الاستاذ روفائيل بولس بيرأس احد مراكز حقوق الانسان وفقا لما ورد في موقع العربية نت وماقالوش بالظبط انهي مركز بالظبط رفع قضية على سفارة الدنمارك لدفع تعويض 25 يورو لما لحق به من اضرار نفسيه وادبية من جراء نشر الرسوم المسيئة للرسول وكمان طالب بدفع تعويض لكل من شيخ الازهر والانبا شنودة بصفتيهما الدينية
ييجي واحد يقول لي وايه الاضرار النفسية والادبية اللي ح تلحق بروفائيل من شتيمة الرسول احنا ح نقرع؟ اقول له بص على التعليقات اللي جات على العربية نت وانت تعرف ايه الاضرار اللي لحقت بروفائيل كمسيحي مصري مالوش اي علاقة بالرسوم المسيئة
زي ان من مثلا واحد ازرق سايب له تعليق يقول له العب غيرها يا قبطي...هو تعليق ازرق ازرق بس بصراحة فطسني من الضحك
انا مش عارفة كل حاجة جاية عليا بضحك ليه؟ فلنائي لما قال هولوكوست ما اعرفش ليه افتكرت بتاع انا عتريس انا بلوة سودا اني ح اخد الاتاوة الطاق طاقين...حتى بصوا...وقعدت اضحك
لما كام واحد ازرق ساب تعليق غريب شبه احنا ما بناكلش من الكلام ده يا قبطي وح تتباس يعني ح تتباس ح نقفل الباب بالترباس وتتباس يا عباس برضه قعدت اضحك وفيه واحد سايب تعليق بيقول الراجل ده مجنون!!!!مجنون ليه؟
مش معنى ان الراجل مسيحي انه ينباساط ان دين غيره يتشتم خصوصا لما غيره دول يبقوا مواطنين عايشين جنبه لزق وممكن يفشوا غلهم - كالعادة - فيه هو لمجرد انه بخته ونصيبه خلاه يتولد مسيحي وياللمصادفة الدنماركيين كمان بيتولدوا مسيحيين وشيل بقى يا روفائيل
وواحد تاني سايب تعليق يقول هو طمعان في الخمسة وعشرين مليون يورو عشان يستخدمهم في التبشير: بس ده سعودي عشان كده خرج من الزرقان ودخل في منطقة السواد الغامق
مافيش غير واحد اردني قال لبتاع العب غيرها: شو ها التحليل السخيف
انا لو من روفائيل اطبع التعليقات دي واحطها امام عدالة المحكمة واقول له شوف الاضرار اللي لحقت بيا كمسيحي من جراء نشر الرسوم المسيئة
===
الا فيه واحدة ست مجنونة بتبرق عينيها بالجامد قوي وتفتح بقها على الاخر وهي بتتكلم اسمها وفاء سلطان طلعت في الجزيرة تهلوس هلوسات فوق الوصف، هي دي ايه؟
-----
وكمان بصوا على الخبر ده عند القهوة العالية
بقالهم مدة بيحضروا في الموضوع ده وانا عارفة من زمان بس ساكتة...عشان ماحدش يقول عليا فتانة وما بتتبلش في بقي فولة بس كنت كل شوية اخش عندها المدونة واقول لها ايه اخبار السيكو سيكو
على الله بقى ربنا يهدي الحال ويحمينا من البسوس اللي يتحطوا على الجرح يمدد ويصدد ويعمل خراج واهدوا شوية اهدوا..كل ده من ازمة الجواز والله
طب والله كمان مرة الفتنة الطائفية سببها ازمة الجواز...لو كل واحد اتجوز واتظبط ح يهدا
No comments:
Post a Comment