Thursday 31 May 2007

هتغني يا منعم

تصحيح
اتصلت بأحمد حلمي انهاردة قال لي ان منعم مش في اسكندرية, و ان اخر ما بلغه انه ح يترحل على أمن الدولة و من هناك ح نعرف ح يعملوا فيه ايه
بركات كأبتك يا أسد
===================================
التدوينة دي أنا باعتها ع الموبايل لمريم عشان تحطها ع المدونة ؛أصلي في اسكندرية بأحضر مؤتمر المخطوطات
المترجمة
و ماعنديش لاب توب, ده بس عشان اللي بيعايروني بقسط عربيتي يلاقي حاجة كمان يعايروني بيها
المهم اني بكتب دلوقتي و لسة عارفة من أحمد حلمي المحامي ان منعم في اسكندرية برضه بس في مؤتمر المدرية
بيستكملوا اجراءات الافراج عنه انشاء الله مريم أول صخص قالي الخبر نقلا عن جيمي,كلمت جيمي؛ أول مرة صوته
يبقى شبه رغاريد من الفرحة
ماصدقتش و اتصلت بأحمد حلمي اللي دلقني بدوره و ماردش, كلمت خالد البلشي و أسد اللي بدورهما رقعوا بالصوت
في ودني: بتتكلمي جد؟؟
قلت اتأكدوا و قولولي بعد شوية برضه خالد صوته قلب زغاريد و هو بيأكد لي الخبر أما الأستاذ أسد كلية النكد قسم
اكتئاب فقال: استني متفرحيش أما نشوف بس أمن الدولة ح يعملوا ايه ! ثم انت باعته لي تقولي أنا بدعي و دعوة
المسافر مجابة؟!الكلام ده لما تبقي مسافرة الشيشان مش اسكندرية
طبعا شحنة الاحباط دي قلقتني و فضلت أرن على أحمد لحد ما فتح عليا: لسة هتأكد يا ستي. لما اتصلت بيه تاني و قال
لي انهم في اسكندرية, قلتله: و أنا كمان في اسكندرية ممكن.... قبل ماكمل قال: لأ في ناس موجودة و ح تقوم باللازم
الظاهر قلق مني عشان مؤتمر المخضوضات قالك دي غريبة الأطوار و ح تنقل دماغ العيال و كفاية اللي شافوه
هو انا قلت اني زهقت من حبسة منعم امتى؟ من كام يوم بس... يا سلام لو الحكاية كده بقى أنا زهقاتة من حاجات كتير
بس مش عايزة أفتكرهم دلوقت
النهاردة يوم ما فيهوش ليل.. الحمد لله

Sunday 27 May 2007

وقع بيان الحملة لمناصرة القدس

هذا بيان لمناصرة بيت المقدس
رجاء وضع توقيعك
اذا مش ح ينفع مش ح يضر يعني
وما اسمعش حد يغني لي النغمة الجديدة بتاعة
مصر بقت اوسخ من فلسطين
والمصريين عندهم مشاكل والكلام الوسخ ده
انا مش فاهمة هي الناس جرا لها ايه
اتجننوا وللا ايه
ح نبقى نتكلم في الموضوع ده بعدي
بس وقعوا دلوقت
وقعوااااااااا
اذا ما كانش عشان وحدة المصالح والمصير
غصبن عن بوز اتخن تخين
ويبقى يوريني نفسه
يبقى على الاقل عشان الانسانية
وللا حتى ما بقاش فيه انسانية؟

ابويا فتح مدونة

وطيعا ابويا بيعرف يرد ع التليفون الارضي
وبيعرف يحط المحمول على ودنه
لكن لا يعرف يطلب منه
ولا يعرف يقفله بعد ما يخلص كلام
وكان بينظر لي بإكبار وإعزاز وتقدير
لأني الوحيدة في العائلة المبجلة
اللي باعرف افتح الميل
وطبعا ما يعرفش اني تكنوفوبيك
واني باحتاس في الكمبيوتر
فاكرني مهندسة
قوم الواد جيمي اتلايم عليه
وح يبتدي يهز صورتي في عين ابويا
لانه اكيد بقى بابا ح يكتشف اني لامؤاخذة حمارة كمبيوتر
المهم ما تعرفش جرجر ابويا ازاي ع التدوين
مع اني ارمي نفسي في التدوين اه
لكن ابويا لا
ده انا افديه بروحي
وفيه واحد صديق قال لي ح تبقوا عيلة البلايجة
والناس ح تشتمكوا
وتقول دول بلايجة ولاد...كذا يعني
عموما اللنك بتاع مدونة ابويا اهو

هو منعم ح يطلع امتى بقى



انا زهقت
عايزة ادخل تاني ع المدونة بتاعته
واعرف منه الجديد
ولما تتبلبل الاخبار ادخل واسيب له في التعليق
سؤال عن حقيقة الخبر
ويرد عليا على طول بعدها بنص ساعة
عايزة ارجع تاني ابتسم من الاذن للاذن كل ما اخش على مدونته
واقول: يا عيني يابني...هو ما بيروحش بيتهم ابدا ده؟
وارجع اضحك قوي لما اقرا مدونته والاقيه عنده امل فظيع
ما يهدوش ندب واحدة يائسة زيي
انا شاكرة جدا للناس اللي بتكتب على مدونته
وبتجدد فيها الاخبار لحد ما يرجع بالسلامة
وشاكرة كمان للمدونين وعلى رأسهم منال وعلاء
ووائل ونورا واسد
عشان اللي عاملينه عشان منعم
بس انا زهقت
عاملة زي العيل اللي اتاخد منه حاجة حلوة
وخلاص
ما بقاش بياكل من جمل التصبير اللي بتتقال له
ما بقتش بقى طايقة شكل منعم وهو في القيد
ولا طايقة شكل المدونة وحد تاني اللي بيكتب فيها
ولا طايقة عبارة: free monem
أنا اتعودت ان منعم هو اللي بيعمل الحملات دي
مش مفروض انها تتعمل له
كلامي اهبل وعيالي
عارفة
بس ده احساسي
وكمان حاسة انها نكتة بايخة
مقلب حد عامله فيا
كابوس مزعج
وخلاص بقى
كفاية كده
وبعدين هو قاعد ازاي كده
ده لما كان برة ما كانش بيقعد
على طول ناطط في كل حتة وبينقل لنا اخبار عبر المدونة
على فكرة انا عمري ما قابلت منعم شخصيا غير مرة
في ندوة التعذيب وما اتكلمناش
بس هو كده يعني
هو المفروض ان منعم هو المدونة والمدونة هي منعم
هو المفروض انه بيروح في كل حتة ويجي يقول لنا
هو المفروض انه بيعمل حملات وينبهنا لها
ايه ده بقى اللي حاصل ده؟
انا مش عايزة كده
يا اما الايام اللي منعم محبوس فيها تمشي بسرعة
يا اما نعمل
rewind
وكأن الايام دي ما جاتش ابدا
منعم جد قوي
مدونته قصدي
مش جد يعني دمها تقيل
بس جد يعني بجد
بجد زيادة
بس انا بقى مش عايزة حبسته دي تبقى بجد

Saturday 26 May 2007

لأقدم مهنة في التاريخ

عندي واحدة صاحبتي دايما تبص لي وتقول انا منصابة في صحابي
الحقيقة انا كمان منصابة في صحابي
واحدة صاحبتي اتقدم لها عريس وقال لها: طبعا انت عارفة الحياة تعاون
قالت له: اه طبعا
قال لها: كويس...مرتبك كام بقى؟
البت جالها ذهول قالت له: ايه ده ايه ده..على طول وش كده؟ طيب
العب بعواطفي واضحك عليا وقول لي بحبك واتجوزني وخد فلوسي
كده يعني
واحدة تانية معرفة مش صاحبة
قال لها العريس: طبعا انا ظروفي المادية مش قد كده والبلد مافيهاش شغل
ها-
انت عارفة طبعا ان كل ست محتاجة لراجل...انا اقوم بواجباتي الزوجية وانت تصرفي والمليان يكب ع الفاضي-
قالت له: وبالنسبة للاعمال المنزلية؟
قال لها: والله انا ماليش فيها بس ممكن اساعدك ولو اني افضل انك تجيبي حد يساعدك في البيت
قالت له: وده برضه ح يبقى على حسابي برضه.. آه....طيب وحضرتك يعني الساعة بكام؟
نعم-
الساعة...الساعة بكام...اصل انا معروض عليا حاجة حلوة قوي وعليها خصم واوفر...اأجر ساعة اخد عليها ساعة تانية مجانا وممكن لو الخدمة ما عجبتنيش استرد فلوسي
ايه ده انت بتتريقي عليا؟
لا طبعا
آه باحسب
اول مرة في حياتي اسمع تعبير "اقدم مهنة في التاريخ" كنت في ثانوي وسمعتها في فيلم ايس كريم في جليم
وما فهمتهاش...بس لما عمرو دياب قالها لسيمون هي زعلت وانا ما فهمتش ليه هي زعلت وسألت صاحبتي اللي قاعدة جنبي: هي ايه اقدم مهنة في التاريخ دي؟
قالت لي: الصيد
قلت لها: طيب ودي تزعل في ايه؟
قالت لي: يمكن عشان من غير شهادات؟
لما كبرت شوية فهمت يعني ايه اقدم مهنة في التاريخ
مش ده موضوعنا
موضوعنا إن الستات لما هم اللي كانوا بيشتغلوا اقدم مهنة في التاريخ
كانوا بيبقوا مكسوفين ومكسورين ومنبوذين وحالهم بالبلا
وعمر ما واحدة منهم حسست "الزبون" انها بتعمل فيه جميلة
كمان لما كان زماااااااااااااان الرجالة بيدفعوا مهر وشبكة ويجيبوا البيت ويجهزوه ويصرفوا على العيلة
كانت يا عيني الست تبقى قاعدة في البيت تكنس وتمسح وتطبخ وتخبز وتعمل مربات ومخلل وتدمس فول
وحتى تدبح الفرخة في البيت احسن من دبح الفرارجي وتخيط الهدوم وفيه ستات كانت بتخيط الشنط والملابس الداخلية وتخلف وتربي العيال
وهو يرجع من الشغل زي اللي راجع من فتح مكة: فين الاكل انا راجع من الشغل..عايز ارتاح انا راجع من الشغل...مش عايز دوشة انا راجع من الشغل
وهي لانها ما كانتش بتشتغل كانت فاكرة ان الشغل ده زي اختراع المفاعل النووي: اما الحق اخلص الاكل قبل ما الافندي بتاعي يرجع يا قلبي من الشغل بيرجع هلكان
وسعادة الهلكان يرجع يقعد كما الشلتة في البيت...اصله راجع من الشغل
وهي بتشتغل من طلعة النهار لحد بالليل عشان تخدم اللي راجع من الشغل وفاتح البيت
لما الستات اشتغلوا اكتشفوا ان الشغل ده ماهواش نكتة ولا حاجة
وإنه أرحم بكتييييييير من هلكة غلي الهدوم وخبز العيش وتفصيل الملابس الداخلية
يعني ماهي بترجع من الشغل طرزان تطبخ وتنضف وتذاكر للعيال
وهو هو: كما الشلتة في البيت...اصله راجع من الشغل
طيب ما انا راجعة من الشغل
اشمعنى انت
اشمعنى انا؟
طيب بقى مافيش شغل
وكل واحد يعمل شغلانة
انا ذكر النحل
وانت الشغالات
بس الخلية بتاعتنا مافيهاش ملكات
فيها شغالات
متخلفات
حتى ما بيطلعش من كمهم يموتوا الذكر
عشان ما يعملش زحمة في الخلية
صدق اللي قال:
سيد الحبايب يا حنانا ننا
وسيد الحبايب بيتعامل زي ما ست الحبايب ربته
ازاي بقى ربته؟

Friday 25 May 2007

رسالة وصلتني هامة جدا جدا جدا جدا

كتبها محمود الزهيري
ولم تكن واضحة في البداية وطلبت منه إعادة إرسالها
رجاء قراءتها بعناية كلمة كلمة
:إليكم الرسالة
حقائق الدين : بين البول المقدس والنخامة ورضاع الكبير
محمود الزهيري
mahmoudelzohery@yahoo.com

مشايخ الندم , وعلماء العدم , أقوالهم سفاهات , وكلامهم خيابات , نطقهم جهلاً , وسكوتهم نعماً , ليتهم ماكانوا بيننا , وليتنا ماكنا بينهم , أرادوا لنا التخلف , فكان مقصدهم لذلك سهلاً ميسوراً , وكانوا قيادات في الجاهلية , فاتبعهم الملايين , وكأنهم عميان يساقون إلي مذبحة , ولما لا , فالعقل متغيب عن عمد , والحكمة ضائعة في دروب الجهل , وعمارة الآخرة أولي وأجدي من عمارة الدنيا , فكان أن أفهمهم مشايخ النكد , وعلماء الجهالة , أن إرادة الله سخرت الكافرين , والمشركين من الديانات الأخري , ومعهم الكفار والملاحدة ليعملوا من أجلهم فيخترعوا لهم مايوفر لهم سبل الرفاهة , وأساليب التنعيم , وطرائق الرفاهية , فكانت أن اصبحت تلك عقيدتهم , وذلك دينهم , وهذا ديدنهم , بعد أن فرغت عقولهم سوي من النجاسات , و الخيابات , فكان أن تفرغوا للعبادة حسب مفهومم المتخلف , وكانت عبادتهم تصب حصيلتها في حصالة الحسنات , فكان لهم أن تمنوا علي الله الأماني , وعبدوه علي الآلة الحاسبة التي يعدوا عليها الحسنات ليل نهار , دون أن يكون من ثمة عائد علي المجتمع من عباداتهم , فكان أن إنعزلوا عن الناس , وخالفوهم , وتخلفوا عنهم , فكان لزاماً من تكفيرهم , ولعنهم , وإتهامهم بالخرافات , والخزعبلات , والبدع , فكان هؤلاء الناس , لابد أن لايتعلموا طباً , ولا يفقهوا صناعة , ولاتنفع معهم صيدلة , أو فن زراعة , فكانوا يبحثون عن خيبتهم في تخلفهم في الطب والصيدلة , فكان لهم ما أسموه بالطب النبوي , أو الطب الإسلامي , وكأن في مجتمع الرسول كانت توجد بدائل طبية , كان الرسول يتخير منها , حسبما يترائي له , أو كأن الطب الذي أسموه طباً نبوياً , أو طباً إسلامياً , هو من إلهامات الوحي , ومن إبداعات الرسالة , أو كأن هذا الطب لم يكن مرتبطاً بالبيئة , وكان لم يشترك في العلاج والتداوي به , أبا جهل , وأبا لهب , وأبي بن خلف , وعبد الله بن أبي بن سلول , وكأنهم لم يشتركوا في التطبب والتداوي بأعشاب البيئة التي كانت ميسورة لهم جميعاً وتحت أيديهم حتي يقال أن هذا طب نبوي , أو طب إسلامي, وكأن هناك في المفهوم طب يهودي , أو طب مسيحي , أو طب بوذي , أو طب هندوسي , أو طب زرادشتي , أو طب وثني كافر , إن المسلمين الجهلاء المتعصبين لايستحون من تخلفهم , ورجعيتهم عن الشعوب والأمم التي أخذت بأسباب العلم , والطب , والحضارة , لدرجة أنهم أصبحوا عالة علي الشعوب والأمم التي يرموهم مع ذلك بالكفر والوثنية , والجاهلية , بالرغم من أنهم هم من يستوردوا منهم الغذاء والدواء والكساء , والتكنولوجيا العصرية المكتقدمة , ووسائل الترفيه , وأدوات الرفاهية التي تيسر لهم المعيشة , ومصاعب الحياة , بداية من إبرة الحياكة , حتي الطائرة , والصاروخ ,ومع ذلك كان هاجسهم الأكبر , التوحيد , والجنس , ومابين التوحيد , والجنس , كانت كل الجماعات المتخلفة , ترتعب من ذكر إسم المرأة , وكان هاجس الشرك , مرعباً لهم , فخلقوا لأنفسهم منطقة منعزلة عن الناس , وجعلوها أرضاً حراماً , لايصح لأحد أن يطؤها إلا إذا كان , فقهه فقهاً مرتبطاً بفقه النساء , وفقه التوحيد !!
فالمرأة كلها حرام , والنساء ملاعين , ترتبط بهن مكائد الشيطان , وهن مصائد الشيطان , فكلهن عورة , وكلهن لايصح لهن أن يخرجن من بيوتهن إلا مرتين مرة من بيت الأب لبيت الزوج , والأخري من بيت الزوج لبيت الدود والتراب , أقصد بيت القبر !!
وما الحل وقد تغيرت الحياة , وتقدمت طرق المعيشة وأسباب الحياة , فكانت المرأة تخرج لتلقي العلم فتدرس الطب , أو الصيدلة , أو اساليب التربية , أو القانون , لتكون طبيبة , او مهندسة , أو محامية , أو عالمة في الكيمياء والفيزياء , ومن ثم تلتحق بوظيفة من الوظائف فتخرج للعمل , وخروج المرأة للعمل في نظرهم جريمة ترتكبها المرأة , وخاصة إذا خرجت متعطرة , فهذا محرم عليها , إذ يتوجب عليها أن تخرج متتفلة , ذات رائحة كريهة , مصنوعة من خلاصة دورات المياه , والصرف الصحي , أو البرك , والمستنقعات ذات المياه الراكدة الآسنة , حتي تنفر منها , ومن رائحتها الرجال !!
حتي أن أحد أساتذة علم الحديث و هو أستاذ ورئيس قسم الحديث في جامعة الأزهر يفتي بفتوي لها قدر من الغرابة , بل من الرعب والجهالة, لأن من قال بها أستاذ ورئيس قسم الحديث في أعرق جامعة إسلامية , وليس داعية دعي , أو فقيه متفيهق , أو عالم متعالم , فهاهو يقول لإحدي النساء , حينما تسأله عن الخلوة في العمل , وهذا أمر بالنسبة للمفاهيم الدينية المغلوطة أمر محرم , يستوجب عقاب الله في الدنيا , وعذابه في الآخرة , يقول لها , عليك أن ترضعيه , حتي يصبح محرماً عليك , وعندما تختلي به , فإن أسباب الخلوة المحرمة بالتبعية تزول , وتنتهي أعراضها , وتموت آثرها وقد كتب نبيل شرف الدين في الدستور المصرية العدد 114 : إذ قال : كما يحدث عادة في مصر بعد وقوع الكارثة أو لنقل سلسلة الكوارث أصدر الدكتور محمد سيد طنطاوي شيخ الأزهر قراراً بوقف الدكتور عزت عطية عن العمل وتحويله إلي التحقيق وذلك رغم تراجعه عن الفتوي الإستفزازية التي إشتهرت بإسم إرضاع الكبير والتي أطلقها عبر الصحف والفضائيات , وأفتي فيها بجواز إرضاع المرأة زميلها في العمل , حتي تصبح أمه في الرضاعة , وبالتالي تجوز الخلوة الشرعية , بينهما إذا إقتضت ظروف العمل تلك الخلوة , ولم يتوقف الأمر عند هذا الحد , بل ذهب عطية إلي ماهو أبعد , إذ طالب بتوثيق واقعة الإرضاع عبر عقد يسمي عقد توثيق الإرضاع , وينص فيه علي أن فلانة أرضعت فلاناً , ونشهد الله علي ذلك , ثم يوقع الشهود علي ذلك , هذه الفتوي ليست الوحيدة من نوعها , فقد نسب إلي الدكتور علي جمعة قوله أن الصحابة كانوا يتبركون بشرب بول الرسول صلي الله عليه وسلم , وأنه أورد هذه الفتوي في كتاب الدين والحياة والفتاوي العصرية اليومية , الأمر الذي أثار إستهجان العديد من المعلقين في الصحف , وهاجموه بشدة , أما مافعلته دار الأفتاء المصرية في سياق ردها علي فتوي البول , انها أصدرت بياناً أكدت فيه , علي أن طهارة رسول الله صلي الله عليه وسلم في الظاهر والباطن , هي محل إجماع بين الأمة , مشيرة إلي أن البعض يري أن هذه الطهارة لجميع الأنبياء !!
وهذا هو رأي الأزهر الشريف وعلماؤه في بول النبي ذلك البول الذي جعلوه مقدساً , لدرجة أن الصحابة كانوا يتبركون بشربه , وللأسف الشديد فإن المؤسسة الأزهرية توافق علي أن يكون بول الرسول بولاً مقدساً , ومن ثم من الممكن أن يتطرق الأمر لو تم ذكر براز الرسول الأطهر فسيكون برازاً مقدساً !!
ولاندري ماهذه الخرافات التي تجعل أمر الدين الإسلامي علي درجة خطيرة من التفير منه , في وقت تشتد أزمات الناس , وتختنق حرياتهم موتاً , وتضيع حقوقهم سديَ , وهباءاً منثوراً , ويضيع البحث في أمور لاتنفع وإنما تضر الضرر البليغ الأثر في واقع المسلمين , وفي تأزيم الإسلام والتنفير منه !!
وعلي مسألة بول الرسول والتبرك بشربه لنا تساؤل :
أليس رسول الله صلي الله عليه وسلم , كان يتطهر , وهو الذي قال إن الله يحب التوابين , ويحب المتطهرين ؟!!
أليس هو القائل أرأيت لو أن بباب أحدكم نهراً يغتسل منه خمس مرات ؟!!
دليلاً علي الطهارة , ورمزاً علي النظافة !!
ألم يكن رسول الله صلي الله عليه وسلم يتوضأ حينما كان يتبول أو يتغوط ؟!
وإذا كان بول الرسول مقدس , وبرازه طاهراً , فمن ماذا كان يتوضأ ؟!!
هل كان يتوضأ من طهارة ؟!!
وإذا كان الإنسان يتوضأ من بوله , أو من تغوطه , وهذه مسألة ظاهرية , فإذا شرب بولاً , كيف يكون تطهره ؟!!
بل هناك من يقول أن بعض الصحابة شربوا من دم رسول الله النازف من الحجامة , وقالوا عن هذا الدم أنه ليس بفاسد , وإنما دم مقدس , وتسابق الصحابة إلي شرب دم الرسول الناتج عن الحجامة !!
يل وهناك حديث النخامة , التي جعلوها نخامة مقدسة أيضاً , وكأن الدين الإسلامي مقصوراً علي البول , والنخامة , والدم , والنجاسات , بول الإبل , والحيض والنفاس !!
بل , وكأن هذا مخطط مدروس حتي يأنف الناس من الإسلام ونبي الإسلام , وقصر الدين الإسلامي علي أبواب بعينها , حتي أصبح المسلمين من رموز التخلف , والجهالة , واصبحوا في ذيل الأمم في الحضارة , والمدنية , وكأن هناك حالة عداء تام , ومستحكم بين الإسلام وبين العلم , والتحضر والتقدم , والأخذ بأساليب , وأسباب الحياة الحضارية , والبحث في أساليب وأد\وات العلوم والتكنولوجيا الحديثة التي ترتقي بحياة الإنسان , وتأخذ بهم إلي عالم من السعادة والرفاهية حيث تكون الوفرة في الزراعة , والتقدم في الصناعة , مع أن هذه المسالك يرفضها ويأباها الدين الإسلامي , إلا أن المنتسبين للإسلام بالإسم يشوهوا الإسلام ويجعلوا منه رمزاً للتخلف والرجعية , لدرجة أنه لو تمت ترجمة هذه الفتاوي بلغات أجنبية وقرأها الأجانب لا ذدروا الإسلام , وحقروا من المسلمين , وكأن لسان حالهم يقول :
كيف حارب الإسلام الوثنية وعبادة الأوثان , ولسان حال المسلمين كأنه يقول : إننا صنعنا من الرسول العظيم محمد صلي الله عليه وسلم , وثناً يعبد , فتبركنا ببوله , ودمه , ونخامته , فشربنا بوله , تجرعنا من دمه , وإستلطفنا نخامته , وهاهو النبي يقول لنا : عليكم ببول الإبل , فاشربوه , ولاتتداوا من المراض !!
مع أن الإسلام يأمر بالتداوي والعلاج , والبحث عن أسباب الشفاء , والصحة والعافية , وهاهو الرسول محمد يقول : اللهم متعنا بأسماعنا , وأبصارنا , وقوتنا , ما أحييتنا .
وهاهو يستعيذ بالله من العجز , والكسل , والشح , والبخل , والفقر , وغلبة الدين , ويستعيذ من قهر الرجال .
واللافت للنظر في مسالة مفتي رضاع الكبير والذي أثار مشيخة الأزهر بقيادة سيد طنطاوي شيخ الأزهر فيما نقلته صحيفة الأهرام في صفحتها الأولي يوم 22 5 2007 : لا يمكن التسامح بشأن الدين خاصة في أمور الفتوي التي تؤثر بشكل خطير علي حياة الناس واتجاهاتهم ومواقفهم من خلال توجيه شعورهم الفطري الراغب في اتباع الحلال‏,‏ وتجنب الحرام‏,‏ لهذه الاعتبارات وغيرها‏.‏ جاء رفض المجلس الأعلي للأزهر برئاسة فضيلة الإمام الأكبر الدكتور محمد سيد طنطاوي شيخ الأزهر قبول اعتذار أستاذ جامعة الأزهر الدكتور عزت عطية رئيس قسم الحديث سابقا والخاصة بإرضاع الكبير لامتداد تطبيقها لعلاقة الزمالة في العمل خروجا بها عن نطاق الخلوة المحرمة‏,‏ وما أثارته من جدل وبلبلة في أوساط المجتمع كله في الآونة الأخيرة‏.‏ هذا ماجاء بصحيفة الأهرام

والمصيبة مازالت متربعة حتي في تناول المجلس الأعلي للأزهر للمسألة , وذلك في الرفض لفتوي الأستاذ رئيس قسم الحديث , إذ مازال المجلس الأعلي للأزهر برئاسة شيخه طنطاوي , وكأنه يؤكد علي حقيقة إرضاع الكبير , ولكن المتوجب أن لاتنسحب علي علاقات العمل في تطبيقاتها لعلاقة الزمالة في العمل , خروجاً بها عن نطاق الخلوة المحرمة !!
وكأن المجلس الأعلي للأزهر أراد أن يعالج الأزمة , فوقع هو ذاته في نفس الأزمة بإعترافه بمسألة رضاع الكبير , وكأن المسألة جائزة في كل الأحوال , إلا في حالات الزمالة في العمل فقط , وبذلك يقر المجلس الأعلي للأزهر هذه المسألة , وعلي رأس الأمر شيخ الأزهر !!
وإذا كانت هناك محاكمة فلا ينبغي أن يحاكم الأستاذ الدكتور رئيس قسم الحديث , وإنما يحاكم المجلس الأعلي للأزهر , وعلي رأسه الشيخ سيد طنطاوي , شيخ الجامع الأزهر وأن يعاقبوا جميعاً علي ضوء نص المادتين‏67‏ و‏78‏ من القانون‏103‏ لسنة‏1961 , ذلك القانون الذي سيعاقب به مفتي إرضاع الكبير الذي هو أستاذ الحديث ورئيس قسمه !!
وفي فتوي عن رضاع الكبير إستند البعض علي مجموعة من الأحاديث منها :
روى الشيخان و غيرهما عن أمّ المؤمنين عائشة رضي الله عنها أنّ النبيّ صلى الله عليه و سلّم دخل عليها و عنده رجل ، فكأنّه تغيّر وجهه ، كأنّه كرِه ذلك ، فقالت : ( إنّه أخي ) فقال صلى الله عليه و سلّم : ( اُنظُرنَ مَن إخوانُكُنّ فإنّما الرضاعة من المجاعة )

وروى الترمذي عن أمّ سلمة رضي الله عنها قالت : قال رسول الله صلى الله عليه و سلّم : ( لا يحرّم من الرضاعة إلا ما فتق الأمعاء في الثدي ، و كان قبل الفطام )

وما رواه مسلم في صحيحه عن عائشة رضي الله عنها أنّها قالت : جاءت سهلة بنت سهيل إلى النبي صلى الله عليه و سلّم ، فقالت : يا رسول الله إنّي أرى في وجه أبي حذيفة من دخول سالم و هو حليفه . فقال رسول الله صلى الله عليه و سلّم : ( أرضعيه ) فقالت : و كيف أرضعه و هو رجل كبير ؟ فتبسّم رسول الله صلى الله عليه و سلّم و قال : ( قد علِمتُ أنّه رجل كبير ) .
و في رواية عند مسلم أيضاً عن عائشة رضي الله عنها أن سالماً مولى أبي حذيفة كان مع أبي حذيفة و أهله في بيته ، فأتت ابنة سهيل النبي صلى الله عليه و سلّم فقالت : إنّ سالماً قد بلغ ما بلغ الرجال ، و عَقَل ما عقلوا ، و إنّّه يدخل علينا ، و إني أظنّ أن في نفس أبي حذيفة من ذلك شيئاً ، فقال لها النبي صلى الله عليه و سلّم : ( أرضعيه تحرمي عليه ، و يذهب الذي في نفس أبي حذيفة ) فرجَعَت فقالت : إني قد أرضعته فذهب الذي في نفس أبي حذيفة)
ويري البعض ومنهم الدكتورأحمد عبد الكريم نجيب
أن : هذا الحديث ظاهر في الدلالة على مذهب الظاهريّة في عدم التفريق بين الصغير و الكبير في التحريم بالرضاعة ، و لكنّه مُعارض بما تقدّم من أدلّة مذهب الجمهور ، و إذا كان القول به وجيهاً لذهاب أمّ المؤمنين عائشة رضي الله عنها إليه ، و لعملها به حيث كانت ( كما في سنن أبي داود بإسناد صحيح ) تأمر بنات أخواتها و بنات إخوتها أن يُرضِعنَ من أحبت عائشة أن يراها ، أو يدخل عليها و إن كان كبيراً خمس رضعات ثمّ يدخل عليها ، فإنّ هذا مخالف لما ذهَبت إليه بقيّة أمّهات المؤمنين الطاهرات رضوان الله عليهنّ أجمعين ، حيث لم يكنّ يُدخلن عليهن بتلك الرضاعة أحداً حتى يرضع في المهد ، و قُلن لعائشة : ( و الله لا ندري لعلّها كانت رخصة من النبيّ صلى الله عليه و سلّم لسالم خاصّة ، فما هو بداخل علينا أحدٌ بهذه الرضاعة ، و لا رائينا ) كما أخبرت بذلك أم سلمة فيما رواه عنها مسلم و غيره .و الظاهر أنّ لتخصيص الرخصة بسالم رضي الله عنه من دون الناس وجه من حيث اختيار معظم أمهات المؤمنين له ، و ذهاب معظم الصحابة و جمهور العلماء إلى القول به ، و هو المفهوم من ظاهر النصوص المعارضة لحديث سهلة بنت سهيل ، و لو كان الأمر على إطلاقه لشاع بين الصحابة الكرام فمن بعدهم من السلف ، و تعدّدت طرقه ، و رويت أخباره
ولكن بالرغم مما ورد في هذه الأحاديث والمرويات , التي لايمكن الإطمئنان إليها في مثل هذه المسائل الحساسة التي تثير في النفوس الرفض الكامل لمثل هذه المرويات ,نظراً لتناقضها الظاهر وعدم إستقامتها مع الفطرة السوية السليمة , وذلك في القول المنسوب للرسول أنه قال أرضعيه , وذلك القول الذي هو بمثابة أمر , وذلك لرجل بلغ مبلغ الرجال , وعقل ماعقل الرجال , ثم يصدر أمر الرسول بالإرضاع !!
وهذا بالرغم من قول السيدة عائشة : إني قد أرضعته فذهب الذي في نفس أبي حذيفة
فماهذا الذي كان في نفس أبي حذيفة , سوي الجنس , ومعاشرة النساء بالزنا المحرم , أو النظرة المحرمة التي هي رسول الزنا ؟!!
أم أن نفس أبي حذيفة كانت تضمر شيئاً آخر غير الجنس المحرم , ومن ثم كان أمر رضاعه أمراً طبيعياً ؟!!
وإذا كان أبي حذيفة رجلاً كبيراً طاعناً في السن , ومن ثم إنقطع عنه أمر معاشرة النساء , فلماذا يتم التخوف منه , ولماذ يتم الأمر بإرضاعه ؟!!
ولكن لنا سؤال آخر يكمن في أن مسالة الحرام , أو النظرة المحرمة التي شغلت مجتمع المسلمين منذ بدايات تكوين المجتمع الأول , وحتي الوقت المعاصر , تمنعها الرضاعة المشبعة , ليصير الإنسان محرماً علي المرأة ؟!!
ثم أليس النظرة المحرمة هي في الأساس محرمة سواء كانت هناك رضاعة , أو لم تكن ؟ ولماذا الإصرار علي مسألة الإرضاع هذه ؟!!
ولماذا الحديث عنها الآن ؟!!
وما القول في زنا المحارم الذي ترتكب جرائمه بين الأقارب ؟!!
هذا مانرفضه , ونذهب إلي أنه أمر ممجوج , ولايقبل به أحد حتي من مفتي رضاع الكبير ذاته , أو من أي إنسان يفتي بذلك و يبح هذا الأمر , وإلا نذهب إلي سؤاله بسؤال أحد المتهكمين علي مسألة إرضاع الكبير : من أنه مستعد أن يعمل خادماً لأحد المشايخ الذين يفتوا بإباحة وحل هذه الرضاعة , علي أن يقوم هذا الشيخ أو من يفتي بذلك بإرضاع هذا الخادم من زوجته , او أحد المحارم لها خمس رضعات مشبعات !!
فهل يقبل بذلك ؟!!
ثم لم يتطرق من أفتي برضاع الكبير , عن الشروط الواجب توافرها في مسالة الإرضاع !!
هل تكشف المرأة عن ثديها , ويرضع منه ذلك الشخص , واقفاً , أم جالساً , أم نائماً ؟!!
وهل يصح أن تكون الرضاعة في وجود محرم , أم أن هذا أمر عارض , وتصح بدونه ؟!!
وهل الخمس رضعات تكون مشبعات , وعلي مرات متتالية , أم مرة واحدة ؟!!
وماذا لو دخل أحد الأشخاص فجأة أثناء الرضاعة , ثم إتقطعت الرضاعة , هل تحسب رضعة , أم لاتحسب , ويتم إعادة الإرضاع من جديد ؟!!
أليست هذه سفاهات مشايخ وعلماء المسلمين الذين خلت عقولهم , وفرغت ألبابهم , وتفتفت تفاهاتهم , وسفاهاتهم ليقولوا بمثل هذه الأمور المخالفة للفطرة السوية النقية ؟!!
وعلي مقياس رضاع الكبير , نقيس البول النبوي المقدس , والنخامة النبوية المقدسة , والتداوي ببول الإبل المقدس !!
أليست مثل هذه الأمور تجعل كل المسائل والأمور الدينية مقدسة , ولم يبقي في نهاية الأمر مدنس إلا الإنسان , الذي كرمه ربه وإلهه سبحانه وتعالي , ولكن إرادة مشايخ الخيابات , وعلماء السفاهات , هم الذين أرادوا للإنسان المقدس , أن يكون في جميع أموره مدنساً ؟!!
من يرحمنا من السفاهات , والخيابات , وإن صح القول من السفالات ؟!!
وأين هي حقائق الدين المقدسة , والرائعة في تقديسها , وإحترامها لإنسانية الإنسان , وتقديرها لقيم الحرية والعدل , وحقه في الحياة الكريمة , بعيداً عن إجتهادات مشايخ ضلوا وأضلوا , وعلماء فسدوا , وأفسدوا , وتخلوا عن نضالهم من أجل سعادتهم في الحياة الدنيا , وأجلوا جنتهم , إلي حيث تكون جنة الآخرة , فصارت حياة الناس بؤس بوصاية مزعومة ليس لها صدي في حياة الناس , فكان هؤلاء المشايخ , وأولئك العلماء كمن ينادي , ولامستمع له , أو كمن يأمر , فلا مطيع لأمره !!
أرجوكم أين الإسلام يامن ضيعتموه ؟!!
فالذي تقدموه لنا ليس إسلاماً !!
فأين الإسلام الحقيقي ؟!!
أعتقد أن الإسلام الحقيقي تائه بين سفالات الساسة , وحماقات ذيول السياسة من المشايخ والعلماء !!
أعتقد أن الإسلام الحقيقي ضائع بين الوصاية المكذوبة , والروايات الخائنة الملعونة !!
أعتقد أننا في حاجة إلي إسلام جديد , أو الكارثة !!
محمود الزهيري
mahmoudelzohery@yahoo.com

Thursday 24 May 2007

مش محمد خان فتح مدونة

وأنا قاعدة نايمة على وداني
ولا دريانة
عرفت امبارح بس
وده لنك مدونته
وأنا من موقعي على الكي بورد
باقول للمخرج العظيم
شرفتنا وآنستنا ونورتنا
ومعلش جات متأخرة ما تآخذنيش
لولولولوليييييييي
دي زغرودة كده ترحيبا بك في عالم التدوين
بس حذاري حذاري
استحمل اللي ح يحصل لك
احنا اصلنا ملطشة العالم
كل اللي زهقان من مراته بيجي يشتمنا
وترحيبا بالعضو الجديد
وبناء على عدم طلب الجماهير
انا ح اعيد نشر مقال كنت كتبته عن شقة مصر الجديدة
في شقة مصر الجديدة عيادة نفسية


هربا من التعديلات الدستورية، والقمة العربية، وتصريحات الدكتور أحمد نظيف التي توالينا بالمفاجئات المدهشة، حضرت فيلم "في شقة مصر الجديدة" من تأليف وسام سليمان وإخراج محمد خان، ومن بطولة غادة عادل، خالد أبو النجا، عايدة رياض، يوسف داوود، مروة حسين.

حين يكون قلبك موجوعا، يجدر بك أن "تفضفض" لإزاحة همك، لكن حين تشعر بالعجز أمام كل هذه المشاكل، تجد صديقا يقول لك: "ما تيجي نغير الموضوع". هكذا غير كل من وسام سليمان ومحمد خان كل المواضيع السخيفة المميتة الموجعة الثقيلة. واتبعا تقنية البرمجة العصبية "السينمائية".

يقول علم البرمجة العصبية، أنه يمكنك تغيير ما تكره في نفسك، بمجرد أن تقتنع أنه غير موجود، بل وتستطيع أن تحل مكانه ما تحب. وبالرغم من تشككي في هذا المنهج، إلا أنني أعلم أن خير وسيلة "للبرمجة العصبية"، خاصة للمصريين، هي السينما. المصريون يعشقون تقليد السينما وأبطالها، ينغمسون في شاشتها ويتوحدون معها.

"في شقة مصر الجديدة" يبثك الحب، في حواره الودود، وصورته العطوفة، وشخصياته الدافئة، ووتيرته المهدهدة، وموسيقاه اللطيفه. كل ما في هذا الفيلم يربت عليك، بأمومة وحنو وعطف، يمدك بطاقة حب وطيبة.

حقا، فيلم سينمائي "طيب"، لا أعني بطيب أي لذيذ، وإنما أعني، طيب القلب. الحقيقة أن أهمية فيلم "في شقة مصر الجديدة" لا تكمن فقط في صناعته الماهرة، واختلافه وتميزه، بل في رقته ورومانسيته وطيبته وأمومته.

فأنا لا أبالغ حين أقول أن فيلم "في شقة مصر الجديدة" يمكن استخدامه في العيادات النفسية والمصحات أيضا، لعلاج مرضى الاكتئاب والتوتر والقلق، لكل الحزانى والشاعرين بكراهية محيطة، تسكبها العولمة فوق رؤوس زعماء القمة الذين يسكبونها، بدورهم، فوق رؤوسنا.

وبدلا من "البرطمة" والشكوى التي يمارسها جميعنا، عمد كل من المؤلفة والمخرج، إلى التقاط الجميل، وإن كان نادرا، في حياتنا، وتسليط الضوء عليه، وتضخيمه، وبث الأمل في قلب الرجل المسن الذي يشعر أن الزمن ليس زمنه، والشاب الذي يتعامل مع الواقع بعبثية يائسة، والفتاة التي تشقق وجدانها تعطشا للحب، والفقير الذي فقد استلذاذه بكسرة الخبز.

يتلقفك "في شقة مصر الجديدة" أيا كان عمرك ونوعك ومستواك الاجتماعي والاقتصادي، ليحتضنك وينبهك إلى الجميل، ويخلع عليك الأمل والحنان والبساطة والابتسام و"الروقان"، فيتلبسك الرضا والإيجابية والنخوة والرغبة في محبة الجميع والتبسم للجميع ومساعدة من تعرف ومن لا تعرف.

خرجت من هذا الفيلم وأنا أشعر بأنني كنت أعيش في صحراء قاحلة، أعاني العطش والجفاف، ثم تلقفتني واحة غناء، مليئة بالجمال والظلال وطاقات الحب والمودة والرحمة والروحانية، فالفيلم يكرس لكل حب بداية من محبة الله وحتى محبة أسفلت الشارع، دون مباشرة أو وعظ أو نقد أو "تلطيش".

أنا لا أمزح حين أقول أن هذا الفيلم، يجب أن يعمم على المصحات والعيادات النفسية، وأضيف أن هذا النوع من الفن "العلاجي"، إن جاز التعبير، يجب أن يظهر نفسه على الملأ ليربت على ملايين المتألمين اليائسين.

هذه الرسائل الإيجابية التي تبدأ من فكرة أن كل ما يعمله الله هو من أجل خير المؤمنين، مرورا بتركيب شخصيات الفيلم التي لا تختلف عن أي منا سوى أن الفيلم أعطاها الفرصة لاستخراج ما بداخلنا جميعا من إنسانية ومحبة، وحتى التركيز على نقاط الجمال في ما نراه يوميا ولا نلاحظ ما به من نور، كل هذه الرسائل، تعالج فعليا، وقد جربت بنفسي الدواء الذي صرفه لي هذا العمل السينمائي الحنون، وأنصح بأن يعمم هذا النوع من الفن على أطفال المدارس وطلبة الجامعات وعمال المصانع وسائقي التاكسيات والميكروباصات والحافلات والـ"توك توكات
".

إعدام التوربيني وسؤال للمجتمع المدني

هو مافيش استئناف للتوربيني؟
وللا عشان غلبان؟
الواد اول ما سمع الحكم شتم الظابط وقال له: كنت بتأكلني كباب وكفتة عشان تضحك عليا؟
فين الناس يعني؟ وللا عشان الرأي العام ضده يبقى ما حدش يقف له؟
انا مش ح اقول مين اللي قال ان واد اهبل زي رمضان ممكن يكون فعلا عمل كده
ولا ح اقول ان الحكاية من اولها لاخرها شكلها هجص في هجص
ولا ح استغرب من موقف القاضي اللي شاف بعينه العيال وهم بينضربوا بالقفا في قفص الاتهام
واكتفى بانه يقول للظابط: انت فاكر نفسك في القسم؟
انا ح افترض ان عيل مرمي في الشارع متخلف عقليا بشهادة الحكومة
وعيال تانية معاه تربية شوارع بياكلوا من الزبالة واهاليهم والمجتمع رامينهم
وفعلا قتلوا واغتصبوا
مش فيه حاجة اسمها ظروف الجريمة؟
ماحدش يقول لي القاضي مالوش دعوة بان العيال دي تربية شوارع وضحيتنا كلنا
لا له دعوة
اشمعنى لما واحد بيقتل مراته عشان شاكك في سلوكها بيخففوا عليه الحكم؟
اشمعنى ظابط يعذب مواطن وياخد براءة وللا ست شهور يقضيهم في مستشفى الشرطة
ويخرج بعدهم يتكرم في عيد الشرطة ويترقى؟
واشمعنى المحامين اللي واقفين مشكورين بمواقف مشرفة
مطنشين على العيال دي بالذات
يعني هي عشان مش قضية سياسية ماحدش يسأل فيهم؟
وللا عشان الرأي العام ضدهم ماحدش عايز يقلل من رصيده عند الناس؟
افهم من كده ان كل مواقف منظمات المجتمع المدني مبنية على حسابات سياسية؟
ايه؟
ايه؟
ايه؟
عيال ح يتعدموا
ما حدش فكر لو مات وعياله فجأة مالهمش حد ممكن يبقى مصيرهم زي العيال دي؟
ما حدش فكر ازاي فرج سمير اللي لسة عيل ح يواجه حبل المشنقة ازاي؟
ماحدش فكر يحاسب المسئولين الحقيقيين عن الجريمة دي
ده اذا كان التوربيني فعلا هو اللي عملها مع عصابته المزعومة
انا مش فاهمة يعني متخلف عقليا يبقى زعيم عصابة ازاي؟
وازاي واحد عبيط بحكم المحكمة ياخد اعدام
وايه السرعة دي في الحكم على العيال
ده احنا طالعان عينا مع اسلاك نبيه
وكل شوية تتأجل
فيه شوية اسئلة لازم نطرحها
ايه الاهتمام المفاجئ باطفال الشوارع ماتوا وللا عاشوا
كل الضحايا اللي المفروض ان التوربيني قتلهم كانوا من اطفال الشوارع
اللي ماحدش بيسأل عليهم
ايه بقى
مين اللي سأل عليهم دلوقت
وسأل عليهم ليه؟
ما العيال دي بتموت في حوادث
وبتموت من الكلة
وبتموت من الاكل في الزبالة
وبتتفعص وهي نايمة تحت عربية
وبتتعجن وهي نايمة في كومة زبالة
وبتنضرب من الظباط لحد ما تفطس وتموت
وبتتشيل قضايا
وبتتاخد للمساجين المتريشين عشان يمارسوا معاهم الجنس
بعلم الظباط
فجأة التوربيني بقى هو المجرم الاثيم والقاتل اللئيم؟
يا سادة يا متطوعين
محدش دريان بالعيال دي ليه؟
سواء كانوا فعلوا هذه الفعلة او لا
ما يستاهلوش اعدام
حتى لو كان التوربيني مش عبيط ولا متخلف
حتى لو كان اعترف من غير كباب وكفتة وضرب بالقفا
حتى لو فعلا عمل كده
ما يستاهلش اعدام
واهم من ده كله
يستاهل متطوعين يدافعوا عنه ويستئنفوا الحكم
وياريت ما الاقيش واحد طالع لي يقول لي الجملة الغريبة اللي باسمعها دايما من الاخوة
اللي "بيلعبوا سياسة": قضية التوربيني الهدف منها الهاء الرأي العام وتشتيت الانتباه عن
الخطوات الاصلاحية
هئ هئ هئ
على أساس ان الرأي العام دريان اساسا ببتوع اللعب بالسياسة وفي السياسة
دول لو لعبوا في مناخيرهم الناس ح تاخد بالها منهم اكتر من كده
ريهام سألتني سؤال محرج قوي
ريهام صاحبتي اللي هي سونيا
قالت لي: هو ايه المعيار اللي بيحرك الناس
مش الدفاع عن الحق والتصدي للباطل برضه؟
ارد اقول ايه؟

Wednesday 23 May 2007

بالنوسبة للبنان سؤال واحد بس




حد فاهم العركة اللي حصلت في لبنان بين الجيش واللاجئين دي ايه؟

استنى قبل ما ترد

كداب ومناخيرك ح تطول ووشك اسود من الكدب لو قلت انك فاهم

فجأة لبسوا في بعض من غير ايتها سبب

مش دي المشكلة

طول عمر اللبنانيين والفلسطينيين بيقعوا في بعض

وطول عمرهم الطرفين بيبقوا غلطانين

الاكادة بقى يا مؤمن

ان الجيش اللبناني العظيم

اللي ما فقعش جيصة في حرب تموز

ومع ذلك عمالين ندلع فيه ونهشتك فيه

والجيش اللبناني العظيم

والجيش اللبناني الوطني

والجيش اللبناني هو جزء من المقاومة

بس هو اصله ما فقعش جيص عشان ما كانش واكل فجل

انما حزب الله بياكلوا كرنب من ايران

وخلافه

فجأة يا سيدي بقى له صواريخ وبيقصف

وإذ بينا نفوجأ انه عتريس وبلوة سودا حتى بصوا

بصوا على أطفال مخيم نهر البارد

ونسائه وشيوخه

لا والله برافو

سبع بصحيح

هو ده الجيش اللي عايزينه يحل محل حزب الله؟

هو ده اللي عشان خاطر عيونه حزب الله يسلم سلاحه؟

الا حزب الله مات منه كام واحد على ايد لبنانية؟

ولا مرة رد

حتى لما النسوان ماتت

اه صحيح حزب الله ده ارهابي

اصله مصر ان سلاحه موجه نحو العدو الصهيوني

انما الجيش اللبناني المغوار

اسد على الاطفال

وفي تموز

فسية

اخصصصصصصصصصصصصصصصصصصصصصص

وبعد ده كله طلعت يا اخي سبحان الله

سوريا هي السبب

ده ربنا له حاجات يا جدع

قال لك فتح الاسلام سوريا هي اللي زقاه

وواحد مجنون من فتح الاسلام طالع برضه يتملق الجيش اللبناني

ويقول هو استدرج للقتال والسبب في اللي حصل

ناس من الحكومة اللبنانية بتعمل لصالح امريكا واسرائيل

كويس يا سيدي اديك بتفهم

قوم يقول لك ايه: والله الذي لا اله الا هو

سنستمر في المعركة طالما يقتل اهلنا

خخخخخخخخخخخخخخخخخخخخخخخخ

لامؤاخذة

يعني هم بيحرروا فلسطين من خلال استفزاز الجيش اللبناني

اللي بدوره

نازل قتل في العيال الصغيرة والحريم

ولا داس لفتح الاسلام دول على طرف

ويقولوا قضينا ع البنية التحتية لفتح الاسلام

البدروم يعني؟

ودولم يفجروا الناس ويموتوا نسوان ولولولولولوليييييييي

ودوكهومة يموتوا عيال في المخيمات و

شوووووووبش

بصوا بقى

احنا غجر

ونستاهل كل اللي بيحصل لنا

ده انا مستغربة ربنا سايبنا ليه

والله نستاهل اكتر من كده

عن اول يوم في استنبول










دي حسيبة والصورة اللي جنبها انا وزهراء ماهناز والدكتورة حياة



ودي الدكتورة حياة وزوجها والصورة اللي جنبها انا وحياة



بقى اللي عملوا المؤتمر هم مجموعة جمعيات أهلية
مش جمعية واحدة
كلها اسامي تركي بس اللي فاكرهم
كادين
استانة
واظن كاسبن كمان
والمؤتمر معمول على شرف وزيرة شئون المرأة نعمت شبوكشي
الجمعيات الاهلية هناك بتمول من قبل التبرعات والاشتراكات
عشان كده ما عندهمش فلوس كتير يفسحونا ويقعدونا مدة طويلة
حتى ما عزموش من برة تركيا غير اربعة
الدكتورة حياة المسيمي
عضو البرلمان الاردني
ربى المصري
عضو جمعية اهلية فلسطينية خيرية
زهراء ماهناز
صحفية ورئيسة سابقة لجمعية اهلية ايرانية لشئون المرأة
وخالتكوا نوارة
انا اول واحدة وصلت في المطار وما لقتش حد مستنيني لان الباقي كان جاي متأخر
فضلت ابص على الناس اللي رافعة لافتات
والناس عمالين يبصوا لي ويبتسمو
- ملحوظة: انا ما شفتش اتراك غير مبتسيمن طول الوقت لسبب مجهول-
بس الحقيقة ما حدش تطوع يسألني مالك
غير مين؟
ايون
اتنين عرب طبعا قعدوا يتفلسفوا ومسكوا التليفون بتاعي اللي كنت محولاه تجوال
وقعدوا يطلبوا نفسهم عشان يتأكدوا انه شغال
ويرغوا ويزبدوا وما عملوش حاجة
بس الحقيقة حسسوني بالونس لاني كنت ح اعيط
الحقيقة صحيح احنا كتير بنتدخل من غير ما نحل بشكل عملي
بس فكرة التعاطف والتضامن المعنوي اللي احنا بنعملها دي
فعلا بتفرق
يعني الاتنين العرب دول (اظن واحد شامي وواحد عراقي) ما يعرفوش بعض
وقعدوا يسألوني سؤال الملكين بمنتهى الاهتمام والجدية وحسسوني انهم ح يحلوا المشكلة
وقعدوا يروحوا ويجوا ويلفوا حوالين نفسهم وفي الاخر
قالوا لي: اسألي الاستعلامات!!!!!بس وربنا الشويتين اللي عملوهم فرقوا معايا معنويا
المهم جات واحدة اسمها فاطمة صغيرة كده وشبه شاهيناز صاحبتي
- كل الاتراك شبه شهيناز صاحبتي -
هي صحفية وبتشتغل في الجمعية الاهلية
وصلونا الفندق وقالوا لنا ناموا وبعدين ناخدكوا لفة صغير في استنبول:
انتم ترتاحون ثم تخرجون انظرون استنبول سريعا لانو وقت مافي
وكان يوم جمعة والدنيا زحمة عشان الناس خارجة تتفسح
السكة واقفة ولا كأن جمال مبارك عنده تشريفة في تركيا
شكيت لاول لحظة بس هم قالوا لي: الناس تخرجون تتنزهون
اللي استقبلتنا في الفندق وفسحتنا هي حسيبة توران
كانت عايشة في مصر وانا اعرفها من ايام ما كانت بتتعلم في مصر
شاورت لنا ع المسجد الازرق وقالت: انظرون المسجد ازرق لا تدخلون
قلنا لها يعني ما ينفعش حتى نبص
قالت: اذن ادخلون انظرون سريعا تصلون لا لانو وقت مافي
وكان معانا واحد تركي شكله سعودي برضه شاور لنا على السوق وقال: انظرون
هزا سوق المصريين كان المصريون يأتون يعملون يضلون في تركيا وهزا احفادهم بالداخل
اتراك من اصل مصري
ادخلون معنا انظرون اشترون بعدين
الحمد لله ان كان معايا ربى الفلسطينية
ربى دي بقى جوزها اللي اخدوه منها وهي لسة عروسة
محبوس بقاله ست سنين
ومسخرة
كل حاجة تسخر منها سخرية مرة
لما الايرانية قعدت تقول انهم عندهم فقر وانهم لازم يلتفتوا لمشاكلهم الداخلية اكتر
طبعا انا سمعت فقر فرحت بيني وبينكوا حسيت برضه بالونس وسألتها نسبة الفقر كام
قالت لي:
tventy percent on the borders of poverty
عشرين في المية على خط الفقر
الفلسطينية ضحكت وزغدتني: أنا مش ح اتكلم بقى
قلت لها: ولا انا بلاش فضايح
كركركر
الايرانية طبعا ما بتفهمش عربي بس فهمت احنا بنضحك على ايه وقالت لنا:
ve are a very rich country ve shouldn't have any poverty percentage
ve dont have israelis or......
وراحت مشاورة عليا
يعني احنا اغنيا ومش لازم يبقى عندنا فقرا واحنا ما عندناش اسرائيليين وشاورت على ربى
ولا عندنا...وسكتت وشاورت عليا
ما اعرفش كانت ح تقول ايه بس انا بقى الشوفونية اكلتني وقلت لها واحنا كمان بلد غنية جدا
اوعي تفتكري ان عشان ستين في المية تحت خط الفقر يبقى مصر بلد فقيرة
احنا بس....راحت الاردنية ضاحكة وقالت: احنا بس عندنا حرامية
على فكرة الاردن في طريقها انها تبقى زينا
الدكتورة حياة بتقول كده
من ساعة ما عملت اتفاقية مع اسرائيل سنة اربعة وتسعين
ومعدلات الفقر والبطالة في ازدياد وكل حاجة بتتخصخص
يجي واحد يقول لي ما الاردن طول عمرها بتتعامل مع اسرائيل في السر
اقول له بس ما كانش بموجب اتفاقية
حياة بتقول ان الاتفاقية خربت بيوت ناس كتير
زي ما خربت بيوتنا من زمان
المهم ان اللفة بتاعة انظر ايفت ادخل يوك دي
كانت فرصة كويسة ان احنا الاربعة نتكلم مع بعض
طبعا مش قادرة اقول لكوا الفلسطينية كانت مخنوقة مننا: انا طالعة ع المعابر عشرين ساعة
من شان اجي اسمع ها الحكي مرة تاني
ما بدي اسمع مشاكل ...عندك اغاني فيروز ع الموبايل؟
قلت لها: انا ما عنديش غير فيروز
منيح افتحي البلوتوث تبعك -
فتحت البلوتوث وبادور عليها لقيتها كاتبة اسمها: همي كبير
وريتني صورة جوزها ع الموبايل
وبعدين قالت: بلاها حكي بيوجع وريني شو عندك
زهراء ماهناز بقى الحقيقة في خطبة وبحث ميداني مستمر
يا اما تتكلم عن احوال ايران يا اما تسأل عن احوال البلاد التانية
اخر ما زهقت قلت لها تعالي لي بقى من خلال الشنطة: عندكوا تعذيب؟
قالت لي: طبعا
قلت لها احكي لي بقى
قالت لي الستات الشرطيات بيزعقوا لنا في الشارع عشان لبسنا
وربى الحشاشة تفطس على روحها من الضحك: يا حرااااااااااام شي بيمزع القلب
وياعني التانية تتنرفز وتقول: وعندنا اتنين مليون مواطن تحت خط الفقر
قلت لها : لا بقى ثانية واحدة اتنين مليون مواطن بس...معلش يعني اذا كنتوا مش عارفين
تحلوا مشكلة اتنين مليون مواطن انا اقدر احل لكوا مشكلتهم
استضيفوني تلات ايام وانا احط لكوا خطة في سنة احوالهم تتحسن
ابتسمت انها قدرت تقنعني انهم عندهم مشاكل وقالت لي: شفتي؟ انا كمان اقدر احل مشكلتهم
بس هم عندنا مش عارفين يحلوا المشكلة
وبعدين سكتت شوية وقالت: بس انا ما اقدرش اهاجم حكومتي برة ايران لان دي ح تبقى خيانة
انا باحب احمدي نجاد...بس فيه حاجات انا باخدها عليه لازم يعملها
الاردنية قالت بالعربي: ايه صحيح اذا بتحكي عن بلدها برة بدها قص رقبتها
قلت لها طب ما احنا بنحكي
قالت لي لا نحنا نحكي عن الحكومات هادي مش بلدنا
المهم عشان نهديها ونحسسها اننا حبيب مش عدو قلت لها: على فكرة سعد الدين ابراهيم
عمل بحث ميداني وطلع اكتر تلات شخصيات محبوبة في مصر نصر الله ومشعل ونجاد
والاردنية قالت لها احنا بنحب سياسيته ضد امريكا وراحت شداني ناحيتها: بدنا نقول لها كمان
انو نحنا ما عجبتنا سياسته بالعراق
قلت لها: ما تقولي
قالت: لازم نقول طبعا....وراحت باصة لها وقالت لها بالانجليزي: احنا فرحانين ان حدا منا
بيقول لامريكا لا!!!!وبنحب سياسيته ضد امريكا في الملف النووي
وتاني توشوشني: بس لازم نقول لها انو ما عجبتنا سياسته بالعراق
طيب انا ماليش مزاج انكد ع الست في موضوع العراق ده ما تقولي انت
طيب اكيد بدنا نقول لها
معظم جلسة انظر لا تدخل دي
كل واحد فينا كان بيغني على ليلاه
الايرانية زعلانة ان نجاد مهتم بالسياسة الخارجية اكتر من السياسة الداخلية
والاتراك زعلانين انهم بيتمنعوا من الدراسة لانهم محجبات
والاردنية نفسها تقول للايرانية مالكوا ومال العراق
وانا وربى قاعدين نضحك واقول لربى: مافيش منحوس اكتر من الفلسطيني غير المصري
تقول لي: لا والله نحنا منحوسين اكتر منكوا
اقول لها: لا احنا اكتر
لا نحنا اكتر-
كركركركر
الايرانية قالت انها لابسة شادور بارادتها وانها بتحبه
بس مش بتحب ان حد يغصب على حد في لبس الشادور
ربى كمان مش بتحب الرغي قوي في الاخر قالت: شو ها الرغي يا الله
كل ها الحكي على مين يقيم الحجاب ومين يحطو؟ اففففففف
افصلوا ده التلاجة بتفصل
هاهاهاهاها
مالحقتش اشتري من سوق المصريين اللي اول ما سمعت اسمه جريت عليه وقعدت اعيط
وابص في وشوش الناس واقول للراجل التركي: شكلهم مصري
يقول لي: ايفت...اجدادهم مصريين
والاردنية تضحك وتقول لي: شووووووووو عندكم بمصر حلوين هيك؟
زعلت وقلت لها: المصريين كلهم حلوين
ما تعرفش يا سيدي ايه اللي حصل جات لي شوفونية على كبر
رحت المسجد الازرق ولقيت برة مسلة مصرية
جريت عليها وقعدت اعيط واقول لهم: بتاعتنا بتاعتنا
والاردنية تضحك عليا تقول: المصريين المصريين
وربى تقول لي: ايه انا رحت مصر الصيف الماضي يا الله ما احلاها مصر
حلوة كتير
بصيت لها: حلوة؟
ايه والله حلوة كتير-
طبعا يعني واحدة بتقف على المعابر عشرين ساعة
لازم تشوف مصر حلوة
وبعدين قلت لها: اه مصر حلوة تعالي عيشي عندنا
ياريت مصر حلوة كتير والمصريين كمان-
كل اللي عرفت اشتريه من السوق المصري شوية حلويات
ولما حبيت ادي البياع بقشيش
كلهم زعقوا لي
مافيش غير ربى واخوها اللي ضحكوا وقالوا لهم: بس بالراحة
ما تعرف هي فاكرة حالها بمصر
هون مافيه بقشيش للبياع هههههههههههههههههه
انت اشتريتي منه ليش بدك تعطيه بقشيش تاني
قلت لهم: عشان ده بياع مش صاحب المحل اكيد صاحب المحل مش بيدي له مرتب كويس
هههههههههههه اكيد بيعطيه مرتب منيح نحنا هون باستنبول مش بمصر -
حسيبة قالت لي: هكذا بقشيش يجعل بياع لا يبيع الا اذا اخذ رشفة (يعني رشوة بس هم مش بينطقوا الواو)
طبعا اخدتني الشوفنية تاني وقلت لهم: ده تكافل مش رشوة
بس هم ضحكوا ما اعرفش ليه
وبعدين حسيبة قالت لي: بس شراء حلفيات كفاية خلاص نحن نذهب
ذهبنا وركبنا مركب في البسفور
طبعا قعدت اتشاهد وكنت خايفة وايمن اخو ربى قعد يعمل طرزان ويقف ع السور
وانا اصرخ
واتشاهد وانا باركب
واتشاهد وانا بانزل وحسيبة قالت لنا: نحن نركب سفينة ننظر بسفور ننزل نركب سيارة نمشي
لا شراء انظر فقط
لا صلاة في مسجد انظر فقط
لا تضييع وقت
وقت مافي
طبعا حسيبة اخدتنا على مطعم على البسفور واكلتنا سمك
شفت اتنين شحاتين اطفال لما نزلنا من المركب
عند المسجد عنيهم زرقا
دول الاتراك الوحيدين اللي عنيهم زرقا شفتهم هناك
جيت اديهم فلوس حسيبة زعقت لي: لا تعطيهم وقعدت تكلمهم بالتركي وتفههم ان الشحاتة غلط
ربى زغدتني تاني: شايفة شو لابسين الشحاتين...احسن مني ومنك
هاهاهاهاها
استنين لما حسيبة ادورت ورحت مدياهم فلوس
قوم البت العيلة بصت في الفلوس وزعقت لي
ربى قالت لي : تستاهلي ...في حدا يشحت اتراك؟
المهم انا ما همنيش انها تزعق لي انا كل خوفي ان من زعيقها حسيبة تعرف اني اديتهم فلوس
الحقيقة انا عمري ما شفت شحاتين بالشياكة والنضافة دي الظاهر اني اديتها حاجة قليلة مش مقام الهانم التركية
حسيبة قالت: نذهب لان عندنا غدا المؤتمر من الساعة العاشرة والنصف
اخدنا في السكة ساعتين بالظبط زحمة بطريقة جنونية
قلت لحسيبة: مافيش طريق يخرم منه؟
قالت لي: يخرم ايش
قلت لها: يعني يختصر منه الطريق...ما عندكوش صلاح سالم طيب؟
ضحكت وقالت لي: لاااااااا هذا الطريق هوفا الطريق الفحيد للفندق مافي يخرم ولا صلاح سالم
وصلنا وحسيبة نبهت علينا اننا لازم ننام بعد العشا على طول عشان نصحى بدري
انت تنامين كثيرا؟-
يجب ان تنامون مبكرا وتصحون مبكرا
انت تعبنا كثير لكي نوقظك حتى تخرجين معنا في النزهة
وكنت سأذهب واتركك ولكن قلبي قال لي لا غدا تصحين مبكرا منشان المؤتمر ستتكلمين الاولى
طيب؟
قلت لها: طيب يا حسيبة
حسيبة بقى دي هانم تركي مؤدبة بس بتتكلم بإدارة كده
وطيبة جداااااااااااااااااااااا
الحقيقة كل اللي شفتهم هناك اتراك طيبين جدا
بس يعني مافيش فرق كبير بينا
مش ناس غريبة يعني
عاملين زي الناس المتربيين اللي عندنا في مصر
حسيت اني في فرح حد من قرايب امي يعني
البلد كلها عبارة عن فرح حد من قرايب امي
يقفوا في الطابور وما ياخدوش مكان حد
ويعدوك الاول: تفظل تفظل
ما بيعرفوش عربي ولا انجليزي
يكلموك تركي ولما ما تفهمش يتكلموا بالراحة تركي برضه عشان تفهم
بكرة بقى ح اتكلم عن فاعليات المؤتمر ان شاء الله

Monday 21 May 2007

عمر الشقي بقي


عمر الشقي بقي
للأسف جيت
ايه بقى؟
ينفع ارجع في موضوع التسامح ده وللا ايه؟
انا رجعت النهاردة الفجر ولسة دماغي بتلف لان السفر بقى بيوترني
فين ايام الشباب لما الواحد كان يقعد تمن ساعات صاحي في الطيارة يتفرج على فيلم
امريكاني بايخ اربع مرات
ياللا بقى العمر بيجري ومش عايز يخلص
المهم
المؤتمر كان كويس والله وكان فيه على هامشه شوية حاجات كويسة
مش ح اقدر اعمل له تغطية طبعا دلوقت مافياش دماغ
لما اروق كده ابقى اكتب التغطية
دي شوية صور ولنك لفيديوهات المؤتمر
مؤقتا كده لحد ما اغطيه كله
ان شاء الله
الغريبة يا اخوانا
اني اكتشفت اني دماغي مش مظبوطة
ما غبتش غير يومين ونص عن البلد الوسخة دي
واول ما شفتها من الطيارة قعدت اعيط واسقف زي الهابلة
تقولش شفت كونتا كينتي
وطول ما انا هناك الشوفونية واكلاني
واول ما شفت المسلة المصرية جريت عليها
حتى لما قدموا لنا في المطعم شوربة عدس
قعدت اقول: الله عدس
this is egyptian food
it is mentioned in the quran
ولانهم ما بيفهموش انجليزي
قلت لهم بلغة سبيس تون: هذا طعام مصري
عدس عدس
مصري
مذكور في القرآن
وهم برضه يعني مش بيعرفوا عربي
لا وفخورة قوي ان العدس مصري
وقعدت اكله واقول:الله الله
تقولش كفيار وللا فواجراه
سجلت كلمة الدكتورة حياة الموسمي من الاردن وربى المصري من فلسطين
وحاولت انزلهم ع اليوتيوب قال لي
the video is too long
مش عارفة احلها ازاي
لان الكلمتين مهمتين جدا
ياريت حد يقول لي احلها ازاي
الكلمة بتاعتي اللي سجلها واحد ما عرفش يتصرف في الموبايل
فسجل حبة صغيرة
ممكن تبقى مش واضحة
بس عموما اللنك بتاعها اهو
فيه فيديوهات تانية كوميدية شوية
يعني شوفوا الكناس عامل ازاي؟
وفيه فيديوهات وصور تانية ح ابقى انزلها مع التغطية




































Thursday 17 May 2007

أنا مسافرة الليلة دي والاعمار بيد الله

انا مسافرة الليلة دي تركيا ان شاء الله
السفرية جات فجأة وعرفت بيها قبلها بكام يوم عشان كده كنت باخرج صبح وبعد الضهر عشان اخلص الورق بسرعة
ان شاء الله ح احضر مؤتمر عاملاه مؤسسة كاسبن النسائية عنوانه المرأة في مواجهة العولمة
ادعوا لي ربنا يوفقني ويبقى العمل خالص لله
ده اولا
ثانيا : بقى هالله هالله ع الجد والجد هالله هالله عليه
الاعمار بيد الله والرسول امر برد الحقوق والمظالم والوصية عند السفر
انا بقى ان شاء الله مسامحة اي انسان ليا عنده حقوق مادية او معنوية
من اول كلمة قالها في حقي في وشي او من ورايا
لحد اكبر اذية اتئذيتها من اي انسان عايش او ميت (حتى السادات: فيما يخص حقوقي الشخصية عنده بس)
مرورا باي حقوق مادية (ديون – امانة – سرقة)
وطبعا اللي يعرفوني يعرفوا قد ايه انا غلاوية والقرار ده يبقى صعب عليا قوي
بس الحقيقة انا ما بقتش طيبة جدا يعني عشان انا مسافرة والاعمار بيد الله
بس انا باقدم السبت
عشان اي انسان له حقوق عندي
اذا كانت مادية (ديون – امانة – وما افتكرش اني سرقت حاجة من حد)
ياريت ياخدها مني دلوقت او من اهلي (بابا وماما) وانا مسافرة وسواء عايشة او ميتة
واللي له عندي حقوق معنوية ايا كانت من اول الكلمة لحد اللكمة
او اي انسان ظلمته بقصد او من غير قصد
في وشه او من وراه (بما اني نمامة درجة اولى) يسامحني
خصوصا لو مت
ولو مش عايز يسامحني يبقى منه لله بقى
يعني مش معقول ابقى ميتة وما يسامحنيش
مش بااااااااارضه
دي الوصية العامة
الوصية الخاصة موجهة لصحابي
والحمد لله هم كتير
عشان كده مش ح الحق اكلمهم كلهم دلوقت
يا شباب
أنا كاتبة الوصية بتاعتي وحاطاها في الدرج التاني في مكتبي اللي عليه الكمبيوتر في اودتي
من ضمن الوصية ان متبرعة بكل ما يصلح من اعضائي
بس بلاش مخي ولا لساني عشان ربنا ما يحاسبكوش
بشرط ان الطبيب ما ياخدش مقابل على اعضائي خالص
وياريت تنقوا طبيب طيب يتبرع هو كمان باجره
وياريت الاعضاء دي تبقى من نصيب واحد فقير
طبعا كل ما املك من حيطان الدنيا
الا وهو الكمبيوتر والموبايل والهدوم وفقط
يا تتبرعوا بيهم للفقرا يا تبيعوهم وتتبرعوا بتمنهم!!!! مش عايزة تريقة عارفة انهم مش ح يجيبوا حاجة
خلاص اتبرعوا بيهم
طبعا انتوا اللي ح تشرفوا على موضوع التبرعات دي لان ماما وبابا مش ح يبقى فيهم دماغ
العربية عليها اقساط ح تخلص سنة 2009
طبعا الاقربون اولى بالمعروف اذا حد من اخواتي او اهلي عايزها ياخدها
اذا عملوا فيها عواطفجية وقالوا ما نركبش عربية نوارة بعدها
يبقى تدوها لعماد الكبير
يقلبها تاكسي
ويكمل بقية الاقساط هو
اذا كان يقدر ع الاقساط اظنهم 400 جنيه
اصل المرتب بيتحول ع البنك
الباقي من تحويل المرتب برضه لعماد الكبير لو ح ياخد العربية عشان يسدد الاقساط بيهم
او يعمل بيهم اللي هو عايزه
لو عماد قال انه مش محتاجها
شوفوا اي عواطلي يقلبها تاكسي ويشتغل عليها
بس لازم يكون غلبان وضاربه السلك
ملحوظة: لما العربية تعطل منه حذاري ثم حذاري يدعي عليا
ويقول ربنا يجحمك مطرح ما رحتي دي عربية دي؟
تاخدوا بالكوا من بابا وماما واخواتي
ثالثا: محاكمة اسلام نبيه الشهر الجاي
لو ما كنش ليا عمر احضرها لازم حد يحضرها ويسجل كل حاجة بالموبايل بتاعي وبعدين بعد ما ينزلهم
ع اليوتيوب ويبقى يتبرع بالموبايل زي ما هو عايز بعد كده
رابعا: قانون التأمين الصحي
لو مت وعدى من تحت شنبكوا يبقى عيب عليكوا
لو عشت وعدى من تحت شنبنا يبقى عيب علينا
الحملة بتاعة التأمين الصحي أمانة في رقبتكوا
خامسا: لو مت وحد فيكوا متخانق مع التاني تتصالحوا
وكل واحد عارف نفسه
وخيرهما من بدأ بالسلام

لو عشت بقى
يبقى ح نيمك من المغرب يا تركيا

يا خوفي ما متش واعيش واتورط في التسامح ده كله
ملحوظة أخيرة: وصيتكوا وائل عباس يا بتعة
خلوا بالكوا منه عشان شكلهم كده بيدبروا له حاجة حقيرة
على رأي خالد البلشي: الأمر مدبر له بليل
ولو بعد الشر جرا له حاجة
يبقى مافيناش ولا راجل بقى
بما فيهم انا
ولو إني باتنشق على الموت عشان اخلص على الاقل من اشكال معينة
الا اني لو اتمنيت اعيش
يبقى بس عشان اللي يهوب ناحية الناس المحترمة
اللي زي وائل عباس
اكل دراعه
مراقب مصري
شايف ده
وصيتك برضه
لحد ما ارجع ان شاء الله
ولو ما رجعتش
وصيتك برضه
انت فاهم ها
وش بيغمز

Monday 14 May 2007

للمشاركة في الحملة ضد قانون الصحة الجديد بمركز هشام مبارك

احنا البلد الوحيد اللي ح يخصخص الصحة
مالناش زي ابدا
برضه مصر بلد الريادة يا اخوانا
انت فاهم يعني ايه تتخصخص الصحة؟
يعني الدولة لقت لها سبوبة جديدة لوز
صحة الناس وارواحهم
مش كفاية ان اللي بيموت بياخدوا على جثته ضرايب
كمان اللي عايش وعيان
ياخدوا على عياه فلوس
طبعا القانون الجديد ده
هو الثمرة المباركة لسرطنة الطعام واستيراد الاوبئة
الحمد لله مرضانكوا
قبوا بالمعلوم بقى
وعموما لو متوا مافيش مشكلة
ما بتدفعوا ضرايب ع الجثث يعني
ح تدفع ح تدفع
ما داهية يجوا ورانا في الاخرة وياخدوا ضريبة على حساب الملكين
المهم فيه حملة ضد هذا القانون
لمن يود المشاركة يمكنه حضور ندوة الغد
في مركز هشام مبارك
شارع التوفيقية عمارة رقم 1
الساعة السادسة
بكرة التلات يعني

Friday 11 May 2007

مفاهيم الجمال بين الماضي والعولمة3

ثانيا: تطبيق هذه المعايير أصبح شبه مستحيل بدون اللجوء إلى جراحات التجميل، فلا توجد امرأة طولها 170 سم ووزنها 50 كجم، ومحيط خصرها 40 سم ومحيط صدرها 130 سم ومحيط أردافها 130 سم!!!!! هذا مضحك حقا، والله لا يخلق هذا المسخ، إذن فعليك أن تذهبي إلى جراح التجميل لكي تحصلي على هذه المقاييس الكرتونية. كما أن الأنف المطلوب غير موجود في الطبيعة، لا على وجه إنسان، ولا وجه حيوان، إذ أن أنفك يجب أن يكون مستقيما من أعلى و"منفوشا" من أسفل ومبتورا من الأمام، حاجة صعبة قوي، وفوق ذلك كله، يجب أن تكون شفاك كأغلظ ما يكون، أي أن أنفك يجب أن يكون أقرب إلى الأنجلو ساكسوني، وإن كان أكثر تعقيدا منه، وشفتاك يجب أن تكونا إفريقيتان، ولون جلدك يجب أن يكون أوروبيا، وخداك يلتزمان بأن يكونا عربيان: "مربربين"، يعني ذات كلثوم، وكيف يكون وجهك ممتلئا ووزنك 50 كجم؟ جراح التجميل يستطيع أن يفعل ذلك، كما أن النفخ لا يقف عند الثديين والأرداف والشفاه والوجنات، وإنما يرتفع قليلا ليصل إلى الجفون، فالمسافة ما بين حاجبك وعينك يجب أن تكون على الأقل "فدادين خمسة خمس فدادين"، وعليك أن ترفعي حاجباك حتى يلتصقان بمنبت شعرك، ثم بعد ذلك، تقومين بنفخ جفنيك حتى يظن الناظر أنك تعانين من "دمل" في عينك من جراء نومك على وجهك فوق وسادة متسخة.
وبعد كل ذلك تصبحين يا سيدتي رائعة الجمال، إذ أن فمك ووجنتاك وجفناك منتفخين جميعا، وكأنك خارجة لتوك من مديرية الأمن، قسم زنازين التعذيب، بعد أن استفززت ضابط شرطة فأوسع وجهك لكمات.
والله فكرة، بدلا من دفع الآلاف، واقتراض المال من بنوك لبنان لإجراء جراحات التجميل، ما رأيك يا سيدتي "عطيات" أن تستفزي ضابط شرطة فيحقق لك ما تنشدين، وكلما "فش" وجهك، ذهبت واستفززتيه مرة أخرى؟

ثالثا: معايير الجمال الحالية، والمستحيلة، التي ذكرناها، تخاطب بشكل فظ وغليظ وحيواني وكوميدي الغريزة الجنسية لدى الرجل: بص شفايفي، بص خدودىىىى...بص....ما علينا. وكأن المرأة والرجل لم يعد لهما شاغل غير الجنس، وكأنهما لا يستطيعان التواصل بأية طريقة قبل اختبار بعضهما البعض جنسيا.
الجنس غريزة محترمة وكانت مقدسة في كثير من الحضارات، خاصة حضارات منطقتنا، بدءا من المصرية القديمة وحتى الإسلامية، وكانت هذه الحضارات تنظر إلى الجنس على أنه أصل الإنسانية، بل وأنه عملية مقدسة، ومتعة راقية تبنى على العاطفة والمحبة والمودة، وتتوج أسمى المشاعر بين الرجل والمرأة، لذلك فكان أجدادنا يؤمنون بأن للجنس مقدمات تبدأ بالنظرة ثم السلام ثم الكلام ثم الموعد ثم اللقاء ثم التعارف ثم التحابب ثم الألفة ثم المودة ثم الرحمة ثم السكن، وهكذا، أما أن تصبح المفاهيم الجمالية الآن، "تجيب من الآخر"، بمعنى أن بداية الخطاب البصري بين الرجل والمرأة هو الجنس، وبعدين نتفاهم، فما معنى هذا؟
أقول لكم معنى هذا ولا يتهمني أحد بأنني "قليلة الأدب"؟ عندما تضخم المرأة بعض البؤر الجنسية في جسدها ووجهها، هذا يعني أنها توجه للرجل رسالة: "خلص في الكلام....إنت لسة ح تقعد تحب؟" وحين يقبل الرجل على هذا النوع من "الجمال"، إذا اعتبرناه جمالا، فهذا يعني أنه يوجه للمرأة رسالة: "نظرا لتكدس الطعام بالهرمونات والتلوث وخلافه...ساعدينا يساعدك ربنا". وحين تفعل بنا "حضارة" العولمة هذه الأفاعيل فهذا يعني أنها تقول لنا: "ياللا يا حيوانات...شوفوا نفسكوا وخلونا نسترزق". والله العظيم أنا متربية، ولكن حين يتبول شخص ما في الشارع، وأقول عنه أنه يتبول في الشارع، فهل أنا قليلة الأدب أم هو؟

كنا نقول أن استغلال المرأة جنسيا في الإعلام والدعاية والإعلان هو انتهاك لحقوقها وكرامتها وإنسانيتها، ولكن الأمر تعدى الحقوق والكرامة، ووصل إلى التكريس لإصابة المرأة بعقد نفسية وخلل عقلي، يدفع بها إلى زيارة طبيب التجميل عدة مرات، وإشفاع تلك الزيارات بزيارات أخرى مريرة إلى الأطباء النفسيين، وأصبح الطب مهنة ملائكة التعذيب بدلا من ملائكة الرحمة، كما تخطت هذه الانتهاكات نفسية المرأة وإنسانيتها، لتعصف بكرامة الرجل الذي تم تلخيصه في "ثور" لا يفكر سوى في غريزته الجنسية التي فقدت إنسانيتها وحتى حيوانيتها وأصبحت بالنسبة له عملية آلية مفرغة من الروح والحب.

ومما سبق، وإذا كنا قد حاولنا أن نعنون الحضارات السابقة، فيمكننا أن نعنون "حضارة" العولمة في جملة واحدة: "قلّب الزبون...كل قرش أحسن من عينه" أو يمكن تلخيصها في المثلين المصريين البليغين: "اللي يصعب عليك يفقرك" و"اضرب الأعمى وكل عشاه ما أنتاش أرحم م اللي عماه".

مفاهيم الجمال بين الماضي والعولمة2

في مرحلة التراجع العربي عن قيادة الحضارة الإسلامية، واستبدالهم بأمم وأجناس أخر، وجد العرب في البداية أنهم في حاجة إلى الدفاع عن كينونتهم، فأصر الشعراء العرب على أن أجمل العيون هي السوداء، وأجمل ألوان البشرة هي السمراء، وهكذا، ثم اختلط العرب بالأجناس الأخرى اختلاطا يصعب معه التمييز بين العرب وغيرهم فظهر جيل: "شعرك والجبين والوجنات كالليل والنهار ياللا للي". وظلت البدانة الشديدة والنحافة الشديدة مذمومتان عند العرب والمسلمين، إذ أنهما تدلان على تدهور الحالة الصحية، حتى تغلب الترك الذين كانوا يرون في البدانة دليلا على العز.

ثم انزوت الحضارة الإسلامية، وسطعت الحضارة الغربية، التي وإن بنيت على أكتاف سود إفريقيا المستعبدين، والسكان الأصليين للقارات المكتشفة أو، بقول أكثر عدالة، المغتصبة، والإرث العلمي والثقافي للحضارة الإسلامية، إلا أنها تميزت بالعنصرية التي وصلت إلى حد اعتبار "الملونين" سلالة أدنى لأنها أقرب إلى القرد الذي يظنون أننا نشأنا من صلبه. فأصبح الجمال هو الملامح الأوروبية البيضاء وفقط، وعاد الجمال ينحصر في المرأة، ولا يلتفت له في الرجال.

أما الآن، في عصر العولمة، فتطور الجمال حتى وصل إلى "عطيات"! تعرفونها؟ تلك الشخصية الكوميدية التي مثلها محمد صبحي في مسرحية "الجوكر"، حين قام بتجسيد امرأة ووضع بالونات كبيرة في مكان الأرداف والثديين، وارتدى قناعا مضحكا يبدو فيه الحاجبان مرتفعان جدا، والشفتان متضخمتان، وهذا الشكل الذي صوره محمد صبحي في مسرحيته، مستوحى من الرسومات الكريكاتورية التي تسخر من المرأة اللعوب المثيرة للغرائز.

نحن لا نهدف هنا إلى قطع أرزاق مراكز وأطباء التجميل، ولكننا نريد أن نستبين الأمر. كما ذكرنا آنفا، المفاهيم الجمالية لكل عصر وحضارة تعبر عن القيم الاجتماعية والأخلاقية والروحانية المسيطرة في ذلك العصر أو تلك الحضارة. ومن خلال تأمل ما يحدث "بالمرأة" نستطيع أن نتبين ما نحن فيه، حيث أن جميعنا "متلخبط" بحق.

أولا: الجمال أصبح شديد الديكتاتورية، إلى حد يجعل الإنسان لا يسخط على شكله بل والعياذ بالله، إذا كان ضعيف الإيمان، يمكن أن يسخط على خالقه. فمعايير الجمال الآن أصبحت تقاس بالسنتي متر، وليس بالإنش حتى، فالمسافة ما بين أنفك وفمك يجب أن تكون كذا سنتي، والمسافة ما بين حاجبك وعينك يجب أن تكون كذا، وطولك يجب أن يكون كذا، ومحيط خصرك يجب أن يكون كذا، وطول رقبتك يجب أن يكون كذا، ومحيط الصدر يجب أن يكون كذا، وارتفاع الثديان يجب أن يكون كذا، ومحيط الأرداف كذا، و...لا مؤاخذة...ارتفاعهما يجب أن يكون كذا.
............يتبع

مفاهيم الجمال بين الماضي والعولمة

لكل حضارة مفاهيمها الجمالية النابعة من قيمها الاجتماعية والأخلاقية والعقائدية أيضا. فالحضارة الفرعونية، وبسبب تقديسها للحيوانات الذي وصل إلى حد العبادة، رأت في التشابه ما بين الإنسان والحيوان الجميل، كالقط الفرعوني، قمة الجمال، وإذا وضعت صورة "نفرتيتي" – رمز الجمال المصري القديم – إلى جانب صورة القط الفرعوني الأسود، ستجد تشابها كبيرا. وعمد المصريون القدماء إلى استخدام مساحيق التجميل بشكل يقرب الشبه بينهم، أو بالأحرى بينهن، وبين القط الفرعوني، كما كان الرجال المصريين يتشبهون بالأسد.

أما الحضارة الفارسية، ونظرا لاعتزازها الشديد بفارسيتها، فعرّفت الجمال بأنه هو الملامح الفارسية الأصيلة، مثل انعقاد الحاجبين، وكانت الحضارتين اليونانية والرومانية تعليان من شأن الثراء والبذخ، فجاءت أفروديت أو فينوس بدينة و"ملظلظة" كناية عن ثرائها الذي يجعلها تأكل وتستقئ لتأكل مرة أخرى كما كان يفعل الرومان في السابق.
ومع إعلاء المبادئ الروحانية في الحضارة المسيحية جاءت القيم الجمالية أقرب إلى الملامح الرقيقة، حيث أن الإنسان يعتقد أن رقة الملامح من شيم الملائكة. ثم حدثت ثورة في المفاهيم الجمالية مع سطوع نجم الحضارة الإسلامية التي تأسست القيم الجمالية فيها على مبدأ: "وصوركم فأحسن صوركم". وعليه، فكل إنسان جميل، لمجرد أنه إنسان. والإنسان له الأولوية في فلسفة الحضارة الإسلامية، فهو المكرم، وهو الخليفة، وهو الجميل الذي سن له الرسول صلى الله عليه وسلم النظر في المرآة وترديد: "الحمد لله الذي سوى خلقي فعدله وكرم صورة وجهي فحسنها وجعلني من المسلمين...اللهم كما حسّنت خَلقي فحسّن خُلقي". ولم تكتف هذه الثورة بأن جعلت الجمال أكثر ديمقراطية، وإنما جعلته أكثر شعبية.
فالحضارات السابقة كانت تلخص الجمال في المرأة وتجعله حكرا عليها، وربما سجنا لها، والرجل لا يطلب منه أن يكون جميلا، وإنما يجب عليه أن يكون قويا، ولكن بعد ازدهار الفلسفة الإسلامية، أصبح الجمال حق للجميع، وجعلته أمرا هينا وسهلا، فكل ما يطلب منك لتكون جميلا، هو أن تكون إنسانا، ويكون ثوبك حسنا، ونعلك حسنا، وأن تتعهد نفسك بالنظافة والاغتسال والتسوك والحناء وتقليم الأظافر والاكتحال وتصفيف الشعر (مع عدم الاضطرار لتنعيمه أو تجعيده) والتطيب وإزالة الروائح غير المحمودة بحلق شعر الإبط والعانة، إلى جانب الالتزام بالتغذية المتوازنة ولا تملأ وعاء بطنك لتضمن تمام الصحة والعافية....وخلاص.
ولم تلجأ الحضارة الإسلامية إلى تغيير لون البشرة بالرغم من أن قدماء المصريين كانوا قد وفروا للبشرية مساحيق تجميل متطورة تغير لون البشرة، كما وفرت الشعر المستعار الذي يختلف في نوعه، من حيث الكثافة والنعومة، عن الشعر الأصلي للمصريين القدماء. بل إن الحضارة الإسلامية كانت تزدري فكرة "تغيير خلق الله" بالتفلج أو وصل الشعر أو التنميص والوشم الذي يعرف الآن بـ"التاتو"، إذ تقوم المرأة بإزالة حاجبها تماما ورسم حاجبا آخرا بالوشم. وينبع هذا الازدارء من إعلاء قيمة الإنسان، فالإنسان جميل، وعليه أن يقتنع بأنه جميل، بل وجميل جدا، والشهادة جاءته من رب العالمين بأنه خلق على أحسن ما يكون، وعلم النفس الحديث يقرر بأن اقتناع الإنسان بأنه جميل سيجعل الآخرين يقتنعون بذلك، ولو جرب أي شخص النظر في المرآة كل يوم والترديد بإيمان: "وصور صورة وجهي فحسنها" لمدة عام مثلا، سيجد أنه اقتنع بالفعل، وأقنع الآخرين، بأنه جميل
.
.........يتبع

Wednesday 9 May 2007

تأجيل محاكمة اسلاك يا بلد مافيهاش مكان للغلابة










أنا باتحدت وانا مفروسة
صورت فايل كامل يجنن
فيه بداية المحكمة وصور من قريب لاسلاك نبيه وأمين الشوربة اسم الله
وحوار مع سعيد جميل ومع جميل عزيز والليلة كانت كلها جمال
يبدو ان رضا فتحي اتظبط لان مينا سأل سعيد جميل ايه تفسيرك لان امين الشرطة طلب محامي تاني
قال: لم يحدث ولن يحدث انا محامي الاتنين
قلت له: بس الدكتور احمد الجنزوري قال ان امين الشرطة لا يثق في هيئة الدفاع الحالية
قال لي: غير صحيح لم يحدث ولن يحدث
وقال لي انه تغيب المرة اللي فاتت عشان كان بيترافع في قضية العبارة
وربنا
ومش مكسوف يعني
سعيد جميل كان عايز يحيل الاستاذ ناصر أمين محامي عماد من محامي لشاهد! وبيقول ان ده انزه له لانه هو المتقدم بالبلاغ
رفعت الجلسة للمداولة وبعدين
طبعا المحكمة رفضت والنيابة كمان دحضت المزاعم دي
الجلسة التانية كانت جلسة الاستماع لخبير الاصوات
قبل ما تعقد الجلسة تاني مرة سعيد جميل قال انه جايب خبير اصوات متخصص كاستشاري
اسمه جميل عزيز
وفي الفيلم اللي طار كنت مصوراهم وهم بيسلموا على بعض بحرارة وبيبوسوا بعض
واضح ان بينهم صداقة عمر
عقدت الجلسة مرة تانية
وانا سجلت شهادة خبير الاصوات والاسئلة اللي وجهها سعيد جميل للخبير
وازاي كان بيكلمه بشكل طبقى واحتقاري
ح تشوفوه كله
في الفيديوهات
معظم اللي طار في الفيلم حكيته
الباقي ح تلاقوه في الفيديوهات
طبعا شهادة جميل عزيز بتقول ان مافيش حاجة اسمها بصمة صوت
وان اي حد ممكن يقلد صوت اي حد
وان مافيش حد يقدر يميز صوت اي حد
وكان ناقص يقول المحكامة دي كلها مالهاش لازمة

وبعدين رفعت الجلسة تاني
بعد ما سعيد جميل طلب التأجيل واخلاء سبيل اسلاك نبيه

اسلاك نبيه كل ما اجي اصوره يشوفني ويستخبى
استنى واعمل نفسي مش بصور يروح طالع اروح مصورة يروح مستخبي
لحد ما ضحك هو والعساكر اللي معاه

بعد ما رفعت الجلسة
سألت الدكتور الجنزوري على الكلام اللي قالوا واللي انا مصوراه ونازل على الفيديو في البوست اللي فات
وانكره كلللللللللللللللللله
وجاب لي واحد من هيئة الدفاع وقال لي هو ده محامي الامين
سألت محامي الامين وقلت له اسألك سؤال شخصي ورحت قافلة الفيديو وقلت له : انا مش باصور اهو
ممكن اسألك سؤال شخصي؟ لو عماد ابنك كان ح يبقى موقفك ايه؟
قال لي: لا ما تسألنيش السؤال ده...عشان انا مش بادافع عن اسلام..انا بادافع عن الامين...الامين غلبان ...وموقوفه كويس
ومن اقوال عماد موقفه كويس
!!!!!!!!!!!!!!!!!!!!
سألت نفس السؤال وبنفس الطريقة لسعيد جميل: قلت له برضه سؤال شخصي وانا اهو قافلة التسجيل
قال لي: ايه انا متجوز
قلت له: لو عماد حفيدك كان ح يبقى موقفك ايه؟
فرد ضهره واتنحنح وعلا صوته وقال في نبرة خطابية لمت الناس علينا: لو كان عماد حفيدي لوأدته
لدي مستندات ووثائق تثبت أن عمادا بلطجيا وله صحيفة سوابق
ولو كان حفيدي لدعوت الله أن يأخذني أو يأخذه
اديته ضهري وانا باقول من قلبي: حسسسسسسسسسسسسسببببببببببي الله ونعم الوكيلللللللللللللللللل

طبعا كل اللي كانوا واقفين ناس غلابة: قعدوا يتمتموا: يا ساتر ...منك لله يا شيخ...حزبي الله فيك

ملحوظة تانية: الزميلة لميس مراسلة تسعين دقيقة واضح ان صلتها وثيقة جدا ومتعاطفة مع هيئة الدفاع عن اسلاك نبيه
هي حرة على رأي مينا
واحنا كمان حرين

المهم طبعا اسلاك ما اخدش اخلاء سبيل
ولا ناصر امين بقى شاهد
غريبة قوي حكاية حولوا المحامي لشاهد دي
مش ناقص غير الجلسة الجاية يطلب انهم يفتحوا له محل حلواني عشان يسيب المحاماة

الجلسة من الساعة اتناشر الضهر لحد الساعة اربعة وشوية العصر
كل شوية ترفع للمداولة

احد محامين هيئة الدفاع عن اسلام...الاستاذ احمد اسماعيل شاب صغير وانا فاكرة كويس اني اول مرة لما سألته انت محامي اسلام
بص في الارض
المهم المحامي ده له ابن عمة مات في مستشفى الاهرام
عارفينها دي اللي بيدخلها عنده اللوز يطلع منها ع القرافة دي
قال لي: انت صحفية؟ انا عايز حد يعمل موضوع عن الحكاية دي
كلموني عشان انا عندي معلومات
سبحان الله حتى محامي الداخلية طاله الفساد
المهم اني اديت نمرته للاستاذ عماد الغزالي عشان يعملوا معاه او مع عمته حوار
والظاهر ان ما حدش اتصل بيه فزعل وقال لي: انا مش ح اتكلم معاكي ولا اديكي اي معلومات عن القضية انا زعلان منك
!!!!!!!!!!!!!!!!!!!!!!!
الجلسة المرة دي
كانت مليانة مخبرين

ح تلاقو صورهم مجموعة كده صورهم اسد كذا صورة واخدتهم منه

وفي الاخر اتأجلت لجلسة 4 يونيو

الشهر الجاي

آه يا بلد الغلبان فيها حمار يموت على ما يجيله العليق

لينكات الفيديو اهه