والنبي ما عارفة ابتدي منين
يعني ابتدي بأن اللي حصل في القدس النهاردة هو التطور الطبيعي للحاجة الساقعة ولاقتتال فلسطيني عبثي
وسفر القيادات الفلسطينية لحد مكة عشان بس يعرفوا إنهم غلط يقتلوا بعض غلط غلط؟
وللا ابتدي بالجولة اللي عملتها امبارح على النت؟
وللا اقول لكوا ح ابتدي برسالة جات لي ع النت
في الاول بس عايزة اسأل
حد عمره فكر في يزيد بن معاوية؟
ولا أنا والله، عمره ما خطر على بالي خالص يعني
خصوصا إني ما باحبش افكر واضايق نفسي في حاجة فاتت من زمان ومالهاش وقع حالي
بس الحقيقة جات لي رسالة على مجموعة بريدية عنوانها كده:
يا روافض الدين هذه مناقب يزيد بن معاوية هو منا ونحن منه
في الاول قلت: إيه الهزار البايخ ده؟
وافتح يا ختشي الاقي عنوان المقال: أمير المؤمنين يزيد بن معاوية
وإزاي إنه تقي وورع، وإنه ما عملش أي حاجة وحشة غير بس هي حادثة كربلاء
واستباحة المدينة
بس كده يعني
لكن كان بيصلي ويصوم وما كانش بيشرب خمرة
وبعدين مش صحيح إن علاقته بأهل البيت كانت وحشة
أبدا
مافيش أي مشاكل حصلت بينه وبينهم غير هي بس حادثة كربلاء
قتلهم بس
لكن بعد كده علاقته بيهم كانت ميت فل وسبعتاشر
وفي النهاية اللي كاتب المقال قال ما معناه: لا يحق لمسلم أن يفسق مسلم أو أن يلعنه
لأن المسلم ليس بلعان مثل هؤلاء الروافض غضب الله عليهم والخوارج لعنهم الله وأخزاهم
آه وربنا
قال كده
قال ما يصحش تشتم زي ولاد الكلب اللي بيشتموا
وقال فتوى شرعية واعترف الحقيقة انها من اجتهاده إن
القتل ذنب ممكن الواحد يتوب منه
لكن لعن وسب المسلم يخرج من الملة
يعني عاتشي الواحد يقتل
بس غلط غلط غلط يشتم
عايز تقتل؟ اقتل بس بأدبك
غلط تشتم القاتل
لكن المقتول يتشتم عاتشي برضه
لانه غلطان
ازاي يركب القاتل ذنب ويستفزه لحد ما يقتله؟
آه وربنا هو قال كلام بالمعنى ده لما قال إن الحسين يعني كان إيه اللي بيخرجه؟
وبعد كده كمان الصحابة والتابعين اللي اتقتلوا في المدينة كانوا خارجين عن يزيد
وحرام عليهم يخرجوا عنه
يعمل إيه بقى غير إنه يقتلهم
يبقى الحق ع المقتول وللا لا؟
قول انت بقى بحق ربنا
ده غير بقى ان الرسالة كلها: يزيد رضي الله عنه
واما تيجي سيرة اهل البيت والصحابة يبقى اسمهم: الحسين، ابن الزبير، ابن عمر، علي
على أساس إنهم كانوا بيلعبوا معاه في الشارع
والله وجهة نظر
وبعدين قال كمان إن يزيد ما قتلش الحسين...ده الجيش اللي بعته يزيد هو اللي قتل الحسين
وبعد كده لما المدينة ثارت عليه أهل البيت ما ثاروش عليه مع أهل المدينة
مما يدل على إنهم كانوا بيحبوه مووووووووت مووووووووووووت مووووووووووت
وبعدين يزيد كان بيروي أحاديث عن الرسول
روى حديث إن الوضوء بيبقى قبل الصلاة
أولا: أنا مش عارفة إيه مناسبة إن سيرة يزيد تيجي تاني بعد اربعتاشر قرن
ثانيا: الدروس المستفادة من المقال إن القاتل راجل كويس إذا كان بيصلي
وقال هو صحيح قتل اهل البيت والصحابة والتابعين بس ما حدش يعرف نيته إيه
ما يمكن كان مش راضي عن الفعلة دي جوا نفسه
آه وربنا كمان مرة
الدرس التاني
إنك لو قلت على القاتل إنه غلطان تبقى كافر
والقتل ده ذنب
ممكن ربنا يغفر فيه
لكن الشتيمة ربنا ما يغفرهاش
بس مش اي شتيمة
يعني فيه ناس مسموح ليك انك تشتمهم
زي الشيعة الروافض
والمسيحيين العرب لازم تقول عليهم عباد الصليب
طبعا المسيحي لما يبقى أمريكاني يبقى من أهل الكتاب
لكن لما يبقى عربي ح يبقى بقى شبهنا
لا شعره أصفر
ولا عنيه زرق
عشان كده يستاهل يتشتم
غير كده ما تشتمش حد
ولا تتألى على الله
إنه يغفر ليزيد
أبو جهل
وأبو لهب كمان
وقياسا على ذلك
فربنا ح يغفر أكيد لبوش
وحكام العرب
وأولمرت
ورامسفيلد
على فكرة أنا ماعنديش مشكلة خالص
يا سيدي ربنا يغفر لنا كلنا وندخل كلنا الجنة
يا ريت
لا.....كلنا ده ايه
الشيعة الروافض مش ح يخشوا الجنة
والمسيحيين العرب بالذات مش ح يخشوا الجنة
لو خواجات ح يدخلوها من أوسع أبوابها
يا حليلة!!!!!!!!!!!!!!!!! في الأول قلت دي عالم مجانين
مخهم تعبان الله يشفيهم
إمبارح ألف شوية ع النت
ألاقي لك مواقع للمثليين
وماله كل واحد حر في نفسيته
أنا صحيح جات لي صدمة شوية اكمني ما شفتش ناس منهم ع الحقيقة
بس قلت أهو كله برتقال
وكلنا بني آدمين المهم ما يئذوش حد وربنا بيحاسب كل واحد لوحده
مش احنا اللي ح نحاسب البني ادمين
خصوصا إني لقيت واحد فيهم اسم الله عليه متدين قوي يا رو ح ماما
إلى جانب رسائل الحب اللي باعتها لصاحبه
كاتب آيات قرآنية
وبيهني المسلمين بوقفة عرفات
وبيتكلم عن الحالة الروحانية الجميلة في وقفة عرفات
وبيقول إن ربنا خلقه كده وهو مبسوط بنفسه كده
يا حليلة يا ولاد
واحدة بقى عندها عشرين سنة
والله واضح انها مثقفة
وبتطالب بأنها تتجوز صاحبتها
ونفسها ترجع من الشغل تلاقي حبيبتها مستنياها
فتحت بقى ع البحري
ولحد دلوقت فاتحاه
آه وربنا باكتب البوست وأنا فاتحة بقى دلوقت
مش عارفة اقفله
طبعا اختكوا فلاحة متخلفة
والله ما كان قصدي اجرحها
بس حبيت أفهم إيه الحكاية
بعت لها كومنت فيه سؤال الملكين
وقعدت اعتذر لها لو كنت تقلت عليها
الحقيقة أنا مش عايزة اجرحها
لأن حرام عليا ده مرض وأكيد له علاج
بس بصراحة في الآخر وبعد كام لفة
خصوصا لما وصلت للكابتشن المثلي
مش مثلي يعني زيي
مثلي يعني شاذ
لامؤاخذة
ولقيته بيقول إنه جاي مصر
أهلا وسهلا والله يشرف وأنا مالي وأنا كنت حجزت البلد لحسابي
بس افتح الكومنتس والاقيلكوا كمية الرجالة المصريين اللي بيقولو له:
نورت مصر
أنا مستنيك
أول ما توصل عدي على دمياط
لازم أفسحك
ح أفرجك على الأهرمات
يا ولاد الـ...... والبنات حالها واقف
وخلتوهم يعملوا مدونة يقولوا : عايزة اتجوز
واللي بتتجوز فينا زيي كده بيطلع تلاتين أبوها واللي خلفوها
عشان انتوا ترحبوا بالكابتش "جاي" زي ما هو مسمي نفسه
دخلت من مدونة على مدونة ألاقي : من حق المثليين يتجوزوا
من حق الرجالة والستات يعملوا علاقات حرة
يا حلاوة يا ولااااااااااااااااااااد
وربنا وربنا وربنا كمان مرة
أنا ما باحبش اتدخل في حياة انسان الشخصية
وكل انسان مدام ما بيئذيش غيره حر يعمل اللي هو عايزه والحساب على ربنا
كوني شايفة ان المثلية دي مرض ولها علاج
والله ده كلام أطباء ومختصين
ومع ذلك اللي مبسوط كده هو حر وربنا
المهم بس يسيب العيال الصغيرة في حالهم
وما يجبرش واحد فقير على عمله زي دي عشان يلاقي ياكل
وربنا يشفي ويهدي
لكن معلث معلث ثؤال والله
يعني النسوان تتجوز النسوان
والرجالة تتجوز الرجالة
والرجالة والنسوان يترافقوا
وأمثالنا من الغوغاء والدهماء يقعدوا فاتحين بقهم زيي كده
لحد ما قبيلة دبان تدخل بقهم؟
يا حليلة
والنبي أنا بايني مش في الدنيا
وبمناسبة الدنيا
فيه واحد بقى مسمي نفسه ابو لهب
بيعمل ايه ابو لهب
بيتريق على القرآن
ويشتم الرسول والصحابة
ويألف قرآن
وبيقول أنا صاحب فكر حر
الحقيقة هو براحته برضه
وربنا وربنا وربنا براحته
بيحب أبو لهب
بس يعني كريم يدخل السجن عشان بيقول أنا مش عايز أصوم
ومش عايز أمثل إني صايم في نهار رمضان عشان ما ابقاش منافق
وأبو لهب قاعد يقول أُعل هُبل؟
واشمعنى ابو لهب يعني
يعني أنا أعرف إن الملحدين بيحبوا الفراعنة
السوماريين
لكن أبو لهب؟ يعني إيه إنجازاته الفكرية أبو لهب ده؟
ومع ذلك هو حر وربنا وربنا وربنا كمان مرة
وربنا بقى يهديه ياخده يعمل اللي فيه الصالح
بس كريم ليه يتحبس عشان زعلان من أغنية يا فاطر رمضان يا خاسر دينك
عايز ياكل قدام الناس في نهار رمضان
ما تسيبوه ياكل يا خوانا
سيبيه يمسكها يا فوزية
ماله الواد؟ زي الفل
لا مسمي نفسه أبو جهل
ولا بيدافع عن الحجاج
ولا بيسمبس لابن الجيران من الشباك
ولا اتقدم لابن عمه، وابن عمه دخل عليه بيقدم له القهوة وهو مكسوف
وام كريم تقول لابن عمه: تعالى يا حبيبي جنبي
ماشاء الله
والله عرفت تنقي يا كريم
زي القمر يا فتحي
طيب هو أنا محتاجة أمشي على راسي عشان أعرف الدنيا ماشية ازاي
والنبي اللي يعيش ياما يشوف
حاسة إني في فرح بلدي مقام في مستشفى المجانين:
صدام الشهيد آه
حسن نصر الله الخاين لأ
يزيد التابعي آه
الحسين بن علي لأ
المسيحيين الخواجات لهطة القشطة آه
المسيحيين العرب لأ
جواز الخـ.....يري آه
الرفق آه
جواز الناس الطبيعية لأ
إسرائيل آه
إيران لأ
دحلان آه
حماس لأ
أبو لهب آه
سيدنا عمر لأ
وسمعني أحلى بودعك
تاتتا تا تتا
وكل الناس زيتها في دقيقها
الفلسطينيين يموتوا بعض
والنسوان تتجوز بعض
والعرب يحتلوا بعض
حاجة كده في بيتها
بدل الحوجة للغريب
قال ومتضايقين مني عشان لساني بقى طويل
ده أنا بنت ناس يا ناس
ومتعلمة في أحسن مدارس
بس الزمن زفر لي لسان
وزعلانين من الشخارة بالكهربا؟
ده احنا عايزين شخارة بالكهربا
وصباعة بالكهربا
وأحاحة بالكهربا
ودراعة بالكهربا
وطقم نسوان بالكهربا يرقعوا بالصوت
يا دهوتىىىىىىىىىىىىىىىىىىىىىى
غطيني وزغردي يا اما
عشان اللي يموت في الزمن ده
يبقى ربنا فك أسره
قال وأنا اللي كل شوية أزغد وائل عباس عشان بيحب السادات
لا يا وائل...براحتك يا حبيبي
طالما ما اتقدمتش تطلب ايد مالك
يبقى حب السادات براحتك
No comments:
Post a Comment