Tuesday 25 August 2009

حكمة اليوم الرابع

"خذ العفو وأمر بالعرف وأعرض عن الجاهلين"
من واقع محاولاتي الفاشلة لمحاسبة نفسي اللي استمرت سبع ثواني ثم اقلعت عنها، عرفت قد ايه التأنيب والتوبيخ مزعجين، وعرفت ان الواحد لو مش عايز ربنا يحاسبه بالتنتوفة ما يحاسبش الناس بقى
والله هم كلهم صعبين، ان الواحد يحاسب نفسه قبل ما ربنا يحاسبه، صعبة قوي، صعبة وغلسة وتجيب اكتئاب، حد جربها؟ اصل الانسان ما يحبش يشوف نفسه وحش، اكيد احب اشوف نفسي ان "اهم عيوبي اني طيبة زيادة عن اللزوم، وبانسى الاساءة، ما باعرفش ازعل من حد وقلبي ابيض" وانا طبعا لا طيبة ولا متسامحة وبازعل عادي يعني واحقن واغل في نفسيتي، بس قعدت كده افتكر كام حاجة غلط عملتها لقيت الحساب صعب، لمجرد اني فكرت نفسي بيهم
طب الواحد لو استنى ربنا يحاسبه طب ما دي وقعة سودا
مافيش غير ان الواحد يتجاوز عن الناس عشان ربنا يتجاوز عنه، هي صعبة، صعبة قوي، خصوصا لواحدة غلاوية زيي، بس، طب على الاقل مافيش داعي لتوبيخ الناس، ما انا لما جربت اوبخ نفسي لقيته احساس وحش، مافيش داعي اعرض الناس لاحساس يضايقهم عشان ربنا ما يعرضنيش لنفس الاحساس ده، الاية اللي فوق دي بتسهل الموضوع على فكرة
يعني لو الواحد عفا بينه وبين نفسه وقال اللي يخلصه من ربنا وضرب طناش وسقع دماغه عن الناس اللي ممكن يسفهوا عليه ممكن يسهل موضوع العفو ده

21 comments:

mido said...

اول مرة أعرف انك غلاوية

و سماوية

:P

TAFATEFO said...

الحكمة دي مكتوبة بعد الفطار .. مش محسوبة المفروض

حتى تلاقيها مكلكعه كده

soreal said...

طب إيه معني أمر بالعرف؟ إيه العرف؟ المعروف؟

Anonymous said...

حكمه جميله بجد

على فكره حكايه طيبه زياده عن اللزوم ده عيب كل المصريين الا انا ..... بصراحه كل مسأل حد ايه عيبك يقوللي طيب زياده عن اللزوم ..... بس انا الصراحه موش طيبه زياده ...... واللي بيدايقني بياخد على دماغه مني

بصراحه محدش في الدنيا بيشوف عيوبه .... كله بيشوف عيوب الناس

تقبلي مروري

Unknown said...

هههههههههههه
اصلي طول النهار عمالة افتكر في الحاجات الوسخة اللي عملتها يا طفاطيفو
لو كنت كتبت حكمة كنت كتبت: انا بنت تيت ايه القرف ده انتوا طايقيني ازاي؟

into said...

Es ist nun schon lange her, da hast du gesagt:
"انا على لينكس"

so, are you still using Linux or you ran back crying to Papa Bill Gates saying I want my windows??

TAFATEFO said...

محدش بيشوف عيوبه ازاي؟؟

ناس كتير بتبقى ارفه معظم عيوبها .. وفي من العيوب دي اللي الواحد بيقدر يتغلب عليه وفي لا

والواحد بيفضل في صراع مع العيب لغاية ما يتمكن منه ويبقى طبع أو يتغلب عليه ويقدر يتحكم فيه

Unknown said...

هو فيه حد في الدنيا بيقول: انا عيبي اني منافق مثلا؟ عيبي اني كداب؟ عيبي اني واطي؟ عيبي اني رمة ودون؟ عيبي اني نتن وبخيل؟ عيبي اني ندل وابيع ابويا؟
فيه حد بيقول كده؟

TAFATEFO said...

ممممم .. معتقدش :D

بس بيبقى عارف .. وممكن يكون حاول يتغلب على عيبه المنفر وفشل .. فبقى طبع فيه ميقدرش يغيره .. وهو عارف انه كده

فهمت دلوقتي ان فتاة هانم تقصد ان محدش بيقول عن نفسه كده .. أنا كنت فاهم غلط

عذراً
بعتلك ايميل

TAFATEFO said...

أنا مش مصدق انه ممكن

احنا لو صاحبنا واحد ندل مثلاً مش عارف انه ندل واننا بنستندله مكناش عمرنا نسيبه أبداً .. كنا هنضمن اننا نقدر نضحك في أي وقت

دنا ممكن أموتكو ضحك على حكاياتنا مع بعض اللي عارفين عيوب بعض .. المتعة في انك تفضل تحرص من عيوب صاحبك لأنه في لحظة لو مخدتش بالك هيشربك مقلب محترم

:D:D:D

أوف .. إلا لو كان ندل ومش عارف اننا بنستندله .. او بيفتح في الكلام ومش عارف اننا عارفينه .. دي تبقى جامده جداًاًاًاًاً

TAFATEFO said...

في أسوان بنقعد في مكان بعيد عن السكن حوالي 3 كيلو أو حاجه .. بنمشي منه على الساعه 4 مثلاً ومفيش أي مواصلات وهي عربية واحدة

اللي يغفل بس .. يضمن انه هيروح مشي

ده مره واحد كان سايق وقال ننزل نشوف التمساح فاتح ولا لا .. وقف على الباب قال بيشطبوا .. قلتله طالما نزلت ادخل اسأل بالمره ينفع نقعد ولا لا .. الواد يا عيني (مع انه والله عارف اني أبيعه لحظة) مخدش باله وراح سأل .. يا ما دوب مشي خطوتين وكنت في كرسي القياده وزودت بنزين .. قام جاي جري .. استنيته ومشيت بالراحه علشان يركب على الشنطة (لأنه بجملة الهبل فاكرني آل ايه هخاف عليه يقع) .. والله فضلت ماشي بيه وأمشي براحه شويه وفجأه أسرع وفجأه أفرمل .. والواد -يا عيني- متشعبط وبيصوت

وجيت في يو ترن خدت أله براحه علشان يطمن وقمت فارك .. اترزع في الإزاز حتة رزعه .. ودقيقة وقمت مفرمل جامد

:D:D:D:D:D

داحنا جزم .. جزم قديمة كمان

إلا لو واحد مش عارف اننا عارفين انه ...... ها ها ها

هموت من الضحك على التخيل بس

طب انتوا هاتولي حد كده .. وحد يصور

مواطن مصري said...

http://www.youtube.com/watch?v=6GLF8QzPnNI

الصين قررت تصدير الزوجة الصينية لمنافسة المنتج المحلي

مع البلحة الزوجة الصينية و جوازتك عليا

يا نوارة اتفرجي على الفيديو دة هتموتي على نفسك من الضحك


جامددددددددددددددددددددددددددد

sherif said...

كل سنه وانت طيبه

overdose said...

السادات سادات يا نوراااااااا
:)))))))

دكـــــتور جدا said...

صح والله عندك حق
رمضان كريم

مواطن مصري said...

نوارة هو سؤال استفساري يعني اية شلولخ؟

Unknown said...

يعني ماحدش اشترى العدد غير لافروز ومواطن مصري؟
:(

فيكوا الخير يا شباب

mido said...

أنا اشرتيته


يا ترى الصورة طلعت حلوة و سوابق زينا ؟

:D

مواطن مصري said...

عشان بس تعرفي ان اسم السادات بيعدي في كل حاجة

هو انتي قولتي ماكسيمم و مينمم

:D

TAFATEFO said...

وأنا كمان اشتريته

على فكره بعت لحضرتك لنكات المقال امبارح

Kalimalhus said...

ما شاء الله واخدة صفحة لوحدك .. ده مش حسد إحنا بنقر بس :)

المقال لطيف جدا و مناسب لنهار رمضان يعنى ماجابليش كريزة سب و لعن أو أى حاجة من اللى ساعات بتحصلى لما أقرا المدونة بتاعتك..

ياريت تستمرى فى الكتابة للدستور كل أسبوع ..(يعنى مادام أنا بأشتريها كل أسبوع كده كده بدل ما أضطر أغرم تمن جرنال تانى)..