Monday 1 December 2008

يا بابي باحبك

اكيد اكيد انا مش من متابعي الاج اجك، بس امبارح شفت الحلقة اللي كان فيها احمد الفيشاوي بيعلن عن اعترافه ببنته اللي هي بنته واللي المحكمة حكمت انها بنته
الحقيقة انا كنت من الناس اللي تعايشوا مع القضية عن قرب، قبل القضية ما كنتش اعرف هند ولا والدها ووالدتها الافاضل، بس لما الموضوع اتنشر في الجرايد وكاي انسان عنده كومن سنس عرفت ان اكيد هند مرات احمد والبيبي ابنه، كانت هند لسة حامل، وكانت اياميها عبارة عن فتلة طالع لها كلكيعة، كل الحوامل يتخنوا ودي كانت عمالة تخس تخس تخس تخس تخس تخس، وجايبة كتب لتربية الاطفال وعلم نفس الطفل وعمالة تذاكر فيها كأن الولادة دي ح تبقى مناقشة الدكتوراه، واتشرفت اياميها بمعرفتها ومعرفة والدها ووالدتها، والحقيقة والدها بهرني، لاننا كنا في موقف ينفع يتقارن بيه اب زي احمد الفيشاوي واب زي ابو هند الحناوي، طبيعي ان الامهات بيحسوا بولادهم، بس نو اوفنس يا شباب والد هند الدكتور حمدي الحناوي مش موديل راجل مصري خالص
وتخيل يا مواطن، مواطنة حامل حواليها كل المصايب دي، وبرضه ربنا كرمها بشوية خنازير يتكلموا عليها احقر كلام وفي التلفزيون، يقعد لهم في عينهم وعافيتهم يا قادر يا كريم، واساسا الحامل بتبقى حساسة وعياطها سهل،
في شريعة حامورابي، اللي يزعل ست حامل ويخليها تعيط بيتقتل
ياريت التشريع ده كان موجود عشان كنت اروح اتجوز دلوقت حالا وابقى حامل وكل يوم والتاني عند القاضي باعيط: جمال مبارك زعلني، هيئة المعونة الامريكية زعلتني، احمد نظيف زعلني، عبد الله كمان زعلني
والله تسع شهور ما كانوش ح يكفو كل اللي انا عايزة اعدمهم
وعشنا كلنا تلات سنين نكد في نكد، كل ما اروح ازورها ارجع معيطة، تخيل بقى انا بارجع معيطة هي وباباها وماماتها واخوها كانوا عاملين ازاي؟ الحمد لله لينا من اول ما اتولدت كانت عبارة عن احمد الفيشاوي صغير، لدرجة اننا لما حضرنا السبوع ام زينب انبرت واخدتني على جنب وقالت لي: والنبي يا نوارة ما تعرفيش نمرة احمد الفيشاوي؟ انا اكلمه انا واقول له يا اخويا ده البت كلها انت...دي ضناك يا حبيبي...ما ترميش ضناك عشان ربنا ما يخلصوش منك ومن صحتك انت لسة شاب
:))
ام زينب بقى
وتروح الايام وتيجي الايام وهند كل حياتها لينا، وتجبرنا كلنا اننا نبجلها ونوقرها وهي حتة زئردة قد عقله الصباع ونبقى قاعدين في حضرتها كأننا قاعدين في حضرة السيد مدير الامن: ماحدش يتكلم في القضية قدامها، وماحدش يغلط في ابوها قدامها! يا هند دي عندها تلات شهور! ايوة بيدخل في العقل الباطن، وبعدين تلبسها حالة السخطة وتقعد تكلمها: مس كده يا لولي...مس هو في العقل الباطن
مرة قالت لي: اسم الدلع لولي وللا لولو؟
- اي حاجة يا هند
- اي حاجة ازاي؟ كتب علم النفس بتقول لازم يبقى اسم الدلع واحد بس
لولي حلو يا هند
اوكيه...لولييييييي
بعد كل التعب ده، والشقا، مش لازم لولي تشوفني وانا باعيط، مش لازم لولي تسمع حاجة عن القضية، مش لازم لولي حد يغلط في باباها، ده باباها ولازم تحبه عشان ما تتعقدش
يا هند انت بتكلميها كأنها عندها تلاتين سنة، هي ح تفهم كل الرغي ده كله؟
ايوة عشان تتكلم بسرعة
وفعلا اتكلمت بسرعة على فكرة، ما شاء الله، بعد ده كله، الاستاذ احمد الفيشاوي عايز يشوف بنته واكتشف انها مالهاش ذنب

طيب طيب، انا مش ح اغلط، مش ح اغلط ومش ح افتكر كل الكلام اللي سم بدني انا شخصيا وحرق دمي فمابال صاحبة الشأن
بس بصراحة هند دي فعلا بنت ناس
وبنت ناس بالقوي، ابنت ناس في الدنيا
انا لو مكانها وكلمني وقال لي اشوف بنتي كنت قلت له حااااااااااااااضر
استناني يوم خمستاشر اغسطس الساعة واحدة الضهر على كوبري قصر النيل، في نصه بالظبط، اوعى تتحرك من مكانك
وبتقول له يا بابي باحبك
طيب يا ست لولي، ربنا يخليهولك ياختي

17 comments:

مواطن مصري said...

استناني يوم خمستاشر اغسطس الساعة واحدة الضهر على كوبري قصر النيل، في نصه بالظبط، اوعى تتحرك من مكانك


دة انتي مفتريةةة اوييييي

:))))

سبهللة said...

شفت الحلقة
ربنا يهديه
بس انا عندى سؤال
هى ام هند
الدكتورة اللى فى جامعة حلوان ست عاقلة كدة ورزينة؟؟
لو انتى اتكلمتى معاها وعارفاها كويس يا ريت تقولى لى

Unknown said...

ام هند ست عظيمة

TAFATEFO said...

مع ان مش منطقي يطلع مني تعليق بالمعنى ده

يخليهولك؟؟!!

يخليلك اللي فضح والدتك وأنكر نسبك وسوء ذكرك؟؟ يخليلك ايه؟؟ اللي قال على أمك انها كانت بتزني معاه .. وقال عليكي انك بنت زنا .. اللي هيخليكي طول عمرك لما تكبري وتروحي المدرسه مثار القيل والقال .. اللي هيخليكي تكرهي أمك وأبوكي في يوم من الأيام؟؟

أنا نفسي أفهم ازاي واحده تستأمن واحد زي ده على عرضها تاني؟؟ ازاااااااااي؟؟ لما يطلع كلب زي ده بالضحكه السمجه والابتسامه اللزجه ويقول انها بنتي

يا ترى بقى بتك يا فيشاوي .. جت من الحرام؟؟ يعني لو واحد قال لها في يوم أبوكي كذا .. وميكذبش لو قالها أبوكي كذا .. ترد تقول ايه؟؟ ما انت اللي قلت كدا

لو واحد قالها انتي بنتي كذا .. ترد تقول ايه .. أبوها اللي قال عليها كده

هند الحناوي .. اللي تستأمن على عرضها شئ زي ده تاني .. مش عارف تبقى ايه

حـنــّا السكران said...

معليش .. بالاّخر ما بيصحّ إلا الصحيح .. و هالبنت الجميلة بتستاهل انه الواحد يعود عن كل أخطاءه عشانها .. و أحمد بالاخر إنسان بيخطئ و بيصيب .. و الرجوع عن الخطأ فضيلة .و شجاعة .

TAFATEFO said...

اللي خلاكي تقولي انه باباكي يا لولي هانم .. أجرم في حقك قدر إجرام أبوكي في حقك

اللي طلعك في لقطه زي دي .. هو مجرد حيوان استغل براءة طفله

تاجروا بيكي ولوثوكي قبل ما تتولدي .. وتاجروا بيكي كمان بعد ما اتولدتي

Unknown said...

يا مصطفى
تبقى بتحب بنتها ومش عايزة البنت تتعقد
اي ضرر ح يلحق بلينا من جراء تعاملها مع ابوها ما يوازيش ابدا الاضرار اللي تلحق بيها لو كرهت ابوها
دي لو كرهت ابوها ممكن تطلع شاذة يابني انت عارف كده؟ كل الستات الشواذ بيكرهوا اباءهم
مدام جابتها للدنيا لازم تستحمل عشانها كل حاجة حتى لو على حساب رغبتها في الانتقام
مش ح تنتقم على حساب بنتها
بنت ناس والله

حنا السكران
امممممممم غلط اه
انا بس عايزة افهم ايه اللي كان مخليه يعمل كل الخرا ده لمدة تلات سنين؟ ياللا المسامح كريم
عشان البنت والله

TAFATEFO said...

انتقام؟؟

اللي هو حرمان أب من بنته

أب ......... من ....... بنته

لا تعليق

=-=-=-=-=-=-=-=-=-=-=-=-=-=-=-=-=

لو الفيشاوي الصغير خرج مع بنته في أي مكان .. الناس هتقول دي لينا بنت الفيشاوي وهند الحناوي اللي --------------- .. واللي هيلوم الناس يلوم الـ (شئ) قبله .. ويلوم اللي خلت ده يشوف دي

هو قال انها مش بنته .. وهو مش أمين على بنته .. ومش من حقه الحضانه

هي في يوم من الأيام هتعرف كل حاجه .. وهتكره أبوها .. وهتركه أمها اللي خلت اللي أنكر نسبها يرجع أبوها .. وهتكره كل لمسة ايد لمسهالها ومش هتبقى متأكده ايه دافعها .. وهتكره كل يوم قعدت معاه فيه .. وكل ساعه وكل لحظه كمان

كون امها تبعدها عن أبوها ومتجيبش سيرة أي حاجه حصلت .. هو ده الصح

انما ترجع الشئ ده .. يقعد مع اللي مش بنته ولا يمكن في يوم من الأيام تبقى بنته .. هو ده العته بعينه

وتستاهل عليه ان بنتها تكرهها في يوم من الأيام

TAFATEFO said...

لو كرهت ابوها ممكن تطلع شاذة --- انت عارف كده

أبوها!!!! مين أبوها؟؟!!


هو دلوقتي بس .. بقى أبوها .. ومش بمزاج لينا .. وهتكرهه .. لأنها لازم تكرهه

مواطن مصري said...

يا طفاطفيو ان الله غفور رحيم
و ربنا يهدي احمد الفيشاوييييي

مهما كنت عملت من المساوىء فربنا بيغفر للبشر

الصراحة انا احمد الفيشاوي احترمتة انو طلع امام الناس اعترف ب البنت

Unknown said...

يا مصطفى هو ابوها وهي بنته
والرابط اللي بينهم اقوى من اي احكام من ناس خارجية ولو كبرت وعرفت ان ابوها كان عايز يشوفها وامها رفضت هو ده اللي يخليها تكره امها
في النهاية هو رد اعتبار بنته
وهند رفعت قضية خلع وكسبتها وخلاص وهو كده في مصلحة البنت عشان تبقى الامور شكلها طبيعي
ثم ان هند طول ما ابو لينا ما كانش على صلة بيها كانت بتقول انا مش ح اتجوز لان لينا لها ظروف خاصة ولو خلفت طفل تاني ممكن البنت تتعقد من اخوها او اختها وتكرههم
لكن كده الوضع بيبقى طبيعي
والناس نساية بطبعها
لكن يبقى ابوها على قيد الحياة ما بيسألش عليها هي دي اللي حاجة تجرح البنت وتعيشها معقدة
اسمها لينا احمد الفيشاوي، واحمد الفيشاوي على قيد الحياة وممثل مشهور: طب مش بييجي يشوفني ليه؟
لكن دلوقت الوضع طبيعي
ان مامتها وباباها مطلقين وبابا بييجي يزورها
وبعدين هي بنته ومن حقه يستمتع بيها ايا كان اللي عمله
وما بين الطفل واهله عاطفة تدي مساحة للتسامح اكبر من اللي بين الناس وبعض
ثم ان ماحدش بيكره ابوه وامه يا مصطفى
الا اذا ابوه وامه دفعوه دفعا بالتعذيب او التصرفات الشاذه انه يكرههم
لكن الطبيعي ان الانسان بيحب ابوه وامه بالفطرة وبيتسامح معاهم

يا مواطن مصري

بس شفت البت كميلة ازاي؟ وشفت بتزعق له وتقول له: لو جيت ولقيت البيت متكركب ح ازعق لك
هههههههههه
وكل حاجة تقول لا لا لا
اول كلمة بتنطقها لا
هههههه
كانت هند بتشتكي من الحكاية دي بتقول لي البت اول كلمة نطقتها لا
الظاهر ح تطلع من احزاب المعارضة

Unknown said...

استناني يوم خمستاشر اغسطس الساعة واحدة الضهر على كوبري قصر النيل، في نصه بالظبط، اوعى تتحرك من مكانك

و يا تري يستني جنب "سمسم" و لا يقف بعيد عنه؟

عبد الزهراء المصري (علي الحسيني) said...

بسم الله الرحمن الرحيم
اللهم صلي على محمد وآل محمد وعجل فرجهم وألعن عدوهم

أزيك يانوارة ياأغلى مدونة في مجرة درب التبانة ؟؟
أزيكم ياأحلى مدونين وخيرة شباب مصر


بداية أنا شايف طبعاً إن أحمد الفيشاوي طبعاً غلطان الغلط أكيد معروف ومش لازم نتكام فيه لكن أنا وجهة نظري المتواضعة أنه فعلاً ممكن سكون نداء الأبوه جذب أحمد لأبنته وهو في الأول والأخر إنسان من لحم ودم وأكيد غلطته في حق أم لينا وبنته لينا نفسها ده بسبب طيش الشباب ولأنه زي ما أكيد واضح أنه مدلع وأنا مش بدافع عنه لكن بصراحة لما شفت في عينه الفرحة بلينا وربنا يهديه والناس إن شاء الله تنسى وياريت يحصل كده لأن مافي بيت خالي من المشاكل ، وتعيش البنت بقى بسلام وأمان ...

تسلم أيدك يانوارة البوست ده إنساني أوي



عبد الزهراء المصري
علي الحسيني

zahra said...

نوارة انا عندى تعليق بسيط قوى على كلمة انتى قولتيها
ان هند بنت ناس قوى
هو يعنى ايه بنت ناس دى
ما هو كل الناس ولاد ناس
و بعدين لو تقصدى ببنت الناس دى انها محترمة قوى فمعلش أنا آسفه
المحترمة بنت الناس متروحش تتجوز من ورا اهلها جواز عرفى ده مع افتراض حسن النية و انه كان فيه جواز عرفى
عارفه ان لينا ملهاش ذنب
بس مينفعش نطلع أمها بطلة قومية و نقول انها احسن واحده فى الدنيا

Unknown said...

الانسانة المحترمة هي اللي تتحمل نتيجة تصرافاتها وتواجه بشجاعة
وما تحكمش على الناس عشان تثبت لنفسها انها كويسة
كويس انك بتقولي انها هي اللي اتجوزت
من ورا اهلها من قدام اهلها دي حاجة متهيالي ما تخصش حد

زمان الوصل said...

لدىّ تعليق على هذه الجمله "وما تحكمش على الناس عشان تثبت لنفسها انها كويسة" ..
أصل الحقيقه دى مصادره على الرأى و فى حد ذاتها حكم على الناس و تدخّل فى نواياهم التى لا يعلمها إلاّ الله !!
فليس معنى انتقاد فعل لفلان أو علاّن أنّنا نفعل هذا لنثبت لأنفسنا إننّا كويّسين !! و كأن انتقاد الغير لا يثبت شئ سوى رغبتنا فى إثبات إنّنا كويّسين و ليس أن هؤلاء الغير قد يكونوا ارتكبوا خطأ فى حق أنفسهم أو فى حق غيرهم !! على كده يبقى جزء كبير من انتقاداتك للغير يمكن تصنيفها تحت نفس التفسير؟

النقد لا ينفى روعة و عظمة أن يعترف الإنسان بخطئه لكن هناك خطأ موازى فى اعتبار انتقاد الأخطاء مجرّد محاوله لإثبات أن من ينتقد غرضه فقط أن يثبت لنفسه إنّه كويّس !! الموقف ده فيه شبه غريب -وياللغرابه- بموقف من يهاجمون المحجّبات و يعتبروهن بيلبسوا الحجاب و يدعوا غيرهنّ له فقط ليثبتوا لنفسهم و لغيرهم أنّهم الأحسن !!

mohra said...

بغض النظر عن موضوع احمد الفيشاوى و هند انا متفقه مع رأى زمان الوصل...المدونات اساسها الحريه و انتى اكتر واحده بتدافعى عن الحق فى اختلاف الرأى