ابطال القرار وابطال الابطال

مبروك

المحكمة الإدارية أبطلت قرار رئيس الجمهورية بإحالة المهندسين والأطباء وأساتذة الجامعة ورجال الأعمال الوطنيين

اللي مش بيفتحوا مصانع خمرة ولا بيحتكروا الحديد والصلب

إلى محكمة عسكرية

الأستاذ أحمد حلمي قال لي إن الحكم كويس بس الحكومة تقدر تبطل الحكم بإبطال القرار

النهاردة المحامين ومن ضمنهم أحمد حلمي زاروا منعم وزملاءه

اللي منهم شباب سبعتاشر سنة

الشباب دول

اللي هم خيرة شباب مصر بجد

محبوسين في المحكوم مع تجار المخدرات اللي بيتحرشوا بيهم جنسيا

محبوسين 23 نفر في زنزانة واحدة مع الجنائيين

زنزانة مش عنبر

والزنزانة مليانة طبعا جرب وقرف وأمراض منها الإيدز مثلا ده غير الحشرات والزواحف

منعم وزملاؤه أعلنوا الاضراب عن الطعام

مريم وميت كاتبين عن الموضوع ده اكتر

النهاردة وانا داخلة التلفزيون شفت تمثال عبد الناصر

اللي انا ما بحبوش

بس وانا داخلة الشغل عشان اجدد الباسبور بتاعي

افتكرت: عايز عربية بالقسط ..من الشغل...عايز شقة بالقسط..من الشغل...عايز مصيف...من الشغل

انت بتشتغل عند الحكومة وما حدش يقدر يذلك

ان فاتك الميري اتمرغ في ترابه

وافتكرت برضه مخاوف الزملاء بإننا نتباع بعد ما اتباع جزء مننا

بصيت لتمثاله وقلت له: ايام دلعك في الموظفين والعمال والفلاحين راحت يا ابو خالد

ما فضلش من زمنك غير التعذيب الوحشي

وسبحان الله...رحت اتصور صورة فورية لقيت صورة السادات...اللي طبعا ما حدش في مصر ما يعرفش برضه

انا باكرهه كراهية شخصية قد ايه

بس برضه لقيت نفسي باقول: الا ايامك يا راجل يا انتيكة صحيح اللي يتنفس كان في السجن لكن الشهادة لله

كل الاحترام كان يحظى به وجه المواطن وقفاه

ده غير التبجيل الذي يصل إلى حد التقديس والتنزيه لمؤخرة المواطن الكريمة

وكان اعضاء سجناء الرأي اللي انت افتتحته بينعموا ببطاطين نضيفة وسراير زي الفل وزيارات ومعاملة خمس نجوم

حتى الظابط المصري أيامك كان لا يتقن القسوة

كان طيب بجد...بشهادة كل اللي اتسجنوا وعلى رأسهم امي وابويا

راحت الايام دي يا انور

وما فضلش من زمنك غير الفساد والخيانة

هو احنا اللي بنعمل الزمن وللا الزمن هو اللي بيعملنا؟

بكرة نلاقي نفسنا بنترحم على أبو جهل وأبو لهب

وللا بكرة ليه؟

هو أبو جهل عمره هتك عرض مواطن؟

هو أبو لهب مهما عذب

كان يهون عليه شباب زي الفل من سن سبعتاشر سنة لسن سبعة وعشرين

هم انضف ما جابت البطن المصرية

يناموا مع الفيران ويتحطوا مع تجار المخدرات عشان يتحرشوا بيهم جنسيا؟

في البوست اللي فات كنت باقول اذكر تلات حاجات ايجابية في بلدك

منعم وزملاؤه حاجة من الحاجات دي

الخوف بقى

ان يجي يوم نبص لصورة مبارك ونقول...راحت الايام دي

وللا هو مافيش اوحش من كده؟

لا فيه والنبي

مصيبة لبعد بيع البلد حتة حتة

يبيعونا احنا

ونلاقي نفسنا واقفين ع الاوكشن: عبد قوي...أمة تجيد الرقص والغناء

ويغيروا لنا اسامينا...ويبقى رجالتنا اسمهم مسرور ونسوانا اسمهم مبروكة

الا بقى المدونين

مش ح يبقى لنا سوق يا اخوانا بلسانا اللي زي الفرقلة ده

الحقوا الستات تتعلم الرقص والغنا والرجالة تشيل كوزين اسمنت

عشان حد يرضى يشترينا وللا بقى ح نلاقي: من يشتري الأمة نوارة

تجيد السب والخناق ولسانها زي الكرباج

سلطها على عدوينك

من يشتري العبد وائل عباس لدغته والقبر استخدمه في فضح جيرانك وكل من يغيظك

من يشتري العبد جيمي يسب بسرعة مائة دين في الثانية

من يشتري طهقانة تشعرك بقيمة مراتك

من يشتري شهروزة لسانها زي المبرد

من يشتري الشرقاوي بدلا من شراء الشخارة بالكهرباء

من يشتري مريم تجيب لك اكتئاب

من يشتري نهى محمود تتفلسف عليك وتحسسك بضحالتك

من يشتري مالك احسن واحد تستعين بيه لما تحب تطلع تلاتين واحد وتندمه على اليوم اللي اتولد فيه

من يشتري الحاج جرجس عشان يفرسك

من يشتري ميت يجيب لك اخبار زي وشك

من يشتري زنزانة تفقسك من نظرة وتشرد لاهلك

من يشتري

من يشتري

من يشتري

حد ح يرضى يشترينا؟

وللا النخاس ح يبلنا ويشرب ميتنا؟

وللا يدبحنا ويشرب دمنا؟

محاكمة اسلاك نبيه واسئلة هامة

جاوب ع الأسئلة دي بأمانة
يا ريت يبقى معانا يعني نتشارك
بس لو ما حبتش جاوب عليها بينك وبين نفسك
وافتكرها كويس
عشان للحديث بقية
الأسئلة: أولا : أذكر تلات مميزات او حاجات إيجابية في حياتك

ثانيا: اذكر تلات ايجابيات في شغلك او دراستك

ثالثا: اذكر تلات ايجابيات في بلدك مخلياك لسة قاعد فيها

رابعا: اذكر تلات ايجابيات في شخصيتك

خامسا: اذكر تلات حاجات بيعجبوك في شكلك ومظهرك الخارجي

سادسا: فاكر اسوأ تجربة مرت عليك في حياتك؟ طيب بقى اذكر تلات مميزات في التجربة دي

ملحوظة: الاجابة بمفيش ممنوع
دور في دماغك واتعب روحك لحد ما تلاقي التلاتة في كل نقطة

ملحوظة تانية: بكرة محاكمة اسلاك نبيه في دار القضاء العالي الساعة حداشر الصبح

وقائع الجلسة الثانية لمحاكمة اسلام نبيه...انتظروا الفيديو واحدة واحدة

النهاردة حصلت حاجة غريبة قوي
طبعا حضرنا المحكمة، المرة دي المحكمة كانت فاضية،
مش ناس كتير زي المرة اللي فاتت
اول مرة اقعد مع عماد واسمعه بيتكلم بشكل شخصي
ونفسي اشوف اللي دخلت عندي المدونة وقالت عليه بلطجي
عشان اديها بونية في راسها
بصراحة كده
وغالبا هي لا اسمها نورا ولا حاجة
وزي ما قلت لها انت واضح انك الرائد وحيد فريد
المهم يعني
عماد ده اغلب من الغلب نفسه
وبدا قبل المحاكمة حائر وخايف ومش عارف ايه اللي ح يحصل
شوية يقول: اهو اتسجن شوية
وشوية يخاف ويبقى هاين عليه يعيط
ماعلينا
دخلنا المحكمة نظروا في كام قضية
كان فيه مصور صحفي نمس
ما لحقتش اعرف اسمه
فضل قاعد قدام جنب القفص
ومخبي الكاميرا بتاعته
عشان هم دايما يحشروا الصحفيين والمصورين على الناحية الشمال
عشان سعادة الباشا القفص بتاعه ع الناحية اليمين
وهو مش بيحب الاضواء اسم الله على مقامه
المهم الصحفي السهن ده فضل ساكت ساكت
واول ما دخل اسلاك نبيه
لابس ومتقمع ولبس – على رأي شرقاوي – من دالي درس
وتخن تخن، مش عارفة بيأكلوه ايه في السجن
كل ما اشوفه الاقيه اتخن من المرة اللي قبلها
محاط طبعا بالحاشية اللي بتحرسه من عين الحساد من كل ناحية
وفيه واحد كان دايما يحضر الجلسات ويبص لاسلام نبيه ويعيط بتأثر
ولما سألته لبنى صاحبة مدونة
Sinfulangel
سؤال سعاد حسني الشهير: من أنت
قال لها: ابن خالته! ماعلينا
ح تلاقوه في الفيديوهات
معلش انا باحملها واحدة واحدة ح توصلكوا باذن الله بعد ما روحي تطلع
ابقوا اترحموا عليا
المهم
ايه بقى الحاجة الغريبة اللي حصلت؟
امين شرطة رضا فتحي
المتهم الثاني في قضية تعذيب المواطن عماد الكبير
طلب من هيئة المحكمة انه يوكل محامي تاني غير هيئة الدفاع الحالية
اللي بتدافع عنه وعن اسلام
والمحامي الدكتور احمد الجنزوري قال في الفيديو كلام غريب
شوفو بنفسكوا
http://www.youtube.com/watch?v=kySFWNxAVaM

هلبت ما أمين الشوربة اسم الله حس والله اعلم ان الدفاع اتزنق وح يضطر يضحي بالام والجنين عشان اودة العمليات تعيش

يعني زي ما حصل قبل كده مع الضابط كريم اللي طلع منها زي الشعرة من العجين
ولبسها امين الشوربة لوحده

طبعا دي مفاجعة اربكت الناس
بس انا شفت الارتياح على وجه الاستاذ ناصر امين محامي عماد
عماد بقى يا حبيبي مش فاهم فيه ايه جه وهو رافع حواجبه وبيبرم ايده ويقول: ايه بقى
ايه فيه ايه؟
يعني قالك امين الشرطة عايز المحامي فلان
وسعيد جميل ما جاش
فيه ايه؟
فالاستاذ ناصر امين قال له وهو بيضحك: عماد...نزل حواجبك...وما تخافش
اه صحيح المحامي اياه بتاع اسلام نبيه اللي هو سعيد جميل
بتاع العصايا طولها كام وسمكها قد ايه ده
عيان بايه خير؟
سلامته...وسلامة قلبه

: تحديث

الفيديوهات

http://www.youtube.com/watch?v=Byc5-qkAlzM

http://www.youtube.com/watch?v=akAMa2coXBI

http://www.youtube.com/watch?v=HCAKhbTin9U

http://www.youtube.com/watch?v=eT3wNvMC3g8

وموعد التأجيل الاربعاء ده

يوم 9/5

دار القضاء العالي الساعة حداشر الصبح

رسالة من كريم الشاعر

والعهدة ع الراسل

:اليكم الرسالة

تعالوا نعمل اتحاد أو رابطه أو نقابه
مش مهم المسمي بس المهم الهدف

بعد أزمة عبد الكريم رمضان وعبد المنعم محمود أدعوا كافة المدونين لعمل رابطه للمدونين والصحفيين الالكترونيين حتي نجد سقف لحمايتنا فنحن اليوم نجد من يساعدنا ولكن هذه المساعده تأتي من منطلق الدفاع عن حقوق الإنسان وفقط وسوف ينسانا الجميع في يوم من الأيام إذا اشتد الهجوم علينا ولكن إذا كان هناك ستار لنا نعمل من خلاله سوف يكون لنا كيان أقوي والكل اليوم يعي خطورة الصحافه الإلكترونيه أو الصحافه البديله علي الأنظمة العميله التي تعمل وتساعد علي خسف شعوبها وسرقة أوطانها .
إذا لم يكن لنا كيان سوف يكون مصيرنا السجون هيا ليكون لنا نقابه موازيه لكل النقابات الموجوده ونفرض أنفسنا علي الجميع أو إتحاد أو رابطه وبرده مش مهم المسمي المهم الهدف.
كل مدون يوافق علي هذه المبادره برجاء نشرها علي مدونته الخاصه ويوقع لدينا بالموافقه وذكر مدونته ويزودنا بأفكاره لعمل الرابطه أو الإتحاد أو النقابه .

الدعوه ليست للمدونين وفقط وإنما الدعوه لكل صحفي إلكتروني ليس له أي حمايه نقابيه وليكن أول إجتماع لنا بعد ستون يوما من هذا التاريخ 4/5/2007 م

الموقعون علي هذه المبادره
كريم الشاعر
جريدة مصر الحره الالكترونيه
http://misrhura.blogspirit.com/
راسلني علي
k_h230@hotmail.com
ادخل واكتب رأيك في مصر الحره

لا تنسوا محاكمة اسلام نبيه يوم الاحد: عذرا للزهايمر

لا تنسوا يوم الاحد الموافق 6 مايو هو يوم

محاكمة اسلاك نبيه

اظنه ح يبقى برضه في دار القضاء العالي

واظن انها جلسة النطق بالحكم

بصوا بقى

عماد لازم يلاقي كل الدعم

ولازم يلاقينا جنبه

وربنا ينصره نصرا عزيزا مؤزرا

لو حصلت سابقة واسلاك نبيه اخد حكم شديد

ح يبقى نصر لنا كلنا

شدوا حيلكوا في الدعاء

ربنا ينصر عماد الكبير ويبرد نارنا كلنا

وينتقم من اسلام نبيه واللي زيه وياخد اقصى عقوبة

اللهم آمين

لا تشرب مصر...مصر فيها سم قاتل

الظاهر التسمم مش في الاكل بس

التسمم الاكبر في البيني ادمين

طيب يا بيني ادمين

الا انا كان ليا نشاط في اتجاه تاني غير التدوين

كنت اشتغلت شوية كده في العمل التطوعي

وحسيت بقرف وخنقة ويأس واحباط

الدنيا شالتني من العمل التطوعي وحطتني في جنب المجتمع المدني

كنت باشتغل فيه من الباطن لظروف عوائلية

قضا يعني بلكونة ووقعت على راسي

بس شفت مصارينه

اوعى وشك

طراش

قلت الف لفة كده واخش ع التدوين

اهو الواحد يبعبر ويقول واللي ف ضميره يطلعه

وكل واحد يسمعه

ويقول اه يا ناس ولا ملام يعني ده الغرض

والكلمة ايد الكلمة رجل الكلمة ركبة الكلمة كبدة الكلمة كلاوي

وع اللي جرا من مراسيلك

وتجيلي صدمات

خلتني احس ان سكان العشوائيات بتوع زنا المحارم والعيال بتوع الاحداث اللي بيغتصبوا بعض

كعب رجلهم المقشف انضف الف مرة من الفاعلين بتوع الحراك والتحرك والمحراك

اول امبارح قلت ليه يا محمود تقفل مدونتك

بس دلوقت عرفت هو قفلها ليه

محمود

محمود

بتاع

sand monkey

قرف

الا هو ليه كل حاجة بتبتدي نضيفة تفضل تترب تترب لحد ما تجلخ؟

عشان كده المجلخين من الاساس احسن من اللي كانوا نضاف وجلخوا

على الاقل مش ح تتخم فيهم وتحدف على بقك وبعدين تطرش

متهيالي اللي عايز يفضل نضيف لازم يدافع عن الكيان ده

اللي في يوم من الايام عمل حاجات كويسة للبلد

حتى لو كانت قليلة

واللي قرف ونفسه قفلت حقه

واللي عايز يوسخ

يتاخر شوية بطينه

ويسيب لنا حتة نقعد فيها من غير ما نتعاص خرا

انا باقول ايه؟

هههههههههههههههههههههه

وصلتني هذه الرسالة

من الأستاذ أحمد حلمي المحامي

مدير مركز الحرية لدعم الديمقراطية

:إليكم الرسالة

على حين غرة .. وبدون مقدمات .. خرج علينا السيد نقيب المحامين الأستاذ سامح عاشور كعادته بعمل فردى غريب اطلق عليه اسم " مشروع تعديل قانون المحاماة " .
وكنت اظن فيما مضى أننا إذا اردنا أن نضع مشروع لتعديل القانون فعلينا أن نمر بمراحل نجمع فيها الأفكار المطلوبة ثم نعهد لذوى الشأن من أساتذة القانون الدستورى واصحاب الخبرة التشريعية لوضع الفاظ وعبارات المواد المطلوب تعديلها ثم نناقشها لنخرج بنتيجة جماعية .. لكن النقيب لا يعترف بالعمل الجماعى فهو يعشق العمل الفردى ونظرية الزعيم الملهم والرأى الواحد .
طالعت بمزيد من الأسى المشروع الذى أعده النقيب وقام بطباعته فى كتيبات فاخرة تنتهى بصور لنادى المعادى وكوبرى اكتوبر ومترو الانفاق .. ولا ادرى ما علاقة تعديل القانون بنادى المعادى !!!
والشىء الغريب أنه رغم ما اعترى مشروع النقيب من عوار قانونى وصل فى بعض الأمور الى حد الفضيحة القانونية إلا أن سيادته لازال مصر على مشروعه ولازال مصر على توزيع هذه الكتيب رغم انه يسىء له ولصفة نقيب المحامين .. فلا يصح ابدا ان يتضمن مشروع قانون مقدم باسم نقيب المحامين مثل هذه الاخطاء القانونية الفجة .
ومع ذلك فشر البلية ما يضحك .. واكثر ما اثار ضحكى حتى كدت اسقط على الارض من الضحك اسلوب صياغة النقيب لتعديل نص المادة 13 من قانون المحاماة والتى تشترط لطالب القيد فى النقابة أن يكون متمتعا بالأهلية المدنية .. فيزيد النقيب تعديله على ذلك باضافة أن تثبت الأهلية بموجب تقرير طبى من أحد المستشفيات .
هل رأيت فضيحة كوميدية أكثر من ذلك .. هو فى كده فى الدنيا .. نقيب المحامين مايعرفش معنى الأهلية المدنية ؟؟ يا نهار اسود !!
الأهلية المدنية التى تدرس لطلبة الفرقة الأولى فى كلية الحقوق فى كتاب شهير يسمى " المدخل " .
لا إله إلا الله !!!!
يا راجل يا طيب .. طالما النص بيقول الأهلية المدنية .. يبقى قبل اضافة تعديل نرجع لنص المادة 44 من القانون المدنى لنرى تعريف المدنية الأهلية .. بدل ما تضحك الناس علينا .
شوف يا سيدى .. نقلا عن كتاب المدخل لطلاب الفرقة الأولى بكلية الحقوق .. المدنية الأهلية هى بلوغ الشخص سن الرشد وهو متمتعا بقواه العقلية ولم يحجر عليه .
إذا طبقا للتعديل المقترح من سيادة النقيب باثبات توافر الأهلية المدنية بموجب تقرير طبى .. يكون التفسير الوحيد لهذا التعديل هو وجوب أن يقدم المحامى " شهادة تسنين " تثبت بلوغه سن 21 عاما ..
وطالما قال التعديل أن التقرير سيتم بمعرفة احد المستشفيات التى تحددها النقابة .. فهذا ليس له إلا تفسير واحد .. هو أن يتم تخصيص غرفة معدنية من أحد غرف معسكر جوانتيناموا الموجود بجوار الشهر العقارى بحديقة النقابة نضع عليها لافتة مكتوب عليها " طبيب الصحة " ويعرض على دكتور الصحة كل متقدم للقيد للكشف عليه وفحص اسنانه وتحديد سنه وهل بلغ سن الرشد من عدمه . ( تخيل أنت بقى .. محامى ..وقاصر ؟؟؟ )
أما إذا كان المقصود بالتقرير الطبى الكشف على تمتع طالب القيد بقواه العقلية فالأمر بسيط .. نستبدل لافتة " طبيب الصحة " بلافتة نكتب عليها " مستشفى الأمراض النفسية والعصبية - فرع نقابة المحامين " .. وهذا القسم موجود بالفعل فى النقابة .. ويرجى مراجعة حديقة النقابة فى ذلك الأمر .
يا مثبت العقل والدين يارب !!!
يعنى لما سيادتك لا تجيد صياغة النصوص القانونية .. أيه بقى لزمة الفضيحة دى !!!!
ماذا كان سيضير النقيب لو أنه استعان بأهل الخبرة ووضع لهم الافكار المطلوبة وترك لهم الصياغة ..
لماذا يصر النقيب دائما على العمل الفردى وأن ينفرد بكل شىء فى النقابة وفى المهنة وفى حياة المحامين ..
هل يظن أن كل محامى هو بالضرورة قادر على صياغة القانون .. العمل التشريعى يختلف كليا عن المحاماة .. وليس معنى أنك محامى انك تستطيع صياغة قانون .. فهذه أمور حرفية وفنية تحتاج لذوى الخبرة فيها .
لا يعيب النقيب اطلاقا أن يستعين باصحاب الخبرة لوضع قانون او تعديله ..
سيدى النقيب العام .. بصراحة .. أنت ما بتعرفش .. تصيغ قانون .. فبلاش فضايح ارجوك !!!
وارجوا أن يتسع صدر النقيب ( وأنا واثق أنه مش حايتسع ) لهذا النقد .. ولكنه نتاج العمل الفردى الذى يصر عليه .
وأهدى له خالص تحياتى واحترامى .. بهذه المناسبة .. واطلب سماع أغنية الأخت الفاضلة " مروى " :
الصراحة راحة يا روحى . . . وأنـت مـــا بتـعــرفـــــش
احمد حلمى
المحامى
( نقابى سابق معتزل ومش راجع .. حاحدف طوب من بعيد بس )
( ملحوظة : كان هذا بمناسبة ما قاله سيادته فى برنامج نأسف للازعاج على قناة دريم أمس مع منى الحسينى " مهمتى أن أجتث الإخوان المسلمين من نقابة المحامين " .. والبادى أظلم ... يا بتوع التوافق والهدنة )

==============

انتهت الرسالة

بالذمة ده كلام؟

ما حدش يطلع مع منى الحسيني دي خالص تاني مرة

الولية عشان بيضا ومزة بتطلع من الناس كلام مش ولا بد

لما لسة نقيب وعايز يجتث

امال لو لا قدر الله مسك البلد

ح يعمل ايه؟

خخخخخخخخخخخخخخخخخخخخخخخخخخخخخخخ

لا مؤاخذة

بس لو قريتوا الموضوع اللي في اللنك ده

http://bahbmasr.blogspot.com/

ح تعذروني

يعني احنا نشتم في حكومتنا وما نعرفش ننقل معلومات عن دولة عربية في بلدنا؟

المواطنة إيمان عاملة مدونة نقلت فيها تصريحات الرئيس معمر القذافي

هو اللي قال انا افريقي ومش عربي

لما ايمان تكتب الكلام ده من مصر وفي مصر وعلى مدونتها

مدونتها تتقفل وتستدعى في امن الدولة؟

خخخخخخخخخخخخخخخخخخخخخخخخخخخخ

تخاريف عيا بخصوص وزير الصحة من خلال الشنطة

مش انا كان المفروض اموت والموت ما عبرنيش ولا استنضفني؟ حتى الموت بينقي

يوم التلات اكلت في محل بينوس، والمفروض انه محل كويس، واكلت فيه قبل كده

والحقيقة اني اكيلة زبالة من زمان يعني، يعني مش باعيا من الاكل اللي مش مغسول

ممكن اعيا من الاكل المغسول زيادة

تاني يوم على العصر، حصلت حاجة زعلتني شوية وبعدين بطني وجعتني، كلمني صخص وقال لي كلام تاني زعلني بعدها حرارتي نطت تمانية وتلاتين وبعدين تسعة وتلاتين ودي اخر حاجة فاكراها

ما جاش في بالي اني عييت من الاكل بس لما قلت لدكتورة انه ممكن يبقى من الزعل ضحكت عليا المهم اني بقيت احسن شوية بس لسة بطني بتكركب ودايخة يعني ما تاخدوش قوي على كلامي ممكن يبقى تخاريف عيا

وطبعا نبعت التهاني والشكرنيات لكل اللي سألوا عليا سواء عرفت ارد عليهم وللا اتصلوا وانا في الدغبوبة

المهم بقى إن ريم صاحبتي قالت لي انها واصحابها اكلوا في فلفلة وكلهم جالهم تسمم وهي بطنها وجعتها

ومريم قالت لي ان اتنين من قرايبها اكلوا برضه في محل المفروض انه محترم مش فاكرة باين كورتجيانو او ايه مش فاكرة...اسمه ايه يا مريم

والضاكتور عزة اللي ضحكت على تشخيص الحلاقين اللي قلته لها قالت لي برضه ان فيه واحدة هي تعرفها جالها تسمسم

كل الناس دي ما يعرفوش بعض يعني اكيد مش متفقين عليا يبقى مافيش غير وزير الصحة هو اللي متفق عليا

آآآآآآآه

طب تعالي لي بقى من خلال الشنطة

سعادة وزير الصحة

من ساعة ما حضرتك شرفت، وانفلونزا الطيور هاتك يا هبد في الناس

وقالوا، كالعادة، الناس هم اللي غلطانين

والمية بقى فيها مجاري واختي الصغيرة اتسممت من المية والدكتور قال: آه ماهو عادي ماهي المية فيها مجاري

وبعدين يا سيدي لما انت الحصبة انتشرت

وبعدين يا سيدي لما انت في ظرف اسبوعين انا وحوالي سبعة تانيين اتسممنا (في اطار الناس اللي اعرفهم) وسعادتك

انا سامعة عنك كلام وحديت واعر جوي

زي انتشار تجارة الاعضاء

وزي ان فيه ناس ع تجول ان جهات ما بتستجلب امراض واوبئة يعني عشان يشغلوا المستشفيات
وضرايبها تكتر

واللي اكد الشكوك دي مشروع خصخصة التأمين الصحي
واخيرا وليس اخرا مش عارفين حضرتك ناكل في مطعم

طيب خير ح نعرف ناكل في بيوتنا وللا إيه؟

ماهو حاجة من الاتنين

يا الامراض اللي هلت مع هلالك دي اتجلبت مع سرق الارصاد والترفص

يا اما ما تآخذنيش قدمك وحش علينا

يا عمي انت مش كنت شغال في دار الفؤاد ميت فل وسبعتاشر وماحدش بيجيب سيرتك وسكتم بكتم

ايه اللي رماك ع الوزارة يا سيدي

الوزارة لبش...والكلام عليها كتير

فارقنا يا عم انصرف بامر الله لا تئذينا ولا نئذيك

يا اما خلص وهات من الاخر وموتنا

ده العيا مر

وفي نهاية البرنامج احب اسمع اغنية: الطبيب ملاك...الموت.

الأهلي وبرشلونة؟ طب حلال ده وللا حرام

بالرغم من اني باكره عادة بعض الناس

اللي كل شوية يتصلوا بالشيوخ: عم الشيخ أنا اتكرعت المغربية كده...حلال وللا حرام؟

انا استظرفت على اخويا وخبيت منه المفاتيح..حلال وللا حرام؟

الا اني في الحقيقة عايزة اسأل

ماتش الاهلي وبرشلونة...حلال وللا حرام؟

حلال اني اجيب عيل عنده اربع سنين وادخله ماتش ملاكمة مع تايسون وللا حرام؟

مش بس كده...ده انا دافعة له ملايين عشان يجي يرن العيل علقة معتبرة

حلال ده وللا حرام

الفلوس اللي اترمت في الارض والناس بتاكل زبالة..حلال وللا حرام؟

التشريفة اللي اتعملت للريس وعطلت الناس عن اشغالها والدكاترة عن مرضاها والاسعاف عن نقل المحتاجين

حلال وللا حرام؟

الهيصة والزمبليطة في الصالون اللي اتعملت للتفاهة دي والناس مرمية في السجن

حلال وللا حرام؟

والفلوس دي كلها منين؟

من الضرايب اللي بندفعها؟

بعنا التعليم والصحة واشترينا علقة من برشلونة؟

بشقى الغلابة؟

وفي الاخر النتيجة متوقعة

هزيمة نكراء

لا والنبي مش نكراء قوي

الناس الظاهر عشان واخدة فلوس ما رضيوش يشدوا علينا قوي

يعني انا عايزة اسأل سؤال

لازمته ايه ماتش زي ده

ما كان كفاية تكريم اللاعبين القدامى والفلوس اللي اتصرفت ع الماتش هم اولى بيها

خصوصا الرعيل الاول اللي كانوا لابسين برانيط والفقر واكلهم

اصل ده الجيل اللي كان بيصرف ع الكورة مش بيكدس منها ملايين

اللي كانوا بيدفعوا تمن الشورت والفانلة من مالهم الخاص

جرا ايه يا سعادة فخامة جلالة الرئيس؟

حابس الناس ورايح تتفرج ع الماتش؟

ربنا يهنيك

انا عمري ما شفت حد بيدفع فلوس عشان ينضرب

فضيلة مشايخ الفضائيات مش سامعين لهم حس يعني

وللا هم تخصص في حكم القبلة اثناء الصيام واللمس بين الخطاب والانزال والاطلاع وجواز المسيار؟

ما تقولوا لنا حلال ده وللا حرام؟

حرام عليكو كفرتوا الناس

وعم تاكل اللقمة بتمي واكلك قدامك يا عمي

واذا باكفر بتقول لي كافر

انا مش كافر

هيدا انت الكافر

تضامنو مع عبد المنعم محمود

الميل ده

:وصلني من أسد

تضامنوا مع عبد المنعم محمود أمام نيابة شبرا الخيمة صباح الثلاثاء
April 22, 2007
. .
المدون والصحفي المصري عبد المنعم محمود, يُعرض صباح الثلاثاء 24/4/2007 على نيابة شبرا الخيمة للنظر في تجديد حبسه على ذمة قضية لفقتها مباحث أمن الدولة التي كانت قد اقتحمت منزل عبد المنعم في الإسكندرية , ثم اختطفته من على متن طائرة صباح الأحد , حيث كان متوجهاً في رحلة عمل لصالح قناة الحوار البريطانية لإعداد برنامج عن الحريات في العالم العربي.

ودعت – الحركة الشبابية المصرية لمناهضة الاعتقال (مش هتاخد) – للتجمع السلمي أمام نيابة شبرا الخيمة في الحادية عشرة صباحاً تضامناً مع عبد المنعم محمود وطلاب معهد التعاون الزراعي المحالين للتحقيق على خلفية نفس القضية الملفقة.

============

كمان رجاء اضافة توقيعك على الرابط ده

http://free4monem.blogspot.com/

والآن بقى

حد يقول لي بسرعة شبرا الخيمة دي تتراح منين

يعني انا ممكن اوصل لحد كورنيش النيل

بعدين امشي ازاي؟

بس ما حدش يقول لي اسامي شوارع

يعني اعتبروني دلوقت مثلا قدام التلفزيون عند كورنيش النيل

تقولي لي امشي ازاي

يمين شمال كده

مش اسماء شوارع

ضحايا التعذيب اتخبطوا سجن وغرامة كمان

المواطن السكندري أحمد علي عبده ظهر في برنامج "وراء الشمس" وهو بيحاول يلاقي حل عملي للحكومة، كان بيقول: "يعني لو البلد دي الحكومة اخدتها واحنا مالناش مكان فيها يوفروا لنا فرصة نسافرو ونسيبو البلد.." وبعدين صوته اختنق بالبكا وهو بيقول: "مصر ما بقتش بتاعتنا خلاص...".

هذا الصخص، كل مشكلته إنه وجد المواطن محمد عبد العزيز عبد الفتاح وهو غرقان في دمه بعد ما ضربه أمين شرطة "العربي صالح محمد" بالرصاص، وقبض على اخوه عبد الرزاق عبد العزيز عبد الفتاح...مش قلت انا قبل كده ما حد يسمي الاسامي دي؟! المهم احمد اخد محمد وكان رايح بيه ع المستشفى قام ابوه اتصل وقال له وديه ع القسم، وبدل ما القسم يوديه ع المستشفى ودوهم الاتنين احمد ومحمد على مديرية امن الاسكندرية حيث اتظبطوا هناك واتعذبوا لدرجة ان محمد بيقول انا كان متهيالي ح يخش لي ملك يقول لي من ربك ومن رسولك.

مش مهم كل ده، المهم ايه بقى، إن احمد على عبده ومحمد عبد العزيز وعبد الرزاق عبد العزيز التلاتة رفعوا قضية ضد امنين الشرطة اللي عذبوهم وضربوا واحد فيهم بالنار وهما: العربي صالح محمد، وجمعة عبد المنصف ابراهيم، قوم المحكمة حكمت بالسجن على المواطنين التلاتة، وبالتعويض لامنين الشرطة بمبلغ 501 لكل منهما.

تقرير الطبيب الشرعي، اثبت الاصابات البالغة اللي اصيب بها المواطنين، وكمان اثبت ان المواطنين التلاتة الاسكندرانية، دافعوا عن نفسهم ضد امينين الشرطة، مما اصاب الامينين بكدمات بسيطة، والتقرير بيؤكد ان هذه الاصابات البسيطة جاءت في اطار دفاع المواطنين عن نفسهم.

طيب يعني ماهو الواحد لو دعا ع البلد دي، ح يدعي عليها بايه؟ يعني ربنا ح يعمل فيها ايه اكتر من العامله فيها؟ دي مش ناقصها غير تتشعلق ع الشجرة وتاكل موز وفول سوداني.

بابا حكى لي حكاية حصلت وهو مشرف في سجن عبد الناصر، كان فيه مواطن بيحب يقرا في تاريخ مصر، جمع صحابه وقعدوا يقروا في التاريخ وكل ما يعدوا على حدث عظيم يقولو: عمار يا مصر، قوم اتقبض عليه وبعد ما عذبوه اخدوا منه اعترافات بانه مؤسس تنظيم "عمار يا مصر" لقلب نظام الحكم، الراجل ده بقى لما رحلوه ع السجن بابا كان بيسمعه وهو قاعد طول الليل يقول: أحه يا مصر...ميتين اهلك يا مصر....أمك يا مصر...أبوكي يا مصر.

والحقيقة أنا من موقعي هذا اللي هو ع الكي بورد اود أن اتضامن مع زعيم الامة مؤسس حزب "احه يا مصر" (عمار يا مصر سابقا). كما اطالب بأن تنظر لنا الدولة بعين الرأفة وتدرس مطلب المواطن احمد على عبده، اللي دفع تمن انه اسكندراني جدع وما هانش عليه يشوف مواطن سايح في دمه ويسيبه، زي ما زملاءه في التعذيب دفعوا تمن ان عندهم كرامه ودافعوا عن نفسهم. هو بيقول سيبونا نسافرو ونسيبو البلد.

طيب يا ريت تسيبوا الناس تسافرو وتسيبو البلد واشبعوا بأمها، مش من حلاوتها الناس ماسكة فيها، بس يا ريت لما يسافروا ويسبوها لكوا مخضرة، ما تجيبوهمش على ملا وشهم في قضية تجسس.

وبرضه الاخوة في المهجر ايدكم معانا، يعني دور لك على اي جنسية واسقط الجنسية المصري اول ما تخرج سليم.
رجاء رجاء رجاء، كل مواطن مصري يدور له على اي جنسية تانية، ان شالله موزنبيقي، أكيد موزنبيق ح تدافع عنك وتطالب بالتحقيق في اي تعذيب تتعرض له

قال عملوا احصائية عن المواطنين اللي بيسقطوا جنسياتهم، ولقوا ان المصريين في ديل القائمة، اقل عدد من المواطنين في العالم بيبقل يسقط جنسيته الاصلية هو المواطن المصري. الشهادة لله: جتكوا خيبة...يبقى نبيل لوقا بباوي بقى معاه حق..احنا شعب بيحب التعذيب. واللي مش بيحبه بيتسجن تلات شهور. لان التعذيب حلو..كويس، قضاء الله، واللي بيشتكي او بيدافع عن نفسه بيبقى كافر، لانه بيعترض على قضاء الله، واحنا طول عمرنا شعب مؤمن.

ثم ازاي العيال دي لما تنضرب تدافع عن نفسها، الظاهر والله اعلم شعب اسكندرية ده مش كويس، بيقول لك السواحلية مشيهم بطال، بيبقوا والعياذ بالله جدعان، وعندهم بسم الله الرحمن الرحيم كرامة، ما يعرفوش اخلاق القرية اللي علمها لنا الرئيس السادات، تاخد على قفاك وتسكت. ما هم السواحلية والاسكندرانية دولم بالذات مش تمام يعني...ربنا يستر على ولايانا...بيقولوا لك عليهم فيهم شهامة...استغفر الله العظيم احنا مالنا بقى دع الخلق للخالق وبلاش نجيب في سيرة الناس.
احنا بقى بنطالب الحكومة باستبدال مادة التربية الدينية بالتربية "المنوفية" عشان المسخرة دي ما تتكررش تاني..اهم حاجة سمعة مصر.

وعاشت موزنبيق حرة مستقلة

سيبنا من النكد شوية

فيه في الدنيا لسة حاجات مبهجة

مش بااااااااااارضو؟

يا شباب

أنا شلت البوست اللي فات

لسببين

اولا عشان انا باكبر ناس اصدقاء عزاز عليا

ثانيا عشان الاستاذ شال التعليق

بعد الجهود المشكورة من صديق عزيز

وعشان الناس الحلوة دي انا شلت البوست

حاجة تانية بقى

فيه ملحوظة ان فيه حد عمل هاك على الكمبيوتر بتاعي

وعلى الميل

اي ميلات توصل لحد مني

ويحس انها غريبة

ارجو انه يخطرني

تحياتي

وأخيرا سيتم القضاء على المسئول الاول عن التعذيب

ومن هنا بقى عرفنا مين المسئول عن فظائع التعذيب
المواطن يا محترم
ايون...سعادة الباشا نبيل لوقا بباوي قال وقوله الحكمة
في برنامج وراء الشمس اللي هويدا طه راحت بسببه وراء الشمس
ان المواطن هو سبب في العذيب اللي بيتعرض له
لانه بيحب يقبل الاهانة
غاويها يعني
مزمل اهانة واما بيستحطاها بيبقى في بلكون تاني
وده مزاجه سعادتك
تيجي بقى انت تفوقه ح يطلع تلاتين اللي جابوك
والظابط اللي بيعمل كده هو مريض
ومش كل جهاز الشرطة مريض
دي قلة مندسة
دستها بعض الايادي الخفية
ليه بقى
هلبت ح تعمل عبيط ومش فاهم
بما إن المواطن بيعمل دماغ تعذيب
وبما إن فيه بعض المواطنين بيعملوا دماغ بانهم يعذبوا غيرهم
فإذن كتر خير الحكومة
اللي دست لنا ناس تظبط لنا الجمجمة وببلاش كمان
يعني يا مواطن يا مهزأ
غاوي تتعذب وكتر خير الحكومة بتظبطك
وانت يا ناكر الجميل تاكل وتنكر
وتشتكي يا قليل الاصل
لو مش عاجبك روح للمأمور عشان يوريك ان اللي شفته على ايد الظابط
هو الفردوس الاعلى
مش عاجبك روح للاعلى
ثم الاعلى
ثم الاعلى
لحد ما تنتقل للرفيق الاعلى
ابواب السادة المسئولين مفندقة على اخرها
روح واشتكي
وخد تلات شهور تهرب من عصاية السلطات في دماغك
ماهو ده اللي بيظبط لك دماغك
جتكوا القرف مليتوا البلد

أما الاخوة بتوع حروق اللسان

صدعتونا ووجعتوا دماغنا ..انتوا ايه؟ ما بتزهقوش؟

ما بتتعبوش؟

ما بتفهموش؟

عايزين تقضوا على التعذيب في مصر

يبقى تقضوا على الشعب

لأن نبيل لوقا بباوي بيقول إن الشعب هو المسئول عن التعذيب

والحمد لله

الحكومة في طريقها للقضاء على التعذيب قضاءا نهائيا مبرما

كيف يا عب رحيم؟

بإنها تسرطن الأكل وتلوث المية

وبعدين تخصخص الصحة

قوم الناس تعيا

وما تلاقيش تتعالج

قوم يموتوا ويغوروا في داهية ويريحونا

قوم الظباط ما يلاقوش حد يعذبوه

قوم يقضى على التعذيب في مصر

وبس لك ورغي بقى

إفففففففففففففففففففف

شوية بس عشان الأمن العام

ولكنكم تحرقون أغصان الزيتون

رجلك والأمن العام

بيمر بظروف نفسية...أحصابه تعبانة شوية وبيتكدر بسرعة

ما جراش حاجة يا شباب نشيل بعدشينا

وبعدين ما الامن العام يا قلب امه ياما شال واستحمل

ايشي عبارة

وايشي قطارات تطقش في بعض

وايشي حصبة انتشرت بشكل مريب

وفلفلوزة طيور سابت العالم وبركت عندنا

وخصخصة التعليم والصحة

يعني ده لو جبل كان انهد يا اخواتي

مش ناقص بقى عم منعم يكدره ويعصبه ينرفزه..اف

وبعدين...قالك منعم بينشر تصاوير

اخص عليه

وانا اللي كنت فاكراه مؤدب

طبعا خدش حياء الامن العام ووشه احمر وفرهد ورقع بالصوت: يا ناااااااااس غيتوني

مش عيب يا منعم؟

تتكلم عن التعذيب اللي انت اتعرضت له في اخر حبسة؟

مش تخليك راجل كده وتاخد اللكاكيم في وشك وما تنطقش

ايه يا اخواتي العيال الورق دول

فين رجالة زمان....يفضل متعلق لحد ما يموت ولا يقول أي

ده الانصاص قامت والقوالب نامت صحيح

الظاهر بتوع اسكندرية دولم كسر

لسنتهم طويلة كده ولوك لوك لوك لوك

وبتوع فضايح ورغي

احنا بقى لازم نقف وقفة من اللي هي كده مع المدونين دولم

يعني عبد الكريم وعبد المنعم الاتنين مدونين والاتنين اتعمل لهم قضية

الاتنين اسماءهم مما عبّد

يعني ما عنتش يا مخيمر تسمي ابنك عبد ....لا الكريم والمنعم والرحيم

من هنا وجاي سميه عبد المنتقم عبد الجبار عبد القادر عبد الخافض عبد القهار عبد القابض عبد المذل

يمكن تحل البركة واللي يمد ايده على ابنك تتشل باذن الله

كمان ما حدش يروح اسكندرية دي

نحس

المدون الاسكندراني يعرف كده على طول انه حبسجي عشان بس ما يكترش في الكلام

والاتنين انسحبوا من لسانهم وجابوا سيرة الاستفتاء والانتخابات

وفخامة عظمة جلالة سمو حضرة قداسة فضيلة الحاكومة وبسم الله الرحمن الرحيم كمان

ومصخوا في الحديت وجالوا كلام واعر اكبر من سنهم

ايه قلة الرباية دي؟

منعم والده في العناية المركزة حزنا عليه

وكريم والده ح يتنقط منه

بس الشهادة لله الحكومة عندنا بتحاكم الاتنين لاسباب مختلفة خااااااااااااالث

واحد عشان ملحد

والتاني عشان مسلم

طيب ممكن نعرف ايه هي الديانة المطلوبة؟

يعني بوذي مثلا؟ هندوسي شغال؟ سيخي ما يضرش؟

يعني اذا كان الموضوع مسألة دين وبس محلولة ان شاء الله

ما هي الحكومة طلعت دين المواطنين

وبما انه طلع في ايديها فتقدر تفرمته زي ما هي عايزة

من غير مشاكل

ومن غير ما كل شوية يمدوا ايدهم في عشة المدونين ويطلعوا منها شمورت وباسم الله الله اكبر

ويدبحوا معاه اب وام واخوات مالهمش ذنب غير انهم تعبوا على عيالهم وربوهم

وللا هه؟

لا والنبي يا عبدو

اخدتها من أيوب المصري

اللي قال لي امبارح - والعهدة عليه - ان الحكومة ح تخصخص الصحة والتعليم

طيب سؤال: بياخدوا ضرايب ليه؟

انا مش معترضه انا بس باستفهم

لكن ح ادفعها ح ادفعها يا فندم

طيب لو الحكومة مش عايزانا في البلد

ما تسفرنا يعني احنا مستعدين نروح اي حتة تانية

مش من جمالها يعني وسحابتها السودا ماسكين فيها

يعني اللي يقعد لهم في البلد يبقى ارهابي ويطبق عليه قانون الارهاب

واللي يطفش من وشهم يتجاب بتهمة الجاسوسية لاسرائيل

الا صحيح، شفتوا الجواسيس اللي فجأة بقت بترف ع البلد

ولما اسرائيل بقى بتتجسس الدولة ليه بتقيم معاها علاقات

وليه ماسكة في الجواسيس وعمالة تفحت فيهم

ده اذا كانوا جواسيس اصلا

وما فكرتش حتى تستدعي السفير الاسرائيلي وتعبر له عن استياءها حتى؟

وايه يا خويا الوطنية اللي حلت علينا فجأة

واشمعنى دول ولاد كلب

وعزام عزام يسافر زي الباشا لاسرائيل

واذا كانت اساسا الحكومة المصرية قبل كده قالت انها رحلت كتير من الجواسيس لاسرائيل "في الكتم" اشمعنى دول يعني معمول لهم فضيحة

يعني الناس لا عارفة تقعد في البلد

ولا عارفة تطفش منها

طيب نعمل ايه؟

هو الدم المصري ده بقى لعنة علينا وللا ايه؟

هو ده اللي بيسموه لعنة الفراعنة؟

طبعا الحكومة عارفة كويس يعني ايه جاسوس لاسرائيل بالنسبة للشارع مصري

وقد ايه التهمة دي مشينة ولا يمكن حد يتطوع عشان يدافع عن الناس المتهمة في القضية دي

خصوصا انها متهمة واحد فيهم بانه كمان شاذ جنسيا

وهم عارفين نظرة العرب والمصريين للشواذ عاملة ازاي

وكمان عارفين ان مافيش مادة في القانون بتجرم الشذوذ الجنسي

يعني مجرد تشهير وخلاص

فعلا دي انسب قضية يلبسوها والحكومة تستفرد بيهم

بس يا ترى

ايه هي تهمتهم الحقيقية؟

على الهامش: إمبارح أيوب المصري قال لي نحن في الخراء حتى الاعناق من اجل ذلك فنحن نسير مرفوعي الرأس

قلت له اديك قريت لحد ما قالوا لنا الفسحة خلصت...كله يغطس

حبس المدون عبد المنعم محمود 15 يوما على ذمة التحقيق

منعم اتقبض عليه النهاردة الفجر، ونيابة شبرا الخيمة حققت معاه ووجهت له تهم وحبست 15 يوم على ذمة التحقيق

عرفت التهم من ميل وصلني من مركز الحرية لدعم الديمقراطية:

وجهت النيابة لعبد المنعم إتهامات من بينها الإنتماء إلى جماعة أسست على خلاف القانون . وصنع وحيازة صور من شأنها تكدير الأمن العام ( ويقصد بها صور لطلبة معهد التعاون ) . وعقد اجتماعات تنظيمية سرية تستهدف تكدير الأمن العام .
وقررت النيابة فى نهاية التحقيق حبس المدون عبد المنعم محمود خمسة عشر يوما على ذمة التحقيق .

يعني أحرق صور عيد ميلاد أختك الصغيرة

يمكن تكون بتكدر الأمن العام

انا مش عارفة يعني ايه تكدير الأمن العام؟

وماله الأمن العام حساس حبتين كده؟

بيتكدر من أيتها حاجة ليه؟

طيب احنا ح نفضل عايشين في التهم الهلامية دي كتير؟

عموما بدل ما نقعد نخمن مين اللي الدور جاي عليه

لازم نعمل بنصيحة فتحي سرور

اللي قال: على كل مواطن أن يحتفظ برقم هاتف محاميه الخاص معه

في كل مكان حضرتك

في البيت

في الشارع

في الحمام

احتياطي

حسبنا الله ونعم الوكيل

قال ومصر هي أمي يقول لي: هم مش خايفين من ربنا؟

لا يا سيدي

مش خايفين

ها؟

إياك تكون اتصدمت

بعد عبد الكريم..أكيد ح يبقى منعم

لسة حالا عارفة موضوع منعم

عبد المنعم صاحب مدونة أنا إخوان

عرفته من جيمي

آه...للي ما يعرفش الموضوع

منعم الأمن داهم بيته وهو مش موجود

واتعمل له قضية

ومطلوب

بس لسة هربان

بيقول انه ح يسلم نفسه عشان اهله ما يتبهدلوش

ووالده اصلا مريض

منعم من الشباب اللي زي الفل على فكرة

اول ما ابتديت ادور في المدونات

لقيت واحد داخل كده بصدره وكاتب على مدونته: أنا إخوان

قلت يا حلاوتك

وحياة عينيك ما ح يسيبوك

وروحي يا ايام وتعالي يا ايام

وحصل موضوع عبد الكريم

وقلت لصديق عزيز كان بيجادلني كتير في موقفي المساند لعبد الكريم

قلت له باللفظ: إيه رأيك ان تاني مدون ح يتعمل له قضية هو منعم بتاع أنا إخوان؟

والليلة دي قلت له: أنا بعد كده ح اعمل النبوءة بنص جنيه

طبعا هي مش نبوءة ولا حاجة

بس ربنا عرفوه بالعقل

عبد الكريم ما يسواش حاجة عند الحكومة

والحكومة ماهياش حريصة قوي على الدين

وما حدش يقول لي شتم حسني مبارك عشان فيه غيره كتير

مدونين تقال بيشتموا حسني مبارك

بس الدولة ما ابتدتش بيهم عشان تقال

وبصراحة كده

حسني مبارك مش بيزعل من الشتيمة

هو قال كده بنفسه

لكن المدونين دول وجع دماغ

وفاضحين الدنيا

ومدخلين ظباط الداخلية في القفص

من ضمن المدونين اللي واجعين دماغ الدولة

منعم

بالذات عشان اسم مدونته : ما تقدرش...قصدي أنا إخوان

الطبيعي إن الدولة، بحبس كريم، بتحط رجل في النت

وبعدين تبرتع بعد كده

وبما انها عندها هسهس إخوان

فأول واحد، بعد كريم، ح يتعمل له قضية هو

"ما تقدرش"

وبعدين

وللا بلاش اقول مين التالت

احسن ابقى بافول عليه

بس فيه واحد تالت

أنا شخصيا مستنتجة هو مين

وانا مش ست الشيخة ولا حاجة

بس ده المنطقي

الدولة لما جات تحط رجل في النت اختارت حد ما عليهوش اجماع

وبعدين

بعد ما عملت سابقة قانونية

تختار ما بدا لها

ويبقى ساعتها ينفعه الاجماع

عشان كده كان لازم يبقى على عبد الكريم اجماع

عشان منعم ما يبقاش مطلوب دلوقت

معلش يا منعم

انت واد زي الفل

وفيه غيرك كتير زي الفل

بنات وولاد

وكلكوا

ضحية ناس بتبص تحت رجليها وبس

ربنا يستر