Saturday 1 August 2009

معلش انا باذاكر

بس حبيت اسقط بعض اللي ذاكرته على السياسة
عوكل مش شخصية درامية، ده زي شخصية عبد السلام النابلسي وعبد المنعم ابراهيم في الافلام، وقالوا لنا في المعهد ان ده غلط اننا نعمل شخصيات كده في الدراما
عبد الناصر والسادات شخصيات درامية
صحيح الاولاني بروتاجونيست والتاني انتاجونيست، بس مهمين الاتنين
انما عبد المنعم ابراهيم مش مهم
اسيبكوا بقى عشان اكمل مذاكرة

28 comments:

مهندس مصري بيحب مصر said...

هو ايه أصله ده ؟
مش قلنا مش عايزين رطانة المثقفين
يعني ايه بروتاجونيست و انتاجونيست ؟
النبي عربي يا أبلة

tuhamy said...

علشان مش عاوز أألف من نفسي
هو ايه معني
بروتاجونيست و انتاجونيست
وبعدين سامحيني أنا ظلمتك

لما نشاطك قل علي النت أنا قولت أكيد انتي في مصيف؟؟

أتاريكي من بتوع- دور تاني- اللي بيذاكروا في الصيف

احترامي ،،،،

Ahmed Fawzi said...

.. مع إحترامى الشديد لأكاديمية رأفت الميهى بس مش موافق على كلمة غلط اللى قولتيها و مش موافق على تشبيه عوكل بشخصيات عبد السلام النابلسى و عبد المنعم إبراهيم
1- ليه غلط إننا نعمل شخصيات زى دى ؟ إذا كانت هى اللى فضلت فى ذاكرة الجمهور أكثر من الشخصيات الأساسية ( عبد الحليم و فريد الأطرش و محرم فؤاد ) ؟؟
أعتقد إن الشخصيات دى كانت حل عبقرى لظرف إنتاجى
بطل له شعبية بسبب أغانيه لكن فى الوقت نفسه لا يتمتع بخفة ظل كافية أو مهارة فى التمثيل و له شروط فى بناء دوره فى الفيلم بتخللى الشخصية عاجزة و تحتاج لشخصية أخرى تكون أقدر على الفعل و أكثر إنسانية ( مش ملاك ) و لهاالقدرة على على جعل الجمهور يضحك و يتفاعل مع الفيلم و لا ينفصل عن المتابعة بين الأغنية و الأخرى ...
إذن المشكلة و الخطأ تكمن فى البطل و ليس فى الشخصية المساعدة التى كانت فى الحقيقة علاج لمشكلة أخرى و فى النهاية هم أهم من البطل تقريبا .
بالطبع الوصف ده كله لا ينطبق على عوكل ... ولو بحثنا عن شخصية يمكن تشبيه عوكل بها فى السينما المصرية تقريبا لن نجد سوى شخصية زوج تحية كاريوكا فى فيلم سمارة و مع ذلك سيكون تشابه فى بعض السمات و ليس بتطابق.
أعتقد أننا سنجد شخصيات تشابه عبد الناصر و السادات فى الدراما بوفرة و لكن عوكل بالفعل حالة فريدة ..

هرطقة said...

مفهوم ان عبدالناصر بروتاجونيست
لكن ازاى السادات أنتاجونيست

TAFATEFO said...

غلط .. حضرتك فاهمه غلط

عبدالناصر والسادات ممكن يبقوا بروتاجونيست وأنتاجونيست لو كانوا الاتنين في نفس الشابتر

لكن الصح ان عبدالناصر كان بروتاجونيست والسادات كان ديوتاجونيست لكن حسني فعلاً مش تريتاجونيست

الفسلم خلص مع السادات وبدأ فيلم جديد بعد شهور من تولي حسني ملحقش يلعب فيهم دور .. لكن بدأ فيلم جديد هو فعلاً مش من أبطاله .. ولا حتى من السنيدة .. هو قايم فيه بدور سميحة صديقة الطلبة في خمسة باب مش دور فؤاد المهندس .. هو **** بس مش في دور بطولة وملوش تأثير يذكر على الأحداث

Anonymous said...

pro
Anti

You are studying medicine!

Anonymous said...

Go ahead Nawara and study well. God bless your steps.

Unknown said...

لا مؤاغزة

بروتاجونيست البطل
وانتاجونيست عدو البطل
يعني عطيل البروتاجونيست واياجو الانتاجونيست

هاملت البروتاجونيست وعمه الملك انتاجونيست

كمال الشناوي ومحمود المليجي يعني

وحسني مبارك عبد المنعم ابراهيم

او يمكن التاكسي اللي كمال الشناوي بياخده عشان يلحق شادية

Unknown said...

مصر 30
ممكن يتعمل شخصية صديق البطل بس تبقى لها دور في الدراما وتبقى شخصية هي في حد ذاتها ملونة زي صاحب هاملت كده
ما يبقاش شخصية طالعة كده مالهاش لازمة
لو مالهاش لازمة يبقى غلط تتحط

وعوكل مالوش لازمة فعلا

Unknown said...

مهندس مصري وتهامي

لا مؤاغذة

:)

Unknown said...

هرطقة

السادات عامل زي شخصية اياجو في عطيل
شايف نفسه احسن من الكل ومش واخد فرصته
ولما اخد فرصته بهدلنا

Unknown said...

طفاطيفو

الفيلم خلص؟
:(

طب واحنا في الاستراحة وللا ايه؟
وللا دي فترة اعلانية؟
اصل شكلها مش فيلم خالص
مافيش اي اثارة ولا تشويق

Unknown said...

سونيت
ههههههههه
لا مش طب

متشكرة

احمد سعيد said...

مصر 30

... ولو بحثنا عن شخصية يمكن تشبيه عوكل بها فى السينما المصرية تقريبا لن نجد سوى شخصية زوج تحية كاريوكا فى فيلم سمارة


----------------------

نيااااااااااااااااااة

بتاع انتى بتلعبى بالنار ياسمارة ؟؟؟

طب مينفعش عبد الفتاح القصرى فى فيلم ابن حميدو ؟؟؟


او حمدى احمد فى فيلم القاهرة 30 ؟؟؟


او شخصيه بدران فى فيلم امير الانتقام ؟؟

او الراجل الطويل بتاع هينضفووونا
اللى جه فى فيلم ليله سقوط بغداد ؟؟؟

Unknown said...

او يمكن يا طفاطيفو دور ازوريس في قصة ايزيس؟ مات قبل ما القصة تبتدي؟

Ahmed Fawzi said...

مين قال إن الشخصيات دى كانت مالهاش لازمة ؟ .. قولى فيلم واحد الشخصية التانية كانت ممكن تتحذف .. حاتلاقى على طول إن البطل لوحده مش حايكفى الموضوع لا من حيث قدرته على الفعل لأن الشخصيات دى هى اللى بتقوم بالفعل و البطل بيقطف الثمرة فى الأخر أو يدخل يضرب و خلاص أو إنتاجيا فى جذب الجمهور ( خللى بالك بنتكلم على سينما مش مجرد دراما نظرية ).. و أكتر من كده فى أفلام كتير كانت الشخصية التانية هى اللى بتحفز البطل على الخروج من أزمة أو بتوجد معاه حالة حوار بينتج منها الحركة التالية للبطل ..
فعليا بقى عوكل محرك خفى فى الأحداث ممكن برضه يبقى أقرب مثل له شخصية البرادعى فى المسلسل القديم اللى قام بدورها المخرج الجميل أحمد توفيق و كان بطولة عبدالله غيث و سهير البابلى ..
كان شخصية محايدة أغلب الوقت بس فى الأخر طلع زعيم العصابة و هو ورا كل الشرور اللى حصلت
بس مش ممكن مقارنته بزكى رستم فى رصيف نمرة 5 لأن زكى رستم فى الدور الطيب كان شخصية متفاعلة مع المجتمع قبل ما نكتشف إنه الزعيم و كان أكثر إبتكارية من عوكل

TAFATEFO said...

أيوه الفيلم اللي فيه بطل الفيلم مصري خلص .. وبدأ فيلم جديد بتقوم فيه مصر بدور عهر ثانوي (شبيه بدور سميحة صديقة الطلبة في خمسة باب - ليست في دور بطولة نبيلة عبيد ولا سنيده في دور فؤاد المهندس ولكن عاهرة تقوم بدور ثانوي تؤديه كما هو مطلوب منها كملما جاءت عليها الكاميرا) .. الفيلم اللي بتقوم مصر فيه بدور بطولة خلص

انتي محسيتيش؟؟

Fatma said...

نوارة
انت رهيييييييبة

:D

بس انا مش موافقاكي
عوكل ليه دور كبيييير في حرق دمنا واستفزازنا
شخصيات عبد السلام النابلسي وامثاله دورها انها تملا الفراغ بدون ما تحسي بيها لا سلبا ولا ايجابا
انما الحقيقة عوكل دوره لا حصل ولا كان ولا له مثيل ابدا ابدا
حالة فريدة من نوعها
لازم يطلعولها تصنيف لوحدها تماما

على الهامش
كل ما ماما تبتدي موال انتو ماتعرفوش تعملوا حاجة من غيري هو انا هفضل طول عمري اعملكم كل حاجة انا انا انا افتح لاخواتي شخصية الام المصرية في كتابك واقولهم هاااا ماحدش ينسى نوارة جابت من الاخر في القصة هي مش متضايقة ولا حاجة دا جزء من الحالة بقيت بعد كدا يادوبك اشاور على الكتاب يضحكوا ويسكتوا :)وماما هتموت وتفهم في ايه

Unknown said...

ههههههههههههههههههههه
يااااه
حتى مامة بكيزة هانم بنت شرين باشا بتعمل زي بقية الامهات المصريات

Unknown said...

لا بقى يا طفاطيفو

يمكن دور شفيق جلال في خلي بالك من زوزو: والقرش الابيضاني ينفع في اليوم الاسمراني يا عيني وكمان الاخضراني يا ليل

مصر 30
انا كمان باحب عبد السلام النابلسي
بس هو لازمته انه لطيف

وده اللي ينقص عوكل

Fatma said...

ييييييييييييي
يادي بكيزة
وربنا انا ما بكيزة
والنعمة ما بكيزة
يا خرااااشيييي

بطلي اوشاعات شككتيني في نفسي
بقول لصحابي هو انا بكيزة
لاقيتهم سرحوا فجأة وقالولي
بصراحة فيكي شوية
بس اللي بكيزة رسمي مامتك
:(
انا مش بكيزة
يعني انا ماليش ذنب على فكرة دي حاجة يظهر وراثية
انا مش بكيزة
انا مش بكيزة
عقدتيني

بابا قرا كتابك ومبسوط بيه قوي وقالي البنت دي طيبة ومليانة احساس وبسيطة وقريبة من القلب وكان عايز يعزمك عندنا على الغدا وماما اقترحت تعملك شركسية قولتيلها لا الله يسترك مشيها ملوخية انا مش ناقصة بكيزة اكتر من كدا :P

lastcrazyboys said...

!!هي دي المذاكرة يا استـــاذة


أنا عــارف ان الحاجات دي بتحلى جدا ســاعة ما الواحد ما يبتدي يمسك الكتاب ..وتتعبي نفسك ليه صحيح..!افرضوا ذاكرت ونجحت ..وابوكوا برضه ساب البيت
؟؟؟؟؟

بس حكــاية "ياجــو" دي بتثبت انــه الســادات كــان ذكي ولئيم ..وبتثبت نظرية واحد حبييييبي كان دايما بيدافع عنه لأنــه الوحييييييييد اللي أثبت ان المنايفـــة أوســ...... من اليهــود

كائن الإبداع .... محمد said...

مطلوب مننا ايه بقى




ما تجيبي المقرر نذاكرلك و نشوف منه ايه الكلام اللي بتقوليه ده



أنا خامس مرة اجي هنا


جيت 3 مرات و انا بتسحب علشان كنت مهموم و مش عايز أضحك ، و مرتين قلت لما أضحك بقى ما فهاش حاجة


http://www.ibtesama.com/vb/imgcache2/97010.gif


دي بس علشا أول مرة أعلق هنا


و لو ما كنت علقت كنت هتعلق

Ibn Barhoma said...

عوكل يبقى توفيق الدقن ... “احلي من الشرف مافيش ... يا اه يا اه“ .... و ماسك الشعب الغلبان و بيقول له “ العلبه فيها ايه؟ ... العلبه فيها فيل ... قول وارايا ... العلبه فيها فيل“

overdose said...

اه انتاجونيست دا بناخده ف الكلية بيعمل بلوك للريسيبتور عشان ال
drug
ميعرفش يدخل
بيقله اقققققققققققققف مكانك

Anonymous said...

وما الدنيا الا مسرح كبييييير
بالتوفيق في المذاكره

محمد said...

انتي بتدرسي ايه يا نوارة؟

سكوت هنصوت said...

بصي بقى يا نوارة

هالله هالله عالجد والجد هالله هالله عليه....ه وانت يا اختي عشان سي عوكل مش عاجبك ومطلع عينك..تقومي تلزقيه في عبد المنعم ابراهيم...طب وسي عبدالمنعم كان عملك ايه....طب ده انا بتفرج على نص الأفلام القديمة بس عشان اشوف عبد المنعم ابراهيم...يعني قوليلي انت بالذمة...فيلم زي اشاعة حب يتشاف ازاي من غير عبد المنعم ابراهيم...فيلم زي السفيرة عزيزة...يتبلع ازاي ان لم يكن فيه سي عبد المنعم...

بلاش....هنزلك بقى بالزغلول الكبير...فيلم زي اسماعيل يس في الأسطول...ينفع يتعمل من غير عبد المنعم ابراهيم....طب ده الواحد كان بيبلع سماجة شكري سرحان بس عشان خاطر عبدالمنعم ابراهيم جنبة...تقومي بعد ده كله وتقوليلي ده خطأ في السينما..

بصي بقى يا نوارة يا حبيبتي انا انصحك كده تسيبك من التعليم الي هيبوظ مخك ده وترجعي لمدونتك...تقولي كلمة وترمي عشرة...وبلاها وجع قلب...