ماذا تفعل لو كنت حرامي

تحديث:
لقد فقعنا في الوخ.. زكريا عزمي خرج بكفالة ميتين الف جنيه
كده بانت خلاص يا شباب
احنا نازلين الجمعة 20 مايو.. انتوا مش نازلين؟ انا نازلة لوحدي

تحديث:
تم التصديق على الحكم على عمرو البحيري بخمس سنين
انزل على ركبك
لا مش حننزل على ركبنا... ومصر مش مومس عشان تبقى المحاكمات ضد الفاسدين هي اللي بتقطع عيشها.. لو محاكمة الفاسدين حتقطع عيشها، يبقى عيشها كان حرام، وربنا يرزقها من الحلال مدام تابت توبة نصوحة


تحديث:
جمعة رفض الاعتذار 20 مايو... كله اتند وهات معاك 10 وانت جاي 
تحديث:
اخلاء سبيل سوزان مبارك مقابل 24 مليون جنيه.. جنيه... جنيييييه
دول تاخدوهم تشربوا بيهم بتوع الكسب المشروع شاي.. واحنا حننزل مليونية نلم لها تبرعات مدام طلعت غلبانة وفقيرة
احنا اتاكلنا على قفااااااااااااانااااااااااااااااااااااا
يا مصريين احنا اتاكلنااااااااااااااااااااااااااااااااا على قفااااااااااااااااااااااناااااااااااااااااااااا
تحديث:
على فكرة.. احنا لو فضلنا في التوتر ده انا حادخل العناية المركزة، والشعب مش حيبقى له نبض عشان كل شوية تجسوه، ورجالة مصر.... عليه العوض ومنه العوض فيهم.. انا عارفة، مبارك طول عمره بيغير منهم عشان عنده مشاكل
جهاز الكسب غير المشروع افرج عن سوزان مقابل التنازل عن فلوسها؟ واللي برة؟ 
طيب ومبارك اللي عايز يتنازل عن "املاكه" بروح اهله عشان ياخد اخلاء سبيل هو كمان، طيب وجرائم القتل
مش حينفع كده.. مش حينفع، اساسا كده كده احنا حناخد الفلوس دي، قانون ايه ده اللي بيخلي الناس ترجع الفلوس اللي سرقتها وتطلع تبرطع في الشارع؟
وبعديييييييييييييييييييييييين
قلنا لكم رقبتنا سدادة.. عايزين كام؟



تحديث:
الجزيرة: معلومات مؤكدة عن ضغوط كبيرة من دول الخليج لاطلاق سراح مبارك
طيب يا شباب
البلد محتاجانا
يا مجلسنا العسكري... ما تمشيش ورا دول الخليج
عايزين كام؟ 
مطلوب بشكل عاجل:
المصريين في الخارج.. تدوا نني عينيكم لمصر
المصريين في الداخل.. تجوع عيالك عشان مصر
حنعمل حملة تبرعات لانقاذ الاقتصاد المصري... وفكك من دول الخليج وحاكم لنا مبارك
كام واحد رقبته سدادة؟ جربونا تعرفونا
تحديث:
هاه... يا مسهل

واحنا في انتظار خبر نفي التسجيل الصوتي لمبارك، او خبر قبول اعتذار مبارك او اساسا فكرة انه ممكن يعتذر
وحنرن لكم الشروق علقة معتبرة... هو احنا عايزين نخرب البيت يعني؟ 
واحنا عشرين مليون نزلوا في الثورة، كل واحد فيهم كان مستعد يموت عشان مصر، عندكم ازمة اقتصادية؟ عايزين كام؟ عايزين كام من الاخر كده؟ 
المصريين اللي في الخارج، اللي حيصوتوا طبعا زي ما كلنا عارفين، عايزين يعوضوا انهم ما شاركوش في الثورة، ومستعدين يشحتوا على مصر بربابة
والا انا نتذل لرجال اعمال والامارات والسعودية.. رقبتنا سدادة.. بس راعونا، احنا ام العيال برضه وحننفعكم، ماحدش حينفعكم غيرنا وربنا
وربنا كمان مرة ما حد حينفعكم غيرنا.. وقلبنا ابيض وبنعمل كل حاجة وفول اوبشن، بس ما تطلعوش زعابيبنا عشان احنا فينا اللي مكفينا
اشترونا تكسبوا... ده احنا نسوى وزننا الماظ والله العظيم، اشترونا وبيعوا مبارك واحنا من بكرة... مم بكنة الصمح.. نلم لكم الفلوس اللي انتوا محتاجينها
بس قولوا بس عايزين كام؟
----------------
تحسس وتعتذر

انا موافقة ان مبارك يعتذر لنا ويرجع الفلوس - اللي هم نص ترليون يا حرامي مش 145 مليون بروح اهلك - شريطة ان كل حرامي في السجن بالذات النشالين وهجامين البيوت والحرامية الغلابة دول، يدفعوا اللي عليهم - واتخن واحد فيهم يعني سارق سبعتلاف تلتمية اتنين وعشرين جنيه - ويكتبوا جواب اعتذار ويخرجوا من السجن حالا، ومش بس كده، والشوية اللي قضوها في السجن تتخصم من الفلوس اللي حيدفعوها

بس ده بالنسبة لقضية السرقة فقط

نمسك بقى المصابين

المصابين يتعالجوا على حساب مبارك الخاص، بعد ما يرجع الفلوس اللي عليه، ومبارك وسوزان على رأي الصحف الاسرائيلية "يتنازلوا عن ايه؟ هي كانت فلوسهم؟" ده اسرائيل اللي بتقول كده، صعبنا على الكافر. بعد ما يتنازلوا لنا عن فلوسنا، يعالجوا بقى المصابين على حسابهم من فلوسهم هم، ويدفعوا لهم تعويضات من فلوسهم هم.

كده خلصنا المصابين

نيجي بقى للقتلا

اااااه... بما ان مبارك فاكر نفسه ربنا، وفاكر نفسه فوق المحاسبة، اوكيه، يثبت لنا انه ربنا وانه فوق المحاسبة.... يحيي اللي ماتوا.

وبما انه صاحب معجزات وابو خطوة.. اكيد حيحيي لنا اللي ماتوا

خلاص كده اللي ماتوا؟

اللي اتسرطنوا بقى

ارتفاع الاصابة بالسرطان بنسبة اربعين في المية في الخمستاشر سنة اللي فاتوا

قدامه الحلول الاتية

يعالج اللي اتصابوا بالسرطان برة مصر على حسابه - زي ما هو كان بيتعالج برة مصر على حسابنا - واللي ماتوا بالسرطان يحييهم - ماهو ربنا بقى 

او.. بما انه راجل مبروك، يحط ايده على مرضى السرطان ويرقيهم والرقوة تجيب نتيجة وتشفيهم

وكذلك يحيي لنا اللي ماتوا في العبارة - ايوة... عبارة من اللي بيغرقوا دول

واللي ماتوا تحت صخرة الدويقة

واللي انضربوا في الصعيد بالنار واخدوا بصمات الجثث وفتحوا التحقيق - في التمانينيات والتسعينات عشان قالوا بس انه كان كويس واخر عشر سنين بس اللي عك فيهم.. هع

ويرجع للصعيد نفسه اللي اتكسرت

ويكلم اصحابه اللي باع لهم غازنا ببلاش يرجعوا لنا الفلوس على الاقل وبلاش يرجعوا الغاز

ويرجع لنا العمولات اللي كان بياخدها على كل بير بترول مصري بيتصدر

بالنوسبة للفضيحة بتاعة غزة... فاكرين؟ ايام ما الاطفال كانوا بيتحرقوا والناس اكلت وشنا.. احنا عايزينه يعوضنا عن الفضيحة دي، يدفع لنا فلوس مثلا تعويضات على ان الناس كانت بتتف في وشنا عالميا، ويتظاهروا قدام سفارتنا لما انا شخصيا كنت حاموت كمدا

بالنوسبة لفضيحة الجزائر.. اللي وصلت ان واحد صاحبي بعد موضوع الجزائر ده كان في لبنان وبقى يتكلم لهجة خليجي عشان الناس ما تعرفش انه مصري، وواحد صاحبي تاني كان في المغرب - اللي اساسا متخانقين مع الجزائر - وبقى يتكلم فرنساوي عشان الناس ما تعرفش انه مصري من كتر ماهو مكسوف وخايف الناس تمسح بيه البلاط

ولا هو فاكرنا زي شوية المرتزقة اللي حواليه؟ ولا هو فاكرنا زيه وكل همنا الفلوس ومبدأنا في الحياة زيه لما قالوا له السودانيين بيشتموك قالهم "هي الشتيمة بتلزق"؟ 

فيه حاجة يبدو ان لا هو ولا دلاديله ولا حتى القوات المسلحة واخدين بالهم منها:

احنا شعب اليط بطبعه، وعريان الـ... ويتأمز تأميز ويقول باب الخمارة فين، واقرع ونزهي... والثورة دي كانت عشان كرامتنا واجعانا... مش عشان جعانين، عادي، الجوع بيتقضى، كرامتنا هي اللي مش بتتقضى

وبمناسبة كرامتنا، حيعمل ايه في اللي دخلوا الاقسام بشرفهم خرجوا متمرطين؟

وبمناسبة السودان، حيعمل ايه في تقسيم السودان اللي لولاه ولولا عمر سليمان ما كانش جرا لها اللي جرالها؟ ولا هو فاكر اننا حلاليف زيه ومش سائلين في اللي حوالينا؟ ولا هو ناسي ان السودان بالنسبة لنا ايه واحساسنا بيها ايه؟

"ومصر الرياض وسودانها عيون الرياض وخلجانها، وما هو ماء ولكنه وريد الحياة وشريانها، تتمم مصر ينابيعه كما تمم العين إنسانها"

وبمناسبة ينابيعه... حيرجع لنا المية اللي باعها وخلانا دلوقت متوقعين في عرض اثيوبيا ازاي؟ خلاص... المية ترجع لنا من غير ما نتوقع في عرض اثيوبيا واحنا نسامحه.

لما امبارح كنت في الندوة بتاعة القوات المسلحة، عاملين البرزنتيشن وحاطين كل اسباب الثورة... الا السبب الرئيسي: كرامتنا.

طب وربنا.. وربنا.. وربنا كمان مرة، تلاتة بالله العظيم تلاتة بالله العظيم تلاتة بالله العظيم، قسما بأغلظ الايمان، يمين احاسب عليه امام الله، ان السبب الرئيسي اللي قوم الثورة دي هو كرامتنا

واللي مش مصدقني يقول لي ايه تفسير الآتي:

يوم 25 اول ما الناس اتجمعت في الميدان الهتاف الاول قبل الشعب يريد اسقاط النظام كان:

لسه فيكي رجالة يا مصر.. لسه فيكي رجالة يا مصر

بكام دي يا مبارك؟ بكام انك خصيتنا وحسست رجالتنا اللي اهيف واحد فيهم ضفره برقبة عشرة منك انهم مش رجالة، ولما اكتشفوا انهم رجالة قعدوا يعيطوا؟ 

يوم 28 يناير.. كربلاء المصرية:

بعد ما ضربنا الامن في ميدان الدقي بقينا ماشيين ناحية كوبري قصر النيل والهتاف كان: قنابل على مين ده احنا المصريين.

بكام دي يا مبارك؟ بكام انك كسفتنا من اننا مصريين وبقينا بندور جوة نفسنا على اي حاجة عشان نرجع ثقتنا في نفسنا؟

بكام الشباب اللي كان ماشي صف ناحية الرصاص عشان يثبت للعالم انهم رجالة، ولما الضرب يزيد والشباب غصب عنهم يجروا البنات تتقدم عشان تنغز الشباب في نخوتهم وما كانش ناقص غير يغنوا: يا قوم الام وحتام ان تقبلوا نعانق ونفرش النمارق

واول ما نلاقيهم بيجروا نقف صف وايدينا في ايدين بعض واحنا عمالين نصرخ فيهم: ما تجروووووش ما تجروووووش لو جريتوا احنا حنتقدم... ونروح ماشيين كلنا - كل الستات والبنات، بلا اي اتفاق والله العظيم بنفس الخطوة كأننا فرقة رضا - ناحية الرصاص، يروحوا راجعين الشباب على الرصاص فورا

موتنا رجالتنا الله يخرب بيتك... موتناهم عشان نشوفهم رجالة

كل الدم ده نزف عشان كرامتنا واجعانا وعايزين نثبت لنفسنا اننا عندنا رجالة.. وكان ممكن الشباب يجري وينفد بعمره، بس كرامتهم كانت اهم من حياتهم

يوم 2 فبراير بعد هزيمة بلطجية مبارك كان الهتاف:

ارفع راسك فوووق انت مصري

بكام دي يا مبارك؟ بكام انك نكست راسنا وكسرت نفسنا، ولما اكتشفنا اننا جدعان قوي، شباب وبنات، بقينا نصرخ للعالم ونقولهم: احنا رفعنا راسنا؟

يوم 11 فبراير كان الهتاف:

اهم اهم اهم.. المصريين اهم

ايه يا راجل.. ايه راجل؟ ايه يا راااااااااااااجل؟ يخرب بيت امك يا شيخ

يخرب بيت امككككك... خليت الشباب يموت نفسه عشان عايز يتأكد انه لسه راجل، خليت ستات مصر تزق رجالتها في النار عشان يشوفوهم رجالة... يخرب بيت امك

تسوى كام دي؟ 

واخدين بالكم يا قواتنا المسلحة؟

واخدين بالكم؟ احنا عملنا اللي انتوا حلفتوا يمين عشان تعملوه وما عملتوهوش.. احنا برينا بقسمكم بدالكم عشان ما يتقالش ان مصر مافيهاش رجالة

واخرتها... مدخلين لمبارك في سجنه مسجل وبتقولوا لنا سامحوه

كتر خيرنا اننا سامحناكم وانتوا بتتفرجوا علينا واحنا بننضرب يوم اتنين فبراير وانتوا ما اتدخلتوش... ما تسكتوا بقى وتبطلوا تحربوا على خرابها؟ هو لوي دراع ولا ايه؟

فتنة طائفية

فلتان امني

ازمة سولار

تهديد بكارثة اقتصادية

والمشهد الاخير: مبارك عايز يعتذر ويرجع الفلوس

لا والنبي؟

لا والنبيييييي

وبعديييييييييييييييين وبعديييييييييييييييييييين... للصبر حدوووووود 

يعني احنا جزاتنا اننا عملنا عبط؟ ادي اخرة الدلع، فضلنا نبوس ونطبطب ونحايل ونهشتك والجيش والشعب ايد واحدة، ومعلش، انزلوا لهم في مليونية عشان ترفعوا عنهم الحرج، ومعلش، ما حموناش يوم 2 فبراير ماهم كتر خيرهم جالهم امر يقتلونا وما قتلوناش، ومعلش فضونا بالقوة اصلهم ملبوخين، ومعلش ومعلش ومعلش

وبعدين.. وبعدييييين.. اتقي شر الحليم

هي حصلت؟ 

دي اخرتها؟ هو فيه كده يا ناس؟ ده انا كنت باكتب للناس في المدونة: احنا نازلين وفيه تهديدات من قناصة انهم يضربوا على قواتنا المسلحة، والعيال يكتبوا لي في التعليق: احنا نحمي قواتنا المسلحة بارواحنا، ونموت كلنا قبل ما حد فيهم يتخدش

ونحل لكم امن الدولة بايدنا وانتوا واقفين تتفرجوا على قناصتهم وهم بيضربونا ونخش نجيب لكم الوثائق ونسلمها لكم

ونأمن لكم البلد بايدينا ونعمل لجان شعبية واللي نظبطه نقبض عليه ونسلمه لكم

ونقف لكم قدام السعودية والامارات واسرائيل بنفسنا وننزل لكم مليونية ودماغنا تتقور في الشمس عشان نرفع عنكم الحرج ونجيب لكم مبارك تحاكموه

ونمسح ونكنس ونطبخ ونغسل ونعصر وننشر ونكوي ونطبق الهدوم ونستفها في الدواليب ونقول لكم: تسلم يا سيد الرجالة.. الله

الله..

جرا ايه بقى؟

جرا ايه؟

ما تلايموها بقى، ده كتييييير.. كتييييييييييييير، كده اووووووووووووووفرررررررررررررر

انا مش عايزة اسمع حس الموكوس ده في اي تسجيل صوتي

مش عايزة اسمع نفسه

والا بقى اللي دخل له التسجيل في سجنه واللي سرب له التسجيل واللي نشر له التسجيل وهو في السجن ومش قانوني انه يسجل اي حاجة ويأثر على مجريات التحقيق كلهم يتجابوا بقى

كلهم يتجابوا... اي واحد متورط في تسريب تسجيل صوتي لمبارك وهو قيد التحقيق للتأثير على مجرى القانون يتجاب مهما علا شأنه، ويتحاكم، والمحاكمة بقى تجيب محاكمة ويتفتح كل اللي احنا عاملين عبط عليه

قلتوا ايه؟

عقلكوا في راسكوا تعرفوا خلاصكوا... انا مستنية تكذيب بقى لموضوع اعتذار مبارك ده، وما عندناش مانع نتخانق مع الشروق ونقول لها يا كدابة يا كدابة يا ثورة مضادة.. وهي مش حتزعل.. هاه؟ فيه اكتر من كده؟ 

يا تطلقوا مبارك يا تطلقونا... انما تتجوزوا علينا وكمان نصرف عليكم وعليه؟ 

وبالمناسبة بقى طلعوا لنا الـ186 عيل اللي انتوا عايزين تحبسوهم عشان اسرائيل

ايه يا اخواتي ده؟ ده ولا كأن مبارك لسه بيحكم

القوافل تتمنع

واللي يتظاهر قدام سفارة اسرائيل يتحبس

الله الله الله

هي بقت كده؟ 

طااااب بقى.. احنا نازلين يوم 27 مايو الجاي، وحناخد في ايدنا الجرحى باهاليهم، واهالي الشهدا كلهم، واصحابهم وقرايبهم وجيرانهم، شوفوا بقى يعملوا كام دول

ان كان شعبك عسل ما تلحسوش كله.. 

احنا صبرنا عليكوا كتير، حقنا راجع في التحرير

بالنوسبة لبتوع سيبنا بقى من غزة

ااااااااااااااااه، وكأن جريمة نجع حمادي جات لهم نجدة من السما، اي والله، ماهو انا لما باشك انا عارفة ان قلبي قلب خساية

طب احضرونا يا بهوات وسيدات ويا انسات

وكتاب الله المجيد، وكتاب الله المجيد، وللا اعدم تامر امين ان بتوع الشأن الداخلي دولم ما بنشوف خلقة اهاليهم في ايتها قضية في الشأن الداخلي، لا شفنا وشهم في كفر العلو، ولا عملوا حاجة في الاضرابات، ولا شفنا وشهم في القرصاية، ولا شفنا وشهم في الضرايب العقارية، ولا شفنا وشهم في العبارة، ولا شفنا وشهم في قضايا الفلاحين، ولا شفنا وشهم في اعتصامات العمال، ولا شفنا وشهم الدويقة

(وانا بادور على اللنكات اكتشفت ان بعض من شقى عمري طار، فيديوهات القرصاية والضرايب العقارية وخلافه من ايام ما المدونة الاولانية خالص انتحرت)

ابدا ابدا ابدا، ما بنشوفش وشهم غير في القضايا اللي بتاكل مع الاجانب بس، اي والله عليكوا، ولا لهم اي دقة جدعنة في ايتها موأف يا مؤمن، سبحان الله في القضايا الوطنية الحقيقية دايما دايما دايما هم عبده ظروف

امتى بقى بيفتكروا الدويقة والعبارة والعمال والفلاحين؟ اول ما تيجي سيرة فلسطين، مش معنى كده انهم لا سمح الله بينزلوا يروحوا في اي داهية تاخدهم، لا العفو، هم بس بيجيبوا سيرتهم وخلاص، اول ما سمعوا عن قضية المعابر وقافلة شريان الحياة ما بطلوش ولولة على الدويقة، مع ان سبحان الله ولا اله الا الله ولا حول ولا قوة الا بالله وان شاء الله والحمد لله بتوع الدويقة دولم فضلوا مرميين قدام المحافظة وانضربوا وطلع ايماناتهم الا ماحد فيهم نزل عبرهم بكوباية مية

اي والله يا مزمن، ما كانش حد حارق نفسه على غزة وح يموت وح ينزل له البواسير واللي نزل وهو عيان واللي راح واللي جه الا اللي ماسكين ملفات العمال والفلاحين والقضايا الداخلية، وتلاقي ناس ما بينزلوش من تحت اللحاف يزايدوا على ناس زي حسام الحملاوي مثلا اللي شايل العمال على كتفه وداير بيهم في كل حتة لما خنقنا، ليه وليه بيقول غزة

ده من حيث الواقع المعاش

من حيث النظرية، انا عايزة افهم بقى، هي الناس دي بتشتغل لحساب مبارك وللا ايه؟ عايزين يخفوا الضغط من عليه ليه؟

يعني الداخلية والاعلام المصري ادعوا ان اهل غزة ضربوهم وعوروهم، ثم بعد كده، هم هم نفس الناس، ادعوا ان المسيحيين في نجع حمادي ضربوهم وعوروهم، وهم هم نفس الناس دي قبل كده ادعوا ان بتوع المحلة ضربوهم وعوروهم، وبتوع الجزائر ضربوهم وعوروهم في عقلهم الباطن، وهم المضروبين في الارض، وكل ماحد يشوفهم يا ضنايا يضربهم ويعورهم واغلب الظن ان الغزاوية والمسيحيين قلعوا لهم البنطلونات برضه

طيب مافيش حد مش عارف ان النظام هو اللي عامل الفتنة الطائفية، وللا لسه فيه حد مش عارف؟ وللا لسه ماحدش واخد باله ان امناء الشرطة كانوا بيروحوا للمسلمين في الصعيد يقولوا لهم انصروا دينكوا دول بينصروا البنات تقوم الناس هجووووووووووم؟ وللا لسه فيه حد شاكك ان الكنيسة في نجع حمادي بلغت عن التهديدات اللي وصلتها ومع ذلك ما حطوش حراسة كافية ووقفوا يتفرجوا على الناس وهي بتموت وكمان طلعوا بيان يقولوا اصل المسيحيين بيغتصبوا الاطفال فيا عيني اللي قتلهم بقى كان دمه محروق، فيه اكتر من كده تحريض علني على المسيحيين؟ لا واليوم الساقع بتقول الاقباط بيحرقوا "بعض ايات القرآن" مش عارفة يعني ايه بيحرقوا بعض ايات القرآن، ما الامريكان كانوا بيحرقوا المصاحف، لكن بعض ايات القرآن دي شافوها ازاي يعني؟ كانت سلسلة ماشاء الله دي وللا حجاب في عب واحدة ده وللا ايه؟

طيب ماهو ده نفس النظام اللي محاصر غزة، ايه المانع حضرتك انك تقول له ياللي محاصر غزة وبتموت المسيحيين؟ هو ايه؟ وان اتهام ات اه تايم مثلا؟ مش مسموح لنا بالتصدي للنظام الا قضية واحدة كل شهر؟ لنا كوتة يعني؟

لا معلش بقى، انا ما سمعتش حد من اللي بيقولوا غزة قال: مالناش دعوة بالمسيحيين يولعوا. لكن سمعت من اللي سايبين كل حاجة جوة وبرة تولع بيقولوا مالناش دعوة بغزة خلينا في المسيحيين، لا ده انت عايز تخف الضغط عن النظام بقى، بتخدم عليه يعني، بدل ما يبقى عليه ضغط من جوة وبره عايز ترحمه، لها تفسير تاني؟ لها معنى تاني؟ ايه مصلحتك انت وانت بتدعي انك ضد النظام انك تخفف عليه الهجوم من ناحية سياسته الخارجية؟ اذا كان هو عنده وقت وجهد انه يقرفنا جوة وبرة، انت وراك ايه يعني لما تقرفه جوة وبرة انت كمان؟

طب انا زي ما رحت الوقفة بتاعة غزة ان شاء الله رايحة الوقفة بتاعة التضامن مع شهداء نجع حمادي

ادي وشي اهو.. اهو، غرقوه تفافة لو حد من بتوع: "مالناش دعوة بغزة خلينا نركز في الشأن الداخلي" حراس مصالح النظام، عتب ناحية الوقفة دي
--------
حاجة تانية مهمة قوي، اكتبوها يمكن تنفعكوا:
الانسان اللي غاب عن جريمة، اي جريمة، هو بريء منها لحد ما يدافع عنها، او يتستر عليها، او يبررها، او يقلل من حجمها، او يسكت عليها، او يصرف نظر الناس عنها
عشان كده الرسول قال الساكت عن الحق شيطان اخرس
الكلام ده ينطبق على جريمة نجع حمادي وجريمة غزة على حد سواء وعلى اي جريمة بترتكب باسمك سواء اسمك مصري او اسمك مسلم، انت ايدك مش مغسولة من دم اي من ضحايا نظامك طول ما انت ساكت، والسكوت علامة الرضا

خبر عاجل من على التويتر

من مالك مصطفى عشان هو في هشام مبارك وهم اللي متابعين قضية الدويقة

النائب العام احال محافظ القاهرة ورئيس حي منشية ناصر الى التحقيق بسبب احداث الدويقة 

يييسسسسسسسسسسسسسسسسسسسسسسسسسسسسسسسسسسسسسسسسسسسس

طب وبغدادي؟ مش ح يحول بغدادي للتحقيق، حيدر بغدادي النائب عنهم في مجلس الشعب، لما الصخرة اتهدت على راسهم راحوا له مشاهم ولا سأل في قرعتهم وبس بيطلعوه في الجزيرة يقول اسرائيل ما بتخافش غير من مبارك ولولا خافت من مبارك ما كانتش وقفت حرب غزة قامت خديجة بن قنة قالت له طب ليه ما خوفش اسرائيل من اول يوم قام قال لها: لا ماهو لازم يتم ردع حماس برضه

ههههههههههههههه

مش ح يتحول للتحقيق ده؟ ده طرد سكان الدويقة لما راحوا له، هو لازمته ايه؟

الخبر التاني من نورا يونس على التويتر برضه ان فيه مظاهرات كبيرة في جامعة الازهر احتجاجا على الجدار

بس انا مبسوطة بخبر الدويقة ده، يارب ياخدوا حق الغلابة اللي ماتوا ويدوا اللي عايشين شقق ويعيشوا زي البني ادمين
----
آه ونسيت، مصر تتهم حسن نصر الله بالعمالة للنظام الايراني 
انا سألت سؤال قبل كده وماحدش رد عليا: المسرحية الهزلية المكونة من سبعمية سبعة وتمانين فصل دي ح تنتهي امتى؟ انا مش ح اقول اللي اختشوا ماتوا لان الله يرحمهم قبل ما يموتوا ما عدوش في الشارع اللي احنا ساكنين فيه اساسا ولا حتى سلموا على جار طليق بنت عمة جدتنا فاحنا ما نعرفهمش وبالتالي مش زعلانين عليهم ولا بنحيي ذكراهم السنوية، ودي اول مرة نسمع عنهم والله، ومش عارفين البني ادم لما بيختشي بيحصل له ايه؟ 
يعني نظام بيبني جدار لحصار اهل غزة بالتعاون مع اسرائيل وامريكا وفرنسا عدوان رباعي على اطفال وحريم لما وصل الامر ان اسرائيليين جم يتضامنوا يعني صعبوا ع الكافر والراجل ما كانش يقدر يعدي مناسبة عاشوراء من غير ما يتكلم عن اهل غزة يعني ضميره ما يسمحلوش، ماهو فضل ساكت وبيتقي شر لسان النظام المصري ولهم عين يقولوا له يا عميل ايران؟ أأأ....إإإ مين اللي جاب القلعة جنب البحر؟ مين اللي جاب القلعة جنب البحر؟

عاجل: تجمعات غاضبة تهتف: يا حكومة وسخة/ اعتداءات على المصريين في السودان

تحديث:
كلمة للتاريخ اللي هو مش ح يبقى كتير، كلها تلات اسابيع

المظاهرات حول السفارة الجزائرية اكبر دعم لمبارك واولاده المظاهرات حول السفارة الجزائرية اكبر دعم لمبارك واولاده المظاهرات حول السفارة الجزائرية اكبر دعم لمبارك واولاده 
اهو 
إهانة العسكري ليست مشكلة. يولع العسكري بعيلته بأبوه بولاده. العسكري تتم اهانته داخل الكتيبة يتم مسح بلاط الحمام بوجهه ومؤخرته، لا يهم. يتم فشخه أو بعبصته طالما كان هذا من قبل ضابط نفس الكتيبة، لكن حينما تتم إهانة عسكري المراسلة من قبل ضابط آخر أو من كتيبة آخري... يثور الضابط فإهانة العسكري في هذه الحالة هى إهانة للضابط، ولا شئ أهم من هيبة الضابط ونايشنه
يااااااااااااااااااااااارب اطلع غلطانة
-----------.


تحديث:
سبحان الله... سبحان الله... سبحان الله... انا مش مصدقة نفسي، مش مصدقة نفسي ان حد قال كل اللي جوايا بطريقة على الله توصل للناس احسن مني، ومش مصدقة ان الحد ده
هو ده!!!!!!! مش معقول، ده ممكن هو اللي يولع في نفسه لو عرف ان كلامه عجبني وضحكت وعيطت:

هيبة الضابط هى هيبة الدولة هى هيبة العلم هى هيبة الوطن هى كرامة الوطن هى كرامة الدولة هى كرامة الضابط. إذا لم تكونوا ضباطاً وتقرآون هذه المدونة فولع في نفسك يا ابنى، بدل ما تجري وراء أوامر الضابط بدعوى الدفاع عن هيبة الوطن.
-------------



تحديث:
فيه مظاهرة دلوقت عند السفارة الجزائري... ههههههههه، والامن بيحميها، والبيض بيضك بيذيعها بفخر.. وانس الفقي بيقول على المتظاهرين: ولادنا متحضرين، كاتبين بالعربي والانجليزي مش زي الهمج بتوع السنج.
دلوقت المتظاهرين بقوا متحضرين؟ والامن بيحميهم؟ انا في سويسرا يا اخواتي؟ وبيطالبوا بمنتهى التحضر، بتكسير السفارة الجزائرية او قفلها على حسب اقوال واحد على التويتر
احنا ح نحارب الجزائر؟ اصل الجزائر اعلنت نفسها تاني اقوى جيش في القارة الافريقية بعد مصر، والاتنين بيتسلحوا من امريكا، فممكن يعني امريكا تحب تجرب الاسلحة بتاعتها وللا حاجة
اديني اكتر... انا عايزة دم

وفيه حالة من الجنون الكامل، جنون كامل، انا مش قاعدة في بلد دلوقت، انا قاعدة في مستشفى مجانين حاليا، ومافيش، مافيش، لا بيفهموا ولا بيسمعوا ولا بيعقلوا ولا اي حاجة، والعاقلين شوية عندهم حالة ارتباك، يقولوا الكلام وبعدين يرجعوا يقولوا عكسه، بس هم مخضوضين بشكل عام من الحالة الجنونية دي
وانا مش متوقعة ان حد في الحالة الجنونية دي لا يسمع ولا يفهم ولا يستوعب، مافيش حد في حالته الطبيعية ولا عارف يفصل نفسه شوية ويركز ويسمع الكلام الخرا اللي هو عمال يقوله ويقول لنفسه: ايه الخرا ده، بس ياريت حد يسجل كلامه. عشان لما يهدا، وماحدش ح يهدا غير لما مصيبة تقع
وح تقع
ح تقع
المصيبة ح تقع
على دماغنا كلنا
بس ياريت ساعتها المخابيل بتوع دلوقت يبقى عندهم الشجاعة انهم يقولوا احنا ما كناش في حالتنا الطبيعية، على الله يتقبل عذرهم
هي اسرائيل فين؟ هابلة دي وللا ايه؟





تحديث:
بيان من المثقفين الجزائريين


تحديث:
يقال على التويتر ان الامن تدخل وانضرب :) وبعدين الامن فرق المظاهرة اللي لسة برضه ح استنى الصور والفيديو عشان اتأكد. او خبر على وكالات الانباء
شوفوا منى الشاذلي دلوقت

تحديث:
فيه ناس هناك، او بيقولوا انهم هناك وبيبعتوا من الموبايل بيقولوا ان مافيش شرطة خالص بتمنع المظاهرة والناس بتقول: واحد اتنين حكومة مصر فين. وبرضه نستنى الفيديوهات عشان ما يتعملش فينا زي اشتغالة السفارة بتاعة امبارح

تحديث:
على التويتر اخبار عن مظاهرة من 200 الى 300 متظاهرين في شارع شريف ضد الجزائر ومافيش امن بيمنعهم ولا واقف قدامهم
ده كلام من على التويتر مش مؤكد لان اللي على التويتر دول نسبة كبيرة منهم مؤلفين وساعات يقولوا اخبار على انها حاصلة عشان ناويين ينزلوا يعملوها
----------------

تحديث:
علاء مبارك: شوبير اللي طالع يقول انا باحترم كابتن روراوة وللا هاوهاوة! وخالد الغندور بيعيط إهيء إهؤ أهأ
انا مش مصدقة الجنان ده
ولا وبيرهب خالد يوسف عشان بيقول: ده مش الشعب الجزائري
وقال: وانا اتشرف ان الرئيس هو مبارك، واتشرف انك انت وجمال ولاد الرئيس
ملحوسة: انا عمالة اجمد قلبي واحاول ابقى عقلانية والحاجة اللي مش نافع فيها العقل (وده ينطبق على اغلب المهازل اللي حاصلة) اتعامل معاها بسخرية تتناسب مع عبثيتها. بس مش قادرة انا حاسة ان كل مشاعري ح تنهار
ايه ده ايه ده؟ ايه اللي بيحصل ده؟ ايه اللي بيحصل في الاعلام المصري ده؟ وايه اتصالات الناس دي؟ وايه ردود افعال البشر دول؟ وايه اللي على التويتر دول؟ وما رضتيش انزل الشغل عشان ما اشوفش بؤس اكتر من كده؟
للدرجة دي الناس مهزومة ونفسها مكسورة؟ انا... لأ... اجمدي، مش ح يصعبوا عليا، بس انا ما كنتش اتخيل ابدا ابدا ابدا ان الناس مكسورة كده وايه كم الشفقة على الذات والاحساس بالظلم والرغبة الهيستيرية في الصريخ واختلاق خيال مآتة ينزلوا فيه بوكسات وشلاليت عشان مش قادرين يضربوا اللي مفروض ينضرب، والكلام ده ينطبق على الجزائريين كمان. بس الايليت اللي بيعرفوا فرنساوي ما بيقولوش الكلام ده، انا نشرت كذا تدوينة وكذا مقالة وكذا فيديو لمن يعتبروا ايليت الجزائر، ومع ذلك فيه ناس مصممة تستعبط بمزاجها وتقول مافيش جزائري واحد اخد موقف من اللي بيحصل ده، عشان عقدوا العزم على فش الغل خلاص
من شوية قالوا لنا: سيبونا نفرح بالماتش
ودلوقت بيقولوا لنا: سيبونا نفش غلنا
وعلاء مبارك بيزايد على الناس في الامهم وبيقول: احنا كمصريين لازم نقول كفاية بقى؟
هههههههههههه ده ناقص يشتكي لنا من صعوبة المعيشة في مصر وغلاء الاسعار
والمصيبة ان فعلا ردود افعال الاغلبية انهم حبوا علاء
بس برضه ح ادوس على قلبي وماحدش يصعب عليا، لا دول ولا دول، يعني ابو تلفيقة بعت العيال اللي كانوا بيضربوا الجيش بتاعه عشان يفشوا غلهم في السودان، ماحدش يقول لي ان دول جهلة واغبيا وسهل يساقوا، لا معلش، بالوعي الكافي اللي يخليهم يضربوا الجيش والقوات الخاصة، ايه اللي يخليهم يبيعوا القضية؟ الا اذا كانوا زهقوا
وبرضه ماحدش يقول لي ان حالة الهيستيريا المصرية دي سببها الجرح في الكرامة والناس كلها بقت تشتم فينا، واتفضحنا، وايام حرب غزة كل اللي رايح واللي جاي يزألنا بالطوب، وكنا عايزين حاجة تنشلنا، واحنا زهقنا من التهزيء
عشان هم عارفين مين اللي بيهزأهم ومصممين ياخدوا صفه لانهم مش عايزين ما ياخدوش صفه، لان مواجهته ح تبقى اصعب، الخناقة مع الشعب الامازيغي المجرم "المرتزق" زي ما علاء قال، اسهل بكتير من الخناقة مع اللي مسود عيشتهم فعلا
ده اختيار
كل واحد عقله في راسه يعرف خلاصه، وخبر ضرب الشريط الحدودي اتأكد في كل وكالات الانباء ومافيش عليه رد فعل.
لا برضه، ماحدش صعبان عليا.
--------

تحديث:
نسيت اقول لكوا ان علاء لما اتصل بخالد الغندور قال: والناس اللي بتقول لو الجزائر راحت كاس العالم ح نشجعها، ليه ماسكين علينا ذلة؟
انا عايزة من ده يا حزمبل... ده احنا ح نعيش احلى ايام، الا اذا كانت الفرشة دي كلها عشان جمال مبارك ياخد خطوة يضرب بيها شعبية الكل
واااااااااااااو سو اكسايتنج

تحديث:
طب اه، انا عايزة علاء يا ريس، هات علاء وخلي جمال وزير اقتصاد، ماشي؟ انا طول عمري احب سواقين التاكسي، واللي علمني السواقة سواق التاكسي

تحديث:
علاء مبارك بيتكلم على دريم وان، ما شاء الله، انا عايزاه رئيس ده، بيتكلم ولا سعد الصغير
طب والله العظيم سعد الصغير كان بيقول كلام عاقل وراقي عنه، انا ما عنديش مشكلة في الرأي انا عندي مشكلة انك تقول الكلمة وعكسها
علاء مبارك: هم معذورين، اصلهم غيرانين من مصر ومعقدين منها
علاء مبارك: بس ده مش جمهور الجزائر، جمهور الجزائر على عينا وعلى راسنا
علاء مبارك: احنا كمصريين بنقول كفاية تيجي على كرامتي ح اديك على دماغك
علاء مبارك: ما احنا بنلعب ماتشات زي الفل مع دول الخليج
ههههههههههههههههه لا الاخرانية دي جامدة موت
طب ما تجيبه ده يا ريس بدل الصغنن؟
علاء مبارك: انا باتكلم بوصفي شاب مصري
(ملحوظة: علاء مبارك عنده تمانية واربعين سنة)
ثم بعد ما قفل، خالد الغندور بيعيط ويشن وينتف في عينيه

-----

تحديث:
هي الناس مش طايقانا بس ما ينكروش اننا شربات، القناة الاولى جايبة واحد اسمه اشرف العشري
- استاذ اشرف، حالة المشجع الجزائري في الماتشات العادية ايه؟
اشرف العشري: هو شعب عنيف بطبعه، يعاني من هوس كرة القدم، غير متصالح مع نفسه، قاسي مع نفسه ومع غيره.
!!!!!!!
عريض المنكعين مشرئب الفلنكات شلولخ، يقدس الحياة الزوجية، لا يشترط السن.
ثم اردف: واتهموا المصريين بانهم آل فرعون
!!!!!!!
كحك، هو احنا اللي مش هرينا قلبهم، منتخب الفراعين منتخب الفراعين لما حبسنا دمهم؟
ايه حكاية الفراعين دي؟ احنا فراعين؟ هو فيه فراعين دلوقت؟ يعني الحاكم بتاعنا تبع معبد آمون رع واسمه الفرعون؟ بنلبس جيبة وصندل ونحط كحل بشرطة؟ الفراعنة دول ماتوا من اربعتلاف سنة
طب الحمد لله، يعني احنا خلصنا من مولد الماتش وح ندخل في تحليل نفسية المشجع الجزائري من سكان العشوائيات اللي بيشيل سنج وسيوف زي كل سكان العشوائيات في مصر، انتوا ح تسيبوا اس البلا وتتخانقوا مع الشعب الجزائري وتحللوا له بول؟
الجيش الجزائري ازاي يلم الصيع والبلطجية ومسجلين الخطر ويبعتهم على حسابه في اي حتة؟ انتوا مش قادرين على ابو تلفيقة والجيش الجزائري ح تمسكوا في سكان عشوائيات الجزائر؟ ماهم زي اللي بيتحرشوا في العيد، يعني كل المصريين بيتحرشوا في العيد؟
وبعدين ايه الهبل والهوس ده؟ اذا ما شتمتش كل الجزائريين واحد واحد بنظام تبقى مش وطني

------


تحديث:
صحيح مهند فكرني بكلمة لوائل الابراشي، بعد يومين من السودان الشقيق واحنا شعب واحد ومتنيلين من نيل واحد وائل الابراشي قال بمنتهى الامبرمبشاق:
يجب محاسبة الاهبل اللي اختار السودان
ههههههههههههههههه
هو انا كنت باسأل الناس مش طايقانا ليه؟ دايما اسأل اسئلة غبية
ههههه والنبي ما تزعلوا مننا، دي مش قلة اصل، هو احنا كده مبالغين شوية في الانفعال، يعني حبيب قلبي روحي نور عيني... يلعن ابو شكل اللي جابك غور في داهية
بس مش بنبقى قاصدين والله

------

تحديث:
ابراهيم حجازي، بعد ما قعد يصرخ سبع ساعات ويتصل بالناس واول ما يفتحوا بقهم يقول: اسمعنييييي اسمعنييييي اسمعنييييي، الله انت متصل بيه عشان تسمعه وللا يسمعك؟ ودخل القومية العربية، واحنا مش اخوات عرب، واحنا محتاجين نقف وقفة بقى مع نفسنا
ايوة
احنا محتاجين نقف وقفة مع نفسنا، ايه الوقفة بقى؟ شوف التفكير العبقري

الاستاذ ابراهيم حجازي بيحمل المعارضة المصرية مسئولية ان مسجلين خطر ضربوا اتوبيسات الحزب الوطني، عشان احنا انتقدنا بلدنا و"ده اللي خلانا هنا ع الناس" الراجل ده عبكري عبكري عبكري: الناس من حقها تطالب بتداول السلطة، بس لازم تفرق ما بين النقد وما بين انك تسيء لوطنك

طيب حد كان قال لكوا ابعتوا اعضاء الحزب الوطني وفردوس عبد الحميد؟ ما انتوا لو بعتوا الصيع اللي كانوا في الماتش الاولاني كانوا قابلوا الصيع التانيين، وهم بيخافوا منهم

دلوقت بقت المعارضة المصرية هي المسئولة عن وجود صيع في الجزائر، زي اي بلد في الدنيا فيها الصيع، ومسئولة عن ان ابو تلفيقة عايز يخلص من ثورتهم فبعتهم يفشوا غلهم في اي حد غيره، ومسئولة انكوا بعتوا الحزب الوطني اللي وشوشهم تستفز اي حد عشان يضربهم حتى لو كان خريج السربون، وكل ده عشان اتكلموا بالبطال على مشي مصر وسيرتها، وقال على رأي المثل، البلد اللي معارضتها تقول لها يا عورة يلعبوا بيها الكورة

هرانا وقفة مع النفس وقفة مع النفس وفي الاخر اتحفنا بالبقين دول الى جانب موت العرب والوحدة العربية والمؤامرة الصهيونية اللي العيال الجزائريين عملاء ليها، ده غير طبعا انهم فرنساويين ونسيوا العروبة ونسيوا اننا ياما ساعدناهم واكلناهم وشربناهم وقمصاني وشراباتي وفانلاتي، ويا عيني يا مصر، يا غلبانة يا مصر، يا حمالة اسية يا مصر، يا سبعي يا مصر، يا جملي يا مصر، ما كانش يومك ياختي لما حسسني انه بياخد عزا مصر

وبعدين يرجع يقول: "ماهم كسروا الدنيا في سوسة في تونس"، الله، دول كل ما يروحوا حتة يتآمروا بقى؟ شوية يقول: بيكرهو مصر وبيغيروا منها، وشوية يقول: هم اصلا شعب عنيف وكل ما يروحوا في حتة يكسروا الدنيا، وشوية يقول: دي مؤامرة صهيونية واجنحة السلطة، وشوية يقول: احنا مش ح تقوم لنا قومة الا اذا اتوحدنا واتعملنا، ويرجع يقول: العروبة ماتت، وشوية يقول: دول صيع الجزائر، ويرجع يقول: كل الناس بتكره مصر
انت يا عم انت واعي بتقول ايه؟ حد في الدنيا يقول على بلده ان كل الناس بتكرهها؟ انت اهبل يا راجل؟ ماهو انا لما اقول كل الناس بتكرهني يبقى حاجة من الاتنين: يا انا مجنونة وعندي برانويا، يا اما انا بني ادمة زبالة قوي عشان كل الناس دي تكرهني
ثم كل التنظيرات دي هريتنا بيها وانت قاعد تاكل بسكوت على الهوا وتتكلم في التليفون وتفتفت وتفتف؟
المسألة بسيطة

ماهو برضه احنا لو كنا بعتنا بتوع الدويقة واسطبل عنتر واقنعناهم ان الجزائريين قتلوا مصريين والجزائر بعتت عيال ابو تلفيقة والشاب خالد والحزب الحاكم كنا احنا اللي ح نبقى ضاربين وهم المضروبين
ماهو وائل الابراشي من قبلها وبيقول اهو: الاصدقاء الجزائريين حذروني وقالوا لي الحكومة باعتة نوعية مشجعين للانتقام ولازم نبعت ناس تأمنا، وبيقول ان فيهم واحد قال له انه طلع الباسبور في نص ساعة، والحمد لله اننا خسرنا والا كانت ح تبقى فيه مذبحة
وبيقول ان العلاقات الجزائرية السودانية شعبيا وحكوميا اقوى بكتير من علاقتنا بالسودان وان الجزائريين محبوبين قوي هناك، وان اللي فهم المنتخب المصري انه بيشجع على ارض صديقة واداله امان لازم يتحاسب لانه غشه، دول كانوا كأنهم بيلعبوا في الجزائر

ايه دخل ده باننا هنا على الناس؟ طب ما هناش على الناس ليه عشان مالناش سفارة تساعدنا في اي داهية نروحها؟ ليه ما هناش على الناس عشان جعانين في بلدنا؟ عشان محوجين نتشرد في كل حتة؟ عشان مضطرين نرمي نفسنا في البحر؟
والجزائريين يعني دول كانوا انجلترا؟ ماهم مش لاقيين ياكلوا هم كمان
ثم الجزائريين بيكرهونا (على حسب قولك يا امور)، والسودانيين متعاطفين معاهم (حسب شهادة وائل الابراشي.. متعاطفين مع ناس ماسكين مطاوي وسيوف ضدنا، للدرجة دي احنا مزعلين الناس منا)، وتونس والمغرب كانوا بيشجعوا الجزائر
doesn't this ring a bell?
مافيش اي محاسبة للنفس من نوع تاني غير اتهام المعارضة وشتيمة العرب اللي بيغيروا من شعر مصر الاصفر وعينيها الزرقا يا عم الكتكوت ببسكوتك وتفافتك دول؟ ماحدش كان بيشجع فريق مصر غير الفلسطينيين المازوخيين دول راخرين هههههه بقية العرب يا اما ضحكوا على هبلنا احنا والجزائر يا اما شجعوا الجزائر... مش ملاحظين حاجة؟ الوووووووووووووووو، الوووو، يعني نص الناس مستهيفانا احنا والجزائر مع بعض، واللي فيهم هايف بيشجع الفريق التاني، ده حتى اسرائيل اللي قاعدين على حجرها (لا مؤاخذة بجملة الاساءة لمصر ما بتوع الحزن الوثني انضربوا كده كده) شمتانة فينا شماتة الاعمى ومش عارفة تخبي مشاعرها خااااااالص، خاااالص، وصحف فرنسية قالت مصر اللي ساعدت الجزائر ضدنا اهم وقعوا في بعض

يا ترى ليه؟ ايه اللي يخلي الناس تحمل ماتش كورة فوق طاقته بالطريقة دي وتبقى قاعدة تهري وتنكت في نفسها مننا؟ يعني كل الناس غلط واحنا اللي صح؟ مش نقف بقى مع نفسنا ونعرف ماحدش طايقنا ليه؟ من احبه كل الناس فهو منافق ومن كرهه كل الناس فهو فاسق
بس ما قالوش بقى: من ضحك عليه كل الناس فهو ايه يا عم براهيم، اصل ما تآخذنيش كل الناس على اختلافاتها ضحكت عليك

اه ونسيت اقول لكوا، ان القطقوط حمل الافلام المصري كمان المسئولية هههههه

لوذعي

-----------------------------------

تحديث:
هالة صدقي على نايل سبورت: دول باعتين صيع الجزائر، اللي جم دول ولا يقدروا يشتروا تذكرة طعمية مش تذكرة سفر، وجايين في طيارات الجيش
!!!!!!!!!!!!!!!!!!!!!!
ياللهول! ايه ابو تلفيقة، باعت لنا اللي كانوا بيضربوا البوليس عشان جعانين عشان يضربوا الناس في ماتش كورة؟ على رأي حسن نصر الله: ليش بتفش خلقك علينا؟

تحديث:
اليوم الساقع اكدت انهم بلطجية ما كانوش في الماتش، بس حد يجيب لي مصدر موسوء

تحديث:
كذا حد اتصل على التلفزيون وقال ان الحكومة الجزائرية تعمدت تبعت مسجلين خطر وناس خرجتهم من السجن مخصوص وما بعتتش جمهور عادي. انا عايزة اعرف مدى صحة الكلام ده لو حد حضر الماتش، اكيد اللي حضروا قدامهم يومين ونفهم منهم ايه الحكاية
-----

خطة ساندمانكي فشلت، ما عرفش يلم ناس كتير والناس اللي راحت معاه ما رضيتش تكسر حاجة والمولد انفض، يعني اصلا ما كانش فيه تجمعات وقت ما انا قلت ولما حاولوا يجمعوا فشلوا، الحمد لله، انا قلت الناس اتجننت، بس الحمد لله، هم مجانين اصلا بس ما اتجننوش للدرجة دي


ده الفيديو بتاع صدمة الماشت: يا حكومة وسخة
تحديث:

ساندمانكي كلمني دلوقت وبيقول لي ان حوالي اربعين خمسين واحد عند السفارة عشان يكسروا سفارة الجزائر وانهم ح يكلموا ناس عشان ييجوا

يعني اصلا اللي كان على التويتر ان الناس رايحة تكسر السفارة ده ما كانش حقيقي ده لسة لامين اربعين خمسين واحد بعد ما قالوا كده على التويتر وقال ح يلم ناس!
----

والله وباضت لك في القفص يا اوووووساااااااااا

فيه واحد على التويتر بيقول ان فيه مئات بيحاصروا السفارة الجزائري، هذا والله اعلى واعلم

بصوا تحت، انا جايبة لكوا اللنكات اللي عليها القصف الاسرائيلي للشريط الحدودي المصري وعليها التطورات اول باول
الملحوظة بس انا مش متأكدة من موضوع حصار السفارة ده، ده كلام على التويتر والتويتر عليه مؤلفين كتير

-----


تحديث:

يا اسرائيليين يا عثثثثثثثثثثثثثثل: قصف اسرائيلي يستهدف الشريط الحدودي في رفح

ايه الحلاوة دي؟

اضرب يا عبد الهادي، اضرب يا عبد الهادي، كل قوتي يا عبد الهادي، ما احنا اللي عملنا في نفسنا كده

تحديث:
ابراهيم حجازي: انا باسحب كلمة مبروك للمنتخب الجزائري... انا مؤمن بالقومية العربية.. واحنا مش ممكن يبقى لنا قوة الا اذا اتفقنا واتحدنا و"اتعملنا"..

تحديث:
اي مصري تايه في السودان يتصل بوزير الاعلام على
0121600000

تحديث:
ابراهيم حجازي بيتصل بمسئول الوفد المرافق ومش مديله فرصة يتكلم، هيثم شاكر واللي معاه خلاص وصلوا لهم وحطوهم في الفندق

تحديث:
طبعا احنا كلنا بنجيب الاخبار من اتصالات تليفونية، يعني مافيش حاجة مؤكدة بالصور ولا من وكالات الانباء لحد ما نعرف ايه الحكاية، ح تلاقوا الكلام متناقض
يعني
خالد يوسف:

محدش فتح سلاح والموضوع بسبب التلاحم والزحمة
اشرف زكي

المجموعة اللى معانا مافيش اي مشاكل
سكرتير الاتحاد السوداني:
كان حادث وحيد، وتم احتواءه
ابراهيم حجازي جايب فيديو على اليوتيوب وعمال يقول: انا حذرت. هههه



تحديث:
ابراهيم حجازي:
لو تشوفوا القنوات العربية كلها شمتانة فينا ازاي؟ فعلا يا حبيبتي يا مصر، يا حمالة الاسية، ياللي شيلتي الفيلم ده كله من الاول، ياللي قدمت الشهدا كلهم
ملحوظة: انا ناقلة الكلام نصا مش بما معناه
ابراهيم حجازي:
فعلا فيه مؤامرة، فعلا فيه مؤامرة، مين اللي عمل كده؟ هم سمموا لنا الجو؟ بقينا كلنا ما بنفهمش؟ وامريكا قالت عايزين الفوضى الخلاقة
------

تحديث:

ههههههه، انا اسفة، اسفة اني باضحك، بس الموضوع ضحك كالبكاء

- اسامة الشيخ بيقول: مافيش داعي للمبالغة هم تلات اتوبيسات انضربوا بالطوب وبس، بس يا ريت يا استاذ ابراهيم اي حد من اللي في الاتوبيسات دول يتصل بيك يقول لك العنوان اللي هو قاعد فيه عشان نبعت له حد

- تامر عبد المنعم: هم بيقولوا لنا يا يهود ليه؟

- هيثم شاكر: احنا مستخبيين في بيت سوداني

ابراهيم حجازي: طيب ما تخلي اصحاب البيت مشكورين يتصلوا بالسفارة

هيثم شاكر: اصحاب البيت سابوا لنا البيت ومشيوا.. كل السودانيين جريوا مننا

هههههههههههه اه يا قلبي، ح اموووووت

- واحد مش فاكرة اسمه: احنا لازم نشتكي ونقدم بلاغ للنائب العام ضد الصحف الجزائرية اللي حرضت علينا

ابراهيم حجازي: ح نشتكي مين وللا مين؟ الظاهر مصر غايظة ناس كتير واحنا مش عارفين

- تامر حسني: ايوة يا استاذ ابراهيم انا اتصلت بوزارة الدفاع وباطمنك واطمن الشعب المصري ان كافة الاجراءات تم اتخاذها والرئيس مبارك مهتم بالموضوع بنفسه

يا ما شاااااء الله، يا زين ما خلفتي يا زينب، عالمة وبلانة، ابطالنا القوميين لعيبة كورة والمتحدثين باسم الرئيس ووزارة الدفاع مطربين ما بيعرفوش يغنوا ولا يستحموا

اضحك وللا اعيط؟ اتنح

-----

تحديث:
دلوقت وزير الاعلام اتصل بالبيت بيتك، وبعدين هيثم شاكر وتامر عبد المنعم اتصلوا بنايل سبورت وبيقولوا ان اتوبيس البعثة المصرية انضرب ورموا عليهم حجارة وسكاكين والامن السوداني سابهم ومشي وهم جريوا واستخبوا في البيوت وبيتصلوا بالسفارة المصري مش بترد عليهم ومافيش حد سائل فيهم
حد يلحق الناس دي بسرعة قبل ما تحصل كارثة
هم مش كسبوا الماتش؟ بيضربوا تاني ليه؟

-------

انا مش عارفة مدى صحة الكلام ده، بس انا جايباها من مدونة ميت، اكيد لو فيه حاجة فيه ناس ح تصور

عبد المنعم مصمم ياخد حقه على الدولة

زي اي حد بيوصل للسن القانوني في المؤسسة، لازم يتخرج، ويبتدي نوع جديد من المشاكل. ومش محتاجة اقول لكوا المؤسسات بتبقى عاملة ازاي، المشرفين، المديرين، الاخصائيين، الزملاء، كلهم ناس غلابة بتفش غلها في بعض، وكل غلبان بيستقوى على اللي الاغلب منه.

بعد ما عبد المنعم اتخرج من المؤسسة فيه ناس ولاد حلال جابوا له شقة وكشك. الكشك اترخص في حتة يقطنها ناس شكل ذئاب الجبل كده. كل يوم على الله يمسكوه يرنوه علقة، لا بس هو واد جدع، ينضرب وما يقولش آي، ويصلح الكشك ويفتحه تاني

ماحدش يسالني بيكسروا له الكشك ويضربوه ليه؟ واحد راجع بالليل مبرشم، وعبد المنعم واد شكله غلبان ومالوش في حاجة، واللي راجع بالليل مبرشم ده واخد بالجزمة من مخاليق الله كلهم، لقى لقية واد غلبان، ما يفشش فيه غله ليه يعني؟ العيال بتوع المؤسسة يبقى جوة المؤسسة واد ايه، مقطع البطاقة، اول ما يطلع تجيله صدمة حضارية ويبقى مافيش اهبل ولا اغلب منه

المهم يا سيدي لما انت، عبد المنعم عارف ان: "الكانون يا ابلة بيقول اني لمن اتخرج من المؤسسة ليا حق اللي انا اخد شقة من المحافصة" بعد ما اهل الخير قدموا له على طلب شقة، واتطنش، كتبت مقال في الوفد لمحافظ القاهرة، اتصلوا بيا وقالوا لي ابعتي لنا عبد المنعم، فرحت فرحة الاعمى وكتبت احيي محافظ القاهرة، راح هناك، قالوا له انت تبع الجيزة، طلع بطاقة تبع القاهرة، او روح محافظة الجيزة، يبدو ان محافظة الجيزة بيبعتوا لها العيال اللي مش بتسمع الكلام عشان يعذبوهم

قام الواد عمل الاتنين، قدم على بطاقة في القاهرة وراح محافظة الجيزة، وانا كتبت نداء لمحافظ الجيزة

الكلام ده بقاله دلوقت سنتين حضراتكوا، كل اسبوعين عبد المنعم يكلمني: ايون يا ابلة، دوقت انا بقى رحت المحافصة، قالوا لي طب هات لنا وسل نور (عايزين وصل نور من واحد مقدم طلب على شقة، يعني هو لو عنده وصل نور ح يروح لهم ليه، ثم الشقة اللي جابها له اهل الخير في العشوائيات يعني، على قد فلوسهم ماهم اصلا كمان اهل الخير دول ناس مكافحين ماهماش احمد عز) جات عايدة عبد العزيز، الممثلة، قرت المقالين اللي كتبتهم عنه واتصلت بيا: انا عندي مزرعة وممكن ييجي يشتغل حارس وادي له مكان

- يا عبد المنعم

آه... بس انا يا ابلة ليا حق كانوني في شقة المحافصة، انا ايه اللي يخليني اخد حاجة من حد وانا ليا شقة في المحافصة

- طب معلش يا عبد المنعم مؤقتا كده بدل ما كل يوم وشك متخرشم من العيال اللي بيكسروا لك الكشك

طبعا قالت له طريق مصر اسكندرية قام راح اسكندرية ودور عليها هناك ما لقهاش. طريق مصر اسكندرية ايه بس؟ ده واحد عاش لسن عشرين سنة في مؤسسة ما شافش غيرها، يوم ما شاف الشارع كان بيروح يجيب سجاير للمدير من الكشك اللي جنبهم، يفهم ازاي هو فرق طريق مصر اسكندرية من اسكندرية نفسها؟ ثم حارس ايه وهو كل يوم ينضرب من عيال مبرشمة لمجرد ان شكله غلبان ومش عارف يدافع عن نفسه

"لا يا ابلة بس انا زعقت لهم بقى... قلت لهم مش كل يوم الاذية دي"

ده ما يعرفش حاجة ده غير ان له حق قانوني في شقة المحافظة، تصوروا؟ ومتسمك بيه قوي

- الو.. ايوة يا ابلة، انا رحت المحافصة وقالوا لي اليومين دولت مشكلة الدويقة ومش ح يدوك شقق فانا بقى ح اروح محافصة الجيزة، ما انا ليا حق في الجيزة

- الو ايوة يا ابلة، منكن اللي حضرتك تديني كارت برضك يساعدني؟

- الو ايوة يا ابلة، منكن اللي حضرتك بقى تديني المكال اللي فيه حضرتك بتتكلمي عني؟ برضك لمن اروح وادخل بيه

- الو ايوة ايا ابلة، انا لقيت حل.. منكن مثلا اللي انا لمن اروح اعمل مشكلة وازعق بقى واخوفهم

خلاااااااااااااااص يا عبد المنعم، يا عبد المنعم حرام عليك، يابني انا تعبت لك، ايه الاصرار اللي انت فيه ده؟ انت يابني مش عارف تفهم انهم بيمطوحوك، انسى المحافظة يا منعم، انساها

"بس انا ليا حق في شقة المحافصة دي"

عبد المنعم، مش ح يدوهالك، خلاص، دي ناس فاسدة، الشقة حقك ح يدوها لحد من معارفهم، انتهينا يا عبد المنعم مشي حالك، مشي حالك يا عبد المنعم، انا ح اكلم فلانة وفلانة واخليهم يجيبولك مكان في حتة ما تنضربش فيها

"بس ده حقي يا ابلة..طب اقول لك، انا عندي اكتراح كويس، ايه رأيك اطلع مكتب المحافص نفسه واكسر لهم المكتب؟ او ازعق"

ايه عبد المنعم اللي بتقوله ده؟

"ما انا باحاول الاقي حل... انا الظاهر تعبتك"

تعبتني؟ تعبتني في ايه عبد المنعم؟ يابني انا لو تعبانة تعبانة عشانك، انت مش حاسس بتعمل ايه في نفسك؟ يابني دول طلبوا منك وصل نور، هو فيه واحد عايز شقة يطلبوا منه وصل نور؟ انت مش واخد بالك انهم بيشيعوك؟ انا اللي تعبانة؟ وانت مش تعبان؟ ما زهقتش يا عبد المنعم؟

"ازهق من حقي؟"

مافيش فايدة

المبهر في الامر، ان انا اللي باقول له مشي حالك وهو اللي بيقول لي انا ليا حق "كانوني" وعايز اخده "الدولة مفروض اللي هي بتدي ابناء المؤسسات شقق تبعت المحافصة، يعني انا في الكانون كده" ايوة، بيقول الدولة وبيقول ابناء المؤسسات، وفي نفس الوقت بيقول المحافصة وما بيعرفش يقرا ولا يكتب عشان ما علمهوش في المؤسسة كانوا بيخلوه يمسح وينضف

وعلى كل البؤس اللي هو فيه ده جاب منين الاصرار على الحق الكانوني؟ وجاب منين التقديس المبالغ فيه للكانون اللي لازم ياخد مجراه؟ الله اعلم

ح اموت واعرف بجد، ده مش اول ولا اخر ولد من المؤسسة يتصرف بالطريقة الغريبة دي، ده كان ناقص يقول لي دي ضرايب المواطنين ولا يضيع حق وراءه مطالب واحنا لازم نحارب السلبية

ما كانش ناقص غير يقول كده بقى عشان كنت انكش شعري وامشي مجنونة في الشارع

ما بقتش عارفة اضحك وللا اعيط، افرح وللا ازعل، وامبارح مسكت صاحبتي اللي عندها جمعية اعصر فيها: العيال دي جابت الكلام ده منين؟ ده انت لما ابن عمك مات ما بقوش فاهمين يعني ايه ابن عمك

"البقية في حياتك يا ابلة، سمعت اللي حضرتك عندك حالة وفات، مين؟"

قالت لهم: ابن عمي

........ يعني ايه؟

قالت لهم: يعني ابويا له اخ، الاخ ده له ابن، ابنه ده هو اللي مات

اهو اللي مش عارفين يعني ايه ابن عمها دول، ييجوا لشقة المحافصة ويقفشوا فيها بمنطق: حقي بالكانون ويتكلموا كأنهم سليم العوا

لو جبت له قصر، عايز حقه بالكانون

- طب لو الشقة دي مش عاجباك نجيب لك شقة تانية

"بس ليا انا حق تبعت الكانون"

ولسة امبارح عرفت انهم بيتسللوا وينزلوا وسط البلد عشان يقفوا في الوقفات الاحتجاجية وكانوا عايزين يسافروا غزة عشان يحاربوا يناير اللي فات

"مين يا غادة اللي بيعلمهم الكلام ده؟ مين مهيج  الجماهير اللي في المؤسسات؟"

قالت لي: مافيش قاعدة، ممكن وهو قاعد على القهوة سمع كلمة، شاف منظر عيل وحس انه زيه، هم يعني عشان ما اتعلموش يبقوا ما بيفهموش وما بيحسوش؟ اما انت غبية ومتكبرة صحيح

تمام، انا غبية ومتكبرة وجاهلة وفاضية من جوة وضحلة، وعمالة ارغي

وفيه ناس ربنا خالقهم صح من غير رغي، هم ناس كده صح من راسهم لساسهم، من غير ماحد يعلمهم الصح

اللي حاول يعلمهم ما علمهمش غير ازاي يحط البشلة في بقه وما يعورش نفسه، وياريتهم بيعرفوا يستخدموها

اي حد عنده بيت واهل اسمعه يشتكي ح ارميه من الشباك

نو مور وور؟ فعلا

حد يقول لي احنا ايه الفرق بينا وبين اي بلد بتحارب؟ ومش ح اسأل ايه الفرق بينا وبين اي بلد تانية في حالة لا سلم لا حرب مع اسرائيل عشان دول حالهم احسن مننا بكتير، ولا نحلم اننا نتقارن بيهم

ايه الوحش في الحرب؟ انها بتموت الناس، انها بتعمل فوضى، ممكن تعمل حرب اهلية، (في حالة لما يبقى فيه احتلال مش مجرد حرب) ممكن تجيب احتلال، ايه الوحش في الاحتلال؟ ناس اغراب عايزين ياخدوا موارد البلد لحسابهم ويستعبدوا الشعب

حد يقول لي ان اللي فوق ده مش موجود هنا في مصر، قولوا لي، يمكن انا بابص بنضارة سودا

احنا بناكل احسن من العراق مثلا او فلسطين وافغانستان؟ بنشرب مية انضف من ميتهم؟ لما الف واحد يموتوا في لبنان على مدى تلاتة وتلاتين يوم في الحرب دي حاجة فظيعة، ازاي بقى مات قدهم في اربعة وعشرين ساعة في البحر عندنا واحنا ما كناش بنحارب؟ حادثة القطر الاولاني مات فيها تلاتلاف واحد في ست ساعات، يعني قد اللي موتتهم اسرائيل في تلات اسابيع في غزة مرتين، من غير قنابل ولا فسفور ولا سحر ولا شعوذة

الاحتلال، خصوصا المودرن ده، بيستخدم اسلحة محرمة دوليا، وحشة في ايه؟ اذا مش بتموت بتجيب امراض وغالبا سرطان

يا سلااااام، واحنا لما ناكل خضار مروي بمية المجاري ده بيجيب ايه؟ حلاوة مولد؟ لما التقاوي بتاعتنا تيجي من اسرائيل مسرطنة، ده اسمه ايه؟

العدد المهول من الاطفال المرضى بالسرطان اللي انفجر في وشنا فجأة ده ايه؟ يعني لو كنا انضربنا بقنبلة ذرية ما كانش كل العيال دي جالها سرطان، تلت سرطان الاطفال في العالم موجود في مصر

حرب اهلية؟ الصعيد ما بطلهاش، من ساعة ما الامن عتبه ولحد اخر مرة اتحرق فيها مسيحيين ما بطلتش، هم بس مش راضيين يفسروا في وشنا

ما اعتقدش ابدا ان اللاجئين الفلسطينيين والعراقيين والافغان واليمنيين حالهم اوحش كتير من سكان العشوائيات اللي تعدادهم بالملايين وكل شوية يجروا وراهم بالونش عشان يهدوا عششهم وهم ينزوحوا في حتة تانية ويبنوا عشش تانية

هو احنا مش بقالنا تلاتين سنة عاملين سلام؟ مين اللي رمى القنبلة دي علينا؟ ثم اترمت امتى؟ انا ما شفتهاش

مش ح نتكلم عن سرقة موارد الوطن لحساب الاجنبي واستعباد الشعب عشان مش عايزين قباحة، المدونة دي طاهرة، وح تفضل طول عمرها طاهرة

طب ايه؟ ايه الفرق؟

فيه فرقين:

الفرق الاولاني: ان اللي عنده حرب او احتلال عارف هو بيتعمل فيه كده ليه؟ وعنده قضية، وهدف، وعارف عدوه، وعارف يعمل معاه ايه؟ حتى لما بيبقى فيه خاين بيعرف يسميه خاين وعميل للعدو، بسهولة الحكاية دي بتتعمل، احنا هنا كل ما بنتكلم بيقولوا لنا مافيش داعي للتخوين

ولما ناس بتموت بيزعل عليهم وبيقول شهدا، بس بيبقى فخور بيهم

لكن احنا بنموت فطيس، موت عبثي مالوش معنى ولا معروف حصل ليه ولا حتى ايه؟ يعني تقدر تزعل على ضحايا الدويقة ويصعبوا عليك، لكن ح تبقى فخور بيهم ليه يعني؟ وللا هم حتى يفخروا بنفسهم ليه ويقولوا احنا صامدين ومستحملين؟ عشان ايه الهدف في الاخر؟

الفرق التاني:

نكتة.... كل الدول اللي بتحارب او اللي لا قدر الله عندها احتلال عندها انتخابات

تصدقوا؟

شوف، برضه باقول لا قدر الله

وده الفرق التالت، اننا عندنا كل اعراض الاحتلال وخايفين، بينما اللي واقع تحت احتلال فعلي مش خايف من حاجة، خلاص، اوحش حاجة حصلت له.

طب انا مش عايزة احتلال

انا عايزة بلد.. اصل البلد اللي حيلتي بااااااظط... بااااااظط

الاعلام المصري الراقص

القناة الاولى جايبة حفلة فيها مدحت صالح بيقول: وانا ويايا بعيش زي المليونيرات واحلم وانا ماعييش ما العنش الازمات

البيض بيضك بيتكلم عن: الشائعات في المجتمع المصري

قناة الحياة بتقول: الشعب المصري بيبالغ

قناة النيل للاخبار: جايبة برنامج مباشر عن الاثار المصرية

دريم: بتتكلم عن الانتخابات

الجزيرة مباشر هي الوحيدة اللي عاملة علينا مناحة، وحسين عبد الغني وشه ازرق من كتر الزعل، وجايب الناس تتكلم

واحد قال: الفلاحين هم اللي عملوا عمليات الانقاذ

الناس ملمومة على حسين عبد الغني وعايزة تتكلم، وهو عمال يقول لهم حاضر حاضر، ويستضيفهم ويسيبهم يتكلموا

واحد تاني قال: محافظة الجيزة هي المحافظة المهمل في العالم المصري كله من حيث حكومتها ومن حيث كل حاجة برة فيه كل الخدمات

واحد قال: مش عايزين نلوم الحكومة، احنا اللي مهملين، الموظفين نازل لهم اجهزة ما عرفوش يتعاملوا معاها، هم ناس فلاحين ايش عرفهم بالاجهزة دي؟ اعضاء مجلس الشعب مش بينزلوا غير في الانتخابات، هيئة السكة الحديد عارفة ان العياط مكان المصايب، بس بيبصوا لنا اننا راكبين ببلاش، اللي بيدفع خمسين جنيه وخمسة وسبعين جنيه ده ياخد خدمات، لكن ابو اتنين جنيه ده مش مهم، ولما بنروح الموقف بيقولوا لنا: اجرة الميكروباظ خمسة جنيه وان كان عاجبكوا، وانا مرتبي خمسميت جنيه خمسة جنيه رايح وخمسة جنيه جاي؟ ولو وصلت لعشرة جنيه ح اركب، ياروح ما بعدك روح

ماما كانت عمالة تعيط وانا مش عارفة اضحكها، ما ضحكتش غير لما قلت لها على "العالم المصري" وبعدين قالت لي، ماهي مصر فعلا بقت كرة ارضية لوحدها

انا عايزة اعرف ايه كم الجليطة وقلة الذوق وقلة الادب اللي الاعلام المصري فيها دي، الناس في ميتم وهم بيذيعوا اغاني؟ ده ماما كانت باعتة مقال عن حدث فني كلمت المجلة وقالت لهم الغوا المقال وهو لسة ح ينزل الاربع الجاي، ايه قلة الادب دي؟ هي الناس دي ايه؟ ما بتحسش؟ ما بتفهمش؟ بهايم؟ حلاليف؟ جواميس؟ ايه ده؟

ثم ايه قناة الحياة بتاعة المصريين بيبالغوا دي؟ بيبالغوا ازاي؟ موتوا الناس بنفسهم؟

المصريين مالهم؟ مالهم؟ انا عايزة اعرف مين شعب في الدنيا مالوش حكومة خالص ولا دفاع مدني وواقف لوحده ينقذ الضحايا

طيب لو هي اناركية، عيشونا اناركية صح، نعتمد على نفسنا، وما يبقاش فيه عملة ولا حكومة ولا ضرايب ندفعها ولا شرطة وناخد بالنا من بعض وخلاص

ح نعرف ناخد بالنا من بعض احنا كويسين في الحكاية دي، مافيش حاجة بتنكد علينا غير حكومة ورانا بالكرباج وبتقلبنا في الفلوس

لو هي دولة يبقى تبقى دولة، مارضيوش ينزلوا الجيش عشان اللي ماتوا غلابة

مع ان الجيش ده اتعمل في اساسه عشان يدافع عن الغلابة ومعمول من الغلابة، والغلابة هم اللي مشيوا على الالغام وخير الغلابة على الجيش والحكومة وعلى البلد كلها، دول اللي بيكنسوا لنا الشوارع ويشيلوا زبالتنا وقرفنا

دول اللي بيأكلونا ويشربونا من شقاهم وتعبهم

ودول لما ماتوا مالقوش غير غلابة زيهم يشيلوهم، وواقفة الشرطة تقول لهم انزلوا من فوق؟ طالعين يجيبوا الجثث قوم الشرطة تقول لهم انزلوا من فوق؟ يا خرابي على التخلف، انبي تعوض عليا عوض الصابرين يارب

وشايفاهم اهو، عمالين يطلعوا الجثث ويقولوا كلهم في صوت واحد: لا اله الا الله، لا اله الا الله، لا اله الا الله

والشرطة والدفاع المدني بيعملوا ايه؟ الدفاع مصدر الفلاحين وواقف وراهم مستنيهم اما يطلعوا له الجثث، والشرطة عمالة تزق في الناس، يعني لا عايزين يعملوا حاجة وبيزقوا اللي بيعمل

يا ناس هو كل سنة؟ كل سنة؟ ده الدويقة كانت رمضان اللي فات، هم المصريين دول ايه؟ عليهم ذنب؟

يموتوا كده؟ ولا بواكي لهم خالص كده غير الغريب هو اللي بيعيط عليهم؟ يوم ما مصري زي حسين عبد الغني عايز يعيط على اهله ما يلاقيش غير قناة قطرية يعيط فيها؟

اتفوووو

اتفوووووووووو عليكوا وعلى وشكوا عالم رمم جرابيع شبعة من بعد جوعة

قراءة مختلفة لاستطلاع

الاستطلاع قال 37 في المية من اللي تابعوا الخطاب صدقوه بالكامل و41 صدقوا جزء منه، انا شخصيا شايفة ان الصياغة ركيكة

السؤال ده لو اتسأل للناس زي ماهو مش ح يعرفوا يردوا، اسأله لنفسك كده، انت ح تعرف ترد عليه؟

الناس قالت: خطاب هايل، وناس قالت والله اهو كلام ومستنيين الفعل بس اهي بداية كويسة

بس دول من اللي تابعوا الخطاب

مبدئيا بس عشان نبقى واضحين، من كذا مصدر مطلع مجلس الوزرا مش بيضرب نتائج، لكن انا ليا تحفظات على استطلاعاته

اول حاجة: انه فيه شريحة بتشكل حوالي تلت المجتمع المجلس مش بيهتم بيها خالص، وهي الشريحة اللي ما عندهاش تليفون ارضي

هم بيتصلوا بالناس اللي عندهم تليفون ارضي ودي حاجة مش متوفرة لسكان العشوائيات، مش متوفرة للنجوع في الصاعيد الدواني اللي ما عندهمش اصلا كهربا عشان يبقى عندهم تليفون ارضي، دي شريحة كبيرة، ومهمة في استطلاع زي ده

هم صحيح معظمهم معاه موبايل :) اي والله، يبقى بيدور في الزبالة على اكل ومعاه موبايل، دي حقيقة واقعة، لكن مجلس الوزرا مش بيستطلع عبر الموبايل

لو يستطلعوا عبر الموبايل ح تكون النتائج ادق ولو كان فيه بعض الناس ح تقول لهم: يا ولا... ياد يا زكي فكك من التهريج الرخم ده

تاني حاجة: مش بيعرفوا يسألوا الناس ولا بيفهموا اجاباتهم. يعني مثلا في احدى استطلاعات رأي طلعوا ان خمسة وتمانين في المية من المصريين سعداء في حياتهم. طبعا هم اتصلوا بالناس وقالوا لهم: هل انت سعيد في حياتك. الناس قالت: الحمد لله. قاموا كتبوا نعم سعيد في حياته! ماهو يا اما يكتبوا الاستطلاع بالعامي عشان الناس تفهم قصدهم وتعرف ترد عليهم وينقلوه برضه بنفس اللهجة عشان اللي بيكتب ما يقعش في حيص بيص، يا اما يحاولوا يستوعبوا اجابات الناس وينقلوها صح

قراءة متمعنة (عشان انا مسكته وفليته وانا لوحدي) بتقول ان حوالي نص العينة ما اهتموش باوباما اصلا

عشرين في المية ما يعرفوش انه جه، :) دول عسل دول، وخمسة واربعين في المية ما تابعوش الخطاب، ودي نقطة مهمة، النقطتين مهمين، العشرين في المية اللي قالوا ما نعرفش انه جه، فيه احتمال ان نسبة منهم تكون كدابة لانها مش عايزة تتكلم، وما تبادرش لذهنها كلمة: انا اسف مش عايز اشارك، لان ده مجلس الوزرا، لبعدين يحبسوه وللا حاجة. ده احتمال وارد، ولو بنسبة ضئيلة، لكن يظل فيه نسبة مؤكدة فعلا مش عارفة ان اوباما هنا. وكذلك اللي قالوا انهم ما تابعوش، اكيد فيهم ولو واحد في المية بيكدب عشان يريح دماغه، لكن يظل ان فعلا فيه نسبة ما اهتمتش انها تتفرج بالرغم من معرفتهم، او معرفة بعضهم، (اذا حطينا في الحسبان ان فيه عشرين في المية من الخمسة واربعين ما يعرفوش اصلا انه موجود) المهم ان فيه نسبة عرفت انه موجود وما تابعوش

يبقى حوالي نص العينة (اللي عندها تليفون ارضي، يعني عندها كهربا ومية ومكان ما شرعي مش عشوائي) مش فارق معاها اوباما اصلا او مش عايزة تتكلم عنه

الباقي هم خمسة وخمسين في المية اللي تابعوا الخطاب، من الخمسة وخمسين في المية سبعة وتلاتين في المية صدقوه تصديق كامل

وواحد واربعين في المية قالوا مش بطال، وسبعتاشر في المية قالوا مش عارفين (جزء من الناس دي مش عارف بجد وجزء خايف يتكلم سواء بقى بالسلب او الايجاب الله اعلم بس هو عادة في استطلاعات الرأي في العالم العربي بيبقى فيه نسبة خايفة تقول اي حاجة) الخمسة في المية اللي قالوا ده ابن ستين في سبعين، هم خمسة في المية من الخمسة وخمسين في المية، يعني من المجموع يطلعوا حاجة بتاعة اتنين في المية اتنين وربع بالكتير. وكذلك من مجموع اللي قالوا رائع ومش بطال وهكذا اقسمها على اتنين يطلع لك النتيجة بالتقريب مش بالظبط.

مع الوضع في الاعتبار ان سكان اسطبل عنتر والدويقة (ماعدا اصحاب المحلات هم اللي عندهم تليفون ارضي في الدويقة) والهجانة وطبعا قرى الصعيد الجوانية مش داخلين في الاستفتاء اصلا

يعني الاهم من النسبة اللي حبت اوباما او كرهته

نسبة المهمشين وغير المباليين والمغيبين

دي نسبة كبيرة قوي، ودي الاهم ان الواحد يفكر فيها من اللي صدق صدق ليه واللي ما صدقش ما صدقش ليه

لسبب واحد منطقي، ان في الهيول او اللي تم اقصاءهم هم الاغلبية، والاغلبية اللي لو اضفنا لها نسبة سكان العشوائيات والصعيد الدواني مش ممكن يقلوا باي حال من الاحوال عن خمسة وستين في المية، (سكان العشوائيات اكتر من تلاتين في المية، بس ح نحسب انهم عشرين في المية)، يا اما ناس مالهاش حق في البلد وفيما يجري فيها، يا اما مش مهتمة بحقها في البلد لاسباب مختلفة، ما اقدرش اجزم بيها لاني ما عملتش احصاء، بس ما ينفعش صحاب البلد، اللي هم الاغلبية، يبقوا مالهمش في البلد وواحد زي ده ييجي ويفضوا له البلد وينضفوا له الشوارع ويرغي ويمشي وهم ولا كأن الامر يعنيهم.... ما ينفعش ده، دي بلدهم، انشالله يحبوه وينتخبوه رئيس المجرة، اهو يبقى اختيارهم، انما تبقى الاغلبية عندها حالة اغتراب قسري او اختيار بالطريقة دي؟

لالالالالالالالالا معقول؟

ههههههههههههههه ايه ده؟

انا ح ادور على الفيديو اللي فيه واحدة من الدويقة بتدعي على حيدر بغدادي واجيبهولكوا، ربنا يجعله من حده ومن نصيبه
بس برضه ما حدش رد عليا: ايه العسل اللي احنا فيه ده؟

---

اهو

واحد بتدعي على حيدر بغدادي

وواحدة تانية بتحكي عليه، وانتوا عارفين بقى، انا كله كوم واهالي الدويقة واسطبل عنتر بالنسبة لي كوم تاني، اللي يئذيهم بالنسبة لي ما يفرقش عن اولمرت قيد انملة

مناخيري اولا

امبارح كان فيه مكالمة طويلة مع واحد متعود يسخني على كل الناس، كان بقالي كتير ما اتكلمتش مع حد خالص ولا باقعد مع حد، وبعدين بقى امبارح هو استلمني، وابتدت المكالمة كالعادة، بانه اولا يستفزني، وبعد ما اصوت في ودنه (وانا امبارح كنت ح اتجنن، او اتجننت تقريبا بالفعل من اللي عملته الحكومة المصرية) وثانيا، بعد ما يسيبني اصرخ، يبتدي يوضح لي انه مش معترض على كلامي، وما تفهمش بيستفزني ليه في الاول طيب لما هو متفق معايا في الكلام، وثالثا بقى يفتن لي على كل الناس ويحكي لي على كل المناقشات الاستفزازية اللي بيتبادلها البشريات، طبعا مش ح اقول اسمه لانه بيقول عليا فتانة وفضحية. كل ده مش مهم

المهم انه وضح لي ان فيه ازمة فظيعة شاغلة الناس كلها دلوقت بعد موضوع غزة: مصر اولا؟ وللا الاسلام اولا؟

!!!!!!!!

افتكرت بعد ما قفلت معاه ان فيه مجموعة على الفيس بوك اسمها العروبة اولا

انا الحقيقة الازمة دي مأزماني قوي لاني مش عارفة احط ايدي بالظبط على الازمة، يعني اي مواطن في مصر، جنسيته مصري، ثقافته عربي، قارته افريقية، ودينه يا اما مسلم يا اما مسيحي. مش كده؟

طب فين الازمة يعني، ايه حكاية اولا؟ ومين ثانيا؟

انا اسمي نوارة، طولي مية ستة وستين سم، وعينيا سودا. دلوقت لو حد جه قال لي: لو خيروكي ما بين اسمك وما بين طولك ح تختاري ايه؟ تحبي تقصري ويفضل اسمك نوارة وللا تغيري اسمك وتفضلي طويلة؟

الحقيقة انا لو حد عمل معايا كده واصر على اني ارد عليه ح اعيط، لاني فعلا مش عارفة، طب انا ايه اللي يخليني يا اغير اسمي يا اما اقصر؟

ايهما اولا عينك وللا مناخيرك؟ شعرك وللا ودنك؟ انك خريجة اداب انجليزي وللا ان عندك جزمة بني؟

طب انا فعلا مش عارفة ايه وجه المنافسة ما بين ودني وشعري، ومناخيري وعيني، ومش عارفة ليه لازم اختار حاجة فيهم اولا وحاجة ثانيا؟

وكذلك مش عارفة فين وجه المنافسة ما بين المسيحي المصري والمسلم الاندونيسي، وما بين غزة والدويقة، وما بين اني في قارة افريقيا واني باتكلم عربي، اذا كنت انا اتولدت لقيت كل ده مع بعضه فيا، يبقى ليه فيه ناس مصرة تخيرني ما بين ودني ومناخيري؟

دلوقت هل سبق وللا وارد ان المسيحيين المصريين ياخدوا بعضهم ويحتلوا اندونيسيا؟ هل سبق وواحد اندونيسي اتخانق مع واحد مسيحي مصري على حتة شيكولاتة وطلبوا مني اني افصل ما بينهم؟

طب ما لو فصلت ما بينهم ح افصل بالحق بصرف النظر مين اندونيسي ومين مسيحي

هل اللي بيساعد الدويقة ما يقدرش ابدا يساعد غزة؟ هل اللي بيساعد غزة بيساعدها لانه بيكره سكان الدويقة ونفسه كلهم يموتوا؟

معلش يعني انا اعرف كويس قوي ان اللي نزلوا الدويقة في ايام الكارثة هم هم نفسهم اللي بيروحوا قوافل غزة

واللي ما بيروحش غزة وبيقول احنا مالنا ومالها دي حاجة ما تخصناش، والله العظيم والله العظيم ما عبر الدويقة بتلاتة صاغ ولا بكلمتين تعاطف، وما افتكروش الدويقة غير لما غزة انضربت، والله العظيم كمان مرة

وكذلك في المحلة....إلخ.

واللي بيعيش في الفشل في الامور الداخلية هو بيعيش في الفشل في الامور الخارجية

واللي اتسبب في كارثة الدويقة هو هو بنفس البنطلون بنفس الفانلة اللي اتسبب في كارثة غزة غزة

فين الازمة بقى؟

انا بجد مش عارفة افهم، واحد عمال يعذبني، ويطلع عيني، جه، هو هو نفس اللي بيعذبني ده، عذب شحيبر، وشحيبر ده اغلب مني، مش الطبيعي اني انا وشحبير نتضامن مع بعض ضد نفس الجلاد؟

هل من المنطقي اني فجأتن اتضامن مع الجلاد ضد شحيبر؟ من غير اي مبرر .......واجي على الضحية اللي زيي والومه في عز ماهو بينضرب، واساند الجلاد بكل ما اوتيت من قوة، مع انه في عز ما بيدي شحيبر بالشلوت بيديني انا في نفس ذات الوقت بالقفا، واقل ادبي على شحيبر، واقل اصلي، واقل كرامتي، وافضل اذل في شحيبر في نفس الوقت اللي انا باتذل فيه، واقول له ياما عملت لك، وياما سويت لك، وقمصاني وشراباتي

ليه؟

فيه سبب للجدل البيزنطي ده؟ 

امممممممم

غير ان شحيبر عنده كرامة وبيقاوم وبيقول انا مش ح اتذل ومش بيخاف، وانا ميت في جلدي وخواف وبصراحة كرامتي على قدي

هي كده؟ هي كده بقى؟

وللا عشان انا حاسة بالعجز والذنب تجاه شحيبر؟

وللا عشان انا زهقت من كتر ما انا غلبانة ومذلولة ما صدقت حد اغلب مني افش فيه غلي؟

طب انا كده محتاجة دكتور نفسي على فكرة يساعدني

النكتة بقى، ان الشخص الفتان اللي كان بيكلمني امبارح قال لي ان فيه نواب سحبوا استجواباتهم للحكومة تضامنا مع غزة

!!!!!!!!!!!!!!!!!!!!!!!!

لااااااااااااااااااااااااااااااااااااااه

حد يفهمني الكلام ده بجد، على اساس ايه بالظبط؟ على اساس ان الاستجوابات دي فرح واحنا ح نأجل كتب الكتاب عشان العزا اللي جنبنا؟ ده بدل ما نزود الاستجوابات ضد الحكومة اللي قارفانا وقرفها مطرطش على الناس كمان؟

طب الحكومة المصرية متآمرة على غزة نظمي فهمي رسمي، طب على الاقل، تضامنا مع غزة، اشغلها شوية عن غزة في الاستجوابات دي خلي الناس تترحم شوية من مبادرتها

طب وربنا كمان مرة انا ما فاهمة حاجة خالص

على فكرة

دي اسمها غباوة

اه والله، هي دي الغباوة بعينها يعني

كده ما ينفعش على فكرة، كده الناس فعلا ح تتفرج علينا، مش غزة اللي مسرحية، احنا اللي مسرحية كوميدية عبثية مالهاش بداية ولا نهاية، بقينا عاملين زي الواد منصور، ما بيجمعش

نهدا كده ونركز

يعني فيه نائب في مجلس الشعب كان رافع قضية على كامب ديفيد، اهي دي حاجة مفيدة، اقصد تضامنا مع غزة، مش بس تضامنا مع غزة، وتضامنا معانا احنا كمان، كامب ديفيد ذلتنا وبهدلتنا وسلبتنا سيادتنا وكرامتنا وحطتنا تحت رحمة امريكا واسرائيل ابد الابدين وعزلتنا وهي السبب في كل اللي احنا شاربينه دلوقت، احنا لو كنا مشينا على خطة التنمية كان زمانا كأحسن ما يكون، مش لو ما كناش انشغلنا بقضية فلسطين

الا موضوع فلسطين هي السبب في سوء احوالنا معيشية دي، ماهو تخريف بقى من ضمن التخريف

الواحد منين ما يمشي يلاقي تخريف، بقى هي قضية فلسطين اللي قالت لنا اقضوا على الزراعة والصناعة واقلبوا المجتمع من انتاجي لاستهلاكي وبدل ما تنتجوا اشتغلوا كومسيونجية تستوردوا شيبس ولبان وشيكولاتة وشامبوهات وتجيبوا ضرف المصانع وتبوروا الاراضي اللي فيها طمي عشان تدوا فرصة للمستثمرين يستصلحوا الصحرا لانها مكلفة والسرقة فيها مش باينة؟ وللا كامب ديفيد اللي حطتنا تحت رحمة شروط امريكا وشروط البنك الدولي وميسز بوكس والمستثمرين الاجانب والشركات المالتي ناشونال والديون اللي بتولد والمعونة اللي لا بتشبع ولا تخلا من النجاسة؟

بقى هي قضية فلسطين اللي السبب في ان حدودنا تنضرب ومجالنا الجوي يخرق واحنا ما نفتحش بقنا؟ 

على اي حال، امبارح المسخناتي اللي كان بيكلمني قال لي قانونا احنا ممكن نطلب التضامن بوصفنا مواطنين متضررين في القضية اللي رافعها النائب ده، طب انا عايزة الاقي الراجل ده، حد يعرف له طريق، هو صعيدي، كان باين من لهجته، واسمه محمد عواد او عودة مش فاكرة، ونائب في مجلس الشعب

انا عايزة اتضامن معاه، الجدع المسخناتي طلعها في دماغي، واقطع دراعي من لغلوغه لو هو تضامن وللا عمل حاجة، هو يزقني ويخلع، بس انا الفكرة عاجباني، مش بس عشان نفسي اخلص من كامب ديفيد، لاني سواء كسبنا القضية او خسرناها، يكفيني شرفا اني اتضامن مع الشخص الوحيد في البلد دي اللي سلوك مخه موصلة على بعض وبيفكر بالتسلسل المنطقي الارسطوطالي التقليدي: مقدمات بينها روابط، ونتائج منطقية لهذه المقدمات

معلش اصلي انا دقة قديمة شوية وتقليدية

ماليش في مسرح العبث وشعر الحداثة بتاع ماذا عن الخنفساء التي في نخاعك والبدر يخرج من كهرباء حذائك؟

حد يجيبهولي بقى وانا ح ادور من ناحيتي واللي عايز يتضامن يتفضل معانا