Tuesday 26 July 2011

حتى الآن.. لم يف بوعده سوى السلفيين

 تحديث:
الشيخ محمد عبد المقصود.. اقروا بيانه
عداهم العيب السلفيين كده
--------
شوفتوا بقى؟ قعدتوا تقولوا السلفيين هم المجرم الاثيم والقاتل اللئيم
ادي احنا قاعدين مستنيين البيانين بتاع ستة ابريل والاخوان وماحدش عمل التحرك الاول غير السلفيين
والله العظيم انا عارفة انهم اصلا غلابة وطيبين، هم بس بيتكلموا بالفصحى بتاعة الكتب القديمة فالناس بتفتكرهم بيشتموا، هم ما بيشتموش، هم بيتكلوا كده
بالنسبة للاخوان عندهم بيروقراطية ههههههههههه لازم يعملوا اجتماع وبتاع
مش عارفة ستة ابريل ملهيين في ايه؟ عمالين يعتلوا في البيان من امبارح
بالنسبة للصحف والاعلام.. اتقوا ربنا بقى، انتوا بتعملوا زي يوم 27 مايو لما لغينا الدستور اولا وانتوا قعدتوا تقولوا برضه الدستور اولا والمرة دي الناس قالت مش رايحين نطهر الميدان ولا حاجة وانتوا مصممين انهم رايحين يشتبكوا ورايحين لتطهير الميدان وجمعة الشريعة والكلام ده، حسبي الله ونعم الوكيل فيكم
احنا مستنيين الاخوان وستة ابريل بقى
وفيه ناس كتير مش عايزة المصالحة دي تتم، وفيه ناس عندها هلاوس ان نوارة اللي ورا المصالحة من امبارح وهم مطلوقين عليا، بتوع الفلول وبتوع الفلوس واللي عاملين ثوريين... كلهم ما وراهمش الا نوارة وواحد قال ان انا اخطر من المجلس العسكري :) وواحد قال: احنا كنا حاطين امل على انقلاب عسكري وجات نوارة بوظته بالبوست اللي كتبته! هههههههههههههههههههههههههه اه وربنا، انا اللي بوظت الانقلاب العسكري اذا كان 52 انقلاب يعقبه تخليه وانقلاب تاني وهو حاطط امل على انقلاب في الانقلاب المنقلب على الانقلاب؟ وكمان انا اللي بوظته؟ 
لا وشغالين في كل حتة: نوارة بوظت الانقلاب نوارة بوظت الانقلاب
طب الحمد لله اني انا اللي بوظت الانقلاب وانا اخطر من المجلس العسكري وانا عتريس انا بلوة سودا
الخلاصة يعني، يبدو اني ما بوظتش الانقلاب، يبدو ان اللي سعوا في المصالحة بوظوا خطة تانية مش عارفة هي ايه؟ بس ماحدش منهم مسحوب من لسانه واتكلم غيري، كلهم يعملون في صمت، واصلا المصالحة سهلة لان الخصومة كانت مبنية على سوء تفاهم من الطرفين والطرفين نيتهم سليمة
المهم.. عايزين بقى ربنا يوفقنا، وعايزين نعمل حملة مضادة لان الظاهر هم مش حيسكتوا على موضوع المصالحة وحيحاولوا يسخنوا بين الطرفين على قد ما يقدروا وناس جاية تقولي السلفيين بيشتموا فيكي قلت لهم: الله يسامحهم، ويبدو ان فيه مندسين بين الطرفين ناس بتزايد على تدين الناس في طرف وناس بتزايد على ثورية الناس في الطرف التاني، فعايزين بقى نتصدى لهم بكل ما اوتينا من قوة
ايدكم معايا
ونحب نشكر احمد الدروي وابراهيم الهضيبي واحمد سمير وابراهيم عيسى.. ما تشتموهم بقى معايا اشمعنى انا اتشتم لوحدي

35 comments:

Mahmoud Gebreel said...

انتي شرييييييرة
لأ انا طيبة بس المخرجين هما اللي حصروني في ادوار الشر =)

المصلحه said...

فتنه انقلاب والله عشتنا كانت هباب
رمضان علينا جي واحنا لسه مطلعناش الدور اللي جي
رمضان عليكم مبارك
:D

محمد نبيل said...

بيان حزب النور بيان رائع أحييهم عليه.

Sara said...

الثورة أولاً و مصر أولاً
و بعد ما نخلص من الثورة و ننجحها نبقى نفكر في الخلافات اللي بين الأطراف السياسية المختلفة
و بس كدا !

Unknown said...

باذن الله هتبقى جمعه امن و امان و مصالحه
ولو اعرف اجيب دراع افذافى هجيبه و اقول " ثوره ثوره الى الامام الى الامام "

علان العلانى said...

للثورة المضادة أوجه مختلفه ومنها ما يتسرب لبعض المخلصين للثورة نفسها فالحرص والخوف على الثورة أحينا ما يلبس ثوب اليأس واليأس هو هدف الثورة المضادة النهائى، المشير لوكان يستطيع لفعل ؟ ولكنه ببساطه لا هو ولا من ورائه يستطيع إيقاف الإيقاع الثورى
الثورة تستدعى مقولة النفرى "سلنى عن كل شىء ولا تسلنى عني" فكنه الثورة سرمدى المدى وبمقدار تعقد شفرتها يكون مداها الثورة المصرية فرضت بشروقها تهيب عصى على الاحتواء لا تستطيع العين التحديق فيها وأن تجاسرة بالشوق ستصاب بالعمى، الثورة ليست مفعول به أنها الفاعل بيد الفعال لما يريد هذه الثورة تحدى سافر لكل استراتيجيات قوى الهيمنة لمصر والإقليم فى وقت كانت تهىء نفسها فيه لجنى الثمار وكانت القدس ثمرة ناضجة حان قطافها،ولكن قيام هذه الثورة فى هذا الموقع من العالم بالنسبه لقوي الهيمنه وبالقرب من مصادر وموارد تتصارع عليها القوى العالمية لتحافظ على سيطرتها على مقدرات العالم قلب الموازين العالمية
وكل من شارك فيها كان صلاح الدين ، لقد فجرها الشباب بعدما ضاقت الدنيا عليهم وصار البعض منهم حلمه هو الخروج من مصر حتى لو اجتاز فى سبيل ذلك الأهوال ما يذكرنا برحلات سندباد البحرية التى يحفها الموت، ولم يكن هنا الخروج بحثا عن ست الحسن والجمال ولكن بحثا عن الوجود ذاته ، بحثاً عن مستقبل مجهول فى وعلى هامش بلاد الناس ولم يكن هذا بحث عن المستقبل وفقط ولكن هربا من التهميش والقهر وقلة القيمة كان هروباُ من أفق مطلم ومن قرية ظلم أهلها أنفسم بأستمرائهم الظلم فى زمان كما يقول تميم البرغوثى.. هون الأحرار منا فديتى.. وحكم الأنذال فينا ، لقد كسر الشباب القيد ، وما حدث قلب العالم رأس على عقب وهذا ما لا يصدقه الكثير من الناس أو لايدركوه بسب خضوع هذا الأمعه الوغد فهو لم يكن فقط احقر فرعون مر على هذه البلاد ولكنه كان لطخه قذره على ثوب مصر هو ونظامه العميل ازالها وطهرها الشعب بدماء أبنائه البرره
أن ما نشاهده من أفعال مستهجنه على أرض الواقع لا ينبع فقد من تفاعلات داخلية وحسب ولكنه مدفوع ومرصود بالثانية من قوى أعجزها الله وحده بقدرته عن تمزيق هذا البلد أرباً لقد وصفت الصحافه العالمية ما حدث فى مصر بالأزمه ولكنهم أدركوا بعدها أنها كارثة والسبب فى كل هذا هو إرادة هذا الشعب أن صوت الملايين ليس موجه لمجموعه من الرجال تحت مسمى المجلس العسكرى أنه موجه لقوى الهيمنه فى العالم التى تمارس ضغوطها على هذا المجلس بوسائل لا يعلمها الا الله وحده أن هذه المليونيات لن تخرج فقد اعتراضا ولكنها ستخرج احتفالا بميلاد الأمه وتلك المليونيات هى الحجة ، ومنة التمكين التى من بها الله على هذا الشعب بتوفيقه وهى التى تكبل أوغاد العالم الذين يتشدقون بالديمقراطية ويجعلون منها بحق كلمة حق هى الباطل بعينه، ولم يكن لهذا دافع ولكن ها هو السحر ينقلب على الساحر وها هى الديمقراطية تخرج من لعبة الصناديق المعلبة لتسير على قدميها عفية هادرة كالسيل تلقف فيما تلقف ما دبر بليل وتقدم تصويت حر ومباشر وفورى فى يوم واحد سجود شكر لله وكلمة حق أمام عالم مغرض وحاقد و فى وضح النهار الملوينيات هي أنعتاق لشعوب العالم المقهوره وليست لأن زيد ضرب عبيد أو عمرو خرج عن أدبه.. أنها إرادة هذه الأمة بشهادة شعب مصر على العالمين وللعالمين

حسن محمد على said...

جمعة "جعلونى مجرما" و"كمين بلطجية فى العباسية" سيناريو وحوار "الروينى" الذى لا اتذكر باقى اسمة

ahmed said...

هو كل تويتر قلب عليكي مرة واحدة كدة ليه
بيقولوا ان العسكر مش هيعمل انتخابات نزيه وذكئك مش مخليكي تفهمي الحتة دي وهما عاوزين انقلاب

حسن محمد على said...

اختلف فكريا مع السلفيين ,ولكن لا اشك لحظة فى صدقهم وعزيمتهم الصادقة

علان العلانى said...

فيما يتعلق بالشتيمة وقلة الأدب

يا نواره اذا لم يستهدفك أوباش الثورة المضادة فمن يستهدفون لقد وهبت نفسك لهذه الثورة، واعدائك هم بذاتهم أعداء الثورة فذلك شرف يسبغونه عليك رغم أنفهم. عندما نراجع النصوص الركيكة لمنتقديك نجد اربعة أنواع فمنها نصوص حقيرة لزجه تقطر حقدا وكراهية وهى لا تستحق الالتفات فخطابها بقذارته يستهلك نفسه والسبب العته العقلى والسقوط الأخلاقى، ومنها نصوص ساذجه تحاول أن تلبس ثوب النصيح المشفق وهى تدعى الواقعيه والحكمة فى زمن ثورى بطبيعته أتى ليغير الواقع لاليفسره، وهى فى هذا تتبنى خطاب هو بذاته الذى كان يعيق الثورة وتحاول إعادة انتاجه وتفعيله وهما نوعان نوع مسجون فى بنياته العقلية التى أصبح أسير لها فلا يستطيع منها فكاكا فهى وسائله المعرفية وهى نفسها الحجاب الكثيف في رؤيتة للثورة ، ونوع يغلب عليه نوع من الحسد لما فاض به عليك الله من حب الناس والقبول ومنها نصوص تحاول الاستفادة من شهرة المدونه بلفت الانتباه اليها ورؤية كلماتها فوق منبر مقروء والغالب عليها المخالفة وإيجاد مشكله لكل حل وهو أمر سهل ويسير فكل الحلول نسبية حتى يفصل فيها الواقع
ومنها نصوص يبدو اصحابها مشوشي الوعي يعبرون عن مشاعر متناقضة لايفهمون ما يكتب وإن قرأوا يتخبطون وهؤلاء عادة لا يعلقون على ماهو مكتوب اساسا ولكنهم يعبرون عن مشاعرهم ورؤيتهم العامة للأحداث ، ويصبغون عليك غضبهم لأنك فى نظرهم تشخيصا ينقذهم من التجريد ومحاولة إدراك المعنى فى كل ما يحدث

ثم نوع رابع مأدلج لا يرى الحقيقة الا فى النسخة الايديلوجية التى يصدر عنها وما تكتبيه فى نظره مجرد تخبطات عشوائية يتلامس بعضه مع ايدلوجيته الهادية ويضل بعضها بسبب قواك العقلية المحدوده فى نظره وثقافتك القاصرة فى مذهبه فهو يتكلم بلسان المعلم الناصح المشفق على البنت الساذجة الغير مقدره للعواقب
والحقيقة أن هذا هو بذاته ما يساهم فى جعل المدونة على ما هى عليه من حضور وقبول
ففى السنوات والأحقاب المتلاحقه تم تهجين نوع من النشاط العقلى المشخصن لا يستطيع الفصل مشاهدات الواقع وتأويل تلك المشاهدات، وبين المصلحة الشخصية لمن يكتب النص وهى دائما ضيقة ومباشرة ومادية (أموال ونفوذ) وهكذا ببساطة لا يفهمون ان هناك معنى للقيم وهذا بالنسبه لهم هراء وكونه هراء بالنسبه لهم بداهة وهذا ما يجعلك أحيانا تشعرين بالحيرة
ملحوظة
طبعا ليس كل من ينتقد رؤيتك أو يحاورك فيها أو حتى يعترض عليها من هؤلاء الأوباش فنصوصك ليست وحي يوحى، ولكن هذا التعليق يستهدف نوع من النصوص المغرضة لا يخطئها القارىء المهتم

nahla5z said...

واللة انت بنت جدعة يانوارة روحي ربنا يكرمك ويجعلك سبب في لم الشمل

qqq said...

العود أحمد، حمدا لله على السلامة و العودة إلى العقل و الاتزان، لعلك لاحظتى إني كنت فقدت الأمل فيكي و قررت التوقف عن التعليق على المدونة، المهم الان تعلم الدروس و العبر من كل الأحداث الماضية، التحرير جامعة وطنية و كل من يعمل على تسييس الميدان ينبغي وقفه عند حده و التعامل معه بحزم، الاعلام عميل و مخترق من بقايا النظام السابق و من الست أمريكا و حبايبها و لابد من تطهير الاعلام , أبسط شئ يمكن عمله هو تجريس أي إعلامي لا يملك ادلة على ما يقول و لا يذكر مصادر معلوماته، الاعتصامات يجب أن تكون سلمية و يجب أن تبتعد عن استفزاز الناس و التصادم مع الشعب بالاجراءات المتهورة مثل غلق مجمع التحرير، الاستفتاء وضع و حدد خريطة الطريق و من يدعوا للخروج عليها ينبغي تجريسه و فضحه لخروجه عن ارادة الشعب المعبر عنها بنتيجة الاستفتاء، أي محاولة للتصادم مع المجلس العسكري هي فتنة و دعوة لتدمير الدولة تستلزم التعامل معها بحزم و عدم التسامح معها، الأولوية الان لاقامة دولة قوية أساسها العدل و تقوم على مؤسسات مستقلة في حدود صلاحياتها و دورها المقرر لها في الدستور، السلفيين و الاسلاميين أثبتوا أنهم أبعد ما يكونون عن التطرف و أنهم فعلا رجال دولة يتفهمون المخالفين و لا يقمعونهم و قادرون على احتواء الجميع عملا بمفهوم العدل و القسط و مبدأ التسامح، هم باختصار خير الناس للناس ( على فكرة هما طيبين بس موش مغفلين)، تطهير الصف الثانى و الثالث مهمة حساسة تحتاج لمشرط الجراح الماهر و بالتالي لا يمكن ان تتم في يوم و ليلة و الاهم منها هو وضع الاطر و النظم التي تمنع الفساد و التي بها يمكن اصطياد الفاسدين بسهولة، أءمل ان تكوني أدركتي أن هناك فرق بين الثورية الهدامة و التي تكون بلا هدف و لا تفهم سوى مبدا الهدم (ثورية الشيوعيين و الراديكاليين) و الثورية البناءة التي تملك أهداف و رؤى و تهتم بالبناء، و شكرا

Ahmed . M . Abdulrahman said...

اقدر اقولك حاجه واحده دلوقتى

الحمد الله

نفس عميق - نفس عميق

حاسس براحه لا حدود لها

مننكرش ان الواحد اتعصب انا كانت روحى فى منخيرى

و مننكرش ان السلفين استفذونا كتير جداً

و الفيديوهات تشهد و المنشورات بتاعتهم تشهد

ولكن

قال تعالى : وإن جنحوا للسلم فاجنح لها وتوكل على الله

واحنا ثورتنا سلميه سلميه حتى الان

و مش عاوزنها تقلب دمويه

وانتى بصراحه بلا مبالغه

مطرح متخطى الخطوه مخضّره

مخضره خضره زرع يعنى مش عفن

انا مبسوط ومتفائل

اول مره اتفائل فى السياسه

وسيبك من الى بيشتموكى

احنا معاكى

و باذن الله كله يبقى تمام

الحمد الله الحمد الله

انا أيدت البيان والله من امبارح ع المدونه بتاعتى

لازم الواحد يعمل الصح ويخلص زمته قدام ربنا:http://misr25jan2011.blogspot.com/2011/07/29_25.html

يارب تمم 29 يوليو على خير

وربنا معاكى ومعانه و مع الشعب

سلام مؤقتاً يا نواره
_____________________
الى عاوزنى يجينى
http://misr25jan2011.blogspot.com

Unknown said...

نوارة الدنيا
انا اسف بس انا عندى و عند ناس كتير فوبيا من اللى حصل ايام ثورة 52
المشير راجل محترم و طيب و عامل زى اللواء محمد نجيب
فيه ناس من المجلس العسكرى ممكن يكون ليها مصلحة فى شيل المشير و عمل انقلاب عسكرى و بعدين حكم عسكر تانى 60 سنة
و علشان يفرحوا بتوع الدستور اولا كل هدفهم ان المجلس العسكرى يفضل اطول فترة ممكنة

و الكرسى بيغر و ممكن لو نوارة مسكت الكرسى نشوف نوارة مختلفة
فيه اصوات كانت فى الميدان مندسة بتقلب الناس على المشير مش المجلس العسكرى
علشان يبقى المشير هو المشكلة
الناس اللى برة الميدان رجعت زعلانة من وقف الحال و عاوزة تقول تانى تعالى لى يا مبارك و يا احمد عز
الاخوان الآن موقفهم مخزى جدا و نفس غلطة 52 و هيضحوا بيهم و يدخلوا السجن تانى
الجماعة الاسلامية منهم عملاء لامن الدولة من التعذيب و هم دول بتوع تصريحات الهجوم على الميدان
و الاعلام زى الزفت
ممدوح خمزةو بعض اللى عاملين مثقفين هدفهم الميديا مش مصلحة البلداللى زى دول يقلب الدنياعلى بعضها و عاوز يثبت ان الباقين غلط
و كل الناس بتشتم فى بعض
مش عارف انا شايف مصر مش ماشية صح
لازم تتوحد كل القوى الوطنية و ندور على نقاط الاتفاق بدل نقط الاختلاف
فيه اصوات عاقلة و نظيفة ووطنية بس مش مسموعة
حسن نافعة و فهمى هويدى بيتكلموا صح بس محدش سامع الا لسويرس و اعلامه و اعلام الفلول ( الشروق و المصرى اليوم ..الخ)
البلد لازم حالهالازم يمشى علشان الناس اللى مش فاهم بتزعلش من بتوع التحرير
اللى بيقلوا عليهم عملاء( زى 6 ابريل ) كان فين التمويل ايام مبارك
لازم يكون فيه اهداف مكتوبة
لازم يكون فيه قيادة حتى لو مجموعة ( من لا امير لهم كان الشيطان اميرهم و امن الدولة و الفلول (

hardway said...

الاخوان بيتصرفوا بغباوة؟ عادي.. طول عمرهم، بس لهم حق النصيحة علينا
........
خلصوا السلفيين كده وامبابة كانت اخر شوت ليهم
........
دلوقت لازم الاخوان يتحرقوا..
.......
والسلفيين دول ما بيتحركوش من دماغهم ابدا.. ابدا.. عمرهم.. عمرهم في حياتهم ما اتحركوا من دماغهم، لازم لهم جهة توجههم
.......
الا شهادة ابو يحيى وشهادة ابو محمد وشهادة ابو جلمبو - هو حماس طائفي، وتبقى القضية دي قضية طائفية
........
كتائب كاميليا شحاتة للانتاج الفني
........
هم الاخوان المسلمين بيلعبوا مع السلفيين ليه؟ والموضوع ابتدا يتطور وبقوا يلعبوا عروسة وعريس قدامنا لما حياءنا اتخدش
الاخوان عاملين زي النشافة، لما بيلزقوا في حد بيطبع عليهم ويبقوا شبهه
السلفيين لما بطنهم بتتملي بيتكرعوا تكريعة تجيب لآخر الشارع، ولما حيلاقوا عدد الاخوان وراهم ودنهم حتتخن
.......................
نـرنـر..أنت مش حرباية بس..أنت حرباية الفيتو ثانية
في ثواني أصبح بيننا نـوارة السلفية
(الكلام السابق ذكره من مدونات الثورجيةنوارة قبل ارتداء ثوب السلفية)
وهكذا عرفنا وعلمنا ياأهل المحروسة ثوب نوارة في جمعة 29/7
الثوب السلفي
والي اللقاء في جمعة أخري مع ثوب جديد

hardway said...

الاخوان بيتصرفوا بغباوة؟ عادي.. طول عمرهم، بس لهم حق النصيحة علينا
........
خلصوا السلفيين كده وامبابة كانت اخر شوت ليهم
........
دلوقت لازم الاخوان يتحرقوا..
.......
والسلفيين دول ما بيتحركوش من دماغهم ابدا.. ابدا.. عمرهم.. عمرهم في حياتهم ما اتحركوا من دماغهم، لازم لهم جهة توجههم
.......
الا شهادة ابو يحيى وشهادة ابو محمد وشهادة ابو جلمبو - هو حماس طائفي، وتبقى القضية دي قضية طائفية
........
كتائب كاميليا شحاتة للانتاج الفني
........
هم الاخوان المسلمين بيلعبوا مع السلفيين ليه؟ والموضوع ابتدا يتطور وبقوا يلعبوا عروسة وعريس قدامنا لما حياءنا اتخدش
الاخوان عاملين زي النشافة، لما بيلزقوا في حد بيطبع عليهم ويبقوا شبهه
السلفيين لما بطنهم بتتملي بيتكرعوا تكريعة تجيب لآخر الشارع، ولما حيلاقوا عدد الاخوان وراهم ودنهم حتتخن
.......................
نـرنـر..أنت مش حرباية بس..أنت حرباية الفيتو ثانية
في ثواني أصبح بيننا نـوارة السلفية
(الكلام السابق ذكره من مدونات الثورجيةنوارة قبل ارتداء ثوب السلفية)
وهكذا عرفنا وعلمنا ياأهل المحروسة ثوب نوارة في جمعة 29/7
الثوب السلفي
والي اللقاء في جمعة أخري مع ثوب جديد

Anonymous said...

على المصريين,بل على كل العرب،أن يغرقوا كل قواربهم،كما فعلنا لفتح الأندلس،وأن يختاروا طريقا واحدا..،طريق الوحدة..،طريق الوحدة،والعدالة الاجتماعية..،العدالة الاجتماعية،بدون ذلك..،لا نجاة لنا. د. شريف عبد الحكم

احمد أبو العلا said...

هو إنت اللى بوظتى الإنقلاب ؟ ربنا ينتقم منك ياشيخة.. على العموم الواد بلبل بتاع الرداوى بيصلح كل حاجة لما نوديله الإنقلاب ده يمكن يعرف يصلحه ولو مديتى إيدك عليه تانى هتعرفى شغلك .... بس

AbdelhamidAbdelkarem said...

أيوه كده يانواره دور جيد عملية المصالحة فى الأيام المفترجه دى لأن التسخين بيصيب ويقتل ويخرب ومابيجيبش نتيجه غير العوده للمربع الأول أتمنى إن يوم الجمعه يعدى على خير قلوبنا معاكم وربنا يحرس مصر ويحرسكم ويحصنكم ضد فيروسات التخريب والتقسيم

AbdelhamidAbdelkarem said...

أيوه كده يانواره دور جيد عملية المصالحة فى الأيام المفترجه دى لأن التسخين بيصيب ويقتل ويخرب ومابيجيبش نتيجه غير العوده للمربع الأول أتمنى إن يوم الجمعه يعدى على خير قلوبنا معاكم وربنا يحرس مصر ويحرسكم ويحصنكم ضد فيروسات التخريب والتقسيم

كيوبيد said...

كلام جميل واكثر من رائع ربنا يهدى الجميع ونرجع تانى كلنا ايد واحد والناس تبطل تكفير وتبطل تخوين ونرجع تانى اكثر من مليون فى الميدان وربنا يسهل الاخوان ويردو علينا هما و 6 ابريل وانتى يانور الشمس ربنا يكرمك يابنت عمى الغالى بجد انتى بنت بالف مليون راجل ربنا يكرمك يارب

salma dodin said...

hehhehe!......en kan 3ala el ostaz ibrahim....fahowa beytshetem gamed gedeeeee! allah yekoon fe 3ono!
yeslam lesanek ya nawara!

BestItalianPizza said...

تصورى يا نوارة .. أول مرة اشوف واحدة فيها كل الشخصيات .. كله .. طيب و شرير و مخلص و همبكة و جد و مهرج و مثقف و جاهل و عبيط و ظريف و لطيف و بريئ و مجرم و مؤدب و قليل الأدب .. شخص ما تصدق تحبة الا و تكرهه .. و ما تصدق تكرهه الا و تحبة .. انتى يا نوارة عالم لوحدك .. قصة .. حدوته .. فيلم هندى .. حاليا انا بحبك .. بس صدقينى .. امبارح كنت بكرهك .. و دايما انا على تويتر معاكى يوميا .. و ساعات ادخل و الهم راكب على دماغى عشرين دور علشان الثورة .. اقرأ كلامك افطس على روحى من الضحك .. و ساعات ادخل على تويتر فرحان .. تكئبينى .. و هكذا .. عموما انا فى اللحظة دى .. بجبك .. رغم انى مش مقتنع باللى بتعمليه .. بس اتمنى انك فعلا توصلى للأهداف اللى انتى متخيلة انك حتحققيها .. فأنا قلت انتهز الفرصة و افتح لك قلبى .. و قبل ما خيالك يروح بعيد و تبنى امال .. انا مرتبط من زمان و قريب من سن والد .... هاهاهاهاه

DIY CNC said...

كلكيت تانى مرة
طيب ان شاء الله خير بلمونسبة السعيدة دى
ان شاء الله ربك يلم الشمل
متكلمو حمدين والبسطويسى وابو الفتوح
والبردعى ومكى وزكريا عبد العزيز وعقلاء
الأخوان والسلفين
ان شاء الله يقعدو مع بعض وربك يلم الشمل وميخبش رجانا فى ناس بتحب مصر وبتخاف من
ربنا وربنا يوفق الجميع

ومن النهردة مفيش حكومة انا الحكومة

DIY CNC said...

كلكيت تانى مرة
طيب ان شاء الله خير بلمونسبة السعيدة دى
ان شاء الله ربك يلم الشمل
متكلمو حمدين والبسطويسى وابو الفتوح
والبردعى ومكى وزكريا عبد العزيز وعقلاء
الأخوان والسلفين
ان شاء الله يقعدو مع بعض وربك يلم الشمل وميخبش رجانا فى ناس بتحب مصر وبتخاف من
ربنا وربنا يوفق الجميع

ومن النهردة مفيش حكومة انا الحكومة

nosseir73 said...

يا رب الجمعة تعدى على خير وباذن الله هتبقى احلى جمعة و هبقى جمعة مهمة مثل جمعة التنحى انشاء الله وبالغيظة فى امن الدولة والمخابرات اللى النت اتملا بيهم اليومين دول بشكل رهيب كل التيارات لها رؤى مختلفة لكن كلهم متفقين فى حب مصر

Argenda said...

أنا مبحبش أكتب إلا لو عندي كلمة لها لازمة بس ما دام إتشتمتي كتير يبقى لازم تسمعي كلمة متشكرين على دورك و بلغي الشكر لكل واحد بيلم شملنا دلوقتي و مهما إتقال عليكوا أنا عن نفسي وراكوا و بشكركم

moo said...

اجمل حاجة فيكى يا بت يا نوارة انك حقانية وانك ممكن تموتى نفسك بس الحق و العدل يبان ويمكن ده اللى خلى الناس المحترمة تثق فيكى عموما احنا حانوصل الميدان الخميس باليل احب اشوف ضحكتك ولو من بعيد

moo said...

تمام يا حاج علانى بس ابقى وطى التون بتاع الفاظ الحداثة شوية علشان هى نفسها بتتخنق من كده وانا والله

Amir_mohamed said...

انا متفق معاكي في كل حاجة بس انتي زعلتي السلفين لما قولتي علي شوية منهم انهم تبع امن الدولة وكام حاجة تانية كدا :)

Dr.issamo said...

للأسف أثر التيار السلفي الوهابي تأثيرا خطيرا كبيرا على الفكر العربي وهو تأثير لن يمحى بسهولة أبدا وهذا التأثير لم ينجو منه أحد حتى غير المسلمين و غير ذوي المرجعية الدينية وهو تأثيره على ثقافة الاختلاف مع الأخر بسبب تأثير فكرة "الكافر والمؤمن" و "الحلال والحرام" و "البدعة والضلالة" فأصبحنا نضيق بمختلفينا وأصبح بيننا وبين مخالفينا في الرأي حواجز سميكة تمنعنا من التعاون معهم والتفاهم معهم بل وحتى الحوار معهم.
لا يطيق أحد منا الأخر و كل يتهم خصمه بأنه عميل أو خائن أو كافر أو رجعي على حسب الموضوع.
تخيل أنك طبيب و أنك تجري عملية في مستشفى كبير لمريض أشرف على الموت مع فريق من الجراحين الأجانب كل طبيب يمسك بمشرطه أو آلته ويأخذ دورا في الجراحة و أحدهم على جهاز التخدير وهكذا ,كل هذا الفريق الطبي مختلف فكريا تماما وعلى المستوى الشخصي لا تربطه لا صداقة ولا حتى لغة على الإطلاق , إذا تعاونوا سويا على أسس جراحية سليمة مع انكار الذات ستنجح الجراحة و ينجو المريض وسينالوا جميعا الشكر دون تخصيص و سيفرحوا ويفخروا و ذلك لأنهم تعاونوا بل وكان كل منهم يصوب خطأ رفيقه دون انتظار لثناء أو شهرة.
هذا هو الوطن , الوطن سيظل يضم المختلفين إلى أبد الآبدين كما يقول الله تعالى" ولا يزالون مختلفين الا من رحم ربك ولذلك خلقهم"
يجب أن يقبل كل منا الآخر فلن يستطيع أحد أن يمحو الآخر بل و يعمل ويتعاون معه كفريق بكل الخلاص حتى تنجح الثورة وينجو الوطن.


لم يكن لهذه الثورة قائد أو قواد ليتسلموا الحكم والحل الأمثل الآن بعد كل هذه المشاكل مع المجلس العسكري أن يتكون مجلس حكماء من مجموعة من الأشخاص يمثلون كل التيارات الفكرية والآراء التي يحملها الثوار و يرتضيهم الشعب للتعبير عنه و التحاور مع المجلس العسكري و على المجلس العسكري أن يعمل على تنفيذ ما يطلبه المجلس وإلا فان المجلس سيدعو الشعب للتظاهر في مليونيات تلو أخرى حتى تتحقق المطالب وذلك حتى تمر بالطول ولا بالعرض الفترة الانتقالية و حتى إذا لم تتحقق بعض الأهداف حتى فيما يتعلق بالمحاكمات نستطيع بعد تسلم السلطة أن نفعل ما نريد ونحاسب من نريد.
ولكني لا أرى أن البقاء في الشارع من الحكمة و طبعا أنا لا أخون أحدا هم وطنيون وأشد وطنية من أي أحد ولكنه اختلاف رؤى فمن يرى عدم الاعتصام أيضا وطنيون يجب أن نعرف كيف نختلف.
أثبت الثوار قدرتهم على الحشد حتى بدون الاخوان المسلمين وتنظيم مليونيات متباعدة أحسن بكثير وأوقع في التأثير من الاعتصام المزمن مع الإبقاء على اعتصام رمزي محدود مع لافتات واضحة بالمطالب و استمرار الحوار عن طريق مجلس الحكماء.
ولكن استمرار الاعتصام يحمل خطورة اختراقه من بعض البلطجية و المسخناتية والهجوم عليه من البلطجية الاخرين ويبدأ تخوين و اتهام المعتصمين بما ليس فيهم و أيضا يتأفف بعض المتضررين من " وقف الحال" بينما ستؤدي المليونيات المتباعدة نفس النتائج.


نعم جف بحر السياسة وعندما بدأنا نتكلم في السياسة تلعثمنا ونسينا الكلام.
يقول صلاح جاهين في أحد رباعياته :
إقلع غماك يا تور وارفض تلف
/ إكسر تروس الساقية و اشتم وتف
/ قال : بس خطوة كمان .. وخطوة كمان
/ يا اوصل نهاية السكة يا البير تجف

كنا مغمضي العيون ندور في طريق الساقية الذي وضعه النظام السابق والآن قلعنا الغمامة من على الشعب المصري الذي عندما أبصر فجأة " بعد أن كان قد نسي أن لديه عينان" بهره النور و كاد يعميه وتهيج الثور و شتم وتف و انطلقت كل الأرجل في أكثر من اتجاه فهو لم يرى بعد الطريق الصحيح لكنه حتما سيدرك الطريق ويهدأ ويسير بخطوات واثقة ولن ينقاد مرة أخرى فقد حطم تروس الساقية وقلع غماه واكتشف أن لديه عيونا ترى وعقلا يدرك

Dr.issamo said...

ربنا يكرمك ويهدي الجميع

tarek momen said...

اللي اتبوظ يتصلح....استري عليهم الله يستر عليكي

Kingdom Of Egypt said...

نواراااااااااااااااااااااا

http://www.youtube.com/user/KingdomOfEgypt?feature=mhee#p/a/u/0/CG_EOBV7cao

محمد حامد said...

قطع لسان اللى يشتمك او يقول عليكى كلمه ... وبصراحه احييكى جدا على شغلك