الرسالة الثالثة: ابنك يقولك ثورتك عارفة الطريق، وعارفة مين يابا العدو ومين الصديق

بسم الله الرحمن الرحيم

عزيزي الجيش..

بعد التحية والاشواق.. 

ده الجواب التالت.. وارجو منك إنك تقراه زي ما قريت اللي قبله، وننتظر منكم الاجابة

انا مش حاسأل على الاعلان الدستوري تاني خلاص بقى.. وقت ما ربنا يكتب لنا نصيب فيه حنلاقيه.. بيقولوا بكرة
يا مسهل

لكن قبل ما اقولك اللي في قلبي، احب اشكرك على اهتمامك العاجل بملف حوض النيل.. وواخدة بالي ان الامن القومي له الاولولية

بس احنا برضه اولوية 

يا ريت تريح قلوبنا، وتسعدنا، وتحقق لنا منانا في انك تتحفظ على صفوت الشريف، وزكريا عزمي (وتفصله من شغله)، وفتحي سرور، وعمر سليمان، لأن الاشاعات كترت، وكلام الناس لا بيقدم ولا يأخر، خصوصا ان القصة بتاعة كاميليا شحاتة مش حتبان على حقيقتها الا اذا اتقبض على عمر سليمان وقر واعترف، واحنا عايزين نخلص بقى من الحكاية دي بدل ما كل شوية سعادة الاخوة السلفيين عمالين يطاردوا اشباح، واللي في ايديهم المستندات فعلا مش بيتكلموا، بياخدوني على جنب يحكوا لي بس، وحسبي الله ونعم الوكيل فيهم، ولو اتعرفت الحكاية حنرتاح ونريح، صحيح ان ناس كتير حتتفضح فضيحة المطاهر والناس حتديهم بالجزم القديمة من الجانبين
بس بيني وبينكم.. احسن، اصلهم بصراحة - سوا دول ولا دول - قالبين دماغنا، وعاملين ازعاج، وكل شوية يسخنوا الناس تسخينات مش تمام، الناس حتتصدم شوية وشعرها حيقف وحواجبها حتقع من الصدمة، بس اهم يفوقوا بقى، بدل ماهم نازلين شتيمة في المحترم وبيحترموا اللي مش محترم.. ينوبكم فينا ثواب
عموما، انا عندي رسالة لك من شباب الثورة - اللي انت بتحبه - بخصوص مطالب الجمعة الجاية.. المطالب دي مكتوبة في الايفينت ده


وهذه نص الرسالة من الشباب اللي في الصورة في اهم مكان إلى الجندي الأسد اللي شايل على كتفه درع الأوطان




نداء الي الشعب المصري العظيم الي ابطال مصر و شبابها و مثقفيها :


إن مؤسسة الفساد فى مصر بما تضم من المفسدين والإنتهازيين والمتحولين مازالت تقبض بقوة على زمام المؤسسات الإعلامية والتعليمية والأمنية والإقتصادية والإدارية والإجتماعية، وتسعى بالثورة المضادة بشراسة لإستعادة زمام المبادرة بغية إجهاض باقى مطالب الشعب ، تحت دعوى أنه بسقوط الرئيس السابق وحل مجلسى الشعب والشورى قد تحققت مطالب الشعب .


إن الشعب فى مصر لن يقبل محاولة غسل النظام السابق وإعادته فى صورة أخرى.




مطالبنا /


1- الأسراع في محاكمة كبار الفاسدين و علي رأسهم مبارك و ثلاثي الشر : زكريا عزمي و صفوت الشريف و فتحي سرور .


2- حل الحزب الوطني اساس الخراب و الفساد في بلادنا .


3- تطهير الأعلام الفاسد الذي يدافع عن المجرمين و يؤيد الثورة المضادة لأجهاض ثورة الشعب , و استبدال رؤساء الجامعات و المحليات و الاعلاميين الفاسدين بأعلاميين شرفاء للمساهمة في توعية الناس و عدم تضليلهم .


4- الأفراج عن معتقلين الرأي الذين اعتقلهم الأمن المركزي مسبقا و الشرطة العسكرية حديثا .


5- التأكيد علي حرية الرأي و التظاهر السلمي و عدم العمل بأي قانون يصدر لتقييد رأي الشعب الذي يستمد الجيش منه شرعيته .


6- الأسراع من مصادرة اموال الطغاة و رجال الأعمال الفاسدين و تجميد كل ارصدتهم في كافة بنوك العالم و اولهم ال مبارك .




تنويه هام جدا جدا::


ايمانا بدور القوات المسلحة المصرية و ثقة في جيشنا العظيم
فأننا سنكمل ثورتنا و يقيننا في الله ان جيش مصر العظيم سيقوم بمساندتنا و حماية ثورتنا و لن يقبل بتقييد حرية الشعب و الألتفاف علي مطالبه و لن يتخذ قرارات اخري الا لصالح الشعب الذي هو مصدر السلطات .


و لا نشك ولا نشكك اطلاقا فى وطنية قواتنا المسلحة (خير أجناد ألارض) ونقدر دورها الهام فى حماية الثورة والثوار الذى جنبنا اسالة حمامات من الدماء...فهى ادت دورها و وجابها فى هذا الامر على اكمل وجه


نختلف فى الرأى مع المجلس الاعلى للقوات المسلحة فى ادارة عملية التحول الديمقراطى ونعلم ان المهمة الملقاه على عاتق قواتنا المسلحة ثقيلة جدا...ونزولنا للتظاهر يوم الجمعة 1/4 هو من اجل تصحيح المسار..والمطالبة بتحقيق باقى المطالب التى تضمن للمصريين جميعا نجاح ثورتنا باذن الله


ارجو من كل من ينضم للمظاهرات يوم الجمعة 1/4 الا يرددوا ولا يرفعوا اى شعار يهاجم القوات المسلحة
الحفاظ على شعار "الجيش والشعب يد واحدة"


والله الموفق
-------------

مع خالص سلامي وتحياتي

شكرا لساعي البريد

مرفق مع الخطاب هدية:

احنا كنا مدورينها على طول في الميدان... وسبحان الله، مناسبة قوي خاصة "ابنك يقول انا حواليا الميت مليون العربية، ولافيش مكان للأمريكان بين الديار"، بالذات بعد ما كلينتون خرجت من عندنا تقول: نحترم اختيارات الشعب وان كنا لا نتفق مع القيادة في كل شيء.. وبعد شوية جه جيتس وزير الدفاع الامريكي وخرج برضه يقول: نحترم اختيارات الشعب وان كنا لا نتفق مع القيادة المصرية في كل شيء.. واول ما روح نزل النيويورك تايمز شتيمة فينا.. شكرا والله، بس المطالب الفوق، ها؟ ها؟ ها؟ 
:)
واي حد حيطول لسانه يو الجمعة حينضرب سلمية سلمية زي ما كانوا امن الدولة وامناء الشرطة لما بيتقفشوا في الميدان بينضربوا.. ويتسلموا للجيش.. بعد ما نجز لسانه من لغاليغه
--------
الجواب الغرامي خلص
نتكلم مع الجدعان.. الحلوين.. اللي بيحييوا الاعلام القذر القاتل المنحط وبيدوله بالجزمة
التغييرات اللي حصلت دي ما عجبتنيش انا شخصيا.. لو عاجباكم خلاص، مافيش داعي اني اقومكم
انتوا ناس فلة، وشعب قمر، وبصراحة لو جبل كان اتهد، ونفسي وامل حياتي اني اشوفكم مبسوطين بقى، تستاهلوا تنبسطوا وترتاحوا بعد الشقا ده كله، تستاهلوا تطمنوا بعد القلق ده كله
بس عموما.. اللي مش عاجبه التغييرات
فيه واحد صاحبي اسمه صلاح صابر - برضه احب انسب الفضل لاصحابه - قال لي على فكرة لطيفة:
نعمل قائمة سوداء بالشركات اللي بتعمل اعلانات في البرامج اللي كانت معادية للثورة 
على سبيل المثال لا الحصر، قناة الحياة بتاعة البيدزا.. برنامج مصر النهاردة، برنامج لميس الحديدي اللي عمري ما شفته وبصراحة مش عارفة مين الانسان المريض اللي كان بيتفرج عليها، وكل الاخوة الافاضل اللي قالوا علينا كنتاكي وقتلونا واتسببوا في معركة الجمل والتحريض علينا
هم مش بيشيلوا ناس كتير زي لميس الحديدي او تامر امين او لبنى عسل او او او.. عشان قال ايه، بيجيبوا اعلانات
طب قشطة
الشركة اللي تعلن في برنامج في المذيعين اللي كانوا ضد الثورة احنا مقاطعين منتجاتها
وخلي الاعلانات تنفعهم
ملحوظة تانية برضه صلاح قالها: ميثاق الشرف الصحفي بيقول ممنوع الجمع بين التحرير والاعلان
يعني حكاية انا باخد فلوسي من الاعلانات دي منافية لميثاق الشرف الصحفي بالنسبة للمذيعين اللي اعضاء في نقابة الصحفيين 
عموما انا شفت وجاهة اقتراحه وشايفة انه قشطة جدا على ما صفوت الشريف يتحبس وياخد عبد اللطيف المناوي معاه وحياخد في ديله كل الناس اللي مضايقينا.. قلتوا ايه؟

حبيب قلبي حبيب قلبي حبيب قلبييييي :)

تحديث:
دي قائمة باسماء المحتجزين.. بس برضه فيه عيال غلابة مش مناضلين ولا بلطجية ومالهمش حد يسأل عليهم غير ربنا
مبرووووك.. عمرو عيسى حيخرج ان شاء الله لأنهم حيعيدوا محاكمته

ربنا يخليكوا ليا يا رافعين راسي، ويسعدكم ويفرحكم ويعزكم عشان ما كسفتونيش قدام العيال اللي اكلت وشي

طب والنبي بقى محمد الجندي ده من شباب 6 ابريل وحيتقدم لمحاكمة عسكرية، وياريت فيه خمستلاف قضية اتقدموا لمحاكمات عسكرية، يا ريت يعاد النظر فيهم، لأن فيه منهم كتير لا هم مناضلين ولهم ضهر، ولا هم بلطجية كمان، عيال غلابة 

احنا كنا عايزين ايه كمان؟

اه

1- محاكمة شلل الاطفال والثلاثي، عمر سليمان، وصفوت الشريف بشنبه ده، وفتحي سرور، وزكريا عزمي، اساسا عزمي ده المفروض يتكهن

2- محاكمة مبارك العاجلة

3- الاعلان الدستوري.. الاعلان الدستوري فين؟ خلاص احنا بقينا التلات.. ربنا يستر، بس واحد كتب على التويتر قال ان الدعوى بأن مبارك خان قسمه، يعني خيانة عظمى.. طب قشطة، لو حكموا ببطلان تنحيه، حنمسك في خان قسمه دي ونطالب بمحاكمته عسكريا بتهمة الخيانة العظمى.. ومش مسامحينه على تنحيه الخاين الغشاش اللي اتجوز علينا شرم الشيخ ههههههههه

4- فاضل ايه؟ فاضل ايه؟ فكروني.. انا من الفرحة نسيت الباقي

بس شلل الاطفال والثلاثي ومبارك وعيلته يتحاكموا واي حد حيفتح بقه بعد كده حاجز لسانه من لغاليغه.. آه.. والاعلان الدستوري

واحد صاحبي عايش في امريكا باعت لي على السكايب بيقول لي جيتس وزير الدفاع الامريكي راجع زعلان من زيارته لمصر والنيويورك تايمز ابتدت تشتم في الجيش

هيهيهيهيييييييييي... قشطة

كل دي اخبار مطمئنة الحمد لله، دي ناس شتيمتهم لنا نتوضى بيها

المهم بقى بقية المطالب احنا منتظرين اهو

الله يجبر بخاطرك يا مجلسنا العسكري.. طب بالنسبة للاعلان الدستوري؟

تحديث

الخبر ده كخطوة اولى كويس، بس هو مش مشكلته الكسب غير المشروع، ده شارك في الاربعاء الاسود والمجلس القومي لحقوق الانسان والتحقيقات مع النائب العام اثبتت انه مشارك فيها ولازم يتم حبسه على ذمة التحقيق، احنا قلقانين منه طول ما هو برة.. على الاقل ما يبقاش عنده حرية الحركة وحرية الاتصال ببلطجيته لانهم بيئذونا، لو هو اتمسك اللي وراه حيتشردوا ويدوروا لهم على شغلانة شريفة.. او غير شريفة بس مش حتبقى حسب خطة ممنهجة زي دلوقت

كمان فيه واحدة صاحبتي بتعمل اعمال خيرية في اسطبل عنتر وقالت ان الحزب الوطني شغال عادي كأن فيه خطة معينة بيحضروا لها، يوم الاستفتاء واحد اسمه خالد حمودة في اسطبل عنتر تبع الحزب الوطني الراجل ده ما كانش فاضي ثانية وكمان بيستعين بتجار مخدرات وفيه تاجر مخدرات منهم عضو في الحزب الوطني احنا عايزين نخلص منهم دول، وبيشتغلوا ليه؟ هم حيترشوا في مجلس الشعب تاني؟ لا ما يترشحوش بقى، خالد حمودة ده مش كويس ابدا، وفيه غيره كتير في الحزب الوطني، لازم نشاطهم يتجمد

وشكرا

الله يجبر خاطركم ويسعدكم قادر الكريم يا رب

نشكركم على سرعة الاستجابة، بالنسبة للانتهاكات انا مصدقة ان فيه اجراءات تمت بشأن اللي عملوا كده، بس اصلا المحاكمات دي ما بتبقاش علنية، مافيش فرد جيش بيتحاسب بعلم المدنيين ابدا، فكونهم اصلا يقولوا لنا انهم اتخذوا اجراءات ضد اللي عمل كده ده لوحده حاجة هم مش متعودين يعملوها، بس نظرا للظرف الحالي هم قالوا

تمام كده

احنا بقى في انتظار الاعلان الدستوري واعلان سقوط دستور 71 

وفي انتظار احالة الثلاثي المرح (صفوت الشريف، وفتحي سرور، وزكريا عزمي) للمحاكمة، ويا ريت لو يتم التحفظ عليهم من دلوقت لأنهم بيضايقونا قوي هم وعمر سليمان، قاعدين يلعبوا في الفتنة الطائفية وكل يوم والتاني يسلطوا ناس يبعتوا تهديدات للكنائس ولسه حارقين المقر القديم للبنك المركزي وعاملين لنا لبش.. فيا تقولوا لهم يلموا نفسهم ويبلطوا يطلقوا كمان اشاعات، عشان هم البلطجية بتوعهم اللي بيعملوا اشاعات وكلام فارغ

على فكرة لما كنا عند وزارة الداخلية والدة بثينة كامل شاورت على واحد كان بيحاول يتحرش بعناصر الجيش عشان يعمل مشكلة بين المتظاهرين والجيش وقالت له: انا من سكان المنطقة وعارفاك، انت كنت بتنزل في انتخابات فتحي سرور وبتقفل له الانتخابات، فراح مشي بسرعة قبل ما الناس تمسكه

فرجاء، هم مستفيدين من انهم يعملوا مشاكل بين الشعب والجيش، وبعدين يطلع فتحي سرور يقول كلام فيه تملق عشان فاكر نفسه كده ناصح

وعايزين كمان سيطرة على عناصر وبلطجية الحزب الوطني وامن الدولة لان امبارح كان فيه هجوم على بيت مرشد الاخوان المسلمين وتقريبا كانوا عايزين يلزقوها في المسيحيين 

بس هم بيعملوا حاجات مش كويسة ابدا

فلو تريحونا وتتحفظوا على الاربعة: صفوت الشريف، فتحي سرور، زكريا عزمي، عمر سليمان

ولو حتى اقامة جبرية في بيوتهم، وتراقبوا تليفوناتهم عشان نعرف بالظبط هم بيعملوا ايه.. معلش، ما ياما راقبوا تليفوناتنا من غير سبب، لما هم يتراقبوا بسبب عشان حماية البلد مافيهاش حاجة، واحب انبه بس انهم عندهم وسائل اتصال اخرى غير التليفونات العادية فيا ريت يبقوا تحت رقابة مشددة 

بالنسبة لسوزان وجمال كمان عايزين نعرف هم فين لأن فيه كلام كتير انهم في القاهرة وده بيوترنا جدا، وعايزينهم يتحاكموا ويتراقبوا لحين احالتهم للمحاكمة

من ناحيتنا احنا:

احنا لازم نعمل لجان شعبية يا شباب في كل المحافظات مهمتها التصدي للناس اللي بتحاول تعمل فتن طائفية وتهديدات للكنائس ونعرف مين دول بالظبط، ماحدش يطلع يقول "سلفيين" يعني ايه سلفيين؟ هو السلفي ده مولود بوحمة مكتوب عليها: احترس سلفي يرجع الى الخلف؟ اي حد يضرب جلابية ودقن ويعمل نفسه سلفيين

اللي تلاقوه في اي محافظة بيعمل فتن طائفية، بيهدد كنائس، بيحاول يفرض الحجاب على البنات زي ما سمعنا والله اعلم بصحة الاشاعة دي، تمسكوه وتقبضوا عليه وتسلموه للجيش

مش للشرطة.. معلش.. نتعب الجيش معانا شوية، احنا ما عندناش لسه ثقة في الشرطة لان لهم تاريخ طويل في تسليط بلطجية يعملوا فتن طائفية

يتسلم للجيش، وقبل ما يتسلم للجيش تشوف بطاقته، هم خلصوا حكاية البلطجية دي، ولما فشلت دخلوا لنا في حكاية "سلفيون يهددون"، والمفروض لو هم مش سلفيين فعلا اللي بيهددوا الكنائس وبيقطعوا الودان وبيفرضوا الحجاب بالقوة دول، المفروض الناس اللي فعلا سلفيين هم اول ناس يعملوا اللجان الشعبية دي ويقبضوا على اللي بيعمل كده في كل المحافظات ويسلموه للجيش عشان على الاقل يحموا سمعتهم بدل ما كل الناس عمالة تتهمهم انهم بيخربوا البلد

ونرجع نتعاون مع بعض كلنا تاني، ونستعيد روح التحرير، ده ممكن جدا.. فيه مسئولية دلوقت على السلفيين، اللي شفتهم بعيني وهم واقفين يحموا المسيحيين في القداس، المفروض انهم يتخذوا اجراء ضد الناس اللي بتحول تصورهم على انهم متوحشين وبيقطعوا الودان

احنا ممكن نختلف فكريا

بس انا واثقة مليون المية.. مليون المية.. مليون المية.. ان مش السلفيين اللي بيعملوا الحاجات دي، وان مافيش شيخ سلفي واحد، مهما كنت مش باطيقه، حيطلب في السر ولا في العلن من مريديه انهم يعملوا حاجة زي دي ابدا ابدا ابدا.. يستحييييل يستحييييل

ده شغل صفوت الشريف وعمر سليمان وفتحي سرور وزكريا عزمي.. انا متأكدة من كده

ملحوظة:

الناس فرحانة يا مجلسنا العسكري بالبيان ده على فكرة، انا شفت ردود افعالهم على التويتر والفيس بوك، وده بيأكد ان كل املهم انهم يطمئنوا مش عايزين يعملوا خناقة ولا حاجة

ناقص بس:

1- الاعلان الدستوري اللي يلغي 71.. هم بس عايزين يسمعوا "اسقاط دستور 71" والنبي والنبي والنبي.. الله يخليكم، النهاردة بس 

2- نشوف الثلاثي مقبوض عليهم عشان نرتاح ومعاهم عمر سليمان بالمرة.. او على الاقل نعرف انهم تحت الاقامة الجبرية والرقابة المشددة ونشوف اثر ده على حياتنا لانهم خربوا لنا الدنيا

3- مبارك واسرته.. وخصوصا اسرته، الحيزبون وابنها بالتحديد، يتحاكموا، وما ينطلقوش كده في القاهرة يجتمعوا بالناس، ويبقوا تحت المراقبة المشددة كمان بس نشوف خطوات جدية على الاقل في سبيل محاكمتهم

4- حلو التواصل ده كده وبيانات وبتاع.. احنا بنبسط لما بنحس ان فيه آلية للتواصل معانا، انا شخصيا مبسوطة

5- وما عادش بقى ننضرب تاني، ويبقى فيه جهة تابعة للجيش تستقبل الشكاوى للشباب اللي اتعذب وكده، بدل ما يضطروا انهم يطلعوا على النت ويصوروا نفسهم، لأن دي حاجة بتسبب لهم الم نفسي فوق الالم النفسي اللي اتعرضوا له انهم يصوروا نفسهم ويتكلموا عن حاجات محرجة وجارحاهم، لو فيه مكتب معين او جهة معينة يتقدموا فيها بالشكاوى ويتابعوها.. ووالنبي اللي اخدوا احكام عسكرية دول غلابة، ومدنيين، ياريت الاحكام العسكرية اللي عليهم تتلغي ويتحالوا لمحاكمة مدنية

وانا عايزاكم يا شباب تشوفوا الفيديو ده عشان تعرفوا يعني ايه جيش مصر برضه

صلوا ع النبي كده.. احنا برضه كلنا مالناش الا بعض، وشوية علينا وشوية عليهم، المهم نحط ولاءنا الوطني قبل اي حاجة.. مافيش مسيحي يقول انا مسيحي، ومافيش مسلم يقول انا مسلم.. ومافيش حاجة اسمها "المسلمون يهددوا المسيحيين" المواقع اللي بتكتب لكم الكلام ده دي مواقع وحشة وعايزة تخرب ثورتنا، ومافيش حاجة اسمها: "دي مؤامرة عشان تشويه الاسلاميين"، المواقع اللي بتقول لكم دي وحشة برضه وعايزة تخربنا.. ده تخريب متعمد لبلدنا وثورتنا وعلاقتنا ببعض
نحمي بعض، وما نتهمش بعض، والجيش يطمنا من آن لآخر، ونشوف خطوات بس ملموسة ده كل اللي الناس عايزاه، ده المصريين شعب زي الفل والله، وجدع، وباله طويل، وحكيم، ويفدي بلده بروحه، واي حاجة بيعملها بيبقى قلق على بلده وخوف عليها لأن المصريين تعبوا على بلدهم قوي، واتبهدلوا عشانها قوي، ومش عايزين تعبهم ومعاناتهم تروح هدر
والنهاردة برضه فيه خبر حلو ان الاحزاب حتبقى بالاخطار، والانتخابات التشريعية حتبقى ان شاء الله في شهر سبتمبر وحيتشال الطوارئ قبل الانتخابات
بس عايزين تجميد نشاط اعضاء الحزب الوطني في اول انتخابات تشريعية سواء نزلوا باسم الحزب الوطني او نزلوا مستقلين، اللي له تاريخ اسود في عضوية الحزب ده - ولا حتى ابيض - ما يدخلش الانتخابات التشريعية الاولى والنبي، اصلا هم اخدوا اكتر من فرصتهم.. حتى لو هم ناس ملائكة نازلة من السما، تلاتين سنة منفردين بالبرلمان.. اظن كفاية كده، دورة برلمانية واحدة بس ما يدخلوش البرلمان
دورة واحدة بس وبعدها يرجعوا يشتغلوا.. اظن ده مطلب سقفه واطي قوي، فيه ناس طالبة حل الحزب من اساسه وحرمان اعضاءه من ممارسة الحياة السياسية اساسا، بس انا طيبة وطالبة انهم ما يدخلوش الانتخابات الجاية
وبالنسبة لاهالي المعتقلين المعتصمين قدام التلفزيون وماسكين ظباط وعساكر الجيش يعيطوا لهم ويحكوا لهم ويوروهم صور عيالهم والظباط والعساكر يطبطبوا عليهم هههههههههههههههه افرجوا عنهم بقى اذا كان العادلي هو اللي قابض عليهم في احداث الثورة بدل ما عناصر الجيش قاعدة تسمع برنامج حياتي قدام التلفزيون كده
وربنا يهدي الحال يا رب
نفسي في ايه تاني؟ نفسي في ايه تاني؟ مش فاكرة دلوقت، بس فيه تعليقات بقى على البوست ده... بوست يعني الموضوع، اقصد المقال ده يعني.. المهم فيه تعليقات حتلاقوا ناس كاتبة برضه حاجات نفسها فيها
والله الشعب قلبه حنين والجيش قلبه حنين وربنا يبعد عنا شياطين الانس والجن
ويالا بقى خلصوا التوقيعات اللي هنا عشان نسلمها على آخر الاسبوع ان شاء الله
<<<<<<<<<<<<

اسكندرية دايما سابقانا... حتى في حملة التوقيعات

تحديث:
اهم كدبوا تأجيل الرئاسة لسنة 2012
صدقتوا بقى انهم بيستشيرونا؟ اه لو تصدقوني بس.. ده جيشي وانا عارفاه، قلبه ابيض وطيب وحنين، هو عشان بس احنا اول شعب في حياته

شباب العدالة والحرية في اسكندرية بيجمعوا التوقيعات على محاكمة الثلاثي المرح والاشراف القضائي على الامن الوطني
(شباب العدالة والحرية دول مش اخوان، دول غير حزب العدالة والحرية بتاع الاخوان، هم يساريين)

وامبارح فيه منهم شباب اتعرضوا لمحاولات اعتداء بس الحمد لله عدت على خير 

وعملوا فيديو جميل

بس نقوا تسجيل للاغنية ياسمين الخيام كانت ناسية كلمات الاغنية :))

انا حطيت كل حاجة على جنب المدونة هنا اهو
<<<<<<<<<<<<<<<<<
عايزين نخلص بسرعة عشان نتفرغ للبلاغ ضد مبارك واسرته بقى مدام كل حاجة لازم نعملها بإيدنا
الخبر  ده من "مصادر مطلعة" وانا مش عارفة بقى مدى صحته
وعايزة اعرف ايه سر الغموض ده؟ يعني حتى الصحفيين ما بقوش عارفين يجيبوا اخبار
وده خبر برضه من مصادر مطلعة بس انا ظني انه جس نبض، لأني عارفة ان المثقفين والسياسيين والنخبة لهم مصلحة في ان الجيش يقعد، وامريكا كمان لها مصلحة في ان الجيش يقعد لحد ما تحضر البديل، وعشان تلحق كمان تخترق بقى كل الاحزاب اللي حتتعمل جديد، ما احنا اخدناها على خوانة
وانا شخصيا صوت بنعم على الجدول الزمني اللي حطه الجيش، وباطالب الجيش انه يلتزم بالجدول الزمني اللي احنا صوتنا عليه، مش ممكن نصوت بنعم يقوم يتعامل معانا على اننا صوتنا بلا ويقعد برضه
اصلا مافيش فرق كبير بين لا ونعم ولولا اننا مش فاضيين كنت طلبت تحقيق في مين اللي ورا هلولة نعم ولا، وليه اللي قالوا للناس نعم فهموهم ان لا كارثة وليه اللي قالوا للناس قولوا لا فهموهم ان نعم كارثة.. ليه الكدب والتدليس ده؟ 
الاتنين اعلان دستوري، واحد بمواد كنا عارفينها، والتاني بمواد ما نعرفهاش وغالبا كانت حتبقى هي المواد اللي اتعدلت برضه، لأن ما عندهمش وقت يكتبوا اعلان دستوري جديد
في الحالتين ما يقدروش يرجعوا لدستور 71 
في الحالتين ما يقدروش يكتبوا الدستور الجديد لوحدهم
وانا اخترت نعم عشان لو اعلان دستوري يبقى اصوت على المواد اللي اعرفها بدل ما يفرضوا عليا مواد ما اعرفهاش، والاهم عشان الجيش كان حاطط جدول زمني، لأن ما كانش حيحصل ابدا ان حد حيعمل جمعية تأسيسية ومجلس رئاسي وكل الخيالات اللي اتصورت في حالة ما صوتنا بلا، كنا برضه حنستنى البرلمان والرئيس عشان يعملوا لنا الدستور الجديد بس المفروض كنا حنقعد مدة اطول
يبقى ليه بقى يستفتونا في حاجة وبعدين يرجعوا يسمعوا كلام عمرو حمزاوي وضياء رشوان برضه اللي عمالين يقولوا لهم اقعدوا سنتين تلاتة؟ هم بيسألونا احنا ولا بيسألوا عمرو حمزاوي وضياء رشوان؟ وبعدين يحيى الجمل هو اللي معطل الاعلان الدستوري دلوقت، طب يحيى الجمل ايه اللي حشره في حياتنا اساسا؟ اذا كان هو اللي عامل دستور 71 اللي احنا محتاسين فيه ده، واشتغل مع السادات، واشتغل مع مبارك، واشتغل مع شفيق، وكمان مفروض علينا دلوقت في حكومة شرف؟ ويعني ايه نائب رئيس الوزرا؟ ايه اهميته يعني بيعمل ايه غير انه طالع لوحده كده يقول مش عايزين نحاكم مبارك، وعفا الله عما سلف، وعمال يعطل في الدستور ويقول نشيل الالف واللام، هو ايه صفته اساسا؟ ايه شغلته من الاصل؟ بيعمل ايه في حياتنا يعني غير ان زكريا عزمي هو اللي فارضه؟ 
اعتقد ان المجلس العسكري محتاج يعرف رأينا عشان كده نزل الخبر ده، وانا شخصيا باقول اني مش موافقة على الكلام ده، انا ما صوتش على نعم عشان برضه الجيش يقعد، والا الاستفتاء ما كانش له لازمة من اساسه، مصروف على الفاضي
واحنا عايزين من المجلس العسكري انه يوجد الية يعرف بيها راي الشارع المصري بدل ما يقعد يجتمع بالنخب.. النخب دي مش كويسة، ولهم مصالح شخصية ومتعودين على الصفقات، وحملاتهم كلها في الاستفتاء كانت مبنية على المصالح الشخصية، وعشان مصالح شخصية قعدوا يخوفونا من الخيارات اللي تخالف مصالحهم زي سيف الاسلام القذافي ما قعد يخوف الليبيين، اللي حياخد مقاعد في البرلمان قال لو صوتوا بلا حتموتوا بالحصبة، واللي مرشح للرئاسة قعد يقول لو صوتوا بنعم رغيف العيش حيبقى بألف جنيه، كل ده عشان كل واحد فيهم مستعجل على السلطة
طب احنا كشعب يعني.. الشعب ده اللي لا حيبقى عنده مقعد في البرلمان ولا هو مرشح للرئاسة وهو اللي عمل الثورة، ماحدش بيحاول يسأله ليه؟ حتى الاستفتاء اللي اتسألنا فيه طلعت النتيجتين زي بعض كانوا بيخلونا نلعب ديمقراطية عشان ننبسط
على الاقل عشان تبقى النصيحة مخلصة يسألوا ناس مالهاش مصالح، ومافيش حد مالوش مصالح غير الشعب.. طب على الاقل اسألوا اللي شارك في الثورة يعني مش اللي كان قاعد طول الثورة بيقترح اقتراحات زي الطين عشان "يحل الازمة" وفضلوا يقولوا على الثورة "الازمة" طول التمنتاشر يوم
على اي حال المصري اليوم عاملة استطلاع رأي هنا يمكن يكونوا عاملينه عشان يساعدوا المجلس العسكري في استبيان الرأي العام على الاقل على النت
انا مش حاقول لكم اخترت ايه، عشان هم كتر خيرهم منزلين دستور 54 والدستور الالماني عشان تحملوه وتقروه، كده احسن.. عشان نقرا احنا ونفهم بدل ما الناس لعبت بينا الكورة في الاستفتاء اللي فات وكل واحد فيهم قعد يهوبص وفي الاخر طلع الفريقين اللي كانوا بيروحوا لنعم وللا بيضحكوا علينا والنتيجة هي هي
--------
بالنسبة بقى للإعلان الدستوري، هو فين؟ النظر في قضية مبارك حتبقى يوم الثلاثاء الجاي يعني بعد بكرة، ايه؟ مش نخلص بقى؟ 
انا حارجع اوضح المطالب اللي الناس عايزاها من الجيش عشان واضح انه اجتمع بناس كتير والدنيا اتكركبت فوق راسه
1- محاكمة مبارك واسرته 
تجميد ارصدتهم، ومحاكمة مبارك بتهمة الخيانة العظمى لأنه امر الجيش بقتل الشعب، ومحاكمة جمال مبارك بنفس التهمة لأنه امر الحبيب العادلي بقتل الشعب، ومحاكمة سوزان وعلاء بالفساد وتخريب الاقتصاد واهدار المال العام، وسوزان كمان لطشت اثار
2- محاكمة شلل الاطفال والثلاثي
عمر سليمان اللي قاعد في بيته يحرك ناس، وبيحرك مثقفين كمان، وهو اللي بيبخ في ودانهم الكلام اللي بيقولوه للمجلس عشان هو موالي لامريكا واسرائيل وعايزين يستعدوا كلهم للقفز على الثورة واختراق المجموعات اللي نشأت عن الثورة، الراجل ده ارتكب جرائم ضد الانسانية، ومتورط في تعذيب ضحايا كانت امريكا بتجيبهم. وهو ده شلل الاطفال.. كفاية انه بيقول: باط هوين.. براذار موسليمهود
ومحاكمة الثلاثي الشريف وعزمي وسرور، والاسراع بالتحفظ عليهم دلوقت حالا قبل الثانية الجاية لحين محاكمتهم على بلاويهم التي لا تعد ولا تحصى.. ومافيش حاجة اسمها زكريا عزمي بيشتغل في الرئاسة، يترفد ده.. واول ما يترفد مش حنشوف وش يحيى الجمل تاني، واول ما صفوت الشريف يتقبض عليه مش حنشوف المناوي تاني، واول ما فتحي سرور يتقبض عليه مش حنشوف بلطجية تاني
الرحمة بقى شوية، ده احنا لو جبل كان اتهد
3- الاشراف القضائي والحقوقي على جهاز الامن الوطني والتحفظ على الضباط المتورطين في قضايا تعذيب وقتل على ذمة التحقيق، ما يبقوش مطلوقين علينا كده يضربوا نار على عربيات الناس.. ولولا انهم محلفيني كنت قلت بيضربوا نار على مين
4- اصدار الاعلان الدستوري فورا واعلان سقوط دستور 71 ووضع خطة زمنية لاجراء الانتخابات البرلمانية ثم الرئاسية لا تتعدى 6 شهور
5- تجميد الحزب الوطني - فيه ناس عايزة تحله بس ما يهمنيش يتحل، يهمني ان اعضاء الحزب الوطني ما ينزلوش اول انتخابات برلمانية على الاقل
6- وترجعوا بالسلامة تحموا لنا البلد زي ما حميتوها طول السنين اللي فاتت وقمتوا بواجبكم على اكمل وجه وعمرنا في حياتنا مهما حصل ما حننسى انكم حافظتم على مصر وعلى شرفكم العسكري وعلى عقيدة الجيش وتصديتوا لضغوط مبارك وعمر سليمان وامريكا واسرائيل بحزم، بس زي ما انتوا كان لكم معارككم طول التلاتين سنة مع النظام، احنا كان لنا معاركنا، انتوا انتصرتوا في معركتكتم، واحنا لسه
اي حد يقولكم اصلي مش مستعد، اقعدوا معايا ذاكروا لي عشان اخش الامتحان ده صاحب مصلحة... اللي عايز يذاكر يذاكر لوحده، والخايب والله لو جبت له كل الدروس الخصوصية اللي في الكون حيفضل خايب
عيب قوي لما ناس بقالهم سنين بيشتغلوا بشكل قانوني، وناس تانية عملوا ثورة وعندهم قبول لدى الناس يقولوا انهم خايفين من منافسة جماعة فضلت محظورة 30 سنة وقياداتها - مش حتى عيالها، القيادات نفسهم - بيتقدموا لمحاكمات عسكرية، واتعمل لهم مسلسل طويل عريض عشان يشوه سمعتهم
اللي يقول لك كده اعرف انه فاشل وخايب ومستني توازنات عالمية تسنده، من الاخر كده، مستني يربط مع امريكا عشان تسانده
هي كيميا؟ 
- اخطار باعلان حزب
- تحضير قوائم.. ويقدروا يتصلوا بشخصيات عامة من اللي عندهم اخوانوفوبيا وعندهم استعداد انهم يترشحوا عشان الاخوان ما يسيطروش على البرلمان لوحدهم 
- مؤتمرات في المحافظات تتعمل بتلاتة نكلة: صوان، وميكروفون، وكراسي 
الناس عندها استعداد انها تسمع، ومش عايزة حد من اللي كان بيوزع عليها وجبات دلوقت
----------
ملحوظة:
اه الناس واخدة على خاطرها من المجلس العسكري عشان حاجات كتير
عشان التباطؤ اللي بقى مزعج فعلا
وعشان التعامل القاسي مع المتظاهرين والمعتصمين
وعشان احداث التعذيب في المتحف
وعشان التكتم وعدم الشفافية
وابتدا ناس يشككوا، وابتدا ناس صوتهم يعلا، وفيه ناس ابتدت تشتم، وناس بقى عمالة تقول في تحليلات، ههههههه بصراحة بتضحكني
وبقيت انا الوحيدة اللي لسه باقول ان المجلس العسكري حسن النية ولسه مساند للثورة
بس لو استمر الوضع على كده حابطل اقول الكلام ده... اكيد عمري ما حاغلط في الجيش، بس مش حاقدر بقى ادافع بلا ادلة
بس انا باتكلم.. وغيري بيتكلم وبيقول كلام كتير يصل الى حد الشتيمة والتخوين
والناس بتسمع من ده وبتسمع من ده، لكن مخها هو اللي بيحكم، ومخها بيحكم بالافعال مش بالكلام
والافعال دي في ايد المجلس العسكري
هو اللي في ايده، بافعاله، انه يطلعني كدابة ويطلع اللي بيشككوا فيه صادقين، وفي الحالة دي ماحدش حيزعل مني انا... حيقولوا نوارة هابلة طول عمرها، عادي، انا بنيت السمعة دي على مدى سنين وبذلت فيها الغالي والنفيس
او في ايده يطلعني انا اللي معايا حق، بأفعاله برضه، ويطلع اللي بيخونوه ويشككوا فيه كدابين
وفي الحالة دي، وانا متعهدة بده بشكل شخصي، الناس حتمسك كل اللي شككوهم في الجيش والمشير والمجلس العسكري يقطعوه بسنانهم ويخلوه ما يسواش تلاتة نكلة ويعلموا عليه طول عمره، وعمرهم ما حيسامحوه على الايام السودا اللي عيشهم فيها
لأن الناس مش عايزة تشك في المجلس العسكري، مش عايزين، هم عايزيني انا اللي اطلع صح، امل حياتهم ان كلامي يطلع هو اللي صح ويطلع اللي بيشككوهم هم الغلطانين، وحينتقموا من اللي شككوهم انتقام الجبابرة لأنهم عيشوهم في قلق وتوتر طول المدة دي.. انتوا ما تتخيلوش الناس نفسيتها تعبانة قد ايه، وزعلانين ازاي
الاعلان الدستوري واسقاط دستور 71 ينفع يتعمل النهاردة دلوقت اهو.. وما تسمعوش كلام يحيى الجمل، مش كويس والله
محاكمة مبارك وشلل الاطفال والثلاثي ينفع يتعملوا في ظرف اسبوع من النهاردة 
الشفافية ينفع تتعمل دلوقت حالا.. وما تقلقوش من تهديداتهم بأنهم حيحرقوا البلد، احنا واقفين جنبكم والله
كل الحاجات دي حتنقل الناس نقلة نوعية في علاقتها بالجيش وحيرجعوا يتصوروا على الدبابات تاني ويشيلوا العساكر عيالهم وينزلوا فيهم بوس، لأن الناس نفسها، نفسها، نفسها، تستعيد الثقة
وعمرهم في حياتهم ما حينسوا ابدا الحاجات دي
دلوقت حتلاقي ناس بتقول: المحليات.. ادارات الجامعات.. ادارات المصانع.. والمطالب بتزيد بتزيد بتزيد، وبتزداد تفصيلية وكل واحد متضايق من جاره يبقى مطلبه شيل جاري من جنبي، بس ده بسبب التأخر في اجابة المطالب الكبيرة الاساسية
ولو فيه تطاول ده بسبب التعامل بشدة مع المتظاهرين والمعتصمين، الناس ما عملتش ثورة عشان تقولوا لها ننة نام من الساعة اتناشر، يالا، لعبنا كتير واتظاهرنا كتير... ورانا مذاكرة بقى، طب ما تنجزوا لهم اللي هم عايزينه، هم يعني غاويين مرمطة في الشوارع؟
الست مطالب اللي فوق لو تم انجازهم بأسرع وقت ممكن، الناس حتتعامل مع الجيش، والمجلس العسكري، والمشير طنطاوي على انهم قادة تاني انتصار لمصر بعد انتصار 73 وحيعلقوا صورهم في البيوت ويسموا كل مواليد السنة دي "حسين" على اسم المشير، وأي حد حيحاول يشككهم، او يسيء للمجلس العسكر او المشير بأي وسيلة كانت حيقطعوه ويخلوه عبرة، لأن ساعتها ماحدش حيبقى له مصلحة في الاساءة للمؤسسة العسكرية وقياداتها غير مبارك وشلل الاطفال والثلاثي والناس مش بتصدقهم، بس التأخر في تلبية المطالب المتزامن مع السرعة في قمع الاحتجاجات والانتهاكات اللي لحد دلوقت مافيش حتى اعتراف بيها ناهيك عن التحقيق فيها حيأكد كلام كل الناس اللي عمالة تشكك... والتشكك ده مش حلو، ومش بيصب في مصلحة حد، لا بيصب في مصلحة الثورة، ولا بيصب في مصلحة الشعب، ولا بيصب في مصلحة المؤسسة العسكرية... بيصب بس في مصلحة مبارك وفلوله
هو ايه اهمية ان مبارك قتل السادات دلوقت اللي التلفزيون المصري ما وراهوش غير الرغي فيها وهو قاتل الف شهيد وفيه 4 الاف مفقود؟ 
انا خلصت ضميري، وقلت اللي عندي، وبعد كده مش حاقدر اضغط على الناس اللي روحها بقت في مناخيرها واقولهم امسكوا نفسكم وما تهللوش
كمان واضح جدا جدا جدا.. ان اللي بيشكك الناس في المجلس العسكري، هو هو اللي بيشكك المجلس العسكري في الناس.. بطلوا تشكوا فينا، احنا شعب، ومش عملاء، ومش بنهدد الامن القومي، وبطلوا تبعتوا ناس تتقصى، ما تتقصوا على مبارك
هو مبارك اللي خاين مش احنا، والشك المتبادل ده وحش وحش وحش
انا حاقعد اعمل الواجب اللي عليا في ملاحقة الفاسدين وعلى رأسهم مبارك، ومش حاخش بينكم تاني بقى، اصطفلوا مع بعض
انا مش حاقدر اقعد ادافع عن ناس بتكهرب البني ادمين
ولا حاقدر اقعد ادافع عن ناس بتتطاول على المؤسسة العسكرية
انا حاقعد اعمل الواجب واحل المسائل عشان عندي امتحانات

انتوا خفتوا ولا ايه؟ ما تخافوش... احنا معاكوا

تحديث:
للي بيجمعوا توقيعات في الفيوم
0185020552


قالك النائب العام يعتزم تجميد ارصدة صفوت الشريف وزكريا عزمي خلال ساعات

الكلام ده كان من 3 ايام، وزي ما احنا عارفين كلنا يا اولاد ان خلال ساعات دي عادة بتبقى مش اقل من خمسة وتلاتين الف ساعة زي الاعلان الدستوري اللي كان حيعلن في خلال ساعات من اسبوع

وعنها وعاديك.. ده كان اخر مرة النائب العام يقول حاجمد ارصدة حد وراح سبحان الله، ولا اله الا الله، ولا حول ولا قوة الا بالله، البنك المركزي، اللي لازم يتم الرجوع اليه في عملية تجميد الارصدة، اتحرق بماس كهربائي في التكييفات

ههههههههههههههههههههههههههههههههههه 

حبايب قلبي.. والله باحبكم، احب انا اللي ما يعرفش يكدب ولما يحاول يكدب وشه يحمر ده، تكييف في مارس؟ وكمان عليه ضغط لدرجة انه يعمل ماس كهربائي؟ وفين؟ في البنك المركزي؟ ليه؟ البنك المركزي ما بيعملش صيانة؟ 

انتوا خفتوا ولا ايه؟

طيب ما احنا عارفين ان الثلاثي المرح لهم ميليشيات ومسلحين كمان، هو احنا بنخاف؟ ما تخافوش

اذا كانوا هددوا بأنهم حيولعوا لكم في البلد كلها لو هوبتوا ناحيتهم

ما تخافوش

اذا كانوا هددوا بانهم حيعملوا فتنة طائفية ويعملوا تفجيرات شبه تفجيرات كنيسة القديسين

ما تخافوش

اذا كانوا هددوا بأنهم حيخربوا البلد

ما تخافوش

احنا واقفين جنبكم... والله العظيم تلاتة احنا واقفين جنبكم.. قسما بالله العظيم احنا واقفين جنبكم

بس ادونا فرصة نقف جنبكم بقى، احنا مش الحيطة المايلة، وجودنا جنبكم هو الضامن الوحيد

انا لو مكانكم اعمل ايه؟

انا لو مكانكم اطلع بيان اقول فيه ان مطالب الشعب على العين والراس، واحنا عارفينها واحدة واحدة، وعايزين نحققها، وبيتم ممارسة ضغوط علينا من قبل كبار الفاسدين، ومن قبل المتضررين من ملاحقة الفاسدين، وبيهددوا امن البلد وشعب مصر، ومحتاجين في هذه الظروف الحرجة وقفة الشعب المصري جنبنا، فيه ناس عايزة تعمل فتن طائفية، وناس عايزة تعمل بلبلة وتخريب، وعايزين جهود الشعب المصري تساندنا

واتفرجوا علينا

اتفرجوا على الشعب ده حيعمل ايه؟ قبل ما البيان ده يخلص حتلاقوا الدنيا كلها لجان شعبية محاوطة كل المصالح والكنايس والجوامع، وفجأتن المسيحيين والمسلمين اللي مسكوا في شعر بعض دول حينزلوا بوس في بعض واحضان تاني، والبلد حتتنظم وتبقى ولا السويد في زمانها

احنا اصلنا لما بنبقى فاضيين بنهبل، لما بيبقى فيه ازمة وعندنا هدف بنبقى زي الساعة.. حتى في الماتشات، ما بنجيبش الجون غير في الوقت بدل الضائع

ده شعبي وانا عارفاه... كان شعبك انت يا كابتن؟ انا اللي لقيته

ما تعملوناش الحيطة المايلة واسمعونا احنا ناس كويسة والله العظيم

مش عارفة... قلبي حاسس كده ان فيه ضغوط عليكم عشان ما تطلعوش الاعلان الدستوري وتسقطوا 71، فيه ناس عايزة دستور 71 وانتوا مش عايزينه، صح؟

وقلبي حاسس كده ان الثلاثي المرح بيهددوكوا بخراب ودمار وحرقوا البنك المركزي بالطريقة الواضحة دي عشان يهتوكوا

طب واحنا رحنا فين؟ ما احنا اهو.. يا ريت يبقى عندكم ثقة فينا شوية

مش انا دلوقت باحب الجيش من طرف واحد؟ بس انا مش حاعرف ادافع لو استمرت سياسة التكتم دي؟ انا مش مصدقة شكوك الناس اللي ابتدت تعلا، لكن مش حاقدر اقولهم مالكوش حق او اسكتوا، لأن الوحيد اللي بايده يطمنهم ويخزي الشيطان هو الجيش المصري فقط لا غير

دلوقت فيه اجهزة، بتحريك من امريكا، عايزين يقعدوا الجيش سنتين تلاتة لحد ما يحضروا البديل الامريكاني، والجيش مش عايز يقعد، فبيحاولوا يقعدوه غصب عنه بأن في نفس اليوم اللي فتحي سرور يتملق فيه الجيش والمشير يندس في مظاهرة ماسبيرو ناس تشتمهم

طب وبرضه انتوا يخيل عليكم الكلام ده؟

احنا شعب مصر.. مافيش احسن من الصراحة معانا، تعالوا لنا بشفافية وتشوفوا وقفتنا جنبكم شكلها ايه، وبعدين كام بلطجي قال كلام فارغ على المشير واساسا ما كانوش جزء من المظاهرة، دول يترنوا علقة بمنتهى السهولة لو جيتوا لنا دوغري وصارحتونا وطلبتوا مساعدتنا في اننا نحقق اهداف الثورة، بدل ما تقعدوا تبعتوا على كل واحد فينا واحد يطقس ورانا عشان يعرف احنا عملاء لمين

احنا مش عملاء ولا حاجة، واللي بنعرفه مش بنعرفه من العمالة، بنعرفه بالاستنتاج، معلش، ربنا فاتح علينا في مخنا شوية عشان الترنت وكده بتعلي مستوى الذكاء، وبعد كده لما تبعتوا حد ورانا يطقس ما تخليهوش يسألنا اسئلة هابلة تكشفه من اول لحظة عشان حتى اهبل ناس فينا فقسوهم، والله العظيم دي مجرد نباهة، والله العظيم كمان مرة احنا ما بنعمل اي حاجة غلط ولا ماشيين في البطال وكلنا عذراوات سوا مدامات ولا انسات ولا حتى رجالة، انتوا شاكين فينا ليه؟ طب لما ناس منا بتشك معذورين عشان هم ما عندهمش مصادر معلومات وكل واحد بيفسر على قد مخه، لكن اصول انت انتوا يبقى عندكم مصادر كويسة تعرفكوا اننا بنحب بلدنا بس، ثقوا في الشعب وما تخافوش علينا

ايه صفوت وزكريا اللي يهددوا دول؟ يروحوا يتوكسوا على خيبتهم، لو عرفوا يعملوا حاجة يوم معركة الجمل يبقى يعرفوا يعملوا حاجة دلوقت، وحرق البنك المركزي مش قصة يعني، والاحداث الطائفية البلهاء بتاعة اطفيح وقطع ودن واحد برضه مش قصة، عادي، احنا اتعاملنا مع حاجات انيل من كده بكتير وقت ما كنتوا في الصحرا، زي ما اتدربتوا هناك ما تخافوش من التعابين والعقارب احنا اتدربنا ما نخافش من صفوت الشريف وزكريا عزمي وفتحي سرور وسوزان مبارك وجمال مبارك، بس ثقوا فينا شوية

ثقوا فينا شوية.. او بلاش.. خلوا بينا وبينهم

يا اما انا مش حاعرف ادافع تاني بقى

واحنا مستمرين في حملتنا لحد ما نجيب الثلاثي عشان يبقوا يعرفوا يحطوا ايدهم في الكوبس وياكلوا ماس كهربائي يا كلوا جاتوه ياكلوا كل اللي يحبوه

هوبا يا شباب؟ 

للي بيجمع توقيعات في اسوان
0122375490


ده رقم مالك عدلي للي عايز ينسق معاه من المحافظات
0101044264


للي بيجمع في دمياط يتصل برقم
0111179793


اللي بيجمع توقيعات في الاسماعيلية يتصل على
0122526411


اللي بيجمع توقيعات في طنطا يتصل على
0124544946


واللي بيجمع توقيعات في اسكندرية يتصل على
0111860593


اللي عايز يوقع في سوهاج يتصل على
0146075050


اللي بيجمع توقيعات في بورسعيد
0120522209


اللي بيجمع توقيعات في المنصورة
0101176127


اللي بيجمع توقيعات في المنوفية
0171009042


لارسال مجموعات التوقيعات داخل او خارج مصر عبر البريد الالكتروني
fegypt20@yahoo.com
الميل ده للي بيجمع توقيعات كتير وياخدها سكان ويبعتها بالميل، ما تبعتليش توقيعك لوحدك، لو توقيعك لوحدك يبقى حطه على التوقيع الالكتروني


وللارسال بالبريد او التسليم يدا بيد
1 ش سوق التوفيقية


ودي صفحة التوقيعات الالكترونية
ودي صفحة الفيك بوس على رأي امين الشرطة اسم الله


وعموما لو هم ما صارحوناش او اتحرجوا منا يقولوا لنا الكلام ده، ادي احنا عرفنا، ماهو الثلاثي المرح دول اساسا هم اللي خربوها على دماغ مبارك بنباهتهم، يحرقوا البنك المركزي يعني فاكرينا مختومين على قفانا؟ 
بلدنا وحنجيبهم يعني حنجيبهم
وبنحضر ملف مبارك واسرته كمان.. هو احنا بنخاف؟ اللي يخاف يروح 
واذا كانت التوقيعات بتخضهم كده وبتخليهم يحرقوا بنوك.. قشطة جدا.. اللي ما وقعش يبقى خايف زيهم، وما يلزمناش الخوافين.. عيب يا جدع احنا من زمان.. من زمان قوي.. من ايام مينا موحد القطرين

خلينا في المفيد.. التوقيعات في تزايد وايدكم معانا

تحديث:
دي صفحة الفيس بوك بتاعة التوقيعات
تحديث:
للي بيجمع توقيعات في اسوان
0122375490


دلوقت انتوا شايفين ده؟ 

ده يخض فعلا، لأن مالك عدلي قال لي ممكن يصدر حكم لصالحهم في غفلة منا

عشان كده احنا عايزين اعلان دستوري فوري، يسقط دستور 71 

يسقط دستور 71 

يسقط دستور 71 

مش يعطله... مش يعطله، لازم الجيش يقول انه تم الغاء دستور 71، دلوقت اللي بتتحرك ومحروقة وما بتفكرش غير في الانتقام من الجيش المصري وقيادات الجيش والشعب والوجوه البارزة في الثورة هي سوزان مبارك، وهي شرانية وغبية الاتنين

اللي بيهندس لها الحاجات دي هو فتحي سرور وصفوت الشريف وزكريا عزمي

هي عمالة تغلي دلوقت ان ليه الجيش المصري سيب جوزها الحكم وليه جوزها سابه من غير ما يعمل فينا زي ليبيا واليمن وهي لما شافت البلدين دول اتشجعت وحست ان القذافي وعلي عبد الله صالح اجدع من جوزها من وجهة نظرها لأنها غلاوية فوق ما تتخيلوا.. اتشجعت للانتقام، هي اللي يهمها ابنها وبس، والشعب خطف التيتينة من ابنها وخلاه يعيط، والجيش ساعد الشعب في الحكاية دي

هي وجوزها وعيالها حييجوا حييجوا، ان شاء الله

بس الاول نخلص من المهندس القانوني والمهندس الاعلامي والمهندس الميليشياتي

بالترتيب: سرور، الشريف، عزمي. 

ودلاديلهم بقى من فلول امن الدولة اللي برضه عندهم حالة يأس ومش قادرين يستوعبوا انهم خلاص ما بقوش "اسيادنا"

مبدئيا

الحمد لله.. حملة التوقيعات بقت ممتازة، وخالد عبد الحميد قال لي النهاردة: ميت الف ايه؟ ان شاء الله اضعاف العدد ده

لأن موقعين الشارع - كالعادة - اجدع من بتوع النت 

:)

والحملة ان شاء الله حتنجح وتلاتة دول حييجوا وحيجيبوا معاهم عوكل واطاطا وكركر وكتكوت ضعيف الجناح والدنيا غدرت بيه

نحب نفكركم تاني ان دي التوقيعات الالكترونية

ده رقم مالك عدلي

0101044264

للي بيجمع في دمياط يتصل برقم
0111179793
اللي بيجمع توقيعات في الاسماعيلية يتصل على
0122526411
اللي بيجمع توقيعات في طنطا يتصل على
0124544946
واللي بيجمع توقيعات في اسكندرية يتصل على
0111860593
اللي عايز يوقع في سوهاج يتصل على
0146075050
وزاد عليهم
اللي بيجمع توقيعات في بورسعيد
0120522209
اللي بيجمع توقيعات في المنصورة
0101176127
اللي بيجمع توقيعات في المنوفية
0171009042
لارسال مجموعات التوقيعات داخل او خارج مصر عبر البريد الالكتروني
fegypt20@yahoo.com
الميل ده للي بيجمع توقيعات كتير وياخدها سكان ويبعتها بالميل، ما تبعتليش توقيعك لوحدك، لو توقيعك لوحدك يبقى حطه على التوقيع الالكتروني
وللارسال بالبريد او التسليم يدا بيد
1 ش سوق التوفيقية
ولو حابب تجمع توقيعات في اي محافظة اتصل بمالك عدلي نسق معاه في محافظتك واطبع النموذج ده واجمع عليه توقيعات

بس بتوع الترنت دولم طلعوا فشنك قوي، كل واحد يقولك اصل اخاف احط رقم بطاقتي.. الناس في الشارع اول ما تسمع صفوت الشريف وفتحي سرور وزكريا عزمي وامن الدولة بيحطوا رقمهم القومي وبيبقى ناقص يتصوروا جنب البيان عشان يبقى مع سبق الاصرار والترصد
اهمية الرقم القومي او الباسبور ان ده بلاغ للنائب العام، فلازم توكل المحامي في البلاغ ده، وبما انك مش عامل له توكيل عام ولا توكيل قضايا يبقى لازم تحط اسمك الثلاثي ورقم اثبات شخصيتك
وانا متفائلة خير ان شاء الله، وحييجوا يعني حييجوا، بأمر الله
لما نخلص منهم ان شاء الله، يبقى خلصنا من مشكاح وريما وجوز المهاطيل خلفة الندامة
بس لازم الاعلان الدستوري قبل يوم الثلاثاء، ولازم الاعلان ده ينص على سقوط دستور 71 والغاء العمل به الى غير رجعة.. 
وانا عايزة اقول لاتنين في هاذوها الحياة ان لو حكم زي ده صدر لصالح مبارك هم اول ناس مش تمام عشانهم
الاخوان المسلمين - وبصراحة اي وعود باي مقاعد في البرلمان مش حتنفعكوا بحاجة لو مبارك اخد حكم زي ده حتى لو ما رجعش وجاب ابنه او حد من دلاديله انتوا حتتدبحوا في الشوارع بلا رحمة ولا شفقة
ومش محتاجة اقول الكلام ده للمؤسسة العسكرية لأنهم ادرى الناس قد ايه مبارك ومراته وولاده بيكرههوهم وامل حياتهم انهم ينتقموا منهم وخصوصا من المشير
لافونا الاعلان الدستوري بقى وبلاش مخاطرات وغلاوة النبي عشان احنا مش ناقصين تعب اعصاب، انا شعري طقطق وخلاص بقيت شبه زوزو ماضي فعلا 
لو سمحتوا شيروا على قد ما تقدروا... 
ملحوظة:
المظاهرة عند ماسبيرو كانت قرف وطين على دماغهم، في الاول كانت مش بطالة وبعدين جم ناس كده ما اعرف مدسوسين ولا اغبيا، واغبيا ده مش عذر لأن عدو عاقل خير من صديق جاهل، وقعدوا يسفهوا ويقلوا ادبهم فانا مشيت بقى لما لقيتها عكت كده
ومش حانزل تاني لو استمر جو الهطل ده.. ده ايه القرف ده يا ربي؟
التوقيعات احسن واضمن، على الاقل عارفين ان مافيش مختلين عقليا حيقولوا هتافات حقيرة ومنحطة ولا تقل سفالة وسفاهة وقرف وانحطاط ووساخة وحقارة وطين على دماغهم عن الهتافات اللي كانت بتتقال ايام ماتش الجزائر، وناس بتئذي بلدها وثورتها، يا اما بعلم يا اما بغير علم، وغير العلم مش عذر، لأن فيه حاجة اسمها كومن سنس
قرفتونا شكوك وطين على دماغكم بقى، لو انتوا مدسوسين وبتوع كنتاكي وخمسين يورو يبقى الجيش والمشير متعاونين مع مبارك، زي ما بعض المخاليل بيشكوا في الجيش، الجيش كمان فيه منهم بيشكوا فيكم انكم مندسين وبتوع خمسين يوروا خصوصا لما بتبقوا باعداد قليلة، وانا اقعد اقول لدول: والله ما يقصدوا، واقول لدكهومة: والله ابدا.. وانا بقى مش حاقضي عمري اصلح بين المسلمين والمسيحيين وبعدين بين بتوع نعم ولا وبعدين بين الشعب والجيش... انا مش مأذون شرعي يعني
بس القرف ده ما استحملوش انا خالص
لا المعتصمين بتوع خمسين يورو، ولما بتحصل غلطات بيبقى الغلط بسبب خوفهم وحرصهم على الثورة، مش عشان هم فوضوية وعايزين خراب للبلد.. لأنهم اول ناس حيتئذوا من خراب البلد، ولو عايزين خرابها ما كانوش عرضوا نفسهم للخطر والبهدلة والاصابات والقتل والتعذيب
ولا الجيش والمشير بتوع مبارك، ولما بتحصل غلطات بيبقى بسبب برضه خوفهم وحرصهم على الامن، مش عشان هم بيحبوا مبارك وعايزين ياخدوا الشعب على خوانة، ولو بتوع مبارك كانوا نفذوا الامر وضربوا الشعب وخلصوا الليلة بلا وجع دماغ وهم اول ناس برضه حيئتذوا لو نظام مبارك رجع سواء بابنه او بوكيل لابنه لأن النظام ده عايز ينتقم منهم
فاهدوا بقى انتوا الاتنين
حبوا بعض.. حبوا بعض
حبوا بعض بقى كلكم، مسلمين ومسيحيين، نعميين ولائيين، مدنيين وعسكريين... حبوا بعضضضضضضضضضضضضضض انا اتخنقت
هو الشك في غير محله ده جين مصري ولا ايه؟ 

هم دول محبوسين ليه والثلاثي المرح برة؟

دول محابيس سجن العقرب اللي محكوم عليهم بالاعدام في قضايا فشنك زي العائدون من افغانستان والعائدون من البانيا والعائدون من البوسنة والعائدون من بيت ابوها رايحة بيت الجيران

القضايا دي كانت فساكونيا اخر حاجة، وكانت كلها محاكم عسكرية بامر من مبارك، ما عملوش حاجة، ماحدش فيهم عمل حاجة، كانوا شباب والدولة بتشجعهم في المساجد والتلفزيونات والدنيا كلها عشان يروحوا يجاهدوا، فكانوا بيلبوا الندا ويروحوا وبعد ما يخلصوا يرجعوا، يقوم ابن الواطية بعد ما يبعتهم بنفسه يعمل لهم قضية ويحكم عليهم بالاعدام

والغريب ان الاعدامات ما اتنفذتش.. ما اتنفذتش يبدو عشان ما عملوش حاجة، او عشان كانوا ماسكينهم يقرروهم: شفتوا مين هناك؟ عملتوا ايه هناك؟ طب فيه واحد سعمنا عنه اسمه كذا، تعرفه ده؟ اعصري مخك يا زينب

وكان منهم محمد الظواهري راخر اللي افرج عنه ورجع اتقبض عليه تاني عشان الحكم بالاعدام

طب انا عايزة اعرف دول محبوسين زي ما هم في قضية فشنك، بموجب محاكمة سقطت بسقوط الدستور، لأنهم مش متحاكمين بالقانون، مافيش قانون بيحاكم انسان لما بيسافر يتطوع في اي حاجة - حتى لو تطوع في القتال - ويرجع بلده يقوم يتحبس، خصوصا لما يبقى مسافر بعلم كل اجهزة الدولة مش هربان ولا مسافر بشكل غير شرعي

المواد الدستورية اللي بتعطي الرئيس صلاحيات انه يحول اي انسان مناخيره مش عاجبة سيادة الريس لمحاكمة عسكرية ويديهم اعدام عشان دمهم تقيل على قلبه، سقطت 
سقطت
سقطت
احنا اسقطناها بدمنا

اللي ما سقطش ومش حيسقط هي جرائم مبارك ومراته وولاده الاتنين وصفوت الشريف وفتحي سرور وزكريا عزمي، دي جرائم لا سقطت قبل الثورة، ولا تسقطها الثورة وعايزينهم

وعايزين الافراج الفوري عن دول، او اعادة محاكمتهم، انشالله تحطوهم تحت الاقامة الجبرية حتى، انما اعدام؟ اعدام ومبارك اللي قتل كل دول عايش في شرم الشيخ؟ وبعدين وثائق امن الدولة قالت لنا ان ما عندناش ارهاب، مبارك وجمال وامن الدولة هم اللي كانوا بيعملوا الارهاب (وكانوا بيراقبوا الجيش كمان، وكانوا بيشتغلوا مع السي اي ايه.. جواسيس جواسيس يعني) ... بقى تفتكروا دول وتنسوا اللي كان في النص؟

الا هو مبارك فين؟
مش عارفين تحكموا عليه ليه؟
مش عارفين تحكموا عليه بتهمة الخيانة العظمى؟ واحد خان شعبه، وخان قواته المسلحة، وادا امر للقوات المسلحة بانها تقتل الشعب، وده اللي خلعه من منصبه، مش دي خيانة عظمى ولا ايه؟ 
اولا افرجوا عن دول:

أسماء بعض المحكومين بالإعدام والموجودين في سجن العقرب




1. مصطفى أحمد حسن حمزة ، ثلاثة أحكام بالإعدام في القضايا 24/92 ، 11/93 ، 268/97 ( العائدون من أفغانستان، إغتيال صفوت الشريف ، أحداث المنيا ) وهو موجود في سجن العقرب . تاريخ القبض عليه 19/2/2003
2. محمد محمد ربيع الظواهري ، حكم بالإعدام في القضية 8/98 ، العائدون من ألبانيا ،موجود في سجن العقرب ، تاريخ القبض عليه 1999 م .
3. رفاعي أحمد طه موسى – 24/92 جنايات عسكرية – سجن المنيا – مايو 2001
4. حسن الخليفة عثمان علي ، – القضية 419/94 أمن دولة طوارئ – إعدام – العقرب – من 22/4/194
5. أحمد عبد القادر بكري محمد ، قضية 745/93 – أمن دولة طوارئ– العقرب – 8/10/1993
6. غريب الشحات أحمد الجوهري – قضية 745/93 – أمن دولة طوارئ – إعدام – العقرب – 14/8/1997
7. شعبان علي عبد الغني هريدي – قضية 847/96 – إعدام – امن دولة – العقرب
8. عثمان خالد إبراهيم السمان – 24/92 عسكرية – سجن المنيا – مارس 2004
9. عبد العزيز داوود موسى – 8/98 عسكرية – العقرب – من 2002
10. يونس محمد محمود – 664/2004 – العقرب
11. محمد جايز صلاح – 664/2004 أمن دولة عليا – العقرب
12. أسامة محمد عبد الغني – 664/2004 - العقرب
--------
فيه بقى غير دول.. عشان زي ما انتوا شايفين التواريخ، دول خللوا في السجن، زمان سرايرهم زرعت جدور في الارض
فيه بقى غيرهم
عمرو البحيري مثلا.. اللي اتنش خمس سنين حكم عسكري من غير مناسبة 
غير قضايا التعذيب قبل وبعد الثورة
انا سمعت امبارح مكالمة احد القادة في القوات المسلحة اللي ما رضيش يقول اسمه
وقعد يقول احنا جيش وطني
واحنا يا سيادة اللوا ما شككناش في وطنية الجيش 
وعارفين ان الجيش المصري جيش وطني
وعارفين ان اسرائيل وامريكا بيكرهوا المشير عشان ما رضيش يغير العقيدة العسكرية المصرية، وعشان بيرفض اي محاولات للاتصال به من قبل اي حد اسرائيلي، وعشان ما بيرضاش يتعامل ولا يتعاون مع اسرائيل، وعشان داجان بنفسه قال: احنا ما نعرفش اي حاجة عن الجيش المصري خالص، مش متعاون زي... وراح راصص اسامي شوية جيوش عربية انما ايه؟ ما يتقلعوش من الرجل كلهم، كل ده ووزير دفاع الجيش المصري مش راضي حتى يرد على تليفوناتهم
وعارفين ان المؤسسة العسكرية المصرية ولاءها للوطن وللشعب فقط ومالهاش اي ولاءات اخرى 
والاكتر من كده، عارفين ان الجيش فرحان بالثورة لأن النظام البائد كان بيتطاول على القوات المسلحة، وبيتجاوزهم في قضايا الامن القومي، وكان عشان ننوس عين امه جمال، وامورتي الحلوة علاء، بيعرض الامن القومي للخطر وبيخلي الجيش يشد في شعره، زي موضوع ماتش الجزائر ده مثلا اللي الجيش المصري وقتها كان عايز يولع في علاء ده لأن الجزائر من الدولة المهمة للأمن القومي المصري
وعارفين ان الجيش لما اتحط في اختيار ما بين النظام والشعب اختار الشعب وما عملش فينا زي ليبيا واليمن
وعارفين ان قيادات الجيش المصري قالت لامريكا لما هددت انها تقطع المعونة اذا ما غيروش العقيدة العسكرية: خدوا معونتكم وروحوا واحنا كمان حنلغي الاتفاقية، احنا اصلا مش عاجبانا الاتفاقية دي
وعارفين ان لما امريكا قالت لقيادات الجيش المصري: حاربوا معانا الارهاب، القيادات ردت عليهم: احنا مش مرتزقة
والكلام ده موجود في ويكيليكس
وعارفين ان بيريز ونتنياهو ورئيس الموساد بيشتكوا مر الشكوى من الجيش المصري ومن قياداته ومن المشير
عارفين ده كله والله العظيم تلاتة، ونبصم لكم عليه بالعشرة، وماحدش فينا انكر ده كله، وماحدش فينا شكك في الشرف العسكري لاي فرد في الجيش من اول المشير لأصغر عسكري، على عينا الشرف العسكري، وفخرنا الشرف العسكري، وعارفين انكم حافظتوا عليه، وماحدش فينا ناسي ان الجيش حمى الثورة وانحاز للشعب وما جازفش بأمن البلد وما عرضناش للي الليبيين واليمنيين بيعانوا منه 
حد ناسي الكلام ده كله يا شباب؟
ماحدش ناسي اهو.. بس ده كله ايه دخله بكشف العذرية على بنات مصر؟ 
بنات مصر.. 
ماهو زي ما احنا عارفين كل ما سبق، احنا عارفين ان الجيش المصري محكوم بعقيدة ايمانية ومعايير اخلاقية هي اللي بتوجه تصرفاته
يعني ايه الجيش المصري اللي الاسرى الاسرائيليين بيحلفوا بحسن معاملته وبيقولوا عمرنا ما شفنا جيش بيعامل اسراه كده يعامل ولاد بلده كده حتى لو كانوا بلطجية ويعذبهم لحد ما يخرجوا ضهرهم متشرح؟ 
يعني ايه الجيش المصري اللي في 73 ما رضيش ياخد المجندات الاسرائيليات اسيرات لأنه مش من اخلاقه يمد ايده على واحدة ست يقوم يعمل كشف عذرية على بنات مصريات؟ 
كل ده عشان عملوا ايه؟ عملوا ايه يستاهلوا عليه ده كله؟ 
نزلوا يعتصموا؟
طب الثورة ما خلصتش.. الثورة ما خلصتش.. خلصوا لهم الثورة ولكم عندي لو حد فيهم نزل انا بنفسي اللي حانزل واخده للمتحف واكشف على قفاه
الثورة ما خلصتش لأن جمال مبارك امبارح كان في نادي رجال الاعمال
الثورة ما خلصتش لأن مبارك في شرم الشيخ بياكل ويشرب وما اتحاكمش لحد النهاردة
الاكتر من كده قلتوا لنا جمدتوا ارصدته.. طب كام ارصدته بقى؟ مش جمدتوها، احنا عايزين نعرف اللي اتجمد ده كام.. ثم احنا عايزين الفلوس دي، بدل ما كل شوية طالع رئيس الوزرا يعمل اعلانات للبورصة واسراء عبد الفتاح طالعة تقول: سهم قليل يمنع بلاوي كتير
طب ما تجيبوا اللي جمدتوه تحطوه في الاقتصاد.. ايه؟ مستنيين ايه؟
ما هو بسم الله ما شاء الله عمرو البحيري اتحكم عليه في ثانية حكم عسكري، اشمعنى عمرو البحيري يتحكم عليه بالسرعة دي ومبارك هو اللي واخدينه على الحنين كده؟ 
وسوزان مبارك بتعمل ايه في مصر؟ وفين الفلوس اللي عليها؟ وفين محاكمتها؟
بلاش ده كله
فين محاكمة صفوت الشريف رئيس المجلس الاعلى للصحافة واللي ضلل الناس في فترة الثورة وشارك في قتل الناس؟ فين فتحي سرور اللي لحد ما كنا عند وزارة الداخلية - فاكرين؟ لما انضربنا - كان منزل بلطجية من بتوعه وكمان طالع يقول انا حاترشح في الانتخابات؟ فين زكريا عزمي اللي بيشتغل دلوقت في الرئاسة؟ زكريا عزمي ده على درجة وزير.. وزير وهو مجرم وقاتل ناس والمجلس القومي لحقوق الانسان وتحقيقات النائب العام بيقولوا انهم التلاتة شاركوا في مدبحة الاربعاء الاسود؟ 
قلنا بتحبوا تعملوا كل حاجة على مهلكم.. ماشي
اشمعنى ضرب الطلبة في اعلام ما كانش على المهل؟ قرار حظر الاعتصامات صدر الصبح العيال انضربت بالليل؟ ومبارك بقاله شهرين حر طليق؟ واكتر من كده دلاديله نازلين فتنة طائفية وبلطجة وادخال سلاح للبلد وبلطجيتهم بيلبسوا جيش وينزلوا الصيعد يعملوا فظائع وانتوا بنفسكم اللي قبضتم عليهم؟
طيب واللي في المتحف دول برضه لابسين ضباط؟ 
واللي كشفوا على عذرية البنات؟ برضه لابسين لبس العيد؟ 
وكل ما نتكلم تقولوا لنا جيش وطني؟ ما عرفنا ان الجيش المصري جيش وطني
عارفين احنا الحكاية دي تلاتة بالله العظيم، وهو الجيش ناقص ما يبقاش وطني كمان؟ 
اذا كان على وطنية الجيش احنا شكرناه كتير، وبنشكره وحنشكره ليوم الدين يا سيدي
بس برضه الاسئلة اللي فوق دي محتاجة اجابة والله
ومالهاش دعوة بالوطنية.. هو انا لما اسأل صاحبتي ما اتصلتيش قبل ما تطبي عليا في البيت ليه تقوم تقول لي انا اشرف من الشرف وعمري ما خنت جوزي؟ 
الاعتصامات مضايقاكم وعشان كده بتتصرفوا حيالها بسرعة
طب فيه وسيلة الطف، وممكن برضه تتصرفوا حيالها بنفس السرعة وحتخلصكم من الاعتصامات للابد:
هاتوا لنا مبارك هو ومراته وعياله وحطوهم في الحبس، ومعاهم الثلاثي المرح، وظباط امن الدولة اللي بيهددوا امن البلد.
محكمة ثورة تنجز مطالب الشعب
بدل مجهود التعذيب وكشف العذرية.. واطمنوا، بنات مصر اشرف من الشرف ومش محتاجين كشف عذرية، واظن كشفتوا عليهم بنفسكم واطمنتوا انهم ما جابوش لكم العار
-------------
يالا يا شباب، ماحدش حيدافع عن ثورتنا غيرنا، لو نمنا حيبقى مافيش ثورة، ومن ثم ماحدش حيتحرك نيابة عنا، احنا نتحرك يقوموا ينجزوا لنا اللي احنا عايزينه، ومش حنبطل وجع دماغ الا لما مطالبنا كلها تتحقق، مش بس جيش مصر جيش وطني، شعب مصر كمان شعب وطني، احنا مش خونة، ولا عملا، ولا بناخد خمسين يورو، ولا كنتاكي، احنا ضحينا باروحانا عشان بلدنا.. اكتر من اي حد.. اكتر من اي حد في البلد دي، الدم دمنا، والحق حقنا... امضوا هنا

ما قلنا طول ما التلاتة برة فيه خطر

تحديث:
اللي خارج مصر يجمع توقيعات ويعمل لها سكان على الكمبيوتر ويبعتها على الميل ده
fegypt20@yahoo.com
صحيح القاضي اجل النظر في القضية ليوم 14 ابريل يعني بعد مرور 60 يوم على خلع المخلوع

انا مش عايزة ابالغ في احساسكم بالخطر صحيح، لكن كمان مش عايزاكم تناموا وتطمنوا، خصوصا ان الشهادة لله مواقف الناس بقت مايعة من غير سبب واضح

يا جدعان الثلاثي عزمي وسرور والشريف طول ما هم برة احنا مش في امان، وبيجتمعوا مع سوزان مبارك وامبارح جمال مبارك ظهر في نادي رجال الاعمال

انتوا ليه ما بتتحركوش بما يكفي؟ وليه دماغكم مظبوطة على التحرير والخناق في معارك مالهاش لازمة زي الخناقة بين انصار نعم وانصار لا وانتوا كلكم جزء من الثورة، واللي طالعة تقول "مأزق التصويت بنعم" وهي اساسا مين اللي جايبها غير الهانم؟ انتوا كل اللي يطبل لكم ترقصوا له؟ وتتخانقوا مع جهات مش هي الخطر الحقيقي، وتتخانقوا مع بعض

لو سمحتوا

لو سمحتوا

لو سمحتوا ركزوا

طول ما الثلاثي عايش ليوم التلات ولا الاربع احنا في خطر

وطول ما عناصر امن الدولة اللي لسه على ولاء لهم وحاسة بيأس وعايزة تسترجع سلطاتها ومش قادرة تصدق ان زمنها راح مش متحفظ عليها ومافيش اشراف قضائي ولا حقوقي عليهم احنا في خطر

هشام البسطويسي لو تفتكروا من اكتر من شهر قال: الثورة المضادة اللي هي بتعمله انها بتفرق الثوار

الاول تبتدي تفرقهم على مواعيد المظاهرات بحيث تكره الناس في الاعتصامات والمظاهرات يبقى شكل المظاهرات هزيل، ثم تفرقهم على المواقف السياسية وتبتدي تستقطب بعضهم، وبعدين تبتدي تحرك ناس انصار مبارك عشان يرجعوه وتعمل له مظاهرات عشان يرجع

البسطويسي قال كده من شهر، واللي بيقوله بيتحقق اهو

لو سمحتوا يا جماعة.. ما تخلونيش افسر اكتر من كده

البيان ده لو اتجمع عليه ميت الف توقيع على الاقل اللي احنا عايزينه حيتعمل... بس كده، ولو ما خلصناش من التلاتة دول ومن عناصر امن الدولة السابق احنا في خطر لانهم بيجتمعوا كل يوم، كل يوم

احنا محتاجين نجمع توقيعات من كل المحافظات

اللي بيجمع في دمياط يتصل برقم

0111179793

اللي بيجمع توقيعات في الاسماعيلية يتصل على

0122526411

اللي بيجمع توقيعات في طنطا يتصل على

0124544946

واللي بيجمع توقيعات في اسكندرية يتصل على

0111860593
اللي عايز يوقع في سوهاج يتصل على
0146075050 

ودي نمرة مالك عادلي

0101044264

وده عنوان مركز هشام مبارك 

1 ش سوق التوفيقية 

وده لنك التوقيعات الالكترونية

وده النموذج اللي تطبعوه عشان تجمعوا عليه توقيعات من الشارع

ومش حاقول لكم اكتر من ان انقاذ الثورة، ودم المهددين بالاغتيال زي علاء الاسواني والبرادعي وجورج اسحاق، في رقبة 100,000 موقع، لو ما وقعش على الاقل دول يبقى الذنب في رقبة المصريين كلهم

ومحتاجين الرقم القومي او رقم الباسبور عشان ده حيتقدم بلاغ قانوني للنائب العام، ويا سيدي اللي خايف على اطيانه وعزبه نبيعها له ما يوقعش لانه اساسا مش متضرر لا من امن الدولة ولا من التلاتة دول... واللي فهمك ان بالرقم القومي حد يقدر يبيعيك ولا يطلقك من مراتك يبقى ما اخدش الابتدائية

وايوة النظام السابق عايز يرجع، وعايز يجيب فترة انتقالية عمرو موسى او احمد شفيق وبعدين يجيبوا جمال مبارك، وبعد ما يجيبوا جمال مبارك حيعملوا قضايا خيانة عظمى فعلا لكل الوجوه البارزة في الثورة، وانا منهم، ومش خايفة الحمد لله، مش خايفة لسبب، ان عقوبة الخيانة العظمى اعدام، يعني الشهادة اللي بقالي عشرين سنة باطلبها من ربنا، ربنا حينولها لي، بس حاموت وانا مش مسامحاكوا، اه والله، حابقى مقبلة على الشهادة وانا سعيدة، وحاروح لربنا وانا مش مسامحاكموا وحاشتكيكوا لربنا عشان ضيعتوا الفرصة الوحيدة والاخيرة لمصر

اعيد تاني؟

انا بأكد لكم ان البيان ده لو اتوقع بميت الف على الاقل حيتعمل اللي احنا عايزينه، وكل ما زاد العدد كل ما سرعة الاجابة للي في البيان ودقة التنفيذ زادت

وانا مش فاهمة الجمعية الوطنية للتغيير، والاخوان المسلمين، وائتلاف شباب ثورة الغضب، والتيارات السياسية اللي شرشحت لبعض في الاستفتاء مش بيشاركوا في تبني البيان ده ليه؟ مش فاهمة الكنيسة اللي بتحشد عشان اعتصام وشافت الامرين من فتحي سرور وصفوت الشريف اللي كانوا ما وراهمش غير مرازية المسيحيين وتمرير احكام ضدهم في القضاء وتسليط اعمال عنف عليهم ما بيمضوش ليه؟ مش فاهمة السلفيين اللي حشدوا عشان المادة التانية اللي مالهاش اي علاقة بالتعديلات  واللي كانوا بيتاخدوا في امن الدولة يتعذبوا لحد ما يتجننوا او يتجندوا او يموتوا ما بيمضوش ليه؟ هم مش عارفين ان واحد واحد فيهم معرض للمحاكمة بتهمة الخيانة العظمى، واكيد مش كلهم عايزين يموتوا شهدا يعني، فيه منهم شوية عايزين يعيشوا ويستمتعوا بالحياة والمناصب اللي مش حيشموها طول ما التلاتة دول برة، وطول ما بتوع امن الدولة مطلوقين

والاهم من كده

فين الشعب المصري يحمي ثورته؟ انا بيدخل لي في اليوم على المدونة دي 20,000 بني ادم، فوق انهم ما وقعوش، مش عارف تاخد توقيعات عشر بني ادمين جنبك؟ صحابك وقرايبك وجيرانك؟ 

انا خلصت ضميري من ربنا، وقلت لكم كل اللي اعرفه، وده مش معناه اننا نرتبك ده معناه اننا نتماسك ونرجع ايد واحدة تاني زي روح التحرير ونبطل خناقات جانبية

احنا الخطوات بتاعتنا لازم تتركز في

1- الخلاص من التلاتة دول وقيادات امن الدولة المطلوقة

2- ابراز حقيقة احمد شفيق وعمرو موسى للناس

3- السعي لبرلمان ائتلافي يعبر بجد عن التحرير ودعم مرشح رئاسي توافقي

واذا ما كانش القوى السياسية تتصالح وتعمل ده، واذا ما كانش الشعب يحمي ثورته، يبقى حسبي الله ونعم الوكيل فيكم وانا برأت ذمتي امام الله وعملت الواجب اللي عليا وسلمت نفسي لله، ووجهت وجهي اليه، وضهري ليكم

وضهري ليكم

وملحوظة تانية: البيان ده كاتبه مالك عدلي، ومتبنيه مركز هشام مبارك، انا مجرد مروجة، وعندي شوية معلومات تعرفني قد ايه البيان ده مهم، وقد ايه التوقيعات مجدية جدا كأنهما مظاهرة مليونية في التحرير، بالعربي: الناس اللي بيكرهوني او مغلولين مني او حاقنين مني، وبالمناسبة هم كمان متحضر لهم قضايا تخابر، البيان ده لا يعبر عني، مافيش داعي تضيعوا على مصر كلها فرصة انقاذ الثورة عشان حزازات شخصية، وكمان صاحب فكرة جمع التوقيعات علاء سيف، بس علاء سيف اللي برضه حاقنين منه مش لازم يتجاهلوا الموضوع عشان ده فكرته، هو كان قصده يخدم يعني

وتاني واخيرا

انا حسبي الله ونعم الوكيل