Thursday 4 August 2011

حوش الدم اللي في ايدك يا رويني

الجنازة النهاردة اتلغت عشان راح على الطب الشرعي


اللي بات في الاعتصام يعرف محمد كويس، لو ما يعرفش اسمه يعرف شكله، يعرفه وهو بيكنس ارض الميدان، ويعرفه وهو مبتسم كده على طول، يعرفه هو في نص الليل يقرر يمشي في مسيرة، يعرفه وهو جاي يقولي: ايه نوارة؟ رأيك الاعتصام حينتهي على ايه؟ وانا ما اعرفش ارد عليه، يعرفه وهو بيوزع ورق، مش عارفة ورق مكتوب فيه ايه؟ بصراحة كنت باناوله لاي حد جنبي، لان كل الناس بتوزع ورق
آآآآه يا محمد.. يا ريتها كانت جات فيا انا.. انتوا مستقصدني ليه؟ يا تموتوا الناس قدامي يا تموتوا ناس اعرفهم؟ وانا حاستنى لحد ما حد صاحبي لا قدر الله يموت؟ 
محمد مات على ايد "المواطنين الشرفاء بالعباسية" اللي شكرهم المجلس العسكري في بيانه
قالوا واحد اسمه محمد محسن مات وحنشيع جنازته بكرة.. قلت هو احنا كل يوم بنشيع شهيد؟ ده احنا لو فلسطين مش حنفضل نشيع في شهدا كده.. بس لما شفت صورته وعرفته دخت ورجليا ساخت وايديا قاعدة تترعش.. هو كده، زي ما انتوا شايفينه في الصورة كده.. دايما مبتسم.. عمري ما شفته بيتخانق.. ولا بيعمل مشكلة، وعمره ما كان بيهمد، لازم يكون بيعمل حاجة مفيدة.. انا بقيت خايفة اعرف حد.. مش عايزة اعرف حد تاني.. مش عايزة اعرف حد واقعد معاه وبعدين يحصل له حاجة.. 
احنا فين هنا؟ احنا في احتلال هنا؟ مواطنين شرفاء ايه اللي عملوا كده؟ بتسلطونا على بعض؟ ايديكم فيها دم، عملتوا زي الولية اللتاتة ومشيتوا في الشوارع تحرضوا الناس على بعضها وتسخنوهم على بعضهم عشان ما عندكوش حتى الشجاعة تواجهوا ولد زهرة زي ده؟ 
حتقولوا ايه؟ حتبرروا اللي عملتوه ده بإيه؟ بلطجي؟ محمد كان زي النسمة، وعمري ما شفته مكشر حتى ولا صوته بيعلا، ولا عمره عمل مشكلة مع حد.. حتنكروا انكم حرضتوا الناس عليه والرويني معترف بعضمة لسانه انه هو اللي بيطلق الاشاعات؟ حتنكروا بيانكم اللي نزلتوه تقولوا للناس اقتلوهم دول بلطجية؟
انا مش بس باحملكم المسئولية انكم حرضتوا عليه واستعنتوا ببلطجية وقتلتوه، انتوا زرعتوا وسطنا تحريات عسكرية ومخابرات عسكرية وأمن دولة ومخابرات عامة كانت بتسخنا وتزايد علينا وتسحبنا.. وانا شاهدة ان اكتر عيال كانت بتسخن على المشير وتتشنج لحد ما يطق لها عرق هم العيال اللي بعد كده شفناهم لابسين خوذ وجاكيتات.. دي جريمة.. جريمة.. ليه كده؟ بتعملوا ناصحين علينا؟ قال يا سيدي عاملين لك نظرية مخابراتية قديمة قدم التاريخ نفسه اسمها المغناطيس، يزرعوا في كل مجموعة عناصر تزايد على المجموعة في افكارها، يعني المجموعة اللي عارفين انها ضد المجلس يحطوا وسطهم واحد يسخنهم على المجلس اكتر حاجة عشان يجذب اكبر عدد من اللي ضد المجلس ويعرفوا يحصروهم، اللي مع المجلس برضه يزرعوا واحد وسطهم يبقى اكتر واحد فيهم مع المجلس عشان يجتذبهم ويعرفوا يحصروهم، الجماعات الدينية، الجماعات السياسية.. وهكذا، كل مجموعة يحطوا لها واحد حيطق له عرق عشان يبقى عنصر الجذب والمجموعة اللي حواليه تثق فيه تقوم تكشف له اسرارها لو عندها اسرار، وفي يوم مظاهرة العباسية تلات اربع المظاهرة كانت تحريات عسكرية ومخابرات عسكرية، وقاعدين يسخنوا على المشير ثم يختفوا، ويقولوا لنا باتوا هنا في العباسية وبعدين يختفوا، واول ما نقول يسقط حكم العسكر يظهروا تاني عشان يغلوشوا على الهتاف ده بالذات.. مش واخدين بيه اوامر بقى، وفيه شهود على الموضوع ده، لأن فيه ناس واحنا في المسيرة جم قالوا لي: هو مين اللي اول ما نجيب سيرة حكم العسكر يحول الهتاف الى: الشعب يريد اسقاط المشير ويغلوش على الاعتراض على حكم العسكر؟ وكلنا كنا شاكين فيهم انهم تحريات عسكرية.. فالحين قوي
اكتشفتوا ايه يا ناصحين؟ اكتشتفوا ايه خلاكم تقتلوا محمد؟ اكتشفتوا ان انتوا اللي جبتوه لنفسكم وقلبتوا الناس عليكم بتصرفاتكم من غير سبب؟ بتعملوا فينا كده ليه هو احنا اسرائيل؟ عمل ايه محمد؟ راح يتظاهر قدام المجلس العسكري وجمال الغيطاني طالع يشتم فيه ويقول التظاهر امام المجلس العسكري خطيئة؟ ليه ان شاء الله.. هو كان الكعبة المجلس ده؟ عمل ايه محمد يستاهل انه يموت عشانه؟ ويموت على ايد مواطنين؟ مواطنين ولا بلطجية ما تفرقش.. المهم انهم مدنيين، وقتلوه من غير سبب.. مافيش عداوة بينه وبينهم وما عملهمش حاجة وما أذاش حد في حاجة عشان يموت، وما عملش حاجة غلط.. ماعملش غير انه بيحب بلده
وبمناسبة الجاكيتات والخوذ... انا رحت متأخر شوية عند قسم قصر النيل اشوف الشباب وهم خارجين
الشباب اللي اتقبض عليهم لأنهم لا مشاهير ولا تحريات عسكرية.. معتصمين بجد، ولولا اعتصامهم ما كناش شفنا مبارك في القفص، وكان زمان المحاكمة ما بقتش علنية، ده اذا كان اتحاكم، وكان زمان مبارك معمول له جنازة عسكرية بتابوت فاضي وهو قاعد في تبوك، العيال خارجة نفسيتها محطمة، عشان اتعذبوا في السجن الحربي، واحد منهم قال لي كهربونا وفينا ناس مش حتنفع في حاجة تاني، وكهربونا في حتت ما ينفعش اقولك عليها.. انا ضهري متشرح. قلت له فين التعذيب ده؟ قال لي في السجن الحربي
اللي دل عليه واحد عامل معتصم وبعد كده لبس الخوذة، واللي شده امن دولة، واللي عذبه ظابط جيش في السجن الحربي.. كل ده عشان بهدل نفسه في الشارع تلات اسابيع بيدور على حق الشهدا اللي اغلبية الناس مش سائلين فيهم.. كل ده عشان قعد في الشارع لحد ما جاب لنا مبارك في القفص.. يتعذب ويتهان في سجن حربي ليه؟ لو اسرائيلي كنتوا عذبتوه؟ والله العظيم تلاتة ولا تتجرأوا تعذبوا اسرائيلي ولا تمسوا شعرة منه.. عيالنا بس اللي ينضربوا ويتشتموا ويتعذبوا عشان بيتظاهروا قدام سفارة اسرائيل وبيقولوا نزل العلم
انتوا ازاي تعملوا كده؟ ازاي تعملوا كده؟ ازاي تزرعوا وسطنا عملا عشان يحفظونا ويدلوا علينا كأننا اسرائيليين، وازاي تسحبونا على ميدان العباسية وتسلطوا علينا مدنيين؟ وازاي تموتوا محمد؟ ازاي تموتوه؟ وازاي تعذبوا الناس كده؟ احسن شباب في البلد.. احسن شباب في البلد.. ازاي اشوفهم خارجين متحطمين ونفسيتهم تعبانة كده؟ ليه عايزين تكسروا نفسهم ليه؟ 
احنا ماحدش يكسر دماغنا.. ابدا... ابدا.. لا عاش ولا كان.. اذا كان انتوا ولا المواطنين الشرفاء المهاطيل بتوعكوا اللي اتقفل عليهم الميدان دلوقت بعد ما قعدوا يقولوا الله اكبر عشان الجيش والشرطة اقتحموا الاعتصام، على الله يكونوا مبسوطين وحالهم ماشي بعد ما اتسببوا في تعذيب الناس اللي كانت بتسعى عشان تجيب لهم كرامة
احنا النهاردة ان شاء الله حنشيع جنازة الشهيد محمد بعد صلاة الضهر من قدام معهد ناصر، هو على كورنيش النيل، تفضل ماشي على الكورنيش، لو جاي من مصر الجديدة تعدي ماسبيرو والنايل سيتي وتفضل ماشي على طول وتسأل هناك اي حد حيدلك
عايزة اشوفكم هناك ان شاء الله.. محمد مش بلطجي.. محمد كان زينة الشباب

85 comments:

mutargim said...

http://al-agenda.blogspot.com/2011/08/blog-post.html

Mohamed said...

الله يرحمك يا محمد دمك مش حايروح بلاش

Mohamed said...

الله يرحمك يا محمد دمك مش حايروح بلاش

Abeer hussien said...

الله يرحمه ويعينا علي باقي المشوار

مشروع دكتور said...

ازيك يا نواره انا اسراء زميله محمد محسن فى الجامعه وكان معانا فى تظاهرات جامعه سوهاج لاقاله رئيس الجامعه
محمد محسن يعنى من انظف البشر اللى تشوفيهم فى حياتك لانه ببساطه وبدون عواطف اسنان بيشتغل فى هدوء ومش عايز لاء خطب ولا كلام كتير مش يعرف غير الشغل وبطريقه صح وبس
ربنا يرحمه بس وربنا مش هنقدر نسامح نفسنا لو حقه مش اتاخد

amr anwar said...

حسبي الله ونعم الوكيل
اللهم اهلك الظالمين بالظالمين واخرجنا من بين ايدهم سالمين
اللهم اجعل تدبيرهم تدميرهم
يــــــــــــــــــــــارب
اللهم اّمين

Ramy Semism said...

الله يرحمه ويسكنه فسيح جناته ويلهم أهله الصبر والسلوان. نفسي أموت شهيد زيه.

Ramy Semism said...

الله يرحمه ويسكنه فسيح جناته ويلهم أهله الصبر والسلوان.

ENg. Muhamed Battiekh said...

محمد زميلي يا نوارة ف جامعة سوهاج وزميلي فالسكن كمان،، وأنبل وأشرف شخصية ممكن تعرفيها . وسؤالي دلوقتي لكلاب السلطة، ازاي اجيب حق صاحبي؟؟

Alok Ray said...

انا لله وانا اليه راجعون . انا بس عايز اقولك ان فى كلام ابتدى ينتشر ان جنرال من الجيش بيقود انقلاب ضد المشير وعايز يعمل نفس الى عمله عبدالناصر فى انقلابه على نجيب والغاء الديموقراطيه والصحف بتلمع فيه اليوميين دول . بتوع التحريات دول تقريبا هو الى حاططهم للسبب ده . علشان كده هما كانوا بيركزوا على المشير وبيغلوشى على يسقط حكم العسكر . وتقريبا لنفس السبب بتوع الجمعه الى فاتت هتفوا للمشير .

Ahmed . M . Abdulrahman said...

لا الله الا الله

البقاء لله

عمره عمره

محدش حينفع يتكلم فى اى حاجه دلوقتى

غير الثأر

الثأر ثم الثأر ثم الثأر


ملعون المجلس ع المواطنين الشرفاء فى الارض

طنطاوى دا كائن غبى غبى

حسبى الله ونعم الوكيل حسبى الله ونعم الوكيل

الهى يصد نفسه زى مصد نفسى

سلام مؤقتاً يا نواره
________________________
الى عاوزنى يجينى
http://misr25jan2011.blogspot.com

ENg. Muhamed Battiekh said...

محمد زميلي يا نوارة ف جامعة سوهاج وزميلي فالسكن كمان،، وأنبل وأشرف شخصية ممكن تعرفيها . وسؤالي دلوقتي للروينى والسلطة، ازاي اجيب حق صاحبي؟؟ية ممكن تعرفيها . وسؤالي دلوقتي للروينى والسلطة، ازاي اجيب حق صاحبي؟؟

شمس النهار said...

الله يرحمة ويغفر لة

ملكش دعوة said...

عليه رحمه الله هو وكل شهيد سالت دماؤه الطاهره علي ارض مصر ومن اجل مصر
مش المشير ولا المجلس ولا امن الدوله بس اللي اتسببوا في موته
ناس تانيه ساهمت في كده وانتي مش بريئه من دمه مهما اظهرتي من تعاطف .... راجعي كلامك اللي كنتي بتقوليه علي الجيش والمجلس العسكري .... راجعي قصائد الحب والغرام وجسر التنهدات
انتي اللي خليتي مريدينك يقدسوا المجلس العسكري لدرجه ان لما جه اليوم اللي ثوار التحرير بشتموا في المجلس ويشككوا في نزاهته ويطكالبوا بمجلس مدني ...كان رد فعلهم عنيف ... لان الجيش كان الضامن الوحيد لاهداف الثوره وهو حامي حمي البلد ولولاه كانت القوي السياسيه الكرتونيه عماله تتلقفنا وتلعب بينا الكوره ودي حقيقه
انا لا اثق بأي من القوي المستحدثه الان لانهم وصوليين لم يقدموا للبلد اي شئ وفي المقابل كله لبس لبس الحمل الوديع وعايز ينهب حته من التورته
حتي انتي عمرك ما اتكلمتي عن نفسك زي دلوقت
ايه الفتوحات والانتصارات اللي عماله تعدي فيها حسستيني انك انتي اللي حطمتي خط بارليف ايه مالك ركبك الغرور ولا ايه ..مالك ... اهدي شويه علينا ... كلنا بنحب البلد ... يوم ما كنتم في التحرير وطيارات اف 16 كانت فوقيكوا قضيت الليل بطوله مغمضليش خفن وكنت بتضرع لله انه يحميكم
رحمه الله عليه ... ياريت تراجعي نفسك وتراجعي حساباتك مش كل اللي بيطبلك بيحبك ... ممكن يكون بيستخدمك وسيله عشان يوصل للي عايزه
رحمه الله عليه ..اذا كان فعلا عزيز عليكي لازم تعرفي انه مات عشاني وعشانك مش عشان اللي عايزين مصر مسخ مشوه ..مصر المدنيه بتوب ليبرالي مصر بتاعه حمزاوي وحمزه وساويرس وغيرهم

شمس النهار said...

علي فكرة يانوارة كل الشهداء دمهم في رقبتكم انتم وليس مبارك وهنعرف قريب ليييييية

BestItalianPizza said...

شهيد فى رمضان .. يا بخته .. معلش يا نوارة .. الصبر .. و بشر الصابرين .. الثورة للأسف كده لازم تتروى بالدم .. زى ما حضرتك شايفة .. كل دم بيسيل بيحقق نصر .. أمر اله علينا .. و ربنا ينصر الحق .. أمين يا رب العالمين

شمس النهار said...

انت قاضل ميين في مصر مجرتيش شكلة ياريت تعرفينا مين الا بعد الرويني والاقضل ترسلي لينا الورقة الا الامريكان معطينك اياها عشان نبقي عارفيين الدور علي ميين

نوبى احمد النوبى said...

محمد محسن صحبى من اسوان كان بيهتف معانا فى اسوان من اول يوم فالثورة الله يرحمه والله العظيم اصابه كتير قالوله ماتنزلش مصر انتا عيان وصحتك موش مساعداك بس هو كان مصمم الله يرحمه لا حول ولا قوة الاا بالله ربنا يصبر امه وابوه

kbahey said...

الله يرحمك يا محمد، انت و كل شهداء مصر اللي ماتوا ضد الظلم سواء مبارك او شرطة او عسكر

خلينا نشوف بقى الصورة الاكبر

موضوع اخلاء الميدان بالقوة اول ايام رمضان فيه ان
يعني لو صبروا يوم و التاس شافت مبارك بيتحاكم، يمكن كان نص المعتصمين مشيوا
هل هو غباء بس و الا ايه؟

حاجة تانية المحاكمة و مبارك و ولاده في القفص
على افتراض ان المحاكمة حتكمل و حيدانوا
كل دة بيقول لي حاجة تانية
بيقول ان العسكر قرروا يضحوا بمبارك بالكامل لان الضغط عليهم جامد، قدموهم قربان للشعب هو و العادلي و قياداته

و الكنبة يتلهوا في المحاكمة و العسكر يبقوا كويسين اهو، و بيحققوا المطالب و و خليهم قاعدين
و نلبس ديكتاتورية عسكرية تاني

و موضوع غزوة الميدان و موضوع العريش
اللي الاول قالوا دحلان في التلفزيون، و بعدين بقت امارة اسلامية تكفير و هجرة، و بعدين بقت القاعدة
خدي بالك: القذافي قال درنة امارة اسلامية و اتهم واحد كان في جوانتانامو انه الامير و ان القاعدة ورا الثورة في ليبيا
و علي عبد الله صالح قال القاعدة في زنجبار
و عندنا لقينا القاعدة في العريش
جنب حماس و على حدود اسرائيل
ليه بقى؟ عشان اسرائيل تخاف
و امريكا تخاف
و المعونة العسكرية تستمر
و امريكا تساند الديكتاتور الجاي اللي حيكون عسكري، او واجهة للعسكر، و تحمي مصالح الحبيبة اسرائيل على حدودها

هو دة السيناريو الارجح
مش انقلاب و ضباط صغيرين

لازم نفضل صاحيين للمطالب و اهمها التطهير الشامل و جدول زمني تفصيلي لتسليم السلطة للمدنيين

نقطة تانية بخصوص لميس جابر
ادي كلامها في اليوم السابع
http://www.youm7.com/News.asp?NewsID=466737&SecID=12

الخلط بين الدولة و الموظف

اولا لا يوجد شئ اسمه هيبة الدولة
المصطلح دة في الدول القمعية فقط
...الدول العادية لا يحكمها الا الاحترام لمن لديه ضمير او الخوف من العقاب لمن ليس عنده
لا وجود لهيبة في دولة عادية

ثانيا الهيبة مصطلح يطبق على الاب او رجل الدين
يعني هناك علاقة اسرية او روحية
و لا يطبق على دولة مختارة من المواطن برضاه و لخدمته و يصرف عليها من امواله

نحن نريد ان ننزل فرعون من عليائه و نعاقبه على ما فعل و نكسر اصنامه و ننكل بسدنته
كي تعود الادمية الى الحاكم و يعود مفهوم انهم موظفين عند الشعب كلهم
و ليسوا في نادي خاص يجمع المال و السلطة

لميس اما فاهمة و بتستهبل او مش فاهمة

عارفين قصة النبي ابراهيم و تكسيره الاصنام؟ الهدف مش مجرد تكسير طوب. الهدف احداث صدمة نفسية شديدة. تحطيم مفهوم ترسخ في اعماق شعب من ايام فرعون. لما يشوفوا الصنم بيتكسر، مخهم حيتحرر من القيود، و يعرفوا ان اللي جاي مش إله فوق المسائلة و المحاسبة، و ردع للي جاي انه ما يلعبش بديله خالص و الا واجه نفس المصير

اهي الصدمة حصلت. اما نشوف الشعب حيفوق و يبتدي يشفى من مرض الاستبداد و الا ايه

Unknown said...

انا لله وانا اليه راجعون وان شاء الله مش هنسيب حقك يامحمد وحق كل الشهدا والمصابين
يانجيب حقهم يانموت زيهم

Anonymous said...

الله لا يوفق اى حد ساهم ولو بمساهمه بسيطه جدا فى قتل او اصابه شخص مصرى

sadek said...

إنا لله وإنا إليه راجعون ، ولا تحسبن الله غافلا عما يعمل الظالمون

احلام جوليا said...

لاحول ولا قوة الا بالله عاوزة اشكرك واشكر كل المعتصمين لانكم السبب في حط مبارك في القفص وانه بدات محاكمة ومعلنة علشان القاضي يعرف ان عليه 85 مليون رقيب لكن وفاه محمد واجعة قلبك وقلبنا البقاء لله يا نواره ربنا يجعل الجنةمتواه ويمكن حيوصل اخيرا للمكان المثالي الي يستحقه ويسيبنا احنا في بلد احنا نستحقها لاننا مش زيه صدقيني الكم يوم الاخرانيين دول بقى عندي قناعة ان الجهلاء في مصر والفقراء في مصر يستحقون سوء احوالهم لانهم ببساطة معظمهم هم دول المواطنين الشرفا الي شكرهم المجلس العسكري ال 65% من المصريين الي مش فاهمين حاجة وعمالين يجروا هنا وهناك شوية منهم ورا الاخوان والسلف يقولولهم يمين يمين ويقولولهم شمال شمال وشوية منهم بتوع اسف يا ريس ناس لا فاهمة ولا حتى عاوزة تفهم حسبنا الله ونعم الوكيل فيهم

محمد عبدالجواد said...

البقاء لله
ربنا يرحم محمد ، واحنا هنكمل المشوار لآخر واحد فينا
وربنا يحفظ أختنا الغالية نوارة
بنت بطل بـ100 راجل من الرجاله الجدعان الشجعان
أرجو تقبل عزائى

محمد عبدالجواد said...

البقاء لله
كلنا هنكمل المشوار لآخر واحد فينا
مش هنقبل البلد ترجع للماضى
ولازم كل مسؤل أخطأ يتحاسب
ويدخل القفص زى مبارك وياخد أقصى عقوبة ليشفى الله صدور قوماً مؤمنين
ربنا يحفظك يا نوارة ، منارة للحق والقوة والعدل ، أرجو تقبل عزائى فى محمد

محمد عبدالجواد said...

انا مصري
عن نفسي ، أحب أقدم ليكى تقديري واحترامى
لدورك البطولى من يوم 25 يناير ومن قبله وانا كنت أعرفك والى الآن
إنتى مصرية أصيلة ، يا ريت فى فى مصر بنات كتير مثلك
ربي يحفظك

أحمد عبداللطيف said...

الله يرحمك يا محمد الله يثرحمك و ينتقم منهم الله يرحمك و يرحم الشرافء اللي زيك الله يرحمك و يعذبهم بذنبك الله يرحمك يا زهرة الشباب أنا أول مرة اشوفك بس زعلي و حصرتي عليك زي اللي كنت كل يوم معايا مكانك الجنة ان شاء الله استنانا هناك يا محمد :(

hesham said...

من قتل الشهيد
القاتل هو من قال لة اخرج في مظاهرة للمجلس العسكري ما نتم كنتم في التحرير سقط مبارك من التحرير لية خرجتوا مرتين لية اول مرة وثاني مرة عايزين تولعوا في البلد وتقولي الرويني اية خرجكم من التحرير الي خرجكم من التحرير هو سبب الدم انتم السبب لو مخرجتوش كان زمان عايش منكم لله قتلتوة علشان تسخنو الناس اخص عليكم منكم لله

elzahraamegahed said...

اللهم تقبله شهيدا واجعله مع الصديقيين والأبرار ، وألهم أهله الصبر والسلوان وإكتب لثورتنا النصر والتمام والكمال بما يرضيك ولما يرضيك

maomran67 said...
This comment has been removed by the author.
maomran67 said...

الى شمس النهار الجيش استلم راية الخيانة والعمالة من مبارك ربنا يحرقهم بجاز وسخ كلهم وانت معاهم

emi_80 said...

الجنازه بقت يوم الجمعه يانواره علشان التشريح

amerelmohager said...

انتى السبب فى موت الناس ديه يا نوارة منك لله

محمد نبيل said...

ربنا يرحمه، ربنا يصبر أهله، بس هو أحسن مننا دلوقتى وأنا أتمنى أكون مكانه

متفائل said...

الله يرحمه بس ذنبه في رقبة المخابيل الذين يقفون ضد الإجماع الشعبي المؤيد للجيش عن وعي وفهم وبصيرة .. ذنبه في رقبة المخابيل أصحاب فكرة مسيرة العباسية الغبية .. أنت ومن هم على شاكلتك تتصورون أشياء لا صحة لها وأقرب إلى الهلاوس السمعية البصرية .. تتصورون إن الكام خيمة اللي إتنصبوا في قلب التحرير هما اللي (أجبروا) الجيش على محاكمة مبارك ووضعه في القفص .. ماسألتيش نفسك ليه الجيش ماسابش مبارك يهرب خارج مصر زي بن علي ؟ وبرضه من الهلاوس السمعية والبصرية أن تقولي إن الجيش عايز يستولي على السلطة ليستمر حكم العسكر .. طب ليه أصدر وثيقة المباديء فوق الدستورية التي تعطي الجيش حق التدخل لعزل الحاكم الذي يعبث بتداول السلطة ؟ .. وثيقة زي دي لما يصدرها الجيش ويصر عليها مالهاش غير معنى واحد : إنه مش عايز يحكم ومش طمعان في الحكم .. كل ما هنالك إنه (خايف) من وقوع البلد في يد ديكتاتورية سلفية ثيوقراطية تبقى للأبد وتعصف بالديموقراطية وتداول السلطة وهو خوف مشروع ومن حقنا جميعاً أن نشعر به (وأستغرب أنك لا تشعرين به).. إنما لو كان الجيش بيخطط للإستيلاء على الحكم مكنش أصدر الوثيقة دي .. يصدرها ليه وهو ينوي عدم تسليم البلاد لسلطة مدنية ؟ يحتاط من أيه ؟ ويخاف من أيه ؟

هراء لا داعى له ..... said...

لسا هندفع شهداء كتير فى الفترة الجاية

عند لحظة الحسم لما العسكر يقرروا يدولنا خازوق فى الإنتخابات

و تطلع برضه المجموعات الثورية تعترض و الشعب يسقف للمجلس و ساعتها هنتقتل بإسم الوطن و الشرعية


بس طول ما القضية ليها مناصرين حتى لو عددهم قليل ....هينتصروا لإن دى سنة ربنا فى الكون

الأقلية دايما بتصنع التاريخ

Mohammad Sulaiman said...

هونى على نفسك , ومحمد مبسوط واحسن مننا والله على الاقل ارتاح من وجوه الكدب والرياء والنفاق الى بنشوفهم كل يوم وبعدين محمد خد الى احنا بنتمناه وهى الشهاده ومابينضفش البلد من نجاسه مبارك ونظامه الا الدم ولازم ندفع ضريبه الحياه الكريمه ولاننسا من ماتو فداء حريتنا وربنا يصبرنا

Mohammad Sulaiman said...

ربنا يرحم محمد وانتى هونى على نفسك ومتنسيش ان محمد اخد حاجه كلنا بنتمناها وهى الشهاده ولا ايه . ومحمد هيفضل مبتسم زى مانتى شوفتيه وخلى املك فى ربنا كبير لاأن ثورتنا دى كلها على بعضها كانت بامر الله بدليل ان مفيح حد فينا مصدق لاحد الان انو شاف الخنزير مبارك مرمى زى الكلب فى قفص الاتهام وبس الان علينا بالدعاء لمحمد وجميع شهدائنا نواره ربنا يكتر من امثالك

الشافعي صالح said...

مش عارف أقول ايييه
المجلس العسكري لازم يتوقف عن الاساليب القذرة اللي بيستخدمها مع أشرف ناس في مصر - دم محمد في رقبتهم وايديهم
والشعب لازم يفوق والسفلة اللي بيهاجموا اللي جابلهم حقوقهم عليهم اللعنة والعار لانبطاحهم للمخلوع اولا والان للمجلس العسكري

دم الشهداء ياولااااااااااد ال ....

Mohammad Sulaiman said...

يانواره هونى عليكى ربنا يرحم محمد ويسكنه الفردوس مع النبين والصديقين والشهداء وحسن ؤلائك رفيقا كمان لا تنسى ان محمد اخد حاجه كلنا بنتمناها وهى الشهاده ولا ايه وبعدين انتى لم تقصرى يعنى فى رأيى انتى والله بمليون راجل بدون رياء وكمان انا معرفوش بس من وصفك حسيت ان دا الشخص الى يستحق الشهاده صح وكمان اعرفى ان ثورتنا دى كلها على بعضها بأمر الله بدليل مجدش فينا لسه مصدق انو شاف الخنزير مبارك وهو مرمى زى الكلب فى القفص اللهم رانى صائم صح ولا ايه يعنى ربنا حافظ مصر صح

Anonymous said...

حرام والله حرام،ليه كذا..،ليه يامصريين كذا..،يارب صيب الذى قتله،ومن تسببوا فى قتله،بسوء العذاب،حتى يقول،ويقولوا،هذا ذنب المسكين الذى تسببنا فى قتله،فى ريعان شبابه،وهو مطالب بحق..،أستغفر الله العظيم يارب

sara draz said...

الله يرحمك يا محمد
يكفى انه نال الشهادة
وان الله سيرزقه بالجنة باذن مهما
فليقولوا مايقولوا عنه
فهو الفائز
وهو الشهيد

مواطن مصري said...

تسلم ايدك يا نوارة

maomran67 said...

الله يرحمك يامحمد .اللهم عليك بالظالمين

hardway said...

اللهم تقبله شهيدا واجعله مع الصديقين والأبرار ، وألهم أهله الصبر والسلوان
حسبي الله ونعم الوكيل فيك يا ركيبة الامواج
حسبي الله ونعم الوكيل فيك يا زعيمةياناشطة
تقتل القتيل وتمشي في جنازته
حسبي الله ونعم الوكيل..
1- من أخذ محمد من التحرير الي العباسية
2-من كان يحسب نتائج هذا التحرك والتظاهر امام المجلس دون حساب اي تداعيات
3- من أمر الشباب المغيب بالسير وراء النشطاء..يا ناشطة التحرير السياسية
4-اين كنت أنت في المسيرة والتظاهر..اين
5- أين كان الزعماء الابطال بتوع كذبة أبريل
أأقول ياناشطة اين كنت...
كنت داخل مستشفي الدمرداش محتمية بها
وحجتك انك كنت بتعملي اتصالات مع القيادات حتي يتم فتح ممر آمن
...أأقول اين كان أبطال كذبة ابريل
المقاتل الصربي /محمد عادل كان بيدور علي الكلانشكوف الآلي علشان يضرب ..فين ؟
داخل جامع النور بالعباسية مختبأ
اين كان د/شادي والمناضل/ناصر عبد الحميد
لم يظهروا ولم يتواجد أحد منهم ..لـيـه؟
جالسين متعمقين عاصرين الأذهان في الغرف المكيفة لبدء المقابلات الفضائيةو المحطات المرئيه و لا مرئية
يا قتله..ياقتله..ياقتله..ياقتله
وبعد كل هذا شايفين بتقول ايه
(آآآآه يا محمد.. يا ريتها كانت جات فيا انا.)
ياريت يا شيخة..ياريت تروحي وماترجعي حتي نحافظ علي شباب هذه الأمة....يـارب

hardway said...

كانت بتسخنا وتزايد علينا وتسحبنا..
ويقولوا لنا باتوا هنا في العباسية وبعدين يختفوا،
..................
وأنتم كان عقلكم ...فـيـن
فين عقلكم..؟ يامن تريدون حكم المحروسة
فين عقلكم..؟ يا من تريدون حكم 85 مليون

hardway said...

احنا ماحدش يكسر دماغنا.. ابدا... ابدا.. لا عاش ولا كان.. اذا كان انتوا ولا المواطنين الشرفاء المهاطيل
.............................
ياشعب مصر..يا شعب المحروسة
نرنر بنت نجم
بتقول علينا كلنا بعيدا عن نشطاء السوء
أننا المواطنين الشرفاء المهاطيل
أحنا المواطنين الشرفاء المهاطيل
وهي طبعا واصحابها الثورجية..عايزين يحكموا شعب من المهاطيل
شوفي يا مهطولة أنت ومهاطيلك
لما الشمس تشرق من الغرب
والبحرالمالح يصبح سلسبيل
ماهتشوفي اليوم ده أبـــــدا

Unknown said...

الله لا يرحمنا لو ما أخدناش تاره وتار كل الشهدا

Unknown said...

الله يرحمك يا محمد دمك مش حايروح بلاش

freedom4ever25 said...

الله يرحمه ... بس لازم نتكلم بصراحه شويه . في نا هتقول انه اصلاّ مش شهيد عشان راح على المجلس العسكري وانه تبع بتوع 6 ابريل "وللعم دول اغلبية الناس" من اول الثورة ولغاية دلوقتي . بس انتي يا دكتورة كنتي بتخدعي نفسك لما قلتي ان كل واحد نزل الثورة في 2 من عائلته موافقين يعني الثورة لو نزلها 20 مليون يبقى في 60 مليون مع الثورة . ودي طبعاّ نظريه خطء تماماّ وهي سبب التخبط اللي انتي والثورة فيه دلوقتي . لأن بكل بساطه انا لوحدي في البيت اللي كنت بنزل في الثورة وماشفتش حد من الشارع بتاعي في الثورة غير 2 بس وفي يوم الخطاب العاطفي للمخلوع كانت اللجنة الشعبيه اللي قدام الشارع كلها مع مبارك ماعدا انا و3 تانيين واللي عمل توازن شويه مجموعة تبع الاخوان كانوا معديين بالصدفه فقلت لهم تعالوا شوفوا الناس دي ... يعني من الاخر يا دكتورة اللي نزلوا الثورة كان فيهم اطفال وعواجيز وناس على عكاز وذوي احتياجات خاصه . يعني من الاخر هما دوول اللي نزلوا الثورة وطبعاّ عدد 20 مليون ده كان في جمعة الغضب
لأن في اواخر ايام الثورة قبل تخلي المخلوع تقريباّ ما كنش في في المظاهرات عندنا غير بتوع الاخوان و6 ابريل وبعض المستقلين ... والناس كانت بترمي علينا ميه وسخه من البلكونات وبيشتمونا وناس معددين يقولوا لنا كفايه بقى خربتوا البلد وانتوا لو كان ابوك بيشتغل باليوميه ما كنتش تعمل كده والكلام اللي انتي عارفاه ده....... الخلاصه
ان المؤمنين بالثورة بجد وعارفين يعني ايه ثورة ومستعدين يضحوا بنفسهم مش اكثر من 5 مليون في جميع المحافظات
وده اللي خلى المظاهرة اللي كانت رايحه المجلس العسكري كان كبيرها 5 - 6 الاف وعلى فكرة دي كان داعي لها ائتلاف شباب الثورة كمان " يعني رسميه" يبقى المرض والدوى فين دلوقتي يا دكتورة؟؟؟
المرض ان الناس رجعوا تاني يبقوا مغيبين لأنهم بيتفرجوا على التلفزيون المصري ودريم والمحور والحياة وطلع لهم دلوقتي كمان سي بي سي والنهار
والثورة مالهاش غير قناة واحدة " التحرير" وللأسف قلبت في رمضان مسلسلات وابراهيم عيسى راح يقعد مع الفنانين وبلال فضل خد اجازة ودعاء سلطان اعتزلت ... يعني من الاخر كده الثورة خدت استراحه طويله
وللأسف برضه انتوا ماسكين في حاجات صعب تقنعوا بيها الناس " يعني ايه حق الشهداء" طيب ماهم فرغوا دائرة لنظر القضايا . والعيسوي بيه عمل حركة بتاعة الظباط المتهمين ونقلهم لديوان عام المحافظه يعني من الاخر بيبطلوا كل الحجج بتاعتكم . عارفه ليه لأنكم مش بتتكلموا في الصميم ( الصميم اللي فعلاّ يقنع الناس ويكشف اي خاين للثورة سلفيين بقى اخوان مش عارف ايه اللي هيرفضه هيتفضح للرأي العام وأولهم المجلس العسكري) ايه هوه الصميم هو ضمان نزاهة الانتخابات يعني تطهير قضاء لأنه هوه اللي في ايده الانتخابات بالاضافه لمحاكمة الظباط قتلة الشهداء وطبعاّ ده هيئدي بالضرورة لتهير النيابه العامه ثانيا تطهير الشرطه لأنها لها تأثير كبير على العمليه الانتخابيه وعلى موضوع النيابه العامه والتحريات وده اللي هيخلينا لنا حق نقول اعادة هيكلة الشرطه لأن ساعتها هيبقى اغلب قيادات الشرطه وظباطها متورطين في تزوير انتخابات سابقه
ثالثا تطهير الاعلام لأن هوه اللي بيشوه في الثورة دلوقتي وبيطبل للمجلس العسكري وبيشتم في الثوار وبيلمع في الاخوان والسلفيين وهوه اللي ضلل الناس وقت الثورة وده بأعتراف المواطينين انفسهم يعني ماحدش هيقدر يقول لنا تلت التلاته كام.... لما نضغط على المجلس بقى بال3 طلبات دي هيبقى لينا حق عند مساحة كبيرة من الشعب المصري تساوي تقريباّ العدد اللي نزل معانا الثورة وساعتها المجلس لا يمكن ينفذ المطالب دي لاأن انتخابات نزيهة تساوي خروج رجال امريكا من مصر واسقاط النظام فعلاّ وساعتها نقدر نروح نحاصر المجلس العسكري بقلب جامد ويبقى في المسيرة ملاايين مش 5 الاف ساعتها اما ان المجلس يوافق على المطالب ويبقى محترم بالغصب واما نعين مجلس رئاسي مدني ويعترف بيه بعض ضباط رجال القوات المسلحه نزولاّ عند الرغبة الشعبيه ويبقى وصلنا لنفس الهدف ولكن بتكلفة اكبر من الدماء

Iero said...

رسالة قرأتها هي دعوة من تويتر..رجاء الاهتمام والنشر دة مهم عشان الشعب يفهم

الدعوة من حد على تويتر وهي

"RT @AhmdAlish عايزين فى جنازة محمد بكره نجهز لافتات بتصريحات الروينى التحريضية ده هيبقى أهم بلاغ للشعب #mohamedmohsen #Tahrir"

-----------------------

ربنا يرحمك يا محمد وكل شهادئنا وتكونوا في الجنة مع ربنا.. وان شاء الله الشعب المصري هايخد حقكوا ومش هننسى انوكوا ضحتوا بحياتكوا علشانا وعلشان مصر

الشهداء هم روح الثورة التي تجعلها حية مهما حدث ومهما تعرضت للهجوم والتشوية لن تموت لأن شهدائها أحياء عند الله فهكذا ثورتنا وثورة الشهداء

يا رب بارك بلادي

Anonymous said...

يارب صبر أهله،وانتقم من المجرمين..،المصريين يعملوا كذا..،لا حول ولا قوة إلا بالله..

محمد نبيل said...

فعلا الأسرى الاسرائيليين فى حرب اكتوبر اتعاملوا أحسن معاملة ومحدش عمل فيهم اللى هما بيعملوه فينا دة. دول عملولهم رحلات ترفيهية كمان امعانا فى المعاملة الحسنة ! رغم اللى عمله الاسرائيليين فى الأسرى المصريين.

على الأقل ساعتها حتى كنا بنحارب، دلوقتى اسرائيل بتدينا فى جنابنا والجيش المصرى الهمام ما بيحطش منطق. عملوا ايه لما اسرائيل كانت كل شوية بتقتل مجندين ومدنيين مصريين على الحدود ؟

كيوبيد said...

نواره البقاء الله فى اخينا محمد ابن الصعيد الى شرفنى وشرف كل اهل الصعيد وحب اقولك تاره لان تنسه مصر ولان ننسه نحن اهله واصدقاء واحبائه ولكن بهدواء ومن غير عصابيه لان حاليا المواقف فية توتر شديد جدا والمجلس العسكرى عامل يقول بيانات والروينى مره والفنجرى مره والناس فى الشارع مش فاهم فاكرين ان احنا بنغلط فى الجيش الى هو فى نظر الشعب وانا واحد منهم مقدس عايزين يكون فى هدواء اكتر من كده وبلاش تخوين ومزيده على حد لا المجلس هو مبارك ولا احنا عملاء لحد وحقنا هاناخده من الجميع محدش كبير على القانون وان الله وان الية راجعون

Anonymous said...

ربنا يرحمك يا محمد يا صاحب البسمة الجميلة.... وربنا ياخد الروينى فى ستين داهيه

عبد الرحمن سالم said...

ربنا يرحمه يا رب !
متأكد إن ان شاء الله دمه مش هيروح هدر !


http://3een-wants-to-see.blogspot.com/2011/08/blog-post.html

صلاح الدين said...

ذنبه في رقبتك انتي .....محمد والشباب الطيب إلي حرضتوهم على الهبل إلي كنت مخططينله انتي و-6 ابريل وممدوح حمزة.. ذنبه في رقبتك.. إنت السبب في موت إنسان بريء وثق في كلامكم وانتو أكبر مخادعين وميهمكوش إلا مصالحك الشخصية وعداكم للإسلاميين إلي بتقلي عليهم يا محترمة يا متربية بالقوي انهم "ولاد وسخة" .. ذنب الولد دة في رقبتك

صلاح الدين said...

ذنبه في رقبتك انتي .....محمد والشباب الطيب إلي حرضتوهم على الهبل إلي كنت مخططينله انتي و-6 ابريل وممدوح حمزة.. ذنبه في رقبتك.. إنت السبب في موت إنسان بريء وثق في كلامكم وانتو أكبر مخادعين وميهمكوش إلا مصالحك الشخصية وعداكم للإسلاميين إلي بتقلي عليهم يا محترمة يا متربية بالقوي انهم "ولاد وسخة" .. ذنب الولد دة في رقبتك

Tears said...

كلامك ابكانى و صح جدا بس كلمة حق

مجلس مبارك مجرم لكن انتى كمان فى ايدك دم و شاركتى فى الترويج للمجلس و ضللتى الناس كتير -يمكن بدون قصد- بس بسبب كلامك فيه ناس انضرت و ماتت كمان...و انظف ضباط فى الجيش ده اتحبسوا و اللى باقى بتوع التعذيب فى السجن الحربى و بتوع انتو عملا...اللى فاضل عسكر مبارك خدم سفارة اسرائيل

Mahmoud Elzohry said...

مبرووك لمحمد الشهادة وعقبال السامعين بس حق محمد عند مين عند الناس المتهورة اللى محسبهاش ولا عند كبير مروجي الاوشاعات طاب شهداء25 يناير اللي ماتوا في ثورة يناير مع لأعتذار لحمادة هلال حسني مبارك والشلة هما المتهمين طاب اللي قتلوا محمد الواطنين الشرفاء اية اللخبطة دي المهممممممممم حق محمد عند مين دمنا عندنا غالى مش تراب ولازم حقه يرجع مش كفاية ان الناس قربت تكفربالثورة عشان مفيش حاجة اتغيرت كمان ناس تموووت وحقها يروح والسلام وعلى فكرة انتي بميت راجل وربنا يبارك فيكي وياريت رقم تليفونك

مش فاهمه said...

ربنا يرحمه و نحسبه شهيدا باذن الله لكن اسمحى لى يعننى يا نوارة مش منطق لما تقولى ان كان فيه ناس بتشتغل مغاطيس و بتسخنكم و انتم بتسخنوا ليه علشان مافيش قياده لكم و مصرين ماتختاروش ناس منكم تمثلكم الغلطه عند المجلس العسكرى و عندكم الناس فى الشارع مش عارفه ايه المطالب اللى روحتوا بيها للمجلس العسكرى كتيييييييير كانوا فاكرين انكم رايحين تحتلوه و تعلوا منه مجلس رئاسى انتم اللى تختاروه انتى مش بتحبى حد يغلط فى الشعب و اللى هاجوا عليكم دول من الشعب اعترفى يا نوارة فيه خطأ ما لازم يتصلح المشوار لسه طويل و النوايا الحسنه مش كفايه

شمس النهار said...

الله يرحمة
ان شاء الله في الجنة ونعيمها
وربنا يقتص من كل اللي ساهم في قتله
ربنا يصبر قلب اهله
وان شاء الله دمه ودم باقي الشهداء مش هيروح هدر
وابتدينا اول المشوار بالمحاكمات اهو ربنا معانا ويحفظ ثورتنا

Gamal Abdel Hamid said...

محمد 1000رحمة ونور عليك والبقاء لله....ماتنساش يا محمد تبلغ اخواتك اللى فوق اللى سبقوك من فجر الثورة الى الان انك عشت لغاية ماشفت مبارك وعياله وكلابه فى القفص وهما فرجة للعالم و ان ده عمره ماكان هيحصل الا بدمائكم الزكية ....ومزعليش يا نوارةعشان مصر ولادة و عليها الطلق والعادة زى ماقال الفاجومى هيجى محمد تانى وعاشر ومليون عشان يكملوا المسيرة..ونصيحة ماتحوليش تصحى ضمير الروينى لان ضميره مش نايم ده ميت ودم محمد واخواته اللى ف ايده بيعتبره حنة!!!!والخلاصة ان الموت بينقى مابيرمرمش يختار محمد ويسيب المخلوع..سبحان الله ولا اله الا الله

محمد عبدالجواد said...

http://www.facebook.com/profile.php?id=100002552712647#!/photo.php?fbid=240084532689928&set=a.117113531653696.12038.113049222060127&type=1&theater


لو كان عنده احساس ( المواطن الشريف ) بتاع (المجلس العسكري) مكنش مالأول عمل جريمته
وعشان احنا منعرفوش ، لا نملك إلا أن نقول : حسبنا الله ونعم الوكيل
وعلى فكره محمد محسن مش شهيد
محمد سيد الشهداء ، كما قال سيدنا رسول الله ( سيد الشهداء حمزة، ورجل قام عند سلطان جائر فأمره ونهاه فقتله ) فنحسب أن محمد محسن رحمه الله قد حقق ذلك الشرط حيث قال كلمة حق عند سلطان جائر فقتله حسنى مبارك وجلسه العسكري بيد أتباعه
حسبنا الله ونعم الوكيل

ساعي الخير said...

يا نوارة أحسن الله عزاءك

محمد قتلته الفوضي

و ان محدش عارف يميز بين

البلطجي و صاحب الحق

يعني مزيد من التعقل و وضوح الأهداف

هيجنبنا فراق الناس اللي بيعزوا علينا

و علي فكرة محاكمة مبارك و لا ليها

لازمة

لأن القوانين فاسدة و النظام القضائي

فاسد

و اذا كانت القوانين صالحة و النظام القضائي سليم يعني كل واحد سهل ياخد حقه


يبقي لماذا قامت الثورة

يا عاقلين

negmat lail said...

نصيحة لوجه الله ...بدل ما القوى السياسية وكل من هب ودب بيتكلم ويفتي ويغطي على الشهداء ويقلب الموضوع الاصلي لموضوعات وصراعات اخرى ويتنسى اصل الحكاية ..النصيحة انك تركزي في البرنامج والجرنال واي حاجة تطلعي تتكلمي فيها وتطوري البرنامج عشان اكبر عدد ممكن من الناس يشوفوه وياثر فيهم ويعرف اللي ما يعرفش بالحقيقة .. مش كفاية تكوني في وسط اهالي الشهداء والناس حواليكي من غير ما يمتد التاثير للناس كلها.. مش كفاية تكوني وسط المعتصمين ..طيب كنتي تستغلي وجودك بينهم وتمشي وسطهم وتصوريهم بسرعة من غير كلام كتير كل واحد يقول كلمتين ونص يعرف الناس باصل الحكاية لو كنتي عملتي كده كان حايكون احسن من الكتابة لوحدها وساعتها كان الناس حتشوف معاكي اللي كان عامل معتصم ولبس ميري.. والبرنامج اللي بتقولي محدش بيتفرج عليه ..لأ فيه ناس يتستناه بس محتاج نوارة تظهر فيه اكتر ويتظبط البرنامج اكتر..ده واجب عليكي ..ما تسيبيش الساحة لمن لا يستحق ..عشان ما نشتكيش بعد كده ونندم..بس خير ان شاء الله

hardway said...

أنت فيـن ؟؟؟؟؟؟
تشييع الجنازة خلص من بدري..
أنت فين؟
طبعا قاعدة تحومي حوالين الميدان..نفسك تدخلي..وتنصبي خيام اللاجئين..
لف ودوران حوالين الميدان ..لكن مفيش فايدة يا نرنر
عودي الي بيتك وهدي سر...الم تكتفي بمن استشهد حتي الان...؟؟؟؟؟؟؟؟؟؟؟؟؟؟

ماجد الجلاد said...

هو ليه معظم الشهداء روحهم حلوه وابتسامتهم بتملى وشهم
سبحانك يا رب بتختار اجمل ما فينا يمكن نحس على دمنا ونواصل ثورتنا ضد القهر والخيانة وضد كل المخنثين الساجدين للعسكر والمنصب والكراسى

مش عارف ليه يا نواره بتنشرى تعليقات الشواذ دول اللى تفور الدم

هتلاقى هنا صور لشهداء سوريا بيبتسموا فى وجه القدر تماما كمحمد
http://teain50.blogspot.com/

دمتى بخير ودمتى ثائرة يا بنت الراجل اللى عمره ما خاف ولا طاطى

شمس النهار said...

يا محمد ياشهيد اكيد انت في دار الحق الان وعرفت الحقيقة كلها وعرفت ان من قام بما حدث في 25 يناير خونة وعملاء وعرفت مين السبب في موتك وعرفت حقيقة نوارة نم ياشهيد وثق ان المصريين الشرفاء لن يتركوا مصر للخونة والاشرار من امثال نوارة

متفائل said...

انا بس عايز اقولك ان فى كلام ابتدى ينتشر ان جنرال من الجيش بيقود انقلاب ضد المشير وعايز يعمل نفس الى عمله عبدالناصر فى انقلابه على نجيب والغاء الديموقراطيه

يا أخ عبد الحميد من سينقلب على الديموقراطية ويلغيها ليس هذا الجنرال المزعوم .. بل من يرفضون وثيقة المباديء فوق الدستورية التي أصدرها الجيش

Mansour Elsayeh said...

نوارة أنا بكلمك على تويتر مبتدرديش.. أنا اسمي منصور ابن عمة الشهيد محمد محسن .. عايزك تساعدينا في تصعيد إعلامي .. عشان في ضغط على أبوه إن ميجيبش سيرة المجلس العسكري في وسائل الإعلام .. أرجوكي رقمي 0177824053
masour.elsayeh@gmail.com

deweyes said...

"نحن قوم أعزنا الله بالإسلام فإن ابتغينا العزة بغيره أذلنا الله "
ارجعوا لربكم.. ادعوا ربكم.. طبقوا شرع ربكم.. وهتنتصروا
انما طول ما المعركه مالهاش علاقه بالإسلام يبقى على مصر السلام
الله يرحم شهداءنا.. وينتقم من الظلمه.. ويهلك اللي بيضربوا شبابنا.. ويفضح الخونه المنافقين.. يارب عليك بهم.. يارب انصر المسلمين المستضعفين في مصر وفي كل مكان

mutargim said...

http://al-agenda.blogspot.com/2011/08/blog-post_05.html

ِأحمد عربي said...

محمد دفناه امبارح في اسوان يا نواره وانتي افتكرتيه دلوقتي وهو شهيد انا بعتلك ع تويتر لما كان مصاب ومعبرتنيش شكرا يا نواره

مشروع دكتور said...

على فكره ياعم صلاح الدين
محمد محسن كان متوقع يبقى فى بلطجيه هناك وقالها من الاول لما صحابه بيهزوا من ضحك قالهم وهو فى احسن من دى موته قالها ومش كان متوقع انها بسرعه هتتحقق على بعد ساعات
فاحترم نفسك انت: 6 ابريل ونواره مش هما اللى رموا الحجر فوق راسه
ومش هما اللى حرضوا الناس والبلطجيه جموعها عشان تنزل ضرب فى المتظاهرين
وعندك كلمه حق تقولها اتفضل مش عندك ياريت تركن على جنب عشان امثال حزب ملقى الاتهامات بتاعكوا هو اللى جايبنا ورا وبيخلى الشباب يقع ودمه يبقى ميه فى الاخر

مشروع دكتور said...

الا هو انت صحيح ياصلاح الدين محروق لمحمد محسن اوى
ولا محروق للشتميه فى الاسلاميين
كاتكم القرف

Unknown said...

إنه منطق الطغاة في كل زمان.. كقول معاوية في مقتل عمار بن ياسر: إنما قتله من أخرجه..

mahmoud said...

احنا فعلا في احتلال ومستمر ومجرمين الداخلية مش حيتحاسبوا وبالمناسبة محدش حيتعدم وقضية اللواء البطران اطرمخت ومش حيتحقق فيها العدل لازم تعرفوا النتيجة دي من دلوقت توفير للوقت وتصرفات المجلس العسكري هي نسخة من مباركفي التعذيب والوحشية واهدار كرامة المصريين والبيانات كلام علي ورق زي مبارك شغل يهود واللي مش شايف يبقي اعمي لو قتلة البطران اتعدموا يبقي فيه امل في العدالة عرفتي بقي احنا قد ايه بعاد عنها المحاكمات لكسب الوقت وكل الاحتمالات مطروحة للي بيدبروه بس ان شاء الله ربنا حيخزيهم

mahmoud said...

الله يرحمك ياشهيد الكرامة وعلي تحقيق العدل والكرامة والحرية رايحيين شهداء بالملايين ده الهتاف وربنا نور بصيرتنا والظلمة ليهم يوم قريب ان شاء الله

شمس النهار said...

في واحد عامل اكونت زي الاكونت بتاعي وعمال يعلق عند المدونين بأفكار غير افكاري خاااااااالص
وبيشتم فينا وفي الثورة
هيستفيد ايه الله اعلم
مش هقول غير ربنا يهديه

مخلاة said...

ده تليفوني 0111385074 وده حسابي ع الفيس yasserbattikh@yahoo.com
وده حسابي على تويتر battikh
ومستني تنشري تعليقي على حكاية محمد حسن اللي بتهمك فيها بالكدب، بعتنالكم يا تجار الشهداء ولا حد فيكم رد، حاولنا نكلمكم كبرتم علينا

محمد شحاتة said...

Mohammad Shehatah Akira عندما تصاب فيتهرب منك الكثير لان مشكلتك مع المجلس العسكرى وهتخسر شعبية بدون داعى ثم عندما يتوفاك الله يصبح دمك مغنما وربحا فيتهافتك الكل مطالبا بحقك عندها هتففهم ما حصل مع محمد محسن ولما لم تسمعوا عنه فىوسائل الاعلام وحملات المرشحين والجروبات الكبيرة والثوريين بالبق داحنا كنا بنشحت خبر على محمد وهومصاب لم نجد الاهتمام إلا بعد وفاتة

محمد شحاتة said...

Mohammad Shehatah Akira عندما تصاب فيتهرب منك الكثير لان مشكلتك مع المجلس العسكرى وهتخسر شعبية بدون داعى ثم عندما يتوفاك الله يصبح دمك مغنما وربحا فيتهافتك الكل مطالبا بحقك عندها هتففهم ما حصل مع محمد محسن ولما لم تسمعوا عنه فىوسائل الاعلام وحملات المرشحين والجروبات الكبيرة والثوريين بالبق داحنا كنا بنشحت خبر على محمد وهومصاب لم نجد الاهتمام إلا بعد وفاتة

فافى said...

http://www.nytimes.com/2011/04/15/world/15aid.html?_r=1&scp=1&sq=6+april+movement&st=cse
يبقى الكلام ده مضبوط بقى يا نواره مستنوش ل6 اكتوبر بصى يا نواره بصفتى انا بنت من شعب مصر عايزه تعرف الحقيقه وبتحب بلدها بكلفك انك لازم تعملى اى حاجه توقفى التهريج ده وتدورى على حقيقة 6 ابر يل انا عارفه انك جدعه وبنت بلد لازم نفهم مين عدونا ارجوكى دورى على مدى صحة الكلام ده وقولى لى انا عارفه انك مش زيهم انا بختلف صحيح معاكى كتير فى اسلوبك لكن بالرغم من كده لما بكون عايزه اعرف الحقيقه بفتح مدونتك واقراها,وحياة مصر يا نواره فهمينى فى حاجه اسمها فريدوم هاوس فعلا وفى ناس اتدربت وعايزه تركب على الثوره؟انتى مطالبه تفهمينى لو سمحتى

فافى said...

ممكن تردى على الكومنت بتاعى مش معقول مش شفتيه يعنى؟