امن الشعب/ والضحية الجديدة

تحديث:
تونس لغت امن الدولة... لا بقى.. هي تونس دي على طول جايبة فينا اجوان
احنا حنلغيه يعني حنلغيه.. ونعمله سندوتشات حلاوة بالقشطة
------------
عشان بس نقفل ملف امن الدولة المنحل

امن الدولة خلاص حليناه، مش لسه حنحله

حننضف مكان الازاز المتكسر ازاي؟ 

دلوقت انا اتكلمت مع بلال فضل امبارح وفهمت منه اكتر وجهة نظره اللي لخصها لي في المثال الآتي: لما يبقى عندك بيت حوى تعابين وعقارب وفيران، المفروض تقفلي البيت ده كويس لحد ما تسيطري على اللي فيه مش تهديه تقوم التعابين تسرح عليك

هو شايف اننا نقفل البيت على اللي  فيه، ونغير مهامه، وصفاته، وخصاله، وصلاحياته، واسمه، ومرجعياته

الجهاز ده كان بيخدم اسرائيل وامريكا، عشان هو البرنامج اللي نازل له كده - الكلام لسه لبلال - وهو كان بينفذ البرنامج، خلاص، نغير له البرنامج

انا شايفة اننا نوزعهم على اجهزة تانية، وماحدش يروح مع زميله، عشان بيبوظوا بعض، لما يروح في اجهزة اخرى وحواليه سياسة مختلفة حيتعود على النظام الجديد

بلال شايف ان ده ممكن يضر الاجهزة الاخرى ويخليه يحاول ينتقم من الجهاز اللي اتنقل له كله

طيب.. في كل الاحوال، الجهاز ده مش نافع ولازم يتحل، يا المبنى يتقفل ويتغير من بيت اشباح لفندق خمس نجوم، يا نوزع العفش اللي فيه على الفنادق اللي حواليه

وطبعا اكد على فكرة ان ماحدش منهم يتقبل منه استقالة لمدة خمس سنين.. وانا موافقة جدا، لحد ما نعصره ينزل اطفال احداث

الكلام دلوقت على بقى حننضف البيت اللي قفلناه ازاي

فيه كام حاجة عايزين نتفق عليها مع بعض، واللي مش حيتفق معانا.. ما يخافش، يعبر عن رأيه بكل شجاعة، واحنا حنعذبه ونخلي اللي ما يشتري يتفرج عليه... احنا عايزين نبقى ديمقراطيين

أولا: بالصلاة عالنبي.. كل الستات بيغيغوا مني مش عاغفة ليه؟ ماما وبابا عملوني عربي انا ذنبي ايه؟

مع متابعة الثورات العربية بشكل عام، والثورة المصرية بشكل خاص، عدم اللامؤاغزة احنا مش بنستلف برامج من حد

احنا الشعوب الوحيدة في العالم اللي بتنضف وتروق وتبيض بعد ما بتخلص ثورة، والليبيين كل ما يحرروا حتة ينضفوها، كأن الحكام العرب دول كانوا نجاسة واحنا بنغسل بلادنا منها عشان تقدر تصلي بقى

واحنا اول ناس نعمل حاجات كتير قوي، مسير كل شعب من الشعوب العربية الثائرة يكتب يوميات الثورات دي وحيلاقي اننا ناس جامدين قوي

ناس جامدين، ومش محتاجين نستلف موديلات من اي حد في الدنيا، احنا بالصلاة ع النبي اللي حنعمل موديلات ونسنجف بلادنا ونروق القناني ونعلم الدنيا بالدول اللي حنبنيها زي ما علمنا العالم بالثورات اللي عملناها

مش حنروح ناخد موديلات من دول ابتدت منحنى هبوطها واحنا اللي صاعدين، احنا بنخترع واحلى اختراعات ان شاء الله

ثانيا: مافيش حاجة اسمها ارهاب

خالص، ما عادش حد يجيب لنا السيرة دي، اللي بيقول ارهاب ده بني ادم ديموديه ومافيش حاجة اسمها اجهزة مكافحة الارهاب

الدنيا دي: افكار واقوال وافعال

الافكار عمرها ما تبقى جريمة، مهما كانت متخلفة، ولو حنحاسب على الافكار يبقى نيتشه ارهابي، لانه كان ملهم لهتلر، ما تقدرش تحمل نيتشه مسئولية فهم هتلر لفلسفته، هو فهمها كده، غيره حيفهمها بطريقة تانية... عشان دي اسمها افكار

الاقوال، فيه تعبير، وفيه خطاب كراهية، وتجريم خطاب الكراهية غباوة، لان ده معناه انك مش قادر ترد، وبتدي خطاب الكراهية اهمية ما يستحقهاش، ثانيا تعريف خطاب الكراهية يتراوح من ثقافة لثقافة بل ومن شخص لشخص ومن ظرف لظرف

يعني مثلا كلمة الاسلام السياسي دي تعد خطاب كراهية في الظرف الحالي لانها ارتبطت بخطاب يخدم على اهداف استعمارية لامريكا واهداف قمعية لواحد زي مبارك مثلا، وفي الحالة دي تنتقل من خانة خطاب الكراهية لخانة التحريض غير المباشر وحنخش في متاهات بقى

اللي عايز يقول حاجة يقولها... مدام ما ترتبش على كلامه افعال هو مسئول عنها، ومافيش انسان يتحاسب على فهم خاطئ لاشخاص تانيين عملوا افعال اجرامية بناء على فهمهم الخاطئ، والا لو حد مثلا راح قتل مبارك دلوقت يبقى احنا اللي قتلناه عشان قعدنا نقول له ارحل ارحل فهو فهم ارحل دي يعني موت؟ 

ومافيش حاجة اسمها تحريض غير مباشر، فيه حاجة اسمها تحريض بجد، يعني انت جبت حد وقلت له ولع في نوارة وانا اجوزك بنتي ولا ادفع لك سبعين جنيه خمسات

طبعا انا مش باتكلم قانون دلوقت، قوانين السب والقذف وافشاء الاسرار العسكرية والحاجات دي تخصص القانونيين، ماليش فيها انا، انا باتكلم على الجزئية اللي كان بيتكلم فيها امن الدولة واللي مالهاش اي علاقة بالقانون خالص: خطاب تحريضي، خطاب إثاري، زعزعة الامن، ارهاب فكري، اللعب في اساس الدولة والكلام اللي مالوش راس من رجلين ده ومالوش اي سند ولا مرجعية قانونية

البند ده يتلغي خالص، مش من امن الدولة المنحل بس، من الكون كله، واحنا بالصلاة ع النبي اللي حنعلم العالم ما يتكلمش الكلام الفارغ ده تاني

الافعال: يا اما قانونية، يا اما خارجة عن القانون، الخارج عن القانون اختصاص القسم بتاعه، الجريمة جريمة، وتتعامل على انها جريمة، مافيش جريمة بشرطة اسمها الارهاب، عشان مكافحة الارهاب دي بتتجاوز مكافحة الجريمة لمكافحة الافكار واحنا مالناش فيه الكلام ده

ثم احنا ما عندناش ارهاب، ما اللي فجر الكنيسة واللي فجر شرم الشيخ كان امن الدولة المنحل.. احنا مالنا احنا؟

ماحدش لا يكلمنا عن الامن والامان، ولا يكلمنا عن الاستقرار، ولا عن الارهاب.. اللي كان بيزعزع الامن هي الشرطة، واللي كان بيهدد الاستقرار هم رجال الاعمال الحرامية، واللي كان بيعمل الارهاب هو امن الدولة المنحل

يبقى اييييه؟

يبقى محتاجين حاجة اسمها

1- امن الشعب

2- شغلتها تحمي امن الشعب من العناصر الفاسدة في الشرطة اللي بتزعزع الامن وتعتدي على المواطنين، وتراقب رجال الاعمال الحرامية اللي بيهددوا الاستقرار، وتطارد فلول امن الدولة المنحل المتورطين في الارهاب

3- زي ما اقترحت نعمل ميثاق لمبادئ الثورة واهدافها بما يخدم مصالح الشعب، السلطة للشعب، وشوفوا بقى، يا يبقى هو الدستور الجديد، يا يبقى ميثاق منفصل الناس تصوت عليه ونديه لبتوع امن الشعب دول ونقول لهم شغلتكم تنفذوا ده 

امن الدولة المنحل كان شغلته يراقب ويعتقل ويعذب اي حد مناوئ للنظام

لا بقى، امن الشعب شغلته يراقب الناس اللي مناصب قيادية وفي ايدها صناعة القرار عشان يطلع منهم المناوئ لارادة الشعب واهداف الثورة.. ويسلمه للقانون. 

عارفة انا حتموته تعذبوا حد

معلش.. حنجيب لكل واحد فيكم مخدة يضربها

مافيش مراقبة على مواطنين تاني، الرقابة تبقى على صناع القرار واللي في موقع مسئولية، لصالح الشعب ومبادئ الثورة ودستور الشعب اللي حيصوت عليه مادة مادة ويوافق عليه

ولازم يبقى فيه ترابط ما بين ثقافة الشعب وعقيدة الجيش وبقية اجهزة الدولة خاصة جهاز امن الشعب

ما ينفعش تبقى ثقافة الشعب بتكره اسرائيل وامريكا، وعقيدة الجيش اللي بتدرس في الحربية: اسرائيل هي العدو، وامريكا بتكره الجيش، وجهاز امن الدولة المنحل بيتعاون مع اسرائيل وامريكا ضد الشعب.. دي خيانة عظمى

حد يفهمهم ان اسرائيل وحشة، وامريكا وحشة، واحنا حلوين، وما يعملوش فتنة طائفية تاني دي حاجة غلط كده

في كل الاحوال

اذا كنتوا حتوزعوا عناصر امن الدولة المنحل غير المتورطة في جرائم على بقية الاجهزة، تفهموهم ان الشعب حلو وامريكا واسرائيل وحشين

اذا كنتوا حتحولوا بيت الاشباح لفندق خمس نجوم ويتحول امن الدولة المنحل الى امن الشعب وحماية الثورة تفهموهم برضه ان الشعب حلو وامريكا واسرائيل وحشين والناس اللي في موقع المسئولية وصناعة القرار دول شغلتهم خدامين للشعب، من النهاردة مافيش باشا، الشعب هو الباشا، الشعب هو الباشا

مش احنا كنا عايزين جهاز لحماية الثورة؟ خلاص.. نقلب الشراب ويتحول لجهاز حماية الثورة او جهاز امن الشعب

انا مقدرة ان الناس حتقول لي دول مجرمين، دول حيحموا الثورة؟

طيب، هم جزء منهم مجرمين قوي لازم حيتحاكموا، وجزء منهم مجرم كاجوال حيدخل في نطاق العفو العام، هو مجرم عشان متبرمج على برنامج اجرام، نبرمجه على برنامج الثورة، وحيبقى مجرم برضه في حماية البرنامج اللي نازل له.. اصل اوفر قوي السلمية اللي احنا فيها

ده اقتراح فيه بناء على اقتراح بلال 

ولو ان انا بشكل شخصي، احب انهم يتوزعوا على اجهزة اخرى ومافيش واحد فيهم يبقى بيشتغل مع زميله، زي الفصل الفاشل، كل واحد فيهم يتوزع على بقية الفصول عشان يتعلم الادب من اللي حواليه، لان برضه قعدتهم مع بعض بتعلمهم قلة الادب

في كل الاحوال... جهاز امن الدولة اتحل خلاص... ده الواقع

احنا حليناه

we are the bad cop

وعذبناهم

دلوقت هم اتحولوا من جهاز، الى مجموعة من البلطجية، وفي ايدينا نفضل نعذبهم لحد ما نقضي على شأفتهم

مطروح قدام فلول امن الدولة التفاوض مع

the good cop 

اللي زي بلال وناس كتير من رأي بلال، حياخدوهم في اودة تانية، ويفتحوا لهم التكييف، ويجيبوا لهم شاي وكيك ويقولوا لهم: ساعدني عشان اقدر اساعدك.. ده انا حايش فرج عنك بالعافية

يجيبوا هم بالراحة كده كل المستندات اللي ضد الشعب، وينضموا الى "التائبين العائدين"

اه.. بلال

the good cop

حيسميهم "الشرفاء"

انا

the bad cop

حاسميهم التائبين العائدين

ويمضوا على الاعترافات اللي احنا عايزينهم يمضوا عليها واحنا حنعتبرهم شهود، وحنشوف لهم شغلانة شريفة، بس حيشتغلوا عملاء للشعب، سوا بقى يشتغلوا عملاء للشعب باننا نوزعهم في الاجهزة المختلفة مدام مدمنين تجسس كده

او نعمل لهم جهاز مخصوص للعمالة لصالح الشعب.. اذا كان ضروري عمالة يعني

واوعى يفتكروا اننا حنغفل عنهم، فرج لسه موجود.. 

وبالمناسبة بقى.. كنيسة اطفييييح... اللي انتوا هديتوها.. والناس اللي زقيتوهم يصلوا الفجر فيها.. حتتبني تاني في مكانها، على حسابكم، والمسلمين حيروحوا ان شاء الله يحطوا حجر الاسااااس، وانتوا واللي زقيتوهم حتتشأمظوا

كفاية نجاسة بجى

هي مديرية امن حلوان منين؟

-----------------------

انا مش فاهمة الجيش، الناس نفسها الجيش يطلع لها بيان عسكري مرقم واللي يقوله واحد لابس بدلة ظابط، ويبنوا لهم الكنيسة مكانها

ما يعملوا لهم اللي هم عايزينه

اهو في الموضوع ده البطئ ما ينفعش يا باشا.... انجز

ومش فاهمة التلفزيون، بيقول مظاهرات اقباط، وفيه نسبة محجبات ومنقبات وملتحين رافعين مصاحف وصلبان في المظاهرة كبيرة قوي

ليه بيقول مظاهرة اقباط؟

عموما عصام شرف اتكلم معاهم وقال لهم الكنيسة حتتبني مكانها والجيش بيتعهد بملاحقة المجرمين اللي عملوا كده

سواء اللي هدوا الكنيسة، او اللي عملوا مكانها مسجد ضرار وراحوا فيه صلاة مش مقبولة ان شاء الله

مافيش امن دولة حيتقبل له صلاة طول ما حاله نجس كده

الناس في المظاهرة يا عيني قعدوا يقولوا تحيا مصر وفرحوا

انما الجيش يعني سهل يفرق اللي اغتصبوا الكنيسة، هو مافيش عصيان كهربائية ولا ذخيرة في الهوا في حلوان ولا ايه؟ ولا دي بس عشان المتظاهرين ولا يتم استخدامها ضد امن الدولة؟ 

يعني نروح احنا نفضهم ولا ايه؟

باقول قلتوا لي امن دولة حلوان فيييين يا جدعااااان، الظاهر لسه عندنا شغل

اخر يابني 

the good cop 

شوية

منكم لله، مش عارفين ننام احنا

وبعدين غباوة كمان؟ ماحدش بيتكلم عن فتنة طائفية خالص، المظاهرة قدام التلفزيون مليانة سلفيين بالتحديد

واكتر مواقع الاقباط تشددا بتتهم امن الدولة

وجربتوها قبل كده اكتر من مرة وما نفعتش... هو انتوا حافظين مش فاهمين يا امن الدولة؟ 

طب الجيش حيتدخل الليلة يا عمدة ويخلصنا من وجع الدماغ ده ولا نروح احنا بكرة الصبح بدري؟ 

------------------------------

الضحية الجديدة حتبقى المجلس الرئاسي

مين اللي قال ان المجلس العسكري مش موافق عليه؟ 

زياد قال المجلس العسكري ما ردش

مش ممكن بعد العشرة دي لسه مش عارفين المجلس العسكري، المجلس العسكري الآه بتاعته آه، واللأ لأ.. لما بيسكت يبقى بيقول: انتوا وشطارتكوا.. لو اقنعتوا الناس بيه يبقى على خيرة الله

ده حتى واضح يعني ومش مراوغ في اي حاجة

اللي حصل يوم 6 مارس

حابتدي من ليلة ستة مارس، يعني خمسة مارس بالليل، الشباب راحوا عند لاظوغلي عشان قالوا الحاجات بتتحرق هناك

استنوا شوية وبعدين مالك قال ان جه شيخ سلفي بعربية فاخرة لم كل السلفيين وقال لهم توكلوا على الله فما فضلش غير بتاع اربعين واحد فقرروا يروحوا تاني يوم

جيت صحيت لقيت مالك بيتصل بيا وبيقول لي احنا رايحين فيه ناس قابلتني وقالت لي الحاجة بتتحرق جوة وفيه صوت تكسير، فقلت له انا جاية وكتبت على التويتر قلت لهم احنا رايحين عند لاظوغلي

رحنا العدد في الاول كان بسيط وفضل يتزايد شوية بشوية. انا شخصيا ما حسيتش ان الجيش ممانع اننا ندخل، بس كان محتاج عدد اكتر عشان يحس بالضغط، لما العدد زاد دخل بتاع عشرة كده وخرجوا قالوا لنا مافيش حاجة، بصراحة ما صدقناش، لان اللي دخلوا دول دخلوا في غفلة منا ومش احنا اللي اخترناهم

كان فيه بقى بتاع خمس عيال كده من الاول مش مظبوطين، منهم اتنين مميزين قوي، واد عمالة ابص في وشه واقول: سبحان الله، يخلق من الشبه اربعين، الواد ده شكل ظابط امن مركزي كنا بنشوفه في الاربع ايام الاولانية، ومعاه واد صايع كده، شكله مخبر، وكان فيه مخبر تاني اتعرف عليه مالك، كان لابس ازرق، وقف شوية كتير كده، وبعدين خرج

فيه ظابط وقف وقال عايز اكلمكم فالناس حاولت تسمعه، قام الكام واد اللي واقفين في الاول قعدوا يقولوا له اسكت اسكت، فبقية الناس استكبرت قوي ان ظابط جيش يتكلم والناس تقول له اسكت، المهم

بعدها الناس راحت تعمل لجان شعبية عشان بلغهم ان فيه بلطجية جايين، وده بعد ما الواد اللي لابس ازرق واللي مالك اتعرف عليه مشي بحوالي ربع ساعة كده، مافيش يدوبك الناس عملت اللجنة الشعبية، شوية صغيرين والبلطجية هجموا فعلا، والناس قعدت تصفر عشان يتصدوا للبلطجية

البلطجية كانوا جايين بسنج ومطاوي وسيوف، كانوا بتاع خمستاشر واحد كده

فاغلب الناس راحت تحاربهم، وشوية من الناس راحوا للجيش يقولوا له: انتوا مش ناويين تعملوا حاجة؟

فظابط جيش قال احنا ما نقدرش نسيب هنا، احنا علينا انهم ما يجوش هنا

فواحد قعد يقول: اصل دول اهالي.. فواحد تاني قال: يعني ماحدش يقنعني ان الاهالي نازلين من بيوتهم يضربونا عشان مش عاجبهم اننا بنتظاهر، فظابط جيش قال: لا طبعا مش اهالي.. وبعدين قال: انتوا عايزين تخشوا ليه؟ المكان متشمع بالشمع الاحمر

فقلت له طب ورونا

المهم فضلنا واقفين كده، وهم قالوا، طب اختاروا انتوا منكم بتاع عشرين واحد يخشوا، ما احنا دخلنا عشرة قبل كده وطلع لكم شيخ بدقن وانتوا ما صدقتهوش، يعني نعمل ايه؟

فيه ناس قبل هجوم البلطجية كانت اميل للاقتراح ده، وكان الاغلبية ابتدوا يقتنعوا بالكلام ده، بس بعد ما البلطجية هجموا الناس كلها غيرت رأيها، وانا قلت لظابط: طيب لو المكان متشمع صحيح، ليه البلطجية هجموا، حضرتك عارف ان البلطجية دول امن دولة، عارف ولا مش عارف؟

فسكت

قلت له طيب، امن الدولة مش عايزنا ندخل ليه؟ لو مافيش حاجة جوة امن الدولة مش حيستموت كده عشان ما يدخلناش. قال لي: طب ايه العمل دلوقت؟ انا ما اقدرش ادخل كل العدد ده جوه، ماهو زي ما انتوا خايفين من البلطجية انتوا كمان بينكم مندسين وفيه مستندات مهمة، ما نقدرش ندخل كل دول، وبعدين احنا بنقول لكم ان مافيش حاجة جوة

فقلت له بس مجية البلطجية علينا بتقول ان فيه حاجة جوة، وانت عارف ان دول امن دولة.. فسكت

انا شخصيا حتى بعد هجوم البلطجية ما كانش عندي مانع اننا نختار عشرين واحد، بس الاغلبية غيروا رأيهم بعد ما البلطجية هجموا، وقالوا اكيد فيه ظباط ومساجين جوة وهم مخبيينهم، امال باعتين لنا البلطجية ليه؟

اه نسيت.. قبلها فاطمة بتقول انها بلغت واحد من الظباط ان فيه بلطجية جايين في السكة، وبتقول ان الظابط اتاخد قوي، وراح بلغ اللي معاه

بعد شوية قالوا لنا، طيب حندخلكم بس حيدخل عشرة عشرة، دخلوا اول عشرة ويادوبك طلعوا وقبل ما يتكلموا، الواد ظابط الامن المركزي والمخبر اللي معاه، زودوا تحرشهم بالجيش، ويزقوا في الحديد، فيه عيال هابلة سخنت معاهم، بس الاغلبية كانت بتقول سلمية وبتحاول تحوشهم، والواد الشرطة ده كل ماحد يحاول يحوشه يفضل يجعر ويشلق ويقول: اللي خايف يروووح... اييييه

ونقول له ما تزقش، يفضل يقول اييييه عايزين اييييه

ويقعد يتخانق مع الجيش ويقول للعسكري: انت بتحمي الطواغيت

طبعا العسكري مافهمش حاجة، مافيش حد اسمه طواغيت جوه

والواد المخبر اللي معاه قعد يجعر راخر ويزق في الجيش ولما نسكته يقول: الجيش ضربييييي ويشد في هدومه ويقول الجيش ضربنييييي.. ماحدش ضربه والله، انا واقفة وشايفة، هو عمال يزق في الحديد ويتخانق مع الجيش وماحدش ضربه ولا جه ناحيته الكداب ده

فجأة لقينا صواريخ بتضرب في السما في ميدان لاظوغلي، فحسيت ان الجيش قلق كده شوية، واحنا سألناهم ايه ده؟ قالوا لنا مش عارفين.. وواحد قال: "دي صواريخ كأن ناس بتحتفل بس بيحتفلوا بايه؟" بعد شوية جم بتوع الشرطة العسكرية وقفوا شوية وبعدين مش عارفة راحوا فين، بعدين نزلت قوات صاعقة الظاهر كان فيه قلق على البوابة هم شافوه من شوية بلطجية، انا مش عارفة ايه البلاغ اللي جالهم عن البلطجية، الظاهر جالهم خبر ان معاهم رصاص ولا ذخيرة ولا حاجة، لان بان عليهم قلق شديد قوي من مجية البلطجية

المهم، وانا واقفة على السور الحديد عشان امنع الناس انها تزق، واحد قال يا جماعة ظابط الجيش اهو واقف، بيقول لكم اللي عايز يدخل ييجي يمين، اعملوا صفين صف ستات وصف رجالة وكله حيدخل

فانا بصيت للواد الشرطة ده، وقلت له انت عايز تخش لو عايز تخش فعلا تعالى من هنا، اه، وكان واقف واحد تاني، بس ده شكله امين شرطة، هههههههههههه والله العظيم، عمال يتدلدل من السور ويزق السور، كل ما ارجعه واقول له ما تزقش السور يجعر لي برضه ويقول لي: انت مااااالك... انت اللي بتزقييييي... اوعيييي..

بس دول مش امن دولة، اقصد التلاتة دول الظابط والمخبر وامين الشرطة، شكلهم مش امن دولة، شكلهم شرطة بس غالبا امن مركزي، او جايبينهم من قسم ولا حاجة

نرجع للظابط، قلت له انت عايز تخش تعالى من هنا: برضه راح مجعر من غير سبب وقال لي: انت مااااالك.. انا واقف هنا

قلت له ما الناس حتدخل من هنا، ظابط الجيش اهو واقف بيدخل الناس

راح ده نازل من على السور واول ما شاف الناس خلاص بيتفتح لها الجنب اليمين عشان تدخل منه راح هو والمخبر وامين الشرطة وكام عيل تانيين جروا السور الحديد، الظاهر ناس تانية سخنت معاهم راحت قعدت تجر السور وانا حاولت امسكهم عشان امنعهم ما عرفتش، ولقيت واحد وسط الزحمة دي طلع حاجة طويلة كده شبه الحبل ولا حاجة

حتشوفوها في الفيديو ده في الاول

وبعدين الناس دخلت من الفتحة اللي اتفتحت وهم رافعين ايديهم، وبعدين سمعنا صوت ناس من ناحية البوابة، وبعدين سمعنا ضرب نار في الهوا، فقعدنا نجري، جرينا ناحية البوابة، وورانا الجيش بيضرب ذخيرة في الهوا وبيحرك الدبابة، لقينا البلطجية هاجمين علينا بالمولوتوف وشميت ريحة غاز مسيل للدموع مع هلتهم، الجيش شاف البلطجية من هنا، وجات له هيستيريا ذخيرة، واحنا اتعملنا ساندوتش (غادة صاحبتي قالت لي ان ساعتها ظابط جيش قال لها انه سمع ان عسكري اتقتل منهم على ايد البلطجية - الكلام ده طلع اشاعة، بس هم افتكروا كده فعلا) المهم يعني البلطجية ضربوا الجيش وضربونا، والجيش راح ضرب البلطجية وضربنا وبعدين نطلع احنا نستخبى على السلالم يروح طالع ورانا ويقول لنا انزلوا ويضرب شوية عشان ينزلهم، ننزل يروح البلطجية ضاربين علينا يقوم الجيش يقول: لا خلاص.. اطلعوا اطلعوا انتوا
وبعدين يضرب شوية عشان يطلعهم لحد ما دخلنا وزارة العدل، وفيه ناس جريت في الشوارع
المهم بعد ما فضوا الشارع والبلطجية هربوا راحوا داخلين لنا وزارة العدل، فاحنا خفنا منهم وقعدنا نطلع السلالم ونجري منهم وبعدين انا وبنتين تانيين رحنا مستخبيين ورا الحيطة، قام جالنا عساكر جيش قالوا لنا انتوا مستخبيين هنا ليه، رحنا مصرخين في وشهم، قالوا لنا بتصرخوا ليه؟ فحبيت انا اجري منهم رحت جارية عليهم فواحد منهم قال لي: انا عايز افهم انت بتجري ليه دلوقت؟ قلت له: عشان حتضربونا.. قال لي: مش حنضربكم ما تخافيش... تعالوا معانا.. فقلت له: طب ما تضربش، قال لي: والله ما حاضرب، تعالي بس عشان ننزلكم ونأمنكم من البلطجية
راحوا منزلينا ومودينيا على الرصيف على الجنب، لقيت بقى مالك عدلي وبثينة ومجموعة كده، الجيش قالوا لنا خلاص ما تخافوش، اقعدوا هنا.. فقعدنا، قام لما قعدنا قالوا لنا: يعني عاجبكم كده؟ مبسوطين انتوا كده؟ ما احنا ما كناش عايزين ندخلكم عشان فيكم الكويس وفيكم الوحش.. فراح مالك عادلي قال لظابط من الظباط: معلش حضرتك.. خلي بس بالك انت من نفسك، قام الظابط قال له: يعني ايه اخلي بالي من نفسي قصدك ايه؟
راحت بثينة قالت لهم: كده تسلمونا للبلطجية؟ قام الظابط قال لها: احنا؟ احنا مش بنقول لكم امشوا؟ قام ساعتها جه عسكري مصاب، قام واحد من المتظاهرين دكتور راح يعالجه، قاموا لما شافوا العسكري مصاب اتعصبوا كلهم، الجيش يعني، وقعدوا يقولوا: عاجبكم كده؟ وعسكري من العساكر قال: شعب ابن متنـ...
فواحدة من البنات اللي كانوا مستخبيين معايا ورا الحيطة قالت له: تقوم تضربونا عشان احنا كده؟ فما ردش عليها
بعدين الظابط قال: اللي عايز يمشي يمشي، فمالك وانا وداليا والبنت التانية قلنا حنمشي، فقالوا لنا طب حنبعت معاكم حد يطلعكم، وبعدين الظابط قال لبثينة وبقية القاعدين لو تحبوا تمشوا ابعت معاكم حد انتوا كمان، فبثينة كامل قالت له: لا انا خايفة من البلطجية، انا حاقعد معاكم، فقال لها طب خلاص براحتك، وبعت معانا واحد يطلعنا، واحنا ماشيين البنت التانية طلعت التليفون ما اعرفش بقى كانت بتتكلم ولا كانت بتصور فعلا، بس المهم يعني ان واحد من الجيش، هو مش ظابط ومش عسكري، اللي هو في النص بينهم ده، راح مزعق لها وقال لها هاتي التليفون، فقالت له: لا مش حاديك التليفون.. ده بتاعي
قال لها: ما تكتريش معايا وهاتي التليفون انا جاي لي اوامر
انا ومالك قعدنا نقولها ادي له التليفون يشوفه يا ستي، قالت: لا ده بتاعي.. عايز تاخده خدني معاه، قال لها طيب زي ما تحبي، تعالي معايا. وراحت معاه.
المهم مشينا احنا، لقينا واحد لابس ملكي كده الجيش قال له: طلعهم لو سمحت، وراح مطلعنا
اخدنا تاكسي ونزلنا على وسط البلد
بس كده
-----
انا قررت احكي الحكاية دون تعليق ودون تحليل، وحتى كلامي عن ظابط الامن المركزي مش تحليل، انا فعلا مشبهة عليه، واديكوا شفتوا تصرفاته

بعد كده عرفت ان بثينة كامل قبضوا عليها، وانا مش عارفة ازاي وليه يقبضوا عليها؟ اذا كانت هي كانت قاعدة معاهم وقالوا لها نوصلك قالت لهم لا انا قاعدة معاكم

ايه بقى؟ يتقبض عليها ليه؟

لا امن الدولة حيتحل يعني حيتحل.. ويشتغلوا في المطافي

قبل اي حاجة: انا ان شاء الله اخلص البوست ده واتوجه الى لاظوغلي

عايزين اعداد كبيرة تتوجه الى هناك لان الناس هناك سامعين صوت تكسير وفيه حرايق قبل ما حد يسأل فين لاظوغلي، عند ميدان التحرير، عارف المجمع؟ فين مدخل القصر العيني من عند التحرير؟ في شارع جنبه على ناصيته هارديز، ادخله وامشي شوية.. حتلاقي لاظوغلي

انا سمعت وجهة نظر بلال فضل امبارح مرتين عشان افهم هو ليه شايف ان امن الدولة يمكن اعادة تشغيله تحت اشراف قضائي وانه ما ينفعش يتحل لأني باثق في رأيه وهو الحقيقة عنده حكمة ودي من الحاجات القليلة، ان الواحد يبقى نضيف وحكيم، سيدنا عمر عنده مقولة شهيرة بس مش فاكرة نصها، لكن معناها: اعمل ايه يا ربي؟ المحترم عبيط، واللي مش عبيط مش محترم.. في النادر لما تلاقي حد محترم ومش عبيط

المهم، سمعت كلامه اكتر من مرة

بس ما اقتنعتش خالص

1- يعني ايه اللي اتعود على القتل والتعذيب مش حيعرف يعمل غيرهم فبدل ما يروح يقتل ويعذب خصوصي ويبقى خارج عن القانون نشغله احنا ونخلي القضاء يشرف عليه؟

القضاء يشرف على ايه بالظبط؟ يشرف على القتل والتعذيب؟ 

اولا هو مش يا اما يشتغل في القتل والتعذيب بتاع الدولة يا اما يشتغل في قتل والتعذيب الخصوصي.. فيه خيار تالت: يشتغل شغلانة شريفة وياكل لقمة حلال، بمعنى انهم يتوزعوا على الاجهزة الاخرى، ويتوزعوا على اجهزة ما ينفعش يقتلوا ويعذبوا فيها، يعني ما يروحش مكافحة مخدرات ولا مكافحة جرائم ولا كل الكلام ده لانه حيمارس امراضه على المواطنين وبدل ما يلفق لهم تهم الارهاب حيلفق تهم المخدرات والجرائم، يروحوا حاجات ينفعوا بيها الناس، مافيه اختراع اسمه مطافي ومرور وسياحة وجوازات (اهو الجوزات ده حيخليهم يمارسوا هوايتهم في التلصص على الناس من غير اذية)، ومافيش حاجة اسمها اصله اتعود! اتعود يبقى مجرم فيا عيني مش حيعرف يعمل حاجة تانية؟ اتعود على الاجرام يتحبس، طب على فكرة وكل اللي في السجن دول اتعودوا على تجارة المخدرات والتزوير والدعارة والقتل والبلطجة والنشل والسرقة، ما نشغلهم باشراف قضائي بدل ما نحبسهم، اشمعنى يعني دول اللي يتحبسوا؟

ثانيا: لو خلاص مافيش قدامي خيار غير اني يا اما اشغله يا اما يعمل عصابة، انا عندي يعمل عصابة ويبقى خارج عن القانون ونقبض عليه ونحبسه احسن ما اورط كل الدولة في تشريع جرائم وكمان احط له قاضي يشرف عليه، ونجيب له لجنة طبية بقى كمان عشان يعرف يعذب من غير ما الفريسة تفطس في ايده

ده خيار مطروح ده؟ ان الدولة تعمل جهاز اجرامي باشراف قضائي والمواطنين يدفعوا له ضرائب عشان نحاول نقنن ميول بعض الشواذ للجريمة والتعذيب والقنص ونشغلهم لحسابنا بدل ما يشتغلوا ضدنا؟ احنا عايزين نعمل دولة ولا عايزين نعمل عصابة؟ 

لو محتاجين يتعالجوا نعالجهم على حسابنا، ما ياما دفعنا فلوس للجهاز ده عشان يعذبنا ويقتلنا ويزعزع استقرار امننا ويكسر نفس شعبنا، ندفع لهم فلوس عشان يتعالجوا اولى.. انشالله نعمل لهم اعانة بطالة يا سيدي ولا اني اشغلهم مجرمين بمرتب

وبعدين برضه يعني: حيبقى عندنا ميت الف محسن السكري؟ طيب يا ريت.. محسن السكري في السجن وواخد اعدام على فكرة، مش بياخد مني مرتب وبيتقال له يا باشا

2- ماحدش يحط لنا مقارنة مع الاف بي اي

الاف بي اي ده جهاز حقير ومنحط ومتورط في قتل مارتن لوثر كينج ومالكوم اكس وكل الناس الحلوة دي.. يا ترى كان واخد اذن قاضي عشان يقتلهم؟ وانا لا عايزة مصر تبقى زي امريكا ولا اسرائيل، انا نفسي بلدي تبقى محترمة.. متهيالي من حقي؟ مافيش بلد محترمة تأوي مجرمين وتشغلهم لحسابها

يا ريت الامريكان يعملوا ثورة ويحلوا الاف بي اي، والله ممكن نبعت لهم مليونية ولا اتنين نساعدهم

وبعدين احنا عندنا جهاز الامن العام، وده كفيل بحماية المجتمع 

3- معلش.. حد يذكر خمس انجازات وطنية عملها جهاز امن الدولة

طب تلاتة

طب واحد

بلال كان بيقول انه يعرف ضباط امن دولة عملوا حاجات كويسة... ايوة يعني ايه اللي ممكن ظابط امن دولة يعمله كويس حتى لو كانت نيته كويسة؟ الكويس مش من اختصاص جهاز امن الدولة ولا من مهامه حتى لو كان فيه ناس فيه نفسها تعمل حاجة كويس.. جهاز امن الدولة تخصصه الوحش بس

اكوس حاجة بعض ضباط امن الدولة ممكن كان يعملوها انهم يخفوا التعذيب، او انهم يدخلوا للناس اكل من ورا الظابط الوحش، او انهم يشوفوا ام الواد اللي محبوس في غيابات الجب على الباب فييجي على جنب كده ويقول لها: اطمني يا حاجة.. حيروح النيابة بكرة تقدري تشوفيه

طب ايه؟ دي شغلانة؟ ده لو اتقفش بيعمل الحاجات دي حيترفد ويروح في ستين داهية

ايوة يعني ايه الاختصاصات الكويسة لجهاز امن الدولة؟

الجرائم - سواء منظمة او غير منظمة - شغلة مكافحة الجرائم (وماحدش يقول لي ارهاب عشان مافيش حاجة اسمها ارهاب، الفعل يا جريمة يا مش جريمة، بصرف النظر عن كون الجريمة نابعة من افكار ولا نابعة من تار شخصي او اي اهداف، الجريمة جريمة والتفتيش في النية مش شغلانة القانون، ارهاب ده مصطلح استعماري، في البداية استخدم من دول الاحتلال ضد المقاومين، وبعد كده استخدم من دول الاحتلال برضه لتبرير اعادة احتلال بعض الدول، وبعدها استخدم من قبل الانظمة الديكتاتورية للسيطرة على الشعب، مافيش حاجة اسمها ارهاب، فيه فعل يتصنف جريمة او مش جريمة، وماحدش في الدنيا يتحاسب على افكاره، افرض واحد ماشي في كل حتة يقول: النصارى عباد الصليب.. النصارى الكلاب.. اللي اللي.. بس عاش ومات وهو بيقول القرف ده وما عملش حاجة، يتقبض عليه لبعدين يعمل جريمة؟ طيب ماهي دي شغلانة امن الدولة، انه يشوفك بتقول ايه، ويصنف كلامك، وعلى اساس تصنيفه لكلامك يقبض عليك لبعدين تعمل حاجة مش على هواه، دي شغلانة دي؟ دي خدمة للوطن دي؟)

مع ذلك، التنظيمات، والمخططات، الداخلية والخارجية، شغلانة المخابرات.. اه، المخابرات تشتغل شوية بدل براذر موسليمهود براذار موسليمهود، وقاعد مع الامريكان والاسرائيليين يتفق معاهم سنة 2007 على حرب غزة 2009/ 2010.. اه اه.. عمر سليمان، عمر سليمان خطط للحرب دي مع الامريكان وقالهم ما توقفوش الضرب الا لما احنا نقولكم عشان عندنا عملاء في داخل غزة واول ما يوصل لنا ان حماس سلاحها انتهى، ساعتها حنقول لكم بطلوا ضرب، وقال لهم انا زارع خلايا سرية في ايران لزعزعة استقرارهم والاطاحة بنظامهم

ادخلوا على وثائق ويكيليكس.. الواد اسانج لما لقى ناس في الاول بتقول عمر سليمان كويس قال في نفسه: يخرب عقلكم يا عبط.. خدوا خدوا، وراح منزل وثائق قد كده عليه، غير اللي كان منزله قبل كده وكانت فضايح، بس احنا مش فاضيين له دلوقت، جايين له جايين له، بس نخلص اللي في ايدنا

وبدل ما يعملوا الحاجات الخايبة دي، يتفرغوا لنا شوية وياخدوا بالهم من بلدهم ومن حماية بلدهم بدل المرازية في مخاليق ربنا وخدمة اسرائيل وامريكا حيث بقى ان عمر سليمان خلاص ما بقاش رئيسهم وهو كان عزيز قوي على اسرائيل وامريكا وبينهم محبة وعشرة.. خلاص مشي، يشتغلوا بقى، وانا وصلني انه ما كانش محبوب في الجهاز للسبب ده، اهو مشي اهو، حمد الله على سلامتكم

كفاية قوي جهاز المخابرات للتنظيمات اللي بتقولوا عليها ارهابية دي، سواء جاية من برة او جاية من جوة، وبصراحة بعد الثورة اتضح اننا ما عندناش اللي بتقولوا عليهم ارهابيين دول، بالذات فيما يخص الفتنة الطائفية، المسيحيين والسلفيين بينهم بوس واحضان اوفر اوفر اوفر.. ما شاء الله يعني مش عايزة احسدهم، بس الحب اللي بينهم عامل زي فيلم امر اكبر انتوني بتاع اميتاب بتشان، مأفورين قوي: حبيبي.. انت ما طلعتش ارهابي؟ 

- حبيبي.. انت ما طلعتش عميل لامريكا؟

وراحوا واخدين بعض بالحضن وقعدوا يرقصوا هندي في الغابة.. على الله بقى ابن عمها الشرير ما يطلعلناش في نص الرقصة، لازم نحل جهاز ابن عمها الشرير عشان يعرفوا يبوسوا بعض ويخلصوا الفيلم ده لأنه طول قوي عايزين نقلب على النشرة بقى ونشوف شغلنا

هو مش ستميت جهاز حيتجسس علينا ويقرفنا في حياتنا، ما فيه مخابرات عامة ومخابرات عسكرية وامن عام بقى ارحمونا شوية هو احنا في سجن؟ 

وانا قاعدة اهو.. مستنية في التعليقات واحد يقول لي بالنقط كده الحاجات الكويسة اللي عملها امن الدولة و"الضباط الشرفاء من امن الدولة" ههههههههههه دي عاملة زي الحرامي الشريف وتاجر المخدرات الجدع 

واظن فيه حرامي شريف وتاجر مخدرات جدع، لكن الظابط الشريف في امن الدولة ده بيبقى شكله ايه؟ شريف ازاي يعني؟ شريف يعني عنده في ذمة في اداء وظيفته؟ يبقى ابن كلب مش شريف ولا حاجة

ولا شريف يعني ما عندوش ذمة في اداء وظيفته؟ طيب وليه نجبر واحد على انه يشتغل شغلانة تأنب له ضميره؟ ما نشوف له شغلانة حلال بدل المشي ده

3- على فكرة.. فلوس امن الدولة دي فلوسنا.. والفلوس اللي بتدخل على ضباط امن الدولة دي مال حرام، وبيدخل على بيته مال حرام، وبيأكل عياله مال حرام، وما نبت من حرام فالنار اولى به

وفوق ده كله ده مالنا احنا، فيه شعب في الدنيا يدفع فلوس لجهاز عشان يتجسس عليه ويعذبه ويلفق له تهم ويعمل له بلبلة في داخل البلاد ويفجر له كنائس ويموت له ناس من التعذيب ويذله ويهدده ويخوفه؟ 

يعني محسن السكري اخد فلوس من سوزان تميم عشان يقتلها؟ لو حيشتغل في عصابة يبقى احسن، على الاقل مش حياخد فلوسه من ضحيته بالفردة كده، وفردة يساعده عليها القانون كمان وباشراف قضائي

4- انا موافقة جدا على عدم قبول استقالات ظباط امن الدولة، استقالات ايه دلوقت؟ مافيش استقالات طبعا

ومافيش مدبحة برضه.. اقصد اننا لو حاسبنا كل واحد بيشتغل في امن الدولة الحساب اللي يرضي ربنا حيطلع كل اللي بيشتغلوا فيه مجرمين بما فيهم العساكر والمخبرين، وحتى اللي في البوفيه اللي بيقدم الشاي والقهوة للضابط وهو سامع صريخ واحد بيتعذب وما بيفتحش بقه وقابل على نفسه ياكل عيش وجنبه ناس بتتظلم

بس كده مش حينفع المحاسبة دي، لان خلاص، هو مبارك كان عامل تشكيل عصابي علينا وواخد شرعية 

مش حينفع نعمل لهم المدبحة دي - ولو انهم يستاهلوها والله، كفاية انهم يقعدوا يتجسسوا على الناس ويسجلوا مكالماتهم ويشوهوا سمعتهم ويطلعوا عليهم اشاعات ويعملوا عليهم حملات اعلامية ويسجلوا مكالماتهم ويطلعوا صور بناتهم وهم لابسين مايوه ويلعبوا بدماغ الشعب ويخلوه يشتم في ناس بريئة ويعمل لنا ازمة دبلوماسية مع بلد عمرنا ما كان بينا وبينهم غير كل خير واخوة ومحبة ومودة ودمنا اختلط في حرب تحريرهم وحرب اكتوبر ولما اي حد منا كان يروح بلدهم كانوا بيشيلونا في عينيهم ولما تسافر فرنسا يستحيل تدخل مطعم صاحبه جزائري ويسيبك تدفع حساب .. الا صحيح، حد لقى ملف الجزائر يا شباب؟ وحد لقى ملف تشويه سمعة البرادعي؟ 

اهو.. مش ده البرادعي؟ مش بلال بيحب البرادعي؟ طب انا ما باحبوش لاسباب تانية خالص غير الاشاعات الكاذبة اللي روجها عليه امن الدولة (عشان مش مؤمن بمجانية التعليم، وعشان لما اتعمل عليه حملة ما خاضش معركة وخد بعضه وخلع، معلش انا فلاحة وما احبش البني ادم لما يلاقي هجوم عليه يطلع يجري).. مين بقى اللي طلع على البرادعي ان معاه جنسية تانية - ده كل الناس مقتنعة بالحكاية دي، مين اللي قال عليه عميل امريكاني وهو اللي ضيع العراق مع ان المعلومة الحقيقية ان الراجل فعلا ما عملش اي حاجة وحشة للعراق ومشوه قبل فتح ملف ايران لان خبرتهم معاه في ملف العراق خلتهم يقتنعوا انه مش حينفعهم الراجل ده؟ مع انه ما اخدش موقف نضالي ولا حاجة، هو قال اللي شافه، قال: ما لقيتش لحد دلوقت اي اسلحة دمار شامل

اهو.. قال "لحد دلوقت" يعني ما قالش مش ممكن يبقى فيه، ولا خطب ضد الامبريالية ولا حاجة، قال اللي شافه، وعشان كده ما عجبهمش

مين اللي اقنع كل سواقين التاكسي والبوابين والبياعين وسواقين الميكروباص ان امريكا هي اللي باعتة البرادعي في الوقت اللي بيقولوا فيه زويل محترم مع ان زويل هو اللي معاه جنسية امريكاني وبيشتغل في الادارة الامريكية مستشار لاوباما وواخد جايزة اسرائيلي وبيقول العلم مالوش وطن؟ اهو كل سواقين التاكسي والبوابين والبياعين ما يعرفوش الكلام ده

انا اسيب جهاز بيغسل مخ الناس كده واقول اصله حيعمل تشكيل عصابي؟

ما يعمل تشكيل زفت على دماغه والشعب يحاربه ويقف ضده احسن ما اسلم دماغ الشعب والكرامته وسمعته تسليم اهالي لمجموعة مجرمين "متعودين على التعذيب ومش حيعرفوا يعملوا حاجة تانية" ما انشالله ما عملوا حاجة تانية، اللي ياكل على ضرسه ينفع نفسه، عايزين يعيشوا بالحلال يتعلموا شغلانة تانية، مش عايزين يبقى يخشوا السجن

5- حيتم المحاسبة، بس مش المحاسبة العادلة.. لو حاسيبناهم حساب عادل كلهم حياخدوا اعدام وده مش حينفع كده، كده حتبقى مدبحة فعلا

يبقى فيه معايير للمحاسبة

- نوع الجريمة: قتل/ تعذيب افضى الى الموت او الى عاهة (آسفة لكل اتعذبوا، ولكل اللي انضربوا من امن الدولة وانا منهم، انا انضربت بس ما اتعذبتش، وعن نفسي خلاص، حاسة ان ربنا اخد لي حقي، ومش عايزة ادور على اللي ضربني، خصوصا انهم كانوا مغميين عيني ومش حاعرف هم مين ههههههههه، اصلهم كانوا هم ما كانوش هو، مش حينفع كل واحد مد ايده على مواطن يتحاسب مدام لا قتله ولا تسبب له في عاهة والا كلهم حيتحبسوا مش حنلاقي مكان في السجن) اضرار بالغ بمصالح الوطن، زي تعريض الوطن للخطر الداخلي او الخارجي، او احداث بلبلة من شأنها زعزعة الامن والاستقرار (هههههههه سبحان الله، التهم اللي كنتوا بتلبسوها لنا لبستكم بس المرة دي لبستكم عن حق)

- حجم المسئولية عن الجريمة، يعني اللي بيدي اوامر غير اللي بينفذ، مثلا، تفجير كنيسة القديسين، اللي ادا الامر مسئول اكتر من اللي نفذ الامر، كمان التنفيذ درجات، واحد اخد امر وقال لواحد تاني هات لي واد صايع اخليه يفجر الكنيسة، اللي راح اللي جاب الواد الصايع مسئوليته اقل من اللي طلب الواد الصايع، لكن كمان الشخص اللي فجر عن بعد مسئوليته اكبر من اللي ادا الامر، ومقاول الانفار اللي راح جاب الواد الصايع، لانه ارتكب جريمة بايده... مش حينفع تحاسب حد ضلع في الجريمة لكن مش من اختصاص وظيفته انه يعرف اهدافها، يعني اللي جاب القنبلة عارف هي جاية ليه ولو مش عارف، هو جايب قنبلة وده كافي، لكن مش شرط اللي جاب الواد عارف هم عايزين يعملوا بيه ايه... الخ

- فيه بعض الممارسات اللي لازم يا جماعة - على شناعتها وبشاعتها - يتم اصدار عفو عام عنها، زي مراقبة التليفونات وتشويه السمعة والافتراءات على الناس واعراضهم، وكل الحقارات دي مدام لم تلحق ضرر بدني ولا ضرر بالوطن، لان مش حينفع تحاسب على حاجة زي دي والا فعلا بقى عامل البوفيه حيتقبض عليه، مش بس عامل البوفيه، ده بتاع كشك السجاير اللي جنبنا اللي شغلوه غصب عنه وكان بيراقب الطلبة ويخلي ودنه معاهم وهم بيتصلوا بالتليفون من عنده، وكانوا بيشاوروا له على عيال معينة يحط عينه عليهم.. سواقين التاكسي اللي كانوا بيجيبوهم ويقولوا لهم انشروا وسط الناس الكلام الفلاني، وبرضه من ضمنهم سواق تاكسي في اول الثورة قعد يؤدي دوره بشكل كامل لحد ما طبطبت على كتفه وقلت له: ما تعملش كده... اصلهم حيمشوا ومش حينفعوك بحاجة، وساعة الجد هم حيهربوا ومش حينوبك حاجة ويمكن ساعة المحاسبة رجلك تيجي معاهم... راح التفت لي وبص لي شوية كده وبعدين سكت بقية السكة

حنحاسب الناس دي؟ مش حينفع 

6- اللي حيتحاسب حيتحاسب، واللي حياخد عفو حياخد عفو ومش حيشتغل في امن الدولة تاني ابدا، لانه عايز ينتقم، لا بقى، معلش، مدام بلال فضل بنفسه قال: اللي اتعود على التعذيب والقتل والقنص مش حيعرف يعمل حاجة تانية.. ده كلام يخوفنا اكتر اننا نحتفظ بالجهاز ده، وكمان نفضل نشغل فيه نفس العناصر اللي احنا شنشلناها وشرشحناها وخلينا اللي ما يشتري يتفرج عليها؟ ده احنا خلينا المية منهم بقرش، حيعملوا فينا ايه لو قدروا علينا؟ مدام هم في تكوينهم القتل والتعذيب والقنص، النوع ده من البشر انتقامي وشراني، ولو اشتغل تاني في جهاز زي ده حيحط خطة ويستنانا لما ننام ونغفل عنه وينتقم من الشعب كله، ما يتحطوش في اماكن تمكنهم من الانتقام منا ابدا

ومش حيتقطع عيشهم، ومش حتتقبل استقالتهم، حيشتغلوا في اجهزة اخرى، وبتوع شرطة السياحة بياخدوا فلوس معقولة قوي وتسترهم، ماهم مش لازم يدخل لهم مليون جنيه في الشهر يعني، ومش لازم يمارسوا هوايتهم في الاذية والضرب والاهانة، واذا غاوين يمسكوا مسدس، يشتغلوا في الحراسات، غاوين يتجسسوا يشتغلوا في المخابرات، طبعا قبل ما اسمع عمر سليمان عمري ما كنت اقترح ان امن دولة يشتغل في المخابرات عشان كنت فاكرة ان الذكاء شرط من شروط العمل في المخابرات، بس بما ان الحكاية طلعت براذر موسليمهود، فيعني ظباط امن الدولة السابقين ما تفش عليهم الكلب يعني.. وبرضه باقول نعمل لجان شعبية مخابرات استوحياطا احسن البلد بتمر بمرحلة حرجة واي عك حيودينا في داهية

نساعد يا شباب.. نساعد.. ماهو احنا لافعين البلد دي على كتفنا 

والله ما فاهمة اساسا الاجهزة دي كلها بتعمل ايه لما احنا اللي بنشيل ونحط ونحمي ونكشف وننظم ونصلح بوابير جاز... واخدين منا فلوس على الفاضي

هييييه، يالا، خليهم ياكلوا عيش، احسبوها اعانة بطالة 

7- بلال قال المجلس العسكري مش حيسمح بحل امن الدولة

:)

بس احنا حنسمح... واحنا ما نهونش عليه يكسر خاطرنا ويبيتنا زعلانين ونفسنا في حاجة ما عملهاش لنا، ما هو كل شوية يقول لنا: خشوا يا عيال بقى، فاحنا لما بنزن عليه وندبدب له على الارض ونقول له: والنبي والنبي والنبي عشان خاطري عشان خاطري.. في الاخر بيقول: طب خلاص.. بس تخشوا بقى.. حاشيل الدش والله ومافيش فسحة يوم الجمعة لو ما سمعتوش الكلام

-------------

اخيرا: المسيحيين كانوا حاسين بالاضطهاد انهم ممنوعين يشتغلوا في امن الدولة

ها؟

لسه حاسين بكده؟ انا شخصيا حاسة اني مضطهدة ومهانة انهم حاسين ان المسلمين يطلع منهم كل الاجرام ده لكن ما تجيش من مسيحي فعشان كده مش حيشغلوه ههههههههههههههههههههه

الا صحيح

قصدهم ايه ولاد الكلب دول؟ يعني ايه ما يشغلوش مسيحي؟ قصدهم ايه؟ قصدهم ان المسيحيين اطيب مننا؟ ولا انبه مننا؟ ماهو مش عايز من ضابط امن الدولة غير انه يبقى غبي وشرير... انهي واحدة اللي شايفينها موجودة في المسلمين ومش موجودة في المسيحيين؟ 

:((

لا زعلت بجد

-------------

يااااااااا رب سكينة فؤاد تقبل منصب وزارة الثقافة

يا رب

يا رب

يارب 

يا رب

يا رب

يا رب

يا رب

يا رب

اهو كده نضمن ان اللوحة والاثار اللي اتسرقوا مننا حيرجعوا، وكمان حتعمل لهم فضيحة المطاهر

اعادة هيكلة جهاز الشوربة؟ مستحيل مستحيل مستحييييييييييييل

عاجل: الشباب عند لاظوغلي ومحتاجين اعداد، نرجو التوجه الى هناك فورا

مواااهاهاهاهااااااااعععععععععععععععع بدل رقص في امن الدولة هيهيهيهيهيييييييييي

لا بجد.. بدل الرقص بتعمل ايه في امن الدولة.؟

وده وزير داخليتنا الجديد

استغفر الله العظييييم.. يا لطيف يا رب يا لطيف..

هيهيهيهيييييييييييييععععععععععععععععع
عمرو موسى امنجي

تحديث هام:

ردا على الفتنة الطائفية التي احدثها امن الدولة في حلوان، مجموعة من السلفيين والمسيحيين يقفون الآن وقفة سلمية ويحتاجون لمزيد من الأعداد... سلمية سلمية

امن الدولة عند قسم ثاني مدينة نصر في ش الخليفة القاهر الموازي لطريق النصر

وثيقة لقوها امبارح في مقر امن الدولة

وفيه فيديوهات كتير انا مش عارفة الاحق، واخبار كتير، واخبار مؤكدة من الصحفي حسام الوكيل بتقول ان الاسكندرانية افرجوا عن العساكر عشان غلابة وسابوهم يروحوا وقبضوا على الضباط، وبصراحة انا مش عارفة الاحق على الشعب ده، وبصراحة اكتر انا اساسا ما استاهلش اكون واحدة من الشعب ده، وبصراحة اكتر واكتر الناس دي جامدة اخر حاجة ومحسسيني ان انا جيت البلد دي غلط وان كتر خيرهم انهم راضيين اني اشيل جنسيتهم ويعدوني واحدة منهم

وانا باحاول امشي وراهم وابقى دلدولتهم وحتى مش عارفة اجاريهم بقى بصراحة

----------------------------

هم كل شوية يوجعوا دماغنا ليه ويحسسونا ان الحاجة لو اتعملت المجرة كلها حتنفجر وان البلد دي عبارة عن مفاعل نووي واي حركة فيها حتقوم القيامة وبعدين نعملها بنفسنا وتطلع سهلة؟ 

الفراخ الدستور الفراخ الدستور.. اهو المخلوع رحلناه بنفسنا... ولا لقينا كتاكيت حتى

تسيير الاعمال تسيير الاعمال.. اصل لو حد غير شفيق مسكها الوزارات حتنهار... اهو مشي.. فين الانهيار

اعادة هيكلة الشرطة دلوقت مستحيييييل مستحيييييل مستحييييل محتاج وقت.. وقت.. وقت يا جماعة

وقت ايه انا عايزة افهم؟

اعادة هيكلة الشوربة تتعمل زي عملية هيكلتها بالظبط

كانوا بيمسكوا الدفعة، يشوفوا مين اللي امه ربته ومافيش امل فيه انه يبقى ابن كلب ابدا ويودوه المطار والسياحة والحراسات، ولو عنده ضمير ومافيش امل يسرق ابدا يودوه المطافي 

ويشوفوا مين اللي رباية وسخة ويصدروه لنا في الاقسام والامن المركزي ويشوفوا مين المريض عقليا ويودوه امن الدولة ومكافحة الجرائم

هي هي نفس الخطة دي يتم اتباعها بس بالعكس

اللي في المطار والسياحة والحراسات يصدروه لنا

وابن الكلب اللي اهله ما ربوهوش يربيه الاجانب والمسئولين اللي هو حيحرسهم، ويبقى منه بقى للخواجات، يقل ادبه على واحد معاه باسبور امريكاني، يتربى بعدها كويس ويعرف ان الوساخة لا تفيد

يطلع جنانه على المسئول اللي هو بيحرسه يتشيع

قوم يبقى عبرة وبقية زملاته يعرفوا ان الادب فضلوه عن العلم

واللي اهاليهم ربوهم خلقة ربنا هم اللي يتعاملوا معانا

بس كده

صعبة دي؟

مش عايزين تعملوها؟ خلاااااااص

بلااااااش تعملوها

نعملها احنا... هوبا؟ 

لجنة حماية الثورة

انا لسه راجعة من التحرير، اللي ما راحش التحرير في يوم الجمعة يبقى ما عداش على مصر

المهم

دلوقت انا طبعا الخوف واكلني جدا من موضوع الانتخابات الرئاسية قبل البرلمانية دي، وفيه ناس خايفة من البرلمانية قبل الرئاسية، عشان بيقولوا ان مش حيبقى فيه تكافؤ فرص

والمجلس العسكري مش عايز مجلس رئاسي

طيب، ما احنا ممكن نعمل لجنة اسمها لجنة حماية الثورة، واللجنة دي هي اللي تشرف على الاداء، سواء كان الرئاسي الاول، او البرلماني الاول، ولجنة حماية الثورة دي لازم يبقى فيه قضاة مستقلين عشان تضمن الحماية، واللجنة دي تبقى هي السلطة اللي فوق الرئيس المنتخب او البرلمان المنتخب لحين وضع الدستور وبعد كده كل واحد يروح لحاله

اللجنة دي يبقى فيها تلات قضاة مستقلين، وليكن زكريا عبد العزيز، ومحمود الخضيري، ونهى الزيني

واعضاء ائتلاف شباب ثورة الغضب - كلهم، ليه كلهم؟ عشان هم تشكيلة من مختلف التيارات السياسية من اقصى اليمين لاقصى اليسار، او اذا ما كانش كلهم هم فيما بينهم ينتخبوا واحد من كل تيار، بس انا شخصيا افضل التسعتاشر واحد يبقوا موجودين

وتلاتة حقوقيين، وليكن فيها عايدة سيف الدولة، واحمد سيف الاسلام، وحسام عيسى

قبل ما حد يقترح كتاب ومثقفين وادباء.. الخ، وانا باقول لكم بلاش المثقفين، ليه؟ عشان يستحسن ان المثقف يبقى مستقل ومراقب فردي من الخارج على اداء لجنة حماية الدستور، وبلاش يدخل في لجنة عشان المثقفين والكتاب والادباء، هو مش بيشتغل غير لما بيقفل الاودة على نفسه، كده احسن عشان ما يبقاش مقيد، اداءهم الفردي بيبقى احسن من الاداء في الجماعة، دي طبيعتهم

وطبعا مافيش داعي للسياسيين او القابلين انهم ياخدوا مناصب

اللجنة دي تتشكل، وتعمل مع بعضها بيان توافقي، باهداف الثورة، من غير ما تجتمع مع المجلس العسكري، وينشروا البيان ده في كل وسائل الاعلام ويعرضوه على الرأي العام، ومن خلال هذا البيان التوافقي يتم مراقبة عمل الحكومة، ثم عمل المنتخب، سواء كان الرئيس الاول او البرلمان الاول

حصانة اللجنة دي حصانة شعبية، بمعنى، الشعب مسئول يحمي كل افراد هذه اللجنة من الضغط ومن التهديد ومن النقصان ومن اي تهديد مادي او معنوي يمكن ان يمارس عليهم من قبل اي سلطة في الكونيات

على اللجنة ان تراقب الجهة المنتخبة سواء كان رئيس او برلمان للتأكد من الالتزام بمبادئ الثورة

بيان ائتلاف شباب ثورة الغضب بشأن استقالة الفريق احمد شفيق

يتوجه إئتلاف شباب الثورة بالتهنئة لشعب مصر العظيم الذى تواصل ثورته تحقيق أهدافها بانتصار جديد للإرادة الشعبية والوطنية باستقالة الفريق أحمد شفيق وتكليف الدكتور عصام شرف بتشكيل الحكومة .. والإئتلاف إذ يتوجه بتحية التقدير والشكر للمجلس الأعلى للقوات المسلحة على إستجابته لهذا المطلب الذى يمثل خطوة هامة على طريق إسقاط بقايا النظام ، فإننا ندعو د. عصام شرف رئيس الحكومة الجديدة الذى يأتى تكليفه بفضل الضغط الشعبى للإسراع بتشكيل حكومة تكنوقراط وطنية بالتشاور مع القوى الوطنية والشبابية والمجتمعية بحيث تخلو من أى أسماء تنتمى إلى النظام السابق بسياساته وأشخاصه وحزبه .

والإئتلاف إذ يترقب الإعلان عن تشكيل الحكومة الجديدة فى أقرب وقت ممكن فإنه يدعوها للبدء فى وضع جدول زمنى لإستكمال تحقيق أهداف الثورة وعلى رأسها :

1- حل جهاز أمن الدولة وإعادة هيكلة وزارة الداخلية برئاسة وزير مدنى .

2- الإفراج الكامل عن المعتقلين السياسيين .

3- المحاكمة العاجلة والعلنية لكل من أصدر أو نفذ أمر بإستخدام العنف وإطلاق النار ضد الثوار بدءا من 25 يناير .

4- إستكمال ملاحقة الفاسدين الذين نهبوا ثروات الشعب المصرى ومحاكمتهم .

5- الدعوة لإنتخابات مبكرة للمجالس المحلية .

6- بحث المطالب الإقتصادية والإجتماعية للشعب المصرى وأولها تطبيق الحكم القضائى بحد أدنى للأجور مع وضع حد أقصى بنسبة (1: 15) ، وحل إتحاد العمال الحالى وإعادة إنتخاب إتحاد يمثل عمال مصر بنقاباتهم المستقلة .

كما نؤكد مجددا على أهمية مد الفترة الإنتقالية بقيادة مجلس رئاسى وتأجيل مواعيد الإنتخابات التى أعلنها المجلس الأعلى للقوات المسلحة بالتوازى مع إطلاق الحريات العامة ووقف العمل بقانون الطوارئ وتعديل قانون الأحزاب بما يضمن حق تأسيس الأحزاب بمجرد الإخطار .

ويعلن إئتلاف شباب الثورة عن تعليقه للاعتصام الذى كان ينوى البدء فيه مساء الجمعة ووقف المسيرات من مناطق متعددة إلى ميدان التحرير وأشكال التصعيد الأخرى ، والإكتفاء بمظاهرة كبيرة فى ميدان التحرير إحتفالا بالإنتصار الجديد للثورة وبذكرى أربعين شهداء الثورة ، وندعو د. عصام شرف رئيس الوزراء لمشاركتنا غدا بميدان التحرير .

ويؤكد الإئتلاف على ترحيبه بالمساهمة بأى أدوار يمكنه المساهمة فيها مع الحكومة الجديدة بعد تشكيلها وفى إطار إلتزامها بإستكمال أهداف الثورة ، بما يحقق إستعادة الهدوء للأوضاع الأمنية والإقتصادية للوطن

عمرو البحيري كان معايا في الاعتصام

عرفته.. كان قاعد جنبي في الاعتصام

خمس سنين؟ خمس سنين محكمة عسكرية؟ ليه؟

هو ايه اللي حصل؟ القصة الكاملة هنا، بس برضه مش فاهمة ايه اللي حصل؟

شهادة الدكتورة ليلى سويف هنا، حنفترض ان عمرو لما انضرب عمل اي حاجة، شتم، تف، اتخانق، ماهو مضروب يعني، وطبنجة ايه اللي حيحوزها ده؟ ما يحوشوا ظباط الشرطة اللي بيضربوا سواقين الميكروباص وبعدين يقولوا اصله كان بيمر بازمة نفسية والواد الظابط اللي ضرب سواق الميكروباص حيرجع لشغله تاني، ما اخدش ولا تلات ايام حبس

ايه العمل دلوقت؟ هو اتحكم عليه من غير حضور محامي، انا بطني وجعتني على الصبح وكركبت، خمس سنين؟ خمس سنين؟ الولد مستقبله ضاع

حد يعمل حاجة، حد يكلم المجلس الاعلى للقوات المسلحة، حد يتصل بالمشير، حد يعمل حاجة، كريم لازم يطلع

حد له اتصال بالمجلس؟

فيه حاجة قانونيا ممكن تتعمل؟ مش ممكن يقعد خمس سنين في سجن عسكري، مش ممكن.. مش ممكن ابدا، ده مستحيل، حد يعمل حاجة

وخلينا بقى نقضي الست شهور دول بالطول ولا بالعرض خلينا نخلص

استغفر الله العظيم يا رب

احنا عايزين مجلس رئاسي.. مش نافع كده.. والله ما نافع.. والله العظيم ما نافع كده ابدا

احنا مشينا مبارك وعايزين نحل امن الدولة عشان نخاف من الجيش؟ هو احنا اتكتب علينا الرعب يعني؟ نعمل ايه اكتر من اللي عملناه؟ شهدا وقدمنا، مصابين والناس اصاباتها اتسببت لها في اعاقات، نوم في الشارع ونمنا، كل ده عشان نتعامل المعاملة اللي تليق بينا، نعمل ايه تاني؟

هو ليه ماحدش بيعاملنا كويس؟ ليه؟ ماحدش بيعاملنا كويس غير التوانسة والفلسطينيين عشان بيحبونا، طيب يعني خلاص كده؟ احنا حنفضل نتعامل وحش؟ ده لازم يعني؟

لأ انا مش قابلة على فكرة اللي حصل لعمرو ده، مش قابلة خالص، مش بعد كل ده تاني يحصل حاجات كده

وبعدين ليه مافيش صياح كفاية للجدع؟ انا عرفت بالصدفة

احنا عايزين نرفع صوره بكرة ان شاء الله، لازم يخرج، لازم يخرج

خمس سنين؟

لأ.. لا ما يقعدش خمس سنين في سجن عسكري لا... ولا اسبوع حتى

مين اللي اتحكم عليه بخمس سنين ايه؟

دلوقت انا لسه عارفة ان فيه حد من اللي كانوا بايتين عند المجلس معانا في الليلة السودا اللي انضربنا فيها اتحكم عليه بخمس سنين في محكمة عسكرية

ومش عارفة ادخل على التويتر عشان قفل على صباعي.. لا حاجة كده حابقى اشرحها لكم، يعني حادخل بكرة الصبح

ممكن اعرف التفاصيل؟

مين ايه فين ليه؟

الفرعونية قبل مجلس الانس؟ طب مجلس الانس ارحم

فضلت ادور على اول خيط الاقتراح بتاع الانتخابات الرئاسية قبل البرلمانية ولقيت ان مصدر الاقتراح العجيب ده هو القاضية تهاني الجبالي

طيب.. انا عندي كام سؤال دلوقت

التعديلات الدستورية مستمرة في منح صلاحيات خرافية في ايد الرئيس، وبصراحة دي اكتر حاجة ضايقتني في التعديلات الدستورية بس تجازوتها على اساس انها دستور مؤقت، ولسه حنعمل قانون احزاب، وقانون انتخابات، وفيه برلمان حيشرف وكدهون يعني

بس بالصلاحيات اللي بيديها الدستور للرئيس، واللي حتى لو كان مدني حيبقى القائد الاعلى للقوات المسلحة، ومافيش غير احنا وهو ثالثنا الشيطان

انا حاعمل ايه؟

اقولكم، مش انتخبتوني خلاص؟ انا رئيسة شرعية

حاسحب كل ميزانية الدولة، عشان ميزانيتها في ايدي، واوزعها على صحابي، وعلى وسائل الاعلام، وعلى بعض المعارضين، ومعايا الداخلية، وانا القائد الاعلى للقوات المسلحة، حتى لو المجلس العسكري ما عجبوش اللي انا باعمله مش حيقدر يعمل لي حاجة، لان انا مش مبارك، انا رئيس شرعي منتخب، ولو وقف قدامي البلد حتتقسم، وحتلاقي الاعلاميين اللي انا دافعة لهم فلوس من ميزانية الدولة بيهللوا على المجلس الاعلى ويقولوا عايزينها عسكرية، ووالنبي ماحدش يقول لي: هي سايبة؟ انتوا الثورة نستكوا نفسكوا شوية، احنا مسروق منا 850 مليار جنيه قابلين للزيادة، ده اللي اكتشفناه، لسه اللي حنكتشفه، ده غير اللي اتحرق من المستندات، حاعرف اجيب فلوس من تحت الارض، واي حد حيشتم الرئيس المنتخب اللي لسه بيتمتع بزخم عاطفة الحملة الانتخابية حيبقى عدو الوطن، واي حد حيكشف فسادي حيبقى من فلول الحزب الوطني اللي عايز يبوظ الثورة.. انا رئيس منتخب وشرعي وفي ايدي كل السلطات اللي في البلد، اعمل ما بدا لي وابقى قابلني لو حد عرف يعمل معايا حاجة

وبعدين انزل صحابي، اللي انا عايزاهم انتخابات برلمانية، واعمل البرلمان اللي على هوايا، وانا صاحبة السلطة الاولى في كل حاجة، وعمالة اكرر في اني صاحبة السلطة الاولى والوحيدة

خلاص كده عملت البرلمان اللي كله صحابي، والناس لسه بتحبني عشان انتخبوني

خلاص بقى، اعمل التعديلات الدستورية اللي انا عايزاها، واحط في الدستور الخوازيق اللي انا عايزاها، واسرق وانهب على كيف كيفي

مين بيراقبني؟

---------------

انا مش قاضية ولا بافهم في القانون، لكن سؤالي اللي ماحدش من امبارح عارف يجاوب عليه:

لما الرئاسية تبقى قبل البرلمانية، مين الجهة اللي حتراقبني؟ بلاش تراقبني.. مين الجهة او الجهات او الاشخاص اللي ممكن مصالحهم تتعارض مع مصالحي حتى، ولما تتضارب المصالح ده يصب في مصلحة الشعب؟

مين حيحاسبني لما اعمل ما بدا لي؟ ما ايدي على خزينة الدولة لوحدي، وايدي على الداخلية ووزيرها لوحدي، وممكن اغيره واحبسه واجيب له مصيبة لو ما عجبنيش، وايدي على القوات المسلحة لوحدي ولو القوات المسلحة اكتشفت حقيقتي اخرها حتعمل انقلاب عسكري، عايزين احنا نوصل الامور لكده؟ والاعلاميين الواطيين اللي احنا شايفينهم كلهم حينافقوني، وماحدش يقول لي بس عندنا ابراهيم عيسى يراقبه، لو حصل وابراهيم عيسى مثلا او بلال فضل او اي معارض اتكلم عن الرئيس المنتخب وغرد خارج السرب حيبقى: يووووو بقى، ايه الناس اللي مش عاجبها حاجة دي؟

ازاي ناس عاقلة تسلم دقنها لفرد واحد وتديله البلد على المفتاح عشان خايفة من نفسها لتنتخب برلمان غلط؟ يعني احنا واثقين في فرد يبقى له كل السلطات في الكون ومش واثقين في الشعب؟ 

وبعدين الشعب اللي حينتخب برلمان غلط يبقى حينتخب رئيس غلط كمان

والوقت اللي حنقضيه في الحملة الانتخابية لرئيس كويس ونقنع الناس ان عمر سليمان وعمرو موسى جزء من النظام، ينفع نقضيه في اننا نقول للناس اللي يديك خمسين جنيه، خد منه الخمسين جنيه وما تنتخبوش

الناس بعد الثورة سخنانة - ماهو انا بابرم في الشوارع وباتكلم مع الناس ولا انتوا ما بتعملوش كده زي ما اتفقنا؟ - واسهل انك تقنعها ان النائب اللي اداها خمسين جنيه ده ابن كلب حرامي وان الحزب الوطني ده وحش من انك تقنعها ان عمرو موسى وحش على فكرة، لان عمرو موسى وش جديد بالنسبة لهم وواحد مبارك ظلمه، وعمر سليمان وش جديد نسبيا وما عملش خير ولا شر قدامهم (عمل شر كتير من وراهم، بس اثبت بقى)، لكن النواب اللي في وشهم واساليبهم اللي اتبعوها معاهم بالبلطجية والفلوس بعد الثورة سخنوا عليهم وحسوا انهم انضحك عليهم بعد ما اكتشفوا ان دول اللي كانوا بيساعدوا في سرقة فلوسهم ويرموا لهم عضمة

وفي كل الاحوال، لو فرضنا ان الانتخابات البرلمانية حتبقى الاول، حتكون النتيجة برلمان خمسين في المية قديم وناجح بالوجبة والخمسين جنيه، وخمسين في المية ناجح بنزاهة، بلاش، تمانين في المية وحش وعشرين في المية كويس، برضه عندنا رقابة عشرين في المية على المجلس ده، وينفع نقدم فيه طعون ونأخر انتخابات الرئاسة ونقعد نفك ونربط فيه ستين مرة

يعني في عز مبارك فيه كام واحد محترم عرفوا يخشوا البرلمان سنة 2005، بعد ما مبارك مشي مش حنعرف نعمل برلمان نصه فيه ناس محترمة؟ 

لكن واحد، يا صابت يا خابت، وهي الحقيقة حتبقى يا خابت يا خابت، لان السلطة المطلقة مفسدة مطلقة، اي حد في ايده سلطة مطلقة، ان شاالله يكون من الصحابة، حيفسد، اكيد، واحد ينام مواطن يصحى له ملك مصر وهذه الانهار تجري من تحته، ايه اللي يخليه يتبرع طواعية بملك مصر يعني؟ 

وارجع واسأل تاني: مين اللي حيراقبه؟ مين اللي حيشاركه السلطة؟ مين اللي لو غلط حيحاسبه؟ حيخاف من مين؟

اذا قلت لي ننزل ميدان التحرير: اولا على رأي تامر موافي، الشعب مش فاضي كل ست شهور يعمل ثورة، ده تحميل على الناس فوق طاقتهم، ده شعب فقير وعايز يأكل عياله، ثانيا، لو انت واثق قوي في الملايين تعمل ثورة كل ست شهور، الاولى انك تثق في الملايين انها تنتخب برلمان كويس او حتى نص كويس، برلمان نص فاسد احسن من فرد يا يطلع فاسد يا يطلع كان نضيف وفسد لما لقى نفسه ملك مصر

انتخابات رئاسية من غير برلمان معناه اننا بنجيب ملك... فرعون، وبنقول له: احنا واثقين فيك انك راجل امير وطيب وابن حلال ومش حتستغل سلطاتك عشان احنا اصلنا مش واثقين في الشعب

-----------

طبعا الحل الامثل مجلس رئاسي، بس المجلس الرئاسي مش حيتعمل الا لو الشارع عايزه، والشارع مش مستوعبه اساسا، ومش عارف هو ايه مجلس رئاسي ده ويفرق ايه عن اللي دلوقت

عارفين ليه؟ عشان ماحدش بيكلم الناس اللي في الشارع، برضه رايحين قاعدين مع المجلس العسكري

طيب بقى المجلس العسكري لا يأتمر الا بأمر الشارع المصري، وما بينزلش على اي طلبات الا لما يلاقي ملايين بتقول له: اعمل كذا، فبيعمل كذا، دي مرجعيته الوحيدة... يعني المجلس العسكري بيحترم الشعب والقوى السياسية مش بتحترمه من الاخر، عرفتوا ليه بيحبوهم اكتر ما بيحبوكوا؟ عشان المشير بيتفرج على جمعة ميدان التحرير على الهوا وبيسمع الهتافات هتاف هتاف ويشوف الناس عايزة ايه، وانتوا رايحين تجتمعوا بالمجلس العسكري تقولوا له: ده شعب حمار وغبي، باصوا لنا السلطة واحنا نظبطه.. لهم حق يحبوهم هم اكتر

وبصراحة بقى يبقى عداهم العيب... والعيب لا في المجلس العسكري ولا في الشارع، العيب في اللي مديين ضهرهم للشارع وعمالين يفتكسوا اقتراحات للمجلس العسكري

يبقى حاجة من الاتنين

يا يتعمل قوائم بمرشحين نثق فيهم ويبتدوا من دلوقت ينزلوا الشارع ويعملوا حملاتهم ويتكلموا مع الناس ويتزامن معاهم حملات نتكلم مع الناس في يعني ايه برلمان، وليه اللي بيديك خمسين جنيه ده راجل وحش؟ 

يا اما برضه يتعمل لجان شعبية تنزل كل المحافظات والمناطق الشعبية تقنع الناس بالمجلس الرئاسي

وارجع برضه تاني للمطلبين الاساسيين، لو مشينا حكومة شفيق دلوقت وجبنا حكومة كفاءات حتعرف ازاي تدور ورا بتوع الحزب الوطني الفاسدين وتقدمهم لمحاكمات وتفككهم بالقضايا بدل ما تفككهم بالقمع والاقصاء

ولو جبنا حكومة كفاءات حيبقى وزير الداخلية مدني وقانوني وبناء عليه حيحل امن الدولة اللي بيخدم على الحزب الوطني، والداخلية ساعتها مش حتبقى تحت امر الحزب الوطني زي ماهو حاصل لحد اللحظة دي

انما احط البلد كلها في حجر فرد، ايا كان الفرد ده، عشان برضه الاستعلاء على الشعب والتكبر عليه

ما قلنا اللي مش عاجبه الشعب يشوف له شعب تاني ويرحمنا احنا

لا وقت للاكتئاب، فيه حل ان شاء الله

دلوقت قبل ما اقول الاقتراح اللي اتناقشت فيه مع الشباب على التويتر، لازم احنا نحل المشكلة عندنا ونرجع نتفق على حاجات موحدة بدل التشرذم ده

أولا: كلنا متفقين على يوم الجمعة

ثانيا: كلنا متفقين على التلات مطالب الاساسية: حل امن الدولة، اقالة شفيق وتشكيل حكومة كفاءات، محاكمة رؤوس الفساد وعلى رأسهم صفوت الشريف ومبارك واسرته

ثالثا: كلنا متفقين على ان الشارع المصري هو اللي صنع الثورة وهي ملكه بالاساس

بالعربي، اننا ندي ضهرنا للشارع ونبص للمجلس العسكري سواء بالخناق والاعتصام ابو الفين واحد او بالتفاوض دي قلة عقل، المجلس العسكري ماله ومالنا، هو علاقته بالشارع والشارع هو اللي بيقول هو عايز ايه ويتعمل له

وده اللي بيعمله الحزب الوطني دلوقت، حد سمع عن اعضاء الحزب الوطني بيعتصموا للمجلس العسكري ولا بيروحوا يتفاوضوا معاه؟ بتوع الحزب الوطني ماشيين في الشارع يكلموا الناس - على قد مخ اعضاء الحزب طبعا، يعني برضه كنتاكي وخمسين يورو والشباب والبنات بيعملوا قلة ادب مع بعض في الميدان وبتوع التحرير بيفتحوا مطاوي على بعض وحاجات كده يا عيني، معلش، طول عمرهم خيالهم فقير

يبقى بداية من النهاردة ولحد يوم الجمعة كل واحد يقرا البوست ده، خصيمه النبي يكلم كل يوم عشرة في الشارع

اكتر حاجة بتضايق المصري انه يحس ان فلوسه اتسرقت - ولو ان المصريين ما عندهمش مشكلة مع الفقر، بس عندهم مشكلة مع اللي ياكل حقهم - وانه يحس ان فيه حد بيذله، اللي هو امن الدولة

واظن كده الشارع افهم من كل السياسيين والنشطاء والنخب اللي بيغرقوا في التفاصيل والتنظير، لان هو ده لب الحكاية، مش هو: تغيير حرية عدالة اجتماعية؟ الشارع المصري مهتم بالعدالة الاجتماعية اكتر ما هو مهتم بالوفرة، يعيش فقير لو الفقر على كل الناس آه، يتسرق لا، لان ده ظلم، يحترم القانون ويسمع كلام القوات المسلحة عشان هو مؤدب اه، يتذل من امن الدولة ويتحاصر ويتراقب لأ. 

وبدل التكبر على مخاليق ربنا، والمعايبة على الناس عشان شايلين طبلة، ولا عشان فيه بياعين بياكلوا عيش، هو ده شعبنا يعني، مش عاجبك شوف لك شعب تاني، والبلد دي بلدهم والثورة ثورتهم، وهم اللي اتعوروا وماتوا، وحضرتك عايش وسليم اهو

وبدل ما تزهق الناس في عيشتهم وتحسسهم انك معطل لهم السكة وهم مش فاهمين مالك؟ انت مجنون ولا ايه؟ 

الصح ان كل واحد يتكلم مع الناس، بداية من النهاردة، الشباب اللطيف اللي نزل يبيض ويكنس، الشباب اللطيف اللي قاعد في التحرير دلوقت، الشباب اللطيف اللي قاعد على النت، عشرات الالاف من كل المحافظات، من دلوقت ننزل كلنا الشارع ونتكلم من النهاردة لحد يوم الجمعة الناس، وتحسبها لنفسك، لازم كل يوم تسجل سكور عشر بني ادمين على الاقل، وما تدخلش في مهاترات تضيع وقتك، وما تدخلش في مناقشات بيزنطية:

ارمي الكلمة في بطن الضلمة تحبل سلمى وتولد نور

حنركب ميكروباصات

حنطلع في المترو

حنقف مع الناس في محطات الاوتوبيس

وحنتكلم معاهم بطريقة واضحة:

المسئولين ايام مبارك سارقين منا نص ترليون جنيه، يعني 500 مليار جنيه، انت عارف يعني ايه 500 مليار؟ يعني 200 مليار يوفروا مية ويخضروا الصحرا ويشغلوا سكان العشوائيات في استصلاح الاراضي، و100 مليار يعملوا شبكة الصرف الصحي والمية ماحدش يتقطع عنه المية ولا المجاري تطفح تاني، و100 مليار يعملوا مساكن للشباب وسكان المقابر، والباقي نحطه في البنك وناخد فوايده، يعني لو الفلوس دي رجعت لنا في خلال سنتين مصر حتبقى جنة

بس الحكومة الموجودة دي اصلها بتاعة مبارك، شفيق ده بيقول على مبارك الرئيس، وابو الغيط فضحنا فضيحة المطاهر ايام غزة، وناس كتير من اللي في الحكومة دي بتوع مبارك، عشان كده فيه ناس كتير من الفاسدين بقى عندهم فرصة انهم يحرقوا المستندات ويحطوها في المفرمة، تلات شهور لحكومة شفيق كتير، على ما التلات شهور يخلصوا حيكون هو واللي معاه لحقوا يوفروا فرصة للفسدة في المؤسسات يحرقوا كل المستندات اللي تجيب لنا فلوسنا تاني

ده غير بقى السبعين مليار دولار بتوع مبارك، يعني 350 مليار جنيه

ما المصريين احسن ناس، وعندنا كفاءات كتيرة في كل حاجة، ليه يعني لازم يجيبوا ناس من بتوع مبارك؟ ما عندنا علماء وعندنا كفاءات وييجوا يديروا البلد عشان يعرفوا يرجعوا لنا فلوسنا ويطلعوا المستندات اللي تجيب لنا حقنا

وبعدين الحكومة دي فيها محمود وجدي، مش عايز يحل امن الدولة، شفت مدير امن البحيرة؟ قال بيقولك نقله، ماهو نقله عشان اتفضح على النت، كل بتوع الامن بيفكروا كده، وامن الدولة ده ياما ذلنا وقتل ناس، وبياخدوا ميزانية قد دماغهم، طب مش الجيش اولى بالفلوس دي؟ بدل ما ناخد معونة نسلح بيها الجيش، ناخد فلوس امن الدولة نديها للجيش، وامن الدولة يشوفوا لهم شغلانات تانية، في الجيش بقى، ولا حتى في المشاريع الجديدة اللي حنعملها لما الفلوس ترجع

وبعدين امن الدولة ده لازم يتحل بسرعة، دول ابتدوا يهددوا ناس ويضربوا عليهم نار، وبعدين هم اللي فجروا كنيسة القديسين، والموضوع ده اتفضح واتعرف وهم بيحققوا مع العادلي وبعدين سكتوا عنه ما حدش جاب سيرته، عايزين يولعوا البلد ويعملوا لنا مسلم ومسيحي، واخرتها ياخدوا الشاب السني ده اللي اسمه سيد بلال ويموتوه من التعذيب عشان يلبسوها له وهم اللي عاملينها، وهي ايه شغلانة امن الدولة بالظبط؟ في كل حتة امن الدولة بيراقب الناس، في كل مكتب في قطاع عام او خاص واحد بيشتغل مع امن الدولة وبيكتب لهم تقارير، في كل جامع وفي كل كنيسة واحد مدسوس من امن الدولة وبيكتب لهم تقارير، دول لهم ناس في المدارس يا جدع، وبعدين ما وراهمش حاجة غير المرازية في خلق الله والضرب والاهانة والاتاوات، ويا الغلابة يشتغلوا مرشدين يا يموتوهم زي الواد بتاع اسكندرية، الداخلية بتاخد تلت الميزانية، مش احنا اولى بيها الفلوس دي، طب لو محمود وجدي ده نيته صافية كان حل امن الدولة وشغلهم بقى في المطافي ولا في المرور، انما هو مش صافي، ولسه مخه زي مخ العادلي بالظبط وزي مخ اي ظابط شرطة، عايزين يذلونا

الحل ان حكومة شفيق دي تمشي ويجيبوا لنا ناس بتعرف ربنا وكفاءة عشان يجيبوا لنا حقنا من الحرامية اللي سرقوا فلوسنا ومن امن الدولة، وامن الدولة ده يشوفوا له شغلانة شريفة

الناس رايحة يوم الجمعة التحرير، حتبقى مظاهرة كبيرة، اصل المجلس العسكري عليه ضغوط من كل ناحية وانتوا فاهمين بقى رجالة صفوت الشريف ورجال الاعمال، لكن لو احنا نزلنا يوم الجمعة مش حنبقى بنعطل البلد وفي نفس الوقت يقدر المجلس العسكري يتحجج بعددنا الكبير عشان يساعدنا، هو كويس وعايز يساعدنا، بس محتاج اننا نديله حجة عشان يقول للغيلان اللي كانوا واكلين البلد: ماليش دعوة بقى الناس هي اللي عايزة كده، امال هو بيسبنا ليه يوم الجمعة فكرك؟ 

--------------

ملحوظات: اول ما تغلط في المجلس العسكري اعرف انك خسرت رصيدك عند اللي بتكلمه

ما تيأسش الناس وتقول: احنا كده ما عملناش حاجة، لأن كده حيحبط ويقول مش نازل، قول له، ايوة احنا عملنا حاجة كويسة ومبارك مشي، بس انا رئيس عصابة، مشيتني، المفروض تمشي العصابة بتاعتي كلها

حتلاقي بتوع الحزب الوطني بيهللوا عليك

تعرفهم ازاي:

1- صوتهم عالي ومهللاتية، مش بياخدوا ويدوا في الكلام، حتلاقيه اتشنج كده وقعد يقول لك: حسبي الله ونعم الوكيل فيك.. خربتوا البلد يا بعدا.. خربتوا البلد

تجاهله وما تتكلمش معاه، وما تعليش صوتك عليه، حيبان قصاد الناس ان انت العاقل اللي بتقول كلام موزون وهو اللي عمال يتشنج

2- بيتكلموا كويس قوي على شفيق وابتدوا مؤخرا يتجرأوا ويتكلموا كويس على مبارك نفسه

3- بيروجوا اشاعات، وده المفتاح اللي تعرف بيه اذا كان مجرد شخص مختلف معاك في الرأي ولا هو حزب وطني فعلا، حتلاقيه بيقول: انا شفتهم بعيني بياخدوا فلوس، شفتهم بعيني قاعدين مع اجانب، شفت الشباب والبنات بعيني والبت قاعدة وراسها على كتف الواد ومنظر استغفر الله العظيم

ساعتها تقول له: فيه ناس ماتت واكيد اللي مات ما اخدش فلوس، وعشان بقى ما نسيبش البلد والشارع للناس الوحشة اللي انت شفتهم بعينك دول، لازم ننزل، والا هم كده اللي حياكلوا البلد، انت عارف المجلس العسكري بيسمع اللي الناس بتقوله في الميدان وبيتكلم معاهم، لو سيبنا الميدان للناس دي يبقى ممكن هم يضيعوا البلد

حاجة اخيرة: بعيدا عن ان اللي يغلط في الشعب يبقى ابن ستين كلب الشهادة لله، ويبقى ما يفرقش حاجة عن امن الدولة اللي بيعامل الناس كده لأنه بيحتقر الشعب... لازم وانت بتكلم الناس تديهم فخر وطني، تقولهم المصريين احسن ناس، وعملنا حاجة حلوة، وكل المشاكل اللي كنا فيها دي طلع ان سببها مبارك وعصابته، ولما اتلمينا على بعض في الميدان بان اننا ناس كويسة ومتحضرة، ولازم نحافظ على اللي عملناه وما نسيبش عصابة مبارك تحاول انها تسيطر على البلد، ولازم بقى نساند المجلس العسكري في مواجهتهم عشان يلاقي دعم، وهو مش معقول حيقول لنا انزلوا اتظاهروا، بس هو بيسيبنا الجمعة ولو فيها ضرر ما كانش سابنا، خصوصا انها اجازة ومش عطلة للبلد

دي افكاري الاولية

طبعا ممكن نطور موضوع التخاطب مع الشارع ده اكتر، زي ستيكرات او ورق او اي حاجة، بس احنا من هنا للجمعة ما عندناش وقت، ولازم نبتدي من دلوقت، من يوم السبت كان لازم نبتدي، بس الفكرة ما جاتش على بالي الا دلوقت

الله المستعان