Sunday 3 July 2011

يوم الجمعة 8 يوليو... للداخلية.. بلطجية

الداخلية.. بلطجية..
اه وربنا بلطجية، بس بلطجية بينضربوا، هههههه يا عيني، فاشلين حتى في البلطجة، لا وجايين جايبين لنا كنابل تلات انواع، واحدة بتطلع دخان اسود، وواحدة بتطلع دخان ابيض، وواحدة بتطلع دخان من غير لون وكلنا عاملين دماغ بقالنا فترة والناس يا اما عندها صداع مستديم، يا اما دوخة مستديمة، يا اما عينينا بتدمع ومناخيرنا بتحرقنا، يا اما عندنا اكتئاب وحالتنا النفسية مش تمام، يا اما جميع ما سبق
كمان واحنا بايتين في الميدان بيقعدوا يضخوا علينا غاز... والله، زي عمر سليمان لما رش مبيد على الفلسطينيين في النفق، هم برضه بيرشوا فليت علينا في الميدان، ويوم 29 او 30 مش فاكرة كنا قاعدين وفجأة كلنا عينينا دمعت وقعدنا نعطس.. اه، 29، ومالك عدلي مناخيره ساحت وعينيه باظت واقول له يا مالك بيضخوا علينا غاز زي عمر سليمان، يقول لي: بفيش حاجة يا شيخة، باتخافيش، ايه البرادويا دي؟ بلاش بقى دظرية البؤابرة، با يبكد بد اثار ابارح؟
اه.. بد اثار ابارح.. قال ايه؟ واحنا قاعدين كده الغازات بتطلع بواقيها من الارض مع الهوا قوم تخلينا كلنا يغمن علينا بالطريقة دي... مالك عدلي، اعرفكم، كل ده عشان ما يتبناش نظرية المؤامرة، مؤامرة ايه ما كلنا قاعدين في الميدان فجأة نكح 
اجرام رسمي نظمي فهمي.. بيتعاملوا مع الشعب على انه حشرات
الشاهد
يوم الجمعة لازم يبقى للداخلية... السجين ده بتاعي، مش كل واحد نفسه في حاجة يحطها في المطالب كأن فتحوا له باب الكعبة وبيلحق يفتكر كل اللي عايزه من ربنا
بصوا، من الاخر كده الشعب ده مايص ومش بيحب الهبد والرقع، بيحب يفك حتة حتة وهو باله طويل، خلاص نمشي على الموجة بتاعته عشان ما نزهقوش
الموجة التانية من الثورة بتاعة اصحاب الثورة الحقيقيين... الغلابة
هي الفكرة كده من اولها، اهالي الشهدا الغلابة معتصمين عشان ما اخدوش لا حق ولا باطل وكمان ولا حتى بيطلعوهم في التلفزيون ولا بينزلوا صور عيالهم عشان شكلهم مش الا فرانكا وفيه وعي شديد عندهم بالموضوع ده وحازز في نفسيتهم 
ما تشغلوش بالكم خالص بالناس اللي بتقول بلطجية، الموجة دي مش بتاعتهم، انا قابلت واحدة في الميدان شيك كده وبتبص حواليها وتقول مش ده الميدان بتاعنا ولا هم دول الناس بتوعنا
ايه ياخويا الناس بتوعهم؟ وهم الناس بتوعهم كانوا حيعرفوا يعلموا على الداخلية كده؟ الناس بتوعها اول ما الداخلية بتضرب بيطلعوا يجروا، من يوم 28 يناير بالمناسبة
وماله الشعب مش عاجبها في ايه؟ ما هو ده الشعب، بيلبس كده وشكله كده
على رأي محمود سعد: يا ريت تبلغونا بماركة بنطلون وتي شيرت شباب الثوار عشان نعرف نميزهم عن البلطجية
ما انا بابات في الميدان والشباب زي الفل، عيال ولاد بلد وغلابة بس، لكن بينظموا المرور، وبيكنسوا الميدان، وكمان ابتدوا يبيضوا يا عيني، ههههههههههههههههههههههههههههههه، كل ما التلفزيون يشتم المتظاهرين يشتغلوا لهم نقاشين عشان يثبتوا انهم ناس كويسة
وعندهم اخلاق، وبيحترموا الستات.. ولما كنا في المسيرة اللي لحد مجلس الوزرا وحبوا يدخلوا على مجلس الشعب لما حشرت نفسي في الاول وقلت لهم ارجعوا اول ما شافوا واحدة ست راحوا راجعين على طول.. طبعا يسري الشرقاوي لو شاف المنظر ده حيقول عليا الزعيمة، وتوفيق عكاشة حيقول ان انا الماسون الاكبر ودول المواسين الصغنين اللي تبعي، بس هي الحكاية مش اكتر من انهم شافوا ست بتقولهم ارجعوا فاتكسفوا وخافوا عليا لما لقوني رامية نفسي على بوابة مجلس الشعب
معلش.. اصلهم بلتجية، واحنا بقى عايزين نعمل نكابة للبلتجية
مطالب الناس دي هي اللي لها الاولوية، وهم لهم تار مع الداخلية.. وانا شخصيا بيني وبين الداخلية مناخيري، انا بقيت مدمنة غاز بكل الانواع دلوقت حاليا، يبقى خلوا العنوان واضح وبين ومفهوم، يعني ايه الثورة اولا؟ هم مالهم هم بالكلام ده؟ الكلام ده تقولوه على التلفزيونات وحزب الكنبة يتفرج عليكم ويمصمص شفايفه، الناس اللي شربت الغاز وقاعدة معتصمة دلوقت مالهاش الا حاجتين:
دم عيالهم، وحقهم من الداخلية
بس كده... يبقى اللي انضرب واتصاب وقدم شهدا هو الاولى يفرض مطالبه:
تطهير الداخلية واعادة هيكلتها:
1- كل اللواءات اللي اشتغلوا ايام العادلي يتم اقالتهم
2- سحب القنابل من الشرطة.. شرطة ايه دي اللي معاها قنابل.. شوية شوية حيبقى لها طيران بقى
3- عساكر الامن المركزي يرجعوا الجيش والامن المركزي يتقسم وحدات مكافحة شغب ويبقى سلاحه شوية عصيان وطلق صوت بالكتير قوي، والعصيان ما تبقاش كهربا كمان، الله، ما الشرطة العسكرية اللي شغلتها تقمع اي تمرد داخل الجيش مش معاها قنابل، وتبقى شغلانة وحدات الامن المركزي دي انها تحمي المظاهرات ويلبسوا اي لون تاني غير اللون الاسود المكئب ده، يلبسوا اصفر زي بتوع انجلترا ويقفوا كده يتشتموا وما يردوش زي ما الانجليز بيقعدوا يشتموا في قوات مكافحة الشغب والتانيين يبقوا واقفين ساكتين كده يا عيني
4- الامن الوطني يتحل.. كل اللي اشتغلوا في امن الدولة ما يشتغلوش تاني في الشرطة اصلا، هم دول نافعين ببصلة؟ ناس تفجر لنا كنيسة وتقتل لنا 24 شهيد، وكمان يستعبطوا ويقبضوا على السلفيين ويعذبوهم وواحد فيهم يستشهد في ايدهم وينفع الناس دي تشتغل؟ ده جهاز عدو للوطن، وماحدش يقول لبعدين يعملوا عصابات، هم عصابة بالفعل، وحيعملوا ايه اوحش من تفجير كنيسة مش فاهمة؟ ايه في الدنيا اوحش من كده؟ ده موضوع القديسين هو اللي خربها وجاب اخر الناس (ونرجع نطرح السؤال السرمدي: تفجير القديسين ما بيتحققش فيه ليييييييه؟ مين اللي متورط فيه وخايفين اسمه يجي؟)، ما هم دلوقت عصابة بقوة القانون وبالمناصب والعلاقات والسلاح، لما يفقدوا كل ده حيبقوا زيهم زي اي عصابة تانية خايبة، يتقبض عليهم، ايه محسن السكري يعني؟ حتة واد صايع اخره يقتل فنانات ويتقفش عشان سايب ادلة دامغة عليه الغبي، ده كان ناقص يسيب لهم الكارت بتاعه جنب الجثة، قول يا رب كلهم يبقوا محسن السكري، وبعدين امبارح مينا بيقول لي اصلهم عارفين معلومات كتير ففي ناس بتقول انهم حيشتغلوا جواسيس
الله.. ماهم بيشتغلوا جواسيس فعلا، وجواسيس بمرتب بياخدوه مننا، يا جدعان مش في مدينة نصر العيال طلعوا ورق انهم بيتعاونوا مع السي اي ايه والموساد وبيراقبوا تليفونات كل المسئولين بما فيهم المشير نفسه؟ راح فين الورق ده؟ كلته القطة؟ وبرضه شغلهم كجواسيس وهم في مناصبهم حيسهل عليهم الشغلانة اكتر.. لما يفقدوا كل آلياتهم من علاقات وحصانة ومعلومات متجددة حيبقى موقفهم اضعف ويروحوا يشتغلوا جواسيس.. هي جات عليهم يعني؟ ربنا بيسترها، اكتر من جاسوس حكمنا تلاتين سنة واهو قاعد في شرم ياكل حيسمون على حسابنا والحرس الجمهوري بيحرسه وناقص ياخدوا له الشعب يسيق له الفيلا ويغير له مية البيسين؟ 
ام الفزع المصري الشهير ده، والله العظيم يا مصريين ما فيكم عيب غير موضوع الفزع والهلع ده، عاملين زي الام المجنونة اللي خايفة تحمي ابنها لياخد برد لحد ما عفن وجاله جرب، طب الجرب ولا البرد؟ بس لو تبطلوها تبقوا كاملين من كله... البني ادم بيبقى اخطر وهو في منصبه ومعاه سلاحه وقانون بيحميه وحصانة شغله والناس بيقولوا له يا باشا... وهم مش جوزنا عشان نقول: خليهم تحت عينا احسن ما يسافروا وما نعرفش بيعملوا ايه ولا قاعدين مع مين.. هم مش حيبقوا تحت عينا، هم حيفضلوا كده متحكمين فينا، لا.. ينزلوا بقى من فوقينا ويبقى زينا زيهم وفارس لفارس، عايزين يشتغلوا مجرمين عايزين يشتغلوا جواسيس عايزين يشتغلوا حلاقين براحتهم، المهم ما يبقاش في ايدهم مصارين البلد واسرارها وسلاح وحصانة وكمان احنا اللي نقبضهم فلوسهم اللي بيخربوا لنا البلد بيها
مش عايزاهم انا الامن الوطني دول.. وماحدش يقول لي عشان الارهاب
احنا ما عندناش ارهاب، احنا عندنا جهاز بندفع له مرتب عشان يعمل لنا تفجيرات في البلد ويفجر لنا شرم وطابا والحسين وكنيسة عشان يجدد قانون الطوارئ، واكتشفنا ان احنا ناس زي الفل وشمعتنا قايدة، وبعدين ما عندنا مخابرات والامن القومي دي شغلته اساسا
مخابرات.. هههههههههههههههههههههه.. يا عيني.. بيقفشوا سياح يقولوا عليهم جواسيس وكمبيوترات يقولوا عليها اجهزة تنصت، معلش معلش، نستحملهم، ونعمل لهم لجان شعبية تساعدهم، برضه في وشنا، وانتوا ما يرضكوش ادهم صبري حاله يميل كده
المهم اهم موجودين المخابرات يا عيني.. نساعدهم انهم ينموا قدراتهم وبلاش الامن الوطني ده خالص
5- القناصة
يا ميت ندامة.. احنا فين هنا؟ فيه بلد محترمة يبقى عندها سلاح قناصة شغلته ينشن على الشعب؟ وكمان احنا اللي بندفع لهم مرتباتهم؟ فيه ايه يا جدعان؟ انتوا ماسكين علينا صور ولا ايه؟ ندفع لكم فلوس عشان ترموا علينا قنابل وندفع لكم فلوس عشان تتجسسوا علينا وتعذبونا وندفع لكم فلوس عشان تنشونا من فوق الاسطح وندفع لكم فلوس عشان تتعاونوا مع السي اي ايه والموساد.. طب نحضر لكم الحمام الاول ولا تتعشوا الاول؟ 
6- يغيروا لبسهم... ده بقى مطلب شعبي.. واهالي الشهدا انا اتكلمت معاهم وهم مش طايقين يشوفوهم بلبسهم ده، مش قادرين، كل ما بيشوفوا البدلة دي بيتجننوا وتجيلهم هيستيريا
واهالي الشهدا هم اصحاب البلد دي
نعيد ونكرر: اللي بيدفع ضرايب بيطالب بحقه في البلد... اللي بيدفع ابنه ولا اخوه ولا ابوه ولا جوزها دول اصحاب البلد اصلا واحنا ضيوف عليهم، واللي دافع عينه ولا رجله ولا اي اصابة سببت له عاهة مستديمة ده صاحب البلد دي واحنا ضيوف عليه، صحاب البيت اللي دافعين فيها دم هم اللي يحددوا شكل الستاير والانتريه واودة النوم ولون الحيطة وعايزين الشبابيك شيش ولا الوميتال.. البلد دي بلدهم هم، واي فتافيت تتبقى منهم يوزعوها زي ما يحبوا واحنا نبوس ايدنا وش وضهر ونشكرهم على كرمهم
ولو عايزين تسموا الجمعة اي اسم يبقى الشهداء اولا
واي حد يفتح بقه معاك ويقول لك عجلة الانتاج وخربتوا البلد قول له ربنا يدوقك اللي اهالي الشهدا فيه يا بطني يا جعان.. انت بتسأل على مرتبك وفلوسك واكلك ودول بيسألوا على دم.. تحب ربنا يحرق قلبك زيهم عشان تبطل اكل وتحس بغيرك؟
ايه حكاية الاكل دي؟ ما ياكلوا بكرة.. هم حيموتوا من الجوع يعني؟ ماحدش بيجوع في مصر.. وبعدين ما يجوعوا، احنا 66% عندنا بيعانوا من البدانة.. خسوا شوية، فيه دم سال.. 
فيه دم سال
العزا منصوب وانت بتسأل على العشا؟ 
وانا مش فاهمة ياخويا اللي يضرب تحية عسكرية للشهدا، واللي بيعلقوا صورهم، واللي متعاطفين مع اهالي الشهدا، وفي نفس الوقت بيدافعوا عن الداخلية.. يا جدعان انتوا تعرفوا حد قتل الناس غير الداخلية؟ يعني ينفع تتعاطف مع اطفال غزة وتدافع عن اسرائيل؟ ما هو يا اطفال غزة يا اسرائيل... يا شهداء مصر يا الداخلية

7- ودي اهم نقطة: كل من اصدر امر بضرب المتظاهرين، وكل من اطلق النار على المتظاهرين يتم التحفظ عليه فورا، لانهم بيروحوا يهددوا اهالي الشهدا، وبيقولوا لهم حندفع على الراس ميت الف جنيه، يا اما ابنك التاني ده مش حتعرف له طريق جرة

لازم تعرفوا ان الداخلية بشكلها الحالي اللي هو نفسه شكل الداخلية ايام مبارك مالهاش عدو غير اهالي الشهدا لان دول وجودهم في الحياة بيدين الداخلية كلها
يعني ما عادش فيها كسوف ياما اعملي معروف، الموضوع مافيهوش توفيق راسين في الحلال
يا انت مع الشهدا يا انت مع الداخلية... ما ينفعش شغل حسني مبارك ده اللي كان بيقول انا محايد وهو قاعد يخدم في اسرائيل.. طبيعي، الحياد في صراع بين ظالم ومظلوم لازم يخليك في صف الظالم، امال هي تبقى ازاي؟

8- امبارح زياد العليمي اقترح ان يبقى فيه جهة قضائية مختصة بشكاوى المواطنين ضد الشرطة
هييييييييييييه

لما نخلص الشرطة بقى نبقى نشوف النيابة.. حاكم ساعات وكلاء النيابة يبقى لهم صحاب ظباط شرطة وبيجاملوا بعض، ده غير ان مبارك عمل سياسة معينة كده انه بقى يحول ظباط الشرطة على النيابة بحيث يملا النيابة بظباط الشرطة السابقين، فيبقى اللي بيقفشك ظابط شرطة واللي بيحقق معاك ظابط الشرطة.. والحمد لله ان مالوش سلطان على الاخرة كان عمل الملكين اللي بيسألوك في القبر ظباط شرطة 

وهذا نداء لكل مواطن: يا انت مع الشهدا يا انت مع الداخلية
وللمجلس العسكري: يا انت مع الشعب يا انت مع الداخلية
ولعصام شرف: روح يا حاج... انت تعبت.. نردها لك في الافراح
على فكرة.. تونس عينت ناشط حقوقي وزيرا للداخلية
يخربببب بييييييت الاجوان اللي عمالة تجيبها فينا... لا بقى.. يا حكم يا مرتشي، احنا نبات في الشارع وهم اللي ينجزوا؟

43 comments:

مـــحـــمـــد صــــلاح said...

كلام فى الجوول والله بس الناس تفهم ونتجمع كلنا تانى عاوزين نرجع روح 25 روح ال 18 يوم دول لازم نشوفها تانى

SoCRaT said...

يسلم فمك

ahmedmohd said...

ناشط حقوقي وزيرا للداخلية
طب و ليه ده مايبقاش مطلب من المطالب ؟
و يعني مش عيب نقلد تونس دي الملهمه.

tarek momen said...

يخرب بيت دماغك علي اسلوبك علي خفة دمك المصرية
ملكين ضباط شرطة دي ماخطرتش علي بال ابليس

nosseir said...

نوارة ...انا لا اخوان ولا تيار اسلامى اساسا ( انا مسلم بس)...بس صدقينى انا الان بقيت مقتنع بالاتى ....عمر ما الحكومة الحالية ولا المجلس العسكرى هيعمل تطهير حقيقى للداخلية ...اللى هيقدر يعمل التطهير الحقيقى هو مجلس الشعب اللى جاى والرئيس القادم...هيبقى لهم شعبية وضهر..وهيكون التيار الاسلامى هو الفصيل الرئيسى بالحكومة ...ودة عارف مين الوسخ فى الداخلية فعلا عشان اتأذى منهم...يعنى من الاخر ننتظر لما بعد الانتخابات ونكون حريصين على اجرائها فى اقرب وقت عشان يطهروا البلد...المجلس العسكرى مع كامل احترامى وتقديرى لة ولكنة فى الاخر مرتبط بالطغمة اللى كانت حاكمة...وعصام شرف معندوش صلاحيات وللاسف ضعيف مش قادر حتى يهدد باستقالة لو المجلس ما استجبش لة

Anonymous said...

انتا يا اما مع الحرية او مع العبوديه وحقيقي يسلم فمك

محمد نور الدين said...

ست الكل يسعد صباحك
اللي يدفع ضرائب يطالب بحقه، وأيضا من يأخذ راتبه من الخزينة العامة يخضع للمساءلة
نعم يا النوارة من يدفع الضرائب يطلب بحقه . ومن يأخذ راتبه من الخزينة العامة يخضع أيضا للمساءلة . وأكثر من ذلك الأمة أو من ينوب عنها تقوم في كل مناسبة انتخابية بالكشف عن عذريته المالية و السياسية هذه هي سمات الدولة العصرية .
بخصوص يسري الشرقاوي مش هو اللي طالب باعتقالك .ألا يعلم أن نوارة هي عروس ثورتكم .
ورغم ذلك أنا زعلان منك شوية لأنك سببت لي إحراجا مع من كلفني بالاتصال بك لأنه لا يعرف عنوانك كما قلت لك في الرسالة، عندك دعوة ويجب آن تصلك ولهذا أرجو مرة أخرى وسأظل ألح في طلبي أن تمكنيني من العنوان
تحياتي

mohad mohey said...

فى مشكلة يا نوارة ان فى عقيدة الجيش الشهيد هو اللى بيلبس ميرى فقط يعنى اللى يموت علشان مصر و مش لابس ميرى يبقى سوررى اكسكيوز مى مش شهيد و بعدين تعالوا نواجه الحقيقة ما هو المجلس العسكرى ده امتداد لمبارك يروح واحد ينط يقولى دول رفضوا اطلاق النار على المتظاهرين حلو و جميل بس ده علشان مصلحتهم ازاى اه ااقولكم ازاى حسنى مبارك الله يجحمه اضعف الجيش على حساب الداخلية علشان كان خايف منهم ينقلبوا على الوريث ابتدى بقى يظبطهم ايشى محافظين و ايشى رؤساء مجلس ادارات و ايشى وزرا بقى الواحد منهم يتمنى يظلع معاش علشان يظبط وبطده تم اضعاف الجيش عن طريق قياداته,زحيث انه اطعم الفم تستحى العين بقت عينهم مكسورة ,فاضل بقى فئة تانية و دى مش بتدوب فى دباديب مصر ام الدنيا و العراق ابوها لا دى عاوزة نوع تانى من التوريث الا و هو توريث المؤسسة العسكرية كلوا تمام يا فندم و لا تقدم و لا تنمية و لا نيلة الجيش ضباط و الشعب عساكر فى خدمة الظباط جم الثوار قدموا لهم مصر على طبق من ذهب من غير ما يتعبوا و يعملوا انقلاب على المخلوع فكانت الفرصة العظيمة اللى استغلوها و وقفوا ظاهريا مع الثورة لكن عند الديمقراطية يزنهروا للثوار ااقف انتباه يالا انت و هو احنا العسكر الحرامية

كيوبيد said...

كلام زى الفل والياسمين بس على الله محدش يطالع لنا يقول علينا كفاره والى خوارج وذندقة وشوية الكفر المعلب دول

كيوبيد said...
This comment has been removed by the author.
ahmed said...

عارفه يا نواره افضل حل هو انك تمسكي انتي وزارة الداخليه وانا متاكد انك تقدري ترجعي الامن للبلاد في ظرف 24 ساعه وساعتها نمسكي رئيسة وزرا وبعدين رئيسة جمهوريه انا مش بهزر انا باتكلم جد انا مش شايف حد يصلح غيرك او يطمن له الشعب عارفه ليه علشان انتي وشوية شباب من الثورة فقط الذين ما زالوا على قلب رجل واحد قلب الثائر الحق الذي يريد رفع الظلم ومحاسبة الظالمين اما البقية فأسال الله ان يهديهم او يريحنا منهم

Egypt trend said...

والله انا شايفة ان الناس كمان لازم تغيير من نفسها كل حاجة كفاية زهقنا وانتوا عاوزين البلد تبقي زيلبنان مش عارفة ايه بيجيب سيرة لبنان في الموضوع؟ ده غير ان الشرطة لازم ترجع برده دي من الحاجات اللي تتضايقني لان المفروض الناس تقول محتاجين جهاز شرطة يليق بالاستخدام الادامي مش شوية اكلي لحموم البشر اللي كانوا ايام المخلوع وراجعين بنفس البلطجة واعمال الارهاب بتاعتهم
الحاجة التانية هو تكريم اهالي الشهدا لازم كلهم يتكرموا وياخدوا حقوقهم هي التمييز الطبقي في دي كمان يعني الشهيد اللي اهله ميسورين الحال هو بس اللي يتكرم والغلبان لا!!
ده شهيد وده شهيد وده ابن مصر وده ابن مصر وده ضحي عشانها وده كمان ضحي عشانها

Sosso said...

ya Nawwara please ta7arri el2awwel fe Tounis el wazeer howa howa we7id men boutou3 ben ali esmou Habib Essid wematchalch (asl ra2is el7okouma be3Id 3annek motamassek bih) bass houwa gablou mouse3id lichou2Oun al islaa7 esmou al azhar al alakrami men alakrami da fee kalam ketir bass ma3ta9idch ennou momken yekoun 7aga 3edla law el kalam elli yet2el 3annou sa7i7 (ahou link https://www.facebook.com/photo.php?fbid=178954948832168&set=a.168161746578155.40531.167910469936616&type=1&theater)
We besara7a 7okoumat roujou3 al iste3mar litounis elli za3imha el3agooz Beji Caid Sebsi (BCE fe Tounis) 7oukouma wal yenfa3 fiha ta3dil 5ales law 7abba adwechik be3amalou eh haygeelik ikti2eb.

norshan said...

معلش.. اصلهم بلتجية، واحنا بقى عايزين نعمل نكابة للبلتجية
ههههههه عسل يا نوارة خفت دمك دي هى اللي حرقاهم اه والنعمه

negmat lail said...

صح لسانك

ali said...

تسلمى يا نواره ، نحمد الله على سلامتك

arabian_faithful said...

طيب مش ممكن نحدد كام أسم محترم لمنصب وزير الداخلية ونقدمهم للمجلس العسكرى زى ماعملنا مع عصام شرف !

محمد على طيلون said...

ناشط حقوقي وزيرا للداخلية
طب و ليه ده مايبقاش مطلب من المطالب ؟



احلى مطلب وبالمرة يعينلهم دكاترة نفسيين تعالج اللى فيهم عنده عقد نفسية
اساسا هما عالم معقدة
وتفعيل مواد حقوق الانسان فى كلية الشرطة



واهم طلب بقى
الشعب يريد حق الشهيد
الشعب يريد حق الشهيد
الشعب يريد حق الشهيد
الشعب يريد حق الشهيد
الشعب يريد حق الشهيد
الشعب يريد حق الشهيد
الشعب يريد حق الشهيد
الشعب يريد حق الشهيد
اولا وثانيا واثالثا واخيرا الشعب يريد حق الشهيد

nour1971 said...

كلامك جميل و الله يا نواره و طالع من القلب بس قبل ما تونس تجيب فينا جول العراق جايباه فينا من زممممممان ايام ما كانت محاكمه صدام و المسؤلين كانت كلها علانيه و كنا بنتفرج عليها كلنا في التليفزيون يعني العراق عندها شفافيه اكثر مننا في المحاكمات ولا ايه . و ربنا علي كل مفتري يا رب

استغفرك ربي واتوب اليك said...

سلامو عليكو:D
هاكلمك بلسان الشعب المصري اللي بيحب عمل المعجزات وعنده القدرة عالتحمل تفوق صبر ايوب ولكنه يكره المغامرة والمخاطرة.
اولا: احنا في شهر 7 كمان 28 يوم رمضان يعني عند المصريين الصبح شغل والمغرب فطار وبعده صلاة ونروح بيوتنا الساعة 10 ننام يعني الفيشة متشالة ومش هايخرج المصريين في رمضان الا الشديد القوي يعني تهريب حسني وعيلته مثلا ....


في شهر9 بدء تقديم اوراق مرشحي الشعب والشوري وهاندخل في خلااااااااااااااااط اسمه الانتخابات ولجنة كتابة الدستور وما فيه وما ادراكي باللي هانكون فيه ودخول مدارس وجامعات ,
السؤال هل مصر في الظروف الحالية اللي هي محاولات داخلية وخارجية قذرة لنشر الفوضي انتقاما مما حدث وافشالا للثورة هل مصر حمل حل جهاز الشرطة والامن الوطني ؟؟؟؟ بكل ما سيتبعه من عمليات انتقامية من المطرودين من جنتهم ستخلق فوضي في البلد ان لم تتم بعقل وحرفتة وبالتزامن مع وجود جهاز شرطي اخر مدرب ومجهز بالامكانيات ...ده اللي في بال المصريين احنا ليه مانصبرش لبعد الانتخابات وتكوين حكومة او حتي لأخر السنة مثلا ثم نبدأ في بناء بلدنا كما نريد ونأمل بدلا من المخاطرة وانا مش بتكلم علي مخاطرة بفدان ارض انا باتكلم عن بلد لو فلتت الامور فيها مصيبة ونقلنا بئا من ثورة لفوضي خلاقة ......الموضوع مش فزع وهلع ولكن ممكن تسميها واقعية والواقع مر ومؤلم وخلينا ساكتين علي البيت الخرب اللي حتي اخر عامود فيه طلع ناخر فيه السوس ولا ادهم صبري اللي طلع ضعيف وباط هوين خرب له دماغه وامكانياته.... قلبتي عالينا المواجع .... وهاكرر كلام قيل كثير مؤخرا انسي انسي يا نوارة الجيش يطهر لأسباب مختلفة منها مثلا انه المجلس العسكري الحاكم هو اصلا جزء من النظام اللي قام المصريين لأسقاطه ولو كان فيه الخير ماكانش سكت علي مصر يحصل فيها كل ده وهو ساكت ...... عموما انا رأيي الفترة القادمة نفضل صاحيين عشان ما نتسرقش ....ونوجه مجهودنا تجاه ما نريد وليس تجاه ما يريدون ...نركز في انتخابات الشعب والشوري مايدخهاش قذر من انجاس الحزب الوطني ... الانتخابات ما تتزورش ......الانتخابات ما تتزورش ......الانتخابات ما تتزورش ...... والا اجمعوا الاسلاميين اللي انا منهم في ميدان عام وموتونا لأننا مش هانسكت تاني نحكم باقلية بقوانين اقلية ودستور يعبر عن اقلية .....


ثم الدستور يكتب بتوافق وبدون حرب اهلية عشان لو اللي حصل في الاستفتاء اتكرر مصيبة مصيبة مصيبة ...وياربت تبدأوا تجهزوا من الان خطة حل الداخلية بئا ولا هيكلتها (اتمني حلها) بس المهم تكون علي اسس علمية نفسي اشوف حاجة في البلد دي بتتعمل علي اسس علمية قبل ما اموت ...لكي لا نبدأ من الصفر بعد 4 شهور ... انا طولت انا عارفة اقبلي اعتذاري ... والله الموفق والمستعان وهو نعم المولي ونعم النصير.

Unknown said...

يسلم فمك يا نواره بجد انتى بنت بمليون راجل بتقولى كل اللى جوانا و بتخلى الشحنه اللى جوانا تطلع بكلامك ده بس يا ريت الناس تفهم و تستوعب كلامك ده لأن بجد اللى بيحصل ده بقى مشخره....الثوره اتسرقت و دم الشهدا بيروح هدر و الحراميه و القتله ما حدش بيحاكمهم و كل اللى قادرين عليه تأجيلات و خلاص و ديل كلاب الداخليه عمره ما هتعدل و لا حالهم هيتصلح و عايزين يحولوها لحرب أهليه و حرب عصابات و شوارع بقى بينا و بينهم لحد ما هيوصلونا ان اللى هيشوف وش ظابط ولا عسكرى ف الشارع حتى لو ما عملش حاجه هيقتله....الناس دى لازم تتربى بجد و تعرف انهم مش على راسهم ريشه ولا هما احسن مننا بالدبابير و الغربان اللى على كتافهم و ان جزمه اى واحد فى الشعب برقبه الداخليه باللى فيها....ربنا يحميكى بجد يا أرجل بنت فى مصر و فعلا اللى خلف ما ماتش و انتى راجل بنت راجل

Ahmed . M . Abdulrahman said...

كلام سليم

ولاكن انا اعترض على جزئية يا نواره

منطقياً لا يجوز ضم الامن المركزى الى الجيش

لان اى اشتباك اخر مع الامن المركزى سيكون اشتباك مع الجيش ذاته

وغير ذلك ان الجيش له مهمه واحده هى حمايه امن و حدود و خطوط الدوله الاماميه

وللداخليه مهمه وحده هى حمايه امن و حدود وخطوط الدوله الاماميه

و الدوله هى الشعب اي ان الداخليه تحمى الشعب ليس غيره وتبذل النفيس و الغالى من اجل توفير الامن و الامان له

وانا معكى فى فكره نزع القنابل الغاز من ايدى الداخليه

و قصر التسليح على الاسلحه الخفيفه و المتمثله فى عصا الابونيت ونزع العصا الكهربائيه

و الحقيقه ان مجلس الوزراء و خاصه وزاره الداخليه تحتاج الى ما نقوله بالبلدى " اننا نفرمت الهارد بتاع الداخليه و نصطب لهم النظام الجديد "

هذا هو العلاج المجدى الوحيد ولا تقولى اعاده هيكله و لا اى كلام اخر

لازم المنظومه تختلف كلياً

اما نقطه حل الامن الوطنى فا الشعب كله كان عاوز يحله منذ ان كان ملقب بمباحث امن الدوله

انا نفسى كنت كتبت تدوينه اول ما عملت المدونه

قلت لابد من حل مباحث امن الدوله و تسليم ملفاتها الى المخابرات العامه

هذا هو المنطقى و العقلانى

اما تغير الزى للشرطه فهذا امر يطول النقاش فيه

ولاكن انا موافق من حيث المبدأ

بس ياريت الشعب ميلبسهمش لبس التنوره انتقاماً منهم

اما شعار يوم 8 يوليو فدا اكيد انه يصب فى اناء الطبقه الكادحه و اهالى الشهداء

وربنا معاكى نواره و معانه

سلام مؤقتاً يا نواره
___________________________
الى عايزنى يجينى
http://misr25jan2011.blogspot.com

Unknown said...

تونس عينت ناشط حقوقي وزيرا للداخلية
..
ناس عايزه تنضف بجد مش زي هنا محسسنا ان الوزاره دي ملايكه ميتلمسوش
طول ما الدخليه زي مهي هتفضل وسخه
واللي عنده راي تاني يخليه لنفسه

ساعي الخير said...

شوفي يا نوارة تعملي يوم للداخلية

تعملي يوم للتقلية

من غير أهداف واضحة و متفق عليها

في حوار و لو علي النت و المدونات

هتبقي الحكاية ملوخية

أنتي مش عايزة تفكري في بناء نظام

ليــــــــــه

هو كله هد هد مفيش بناء أبداً

ده حتي ماسون يعني بناء

mahmoud said...
This comment has been removed by the author.
mahmoud said...
This comment has been removed by the author.
mahmoud said...

توحش الداخلية هو سياسة لحكم مصر وموافق عليها القوي العظمي في اوربا وامريكا وطبعا اسرائيل متورطة وده عشان يعرفوا يحكمونا ويسيطروا علينا وانا فاكر مسؤول الماني كبير قال ان من اهم مكاسب الثورة الغاء امن الدولة مش اي حاجة تانية وده عشان عارف ان التغيير الجذري في السياسة الامنية هو تغيير في كل حاجة وثورة بجد ولان مصر لسة مقيدة تم انشاء الامن الوطني في مشهد مؤسف يضحك ويبكي وصيع الداخلية في كل القطاعات زي ماهم وهناك اسئلة تخطر ببالي مثل لماذا لايحاسب المجلس العسكري الذين اهانوا شرف مصر وكرامتها بما يتناسب مع شرفهم العسكري؟وهل يستطيع مبارك واعوانه ان يدمروا مصر كما فعلوا رغم عن المؤسسة العسكرية والتي تملك القوة علي الارض؟ولماذا لايحقق في قضايا موت الطياريين والكفاءات الاخري التي ماتت في حوادث رغم ان هذا يمس كرامة وشرف الجيش؟ وهل هناك مراكز قوي داخل المؤسسة العسكرية تتحكم في الافعال والسياسات بشكل معين؟وهل المؤسسة العسكرية هناك من يحكمنا من داخلها من وراء الستار؟

emadhsobhy said...

كان نفسي اعلق بعريضة على كل كلمة و فكرة هى قالتها بس ما قدرتشي لان كلامها فوق مستوى فكرى الغلبان و تربيتى الفاشلة و لانى من الشعب المايص و لانى ما بعتبرشى الداخلية اسرائيل و لا احنا فلسطنيين كنت فاكر اننا كلنا مصريين بني ادميين فينا الحلو و الوحش و الفاسد و الصالح فينا قبيل و هبيل بس فى الاخر بيجمعنا دم واحد. و لانى كنت فاكر اننا عايشين فى دنيا مش فى غابة يوم الشرطة تكون ايد السلطان فى البطش و يوم تنضرب بالجزمة. ما ينفعشى ارد لانى اتعلمت ان اللى اتظلم ما يظلمشى. ما ينفعشى ارد لانى صحيح ما كنتش معاهم فى الميدان و لا تعرضت حياتى زيهم للخطر بس جدودى ماتوا فى حروب 48 و 56 و 67 و الاستنزاف و خالى حارب فى الصاعقة و المظلات فى حرب 73 و عمرى ما شوفته بيتكلم بالاسلوب ده و لا بيحسسنا انه كان شايل عمره فى عز شبابه على كفه علشان يحمينا و يخلينا نرفع راسنا و نسترد ارضنا المحتلة و عاش حياته بينا انسان بسيط لما كان بيتعرض للظلم كان بيتوجه للي خالقه و بيطلب منه المساعدة و كان بيدافع عن حقوقه من غير ما يزلنا انه حررنا و لا يبتزنا بدم اخوانه و زملائه الشهداء اللى ماتوا بالالاف و منهم اللي مات بين ايديه محروق او راسه مقطوعة او متفرفت مليون حتة عمره ما جاب سيرتهم غير بالترحم لكن ما استغلش حالتهم و حالته فى دفاعه عن حقوقه. و عمرى ما شوفته بيقل ادبه على واحد اكبر منه او بيشتم فى الشعب اللي ممكن يكون برأى مخالف له و عمره ما تسبب بوقيعة بين الناس و بعضها و كانت دى عظمته و قوته

Anonymous said...

مرحبا نوارة.. شكرا لجهودك و جزاك الله خيرا.. إقتراحين لجنابك: مع إني أقرأ مقالاتك وأتابعها إلا إنني أظن أن الجيل الجديد من 18 إلى 25 قد تعود على الإختصار و والقراءة القصيرة, لذلك أقترح ان تختصري مقالاتك أوتنشئ مدونة جديدة موجهة لمن هم دون ال 25.

الأمر الآخر هو حساب تويتر.. هل لديك واحد؟ هل بالإمكان إنشاء حساب لكي نتمكن من متابعتك من الموبايل ؟؟ شاكرا لك و حفظك الله. أحمد من الإمارات

ساعي الخير said...

بت يا نوارة أنا فيه موضوع غايظني

من زماااااااااان

و مستني تتكلموا فيه لكن للأسف واضح

اننا بننسي و بنحب الهيصة و بس

تفتكري واحد أسمه

أحمد علي مبروك

طفل المحلة الشهيد

في أحداث 6 أبريل 2008

فاكراه فاكره يوم ما خوفتي

بعد ما سال الدم و ولعت و قولتي لأ

أنا ما أقدرش علي تحمل المسئولية دي

طيب فاكره

اللواء محمد عبد الفتاح عمر وكيل لجنة الدفاع والامن القومي بمجلس الشعب


الراجل اللواء ده في حلقة
مع وائل الأبراشي

عمل مداخلة و قال

علي الواد اللي اتقتل و قدام أبوه

و خاله في البرنامج يروح في ستين داهية

حتي لوكان أبني

ليـــــــــــه

قال علشان الواد معندوش

ثقافة أين يقف

و ما هانش عليه يعزي الراجل في ابنه

ابنه الوحيد طالب الأعدادي

اللي كان عنده 15 سنة

و رفض بأستهزاء ان الواد يتقال عليه

شهيد و ان دي مغالاة و تلاعب بالألفاظ

الراجل المجرم ده
محمد عبد الفتاح عمر

مجرم حرب هو و اللي زيه

السبب في السياسة الفاشلة للداخلية

هو و اللي زيه المفروض

يتعدموا

لأنهم السبب في تضليل رجال الشرطة

و في وضع السياسة الفاسدة اللي

خلتهم يضربوا في أهلهم و ناسهم

أنا ساعتها كنت عايز أتصل

بالبرنامج و أقول له

أنت مجرم حرب و هييجي يوم و تتحاسب

لأنك علي الأقل معدوم الرحمة

حتي ما عزيتش الراجل في أبنه الوحيد

اللي مات في بيتهم مش في الشارع حتي

لكن قولت أنك يا نوارة أنتي و السادة

المدونين هتقوموا باللازم

و هتتكلموا و هتنتبهوا

علشان السياسة دي تتغير

وائل عباس عمل فيديو و خلاص علي كده

و أنتي قعدتي تولولي ما اقدرش أتحمل مسئولية الدم و سكتي

و المحصلة السياسة الفاسدة

فضلت زي ما هي و أتسببت

في كل الجرحي و القتلي في 25 يناير

ذنبهم في رقبة ميــــــن

مين اللي عرف أن فيه سياسة فاسدة

و سكت عليها

مين سكت علي
وكيل لجنة الدفاع و الأمن القومي

اللواء المجرم
محمد عبد الفتاح عمر

مين بيعمل هيصة و خلاص

مين مش عايز يفكر

و بيتسبب في زيادة المصايب

ميــــــــــــــــــن

مين بيطنش و يطرمخ

و لا هو حق خالد سعيد

غير حق أحمد علي مبروك

غير حق كاميليا

عموماً آخرة الطرمخة

كانت زيادة القتلي و الجرحي

في 25 يناير

ياتري ميـــــــــن

هيهيص من غير ما يتناقش بالعقل

و يحط حلول تحقق العدل

ميــــــــــــــــــــــــــــــــن

ساعي الخير said...

العدد الكبير لقتلي و جرحي 25 يناير

سببه الأساسي الطرمخة

علي ناس زي اللواء المجرم

محمد عبد الفتاح عمر

مجرم الحرب

الطرمخة هي سبب كل النكبات

زي الطرمخة علي

محاكم التفتيش بتاع البطرك شنودة

حبيب حسني و الطرمخة علي شيخ الأزهر


عضو الحزب الوطني

و آدي آخرة الطرمخة عدي في القتلي

و داوي الجراح و يا مين يرجع اللي راح

الطرمخة آخرتها وحشة

و زي ما نهد لازم نبني

و قولة الحق ما تعيبني

و أبعد يا خوف وسع سيبني

مين قال الظالم يغلبني

بدستور وقانون قال يلاعبني

لو أطاوعه هيفضل ينهبني

و بحكم براءة هيكدني

مش لاعب لعبة ما هتفيدني

تسموه قانون و ديمقراطي

و ترجعوا و تسيبوا الواطي

و تزيدوا في حزني و أحباطي

طيب ليه أنا أوافق و أطاطي

أذا حقي يضيع بأستعباطي

ملعون القانون يا ديمقراطي

و الله العالم بالآتي

لغير العدل أنا ما هطاطي

علي ك.. أ.. الديمقراطية

علي ك.. أ.. يا ديمقراطي

لا مؤاخذة متغاظ

محمد عبدالسلام said...

تسلم الايد اللى كتبت

محمد عبدالسلام said...

تسلمى

heeba_alrahib said...

ايوة كده اتعدلي يا احة قرفتينا على الله شهر العسل يكون خلص ومش ترجعى تحنى للدباببير تانى

تعليق said...

بصراحة بقى الثورة دي عايزة ثورة تاني على الداخلية بعد الثورة الأولى إللي كانت على مبارك و عياله و مراته و على عز و نظيف . شوفتوا أمين الشرطة وللا المخبر كان بيرقص إزاي بالسنجة و السيف؟ هيي الداخلية بتاعة العيسوي و عصام و المجلس لازم ننزل الميدان تاني يوم8 و إلا ماتبقاش رجالة

احلام جوليا said...

عارفة ان عند اهل الشهداء حق انا فاهماهم وحساهم الام متقدرش تفرط في دم ابنها مهما حصل ومهما سالت دماء بس الابن نفسه لو رجعنا له الحياه وخيرناه حيختار حق مصر الي مات علشانها قبل حقه يانواره جهاز الشرطة يتنظف وكل الي تورط في ضرب المتظاهرين يقلع البدلة الميري اولا ويتحاكم ثانيا ولا يعود ثانيا للشرطة جهاز امن الدولة الي غيروا له اسمه يتلغي تماما ووزير الداخلية يكون مدني ومن نشطاء حقوق الانسان زي تونس لكن حل الداخليه مستحيل حد يوافق عليه لان عصابات الداخلية الي متركزة تضرب في شباب الثورة اذا حليناها حتتحول تضرب الشعب كله وفي الحالة دي حتدمر الشعب كله مش كم الف ونشر البلطجة والعنف سيساعد كل الي بره مصر علشان يهاجموها في عز ضعفها نطهر الشرطه اه ونشيلهم من مناصبهم المتورطين في قضايا التعذيب وقتل الشهداء اكيد لكن الجهاز نفسه لا يحل

طبيب بيطري said...
This comment has been removed by a blog administrator.
الكلمة نــور وبعض الكلمات قبور said...
This comment has been removed by a blog administrator.
بطة بطوط said...
This comment has been removed by a blog administrator.
تعليق said...
This comment has been removed by a blog administrator.
تعليق said...
This comment has been removed by a blog administrator.
Msry 7or said...
This comment has been removed by a blog administrator.
متفائل said...
This comment has been removed by a blog administrator.