اعتصام 400 من عمال طنطا للكتان

تحديث:
هو فيه ايه النهاردة؟



تحديث:
من عند خالد علي والمركز بتاعه اسمه المركز المصري للحقوق الاقتصادية والاجتماعية
طب بذمة النبي يا خالد ده اسم يتحفظ؟
عموما ده النص والصور عنده على الفيس بوك
الشرطة تتدخل لفض اعتصام طنطا بالقوة




10 فبراير2010
فى الساعة الرابعة والنصف عصر اليوم قامت قوات الشرطة بمحاولة اقتحام اعتصام عمال طنطا للكتان بشاع حسين حجازى أمام مجلس الوزراء بوسط القاهرة، وهو الإعتصام الذى قام به العمال منذ صباح يوم 8 فبراير واستمر لليوم الثالث على التوالى احتجاجا على سياسات المستثمر السعودى عبد الله الكحكى الذى أغلق الشركة، واعتراضا على تجاهل وزارتى الإستثمار والقوى العاملة لمطالبهم، وكذلك تقاعس الإتحاد العام ونقابة النسيج.
ومنذ بداية الإعتصام كانت قوات الشرطة تقف على الحياد الإ أنها وعلى حين غره قامت فى الساعة الرابعة والنصف بالإعتداء بالضرب على العمال وتكسير واتلاف ما معهم من محتويات لمحاولة فض الإعتصام بالقوة، وتسببوا فى اصابة هشام أبو زيد القيادى العمالى بالشركة ، كما ألقو القبض على اثنين من شباب حركة تضامن وهم محمد ناجى وخالد السيد وهم الآن محتجزين بعربات شرطة تحمل أرقام 39789، كما تعرض الصحفيين جيهان شعبان وهشام فؤاد، والباحثة فاطمة رمضان للإعتداء بالضرب والسب أثناء متابعتهم للإعتصام وتم إبعادهم عن شارع حسين حجازى بالقوة .
وقد جاء هذا التدخل بعد تغيير العمال لهتافاتهم حيث كانوا طوال الأيام الماضية يرددون شعارات لا تهاجم الحكومة ولكنهم اليوم رفعوا هتافات " بالروح والدم رزق عيالنا أهم"، " تسقط حكومة الحزب الوطنى" " يا علاء قول لابوك العمال بيكرهوك" ، وحتى صدور هذا البيان عجزت الشرطة عن فض الإعتصام رغم كل هذه الاعتداءات الإ أنه شوهدت عربات من قوات الشرطة تتوافد وتتزايد على مكان الاعتصام .
ومن الجدير بالذكر ان مطالب العمال فى الاعتصام
1- صرف الارباح.
2- ربط الحافز بأجر 2008
3- رفع بدل الوجبة من 32 حتى 90 جنيه
4- إقرار العلاوة الدورية ب 10%
5- تثبيت العمالة المؤقتة
6- تسديد حصة التأمينات للعمال عن فترة الاضراب من مايو 2009 حتى نوفمبر 2009
والمركز المصرى للحقوق الاقتصادية والاجتماعية إذ يعلن تضامنه مع عمال طنطا للكتان يطالب كل القوى السياسية والنقابية والحقوقية بإعلان تضامنها مع العمال، وتقديم كافة أشكال العون والمساندة لهم، ويدين اعتداءات الشرطة ومحاولاتها فض الاعتصام .


المركز المصرى للحقوق الاقتصادية والاجتماعية
10 فبراير 2010
الساعة الخامسة عصرا
----

بالنسبة بقى لموضوع المنوفية بتاع النجار المسيحي لسه لا خالد ولا مركز هشام مبارك نزلوا بيان اول ما ينزلوا ح اجيبهولكوا ان شاء الله الاخبار المؤكدة حتى الان ان الشرطة من فترة قفلت مصلى المسيحيين وحطت عليه حراسة وان امين شرطة قتل نجار مسيحي ولحد ما تيجي اخبار تانية غير اللي في البوست ده هي دي المعلومات الواردة من الشهود، وزي ما قلت في التعليق اذا افترضنا ان الشهود بيتخيلوا بنسبة اربعين في المية فالحكومة كدابة بنسبة خمسة وتسعين في المية، وفيه جهات مستقلة متولية الموضوع وهم دول اللي ح يقولوا الحق، وانا عارفة ان نسبة لا بأس بها من المسلمين اللي عاملين متدينين مش ح يقولوا كلمة حق في الموضوع ده حتى لو طلع جزء كبير من شهادة الشهود صحيحة، عملا بقول الله: وإذا قلتم فاعدلوا ولو كان ذا قربى. والانسان عشان يبقى متدين لازم يفسر بالعكس طبعا زي ما كلنا عارفين

حاجة بقت تخنق

التفاصيل هنا وهنا
الله اكبر.... دول بيقولوا يسقط يسقط الاستثمار


الحمد لله الحمد لله الحمد لله... ايييييوة كده انطقوها بقى

 

مين اللي صوتها طالع في التسجيل دي؟

الناس تغني للاطفال ننه هو.. ماما زمانها جاية... تونكل تونكل ليتل ستار، مش يغنوا لي لسعة في لسعة نهب نثور وانا عندي تسع شهور ويرجعوا يتلبشوا لي: انت لسانك طول قوي خلي بالك

هو فيه ايه في المرور النهاردة

انا باكلمكوا بعد ما نجحت في تهدئة نفسي واتخاذ كافة الاجراءات اللي من شأنها اني ما اصورش قتيل

فيه ايه بقى؟ انا كنت راجعة في حالة لا يرسم لها، وكنت عمالة اصرخ واعيط في الشارع زي المجنونة طول ما انا سايقة

وطلعت همي في تاكسي وكسرت عليه جه ورايا وقال لي: ايه؟ قلت له: مخنوقة.. قال لي: طاب خلاص اذا كان كده معلش

ماهو نعمل ايه طيب؟ لازم نشيل بعضينا يا حورية

تعذيب حتى الموت تاني

اظن الموضوع ده ما بقاش خبر خلاص

اعتقالات الاخوان

ممكن افهم ليه؟ ليه يعني؟ ايه اللي حصل؟ فيه حاجة؟ خير؟ وللا صحيوا الصبح عندهم تعنية مثلا؟

حسام حسن جالكوا خبوا عيالكوا

هو الماتش ما كانش حلو قوي، بس له مميزات

1- الزمالك فاز للمرة الرابعة على التوالي وده احساس كان بقالي كتير ما حستوش، اخيرا ح نبطل نقول الحكم ظلمنا

2- الف مبروك للمحلة مواهاهانياهانياهانياهاهاهااااااااااااااااااااااااااااعععععع

3- والاهم: الانسة مصر بسمعتها وكرامتها وصورتها وحشاكيلها والاضيشها ولوريل وهاردي اللي دخلتهم علينا في ديلها الحمد لله لموا عزالهم كلهم واتكلوا على الله.... يا سااااااااااااتر، ده زيارتهم كانت تقيلة قوي وقلبوا القعدة ورموا قشر اللب الابيض على الارض

واحسن ميزة لفوز الزمالك، ان ماحدش بيحتفل في الشارع، انا بس اللي كنت ماشية اكلكس والناس فاكريني بازف عروسة

مين عبد الله بدر ده بقى؟ ده طلع من السجن

تحديث:

وفيه اخ زعلان اني باقول معاتيه؟

امال دول ايه اللي يكتبوا عن سجنه وينوحوا ويألفوا قصص عبثية ولما الراجل يخرج من السجن ويقدم برنامج في قناة فضائية ما يجيبوش سيرة؟

عموما الف حمد الله على سلامته وكفارة

ناخد راحتنا بقى مدام طلع من السجن بالسلامة: طبيعي ان واحد دي دماغه ودي طريقة كلامه ودي افكاره وده اسلوبه يبقى تلامذته عمرهم العقلي اربع سنين وسبع شهور وما بيعرفوش يشتهجوا زاراعا

قال ازب عن ديني وعابث الوجه قال

--------
البوست بتاع عمرو خالد جاب جماهير كتير من ضمن الجماهير طارق على التويتر جاب لي فيديو لواحد بيشتم عمرو خالد قمت انا سألت على اسمه قام قالوا لي اسمه عبد الله بدر قام حد على التويتر قال لي ده محبوس قمت دورت محبوس ليه، لقيته مرمي في السجن بقاله اربع سنين ومش عارفة محبوس ليه، ومواقع السلفية عمالة تنزل خيالات واوهام وباينة قوي انها متفبركة

بس قالوا انه عشان خاطر رد على زكريا بطرس، وانا متخيلة ممكن يكون قال ايه؟ انا لسه ما سمعتش الفيديوهات دي لاني نازلة مستعجلة لما ارجع، بس متخيلة انه شتم لانه بيشتم كتير قوي، بس مافيش حد يتحبس اربع سنين عشان بيشتم... حرام

ومواقع السلفية بدل ما يكتبوا الكلام المعاتيهي ده 

المفروض كانوا يلفتوا النظر له عشان الناس تعمل له حملة بدل ما الراجل قدد في السجن، والمحامي بتاعه ممدوح اسماعيل بيدافع عنه متطوع، طب ممدوح اسماعيل ده لما اتقبض عليه راح جاب قناة الجزيرة، الراجل ده اربع سنين مرمي في السجن ولا نسمع عنه؟ ده اسمه كلام ده؟

انا عارفة ان الناس لما تسمعه ممكن شوية منهم يتضايقوا منه، لكن تضايق منه حاجة ويتحبس اربع سنين من غير ذنب ومن غير حكم قضائي دي حاجة تانية.. وبعدين الراجل واضح انه مش امن زي كتير من الشيوخ اللي مسميين نفسهم سلفية، مش بس عشان اتحبس، لان عادي ممكن الامن يقلب على واحد جنده ده وارد، بس عشان كمان هو في كذا فيديو بيقول انا صحيح اللي بيسمعوني قليلين بس..إلخ، يعني جمهوره مش كبير، وهو طريقته اقرب شوية لوجدي غنيم، يعني مش زي ثلاثي اضواء المسرح، ومش ح يعجبك كلامه من الاخر كده، بس مش مهم، ما يتحبسش برضه

ماحد يشوفه الراجل ده حرام، انا مش لاقية اي حاجة في منتديات السلفية بتقول انه خرج، اربع سنين كتير، كتير قوي، وطبعا بخلاف "انت تفعل دروس.... انا كنت لا مؤاخذة *** عن ديني... افعل لي قناة فضائية... فسكت الظابط وهو مبهم وعابث الوجه... " والهطل اللي مكتوب على المواقع والمنتديات دي، ما فعلوش نزلوا الاتهامات، ولا فعلوا قالوا لنا اذا كان فيه محاكمة وللا هم ناسيين الراجل كده وانا افعل قلبي مبهم وواجعني على الراجل لانه لم يفعل شال سلاح كل اللي فعله ان لسانه طويل، حد بيتحبس اربع سنين عشان لسانه طويل؟ حد من هشام مبارك وللا الشبكة العربية يفعل يروح يشوف التحقيقات وللا يشوف لنا الراجل ده ماله، ده مالوش صاحب ولا سند غير اللي بيفعلوا هبل في الجبل وحايسين ومبهمين ومش عارفين يفعلوا يتصرفوا وهم بسبب اللي اتفعل فيهم في التسعينات خوافين والظاهر خلعوا من الراجل، حد يفعل يصيح له وللا يعمل له حملة وللا اي نيلة الراجل نشف في السجن

وياريت ماحدش لما يسمع الراجل ويتضايق من كلامه يطنش ويقعد مبهم وعابث..

مهما كان كلامه مضايقني، بس دي حرية رأي، مصداقية البني ادم بقى تبان لما يفعل يدافع عن بني ادم هو مبهم من كلامه

هههههههههههه هم يضحك وهم يبكي، ربنا يفك يسجنه يارب
اه.. وماحدش يروح يجيب للراجل منتصر الزيات، منتصر ده متخصص اعدام لو رحت له في قضية كمبيالات ح يجب لك اعدام

------------

اسرائيل عدت بوارج من قناة السويس متجهة للبحر الاحمر

خلاص يا شباب.. معلش

كللللله يثثثثثثثثثثثثثبت بقى، احنا ح نشوف ايام صعبة جاية وربنا موجود

وهو يستر من عنده

بروتوكلات حكماء فرعون

حلوة قوي

انا لازم اعتذر لعمرو خالد

اصل انا شفت كام فيتيون كده لناس لهربانة من مصحة عقلية ومسميين نفسهم دعاة، ومواطن مصري عمال يحرضني عشان اقول رأيي فيهم بالاسماء بس انا بصراحة كده وش باخاف من الاضيشهم، اذا كان بعض الاضيش عمرو خالد لما انتقدته قالوا لي كلام في منتهى الانحطاط امال بقى اللي سلوكهم كلها محروقة دول الاضيشهم ح يقولوا ايه؟

بس فيه ملحوظة، هم مالهم ومال عمرو خالد؟ ها؟ لا بجد، فيه انسان في الدنيا بيقول على نفسه داعية وعالم وكده ويطلع شرايط يشتم في انسان تاني؟ يعني ده مجهود يعني يشكروا عليه انهم يقعدوا يلتوا ويعجنوا في سيرة الراجل كده؟ وقلة ادب قلة ادب و"عمرو خالد بتاع الفنانات" ايه ده ايه ده؟ ايه شغل العوالم ده؟ وبعدين الراجل ما ردش خالص، لا تلميحا ولا تصريحا، بصراحة كبر في نظري واحترمته، يعني هو بيقول على نفسه مصلح اجتماعي، وانا من وجهة نظري المتواضعة مش شايفاه اصلح حاجة وهو بقاله سنين، شايفاه ريح ضمير الاغنيا بس، بس الظاهر اني كنت غلطانة والعيب في عيني مش فيه، والا ايه اللي يخليهم يعملوا فرقة لشتيمته بالطريقة دي وهم ناس هدفهم في الحياة انهم يجننوا الشعب؟ زي ما علاء مبارك جننا في الكورة هم بيجننونا في الدين، طب بيشتموا عمرو خالد بالهيستيريا والوضاعة دي ليه؟ اكيد له ثمرة ما انا مش شايفاها وغايظاهم، وشتيمتهم له، خلتني انا اللي مختلفة معاه احترمه واراجع نفسي واحاول ادور على الحاجة الكويسة قوي اللي عملها اللي تخليهم محروقين منه كده، واذا كان ما بيعملش حاجة غير انه بيحافظ على مخ اللي بيسمعوه من الجنان الازلي اللي مالي البلد يبقى كتر خيره بقى، ما كل الناس اتجننت اصلا، وعدم رده عليهم ولا حتى بالتلميح خلاهم قد النملة قدامي، ده لو كان الف فيهم مجلدات شتيمة ما كانش اهانهم كل الاهانة دي لما تجاهلهم ولا كأنهم شوية دبان، والله محترم، وانا لا ليا في دول ولا في دول، فقلت بقى انا لازم اعتذر للراجل وان كنت لسه مختلفة مع طريقته بس ما يستاهلش يتشتم كده ابدا بالانحطاط ده ويتخاض في سيرته بالطريقة الواطية دي... ورد فعله رد فعل واحد محترم، هم ايه دول؟ بلاش الدين والكلام ده، الست الوالدة ما علمتهمش يتكلموا ازاي؟

انا اسفة يا استاذ عمرو... واختلاف الرأي لا يفسد للاحترام قضية، كفاية انك متربي

مقال ابراهيم عيسى حلو قوي النهاردة

كبرياء بلا ديمقراطية واستبداد بلا كبرياء!

من اول السطر

ابراهيم عيسى

أداء جمال عبدالناصر في هذه الخطبة ربما يثير الحماس والإعجاب، ولا أملك إلا أن أفرح وأنا أقرأها بعد خمسة وأربعين عاماً من إلقائه لها، وأفخر بأن هناك رئيساً وزعيماً عربياً كان قادراً علي أن يرد علي الولايات المتحدة الأمريكية بهذه الطريقة، وبهذا الكبرياء حين تطالبه بالصلح والتسوية مع إسرائيل، قال عبدالناصر في خطبة عيد النصر عام 1964رداً علي تهديد الرئيس الأمريكي «جونسون» بوقف المعونة الاقتصادية:دي سياستنا.. سياسة مستقلة، وإحنا بنقول إن إحنا أمّا بنتعامل مع دول العالم بنتعامل معاها علي أساس إن ما حدش يتدخل في شئوننا، ولكن إذا كانوا الأمريكان بيفهموا إنهم بيدونا شوية معونة علشان ييجوا يتحكموا فينا ويتحكموا في سياستنا، أنا باقول لهم إحنا متأسفين، إحنا مستعدين ننزل الشاي شوية، بنقلل من استهلاكنا في البن، وبنقلل من استهلاكنا في بعض حاجات ونحافظ علي استقلالنا، ليه أنا باقول إحنا بناخد من الأمريكان قمح، لازم نعرف المواضيع بالمفتوح، قمح، ولحمة، وفراخ، ما بناخدش مصانع، والله أبداً يعني ما بيدوناش مصانع، بيدونا بحوالي 50 مليون جنيه في السنة ( تأمّل رقم المعونة أيام عبدالناصر ثم شوف عبدالناصر وهو يقارنها بميزانية مصر وقتها) فيضيف: إحنا ميزانيتنا في السنة 1100 مليون جنيه،(أقل من ثروة أي رجل أعمال في أمانة السياسات بالحزب الوطني هذه الأيام ) بنصرف علي الخطة حوالي 400 مليون جنيه أو 500 مليون جنيه، إذا دعا الأمر إن إحنا نوفر الـ 50 مليون جنيه بنوفرها علي الجزمة، ولا بتهمنا والله العظيم.(ياه حكاية الجزمة دي قديمة قوي، إنها لهجة فيها استخفاف وسخرية وفيها قسوة وترفع علي أمريكا التي تريد كسر إرادة مصر ) ويكمل عبد الناصر: ليه أنا باقول هذا الكلام؟ أنا باقول هذا الكلام النهارده بمناسبة إن إمبارح السفير الأمريكي قابل نائب رئيس الوزارة للتموين وراح عنده مقموص وزعلان وقعد عنده دقيقتين، وكان مفروض حيكلمه علي التموين - المواد التموينية اللي إحنا بنجيبها من أمريكا حسب قانون الحاصلات - وقال له والله أنا ما باقدرش أتكلم أبداً دلوقت في هذا الموضوع.. ليه؟ لأن سلوكنا يعني - إحنا - هنا في مصر مش عاجبهم. أنا باقول له هنا اللي سلوكنا مش عاجبه يشرب.. يشرب منين؟ «وترد الجماهير من البحر» يشرب من البحر وإن ماكفهوش.. وقلت هنا اللي ما يكفيهوش البحر الأبيض بندي له البحر الأحمر يشربه كمان!

يواصل عبدالناصر :اللي أنا بدي أقوله إن إحنا لا يمكن نبيع استقلالنا علشان 30 مليون جنيه ولاّ 40 مليون ولاّ 50 مليون جنيه، إن إحنا مش مستعدين نقبل من واحد أي كلمة، اللي بيكلمنا أي كلمة بنقطع له لسانه،(بعد الجزمة جاء قطع اللسان!) كده كلام واضح وكلام صريح، إذا كنا النهارده بنشرب شاي 7 أيام نشرب 5 أيام لغاية ما نبني بلدنا، إذا كنا بنشرب قهوة 7 أيام نشرب 4 أيام، إذا كنا بناكل لحمة 4 أيام ناكل لحمة 3 أيام.

اللي أنا بدي أقوله إن طبعاً مناسبة هذا الكلام في الوقت اللي بيقولوا إن إحنا عندنا أزمة تموين وعندنا كذا وعندنا كذا إن دل علي شيء فيدل علي أنها طريقة من طرق الضغط، إحنا متأسفين ما بنقبلش الضغط، وما بنقبلش الكلام السخيف، وما بنقبلش الرذالة أبداً، وإحنا ناس خلقنا ضيق، خلقتنا كده وطبيعتنا كده، إذن المعونة الأمريكية زي ما قال السفير إمبارح إنهم مش مستعدين يتكلموا، بنقول لهم والله متشكرين وكتّر خيركم، لكن إحنا مش مستعدين نقبل كلام ولا نقبل أنزحة، إحنا بنقدر نوفر الـ50 مليون جنيه، وبنقدر يكون عندنا كفاية ذاتية، والشعب المصري يستطيع أن يصبر ويكافح.

انتهت الخطبة وطبعاً تملأك عزة خصوصاً عندما تقارن الأداء الناصري بالأداء المباركي مع السياسة الأمريكية، حيث حكومة مصر طيِّعة ومستجيبة وتابعة لأهداف واشنطن كأن سياساتنا صارت فرعاً لوزارة الخارجية الأمريكية في القاهرة، لكن الحقيقة أن منهج عبدالناصر المستقل عن الأمريكان والمناهض لسياسة أمريكا الإسرائيلية في المنطقة لم يقم بحمايته بالديمقراطية، بل أدت ديكتاتورية عبدالناصر إلي هزيمة عسكرية فادحة نخرت منهج الاستقلال وفتحت الطريق بعد عبدالناصر إلي تبعية مصر الصارخة لأمريكا، وتحولت مصر من كبرياء الاستقلال إلي ابتذال الكرامة والسمع والطاعة من أجل الرضا الأمريكي السامي علي الحكم ورجاله، فكما ضيع الاستبداد الاستقلال عن أمريكا جلبت الديكتاتورية وحكم الفرد والرغبة في توريث الحكم التبعية لأمريكا، الحل هو النموذج التركي، ديمقراطية محترمة وعظيمة ودولة ناهضة وقوية وموقف مبدئي مستقل وعلاقة ندية رأساً برأس مع أمريكا!

أما كبرياء بلا ديمقراطية أواستبداد بلا كبرياء فهو الفشل بعينه وبوجهه وبقفاه!

---------------

صح، انا ابصم على ان الديكتاتورية بتجلب الهزيمة وبعدها الذل وحسن النوايا والطيبة ما يبرروش الديكتاتورية وكل حاجة، ولو ان النموذج التركي يعني فاشيست وعنصري وعسكري وما اتحسنش الا لما اردوغان جه بعد طلوع الروح وفين وفين لما قبضة الجيش خفت شوية وبرضه لسه فيه صراع ما بين السلطة المدنية والقبضة العسكرية والجيش قرفان من اردوغان وعايز يقلبه لانه عامل لهم مشاكل مع اسرائيل

بس برغم كل ده، برضه عبد الناصر عسل

هههههههههههههه

بيتكلم كأنه بيظبط مصروف البيت وعايزين نمسك ايدنا شوية يا ام العيال، وفعلا بيتكلم زي الابهات المصرية بالظبط، ومن غير تمثيل... هو فيه اب مصري ديمقراطي؟ ولا ابويا

ههههه امور كده، يعني تحس انه بني ادم يا اخي ومخلص مش اراجوز زي التاني ولا دغوف زي التالت، انسان عادي كده مش تحفة من تحف الزمن مالهاش مثيل زي البلاوي اللي اتحدفت علينا بعده، وعلى الاقل دمه خفيف

انا ح افتح المدونة مبرة محمد علي

المنقبات
كل المنقبات اللي اعرفهم بيتعرضوا دلوقت لاضطهاد شعبي رهيب، حط بقى امن الجامعة وامن الشغل وامن العمارة والامن الغذائي على جنب وهات الناس، انا عمري ما شفت ببغاء عقله في اذنيه بالشكل ده، دلوقت مافيش منقبة اعرفها الا وكل ما حد يشوفها يقول لها: على فكرة النقاب غلط... على فكرة النقاب ده مش من الاسلام في شيء... وانا ايش عرفني بقى انك ست؟ ما يمكن راجل متخفي!!! وهكذا كذا فزورة
والنهاردة واحدة صاحبتي منقبة قالت لي قبل كلام شيخ الازهر والحملة دي ما كانش حد بيتعرض لي
وبعدييييييين
وبعدييييييييييييييييييييييييييين
وبعديييييييييييييييييييييييييييييييييييييييييييييين وبعدين وبعدين وبعدين وبعدين؟ انا زهقت
انا ح الاحق على النصارى وللا الروافض وللا الجزائريين وللا الفلسطينيين وللا المنقبات، وكله كوم واللي بيتشتموا في وشهم بالجرأة دي كوم تاني، يعني ايه؟ مش ح يعرفوا يدخلوا حتة من غير ما يتهزأوا وللا ايييييييييييييه؟
الله يخرب بيتك يا عوكل

صباح المزاج

هيهيهيهييييييييييييي

انا قلتها قبل كده على التويتر، بس بما ان فيه ناس بقت تبعت لي على الفيس بوء ورسايل على الموبايل بقى فانا مضطرة اعلنها مدوية من منبري هاتيك المجالي:

قسما بالله، تلاتة بالله، يمين بالله انا ما باخد مليم اصفر ولا احمر ولا اخضر من الدستور

والناس الشهادة لله عرضوا عليا على استحياء وانا اللي ما رضتش عشان انا باحب الدستور، وعشان لما انقل مقال لابراهيم عيسى هنا ماحدش يقول: اااااه عشان بيقبضها ويطلع بيقبضني ميتين جنيه وللا حاجة واهزأ نفسي على الفاضي

وقسما بالله، تلاتة بالله، يمين بالله انا عمري ما باعرض نفسي على حد ابدا، الناس لازم تقول لي ولازم يقولوا لي بجدية مش كلمة عابرة كده: ما تكتبي عندنا... عشان انا باتكسف، ساعات يعني، باتكسف من حاجات معينة، ده انا اول ما اتعينت في الشغل اتكسفت اطلع الخازنة اقبض

ايه بقى؟ نعم؟ مالهم اللي طالعين واكلين نازلين واكلين جوة مصر وبرة مصر من ايتها جيهة ما بيخطوش خطوة من غير دورارات وايشي اخضر واحمر؟ 

محروقين ليه من حتة عمود في الصفحة قبل الاخيرة اللي عمر ما حد بيفتحها وعلى يمين الصفحة وفوق السودوكو وجنب تعيش وتفتكر وتعيش وتفتكر لو حد شافه اصلا بتوضيب الصفحة دي؟ 

وانا راضية، انا باحب الدستور كده لله في لله وشايفاهم بيعملوا دور وطني مهم ويشرفني اشارك معاهم ولو طلبوا ادفع لهم فلوس، انا لسه عايشة بذنب جرنال البديل وزعلانة انه راح مننا ويهمني ان جرنال زي الدستور في وسط الواغش اللي حوالينا يفضل عايش، ولو معايا فلوس كنت لميت لهم تبرعات، بس انا باشارك باضعف الايمان

التانيين بقى ماهم ربنا مسهل لهم يعني ونفخ في صورتهم ومن بعد الجلابية والفوطة الدبلان في رقبته المهرية من هبش الاكلان والدوخة الازلية والنوم في الدكان بقى صاحب عربية وعمارة وسكان، شعبان البقال شعبان البقال، ومكومين فلوس قد كده على قلبهم ولهم حسابات في بنوك، انا والله العظيم الحساب الوحيد اللي ليا في البنك بيتحول عليه المرتب عشان اسدد اقساط العربية وبقية فلوسي من وظيفتي حوافز ومكافئات وكده

مش ذنبي والله ان ماحدش حاسس بيهم عشان كلامهم رايش ومش ذنبي ان ماحدش بيثق في مصداقيتهم عشان سمعتهم اللي زي الطين، مش انا اللي عملتها، كل واحد بيعمل سمعته بتصرفاته، وماحدش بياخد كل حاجة، مافيش حد بيطلع واكل وينزل واكل وكمان عايز الناس تثق فيه وهو حتى لما بيطرش التعليمات اللي جاية له ما بيتحلاش بقدر من المهنية عشان يبان كأن يعني ده كلامه، كل واحد له اختياراته

حاسبوا الدودة بقى، دودة موجودة تحتيكوا في المية، دودة موجودة والنية اذية

انا بس كاتبة البوست ده عشان اهديهم والله بدل ما ينبروا عليا بخيالات في دماغهم وانا اصلي طول عمري نجمي خفيف "اجرني" كايدة العزال انا من يومي ايوه اه هيهيهيهيهيييييييييييييييييييييييييييييييي

والله العظيم كل يوم الجزيرة بتكبر في نظري

بعد النجاح الباهر لضرب خبر سيفون سبورت في اليوم الساقع وضرب خبر الحكم كودجا في العربية اليوم الساقع رجعت تنشر اخبار كاذبة تاني بعد ما قلنا انها تابت وارتجعت

انا بصراحة شفت الخبر ده اتلهيت واتخضيت وركبي خبطت في وداني

قام ربنا يكرمهم الشباب على التويتر قالوا لي ده تأليف وتلحين ووائل خليل جاب لي اللنك ده اجرنها بقى كدبة عالمية (عارفين يعني ايه اجرنها يا فرافير؟ :) مش ح اقول) وكل الناس بتسرح بيها

انا مش سبق وحذرت اليوم الساقع من انها تنقل من النت عمياني بالطريقة دي؟ لازم كل شوية نعمل لهم فضيحة؟ 

وقبل كده دبسوا السي ان ان بذاتها في اخبار سيفون سبورت؟ والعربية طبعا ام الكومبينيشن والبيديهات كلها

كل يوم الجزيرة بتكبر في نظري، ما شاء الله عليهم، لا عمرهم ضربوا خبر، ولا جريوا ورا اخبار منشورة في اي حتة تانية من غير ما يتأكدوا من صحتها من مراسيلنهم ومصادرهم

وعشان كده كايدين العزال مرة يقولوا عليها اسرائيلية ومرة يقولوا عليها شيعية ومرة يقولوا عليها تبع تنظيم القاعدة

وهي مش اكتر من قناة اعلامية اللي فيها بيراعوا ربنا في لقمة عيشهم وبيعملوا شغلهم

ما تنسوش تشردوا لليوم الساقع تاني، على الله يرتجعوا خالص المرة دي

حد ينقل خبر من على مجموعة على الفيس بوك؟ افرض كدبة فبراير؟ افرض واحد بيستظرف دم اهله، طب تليفون صغير للداخلية يسألوا عن صحة الواقعة طاه

لا لجدار العار

هنا

اسرائيل ح تقدم اسكتشات ابو لمعة الاصلي

مرة تقول لنا مصر لها يد في اغتيال المبحوح، ومعلش انا اللي سيئة الظن بالنظام المصري وباصدق عليه اي حاجة عمري ما اصدق ابدا حاجة زي دي، مصر ح تتلحلح من مكانها وتروح لدبي عشان تموت المبحوح؟ ليه؟ ولا تدخل نفسها في حاجة زي دي ابدا، واسعة واسعة اوسع من بوابة المتولي

ومرة تقول الجزيرة كمان ساعدتنا في اغتيال المبحوح، قال ايه، صورته قمنا احنا عرفنا مكانه، وهو بقى كان بيريل يعني؟ صوروه ازاي عشان يعرفوا مكانه؟ صوروا اسم الشارع ورقم العمارة والدور اللي ساكن فيه؟ ها.. وقالوا لهم التاكسي بياخد كام من المطار للبيت عنده؟

اخر النكت بقى، قال المبحوح، بتاع حماس، الاخوان المسلمين، فتاة هي اللي اغرته وخلته يفتح الباب اللي هو دايما مسوجر

ايه افلام نادية الجنسي الساقطة دي؟ تخيلوا المبحوح الله يرحمه قاعد يفرقع في علب فيروز توت والفتاة لابسة البيبي دول الاسود بتاع نادية الجنسي اللي بتطلع بيه على طول ده وبترقص له على اغنية والبط يقوم فرحان م النوم يغطس ويعوم وهات يا لعب حتى جاموسته سمينة اللحم بتاكل المام وآخر لعب جدو علي عنده حمار

لا يا اسرائيل وسعت منك قوي، ايه التخلف اللي صابهم ده؟ ده من قعدتهم معانا وللا ايه؟ يا عيني، هو من ساعة ما اتصاحبوا على عوكل والطقم بتاعه قوي وهم فيهم حاجة مش مظبوطة في مخهم، دول حتى كانوا بيتابعوا مسلسل حرب الجواميس لا وسفارتهم اعترضت على المسلسل .. اه، هو حرب الجواميس اللي عمل فيهم كده على فكرة ... مش هم اللي كانوا عايزين تطبيع؟ يشربوا بقى ان ما خليناهم يجروا ويقولوا ابويا اتحرق هيه يبقى انت اكيد مش في مصر

رسالة هامة من غزة

انا كنت سألت عما قيل في الصحف الاسرائيلية عن اسماعيل هنية، وانا لا كدبت ولا صدقت، بس طلبت رد من غزة
وجاني الرد ده من البروفايل ده وشايفة انه مهم يتنشر بوست
أختي الكريمة نوارة ..

لا تصدقي ما حدا يتابعك من قطاعنا الحبيب ويتابع شو بتقولي في مدونتك ..

احنا كتير متابعينك وفخورين بيكي وبأمثالك وكتير تسعدنا التعليقات اللي نقراها هنا بمدونتك من أشقاءنا المصريين ..

ويمكن سعادتنا بيكم أكبر من احتياجنا للتعليق على ما نقرأه هنا ..

يكفينا فخراً إنكم مصريين ويكفينا رداً على النظام المصري وكل من يؤيد الصهاينة بأن لنا أخوة مصريين متلكم أنتم ..

أما بالنسبة لأبو العبد حفظه الله ورعاه نحن لا نصدق عليه أي غبار ونحن نعلم حق العلم لو أن أبو العبد امتلك مالاً أين سيكون مصير هذا المال..

هو لا ينسى أبناء شعبه وهو يطوف غزة من شمالها لجنوبها يدخل بيوتنا ويسأل عن كل مواطن ويأكل من أكلنا ولا يتكبر علينا خاصة من تمت إصابته في الحرب أو استشهد أحد أبناؤه ..

بيوم من الأيام حكوا إنه تزوج امرأة أخرى على زوجته إم العبد والجميع يعلم كم تحبه أم العبد وهي ابنة عمه وتملك الدين والخلق والجمال وهي حريصة كل الحرص عليه وكما أنتم تعلمون هو يسكن هذا المنزل هو وكل أفراد أسرته ولا يريد أي شيء من متاع الدنيا لا هو ولا أبناؤه ..

لا أعرف لماذا يطلقوا عليه الشائعات الغريبة هذه .. هو بريء من كل هذا وهو لا يعامل أبناء فتح إلا بكل خير وبذات مرة أرسل نقود لأبناء فتح الأسرى في المعتقلات الصهيونية حتى يتمكن الأسرى من الشراء من الكانتين في المعتقل ...

عموماً إحنا بنحبهم لأنهم منا واحنا منهم ولأنهم عايشين عيشة متل عيشتنا
ويوجد في غزة أشخاص يمتلكون أموال أكثر منهم بكثير وإن كان حدا من القيادة صاحب أملاك فهي بسبب الوراثة
أموال الحركة للحركة وأموال الحكومة للشعب .. هذه نقطة مهمة جداً في فرق بين الحركة والحكومة .. والخلاصة رح تكون من وين لأبو العبد ملايين الدولارات ..

ومع هيك يا أختنا الكريمة ليس معنى هذا إننا في غنى عن السلطة الفلسطينة فأغلب حياة غزة تعتمد اعتماد رئيسي على السلطة الفلسطينية ولهيك احنا بحاجة للوحدة وبحاجة إعادة اللحمة الوطنية حتى نعود شعب واحد ووطن واحد .. سئمنا الفرقة وسئمنا الانقسام وسئمنا الحصار ولكن ليس معنى ذلك أن نتنازل عن كل ما ضحينا من أجله وهذا سر تمسكنا بتلك الحكومة ..

مشكلتنا مشكلة صعب حلها يا أخت نوارة وربنا يطلع لنا من عنده ويحفظنا من شر الصهاينة وشر كل من والاهم ..

تحياتي الصادقة لك ولجميع من يمر على مدونتك الرائعة
---------
ده كان رأي الاخت اشتياق
جالي رأي تاني من الاخت علا من غزة وانا شفت اني من الامانة لازم اعرض رأيها
مع الوضع في الاعتبار ان الاتنين مواطنات وكل واحدة بتعبر عن رأيها
ده كلام علا من غزة:

شوفي يا استاذة نوارة

ردي على الخبر هو من تلات نقط .. الشق الاول : هل من الممكن ان اسماعيل هنية يكون معاه فلوس كتير كدة؟ والشق التاني : هل خبر شراء الارض لابنه صحيح او لأ

النفطة التالتة .. بعلق على رد الاخت اشتياق .. صراحةً كنت احب لو كان الها مدونة عشان اشوف هي عموما كيف توجهاتها السياسية .. لكني بحصر انطباعي من وحي تعليقها هنا فقط .. وهادا اكيد مش كافي .. لكني بستشف من مجرد كلمة :ابو العبد هنية حفظه الله ورعاه" انها ذات توجه حمساوي او متعاطف مع حماس
انطباعي ممكن يكون غلط
لكن انا وحدة محايدة مش ممكن اقول على شخصية سياسية "حفظه الله ورعاه" ابدا لو مين ما كان

لكنه بالنهاية رأي مواطنة من غزة

بالنسبة لنقطة هل اسماعيل هنية معاه فلوس ؟ اكيد معاه .. وصلك تعليق بيقولك عن ربح تجارة الانفاق .. وهادي حقيقة محدش بينكرها .. ان قادة حماس اغتنت بشكل جنوني بسبب الانفاق .. عشان كدة هما عاملين هجمة ضد الجدار

بالتأكيد غزة مع انها صغيرة وعموما فقيرة .. لكن من ناحية وجود اراضي غالية فا طبعا فيه اراضي غالية .. بالذات الموجودة على شط البحر وهادي معلومة مؤكدة مش اجتهاد مني

هاقول حاجة على الجانب الاجتماعي لابد من التأكيد عليها .. انه من العرف الاجتماعي ان يشتري الاباء لابنائهم اراضي او شضض او بيوت .. معظم الشباب يتزوجون في بيوت بناها لهم آبائهم .. هادا عرف سائد في مجتمعنا وعادي جدا

للأسف وانا فعلا متألمة وانا بحكي ان انطباع غير الحمساويين عن قادة حماس هو امتلاكهم لفلوس كتير وتوزيعها بس على معارفهم

هاديكي مثل قافلة شريان الحياة .. طبعا قادة حماس هما الي استقبلو الوفد والقافلة .. اسأليني انا كمواطنة شو اخدت منها هاقولك ولا اي حاجة

مريدي حماس وانصارها ومن يتمحك فيهم من عموم الناس .. اخد

القافلة جابت معاها معونات عينية على شكل سيارات وجيبات زائد سيارات اسعاف وشاحنات صغيرة "زي الميكرو باص"

عشان كدة هاتلاقي سوق السيارات في غزة انتعشت مؤخرا بسبب ان فيه سيارات جديدة وصلت البلد واخدوهم "فلان وعلان" وهما بالتالي باعوا سياراتهم القديمة .. وهادي كمان معلومة مؤكدة مش افتراض

بس بطلب منك استاذة نوارة انك تعيدي النظر على نشر تعليق اشتياق على انه رأي عام لأهل غزة .. لأنو بالحقيقة فيه آراء تانية تقع على بعد 180 درجة من الرأي القائل .. قادة حماس منا وفينا .. عفوا .. اعترض

وتحياتي الك دائما
------------------

هو انا لحد دلوقت مش عارفة هو اشترى الارض وللا لا، واتجوز وللا لا
اللي وصلت له من التعليقين دول ان الحالة وحشة في غزة، وحشة قوي، واننا لازم نفتح المعبر على طول، ولولا قفلنا احنا المعبر ما كانش حصل كل التحولات الاقتصادية دي، لان اصلا ما كانوش ح يضطروا للانفاق او على الاقل ما كانش بتوع الانفاق ح يبقى لهم حجة او مبرر يفتحوا بيها الانفاق، ومشكلة المعبر دي بقالها كتير ومشكلة الانفاق بقالها قليل
مش الانفاق اللي بقالها قليل، المشكلة اللي اتعملت على الانفاق بقالها قليل
الحاجة التانية: ان واضح ان فيه اختلاف في الاراء زي اي مجتمع في الدنيا، بس واضح كمان انهم حريصين ان الاختلاف في الاراء ده لا يؤدي الى انقسام داخل غزة فوق الانقسام الفلسطيني كمان ودي حاجة كويسة برضه، اقصد كويس من المواطنين العاديين انهم حريصين انهم ما يصعدوش اختلافهم في وجهات النظر ويعملوها خناقة
وده حرص محمود، بس لازم ياخدوا بالهم ان اسرائيل ممكن تستغل حاجة الموضوع ده زي ما بتعمل دايما وعملت مع الفلسطينيين كده ومع غير الفلسطينيين وفرجت الناس علينا
الطبيعي ان كل المجتمعات فيها ناس مختلفة في وجهة النظر ولها اراء متباينة، امريكا فيها كده، وفيها عشر ولايات عملوا مظاهرات عشان ينفصلوا، والموضوع اتلم واتقفل عليه، وزفتة اسرائيل فيها كده وبرضه بيقفلوا على المواضيع دي، مافيش حد بقى فرجة العالم بسبب تباين الاراء غير العرب
وانا ارجو من الاخوة في غزة، سواء المتعاطفين مع حماس، او اللي ضد حماس، في النهاية حماس دي قوة سياسية، وهم ناس والناس مالهاش الا بعض، يصبروا بس لحد ما يمروا من عنق الزجاجة دي وربنا يفرجها عليهم
وربنا يهدي فتح وحماس ويتصالحوا ان شاء الله
على الله
-----
اه فيه ملحوظة تانية، احنا خربنا بيت الفلسطينيين... اي والله، من تمانية واربعين واحنا خاربين بيتهم
ده ملحوظة كده ع السريع يعني.. ياريتنا سبناهم في حالهم من الاول

عشان تشوفوا بس مين اللي بيقف جنبنا في اوروبا والدول المتقدمة

حزب يساري فرنسي يرشح منقبة

ابراهيم عيسى بيشرد للنظام المصري... واحنا معاه

هههههههههههههههههههههههه ماسح بيهم البلاط 

لو لم يكن ابراهيم عيسى صحفيا لوددت ان يكون بوكسيرا

حد هنا غزاوي محايد يشرح لنا الموقف؟

فيه خبر من مصدر مش موثوق، اللي هو الصحف الاسرائيلية، مش دايما على طول بتكدب، بس ساعات بتكدب

الخبر بيقول ان هنية اشترى ارض باربعة مليون دولار باسم ابنه

الخبر ده عشان نتأكد منه محتاجين واحد غزاوي لا فتحاوي ولا حمساوي يقول لنا انه عرف بحاجة زي دي، طبعا حاجة زي دي لو حصلت في مصر عمري ما ح اعرف ااكدها او انفيها كمصرية لان مش كل اللي قاعد في مصر عارف كل اللي بيجرا فيها، بس اظن ان القطاع صغير والاخبار بتتناقل بسهولة، ويسهل التأكد منها

بس يبقى عندنا مصدر محايد، لان بصراحة يعني، هنية ح يجيب الفلوس دي منين؟ مش منطقي يبقى معاه فلوس كتير كده، ولو معاه فلوس مش مفروض يبقى معاه فلوس، اقصد، لو هو وارثهم مثلا، مش مفروض في الظرف ده وهو مسئول عن الناس والناس تتضور جوعا انه يفضل يخلي الفلوس دي معاه لانه المفروض انه مش زيه زي محمود عباس مثلا

على العموم احنا محتاجين مواطن عادي محايد يأكد لنا الموضوع