مبروك
المحكمة الإدارية أبطلت قرار رئيس الجمهورية بإحالة المهندسين والأطباء وأساتذة الجامعة ورجال الأعمال الوطنيين
اللي مش بيفتحوا مصانع خمرة ولا بيحتكروا الحديد والصلب
إلى محكمة عسكرية
الأستاذ أحمد حلمي قال لي إن الحكم كويس بس الحكومة تقدر تبطل الحكم بإبطال القرار
النهاردة المحامين ومن ضمنهم أحمد حلمي زاروا منعم وزملاءه
اللي منهم شباب سبعتاشر سنة
الشباب دول
اللي هم خيرة شباب مصر بجد
محبوسين في المحكوم مع تجار المخدرات اللي بيتحرشوا بيهم جنسيا
محبوسين 23 نفر في زنزانة واحدة مع الجنائيين
زنزانة مش عنبر
والزنزانة مليانة طبعا جرب وقرف وأمراض منها الإيدز مثلا ده غير الحشرات والزواحف
منعم وزملاؤه أعلنوا الاضراب عن الطعام
النهاردة وانا داخلة التلفزيون شفت تمثال عبد الناصر
اللي انا ما بحبوش
بس وانا داخلة الشغل عشان اجدد الباسبور بتاعي
افتكرت: عايز عربية بالقسط ..من الشغل...عايز شقة بالقسط..من الشغل...عايز مصيف...من الشغل
انت بتشتغل عند الحكومة وما حدش يقدر يذلك
ان فاتك الميري اتمرغ في ترابه
وافتكرت برضه مخاوف الزملاء بإننا نتباع بعد ما اتباع جزء مننا
بصيت لتمثاله وقلت له: ايام دلعك في الموظفين والعمال والفلاحين راحت يا ابو خالد
ما فضلش من زمنك غير التعذيب الوحشي
وسبحان الله...رحت اتصور صورة فورية لقيت صورة السادات...اللي طبعا ما حدش في مصر ما يعرفش برضه
انا باكرهه كراهية شخصية قد ايه
بس برضه لقيت نفسي باقول: الا ايامك يا راجل يا انتيكة صحيح اللي يتنفس كان في السجن لكن الشهادة لله
كل الاحترام كان يحظى به وجه المواطن وقفاه
ده غير التبجيل الذي يصل إلى حد التقديس والتنزيه لمؤخرة المواطن الكريمة
وكان اعضاء سجناء الرأي اللي انت افتتحته بينعموا ببطاطين نضيفة وسراير زي الفل وزيارات ومعاملة خمس نجوم
حتى الظابط المصري أيامك كان لا يتقن القسوة
كان طيب بجد...بشهادة كل اللي اتسجنوا وعلى رأسهم امي وابويا
راحت الايام دي يا انور
وما فضلش من زمنك غير الفساد والخيانة
هو احنا اللي بنعمل الزمن وللا الزمن هو اللي بيعملنا؟
بكرة نلاقي نفسنا بنترحم على أبو جهل وأبو لهب
وللا بكرة ليه؟
هو أبو جهل عمره هتك عرض مواطن؟
هو أبو لهب مهما عذب
كان يهون عليه شباب زي الفل من سن سبعتاشر سنة لسن سبعة وعشرين
هم انضف ما جابت البطن المصرية
يناموا مع الفيران ويتحطوا مع تجار المخدرات عشان يتحرشوا بيهم جنسيا؟
في البوست اللي فات كنت باقول اذكر تلات حاجات ايجابية في بلدك
منعم وزملاؤه حاجة من الحاجات دي
الخوف بقى
ان يجي يوم نبص لصورة مبارك ونقول...راحت الايام دي
وللا هو مافيش اوحش من كده؟
لا فيه والنبي
مصيبة لبعد بيع البلد حتة حتة
يبيعونا احنا
ونلاقي نفسنا واقفين ع الاوكشن: عبد قوي...أمة تجيد الرقص والغناء
ويغيروا لنا اسامينا...ويبقى رجالتنا اسمهم مسرور ونسوانا اسمهم مبروكة
الا بقى المدونين
مش ح يبقى لنا سوق يا اخوانا بلسانا اللي زي الفرقلة ده
الحقوا الستات تتعلم الرقص والغنا والرجالة تشيل كوزين اسمنت
عشان حد يرضى يشترينا وللا بقى ح نلاقي: من يشتري الأمة نوارة
تجيد السب والخناق ولسانها زي الكرباج
سلطها على عدوينك
من يشتري العبد وائل عباس لدغته والقبر استخدمه في فضح جيرانك وكل من يغيظك
من يشتري العبد جيمي يسب بسرعة مائة دين في الثانية
من يشتري طهقانة تشعرك بقيمة مراتك
من يشتري شهروزة لسانها زي المبرد
من يشتري الشرقاوي بدلا من شراء الشخارة بالكهرباء
من يشتري مريم تجيب لك اكتئاب
من يشتري نهى محمود تتفلسف عليك وتحسسك بضحالتك
من يشتري مالك احسن واحد تستعين بيه لما تحب تطلع تلاتين واحد وتندمه على اليوم اللي اتولد فيه
من يشتري الحاج جرجس عشان يفرسك
من يشتري ميت يجيب لك اخبار زي وشك
من يشتري زنزانة تفقسك من نظرة وتشرد لاهلك
من يشتري
من يشتري
من يشتري
حد ح يرضى يشترينا؟
وللا النخاس ح يبلنا ويشرب ميتنا؟
وللا يدبحنا ويشرب دمنا؟
11 comments:
اظن يا نوارة ان مفيش اوحش من الي احنا فيه ده..و لو لا قدر الله طلع فيه أوحش من كده أكيد هنتحر قبل ما يحصل الي قولتيه ده؟؟؟و ماظونش ساعتها الانتحار هيبقى شرك بالله...و لا هيبقى شرك؟؟
الله أعلم
بس أي شئ أهون من الواحد يعيش في سواد أكتر من كده..
بس انتي نسيتي تقولي في الاعلان عني اني لمل أجيب اكتئاب عندي أوبشن اخر اني أمشي الاكتئاب ده بس ابجني يا معلم ههههههههههههههههههههه
هاموت يا ولاد ستين فى سبعين
اللوز هاتقتلنى
قالها يوما أحد أصدقائي وصدمني عندما قال إنه بكرة سيأتي يوم نترحم فيه على أيام حسني مبارك... والمصيبة أن كلامه صحيح بالفعل فحسني على كل سوءاته إلا أنه راجل عسكري ومنضبط (بحكم العسكرية) وراجل فاهم تاريخ كويس (بحكم سنه فالراجل أصغر من الملك فاروق بتمان سنين بس) وفاهم سياسة دولية بحكم إنه خلل في برميل الطرشي السياسي سنوات هذا عددها... قارني ده بقى بالأستاذ اللي جاي (أو غيره) هتلاقي ضحالة في فهم التاريخ أو السياسة أو الانضباط العسكري أو دواعي الأمن القومي أو أي حنكة من أي نوع... فرق كبير أوي بين واحد فاهم وبيستعبط فبتحصل بلاوي وكوارث وواحد أبيض من مجاميعه في كل شيء فتترحمي ساعتها على عهد الفاهم اللي بيستعبط... المهم سيبك إنتي هو سعر النفر فينا حاليا وصل كام؟ يقال إن المدونين بالذات سعرهم واقع في سوق النخاسة الوطني ومالهمشي دية... سلام بعد إذنك أروح ألعب بعصاية الغلية وكوزين الأسمنت
مرَاقِبْ مِصْرِي
انا اعترض على كلمة رجل
نوارة
بما ان المدونيين هيتباعوا فى سوق العبيد
طب انا وزنى 145 كيلو هلاقى حد يرضى يشترينى ويقدر على اكلى ولا اروح لابويا واحب على ايده واشكره انه بقاله سنيين عمال ياكلنى
سعادتك بعد قرار المحكمة ده ممكن القاضى هوا اللى يتحول للقضاء العسكرى بتهمة محاولة تغيير ارادة الرئيس
بقولك ايه الامير اللى هيشتريكى وحياة ابوكى عامليه كويس
وبلاش تقرى البوست بتاع ايوه خدامة النهاردة
مش هينفعك خالص مع الامير اللى هيشتريكى
القاضي هيتحول لمحاكمة عسكرية
وهما هيستأنفوا الحكم ويوقفوه
كلها حركات وإشتغالات
وبعدين إحنا مش هنترحم علي أيام مبارك ولا حاجة
ما هو قاعد ... هو يعني هيروح فين
أنا جيت الدنيا وهو بيحكم وشكلي همشي وهو لسه بيحكم
لو الله مقرر ياخدوه ما بظن كان مخليه
تحياتي
عزيزتي نواره
والله التغيير قادم والامل جاي
بجد خلاص الشباب دول هما اللي هيغيروا البلد دي
الحمد لله البت نواره معرضتنيش للبيع
بس لو كانت عملت ده
بالتأكيد ومن سابق معرفتى بلسانها عليه السلام كانت هاتقول
واحد مدعى إنه مدون فشل رغما عنه أن يحتكر الحديد وفشل فى إغراق ما وقع تحت يديه من عبارات وعجز عن أن ينضم للجنة السياسات ومابيقولش لأى رئيس يا أونكل وهو فى الحقيقة شوارعى وبياكل كشرى وكبده هوهو وبيحب التريقه زى عينيه حتى على نفسه
يجيد العربية بطلاقة عجيبة رغم إنه أخرس بيرسم من غلبه وبيحب يشتم مصر علنى رغم إنه بينه وبينها علاقة آثمة قديمة
اشتريه يمكن تحب تألس على حكومة بنت كلب
وممكن نواره تعمل علينا عرض تقولك اشترى أى مدون تاخذ جيمى عليه هدية
بعد مايشيل اللوز
الله يخرب بيت جيمى و سنين جيمى
محسسنى انكوا لقيتوا جيمى دة فى كيس كاراتيه
بعد اذن حضرتك أنا عملت رابط لمدونتك عندى فى المدونة فى (أطالعهم)و
امبارح كنت بقلب كده في قنوات الوصلة
لقيت فيلم الكرنك
طبعا مراتي اصرت تتفرج عليه رغم انه بيجبلها اكتئاب بلدي
بس تقولوا ايه ناس غاوية نكد
المهم في مشهد قبل النهاية بشوية
سعاد حسني بتقول لنور الشريف
مش ممكن حيحصلنا اوحش من اللي حصل
بس بقه
مراتي قعدت تضحك وتقهقه ولا الافلام الكوميدي وتبصلي وتضحك تاني
قلت في عقل بالي دي عبيطة ديه ولا ايه؟؟
مش ده اللي كان بيجبلها إكتئاب
هو ليه قلب علي كوميدي وفرفشه
ربنا يخليهملك يا ابو جيمي
ضحكتنا علي اللي كان بيعيطنا
سؤال للاخ جيمي
هو موضوع كيس الكارتية ده بجد
اصل الود عمر ابني بيحب الكارتية
وملاحظ عليه كده من كام يوم قلة ادب مش طبيعية ولسانه طويل
يمكن كل شيئ جايز
شفاك الله وعفاك يا باشا من اللوز
بس ماظنيش انها حتقتلك دا انتي ممكن تطلع مي....ولا خليني مؤدب
Post a Comment