Monday 10 August 2009

انا مستعدة اثور بس اثور ازاي؟

على التويتر الشباب لنكوا اللنك ده
ثورة مستخدمي الانترنت، طب انا مستعدة اثور من دلوقت اهو، بس اعمل ايه يعني؟ اقفل الراوتر مثلا؟
ياريت حد يشرح لي
وبالمرة الموبايل بقى، نقفل الموبايل كمان
بس لو قفلنا الموبايلات والنت هم ح يخسروا يعني؟ لو ح يخسروا اخسر ابوهم عادي انا باحب اخسر اللي معاهم فلوس كتير حتى من غير ما يعملوا حاجة، محبة كده لوجه الله
مستعدة انضم لو حد فهمني

16 comments:

مواطن مصري said...

رأس مالية انتهازية نعمل اية

into said...

و الله بنشكر الريس (متقال)و جهاز تنظيم الاتصالات و البهوات جهابزة الاتصالات اللي كل يوم و الثاني يحللوا اللقمة اللي بيلهطوها بافكر نيره لا يتفتق عنها ذهن ابليس من اجل خدمة الواطن الاوحد في البلد (متقال).ـ

حـــلـــم كـــان said...

مهو مش نافع النظام كده لازام يخسرو

soreal said...

useless..

you will be boycotting a service that you already paid for.
in fact you will be doing them a favor :P

unless this boycott means that you can consider living without the internet for a considerable time, as in you can cancel ur service. now that would hurt really hard

Widiman said...

المتضررين من قرار المرفق القومى لتنظيم الاتصالات هم شباب الوصلات الذين يقومون بالتعاقد على الخطوط و اعادة توزيعها (وهو ما يخالف فى الاصل بنود العقد) ، هامش الربح يتعدى 200% من سعر الخط الاصلى على حساب شركة الانترنت وعلى حساب جودة الخدمة طبعا التى تقوم باستثمار الملايين لتوفير خطوط الربط الدولية بشبكة الانرتنت والبنية التحتية لتوفير الخدمة بكل مدينة و قرية بمصر.

بناء على خبرة شخصية عدد مستخدمى الانترنت الذين سيتأثرون بالقرار لا يتعدى 5% من مستخدمى الخدمة حيث يستهلكون اكثر من 60% من السعة الدولية.

وبمعادلة بسيطة لو تم اقصاء ال 5% سيتم تحسين مستوى الخدمة لدى 95% من المستخدمين بنسبة 100%

هاه فهمتوا والا اقول كمان

خبير بشبكة الانترنت باحدى الشركات وماليش مصلحة شخصية فى الحوار ده ان شاالله يولع الانترنت والنتيتة فى يوم واحد

Anonymous said...

انا سمعت دعه انهم لو موش تراجعوا ...... الكل هيلغي خطوطه عند الشركات

mido said...

mtalaat

انت بتقول الكلام ده ازاى ؟

انا جبت ردى عليك من عند كاريكاطز
-----------------

ححاول اشرح الموضوع ببساطة شديدة دلوقتي انت مشترك في خدمة الانترنت ، عندك خط سرعته 512 مثلا ، المفروض انك مشترك في الباقة الغير محدودة يعني تقعد ليل نهار ع النت براحتك ، دلوقتي الباقات كلها بقت محدودة يعني بعد ما تستهلك خمسة وعشرين جيجا النت يا إما تقل سرعته جدا ويبقى بطيء جدا جدا يا إما تدفع فلوس زيادة يعني ايه انت بتستهلك نت ؟ يعني الصفحة الي قدامكم دي مثلا ، بمجرد ما تفتحها تحسب مثلا خمسين كيلو بايت ، فتحت موقع تقيل تحسب 200 كيلو بايت ، شغلت فيديو على اليوتيوب تحسب خمسة ستة أو حتى عشرين ميجا بايت ، سمعت أغنية آدي اربعة ميجا طاروا وهكذا لو وصلت لخمسة وعشرين جيجا قبل آخر الشهر يبقى انت ما التزمتش بساسة الاستخدام العادل وتتعاقب اللي حيقول خمسة وعشرين جيجا كتير حقوله تعالى اتفضل شوف استهلاكي العادي كام وانا على خط لوحدي ومش بعمل داون لوود غير عند الضرورة فقط مجرد بشوف فيديو على اليوتيوب على كام مجلة وكتاب وكام موقع بتصفحهم وكام برنامج بعمل لها أب ديت

Bella said...

لو تم تطبيق القرار المسخرة ده يانوارة مش ح تلحقي تتصفحي موقعين تلاتة وتشوفي فيديو او ترفعي فيديوهين من اللى بترفعيهم في مدونتك وتلاقي العداد بيصفر ويقول لك لقد نفذ رصيدكم والسرعة تنزل ل 128 يعني الدايال اب ارحم

احنا اشتركنا وبندفع تمن خدمة غالية علشان نتحرك على النت براحتنا والعقد شريعة المتعاقدين

هم بقى مش عايزين يحدثوا شبكاتهم مش ذنبنا احنا

اما الحجة بتاعة الوصلات فعندهم مليون طريقة للقضاء عليها اولها يرخصوا سعر النت المحدود واللى عايز النوع ده يتفضل واللى عايز ده اهو بيدفع

انما يقرروا بمزاجهم يحرمونا من حقنا فدي سرقة وبلطجة

عن نفسي بادفع لوحدي ومعنديش حد معايا ع الخط والنت بطئ وزي الزفت وفجأة الاقيهم كمان حددوه بسعة معينة وعايزين يلزموني ادفع عن كل جيجا زيادة 10 جنيه ونحتكم للعداد اللى ح يبقى في ايديهم وممكن يتلاعبوا فيه

فلا والف لا

من الشهر الجاي مش ح نجدد اشتراكنا

انا خلاص بلغتهم اني ح اعلق الاشتراك من اول 9

ولو مااحترموش نفسهم وتراجعوا عن قرار النصب والسرقة ده يبقى نت بطئ بنت بطئ نرجع دايال اب ومش ناقصة لوي دراع وسرقة

Bella said...

نسيت اقول للاستاذ خبير النت اللى بيرد وبيتكم عن اقصاء الخمسة في المية معلش يعني

لما الخدمة ح تتحسن لو اختفى الخمسة في المية دول

ايه ذنبي انا يطبق على نفس القرار

طيب ماالسايبرات او الاماكن اللى فيها وصلات يقدروا يعرفوها وممكن يخلوهم يشتركوا في سرعات اكبر لتوزيعها على المشاركين

لكن الحل بتاع تحميل الجميع المشكلة ده حل العاجز اللى بيستسهل ويستهبل علشان يقلب جيوب المشتركين

ح نلغي اشتراكاتنا وخليهم بقى يعملوا على الخطوك شوربة لسان عصفور وبالهنا والشفا ويشوفوا ح يدفعوا مرتبات موظفيهم منين

Kalimalhus said...

mtalaat
-------
كلامك صح لكنه لا يبرر القرار..

1 - الحدود المقررة ضئيلة بحيث سيتضرر منها عدد كبير من المستخدمين يتخطى أصحاب الوصلات..

2 - القرار يخل بإلتزامات الشركات تجاه عملائهم بدون مبرر .. بمعنى أن العميل الذى لم يخرق شروط تعاقده يعامل مثل من خرق هذه الشروط.

3 - القرار يمثل تكاسلا من قبل الشركات عن مواجهة ظاهرة الوصلات فى حين أن بإمكانها إكتشافها و التعامل مع أصحابها دون التعرض لغيرهم..

مواطن مصري said...

شوفي الفيديو دة

http://www.youtube.com/watch?v=hIiIwbpTOkk

هتلر و أزمة الانترنت المحدود في مصر

عمرو said...

ياريت تزورى اللينك ده يا نواره
http://mosh3arfa7aga.blogspot.com/2009/08/blog-post_10.html

Unknown said...

ادي احنا ثرنا وقفلنا الراوتر
ايه بقى؟

مواطن مصري said...

طب نعمل اية انا هيتخرب بيتي عااااااااااااااااااااااااا

فلاشاوي said...

أنتي طيبة أوي يا نوارة
:)

حسـّون الملعـون said...

يعني ايه ثورة انترنت؟

يعني حتضربوا عن استخدام النت؟

معقولة؟

طب عيني ف عينك يانوارة

@@

المشكلة ان الكلام سهل قوي, بس ساعة التطبيق ما تلاقيش ولا حد حيعملها

تخيلي فرضاو انا بقول فرضا, انك صحيتي من النوم في احدى الايام المشرقة وبعديها قعدتي على الجهاز وانتي ماسكة كوب القهوة الساخنة

وفجاة تلاقي ان مافيش كونيكشن بتاتا

يا الهي

ح يجرالك ايه ساعتها؟

بصراحة يا اخت نوارة, الكل اصبح مدمن انترنت وموبايل, واصبح من الصعب عليهم انهم يستغنو عنه

دول ممكن يستغنوا عن الاكل والجنس, لكن النت؟ مستحيل