Wednesday, 27 July 2011

الحمد لله.. ربنا يتمم بخير، نقرا الفاتحة؟


آدي كمان بيان 6 ابريل


صباح الخير على الورد اللي فتح في جناين مصر
صلوا ع النبي.. وموسى نبي عيسى نبي محمد نبي وكل من له نبي يصلي عليه، وبحق من قال لموج البحر يهتدي لتقولوا يا عزيز
يجعلها بيضا ع الكريم سودا ع اللئيم بمبة ع اللي ما يساعد الحريم
البيان الآتي قعدت الاستاذة رباب المهدي والاستاذ... الاستاذ... نسيت اسمه، شيخ سلفي، ابراهيم الهضيبي قالي على اسمه ونسيت، هو من الجماعة الاسلامية غالبا، بس هو قعد مع رباب المهدي وقعدوا يكتبوا البيان ده وتم جمع التوقيعات عليه، المفروض البيان يتنشر في الشروق النهاردة ، وانا بصراحة مش باعرف ادور في موقع الشروق ده بيدوخني، فابراهيم بعت لي البيان بالميل وعلي الموقعين
بيان:
جمعة الارادة الشعبية ووحدة الصف




تؤكد القوى الوطنية المجتمعة، في هذا الظرف التاريخي الحَرِج الذي تمر به البلاد، على أن الجمعة القادمة (٢٩ يوليو) هي جمعة الإرادة الشعبية ووحدة الصف الوطني، الهادفة إلى إنهاء حالة الصراع والانقسام بين القوى السياسية المختلفة ورفض التشرذم حول مصالح سياسية أو حزبية ضيقة.


وتؤكد على استمرار التوافق والإجماع الوطني، الذي كان سببا رئيسيا في إنجاح الثورة، مع التأكيد على أن هذه الجمعة لن تشهد تنازعا بين أي من القوى السياسية المشاركة، والتي توافقت على المطالب التالية:





1- ‫وقف المحاكمات العسكرية للمدنيين، أما من تمت إدانتهم فإعادة محاكمتهم
أمام المحاكم المدنية المختصة






2- ‫الإسراع في محاكمة قتلة الثوار، وإنهاء كل محاولات إهدار حق أسر الشهداء
في القصاص العادل والتعويض الملائم والتكريم اللائق بشهداء مصر


3- ‫تفريغ دوائر قضائية لضمان المحاكمة العاجلة والعادلة لرموز النظام
السابق




4- ‫إنجاز كافة الإجراءات التي تحقق رفع مستوى المعيشة للمواطنين وتحقيق
العدالة الاجتماعية عن طريق وضع حد أدنى وأقصى للأجور




5- ‫الإسراع في تفعيل قانون الغدر لمنع كل من أفسد الحياة السياسية من
المشاركة في صياغة مستقبل مصر




وإننا، إذ نؤكد على مشروعية وعدالة كل هذه الأهداف، فإننا نعول في تحقيقها على
الإرادة الحرة للمصريين، وعلى نضالهم السلمي، البطولي، في ربوع مصر المختلفة،
ونؤكد على أهمية قيام مؤسسات الدولة بدورها في حماية حقهم في التظاهر السلمي.






*الموقعوون:*


- إئتلاف شباب الثورة


- حزب الحرية والعدالة


- الجماعة الإسلامية


- حزب التحالف الشعبى الإشتراكى


- حزب العمال الديموقراطى


- الحزب المصرى الديموقراطى الإجتماعى


- الإشتراكيين الثوريين


- حزب مصر الحرية


- الجبهة القومية للعدالة و الديموقراطية


- حركة المصرى الحر


- اللجان الشعبية للدفاع عن الثوره


- حركة مشاركة .


-حركة بداية .


- حزب الوعي .


- حزب التيار المصري .


- رابطة الشباب التقدمي


- ائتلاف شباب اللوتس


- اللجنه التنسيقيه لتحالف حركات توعية مصر .


- شباب من أجل العدالة والحرية .
------------
 والكلمة كلمة أهالي الشهداء والمصابين والمعتقلين والشورة شورتهم والرأي رأيهم واللي يقولوه يمشي على رقبة اتخن واحد في البلد
وده خبر عرفت اطلعه من موقع الشروق اللي بيلخبطني
--------
شوفوا بقى... هو انا متعودة اني لما ابتدي في حاجة كويسة اصحاب المصلحة المضادة يعملوا عليا حملة فده بيطمني، لكن انا عمري في حياتي ما لقيت سيل الشتايم دي كلها بمجرد ما عرفوا اني مشاركة في موضوع المصالحة وتوحيد الصف ده، انا بجد عندي فضول اعرف هم كانوا مدبرين ايه يوم الجمعة ده، هو مافيش غير ان اللي كانوا مدبرينه ان تحصل مواجهات دامية - ومازال احتمال اندساس ناس تعمل مواجهات قائم ولازم ناخد بالنا - وتنتهي بحكم عسكري، حيث ان القوى الوطنية اللي مش اسلامية بقى طلعوا عملاء والقوى الاسلامية طلعوا بلطجية وبتوع عنف، فكده بقى ما ينفعش حد يمسك البلد غير الجيش... لها تفسير تاني؟ انا شخصيا عقلي مش جايب لي اي تفسير تاني، واصلا دي لعبة مبارك القديمة: التيار الاقوى هو التيار الاسلامي ودول ارهابيين، والتيارات التانية ليبراليين ولا يساريين دول عملاء لجهات اجنبية... فانا احسن واحد في البلد. وعم احسن واحد في البلد ده ما وقعش الا لما العملاء والارهابيين اتحدوا.
المهم ان انا سعيدة لإن مش انا اللي عملت الجهد، انا اللي لهيت اصحاب المصالح عن اللي بيعملوا الجهد، اتلهوا فيا على ما التانيين يخلصوا شغل والحمد لله ربنا وفقهم، بس لسه احتمال الخطر قائم، انا وابراهيم اتفقنا اننا حنقف لجان شعبية يوم الجمعة ان شاء الله، ولو اني لما باقف لجنة شعبية بتتحول لصندوق الدنيا والناس بتتعامل معايا على اني دبابة جيش ويقفوا يتصوروا جنبي واللي واقف في الدور بيفضل يزعق عشان ملطوع في الطابور  خصوصا لما يقعد زميله يسأله ادوس فين؟ طب تعالوا يمين شوية، طب شمال شوية، والناس واقفة تشتم ههههههه، بس اظن اليوم حيبقى زحمة ومش حيبقى عندهم خلق يقفوا يتصوروا 
بس انا لازم ادي الفضل لاصحابه، وان شاء الله بقى مش حيتشتموا، او يتشتموا بقى اعملهم ايه؟ ما انا بقالي تلات ايام باحوش عنهم البونيات والشلاليت وعاملة لهم درع بشري:
رباب المهدي، ابراهيم الهضيبي، احمد سمير، ابراهيم عيسى، احمد الدوري.. وكان معكم عبر القارات مينا زكري - اللي طول عمري مش عارفة هو ذكري ولا زكري، طب لو زكري، يبقى يعني ايه زكري؟ - ونحب نوجه شكر عميق الى الدكتور البلتاجي، اللي عمل المستحيل عشان يتجاوز الاجراءات البيروقراطية في الجماعة عشان يوقعوا على البيان، انتوا عارفين بقى الاخوان لازم يعملوا اجتماع ودراسة واجتماع تاني ومناقشة واجتماع تالت وتصويت ولولا الدكتور البلتاجي كانوا مضوا على البيان على عيد الفطر هههههههه
ونشكر الجنود المجهولين على التويتر اللي كانوا بيبعتوا لي دايركتات ويقولوا لي انهم اجروا اتصالات للضغط 
ومجموعة "لا للمحاكمات العسكرية" وعلى رأسهم منى سيف
ده غير 6 ابريل اللي اتصلوا بالسلفيين عشان ينسقوا لتأمين الميدان
باقي حاجة بقى مهمة جدا... بيانك في جيبك، وحدتك في صفك، اللي يشق الصف قطعه، من هنا لحد ما يوم الجمعة يخلص
هم لسه ما يأسوش، وماحدش يسألني مين هم؟ عشان انا نفسي مش عارفة، بتوع آسف يا ريس ضد المصالحة، بتوع السفارة الامريكاني ضد المصالحة، بتوع املنا هو الانقلاب العسكري ونوارة بوظت لنا الانقلاب ضد المصالحة، بتوع بنحبك يا مجلس ضد المصالحة، بتوع احنا الثورة والثورة احنا ضد المصالحة، بتوع يسقط المشير ولما تقولهم يسقط حكم العسكر يبصوا في السقف ضد المصالحة، ناس يبانوا انهم عكس بعضهم فجأة بقت المصالحة بتهددهم كلهم وقلبهم حيقف ومش عارفين يعملوا ايه عشان يوقفوا الموضوع ده، واظن حيعملوا حاجتين:
من هنا ليوم الجمعة حملات مزايدة وشتايم وجنان اصلي.. ودي سهلة قوي، انا اخدت بالي انك لما بترد عليهم الموضوع بيسخن، تجاهلهم لحد ما يزهقوا، ويا سيدي انا عن نفسي ما بازعلش من الشتايم وواخدة عليها، وما باحطش في بالي الاتهامات بالباطلة وبعد شوية بتروح وبيفضل الحق، فما تشغلش نفسك بيا، ولا تخلي حد يجرك لخناقة حتى لو شتمك، وانا باعرف اخد حقي بالصندل، وبالنسبة للاساميهم مذكورة، هم ناس مؤدبة ومش بتعرف ترد على الشتايم ولا عندهم صنادل، على الله حد يتعرض لهم بقى.. صندلي انا جاهز
من هنا ولحد يوم الجمعة ويوم الجمعة نفسه ناس حتندس من الطرفين وتعمل مشاكل وخناقات، عندك مثلا الواد اللي عامل سلفي ومش بيصلي - وبالمناسبة راح كحت اورته بغطا كوكاكولا لما عرف اني باقول عليه مش بيصلي - بعد ما جاب لنا البنت اللي عاملة مسيحية واسلمت راح جاب لنا امبارح بنت ويقول لي: مش معاها بطاقة، نعمل فيها ايه؟ قلت له مشيها، قالي: انت ترضيها لاختك؟ 
!!!!!!!!!!!!!!!!!!!!!!!!!!!!!!
انا ما اعرفش بيجيب كم البنات اللي مالهمش صاحب دول منين؟ هو لما عرف اننا كنا حلينا مشكلة البنت اللي عاملة مسيحية واسلمت دي راح قال لندى قصاص: انتوا فاكرينها اتحلت؟ ده انا حاجيب لكم الافات.. اه وربنا، فقد اعصابه خالص مش عارفة ليه؟  بس اغلب الظن انه كان ناوي يعمل مشكلة بإن ناس تيجي تدعي انهم عايزين بنتهم وناس تيجي تانية عايزين اختهم وتحصل مواجهات
ده مش اخطر حاجة، بس ده مثال، حنلاقي في الميدان حاجات شبه كده كتير، وكل شوية خناقة وافتعال مشاكل، وحنلاقي يوم الجمعة نفس الحكاية.. مهمتنا بقى اننا نحتويها، ونأمن الميدان كويس قوي، ومش بس نعمل على البوابات تأمين، نعمل شرطة شعبية داخل الميدان تراقب اي محاولات لافتعال مشاكل، واي محاولات على المنصات للهتاف بشعارات تفرق الصف وتعمل خناقة، او يفط تعمل مشاكل بين الناس
وزي ما قلنا: حاسبوا من اللي بيزايد على ثورية الناس ويعمل فيها ثوري اكتر من الثوريين.. ده امن وش، طول عمرنا من ايام الجامعة متعلمين الحكاية دي
والتيارات الاسلامية حاسبوا من اللي بيزايد على دين الناس ويعمل فيها سيدنا ابو بكر الصديق وبقية الناس بيفرطوا في دينهم.. ده برضه امن وش وبرضه متعلمين كده من ايام الجامعة
واهم من ده كله نقول: يا رب
يااااااااااااااا رب... مالناش غيرك يا رب
هو اللي عمل الثورة دي، وهو اللي حيحفظها ان شاء الله، وبأمر الله، وزي ما ربنا عودنا دايما، كل ما يعملوا لنا خطة ضدنا ربنا يرد كيدهم في نحورهم وتقلب ضدهم وتبقى في صالحنا... عشان ربنا عايز للبلد دي خير، وعايز للغلابة انهم يتنصفوا بعد كل اللي شافوه وصبروا عليه في حياتهم، وعايز لشباب طاهر خرج يموت نفسه عشان بلده انه يتجبر خاطره، وعايز لارواح الشهدا انها تستقر وترتاح لما البلد دي تتعمل زي ما هم كانوا عايزين ولما اللي هم ماتوا عشانه يتحقق
ونريد أن نمن على الذين استضعفوا في الارض، ونجعلهم أئمة ونجعلهم الوارثين، ونمكن لهم، ونري فرعون وهامان وجنودهما منهم ما كانوا يحذرون.
أمر الله نافذ
واحنا مكملين اعتصام لحد ما اهالي الشهداء ولحد ما المصابين واهالي المعتقلين والمتحاكمين محاكمات عسكرية يؤمرونا ويقولوا: رضينا
وعيب قوي قوي قوي يا اسمكم ايه اللي بتعملوه ده.. عيب عليكم كل شوية تبعتوا لهم ناس يساوموهم على دم ولادهم ولا على عينيهم المخزوقة ولا على ولادهم المرمين في السجون... لو كان الموضوع فلوس ما كانش بقى ده حالهم، لو كان الموضوع عيشة والسلام ما كانش ولادهم ماتوا ولا كانت عينيهم راحت ولا كان ولادهم اترموا في السجن، انتوا ترضوها على نفسكم؟ انتوا ترضوها على ولادكم؟ ولا عشان ماهم غلابة فاكرينهم حيتكسروا بالقرش؟ بكرة يعلموكوا درس ان الفقير عنده كرامة زيكوا واكتر منكوا.. هو فيه بعد الضنا ونور العين؟
ملحوظة تانية:
اهالي الشهدا متضايقين قوي ان فيه ناس بتطلع على المنصات تتكلم باسمهم، هم لهم لسان يعرفوا يتكلموا، ومتضايقين قوي ان ماحدش بيرضى يطلعهم على المنصات.. عيب عليكم، دول اسياد  البلد كلها، المفروض ماحدش يطلع على المنصة غيرهم، وماحدش يطلع في الاعلام غيرهم، وماحدش يفصل ولا يحل ولا يربط غيرهم، وتاني نرجع نقول: اللي بيدفع ضرايب في بلده بيطالب بحقه فيها، امال اللي بيدفع دم ابنه يبقى ايه؟ هم اصحاب البلد الاصليين، وهم اللي يتسمعوا، وهم اللي انكووا بالنار واللي حرقتهم على ولادهم عرفتهم الصح من الغلط ووجهت بوصلتهم صح، مش عشان غلابة يبقوا ما بيفهموش، بيفهموا سياسة وبيفهموا في كل حاجة احسن من اي حد في الدنيا دي، واللي يقرروه هو الصح ويتسمع
اخيرا:
بالنسبة لرمضان.. احنا محتاجين عدد كبير من المسيحيين ييجي يأمن البوابات في نهار رمضان لإن الوقوف على البوابات بالنسبة لناس صايمة في الحر ده دبح دبح، وعادي يعني احنا عايشين سفلقة على المسيحيين هههههههههه يأمنونا واحنا بنصلي ويأمنونا واحنا صايمين :)))))) ويستحملونا يعني، ماهم زاعق لهم نبي وتفجير كنيسة القديسين جاب آخر مبارك... يالا مستنينكم
ولو تعرفوا تجيبوا لنا الراجل الجميل ده اللي بييجي يعمل قداس في الميدان يبقى كتر خيركم قوي
همتكم معانا بقى كلكم
ياللي تحب النبي ايدك معانا وشيل
الحب اتقل من اسمه واسمه نفسه تقيل
وفي التباس المحبة ع المحبة دليل
ما تعرف اللي اصابك عشق ولا تعب
والشوق بيقلب مع الحرمان ساعات بغضب
والصبر بس اما يخلص يبقى صبر جميل
ياااااااااااااا رب



39 comments:

روبسبير said...

شوفوا حلقة ناس بوك هالة سرحان روتانا مصرية الساعة اتنين ضهر الأربعاء 27 يوليو في الفقرة التانية اللي جايبة فيها اللواء فاروق المقرحي جايب قانون العقوبات بيقول : لا جريمة على موظف أميري ((حكومي)) أطاع من اعتقد أنه يجب عليه طاعته وفقا للقانون
http://www.youtube.com/user/rotanamasriya

التردد : 12054

الأستقطاب رأسي

معدل الترميز 27500

معامل تصويب الخطأ 6/5
ده غير الضابط اللي قتل متظاهرين قدام القسم كان بيحمي منشأة سيادية و لا جريمة عليه
خللي بتوع المحاكمة العادلة يتكيفوا
و الله إن روبسبير ما ظهرش في الثورة دي ههتتنكس

elzahraamegahed said...

ربنا يسعدك يا نواره بحق جاه حبيبه وحبيبنا سيدنا النبى وأهل بيته ويلهمك الرشد والصواب ويعينك ويثبتك عليه
آمين يارب العالمين

Hesham essa said...

،،ويهدى الله لنوره من يشاء ،،
ان شاء الله تمر بسلام ولن يضيع الله اجر من احسن عملا

mariamrrs said...

يعجز لساني عن شكرك وشكر كل من قام على هذه المصالحة. ربنا يتممها على خير

DIY CNC said...

طيب ياست الكل لحد كدا فل الفل
ممكن تلمى الناس الكبار الى عليهم اجماع شعبى حقيقى مش مصطنع وتحولى تحصلى على تئيدهم للبيان بسرعة ويريت لو كان فيهم الناس الى بتظهر فى الفضائيات عشان يبان الأجماع الشعبى ودا علشان كل مشتاق يركب معاكو لأن الناس مبتركبش غير الريجا
ويا بنت الناس الطيبين بقالى 8 شهور بقلك لمى الناس هو لازم الكلام يبقى فيه مصيبة علشان تتحركى

جتكو الأرف مليتو البلد
وسلميلى على ابوكى الى كان سابق كل الناس
وكان شايف لمالناس كانت عمى

حسن محمد على said...

كل سنة وانتى طيبة يانوارة ,ربنا يديكى الصحة ويقدرك على مجهودك الهائل فى رمضان - اغسطس - السنة دى.

teen eagle said...

نعم يا اما ..... فين اقالة النائب العام ؟؟؟؟ ..... امال اهالي الشهدا يطلعوا بلا حمص ؟؟؟؟

هو واقف العداله غير النائب العام

ع.سالم said...

نقرا الفاتحة يا نوّارة

بيان مبّشر بالخير :)

يا رب !

3een-wants-to-see.blogspot.com

ahmed abdelhady said...

انا نفسي اعرف والنبي انت ضاربه ايه عشان تكتبي الكلام ده كله انا زهقت واا بقرااه حرام عليكي ياشيخة على العموم بصراحة كلام جمييييل جدا والحمد لله يارب بس مايحصلش حاجة ونفضل مع بعض كده على طوووووووووووووووول

ahmed abdelhady said...

ايه ده كله يا نواره انا نفسي افهم انت ضاربه ايه وانت بتكتبي الكلام ده
على العموم بجد رائع جدا وياريت نتفق فى كل حاجة مش كده وبس ويارب يتمم بخير ومايحصلش حاجة بالعند ف الناس بتوع الاعتذارات دي

Ahmed . M . Abdulrahman said...

هييييييييييييييييي

معلش اعذرينى قلت فجأه على طفل

بس دا علشان انا سعيد و مبسوط

شئ عظيم الى انتى عملتيه يا نواره

وانا بهنيكى عليه

وان شاء الله يحصد الشعب ثمار الثوره


من جد وجد و احنا جدينا كتير

و من زرع حصد واحنا روينا الزرعه بالدم

ومفيش حلاوه من غير نار

واحنا عمرنا ضاع مع حسنى

اظن ان دا يكفى

السياده للشعب وحده

واقولك مبروك تانى

وسلام مؤقتاً يا نواره
______________________________
الى عاوزنى يجينى
http://misr25jan2011.blogspot.com

torero said...

ما تقلقيش ربنا موجود ومعاكى و مع مصر كلها
خلاص المصريين بس وضعوا البذرة فى الارض و ربك هيكمل و تطرح الشجرة حرية و عدالة و كرامة
ومصر هترجع تانى عشان شكلها كده
مصر ام الدنيا

torero said...

سيبك من الشتايم ما بتلزاءش
والشتام مفقوع و محروق وجاهل

nahla5z said...

تصدقي يانوارة احنا ممكن نحط صورتك على تمثال نهضه مصر ,بنت مصريه اصلي عسسسسسسسسسسسل ربنا يكرمك

كيوبيد said...

حلوووووووووووووووووووووووووووووووووو قوى قوى ها الكلام وهذا البيان جميل جدا ورائع لابس لسه مكتب المرشد العام مش طالع لنا بيان وكلام الدكتور محمد البلتاجى مع كامل احترمى له مش له اى لازوم من غير بيان من مكتب الارشاد بس المجهود حتى الان تمام مقدرش اقول فية اى حاجة اكثر من رائع ربنا يوفقك انتى وكل الى سعى فية ويبعد عنا الناس الشر ويبعد عنا العفريت الى اسمو الفلول الى طالع لينا فى كل حته

محمد حامد said...

نواره ممكن سؤال ... انتى مرتبطه ؟
انا بجد هتجنن ياريت البنات كلها تبقى زيك كده

rasha2210 said...

بالتوفيق باذن الله , حاقرا لمصر سورة ياسين يوميها و قبليها و موفقين و منصورين باذن الله

dahabhospital said...

تصدقي لما ما بلاقيش الراجل بتاع هارد واي بتضايق لانه مسلي جدا ولانه علامة علي انك ماشية صح

متفائل said...

مش إنتي بتقولي لما الكل يشتمك بتطلعي صح غالباً ؟ .. أنا برضه عندي قانون بس أظبط من بتاعك : لما ماتنشريش تعليقي بابقى غالباً صح وبتبقى مخاوفي هي نفس مخاوفك عشان كده مابتحبيش تنشريها حتى لا تشقي الصف (من وجهة نظرك طبعاً لأن الصف مشقوق أصلاً يا حاجة).. على كل حال مش مهم النشر .. المهم إنك قريتي التعليق .. بس ياريت تبقى عندك الشجاعة وتعترفي إن العبد لله تنبأ باللي حيحصل قبل ما يحصل

يوسف حماد said...

سبعتلاف حركة وائتلاف يشهدون أمام الله والمجلس ان المصريين سينتخبون ( الذين افسدوا الحياة السياسية )لا محالة ... وانه لا أمل فى وعى هؤلاء الناخبين ولا ثقة فى اختيارهم ... وبناء عليه تقرر الخروج فى مظاهرة ـ بجلاجل ـ والمطالبة بقانون ( الغدر ) حتى لا يفتتن الناخبين بطلعتهم البهية وحرصا على سلامة اياديهم من سكاكين امرأة العزيز....
........................................................................... جتكو فضيحة .. يا طبقة سطيحة .. عاملة فصيحة ... وجايبة العار

cherif.hakam said...

فى الجمعة،التاسع والعشرين من يوليو،نرسل لأعداء الشعب والثورة،وبدون تحديد..،رسالة بعلم الوصول مفادها،وبوضوح الثورة البهية،أن مؤامراتكم وسمومكم،لن يفلحوا فى شق صفوف الشعب،الذى زادته الصعوبات تصميما،وبالأهم،صبرا،على تحقيق أحلامنا فى الحرية والعدالة الاجتماعية. د. شريف عبد الحكم

Nahla Anwer said...

واللله إنت جدعة يا نوارة وبجد فرحتيني أنا كنت مرعوبة...
بالحق... الأبيات اللي في الآخر دي بتاعتك؟ عملتها ستاتس وحطيت إسمك وبعدين قلت يمكن مش بتاعتها... هي عموماً بجد بجد عظيـــــــمة

Ola said...

و الله لما تقولي إيه، حنتصور معاكي برده، مش بمزاجك :))

روبسبير said...

روبسبير قتل 6 آلاف في فرنسا لعدم النقاء الثوري و الفلول انقرضوا بعدها و إحنا هنا لسه بنتخانق على قانون الحرمان من الترشح للفلول

ابراهيم رزق said...

نوارة يا بطلة

من زمان مشفنكيش بمثل هذا الهدوء

هى دى البداية بأذن الله تقبل الاخر

تحياتى

magda said...

بس نفسي حد يجاوبني هو ايه كان دور ابراهيم عيسي في هذا التوافق حسب تصوري انه اذا كف عن مهاجمة التيارات الاسلامية لمدة يومين هو ومن يعمل معه فهذا دور كبير ومجهود عظيم

Aly said...

really I hate nawara from all of my heart..for being a criminal toward MISR my beloved country..I ask my LORD almighty to affect her by vancer that totally occupy her attention away from destroying misr although i know she is so trival that she can not inshaaallah

Aly said...

I hate Nawara from all of my heart for being destructive tool not constructive ..may allah make her cancer patient...amen

negmat lail said...

ربنا يكرمك يا نوارة بس انا شوفت نقاشات بين البلتاجي وعمرو حمزاوي وكمان واحد بتاع المسلمين الجدد بيتكلموا مع ريم ماجد وشكل الاخوان والسلفيين برضه مصريين على موضوع شعارات رفض مبادئ الفوق دستورية واللي ممكن تتناقش بعد الجمعة الجاية لكنهم معتبرينها انها شعار توافق وطني وهي عليها خلاف( بغض النظر عن رفضي او قبولي )... بس اتمنى ان تتوحد الكلمة بكرة ان شاء الله ...........اخيرا ممكن صورة معاكي لو سمحتي من غير طابور ..احجز بدري

mohamad said...

يا رب عدي الجمعة دي على خير

samy mansour said...

على فكرة يا نوارة المحروسة الشتيمة احسن من الضرب...وخاصة فى الحر دةوبأذن الله بعد ما طبعنا ليهم المفروشات زنقناهم فى ميدان روكسى ومصطفى محمود وعملنالهم محشى...وصباح التحية العسكرية

hardway said...

نرنر..شفتي الميدان
شعرت واحسست الان كم تمثلون من الشعب المصري
شعرت و احسست الان حجمك وحجم اصحابك
شعرت و احسست الان حجم 6ابريل
(كذبة ابريل)
شعرت واحسست الان بحجم كفاية وهي ولا كفاية ولا حاجة
احترمي نفسك من الان وعندما تتكلمين لا تتكلمي ولا تتحدثي باسم الشعب تاني مرة
اعرفي حجمك.. وحجم بلال بك وابراهيم بك عيسي
انتم لا تمثلون اي نسبة للشعب المصري
ألا عددكم فقط ..وعدي انت ..كتكم خيبة

hayat ank said...

مش هانقراالفتحه خالص دا احنا هانقرا على الاخوان والسلفيين عديه يسين من الاخر للاول على الخيانه والوكسه القويه الى لقيناها النهارده مين الى قال اننا الكلام الاهبل ده مطالب توافقيه وعليها اجماع ماشفتش يافطه من متاسلم بتقولحق الشهداء ولا تطهير القضاء ولا اعاده هيكله الشرطه ولا حقوق الفقراء ولا نحاكمه الفاسدين كل الى شفته هرتله وتصرفات ضد الستات وتكفير للعلمانيين ولعق حذاء القمعيين الى ضربونا بالرصاص يوم السبت وحياه للمشين وحاجه تقرف هم اتعدوا من امن الدوله وبقوا بيقولوا كلام باليل يطلع عليه الصبح يسيح واسلاميه وتطبيق الشريعه تقريبا هم شايفينا كفره وهم انبياء ومعاهم مفاتيح الجنه ومذاكرين كتاب د رافت عبد الحميد اوربا العصور الوسطى والمشهد بتاع ازلال كانوسا لطلب الغفران ايه القرف داااااااااا نقرا الفتحه على ايه وربنا يتمم بخير دا احنا هانطلب الطلاق وهانجرسهم فى المحاكم وهانطلب نفقه الخلع كمان ايه القرف ده

متفائل said...

شفتي اليفط اللي رفعوها الإخوان والسلفيين النهاردة ولا ما شوفتيهاش ؟ .. جالك كلامي ؟ اللي أنا مش قادر أفهمه هو أيه علاقة وثيقة المباديء فوق الدستورية بالمادة الثانية ؟ ولماذا يعتبرون الوثيقة ضدها بينما لم تأت سيرة المادة الثانية في المقترحات لا من قريب ولا من بعيد .. الموضوع مش كده .. الموضوع أنهم ضد مبدأ حماية الجيش لتداول السلطة الموجود في المقترحات والذي يحرمهم من خطتهم الجنهمية وهي إعلان الخلافة الأبدية وإلغاء تداول السلطة إذا وصلوا للحكم

hardway said...

هو أنت لسه في الميدان..أنسحبتي مع الحركات
والائتلافات و الاحزاب الكرتونية..يا خيبة
المصيبة ان كل هؤلاء أعلنوا لجميع وسائل الاعلام في العالم كله انسحابهم من الميدان
والميدان في خلفية الشاشات مزدحم..محتشد
بملايين...اي انسحاب تتحدثون عنه..ياخيبة
نرنر..أتلمي في بيتكم
نرنر..اتكلمي علي حجمك
نرنر..اتعلمي ماهي الحشود
نرنر.. اوعي اسمعك تاني تقولي
الشعب..او الجماهير او المصريين
نرنر ..27مايو علي مقاسك

hardway said...

هو أنت لسه في الميدان..أنسحبتي مع الحركات
والائتلافات و الاحزاب الكرتونية..يا خيبة
المصيبة ان كل هؤلاء أعلنوا لجميع وسائل الاعلام في العالم كله انسحابهم من الميدان
والميدان في خلفية الشاشات مزدحم..محتشد
بملايين...اي انسحاب تتحدثون عنه..ياخيبة
نرنر..أتلمي في بيتكم
نرنر..اتكلمي علي حجمك
نرنر..اتعلمي ماهي الحشود
نرنر.. اوعي اسمعك تاني تقولي
الشعب..او الجماهير او المصريين
نرنر ..27مايو علي مقاسك

btkhekhaweaykalamtoz said...

كل جمعة وانت طيبة وكل قال اية ثورة وانت طيبة ياة احنا في زمن غريب قوي خطة امريكية اسمها الفوضي الخلاقة بقت بقدرة قادر ثورة مسجليين خطر هاجموا الاقسام وماتوا بقوا شهداء حشاشة بقت ثورجية وكم فيك يامصر من المبكيات وتتها نيلة الاعايزة الخلف

شمس العصارى said...

من شوية كان فى بوست راح فين
انا عاوز اعلق عليه
مش عارف انتى شلتيه ولا المشكلة فى البلوجر

الحسام المصري said...

ربنا يلهمك اكتر واكتر