نداء الى المسيحيين: بلاش قلة عقل

تحديث:

عشان تعرفوا اني مكشوف عني الحجاب، الامن منع المسلمين من المشاركة في اعتصام كنيسة المسرة وبقى يشوف البطاقات المسيحي يدخله والمسلم يمنعه

طبعا الواحد ما ينفعش في الظروف دي يقول انه سعيد بحاجة، بس ينفع الواحد يقول انه مرتاح لمواقف الناس وردود افعالهم ومبادراتهم

الداخلية بطيئة، والناس كانت سريعة

وكان فيه تفهم كامل لرد فعل المسيحيين، الاغلبية كانت متفهمة تماما، وحتى اللي اتخانقوا ما تقلوش ايدهم في خناق، وفيه تفهم لحق المسيحيين في انهم يرفسوا من الحزن وحقهم ان اللي حواليهم يستحملوهم

بس ده رد فعل اولي ما ينفعش يستمر، خلاص اتعصبنا واتنرفزنا وهسترنا وضربنا ناس مالهاش علاقة بالموضوع والناس تفهمت.. نبتدي نتعامل مع الموضوع على اننا عايزين حقنا مش عايزين نفش غلنا

من الاخر كده، الداخلية مش حتجيب لكم حاجة، الداخلية سايباكم تهبهبوا، وسعيدة جدا انكم بتلوشوا، لانها مش عارفة حاجة، وعمالة تهلوس، وتطلع في اخبار وتقارير ما انزل الله بها من سلطان، يعني ايه: الانتحاري كان نفسه يدخل الكنيسة عشان يموت عدد اكبر بس خاف من الامن؟ ايه العشوائيات دي؟ هم لقوا الدي ان ايه بتاع الانتحاري المزعوم ده اساسا عشان كمان يعرفوا كان نفسه في ايه وخاف من ايه وكان بيحب بنت الجيران وكاتم في قلبه وبيبص عليها من ورا الشيش؟

اسمعوني بقى

الداخلية حتسيبكم تهللوا، لحد ما تخلصوا اللي عندكم وبعدين تلمكم، وتلمكم بمصيبة

بما انكم في حالة هيستيريا فدي حاجة في مصلحة الداخلية، ساعة ما تزهق منكم حتدخل في وسطكم بلطجية يعملوا كارثة، يحرقوا جامع، يشتموا محمد، يرفعوا صورة كاريكاتير من بتوع الدنمارك.. اي حاجة تبقى مصيبة كبيرة تجيب آخر المسلمين اللي لحد دلوقت متفهمين، وانا بصراحة متفاجئة من تفهمهم ده، انا متعودة عليهم دماغهم بتسخن على طول، وزي ما قلت ما ينفعش اقول اني سعيدة، بس ينفع اقول اني مرتاحة لرد الفعل ده، لانه ينم عن حاجات كتير ايجابية

رد فعل الجماهير المسيحية العادية والهيستريا اللي هي فيها طبيعي جدا ومفهوم جدا، لانه مش مجرد حزن، ده خليط من الهلع، والاحساس انهم اتاخدوا على خوانة، والاحساس بان الصبر مش مفتاح الفرج ولا نيلة ده مفتاح الكوارث، والاحساس بالغبن وانهم ما يستاهلوش ده كله، "ده احنا ماشيين جنب الحيط يقوم يتعمل فينا كده" بس لازم يبقى فيه ناس وسط الجماهير دي تعرف تدير الموضوع ولا هو متساب كده؟ ما ينفعش يتساب كده، لان هم كده حقهم حيضيع، وبعد ما يبقى لهم حق، حيلاقوا نفسهم يا بيعتذروا وبيقولوا يا حيطة داريني

اولا: الداخلية لها بلطجية ينفع يدخلوا وسط كل الناس ويعملوا عملة سودا تؤدي الى غضب كبير من الطرف التاني

ثانيا: الطرف التاني برضه حيتزرع فيه بلطجية يعملوا كوارث

رابعا: حتكون النتيجة ان الناس حتسيب الموضوع الاصلي ويمسكوا في الموضوع الفرعي اللي هو ان المسيحيين غلطوا، ولو البلطجية دول فعلا ضربوا مسجد حيبقى خلاص يا عم خالصين، كنيسة انضربت مسجد انضرب، لم تعابينك بقى يا ابونا

خامسا: البابا شنودة في اللحظة دي حيلم الناس فعلا، لان حيبقى فيه خطر عليهم حقيقي

سادسا: يالا بالسلامة.. ابقوا قابلوني لو اخدتم حقكم

ركزوا.. انتوا لكم حق لازم تاخدوه، والكل واقف معاكم في الحق ده، ما تركبوش نفسكم الغلط، عشان الداخلية محتاسة ومش عارفة تجيب اللي عمل كده ومنى عينها انكم تغلطوا عشان تكبر غلطكم وتسلط عليه الضوء وتهرب هي بتقصيرها

وبعدين انتوا بتطردوا المسلمين من مظاهراتكم ليه يا خايبين؟ انتوا محتاجين المسلمين ومحتاجين انهم يسخنوا في المظاهرات معاكم عشان يوم ما البابا شنودة يصدر امر بان مافيش مظاهرات تاني، انتوا حتسمعوا كلامه، وخلاص انا حطيت صوابعي في الشق من الموضوع ده ومش حاتناقش فيه، حتسمعوا كلامه وادي الله وادي حكمته... طب خلاص، اسمعوا انتوا ساعتها كلامه، المسلمين بقى سايبين وما بيسمعوش كلام حد حيكملوا هم مظاهرات لانهم خلاص سخنوا، قوم تقدروا ساعتها بقى تطلعوا معاهم في الاماكن اللي خارج الكاتدرائية وتكملوا تظاهر

بلاش التلويش يمين وشمال عشان نجدة الداخلية في ان تحصل مواجهة بين المسلمين والمسيحيين واكيد المواجهة دي مش في صالح المسيحيين وهي تطلع منها

انا عارفة ان اكيد اللي قاعدين في الاعتصامات مش بيقروا المدونات، بس اكيد فيه ولو واحد بيقراها ياريت يوصل لهم وجهة النظر دي