Thursday 7 February 2008

النبي قبل الهدية/ في ماتش ساحل العاج


والله انا ماليش دعوة بالمعركة اللي دايرة دي بتاعة حاكم الشارقة لاني مش عضوة في اتحاد الكتاب ومش عشان امي طرف فيها اتدخل في حاجة بجد ما تهمنيش خالص ولا تفرق معايا صح؟
بس امبارح السيدة اقبال بركة قالت: وايه يعني لما ناخد من حاكم الشارقة مافلوس الخليج بتتصرف في كلام فارغ كتير جرا ايه لما ناخدها احنا دي هدية والنبي قبل الهدية ايه الحكاية الكرامة دي انا مش فاهمة؟
!!!!!!!!!!!!!!!!!!!!!!!!!!!
كانوا زمان بيقولوا لنا الكتاب والمثقفين والصحفيين سلطة رابعة والسلطة ما بتاخدش هدية
اما بخصوص النبي
فده النبي: استعمل رسول الله صلى الله عليه وسلم رجلا على صدقات بني سليم ، يدعى ابن اللتبية ، فلما جاء حاسبه ، قال : هذا مالكم وهذا
هدية . فقال رسول الله صلى الله عليه وسلم : ( فهلا جلست في بيت أبيك وأمك ، حتى تأتيك هديتك إن كنت صادقا ) . ثم خطبنا ، فحمد الله وأثنى عليه ، ثم قال : ( أما بعد ، فإني أستعمل الرجل منكم على العمل مما ولاني الله ، فيأتي فيقول : هذا مالكم وهذا هدية أهديت لي ، أفلا جلس في بيت أبيه وأمه حتى تأتيه هديته ، والله لا يأخذ أحد منكم شيئا بغير حقه إلا لقي الله يحمله يوم القيامة ، فلأعرفن أحدا منكم لقي الله يحمل بعيرا له رغاء ، أو بقرة لها خوار ، أو شاة تيعر ) . ثم رفع يده حتى رئي بياض إبطه ، يقول : اللهم هل بلغت

يعني بلغة العصر : الهدية دي عند امه يا ادهم

وعموما احنا مالنا الكتاب والمثقفين دول عالم يا عمي خلينا في موضوعنا انا واحدة فهمي على قدي
بما ان بيقولوا على حاكم الشارقة راجل كريم وطيب وامير وبما انه كان ناصري زي ما هو بيقول واتدرب في حرب الكنال
فياريت عمال عبد الناصر اللي اترفدوا من المصانع بعد الخصخصة يعمل لهم مصنع وللا اتنين ويشغلهم
ياريت الفلاحين اللي عبد الناصر اداهم اراضي والحكومة طردتهم دلوقت ورجعتها للاقطاعيين يشتريها ويرجعها للفلاحين
او حتى يلمهم في حتة ارض...اصل الفلاحين مالهمش غير الارض
ياريت التعليم اللي بقى احد اسباب السرقة والرشوة عشان الناس تعرف تعلم عيالها ياريت لو حاكم الشارقة الناصري يعمل كام مدرسة كويسة في الفلاحين وفي المساكن العشوائية ويعلم ولاد الفقرا على حسابه وللا حتى بأجر رمزي
مش عشان حاجة والله بس عشان خاطر عبد الناصر اللي هو بيحبه
ثم ان عبد الناصر ما كانش بيحب الكتاب ولا المثقفين ولا الادباء ده كان بيسجنهم واي حد يكح كحة مش عاجباه يوديه ورا الشمس
يبقى حاكم الشارقة الناصري صاحب الهدية اللي النبي قبلها ماله بقى ومال الناس اللي الزعيم بتاعه كان شايفهم رغايين ولتاتين وبيضللوا الرأي العام؟

يووووووووو برضه رغيت في اللي ماليش فيه
عموما العروسة للعريس والجري للمتعايس من امثالنا من الغوغاء والدهماء الذين يساقوا من قبل النخبة المثقفة ولا يسوقوا لانهم جهلة ومتخلفين

الا بقى بمناسبة الغوغاء والدهماء من امثالنا: في ماتش ساحل العاج بما ان حسن شحاتة اكيد اكيد ح ينزل عماد مرهق
عايزين نشوف وسيلة نسم بيها عماد مرهق قبل الماتش لان الاستاذ عماد مرهق كل ما حد يظبط له كورة ويحطها له في رجله ويوقفه قدام الجون يقوم زي الشاطر يسمع كلام مامي لما قالت له لازم ترجع الحاجة لصاحبها وينشن على ايد الجون عشان يسلمه الكورة في ايده

طبعا ربنا عرفوه بالعقل وانا بطبعي ما باحبش الخيالات المريضة والضلالات الذهانية وما عنديش امل ان مصر تكسب كوت دي فوار
بس ياريت ما نطلعش بفضيحة مافيش داعي لخمسة صفر واربعة صفر عشان نخرج واحنا شكلنا حلو كده وابو تريكة يستقبل الاستقبال اللي يليق بيه
يعني انا اقصى امالي اننا نتغلب تلاتة واحد يوم ما نبقى انجزنا يبقى نتغلب اتنين واحد
لكن لو عماد مرهق نزل النهاردة يبقى الواحد لا ح نشوفه ولا ح نشمه ومش ح ينوبنا غير ارتفاع ضغط الدم ويمكن تيجي لنا كومة سكر جماعية وحسن شحاتة بيقول عماد ده ابني....طيب يا كابتن ابنك تاخده تفسحه في كوكي بارك تجيبله عسلية مش تنزله يلعب ماتش
لو حد عرف يسمه او حتى يديله منوم قبل الماتش بساعة يبقى عمل جميلة فينا
بس منوم طويل المفعول يقعد له ست سبع شهور كده

No comments: