Friday 29 December 2006

تهييسات



أنا أصلا مش عارفة ح انزل الكلام ده وللا ح امسحه،

فيه تجارب في الحياة بتبقى تقيييييييييلة قوي على القلب والأعصاب،

كل الناس بتمر بتجارب بس فيه تجارب انت تمر بيها،

وتجارب تمر عليك،

تطلع منها زي اللي عدى على وشه قطر ومامتش،

كل الناس تقول حمد لله على سلامته،

المهم إنه عايش،

هو الوحيد اللي لما يبص في المرايا يقول يا ريتني مت،

ولما حد يهون عليه، يقول له: يا شييييييييخ احمد ربنا انك عايش،

وهو مش عارف إن هي دي المصيبة في حد ذاتها،

إن شكله عايش بس هو مش هو،

لما بيبص في المرايا بيشوف عجل القطر على وشه،

ومن وراه مش لاقي وشه،

فين وشه؟

بعد شوية يحاول يتعايش مع شكله الجديد،

وش بني آدم عليه آثار عجل قطر،

بس بذمتكوا ده شكل الواحد يعرف يتعود عليه؟

حتى لو فضل ميت سنة كده،

وما يغيظوش ولا ينقطه غير الناس اللي بتقول له: يا شييييييييييييييييخ مش المهم إنك عايش؟،

بينما هو أهم هدف في حياته دلوقت إنه يموت،

مش يموت لأنه زهق من حياته لا سمح الله ومعترض على أمر الله،

بس لأنه حاسس إن روحه جوة حد مش هو،

يمكن شكل وشه وعليه آثار عجل القطر يعجب الناس،

بس هو مش عاجبه،

فيه ناس تقول له اعمل عملية تجميل عشان ترجع زي ما كنت،

بس ما حدش بيرجع زي ما كان،

وهو ده اللي بيخلي واحدة زيي تعيط لحد ما تحس إن عنيها ح تقع من وشها،

ما حدش بيرجع زي ما كان أبدا،

الدنيا طريق اللي فات منه اتقطع،

واللي جاي منه ضلمه،

والنقطة اللي واقفين فيها مستنيين حاجة مش عارفين إيه هي،

أنا عن نفسي حسمتها وعارفة أنا مستنية إيه،

مستنية أروح مكان الناس اللي فيه،

يعرفوا يشيلوا آثار عجل القطر من على وشي،

عشان أرجع أعرف نفسي تاني
.

No comments: