لازم لازم تشوفوا الزمن المتبقي

فيلم الزمن المتبقي سيناريو واخراج وبطولة ايليا سليمان، مخرج فلسطيني

الفيلم ده لازم يتشاف ضروري ضروري ضروري، انا عمري ما ضحكت وعيطت في نفس اللحظة زي النهاردة، والفيلم كله على بعضه مافيهوش خمستاشر جملة حوارية، ثم انا عمري ما شفت حد يتكلم عن النكبة ويضحكك لما يوجع بطنك وهو ساكت مافيش جملة حوار واحدة بس بتضحك وانت وبتعيط

الفيلم ح يتعرض بكرة ان شاء الله حفلة تسعة ونص في سيتي ستارز في بانوراما الفيلم الاوروبي لانه انتاج فرنسي

وح يتعرض تاني يوم التلات الجاي ده على طول حفلة تلاتة ونص العصر

النهاردة القاعة كانت فوق بعضها مع ان المهرجان ما كانش عليه اقبال يعني، والمهرجان فيه افلام كانت كويسة، ماعدا الافلام الهولندي، عاملة زي الافلام المصري، ونفس غلظة الحس دي بتاعة يجيبوا واحدة بضب ويتريقوا عليها، يجيبوا واحد تخين ويتريقوا عليه، والمفروض انك تضحك مش تعيط ولا تتغاظ ولا تغضب ولا حاجة، حاجة في منتهى غلظة الحس يعني، بس الحمد لله فلسطين لسة مهمة، القاعة كومبليه وكان فيه ناس واقفة

ايليا سليمان ده مبدئيا انا عايزة اقبض عليه، واكتفه، واهدده باني ح اعذبه والفق له قضية مخدرات اذا ما كانش يعمل هنا مدرسة ويعلم الناس ازاي الواحد يعمل فيلم راقي وحساس ويضحك ويعيط من غير ولا كلمة ومش عايزاه يفلت مني، النهاردة قعدت اجري وراه زي البنات اللي بيطاردوا النجوم

ثانيا عايزة احبس المصريين واقعدهم يتفرجوا على افلامه جرعة مكثفة عشان يبطلوا يبقوا زي الهولنديين ويرجعوا تاني زي المصريين

بعد كده كان فيه فيلم فرنساوي اسمه يوم التنورة انما ايه؟ حاجة وسخة وسخة، عنصري بينتقد العنصرية، ملخصه مدرسة فرنساوية عايزة تعلم ابناء العرب والافارقة التحضر انما هم مش تمران فيهم وعنصريين ومبتزين وعنفا وبيكرهوا اليهود وبيتكلموا على الستات ومتشردين وقذرين وحقراء وولاد كلب واضطرت المدرسة الفرنسية المتحضرة القطة البطة اسفة بمنتهى الرقة والمشاعر الفياضة انها تحتجزهم رهائن بالمسدس عشان تجبرهم على التعليم والتحضر اي والله، انا خرجت من نص الفيلم وانا باقول: قرررررررففففففففففف

صدق الشاعر الشعبي، اللي هو انا، لما قال: الفن بيخرج مصارين الشعوب

وانا قلقانة قوي ان مصارينا شبه مصارين الهولنديين، ده الهولنديين عنصريين اكتر من الفرنساويين، انا عايزة المصران ده يتغير او يتشال خالص ويركبوا واحد بداله

اما ايليا سليمان، فبجد يعني، لو دي مصارين الفلسطينيين فعليهم انهم يفتخروا ويتفشخروا بنفسهم، ايه الشفافية دي والحساسية دي وخفة الدم والمرارة والتفاؤل في نفس الوقت وقوة من غير خطابة وصلابة من غير تشنج ورومانسية اللي مش مهترئة دي؟ يارب يخليه، يارب يخليه لحد ما يبقى عنده مية وخمسين سنة، ويحرسه ويحميه، ده راجل كوزموبوليتان، ما تحسش انه يخص حد، الفيلم لما اتعرض في امريكا قالوا: احنا حاسين انه بيلمس علينا، ولما اتعرض في فرنسا كذلك، ولو اتعرض في الصين الناس ح تحس بتوحد معاه، كم انسانية مش معقول، قال انا باقول لواحد ده لازم ييجي يدرسنا قوم يقول لي: ماحدش ح يرضى يستضيفه اصله اسرائيلي! اسرائيلي ازاي يا عم ده عامل فيلم كوميدي عياطي عن النكبة، قال لي: ماهو عرب تمانية واربعين يعتبروا اسرائيليين وانت عارفة مفهومية اللي عندنا

يا سبحان الله، يعني ايليا سليمان اسرائيلي وبيريز صعيدي؟ ده ربنا له حاجات يا جدع

الغريبة ان الفيلم عن النكبة، اهو عن النكبة اهو، وبيضحك بسخرية مرة قوي وبيعيط وانت في وسط ما بتضحك قوي صح؟

بس متفائل جدا جدا جدا، تصدقوا؟ والله متفائل، مش بس متفائل، ده كمان مطمئن، يعني يحسسك ان فلسطين لسة بخير وانها ح تفضل عايشة

طب انا اعمل ايه انا دلوقت؟ فيلم عبارة عن تابلوهات تشكيلية رائعة، بيضحك بمرارة ويعيط بتفاؤل، وعن النكبة، ومافيهوش خطابة، والاكادة مافيهوش سياسة، تصدقوا، مافيهوش سياسة خالص، مافيهوش كلام اساسا غير كام كلمة كده متنطورين وتبقى قاعد مش عايزه يخلص، اعمل ايه؟ اروح اخطف الراجل ده واخده رهينة لحد ما يقول لنا سره ايه؟

---------------

بالنوسبة بقى لموضوع حواري في راديو بكرة تومورو تومورو آي لاف يو تومورو يو اونلي وان داي اواي

دلوقت كلمني محمود صابر وقال لي انا سبت راديو بكرة انا ومحمد الطاهر، مع انك عاملة لمحمد الطاهر بلوك يعني (ده محمود اللي بيقول ههههههههه) ليه يا محمود؟

قال ايه يا اخويا، بتوع راديو بكرة قالوا له لا مش ح نذيع حلقة نوارة عشان... اسمع بقى... عشان نوارة مش ليبرالية واحنا مش ح ندي منبرنا لحد مش ليبرالي يعبر فيه عن نفسه هههههههههههههههههههههه منتهى الليبرالية الحقيقة

طبعا انا اتفحت في الضحك.. الله، اتمنعت، المهم قلت لمحمود يا ابني ما تخسرش نفسك وما تعملش خناقة، قال لي اخسر نفسي ايه انا كنت باشتغل ببلاش انا ومحمد الطاهر عشان ندعم الحريات يقوموا بعد ما يوافقوا على الحلقة يقولوا مش ح نذيع؟ انا شامم ريحة

المهم فتكوا في الكلام قلت له ريحة ايه؟ قام الجدع خاف مني عشان انا مسحوبة من لساني وقال لي: لا انا مش متأكد من حاجة وراح قاطم وقال لي انه هو ح يكتب على الموضوع على مدونته

ابقوا افهموا منه هنا بقى عشان انا فهمتش منه حاجة

بس انا مش عارفة ليه صايباني كريزة ضحك.. انا باتمنع؟ ده انا حتى حسني مبارك ما بيمنعنيش، ده على كده حسني مبارك احسن منهم بقى

بس حاجة غريبة، ده محمود بيقول لي انهم كانوا عاملين اعلان على الفيس بوء قبل الحلقة وكدهون يعني، هو حد قال اني ريبرارية؟ ماهم عارفين اني مش ريبرارية من ساعة ما وافقوا على تسجيل الحلقة واعلنوا عنها على الفيس بوك، ايه اللي جد؟ ويا ترى ريحة ايه اللي شاممها محمود.. للاسف ما عرفتش استدرجه، بس لو ما نطقش ح اهدده بالبلوك، وهو حر بقى