Monday 3 August 2009

كام سؤال كده عشان مش قادرة امسك نفسي على ما ارجع بقى

ايه اللي وليد جنبلاط عمله ده؟
هههههههههههههههههه
لا حول ولا قوة الا بالله
احسن
----
ليبرمان طلع له علاقة بغسيل الاموال وبيع الكلاوي؟ اخصصصصصصصصص، امال عامل لي متدين ومتشدد كمان، هم المتدينيين المضروبين دول في كل حتة وللا ايه؟
----
فيه حاجة في الاجزخانة اسمها زيت الحشيش، كويسة قوي لسقوط الشعر، قام ميدو جاب لي لنك بيقول لي ان زيت الحشيش ممكن ينضرب بس عموما اللي باجيبه مش مضروب (مالوش ماركة، اسمه زيت الحشيش في ازازة كده تقرف الكلب الحزين، والزيت اخضر غامق قوي)، وبعدين من ضمن الحاجات اللي بعتها لي ميدو واحد شيخ سعودي بيقول على زيت الحشيش حرام!!!!!!! حرام نحطه على شعرنا!!!!! طب انا افهم واحد حشاش يقول كده: "نسوان مخها فاضي صحيح؟ بقى يحطوا نعمة ربنا على شعرهم عشان يطول؟ حلال ده وللا حرام؟ ما انشالله عنه ما طول، ما يحلقوا نمرة واحد، يعني انا لما الفلوس تقصر معايا اروح احرق شعر مراتي واشمه؟"
لكن شيخ بيقول كده ليه؟ ده زرع، يعني اكيد ربنا خلقه لسبب، واكيد ما خلقوش عشان الناس تشربه، يبقى فيه فايدة تانية، يعني لما نستخدمه للفايدة اللي ربنا خلقه عشانها يبقى حرام؟
انا الحقيقة اول ما اشتريته ما خطرش في بالي انهم يقصدوا الحشيش الحشيش، افتكرته النجيلة، بس اللي فهمته من الشيخ السعودي انه الحشيش الحشيش وقال ايه، زيت الحشيش في حكم دهن الخنزير والميتة!!!!
طب الشيخ ده لما بيتعور ما بيحطش سبرتو على الجرح؟ ده فيه مشكلة في المخ على فكرة، مش حكاية تشدد
بس حلو اشتروه يا بنات، بيطول الشعر وبيمنع سقوطه
(نعتذر للاخوة الرجالة عن حديث ربات البيوت المفاجئ)
بركات طالبان دي، انا والله باحبهم من زمان، من قبل ما يساعدوني ان شعري ما يقعش
-----
فيه بني ادم ما بيحسش وما عندوش دم، بس ربنا مديله نباهة في مخه، دحيح يعني، زي الكمبيوتر كده
وفيه بني ادم مش نبيه ولا حاجة، وممكن يبقى ما بيفهمش خالص، بس عنده دم وبيحس
(فيه ناس بتحس وبتفهم بس دول زي زيت الحشيش اللي مش مضروب، ناااااادرين جدا)
اهو اللي ما بيحسش تعرف تفهمه، اللي ما بيفهمش تعرف تحسسه
لكن اللي لا بيحس ولا بيفهم ده عايش ليه؟ حتى لما ينضرب مش ح يحس غير الوجع الوقتي وبعد شوية لا ح يفكر: هي الناس ضربتني ليه؟ ولا ح يحس ان كرامته واجعاه
طب ده عايش ليه؟ اه، عايش عشان الناس تقول له: الله.. بصوا الراجل ده، لا بيحس ولا بيفهم... ياااااه سبحان الله
-----
اسيبكوا واكمل اللي ورايا

14 comments:

دودو said...

يانهار ابيض على وليد جنبلاط
اية الراجل دة
دة مابيونش دة خيلنى ياختى من اليمين للشمال
ومن الشمال لليمين فية اية
_____________

زيت الحشيش دة كويس اجيبة على ضمانتك شوفتى اهى دى فايدة الشيوخ اياهم يعنى انا مكنتش اعرف انة فية حاجة اسمها زيت الحشيش اصلا
___________
وربنا يكفينا شر اللى بيفهم ومش بيحس

مهندس مصري بيحب مصر said...

شوفي التدوينة دي مهمة جداً
http://mylifeflavor.blogspot.com/2009/08/blog-post.html

Empress appy said...

كنت هقولك مفيش زيت حشيش ده مضروب لو بتجيبى كويس قوليلى منين
اختك ام جلمبو نايم على جميو انا بحبك اوي وبحب البورنامج بتاعك ده بصراحه
انتى على فكره بقي غلسه حضرتك دي اسئله دي اسئله
اللى مبيحسش يمكن جسمه كده الجلد طبقات برضه يا ستو هانم قدري دي مع السلامو عليكو

Love-Guru said...

سؤال برئ... لما استعملتي زيت الحشيش اللي مش مضروب حسيتي بحاجة ؟ يعني حسيتي انك مبسوطة شوية و مزاجك عالي ؟ السؤال مش هزار لان فيه دواء لمنع سقوط الشعر اسمه "مينوكسديل" و يتم امتصاصه من فروة الشعر الي داخل الجسم. هذا المينوكسيديل ممكن يخفض ضغط الدم اذا استعمل بطريقة مبالغ فيها. الخلاصة ان ممكن دواء يوضع علي فروة الرأس و يتم امتصاصه و يكون له اعراض عامة. في ضوء هذه المعلومة هل يكفي هذا لتحريم استخدامه؟ هنا اقف لاقول لا أعلم

احمد سعيد said...

بس احب اوضح حاجه

زيت الحشيش بتاع الشعر غير زيت الحشيش بتاع الضرب

الزيت بتاع الشعر بيستخرج من اماكن معينه فى النبات , ومبيكونش فيه المادة الفعاله اللى بتسطل

اللى هى التتراهيدروكنابينول


اما زيت الضرب فبيستخرج من اماكن تانيه ودة بيكون فيه المادة الفعاله دى


زيت الحشيش الاولانى مستخدم على نطاق واسع فى دول الخليج وعلى حسب كلام الخليجيات بيقولوا انه كويس جدا للشعر

بل انهم كمان ساعات بيطبخوا بيه


الزيت التانى دة بقى اللى بمادة فعاله بتتخلط كميات قليله منه بكميات كبيرة من عجينه معينه وبتتباع بشكل الحشيش اللى احنا عارفينه


يعنى مافيش علاقه بين الاولانى والتانى خاااااااااااااالص
غير الاسم

وبعدين سيبكم مش كلام مشايخ عاصفه الصحراء دول

اذا كانوا حرموا اهداء الورد

طب دول منتظرين منهم ايه تانى


اللى عاوز يضرب يضرب
سواء على شعرة او فى جوينتات

عالبركه


اى خدمه

احمد سعيد said...

بالمناسبه

زيت الحشيش اللى بيسطل
نادر قوى فى مصر وغاااااالى جدا

زيت الحشيش اللى مش بيسطل بقى
دة ناااادر فى الخليج نفسه
وغالى

فغالبا مش هتلاقوة فى مصر
ولو لاقيتوة فغالبا هيكون مضروب
او على افضل الاحتمالات هيكون مخفف جدا او مضروب بمواد تانيه

خلو بالكم بقى
علشان فروة الراس بتمتص بسرعه
ومبترحمش


العواف

Kalimalhus said...

وليد بك جنبلاط .. بيشم الريح رايح على فين و يفرد قلوعه مع اللى طريقه مفتوح .. أصلا لما تشوفيه تعرفى إنه مدقدق و إبن حنت و يعرف من أين تؤكل الكتف.. و هو بيتنطط على كتاف الناس و عمره ما إتزنق لوحده فى خانة دايما فى وسط شلة و له فى الشلة المقابلة أصحاب .. فاللى يغلب يا إما معاه يا إما مش هيضره..

و لا يلام من يلعب فى ملاعب السياسة إن كان حريف .. و هو هداف الدورى اللبنانى بدون منازع و لو وزنت اللى حواليه سياسيا تلاقيه أتقلهم و لا يضاهيه إلا صديقه نبيه برى و الباقى كلهم عالم مالهاش فى السياسة.. البعض تعففا زى حزب الله و البعض لبلاهة الثروة زى الحريرى جونيور و البعض لأحلام العظمة الموهومة زى عون و جعجع و البعض بإسم التاريخ اللى كان زى عائلات الجميل و فرنجية و معوض و غيرهم..

TAFATEFO said...

اللي حضرتك بتستخدميه ده زيت بذور الحشيش cannabis seed oil

وده للأسف لو بتشتريه زي ما حضرتك بتقولي كده بيبقى أغلبه مغشوش .. زيت بذور الحشيش الطبيعي بيتميز بكونه عالي البروتين وبيستخدم مش بس للشعر ده حتى لعلاج التجاعيد .. المشكله ان 99% من الرخيض الموجود في الأسواق هي مستحضرات بتزود الدورة الدموية الواصلة لفروة الرأس وبالتالي بتزود كثافة وطول الشعر لكن الشعر ده بيسقط لما توقفي الاستخدام

لو عايزه تجيبي الزيت ده فأي حد في أمريكا (يجيبلك) انما مثقيش في كل الموجود في الأسواق العربية .. عموماً علشان تتأكدي من النوع اللي حضرتك بتشتريه ممكن تدي لأي حد عينه يحللهالك ويعرفلك محتواها ويقولك ان كان زيت بذور قنب ولا لا

على فكره الزيت الحقيقي غالي .. والمستحضرات منه برضه غاليه مش رخيصه .. وإزازتها مش حقيرة أبداً

* هو علشان موضوع أمريكا حساس فممكن عليكي وعلى باكستان .. الزيت الطبيعي أصلاً بييجي من هناك لكنه غالي في المنطقه العربيه .. بحوالي 80 دولار .. لكن من باكستان أكيد أرخص

TAFATEFO said...

ده ملوش علاقه طبعاً بزيت الحشيش اللي بيستخدم كمادة مخدرة .. وطبعاً لا يمكن يكون هو لفرق السعر الخرافي

زيت الحشيش المخدر ده نحلقله كلنا أرحم من حكم الإعدام .. وطبعاً محدش هيشتري حاجه بملايين لشعره .. يحلقه أوفر برضه

وزيت بذور الحشيش وزيت الحشيش نادرين

* اللي يشتري من أمريكا يشتري زيت بذور حشيش وميسألش عن زيت الحشيش .. في باكستان بقى كل واحد حر

Unknown said...

هي ابي كانت بتسأل انا باجيب الزيت منين
من اجزخانة

اجزخانة المروة في عمارات المروة
يااااه
انا باقول اجزخانة
تقريبا انا اخر واحدة باقول الكلمة دي في البلد ما لاحظتش غير دلوقت

Sosso said...

انا كمان اقول اجزخانه

احمد سعيد said...

الله

انتى بتقولى اجزخانه ؟؟

هو انتى فيكى عرق تركى ولا ايه ؟؟

( لما استفزك شويه )



اصل دى كلمه تركيه
او مش تركيه بالظبط
هى من التركى المكسر المخلوط بعربى
اللى كان موجود عندنا زمان

زيها زى :

عرب خانه
كر خانه
شف خانه
جب خانه
سل خانه
انتيك خانه


___________________________--

مصطفى

ان كمان كنت واثق انه مستحيل يكون لزيت الحشيش الطبيعى وجود فى مصر

اذا كانت زيوت الشعر العاديه والرخيصه بتكون مضروبه

فما بالك بقى بزيت نادر زى دة

فى مصر , بلد الغش التجارى الاولى

Sosso said...

Ahou ya setti adini gebt el zeit beta3 el7ashish. Be 9,90 euro el 25 ml organic. el marra elgayya agy masr ageblik ;-)

ahmedyosry21 said...

tayeb !