ما بقاش الا انت كمان يا خدامة بكيزة

عمر سليمان طالع امبارح في الايه بي سي يقول للامريكان: المصريين غير مؤهلين للديمقراطية

طب لما احمد نظيف قال كده قلنا دكتور في هندسة الاتصالات وجايب مجموع كبير في الثانوية العامة ونجح في الوصفية في اعدادي هندسة، انما انت مين يعني انت عشان تتكلم على اسيادك كده؟ انت اخرك تروح تاخد اوامر من الاسرائيليين والامريكان وتنفذ وتتواطأ مع العادلي على تفجير كنيسة القديسين وتضخ غاز مسمم على الغزاوية عشان تموتهم... سفاح يعني، هو السفاح ده كمان عنده مخ وبيتآلط علينا؟ ولا افتكرت نفسك نبيه عشان دخلت كام وسخ في لعبة دوخيني يا لمونة، طب اصلا اللي دخلوا معاك في اللعبة دي هم اساسا اوساخ مش حتلاقي حد نضيف يرضى يلعب اللعبة دي معاك

واللي يغيظ ان الامريكان هم اللي زعلوا علينا وقالوا ما يصحش يقول على المصريين كده 

وجاي في وشنا يقول كلام ورايح للامريكان يقول كلام تاني على اساس اننا ما بنعرفش انجليزي يعني.. نبيه قوي، ما يروح يلم فضايحه من الويكيليكس، ماهو ده المسئول الامني رفيع المستوى اللي ما عرفتش احط اسمه ايام ما كان لسه رئيس المخابرات، مش عشان له هيبة، بس عشان مفتري وممكن يئذي بتوع الدستور، انما العالم كله عرف انه بيقعد قدام الامريكان والاسرائيليين لامم رجليه وبيفرك في ايديه ويقول: وماله يا سي السيد.. اللي تشوفه ياخويا.. الامر امرك والشورة شورتك

انت لسه على البر وبتقل ادبك علينا؟ 

لا... ما عادش خلاص، ما عادش حد ينفع يهزأنا ونسكت له، وما عادش حد ينفع يذلنا ونبلع له، وما عادش حد ينفع يتآمر علينا وننطش عليه.... نجز لسانك من لغلوغه ده احنا اسيادك واسياد اسيادك 

-----------

شهادة لوجه الله، وانتوا عارفين اني مش باحب صفوت حجازي، بس الشهادة لله الراجل ده في الاعتصام رامي نفسه على الجبهة في المقدمة وكان حيموت اكتر من مرة.. لا مش مجازا، كان حيموت حيموت فعلا، هو عايش لحد دلوقت عشان ربنا كاتب له عمر بس، انما الحقيقة هو في المواجهات وبيلقح نفسه على القنابل والرصاص بشجاعة رهيبة .. متفاني جدا وبهدل روحه خالص