Monday 25 July 2011

ان شاء الله خير

تحديث:
حركة 6 ابريل حتعمل الجمعة الجاية جمعة توحيد الصف وجاري كتابة البيان
وان شاء الله حيعملوا مع السلفيين لجان لتأمين الميدان
:)
واهل مصر صحابي واولياء الله
-------------
بصوا بقى، فيه شخصيات كتير متدخلين عشان ان شاء الله يوم الجمعة ده يبقى يوم لاستعادة وحدة الصف 
مش عارفة اقول اسماء دلوقت ولا لا، بس اللي قالوا عن نفسهم في التويتر ابراهيم الهضيبي واحمد سمير واحمد الدروي
وانا كلمت د. عصام العريان ود. البلتاجي وهم تعهدوا ببيان لتوحيد الصف وتأليف القلوب
انا عايزة من المنسقين في ميدان التحرير كام حاجة كده
اولا: اللجان الشعبية الموجودة دي مش امان، عايزين نعيد هيكلتها بحيث ما تحصلش مشاكل الخميس بالليل
ثانيا: اليفط الخلافية تتشال اليوم ده بس ونرجعها لما يمشوا عشان برضه ما تحصلش مشاكل
بالنسبة لهم هم تعهدوا بإنهم يطمنوا الناس المعتصمة في التحرير وده اول تعهد ظهر وان شاء الله منتظرين منهم بيانات لتهدئة روع الناس في الميدان
وكمان اهالي العباسية رايحين يعتذروا لنا
والله حتروق وتحلا.. ده ربنا.. ربنا.. قولوا يا رب
------------
فيه حاجة مهمة قوي، فيه ناس مش عايزة المصالحة دي تحصل
انا ما اعرفش ايه مصلحتهم بالظبط، بس فيه ناس من اللي مش سيئي النية لكنهم عندهم اخوانوفوبيا واسلاموفوبيا نفسهم الاسلاميين ييجوا يضربونا وتحصل الاشتباكات دي عشان المظهر بتاعهم يبقى ان دول بلطجية ويتحرقوا
طبعا هم فاكرين ان ده حيفضي السكة لقوى سياسية تانية وده مش صحيح، اذا كان ضرب المربوط بيخوف السايب فضرب السايب بيقتل المربوط، حرق فصائل سياسية قوية يسهل حرق الفصائل التانية
وبعد ما تطلع 6 ابريل عميلة وجاسوسة ويطلع الاخوان والسلفيين بلطجية الناس حتتف علينا وتقول يا مرحب بالحكم العسكري يا مرحب
وبالمناسبة فاكرين لما قلت لو اتشتمت على البوست اللي فات يبقى كلامي صح، اتشمت فعلا، والنهاردة انفجار شتيمة عشان قلت اني انا واطراف تانية بنحاول نعمل تهدئة ومصالحة ما بين المعتصمين وما بين الداعين ليوم جمعة 29 يوليو وهيستيريا بقى وشتايم وافتراءات
فانبسطت بقى، حسيت ان كده صح
هو فيه ناس غيري والله بتعمل شغل، بس هم مش حابين يبانوا في الضوء دلوقت لحد ما يخلصوا، انا اللي مسحوبة من لساني، وبرضه احب اوافيكم بكل حاجة بتحصل عشان مش باحب الاسرار
البرهامي تعهد للدروي بإنهم يطلعوا بيان للتهدئة
والعريان والبلتاجي تعهدوا لي بنفس الحكاية وطلبوا مني ان بشكل مؤقت منسقين الاعتصام يشيلوا اليفط الخلافية عشان نعمل وحدة صف 
طبعا لما نيجي نشيل اليفط الخلافية حتحصل خناقات من ثلاثي اضواء المسرح المزروعين وسطنا: المخابرات العسكرية، والمخابرات العامة، وامن الدولة.. زي ما احنا راسيين يعني، ما احنا اتعودنا من يوم 8 يوليو كل ما نيجي نعمل حاجة كويسة تلاقي الثلاثي ده انفجر بخناقة وابتدا يزايد على ثورية الثوريين، فعادي يعني احنا اتعودنا، نشرب احنا الخناقات في عدم حضور اللي جايين يوم 29 عشان دول بيتخضوا مش واخدين على الباللو بتاع كل تلات ثواني ده 
وبالمناسبة ما بيحبوش الشتيمة.. بطلوا تشتموا فيهم، هو اللي بيقلبهم انهم بيتشتموا
وبعدين هم فاكرين ان ممدوح حمزة هو قائد الاعتصام، وما يعرفوش ان العيال اتلمت عليه لما جه وقالوا له: انت عمال تقول انت اللي مكلف الاعتصام، مكلفه في ايه؟ قول لنا دفعت كام واحنا نلمهولك
ولما كلمت البلتاجي لقيت سوء تفاهم كتير، هم فاكرين ان ساويرس وممدوح حمزة هم اللي ورا الاعتصام، وفاكرينا بنقول مواد فوق دستورية والدستور اولا، ومش عارفين ان فيه اهالي شهدا ومصابين بالكثافة دي، وفاكرين حاجات كتير غلط
فانا شرحت لهم الوضع
وانا محتاجة مساعدة 6 ابريل عشان نكمل موضوع التوافق ده
ولازم كل الاطراف تعمل حسابها ان اطراف كتير حتقاوم التوافق وعايزة تبوظ اليوم وتعمل مواجهات وخناقات، غير التلات اجهزة، الناس اللي عمالة تركب على الاعتصام وتقول مطالبها هي على التلفزيون وهم ما بيعتبوش الاعتصام
وانا بصراحة قلت للبلتاجي سبب ان فيه ناس بتركب على الاعتصام من براه هو تغيبكم انتوا، وانتوا تتحملوا المسئولية دي... فسكت
المهم يعني.. المهمة مش سهلة، اي حد بيحب مصر وعايز يعمل التوافق ايده معانا
ياللي تحب النبي ايدك معانا وشيل.. الحب اتقل من اسمه واسمه نفسه تقيل
المهمة حتلقى مقاومة فظيعة... كل واحد ييجي على نفسه عشان مصر لحد ما اليوم ده يعدي على خير
الهدف من اليوم ده هو حرق كل القوى الثورية لما يمسكوا في بعض عشان الناس تختار الحكم العسكري، وفيه ناس مستفيدة ودافعة فلوس في الموضوع ده
اتقوا الله في بلادكم وبلاش تبادل اتهامات وكل واحد يتهم نفسه ويبرأ اخوه..... زي ايام التحرير اللي بجد
فاكرين؟


71 comments:

Anonymous said...

ياااااارب تتوحد كل الأيادى علشسان مصر وكلنا نرجع تانى زى ايام التحرير الى بجد ويارب بيوفقك كل حد نيته خير .

Masri said...

تمام و هو ده اهم حاجة قبل الجمعة الجاية
لازم كل القوى تتحد مع بعض

Hossam Hassan said...

الله عليكي يا نوارة
ربنا يوفقك انتى وكل واحد بيحاول يوحد الصف

رجعتيني متفاءل تاني
يارب

BestItalianPizza said...

هو احنا لازم نسلم الثورة ؟؟ يا اما للمجلس العسكرى يا اما للإخوان ؟؟؟ الإخوان و التيار الدينى هم اول من بدأ الفرقة و الشتيمة و الإتفاقات السرية .. و التخوين و العمالة و التكفير .. لأ و قال عايزين يروحوا يطهروا الميدان .. يعنى اعلان حرب .. ما ينفعشى الطريقة بتاعتك دى يا نوارةفى لخبطة الأمور و الأوراق .. اللى عايز وحدة الصف .. يعوزها بدون قيد و لا شرط و يحترم الرأى الآخر .. ييجوا الميدان و يحطوا اليفط اللى عايزينها .. ما ينفعشى مشيل سفطنا علشان خاطرهم .. و بعدين دول بيدافعوا عن المجلس باستماته و من الآول خااااالص .. ما ضيعيش الثورة يا نوارة .. ثورتك انتى .. نصيحه

hala said...

لازم كلنا فعلا نوحد الصف عشان محدش يقدر يدخل مبانيا

Mustafa Kamel said...

مش أنتي البنت اللي طلعت على الجزيزرة وقالت مش عايزين شرطة

طيب دلوقتي انتي مش عايزة جيش
وكمان شوية عهتقولي مش عايزة شعب

و عجبي

علاء said...

تخيلى بعد ما الثورة تنجح نكتشف ان ممدوح حمزة المجلس اللى بيحركه وبيموله كمان وللاسف انا قلت ميه مرة الناس اللى فى اللجان الشعبيه اتحولوا لموظفين عند ممدوح حمزة بس فيهم الاصلي بس الظروف والمعيشه

hala said...

لازم فعلا نوحد الصف عشان منسمحش لحد انة يدخل مبانا

hala said...

لازم فعلا نوحد الصف عشان منسمحش لحد انة يدخل مبانا

Mustafa Kamel said...

مش دي البني اللي كانت بتقول مش عايزة شرطة

و جاية دلوقتي تقول مش عايزة جيش

كمان شوية هتقول مش عايزة شعب

ده بقى تحشيش مش تهييس
و عجبي

torero said...

كل كلامك صح
مهما بلغت قوة كل فصيل فهو اضعف من الموجودين فى السلطة دلوقتى
عشان كده لازم تتوحدوا وبعدين صندوق الانتخابات هو اللى يقول الشعب عاوز مين
لكن بدون وحدة الشعب هيقولك انا عاوز اعيش مع اى نظام الى ان يقضى الله امر كان مفعولا

shiemaeid said...

ربنا يحمى مصر ويحميكى لأنك بجد وحتى لو اتهورتى بيكون علشان حبك لمصر لكن تفكيرك فى المجمل صحيح ومش بس امريكا واسرائيل اللى عايزين يجيبوا ضلف الثورة بالديمقراطية دة كمان اخوات مبارك فى الدول المجاورة اللى قام واللى ما قامش فيها ثورة يبقى نوعى لنفسنا ولمصر ونوحد صفوفنا وانا واخويا على ابن عمى وسلمية سلمية حتى اسقاط النظام لأن النظام مكانش فى يوم مبارك لوحده دى كانت عصابة محلية ودولية ومستقويين ببعض وربنا يرد كيدهم فى نحورهم ونشوف فيهم عدل ربنا دنيا وآخرة

Mustafa Kamel said...

مش دي البني اللي كانت بتقول مش عايزة شرطة

و جاية دلوقتي تقول مش عايزة جيش

كمان شوية هتقول مش عايزة شعب

ده بقى تحشيش مش تهييس
و عجبي

Mustafa Kamel said...

مش دي البني اللي كانت بتقول مش عايزة شرطة

و جاية دلوقتي تقول مش عايزة جيش

كمان شوية هتقول مش عايزة شعب

ده بقى تحشيش مش تهييس
و عجبي

علاء said...

نوارة نجم البت اللى انا اشهد انها ارجل من رجاله بشنبات نفسى بقى اللعب على المكشوف ونحط لسته باسامى العملا اللى فى الميدان وانتى عارفاهم بالاسم او هما معروفين بالاسم ايه راءيك يالا ؟

Bassem R. Zohdy said...

ربنا معاكم

nosseir said...

كلام جميل..كلام معقول..ما اقدرش اقول حاجة عاااااااانووووووووووو

Shoukry said...

احسن حاجه ... بجد ربنا يبارك فيكم .. الكلام ده كان المفروض يحصل من زمان و كلنا اغبيا اننا ساعدناهم علي شق صفنا بالأستفتاء ... المفروض كنا قاطعنا الأستفتاء ده. حصل خير, الناس العاقله المفروض تبتدي تتحرك علي المحور ده و يكلموا التيارات الأسلاميه و الأخوان و الليبرالين ... انا مش شايف غير البرادعي اللي عمال يعمل كده و لوحده مفيش حد بيساعده. فين دعاه الديموقراطيه؟؟!! الديموقراطيه في التوافق و المناقشه مش استقطاب و تحزب!!

BestItalianPizza said...

الأحتواء المزدوج .. المجلس يحتوى الإخوان و الإخوان يحتووا الثورة .. العوا لسة مطلع تصريح يهاجم المسيرة اللى انتى كنتى فيها .. و فى سوريا واحد مفتى افتى بجواز السجود لصورة الأسد

BestItalianPizza said...

تتوحد الأيادى لما الإخوان يعرفوا ان اللى بيحاول ياكل 6 ابريل النهاردة حياكلهم بكرة .. يقوموا همة يصححوا مسارهم الغلط اللى بدأ فى الإستفتاء مش احنا اللى نعوج مسار الثورة علشان نديهالهم هدية

ahmedbasha said...

خبر جميل استاذه نوارة
اولا انا مستقل
ثانيا انا حاليا خارج مصر وكنت على وشك الاحباط لما يحدث من عملية تخوين ل 6 ابريل
ثالثا يجب على السلفيين والاخوان كل جماعة فيهم تطلع بيان تستكنر فيه تخوين 6 ابريل واي فصيل سياسي بدون دليل

مش من باب يعني الجدعنه من باب انه اكلت يوم اكل الثور الابيض

==
نختلف في التوجهات ويجمعنا حب الوطن

محـمــد حمايـــــة said...

فخور بيكى يا نوارة .. وفخور بكل شباب وبنات جيلى .. ربنا يوفقنا لما فيه الخير لبلدنا
محمد حماية - السويـس

hamto shanab said...

انتى اصلا عميلة وتلقيتى تدريبات عسكرية فى اقليم كشمير المتنازع عليه بين الهند وباكستان وفى كلام ان بن لادن مماتش وانتى بن لادن اصلا

hardway said...

يا أهل مصر المحروسة....
نوارة في ثوبها الجديد..بعد علقة العباسية
شفتي يا نـرنـر الكف الشعبي السخن المولع
علي قفاكي ..عمل ايه..
مبروك عليكي الثوب الجديد بتاع اليومين دول....المهم هاتلبسيه لغاية امتي ؟؟؟
...ياأهل مصر المحروسة
هنعرف يوم الجمعة القادم..اي ثوب سترتديه ضلامة الانتصار

sabrafamily76 said...

ينصر دينك يا نوارة .سر قوتنا في وحدة الصف و إرجاء القضايا الخلافية .

نور said...

تمام الكلام يا نوارة ... ربنا يهدى النفوس و يبعد الـــ نفوس التانية

freedom4ever25 said...

انا مش عارف ايه المشكله يعني وعلى ايه الضجه دي كلها ... ما السلفيين والاخوان يروحوا التحرير ويعملوا الجمعه بتاعتهم وياخدوا واجبهم تالت ومتلت شاي وتمر هندي ومانجا ولو في حد بيشرب سجاير كمان مش مشكله. بس لازم برضه باقي القوى السياسيه والنشطاء وشباب الثورة يحشدوا ليوم الجمعه دي عشان حماية المعتصمين من اي حد يحاول فض الاعتصام ... الناس جايه ترفض الوثيقه فوق الدستوريه وجايين يأكدوا على الانتخابات وان مجلس الشعب هوه اللي يحط الدستور . (طيب وماله) حقهم يروحوا التحرير ويقولوا اللي عايزين يقولوه واللي مش عاجبه الكلام مايبقاش يهتف معاهم . يبقى يعمل منصه تانيه ويقول اللي هوه عايزه ( سهله)المهم انه يبقى في حشد كبير من شباب الثورة والمواطنين العاديين عشان لو حد حاول يمد ايده على الاعتصام او المعتصمين يوقفوه عند حده خصوصاّ الناس بتوع الجماعه الاسلاميه لأنهم واضح ان في حاجة غلط ناويين يعملوها وان في حد بيحركهم بالاضافه لبعض السلفيين اللي بدأ شيوخهم يشحنوهم ضد شباب الثورة وضد 6 ابريل وضد الثورة بشكل عام وبدأ يبقى في كلام انهم رايحين يفضوا الاعتصام ده لأنه جايب لهم المشاكل...مع العلم ان في سلفيين كتير من اللي هينزلو مؤمنين بالثورة بجد ومش مخدوعين بالمجلس العسكري ....فالحل الوحيد هو الحشد وكثرة العدد لضمان بقاء الاعتصام بعد مرور الجمعه على خير ان شاء الله

نور said...

كلام تمام يا نوراة ..ربنا يهدى النفوس و يبعد الــ نفوس التانية ..

Rasha Mahmoud said...

ودة كمان استنكار من الشيخ محمد يسري أمين عام الهيئة الشرعية للحقوق والاصلاح اللى دعت لمليونية الجمعة 29 بيستنكر فيها تصريحات الراجل بتاع الجماعة الاسلامية الى اتهم فيها معتصمي التحرير http://youtu.be/3ly7PDBQYI

اضطريت اجبهولك هنا عشان انتي مبلكاني طبعا..بس بشوقك يا بنت نجم

elzahraamegahed said...

يا رب كرامه لحبيبك النبى وأهل بيته تجبر بخاطرنا ياااااااااا رب
شىء لله يا سيدنا الحسين بركاتك يا ستنا السيده زينب
يااااااااااا رب إن لم نكن أهل لعطائك فأنت أهل للعطاء يا كريم

Anonymous said...

بصي يا نوارة ا اختي ,,ربنا ينورهالك ,,مشكلتك ان انتي بتبصي للاحداث من تحت رجليكي معندكيش بعد استراتيجي ,,,وحلو ان انتي بتهدي الناس ويا ريت تبصي لحقائق الامور

Ahmed Abdel Mohsen said...

بنت بميت راجل

http://morsy-abo.blogspot.com/ said...

الى المجلس العسكرى انت معانا ولا ضدنا
شارك برايك يهمنا Feedback Feedback mhassanabo@gmail.com maboeleneen@yahoo.com
الى المجلس العسكرى انت معانا ولا ضدنا

الى المجلس العسكرى انت معانا ولا ضدنا الجيش طول عمره وهو مع الشعب لانه هو من الشعب ولا يمكن ان يكون فى يوم خلاف ذلك فنحن فصيل واحد ولا بد ان نعترف ان الاسرة واحدة ممكن ان نجد ابن فاسد او ضل طريقه بسبب الوسط المحيط به منهم من يصحح اخطاءه بالنصيحة ويستغفر الله على خطاياه ومنهم من يستمر على فسقه حتى اسرته تتبرأ منه ومنهم من يقتل أبناءه عند تلوث هؤلاء الأبناء بقضايا الشرف والخيانة يقتل فلذة اكباده للتخلص من عارهم .
عليكم ايها القادة ان لا تقطعوا الخيط بيننا وبينكم اصبحنا شعب يقرأ بين السطور ولن يلتف عليه احد مرة أخرى بأقوال مرسلة واليكم بعض ما نرى :-
1- اللواء الروينى تكلم وياليته لم يتكلم من تخوين والقاء تهم على شباب ورجال عظماء قام بثورة للحرية والعدالة من اجل شعب غافل وكشف فساد استشرى فى بدن هذه الامة العظيمة حرام كفاية تتطهروا من عصر فاسد نحتاج سنوات وسنوات للتخلص من عفانته وقذارته .
2- لقد اصبحت مصر بعد الثورة :-
ü لن يكون هناك فصيل افضل من فصيل اخر.
ü لن يكون هناك احد ليس تحت المسائلة القانونية .
ü لن تكون هناك حسابات أو صناديق خاصة غير خاضعة للرقابة أو المحسبة.
ü لن يكون هناك عفو أو تسامح أو تصالح
3- لا بد على من يحكم مصر ان يقدم اقرار ذمة مالية قبل تولى السلطة وأن يتقى الله فى كل خطوة وعليه أن يتعهد للشعب بمحاسبة كل فاسد وخاصتا العصر البائد.
4- لماذا التباطىء فى اتخاذ القرارات ومحاكمة كل من افسد وساعد على الفساد
5- اين كنتم عنما قام الرئيس الغير الشريف والغير والغير والغير0000
نحن نعتز بما قمتم به حتى وقت قريب ولكن من بداية الاستفتاء على مواد الدستور الغير كافية والتى اعطة شرعية واهية لفصيل دون الباقى من ابناء هذا الشعب والتى ادت الى الفرقة لحصول هذا الفصيل على مكاسب ( قصر فى النظر للاسف الشديد) وقد قلت لصديقى انتم ركبتم موجة خاسرة ولن تدوم مهما طال الزمن وخسارتكم اكبر على المدى البعيد واعتقد بعضهم نادم على ما حدث ومسجل فى مدونتى هذه فى حينها .
6- على الجميع أن يأخذ العبرة من احداث هذه الثورة وماحدث للمخلوع الغير مأسوف عليه ولكنى استعجب من بعض أبناء وطنى أن يطل علينا بطلعته البهيه وحتى لو كان هذا المواطن من الفلول أو الاذناب أو حتى فاسد أو مرتشى أو من المحاسيب أو من الحزب الفاسد أو أو أو أو ......ألخ ان تنتزع من قلبه الرحمه أو عقله الخلاص من فساد وقد اتته الفرصه للتطهر الم يتذكر الاتى :-
* فساد السلطة الحاكمة لمدة 32عام ومشروع التوريث واستخدامها فى نهب
كل ثروات مصر والاستيلاء على الاراضى والمناجم والشركات والمصانع لهذه الاسرة الفاسدة وكل من له صله بهم حتى المستوى العاشر من هذه الاسرة حتى الدعاء عليهم الى نهاية العمر لا يكفى .
· لقد تركوا الشعب بدون تعليم وبدون رعاية صحية وترك الامية وجلبوا المواد المسرطنة والتستر على كل من يضر هذا الشعب بدون حساب ( العبارة – والدم الفاسد –سرقة أراضى ومصانع وشركات وضياع حقوق العمال) من اجل تربحهم حتى المحميات الطبيعية تم الاستيلاء عليها تحت امرهم وبيع الغاز لاسرائيل وكمان بأسعار لاعانة اسرائيل على التفوق وقتل الشعب الفلسطينى .
· ترك الكلاب تنهش فى خيرات مصر بدون حساب حتى ثروة ألاثار تركها الاجداد لتسرق وتنهب بدون حساب
· حرام اتقوا الله عليكم تنفيذ متطلبات الثورة الحقيقية بالقضاء على كل الفساد فى كل صوره من قضاء وشرطة ووكلاء نيابة وحزب وطنى ومجالس محلية وصحافة واعلام ومحافظين ووزراء ..........الخ
· عليكم محاسبة كل من افسد وساعد حتى يبقى لكم فى سجل التاريخ لكم وابنائكم واحفادكم الفخر حتى لا تكونوا مثل المخلوع واسرته أذا دفن فى هذه الارض الطاهره ستلفظه من بطنها لان الارض الطيبة لا تستقبل الا الابدان الطيبة لانهم لم يتطهروا حتى الان بداية التوبة الاعتراف بالاثم ومحاولة ارجاع الحقوق لاصحابها وروحه ستظل معلقة لا ان يغفر له كل من اساء اليه ويعفوا عنه واعتقد من ظلمهم كثيرين على الاقل اكثر من مأئة مليون وطبعا هتقولوا ليه احنا 85 مليون اقول اطرحوا 5 مليون وضيفوا من ماتوا اضرهم على مدار 32عام وهما اكثر من 20 مليون كمان ادعو معى اللهم انتقم انت العزيز الجبار

heeba_alrahib said...

الله يخليها ليا مراتى (والله اعلم باللى في ضميرى) دايما تقولى فلان ده غبي والغبي لازم يموت
نوارة انتى غبية
الديب عمره ما يبقى حمل يا نوارة
يا ريت تحسي بلاش تفهمي لانه صعب عليكي موضوع الفهم ده
اقرى كلامك سيدك الانبنودي عن الديب اللى لا يمكن يبقى حمل
واللى طول عمره عريان لا يمكن يلبس ابدا

hardway said...

انا كلمت د. عصام العريان ود. البلتاجي وهم تعهدوا
انا بصراحة قلت للبلتاجي
لما كلمت البلتاجي لقيت سوء تفاهم كتير
.............................
يعني يا خويا الناس دي في الفضائيات عالطول و العرض ..لم نسمع مطلقا منهم انهم كلموا نـوارة الثورجية..خالص..خالص
ايه يا نـرنـر ..دي أشتغاله و لا ايه
أيام ماكنتي مع الجيش والمجلس..كانت الاسطوانة ماشية..أصل اللواء/ علان..
قالي وقلت له...واللواء/ فلان في الأجتماع قال لازم لازم نسمع كلمة نوارة
مايكنش المخلوع كان بيكلمك كمان...
الي اللقاءيوم الجمعة وهانشوف يومها مين هيكلمك وتكلميه

Hazem said...

الشعب ده شعب عظيم
ومفيييش حاجة حتقف قصاده بس العقل زينة في الفترييينة يا جماعة الخير
وجزاكم الله خيرا

negmat lail said...

عود أحمد يا نوارة...مين أحمد !!

negmat lail said...

عود أحمد يا نوارة...مين أحمد !!

Ahmed . M . Abdulrahman said...

كلامك سليم 100%

الحل للخروج من المأزق الى احنا فيه هو التوحد الوطنى

يارب عدى يوم الجمعه الى جايه على خير

وللعلم انا طبعاً مش مقتنع ان عصام العريان والاخرين مش فاهمين الناس الى فى التحرير بيقولوا ايه

انا اساساً رافض فكره المبادئ فوق الدستوريه

ومن دعاه الدستور اولاً

لاكن احنا قلنا 8 يوليو من غير شعرات

وانا من يومها و انا حزفت موضوع الدستور اولاً من قاموسى

بس المسئله بسيطه

الى عاوز يطلع بيان لتوحيد الصف و تغيراسم يوم الجمعه الجايه

يا اهلا بيه

اما بقى الى حينزلى و يعد يقولى جمعه الشريعه و جمعه الهويه

هويه ايه وبتاع ايه

احنا اساساً مجبناش سيره الهويه فى حاجه

انا مش عاوز احس ان الى نازلين يوم الجمعه الجايه نازلين يكفروا الى فى التحرير او اى ميدان اخر

انا شفت مهازل معلش انا بقلهالك

ودمى اتحرق

و الجرايد نازله بتولع فى الموضوع زى الكبابجى الى بيهوى ع الفحم

وانا فى منتهى الحزن من الى بيعملوا الاخوان وغير الاخوان

وفتكرى ان هم الى انسحبوا

و هم دلوقتى الى عاوزين ينزلوا مظاهرات

بس لو هم عاوزين يعملوا اجماع وطنى ويرجعوا لصفوف الناس

باحترام - و ضمير - وزمه - وامانه -واخلاص

يا اهلاً وسهلاً

يتفضوا يطلعوا اى بيان يجمع الناس او اى طرف سياسى يطلع اى بيان يجمعهم ويجمع الناس

و فى النهايه الاتحاد قوه

اما ننزل نخون فى بعض ونشتم فى بعض و نكفر فى بعض

فاقدر اقولك كل سنه وانتى طيبه

وان الى حيكسب فى اليله دى هم 3 اطراف

المجلس العسكرى

اميريكا

اسرائيل

ولا عزاء للشعب المصرى

ياريت تبلغى الاخوه بتوع الاخوان

يحترموا نفسهم و ينزلوا يقفوا معانا ويجتمعوا على مطالب موحده وينسوا شويه المصالح الشخصيه وينسوا الانتخابات اولاً زى ما المحترمين نسوا الدستور اولاً

وانا اشهد ان فى ناس محترمه منهم كتير
وخاصه الشباب وانا شفت دا بعنيه انا شفت شباب منهم بيكسروا اوامر مكتب الارشاد و بيتظاهروا يومياً معانا فى المنشيه
والكلام دا من يوم 8 يوليو حتى الان

ونا طبعاً عمرى ما حشتمك لان اولاً الى قلتيه صح لابد من اجماع وطنى

ثانياً انا واثق 1000000% من وطنيتك و حرصك على مصلحه الشعب

وكل الى يجى من نحيتك خير

وربنا معاكى و معانا
وسلام مؤقتاً يا نواره
________________________
الى عاوزنى يجينى
http://misr25jan2011.blogspot.com

hosam mohareb said...

نوارة مرحبا,اليوم اكتشفت هدا المحل,طب ليش محكتيش من زمان ؟ بالصدفة اكتشفتو اقسم.

Dr.issamo said...

ثورة مصر و غزوة أحد

بعد أن أحرز المسلمون الأوائل نصرا في أول غزوة أحد و قتلوا بعض صناديد المشركين ظنوا أن المعركة حتما ستنتهي بالنصر لهم ثم كان أن تركوا أماكنهم الإستراتيجية التي أوصاهم الرسول صلى الله عليه وسلم ألا ينركوها و اندفعوا بحثا وجمعا للغنائم ناسين المصابين والشهداء بل ورسول الله صلى الله عليه وسلم الذي أصيب في هذه المعركة ثم انتهت المعركة بهزيمة المسلمين بعد أن أخذ المشركين مواقعهم الإستراتيجية.

نفس ما حدث في غزوة أحد يحدث الآن في الثورة المصرية فعندما ظن المصريون أن الثورة انتصرت اندفعوا نحو الغنائم وتقاتلوا عليها بل والغريب أن بعض ممن لم يشارك في المعركة جاء من خارج الميدان ليجمع الغنائم ويتقاتل عليها مع مستحقيها وانقسموا ولم يدركوا أن المعركة لم تنتهي بعد ومن خارج ميدان المعركة دخل هؤلاء للتكالب على الغنائم ودخل فريق ثاني لنصرة المهزومين ومحاربة المصريين ثم قفز فريق ثالث كان متفرجا ليأخذ المواقع الإستراتيجية و يدعي أنه مع الثورة وحاميها.
المهم أن الناس تناست القضايا الرئيسية و نسينا المصابين والشهداء بل ونسينا الثورة نفسها بحثا عن الغنائم أو للنبش في صراعات الماضي و تصفية حساباته والخوف الآن أن يفيق المهزومون ويأخذوا المواقع الإستراتيجية و يدين النصر لهم في النهاية وهذا ما لا نتمناه ولا أتوقعه شخصيا رغم خيبة الشهد وإحباطه.

للأسف أثر التيار السلفي الوهابي تأثيرا خطيرا كبيرا على الفكر العربي وهو تأثير لن يمحى بسهولة أبدا وهذا التأثير لم ينجو منه أحد حتى غير المسلمين و غير ذوي المرجعية الدينية وهو تأثيره على ثقافة الاختلاف مع الأخر بسبب تأثير فكرة "الكافر والمؤمن" و "الحلال والحرام" و "البدعة والضلالة" فأصبحنا نضيق بمختلفينا وأصبح بيننا وبين مخالفينا في الرأي حواجز سميكة تمنعنا من التعاون معهم والتفاهم معهم بل وحتى الحوار معهم.
لا يطيق أحد منا الأخر و كل يتهم خصمه بأنه عميل أو خائن أو كافر أو رجعي على حسب الموضوع.
تخيل أنك طبيب و أنك تجري عملية في مستشفى كبير لمريض أشرف على الموت مع فريق من الجراحين الأجانب كل طبيب يمسك بمشرطه أو آلته ويأخذ دورا في الجراحة و أحدهم على جهاز التخدير وهكذا ,كل هذا الفريق الطبي مختلف فكريا تماما وعلى المستوى الشخصي لا تربطه لا صداقة ولا حتى لغة على الإطلاق , إذا تعاونوا سويا على أسس جراحية سليمة مع انكار الذات ستنجح الجراحة و ينجو المريض وسينالوا جميعا الشكر دون تخصيص و سيفرحوا ويفخروا و ذلك لأنهم تعاونوا بل وكان كل منهم يصوب خطأ رفيقه دون انتظار لثناء أو شهرة.
هذا هو الوطن , الوطن سيظل يضم المختلفين إلى أبد الآبدين كما يقول الله تعالى" ولا يزالون مختلفين الا من رحم ربك ولذلك خلقهم"
يجب أن يقبل كل منا الآخر فلن يستطيع أحد أن يمحو الآخر بل و يعمل ويتعاون معه كفريق بكل الخلاص حتى تنجح الثورة وينجو الوطن.

أثبت الثوار قدرتهم على الحشد حتى بدون الاخوان المسلمين وتنظيم مليونيات متباعدة أحسن بكثير وأوقع في التأثير من الاعتصام المزمن مع الإبقاء على اعتصام رمزي محدود مع لافتات واضحة بالمطالب و استمرار الحوار عن طريق مجلس الحكماء.
ولكن استمرار الاعتصام يحمل خطورة اختراقه من بعض البلطجية و المسخناتية والهجوم عليه من البلطجية الاخرين ويبدأ تخوين و اتهام المعتصمين بما ليس فيهم و أيضا يتأفف بعض المتضررين من " وقف الحال" بينما ستؤدي المليونيات المتباعدة نفس النتائج.


نعم جف بحر السياسة وعندما بدأنا نتكلم في السياسة تلعثمنا ونسينا الكلام.
يقول صلاح جاهين في أحد رباعياته :
إقلع غماك يا تور وارفض تلف
/ إكسر تروس الساقية و اشتم وتف
/ قال : بس خطوة كمان .. وخطوة كمان
/ يا اوصل نهاية السكة يا البير تجف

كنا مغمضي العيون ندور في طريق الساقية الذي وضعه النظام السابق والآن قلعنا الغمامة من على الشعب المصري الذي عندما أبصر فجأة " بعد أن كان قد نسي أن لديه عينان" بهره النور و كاد يعميه وتهيج الثور و شتم وتف و انطلقت كل الأرجل في أكثر من اتجاه فهو لم يرى بعد الطريق الصحيح لكنه حتما سيدرك الطريق ويهدأ ويسير بخطوات واثقة ولن ينقاد مرة أخرى فقد حطم تروس الساقية وقلع غماه واكتشف أن لديه عيونا ترى وعقلا يدرك..,
http://www.facebook.com/notes/mohamed-issamo/%D8%AB%D9%88%D8%B1%D8%A9-%D9%85%D8%B5%D8%B1-%D9%88-%D8%BA%D8%B2%D9%88%D8%A9-%D8%A3%D8%AD%D8%AF/10150255957426655

ام مصرية said...

http://wikileaksupdates.blogspot.com/2011/01/april-6-activist-on-his-us-visit-and.html?spref=fb

ياسر كامل said...

يعنى هو الميدان مش بيتملى غير بالاخوان؟
خلاص بقى تبقى مصر اخوان مسلمين وسلفيين

كيوبيد said...

اولا وقبل اى كلام وشرح يسمع منك ربنا والناس ترجع تانى ايد واحده بس انا بقولك اهو كل الى بتعمالى ده سراب قولى عنى متشائم قولى ان عندى الاسلاموفبيا قولى الى تقولى خلاص القوى الوطنية كله نزلت الملعب بس بدرى قوى على التنافس والاستقطاب ده بس بردو والكل يعلم ان اول من شق عصاى الجماعه وخلف وشرد وحيد بعيد عن الجماعه كانت الاخوان ومن اتبعه من الاسلامين ربنا يسمحهم علشان فيه بقا صفقه بينهم وبين مجلس العسكر او حد غبى فاهمهم انهم هايكتسحو مجلس الشعب بعد زول النظام الله اعلم الحقيقه فين وعلى العموم ربنا يوفقك وانا معكى ويارب نرجع تانى كلنا واحد فى الميدان

hayat ank said...

بالنوسبه لموضوع اللجان الشعبيه انا وقفت فيها كام مره ومش باخد من ممدوح حمزه بس هى فعلا مخترقه فخلوها تتغير كل يوم وكل ما تقدروا فى اليوم الصباحيه غير المسائيه واشرفوا عليها بنفسكوا وانتوا عارفين مجموعات كتير ممكن تستخدموهم مثل الالترس مثلا الناس بتوع تويت ندوه بتوع 6 ابريل الاحزاب الى انتوا واثقين منها العيال الجداد منهم بيحبوا يعملوا ابطاااااااااال العيال الطلبه بتوع ثانوى بس المهم يكون فى رقابه مستمره بس السؤال هو هاتعملوا ايه فى رمضان

hayat ank said...

عايزين نعرف ايه الخطه للفتره القادمه وعلى فكره اكاد استلقى على قفايا من الضحك على الى قولتيه على التليفوووووووووووون

DIY CNC said...

طيب ان شاء الله خير بلمونسبة السعيدة دى ان شاء الله ربك يلم الشمل
متكلمو حمدين والبسطويسى وابو الفتوح
والبردعى ومكى وزكريا عبد العزيز وعقلاء
الأخوان والسلفين
ان شاء الله يقعدو مع بعض وربك يلم الشمل وميخبش رجانا فى ناس بتحب مصر وبتخاف من ربنا وربنا يوفق الجميع

واجمدى يا نور
سلام

samysalah7 said...

أنا إخواني وسلفي وجماعة إسلامية وتبليغ ودعوة وأنصار سنة وجمعية شرعية ..إلخ

ونازل التحرير أخد كل اللي في التحرير بالحضن لإنهم أسيادي وتاج فوق رأسي. وعملوا عشاني اللي ما عملتوش عشانهم. أنا نازل أطالب بمحاكمة مبارك وعصابته محاكمة جادة وناجزة وتطهير مؤسسات الدولة كلها من دنس الحزب الوطني وأشياعه وأهمها القضاء والإعلام والشرطة والمحافظين والمحليات والجامعات والنقابات والمجالس العليا كلها وإلغاء مجلس الشورى تماماً وسرعة إسترداد الفاسدين الهاربين والأموال المهربة وسرعة إجراء الإنتخابات عشان المجلس العسكري يرحل لثكناته ونرجع دولة مدنية من جديد نضع دستورنا وننتخب رئيسنا ونربقي سلم الرفعة والعلو الذي تستحقه أمنا الحبيبة مصر، مصر أم الدنيا، مصر جوهرة الأمة العربية، ولؤلؤة الأمة الإسلامية، مصر كنانة الله في أرضه، مصر مبعث محرري الأمة شرقاً وغرباً، مصر أم السيدة هاجر أم سيدنا إسماعيل أبو العرب المستعربة، مصر أم السيدة مارية زوجة سيد الخلق وأم إبنه إبراهيم، مصر التي كلم الله كليمه موسى على جزء طاهر من أرضها، أتدرون لقد نزل كلام الله الملك الأعلى على أرض مصر مباشرة من السماء إلى الأرض، هل حدث هذا على أي بقعة أخري على وجه الأرض، مصر التي وصى بها وبأبنائها خيراً خير الأنام الذي لا ينطق عن الهوى، مصر التي كانت دولة كاملة الأركان ومعظم أرض الدنيا لم تكتشف أصلاً، مصر حبيبتي مصر حبيبة كل المخلصين مصر الجارة الكبرى والحارسة لبيوت الله الثلاثة المشرفة الكعبة ومسجد الرسول والمسجد الأقصى، مصر مصر مصر مصر مصر مصر مصر. أنا نازل التحرير عشان مصر. لك الله يا مصر. اللهم أنصرها بأبنائها على حثالة أهل الأرض يارب الأرض والسماء.

dahabhospital said...

يا ست الكل ...يا نوارة الانتصار رغم انف الحاقدين ...نيابة عن اطباء الخارج ...بقول لك احنا واثقين فيكي ...بس اوعي تنسي شركاء الثورة ...فاكرة لما الاخوان كانو شركاء 52 ..المجلس العسكري اكلهم واحد واحد ..لأن ..زي الفريك مايحبش شريك ..التاريخ هيعيد نفسه ...كوني علي حذر من العسكر وبسرعة خدوا منهم البلد ..بعد شهر مش هتقدروا عليهم ..عندهم كافة المبررات ...وممكن يمدوا قانون الطوارئ بنفس طريقة المخلوع ...كلها عقيدة واحدة ...اوعي تصدقي ان فيه حد دخل الحربية أو الشرطة حبا في المحروسة ؟دول كلهم دخلوها للمصالح والامتيازات ومساكن الظباط واستراحات الظباط وشاليهات الظباط ومشتشفي الظباط والخ ...دول بيعبدوا اللي لبسهم الميري ...وبيقولوا عن نفسهم انهم الاقدر علي الادارة لانهم بيديروا حروب ووحدات فيها كل التخصصات ....لو الكلام بيني وبينك كنت قلت لك حاجات تانية ...ربنا يوفقك وخللي بالك من ام صابر مصر

Leonardo said...

أولا عصام العريان ده منافق وكذاب واحنا مجربينه أكتر من مره فى نقابة الأطباء
أما البلتاجى فماتعاملتش معاه فى حاجه .. يادوب شفته فى التليفزيون .. واللى كان بيقوله مايخلينيش أصدقه بس ماعلينا
النقطه الأهم إن لو اليفط الخلافيه دى هى الدستور أولا وللا المجلس الرئاسى فماشى .. نشيلها
رغم إن المفروض حرية الرأى مكفوله للجميع لكن ماشى اليوم ده مهم
لكن لو اليفط الخلافيه هى بتاع المجلس العسكرى والمشير زى ماكتبتى على تويتر يبقى لأ وألف لأ يانواره
يوم 8 يوليو كانت كل الناس موجوده والإخوان كانوا موجودين وضربوا الناس كمان ععلشان يعملوا منصتهم .. ورغم كده كانت الهتافات واليفط ضد المجلس العسكرى والمشير عادى .. وماكانش فيه مشاكل ولا قلق .. وكمان كانت الناس كلها بتاجم الإخوان ويناقشوهم عادى ..
مايجيش الإخوان دلوقتى يقولوا ماتهاجموش المجلس العسكرى علشان نتوافق
لأ بقى أمال اللى معتصمين دول طالع ميتين أبوهم ليه ؟ عشان عصام شرف ؟
والإخوان نفسهم نازلين ليه وضد مين ؟
بالمناسبه يانواره .. كلام البلتاجى عن أفكاره الغلط والحاجات دى ماتخيلش على حد .. وكلامك عن إن الناس شتموكى على البوست اللى فات فيبقى صح برضه مغلوط لأن فيه ناس ردت على كلامك بمنطق معقول وهو إنك كده عايزانا نقف قدام حد محتمل إنه يكون مع أمريكا قصاد مجلس احنا متأكدين إنه خدام أمريكا وكل ده بناءا على إحساس !!!! يبقى إيه بقى ؟

ana masry said...

ربنا يسترها على مصر و يولى علينا من يستحق ان يكون خادما لها وليس رئيسا عليها ويارب كل واحد فينا يعمل اللى عليه عشان مصر مش عشان تورته عاوز ياخد اكبر نصيب منها ويارب نتحد ونكون ايد واحدة

ana masry said...

يارب ولى على مصر من يكون خادما لها وليس رئيسا عليها ويكون بيحب مصر بجد مش عاوز ياخد اكبر نصيب من التورته ويارب تتوحد كلمتنا على حب مصر ياااااااااااااااااااارب

ana masry said...

يارب ولى على مصر اللى يكون خادم لها ولا يكون رئيسا عليها و مش يكون عاوز ياخد اكبر حته فى التورتة ويجرى ويارب تتوحد كلمتنا فى حب مصر يااااااااارب

احلام جوليا said...

ربنا يوفقك يا نواره بس خدي حذرك من الاخوان والسلفيين الي خون مرة يخون تاني طالما بيلاقي الي يسامحه ودول اول من خانوا الثورة وفتتوا الصف وكذبوا واعلنوا انهم من دعا ة 25 يناير مع ان كلنا عارفين انهم رفضوا المشاركة بشكل رسمي وان اليشاركوا شباب منهم منشقين عليهم احذري الخاين يا نواره

احلام جوليا said...

ربنا يوفقك يا نواره بس خدي حذرك من الاخوان والسلفيين الي خون مرة يخون تاني طالما بيلاقي الي يسامحه ودول اول من خانوا الثورة وفتتوا الصف وكذبوا واعلنوا انهم من دعا ة 25 يناير مع ان كلنا عارفين انهم رفضوا المشاركة بشكل رسمي وان اليشاركوا شباب منهم منشقين عليهم احذري الخاين يا نواره

ayman abdelrazek said...

يانواره انتوا اللى يعارضكم فى الرأى يبقى فلول ولو حد جاب سيرة وقف الحال والاستقرار يبقى حزب كنبه ونموته احسن ولو الصوت على والعصبيه زادت وبقت خناقه نبقى بلطجيه صدقينى انتوا بتشتكم من التخوين وانتوا اول ناس بتخونوا كل الناس (الجيش والاسلاميين والمجلس العسكرى والمخابرات العسكريه اللى هيه اصلا انتوا مش تخصصها واهالى العباسيه والبسطاء اللى هم زى مابتقولوا عليهم حزب الكنبه ....الخ)
صدقينى اخلصوا النيه وقبل المصالحه يجب ان تكون هناك مصارحه والاعلان عن الاموال الامريكانى مين اللى خد واتصرفت ف ايه؟
لأن بصراحه الناس مولعين منكم بسبب الموضوع ده واوعى تستخدمى سوفسطائيتك المعهوده وتقوليلى محدش خد انتى اول واحده عارفه ان اللى خد خد فعلا ......
لو انتى وطنيه فعلا وقلبك ع البلد وعلى ناسها الغلابه اللى مليانين طيابه على رأى ابوكى اعملى المطلوب لرأب الصدع والانشقاق فى الصف الداخلى
اللهم بلغت اللهم فأشهد
سلاااااااااااااااااااااااا​اااام

ayman abdelrazek said...

يانواره انتوا اللى يعارضكم فى الرأى يبقى فلول ولو حد جاب سيرة وقف الحال والاستقرار يبقى حزب كنبه ونموته احسن ولو الصوت على والعصبيه زادت وبقت خناقه نبقى بلطجيه صدقينى انتوا بتشتكم من التخوين وانتوا اول ناس بتخونوا كل الناس (الجيش والاسلاميين والمجلس العسكرى والمخابرات العسكريه اللى هيه اصلا انتوا مش تخصصها واهالى العباسيه والبسطاء اللى هم زى مابتقولوا عليهم حزب الكنبه ....الخ)
صدقينى اخلصوا النيه وقبل المصالحه يجب ان تكون هناك مصارحه والاعلان عن الاموال الامريكانى مين اللى خد واتصرفت ف ايه؟
لأن بصراحه الناس مولعين منكم بسبب الموضوع ده واوعى تستخدمى سوفسطائيتك المعهوده وتقوليلى محدش خد انتى اول واحده عارفه ان اللى خد خد فعلا ......
لو انتى وطنيه فعلا وقلبك ع البلد وعلى ناسها الغلابه اللى مليانين طيابه على رأى ابوكى اعملى المطلوب لرأب الصدع والانشقاق فى الصف الداخلى
اللهم بلغت اللهم فأشهد
سلاااااااااااااااااااااااا​اااام

tigers dad said...

يارب التوافق ده يحصل والقوي الوطنية تتوحد تاني دا الامل الوحيد

Ahmad Tawfik said...

على فكرة أنا بأكد لك إن جهود كثيرة من داخل الإخوان تسعى في هذا الشأن لكن المشكلة فعلاً في الثلاثي المرح والذي يجب أن نفكر في إجراءات عملية للسيطرة عليه واحتواؤه.
تحياتي

ayman abdelrazek said...

يانواره انتوا اللى يعارضكم فى الرأى يبقى فلول ولو حد جاب سيرة وقف الحال والاستقرار يبقى حزب كنبه ونموته احسن ولو الصوت على والعصبيه زادت وبقت خناقه نبقى بلطجيه صدقينى انتوا بتشتكم من التخوين وانتوا اول ناس بتخونوا كل الناس (الجيش والاسلاميين والمجلس العسكرى والمخابرات العسكريه اللى هيه اصلا انتوا مش تخصصها واهالى العباسيه والبسطاء اللى هم زى مابتقولوا عليهم حزب الكنبه ....الخ)
صدقينى اخلصوا النيه وقبل المصالحه يجب ان تكون هناك مصارحه والاعلان عن الاموال الامريكانى مين اللى خد واتصرفت ف ايه؟
لأن بصراحه الناس مولعين منكم بسبب الموضوع ده واوعى تستخدمى سوفسطائيتك المعهوده وتقوليلى محدش خد انتى اول واحده عارفه ان اللى خد خد فعلا ......
لو انتى وطنيه فعلا وقلبك ع البلد وعلى ناسها الغلابه اللى مليانين طيابه على رأى ابوكى اعملى المطلوب لرأب الصدع والانشقاق فى الصف الداخلى
اللهم بلغت اللهم فأشهد
سلاااااااااااااااااااااااا​اااام

أبوصابر (مواطن مصرى قٌح ) said...

انا اول مرة اقرا مدونتك يا نوارة وانا معاكى فى اللى انتى عاوزة تعمليه لمصلحة مصر انا مش هقول الدستور اولا ولا الانتخابات اولا ولا الثورة اولا بل اقول مصر مصر هى اللى لازم تفضل اولا عندنا كلنا ربنا معانا وينصرنا ويبعد عنا شر الفتن ما ظهر منها وما بطن والله الموفق والمستعان

أبوصابر (مواطن مصرى قٌح ) said...

اول مرة اقرا مدونتك وعجبنى فيها انك بتذكرى الاحداث بطريقة كأنك بتتكلمى وانتى واقفة قدامنا وبتحكينا ايه اللى حصل
ربنا معانا وياريت وحدة الصف تفضل على طول عشان خاطر مصر مش يوم الجمعة وبس
انا مش هقول الدستور اولا ولا الانتخابات اولا ولا هاقول الثورة اولا بل اقول مصر مصر لازم تفضل هى دائما اولا مع مراعاة حقوق الشهداء ومصالح المواطنين
شكرا ونتمنى لك التوفيق يا نوارة الانتصار

mkadry28 said...

ليا شوية أسئلة صغيرة عايز حد يجاوبنى عليها ، بما إن 6 إبريل اعترفوا انهم سافروا صربيا لدراسة تجربتها الديمقراطية ، عايز بس أعرف كام واحد سافر وأساميهم ومين اللى سفرهم وسافروا كام مرة وقعدوا كام يوم وأخدوا بوكيت مونى وبدلات أد إيه ودرسوا فين ودرسوا إيه بالظبط
حد عنده إجابة؟

خالد المصرى said...

الله ينور عليكى يا نوارة
و بداية اول واحد من اى فرق ما يبتدى يقول : ما هو اصل "كذا" هو من بدء الشقاق عشان ...... نقوم علطول نحط جزمة فى بقه و نقوله اخرس يا حيوان و ارجع ورا

خالد المصرى said...

بعد ما قرات كثير من العليقات فى الصفحة دى
اقترح تسليم أمن الميدان بالكامل للاخوان
عشان لو حد من ولاد ديل الكلب المعاتيه اتهور و عمل حاجه يقطموا رقابته على وسطة عشان اليوم يعدى
-----------------------
الكلام ده مش للنشر .. ده بينى و بينك بس

SHALI_1313 said...

تسلمي يا نواره ويسلم اللي جابوكي ربنا يبارك فيكي انتي وكل اللي شغالين علي موضوع التوافق ده وانا وناس كتير عندنا ثقه ان اليوم ده هايكون اجمل جمعه عدت علي الميدان وعقبال ما نعمل جمعه الفرح بالقصاص لاهالي الشهداء من اللي قتلوا ولادهم

ismail said...

جميل جدًا..
أنا دايمًا بقول لو 6 إبريل والإخوان اتحدوا هيبقوا أحسن قوة حشد..
ربنا يسهل

متفائل said...

مافيش فايدة فيكي .. نفس السذاجة والبلاهة وتناول الأمور السياسية الدقيقة بطريقة خالتي .. طريقة : خدوهم بالصوت ليغلبوكم .. تقفزين فوق الحقائق وتخلطين الأوراق .. تزورين وتدلسين وتضعين قوانينك المغلوطة الخاصة وتجمعين الشامي على المغربي .. وسأفصل لك هذا في نقاط محددة
أولاً : كما أن مبدأ تخوين أي فصيل سياسي مرفوض (مثلما فعل الجيش مع سته أبريل) فأن تخوين الجيش بلا دليل سوى (إحساسك) مرفوض أيضاً وبنفس الشدة .. أما (القانون) الذي ألفتيه بنفسك ولنفسك والقاضي بأننا لو شتمناك فأنتي على حق فهو محض نكتة بايخة .. لأن المنطق السليم هو شتيمة الغلطان لا المصيب
ثانياً : كيف يمكن توحيد الصف بين الإخوان وسائر القوى السياسية ؟ كيف يمكن ذلك مع تصريحات الإخوان المستفزة والمخيفة والتي تشي بمسارهم الفاشي إذا وصلوا إلى الحكم ؟ عشان هما أكثر عدداً مثلاً ؟ عشان هما (السايب) وباقي فصائل الثورة (مربوط) ؟ تريدين إذن أن يسلم المربوط للسايب دون قيد أو شرط ؟ نوارة نجم هي اللي بتتكلم أم نوارة كاظم ؟
ثالثاً : ما هذا التزوير والتدليس والخداع في إطلاقك لقب (إسلاموفوبيا) على النشطاء السياسيين الذين يخشون الإخوان ؟ كان الأحرى بك أن تسمي الحالة (إخوانفوبيا) لأن إصطلاحك المغرض يجعل من الإسلام والإخوان شيئاً واحداً ويجعل من يخشاهم يخشى الإسلام بالتبعية .. يعني كافر .. مرة أخرى : هل نوارة نجم هي التي تتكلم ؟
يسمونك في الفضائيات : ناشطة سياسية .. أنت فعلاً (ناشطة) لكن ليس في السياسة .. الناشط السياسي ينبغي أن يزن كلامه وتصريحاته بميزان الذهب لا الباذنجان

متفائل said...

مافيش فايدة فيكي .. نفس السذاجة والبلاهة وتناول الأمور السياسية الدقيقة بطريقة خالتي .. طريقة : خدوهم بالصوت ليغلبوكم .. تقفزين فوق الحقائق وتخلطين الأوراق .. تزورين وتدلسين وتضعين قوانينك المغلوطة الخاصة وتجمعين الشامي على المغربي .. وسأفصل لك هذا في نقاط محددة
أولاً : كما أن مبدأ تخوين أي فصيل سياسي مرفوض (مثلما فعل الجيش مع سته أبريل) فأن تخوين الجيش بلا دليل سوى (إحساسك) مرفوض أيضاً وبنفس الشدة .. أما (القانون) الذي ألفتيه بنفسك ولنفسك والقاضي بأننا لو شتمناك فأنتي على حق فهو محض نكتة بايخة .. لأن المنطق السليم هو شتيمة الغلطان لا المصيب
ثانياً : كيف يمكن توحيد الصف بين الإخوان وسائر القوى السياسية ؟ كيف يمكن ذلك مع تصريحات الإخوان المستفزة والمخيفة والتي تشي بمسارهم الفاشي إذا وصلوا إلى الحكم ؟ عشان هما أكثر عدداً مثلاً ؟ عشان هما (السايب) وباقي فصائل الثورة (مربوط) ؟ تريدين إذن أن يسلم المربوط للسايب دون قيد أو شرط ؟ نوارة نجم هي اللي بتتكلم أم نوارة كاظم ؟
ثالثاً : ما هذا التزوير والتدليس والخداع في إطلاقك لقب (إسلاموفوبيا) على النشطاء السياسيين الذين يخشون الإخوان ؟ كان الأحرى بك أن تسمي الحالة (إخوانفوبيا) لأن إصطلاحك المغرض يجعل من الإسلام والإخوان شيئاً واحداً ويجعل من يخشاهم يخشى الإسلام بالتبعية .. يعني كافر .. مرة أخرى : هل نوارة نجم هي التي تتكلم ؟
يسمونك في الفضائيات : ناشطة سياسية .. أنت فعلاً (ناشطة) لكن ليس في السياسة .. الناشط السياسي ينبغي أن يزن كلامه وتصريحاته بميزان الذهب لا الباذنجان

محمد حامد said...

الشعب ايد واحده ... وربنا يحفظك يا نواره

محمد الشافعي فرعون said...

اتابع اعمال الجبهة من فترة طويلة ، ورغم انك بنت ، ولكن تساوي الف رجل ، خالص تقديري واحترامي للجهود المتميزة التي تقومين بها ، ويضاف لهذا التقدير تقدير اضافي لانك بنت المبدع العظيم شاعر الغلابة والمقهورين ( يعني شاعر المصريين )
عمنا احمد فؤاد نجم .
محمد الشافعي فرعون
الرياض في 23/9/2011

ملاحظة : لو بحثتي عن اسمي الثلاثي المذكور اعلاه على الفيس بوك ستجدي ما يسرك