شرف الاخوان زي عود الكبريت

هم الاخوان المسلمين بيلعبوا مع السلفيين ليه؟ والموضوع ابتدا يتطور وبقوا يلعبوا عروسة وعريس قدامنا لما حياءنا اتخدش

احنا مش قلنا كخ كده كخ؟

حتندموا ندامة الكسعي لما غدت منه مطلقة النوار

فيه اخطار واضرار كخ كخ كخ

1- الاخوان عاملين زي النشافة، لما بيلزقوا في حد بيطبع عليهم ويبقوا شبهه، وفي الحالة دي الوسطية اللي بيتكلموا عنها، وهي مكسبهم الوحيد قصاد السلفية، حيخسروها

2- اذا لم يتماهى الاخوان مع السلفية الناس طبيعي حتروح للاكثر راديكالية عشان هي دي بقى الثورية والاخوان حيضطروا يزايدوا في الراديكالية عشان يكسبوا مقاعد في البرلمان، دلوقت السلفيين محتاجين عدد الاخوان، بس لو فضل الاخوان يدعموا الخطاب السلفي، في البرلمان السلفيين حيبقى لهم اليد العليا ويبقوا يقابلوني بقى ساعتها لو عرفوا يسيطروا عليهم، ويخرجوا من ذل مبارك يخشوا على ذل السلفيين، والسلفيين حيحسوا بالخطر من الاخوان فحيتغدوا بيهم قبل ما الاخوان يتعشوا بيهم

3- انتوا بتئذوا السلفيين كده، وبتدعموا الخطاب الاعلامي الناري ضدهم، السلفيين لما بطنهم بتتملي بيتكرعوا تكريعة تجيب لآخر الشارع، ولما حيلاقوا عدد الاخوان وراهم ودنهم حتتخن واهم راحوا يتهجموا على الكاتدرائية امبارح، ويقول لك احنا ما مارسناش عنف، مع ان فعل التظاهر قدام دار عبادة للترويع ده في حد ذاته عنف، واذا كانوا ما عندهمش تقدير سليم لما هو عنيف وما هو غير عنيف، يبقى التطور الطبيعي للحاجة الساقعة حيبقى خارج سيطرة الاخوان... انتوا ما بتتعلموش؟ مش كفاية اللي حصل مع الجهاد؟

4- وبتئذوا نفسكم كمان، دي اول تجربة لكم وانتوا مش محظورة، ولما الناس تشوفكم اول ما خرجتم من اطار المحظورة لاطار اللا محظورة بتتحالفوا مع ناس بتتظاهر قدام الكاتدرائية يبقى بتدعموا كل خطاب مبارك اللي كان ضدكم طول تلاتين سنة، واول حاجة الناس حيقولوها: اهم بانوا على حقيقتهم اهم.. لا وسطيين ولا نيلة

5- لون السلفية مش لايق عليكم.. السلفية بيليق عليها الوان تانية، وغالبا بيبقوا احسن لما بيبقوا لوحدهم كده، ادوهم للجيش واتحالفوا انتوا مع حد تبانوا جنبه انكم ناس طيبة ومتسامحة وكل المخاوف اللي كان بيبثها مبارك ضدكم طلعت كدب

ولما باقول ادوهم للجيش انا مش باهزر، هم لازم يتحركوا في اطار قيادة، وقيادة حكومي كده، غير كده عيارهم بيفلت، ولما عيارهم بيفلت بيجيبوا ضرف اللي هم متحالفين معاه قبل ما يجيبوا ضرف نفسهم

انتوا بتليقوا على اليساريين، بيخلوكوا تتكلموا في قضايا كويسة وقريبة من الناس، وبتقدموا خطاب مجتمعي كويس، واليساريين بيكسبوا ان قضيتهم بتتروج، وانتوا بتكسبوا ان شكلكم بيبقى حلو

اديني جبت لكم من الآخر اهو، وبمنتهى الوضوح والصراحة عشان انا ما احبلكمش الاذية

برضه كنتوا جدعان في الميدان

والله الموفق