Saturday, 23 July 2011

مجرد احساس مالوش اي ادلة

قلبي بيقول لي حاجات مالهاش اي ادلة في ايدي، بس مجرد احساس قلبي، ومش تحليل سياسي ولا حاجة، انا ما باحللش.. انا بامشي ورا الشعب، اللي شعب بيعمله باعمله.. عشان باحبه زي الستات اللي بتلغي شخصيتها لما بتحب واحد وتفضل تقول: احمد قال لي.. احمد ما يحبنيش اعمل كذا.. اهو انا بقى الشعب قالي.. الشعب ما بيحبنيش البس اصفر.. كده
بس مجرد احاسيس طفولية حبيت افضفض بيها معاكوا، والله طلعت صح انبسط بقى واحسن ان زياراتي لسيدنا الحسين جابت نتيجة، طلعت غلط يبقى يا رب تطلع غلط
- احساسي كده ان امريكا حاطة خطة لاحتواء الثورة المصرية بحيث انها ما تبقاش ثورة استقلال وطني حقيقي
- خطتها ان المجلس العسكري القائم ده حيمشي حيمشي، وحيخرج خروج امن حيخرج خروج آمن وهي الظاهر مطمناه بدليل انه ما بقاش متوقع في عرضنا زي زمان وكل ما نعمل له مليونية ولا اعتصام يخاف، ويبدو والله اعلم انه للوهلة الاولى انبسط بالثورة فعلا، وانا مصدقة دموع طنطاوي لما نزل لان المشهد مهيب فعلا، اذا كان اوباما نفسه اتخض من شكلنا وجاله انبهار، بس هم عليهم اللي عليهم، فامريكا قالت لهم خلصوا لي الشغلانة وانا اطلعكم.. الشغلانة بقى هي تفتيت القوى الثورية على الارض وتفريقها، والاستفراد بكل فصيل سياسي وياخدوه ويروه القطر لوحده، يدخل بشرفه يخرج وهو موطي راسه، نقوله مالك يا ولا.. ما يردش.. ايه اللي اتعمل فيك يا ولا.. ما يردش
- ويتمكن المجلس القائم ده انه يقتنص للجيش صلاحيات زي صلاحيات الجيش التركي، بحيث اي رئيس او برلمان ما يعجبش امريكا يتم الانقلاب عليه وكله بالدستورية وبـ - اللا مؤاغزة - فوق الدستورية وربنا يستر على ولايانا
- بس المهمة دي كده كده حتحرق المجلس عند الناس، فقبل ما الشعب يقولهم جرا ايه يا كتكوت انت وهو انت نسيت نفسك؟ قوم ييجي بقى شباب من الجيش "ثوري" يقول للمجلس.. يالا بقى من هنا، قال يعني ثوري بقى ومتضامن مع الثوار، وبما ان المجلس قرف الناس في عيشتهم فالناس حترحب بالضباط الاشراف الشباب.. يستملوا منهم بقى بالصلاحيات اللي هم اخدوها واللا مؤاغزة فوق دستورية وكدهون ويبقوا ابطال الوطن.. وقلبي الصغنن بيقول لي ان اعداد المجموعة دي شغال بقاله مدة، وبعلم المجلس... ده مجرد احساس
قووووووووووووووم الجيش يستلم برضه، بس بوجوه جديدة شابة مزة لطيفة ظريفة وسلم لي على الاستقلال الوطني والمدنية والديمقراطية

دي مجرد احاسيس
لو اتشتمت قوي قوي قوي قوي قوي قوي قوي قوي قوي عليها.. يبقى مدد يا سيدنا الحسين، كلامي صح - ده بالتجربة كده كل ما اتوقع حاجة صح باتشتم قوي، وانا عادة مش باتوقع حاجات صح كتير يعني
لو ما اتشتمتش يبقى دي هلاوس ومخاوف عندي وبارانويا ناتجة عن القفا السخن اللي اخدته
المهم بقى ان السيناريوم اللي كل دماغي ده لو صحيح يبقى الاخوان حيطحنوا لحد ما يتحولوا لسكر سنترافيش تذروه الرياح، وتبقى هذا ما صنعت ايديهم... بس قبلها حنكون كلنا اخدنا اعدام، بالذات انا بما انهم اخدوا التليفون بتاعي واكيد ما عرفوش ينزلوا من عليه اي علاقات شائنة يبقى حيلبسوني قضية تخابر للسودان ويعدموني، وعلى فكرة بقى.. انتوا مش فرغتوا التليفون؟ رجعوه بقى عشان النمر، وعشان العدة دي ام زينب جايباهالي هدية في عيد ميلادي، انتوا ايه ما عندكوش رحمة؟ 
بس يعني خطط امريكا - اللي هي اساسا انا اللي متخيلاها وما عنديش اي ادلة عليها غير البرانويا - مش قضاء الله وقدره، ينفع يتم احباطها بالاجماع الوطني واننا نقف كلنا مع بعض، وان العسكر يروحوا ثكناتهم، بكبيرهم وصغيرهم يا عم
اذا كنا مش عارفين نسلك مع عسكر عواجيز وحاربوا في 73، حنعرف نسلك مع عسكر شباب فيهم عافية وما حاربوش اسرائيل كمان؟ لا يا عم يفتح الله
مدنية مدنية.. ومش عايزين حكم مدني يبقى ستار للحكم العسكري زي عصام شرف كده، العساكر يروحوا ثكناتهم ويسيبونا في حالنا، لا شباب ولا كهول ولا شيوخ... ربنا يسعدهم ويرجعهم على الحدود واحنا حنغني لهم: احسن جيوش في الامم جيوشنا
وباقول الاخوان يعني لازم يتضامنوا مع 6 ابريل ويقفوا جنبهم عشان الحجر الداير لابد من لطه والدنيا زي الخيارة يوم في ايدك ويوم في السلاطة
وفي كل الاحوال:
مش لازم نمشي مشير عشان نجيب مشير تاني
ولا نمشي مجلس عسكري عشان نجيب مجلس عسكري تاني
مدنية مدنية..
والله الموفق

103 comments:

M said...

السيناريوم اللي حضرتك بتقولي عليه ده مرعب قوي.. بس الحالة الوحيدة انه ممكن يجيب نتيجة اننا نقبل بحكم العسكر بأي شكل أو صفة.. مدنية مدنية مدنية

Amed Gomaa said...

سهلة يبقى اول مايحصل انقلاب عسكرى نعد فى الميادين ونطالب بمجلس رئاسى مدنى

Nicholas Urfe said...

الجيش عبر الشهور الماضية ومن قبلها ، لما شاف القوى الوطنية بتتصرف ازاي سواء معاه او مع بعضها او في الشارع، اظن وقعت هيبتهم من عينه ، وبدأ يرتب حساباته من تاني، وطبعا طبعا طبعا ، امريكا في الموضوع سواء عبر المجلس او بعيدا عنه ، وطبعا طبعا طبعا الاخوان هيلبسوا ان شاء الله

الحل هو
الانتخابات ووحدة القوى الوطنية في وجه امريكا ووجه اي تعديل لمسار الثورة من الجيش او غير الجيش ، وان احنا نلعب بواقعية سواء اسلاميين او علمانيين ، احنا عمرنا ما هنكون اصحاب لكن عمر ما مصلحتكم هتكون مع الجيش

Sara said...

ربنا يستر يا نوارة و يطلع إحساسنا العام دا غلط !

Dr.issamo said...

يا نوارة حرام عليكي
انتي بتديهم افكالر عشان ينفذوها


بس على مين
وحياة دم الشهداء
الثورة دي مش هتتخطف مننا

وبعدين امريكا دي اونطى دي خدت على قفاها في كل حتة

و رؤيتهم الاستراتيجية اي كلام

وبيتفاجئوا بالحدث زيهم زي اي حد

المهم بس ان احنا نقعد ونتوحد

د.أحمد said...

الولايات المتحدة، حتى الآن، تتبع نهجها المعتاد فعندما يوشك نظام ديكتاتوري مدعوم من قبل الولايات المتحدة على السقوط وفقدان السيطرة وقد حدث ذلك عدة مرات كما في حالات ماركوس، دوفاليه، شاوسيسكو وسوهارتو

ويقضى هذا النهج بتقديم الدعم للنظام لأطول فترة ممكنة، وفي حال وصلت الأمور لنقطة اللا عودة أو تدخل الجيش ضد الحاكم، يتم تبني الموقف المضاد والتخلي عن الماضي تماما والتحول 180 درجة والإدعاء بأن الولايات المتحدة كانت تدعم الثوار منذ البداية، مع اتخاذ جميع ما يلزم من اجراءات لاستعادة النظام القديم بوجوه وأسماء جديدة

وهذه الخطة عرضة للفشل أو قد يكتب لها النجاح تبعا للظروف المحيطة

نعوم تشومسكي - في حوار بتاريخ 4-2-2011
http://www.chomsky.info/in​terviews/20110204.htm

the bu zahra said...

بحكم البارانويا اللي تقريباً كل اللي كان في الميدان من اول الثورة مروراً بالإعتصام الحالي ثم التحرك نحو المجلس العسكرى!! أظن تخمينك وتحليلك في مكانه وعلي مقاسه وربك الستار والموفق والمستعان

sabrafamily76 said...

واللهي يا نوارة أنا حاسة بكدة بردو .أنا عرفة إن أمريكا بعد ما فائت من صدمة الثورة بتحاول تنقذ ما يمكن انقاذه وتحول خسائرها إلى مكاسب . أنا كان عندي أمل إن بعد تنحي مبارك يطلعلنا بيان من الجيش يقول لأمريكا متشكرين أوي على أد كدة بس احنا مش عايزين المعونة .لما البيان ده مطلعش عرفت إن في حاجة غلط .أما حكاية الجيش التركي إللي عوزين يخلو جيشنا زيو فأنا بقولك للأسف احساسك صح و أنا عندي الدليل مقال اتنشر في الاسوشيتد برس الإسبوع إلي فات بيقول إن المستشار هشام البسطويسي من الناس إلي بتأيد الإقتراح بإعطاء الجيش صلاحيات دستورية تخليه يتدخل لإقصاء أي حكومة أو مجلس تخالف توجهاته

One of the legal experts that the military is consulting in the process, Hisham Bastawisi, has gone further, proposing that the military in the future have the role of "guaranteeing supra-constitutional principles." In his formulation, that would appear to mean powers to intervene to protect basic democratic rights.

http://news.yahoo.com/egypts-military-seeks-future-political-role-151305695.html

elzahraamegahed said...

من أساسه ما نسمحش بالمبادىء اللامؤخذه دى ، مفيش حاجه اسمها فوق دستوريه تتفرض علينا ولا تحطها لجنه مش منتخبه ولا نستفتى عليها... دى قلة أدب وكمان يدوا فيها صلاحيات للجيش ، ده بعينك يا بسطويسى الكلب. لو اتحط صلاحيات للجيش فى المواد الفوق دستوريه دى _ده لو اتعملت يعنى _ يبقى البلد دى ما فيهاش راجل وعلى فكره بأه أنا مع تظاهرة الاسلاميين يوم 29 يوليو الرافضه للمبادىء الفوق دستوريه
دى البدايه الصح اللى تقفل الباب ده خاااالص

samtex233 said...

كلامك صح في انه عايز يبقى زي الجيش التركي له هيبته و قوته و قدرته على تغيير قوانيين اللعبة في اي لحظة تهدد سيطرته على البلد حتى لو كانت الديموقراطية و الجيش نفسه في كده من زمان بعد التهميش الي حصله في عصر المخلوع و همه اعلنو ده بصراحة دالوقتي و الفرصة الان مع فزاعة الناس دالوقتي و هو السلفيه و الاخوان لاكن ان الضباط الصغيرين ينتفضوا عليهم و ينقلبوا عليهم صعب لانهم تم تكميمهم و قصقصت ريشهم طول الفترة الماضية و على فكرة الي ليه حد في الجيش لو ساله يقله ده (على فكرة الضباط في الجيش طنطاوي مسود عيشتهم و من يوم ما مسك طنطاوي و اللي معاه و هوه اهان كرامتهمو مقيد حركتهم و هاريهم مطاردات و لذلك بيكرهوه جدا) دول لسه شامين نفسهم بعد الثورة فمستحيل انهم ينقلبوا عليه لاكن هي تركيه تركيه و تابعوا كلامهم في الاعلام هتستنتجوا كده و ربنا يحمي مصر و الثوار اشرف ناس في مصر

Ahmed . M . Abdulrahman said...

اشتمك
هاااااااااااااااااااا
كلامك سليم 100%

بس حتى هذه اللحظه كل الذى تحقق من هذا السيناريو 30 %

الى انتى قلتيه هو احتمال طريقه بقاء النفوذ الامريكيه فى مصر

ولازم نحط قدامنا

احتمالات

مش احتمال واحد

الى انت قلتيه سليم لان ببساطه

لو حصلت انتخابات و جه مجلس شعب و جه رئيس جمهوريه

أ ب حيتحل المجلس الاعلى للقوات المسلحه

و بعد ما كان طنطاوى ع الكرسى

حيبقى برضه ع الكرسى بس جوه القفص

علشان كده لازم يدبروا وسيله للخروج

فى المقابل اميريكا بتبحث عن وسيله لاستمرار نفوذها فى مصر

وزى منتى عارفه
الارواح تتلاقى و الطيور على اشكالها تقع

و تقدرى تقولى ان فى صفقه ما بين الطرفين

لاكن المضمون بتاعها ايه دا الله اعلم بيه

ممكن تتعمل الحركه بتاعت الشباب العسكر

ودى الاكثر قابليه للتنفيذ و ممكن يحصل تواصل مع الاخوان المسلمين

من الطرف الامريكى

لتسهيل الوصول للسلطه

مقابل معونات ودعم ورفع من قوائم الارهاب

فى النهايه

الاخوان و القوى السلفيه

المجلس العسكرى

و الولايات المتحده

بيلعبوا على الشعب

وربنا معاكى و معانه

واسيبك علشان اروح اتغدى

وسلام مؤقتاً يا نواره

El-Fahafeh said...

ﺍﻧﺎ ﻧﻔﺴﻲ ﺍﺷﺘﻤﻚ ﻋﻠﺸﺎﻥ ﺍﺣﺴﺎﺳﻲ ﺑﻴﻘﻮﻝ ﺍﻧﻚ ﺻﺢ ﻟﻼﺳﻒ ﺍﻟﻤﺸﻜﻠﺔ ﺍﻧﻲ ﻣﺶ ﻗﺎﺩﺭ ﺍﻋﺘﺮﻑ ﺑﻜﺪﺓ

elzahraamegahed said...

هو أنتى ما ينفعش تطلعى تقولى الكلمتين دول مع يسرى فوده ولا فى برنامجك
عشاان الناس العاديه تصحى لنفسها وتفوق لخطورة موضوع الصلاحيات للمجلس العسكرى دى عشان نحرقها لهم لأن فيه ناسكتير بتؤيدها فاكرين إن دى حمايه لهم نن الاسلاميين

magdy shaheen said...

دليل واحد ان هناك طواطئ امريكى انهم لم يعلقوا على ان الانتخابات ستجرى بلا رقابة دولية علشان المجلس الموقر يعرف يجيب الي هوة عاوزة

freedom4ever25 said...

ده احلى سيانريوم ومافيش حل غيره لأن المجلس العسكري مش ناوي يسلم السلطه الا لتحالف الحزب الوطني مع الاخوان والسلفيين وطبعا المحسوبين على النظام او الحزب الوطني هو اللي هيبقى له الاغلبيه بس مش اغلبيه فاجره اوي زي ما كانت ....لأ . اغلبيه بسيطه كده تحافظ على مصالح امريكا واسرائيل وكبار رجال الاعمال والرأسماليه المتوحشه
ياسلاااااااااااااااام دي يبقى حتة سيناريوم لو حصل سيناريوم سيناريوم يعني
بس خدي بالك الظباط اللي طالعين هيبقوا ظباط شرفاء وهيسلمو السلطه لمدنيين منتخبين بجد وفي انتخابات نزيهه بجد بس طبعاّ لازم نراقبهم وننزلهم في الميادين برضه

BestItalianPizza said...

انتى نسيتى اهم حاجة .. حسنى .. موقعه ايه فى الحدوته دى كلها ؟؟ حسنى فى الحكم يا نوارة مامشيش .. و مش ناوى يمشى .. و الغلب الظن انه هيرجع جمال و التوريث بخطة طويلة المدى .. علشان كده مافيش محاكمات و لا ادانات للحظة دى .. كلها حاجات فى الريش او على ناس جعلهم حسنى كبش فداء زى العدلى .. لا توجد ادانه واحدة فى الصميم

BestItalianPizza said...

يا نوارة لهجة الجيش اتغيرت لأن وقتها كانت الداخلية واقعة و لأنه فاكر ان خطته فى اجهاض الثورة حتنجح .. احنا زى المغفلين اعطيناهم فرصة لتحقيق الطلبات حيث اعادوا بناء الداخلية .. و بعدين اكتشفنا الملاعيب كلها .. فهو بيواجهنا الآن و دخل ناشف و جايز جدا يحولها لليبيا ثانية لأن العسكر كلهم زى بعض

aly said...

كويس اوي تشتمي الاخوان وتقولي انهم بيتلقوا دعم بدليل انهم عملوا حفلة في جراند حياة وبعدين تطلبي منهم دعم 6 أبريل

aly said...

البوست اللي فات تشتمي الاخوان وتقولي بيتمولوا من برىة عشان عملوا حفلة في جراند حياة
ودلوقتي تطلبي منهم يقفوا جنب 6 أبريل في مشكلة وصدام مع الجيش باصرار من 6 أبريل لوحدهم

انتي هبلة يانوارة؟

عادل said...

الاخت الحبيبة ارجل بنت في مصر كلها، السيناريوم بتاعك لا يمكن يتحقق، قوليلي ليه؟ لأن سنة 52 ماكانش فيه لا بلوتوث ولا تليفونات محمولة واصلة على النت ولا شباب روش ماشاء الله بيكتب على النوبايل اسرع من استاذ العربي بتاعي على السمبورة، ده غير السبب الاساسي: في 52 كان الجيش في الملعب والجمهور المصري قاعد في المدرجات، دلوقتي مصر هي اللي في الملعب وسبنا حراسة الجون للمجلس العسكري بمزاجنا، واي حد عايز يلعب هاينزل تحت الاضواء الكاشفة واللعب هايبقي على المكشوف واللي مش قد الشعب المصري ما يلاعبوش، بس اهم حاجة ان كل اللعيبة في الفريق تكون عينيهم على مصلحة مصر علشان نحط اول جون يوم انتخاب الرئيس المدني. انا بس اللي مضايقني شوية اني مش شايف أي حسن شحاته لحد دلوقتي..

bahgat said...

هذا هو السيناريو الاكثر احتمالا

bahgat said...

اعتقد ان هذا السيناريو هو الاكثر احتمالا
بس الناس دى متأخره مائة سنة
ميعرفوش اننا هارشين كل الحركات الخايبه دى

أبو هاجر said...

ست الكل مساء الخير

أجمل ما كتبت منذ 25 جانفي
هناك مثل فرنسي يقول : أن تأتي متأخرا أحسن من ألا تأتي . لقد ذكرني مقالك هذا بكتاب قرأته لما كنت تلميذا في الثانوية للكاتب الكبير توفيق الحكيم الموسوم " عودة الوعي " لا أريد أن أقول أكثر من ذلك لأنني أعرفك عندية وراكبة دماغك وما تعترفيش، لأنه وجد من حذرك أيام الرسائل المذيلة بقلبيين وسهم ، من الإفراط في التعلق بمن هم جزء من النظام السابق . ووجد أيضا من عاتبك أشد العتاب عن ذلك المقال المشين لما تهجمت على النخبة المصرية وقلت عنها واطية وتعلق ملابسها الداخلية .... لمجرد ان الدكتور حسن نافعة اختلف مع أحد قيادات العسكر . هناك كلام كثير يا النوارة ولأنك عزيزة لا أريد إغضابك . .
تحياتي الخالصة
ملحوظة
أما بخصوص اللباس الأصفر، في حدود علمي الشعب لم يرفض اللباس الأصفر في المطلق.

Dr.Online said...

اختلفت كتير مع نواره بس عمري محسيت انها ممكن تكون بتعمل بدافع خفي ... كنت بشك أحيانا بس كنت بقول انسانه مندفعه بس وطنيه .. لكن هنا لأ - ليه ميكونشي مجلس الغجر فسده و هيخلعهم ظباط شباب محترمين مطالهمشي الفساد .. و سواء دا و لا ده يا حاجه احنا مش هنسلم دقننا لحد... و الدوله مدنيه بدون وصايه عسكريه حتى لو الملايكه نزلت و مسكت ظباط في الجيش... ماشي يا قطه؟

رحب said...

بعيدا عن الأدلة والسياسة ,سنة ربنا في الأرض هي تداول القوة ودولتنا إن شاء الله قادمة, وإذا كان الفشل مصير الثورة كان مبارك نفسه مش أمريكا وأد الثورة في 22 يناير مش 25 كمان

على الرغم من إني مأيداكي جدا في إن الكلام الي بتقوليه بيحصل في الخفاء لكن واثقة جدا ومتفائلة :)


وتذكري قول الله
بسم الله الرحمن الرحيم
الَّذِينَ قَالَ لَهُمُ النَّاسُ إِنَّ النَّاسَ قَدْ جَمَعُواْ لَكُمْ فَاخْشَوْهُمْ فَزَادَهُمْ إِيمَاناً وَقَالُواْ حَسْبُنَا اللّهُ وَنِعْمَ الْوَكِيلُ
صدق الله العظيم

ياسر محمد said...

بمناسبة مُكالمة اللواء الرويني على الجزيرة مُباشر مصر

6 إبريل تتلقى تمويلاً من الخارج، وكفاية مش حركة مصرية أساساً، مدو الخط معايا كده يا رجالة (العلمانيين بيدعوا لأفكار غير مصرية - الليبراليين مُتحالفين مع الغرب لهدم البلاد - الإخوان المُسلمين تنظيم دولي - السلفيين يأخذون أوامرهم من السعودية)، شكلها كده كمان شوية وهيتقلنا كُل ثورة وإنتم طيبين.
ولا عزاء للديمُقراطية.

متفائل said...

هي حاجة من إتنين .. إما أنتي مضللة بفتح اللام أو مضللة بكسر اللام .. لأن المقصود بالحل التركي هو أن يقوم الجيش بحماية مبدأ تداول السلطة وعدم السماح لأي جهة كانت بتدميره (زي الإخوان مثلاً اللي عايزين يعملوها خلافة مدى الحياة) وليس المقصود به هو حكم الجيش من وراء ستار مدني يلعب دور الطرطور أو خيال المآته (وهو الحكم المدني في تركيا طرطور يا مفترية ؟).. واضح إن القلم اللي أخدتيه على قفاكي كان سخن فعلاً .. سخن أكثر من اللازم

moaaz said...

ابوكى فين يا بت و الله واحشنا

moaaz said...

ابوكى فين يا بت و الله واحشنا امانة تسلميلى عليه

Ahmed Kazem said...

أنا أخوانى و بقول كل الكلام اللى أنتى بتقولية دة من فترة. لكن محدش معبرنى. من يوم 27 مايو و أنا بقول عدوكم هو العسكر. و لازم تتوحدوا قدامة و تحاولوا تنسوا خلافتكم شوية لكن لا حياة لمن تنادى. يالا أشوفك يا نوارة الثورة اللى جاية. بس بالتأكيد هنكون هكعنا أوى

hardway said...

يانـرنـر...عايزة تلصقي في اي حاجة..
علاقات شائنة ايه الي علي تليفونك...
لاشائنة و لا غير شائنة...هو انت تعرفي
حاجة عن صفات البنات..ولا كلام البنات
خليكي في التهييس..والهرتلة..والعبط
من الكف السخن اللي نزل يرن علي قفاك
سؤال
هو محمد عادل بتاع 6ابريل بيتكلم مع الجزيرة وبيقول ؛حاولنا مع الجيش يفتح لنا ممر أمن للعودة لميدان التحرير
ممر آمن...تعبير عسكري لشاب مدني غريبة
والعودة لميدان التحرير...هو صدق ان أبوه اشتري له الميدان...شغل صربيا ظهر
وأنت مدربة فين أن شاء الله....

Mahmoud Ahmed said...

مش معاكي لإن ضباط التحرير محبوسين واخدو أحكام مشدده وفي ناس منهم ليلة الإقتحام ماتو
فإزاي هايكونو ه زي ماحضرتك بتقولي مجرد وجوه شبابيه للدكتاتوريه
لازم يقف مع الشعب عساكر شرفاء من الجيش يطردو العجزه العملاء ويطهرو البلد من فلول النظام العميل ورجال الأعمال الفسده
تمهيدا لإنشاء دوله مدنيه حقيقه

lailol said...

السيناريو اللي انتي قولتيه ده صحيح بس مع فرق واحد انهم مش تبع امريكا ومش بتحريض من امريكاانهم رجاله شجعان هدفهم الوحيد مصلحة الوطن والشعب الغلبان وحيقيموا العدل ومحاكمة كل الخونه والقتله ويا ريتك تفتكري لما قلت لك ابشري يا نواره حيحصل شيئ كبير وستكون ايه من عند الله وستحدث قريبا كان قصدي كده لاني حلمت به وكانت بشري من عند الله وبشرتك بها وقلت لكي بكره تشوفي وتقولي ليلي قالت

hardway said...

فين اللماضة والفوريجية ..وأنت بتضربي في العباسية وبتصرخي عايزة ممر آمن
..................
اما نشوف مين اللي حيقول أي

ودي مش اول مرة اكل على قفايا، بس اللي جرب واداني على قفايا قبل كده عارف كويس لما باتلفت له باعمل ايه؟ وكتاب الله بيندم انه اتولد اساسا
..................
أتلفتي ياختي أتلفتي..ورينا هتعملي ايه
انت عارفة يا بنت ..انت بوء..
وبوء حمضان كمان

hardway said...

فين اللماضة والفوريجية ..وأنت بتضربي في العباسية وبتصرخي عايزة ممر آمن
..................
اما نشوف مين اللي حيقول أي

ودي مش اول مرة اكل على قفايا، بس اللي جرب واداني على قفايا قبل كده عارف كويس لما باتلفت له باعمل ايه؟ وكتاب الله بيندم انه اتولد اساسا
..................
أتلفتي ياختي أتلفتي..ورينا هتعملي ايه
انت عارفة يا بنت ..انت بوء..
وبوء حمضان كمان

محمد حامد said...

نواره .. انتى ماتقوليش حاجه زى كده الا وعندك حاجه مخبياها دى مش احاسيس ... وقعتى قلبنا يا نواره ايه اللى انتى عارفاه بالظبط

Jemy_King said...

والله خوفتيني يانوارة أكتر مانا خايف .. بس الحقيقة حاسس ان كل كلامك صح وعندك فراسة سليمة .. أمريكا عمرها ماهتقف ساكتة وهي شايفة مصر بتروح من ايديها ووراها طبعا الدول العربية كلها وانتي أكيد فاكرة كلام تميم البرغوثي ..والمجلس العسكري فعلا مبقتش مرتاحله بقالي فترة لأسباب كتيرة علي رأسها المخلوع اللي مبلط في شرم وعدم محاكمة قتلة الشهدا .. يبقي كلامك احتمال يكون علي درجة عالية جدا من الدقة (وممكن نضيف كمان صفقة الدبابات الأمريكية الأخيرة اللي خوفت اسرائيل واستمرار المساعدات العسكرية للجيش) الكلام ده كله لايبشر بخير يانوارة :( .. بس ان شاء الله الشعب قدها وقدود واستحالة يسمح بحاجة زي كده , وبكره نوري المجلس وأمريكا من وراه مين هو الشعب المصري

ياسر كامل said...

لا يا نوارة
انا مش معاكى
تانى يوم الخيارة مبتبقاش فى السلطة

ياسر كامل said...

كلامك معناه ان المجلس العسكرى خاين
؟؟؟؟؟؟؟؟؟؟؟؟؟؟؟؟؟؟؟
معقول
مش بالعها الحكاية دى
ويعنى ايه امريكا تقدم لهم خروج آمن
؟؟؟؟؟؟؟؟؟؟؟؟؟؟؟؟؟؟؟؟؟؟
خروخ آمن من ايه؟

emadh19 said...

التوقع قريب جدا من الواقع مع عدم الحاجة لانقلاب عسكرى لا دلوقتى و لا بعدين الحاضر يسد و قدها و قدود معركة الجمل و العباسية الليلة اكبر اثبات

بهيج الشرير said...

والنبي ياأبلتي أوعي تزعلي نفسك على نمر التليفونات اللي راحت، أنا مستعد أديليك النمر بتاعتي كلها

خالد said...

كلامك خطير واكيد فيه كارثة جاية بدليل السفيرة الامريكية المسماة سفيرة المهام الصعبة او بمعنى اصح سفيرة جهنم وربنا يستر

hardway said...

هو أنت لسه بتضربي لغاية دلوقتي
هو أنت لسه لم تلتفتي لاهل العباسية
.....................
باعمل ايه؟ وكتاب الله بيندم انه اتولد اساسا
والله العظيم تلاتة
.....
والله العظيم أنت فوريجية كلام بس

ميدان التحرير said...

اتصدقي بالله يا نواره وما ليكي علي حلفان ان ده نفس احساسي بالضبط اصل المجلس مش هيهبب الهباب ده كله لوحده اصله ميقدرش يعمل انقلاب لان الانقلابات زمانها خلص ومصر مش اي دولهوهم نفسهم قالو عايزين النموذج التركي الواحد لما يربط التصريحات والاحداث يلاقي السيناريو ده نتيجه منطقيه

AbOHaNi said...

ربنا يستر بس بمناسبة الشتايم هى الناس مأجورة و لا بجد شعب النت أخلاقهم زبالة

Hanan said...

السناريو اللى انتى كتباه ده والله اعلم هو اللى فعلا مترتبله .. ولو حصل وقبلناه يبقى احنا اللى نستاهل لأننا كده بنعيد السيناريو اللى عايشين فيه من 60 سنة وبابطل كومبارس كمان ... مدنية مدنية مدنية .. كفايانا بقى حكم العسكر لا كبار ولا صغيرين يرحمونا يرحمهم ربنا

! أم مصرية said...

برافو .. لما مصر ان شاء الله تتقسم ما تنسيش انك كنت واحدة من المحرضين ، و 6 ابريل فعلا فيها ناس اتدربت فى الخارج و باعترافهم ، و حتى لو ما كانوش عملاء ، فاذا كانوا و كنت مش عارفين الفارق بين اسقاط النظام و اسقاط الدولة تبقى مصيبة

عباس ابن فرناس said...

هههههه

والله هم يضحك وهم يبكى صح !

و باين علينا كدا طلعنا ناس هافا وحنا مش
حاسين وعلى راى المثل : مجلس عسكرى حزرك بين جبلين تفتحلو ولا يفتحلك ؟

btkhekhaweaykalamtoz said...

يا منافقة يابنت المنافق دا الا حصل في 25 يناير تخطيط امريكي وانت عارفة ومشاركة فية يا اخس بنت في مصر والحمد لله المجلس العسكري فهمكم اخيرا ياعميلة قطر وعلي فكرة انتم كلكم شوية عيال قلالات الادب ودة مش كلامي دا كلام كل من راح التحرير بدافع حب الاطلاع الكل اجمع انكم مهاويس قلالات ادب ولا اخلاق عندكم طبعا اما هو حمادة هيخلف اية

btkhekhaweaykalamtoz said...

يابنت حمادة دة احساس ولا دة سيناريو بتقولية عشان مزيد من الفوضي الخلاقة مسيري في يوم اعرف الناس حقيقتك انت وابوك قليلة ادب وجاسوسة وخائنة طبعا مش بنت نجم

إيمان said...

متخافيش يا نوارة .. الله خير حافظ وهو أرحم الراحمين .. وصدقينى انا كمان معنديش دليل بس شامه ريحة اليهود فى اللى بيحصل الفتن اللى بتحصل دي فتن يهود كلمه هنا وكلمه هناك واضحك على اللى هنا واضحك على اللى هناك واوقع الاتنين فى بعض واوقع الاتنين فى الغلط خللى بالك ان الجيش بياخد معلوماته من المخابرات والمخابرات كان سليمان هو اللى ماسكها ورجالته هناك بالهبل وسليمان رجل اسرائيل يعني اللعب اسهل مما تتخيلي
صلى على النبي فى قلبك يا نواره وصدقيني مصر داخله على ايام بيضه وزي الفل بس اتوكلى على الله والجيش مش هيخون .. قوليلي هاتى دليل اقولك (فَلَمَّا تَرَاءَى الْجَمْعَانِ قَالَ أَصْحَابُ مُوسَى إِنَّا لَمُدْرَكُونَ (61) قَالَ كَلَّا إِنَّ مَعِيَ رَبِّي سَيَهْدِينِ (

esraa said...

انا عارفة انك عندك برانويا من الزباط الي نزلوا بس همة اول حاجة قلوها عند المنصة اطلبوا مجلس رئاسي يعني همة طلبوا طلبك ليه ظالمة زباط الجيش الصغيرين همة اصلا اول ناس طالعة عنيهم مع طنطاوي و اسالي اي زابط جيش صغير و بالمناسبة همة فقدوا حياتهم عشان طلعوا قالوا الي احنا بنطالب بيه دلوقتي يعني همة شافوه و عرفوه من زمان بصي غالبا السيناريو بتاعك صح بس من غير موضوع الزباط الصغيرين ياخدوا الحكم المجلس عواجيز بيفكروا لسة بطريقة مبارك الي هوة احنا معانا الحماية خليهم يتسلوا

Egyptian Vina said...

س

Nael ESSA said...

بصي يا نوراة انا مصدق السيناريو الأول و بالصدفة كنا بنتكلم فيه على سبيل الجدل لو الصبح صحينا سمعنا أن الجيش انقلب على المجلس العسكري و قرر تطهير الجيش و استلم هو الحكم و وعد الشعب بتحقيق مطالبه و كمان راح جاب اي حد من رموز النظام و حكمو محاكمة عسكرية و سريعة و اعدموه و نزلو التحرير و اجتمعو مع المعتصمين و قالو احنا كمان خدنا الشرعية من التحرير و بعدين قوم ايه قررو بقدمو مرشحهم إلي بالي بالك للرئاسة سعتها احنا نعمل ايه ؟؟ و دا سيناريو واضح جداً

kbahey said...

موافقك في جزئيات بس مختلف في اخرى

موافقك في ان المجلس لعسكري بيفتت القوى الثورية و بيعمل على تفريقها، والاستفراد بكل فصيل سياسي

و موافقك انه يريد ان يقتنص للجيش صلاحيات زي صلاحيات الجيش التركي،او على الاقل عدم المسائلة بما يخص الميزانية، و قالوها صراحة اظن مختار الملا و ممدوح شاهين

اختلف معاكي ان صغار الضباط هم اللي حيعمولها، لان الجيش مؤسسة هايراركية، و مش حينفع الاقدم يخضع للاحدث
و سيناريو الانقلاب العسكري على قيادات الجيش مستبعد

و اختلف معاكي ان امريكا لها دول. بلاش نديهم اكبر من حجمهم اصلا

عايزة تحليلي الشهخصي للامور؟

الجيش شاف الثورة من الاول صدق ان هي مؤامرة خارجية زي امن الدولة ما كان بيروج

قام الجيش عمل انقلاب عشان يحمي البلد من المؤامرة التخيلية دي

و بيقول للشعب ان ثوتك مشروعة و بتاع، كلام للاستهلاك يعني

و ينكر في قرارة نفسه ان دي ثورة شعبية للكرامة و الحرية

و بالتالي بيحاول انه بس يلم المواضيع و يرجع النظام زي ما كان بوجوه جديدة، لانه لا يعرف نظام الا دة، و لا يتخيل نظام غيره، و يخون اي حد يطالب بالاصلاح الجذري و تحقيق مطالب الثورة الحقيقية

لاحظوا ان الرويني بيقول ان في وقيعة بين الشعب و القضاء و الشعب و الشرطة و الشعب و التعليم الخ، اللي هي مطالب التطهير اللي كلنا عايزينها، بس حورها و قال وقيعة

و ليه مش عايزين ناس نضيفة تمسك؟ عشان الدنيا تمشي زي ما هي و عشان ما يتكشفش الفساد، و الاهم انهم ما يعرفوش و لا يتخيلوش غير نظام كدة

هم شايفين الوضع زي 1952 ان دة انقلاب بتاعهم هم لوحدهم

لسة عايشين في الماضي

الشعب شايفها ثورة

بس ناس كثير مش شايفين المجلس العسكري عايز يقرطسنا، و دة الخطر على الثورة

في الاخر بخصوص التليفون. لا هو مش معايا و لا اعرف هو فين.

بس لما تشتري تليفون جديد، اشتري واحد بنظام اندرويد عشان يبقى كل النمر و الايميلات و كدة معمول لهم نسخ على جوجل اوتوماتيك من غير تعب. لو اتسرق او ضاع يبقى كل بيانات صحابك لسة عندك و تليفون جديد و الحاجة تنزل لك اوتوماتيك. جربيه و ادعي لي

علاء said...

انا معرفش يعنى ايه سيناريو بس كلامك كله عندى احساس بيه انا عايز اديكى كشف اسامى بناس فى الميدان ادوات بتساعد على زرع الفتنة بين الجيش والمعتصمين وبيشوه شكل الميدان ودا اللى خلانى سبت الميدان انا علاء الصعيدى اللى اتقابلنا يوم ما بتاعت الصيدله دخلت الميدان وعرفت قد ايه انتى واعيه وبتحبى البلد دى بس انتى روحتى وقعدتى مع ااتلافات واجتماعات ونسيتى ان الميدان فى ناس كتير مخلين الميدان مليان ومش اتلاف ولا احزاب لو عندك استعداد تواجهى اللى مزروعين فى الميدان انا معاكى وفدا مصر

علاء said...

انا عايز اشهد شهادة حق قدام ربنا انا سبت التحرر لاسباب حضرتك اكيد عارفاها ولمستيها بنفسك وعايز اسلم لحضرتك لسته باسماء ناس فى الميدان يشعلون الفتن واصحاب مصالح غير معلومة لى اشهد الله انه على ايدك لمستى واحده من احدى الفتن لو تفتكرى يوم ما جات طالبه رابعه صيدله مشيت وانا كنت معاكى بس ما مشيش اللى كلنا عارفين انه هو اللى خطط او طرف منفذ موجود فى الميدان الشخص اللى سلمها انا سالته فلت له فين اليافطة اللى كانت معاها قالى انت بتكدبنى وهاج فيا وليه دقن واخلاقه لا تمت للاسلام بصله دا غير شخص تانى معاه مكرفون وكل ما يشوف شخص عسكرى يشتم فيه بالفاظ وسخه اشهد الله ان انساحبى من الميدان بعد ما فقدت الامل فى تطهير الميدان فلنطهر الميدان من القله المندسه كما يسمونها وانى فى اعماق فلبى اشعر ان من يقول ان هناك قله مندسه هو من قام بزرعهم

علاء said...

ممكن اسلم حضرتك لسته باسماء القله المندسه فى ميدان التحرير ؟ حضرتك لمستى بنفسك انهم موجودين وعندى الدليل

احلام جوليا said...
This comment has been removed by the author.
احنا المصريين said...

مش عارف ليه شايفها مش بعيده قدام عنيا و من غير شتيمه تبقى واقعه منيله
مدنيه ملوخيه بس مش عسكريه

wolf said...

الكلام ده اتقال فى واشنطن بوست وقالت على لسان مسؤول عسكرى انهم عايزين يطبقوا النظام التركى وللاسف احداث العباسية ووجود بلطجية بالتعاون مع الامن والجيش ده معناه حاجة واحدة ان المجلس هو نسخة من مبارك ورايحين يقولوا على بتوع 6 ابريل عملاء وكلام فاضى طيب فلوس المعونة الامريكية بتروح فين ولا بتتوزع على ايه يالوائات وعمولات السلاح ومزارع ومصانع الجيش اللى خيرها عندكوا بدون رقيب ولا حسيب وكمان ايه اللى هيودى بتوع 6 ابريل صربيا هيتدربوا على القنص! للاسف المجلس طول مهو موجود هيخرب فى الثورة وهيولعها اكتر والكجرمين هيطلعوا برائات وهيهربوا كلهم على برة المدنية هى الحل والاسلام هو الطريق والمنهج

noha said...

طيب ما ننزل كلنا و نتحد يوم 29 بتاع السلفيين و الاخوان دة و نضم كلنا عليهم هم نازلين علشان المبادئ الفوق دستورية و الحاكمة متتنفزش و كمان باقى مطالب الاجماع الوطنى يبقى نضم عليهم و نبقى مليونية كبيرة بجد انا شايفة دة حل كويس ايه رئيوكوا؟؟؟؟؟؟ علشان نبدأ نحشد جامد لليوم

noha said...

طيب ما ننزل كلنا و نتحد يوم 29 بتاع السلفيين و الاخوان دة و نضم كلنا عليهم هم نازلين علشان المبادئ الفوق دستورية و الحاكمة متتنفزش و كمان باقى مطالب الاجماع الوطنى يبقى نضم عليهم و نبقى مليونية كبيرة بجد انا شايفة دة حل كويس ايه رئيوكوا؟؟؟؟؟؟ علشان نبدأ نحشد جامد لليوم

noha said...

طيب ما ننزل كلنا و نتحد يوم 29 بتاع السلفيين و الاخوان دة و نضم كلنا عليهم هم نازلين علشان المبادئ الفوق دستورية و الحاكمة متتنفزش و كمان باقى مطالب الاجماع الوطنى يبقى نضم عليهم و نبقى مليونية كبيرة بجد انا شايفة دة حل كويس ايه رئيوكوا؟؟؟؟؟؟ علشان نبدأ نحشد جامد لليوم

مش فاهمه said...

جلال امين يوم الجمعه فى الشروق قال كلام شبه كده الراجل ده محترم قوى بيقول انتوا بتهملوا عامل المؤثرات الخارجيه ليه اللى بيحصل فى مصر مش اختلافات داخليه لأ فيه ايادى خارجيه كتير يهمها الثورة ما تتمش
بس انتى عايزه الحق بقه ولا ابن عمه لو عايزه الحق خدى دول .....انتم الثوار الحقيقيون يعنى اصحاب الضمائر و اللى بيشتغلوا لوجه الله و لوجه مصر عملتوا غلطات فادحه لازم تنتخبوا ناس محترمه منكم انتم اكتفيتم ببتوع الفايس بوك و التويتر الناس عايزه تعرفكم الناس عايزه بيانات موحده لحد دلوقتى فيه ناس فاكره انكم عايزين مجلس رئاسى و عايزين الشواذ يمارسوا حريتهم ده مثلا لازم تعرفوا الناس عايزه ايه زى حركه ميرة المجلس ماحدش فهمها زى ماانتم عايزين و الأعلام وسخ زى ما هو .....الحقوا نفسكم يا نوارة ارجوكم احنا اتهرينا توضيح و تحلسل و دفاع

rightholder said...

الظباط الكبار مخوفيين الصغار و بيقولوا لهم حيحصل قيكم زى ما حصل فى ظباط الشرطة يعنى ببساطة الجيش ايد واحدة

rightholder said...

بيضحكوا على الضباط الصغيرين و يخوفوهم من انة حيحصل ليهم زى ما حصل لضباط الشرطة يعنى الجيش خلاص بقى ايد واحدة

أبو جودة said...

اولا
اول مرة اعرف انك من الى بيروحوا مساجد الأولية والحاجات دى وبجد حزنت ان واحدة ناضجة زيك تفكر بالأسلوب ده بس عزائى ان كلامك بيبقى دمه خفيف ومش بتبقى قصدة المعنى الوحش .
ثالثا
انا معاكى ان امريكا بتشخبط شخابيط وبتلخبط لاخبيط فى مصر وخايفة ان مصر تتحرر فعلا وتبقى نواة المقاومة العربية لمشرعهم فى العالم ،،، انا بتفق معاكى 100 فى 100 :)
لكن ليه تقولى ان المؤامرة من الجيش ليه متكونش بتعاون مع احزاب وقوى سياسية معادية لبلدنا .
على فكرة انا شفتكى الميدان يوم الخميس قبل ما يمشى الحيوان بيوم وكنت قاعد قصاد البوابة بتاعت المجلس مولع سجارة وبجد فرحت بيكى وبحماسك الشديد

omima said...

تحياتى يا نوارة وانا معاكى فى الهلاوس بس عايزة اطلب منك طلب خاص لو مش عايزة كنسلى الرسالة انا عارفة انك بتشتغلى فى المبنى وانتوا دايا تتهموا العاملين فى المبنى بانهم مش ثوريين لكن العبد للةمع الثورة قلبا وقالبا ولا ادعى بطولة انى راعيت ربنا يوم ستة فبراير مع الشباب فى التحريربس ماحدشاخدبالةلان الهتمام الاكبر بالتليفزيون وانامازلت مستمرة واستضفت شباب منالائتلاف ومن 6ابريل وهايسعدنى لو تشرفينى يوم السبت فى س37 الدور الرابع من الساعة 11 للتسجيل حول رايك فى الاحداث الجارية وياريت توفقى علشان تشجعوا الاعلاميين من امثلى ممن يؤمنون باهمية ان تصل الثورة الى المحافظات البعدة وريف مصر اللى لسة بيسمعوا البرنامج العام والاذاعة المصرية ووعدمن كل اللى هاتقولية هااذيعة وتكلنا على اللة

omima said...

يانوارة نسيت اقوللك انا اميمة حاتم بقدم برامج الشباب فى البرنامج العام وتليفونى 0101199023 رجاء لوناوية تنفضيلى دلتى الرسالة لخصوصية التليفون

Mohammad said...

يعنى المجلس يحمى مبارك وشباب الجيش يعملوا حركة عشان يحمو المجلس وهو خارج , وكل ده بأوامر وإيحاءات وتطمينات من كلاب البيت الأسود الأمريكى.

إن رفاهية الأمريكان والبريطانيين تقوم أساسا على استغفال الشعوب قليلة التعليم والوعى من أمثالنا. بل إنهم يستغفلون شعوبهم ليوهموهم بأنهم يحافظون على استقرار العالم من حولهم وعلى الديمقراطيات فى العالم كله. هل يعلم الأمريكان بما تفعله وزارة خارجيتهم وأجهزة مخابراتهم فى دولنا المنكوبة بهم؟

هل يعلم المواطن الأمريكى أن رفاهيته ومايتمتع به من خيرات جاءته على حساب إفساد الصناعات والزراعات فى الدول النامية , هل يعلمون أن مبيعات أسلحتهم تعود الى الوقيعة التى تقودها أجهزة مخابراتهم بالتعاون مع ضعاف النفوس من حكامنا وبالتعاون الشديد مع أنانيتنا وخوفنا وخنوعنا لحكامنا.

ِAhmed said...

احساس سليم تؤيده كل الشواهد ولفتره أرى هذا السيناريوم في ذهني ويتأكد يوما بعد يوم

salma dodin said...

wallahe ma3akee 7a2!!......we ya albee khabee layban 3alya....we tshoof israel el khof ele fe 3enya!!
ya rab yetla3 mesh sa7ee7!!

hardway said...

حتي لا يوجد عندك أحترام لخصوصية فتاه مثلك
حاجة زبالة حقيقي....
معلهش يا ست omima ..
اسفين يا ست أميمة حاتم..هي دي اشكال تتشرفي باستضافتها في برنامجك حتي رقم تليفونك لم تحترم خصوصيته ...معقول يا ناس
ان شخصية زي ضلامة الانتصار تؤتمن علي وطنا وعلي اولادنا..دي ركيبة مثل ابوها
تركب الموجة الماشية في البلد

hardway said...

حتي لا يوجد عندك أحترام لخصوصية فتاه مثلك
حاجة زبالة حقيقي....
معلهش يا ست omima ..
اسفين يا ست أميمة حاتم..هي دي اشكال تتشرفي باستضافتها في برنامجك حتي رقم تليفونك لم تحترم خصوصيته ...معقول يا ناس
ان شخصية زي ضلامة الانتصار تؤتمن علي وطنا وعلي اولادنا..دي ركيبة مثل ابوها
تركب الموجة الماشية في البلد

Egyptianyy said...

The scene of Egypt today is confusing just as the former president "Mubarak" promised in his last speech (Me or chaos).
but...
*)the question now: Who's helping him to execute his plans?????? and why?????
ok,
let's see the main players (in order) trying to get some answers:
1-the United states.
2-the Military council.
3-former Democratic party members.(most of them still in power positions!).
4-Muslim brothers.


1- Every child knows that the U.S is interfering in Egypt for it's benefits as we all heard the CNN reporter talking about Omar Soliman the former vice president as : the man we put there.
Mubarak was one of the best allies for the U.S governments, and we know how much they used to support him for more than 30 years,
but the U.S is know trying to put another man instead of the formers so, may be they are trying this scenario to enable them to do so.

2- the Military council announced from the first start that he is taking the side of the revolutionists and supporting them, and they only need to deliver the country to the elected government,
ok, BUT
we also know that most of the Military council were in the Pentagon (U.S again) when the revolution started, also the history tells us that Military is not giving the power that easy, as they did When Muhammed Nagib tried to deliver the country to an elected civilian authority,they made him resign to keep the power and president nassir came to power.
but why they want to keep it ?????
the answer is in that question:
Isn't it possible that when a civilian elected president comes to power may judge the Military council ???? as what happened in Turkey.

3- former Democratic party members, people who had the most almost every thing and spoiled the political atmosphere in Egypt for almost 30 years,
so, they have to keep trying to make that chaos in order to reduce their loss and they have the ability to do so (money power).

4- Muslim brothers, the most organized POLITICAL group but not the greatest, they had some space after mubarak. but that space showed their real personality and goals.
they are trying to get all what they can before any other new parties organize themselves.

the extraction
1-Former president Mubarak will never be judged or even his sons or wife,
the expected scenario is that: Mubarak will be declared as Clinically dead so can not be judged.(Pen Ali, and Kaddafi also will never be judged).
2-The military council will eventually rule the country (as the U.S desires)even through some former military officer.(some of them already started their campaign).
3-former Democratic party members, some of them came back under some new parties, and some others already had enough and they don't need to.
4-Muslim brothers will get the majority in the parliament, and will be free to act for some time but eventually they will go back the the square ZERO.

Egyptianyy said...

المشهد المصرى مربك عن عمد فحاصل جمع 1+1 لايساوى 3
اللى حصل فى مصر ثورة؟ ولا حاجه تانيه؟
باعتراف المجلس العسكرى كانت ثورة
يبقى ماختلفناش
ايه اللى بيحصل بعد أى ثورة فى العالم؟
نشوف ظباط الجيش عملوا ايه فى ثورة يوليو (اللى فى ناس دلوقتى بتقول عليها انقلاب عسكرى).
عملو محاكم غدر وتأميم ممتلكات لدرجة ان كان فى ناس بتتظلم بس كانو بيقولو طبيعى فى فترة مخاض الثورة
ومسحو بأستيكه كل النظام السابق ابتداء من الملك اللى نفوه خارج مصر وحتى اصغر موظف فى الدوله (تطهير)
يبقى ايه؟؟؟؟؟
الثورة دى مختلفه؟ ولا ايه؟؟؟ ولا ثورة دور تانى؟؟؟؟
الناس بتطالب بالاجراءات الطبيعية بعد أى ثورة مش بتطالب بحاجه عجيبه يعنى؟ ولا حاجه استثنائيه.
بالعكس الناس بتطالب بمحاكمات عادلة امام القضاء المدنى ومش بتطالب بتأميم ولا بتاع.
بس براااااااااااااااااااااافو
احزاب وتيارات وتخوين وعمالة وفلوس بتيجى من أمريكا.
على أساس ان الفلوس دى دخلت تهريب؟ ولا حد جابها فى اكياس سوده؟
طيب ماشى
العيال بتوع 6 ابريل خونه وبياخدو فلوس من امريكا يبقى ليه بنعامل أمريكا على انها حليف؟ مع انها بتخرب البلد؟
وبتجند شباب وبتدربهم؟ وليه بناخد معونات (ماليه وعسكريه) من دوله المفروض ان نواياها كوخه؟
ولو فى دليل مادى على ان الشباب دول خونه وعملا يبقى يتحبسوا مش نطلع نسيحلهم فى الاعلام واحنا سابينهم كده؟
ولا دى حملة تشويه فقط؟؟؟؟؟
مطالب الثورة واضحه وعادله للجميع.
واللى بيعمل عبيط الايام دى عشان يحقق مكاسب سياسية على المدى القصير هايدفع التمن بعدين
بس للأسف.....
مش هايدفع التمن لوحده....هاندفعه كلنا

thirteenoclock said...

شتيمة شتيمة شتيمة شتيمة شتيمة

ينبغى التركيز يوم الجمعة على رفض النصوص اللمؤخذة فوق الدستورية لاسقاط هذا المخطط المشترك فيه للاسف بعض بنى جلدتنا الذين يرون فى الاسلاميين خطر اكبر من الامريكان و اسرائيل

torero said...

مشكلة الشعب المصرى واى شعب انه ممكن يتعب و عاوز يعيش فى هدوء و عشان كده ابتدا يقول خلاص بقا واهو الجيش هيظبط البلد ونصبر كمان شوية ماحنا صبرنا 30 سنة
الشعب لازم يعرف انه محتل من زمان وان حاله مش هينصلح الا لما يستقل عن امريكا
ركزوا على الشعب اكتر من كده

torero said...

http://www.youtube.com/watch?v=v4BrfDl84mI

الفوريجي said...

hardway said...
فين اللماضة والفوريجية ..وأنت بتضربي في العباسية وبتصرخي عايزة ممر آمن
..................
اما نشوف مين اللي حيقول أي
ياننوس عينه
هى لسه بدت عشان نشوف هو انته لسه شفت حاجه
أنا مش قلتلك عندى ديتك
أصل الرمه اللى زيك مفهوش حاجة تستاهل الشتيمه مشكلتك أنك متعاص ومحتاس واللى زيك ديته زبلته
نوارة عملتك قرد بصديرى بيسلى زائرين المدونه يالله الليل الليل اللى يا ميمون

كيوبيد said...

نواره انتى مخك يظهر والله اعلم حصل له حاجة من الشمس فى الميدان هو الكلام فية شى من الحق بس خيالى قوى محدش هايسكت ولا ينتظر مصرين عام 2011 مش زى مصرين 1952 فيه فراق كبير القوى الوطنية مش هاتسكت حتى بتوع الانتخبات اولا الى خانو دم الشهيد من اجل كرسى فى المجلس كمان الشباب روح الثورة فينا لسه زى النار الكلام ده ممكن بس بعد مرور 60 سنة كده على ثورة يناير

khmaoda said...

دفاع المثقفين عن التمويل الاجنبى والتكالب على قنوات الفلول لحجز برنامج او اثنين .. التسارع لأقصاء تيارات بعينها ..كيف اتقبل عظه من بلال والاسوانى ونواره وقنديل وائل وعبدالحليم ..وكل هؤلاء الشرفاء على منابر طائفيه تاره ولرجال اعمال فاسده تاره ..اتمنى خروجكم على التلفزيون المصرى...لتلعنوا ابو خاش الديناصورات الفلوليه بها ولا احد يعرف اسمائهم ..واحده اسمها رشا واتمنى ايضا اغلاق جميع الجرائد الحكوميه والفلوليه

حسام شعبان said...

خيال مريض

أبو يوسف said...

أخيراً بدأتو تبصوا لكلامي ؛ يا ما كتبت لكم عن هذا الموقف كثير جداً، ولكن للأسف كنتم عين من طين وعين من عجين،ولسة باقي السيماريوم بلاش بعد إذنك السيناريوم، نفس نهج أمن الدولة بيتكرر في الميدان من دخول عناصر مندسة وسط المعتصمين ونشر فكر التخوين وقتل المتظاهرين وغيره الكثير والكثير،يا شعب مصر وياكل المعتصمين أناشدكم الله أن تدعو معي أولاً إلي نكران الذات؛وثانياًتوحيد الكلمة كما كنا بالأمس القريب وثالثاً عدم تسمية أي مليونية بثورة ثانية أو ثالثة. فنحن لسنا شعباًهمجياً أو يفضل الفوضى على الاستقرارولكن دعونا نطلق عليها أن الثورة جاءها نزلة برد والحمد لله الآن تمثل للشفاء وتتعافى؛ أو أن الثورة الوليدة بدأت تحبو؛ولا تطلقوا ثورة ثانية أو تصحيح مسار أو أي شيء من هذا القبيل .يا نوارة أنا كنت في الميدان ليلة28 يونيووشفت الكارثة التي قامت بها الداخلية وأقسم بالله أنه كان معي أبنائي الخمس أكبرهم ثماني سنوات ؛ وأصغرهم سنة وثلاثة شهور وأمهم،وسألني أبني الكبير عن الناس الذين يقيمون في الخيم في حديقة الميدان وقتها ولماذا هم يحيطون أنفسهم بسور من الحبال؟ وليه الناس اللي واقفة تفتش دي؟ ودول يابابا اللي كانوا معاك في شهر يناير ؟ قلت له لا ده اللي كان معايا أبنائهم؛والناس دي اللي واقفة إلي جوارهم شكلهم غريب جداً وزوجتي سألتني أمال فين الثوار أنا مش شايفة بصراحة إلا اللي واخد له علامات في وجهه أو البائعين اللي بيفرضوا البيع على الناس بالعافية وبعدها ما لحقناش نكمل كلامنا وأشتغل الضرب فأخذت أبنائي وزوجتي إلى السيارة واتجهت إلى عابدين وشفت باقي سيارات الأمن المركزي والبلطجية والشرطة العسكرية والبقية تأتي،وجلست أتابع الأخبار وانتابني العجب وعجب العجاب كمان لما سمعت الناس تغالط في الحقبقة وتحاول طمسها! أيقنت وقتها أن ثورتنا كانت عبارة عن انتفاضة وشعرت أن المخلوع هو اللي عمل كل ده علشان ينقذ مصر من بلاوي كثيرة جداً وأن تلك الأرواح الطاهرة والدماء الذكية لم تكن! والكل يلهث وراء الانتخابات والدستور والحوار الوطني وي كأنه رضي من هذه الثورة بأن يراه الناس في شاشات التلفاز وعلى القنوات الفضاية؛ إن عدونا ياسادة ليس مستعمر دخيل نطرده من بلادنا بثورة أو بحركة إنما هو أبناؤنا وأنفسنا يجب أن نتعايش معها ونقومها ونطهرها وبعدها من أراد أن يسأل عن 86 مليون روح فليتول الكرسي ثم يقف بعدها بين يدي الله إن كان يستطيع والله الموفق.

mohosamaa said...

مساء التسلخات النفسية يا نوارة يعنى زعلانين من الروينى علشان بيقول على 6 ابريل عملاء قوم تغلطى نفس الغلطة بناء على أم أحاسيسك وتهيؤاتك بصراحة انتم وهم لايقين على بعض نفس العقلية ونفس الهسهس ربنا يخليكوا لبعض ومبروك للاخوان غباوة كل خصومهم

Mohamed hany said...

حمد هلى السلامة ايتها النوارة العزيزة .... نفس الذى دار فى ذهنك .. يدور فى ذهنى .. وربنا يستر ... وأكيد ربنا حا يستر

mona fahmy said...

التعليق دة مهم يا نوارة وياريت تقريةللأخر مهم جداً ، طبعا النظام ماسقطش ولا حتى مبارك، بالعكس النظام دلوقتي بيبين لنا وشة الوحش والشواهد بتقول ان هيحصل حاجة مرعبة 1المجلس العسكري يهدد بصباع الفنجري 2الجماعة الإسلامية و(ياريت تفتكري امبابة زمان )تقول انها هتنزل الجمعة 29 عشان تصحح مسار الثورة ويتضامن الأخوان معاهم والسلفين وكمان الجيش 3-يحصل الضرب في العباسيه ويطلع الثوار بلطجية ومخربين وعملا وجواسيس وقبلها بيان من المجلس العسكري عشان 6ابريل لوحدها ويطلع عليكوا بلطجية ومعاهم ملوتوف وأسلحة بيضاء زي مقال اللوا الرويني قبلها ب6 ساعات على الأقل ويتمسك عمرو غربية ويتزف ويتقال علية جاسوس 4-تقرا دينا عبد الرحمن مقال فيهاجمها اللوا كاطوويحصل مشاكل مع دينا في عملها ويتقال على اللى كتبت المقال عميلة ومخربة ، بصي يا نوارة احتمال كبير يحصل تلفيق مستندات لبتوع 6ابريل ولبتوع الإتلاف كمان ، ويوم الجمعة الجاي الناس الي اتفقوا مع الجيش يخلصولهم المسألة هيكون معاهم كل الأسلحة اللي تتوقعيها وماتتوقعيهاش والناس في التحرير هتنطحن ومش بعيد يحصل تخريب في المنشئات ويتوة العاطل مع الباطل ويضطر الجيش ياحرام حفاظا على الأمن العام انة يفض الإعتصام بالقوة وبعد كدة يعمل حملة اعتقلات واسعة عشان يحمي الوطن من المخربين وطبعا مش الناس اللي معاهم سنج وسيوف هما اللي هيعتقلوا ويتحكموا محكمات عسكرية دا ان بان لهم أثر انماالغلابة اللي عملوا الثورة ومسكوهم الحكم ، الحل يا نوارة نفوت عليهم الفرصة ويوم الجمعة تسيبولهم الميدان والناس اللي معروف أسميها في كل الحركات الشبابية 6 ابريل وغيرها يحاولوا يثبتوا انهم في أماكن تانية ويكون في شهود على كدة وياريت لو ورق حكومي وماتخافوش على الميدان الناس دي مابتعتصمش وايلا هيبقوا هما بلطجية السياسة الله يخليكي يانوارة وصلي الكلام دة لكل اللي تعرفية عشان حرام علينا مصر نضيعها من ادينا بعد ما سال كل الدم دة عشان نلاقيها وعشان الشرفا مايرحوش بلاش وربنا يهلك الظالمين بالظالمين ..آمين

fagr-el-dameer said...

http://fagr-el-dameer.blogspot.com/

faroan said...

الله يهديكى يا نوارة !! انت ما قولتيش مين اللى بيزن على المجلس العسكرى عشان يعمل مواد فوق دستورية و يكون الوصى عليها زى جيش تركيا ؟؟؟؟؟

مش ممدوح حمزة و اسامه الغزالى و عمرو هشام ربيع نور فرحات و عبدالحليم قنديل و تهانى الجبالى و كل الشلة التييييييت اللى هما نخبة و احنا حثالة !!!

انت عبيطة يا بنتى و لا ايه؟؟؟
ليه مش بتهاجميهم و مفيش فى دماغك الا الاخوان ؟؟ هما متجوزين امك؟؟؟

faroan said...

الله يهديكى يا نوارة !! انت ما قولتيش مين اللى بيزن على المجلس العسكرى عشان يعمل مواد فوق دستورية و يكون الوصى عليها زى جيش تركيا ؟؟؟؟؟

مش ممدوح حمزة و اسامه الغزالى و عمرو هشام ربيع نور فرحات و عبدالحليم قنديل و تهانى الجبالى و كل الشلة التييييييت اللى هما نخبة و احنا حثالة !!!

انت عبيطة يا بنتى و لا ايه؟؟؟
ليه مش بتهاجميهم و مفيش فى دماغك الا الاخوان ؟؟ هما متجوزين امك؟؟؟

amr565 said...

احذري بتتحولي لتكوني من الثورة المضادة لا اتكلم عن كلامك في البوستات بتكلم عن الموقف ككل فرملي واطلعي بره الحدث واتفرجي...الجميع كان بيدعي امس لاهل العباسية والوايلي ان ربنا ينصرهم تصدقي كل قهوة في كذا منطقة في اسكندرية كان الحديث عن ولاد الو بتوع التحرير والاهالي والشباب والكبار رايتهم وعرفت انكم في التحرير مهزمون وده ايه ومعظم الفضائيات معاكم ومتعاطفة معكم عكس ما كان ايام الثورة تفتكري لو كلامي حقيقي فده مؤشر لايه ... طب بلاش كلامي ده ليا سؤال واحد فقط هل تعتقدي ان يد الله سبحانه كانت مع الشعب وفي التحرير قبل 11 فبراير واثناء موقعة الجمل ومن غير ما اكون موجود هناك في التحرير فانا متاكد ان الجميع كان قريب من المولي عزوجل فهل نفس الروح الايمانية دي موجودة في التحرير الان ولو الاجابة لا يبقي في شي خطا ... مع احترامي لاي تعليق في البوست بتاعك لكني اري كمية سطحية وتفاهة وعدم المام بكليات الامر الجارية...موقفي كالتالي اثق في الجيش ولا اثق في اي بلهارسيا بتطلع في اي فضائية اثق في الجيش ولا اثق فمن كان قالب الدنيا ليل نهار علشان الدستور اولا وفجاة تذكر دماء الشهداء بعد حادثة البالون وجعلها قميص عثمان اثق في الجيش ولا اثق في اي سياسي الا من رحم ربي ... النظام حيقع تماما بمجرد اجراء الانتخاب وتشكيل وزارة وانتخاب رئيس وانتخاب محليات تفتكري في شي ناقص بعد اتمام الاشياء دء لنقول سقط النظام فقط من يعطل الطريق ويضع العقبات تلو العقبات ويطالب المشير ان يقعد سنتين او يتحجج بالامن علشان الانتخابات لا تتم هو العدو والثورة المضادة وشوفي انتي واقفة في اي اتجاه.. اه وعلي فكره حق الشهداءودماء الشهداء واهالي الشهداء لا تسقط بالتقادم فيعني حتي لو فرضنا ان المجلس متواطي فمن مصلحتنا ان نسرع للمدنية حتي نعرف نحاسب قتلة الشهداء اماموضوع البوست فحرام ارد عليه

NightRose said...

يا خوفي يا بدران بس على العموم مدام هتبقى حرب اهليه و ربنا يستر
الجيش نص مليون و الشعب المصرى 84 مليون

واحد عادى said...

الكلمتين دول تم تسريبهم من مسوده البيان القادم - بصوا يا ابنى انت وهوه - هوجه يناير خلاص عملت اللى كنا عاوزينه منها - خلصتنا من نظام التوريث - خلاص بقى - نفضها سيره وكل واحد يروح لحاله ويشوف شغله احسنله - ولا انتم صدقتم بجد انكم عملتم ثوره - كل واحد منكم يا روح ماما يشوفله غرزه يتلم فيها وسيبوا بقى اكابر البلد يشوفوا ح يعملوا فى امها ايه

rasha2210 said...

بتسالي علي تويتر الاخوان مع مين ؟ طيب افري صفحة القرضاوي علي الفيس بوك النهارده وفيها الجمله دي :الإمام يوسف القرضاوي
ويستمد المؤمن قوته من إخوانه المؤمنين، فهو يشعر بأنهم له وهو لهم، يعينونه إذا شهد، ويحفظونه إذا غاب، ويواسونه عند الشدة، ويؤنسونه عند الوحشة، ويأخذون بيده إذا عثر، ويسندونه إذا خارت قواه، فهو حين يعمل يحس بمشاركتهم، وحين يجاهد يضرب بقوتهم..!

amoka said...

تصدقى احلى حاجه فيكى دماغك الجزمه دى

انا بصدقك وهنروح فى داهيه

btkhekhaweaykalamtoz said...

يا جاسوسسسسسسسسسسسسسسسسسة يابنت اقذر ناس في مصر بقي المجلس العسكري وراة امريكا امال انت و6 ابريل قصدي اسرائيل والبرادعي وامثالكم دول يبقوا وراهم ميين اتكشفتم واقسم بالله معظم الشعب عرفكم خلاص وبيقولوا عليك طبعا بنت احمد فؤاد نجم هتكون اية غير خاينة لبلدها

علاء زين الدين said...

راجعوا مذكرة هشام البسطويسي للقوات المسلحة، أو الطعم الذي ألقاه البسطويسي. وفيما يلي حديث دار بيني وبين سيادةالمستشار حول هذا الموضوع. لم يقنعني البتة:

http://ayamalsabr.blogspot.com/2011/07/blog-post_10.html

khaledali said...

http://www.facebook.com/photo.php?fbid=252542464759053&set=a.217108221635811.63978.208796022467031&type=1&ref=nf

Ayman said...

يجب التوحد و التركيز على مطلب واحد و هو تنفيذ إرادة الشعب في الإستفتاء بـالعمل بدستور 1971 المعدل إلى أن يتم وضع دستور جديد و إلغاء مواد الإعلان الدستوري التي لم يستفتى عليها بما فيها مادة 56 التى قام المجلس بـتفصيلهـا على مقاسه لتعطيه سلطة ديكتاتورية لم يقال عليها نعم. بالتالي على مجلس العسكر الذي فوضه مبارك و ليس له أي شرعية الا منه أن يرجع إلى ثكناته و كما هو منصوص في دستور 71 المعدل يسلم فورا السلطة إلى محكمة دستورية عليا (منتخبة من نادي القضاه لضمان النزاهة) لتنفذ بقية المطالب. هذا الحل الوحيد المطروح الآن لإنقاذ مصر الذي يمكن تنفيذه سلميا في الحال و لا تشوبه أي تعقيدات من ناحية الإجماع أو الشرعية أو الدستورية

Ayman said...

يجب التوحد و التركيز على مطلب واحد و هو تنفيذ إرادة الشعب في الإستفتاء بـالعمل بدستور 1971 المعدل إلى أن يتم وضع دستور جديد و إلغاء مواد الإعلان الدستوري التي لم يستفتى عليها بما فيها مادة 56 التى قام المجلس بـتفصيلهـا على مقاسه لتعطيه سلطة ديكتاتورية لم يقال عليها نعم. بالتالي على مجلس العسكر الذي فوضه مبارك و ليس له أي شرعية الا منه أن يرجع إلى ثكناته و كما هو منصوص في دستور 71 المعدل يسلم فورا السلطة إلى محكمة دستورية عليا (منتخبة من نادي القضاه لضمان النزاهة) لتنفذ بقية المطالب. هذا الحل الوحيد المطروح الآن لإنقاذ مصر الذي يمكن تنفيذه سلميا في الحال و لا تشوبه أي تعقيدات من ناحية الإجماع أو الشرعية أو الدستورية

Ayman said...

يجب التوحد و التركيز على مطلب واحد و هو تنفيذ إرادة الشعب في الإستفتاء بـالعمل بدستور 1971 المعدل إلى أن يتم وضع دستور جديد و إلغاء مواد الإعلان الدستوري التي لم يستفتى عليها بما فيها مادة 56 التى قام المجلس بـتفصيلهـا على مقاسه لتعطيه سلطة ديكتاتورية لم يقال عليها نعم. بالتالي على مجلس العسكر الذي فوضه مبارك و ليس له أي شرعية الا منه أن يرجع إلى ثكناته و كما هو منصوص في دستور 71 المعدل يسلم فورا السلطة إلى محكمة دستورية عليا (منتخبة من نادي القضاه لضمان النزاهة) لتنفذ بقية المطالب. هذا الحل الوحيد المطروح الآن لإنقاذ مصر الذي يمكن تنفيذه سلميا في الحال و لا تشوبه أي تعقيدات من ناحية الإجماع أو الشرعية أو الدستورية

muhammad said...

يا جماعة بما أن امريكا هي الدولة القمعية العظمى وده باسم ديكتاتورياتها في الوطن العربي وباسم حق الفيتو و باسم اﻻحتلال لنهب ثروات اﻷمم فنحن في ثورة ضد هذا الكيان يعني الثورة تقوم ضد الفرع اﻷمريصهيوني في مصر وهو ده التحدي وكل واحد ليه وجهة نظر