الاول ح اقول الخبرين بسرعة وبعدني نحكّي
المواطن احمد السيد عبد الفهيم مات في قسم الازبكية
والشرطة بتدعي انه جات له غيبوبة سكر مع ان اخوه قال ان
ما عندوش سكر الاستاذ طاهر ابو النصر توجه فورا الى القسم
ثم المشرحة ثم النيابة وفي النيابة فوجئ بطناش من اهل القتيل
لان اهل القتيل فيهم واحد بيشتغل في المصرية للاتصلات
وكلهم ناس موظفين "محترمين" بينما اخوهم اللي مات بائع جائل غلبان
اتقبض عليه في قضية بورشام لامؤاخذة
وياريت ماحدش يطلع لي زي الخازوق ويقول لي مدام بيبرشم يبقى يستاهل يتقتل في القسم
عشان انا احصابي تعبانة
فيه واحد تاني اسمه عمرو سعيد الظابط غلس عليه وهو قاعد مع خطيبته
فنزل فيه ضرب لحد ما الواد جاله شلل كامل واهله مستعوضين ربنا عشان
ما يسوءوش سمعة البنت
!!!!!!!!!!!!!
والخوازيق يمتنعون عشان نفس ذات احصابي التعبانة
=====
كريم عامر اتعذب كالتالي: ضابط المباحث مدحت سمير سلط عليه
واحد اظن صول يقعد على راسه لحد ما سنته اتكسرت وانا شفت وشه
بقى شوارع رقبته لسه فيها كدمات وعينه اليمين فيها حتة سودا كده
كأنها احتقان دم متكلس وسنته مكسورة
وبعدين ربطوا رجليه وايديه من ورا في بعض ونيموه على بطنه
وجابوا مسجون قلعوه قدامه ونزلوا في المسجون ضرب وقالوا له ح نعمل فيك كده
سبب التعذيب: مالوش علاقة لا بالدين ولا بالميتين
كريم كشف واقعتين فساد واحدة خاصة بالضابط والتانية خاصة
بواحد نباتشي واضح انه مظبط اموره مع الظابط برضه
وكان التعذيب انتقام من كريم
كريم راح عشان يعمل تقرير طبي فالدكتور قال له مش ممكن نخالف ضميرنا
بس مارضيش يخليه يطلع على التقرير
ومحامين كريم: جمال عيد وروضة قدموا بلاغ للنائب العام ولسة لم يتم التحقيق
غالبا عشان اثار الكدمات تروح
بس هم فاكرينه عنده ست سنين يعني والسنة اللي اتكسرت ح تطلع؟
====
نحكّي بقى
اتقابلنا انا وروضة وجمال عيد ومجدي سمعان الصحفي بالمصري اليوم
واللي بالمناسبة ابلغته اني مسمية المصري اليوم: المخبر اليوم
ماهو انا لساني ده عايز قطعه
وبعدين عند السجن اتقابلنا مع الاستاذة هويدا طه وزوجها الاستاذ رمضان
فتشونا واحنا داخلين وبعدين وقفونا طابور وبعدين فتشونا تفتيش ذاتي
وبعدين اخدوا الزيارات وفتشوها وبعدين واحنا داخلين على ساحة
انتظار الزوار فتشونا تاني والبنت اللي بتفتشنا كل ما تشوف وش
هويدا تقول لها راضيني لحد ما هويدا قالت لها: ممكن اعرف
ايه الخدمة اللي بتقدميهالي عشان اراضيكي
طبعا قبل ما ندخل على كل التفتيشات دي ادينا اسمنا للامين
عشان يحطنا في الزيارات ودخلونا حتة كده نستنى فيها
نستنى فيها
نستنى فيها
نستنى فيها
لحد ما ابتديت اغني شوية وارغي شوية
بس كانت ميزة ان الواحد يقعد مع ناس مختلفين معاه تماما
انا شخصيا باحب اتكلم مع المختلفين معايا قوي ومش باحب اتناقش معاهم
باحب اسمعهم ممكن اتناقش مع اللي انا وهم متفقين او منطلقين من ارضية واحدة
لكن اللي مختلفة معاهم باسيبهم يتكلموا عشان اكيد ح استفيد
الحقيقة الاستاذة هويدا قعدت تتكلم معايا وفي الكلام اللي فهمته منها
انا مختلفة شوية ومتفقة شوية بس هي كمان قعدت تقول لي كلام
مافهمتوش: قعدت تقول لي لازم نقضى على الطماطم
لازم نقضى على الطماطم
الطماطم هي سبب تأخرنا
لازم نتخلص من الطماطم
وبعدين ركزت شوية لقيتها بتقول
الطواطم مش الطماطم
طبعا انا احترت واحتار دليلي ولما سمعت الكلمة صح زادت حيرتي
لما كنت فاكراها بتقول طماطم قلت يمكن مرشوشة
لكن لما لقيتها بتقول طواطم قلت هم زرعوا حدانا في البلد
هجين جديد واني مش عارفة وللا آه؟
بس بصراحة ما رضيتش ابين جهلي مع اني متعودة ابينه
بس حسيت اني لو بينته لهويدا ممكن تتأثر شوية
فقعدت اهز راسي وهي تقول لازم نتخلص من الطواطم
يا خوانا ما تشوفوا الطواطم دي اذا كانت مشمومة نحرقها مع قش الرز
وبعدين مرينا بالتفتيشات اللي حكيت لكم عليها وبعدين فضلنا
نستنى كريم
نستنى كريم
نستنى كريم
نستنىىىىىىىىىىى كررييييييييييييييييييييييم
ولما سألتهم مالكم مأخرينه كده واحد قال لي
اصل الزيارة كتيرة النهاردة بس الشهادة لله هم اخروا معاه اربعة كمان
منهم واحد امه كانت بتعيط وتقول مش ح الحق اقعد معاه
ده عيان وشايل المرارة عايزة اشوفه
وواحدة واقفة جنبي سألتني سؤال الملكين في الاول رديت بحسن نية
بس لقيتها اكلت دماغي وانا مش حملها متوترة وجمال عمال يخوفنا
ويقول انا مش ح اطمن انهم ح يخلونا نزوره الا لما اشوفه بنفسي
وخصوصا بعد حادثة الطماطم ودي مسكتني
- انت من القاهرة
- آه
- اللي جوة ده اخوكي
- اه
- البنت الامورة دي (قصدها على روضة) اختك؟
- اه
- امال ام احمر (هويدا) دي مين
- بنت خالتنا
- انتوا معاكوا عربية
حسيت انها عايزة تروح معانا فقلت لها: لا
وطلع احساسي صح واحنا خارجين من عند كريم بصت لنا من
الميكروباص وقالت: ما انتوا معاكوا عربية خدوني معاكوا
!!!!!!!!!!!!
المهم جه اخيرا كريم الحمد لله انا كنت متخيلة انه ح يبقى منهار
لكن الولد بصراحة واد زي الفل متماسك وقوي
صحيح في وشه مسحة حزن بس مش انكسار
وثابت ولطيف وفرحان قوي اننا زرناه حسيت بمدى التقصير اللي ارتكبته
في حقه طول الفترة اللي ما زرتوش فيها لما شفت الفرحة في عينيه واحنا قاعدين معاه
وبصراحة بقى الواد ده اختلف معاه في كل حاجة
بس باحترمه وكفاية انه ما سكتش على فساد شافه وهو في السجن
ودفع تمنه وبرضه لسة متماسك وثابت
اهل كريم مش بيزوروه بس مامته بتبعت له جوابات
وهويدا طه متبنياه كأنها مامته بالظبط
قعدنا مع كريم وحسيت اني ما كدبتش لما البنت سألتني: اخوكي
وجاوبتها : اه
والوقت عدى بسرعة قوي
كريم بعد البلاغ اللي قدمه محاميه المباحث طلبته للتحقيق
جمال قال له ازاي المباحث تطلبك للتحقيق وهي الجهة اللي احنا
مشتكينها؟ المفروض النيابة هي اللي تحقق معاك
دلوقت كريم قاعد في تحقيق جنايات
الاول كان قاعد في حبس انفرادي خمسة وستين يوم
وبعد ما خرجوه منعوا الاقامة في الانفرادي
وبعدين نقلوه على حبس السياسيين وكان معظم اللي معاه اخوان واسلاميين وكده
وهو كان تمكن انه يعمل معاهم علاقات كويسة ويرتاح في صحبتهم
فلما لقوه مستريح قاموا ناقلينه لجنايات تحقيق
وفوق واقعة التعذيب دي بيكدروه طول الوقت وبيكدروا اللي يزوره كمان
كل الناس شافت قرايبها واحنا والاربعة منحوسين معانا لطعونا اكتر من ساعة
احنا خرجنا من بيوتنا الساعة ستة وتلت الصبح ما شوفناش كريم غير الساعة
تلاتة العصر
بعد ما خرجنا هويدا والاستاذ رمضان عزمونا في بيتهم
وقدموا لنا اكل حلو وبعدين مشينا لحد ما جمال وداني لعربيتي
نزلت انا ومجدي ركبنا عربيتي وتهنا برضه زي ما تهت وانا رايحة
تهت وانا راجعة ماهو انا مدام مافيش حد من صحابي جنبي يقول لي يمين شمال
باتوه
اليوم كان لطيف وفرحت قوي - برغم كل شيء - اني شفت كريم
وشفته بالتماسك والقوة دي
بس انا مش قاهرني ولا حازز في نفسي غير اني بعد العمر ده كله
يتقال لي في وشي: طواطم
الا ما اتقالت لي وانا عيلة بالعب الاولى على بسطة السلم
افتتح الجلسة الاستاذ احمد سيف الاسلام
الاستاذة جميلة اسماعيل كانت من ضمن الحضور
وحضر شوية من المدونين، جيمي هود، ومهندس مصري، وطبعا نورا ومنعم
وده الدكتور سيتي شنودة والحقيقة هو بيتكلم في حاجة مهمة جدا ما اعرفش ليه ماحدش مهتم بكلامه
المهم بقى من كتر ما دماغي ساحت من قلة الكافيين والتعطيل من الساعة اتنين للساعة اربعة
يعني دي صورة مفاجآة لمنعم، وفيه صورة تانية مش ح انشرها
وده مصطفى ظبطه وهو نايم
ودي نورا ظبطها وهي بتبعت مسج في وسط الاجتماع
