انا ح اقول بقى وامري لله واللي يحصل يحصل
اولا احيي الاستاذ احمد حسينين على مقال نشرتهوله
المجموعة البريدية
fij
مفاده إن ضجة فتاوى البول والرضاع جات في مصلحة النظام
ولكن يجب علينا أن نتنبه ونبحث في التراث وننقيه
- الكلام ده قالهولي مينا امبارح -
وإننا نبطل نضفي قداسة على علماء هم في النهاية بشر
ثانيا تعليقا على هذا الكلام او استطرادا له
القداسة دي لا يضفيها الا انصاف العلماء
لان الدكتور المطعني وهو متخصص في علوم القرآن
كلمته مرة عشان أسأله على آية الرجم اللي موجودة في البخاري
وقال لي باللفظ: لا مافيش حاجة من دي وانا عملت بحث أثبت فيه ان الحديث ده مش صحيح
والكلام ده ما حصلش من اساسه مافيش آية نزلت واتشالت من نص القرآن
قلت له: بس ده البخاري
قال لي: البخاري عالم جليل وفاضل بس بني ادم مش ربنا يعني
ومافيش كتاب موثوق به مائة بالمائة غير القرآن غير كده أكتر كتاب ثقة في الدنيا يبقى واثقين فيه تسعة وتسعين في المائة وبرضه دي نسبة كبيرة...إذا كان مافيش بني آدم واثق في نفسه تسعة وتسعين بالمائة
قلت له: بس ده البخاري
ضحك وقال لي: يا بنتي إيه البخاري...البخاري عالم تحرى الصدق قدر المستطاع
ما عندوش حقيقة مطلقة الحقيقة المطلقة في القرآن بس...البخاري بيغلط زي أي إنسان تاني بيغلط
البخاري بيغلط؟
المفروض إن السيدة عائشة أوصت بعرض الأحاديث على القرآن ولو تعارضت مع نص القرآن أو منطقه أو منهجه تبقى يا إما غلط يا إما احنا بقى مش فاهمينها كويس...قصدي الأحاديث، أو مش عارفين الظروف اللي اتقال فيها الكلام ده ولازم نكون على علم بالسياق وده شغل المختصين في اللغة والحديث
يعني مش اجي انا مثلا وافتح البخاري واعمل قرعة على الاحاديث واشيل منها اللي ما يعجبنيش واخللي اللي يعجبني
لازم اللي يعمل كده يبقى متخصص
والتخصص سهل يعني
اللي عايز يقدر يلتحق بالدراسات الحرة في الازهر ويدرس لحد ما يتخصص
وبعدين يعمل الابحاث بتاعته
بخصوص ان الاحداث دي جات ع الطبطاب للنظام المصري
مش عارفة
حاسة انها مش طبطاب ولا حاجة
حاسة انها مقصودة
والفورتينة بين المسلمين والمسيحيين مقصودة
والتصييد للعلماء برضه مقصود
يعني معلش اسمحوا لي
التنكيل اللي لحق بالدكتور بتاع رضاع الكبير
تنكيل فوق الطاقة
الراجل قال كلام غلط
واعتذر
يعني ايه يترفد ولا يقبل اعتذاره
ويتخرب بيته ويطلع تلاتينه
وناقص يسلطوا عليه اسلاك نبيه عشان يحط له عصايا
الدكتور علي جمعة
كاتب الكلام ده في كتاب مطروح في الاسواق من مدة
يعني ايه يقعد الناس يدوروا ويفلوا لحد ما يلاقوا له غلطة
عشان يعملوا عليها ضجة
طب ادي الراجل عشان وجع الدماغ
سحب الكتاب من الاسواق
ثم هو فين بول الرسول اساسا؟
يعني احنا لو دورنا في كل الكتب اللي مكتوبة
زمان وللا دلوقت
سواء في التراث الاسلامي
او المسيحي
او اليهودي
او الانجليزي
او الفرنسي
او الالحادي
او السياسي
او الاقتصادي
او اي حاجة
ح نلاقي تخريف كتير
وعلى رأي المطعني
دول بني ادمين
نحترمهم لانهم علماء بذلوا مجهود
لكنهم مش ربنا
بيغلطوا
والغلط مردود
ومسموح به
على الاقل في الاسلام
"ان أخطأ فله أجر وإن أصاب فله أجران"
يعني واخدين تصريح من سيدنا محمد اهو
اننا نغلط طالما لا نتعمد الغلط
طالما بنجتهد بكل ما في وسعنا
طيب يعني مافيش حد مسك جمهورية أفلاطون وطلع منها
التوصيات الصريحة بانتهاك حقوق الإنسان والمعاق والمرأة
وقال ازاي الحضارة الغربية مبنية على تراث حقير زي ده؟
ماحدش مسك توماس مور وطلع كلامه اللي بينضح
تخلف وتعصب وحقارة
وقال ايه القرف ده؟
والإسلام أكتر فكر في الدنيا مرن ومفصلي
وبيسمح بالاختلاف في داخله وبيقبل المختلف معاه من خارجه
ايه بقى؟
إيه؟
واحد قال حاجة
مش عاجباك
مش عاجباني
نتناقش بشكل محترم
او نسيبها
وخلصنا
كفر يعني؟
ولو كفر...ما يكفر يا سيدي
من شاء فليؤمن ومن شاء فليكفر
وللا هو بس الكفر الصراح اللي مسموح بيه
والخطأ مش مسموح بيه؟
الا حاجة غريبة قوي بتحصل
من الجانبين
اللي هم نقطوني
من كتر ما هم مش موضوعيين ومصلحجية
وبيصطادوا في الماء العكر
جانب عامل نفسه حامي حمى الاسلام
وهو اساسا مش فاهم حاجة عن الاسلام
وبيتعامل مع الاسلام على انه قومية
مش عقيدة
وجانب نصاب
يتكلم عن حرية الفكر والتعبير لما تبقى حريته هو
لكن غيره لا
مش حر يقول اللي هو عايزه
ولا يلبس اللي هو عايزه
ولا يفكر بالطريقة اللي هو عايزها
مش حر يغلط او يصيب
مش حر خالص
ومرة واحد يساري قالها لي كده على بلاطة: انا مش باحب الاسلام
ولا المسلمين
ودول كلهم يترموا في الزبالة او يتخرسوا خالص
!!!!!!!!!!!
واظن لو قرا البوست ده ح يعرف نفسه يعني
انا باكره الانتهازية في كل من الجانبين
اللي كل واحد فيهم مستني التاني عشان يقع
وهو يطرح نفسه كبديل
وكونه بيطرح نفسه مش عيب
بس الناس دي ما تعرفش اخلاقيات
ولا نزاهة وهي بتطرح نفسها
وبيخوضوا مع بعض حرب باردة
مافيهاش ابسط مبادئ الاخلاقية
او المبدأية
زي برضه واحد امبارح - راخر عارف نفسه - يقول المنقبة حرة
بس ما تدخلش الجامعة وما تسوقش عربية وما تمشيش في الشارع
اصلها مغطية وشها
قلت له اشمعنى يعني اللي بطنها باينة تمشي في الشارع
ما ردش والناس اللي قاعدة ضحكت
اللي بطنها باينة تمشي في الشارع عشان هو عايز يتفرج
واللي مغطية وشها ما تمشيش في الشارع عشان هو عايز يعرف ايه اللي ورا النقاب
وهي غايظاه ومش عايزة تقول له
طيب يعني احنا في الروضة هنا؟
وكل واحد يلاقي لنفسه تخريجة عشان بس يعرف يخدم مصالح تياره
التي لا تتجاوز أرنبة أنفه
الإسلام دين الحرية الإنسانية
مبني عليه أساسا
وفيه ناس - على هذا الاساس- بتقول ان الاسلام هو الحل
لانه دين بيحترم الانسانية وبيقبل الاختلاف
مش بااااااااارضه؟
والمفروض إن فيه ناس مسمية نفسها
اليسار
بيتكلموا عن العدالة وحرية التعبير
وللا ناس مسميين نفسهم ليبراليين
بيتكلموا عن الديمقراطية
هلبت بقى
ليه كل دولم
ما بيعترفوش بالحرية اذا مارسها حد
من خارج تيارهم؟
اوووووووعععععععععععععع
لا ولا حاجة
انا بس بارجع