقى دول عندهم مخ؟)
بس اهم حاجة
1- تكثيف الرسالة
2- البعد عن الخطابة وترك الكلام للصورة
كمان ما تدخلوش عليهم بصور الدم على طول، هاتوا رجلهم بصورة تخطف العين في اول الفيديو
الاسرائيليين مش انبه مننا عشان يأثروا على الرأي العام العالمي واحنا قاعدين نعمل كده
انا والله لو باعرف اعمل فيديوهات كنت عملتها
انا نازلة الشغل دلوقت، ولما ارجع ادور على مصادر اكتر
شدوا حيلكوا
تحديث:
ما رحتش الشغل وقعدت لكوا
اهو الحقوق المدنية والسياسية بالانجليزي
http://www.hrweb.org/legal/cpr.html
ودي الترجمة بالعربي
http://www.geocities.com/dalbah4/baloch6.htm
بس احنا عايزين نوجه الرسالة بالانجليزي عشان توصل للعالم
ملحوظة:
ماحدش يقول مافيش فايدة هم مش ح يسمعوا
مش صحيح، هم دلوقت عندهم استعداد يسمعوا، بعد ما قتلوا اتنين مليون في افغانستان والعراق ابتدوا يحسوا بالذنب ومتهيالي فرصة كويسة اننا نعبر عن نفسنا وعن احساسنا بالمرارة كأقوى ما يكون
الخطاب المتراجع مالوش مجال لانهم مستعدين يسمعوا، مدام مستعدين يسمعوا يبقى نقول كل اللي في قلبنا بقى
بس التكثيف، والتركيز اهم حاجة، والتأثير، هم مش بيحبوا الرغي، مش زينا يعني
:))

15 comments:

دعاء said...

يا ريت نتحرك في الجانب ده بالفعل

أنا النهاردة شفت مقالة روبرت فيسك بتاعت الاندبندت البريطانية لو أكثر من صحفي أتنقلت لهم وجهات النظر بالوضوح ده اعتقد إن هيبقى في تأثير

بعيدًا عن الموضوع في مجموعة بقى و انا منها من الجايكو عاملة مطالبة برجوعك هناك

طنشي الناس ألي بتغلس هناك ولا كانها موجوده وأرجعي بقى يا نوارة

الجماهير هناك بتطالب بيك :D

ناصر said...

اشتقنا اليكم ياست الكل، كنت بعيدا عن النت فترة وكنت اظن ان اجازتك ستطول.
على كل حال الحمدلله على السلامة، نورت شتائنا المظلم.

فاروق عادل said...

شوفى اخر بوست عندى

Empress appy said...

احنا عملنا انجليزي وفرنساوي وهننشرهم علشان الناس تاخدهم وتبعت لو عندك اكتر هاتى المنظمات الحقوقيه

ناصر said...

بالنسبة لمشروع الافلام، وانا اعتقد انه مشروع حيوي وبالغ الاهمية اقترح السيناريو التالي لفيلم لمن يستطيع انجازه:
مدته ستين ثانية اومائة وعشرين على ابعد حد.
خط زمني"تايم لاين" صورته الاولى خريطة مكتوب عليها فلسطين بلون معين ثم لون اسرائيلي يقلص المساحة ويخرج من عملية طرد اللون الفلسطيني صور لموجات تهجير الفلسطينيين وصور لمخيمات اللاجئين وتختم بصورة المساحة الضيقة لغزة ويحيطها اللون الاسرائيلي من كل الجهات ويمطرها وتخرج من عملية الاحاطة صور القصف والغارات ويختم الفيلم بعبارة: يريدون اكمال العمل ويزعجهم الدفاع عن النفس

أفندينا said...

كنت بتكلم الصبح في نفس الموضوع يا نوارة ... أحنا عمالين بنكلم بعض فعلاٌ بينما العالم الخارجي نحن المعتدين والصهاينة يدافعون عن أنفسهم .... كل من يقدر من ناحية اللغة والتقنية على صنع أفلام توضح الحقيقة يجب أن يفعل وهذا أضعف الإيمان
خالص الود لنوارتنا

أفندينا said...

كنت بتكلم الصبح في نفس الموضوع يا نوارة ... أحنا عمالين بنكلم بعض فعلاٌ بينما العالم الخارجي نحن المعتدين والصهاينة يدافعون عن أنفسهم .... كل من يقدر من ناحية اللغة والتقنية على صنع أفلام توضح الحقيقة يجب أن يفعل وهذا أضعف الإيمان
خالص الود لنوارتنا

انسانةعادية فى عالم مش عادى said...

والله كنت بفكر فى الموضوع ده امبارح وانا بقلب فى اليوتيوب نفسى الاقى حاجة انجليزى وتوضح وجهة نظرنا فعلا

Ahmed Mohamed said...

من الاخر زي ما بتقولي يا
انسه عتامه
محتاجين كوهن زي الكوهن الاسرائيلي
من ناحية تانيه نبطل احتفلات ورقص بمناسبة السنه الجديده
يعني بالاضافه للرسائل
القنوات المصريه والفضائيه والعربيه تبطل احتفال بهجص رأس السنه
المفروض يكون في علامه سوده علي كل قناة
اقلو لو واحد شاف الحفلات دي
هيقول ياعم دول بيرقصو عشان غزه بتنطحن يا بجاحتهم
اويقول بيرقصو عشان بيدمرو اسرائيل يعيني ياحرام

Unknown said...

طب يا سيد قتامة ما تتنحرر كده وتعمل لنا فيديو عدل

هو فيه ناس بتحتفل بالنيو يير؟

سعيد أفندى said...

طب يا جماعة أنا ماليش أوى فى شغل الفيديو وتقطيعها والكلام ده .

بس لو محتاجين ترجمة للغة الإسبانية , انا مستعد اترجمها .

حد يبعتها بالانجليزى أو بالعربى

مواطن مصري said...

انا شايف بدل الخناق و القنوات الي بتشتم في مصر تكثف مجهودها بنشر القضية على اليو تيوب و على البلوجات و الرديوهات و تعمل حملات زي بتاعت غير حياتك و امتنع عنالتدخين و العرب الي برة ينشرو الصور بدل ما يمسكو في خناق بعض

Lasto-adri *Blue* said...

مشكلتنا يا نوارة اننا بنقوم ف الحالات الإنفعالية..
فلسطين مش محتلة امبارح.. محتلة من 60 سنة.. وجايين نفوق دلوقتى..
دا شئ كويس على أى حال.. المهم استمراره لبعد الغارات الحالية.. لانها ح تخلص عاجلا أم آجلا.. وح يخلص معاها إنفعالنا.. وتعود الحياة كما كانت ..

Abeer hussien said...

صحيح فلسطين مش محتلة من امبارح
وصحيح ممكن انفعالنا دا ينتهي بعد فترة
لكن هو دا اللي هيفرق بين الاشخاص الانفعاليين والاشخاص اللي فعلا عايزين يعملوا حاجة يخدموا بيها القضية وحاجة يقفوا بيها قدام ربنا يوم الحساب
جماعة ممكن نشوف خطوات عمليه لتنفيذ المشروع دا ولنعتبره مشروع طويب المدي عديد المراحل

ثورة الياسر said...

هنا فلسطين
من قلب الحصار والنار نحييكي اختي الكريمة ونشكرك على الاهتمام والفكرة ويارب التنفيذ يكون بسرعة
دعواتكم لينا بس يا ريت تكون الدعوة لفلسطين بكل الوانها واطيافها مش لحزب دون التاني او لتنظيم بعينه والباقي لا لان الي بينقتل بالاول والاخر هم فلسطينيين
تقبلي مروري
http://jdwralbadeah.blogspot.com/