Tuesday 26 February 2008

الولية هيلاري بتعاير اوباما ان جده مسلم


الصورة دي الولية هيلاري نشرتها لاوباما وبتقول اهو رايح كينيا ولابس لبس الكينيين وبيحن لاصله الوسخ، اللي هو مسلم يعني لامؤاخذة، يا عيييييييب الشوووووووووووووم بقى جده مسلم؟ اخص اخص اخص، وانا اللي كنت فاكراه راجل محترم؟ طلع قليل الاصل والبعيد جده مسلم
ايه البلد دي؟ بجد يعني...ومالك يزعل ويقول لي انت عنصرية، انا في قمة الفرسة حاليا دلوقت
احنا كان عندنا وزير زراعة جده يهودي وماحدش عمل له حاجة غيرش هو اللي سرطن الاكل عامدا مستعمدا وما حدش حاسبة كمان ولا اتقدم للمحاكمة، ده دي مصر، اللي بنقول عليها مصر، واللي عمالين نعيط ونلطم ونقول يا ناس شوفوا حروق اللسان عندنا منتهكة
وهي منتهكة يعني احنا شفنا عندنا حقوق انسان محترمة وخبيناها مثلا؟ والله ما شفنا حاجة من دي انشالله نطفحها
بس لما بلد، بلد بحالها، كبيرة قوي قارة يعني، والمفروض انها دي الابلة اللي بتمم على حروق اللسان في العالم، واللي حتى البشرية عندنا مصدقين انهم شعب محترم وعندهم قانون ومش كل الشعب الامريكي وحش دول حلوين ده هو بوش بس اللي وحش والباقي فلة، على اساس ان امي هي اللي انتخبت بوش، هاذوها الشعب يتقبل فكرة ان واحد يتعاير باصله الاسود وجده المسلم، والولية تقول ده جده مسلم، جده مسلم، جده مسلم....كأنها ظبطت جده ده مع جوزها مثلا يبقى دي بلد شكلها ايه؟
والغريب..الغريب..ان شعبية اوباما بعد نشر الصورة دي اتأثرت
ولما نقول الثقافة الامريكية ثقافة عنصرية وسخة بتطلع ناس دماغها فيها صراصير يقولوا عليا عنصرية
طب انا عنصرية بقى وليا الشرف
====
ملحوظة: يعني بعد كل قلة الادب دي على المسلمين، والافارقة، متهيالي لو كانت هيلاري طلعت ان جده يهودي كانت اتفضحت فضيحة المطاهر يوم طلوعه على المعاش، لكن حملة زي دي تتعمل واحنا برضه مصممين ان امريكا حلوة امريكا حلوة يبقى بجد بقى ماحدش يفتح بقه ويقول يسقط يسقط حسني مبارك عشان ده كده يبقى تقرين فعلا
ثانيا
كده بقى انا مش عايزة اوباما ييجي رئيس العالم لانه عشان ينفي انه مالوش علاقة بالزبالة والخنازير اللي هم احنا ح يطلع ميتين ابونا بالعربي والانجليزي والامازيغي

1 comment:

Unknown said...

على فكرة جد اوباما لأمه يهودي فعلا
وعم زوجته أو خالها، حاخام غالباً من يهود اثيوبيا