Thursday 4 December 2008

اموت واعرف مين اللي زقني

الا انا بقالي فترة لا بادخل على الريدر ولا بادخل على المدونات ولا باشوف خلقة حد وقاعدة يا باشتغل يا باتفرج على افلام يا باقرا كتب، واتخبطت في عقلي ودخلت الريدر النهاردة
وده يبقى اسمه ايه ده؟
والله يرحمه الحريري يعني، انا عايزة افهم هي واشنطن دي ارملته؟
وهي خريجة سادسة ابتدائي بتعرف رياضيات بالشطارة دي يا اوختشي؟
آآآآآآآآآآآه انا عرفت فرص العمل اللي بتتكلم عليها است عيشة جات منين...شوف النباهة، هم يفصلوا العمال فصل تعسفي عشان يوجدوا فرص عمل
امال يعني ح يشغلوا العواطلية ازاي؟ خلاص انتوا اشتغلتوا شوية سيبوا غيركوا بقى يجرب الشغل وبعدين يتفصل وهكذا دواليب
وآخرة المتمة تسمع ناس بتقول على اسرائيل دولة ديمقراطية
واوباما بيحدد خطر ايران في الخليج بس، ومش ح اديكوا اللنك دوروا انتوا بقى، واحد بلده محتلة العالم وبيتكلم عن الخطر التوسعي الايراني في الخليج
انا زهقت من الجنان على فكرة، كده بزيادة جنان قوي، ولما تقول لهم ده جنان يزعلوا ويقولوا لك انت اللي مجنون
اللي ينقل المخ بقى ان فيه ناس تعمل زي الراجل العجوز اللي قابله اسماعيل يس في فيلم المليونير الفقير لما دخلوه مستشفى المجانين، اللي قعد يقول له كلام حكم وفي الاخر اسماعيل يس قال له: يا عم انت بتقول كلام حلو قوي..انت مين
راح منطور واقف وقال له: انا المجريييييييييييييي تشك تشك تشك تشك توووووووووووووووووت
هو حسن نصر الله مش ناوي يتكلم بقى؟
يقول اي حاجة...اي حاجة يعبرنا ما يسيبناش في الموريستان اللي احنا فيه ده لحد ما نحس اننا احنا اللي غلط،
يتكلم
نفسي اسمع كلام عاقل، بمعنى  مقدمات منطقية لها علاقة ببعض وتوصل لنتائج منطقية لها علاقة بالمقدمات اللي قبل كده، ماحدش بيعمل المعجزة الاعجوبة دي غيره
يارب يتكلم قريب، نفسي اسمع واحد مش مجري.....نفسي
يا شباب انا كنت زمان قريت حديث للرسول صلى الله عليه وسلم مش فاكرة نصه بس فاكرة معناتو ان في آخر الزمن كل الناس دماغها ح تضرب وتخرف
"فما تكاد تجد رجلا عاقلا"
دي الجملة اللي فاكراها من الحديث
حد يعرف يجيبهولي؟ 

10 comments:

مواطن مصري said...

احلى حاجة الخبر بتاع مرات رئيس وزراء الدنمارك تحسن دخلها

ههههههههههههههههههههههه

مايتعلمو من الي عندنا

هو دخل رئيس وزرائهم كام

أحمد عبد الوهاب said...

القاتل اللئيم و هو بيمثل الحريمة وقف ربع ساعة مش عارف ينط السور و المخبرين
يشبكوا له و يشاوروا له يخش منين .

و بعدين قال اللئيم :
أنا خات ال200 جنية اللي كانوا تحت كيس البونبوني .

قام المخبر زاغره: 200 و لا 400؟

اللئيم :400

TAFATEFO said...

مش عارف الحديث اللي حضرتك بتتكلمي عنه .. بس المعنى في حديث أبي موسى الأشعري في صحيح الألباني


قال (ص) "إن بين يدي الساعة الهرج ، قالوا : وما الهرج ؟ قال : القتل ، إنه ليس بقتلكم المشركين ، ولكن قتل بعضكم بعضا ، ( حتى يقتل الرجل جاره ، ويقتل أخاه ، ويقتل عمه ، ويقتل ابن عمه ) قالوا : ومعنا عقولنا يومئذ ؟ قال : إنه لتنزع عقول أهل ذلك الزمان ، ويخلف له هباء من الناس ، يحسب أكثرهم أنهم على شيء ، وليسوا على شيء"

TAFATEFO said...

وبعدين انتي بتعايري الست بتعليمها؟؟

أهي ربنا فتحها عليها وبقت وزيره .. بطلوا النفسنه والحقد الطبقي ده بقى

يمسيه بالخير عادل امام .. بلد شهادات صحيح

:@:@:@

TAFATEFO said...

وكمان نفسي تاخدي بالك من تصريحات الست دي .. علشان اللي بيغيظني أكثر من الكذب الحومي .. استعباط واستهفاء الرأي العام

في نفس الخبر (ومش عايز أكرلك كل تصريحاتها وأخبارها لأنها كلها فشر) تقولك أهم الفرص دي 2000 سائق .. سواقين تاكسي العاصمه أكيد مشترط فيهم عدد سنين من الخبره .. يعني الوظائف للي شغالين أصلاً .. ميقولوش بقى للشباب العاطلين عن العمل

دي عالم بنت تيت

نفس بيانات الدعم .. كلها كدب غبي .. بيستغبوا الناس

AmiroZ said...

صحيح .. قلب المؤمن دليله!!!
http://www.alarabiya.net/articles/2008/12/04/61364.html
والد المتهم قال أنه كان في تلك الليلة بين أشقائه في البيت
شكوك في تلفيق الشرطة المصرية لتهمة قتل ابنة ليلى غفران

القاهرة - محمد المعتصم

أثيرت في الأوساط الإعلامية والقانونية المصرية شكوك واسعة في أن تكون الشرطة لفقت جريمة قتل ابنة ليلى غفران وصديقتها لمتهم بريء، على نمط تلفيق جريمة ذبح عدة أسر في بيوتها بقرية بمحافظة المنيا قبل عدة أعوام لشاب مريض نفسيا ظهرت براءته فيما بعد.

وطالب محامي المتهم محمود سيد عبد الحفيظ عيسوي ويعمل في حرفة "نجار المسلح" بالكشف عن القوي العقلية للمتهم واستشهد بأنه يهذي بكلام غير مفهوم وفي غير موضعه، وأنه اعترف تحت الإكراه؛ حيث يظهر التعذيب واضحا علي يديه.

فيما قررت نيابة مصرية أمس الأربعاء 3-12-2008 حبسه أربعة أيام علي ذمة التحقيقات بعد أن وجهت إليه النيابة تهمة القتل العمد مع سبق الإصرار المقترن بالسرقة.

أبو أمير said...

بلد عدد سكانها 80 مليون
تقول وزيرة القوى العاملة فيها
أنا لقيت لكم 6 آلاف وظيفة
فقط 6 آلاف وظيفة

!!!!!!!!!!!!!!!!

على رأي نونو
لازم توفري أنا كمان الكلة

كلاكيت تانى وتانى said...

تعرفى نفس الاحساس اللى بيجيلك دة بيجينى اوقات كتير جدا عشان كدة بيبقى اجمل شئ فالحياة ترتيب الاولويات والأنسحاب الفورى بلامقدمات من اى شئ وكل شئ ممكن يرهقنى عصبيا ونفسيا لأن الحياة والناس بقم مليانين كذب وخداع والفساد حوالينا بيزيد ويستشرى بصورة بشعة ولأن حياتنا لازم نعيشها مع الناس ومتنفعش بدونهم يبقى لازم نمتلك القدرة على من حياتنا واللى انا بعتبرها بالنسبالى غرفتى وكتابى وموسيقى الة البزاق الرائعة وانغام العود لنصير شمة وفنجان قهوة مضبوط وامسح من عقلى الدنيا والناس والعقول العقيمة اللى بنتعامل معاها يوميا
المشكلة انك تستغربى بمدى وكم المشاكل اللى الناس فيها وبرضة عايشين فتفاهات مفيش اى قدرة على تحديد الاهداف شاغلين نفسهم بغيرهم ومش قادرين يحددوا مشاكلهم ويفكروا فحلول لها فأصبحنا فى مجتمع كلة بيجرى ورا ديول بعض ويهوهو على بعض وينتقد بعض بدلا من انة يبص فى مرايتة ويفكر ازاى ولية وامتى وفين اقدر احل مشاكلى
فالامارات اللى من يجى 15 سنة كانت صحرا كنت بلاقى فتيات وسيدات فى مثل اعمارنا واقل بيجتهدوا يحضروا محاضرات التنمية البشرية وتقوية المهارات الحياتية وطرق حل المشكلات الزواجية وكيف تفكرين بعقلانية ومحاضرات عن احدث الافكار والمخترعات ومحاضرات حول البرمجة اللغوية العصبية وحلقات نقاش عن دول العالم الثالث وجهود التنمية واروح اى مكتبة جرير او مكتبة جامعية الاقيها مليانة بنات وسيدات وشباب بيقرى ويتثقف
اة عندهم مشكلات داخلية فى المجتمع بس برضة عندهم محاولات جادة لملأ عقولهم وافكارهم والاحتكاك بحضارات تانية وبعثات خارجية لكل انواع الدراسة وساعات بعثات بس للأحتكاك بثقافات اخرى
طيب سيبك من كل دة كانوا بياخدوا محاضرات ودورات فى فن المكياج والاهتمام بالذات وتمليس الشعر
لمجرد شغل اوقات فراغهم
تحسى لما تتعاملى معاهم انك بتتعاملى مع ناس لها عقول خلية نحل من الافكار والاتجاهات منها البسيط ومنها المعقد
د أياد حرفوش فمدونتة للفجر نغرد اثار القضية دى واعتقد انة من الكتاب او المدونين الرائعين واللى عندة نفس الاحساس وحاول يعمل ملتقى لأصحاب العقول زى ماكان بيسمية ولكنة فشل أو للأسف وجة بأنتقادات حادة حول الاهداف والأفكار برغم ان الغرض الرئيسى كان التفكير بعقلانية ومناقشة الاحجوال من حولنا ومحاولة التوصل لفهم صحيح لحلول بسيطة نقدر\بيها نتعايش او حتى نساهم فى مشكلات مجتمعنا دون اى حجر او تسويف او تشوية لأفكار احدنا للأخر
تعالى عندنا دة شيوعى ودة رأسمالى ودة يسارى ودة اخوانجى ودة ابن تيت
طيب لية كل دة ما تتعاملوا مع الناس بأفعالها وفكرها وسيبكوا من المسميات والافكار لأنها حرية شخصية
للأسف انهارت الفكرةللدكتور اياد قبل ان تبدأ
تعرفى المشكلة اية يانوارة
احنا كمصريين فقدنا احترامنا لبعض وفقدنا قدرتنا على امتصاص افكار الاخرين واستيعابها دون هضمها يعنى مش ضرورى اوافقك عشان احبك ومش ضرورى اعمل حجر على فكرك عشان احترمك واقدرك وفنفس الوقت من حقى لو بحبك انصحك بس واتوقف عند النصيحة دون الخوض فى خطأك
اذا اقتنعت برأى أشارك مشاركة فعالة واهتم واعبر عن رأأي بصراحة واتحمل مسئولية افعالى وطبعا العكس بيحصل تماما
وللأسف حكومتنا ضالعة فى عالم العبط والثقافة الضحلة وقتل بل وأد العقول المفكرة ويبقى اسلوب كبر دماغك وأقلب الطاسة وعيش هوة اللى ماشى
كمان ثقافتنا بقت ضحلة وقليل جدا من الناس تلاقية بناقشك فكتاب او بيردد لك ابيات شعر تأكيدا على كلامة
عقول ضحلة سيئة التركيب
المغزى من كلامى كلة اننا فى زمن مجنون الوحدة فية عبادة
دة حتى يابنتى التدوين اللى اتسمى تدوين عشان الناس تعبر فية عن افكارها وتكتب قناعاتها الشخصية واستفيد من تجربتك وتستفيدى من تجربتى بقى مساحة للمهاترات والشتائم وزج انوف الاخرين فى افكارنا بدون وجة حق
وناس مش عارفة ان الكتابة فن وفكر واسلوب مش فارقة العامى من العربى الفصيح قد مافارق المحتوى وظهر بيننا اللى عاملين نفسهم صحفيين وهمة ميساووش اكتر من كلماتهم الركيكة وشتائمهم اللى بلا مبرر
تلاقى واحد يقولك يامطلقة هههههه
وهوة مش قادر يفهم ان قرار الطلاق دة قرار شخصى جدا ومحترم جدا لأنسانة قررت انها متكدبش على نفسها ولا على غيرهاواختارت ابغض الحلال ودة قرار شخصى جدا وميحقش لحد انة يعتبرة سبة او تتوصم بية بس تعملى اية فالجهل بقىهههههه وكأنها سبة وعيب ولايرجع لما يفضى جعبتة القذرة من الشتائم يقول ياللى ابوكى عمل وامك قالت
طيب انت بتنتقدنى انا مال ابويا وامى ياعم خليك قدى وانتقد فكرى كلامى اسلوبى ولا الظاهر انك مش فاهم اصلا انا بقول اية ههههههههه
دة نوعية مبتبقاش فاهمه اساسا انها بتيشتم نفسها لأنها ببساطة أضعف واقل ثقافة وفكر من انها تهاجم او تنتقد بطريقة محترمة فبتهاجم بطريقة النسوان الجهلة اللى مبيفكوش الخط اللى قاعدين على باب الحارة بيلطموا الخدود ويشقوا الجيوب ماهم جهلة ومعندهمش طريقة للتعبير عن الغضب والرفض الا دى
ولسة بعد كل دة بتدورى على حد عاقل
نوارة
كملى قراية كتابك وقومى اشربى فنجان قهوة ومتفتحيش ريدر ولا جايكو تانى هههههههههه

Blue Bird said...

كل سنه وانت طيبه يا نواره
حقيقي فعلا محتاجين نسمع حسن نصر الله ، وعلي فكره يا نواره الجنرال عون كمان بيعمل منطق عالي ، لكن السيد حسن نصر الله ، كلام وفعل ، زكل سنه وهو طيب وكل المقاومه في لبنان واي مكان من العالم بخير.

doaa said...

كل سنة وانت طيبة يا نوارة

وبعدين 6000 وظيفة حلوين قوي

يعني الست تعمل ايه يعني ما هو بالدور

ولا عايز الناس تموت بعض زي بتوع المعاشات