لبنان الكرامة والشعب العنيد...والمطرقع

وحشتوني يا عيال ويومين عدوا ووحشتني مصر وهدوء مصر وتهييس مصر :) وحشتني كلمة: يا عم احنا مالنا ما تخلينا في اللي احنا فيه...هو ايه اللي احنا فيه؟ ما اعرفش..اي موضوع يوجع الدماغ يبقى احنا مالنا خلينا في اللي احنا فيه
اوادم اللبنانيين والله، من ساعة ما توصل وهم بيبتسموا لك. طريق المطار منطقة انصار حزب الله، طريق المطار صور سماحة السيد، عماد مغنية، بعدها بشوية صور هيفاء وفضل شاكر، بعدين يافطة صفراء مكتوب عليها "لو جاء الكون كله...لن يعود الجنديين الا بالتفاوض غير المباشر والتبادل" وبعدها على طول صورة كبيرة قوي لنانسي عجرم وبعدين صور السيد وعماد مغنية وشهداء المقاومة وبعدين صور ملحم بركات وصابر الرباعي وهلم جرا.
ما اعرفش هم الفقرا هم انصار حزب الله وللا عشان هم انصار حزب الله هم فقرا، بس اكيد اكيد كل "المعترين" بلا استثناء من اول السواق والشيال والبياع الغلبان والجرسون اللي قال لي: الف ليرة متل الجنيه...الجنيه بيعمول شي بمصر؟ كمان الالف ليرة ما بتعمول شي...
كلهم بيحبوا حزب الله والسيد حسن بصرف النظر عن اساميهم طوني او علي: بتحبي السيد؟ يللي بيحب السيد منخدمه بعيونا
مش عارفة ليه الكرم الحاتمي المنار نزلوني في الماريوت، وكنت في نص هدومي...قاعدة في الاودة كأني نايمة على دم الشهدا ومكسوفة اطلب حاجة: ما سوينا شي..انت نورتينا بالمصري..هيدا اقل من الواجب

ظروف المعيشة صعبة كتير...تمانميت دولار ما بيعيشوا اسرة..كل شي غالي
كل حاجة سعرها كام في مصر؟ طب اضربها في اربعة وساعات خمسة وساعات....وااااااو
قميص نوم بالفين دولار...بيعمل ايه قميص النوم ده؟ بيقول ماما وبابا وبيروح المدرسة وبيضرب صواريخ على اسرائيل؟ برضه لو كده مش ح يسوى الفين دولار
قالوا لي جمال مبارك قبل العرس اجا هوني هوى وخديجة...واشتروا اشيا كتيييييير
بس انتوا مش باين عليكوا...شكلكوا بهواتي والالاطة واكلاكوا...يعني فقرا بهوات
يضحكوا: ايه والله...اللبناني لبسه ولا تأكله
سهام حيدرون اتصلت اول ما وصلت الفندق...بعدها بشوية اتصلت زينب رحال: بامرق عليك وبنضهر؟

انا عرفت زينب من الفيس بوك...لحد قبل ما اسافر ما كنتش اعرف انها صاحبة مدونة تأملات تافهة: انت يا ستي عايشة لي في دور عماد مغنية وطالعة لي بكذا شخصية؟ انت مش ع الفيس بوك قلتي لي انك صحفية؟ بتشتغل محاسبة وكان عندها مشاكل في الشغل لاسباب...طائفية واشياء اخرى...الجيب بتاعتها مش قصيرة...مش ضاربة شعرها في الخلاط...ومن برج البراجنة...بس الحمد لله المشاكل اتحلت وربنا نصفها وهي بتحكي لي تراكم المشاكل والاضطهاد اللي مالوش اي معنى لواحدة معاها شاهدتين جامعيتين وكفء وماعملتش اي جريمة وبعدين ربنا بعت لها مدير هندي حل المشاكل ضحكت وقلت لها: انت قريتي عليهم ورد وللا ايه؟ زينب طيبة قوي، لطيفة قوي، ذكية قوي، مثقفة قوي، شخصية مسئولة قوي، مرحة قوي، دمها خفيق قوي
قلبها محروق قوي، متألمة قوي، شايلة الهم قوي تحكي تحكي وابقى مش عايزاها تسكت
رحنا على المنارة، حاجة زي الفنار اللي عندنا في اسكندرية

اليومين اللي كانوا في لبنان كانوا مكثفين قوي ومليانين مشاعر متناقضة كتير وعرفت فيهم معلومات فوق طاقة مخي وفوق طاقة اليومين، عشان كده اول ما رجعت نمت...كان لازم افصل الفيشة
مش عارفة الحالة اللي متلبساني دي ح تفضل على طول وللا ده بس تأثير اليومين وبعدين ارجع زي ما كنت
اول ما رحت لبنان مريت بالمشاعر التالية
الترقب
الصدمة
صدمة جامدة موت
اكتشافات
نوة عياط (عياط بالمصري مش باللبناني)
ازبهلال
سعادة لدرجة البله
رايحة وانا ناوية اسمع كل الاطراف
راجعة وانا لابسة صورة السيد حسن ومش عايزة اشوف خلقة واحد يفتي في المقاومة وهو مش عارف حاجة
اتاريهم يا عيني عمالين يقولوا: انتو ما بتعرفوا شي...نحنا منعرف
تعرفوا ايه؟
.....الشأن اللبناني معقد
ولا معقد ولا حاجة....بس ..بس الكلام ما يتقالش يا ناس...حتى بجحة زيي مش عارفة ح اقوله ازاي
اللبنانيين عاملين كده

وشفت واحد مصري..في المنارة، اول ما بصيت في وشه عرفت انه مصري...زي ما بنعمل دايما بصيت له بفرح قلت له: انت مصري؟ ابتسم وفضل يدلع فينا عشان انا مصرية...وبعدين ابتدينا وصلة الندب اللي دايما نغنيها في كل حتة في العالم
الجرسون المصري بيقول للجرسون اللبناني: حاسب توقع القهوة...وقعها على المصرية تستحمل
انا: اه ما احنا حمالين قسية
الجرسون المصري: ما احنا غلابة...
صعبان علينا نفسنا بالقوي...واحسن حاجة اننا بنتكلم
تيجي تسأل في العلن اللبناني عن اللي واجعه يجاوب اجابة واحدة: الشأن اللبناني معقد
لما تقعد معاهم قعدة صفا ويفضفضوا تعرف ان لهم حق ما يتكلموش، مش عارفة اقول ايه؟ بس ح احكي لكم حدوتة
عويس وجعضيض اخوات وساكنين في شقة واحدة ايجار قديم وارثينها عن المرحوم والدهم، امهم واختهم معاهم. جعضيض تاجر شاطر، بس بيتاجر في كل حاجة، وعويس مش معترض على جعضيض بس: يا عمي تركني لحالي وعمول يللي بدك اياه
لا...يا تعمل زيي يا تبقى عدوي
عويس قال لجعضيض طيب انا ح ادفع ايجار الشقة، وح اخد اودة في الشقة وادفع لك ايجارها كمان من الباطن واقعد فيها مع امي واختي وانت: عمول يللي بدك اياه بباقي البيت
يا تعمل زيي يا تبقى عدوي
جعضيض عامل البيت كراخنة: كيف ما بدك...بس تركني وامك وخيتك لحالنا...
يا تعمل زيي يا تبقى عدوي
الجيران بيطلعوا الكرخانة بتاعة جعضيض وبيقضوا وقت لطيف يسكروا ونسوان وعيشة، وعويس قافل على نفسه وامه واخته الاودة، يسكر واحد من الجيران ويدخل على اودة عويس وامه واخته وراسه والف جزمة قديمة الا ينام مع اخته: طلع طلع
ييجي جعضيض: بتطرد ضيوفي؟ ما كانش العشم يا عويس...لو كان بابا عايش ما كنتش عملت كده
جعضيض ما عندوش مانع الجيران يناموا مع اخته وكمان امه لو ح يدفعوا...ما عندوش مانع؟ لا جعضيض كل ما اخته وامه يلاقوا لقمة حلال يسعى من وراهم عشان يقطع عيشهم ويجبرهم على الحرام
عويس ما يخلصوش...جاب قفل وحطه على باب اودته عشان يحمي امه واخته
كل ليلة جعضيض يسلط الجيران يتحرشوا بعويس ولما عويس يرد يرقع جعضيض بالصوت: شايفين؟ شايفين عويس بتاع مشاكل ازاي؟ كل يوم والتاني عامل لنا خناقة مع جار شكل
الجزار قال لجعضيض: طب وانت ايه اللي جابرك ع الحال ده...طفش امه..لك عليا كل يوم والتاني اخليه فرجة العالم لحد ما يطفش خالص من الحارة ومن البلد كلها
نزل جعضيض على القهوة اللي تحت البيت وقعد يعيط لاهل الحارة: اخويا...ابن امي وابويا...تصوروا واخد اودة من الشقة ومانعني ادخلها وحارمني اشوف امي واختي وبيوقع بيني وبينهم..وكل يوم متخانق مع الجزار وعامل مشاكل مع طوب الارض، وفيه ناس زي حضراتكوا كده طيبين..لكن الجزار كل يوم يطلع يكسر لنا الشقة...طب انا ذنبي ايه؟ اذا كان عويس شكلي وبتاع مشاكل
وعويس راجع من الشغل نداه معلم القهوة: ده اخوك...ابن امك وابوك...بقى تحرم عليه يدخل في ورثه؟ الاودة دي بتاعته زي ماهي بتاعتك...اتقي ربنا
عويس: والنبي يا معلم انت مش عارف حاجة
المعلم: عارف ايه؟
ح يقول ايه عويس؟ ح يقول اخويا بيشتغل في الدعارة؟ عيب...يتفها تنزل في عبه
في يوم جعضيض وواحد من الجيران كسروا القفل اللي على الاودة وداخلين على ام عويس وجعضيض واختهم جري عويس وقعد يقول: انت اتجننت يا جعضيض؟
وجعضيض ابدا مافيش..سكران و..أراب توب عليا
راح عويس قلع الحزام وهوش جعضيض بيه راح جعضيض باطح نفسه في الحيطة وهاتك يا صويت: يا ناس يا عالم اخويا بيضربني..سيح دمي
الناس اتلمت: هي حصلت يا عويس
عويس: كداب..ده هو اللي معور نفسه...هو اللي كسر القفل ودخل
الناس: وايه اللي يخليك تحط قفل على الاودة...البيت ده بيته زي ماهو بيتك بقى عشان كسر قفل تقوم تبطحه وتسيح دمه
عويس: انا اللي بادفع ايجار الشقة وبادفع له كمان ايجار الاودة
الناس: قصدك ايه من الكلام ده؟ عايز تطرد اخوك من الشقة؟ هي حصلت؟
عويس: اقول ايه...يا ناس..يا عالم...اخويا بيسرح نسوان...وعايز يسرح امي واختي، وعشان كده كل الجيران واقفين جنبه عشان بيستفيدوا منه
الناس: تؤ تؤ تؤ تؤ تؤ عيب يا عويس تقول على اخوك شقيقك كده..تتفها تنزل في عبك يا عويس
وطلع عويس هو الغلطان
---
احمد عز بيعمل ايه في البلد؟
طب احمد عز ملاك ينقصه الجناحين مقارنة باللي عرفته عن بتوع اربعتاشر اذار..بالمناسبة كلهم بتوع بزنس... وبزنس من الوسخ قوي...قوي...قوي.. لا لا ..انتو مش عارفين...قويييييييييييي، آه عشان كده المعترين بيحبوا السيد حسن، بدنا نعيش شعار شبه نحكم عقلنا كده
لا نحكم عقلنا؟ ده نحكم عقلنا ده قمر...بدنا نعيش يعني بدنا نشتوغل بالدعارة ونسكر ليل نهار
والكرخانة لازمها جو ملائم للابداع الفني
والمقاومة مش بتوفر الجو الملائم
بس..والله العظيم بس...والله العظيم بس...والله العظيم دي كل حكاية الشأن اللبناني المعقد
ناس عايزة الوطن كرخانة، وناس بتقول طب نقسم البلد نصين، خدوا حتة اعملوها كرخانة وسيبونا احنا برة الكرخانة...لا، يا تعمل زينا يا تبقى عدونا
-------
هنا الضاحية:
بالليل سهام عزمتني انا وبشرى من البحرين على العشا
بشرى ناشطة من البحرين...دمها خفيف قوي، والله حكت لي عن البحرين كلام
الا قولوا لي، هو اوسني عامل ايه؟
يا ترى عامل: مدرسة اوسني السرية لشلل الشعوب العربية؟
رجال الاعمال عاملين ايه في البلد في مصر؟
اهم هم والامراء في البحرين تافين في بق بعض، لدرجة ان فيه واحد من العيلة المالكة بنى سور جوة البحر...البحر بتاع ربنا، بنى فيه سور وقال: الحتة دي بتاعتي...ماحدش يصيد هنا
البياعين اللي بيقعدوا على الرصيف..واحد من العيلة المالكة معدي عليهم لقاهم بيبيعوا قال: ودول قاعدين كده؟ كل واحد عشان يقعد على الرصيف يدفع لي فلوس..ثم..ثم الارض دي بتاعتي بقى...امشوا من هنا
قعدنا في مطعم الضاحية مع سهام وبشرى، سهام ضحوكة وحبوبة وحنونة كأنها ام مع انها صغيرة في السن
جه بعد شوية بسام المذيع اللي المفروض يعمل معانا الحوار عشان يتكلم معانا
مين قال ان اللبنانيين عكس المصريين في كل حاجة؟ فيه حاجات اللبنانيين شبهنا فيها بالمللي
وفيه حاجات هم عكسنا تماما
شبهنا في ايه؟ دايما مبتسمين، كل حاجة يسخروا منها حتى نفسهم، مأفئفين ومتضايقين، دايما متضايقين بس دايما بيضحكوا عشان هم متضايقين، كل حدث مهما كان دامي طالع عليه عشر نكت يوجعوا بطنك من كتر الضحك...يضحكوا ويعيطوا في نفس الوقت (يعيط بالمصري مش باللبناني)
عكسنا في ايه؟ مش صعبان عليهم نفسهم زينا، يمكن بيحملوا نفسهم مسئولية اي حاجة طول الوقت
كل لبناني براسه، الاخبار بتقول ان في لبنان فريقين: فريق سلطة وفريق معارضة
بس اللي شفته ان فيه تلاتة مليون فريق، كل لبنان فريق لحاله على رأيهم
في القعدة الواحدة شخصية كل لبناني بتتغير زي البحر
لما قريت عن عماد مغنية انه كان عايش كذا حياة وكل مرة بوجه مختلف وسلوك مختلف وطبيعة معيشة مختلفة قلت: دي عيشة صعبة قوي..ممكن يكونوا بيبالغوا
بس لما تعرف اللبنانيين تعرف انهم بسهولة ممكن كل واحد فيهم يبقى عماد مغنية
حتى بسام وسهام كده
اللبناني لما بياخد موقف ما بيبقاش ماشي ورا حد...بيبقى ماشي ورا دماغه هو وبس ولو جابوا له ميت دماغ على دماغه مش ح يمشي غير ورا دماغه
اللبناني عمره ما يقول خلينا في اللي احنا فيه، ولا يقول وانا مالي يا عم انت ح توجع دماغي...كل حاجة اللبناني حاشر مناخيره فيها، كل حاجة في الدنيا تخصه
عشان فعلا كل حاجة تخص كل حد
طبعا احنا مش كده
نتكلم عن الانتخابات الامريكية يقولوا واحنا مالنا ما تخلينا في انتخابات مصر
وكأنه مثلا اللي بيقول كده بيستعبط...يعني هو مش عارف ان امريكا هي اللي بتحكم العالم؟
نتكلم عن الحريات في العالم يقولوا احنا مالنا
نتكلم عن كل حاجة يبقى واحنا مالنا....مع انه مالنا ومالنا...مع ان كل حاجة بتحصل في العالم بتخصنا وخاربة بيتنا..
- ليش ساكتين؟ مصر عظيمة ونحنا بنحبا...انتوا تمانين مليون..صابرين والله...بس ليش؟
الله الله...انتوا ح تتنططوا عليا وللا ايه؟
احنا مش ساكتين...بس نبقى زي العراق يعني؟
- اممممممممم وليش؟
معاهدة السلام... مش ساكتين...بس لازم ناخد حذرنا ..بنحاول تاتا تاتا ناخد ولو حق صغير بحرص... اللي عشاناه تحت قصف السلام تلاتين سنة اكبر بكتير من القصف اللي عشتوا تحتيه
تسعة وتسعين في المية من اوراق اللعبة كانت في ايد امريكا؟
بعد معاهدة السلام بقت مية في المية من اوارق اللعبة في جيب امريكا...بس احنا مش ساكتين
- الله يعينكوا
الناس في مصر...حتى سواق التاكسي اللي وصلني للمطار كلهم بيقولوا لي سلمي لنا على حسن نصر الله
زي ما العرب كل ما يشوفوا مصري يقولوا له: قول لنا نكتة...سلم لنا على عادل امام
بعد كده كل اللي ح يشوف لبناني ح يقول له: اضرب صاروخ...طلع اسير من جيبك...سلم لنا على حسن نصر الله
-------
شفت سمير القنطار ازاي؟
صحيت الصبح اتصلت بالمنار وطلبت نمرة غسان بن جدو لانه صاحبنا وقلت اسلم عليه
اتصلت بيه قال لي: تكوني باللوبي بعد عشر دقائق...بتجيلك سيارة تجيبك لهون
السيارة اللي جات مش بتاعة سواق، ده مراسل صحفي بس عملها خدمة وحكي شوية بس بحرص: يعني فيكي تعيشي بتمانميت دولار..بس مافي سيارة، مافي ساليلور، بس ع القد
وفيه ناس عايشين بعشرتلاف دولار...بس هني مانن اغنيا كتير...وفيه ناس...ناس..وكيف مصر بقا؟
دخلت مكتب غسان بن جدو وما كانش هو فيه ولقيته عامل معرض لغنائم حرب تموز الاخيرة

بس الخوذة والقميص بتوع قناة الجزيرة

الله يعز المقاومة...لولاها كان زمان راس غسان محطوطة في معرض اسرائيلي
اسرائيل عايزة تقفل مكتب الجزيرة في فلسطين المحتلة عشان غسان عمل لقاء مفتوح مع سمير القنطار، واحنا قاعدين وبشكل عابر غسان قال: ده سمير فوق
- سمير مين؟
- سمير القنطار
رقعت بالصوت: ايه؟ فوق فين؟
- فوق بيسجل..شو؟ بدك تشوفيه؟
- انت بتتكلم ازاي
- خلص...قعودي هون لانه بلش تسجيل

شوية وغسان قال لي تعالي نطلع، قبل ما يقول لي نطلع ابتديت افيد، بقى يتكلم معايا وانا اجاوب على حاجات تانية، قال لي مالك قلت له متوترة شوية، طلعنا وكان سمير القنطار لسة بيسجل
طول ما انا طالعة في الاسانسير عمالة احضر في خطبة طويلة عريضة استقبل بيها البطل ومش عارفة ركبي بتخبط في بعض وبطني بتكلبش وابتديت ادوخ..اول ما شفته ما حسيتش غير وحنفية مية سخنة اتفتحت في عينيا الاتنين وكلي بيترعش
قعدت وعمالة ابص له وهو بيتكلم ومش سامعة بيقول ايه خالص
انا بابص على تلاتين سنة من العذاب والالم والبطولة والتحمل
انا بابص على تلاتين سنة من "ما بدلوا تبديلا"
انا بابص على انتصار
انا بابص على عند وعزيمة
انا بابص على مناخير اسرائيلي معقوفة...مدعوكة في التراب ومكسورة والبطل دايس عليها
اول مرة اشوف بطل وانا كبيرة
وانا عندي تمن سنين شفت فتحي الشقاقي...ومع اني كنت طفلة مش فاهمة حاجة بس الهوا كان بيئز
الجو حواليه كان بيعمل كده: ازززززززززززز، وكان فيه احساس بالخفة كأن الواحد طاير وكأنك واقف على الفاصل ما بين العالم ده وعالم تاني كله انوار والوان
كنت طفلة والطفولة بريئة شفافة عشان كده الازيز بيبقى خفيف على نفس الاطفال
نفس الجو كان حوالين سمير القنطار، بس انا كبيرة، حسيت اني فقدت توازني واني ح اقع
اول ما خلص وقفت كان بسام القنطار وبسام القادري واقفين قلت لهم اسلم عليه
اول ما قرب وسلمت عليه اعصار من العياط وهو اتخض وبعدين ابتسم لي عشان يخفف عني: قعودي...جيبولا كاسة مي ...ارتاحي..ارتاحي
مش عارفة قلت ايه...يا رب ما اكنش خرفت، اكيد اكون خرفت لانه كان بيضحك
انا مش فاكرة غير جمل متقطعة: انا مش عارفة اقول ايه...انا مش مصدقة نفسي..انا شفتك خلاص اموت بقى
ضحك: لاااااااااا شالله بتعيشي مية وعشرين سني
- انا كنت محضرة كلام كتير...انا بابص على النصر..على بطل...على ولي من اولياء الله... ادعي لي... ادعي لي..ادعي لي (ييييي اديني عيطت تاني)
- الله يوفقك اهم شي...الله يوفقك
بسام القادري: اذا معك كامير ما تنسي تتصوري...
- اه صحيح...اتصور
وزي ما انتوا شايفين شكلي في الصورة مفحوتة من العياط

اه..افتكرت...الاسير المصري...انت عارف كل بني ادم في الدنيا له بلد تسأل عليه الا احنا...مالناش غير ربنا
سمير ما ضحكش..بان عليه الحزن والتأثر
ايه حكاية الاسير المصري: اياد ابو حسنة، من رفح المصرية، سنة 1989 دخل مع ايمن يونس الاراضي المحتلة لوحدهم من غير ما ينظموا ولا ينسقوا مع حد...دخلوا يعملوا عملية كده من دماغهم، اتقبض عليهم، وهم جوة السجن المساجين قالوا لهم: فيكوا تلتزموا مع حدا..لازم، ايمن يونس التزم مع فتح، وعشان كده طلع اياد ابو حسنة اختار حماس وعشان كده ما طلعش لحد دلوقت، هو مش من حماس، بس جوة السجن لازم يتبع لاي فصيل سنه دلوقت حوالي 39 سنة يعني كان عنده عشرين سنة لما اتقبض عليه
خلص سمير
مش عايزاه يمشي...وخايفة يقعد اكتر من كده يبقى فيه خطر عليه
انا ما مسحتش ايدي فيه واخدت بركة على وشي...متهيالي...متهيالي ما عملتش كده...يا رب اكون ما عملتش كده...يا نهار اسود..لا لا لا لا لا اكيد اكون ما عملتش كده
اه اه..افتكرت..معلش يا شباب صح افتكرت، هو انا مخي وزني اعمل كده، بس ربنا الهمني اني بدل ما اعمل كده اقول له: ممكن اسلم عليك تاني
سلمت عليه وبعد ما مشي استنيت ماحدش بيبص عليا ورحت ماسحة وشي وراسي مطرح ما سلمت عليه
مش ح تحسوا بالوقوف على الخط الفاصل ما بين عالم المادة وعالم الانوار غير لما تشوفوا سمير او حد زي سمير
الكلام ده حقيقة مش خيال

كنت اتمنى اشوف السيد حسن، بس انا كنت قاعدة يومين، لو شفت سمير الصبح والسيد بعد الضهر كان ممكن ارجع لكوا في صندوق اثر سكتة قلبية
مافيش انسان يستحمل كل الازززززززززز ده
------
هنا الضاحية...من جوة:
نصر الله ده مش السيد حسن...ده نصر الله تاني

رجعت على الفندق والاززززززززززززززز لسة حواليا...رجليا خفيفة على الارض..لسة هالة الطاقة لاحقاني، لقيت بشرى والسواق بتاع المنار مستنيني وبيأفئفو: وين كنتي
كنت مع سمير القنطار
بشرى: يا خااااااااااااااااااااااايييييييييييييييييييييييينننننننننننننننننننننةةةةةةةةةةةةةةة
طلعت بسرعة غيرت هدومي ورحنا على البرنامج هناك كان فيه شاب فلسطيني وشاب لبناني اسمه سليمان فرنجية بس مش سليمان اللي كان وزير واحد من نفس العيلة وبيشتغل المسئول الاعلامي في تيار المردة
خلصنا البرنامج ورحنا على المنار...التصوير ممنوع...المنار مستهدفة
طلعنا وكان اليوم خلصان والموظفين مشيوا مش باقي الا بتوع الهوا
عايزة اروح قبور الشهداء
زينب كلمتني على المنار: وينك؟
رايحة قبور الشهداء
خلص..بشوفك هونيك
تاني الاززززززززززززززززززززز
في قبور الشهداء

كان فيه زيارة...اهالي كتير كانوا موجودين
كل ما تدخل اكتر..الاززززززززززززز بيزيد وحنفيات المية السخنة اللي نازلة من عيني بقت مواسير

هنا

يرقد عماد مغنية بسلام

لا مؤاخذة...الموبايل وقع من ايدي...قعدت جنب القبر متربعة والمواسير طفحت من عينيا
امال ادهم الصفتي قال لي انصار حزب الله بيضربوا البنات عشان يتحجبوا في الضاحية ليه؟
امال دول ايه؟

لولا ان التصوير ممنوع في الضاحية كنت وريتكوا غيرهم...وعاملين تاتو كمان
طب امال فين انصار نصر الله عشان يضربوا دول

ليه يا ادهم كده؟ عموما انا فضحتك يا حبيبي :)) وقلت لهم فيه مدون اسمه ادهم الصفتي بيقول انه شاف كذا كذا بان عليهم الخنقة: نحنا ملينا والله

خفف الوطء
وامشي الهوين
هنا

يرقد عريس المقاومة
هادي نصر الله

اززززززززززززززز كتير عليا في لبنان
خصوصا اني جاية من وشششششششششششششش كتير في مصر
مشينا في الضاحية وكان ابتدا العمار
امممممممممم العمار اللي بيقولوا: المقاومة واخدة فلوسه من ايران
طيب وفلوس السوليدير؟
ششششششششششش اسكت يا لساني اسكت يا لساني ماهو انا ما رحتش يومين عشان الخبط لهم الدنيا
الشأن اللبناني معقد
ايه اللي مضايق فريق السلطة ان المقاومة بتعمل الاعمار؟
مع انها بتعمله سلف لحد ما السلطة تصرف التعويضات وهم ياخدوها ولو فيه فرق المقاومة تتحمله
بس لان فريق السلطة كان عايز يعمل الضاحية زي سولدير ويعمل عليها مناقصة واسهم والعبي يا مدرسة العاب
اسهم سعودي..اسهم امريكاني...اسهم..............اسرائيلي
وبيع يا جعضيض واكسب
والله ده مش بس له علاقة بالكرامة ده له علاقة بالامن
الضاحية بتاعة المقاومة والتصوير فيها ممنوع دلوقت، لما تتباع الضاحية اسهم وكل اللي ما يشتري يتفرج عليها يبقى السيد حسن - بعد الشر عليه انشالله اللي يتمناها له يا رب - يتنش بمنتهى السهولة، سيبك من السيد، المقاومة كلها تتنش، لان المنطقة بقت مكشوفة، مكشوفة على كل مستوى...والبضاعة تتباع بالفين دولار لقميص النوم، وطبعا ماحدش يشتري، ولما محدش يشتري صاحب المحل ياكل منين؟
ما علينا ما علينا كل واحد ونباهته بقى
لما مشينا في الضاحية ما كناش نعرف ان ممنوع التصوير صورت انا وبشرى وبعدين شاور لنا واحد من الحرس انه لا، نزلنا من العربية ورحنا لهم: احنا صورنا خدوا الكاميرات والصور وشوفوا ايه اللي عايزين تمسحوه وامسحوه
- والله منعتذر منكن بس هيدي احتياطات امنية
على قلبي عسل...اعملوا احتياطات امنية اكتر واكتر...التربص من جوة ومن برة
جعضيض عايز ياكل عيش
واسرائيل عايزة السيد
والصور احداثيات ممكن يستفيد منها الاعداء
بشرى قالت لي: اول مرة احب الاحتياطات الامنية
- لا خدي انت وامحيها...صورتي الشباب شي؟
لا انا مش مجنونة للدرجة دي هم عمارتين اللي صورتهم...واهم مسحتهم
- والله منعتذر منكن
لا احنا اللي بنعتذر
وليد جنبلاط زعلان من القفل اللي على الاودة...مع اني شفت بيته وهو عبارة عن ثكنة عسكرية
وبعدين رحنا مطعم الساحة..حاجة كده زي مبرة تبع السيد محمد حسين فضل الله الريع بتاعها بيروح للايتام
امال فين اللي بيضربوا الستات يا ادهم؟

هع هع هع معلش يا ادهوم
------
صحيح في مصر عشان تكره المقاومة لازم تكون غيران او مضحوك عليك والاتنين حالات انسانية يمكن التعاطف معاها
بس في لبنان عشان تكره المقاومة لازم تكون قواد بالمعنى الحرفي للكلمة، بكل تفاصيلها
مش عارفة ينفع الواحد يتعاطف مع الحالة دي وللا لا؟
-------
انا بطبعي مش باتعاطف مع القواد...ممكن اتعاطف مع العاهرة، تصعب عليا، لكن ما اقدرش اتعاطف مع حد بياكل من اعراض الناس، عشان كده وانا رايحة المطار في رحلة الرجوع لبست صور السيد حسن
في المطار
لبنانيين اغنيا قوي، قوي، قوي، تمانميت دولار يدوها بقشيش للسواق
بيبصوا لي من فوق لتحت
في المطار
شيالين وكناسين ومعترين وجيش يبصوا لي ويبتسموا ابتسامة بغمزة وكأنهم بيقولوا لي: أميه أميه
ولما اتكلم مصري قلبهم يبقى ح يقف من الفرحة ويبقى هاين عليهم يلفعوني على كتافهم ويوصلوني مصر مشي وهم شايليني
المساكين عندهم بوصلة انا باثق فيها
وكلهم زي بعض....في كل حتة في العالم
مساكين هناك زي مساكين هنا
والمساكين دايما صح، والا ما كانش الرسول صلى الله عليه وسلم يقول: اللهم احيني مسكينا وامتني مسكينا واحشرني في زمرة المساكين
اللهم آمين

خدوا دي تصبيرة هع هع هع

يعني يا اوسني ماهانش عليك ارجع مبسوطة من رحلتي؟

دول هم يومين ياربي ارجع الاقي اربعتاشر واحد معتقل عشان كانوا عاملين طيارة ورق عليها علم مصر وبيغنوا اغاني وطنية؟
ده ايه النحس ده يا ربي..ده ايه النكد ده؟
وانا اللي راجعة مبسوطة وحاملة لكوا اخبار كتييييييييييير حلوى وعمالة احضر في دماغي واسنجف ح احكي لكوا على الرحلة ازاي من طأطأ لسلامو عليكو وكنت عاملة لكوا مفاجأة مش ح تصدقوها
بس عشان مخكوا ما يروحش لبعيد ما شفتش السيد حسن ولا حاجة يعني...ومشيت وانا باعيط عشان كده
بس عندي مفاجأة بمليون جنيه
كانت بمليون جنيه قبل الخبر النكد اللي قريته في الطيارة وانا راجعة
اففففففففففففففففففففففففففف
تاني تاني تاني...راجعين للهم تاني
هم العيال عملوا ايه غير انهم بيحبوا مصر؟ وللا مصر جوزها بيغير عليها؟ دول في سن اولادها يعني
انام واصحى بقى واعرف الحكاية بتفاصيلها
واما نشوف ح احكي لكوا ازاي على الاخبار والمفاجئات الحلوة في جو النكد اللي ام الدنيا مستقبلاني بيه
كده برضه ياما؟ وانا اللي راجعة باقول وحشتيني؟

لبنان بكرة ان شاء الله

انا مسافرة لبنان بكرة ان شاء الله ح اسافر الاربع واقعد الخميس وارجع الجمعة ان شاء الله
عادة لما باسافر بابقى قلقانة لاموت
بس لو مت في لبنان ح ابقى فرحانة
ان شاء الله المفروض فيه برنامج يوم الخميس ح اصوره في المنار مش عارفة ح يبقى هوا وللا تسجيل ولا عارفة ح يتذاع الساعة كام ولا عارفة اي حاجة
كل اللي عارفاه اني احاول اخليهم يسألوا لي على اياد ابو حسنة ولو رجعت ان شاء الله ابقى اقول لكوا
دعواتكوا بقى اعرف اتكلم وما ازهقش واسكت كالعادة
:)

ويا ترى طباخ بن لادن كمان مجرم حرب؟

مجرم حرب؟ سواق...سوووااااااااق مجرم حرب؟
وعلى كده الدادا اللي ربت بن لادن كمان مجرمة حرب لازم يجيبوها ولو ميتة يطلعوا رفاتها ويعذبوه
والطباخ..مش هو اللي كان بيأكله ويقوته؟ يبقى مجرم حرب
والبقال اللي كان بيبيع له الشاي...هو اللي كان بيمده بالمزاج عشان يشرب الشاي ويمخمخ
وبياع الجرايد اللي كان بيجيب له الجرايد...هو اللي السبب في ان بن لادن يقرا الجرايد ويعرف الاخبار ويقرر يعمل عملية
والواد اللي ظبط له الدش على السطوح
والبواب
وبياع الخضار
والحلاق
والترزي
وصاحب المحل اللي باع له نضارة الشمس كان المفروض يسيبه يتعمي في الشمس
والكشك اللي كان بيشتري منه كارت الموبايل اتكلم براحتك
هو السبب في اتصال بن لادن بالشبكات الارهابية المهلبية
وظابط المرور اللي فتح الاشارة للسواق اللي كان بيسوق لبن لادن
كان المفروض يفضل مخلي الاشارة حمرا
كل واحد من دول مجرم اثيم وقاتل لئيم قتل الحضارة قتل المدنية والمعمار ولهذا ولكل هاتيك المجالي اطالب باعدام المذكور شنقا مع سبق الاصرار والترصد

مش انا الدكتورة شرين ابو النجا كتبت عني في الدستور؟

وفرحت قوي
فرحت قوي قوي قوي
فرحت قوي قوي قوي قوي قوي قوي قوي قوي قوي قوي قوي قوي قوي قوي قوي قوي قوي
اكتر من اي مرة اتكتب عني فيها
لسة قارياها حالا وانبسطت اكتر من اي حاجة خالص
الدستور بتاعة بكرة
ياااااااااااااا انا فرحانة جدا ان د.شرين ابو النجا عاجباها مدونتي
انا ح انام وانا فرحانة النهاردة
:)
تصبحوا على خير

يعني يسرا وهشام سليم احسن مني؟

انا كمان زيهم بقيت متخصصة في المرور عشان اليومين دول ورايا مشاوير كتير باخلص ورق
النهاردة في اشارة زحمة كنت فاتحة السبيكر بتاع التليفون وباتكلم قام امين الشوربة وقفني وقال لي ح تدفعي غرامة قلت له انا فاتحة السبيكر قال لي بس ماسكة التليفون بايدك قلت له ما انا ممكن ابقى ماسكة كوباية شاي في ايدي قال لي لا كوباية الشاي مش ح تشغلك زي الموبايل
قلت له: طيب انا ح ادفع الغرامة بس والنبي ترد على سؤالي
قال لي: والله العظيم ح ارد على سؤالك

قلت له: رئيس الجمهورية ورئيس الوزراء بيدفعوا كام غرامة لما بيعدوا في التشريفة ويعطلوا الناس؟
قال لي: اقول لحضرتك...(وركزوا والنبي في الكلام اللي ح يقوله عشان كلام مهم) انا ما اقدرش اقول لرئيس جمهورية انت ليه بتعمل تشريفة وتعطل الناس...اما بالنسبة لرئيس الوزراء فده راجل وراه شغل مهم ولازم يوصل له بسرعة
ههههههههههههههههه
يعني حتى امين الشرطة عارف ان الريس ما وراهوش شغل.... المهم
قلت له: بس رئيس الوزراء بياخد مننا ضرايب عشان يعمل الشغل ده مافيش داعي يعطلني...مش انت بتدفع الضرايب؟
قال لي: انا مش بادفع ضرايب انا باقف تسع ساعات في الشمس المفروض تدفعوا لي انتوا ضرايب
قلت له: ما انت بتدفع ضرايب انت مش عارف؟ وبعدين انت بتقف في الشمس تسع ساعات...انت بيتعمل لك تشريفة
قال لي: بصي يا انسة (طبعا وقعت في غرامه عشان قال لي يا انسة زي ما انتوا عارفين ) بصي يا انسة....احنا مسيرين مش مخيرين...هو حضرتك بتشتغلي فين؟
قلت له: في التلفزيون
قال لي: في التلفزيون وتدفعي غرامة؟ ده انا ممكن اخد الفلوس منك واحطها تحت البنورة للذكرى...لا خلاص بس انت في انهي دور..قلت له في التالت...قال لي: خلاص تبقى تنشري صورتي في التلفزيون..ح ابقى اجيلك..ح تديني كارت؟ وللا ح تفتكريني لما اجيلك
قلت له: لا ح افتكرك
طبعا لو قلت لي اني باشتغل في القناة اللي بتشتغل بدل الوشششششششش كان دفعني الغرامة دوبل

اخيرا وقع في ايدي ظباط التشريفة

والله ما اعرف مين ابن الكلب اللي كان معدي المرة دي بس وقفونا على مطلع كوبري اكتوبر مع اني نزلت من الشغل فور انتهاء الماشت عشان عربيتي بيضا وخفت حد يكسرها لي الدنيا كانت فاضية وعلى المطلع لقيت عسكري وامين شوربة بيوقفونا اول ما طلعنا لقيت ظابط بتلات نجوم وظابط تاني مش عارفة بقى رتبته ايه رحت مطلعة راسي وقلت له: انتوا مش ح ترحمونا من التشريفات دي بقى؟ اللي معدي في التشريفة ده بياخد مرتبه من ضرايبنا...كل يوم متعطلين كده؟
الظابط ابو تلات نجوم فضل يبص لي ويبتسم ابتسامة بلهاء والتاني كان بيبص لي بغيظ ونفسه يضربني والاتنين ما ردوش عليا وانا ما استنيتهمش قلت الكلمتين الواقعين بتوعي دول وانا متنرفزة ورحت طالعة بالعربية
وكل ما ح اشوف ظابط تشريفة ح اقول له كده
بس نسيت اقول لهم اننا بندعي عليهم هم واصحاب التشريفات
ملحوقة ما انا كل يوم متعطلة في تشريفة
الا مين المسئول النشط قوي ده اللي بيروح السيما كل يوم حفلة اتناشر ده؟

جلد اسود اقنعة بيضاء: الجزء الرابع من الفصل السادس

التهديد اليهودي بيستبدل بالقدرة الجنسية عند الزنجي. مانوني بيقول:

فيه منطق بيتكلم بيه العنصريين عشان يهاجموا المختلفين معاهم في الرأي

وانا شايف ان ذكره مهم لانه بيعكس سمة العنصريين:

نعم؟ يعني لو عندك بنت ح تجوزها لزنجي؟

انا اعرف ناس مش عنصريين ابدا اول ما يتواجهوا بالكلام ده بيفقدوا اي

حس نقدي وبيتلبخوا، لان السؤال ده بيعمل عدم ارتياح بداخلهم. (شبه احساس زنا المحارم) وبيرجعوا للعنصرية كنوع من رد الفعل الدفاعي.

قبل ما نكمل مهم قوي اننا نقول النقطة الاتية: بما اننا عارفين ان ميول زنا المحارم موجودة في اللا وعي، عايزين نعرف ليه الاحساس بيه مرتبط بالزنجي؟ يعني ايه الفرق ما بين جوز البنت الاسود وجوز البنت الابيض؟ هل القرف من زنا المحارم اللي شبه القرف من الزواج من زنجي الاتنين خارجين من اللا وعي؟ طب ليه ما نستنتجش ان الاب بيثور لما بنته تتجوز زنجي لان الزنجي ح يعرفها على عالم جنسي ما يعرفوش الاب ولا يملك مفاتيحه ولا صفاته؟

مع كل تقدم فكري بيحصل تضييق في مجال الممارسات الجنسية، الرجل الابيض عنده اشتياق لعصور الجنس المرخص، مشاهد الطقوس الجنسية، الاغتصاب اللي لا يستتبعه عقوبة، زنا المحارم غير المقموع. بشكل ما الميول دي هي استجابة لغريزة البقاء اللي بيتكلم عليها فرويد. وباسقاط كل الرغبات الجنسية اللي عند الرجل الابيض على الزنجي، الرجل الابيض بيمثل كأن الزنجي عنده كل ده. لما نيجي لمسألة اليهودي، المشكلة واضحة: هو مشكوك فيه لانه عايز يستحوذ على المال والسلطة. لكن الزنجي مثبت على الاعضاء التناسلية، وتم تثبيته عليها مهما حاول وفي اي مجال. مملكتين: الفكرية والجنسية. الانتصاب في كتاب "المفكر" لرودين هو تفكير صادم. البني ادم المحترم مش معقولة يبقى مثار جنسيا طول الوقت. الزنجي بيشكل الخطر البيولوجي، واليهودي بيشكل الخطر الفكري.

فوبيا الزنجي هي فوبيا بيولوجية. لانه هو بيولوجي وبس. الزنوج حيوانات. بيمشوا عريانين، والله اعلم بقى...مانوني بيقول: “في محاولاته لتشخيص انسان الغاب، كاليبان، الزنجي، وحتى اليهودي بصورة الاله ساتير الاسطورية (اللي نصه حصان نصه انسان) الانسان الابيض بيبان ان فيه نقاط حساسه في نفسه لدرجة ان التفكير بيتلخبط والرغبة الجنسية بتتصل بشكل غريب بالعدوانية والعنف.” مانوني ضمن اليهودي في المسألة وشايف ان ده ممكن يكون ملائم، لكن في المجال ده الزنجي هو الرئيسي، هو المتخصص، اول ما تقول اغتصاب يبقى زنجي.

(هامش من المؤلف: لما بنشوف نتائج علاج احلام اليقظة، ح نلاقي النموذج الاسطوري ده موجود في العمق، النموذج النمطي موجود في عمق التفكير الانساني، كل ما نغوص في العمق بنلاقي الزنجي يا اما بتجسيده يا اما برمزه/ انتهى هامش المؤلف)

في خلال تلات او اربع سنين سألت حوالي 500 ابيض اوروبي، فرنسيين، انجليز، المان، طلاينة، (وايه الطلاينة دول كمان؟ دول بينضربوا بالشبشب من بقية اوروبا وبيتقال عليهم طباخين/جبهة) وعرفت احوز على ثقتهم وارتاحوا لي: في كل حالة كنت باستنى لحد ما الشخص هو اللي يثق فيا ويتكلم معايا لوحده. يعني ايه يثق فيا؟ يعني يبقى متأكد ان الكلام اللي ح يقوله ليا مش ح اتضايق منه. واحيانا في الاختبارات النفسية كنت باحط كلمة "زنجي" ضمن ستين كلمة مثلا، وكان الربط ما بين الزنجي وبين المفاهيم كده:

الزنجي: بيولوجي، عضو ذكري، قوة، رياضة، قدرة، ملاكم، جو لويس، جيسي اونس، القوات السنغالية، متوحش، حيوان، شيطان، خطيئة.

وكلمة عسكري سنغالي استخدمت كمحفز، اثارة الرعب، دموي، قاسي، قوي

من المثير للاهتمام ان حوالي واحد كل خمسين رد فعلهم على كلمة زنجي كان: نازي، اس اس. لما نعرف معنى رمزية شكل

SS

النفسية، ح نعرف ان مافيش فرق بين الكلمة دي وبين الاجوبة التانية. (الاس اس دي وحدة لحراسة هتلر وبعد كده بقت مسئولة عن المخابرات والامن المركزي والسياسات والقتل الجماعي لمن اعتقدوا انهم اقل او غير مرغوب فيهم/ جبهة/ المصدر: ويبستر) كمان فيه اوروبيين ساعدوني بانهم ادوا الاختبار لمعارفهم: في الحالات دي النسبة ارتفعت قوي. ولازم اعترف ان النتائج دي اثرت عليا كزنجي: بقى عندي حالة من النفور.

الزنجي هو رمز بيولوجي. بيدخل البلوغ وهو عنده تسع سنين وبيبقى اب وهو عنده عشر سنين، دمه حامي، ودمه قوي، قاسي. زي ما واحد ابيض قال لي بمرارة: “تكوينكوا قوي ..كلكوا". ياله من جنس جميل، بصوا على السنغال...كانوا اسمهم "شايطيننا السوداء" اثناء الحرب. بس هم متوحشين، ما اقدرش اتخيل انهم يحطوا ايديهم الكبيرة دي على كتافي، انا بارتجف لمجرد تفكيري فيهم.

طيب خلينا واعيين بقى ان التفسير في احيان كتير لازم يبقى بالضد، انا فاهم السيدة الهشة اللي قالت لي انها في اعماقها نفسها زنجي قوي يضربها في كتافها الضعيفة لحد ما يصيبها بالكدمات. سارتر بيقول لما بتذكر كلمة "يهودية شابة" بيبقى فيه دخنة من الخيال اللي مليان اغتصاب وسلب. في المقابل، نقدر نقول لما بيذكر كلمة "زنجي وسيم" بيبقى فيه تلميح من نفس النوع. انا كنت دايما باستغرب من سرعة تحول جملة "زنجي وسيم شاب" الى جمل شبه "المهر الصغير" او الحصان. في فيلم "الصباح اصبح الكترا" جزء كبير من القصة مبني على الصراع الجنسي. اورين بيوبخ اخته فيني لانها معجبة بسكان جنوب البحر العراة الرائعين. ومش قادر يسامحها على الموضوع ده. (هامش من المؤلف اللي هرا امي هوامش: خلينا نتذكر ان الموقف الى حد كبير غامض. اورين برضه بيغير من خطيب اخته، على المستوى النفسي ممكن شخصية اورين تتحلل كده: اورين اللي بيعاني من عقدة التخلي متعلق بامه ومش قادر ينفس عن رغباته الجنسية. لاحظ، مثلا، معاملته لخطيبته. اخته فيني بقى متعلقة بابوها وبتثبت لاخوها ان امهم كانت ست خاينة. بس عشان ما نعملش اخطاء، تصرفاتها هي مشروع اتهام. ولما اورين بيحصل على دليل خيانة امه بيقتل عشيقها. وكرد فعل هي بتنتحر، رغبات اورين الجنسية المقموعة اللي بينفسها بطريقته بتتوجه ناحية اخته، فيني بسبب تصرفاتها وشكلها بتحل محل امه. بعد كده اورين بيتحول لاوديب بس بالنسبة لاخته – والفيلم بيعالج النقطة دي بطريقة كويسة قوي – عشان كده اورين بيثور ويندب ويلوم اخته لما بتعلن جوازها. بس صراعه مع خطيبها عاطفي، بينما صراعه مع الزنوج السكان الاصليين بيبقى صراع على المستوى التناسلي والبيولوجي/ انتهى هامش المؤلف..ما كان يضمنه في الكتاب وخلاص) تحليل الواقع دايما صعب. اللي بيبحث ويحقق ممكن يختار ما بين تصرفين تجاه الموضوع بتاعه. ممكن يكتفي بالوصف زي طريقة التشريحي اللي بيوصف عضم قصبة الرجل وبيصاب بالذهول لما حد يسأله وانت عندك كام عضمة؟ وده لان ابحاثهم دايما على غيرهم، عمرهم ما بيفكروا انهم هم نفسهم مادة للبحث. في بداية دراستي للطب، بعد عدد من الجلسات اللي تغمم النفس في غرفة التشريح، سألت زميل ليا اقدم شوية ازاي اتجنب احساسي بالغثيان، "صديقي..تظاهر بانك بتشرح قطة...وكل حاجة ح تبقى كويسة" (يا سلااااااام يعني هم القطط ما لهمش دية يعني؟ مش بني ادمين زينا زيهم؟/جبهة). لكن لو اختار المحلل اسلوب تاني وهو الاول يوصف الواقع وبعدين يحاول يغيره. من حيث المبدأ، قرار انك توصف الواقع يبدو انه نوع من انواع التناول النقدي، ولذلك فيه احتياج اننا مدام انتقدنا يبقى لازم نوجد حل. الادب السردي والادب التحليلي الاتنين خلقوا قصص كتير عن الزنوج المقموعين. لكن تجميعهم مش ح يساعدنا في مهمتنا الحقيقية، وهي ان نكشف عن الياتهم. احنا ما يهمناش اننا بس نجمع حقائق ونرصد سلوك، ولكن اننا نعرف معانيهم. وهنا نقدر نشير لكاسبر لما كتب: “الفهم العميق لمثال معين ح يمكنا من اننا نعمم الظاهرة ونفهم عدد كبير من الحالات. عادة اللي بنفهمه كويس مرة بنقابله كتير. المهم في دراسة الظواهر اننا ندرس عدد قليل من الافراد ونفهمهم بعمق وده اهم من دراسة سطحية لعدد كبير من الافراد. السؤال هو: هل يقدر الابيض انه يتصرف بشكل صحي تجاه الاسود والعكس؟

ممكن حد يقول ده سؤال مزيف. بس لما نتأكد من ان الثقافة الاوروبية عنده صورة معينة للزنجي ومنها بيخرج كل الصراعات يبقى احنا لما بنتكلم كده مش بنبعد عن الحقيقة. في فصل اللغة شفنا ان على الشاشة صورة الزنجي النمطية بتتأكد. حتى اكثر الكتاب جدية ادوا نفسهم الحق انهم يتكلموا نيابة عن الزنجي، ونلاقي مايكل كورنوت بيكتب:

سيف الزنجي هو سيف حقيقي، لما بيطعن بيه زوجتك بتحس بشيء مختلف، وهو اكتشاف الحقيقة.

وفي الهوة اللي بيسيبها السيف لعبتك الصغيرة تتوه، مهما ضخيت لحد ما الاودة تتملي

بعرقك وممكن تبقى كأنك بتغني. دي نهايتك...لان اعضاء الزنجي التناسلية ممكن تدخل

في كاتدرائية، ولن يتركوا المبنى حتى تخمد شهوتهم، وفي المربعات الضيقة لن يكون

الامر بسيطا

(لامؤاخذة يعني..ايه الخيال العلمي ده)

وعشان يبقوا مرتاحين من غير مشاكل بيفضلوا الهواء الطلق، لكنهم بيتواجهوا باهانة مستمرة:

النخلة، شجرة العيش، وكل الاشجار الكبيرة السامقة واللي عمرها ما بتخضمع لامبراطورية، منتصبين للابد وبيوصلوا لارتفاع لا يمكن بلوغه باي حال من الاحوال

(انتهى مقتطف الراجل المجنون)

لما الواحد يقرا المقتطف ده عدة مرات ويسيب نفسه للفكرة اللي فيها يبقى مش ح يشوف الزنجي خالص، لكن ح يشوف عضوه التناسلي. الزنجي نفسه ح يتلاشى. وح يتحول لعضو تناسلي، وسهل قوي تتصور ايه اللي ممكن صورة زي دي تثيره في نفس فتاة صغيرة من ليون. الرعب؟ الشهوة؟ مش اللا مبالاة على كل الاحوال. دلوقت، ايه الحقيقة؟ متوسط طول العضو التناسلي للرجل الاسود كما يقول دكتور باليه نادرا ما يزيد عن 120 ميلي متر (4.6244 بوصة). تيستات في كتابه خصائص الانسان التشريحية بتقول نفس الكلام عن الرجل الاوروبي. لكن الحقائق دي مش بتقنع حد. الرجل الابيض مقتنع ان الزنج وحش، ولو مش ح ينبهر بطول العضو التناسلي يبقى ح ينبهر بالقدرة الجنسية للزنجي. لما بيواجه الراجل اللي هو "مختلف عنه في كل حاجة" بيحس انه محتاج يدافع عن نفسه. بقول اخر، هو بيجسد الاخر. الاخر هو دعامة افكاره ورغباته. (ام هامش من ام المؤلف: فيه كتاب قبلوا فكرة التحامل على الاسود وحاولوا يفسروا ليه الرجل الابيض مش قادر يفهم الحياة الجنسية للرجل الاسود وبنلاقي دي بيدرال كاتب كلام وان كان صحيح الا انه مش بيوصل لعمق اسباب الرجل الابيض في التحامل على الاسود وبيقول: الطفل الزنجي لا بيتفاجئ ولا بيتكسف من الحقائق التناسلية، لان اهله بيقولوا له كل حاجة، وده واضح، من غير ما نقع في غموض التحليل النفسي، وعشان كده الطريقة المختلفة دي في التربية بتأثر على طريقة تفكيره ومن ثم طريقة تصرفه، وبما ان الجنس بيتقدم له على اساس انه اكتر حاجة طبيعية واكتر حاجة جديرة بالثناء، لانها هي السبب في الحمل، فالافريقي ح يفضل يحتفظ بالنظرة دي لاخر لحظة في حياته، بينما الاوروبي طول حياته بيفضل محتفظ بعقدة الذنب تجاه الجنس اللي ولا التجربة ولا العقل ح يفلحوا في محوها، وبالطريقة دي الافريقي بيميل لانه يشوف حياته الجنسية انها جزء من حياته السيكولوجية بالظبط زي الاكل والشرب والنوم، وطريقة التفكير دي بتتفادى التشتيت اللي الاوروبي بيعاني منه عشان يتصالح مع ضميره واحساسه بالذنب وعقله المتردد وغريزته المقموعة (كل اللي بيعملوه ده ومقموعة؟/جبهة) وعليه فالاختلاف الاساسي مالوش علاقة بالطبيعة او التكوين الجسدي، ولكن له علاقة بالمفهوم، وعليه كمان فان غريزة التكاثر واللي نزعت الهالة المقدسة اللي موجودة في ادبنا القديم المزرخرف، ماهياش فكرة مسيطرة على دماغ الافريقي زي ماهي مسيطرة على دماغنا، بالرغم من كلام الكتير من تلامذتنا اللي شرحوا اللي شافوه من خلال منهج احادي في تحليل انفسهم/ انتهى هامش المؤلف) العاهرة اللي كنت جبت سيرتها قبل شوية، بتقول لي ان بحثها عن الزنجي ابتدى لما سمعت حكاية: في ذات ليلة امرأة كانت مع زنجي في السرير واتجننت، وفضلت مجنونة لمدة سنتين، ولما خفت رفضت انها تنام مع حد تاني، العاهرة ما تعرفش ايه اللي جنن الست، لكنها بتحاول تحقق اللي حصل مع الست دي معاها هي. عشان تعرف السبب اللي لم يذكر. يبقى لازم نلاحظ انها بتدور على التدمير والذوبان لذاتها على المستوى الجنسي. كل تجربة مع اي زنجي بتؤكد محدوديتها، هذا الهذيان الخاص بالنشوة الجنسية عمره ما اتحقق. مش عارفة توصل للي هي عايزاه فبتنتقم من نفسها بانها تسيب نفسها فريسة للاحتمالات.

فيه حاجة بس لازم نذكرها: الست البيضا اللي بيبقى لها صديق اسود بتلاقي صعوبة في انها تصاحب بعد كده راجل ابيض، او على الاقل الرجالة البيض مؤمنين بكده: “مين يعرف هم ممكن يدوا ايه للست؟" صحيح مين يعرف، ماحدش يعرف فعلا. انا ما اقدرش اتجاهل تعليق ايتيامبل:

الغيرة العنصرية هي اللي بتنتج جرائم العنصرية:

بالنسبة لرجال بيض كتير الرجل الاسود هو عبارة عن هذا السيف الهائل اللي

ما ان يلبث ان يطعن زوجاتهم حتى يجعلهم يبدون صغارا، احصاءاتي

لم تفلح في ان تمدني بالوثائق في هذه النقطة، بس انا عرفت زنوج وبعض

النساء البيض اللي عملوا علاقات مع زنوج، واخيرا سيدات زنجيات عملوا

علاقات مع رجالة بيض وسمعت اسرارهم وعرفت منهم اللي يخليني أحزن على السيد

كورنوت اللي استخدم موهبته عشان يجدد اساطير بتدي للرجل الابيض

مبررات مزيفة: احساس بالعار، التشكك، وبالتالي فعال بشكل مضاعف.

معرفة الحقيقة مهمة لا تنتهي، بنراكم الحقايق، ونناقشها، ولكن مع كل سطر بيتكتب، ومع كل مقولة بنقولها، برضه الواحد حاسس ان فيه حاجة ناقصة. جابريل داربوزيه كتب يهاجم سارتر ويقول:

هذه المقتطفات اللي بتحط الانتيل والغانيين والسنغال والملاجاش كلهم زي بعض، بتخلق حالة من

الارتباك. بالطريقة دي هو بيقرر المشكلة الثقافية للبلاد اللي عبر البحار باجتزائها من

حقيقتها الاجتماعية والتاريخية الخاصة بكل واحدة فيهم، ومن شخصيتها القومية

والاختلافات في الظروف اللي فرضت عليهم من قبل الاحتلال بالاستغلال والظلم.

وعليه فلما كتب سارتر "لما يبحث الزنجي في عمق ذاكرته ويفتكر

انه كان عبد هو كده بيأكد ان المعاناة هي قدر الانسان وانها ذات قيمة بهذا المفهوم" هل سارتر اخد

في اعتباره معنى الكلام ده بالنسبة لواحد من الهوفا؟ او مغربي؟ او توريج؟ او بويل؟ او من الكونغو؟

او من ساحل العاج؟

والله اعتراض الراجل معقول، وينطبق عليا انا كمان، في البداية كنت عايز احدد نفسي في الانتيل، بس بصرف النظر عن التبعات، الجدل اخد مداه وكنت مدفوع باني اشوف ان الانتيل هو نموذج لكل الزنوج. ومع ذلك مش ممكن نتجاهل ان فيه زنوج اللي جنسيتهم بلجيك وللا انجليز وللا فرنساويين وكمان فيه جمهوريات للزنوج. ازاي الواحد يدعي انه مسك الجوهر بينما حقايق زي دي محتاجة ان الواحد يلاحظها؟ الحقيقة ان العرق الزنجي تم بعثرته، وما نقدرش ندعي وحدته. لما قوات إيل ديوس غزت اثيوبيا حصلت حركة وحدة بين كل الملونين، لكن بالرغم من ان طيارتين او تلاتة ارسلتهم الولايات المتحدة الامريكية للبلد اللي عانت من الغزو، مافيش اسود واحد اخط اي خطوة عملية. الزنجي عنده بلد، بياخد مكانه في الكومونويلث. وكل وصف لازم يتاخد على انه ظاهرة متفردة، بس تاني برنجع للمفاهيم المطلقة. الوضع العالمي للزنجي فيه غموض، لكنه بيتحل بوجوده المادي. وده تشابه بينه وبين اليهودي، اللي ح اقوله ده ضد كل الجدليات اللي طرحتها: اينما ذهب الزنجي فهو زنجي وفقط.

في بعض البلاد الزنجي دخل في الثقافة. وزي ما قلنا قبل كده، ح يبقى صعب اننا ننسب اهمية كبيرة للطريقة اللي الاطفال البيض بيتعاملوا بيها مع حقيقة الزنجي. في الولايات المتحدة مثلا، حتى الطفل الابيض اللي مش عايش في الجنوب واللي فيه سود كتير، الا ان الاطفال البيض حتى اللي في الشمال بيتعرفوا على الزنجي من خلال اسطورة انكل ريموس. (في فرنسا موازي له انكل توم/المؤلف) (انكل توم وانكل ريموس هو الاسود اللي بيعمل قرد عشان ينال رضا الرجل الابيض/جبهة) ابن سالي وجون بيقعد يسمع بخليط من الخوف والاعجاب لقصص الارنب برير (اه كده ح اضطر احكي لكوا الحكاية من الاول، بقى فيه زمان قصص من الفلكلور الامريكي عاملة زي كليلة ودمنة كده، الراوي كان انكل ريموس العبد اللي من الجنوب، والقصص كلها عن الحيوانات والشخصية الرئيسية فيها كانت الارنب برير/جبهة). برنارد وولف بيقول ان التناقض اللي موجود في الرجل الابيض ده هو اهم سمة في الشخصية الامريكية. واستنادا على قصة حياة جويل تشاندلر هاريس (اللي هو مؤلف مجموعة قصص انكل ريموس/ جبهة) وولف بيقول ان الاعجاب بالاسود بيوصل عند الابيض لدرجة التوحد معاه.

فحوى القصص دي واضح قوي، الارنب برير بيتصارع مع كل الحيوانات اللي في الدنيا، وطبعا هو دايما الكسبان. القصص دي بترجع للتراث الشفهي للزنجي المزارع. عشان كده من السهل اننا نلاحظ ان الزنجي متخفي في الارنب، وبيبان ده من طريقة سخريته. عشان يحموا نفسهم من مازوخيتهم اللا واعية، واللي بيدفعهم للاعجاب المبهور بالارنب او الاسود، حاول البيض انهم يصرفوا القصص دي في امكانياتهم العدوانية. وبالطريقة دي عرفوا يقنعوا نفسهم ان "الرجل الاسود بيخلي كل الحيوانا تتصرف كأنهم التنظيم الاقل للذكاء الانساني، النوع اللي بيفهمه الزنجي. الانسان الاسود بيحس انه على اتصال اكثر حميمية بالحيوانات الطيبة اكتر من الرجل البيض، واللي هو احسن منه على كل مستوى". وفيه بقى منهم ناس طوروا النظرية دي، وببجاحة بيقولوا ان القصص دي مش نتاج الاحوال السيئة اللي بيمر بيها الزنجي في الولايات المتحدة الامريكية، لكن دي اثار من القصص الافريقية. وولف بيشرح لنا التفسير ده:

واضح بالدليل القطعي ان الارنب برير حيوان لان الزنجي لازم يبقى حيوان

الارنب غريب لان الاسود لازم يبقى موسوم بانه غريب وده موجود في

الكروموزومات بتاعته. من بداية العبودية، ذنب الجنوبي المسيحي والديمقراطي

اللي نتج عن استعباده للاسود بيدفعه دايما انه يعمل حيلة دفاعية ويصف

الاسود بانه حيوان، وعمره ما ح يتغير، افريقي وح يفضل افريقي. ولو

الاسود لقى نفسه متصل بفصيلة الانسان باي وسيلة يبقى هو ضحية

صفاته الوراثية اللي جابها من جدوده في الادغال مش ضحية الرجل الابيض

عشان كده الجنوبي بيرفض يشوف في القصص دي العدوان اللي بيوجهه الاسود ناحيته. لكن وولف بيقول ان مؤلفات هاريس كانت سايكوباتية:

هو كان ماهر في الكتابة دي لانه كان مفعم لدرجة الانفجار بامراض العنصرية

اللي كانت بتعذب الجنوبي وكل الامريكان بدرجة اقل. بالنسبة لهاريس زي ماهو

بالنسبة لبيض كتير الاسود هو النموذج العكسي للذات القلقة للابيض، الاسود:

مش قلق، مستأنس، سلس، عضلاته مسترخية، ما بيزهقش ابدا،

او سلبي، بيستعرض اعضاءه التناسلية من غير ما يتكسف، ماعندوش احساس

بالشفقة على الذات بالرغم من معاناته الضخمة

لكن هاريس كان دايما عنده احساس انه معوق، عشان كده وولف كان دايما شايفه مقموع – لكن مش بالمفهوم التقليدي: هو ماقدرش يتصرف بالشكل "الطبيعي" بتاع الزنجي بسبب جوهره الانساني. ماحدش منعه؛ بس هو ده كان مستحيل بالنسبة له. مش محرم، بس لكن غير مدرك. لانه حاسس انه مقموع من تصرفات الزنجي التلقائية فهو عايز يقمع الزنجي، وبيحاوطه بالممنوعات من كل نوع. وبكده يبقى الرجل الابيض ضحية اللا وعي، وولف بيقول:

قصص ريموس هي رمز للتناقض اللي موجود في الجنوب.

هاريس، وهو النموذج النمطي للجنوبي، بيدور على حب الزنجي

وبيدعي انه حصل عليه من خلال ابتسامة الزنجي

(فاكرين رواية ذهب مع الريح؟/جبهة)

وفي نفس الوقت كان بيناضل عشان يحصل على كراهية الزنجي من خلال

شخصية الارنب برير، واعلنها بشكل صاخب، بطريقة مازوخية غير واعية – وممكن

جدا يكون بيعاقب نفسه على انه مش هو الرجل الاسود، الزنجي النمطي، المعطاء بشكل

مذهل. ومن الممكن ان الابيض الجنوبي ويمكن كل البيض

بيتصرفوا تجاه الاسود بنفس الطريقة

هنا دولة جتها نيلة اللي عايزة خلف

يا خيبتي ياما...حد يعمل كده برضه؟
دول عاملين زي البتش اللي بدبلون التشيجارة اللي كانت بتحب سواق الميكروباظ وبعد ما اخد منها اعز ما تملك سابها واتجوز بنت عمه وهي مش عارفة تعمل له حاجة غير انها كل شوية تكلمه من السنترال وتقول له: خلي بالك عمرك ما ح تكسب ولا تربح...وح تخلف بنت وح يقعد لك في بناتك
الا كل الناس شمتانة فيهم وانا الوحيدة اللي متغاظة...متغاظة...متتتتتتتتتغااااااااااااظظظظظظظظظة

بقى احنا كنا بنخاف من دول؟
دول؟
دوووووووووووول؟
واتهزمنا منهم مرتين ونص وعملنا معاهم سلام عشان بياكلوا العيال الصغيرة؟
النبي تعوض عليا عوض الصابرين يارب جتهم خيبة
قال وبيتصلوا بالناس يقولوا لهم: هنا دولة اسرائيل...جتها نيلة اللي عايزة خلف
جتها وجتنا ستين نيلة
جتنا ستين الف نيلة
قال وبيقولوا حزب الله احرج الحكومات العربية؟ لا ما احرجش الحكومات العربية ولا حاجة هي يعني الحكومات العربية عندها دم عشان تحرج؟
ده احرجنا احنا
احرجني انا شخصيا
يا حيطة داريني
اظرف حاجة قالوها ايه؟
غير يعني انهم يعاكسوا الناس في التليفونات زي العيال المراهقة
قال بيقولوا قال: ازاي يحتفلوا بسمير القنطار اللي قتل طفلة
دي نكتة
بس اللي مش نكتة فعلا ان فيه كتاب عرب اوساخ بيرددوا الكلام ده، بعيدا عن سمير القنطار كلف نفسه ورد على الكلاب دول وقال انه مش هو اللي قتلها ده هم اللي قتلوها ولبسوها فيه وبعيدا عن سمير القنطار اصدق طبعا، وحتى كلامه اقرب للمنطق
انا عايزة بس اتأكد ان الكتاب العرب اللي بيكتبوا الكلام ده بيقبضوا كويس والنبي
عشان مش معقولة يبيعوا دنيتهم واخرتهم بفلوس قليلة
يااااااااااااارب يااااااااااااااااا ررررررررررببببببب يكونوا بيقبضوا كويس
ح نعمل ايه في اياد ابو حسنة؟
مش ح نختشي على دمنا بقى؟

ارسل الى العالم للافراج عن الاسرى

لو سمحتوا ابعتوا للعناوين دي رسائل بتطالب بالافراج عن الاسرى
واياد ابو حسنة ده اللي مالوش حد يسأل فيه...ياربي، يعني الفلسطينيين لهم حد يسأل فيهم واحنا حكومتنا الوسخة مشردانا كده
ياريت تراسلوا العناوين دي على تلات دفعات

sstanzanino@spamnpwj.org, gdellalbano@spamnpwj.org, adentamarono@spamnpwj.org, gpaciaronino@spamnpwj.org, lpeconino@spamnpwj.org, scergnulno@spamnpwj.org, nfigatalamancano@spamnpwj.org, nwonline@toronto.cbc.ca, letters@nytimes.com, letters@nationalpost.com, info@britishembassy.org.eg, center@embjapan.org.eg, buster@startribune.com, davis@jsonline.com, heralded@herald.com, jotimes@jpf.com.jo, globalnational@canada.com, info@buenosairesherald.com, letters@globe.com, editor@bangkokpost.net, 2020@abc.com, lastword@canada.com, info@expresstorussia.com, president@whitehouse.gov, inquiries@un.org, pm@pm.gc.ca, accreditamenti@pressva.va, delegation-new-york-euinfo@cec.eu.int, usa@un.int, germemb@tedata.net.eg, reyadhb@state.gov, consularcairo@state.gov, cdr@esteri.it, cairo@dfait-maeci.gc.ca

==============

peterjennings@abcnews.com, russell_feingold@feingold.senate.gov, senator@biden.senate.gov, senator@dorgan.senate.gov, senator_leahy@leahy.senate.gov, senator_lugar@lugar.senate.gov, senator@shelby.senate.gov, senator_bingaman@bingaman.senate.gov, emven@netvision.net.il, consular@botschaft-venezuela.de, audsvcs@cbs.com, nightly@nbc.com, tips@komo4news.com, newstips@kirotv.com, info@consulado-ny.gov.ve, uk@un.int, romano.prodi@cec.eu.int, civis@europarl.eu.int, epbrussels@europarl.eu.int, public.info@consilium.eu.int, belrep@belgoeurop.diplobel.fgov.be, christian.jouret@consilium.eu.int, javier.sancho-velazquez@consilium.eu.int, editor@villagevoice.com, lettertoed@thestar.ca, letters@thenation.com, newseditor@independent.co.uk, reader@guardian.co.uk, editorial@dailystar.com.lb, emailnews@smh.fairfax.com.au, sspears@sptimes.com, news@ctv.ca, national@cbc.ca, nwonline@toronto.cbc.ca, ososos777@yahoo.ca, letters@herald.co.nz, letters@nytimes.com, letters@nationalpost.com, info@britishembassy.org.eg, center@embjapan.org.eg, buster@startribune.com, davis@jsonline.com, heralded@herald.com, globalnational@canada.com, info@buenosairesherald.com, letters@globe.com, editor@bangkokpost.net, 2020@abc.com, lastword@canada.com, info@expresstorussia.com, president@whitehouse.gov, inquiries@un.org, pm@pm.gc.ca, accreditamenti@pressva.va, delegation-new-york-euinfo@cec.eu.int, usa@un.int, germemb@tedata.net.eg, reyadhb@state.gov, consularcairo@state.gov, cdr@esteri.it, france-presse@un.int, rusun@un.int, chinamission_un@fmprc.gov.cn

================

egypt@un.int, letters@vheadline.com, velazquez@consilium.eu.int, audsvcs@cbs.com, nightly@nbc.com, tips@komo4news.com, newstips@kirotv.com, peterjennings@abcnews.com, senator@biden.senate.gov, senator@dorgan.senate.gov, senator_leahy@leahy.senate.gov, senator_lugar@lugar.senate.gov, senator@shelby.senate.gov, senator_bingaman@bingaman.senate.gov, veneconsul@setarnet.aw, info@consulado-ny.gov.ve, hrwnyc@hrw.org, chicago@hrw.org, headquarters@costaricarios.com, info@casapres.go.cr, ctuws@link.net, geramono@spamnpwj.org, ngiovanninino@spamnpwj.org, mschulthesno@spamnpwj.org, epolizzottono@spamnpwj.org, aiusane@aiusa.org, aiusaso@aiusa.org, center4justice@cja.org, public.info@consilium.europa.eu, press.office@consilium.europa.eu, visits-publicevents@consilium.europa.eu, letters@herald.co.nz, hrwla@hrw.org, action.news@organizerweb.com, webmaster_eg@mfa.gov.cn, france-presse@un.int, rusun@un.int, chinamission_un@fmprc.gov.cn, uk@un.int, romano.prodi@cec.eu.int, civis@europarl.eu.int, epbrussels@europarl.eu.int, public.info@consilium.eu.int, belrep@belgoeurop.diplobel.fgov.be, christian.jouret@consilium.eu.int, javier.sancho-velazquez@consilium.eu.int, editor@villagevoice.com, lettertoed@thestar.ca, letters@thenation.com, newseditor@independent.co.uk, reader@guardian.co.uk, editorial@dailystar.com.lb, emailnews@smh.fairfax.com.au, sspears@sptimes.com, news@ctv.ca, sg@un.org, hrwsf@hrw.org, hrwuk@hrw.org, hrwbe@hrw.org, hrwgva@hrw.org, berlin@hrw.org, toronto@hrw.org, hrwpress@hrw.org, crawshs@hrw.org, shahu@hrw.org, national@cbc.ca, eupress@hrw.org, feedback@humanrightsfirst.org, info@icj.org

ودي رسالة يمكنكم الاستعانة بيها

Free Arab detainees

Dear sir,

We the undersigned demand the immediate and unconditioned release of all the Arab detainees imprisoned in the notorious Israeli prisons. Different nationalities from the Arab world has been arrested and detained by Israel under uncertain and false accusations of terrorism. Among those alleged terrorists there are children, women, handicaps and aging people. Many of the prisoners suffer acute and fatal illness, some of them became ill in prison and all of them are not receiving suitable health care.

Rejoicing the release of Lebanese detainees does not make us forget thousands of innocents who are undergoing the most inhumane conditions, receiving the most racist treatment.

This continuous aggression from the Israeli side, accompanied with the unconscionable recklessness of the international community put Arabs in general and Palestinians in particular in a stifling corner so that they find no choice except using violence to shake the human conscience and draw the attention of the world.

Among the detainees: Palestinians, Syrians, Jordanians, Egyptians and other nationalities.

We call upon the Arab League and the United Nations to move immediately and effectively and to take every action to oblige Israel to release the detainees.

Israel never concedes to UN resolutions, that is why we demand a world wide pressure on it.

Our demand is not restricted in releasing Arabs from Israeli prisons. We demand the immediate closure of notorious Guantanamo bay, releasing all prisoners detained in it and taking all guarantees from the prisoners' governments that they will not be rearrested when they return to their countries.

Arab people are sieged, their rights are violated and their lands are usurped, all these inhuman acts are adopted by countries which claim confronting to human rights measures and democracy. These countries – US and Israel – are receiving full support from the whole world either by accomplice or silence.

When it comes to Arab world; no international law is respected. We are stuck, the world does not leave us any choice but explosion.

Being the sacrifice lamb will not be the Arabs' role till the end.

This has to end.

ياريت اللي عنده رسالة احسن ينزلها لنا

بس بلاش التحركات البطيئة دي الله يخليكوا

ووقعوا على الرابط ده برضه، بس مراسلة العالم اهم

اسير مصري في السجون الاسرائيلية

جو دخل ساب لي التعليق ده:

نوارة

الأسير المصري اسمه إياد أبو حسن ..موجود في السجون الإسرائيلية منذ عشرين عاما و لا أحد يسأل عليه أو يطالب به .. و حسب سمير القنطار بأن المقاومة بذلت جهدا كبيرا لتحريره في هذه الصفقة لكن لإعتبارات سياسية ( منها الإتفاقية و العلاقات السياسية المصرية الإسرائيلية ) حالت دون الموافقة على ذلك من قبل الإسرائيليين .. الذين رفضوا إدراج أسماء أسرى عرب من مصر و الإردن خصوصا لأن بينها و بين هذه الدول إتفاقيات و علاقات سياسية ..و أنت تعرفين ماذا يعني ذلك .. في الصفقة الماضية و الحالية هذه الدول العربية طلبت من اسرائيل عدم إدراج أبنائها في صفقات حزب الله كي لا يصبح حسن نصرالله قائدا للعرب جميعا ..كما يقولون ..
أرجو أن تتأكدوا من قصة هذا الأسير ..لأن سمير لم يذكر عنه سوى ذلك و سوى مطالبة مصر بتحريره

طبعا ماحدش سائل عنه
وماحدش يعرف اهله ولا بيعمل له بانرات ولا واخد سيط انه مناضل
مرمي ولا حكومته سائلة فيه
ولا بتوع الشأن الداخلي سائلين فيه...اصله مش في مصر
يبقى يغور في داهية

طيب مدام اسمه اياد يبقى حاجة من الاتنين: يا والدته فلسطينية
يا اما هو من سيناء
طب ماحدش ح يسأل فيه؟ عايزين نعرف مصيره ايه؟
حد يقول لي نعمل ايه؟ كل الناس بتسأل على عيالها الا احنا حكومة وشعبا سايبين الواد كده؟ واللي يبلغنا بيه ويقول لنا اسألوا في ابنكوا سمير القنطار
اخصصصصصصصصصصصصصصصصصص علينا

متفرقات

عن حادث قطار مرسى مطروح:
قالوا لنا اعملوا سلام عشان نعمر مصر...واهي خربت كأنها بقالها مليون سنة تحت القنابل
قالوا لنا عشان المصريين ما يموتوش...واهم بيموتوا كل يوم من غير اي معنى
مافيش سنة بتعدي من غير حادث او اتنين يروح فيهم العدد ده
الطف بينا يا رب ده احنا غلابة
----------
عن مظاهرة امام البيت الابيض:
يعني المجموعة دي اللي مصممة تتكلم نيابة عن مسيحيين المصريين كلهم عايزين ايه؟
عايزين امريكا تحتلنا زي العراق؟ ليه؟ هي اتجننت تحتلنا وتصرف علينا واللي سرقته من العراق بط بط تصرفه علينا وز وز؟
عايزين حرب اهلية؟ والله عشان المصريين يهزوا المؤخرة ويتحركوا ويعملوا حرب اهلية ده ح يبقى في حالة واحدة: حرب ما بين الشعب كله وما بين محافظة المنوفية
ياريت يتبطوا شوية عشان فعلا بقوا يثيروا الغثيان
اللي عايز يشتكي بلده ييجي يشتكي هنا فيها، واللي خلع منها ومش عايزها يغور بقمله بقى ويرحمنا
---------
عن الكاريكاتير بتاع اوباما:
الله...يعني هو يقول والله انا مش زعلان عادي، وهم يقولوا والله ده احنا بنهزر عادي، وانصاره يقولوا دي قلة ادب، واعداؤه يقولوا لا ده ادب
وماحدش واخد باله ان اوباما ملبسينه لبس عربي مسلم
يعني احنا بقينا شتيمة
زي مثلا ما ترسم الريس بتاعنا هنا البقرة الضاحكة
هم يرسموا المرشح بتاعهم عربي
طب هو بقى عادي كده؟ واحنا ايه نظامنا؟ يعني احنا بطلنا نزعل ليه؟ ونيجي بقى في حاجة هايفة ونتقمص
------------
بوش بيقول جبهة العراق احسن من جبهة افغانستان واوباما وماكين بيقولوا لا انا حايز احد هناك...انا مش مرتاح في السرير ده، والعرب فرحانين ان اوباما ح يخرج من العراق، طب هم الافغان دول مش بني ادمين يعني؟ انا عايزة اعرف ليه كل العالم، بما فيهم احنا، مستحليين دم افغانستان كده؟
--------
دلوقت امريكا بتقول: ايران لا عندها صواريخ ولا حاجة دي كدابة
يا سبحااااااااااااااااااااان الله
يعني العراق يقول ما عنديش اسلحة دمار شامل يقولوا له لا عندك
ايران تقول عندي اسلحة دمار شامل يقولوا لها لا ما عندكيش...المهم نغلس على الناس وخلاص
---------
هو علاء مبارك فين؟ اقصد مش بيتكلم ليه؟ طب اذا كان يعني خلاص ده نصيبنا في العيلة دي طب ممكن يطرحوا علينا الامين والمأمون واحنا نختار بناتهم؟ وللا هو لازم الواد ابو دم تقيل ده؟ انا مش قادرة اتخيل..مش قادرة مش قادرة...لو بيجوزوني زكي رستم غصب عني مش ح ابقى قرفانة كده
--------
دي مصر...دي مصر...يعني الناس بتوجع دماغنا ليه؟ لييييييييييييييه؟ لييييييييييييييييييييييييييه؟ احنا ناس اللاوية ومالناش في الهجص ده، مرة يقولوا لنا العائدين للمسيحية ومرة يقولوا لنا البهائيين ومرة يقولوا لنا الشيعة اللي في ستة اكتوبر، وبكرة يطلع لنا الدروز في خمستاشر مايو وشهود يهوة في الرحاب
ماللي عايز يعمل حاجة ما يعملها احنا من امتى مركزين في الحاجات دي؟ دي مصر...يا امريكا انت ودلاديلك دي مصر...ما ينفعش فيها الهبل ده الناس عندنا مش عارفين الفرق ما بين الشيعي والشيوعي وفيه ناس فاكرة ان احمد بهاء الدين الله يرحمه كان بهائي
----------
انا ما نسيتش الكتاب وقاعدة شغالة فيه بس عايزة اخلصه بقى وخصوصا اني كان ورايا شغل الفترة اللي فاتت وعايزة الحق اخلص منه جزء كبير قبل ما انشغل تاني
-------
ما تنسوش ده وكمان ما تنسوش ده
مواطن مصري عمل بانر كتر خيره
عايزين بانرات تاني
-----
اه نسيت
كندا بتقول انها مش ح تضغط على امريكا عشان تطلع الواد اللي كان قاعد في الفيديو يقول: هلب مي مامي...آي وانا جو تو كندا...يو دونت كير اباوت مي ذاتس اول
ولو كان كندي ابيض برضه كانوا مش ح يضغطوا على امريكا؟
------
ايه بقى حكاية كل ما نفتح بقنا في اي حاجة اقليمية وللا عالمية، وبالمناسبة بتصب رأسا في مشاكلنا، يقولوا لنا: ما تخليكوا في المشاكل الداخلية وشوفوا اللي عندنا؟ ايه قصر النظر ده؟ طب ما يروحوا لدكتور عنين يكتب لهم على نضارة
يعني تصوير التعذيب بالموبايل في مصر ابتدا قبل ابو غريب وللا بعده؟
البجاحة بالتعذيب ابتدت قبل جوانتانمو وللا بعدها؟
احمد نظيف قال لرئيس الهيومان رايتس ووتش: امريكا بتعذب اشمعنى انا ما اعذبش؟
بلاش..الخراب الاقتصادي اللي فيه مصر سببه ايه؟ مش سببه البنك الدولي واقتصاديات السوق الوسخة والعولمة واننا بقينا سماسرة؟
طب مين السبب في ان البنك الدولي يبيع ويشتري فينا؟
طب انعزال مصر عن دورها الاقليمي كان قبل الخراب الاقتصادي وللا بعده؟
عيب يعني الكلام ده..لما الواحد يبقى مضطر يقول الكلام بتاع اولى ابتدائي ده للناس يبقى الناس بتاعة الشأن الداخلي دي عبيطة وللا بتستعبط؟
يبقى كل ما نهتم بقضية اقليمية يقولوا لنا خليكوا في الشأن الداخلي
دول بيخدموا مين بالظبط؟ بيخدموا البلد وللا بيخدموا حسني مبارك واللي مقعدين حسني مبارك على الكرسي؟


اكيد عارفين ان لو القارة الامريكية غرقت بكرة الساعة عشرة الصبح
الساعة عشرة وربع مش ح يبقى فيه الحكومات العربية الموجودة
وللا دي كمان عايزة شرح؟

على اي حال الاسرى العرب بينهم اسير مصري...اخص عيب قوي عيب قوي عيب قوي قوي وقوي لما يبقى فيه مصريين ما يتحركوش غير لما نقول لهم فيه اسير مصري...خيبة...خيبة خيبة ماهو اللي احنا فيه ده مش من شوية