كان عبده البرماوي بوظهولي سأل شوية اسئلة لها علاقة بالطبيعة البشرية....مالهاش اجابة، مش عارفة اجيبهالكوا منين لانها كانت على الفيس بوك....بس انا بقى عندي اسئلة اكيد لها اجابة وشاغلة بالي من وانا صغيرة
زي مين يوسف افندي اللي اليوسفندي متسمي على اسمه؟
واشمعنى احنا بس اللي مسميين الفاكهة دي على اسمه وبقية الاخوة العرب مسمينه يوسفي من غير افندي وما حدش حاسس انه له علاقة بالاخ يوسف ده غير العرب بس؟ وسي يوسف ده اسمه ايه بالكامل؟
مين اول واحد قرر ان الستات عشان يبقى شكلها حلو لازم تحط فوق عينيها الوان؟ وليه ما فكرش ان الرجالة برضه يحطوا فوق عينيهم الوان عشان يبقى شكلهم حلو؟ وازاي اقنع الناس ان المنظر ده حلو؟
مين اول واحد قرر ان الستات لازم تطول ضوافرها؟ متهيالي دي واحدة جوزها كان بيضربها وطولت ضوافرها عشان تخربشه في وشه لما يضربها؟ طيب مين اول واحد قرر ان الستات لازم تحط في ضوافرها الوان؟ وازاي عرف يقنع الناس ان الضوافر الحمرا والبني والموف بيبقى شكلها حلو في ايد الستات؟ وليه ما يبقاش شكلها حلو في ايد الرجالة؟
مين اللي قرر ان الستات لازم تمسك شنطة والرجالة مش لازم يمسكوا شنطة؟
طيب مين اول واحد اخترع الشطاف؟ وليه ما حدش يعرف اسمه ولا بيحيي ذكراه مع انه اسهامه في الحياة البشرية اهم من اسهامات اينشتاين ونيوتن؟
انا فاهمة ليه البدوي كان بيوئد بنته، لكن ليه كان بيدفنها حية؟ يعني لو خايف ان قبيلة تغير عليهم وتاخد بنته تذلها وتمشيها المشي البطال وتجيب لابوها العار، ليه ما كانش مثلا بيكتم نفسها بالمخدة مع ان كان عندهم مخدة؟ ليه ما كانش بيطير رقبتها بالسيف؟ ليه يرميها في حفرة ويردم عليها ويسيبها تتعذب وقت طويل على ما تموت؟
ليه مراته لما جوزها وأد بنتها ما قتلتوش؟ طيب ازاي ما اتجننتش وهي نفسه واللبن في صدرها وبنتها موؤدة؟ طيب ليه اما انتحرتش؟ طيب ليه ما هربتش بولادها منه وغارت في اي داهية؟
مين الله يجحمه اول واحد اخترع الاحتكار؟ واساسا يعني جات له الفكرة الوسخة دي منين؟ وازاي الناس سكتت له؟ ليه لما قال للناس انا ح اكوش على كل حاجة وتبقى بتاعتي لوحدي ما حدش طير رقبته وموته وموت معاه اوسخ تعامل اقتصادي عرفته البشرية؟
ايه وجه الاضطرار في ان واحد يحتكر حاجة والتانيين يسكتوا له؟ الربا المقترض بيبقى محتاج الفلوس بشكل عاجل وعشان كده بيقبل...العبودية واحد ضعيف وقع في ايد واحد ابن ستين في سبعين يبيع ويشتري فيه...لكن الاحتكار ده فرد قصاد جماعة سكتوا له ليه؟
مين اول واحد طبخ الملوخية؟ ويا ترى قولونه كان معمول من حديد وللا جبس؟
ايه اول كلمة قالها الانسان الحجري؟ دادا وللا ماما وللا باب؟
وعلى اي اساس اختلفت اللهجات؟ وايه اللي يخلينا احنا نتكلم عربي وغيرنا يتكلم ماوماو مثلا؟ اشمعنى يعني؟ هو فيه لغة اسمها ماو ماو؟
ليه سامح سر الختم ابوه اسمه سر الختم؟ وللا ده اسم العيلة؟ وليه العيلة اسمها سر الختم؟
ليه العز بن عبد السلام قال على المماليك انهم عبيد وهو عارف ان استعبادهم غير جائز شرعا لانه لا يجوز استعباد المولود حر ولا يجوز استعباد الاطفال الا المولودين لاسرة عبيد ناهيك عن خطف الاطفال وترويع الآمنين؟ وليه بدل ما يطالب اللي خطفهم واستعبدهم بدفع تعويضات لهم باعهم وذلهم وكأنه بيعايرهم بحاجة هم مالهمش ذنب فيها؟ وكان يبقى احساسه ايه لو ابنه اتخطف واستعبد في بلد تاني؟ وليه الناس بتحبه وبتقول عليه راجل كويس؟ لمجرد انه جريء يعني؟ طيب واضح ان الجرأة دي كانت ببلاش بدليل ان السلطان استجاب لطلبه ووقف جيشه يتباع ويتذل قدام الناس مع ان السلطان ده كان المفروض يتشنق انه يعمل في اطفال كده ويستعبد ناس مولودين احرار
مين اللي اخترع فكرة الدولة؟ مينا موحد القطرين؟ ما اعتقدش اظن ان حد قبليه اخترع الفكرة الوسخة دي....آه فكرة وسخة عشان بسببها الحروب المدمرة قامت لو كنا فضلنا قبائل كان زمان الحروب خفافي خفافي
مين اول واحد اخترع العنصرية؟ وازاي عرف يقنع بيها عدد كبير من الناس؟
ليه اول واحد استعبد ما قتلش اللي استعبده؟
ليه الرجالة بيبصوا على رجلين الستات؟ وايه علاقة الرجلين باي حاجة؟ وليه الستات بتبين رجليها؟ عشان الرجالة يبصوا صح؟ طيب بتزعل ليه لما حد بيبص؟
مين اللي اخترع الرقص البلدي؟ طيب مين اللي اخترع الباليه؟
ومين اللي قرر ان الرقص البلدي رقص واطي والباليه رقص راقي؟ عشان في الباليه الستات بتمشي على طراطيف صوابعها؟ طيب ليه الرجالة اللي بيرقصوا باليه بيلبسوا شراب كولون؟
مين اول واحد قرر ان الستات تطلع تصوت والرجالة تطلع تجعر وسماها اوبرا وانبسط بيها وازاي اقنع الناس انها حلوة؟ ولحد النهاردة كمان؟ وازاي بيمسكوا نفسهم ومش بيضحكوا؟
ليه قدماء المصريين قبلوا بفكرة الفراعنة؟ وليه ماحدش فيهم طمع في انه يبقى ريس نفسه؟
مين اول ممثلة عيطت من غير جلسرين؟
وازاي الممثلين بيعيطوا بجد وهم عارفين انهم بيمثلوا؟
وازاي اللي يعرفوهم في الحياة الشخصية مش بيخافوا منهم ليكونوا كدابين؟
مين اللي اقنع الافريقيات انهم يفردوا شعرهم؟
وجات فكرة فرد الشعر منين؟
مين اللي قرر ان اللون والملامح الاوروبية احلى من اللون والملامح الافريقية؟
ليه الكوريين كلهم مؤدبين قوي كده؟ امهاتهم بتربيهم ازاي؟ وليه بتوع شرق اسيا عاملين فيها الغامضين ومش عايزين يقولوا بيربوا عيالهم ازاي عشان احنا كمان نطلع عيالنا مؤدبين زيهم؟
مين اول واحد خمر الخمرة؟ واللي شربها لما لقى طعمها وحش ولقى نفسه مهزأ وبيطوح الحكاية عجبته ليه؟
ليه الهنديات بيغنوا كده؟ وليه فيه كذا مغنية هندية مع ان كلهم صوتهم واحد؟ وازاي الهنود بيميزوا مغنية من التانية؟ وازاي بيغنوا بالطبقة دي وزورهم مش بيوجعهم ولا حنجرتهم بتتشرخ؟ وايه الحلو في السرة عشان يبينوا سرتهم؟
مين اول واحد روض الخيل مع ان الحمار الطف وبيسمع الكلام اكتر صحيح الحصان اسرع بس هو مستعجل على ايه يعني؟
مين اللي اخترع فن الاغراء؟ وليه الناس مش بتضحك لما بتشوف واحدة بتعمل اغراء مع انها حاجة تضحك قوي؟
ليه الصينيين واليابانيين بيكتبوا كده؟ وازاي عرفوا يحفظوا الحروف دي؟
هي عايدة الايوبي راحت فين؟
ليه فيه جوازات سفر؟ وليه قوانين الاجرام بتركز على الانتقام من المجرم مش على اصلاحه مع انهم بيكدبوا علينا وبيقولوا انهم بيصلحوه؟
ليه السياسيين معظمهم كدابين؟ ولما بيحس انه كداب ليه مش بيبقى مكسوف قدام نفسه؟
ليه الاطفال في الشارع بيعذبوا القطط والكلاب ويضحكوا؟
ليه الكاكا اسمها كاكا؟
ليه الستات بتفرح لما راجل يجيب لها جثث الورد ويسميه بوكيه؟ ده جايب لها حزمة قتلا مساكين هي فرحانة ليه؟
ليه البني ادم شايف ان من حقه ياخد جلد التمساح وجلد التعبان ويروح لهم يرازيهم في الغابة من غير ما يعملوا له حاجة؟
ليه الفيجيتاريان (اللي مش بياكلوا لحمة يعني) بيقولوا على اللي بياكلوا لحمة انهم متوحشين عشان بيدبحوا الحيوانات مع انهم بيقتلوا الزرع ويغلوه في المية بنفس الوحشية اللي احنا بندبح بيها الحيوان؟ وللا عشان الزرع مش بيقدر يعبر عن نفسه؟
ليه واحنا صغيرين كنا بنسمع في الافلام: مع سبق الاصرار والترسب بدل والترصد؟ زي سعد نبيهة بالظبط
اللي كانت بتغني اني خضرا راحت فين؟
ليه بطلوا يذيعوا اغنية: رجالة وطول عمر ولادك يا بلدنا رجالة؟
ليه اوزوريس بطل مع ان كل دوره في القصة انه مات قبل ما القصة تبتدي وايزيس هي اللي عملت كل حاجة؟
No comments:
Post a Comment