لعنة عائلة عبد الفتاح اسماعيل

هو مش من الفراعنة ولا حاجة

يعني

هو حفيدهم زينا كده كلنا

عبد الفتاح اسماعيل ده اعدم مع سيد قطب سنة ستة وستين

وساب ولاده اطفال اكبر واحد فيهم كان عنده اربعتاشر سنة

وارملة ربت ولادها ومن يوم ما اعدم ابوهم وهم مالهمش دعوة

بالسياسة ولا لهم صلة بيها

بس تقول لمين بقى

عبد الفتاح اسماعيل مات وساب لولاده سجلات الامن

اللي دونت اساميهم واستنتهم واحد واحد كل ما واحد فيهم

يعدي سن التمنتاشر يتقبض عليه

وطبعا ما عندوش قضية

فبيتحبس على ذمة التحقيق

خمستاشر سنة نجيب عبد الفتاح اسماعيل محبوس على ذمة التحقيق

سنين كتيرة ابنه عمار كان على ذمة التحقيق وخرج قريب

حتى بنته امل اتقبض عليها في اعتقالات سبتمبر لما كان عندها

تمنتاشر سنة وهي حامل

ولعنة الفراعنة دي ما وقفتش عند ولاد عبد الفتاح اسماعيل

زوج اسماء عبد الفتاح اسماعيل وهو ابراهيم محمد شحاتة موسى بيشتغل صياد

لكنه دلوقت مريض عمل عملية استئصال لنصف القولون وجزء من الامعاء الدقيقة

وما بقاش يقدر يتحرك ولا حتى يخرج يصطاد

وعنده تليف في الكبد وتضخم في الطحال ودوالي في المعدة والتهاب في الركب

معتقل على ذمة التحقيق

بقاله اكتر من سنة

اخيرا لعنة الفراعنة وصلت لاحفاد عبد الفتاح اسماعيل

شباب كلهم صغير بيدرسوا في الشتا

وبيشتغلوا صيادين ونجارين ومزارعين في الصيف

عشان يصرفوا على نفسهم

تسعتاشر شاب من العائلة دي تم اعتقالهم بدون تهمة

واتاخدوا لمديرية امن دمياط اتعذبوا واتكهربوا واتعمل فيهم حاجات

مش قادرين يحكوها كلها

من ضمنهم

مصعب

ابن امل عبد الفتاح اسماعيل

مصعب اسماعيل حامد اسماعيل

اتقبض عليه وهو طالب في بكالريوس كلية الدراسات الاسلامية والعربية

شعبة شريعة

يمكن عشان كده اتقبض عليه؟

حاضر

ح نخليه يغير دراسته

عموما هو مقبوض عليه من سنة وذاكر في السجن وامتحن

ونجح بتقدير جيد جدا

والحمد لله انه خلص كلية شريعة

احنا اسفين مش ح نخليه يعمل كده تاني

ح ندخله كلية هات الازازة واقعد لاعبني

ونوعدكوا انه يجيب فيها امتياز مع مرتبة الشرف

بس طلعوه بقى

ذنبه ايه شاب لسة في مقتبل عمره

هو بقية اهله يتعذبوا في المديرية بابشع الوسائل

ودول فلاحين

يعني مش ح يقدروا يقولوا كل اللي حصل لهم في التعذيب

مهما حصل

وبعد كده يتخزنوا في سجن وادي النطرون سنين وسنين

من غير تهمة موجهة ليهم

ومن غير عرض على القضاء

لحد النهاردة مصعب مافيش تهمة متوجهة له

لا هو ولا خاله ولا ولاد اخواله ولا اولاد خالاته

ولا جوز خالته

ممكن نعرف هم في وادي النطرون بيعملوا ايه؟

في الوقت اللي فيه ممدوح اسماعيل بيستمتع بفلوس التأمين

اللي قبضها بعد ما قتل الف مواطن؟

امهاتهم وزوجاتهم وبناتهم

مستعدين يمضوا على تعهد ان ازواجهم ح يصلوا في البيت

مش في الجامع

ما هو ده النشاط الوحيد اللي كانوا بيعملوه

واذا كان الصيد والنجارة والزراعة شغلانات بتضايق الحكومة

هم مستعدين يشتغلوا مطربين

====

ملحوظة: العائلة المنكوبة تنتمي الى بلدة سواحل كفر البطيخ

عارفين دي بلد مين؟

حارس المرمى المحبوب

اللي بيرقص

يا حضري

ارقص

يا حضري

ارقص يا عم

اهري نفسك رقص

ما انت بطل مصر الاوحد

عاجل: اعتقال صحفي من الدستور

الرسالة الآتية جات لي من

: محمود الشيشتاوي

إقتحمت الأجهزه الأمنية بالفيوم اليوم الزميل أحمد سيف النصر مراسل جريدة الدستور في الفيوم والمحرر بموقع نافذه الفيوم ، الساعه الثانية بعد منتصف الليل ” علي السحور ”
وعلي ما يبدوا إن الأجهزه الأمنية قد غيرت مواعيدها في رمضان لتأتي علي السحور ، لتعتقل ما تشاء
وكان أحمد النصر قد أعتقل أثناء تغطيتة الإعلامية ومناصرته لأحد مرشحي الإخوان في الفيوم
كما تم إقتحام شقه محمد عبد التواب الذي لم يكن متواجدها لحظه المداهمة في المنزل
وقد إستولت الأجهزه الأمنية علي الجهاز الشخصي الخاص بأحمد نصر وصادرتة
ومن المتوقع أن يعرض احمد نصر علي النيابة في الساعات القادمة

من ميت

مصحة رمضان

دخلنا مصحة رمضان، وقد أفرغنا من كل الشوائب التي تعكر أرواحنا، وربما نستند عليها أحيانا. في نهار رمضان تصفى أجسادنا من الغذاء، وفي الليل تصفى أرواحنا بالصلاة، وقد صفدت الشياطين ليصفو لنا المحيط، فلا أحد سوانا نحن والطبيب المعالج: رب العالمين.
في رمضان تصفد الشياطين، هكذا قال رسول الله صلى الله عليه وسلم، هذا يعني أن في رمضان تبدو الطبيعة البشرية نقية دون وساوس ولا نزغ. ربما تزعج هذه الفكرة الكثير من بني البشر، فحين نقترف حماقات ونأت الشر في غير أيام رمضان نقول: اللهم اخزيك يا شيطان. لكننا حين نقترف نفس الحماقات ونأت ذات الشر وربما أكبر منه في رمضان نفزع: هل أنا سيء إلى هذه الدرجة؟ هل هذا الشر هو طبيعة في اصل تكويني؟
سمعت التفسيرات المربتة على وجنة الإنسان قائلة أن من يصفدون هم المردة الكبار أما الشياطين الصغار فمازالوا يرتعون حولنا وكأنهم يقولون لنا: لا تقلق أيها الإنسان أنت "زي الفل". الحقيقة أنني راجعت حديث الرسول عن رمضان ووجدته، صلى الله عليه وسلم، يقول: "وصفدت الشياطين"، ولم يفصل أو يسهب في حديثه حول كبار الشياطين وصغارهم ورضعهم وخلافه. والحقيقة أنه لا بأس أبدا من أن تحمل الطبيعة البشرية كل الشر الذي نظن أن مصدره الوحيد هو الشيطان، وحقيقة ثالثة أننا لسنا "زي الفل"، ورمضان مصحة نعالج فيها أروحنا وليس ساحرا يغير طبائعنا بين عشية وضحاها.
نحن مثل البساط المتسخ والمعبأ بالأتربة، ورمضان هو الـ"منفضة" التي تضرب فوق البساط لتخرج الوسخ يوما بعد يوم حتى يعود البساط ناصعا، وربما أثناء عملية "التنفيض" تخرج حشرات صغيرة أو كبيرة وأحيانا سامة، كانت ساكنة في البساط ولم نكن نعلم بوجودها. لذلك فمن الطبيعي أن يصدر عن أرواحنا وأخلاقنا، مع بداية رمضان، أتربة الغضب والوساوس والحزن والذنوب وكل "التشوهات" والأمراض الإنسانية والحشرات النفسية السامة التي حين نعلم أننا مصدرها الوحيد ندفن رؤسنا في والوسائد كالأطفال: لا لا هذه هي الشياطين الصغيرة.
"في القلب وحشة لا يؤنسها إلا الله"، والله يضعنا في "مصحة رمضان" كما يغسل بطوننا بالصيام، هو يغسل أرواحنا من شوائبها، وما نفزع منه من أخلاق نشعر كأنها أفسدت علينا يوم صيامنا وأذهبت بحسنات الصلاة والصيام والصدقة وقراءة القرآن، إن هي إلا أعراض طبيعية لعملية التنقية والصيام الروحي مثل أعراض العطش والجوع المصاحبة للصيام البدني.
"في القلب وحشة لا يؤنسها إلا الله"، وهذه الأتربة التي تتصاعد من أروحنا ليس لها مذهب إلا أن تضعها بين يدي الطبيب المعالج: الله الخالق. كلنا مريض ليس له طبيب إلا الله، كلنا يملأ قلبه مرار لا يحليه إلا الله، تملأنا آلام ليس لها مخفف إلا الله، كلنا ملدوغ ليس له ترياق إلا الله، كلنا مجروح ليس له مضمد إلا الله، كدست دمامل الحياة صديدها في قلوبنا حتى أوشكت أرواحنا على الموت مسمومة، فحملنا رمضان في سيارة "إسعافه" وغرفة إنعاشه، فلا تجزع حين يخرج الطبيب المعالج من قلبك الصديد والقيح، وتشبث به مرة تلو المرة ليطهرها.

وإياك ثم إياك أن تقول: لست مثل محمد صلى الله عليه وسلم في خلقه.

فالنبي محمد المصطفى هو سقف الإنسانية

ونحن في زمن الاقزام

بل والزواحف

اجتماع اليوم بمركز الدراسات الاشتراكية

ما تنسوش يا شباب الليلة دي اجتماع

لجنتي الدعم الاجتماعي والتعبئة لمصريين ضد التعذيب

الساعة تسعة مساء

في مركز الدراسات الاشتراكية

7 ش مراد

الجيزة

وقع الآن: ندين حبس الصحفيين ونتساءل عن مصير البلاد

كحك ولولا اننا في رمضان كنت كتبت اللفظ الاصلي

يعني هم الصحفيين اللي اتحالوا للجنح دول سقفوا بشلة في بقهم؟

وللا هربوا قروض

ايه بقى فيه ايه؟

يعني نخرس خالص وللا ايه؟

لا مش ح نخرس بقى

وقعوا هنا

على البيان ده

اللي كتبته وانا صايمة برضه

على الله بقى ما كنش هيست

http://www.petitiononline.com/prejai/petition.html

بيان من مجلس نقابة الصحفيين

تلقى مجلس نقابة الصحافيين نبأ الأحكام الصادرة ضد الزملاء "عادل حمودة ووائل الإبراشي وإبراهيم عيسى وعبد الحليم قنديل بالحبس والغرامة ببالغ الدهشة والاستياء، واعتبر هذا اليوم هو يوم أسود في تاريخ الصحافة المصرية، وأن هذا الحكم الذي شمل 4 زملاء من رؤساء تحرير الصحف دفعة واحدة، وبالسياق التي بدأت فيه هذه القضية وسارت وانتهت يؤكد أنه حكم غير مسبوق في تاريخ القضاء وفي تاريخ الصحافة.
والغريب أن هذه القضية مرفوعة من غير ذي صفة، والأكثر غرابة أن يحيل القاضي الأمر إلى مظاهرة سياسية وأن ينضم إلى حملة التحريض ضد الصحافة متخليا عن مقتضيات مهنته السامية ومسيئا إلى مكانة القضاء التي نجلها جميعا وواضعا نفسه في موضع الشبهة وجاعلا نفسه طرفا في القضية وليس حكما عادلا الأمر الذي يجعل الحكم الذي أصدره في موضع العدم.
إننا نعتبر صدور هذا الحكم وعلى هذا النحو وفي هذا التوقيت الذي يصادف حملة تحريض محمومة وواسعة على حرية الصحافة هو بمثابة إعلان للحرب على حرية التعبير وعلى الهامش المتاح لحرية الصحافة ويؤكد مطلبنا بإلغاء ترسانة القوانين التي تهدف إلى ترويع الصحفيين وقصف الأقلام وأن الحرية العرفية يمكن أن يعصف بها في أي وقت وأنه لا ضمانة لأي حرية حقيقية إلا بتحصينها بالقوانين.
إننا نعلن رفضنا لأي أحكام تصدر استنادا إلى ترسانة التشريعات والقوانين، التي تشاركنا في رفضها والمطالبة بإلغائها القوى الوطنية والديمقراطية..
إننا لا يمكن أن نقف مكتوفي الأيدي أمام هذه الهجمة وندعو جميع الكتاب والصحافيين وأنصار حرية التعبير وجميع المواطنين أصحاب المصلحة الحقيقية في حرية الصحافة أن ينتفضوا لرفض هذا العدوان الجديد.
وقرر المجلس دعوة رؤساء تحرير الصحف الخاصة والحزبية وكبار الصحافيين والزملاء لعقد اجتماع طارئ مع أعضاء المجلس يوم الأحد المقبل لتدارس كل الوسائل الكفيلة بمواجهة رد هذا العدوان.
كما أكد المجلس تضامنه الكامل مع الزملاء الذين طالتهم هذه الأحكام.

القاهرة
13/9 /2007
====
خلص بيان

النهاردة فعلا كانت مناحة

على الاقل بالنسبة لي يعني

ايوب المصري كان دايما بيقول نحن نعيش في الخراء حتى الاعناق

ولذلك نمشي مرفوعي الرأس

وقلت له اوعى يقولوا لنا الفسحة خلصت كله يغطس

والحقيقة من واقع اللي حصل انا بقيت اتشائم من توقعاتي

اهم غطسونا في الخراء

الفسحة خلصت يا شباب

كله يغطس

وقال على رأي المثل

ادي جيجي يا طنط سعاد وادي طنط سعاد يا جيجي

والنبي يا طنط سعاد

لما تبعتي مسج للمندوح سماعين قاتل الالف مواطن

ابقى سلمي لي عليه

وقولي لي البتش نوصا بتقول لك كتر الف خيرك

كسبت ثواب في اللي قتلتهم

الهي ما يغلب لك ولية

تجيش تخلص على الباقي وتخلصهم ينوبك

فينا صواب يا كابتشن اهو نريح ونستريح

عشان العيشة كده بقت صعب

العيشة عادة بتبقى للي عايشينها

مش لامثالنا من الغوغاء والدهماء والمتخلفين

اللي فاكرين الحكومة ماما وللا بابا

وغير مؤهلين لخوض التجربة الدنماركية

اصل الدنماركيين كفرة

واحنا ناس مؤمنة وموحدة بالله

هاه؟

لااااااااا

انا فعلا لازم اكتب بوستاتي بعد الفطار

فاعليات القراءة للجميع: حبس اربعة صحفيين

الاربعة دول رؤساء تحرير

الاربعة دول قالوا خبر عن شائعة كانت موجودة في المجتمع بالفعل

الاربعة دول اخدوا سنة سجن وغرامة تلاتين الف جنيه

بتهمة سب الرئيس وابنه

كده يعني بيقولوا لنا: هس بس مافيش كلام تاني

الست مالهاش اللا جوزها

والضنا غالي بصحيح على رأي ماما كريمة

تشكري يا محكمة الجنح

تشكري ياماما سوزان ويا بابا مبارك وأبيه جمال

هي دي معايدة رمضان على الصحفيين؟

على رأي البابا شنودة

ربنا موجود

بس حلو قوي الاحكام ضد الكتاب

اللي مصاحبة مهرجان القراءة للجميع

على اساس هم يكتبوا الكتب وشكرا

يدخلوا السجن بقى ما بقاش لهم عازة

تخاريف صيام بخصوص ابراهيم جنح وشجر الدر

بقى قاعدين يا ظلمة يا كفرة تتهموا الحكومة
بانها هي اللي وراء غلاء الاسعار لحد ما الناس ما بقتش لاقية العيش الحاف؟
حسبنا الله ونعم الوكيل
اهو على ابواب الشهر المفترج ربنا اظهر براءة الحكومة
وعرفنا مين اللي ورا انهيار الاقتصاد المصري
ومين اللي ورا هروب المستثمرين الاجانب
ومين اللي ورا وقوع البورصة
وعليه فهو السبب في غلاء الاسعار
طلع ابراهيم عيسى
قصدي ابراهيم جنح
اخص عليه واحنا اللي اتخدعنا فيه وكان بيمثل علينا
الحب والاخلاص؟ الغدار الخاين
ان المتهم ابراهيم جنح الماثل امامكم خلف القضبان الحديدية
هدم الحضارة
هدم المدنية والمعمار ولهذا ولكل هاتيك المجالي
اطالب باحالة اوراق المدعو ابراهيم جنح
(ابراهيم عيسى سابقا)
الى مكتب التنسيق واحنا على دخول المدارس
الاستاذة بثينة كامل بعتت لي على سي دي برنامج الادباتي
اللي اتعمل وقت ما ابراهيم عيسى اتهم بسب وقذف الرئيس
وطلع من غير كلبشات وبغرامة
طبعا انا مش ح اسرق مجهود صناع البرنامج
انا بس اخدت مقاطع من الفيلم مش كله
ما اخبيش عليكوا يعني
الناس قعدت تنبر عليه: هو ليه بيطلع؟ هو ليه متساب؟
وفي نفس الوقت كل صحفي يبقى عايز يكتب حاجة ممكن يبقى فيها شوية جرأة
والناس تحذره يقول: ليه ما هو ابراهيم عيسى ما بيحصلوش حاجة
اهو حصل له
عشان تتبطوا بقى
وطلع مرقدين له وعمالين يكوموا يكوموا يكوموا
وبقى ابراهيم جنح
وربنا يستر والست فاتينتسا ما تعملوش ابراهيم نفخو
فاتينتسا
اهييييي
فاتنيتسا مش عارفينها؟
ايه بتضحك على انت وهو
انا اقصد المرحومة الست توحة
تحية كاريوكا في فيلم
لعبة الست
يااااااااااا ربنا يكفيك يا جدع شر لعبة الست
ولا يجعلك لعبة في ايد الست ابدا
وما تهيسش مع الست
ام كلثوم طبعا
لان دي مش مرجلة منك يا عمي
خلي كلامك مع الرجالة كده
اصل الستات ساعات يصغروا مخهم كده في حاجات
وانت عارف بقى الستات ما يعرفوش يكدبوا
يعرفوا بس يفتروا
والست...ام كلثوم طبعا... مدام حشرت مناخيرها في حاجة
يبقى ليديز فيرست
وسكند
وثيرد
اصل الست معروفة انها ولا واحد ولا مية
ولا الف وتلتمية ولا كل الدنيا دي ولا مليوووووووووون
تاني؟
باقول لك الست ام كلثوم
هو فيه زيها في الدنيا؟
===
هي المرحومة شجرة الدر اللي كانت ساقيانا المر
مش ماتت بالقبايب برضه وللا انا غمي عليا في احداث التاريخ؟
لا ده مجرد سؤال عشان استوثق من معلوماتي
على اي حال
الله يرحمها ويحسن اليها ويبشبش الطوبة
اللي تحت راس ام علي
ام علي الجارم الاديب الكبير
كانت ست كويسة قوي الله يرحمها
وقال على رأي المثل القائل: حتشبسوت يا حتشبسوت
قفلوا عليكي يا حلوة تابوت
اه يا حياتي يا مولاتي
ردي يا فرخة على الكتكوت
هيييييييييييه كلنا لها
هو فيه ايه؟
الظاهر دي تخاريف صيام
ما تاخدوش في بالكوا
وللا انتوا مش صايمين؟ اوعوا يكون عليه ضريبة ده راخر
الا صحيح لو عملوا ضريبة مبيعات على الصيام
ايه حكم الشرع ساعتها؟
هل يجوز لينا نفطر؟
وللا ينفع نصوم ونكدب ونقول اننا فاطرين؟
وللا التهرب الضريبي حرام
هئ هئ هئ
انا في النار ولا انت ضريبي
يااااااااا ع فقع
انا باهيس تهاييس صيام فعلا
باي بقى قبل ما تفطروا على شتيمتي
معلش نساع بعضينا
اصل انا كنت ناوية اريح في رمضان واكسب ثواب فيكوا
بس بقى مش عارفة ايه اللي فكرني بشجرة الدر
هو الدر بيتزرع اصلا؟ ايه النصب ده؟
طيب ايه حكم الشرع في اللي سماها وهو اساسا راجل كداب
هل تحسب عليه كذبه ام ان ده من لغو الحديث؟
لا بس حرام هي كان اسمها شجر الدر مش شجرة الدر
يعني ممكن شجر دي يقصد بيها اسم الفعل بتاع مشاجرة
يعني الدر اتشاجر مع بعضه من كتر ما الانسة ولعتها؟
هي كانت انسة وللا مدام..ياللا اهو كله برتقال
وللا اللي يسمي بناته باسم المثني على اساس انها اتنين يعني
ورد شان، جي هان، بري هان، كرمب ان
عايز يقول لك يعني انا بنتي وهي لسة حتة لحمة حمرة
بدكرين من عندكوا فهمت؟
كداب
اذا كنت انا مش فاهمة باقول ايه

مركزا هشام مبارك والنديم يتقدمان ببلاغ للنائب العام

بشأن صبحي احمد غازي البري

قتيل سيدي سالم اللي الفيديوهات بتاعة اخوه موجوة

هنا

كان موجود الاستاذ طاهر ابو النصر من مركز هشام مبارك

والاستاذة مها محمود من مركز النديم

والاستاذ اسلام من اتحاد المحاميين الليبراليين وهو عضو في اللجنة القانونية

في مصريين ضد التعذيب

والاستاذ احمد عطية البلاصي محامي الشهيد صبحي

واخو الشهيد الحاج محمود احمد غازي البري

والاستاذ حسن من جريدة البديل

واختكوا

لما الاستاذ طاهر والاستاذة مها قدموا الشكوى

عشان تتعرض على النائب العام المساعد

كان فيه امين شرطة سأل الاستاذ حسن: وهو جرنال البديل ده طلع بدل ايه يعني؟

والله ما كان بيتريق كان بيسأل بجد

وبعدين سأل الاستاذ طاهر: مش ايمن نور ده تبع الليبراليين؟

فالاستاذ طاهر قال له: اه

قال له: انا عارف كل حاجة

يا رووووووحي

المهم الحقيقة ان النائب العام المساعد احسن استقبالنا جدا

وابدى اهتمامه بالشكوى وباخو الشهيد صبحي وسمع له

ان شاء الله متفائلة خير

===

ملحوظة اللي قتلوا الشهيد صبحي مازالوا بيمارسوا عملهم في قسم شرطة

سيدي سالم

ولم يساءلوا حتى الان

وبيهددوا الشهود انهم ح يلبسوهم قضية

وكسر عين كده لبسوا واحد قضية مخدرات وسلاح

لمجرد انه صور جثة الشهيد وهم بيطلعوها من ماسورة المجاري

ابراهيم اتحال للجنح...يادي النيلة

منعم لسة باعت لي دلوقت انت ابراهيم عيسى اتحال

لمحكمة الجنح

على دخول رمضان كده؟ هي الشياطين مش بتتسلسل في رمضان؟

امال هم مش عايزين يكنوا ليه بقى؟

كملوا توقيعات على البيان بقى

http://www.petitiononline.com/ibrissa2/petition.html

التفاصيل عند عبد المنعم محمود

اللي قتل المتناوي امين الشرطة؟ يا خيبتي التقيلة

اقول حاجة وما حدش يطلع في زوري ويشتمني؟

انا ظباط الشرطة والامناء بيصعبوا عليا

اه وربنا

يعني بجد النظام المحطوط لهم نظام حالة طقس غير محتمل

وفي المقابل لهم صلاحيات انه ياخدوا حقهم المهضوم من الناس

مش من اللي مفروض يدوهم الحق ده

يعني ظابط الشرطة بيطلب منه عدد معين من القضايا كل شهر

عشان يترقى

ومرتبه ستميت جنيه

طبعا بالنسبة لسواق ستميت جنيه تجوعه فما بالك بباشا ولازم يعيش عيشة باشا

والسيط ولا الغنا خصوصا اننا مجتمع طبقي بطريقة مقززة

وقاعد في القسم مثلا في مكتب شبه الزنزانة كئيب ومقبض ومقرف وقذر

والاخ بقى اللي مطلوب منه عدد كذا قضايا في الشهر

مش متدرب التدريب اللي يخليه يواجه المجرمين بجد ويعرف يوقع بيهم

لا تدريب بدني ولا تدريب ذهني

ما تصدقوش المسلسلات بتاعة الظابط النبيه الذكي اللي قعد يفكر ويحل

لغز الجريمة ده

ولا الظابط الشجيع اللي ضرب خمستاشر بايده اليمين وتسعتاشر بايده الشمال

وفضل له واحد في النص فرقه اتنين

الظابط اللي بحق وحقيق غلبااااااااااااااان ولما بيعمل شغله بيتقتل زي الشهيد المتناوي

ويا ريت اللي قتلوه هم المجرمين

لا

الا اللي قتله امين الشرطة

يا ريته كان قاصد

ده قتله بالغلط

يعني انا مثلا لو معايا مسدس وقاعدة جنب غودي صاحبتي

ودخل علينا حرامية ممكن اتخض وارتبك واقتل غودي بالغلط

بس ده انا

انا مش امين شرطة المفروض انه متدرب على المواجهات

مع اعتى المجرمين ومتدرب ذهنيا اكتر ما هو متدرب بدنيا

لان المواجهات مع المجرمين محتاجة حسن تصرف وذهن يقظ من بتوع ادهم صبري

رجل المستحيل

مش لازم يعني يحرك اطرافه الاربعة

بس المفروض انه واخد شوية تعليمات كده يعملها في المواجهات

عشان يشل حركة المجرمين

والمجرمين دولم كانوا يا عمي سواقين مكروباظ

يعني مافيش توخولف اكتر من كده

ده ممكن لو جيت من وراه وقلت له بخ يرمي المطوة من ايده

وياعيني امين الشرطة دفع تمن انه ماتلقاش التدريبات اللازمة

واندب ست سنين سجن

وتهمته: القتل الخطأ واستخدام العنف مع المتهمين

هئ هئ هئ

قال يعني قلبهم على المتهمين

طيب والنبي انا عندي سؤال

المتهمين دولم لمن اتقبض عليهم وانهاروا واعترفوا

طبعا انت بتقراها دايما: وانهار واعترف

ما تعرفش انهار ازاي؟

واحد داخل القسم اعصابه حديد ايه اللي ينهاره جوة بالظبط

المهم يعني الظابط اللي انهار على ايديه المتهمين واعترفوا

بجريمة ما عملوهاش

يا ترى استخدم ايه معاهم

ولولا انهم لما طلعوا الرصاصة لقوها ميري كانت العيال دي لبست اعدام

يعني هو امين الشوربة اللي مجرم اثيم عشان استعمل معاهم العنف؟

وامين الشوربة هو اللي مجرم اثيم عشان ما عرفش يستخدم الفرفر اللي هم ادهوله

وما شرحوش له ازاي الفرفر ده بيشتغل؟

قوووووم ايه

قوم الظباط والامناء اللي مش متدربين وما بيعرفوش يواجهو المجرمين

بيعملوا ايه؟ بدل ما يموتوا زي الشهيد المتناوي او يتسجنوا زي امين الشوربة

بيطلعوا القضايا اللي مفروض يجمعوها كل شهر من الناس اللي مش محتاجة مواجهة

يشوف له واحد كده على شرط انه يكون اغلب منه

من الظابط يعني

اللي هو غلبان فعلا

ويروح ماسكه مكتفه ونازل فيه هبد ورقع ومرمطة

ماهي دي الحاجة الوحيدة اللي اتعلمها وما يعرفش يعمل غيرها

لحد ما الواد يعترف باي حاجة

وبكده يطلع له العدد المطلوب من القضايا عشان يترقى

يعني الناس كلها شتمت الشرطة عشان ما تدخلتش في احداث التحرش

طيب يعني ماهم ما يعرفوش يعملوا حاجة يا اخوانا

بجد ما يعرفوش ما علموهمش

اوعى يغرك جسمك

واوعي يغرك البدلة

ده زيه زيك بالظبط

حتى ما يعرفش يضربك وانت مفكوك

لازم يبقى معاه طقم عشان يكتفوك وهو يضربك

لو الماتش مان تو مان ممكن ح الظابط يتفسخ في ايدك

طيب يعمل ايه

ما هو مطحون زيه زيك

ومقهور زيه زيك

وعايز فلوس زي ما انت عايز فلوس

وعايز يترقى زي ما انت عايز تترقى

والحكومة بتقول له: خلص حقك من الناس يا بطل

بس على شرط الناس دول يبقوا غلابة

انت مش قد المجرمين اللي بجد

==

كان فيه عصابة بتقف في اخر الهرم بترفع اي حد يعدي

العصابة دي عبارة عن عيال ستاشر وسبعتاشر سنة

كل ما حد يروح يشتكيهم البوليس يقول له: لا احنا بنخاف منهم

اصلهم مجرمين

ده اسم الهرم اللي كان فيه الظابط بتاع كليب الاقلام على وش مواطن

اكيد مش من ضمن العصابة دي

===

انا مش بالاقي تبرير لعناصر الشرطة اللي بتستغل سلطاتها

وبتخلص حقها من الناس

لانهم استسهلوا

بدل ما يشتكوا وللا يعتصموا ويطالبوا بحقوقهم الادمية

من الجهات المسئولة

مستمرئين انهم يخلصوا من الناس ويقلبوا رزقهم من البشر

خصوصا ان النموذج الشريف من الشرطة مش مشجع ابدا

بيموت

زي المتناوي

بس الحقيقة هم مالهمش تبرير لكن ده تفسير

تفسير ليه هم بيصعبوا عليا

فعلا هم ولاد مصر

ماهو الغلبان في مصر لما بيقدر على اللي اغلب منه ما بيرحموش

عشان كده انا متحمسة لمصريين ضد التعذيب

عشان احنا عايزين ثقافة جديدة غير ثقافة الغلبان في الاغلب منه

عايزين ثقافة: نساع بعضينا كده ونقدر ظروف بعض

انا مقدر انك بتاخد ستميت جنيه

وانت تقدر اني مش انا السبب في الظروف اللي انت فيها

واني زيك بالظبط

وان علينا احنا الاتنين نحاسب المسئول عن ظروفنا دي

عااااجل: لجنة الدعم الاجتماعي لاسر ضحايا التعذيب

صباح الخير مش ح ارغي كتير امبارح كان اجتماع التاسسي لمصريون ضد التعذيب

اتقسمنا لجان وانا بقيت مسئولة لجنة الدعم الاجتماعي لاسر ضحايا التعذيب

وجيهان شعبان مسئولة لجنة العمل الجماهيري والتعبئة وضمينا مع بعض

طبعا فيه اللجنة القانونية واللجنة الاعلامية ولجنة تقصي الحقائق

بس اهم حاجة دلوقت ان انا وجيهان ضمينا سوا واول اجتماع ان شاء الله

ح يبقى في مركز الدراسات الاشتراكية

7 ش مراد الجيزة

يوم الجمعة تاني يوم رمضان الساعة تسعة مساء

===

طبيعة عمل لجنة الدعم الاجتماعي لاسر الضحايا

كالاتي: المفروض ان واحد من اللجنة يزور اسرة من الاسر

ويعمل تقييم لحاتلها المادية والاجتماعية والمعنوية ويقدم التقييم مكتوب

دور اللجنة انها تقوم بتقديم الدعمي المادي والمعني

طبعا الدعم النفسي ربنا يخلي لنا مركز النديم ويجعله عامر

هو اللي بيعالج ضحايا التعذيب واسرهم ومش متأخر

فح تلاقوا ضحايا التعذيب معظمهم بيروحوا هناك

واللي مش بيروح يبقى اكيد ح نبعته على مركز النديم

ويبقى ده شق العلاج النفسي

لو فيه اطباء نفسيين متطوعين لعلاج حالات يبقى كتر خيرهم والله

انت شغلتك كفرد ايه؟

اللي ح يحصل ان شاء الله اننا ح نجيب قائمة

باسماء وعناوين وتليفونات اسر ضحايا التعذيب

من مركز هشام مبارك ومركز النديم

وانت سواء كنت في القاهرة او اي محافظة تانية

ح يسند اليك زيارة اقرب اسرة ليك

ما تاخدش معاك لا كاميرا ولا فيديو ولا نيلة دي مش شغلتك

دي شغلة اللجنة الاعلامية

انت شغلتك تصاحب الاسرة وبس

ازاي تعمل تقييم لحالة الاسرة

ان شاء الله فيه كورس ح اخده انا كمان معاكوا

الكورس ده محتاج جلستين بس

لما نجتمع يوم الجمعة الجاي باذن الله

ح نحدد المواعيد اللي ح ناخد فيها الحصتين دول

الكورس ده ح تديهولنا واحدة متطوعة والمفروض

ان ده ح يديلك ارشادات ازاي تزور الاسرة وازاي تتصاحب عليهم

وتخليهم يتكلموا ويثقوا فيك ويحبوك

اللي فهمته من الصديقة المتطوعة انه مثلا ح يقول لك تلبس ايه وانت رايح

يعني مش يا عم الامور تلبس شورت مشجر وفانلة كات حمرا وتضرب السبايكي والنضارة الشمس

وتخش بيهم منطقة عشوائية وللا منطقة في الارياف هوب هوب

وتقول لاسرة الضحية: فل يا معلم

ازاي تتعامل معاهم بحيث يحسوا انك واحد منهم مش ان انت ناس وهم ناس

وح يبقى عليك زيارة الاسرة دي مرة كل اسبوع

تقعد معاهم بس وترجع البيت تكتب تقييمك وتسلمه للجنة

اللجنة المفروض بقى في الدعم المادي

ان شاء الله ح نعمل صندوق عشان نقدر ندمجهم في المجتمع تاني

وندمجهم في عمل مشاريع صغيرة تدعمهم مادية

وترجعهم للحياة الطبيعية تاني

يعني مش ناويين نعملهم شحاتين ناويين نساعدهم يشتغلوا ان

شاء الله

===

بالنوسبة للعمل الجماهيري طبعا جيهان شعبان هي اللي ح تحط خطته

بس يعني مثلا من ضمن العمل الجماهيري ان النمرة اللي على اليمين دي

تتعمم

وتبقى مع كل المواطنين

====

فيه اخوة سألوا اذا كانوا في محافظات تانية

احنا محتاجين اللي في محافظات

عشان فيه اسر كتير في محافظات وطبيعي لما تبقى انت في محافظة

ح تروح للاسرة القريبة منك في نفس المحافظة

المغتربين برة مصر ح يشاركوا في دعم الصندوق

ان شاء الله اول ما نعمله ح اديكوا بياناته

====

احنا محتاجين اكبر عدد من المتطوعين وان شاء الله كل ما العدد زاد

كل ما المجهود اللي الفرد بيعمله قل

لان لو العدد قليل ح نضطر ندي الفرد اسرتين تلاتة

لكن لما يبقى العدد كبير ممكن كل فرد ياخد اسرة واحدة

وكل شغلته انه يتصاحب عليها ويزورها وبس

وما تخافوش ده عمل اجتماعي اغاثي

مافيهوش الباش

:)

الصحفيين والمحامين بس هم اللي بيتعجنوا

وهم واخدين على العجن

=====

اللي عايز ينضم للجنتين دول

الدعم الاجتماعي للاسر

والعمل الجماهير والتعبئة

يراسلنا على الميلين التاليين

nawara_negm@yahoo.com

gehan_shaaban@yahoo.com

او الاتصال على رقمي

0123050316

0123325173

====

ما تنسوش اول اجتماع الساعة تسعة الجمعة القادم في مركز الدراسات الاشتراكية

7 ش مراد الجيزة

حظر جمعية المساعدة القانونية رسميا

صدر اليوم رسميا قرار حظر جمعية المساعدة القانونية

أبلغني بهذا الخبر الأستاذ احمد حلمي وقال لي كمان

انهم دلوقت مسميين نفسهم الجمعية المحظورة

:)

يوم الثلاثاء القادم ان شاء الله الساعة واحدة ظهرا

نقابة المحامين عاملة مؤتمر عن التعذيب والاعتقالات والمنع

طبعا احنا بتوع الظلم زي جماهير الاهلى

مطلوب من المدونين المسئولين عن ملف التعذيب المشاركة

ونقابة المحامين محملاني مسئولية اني اتصل بالمدونين

وهم منفضين لي ومش بيردوا مافيش حد رد غير وائل عباس

فيه ناس ما اعرفش تليفونهم زي معتز عادل

يا معتز هل تسمعني؟

حول

ابقى تعالى

والباقي اللي باتصل بيهم ومنفضين ح اوريهم

عاجل المحتجزين على المعبر يضربون عن الطعام

اتصلت بي الآن الزميلة ندى القصاص دلوقت حالا

وأخبرتني أن السلطات المصرية تحتجز عشرين مواطنا فلسطينيا

في الترحيلات منهم واحد أردني فلسطيني

وواحد كان عليه حكم سنة وقضى المدة وخلصها بقاله تمن شهور

وواحد من المطلوبين اللي ما يقدروش يعدوا من معبر العوجة

وان الاخوة اللي راحوا رحلة رفح النهاردة واللي منهم ندى

حاولوا يدخلوا لهم اكل وزيارة والمأمور ما اخدش غير الخبز بس

ورفض تسلم بقية الزيارة

وانه لم يسمح لهم بالدخول ولا زيارتهم وان حتى المحامي اللي تطوع للدفاع عنهم

لم يسمح له بالدخول اليهم

وان السفارتين الفلسطينية والاردنية مطنشة على مواطنيها ولا حتى وكلت لهم

محامين

وان تمانية من العشرين دول اضربوا عن الطعام وبعتوا رسالة من الداخل

بيقولوا انهم مضربين

والمأمور هدد المجموعة اللي راحت تزورهم بانهم لو عملوا دوشة

على دول بالذات ح يوديهم الفرق

قصده معسكرات الامن

وانه عمال يقول لهم انتوا مين طيب اساميكوا

يقولوا اساميهم يبعتها للامن فالامن مش عارف دول مين

فالمامور قال لهم لو عايزين تحركوا قضية اللي في الترحيلات

روحوا بنفسكوا كلكوا للامن او المخابرات

ههههههههه

هم يضحك وهم يبكي

====

كمان فيه 36 فلسطيني محتجزين في مطار العريش

تسعة منهم بس اللي يقدروا يعدوا من معبر العوجة

والباقي مطلوبين

وكانت السلطات اعلنت بانها اتفقت على فتح معبر العوجة اليوم

وتمرير 170 طالب وطالبة للسفر الى الدول العربية التي

يدرسون فيها

وفيه كلام على ان الكل بعد كده ح يعدي من معبر العوجة

وده مستحيل لان الغالبية مطلوبين

فهل هذا معناه ان السلطات المصرية والفلسطينية

بفصيليها فتح وحماس

اتفقوا على تسليم هؤلاء المطلوبين لاسرائيل

=====

السلطات الفلسطينية والمصرية بيقولوا ان فيه

108

في معسركات الامن

لما راحوا معسكرات الامن الناس هناك ناكرنهم تماما

وبيقولوا لا مافيش عندنا حد

====

فيه 75 فلسطيني مقيمين في مراكز الشباب

كتير منهم ما ينفعش يعدي من العوجة لانهم مطلوبين لاسرائيل

===

ايه بقى ايه؟ ناس مطلوبة لدول عربية وناس مطلوبة لاسرائيل

وناس محبوسة في مصر

والتهمة

فلسطيني

اللي اختشوا ماتوا واندفنوا وبقوا بترول اتصرف وطار

وخرم الاوزون كمان

====

ده بالنوسبة للعريش

ندى قالت لي انهم لسة بقى ح يروحوا رفح عشان

وراح الخط قاطع وجاية اتصل بيها مش بيجمع

الخطوط مش كويسة ما تفهموش غلط

المهم يعني لما الخطوط تتصلح ح افهم منها لما تروح رفح ح تعمل ايه

مصريون ضد التعذيب: بالنوسبة للناس اللي ح تكسل والناس اللي ح تخاف

تاني هالله هالله ع الجد والجد هالله هالله عليه
أنا شخصيا ما احبش انضم لاي حاجة خالص
لا جمعية ولا حزب ولا تيار ولا حركة ولا اي عمل جماعي
مش لاني لا سمح الله ضد الناس دي ولا ضد الفكرة بس دي حاجة لها علاقة بشخصيتي
انا لا احب حد يقول لي اعملي ايه ولا احب اقول لحد يعمل ايه
واحب ابقى ماشية بدماغي ولما تطق في راسي حاجة اعملها او اقولها من غير حسابات ولا محاسبات
جميل؟
بس بالنوسبة لمصريين ضد التعذيب الامر مختلف تماما
مش بس لان اسمها مصريون ولا انها بتضم كل الناس من كل الاتجاهات
بس لان الدكتورة عايدة سيف الدولة قالت كلمة في مؤتمر عن التعذيب
ولعت لي دماغي وحسستني بالذنب وكلمتها كل يوم كل يوم بلا مبالغة
بترن في وداني وبتنزل عليا زي الكرابيج
الدكتورة عايدة قالت باللفظ: كلنا مسئولين عن التعذيب المنظم في الاقسام
لاننا في التسعينيات لما الدولة كانت بتجابه الجماعات الاسلامية او الارهابية او سموها
زي ما تسموها كلنا
(تقصد فصائل المعارضة بكافة اطيافها)
تواطأنا مع الحكومة في قبول فكرة تعذيب الارهابي لانه ارهابي
منا من تواطأ بالصمت ومنا من حرض أيضا
وظللنا هكذا الى ان اصاب السعار جهاز الشرطة وتحول الينا
دلوقت جايين نقول بنتعذب؟ امال كنا منتظرين ايه؟ ما احنا اللي اتسببنا في انهم
يتعاملوا مع التعذيب على انه فعل عادي ويدربوا ولادهم عليه وتواطأنا معاهم
آآآآآآآآآآآآآآآآيييييييييييي يا دكتورة عايدة حرام عليكي
كل ما افتكر كلامها اعيط واحس بذنب فظيع
الحقيقة انا مش من فصائل المعارضة
بس انا فاكرة حاجة كمان
لما كنت في تالتة جامعة اتقبض عليا في مظاهرات ضد مشاركة اسرائيل في معرض القاهرة الصناعي
لما رحت القناطر
- مش رحلة في القناطر ده السجن -
لقيت الستات هناك بتوع الجماعات الاسلامية متعذبين ومتكهربين واللي حامل سقطت
واللي كانت بعقلها اتجننت وحاجة فوق الوصف والتخيل
ده غير اننا لما كنا في الحجز كنت باسمع من حجز الرجالة واحد عمال يدن طول الوقت
من بالليل لحد الساعة عشرة الصبح
لما خرجنا للتحقيق وشفت الشباب قلت لهم مين اللي عمال يدن في معاد لا صبح ولا عشا ولا مغرب ده
قالوا لي ده واد من الجماعات الاسلامية واخد كهربا في راسه وماسك مقشة وعمال يدن
ويقول الله اكبر الله اكبر وبعدين فجأة يقول الله اكبر فوق كيد المعتدي
قولوا معي
قولوا معي يا ولاد الكلب

وهم سايبينه هنا في الحجز لانهم لا يقدروا يرجعوه لاهله
ولا يقدروا يعرضوه على النيابة وهو بالشكل ده
يعني ما اقولكوش الحالة النفسية اللي خرجت بيها من السجن والهلع اللي اصابني
مش من اللي شفته لاني ما شفتش حاجة الصراحة
يعني لاني مش جماعات فاخدت بس كام شلوت وكام بونية وخلاص
لكن انا كان بيجيلي كوابيس من اللي شفته على الناس دي
لما خرجت بقيت اقول للناس: يا ناس الجماعات الاسلامية بتتعذب فوق الوصف
تصوروا وقتها كل الناس
كلللللللللللهم باستثناء امي وابويا والدكتورة رضوى عاشور وطنط وداد
قالوا لي ايه؟
حتى اللي مش مسيسين
لا الحقيقة بالذات اللي مش مسيسين
قالوا لي باللفظ: ما يتعذبوا وللا يروحوا في داهية ولاد الكلب الارهابيين
امال ح يعترفوا ازاي
ومرة ناس من صحاب بابا قالوا له عايزين نسلم على نوارة
مجموعة كده مش ح اقول اساميهم عشان ما يبقاش شكلهم وحش
بس كان فيهم محسن زايد الله يرحمه وهو الوحيد مع بابا طبعا اللي كان شايف
انه ما ينفعش البني ادم يتعذب حتى لو كان شارون
بس الباقي لهم بلا استثناء قالوا نفس الكلام اللي الناس اللي مش مسيسة قالته
ما يتعذبوا وللا يروحوا في داهية دول قتلة
قلت لهم طيب ما القاتل عقوبته الاعدام مش التعذيب
قوم واحد عبقري هو صحفي ويساري وابن واحد صحفي كبير
وانا مش ح افسر بقى
يقول ايه؟ يقول لي: لا ماهو عشان ياخد اعدام لازم يعترف وهو مش ح يعترف
غير بالتعذيب لانه صاحب عقيدة ده فيه منهم بيستحملوا التعذيب وبيقولوا عليه ابتلاء
وفاكرين انهم ح ياخدوا ثواب يعني لازم كمان يهددوهم بالانتهاك الجنسي عشان
يضطروهم يعترفوا وللا انت عايزة التفجيرات دي تستمر؟
آه وربنا
وواحد تاني عامل لي اسلامي معتدل يقول لي ماهم يقام عليهم حد الحرابة ويستاهلوا التعذيب
والناس العادية بقى سواقين التاكسي والبياعين والبوابين وغيرهم وغيرهم
كلهم بيقولوا دول قتلة وقتلوا اطفال ويستاهلوا يتعذبوا
وانا مسئولة زيهم
لاني وقتها كنت صحفية تحت التمرين وكان ممكن ابقى جدعة زي محمد الشرقاوي
واستخدم المي لخدمة اكبر عدد من البشر بس انا كنت ندلة وجبانة
مش خايفة من الحكومة قد ما كنت خايف من الرأي العام
مافيش مرة اتكلمت فيها مع حد سياسي او غير سياسي متعلم وللا جاهل
الا وقال لي: ايه ده؟ انت متعاطفة مع الارهابيين؟ دول ارهابيين
انت متعاطفة معاهم؟
ده غير بقى شوية اتهامات يسارية: هم جندوكي وللا ايه؟
====
فاهمين قصدي ايه؟ وواخدين بالكوا الدكتورة عايدة سيف الدولة بتنبه لايه؟
لو الحملة اللي اتعملت دي كانت اتعملت من عشر سنين بس
ما كانش الطفل ده مات

وما كانش عماد الكبير حصل له اللي حصل له

وما كناش شفنا الفيديو ده اللي اخدته من معتز عادل

يعني كل اللي اتعذبوا دول ذنبهم في رقبتنا جميعا
الاخوة اللي ح يكسلوا يجوا النقابة بكرة
واللي ح يخافوا
انا الحقيقة باقدر الخوف واحترمه اكتر ماباحترم الكسل
بس حتى اللي خاف
"وليخش الذين لو تركوا من خلفهم ذرية ضعافا خافوا عليهم فليتقوا الله وليقولوا قولا سديدا"
عارفين واحد ينقطني ويقول لي ده في الميراث
ح اطلع بظابيظ عينيه
الخايف على نفسه وعلى ولاده لازم يجي بكرة
قبل اللي مش خايف
لو كنا ما سكتناش وما خفناش من عشر سنين
ما كانش الحال بقى هو الحال
وكل ما اتأخرنا كل ما بقينا كلنا مهددين بالتعذيب
واحد واحد بنظام
قبل كده كانوا بيعذبوا الجماعات بعدين بقوا يعذبوا السياسيين
بعدين بقوا يعذبوا المواطن العادي الفقير الغلبان
بكرة ح يعذب مواطن عادي لا فقير ولا غلبان
وما تقدرش تلوم على جهاز الشرطة لوحده لو انت سكت
والحقيقة جميل سعيد قال كلمة حق بصرف النظر عما اريد بها
الشرطة دول ولاد مصر
يعني احنا اللي ربيناهم كده
واحنا اللي سعرناهم كده
واحنا اللي علينا نداويهم ونكفيهم شر نفسهم
ونكفي نفسنا شرهم

افتكر ان اللي بيتعذب ده ممكن يبقى انت

وافتكر ان الشرطي ده ممكن يبقى اخوك او جارك او قريبك

وافتكر ان في التعذيب

مش اللي بيتعذب بس هو اللي ضحية

اللي بيعذب كمان ضحية

وللا انتوا فاكرينهم عارفين يناموا؟

ليه مش بني ادمين؟

مش مصريين؟

احنا اللي عملنا فيهم كده

واحنا اللي عملنا في اللي اتعذبوا كده
ارجو الحضور غدا في نقابة الصحفيين الساعة السادسة والنصف مساء
الاجتماع التأسسي لمصريين ضد التعذيب
الكلام ده اول مرة اقوله

واول مرة اعترف بالذنب

حتى لنفسي

واول مرة اعترف اني مسئولة زي ما ناس كتير

يمكن كانوا ملايين

مسئولين

انا رايحة بكرة ان شاء الله

اكفر عن ذنبي

مين جاي معايا

ظهور أسامة بن لادن هأو أو أو

أمريكا مطلعة لنا شريط لاسامة بن لادن
شعره اسود
ودقنه سودا كحل
ومناخيره كبرانه قوي عن أصلها
الظاهر حد عضه فيها
يعني لما ربنا بيغضب على إنسان بيسلط عليه مخه
أسامة بن لادن من تلات سنين ظهر في الجزيرة شكله

كده

النهاردة وبعد تلات سنين أمريكا بتقول أنها عندها نسخة من شريط

بن لادن وأنها فحصته وطلع

authentic

أصلي أصلي

مش عارفة عرفوا انه اصلي ازاي؟ احنا عايزين نبعت لهم

جميل سعيد عشان يشخرم لهم الخبراء بتوعهم

ومش بس كده دي بتقول ان الشريط ده حديث

ده

بشكله ده

حديث

حديث العمر يحدث عمره ويزهزه عصره وينصره على مين يعاديه

هاي هئ

ياخوانا احنا داقين عصافير

العيب مش عليهم

العيب علينا اللي عمالين نستغبى نستغبى نستغبى

لحد ما الامريكان حسوا انهم بيتعاملوا مع مجموعة من المعاقين ذهنيا

سيبك من شعره الاسود ودقنه السودا

لا مناخيره هي مناخيره ولا عينيه هي عينيه ولا حواجبه هي حواجبه

ولا هو هو خالص يا ناس

يعني دول لما بيعملوا اختبار ذكاء فيه جزئية اسمها

اختبار بصري

بتاع الملاحظة

ده اي واحد نسبة ذكاءه تمانين يلاحظ ان ده مش هو ده

السؤال بقى الغبي اللي بيطرح نفسه

ليه دلوقت مطلعين لنا الفيديو الغبي ده؟

بالمناسبة فيه شوية اغبيا مصدقين ان ده بن لادن وان الشريط اصلي وانه حديث

ومسميين نفسهم محللين سياسيين

وطالعين يحللوا بول على الفضائيات

السؤال

ليييييييييه امريكا مطلعة شريط الكارتون ده؟

=====

بالنوسبة للأخوة اللي مش مصدقين ان امريكا متخلفة الى هذه الدرجة

وانها تقدر تطلع لنا واحد شعره ابيض ودقنه بيضا وشبه بن لادن

واكبر دليل على ان ده بن لادن انه ما يشبهوش خالص يعني

طيب النهاردة جورج بوش في اول تعليق ليه في اجتماع

APEC

قال عدة اشياء مهمة موت موت موت

اولا قال انا سعيد بوجودي في مؤتمر

OPEC

راحت الناس ضاحكة

راح قال قصدي

APEC

وبعدين قال انا باشكر القوات النمساوية

Austrian

وهو يقصد يشكر القوات الاسترالية

Australian

وبرضه راحت الناس ضاحكة بس هو ما فهمش بيضحكوا على ايه

وكمل كلامه عاتشي

وبعدين وهو نازل من المنصة

المفروض ينزل من السلم عاتشي زي اي انسان

فضل ماشي على المسرح الى الاتجاه اليمين

لحد ما الرئيس الاسترالي بس بس له وشاور له ينزل منين

قبل ما ينزل قال: شريط بن لادن اكبر دليل على اننا لازم نفضل في العراق

عشان بس اللي بيقولوا لي انسحب

اهو بن لادن طلع شريط

الحمد لله ما غلطش وقال: يا سلام انتوا عايزيني اقول لكوا ان انا اللي قلت

للاف بي اي انها تعمل شريط تطلع فيه بن لادن بيتكلم

لاااااااا ده بعدكوا

بس الحقيقة ان الاستخبارات الامريكية امبارح قالت حاجة شبه كده

قالت: اه اه ما احنا عندنا نسخة من شريط بن لادن

طبعا مش هي الاصل الاصل عند بن لادن بس احنا عندنا نسخة وفحصناها

وطلعت اصلية

ممكن بقى الوهم اللي عندنا واللي مستمدينه اساسا من

mission impossible

بان الامريكان دول اذكى ناس واصيع ناس وما تفوتش عليهم النملة

ممكن الوهم ده يفضل موجود يعني بس نحط معاه احتمال تاني ولو تلاتة في المية

انه مجرد وهم؟

يعني ما يضرش ان دي تبقى الخطة

b

في طريقة تفكيرنا

مش كويس انك تستهين بذكاء غيرك طبعا

لان ده في حد ذاته غباء انا ما عنديش اعتراض على ده

وانا ما قلتش اننا اغبيا ولا ان اللي بيختلف معايا يبقى غبي بالمعنى اللي فهمه الاخوة

انا قلت اننا بنستغبى

والاستغباء ده فطرة في الانسان لما بيبقى خايف

مش معنى كده ان ال

iq

بتاعه منخفض

ابدا

بس الانسان لما بيبقى خايف بيستغبى مهما كان ذكي

بيحل عليه الغباء مع سرق الارصاد والتمصر

والانسان لما بيبقى خايف من قوة شايفها اقوى حاجة في الدنيا

بيتهياله انها مش ممكن تغلط خصوصا لما تبقى غلطة هابلة

وانا باعترف اني اول ما شفت الفيديو ولقيت واحد تاني غير بن لادن

قلت: يااااااااا لا لا مش معقول امريكا تغلط غلطة زي دي

بس امريكا الفزيييعة دي

انتخبت واحد ما بيعرفش ينزل من المنصة مرتين

مرتين

انت

انت ترضاها على نفسك ان رئيسك يبقى مضحكة الخلق كده؟

يمكن عشان هم كمان خايفين فبيعملوا حاجات غبية

واحنا عشان خايفين بنصدق غباواتهم وبنستغبى زيهم

وباكرر ده مالوش علاقة بانك جايب مجموع في الثانوية العامية

وللا انك شاطر في شغلك

ده له علاقة باننا كلنا خايفين وخايفين من بعض

مين المسئول عن حالة الرعب المنتشرة في العالم

هس بس

اياك تقول بن لادن هو السبب

والا تبقى غبي بقى بجد وازعل وللا اتفلق حتى

خلصت المرافعات في محاكمة اسلام نبيه وبقى حاجة واحدة

اللي هي

مرافعتنا احنا
يا حضارت الكضات يا حضرات المشتشارين
ميت مسا عليكوا
وعلى الصحبة الحلوة دي
بقى احنا يا حضرات الكضات مالناش في الأنون
يعني ما دخلناش مردسة الافوكاتية ولا ذاكرنا: المادة راحت
المادة جات المادة عملت خراج
بس احنا نعرف في حاجات تانية الدنيا والغلب والشقا هم اللي علموهالنا
نعرف في الانسانية والرجولية والمجدعة
بقى يا حضرات المشتشارين اللي حصل ده ما يرضيش ربنا ابدا
وسعادة البشوات الكبار قالوا كلام وعادوا كلام
وباقي لنا كلمتين
يا سعادة الباشا دفاع اسلام باشا بيقول ان عماد كداب
وانه عرى نفسه وفضح نفسه وموت ابوه عشان قرشين
وبيقولوا انها حاجة ماهياش غريبة عليه اكمنه بيشتغل في الصنف
مش هو بس
هو وابوه وامه وعمه ومرات عمه وجده من سنة خمسة وخمسين
طيب يا سعادة الباشا
لمن عماد شغال في الصنف كابر عن كابر
وحرامي وبلطجي كابر عن كابر
امال البعيد عامل زي الخلة اللي عليها زتونة وهفتان ومألحف
وواكلاه الانيميا ليه؟
بقى كل التجارة في الصنف دي مش مخلياه عارف يشتري له
ربع كباب وكفتة يتقوت بيهم؟
ولمن هو بيتاجر في الصنف كابر عن كابر
ليه ملزوم يشتغل على عربية ميكروباظ ماهياش ملكه
وشغال عليها بالاجرة؟ يعني تجارة الصنف ما تغنيهوش
عن شغلانة اللف كعب داير
بلاش
تجارة الصنف ما تجيبلوش عربية ميكروباظ بالقسط حتى؟
ولمن هو شغال في الصنف كابر عن كابر
وكمان بلطجي وبياخد اتاوات من الناس
ايه اللي يخليه يفضح نفسه ويجرسها وابوه يموت بحسرته
لجل ما ياخد قرشين
يعني همن بتوع حروق اللسان دولم ح يدوله كام؟
وتسوى كام ان بيني ادم بارادته يعري نفسه
ويهتك عرضه ويفضح نفسه على النت وكل العالم يتفرجوا عليه؟
ولمن هو هبر الهبرة الكبيرة اياها بعد ما اخد الرشوة من حروق اللسان
لسة بيشتغل على عربية اجري ليه؟
واشمعنى نقى اسلام باشا من دون كل الناس؟
اه
عشان بناتهم تار مش كده؟ اكمن اسلام باشا بيضرب بيد من حديد
على ايدي تجار الصنف
طيب
يعني ما تآخذنيش يا باشا
عندنا احنا ولاد البلد
لما الشيطان يتملك من حد ويحب ينرمي بلاه على عدو
يبطح نفسه عليه
يفتح دماغه عليه
يسرقه سنسلة دهب عيار واحد وعشرين
يرمي له حتة من الصنف
يأجر عليه مزة تطلقه من مراته
انما ما تآخذنيش يا باشا
فينا واطيين اه
فينا اشرار اه
لكن ان واحد يقلع بنطلونه ويفضح نفسه
ويفرج عليه امة لا اله الا الله وامه لا اله خالص كمان؟
دي تبقى وسعت قوي
لا حصلت ولا ح تحصل يا باشا
وبعدين ماهو يا باشا الصوت صوت اسلام باشا
وهي دي لامؤاخذة محتاجة خبير بالدبلون
وللا بالضاكطوراه حتى؟
سعادتك انا واحدة من الناس شفت فيديو عماد ده
يجي عشرميت مرة
وحضرت محاكمات الباشا كلها ما عدا واحدة بس
والحقيقة صوت الباشا بيرن في ودني
سوا لما كان بيقول في المحكمة بصوته العريض: اااففففففنددددمممممم
او وهو بيقول في الشريط: ياااااا عععععععرررررص
والصوت هو هو يا باشا وكلك مفهومية
وبعدين يا باشا ده انت عملت حاجة تشكر عليها
ونشيلك على راسنا من فوق
لوننا خدنا على خاطرنا ساعتها
لكن عرفنا دلوقت انها كانت في الصالح
انت يا باشا سجنت عماد تلات شهور وفي اول القضية
وفي اول جلسة
معناتو ايه الكلام ده؟
معناتو ان لو عماد بيرمي بلاه ع الباشا كان قال في ساعتها
عنننندك.....جاي يا باشا احنا ما اتفقناش على سجن
انا ح اقر واعترف
صح؟
لكن عماد خرج وهو لسة مصمصم يكمل القضية وياخد حقه
يا باشا ايه اللي يخلي بيني ادم في الدنيا بعد الفضيحة والموت وخراب
الديار يستحمل كمان السجن ولسة مصمصم على القضية الا اذا كان
ده حقه ومستحقه وقلبه محروق عليه وناره مش ح تنطفي
الا لما يشفي غليله
مش كده يا باشا؟
وبعدين خليني معاك للاخر يا باشا
عماد وحش
عماد بطلجي
عماد بيتاجر في الصنف
ان شا الله حتى عماد اغتصب عيل صغير
طيب يا باشا عماد ده سواق ميكروباظ
مش متعلم ولا متنور ولا متسأف زي اسلام باشا
مش متربي على العز واكل الوز ولهط البغاشة يا باشا
مالوش اب حنين يعلمه الصح من الغلط
مش انتوا بتقولوا ابوه تاجر مخضروات؟
طيب
يعني ابوه مش باشا ولا هو باشا
زي اسلام باشا اللي هو باشا من ضهر باشا
متعلم ومتنور
وصرفنا عليه دم قلبنا من ضرايبنا عشان
يتعلم ويخرج لنا ظابط قد الدنيا يحمينا ويراعينا
يقوم يتصرف زي المجرمين
طيب اذا كان عماد مجرم فمعاه عذره
لكن اسلام باشا اللي رد على الاجرام باجرام
وهو راضع العز
ايه عذره؟
عماد واد زينا كده جاهل بالانون وعشان كده
ممكن ياخد حقه بدراعه
ده اذا فرضنا ان الغلبان ده ابو دراع زي سلك الكهربا
يعرف ياخد بيه حق وللا باطل
لكن سي اسلام باشا افندي عارف الانون ومذاكره وحافظه
بيعمل زي المجرمين ليه؟
طيب البشوات اللي بيدافعوا عن الباشا
بيقولوا ان عماد كتف واحد وضربه
اخص عليه عماد
بس عماد واد جاهل وتربية بولاق
لكن الباشا الظابط اللي دفعنا فيه دم قلبنا
قبل ما يتخرج وبعد ما اتخرج مرتبات وشقق وعربيات وبدل
وكله من شقانا وعرقنا
بيعمل ليه زي عماد المجرم؟
تاني يا باشا ح تقول لي بيتبلى عليه؟
يوه؟ ولمن هو واصل وقادر وفاجر كده
ما رماهوش بمية نار وخلص ليه؟
ما سلطش عليه بلطجية ياخدوه القطامية ويقلعوه ملط
ويعملوا فيه الفعل الفاحش ليه
ويبقى اكبر باشا يقابلني ع الناصية لو اللي عملوا فيه كده اتقفشوا
كانوا اللي بلطجوا على الصحفيين اتقفشوا
بقى حد ينتقم من حد يقوم يغتصب نفسه ويهتك عرض نفسه
ويموت ابوه بحسرته؟
وعليه من ده كله بايه؟ يا باشا لو اخد مليار دولار برضه
ح يطلع في البيعة دي خسران
لسبب بسيط
ان عماد العين عليه وح تفضل عليه طول عمره
يعني مش ح يقدر ولا يوم واحد يطلع الفلوس اللي قبضها
عشان يفبرك القضية من تحت البلاطة ويستمتع بيها
يعني قبضها للورثة
ده اذا كان قبض حاجة
اما انه بيزيح اسلام عشان يتاجر في الصنف براحته
يا سلام
ما فيه ستميت طريقة يزيحه بيها
كفاية بس يهدده بمطوة ده لامؤاخذة البشوات الظباط اول ما بيشموا ريحة
تهديد بيقولوا يا فكيك
ولمن هو واصل وقادر وفاجر كده
ما ظبطش واحد من الكبار ونقلوه ليه
بلاش ما ظبطش حتى امين شرطة اسم الله ورمى له حتة حشيش في مكتبه ليه
يا باشا قولوا كلام يعقل
الا احنا ما عندناش ايتها احتراض على ان البشوات الظباط دولم ولاد مصر
الحقيقة هم اللي عندهم احتراض اننا ولاد مصر
شايفينا ولاد كلب
وهم ولا الملايكة
احنا نستاهل نتمرمط ونتبهدل ونتفضح ونتعذب
وهم يستاهلوا يتشالوا على الاعناق
ونلف وراهم ونقول: نحن غرابة عت عت
ولاد مصر
صحيح
هم عارفين انهم ولاد مصر؟
عارفين ان مصر هي اللي بتدفع فيهم فلوس
عارفين ان مصر دي هي سواق التوك توك والميكروباظ
والتاكسي والفلاح والموظف والناس اللي بتجري على لقمة عيشها
وتدفع ضرايب اكتر من رجال الاعمال اللي بيدفعوا في السنة
ضرايب خمسة جنيه؟
الحقيقة يا باشا
طول عمر فيه فرق ما بين البشوات اللي بيتعاملوا مع بتوعت السياسية
والظباط اللي بيتعاملوا مع الغلابة امثالنا
ايام عبد الناصر البشوات بتوعت السياسة كانوا بينفخو الفئة المندسة
بس الشهادة لله كان الامن والامان في الشارع مع زعقة الشاويش
هااااااااااااااااا مين هناك
وايام السادات كان البشوات ما وراهمش حاجة غير يحطوا اي حد
من بتوعت السياسة وللا مش بتوعت السياسة في السجن
كان السجن فاتح بقه عمال على بطال
بس الشهادة لله
ما كانش فيهم صخص يمد ايده على ايتها نفر
وكان سوا اللي بيعذب ايام عبد الناصر واللي عمال يحط الكلبشات
في ايدين اللي رايح واللي جاي ايام السادات
كانوا كلهم عبد المأمور
انما يا باشا ايه اللي حصل لولاد مصر دولم
ليه حاسين ان فيه ما بينهم وما بينا عداوة صخصية
احنا لامؤاخذة ما بنكرهش حد
وصحيح دي ساحة الرحمة قبل ساحة العدالة
عشان كده
ارحمونا
وارحموا عماد
وارحموا كل غلبان
ووقعوا اقصى العقوبة على اسلام باشا
ومهما قعد في سجن الشرطة معزز مكرم
برضه مش ح يكافئ اللي عمله في الغلبان ده
وقبل ما تبصوا بعين الرحمة للشاب النقيب
بصوا بعين انسانية لانسان عنده عشرين سنة
ابتدا حياته بحادثة زي دي
وح يعيش عمره كله يتعالج منها
وح يعيش عمره كله يتشاور عليه ويقولوا
ده اللي الظابط هتك عرضه
فكك يا باشا من اللي اخد براءة عشان قتل واحد
كتر خيره
صحيح عذبه
بس اهو مات وارتاح
مش ح يعيش عمره كله في سجن التجربة اللي مر بيها
اما بالنوسبة لخبير الاصوات الكهربائي
يادي الخيبة يا ولاااااد
بقى تجيبه الراجل من فرشته وتقولوا له اشهد
وبعد ما يشهد تقولوا له يا كهربائي؟
لهو ضحك عليكوا وقالوا لكوا انا دكتور فمتو ثانية
وطلع كهربائي؟
خلاص يا باشا
اسمع التسجيل بنفسك
واسمع اسلام بنفسك
وقول لنا صوته ده وللا مش صوته
اما بالنوسبة برضه لموضوع ممكن يمثلوا الصورة
ويركبوا عليها صوت
طيب يعني ده اعتراف ضمني ان ده صوت اسلام
وهم مركبينه على الصورة
طيب يا باشا سؤال بس
هو اسلام باشا كان بيشتم مين كده وبالالفاظ دي؟
ومين ده اللي زمايله في الموقف ح يشوفوا الكلام ده
وكلام ايه اللي ح يشوفوه؟
واذا كان فيه حد قلد صوته زي ما فيه واحد قلد صوت
رشدي اباظة
يعني هو اسلام باشا عبد الحليم حافظ؟
ولو عبد الحليم حافظ برضه بيبان الفرق في الصوت
احنا كمان بنطلب الرحمة
بنطلب الرحمة بينا
وحتى باسلام باشا
ماهو اسلام في لحظة ما عمل كده في الغلبان ده
كان ناسي ربه
دلوقت بيقرا قرآن
طيب كويس انه افتكر ربنا
يا ترى كان ربنا في دماغه وقلبه ساعة
ما كان بيحط العصايا في مؤخرة عماد؟
متهيالي اسلام باشا محتاج يحس انه انسان
مش اله
ومحتاج يحس اننا انسان مش خنازير
ومحتاج يحس ان الناس سواسية كاسنان المشط
متهيالي الحكم باقصى العقوبة على اسلام
ح يبقى في مصلحته قوي
ويمكن يبقى السجن ده فرصه انه يراجع حساباته
مع ربنا ويخرج انسان تاني
ولكم في القصاص حياة يا اولي الالباب