Thursday, 31 January 2008

أحدث قصائد أحمد فؤاد نجم بجد


وأحب أنوه إن آخر قصيدة لنجم قبل القصيدة دي هي "عريس الدولة" مافيش بعدها حاجة لا نظرا ولا يا شعبي ولا طاطي ولا اي حاجة من دي

القصيدة دي بابا لسة ممليها لي على التليفون وهو لسة كاتبها النهاردة الصبح بدري إوإليكم القصيدة:

غنوة جديدة لغزة

شي لله يا لغزاوية

يا وجع الأمة العربية

لا انتوا حماس ولا عباس

فلسطين هي القضية

شي لله يا لغزاوية

شي لله وعلى دلعونة

حكمونا ولاد الملعونة

والآخر خانم وباعونا

للسمسار والصهيونية

شي لله يا لغزاوية

شي لله وانتوا لوحديكوا

الله ينصركوا ويهديكوا

ويدمر دولة أعاديكوا

والأيام أهي رايحة وجاية

شي لله يا لغزاوية

شي لله ولا عادش رجوع

ويّا الخاين والجربوع

الأطفال ماتت م الجوع

والعطشان مش لاقي المية

شي لله يا لغزاوية

شي لله على أحلى كلام

ناس تصحى والأمة تنام

يعني قفاك يصبح قدام

يا لعربي وتركب عربية

شي لله يا لغزاوية

أحمد فؤاد نجم

31/1/2008



Tuesday, 29 January 2008

قبول الطعن في قضية البهائيين ورفض قضية محمد حجازي

اولا الحمد لله طعن البهائيين اتقبل واتقبل انه يتكتب في البطاقة وشهادة الميلاد امام خانة الديانة فراغ او شرطة
اما محمد حجازي فالقاضي قال هو عايز يبقى مسيحي هو حر بس ده مايتكتبش في البطاقة!!!!!!!!! مش فاهمة ازاي؟ ده واحد مسيحي يتكتب مسلم ازاي؟
عمرو عزت مرة سأل سؤال ماحدش جاوب عليه: هو الاسلام عقوبة؟
صحيح الاسلام عقوبة وللا شرف؟
المفروض ان الواحد يتشرف بانه مسلم مش يبقى مغصوب عليه؟
يعني هم شايفين انه بما انه ارتد عن الاسلام فاحسن عقوبة له انه يتكتب مسلم؟
يعمل لجوء بقى ويمشي برة البلد احسن
بس خبر قضية البهائيين خبر كويس
طيب والنبي انا عايزة اعرف اشمعنى قبل الطعن بتاع البهائيين وما قبلش قضية محمد حجازي؟ ما هي هي
وللا هو مسترخم محمد حجازي مثلا؟

Monday, 28 January 2008

شوية اسئلة رجالي

الاسئلة دي خاصة بالرجالة المصريين لاني ما اعرفش بقية الرجالة في العالم عاملين ازاي. وزي ما قلت في الجزء الاول مش كل الستات كده، فبرضه مش كل الرجالة المصريين كده لكن على الاقل معظم اللي شفتهم في حياتي كده

اولا: ليه بتفرح لما حد بيقول الرجل طفل كبير؟ بقى بذمتك مش مكسوف لما تبقى شحط خنشور قد الباب صوتك يفزع الميتين وتقول لخطيبتك او مراتك عامليني زي الطفل؟ طيب يا سخطة اقعد جنب مامي يا ننوس عين مامي لحد ما تكبر وتبقى راجل

ثانيا: انت ليه متصور ان شغلتك في الدنيا انك تبصبص للبنات؟ ولو ما عملتش كده يتهيألك انك اقل من صحابك؟ مش حرام عليك؟

ثالثا: ليه لما تبقى مؤدب ومتربي ومش صايع وعمرك ما جربت المخدرات ولا عملت حاجة حرام تبقى مكسوف من نفسك وتمعر على صحابك وتحكي عن تجارب عمرك في حياتك ما عملتها؟ هو مين اللي مفروض يتكسف اللي بيعمل حاجة غلط وللا اللي بيعمل حاجة صح؟

رابعا: انت ليه متأثر بالافلام المصرية الفاشلة؟ يعني بتعتبر ان قصة الحب هي الفيلم والجواز هو نهاية الفيلم، خلاص بقى، ضحكنا كتير هزرنا كتير قلنا كلام حلو كتير واتجوزنا...مش ح نقضي العمر كله في الكلام الفارغ ده ورانا مهمات عظام: ورانا ننكد على ام الولية دي، ونكشر في وشها، ونكبتها، ونقرفها، ونحطم معناوياتها، ونتفرج على الماتش، ونقعد مع صحابنا في القهوة...ونعاكس ستات تانية بقى..هو انا ح اعاكس مراتي؟

خامسا: ليه بتتعامل مع الستات على انهم سؤال في امتحان: جاوبنا السؤال ده واتجوزناه نجاوب على السؤال التاني بقى؟ من غير جواز طبعا عشان مش عايزين مشاكل...بس لو ينفع في السر يبقى خير، ومش مهم مراتك تبقى قاعدة زي القرطاس في البيت ومش مهم التانية تبقى بتعاملها على انها عشيقة وهي زوجة...ليه تدفع اكتر لما ممكن تدفع اقل؟

سادسا: لما مراتك بتكلمك وانت بتاكل او بتتفرج على الماتش مش بترد ليه؟ ما هو يا اما سامعها ومطنش وده معناه انك قليل الذوق يا اما مش سامعها تبقى ندهتك النداهة يا عبد الرحيم

سابعا: ليه بتتهم مراتك بالتفاهة عشان بتكلمك عن مشاعرها والحاجات اللي تاعباها في حياتها؟ وهو الكلام مع صحابك عن ابو تريكة وحسني عبد ربه مش تفاهة؟ والكلام عن احدث عربية نزلت مش تفاهة؟ (نفسي اعرف سر ولع الرجالة بالعربيات) وكلامك مع صحابك عن كذا كذا وانت فاهم انا اقصد ايه وربنا حليم ستار مش تفاهة؟ يعني انت بتقعد على القهوة تحل قضية فلسطين يا خي؟

ثامنا: ليه بتستسهل تخوض في عرض نوعين من الستات: واحدة عاجبك ومش مدياك ريق وواحدة كان بينك وبينها علاقة وسبتها وغالبا بتبقى ظلمتها؟ الاولانية مالهاش ذنب ان ربنا خلقها حلوة وعجبتك والحب مش بالعافية يا اخي، والتانية اي كلام ح تقوله على اخلاقها ح ينطبق عليك بالظبط لانك شريكها في كل حاجة، وللا انت فاكر نفسك معمل لاختبار اخلاق النساء؟

تاسعا: ليه بتعرف تخلي الستات تحبك ومش بتعرف تحتفظ بحبهم؟ وللا انت مش عارفة ان اغلبية الستات عايشين عشان الولاد وعشان مش عايزين طلاق ووجع دماغ وانها ما بقتش تحبك خلاص؟ شكلك ايه قدام نفسك؟

عاشرا: ليه متصور انك مهما تهمل في مراتك ح ترجع تلاقيها بحطة ايدك؟ ما تقوليش انا مراتي ست اخلاقها زي الفل وانا منقيها على الفرازة...ما تنساش ان فيه صحابية زنت ايام الرسول،
ح يجرا لك ايه يا اخي لما تقول كلمة حلوة وللا طبطبة وللا شكرا وللا تسلم ايدك وللا تعبتك معايا وللا ايه الشياكة دي وللا تجيب لها هدية حلوة من غير مناسبة وللا تنشر كام حتة غسيل وللا تقعد مع العيال ساعة وللا لما توصل الشغل تتصل بيها تطمن عليها وللا قبل ما تنزل من الشغل تتصل تقول لها مش عايزة حاجة وللا تغسل كام طبق وترحمها من الساقية اللي هي بتدور فيها يا اخي انت ايه جبلة؟
ده انت لو جايب جاموسة في البيت كانت بركت منك، ح يجرا لك ايه لو تقعد تسمعها شوية وللا تسألها عملتي ايه في الشغل النهاردة وللا تقول لها نكتة لطيفة تضحكها وللا تضحك على استظرافها حتى لو كان بايخ، وللا تقول لها بحبك؟ يعني راح فين الكلام اللي كنت بتقوله ايام الخطوبة؟ ليه تعطشها لحد ما تكتئب وتتخن وتفشكل وتبوز وترجع تزعل وتروح تبص برة؟ حتى اشتري نفسك من نكدها يا اخي بكام كلمة حلوة، مين قال لك انك لما تفضل تعاملها كده مش ح تنفجر في وشك وتلبسك حلة فيها الاكل بيغلي زي واحدة فعلا عملت كده؟ مين قال لك انها وانت راميها زي الكرسي في البيت مش ممكن تضعف، مهما كانت اخلاقها ودينها، قدام كلام معسول لراجل شايف فيها الاكتئاب وعايز يقرصن عليها؟ مين قال لك انها اصلا ما ضعفتش من وراك ورجعت عشان العيال وانت ولا دريان عشان بتتفرج على الماتش وبتلعب طاولة على القهوة وبتتكلم عن العربيات ورجلين الستات اللي في الشارع مع صحابك وعن احدث صنف من الادوية اياها؟

الا انت ليه بتاخد الادوية دي بالطريقة الجنونية دي؟ انت فاكرها بونبوني؟ يابني ادم فيه حاجة اسمها مشاعر واحاسيس مش كل مخك في كده يا اخي بقىىىىىىىى

حادي عشر: انت ليه بتتهرب من مواجهة اخطاءك؟ ليه مش حسيس كده ولما تغلط تعرف من نفسك انك جرحت اللي قدامك ليه تضطرها تبوز في وشك وياريتك بتعترف بغلطك الا بتعمل بهلول وتفضل تقول لها مالك مالك؟ انت بتستعبط ما انت عارف انت عامل ايه؟ وليه لما بتسعبط لحد ما تضطرها تواجهك وتفرقع في وشك تبجح وتهبل عشان تغطي على غلطك؟ انت مش شايف انك كبرت على التصرفات دي؟ انت راجل..رااااجل...راااااااااااااااجل
من الرجولة انك لما تغلط تقول انا اسف وما تكررش غلطك

ثاني عشر: ليه لما بتقابل ست مخها على قدها بتتريق عليها ولما تقابل ست ذكية تبقى بتهري وتنكت في نفسك وكل املك انك تصطاد لها غلطة عشان تسفهها؟

ثالث عشر: ليه لما بتقابل ست ضعيفة بتديها على قفاها ولما بتقابل ست قوية تحطها في دماغك وراسك والف جزمة قديمة لتجيب مناخيرها الارض؟

رابع عشر: ليه يا موكوس تبقى معيوب وحالك بالبلا والبلا لاحقك وتتشرط وانت بتخطب وفاكر نفسك بباطك اللي والنجم ومناخيرك المعووجة من حقك تتجوز واحدة شبه نانسي عجرم في الشكل وزي رابعة العدوية في الاخلاق؟ مش تبص لسنك وظروفك وامكانياتك قبل ما تقعد على البساط وتاخد ست البنات؟ ماما اللي قالت لك كده صح؟

خامس عشر: مين اللي فهمك انك اكيد بتفهم احسن من كل الستات وان كلامك درر وحكم؟ ماما صح؟

سادس عشر: مين اللي قال لك ان الراجل ما يعيبوش حاجة ابدا لا سن ولا ظرف اجتماعي ولا فلوس ولا اي حاجة ده انت اي بنت تتمناك؟ ماما صح؟ (مرة جبت عروسة لواحد كان عنده اربعين سنة ومطلق وهي كان عندها واحد وتلاتين سنة انسة وبالرغم اني كنت مستخسراها فيها الا ان هو اللي رفض وقال لي كبيرة!!!!! مع انه كان اقرع وبكرش)
سابع عشر: انت ليه اناني ومش بتفكر غير في نفسك وراحتك ومزاجك وبس؟ ماما هي اللي خلتك كده صح؟ كنت بترجع ترمي الهدوم وماما تقول لك اتعشيت تقول لها عندك ايه تقول لك مكرونة وفراخ بانيه فتلوي شفتك وتقول لها خلاص انا مش جعان فتقول لك طيب احمر لك بطاطس؟ اعمل لك سندوتش؟ اطلب لك من السوبر ماركت لانشون؟ اعملك لك بيتزا (الساعة اتناشر بالليل عايزة تعمل له بيتزا)؟ ولما تبقى بتذاكر انت واختك تقول لها قومي اعملي لاخوكي شاي...صح؟ بس دي ماما يا حبيب ماما...مش مطلوب من مراتك انها تقوم بنفس الدور...عشان انت كبرت خلاص بص في المراية يا سكمنس..او اقول لك سجل صوتك على كاسيت، بقى ده صوت عيل ده؟

ثامن عشر: انت ليه لما بتخطب واحدة اول حاجة بتقولها: انا يهمني في الانسانة اللي ح اتجوزها انها تكون كذا كذا وانا باحب كذا وباكره كذا...وعمرك ما بتسألها انت عايزة ايه ولا بتحبي ايه ولا بتكرهي ايه؟ ومين فهمك انك عملت فيها جميلة انك اتجوزتها وان مهمتها الاولى والاخيرة انها تحافظ على النعمة اللي هي سيادتك؟ ماما صح؟

تاسع عشر: انت ليه رغم انك عارف واجباتك كلها الا انك بتطنش عليها لحد ما مراتك تتخانق معاك عشان تعملها؟ مين اللي عودك انك ما تعملش الواجب غير لما تتهدد؟ ماما صح؟

عشرين: انت ليه بتعمل بالونات اختبار مع مراتك؟ ليه تجرب تتغدى برا مثلا عشان تشوف ح تعمل ايه لو سكتت يبقى بكرة تتغدى وتتعشى برة لو اتخانقت يبقى تاخدها من قصيرها وتشوف ممكن تخطط لها في ايه تاني؟ ليه طول الوقت محسس مراتك انها كل يوم لازم تصحى تتنمر لك عشان انت دايما ناوي لها على نية سودا؟ وليه مش بتيجي دوغري وتقول لها انا عايز اتغدى برة النهاردة؟ مين اللي عودك على المرواغة عشان تاخد حاجة انت عايزها؟ ماما صح؟

طيب ممكن تسيب كلام ماما شوية لو سمحت وتبص لي هنا؟
عشان بس تبقى فاهم عاطفة الامومة بتشتغل ازاي، الامومة بترتبط بتغيرات كميائية في الجسم والمخ بتغير الشخصية، فيه حاجة اسمها اكتئاب حمل، وفيه حاجة اسمها رهاب حمل، وفيه حاجة اسمها رهاب ولادة وفيه حاجة اسمها ذهان ما بعد الولادة واكتئاب ما بعد الولادة وهيستيريا ما بعد الولادة، وتطلب زي ما تطلب بقى، فيه ام تلاقيها اول شهر خايفة على ابنها بشكل مرضي، فيه واحدة تبقى خايفة من ابنها نفسه، فيه واحدة يجيلها ضلالات فيه واحدة تبقى خايفة السقف يقع على ابنها فيه واحدة يتهيالها ان جوزها عايز يخطف الواد فيه واحدة تقعد تعيط من غير سبب وهكذا
يعني باختصار عاطفة الامومة مرتبطة من بدايتها بالجنان
تقدر تقول وانت مرتاح بشكل عام الامومة هي عبارة عن واحدة مهبوشة بتشوف في ابنها او بنتها حاجات مش موجودة وخنفسة شافت ولادها على الحيط قالت لولي في خيط
ده غير شوية ظروف اجتماعية خلت ماما تعمل حاجات غلط في التربية وماما كبرت دلوقت وما يصحش نحاكمها ونقول لها ربيتي الرجالة غلط، واحنا دلوقت بقينا كبار وعاقلين والمفروض اننا نبوس ايد ماما ونحاول اي حاجة غلط فينا نصلحها صح؟
وللا انت ح تفضل سخطة كده على طول؟ عايز تفضل سخطة يبقى تتعامل كسخطة وما تعمليش راجل بقى

واحد وعشرين: ليه بتحب تاخد كل حاجة وما تدفعش تمن حاجة؟

اتنين وعشرين: انت ليه بتحب تستغبى وتستهبل نفسك؟ ليه بتسأل البنت اللي ح ترتبط بيها انت حبيتي قبلي وللا لا وانت عارف ومتأكد انها ح تكدب عليك؟ ليه لما مراتك تقول لك رأي فتسفهها وتقول لها: اسكتي انت مش فاهمة حاجة انا ح اقول لك بقى الكلام المظبوط وتروح عايد الكلام اللي هي لسة قايلاهولك تقوم هي تضحك عليك وتقول لك: تصدق معاك حق فعلا انا ما كنتش واخدة بالي خالص...عشان لو قالت لك يا اهبل ما انا قلت لك كده ح تزعل فلازم تحسسك انك جايب التايهة وانت عارف انك لا جبت ولا وديت..هو انت اهبل بجد؟

تلاتة وعشرين: ليه تفضل تجري ورا واحدة وتمشي تكلم نفسك طول ماهي دلقاك واول ما تحبك تعمل فيها هيركليز وتديها على دماغها؟ وليه ما بتحسش بقيمة اللي في ايدك غير لما يروح منك؟

اربعة وعشرين: ليه بتحب تشيع وسط الناس ان مراتك بتغير عليك مع ان انت اللي بتتصرف تصرفات تشككها فيك...وبعدين تمشي تشتكي قال يعني متضايق؟

خمسة وعشرين: عارف حجم الالم والاسى وعمق الجرح اللي بتسببه لمراتك لما تقارنها بست تانية؟ حتى لو بصيت في التلفزيون وقلت لها شايفة الستات؟ جتنا نيلة في حظنا الهباب...عارف؟ عمرها ما بتنسى الكلام ده لحد ما تموت، وعمرها ما بتسامحك حتى لو كدبت عليك وقالت لك انها مسامحاك.
ستة وعشرين: انت ليه لما بتشوف واحدة لابسة محزق وللا قصير وعينك ح تطلع عليها طول ما انت باصص لها تفضل تشتم فيها وتقول عليها: سفالة...انحطاط...حقارة..ماهو يا اما هي سافلة ومنحطة يبقى لو سمحت دور وشك يا اما المزة عاجباك اتفرج وانت ساكت
سبعة وعشرين: هي ايه حكاية فرحك بكلمة: الست بتتحكم فيها العواطف...الست عاطفية بطبعها انما الراجل لا...هو انت الابعد فرحان ان الناس بتقول عليك حلوف وما عندكش دم ولا احساس؟ مين اللي قال لك ان الراجل المفروض يبقى من غير عواطف؟
والله العظيم انا مقدرة الازمة النفسية اللي اتسببت فيها ماما لما جيت تعيط وانت عندك خمس سنين فقالت لك: وبعدييييييييين الراجل ما يعيطش
بس احنا اتفقنا انك كبرت بقى
واحب اقول لك ان العاطفة هي ارقى حاجة عند الانسان والمفروض انها في الراجل والست، وانها هي اللي بتخلي البني ادم عنده انسانية ورحمة وعدالة وانها ارقى من التفكير المجرد لان الكمبيوتر بيفكر تفكير مجرد لكن الانسان هو اللي عنده عواطف
وبعدين بقى الست بتفكر بعواطفها...طب والراجل بيفكر بايه؟
تحب اقول لك ايه وللا مافيش داعي نقبح؟
على فكرة ابقى خلي بالك لما تبقى مريل على واحدة عشان شكلك بيبقى باين قوي...وباااااااااييييييييييييييخ
امسك نفسك شوية

تمانية وعشرين: انت ليه وانت داخل البيت مش بتبص في وش مراتك اصلا؟ وترجع تقول مش مهتمة بنفسها؟ طيب ما انت مش شايفها خالص سواء اهتمت وللا ما اهتمتش انت مش فارق معاك، وليه مكشر في وشها؟
ما تقوليش راجع من الشغل تعبان..انت بتقعد في الشغل تضحك مع دي وتهزر مع دي وتعاكس دي وتتكلم مع دي وتسمع مشاكل دي...كل دول ستات ومراتك هي اللي بدقن وشنب؟
====
اخيرا : ايه حكاية تعدد الزوجات اللي انتوا كلكوا ماسكين لي فيها؟ مش لما تعدل مع واحدة تبقى تفكر في التانية؟ وبعدين هو انت مش طفل يا بطة؟ ومراتك هي الام يا صغنن؟ فيه عيل يبقى عنده 2 وللا 3 وللا 4 ماما؟
ملحوظة: انت ليه متضايق من الكلام ده؟ طب سد سد

عاجل: القبض على هويدا طه

يادي النكد اللي ع الصبح...جاني الميل ده من احمد حلمي
فى الذكرى السنوية الأولى للقبض على هويدا طه المعدة بقناة الجزيرة بمناسبة برنامجها " وراء الشمس " .. قامت الشرطة المصرية صباح اليوم بالقبض على هويدا طه للمرة الثانية وذلك أثناء قيامها بتصوير أحد برامجها بنطقة إمبابة بالقاهرة .. ورغم أن هويدا حصلت على تصريح مسبق بالتصوير من الرقابة على المصنفات إلا أن الشرطة أدعت عدم علمها بذلك وقامت بالقاء القبض عليها أثناء قيامها بالتصوير . وحتى هذه الساعة لازالت هويدا طه محتجزة بقسم شرطة إمبابة . وقد توجه لها عدد من المحامين .. وجارى متابعة الموقف .

مركز الحرية للحقوق السياسية
ودعم الديمقراطية
http://freedomcenter.blogspot.com/

انضم الى المقاومة




اضغط على الصورة عشان تعرف ح تعمل ايه

Sunday, 27 January 2008

شوية اسئلة حريمي

هو انا واحدة ست ومكتوبة في البطاقة انثي بس بجد فيه حاجات في الستات بتثير تساؤلي وببقى مش فاهمة هم بيعملوا كده ليه
مش كل الستات طبعا انا اعرف ستات مش بيعملوا التصرفات الغريبة دي بس معظم الستات بتعمل الحاجات دي
اولا: ممكن افهم ليه الستات بتفرح لما راجل بيقول لها انت حلوة؟ هو انت البعيدة ما عندكوش مريات في بيتكوا تعرفي منها اذا كنتي حلوة وللا مش حلوة؟
انا اعرف واحدة هي حلوة وامورة وكل حاجة، بس لو قعدت نص ساعة من غير ما راجل يعاكسها تدخل الحمام تشلفط وشها بالوان كتير قوي وتيجي تاني يوم صابغة شعرها بلون جديد، طيب يعني دول زمايلنا في الشغل، يعني اول يوم ح يقول لك انت حلوة، تاني يوم، تالت شهر لكن مش معقول على مدى اربع خمس سنين يقعد كل يوم يقول لك انت حلوة ده حتى تبقى مسخت قوي
ثانيا: ممكن اعرف لما جوزك وللا خطيبك وللا حبيبك بيخونك او يسيبك عشان واحدة تانية، ممكن اعرف بتكرهيها هي ليه وتصبي جام غضبك عليها وتتندري بيها في المحافل الدولية وتنزلي فيها شتيمة بينما ما تجيبيش سيرته هو باي حاجة وحشة مع انه هو اللي خانك مش هي؟ ولو رجع لك بتسامحيه وبرضه تفضلي تشتمي فيها هي وما تسيبيش مخلوق الا لما تقولي له انها كذا وكذا وكذا ومعظمها في منطقة الاعراض على رأي كريم عبد العزيز، ليه؟ لييييييييييييه؟
طيب هو لما بيرجع لك وطبعا اول سؤال بتسأليه: وهي فيها ايه زيادة عني؟ هو اكيد بما انه عايز يرجع مش ح يقول لك هي احلى ولا اظرف ولا اذكى ولا بارتاح معاها في الكلام ولا حبيتها ولا اي حاجة من دي عشان هو مش عايز مشاكل، فطبعا يقول لك: والله دي ضحكت عليا واكلت دماغي وورطتني ولقحت جتتها عليا وخلافه
طب انت البعيدة ما عندكيش مخ؟ ما عندكيش عنين تشوفي بيها هي متميزة عنك في ايه؟ ما عندكيش قدرة تميزي بيها انه هو اللي طفس وعينه فارغة مثلا؟
بصراحة الرجالة في النقطة دي اعقل، لانه بيصب جام غضبه وانتقامه على الست اللي خانته مش على الراجل التاني
ثالثا: ممكن اعرف لما بتدي البوز المتين وهو يقعد ساعة يسألك مالك ما بتقوليش مالك ليه؟ طيب بوزتي عشان زعلانة حقك، طيب مش تقولي زعلانة من ايه وللا ح تفضلي مبوزة كده وهو يضرب الودع عشان يعرف سبب البوز ايه؟
رابعا: ممكن اعرف لما راجل بيغازلك بحاجة انت عارفة ومتأكدة انها مش فيكي بتفرحي ليه؟ المفروض تزعلي لان ده مالوش غير معنيين: إما انه بيتريق عليكي، او انك صعبانة عليه وبيجبر بخاطرك....يبقى ايه اللي يفرح؟
خامسا: ليه لما اي واحدة صاحبتك تقول لك رأي ما يعجبكيش ولما راجل يقول لك نفس الرأي تحسسيه انه جاب التايهة وانه قال الكلام الدرر وتسمعي كلامه على طول كأنه منزل؟
سادسا: يعني ايه عايزة راجل شخصيته اقوى من شخصيتي حضرتك؟ وايه مفهومك للراجل اللي شخصيته قوية؟ يعني يشخط ويزعق ويقول لك ما تكلميش ده وكلمي ده ورايحة فين وجاية منين ويكبس على نفسك صح؟
طيب لما بتتجوزي واحد غبي فيه كل المواصفات دي بتكتئبي ليه وتتخني وتقعدي تعيطي عمال على بطال؟ مش انتي اللي عايزة كده؟
انت ما تعرفيش ان قوة الراجل في انه يتحكم في اعصابه مش في انه يبقى طور بينطح؟
سابعا: مين اللي فهمك ان القعدة في البيت مرتبطة بالفلوس وبس؟ ومين قال لك انك لما تقعدي في البيت مش ح يجيلك تخلف واستبحس؟ وليه طول ما انت بتشتغلي عايزة تقعدي في البيت وطول ما انت بتقعدي في البيت عايزة تشتغلي؟
ثامنا: مين اللي فهمك ان عيالك ملكية خاصة تعملي فيهم اللي انتي عايزاه ومحدش له حق يحاسبك؟
تاسعا: اذا كان جوزك بيعاملك وحش وانت قاعدة معاه عشان العيال بتضربي العيال ضرب غرائب الابل ليه هم مالهم؟
عاشرا: بدل الشكوى العمال على بطال والزن الزن الزن مش بتاخدي خطوات تاخدي بيها حقك بدراعك ليه؟ انت كتعة؟
حادي عشر: ليه لما واحد بيحبك ويقيد لك صوابعه شمع تتملعني عليه لحد ما تقعي على جدور رقبتك في واحد يطلع عليكي القديم والجديد وتستحمليه والجزمة في بقك؟
ثاني عشر: بقى بذمتك الكلام السم اللي بتقوليه لصحباتك البنات عشان تحطمي بيه صورتهم قدام نفسهم تقدري تقولي ربعه لجوزك وللا انت تخافي ما تختشيش؟
ثالث عشر: ليه بتغيري لما عيالك يحبوا ابوهم؟ هو الاب ده كومبارس صامت في البيت ؟ مش هو له حق في العيال اللي مكتوبين على اسمه؟
رابع عشر: اساسا ليه بتسيطري على الولاد وفعلا تحجمي سلطات ابوهم لحد ما يبقى كومبارس صامت؟ دي انا عارفة اجابتها، عشان يحبوكي اكتر...هو جوزك ده ضرتك؟
خامس عشر: ليه بتطوعي بتضحيات لجوزك وولادك ماحدش فيهم طلبها منك وتحملي نفسك فوق طاقتك لحد ما يعتبروا التضحيات دي حق مكتسب ولما تفيصي في يوم وما تقدريش تقدمي التضحيات دي وما يعذروكيش ترجعي تزعلي؟ مش انت اللي عودتيهم على كده؟ حد طلب منك؟
سادس عشر: ليه لما بتمسكي جوزك تسلخي وشه وتقولي له انا باعمل كذا وكذا وكذا وكذا وترصي له لستة التضحيات ويرد عليكي ويقول لك: والله ما حدش طلب منك كل ده...ليه لما بيقول كده ما بتقوليش له طيب وانا من النهاردة ح ابطل ده كله مدام مش مهم عندك وانت ما طلبتوش؟ ليه تفضلي تعملي نفس التضحيات وبرضه زعلانة ومتبرمة؟
سابع عشر: ليه لما الراجل بيكسل في مسئولياته بتعمليها بداله؟
ثامن عشر: ليه بتحبي ولادك الصبيان اكتر من البنات وليه بتفهمي ابنك انه اهم كائن في الكون وان الدنيا بتدور في فلكه وتعملي كل حاجة بداله....وبدل جوزك طبعا مع انهم مش عايزين ده منك؟
انت فاكرة ان دي تضحيات؟ لا ده شر منك حضرتك؟ انت فاكرة انك بتكبلي جوزك وولادك بجمايلك لكن بعد الشوية الجمايل بتبقى عادة وحقوق وبرضه ما بيتكبلوش
تاسع عشر: ليه لما بتتخطبي او تتجوزي كل تفكيرك بينصب على احتياجات جوزك وازاي تلبيها له عشان تحتفظي بيه وعمرك ما بتسألي نفسك انت محتاجة ايه؟ مين اللي فهمك انك عبد حبشي؟ ومين اللي فهمك انك لما تواصلي في الاهتمام باللي حواليكي على حساب نفسك مش ح تجيليك لحظة تنفجري انفجار ممكن يهد البيت كله؟
عشرين: ليه بتحطي اخوات جوزك البنات ومراتات اخواتك الصبيان في دماغك؟ لا انت ح تتجوزي اخوكي عشان تغيري من مراته ولا اخوات جوزك ح يتجوزوه عشان تغيري منهم
واحد وعشرين: ليه ولادك لازم يطلعوا زي ما انت عايزة مش زي ما هم عايزين؟ وليه بتعيطي عشان تبتزيهم وتعملي زي ميمي شكيب: قلبي قلبي قلبي؟
اتنين وعشرين: ليه بتحبي تصعبي على الناس؟ وليه بتحسي ان قوتك في انك تبقى غلبانة؟ انت شحاتة وللا حاجة؟
تلاتة وعشرين: ليه مؤخرا انتشرت ظاهرة المزة المؤدبة؟ ماهو يا مزة يا مؤدبة...منى زكي هي السبب مش كده؟
اربعة وعشرين: ليه عارفة كل ده ومصممة ما تغيرهوش؟

للي عايز يروح غزة

اتصل بيا احمد عبد الفتاح بتاع مدونة يالالاللي عارفينه انتوا بتاع الاخرام السودا اللي في الفضاء...شاغل نفسه بيها قوي وكل يوم يطلع ويقول حدث سيغير مجرى التاريخ: خرم اسود في الفضاء
معلش اصل دراسته فيزيا بس والله طيب وابن حلال وجدع، المهم قال لي عايزين مجموعة مدونين يروحوا غزة انا لسة راجع منها
بيني وبينكوا هي فرصة كويسة الواحد يشوف اي حتة من فلسطين قبل ما يموت
بس هو قال لي نعملها بكرة الاتنين...برضه بيني وبينكوا يوم الاتنين قريب قوي عموما انا ما اقدرش اسيب ميله ولا تليفونه كده على المدونة من غير اذنه فرجاء حاولوا تدخلوا عنده في اللنك ده
وتقولوا له والنبي يا احمد والنبي يا احمد اعملها يوم التلات الصبح والنبي والنبي والنبي
ماحدش يقول لي كلميه انتي عشان انا لما باكلمه بيقنعني ومش باعرف ابمبك معاه فقولوا له انتوا بقى
ملحوظة انا مش ح اقول لماما ما حدش يقول لها بقى احسن ده سر
لو يوم الاتنين انا مش ح اقدر اروح الا بقى اذا كان يوم الاتنين بالليل اطلع من الشغل واكلم ماما من هناك زي ما باعمل عادة
ماما مش بتفتح النت يعني لو عرفت يبقى من حد منكوا ونهاره ح يبقى اسود

Saturday, 26 January 2008

اسكتوا اسكتوا اسكتوا: مش احنا طلع ما عندناش مسلمين؟

"ما آمن بي من بات شبعان و جاره جائع إلى جنبه و هو يعلم به"
رسول الله صلى الله عليه وسلم
الراوي: أنس بن مالك - خلاصة الدرجة: صحيح - المحدث: الألباني - المصدر: صحيح الجامع - الصفحة أو الرقم: 5505
خد


اتسلى وانت ماشي

الشرطة المصرية: كل عام وانت خنيقتي






كل سنة وانتوا طيبيييييييييييييييييين كل سنة وانتوا طيبييييييييييييييييييييييييييييييييييييييين
ياللا حالا بالا بالا هنوا ابو الكرابيج
ح يكون عيد ميلاده الله الليلة اسعد الخوازيق
فاليحيا ابو الكرابيج
هييييييييييييييييييييييييييييييه
هابي خوزق تو يووووووووووو هابي خوزق تو يوووووووووووو هابي خوزق هابي خوزق هابي خوزق تو يوووووووووووووووووو

Friday, 25 January 2008

واللي بيحصل مع غزة ولا يدخل عليا بتلاتة مليم

مش الناس بتتعامل معايا على اني واحدة خلل ومجنونة؟ طيب اهو مالك العاقل الكامل ابن الناس الطيبين والله ولا اتكلمنا ولا ناقشنا الموضوع من اصله مع بعض وعادة ما بنتفقش في اي اراء سياسية حتى حين ميسرة عجبه
اهو
بيقول انا مش داخل عليا حكاية انسانية الحكومة المصرية وان بتوع غزة سهوها وفجروا الحدود وهي مش واخدة بالها وبعدين قالت يا خرابي؟ طيب مش تقولوا؟ طب ولا تزعلوا نفسكوا تعالوا تعالوا
ولما قلت انا مخضوضة ان الفلسطينيين ما يرجعوش قالوا لي انت بتتكلمي عن فانتازيا فلسطينيين ايه دول اللي ما يرجعوش ما الحدود مفتوحة والريس قال ح يرجعوا
يا سلااااااااااااااااااااااااام عشان قال ح يرجعوا يبقى ح يرجعوا
طيب امبارح اسرائيل قالت تصريحات "تبدو" انها غاضبة بتقول لمصر مش فتحتي المعبر طب خدي غزة كلها وغزة دي بالنسبة لاسرائيل زي الدمل اللي طالع لي في جنب اورتي ومش عارفة انام على جنبي اليمين لان مكانه عجيب جدا اول مرة يطلع لي دمل في جنب اورتي
والحكومة الاسرائيلية عملت موجتماع وعملت قائمة باغتيال قيادات حماس واخدت قرار بقتلهم
يعني الغزاوية هنا في مصر بيلفوا في السوق يشتروا عيش وبنزين وادوية وغزة تفضى تفضى تفضى عشان يعرفوا يصطادوا قيادات حماس وبعدين بقى يشوفوا مصر ح تعمل ايه في غزة
ح تاخدها بقى وللا ح تبقى هي الحاكم العسكري زي ما مالك بيفترض وللا ح تبقى مسئولة عنها انسانيا وعاطفيا وللا ح ياخدوهم هم راخرين يشيلوهم هيلة بيلة يودوهم المدن الجديدة عشان يبيعوا اراضي غزة للمستثمرين
يعني اذا كانوا بيبيعوا جزر في النيل مش ح يبيعوا الحتت المطرفة؟ والغزاوية المحافظين دولم اللي لما واحدة بتمشي ببنطلون محزق بيزفوها في الشارع ح يشتغلوا في السياحة ويرقصوا ويغنوا: كل الستات بيغيغوا مني مش عاغفة ليه ماما وبابا عملوني حلوة انا ذنبي ايه؟ والبلية تلعب معاهم ويبتدوا بقية الفلسطينيين يتوافدوا على غزة السياحية وهم بيرقصوا: دمي شغبات وتغيه دليكات والحلويات لها ذوق مخصووووووووووووووص انا ايغما ايغما لا دوس انا ايغما ايغما لا دوس
واللي مش عايز يبقى ايغما لا دوس من الاخوة يقدر يجي يتفضل جنبنا في اي اعتصام من اعتصامات العمال والقرصاية وكفر العلو
ماهو اذا كانوا ح ينضموا للاسرة المصرية لازم يعرفوا التقسيمات الديموغرافية احنا ده نظامنا
يا اما ايغما لا دوس يا اما جعانين معتصمين
ايه ده؟ ممكن يرموا غزة في وشنا وخلاص كده تبقى مشكلة فلسطين اتحلت؟ ممكن جدا بدليل ان عم الكتكوت محمود عباس ضارب طناش ولا كأن المتحاصرين دول من جزيرة المارتنيك
يالهو بالي...........يا دي المصييييييييبة
يا دهوتييييييييييييييييييييييييييييييييي

Thursday, 24 January 2008

غزة المصرية: تحيا مصر

غزة المصرية دي كفر العلو، بس الفرق ان اللي بيحاصر غزة هي اسرائيل، لكن اللي بيحاصر اهل كفر العلو هي الحكومة المصرية عشان كده الناس بتقول طيب نروح فين؟ نغير جنسيتنا؟ واحدة قالت لي ح نحتفظ بدينا ونغير جنسيتنا يمكن نلاقي بلد تحل لمنا من الشوارع
http://www.youtube.com/watch?v=B77-nQhcjzY

كل اللي شفتهم هناك ستات...فيه ستة وعشرين اسرة، قاعدين في الشارع، بيروحوا بالليل يشوفوا لهم اي حتة يناموا فيها لان التعابين بتطلع عليهم الستات بيسألوا ماما سوزان عن حقوق المرأة والطفل اللي هي داوشاهم بيها؟ هم اللي قالوا كده يا ح الظابط مش انا... الست دي جوزها لما سمع ان الارض اللي حط فيها شقى عمره اخدتها الحكومة...مات...مااااااااات وسابها وعياله في الشارع
http://www.youtube.com/watch?v=oocS_b8RTrE

فيه ستات كان اجوازهم عمال في شركات قطاع عام خصخصوها وباعوها وقطعوا عيش العمال وادوهم مكافئة المعاش المبكر اخدوا الفلوس وزودوا عليه بالجمعيات واشتروا الارض دي والارض راحت يعني خراب بيوت من كل ناحية
http://www.youtube.com/watch?v=Wyjmj2byh3U

ضحكوا عليهم ازاي؟ لما جم بتوع تقصى الاحوال قالوا كانوا بيقعدوا على القهوة وقالوا لهم عشان نقدر نبعت لكوا تاخدوا الشقق هاتوا وصل نور من اي حد من جيرانكوا عشان نبعت عليه الجواب راحوا ادوهم ايصلات النور بتاعة جيرانهم راحوا قالوا لهم امكوا في العش وللا طارت ما انتوا ساكنين اهو...امال ايه العناوين دي وايصالات النور دي؟
واللي ساكن عند بيت ابوه يفضل قاعد عند بيت ابوه واللي ساكن في الايجار يفضل بالايجار..والناس مش عايزة تستضيفهم لان حقهم راح
وبالعافية بيسمحوا لهم يباتوا بالليل وطول النهار يسيبوهم جنب المخر
http://www.youtube.com/watch?v=a2VTIovab7o


الناس بعد ما حطت شقى عمرها في البيوت عشان تترحم من السكنة واستغلال اصحاب البيوت حولوهم لشحاتين ومستنيين فاعل الخير يبعت لهم ميتين جنيه كل شهر
الناس راحت لوسائل الاعلام وادوا محمود سعد شكوى في ايده والعاشرة راحت صورت وما فيش حاجة اتذاعت
الست بتسأل: مستنيين لما عيل تعبان وللا عقربة تقرصه؟ مستنيين لما واحدة تغتصب هنا في العشش؟
http://www.youtube.com/watch?v=YdgO8gm44Ag



هم ستة وعشرين اسرة صحيح، بس اللي اساميهم راحت للمحافظ سبعتاشر اسرة، والباقيين كانوا مش موجودين لما الاخوة الموظفين جم اخدوا الاسامي...يعني اللي ماكانش موجود امه طارت فعلا....
الناس بتناشد الرئيس محمد حسني مبارك انه يتدخل بنفسه والسيدة الاولى...بيسألوا هي عنوانها فين عشان نروح لها مش هي بتدافع عن المرأة؟
انهي بني ادم يقبل يعيش كده؟ يروحوا فين؟
http://www.youtube.com/watch?v=WFKd9Sv8Nik


عم نظيف...الناس بتقول عليك نظفت البلد كلها...فقرتهم وجوعتهم وجبت البلد عاليها واطيها...الناس بتدعي على المحافظ كمان
http://www.youtube.com/watch?v=L2FQs8Qg7-g

الناس لما راحت تعتصم عند المحافظ نزل لهم ظابط ضربهم وبهدلهم ومرمطهم وجرجرهم ولما راحوا قسم عابدين يشتكوا مأمور القسم قال لهم انا ح اساعدكوا انكوا تاخدوا بيوت بس على شرط تسحبوا المحضر اللي عملتوه في الظابط وطبعا هم صدقوه بس كل سنة وانتوا طيبين
تحيا مصر
http://www.youtube.com/watch?v=9BMSVz0OJAQ

والسيد الرئيس النهاردة كان بيحيي شجاعة الشرطة وحفظها للامن! وطبعا انتقد حملات التشهير ضد جهاظ الشرطة
واحدة بايعها دهبها واشترت الارض وبتقول لحماتها يا تديني دهبي يا ترجعي لي الارض اللي راحت
http://www.youtube.com/watch?v=64V1QjTQiig


اي مسئول بيشحت عليهم..واحدة بتقول كده...جالهم تبرعات كتير، وما وصلهمش اي حاجة اهم قاعدين في الشارع وفوق البيعة بيقولوا عليهم نصابين ولما جات السيدة الاولى تفتتح مدرسة جريوا عشان يكلموها الحرس بتاعهم قال لهم انتوا نصابين انتوا سماسرة شقق!
وهم قاعدين في الفلل دي مستنيين يسمسروا على الناس
واحدة جوزها عنده سرطان كانت بتشتغل عشان تصرف على جوزها وولادها بس بعد ما اترموا في الشارع مش عارفة تودي ولادها فين عشان تصرف عليهم
كان فيه واحدة بتقول ان مصطفى بكري كويس...عشان عيالها قالوا لها كده
http://www.youtube.com/watch?v=HotPzxyHCfk



ايه بقى اللي عمل خلل في العدد؟ انا احكي لكوا...اصحاب الاراضي اللي عندهم حيازة باعوا للناس دي والناس دي اشترت، الناس دي انطردت واتهدت البيوت على راسهم واتجرجروا مش شعرهم، لما جم يصرفوا بيوت المحافظة واللي هي بالمناسبة محتاجة مقدم الفين جنيه بس وبعدين بعد كده يدفعوا خمسة وسبعين جنيه كل شهرة لمدة اربعين سنة، لما جم يصرفوا البيوت دي ادوا ناس من اللي بايعة اصلا عشان عندهم حيازة، يعني الشقق راحت للي بايع الارض واللي كان في الارض ودفع فيها شقى عمره وانطرد منها قاعد في الشارع
http://www.youtube.com/watch?v=jNIeZSYtrDM


انا طبعا عشان افهم منهم الحكاية دي تعبت قوي لانهم غضبانين قوي ومش عارفين يفهموني بالراحة
قعدنا نعد سوا عشان افهم منها هي بتقول ايه وازاي اللي في الشارع ستة وعشرين واللي اساميهم عند المحافظ سبعتاشر بس
http://www.youtube.com/watch?v=A4wSJiQTZlI


واختتموا هذه الجلسة الشيقة بوابل من الدعاء على المسئولين...ربنا يجعله من حدهم ومن نصيبهم
http://www.youtube.com/my_videos?page=1


انا مش عارفة الناس دي مش خايفة من ربنا ازاي؟

عاجل: أخطر قضايا الفساد

عند كريم البحيري على مدونة عمال مصر
البشوات بيتعاملوا باتفاقية الكويز في شركة غزل المحلة مع انهم مش من ضمن الاتفاقية
بس محبة كده بيتعاملوا مع اسرائيل
وبالرغم من ان الادارة الفاسدة السابقة هي اللي عملت كده الا ان الادارة الحالية ماشية في المشروع زي ما هي
مع ان ده مش قانوني
ده غير بلاوي تانية كتيييييييير
يمكنكم قراءة التفاصيل هنا

اجتماع لمناصرة غزة بمركز الدراسات الاشتراكية


وصلني الميل ده من جيهان شعبان:
دعوة

إلى كل القوى الوطنية والسياسية في مصر.. إلى كل النشطاء والمناضلين المستقلين.. ندعوكم للمشاركة والعمل الجماعي للتضامن مع شعب غزة المحاصر..

بحضور اجتماع غدا الجمعة 25 يناير الساعة الواحدة والنصف ظهرا في مركز الدراسات الاشتراكية 7 شارع مراد ميدان الجيزة

وذلك لتنظيم عمل الإغاثة والتضامن

وقد كانت لجنة الإغاثة بنقابة الصيادلة بالتعاون مع مركز الدراسات الاشتراكية قد نظما معا قافلة دعم غذائي وطبي ومالي لشعب غزة وصلت إلى الأراضي الفلسطينية بالفعل.. وهو ما يعني أن هناك إمكانية هائلة لتنظيم مثل تلك الأنشطة في الأيام القليلة المقبلة بنجاح

برجاء المشاركة ودعوة من ترون أن في مقدوره المساهمة في دعم نضال الشعب الفلسطيني

خطوبة ابني الصغير

شايفين البنوتة الأمورة دي؟
دي خطيبة ابني الصغير
آه ده ابني ومش عايزة اسمع الكلمة السخيفة اللي باسمعها دايما: كل الشحط ده ابنك؟
ده اصغر ولادي
الففففففففففففففففففففففففف مبروك اتجوزوا بقى بسرعة وهاتوا لي بنوتة العب بيها
لو جبتوا ولد خدوه مش عايزاه بس لو جبتوا بنت ح ابقى اخليكوا تزوروها كل اسبوع

Wednesday, 23 January 2008

رواية شاهندة مقلد عما حدث اليوم

طنط شاهندة وصلت البيت واتصلت بينا عشان تطمنا وقالت لي الآتي:
امبارح كلموني وقالوا لي ان فيه وفد من 17 شخص ح يروحوا يقابلوا الامين العام لجامعة الدول العربية وواخدين تصريح عشان يقدموا له بيان شعبي بطلب فتح المعبر للفلسطينيين وقالوا لي تحبي تيجي قلت لهم آه طبعا رحت أنا اول واحدة ما كانش حد لسة وصل وكان فيه حضور امني عالي جدا اتاري فيه ناس تانية عاملة مظاهرة من عمر مكرم
قلت لها: وانت ما كنتيش تعرفي؟ طيب ما نسقتوش مع بعض ليه يا طنط
قالت لي احنا ومين؟
قلت لها السبعتاشر مع المظاهرة
قالت لي مش عارفة المهم لقيت ظابط جايلي ومعاه يجي خمسين واحد بيقول لي انت مين وبتعملي ايه قلت له انا ضمن وفد واخد تصريح لمقابلة الامين العام لجامعة الدول العربية قال لي طب لو سمحتي اثبات الشخصية ادتله الباسبور راح ورجع قال لي ممكن تيجي تكلمي سيادة اللواء قلت له سيادة اللواء لو عايزني يجي هو يكلمني انا مش رايحة اكلم حد قال لي ما هو انت مش ح تقفي هنا قلت له ح اقف هنا ومش ح امشي دي بلدي وانا واقفة على ارض بلدي وانت مش ح تمشيني الا لو قررتوا تشيلوني بالعافية قال لي لو سمحتي يا مدام انت زي والدتي قلت له انا زي جدتك مش والدتك وهو بيتكلم معايا لقيت عادل المشد بيشاور لي وبيقول لي تعالي رحت لقيتهم ماسكين عدد كبير يطلعوا خمسين هم كمان وبيطلعوهم في البوكس وواحد من الظباط بيقول لي روحي انتي يا مدام قلت لا مش انا اللي ح اروح هم اللي ح ينزلوا ويروحوا قال لي كده؟ طيب اتفضلي بقى اطلعي معاهم طلعنا البوكس وكان عبد الغفار شكر موجود وهو عامل عملية قلب مفتوح وقعدت انا وهو نزعق ونقول لهم احنا الاتنين عندنا القلب وح نوديكوا في داهية انا عايزة اعرف مين اللي بيحكم البلدي وكده يعني وبعدين كان معانا الموبايلات عملنا اتصالات وبعدين بسمة بنتي اتصلت بيا وبتزعق وبتقول لي: انت فين والناس بيتقبض عليها وبينضرب قالت لها انا مقبوض عليا يا بسمة فيه ايه؟ قالت لها انا في مظاهرة في عمر مكرم والامن بيجرجر الشباب وبيسحلهم وبيضربهم وبيرميهم في البوكسات
بعد كده الضابط قال فيه امر باننا ننزل شاهندة وعبد الغفار وعادل في الدراسة واطلع بالباقي على التجمع الخامس
======
على الجانب الاخر بعت لاحمد حلمي عشان يبعت لي اسامي المقبوض عليهم بعت لي الرد ده:
لسه بنجمع الاسماء .. كل ما نجمع مجموعة يسيبوهم مش باقى معنا غير عصام شعبان وعمرو يوسف وغالبا حايسبوهم لانهم فى قسم الدرب الاحمر مش معسكر الدراسة .. اللى لازقين فيهم بتوع الاخوان ودول فى معسكر الدراسة وبنحاول نعمل حصر لهم لان اغلبهم من خارج القاهرة
=====
المعبر اتفتح خلاص والفلسطينيين بيشتروا احتياجاتهم من المؤن دلوقت بس ما اعرفش ح يعملوا ايه في الجرحى والمصابين هم دول اهم من شراء الحاجات الغذائية
نرجو فتح المجال للمصابين ونقلهم بشكل عاجل لاقرب مستشفى
كمان رجاء شخصي من القوافل الطبية الخيرية انها تتوجه لرفح لاسعاف المصابين
وما اظنش ان دي حاجة الحكومة المصرية تعترض عليها ولو ح تعترض عليها يبقى ح نعمل فضيحة

عاجل اعتقال عدد كبير من المتاظهرين ضد حصار غزة

تحديث:
جاني الخبر ده من الاستاذ احمد حلمي
انتقلت مظاهرة ميدان التحرير بعد تفريقها الى نقابة المحامين حيث تجمع عدد كبير من المتظاهرين على سلم نقابة المحامين واستكملوا المظاهرة بينما انتقلت حشود أمنية مكثفة الى منطقة وسط البلد حيث تم حصار نقابة المحامين واغلاق الطرق المؤدية لها واغلاق مداخل مترو الانفاق المؤدية للمنطقة ، وتقوم قوات الأمن المتواجدة باستيقاف المواطنين بالشارع والاطلاع على بطاقتهم ويتم احتجاز بعض المستوقفين بطريقة عشوائية .. وتزداد الاجراءات الأمنية شدة مع مرور الوقت بما ينباء باستمرار حملة الاعتقالات الجارية فى منطقة وسط البلد حاليا .
وجارى المتابعة .

مركز الحرية للحقوق السياسية
ودعم الديمقراطية
http://freedomcenter.blogspot.com/
جاني خبر ان المعتقلين من المتظاهرين النهاردة ضد حصار غزة وصل الى 240 معتقل كان منهم طنط شاهندة بس سابوها، انا كلمتها قالت لي حطونا في البوكس وودونا عند قسم الدراسة وسابونا اللي سابوهم طنط شاهندة وعبد الغفار شكر وعادل المشد، بسمة بنت طنط شاهندة بتقول انها شافت الامن وهو ماسك الشباب وبيجرجرهم على الارض ما اعرفش مين اللي خرج تاني بس طنط شاهندة بتقول لي فيه عدد كبير من الشباب لسة معتقل
ح احاول اعرف اسامي المعتقلين
الخبر التاني
ان الحكومة المصرية سمحت لاهل غزة بالدخول ودخل 200 الف فلسطيني

أنا إنسانة قاسية ومش عارفة اتعاطف

جورج بوش جه فلسطين مخصوص عشان يتفق مع اسرائيل وعباس انهم يحاصروا غزة عشان يخلصوا على حماس، واللي اسرائيل عملته في لبنان وما نجحتش فيه بتعمله في غزة وح تنجح فيه
ليه ح تنجح فيه؟ عشان حماس ح تديهم الفرصة، الحقيقة هي ادتهم الفرصة وخلصنا
في وقته كنا بنقول ما كانش المفروض تدخل الانتخابات لو كانت فعلا فصيل مقاومة...وكان مفروض انها لما تلاقي الوضع ح يبقى انفجاري ما تستناش لحد ما يبقى فيه حرب اهلية وكمان تشارك فيها بس خلاص الكلام ده خلص دلوقت
دلوقت ما ينفعش حماس تنسحب انتهينا بقى اللي ذاكر ذاكر دلوقت المفروض تثبت وتواجه الموقف لآخره وتقاوم
وتواجه مش يعني انها تبعت ستات على الحدود المصرية وكام عيل يضربوا الامن المصري
الحقيقة انا الظاهر انسانة قاسية...اعذروني مش عارفة اتعاطف مع حماس خالص
خالص
خالص
مش صعبان عليا غير الفلسطينيين اللي بدل ما كان عندهم أتب بقوا أتبين
النهاردة اسماعيل هنية قال ان اللي حصل على الحدود المصرية رد فعل طبيعي لحالة الاحتقان والكبت والقهر اللي بيعاني منها الفلسطينيين
!!!!!!!!!!!!!!!!
يعني بدل ما يفرغوا الكبت والاحتقان في اسرائيل بيفكوا زنقتهم عند ناس فعلا وضعهم حرج ادخال الجرحى والمصابين يتم بالتنسيق بين الحكومتين مش بالطريقة دي
ومحمود عباس ادان صواريخ القسام اللي بتطلق على اسرائيل
يعني صواريخ القسام مدانة عند عباس وتصدير الستات على حدود دولة عربية شقيقة هي رد فعل طبيعي؟
عشان كده مش عارفة اتعاطف خالص
محمود عباس صهيوني وخلصنا مش ح نقعد نقول جاسوس جاسوس...الجاسوس ده بيشتغل في السر محمود عباس بيشتغل لحساب اسرائيل في العلن
لكن مين صاحب القرار الغبي اللي وجه الجموع الغاضبة ناحية مصر بدل ما يوجهها ناحية اسرائيل؟
اعتقد انه هو نفسه صاحب قرار ان سلاح المقاومة يتوجه ناحية الفلسطيني مش الاسرائيلي
ايه الغباوة دي؟ انا مش باحب الغباوة
لو كانوا اشرار كان بقى لهم عذر افضل
مش كفاية احتلال وخونة....هم الفلسطينيين كانوا ناقصين ناس اغبيا كمان؟

Tuesday, 22 January 2008

الله يخرب بيوتكوا

حصلت المواجهة بين شباب فلسطيني والامن المصري فيه شباب انضموا وتقدموا ورشقوا الامن بالحجارة وحصل ضرب نار ما نعرفش مصدره هل هو من الامن المصري وللا من الامن الفلسطيني ما نعرفش اذا كان فيه اصابات بس انا شفت ست راسها عليها دم ما اعرفش ده من ضرب النار وللا من الحجارة وللا من الوقعة وللا من ايه
الفلسطينيين اقتحموا والامن تراجع شوية وبعدين رجع كثف نفسه وتقدم تاني وبيزق الناس
ايها السادة المسئولين من الجانبين اللي كنت باهيب بيهم
الله يخرب بيتكوا
انتوا ازاي تعملوا كده؟ ازاي تعملوا كده؟ ازاي تعملوا كده؟
سماعين هنية ده مستخبي تحت الكنبة ومصدر الحريم للامن؟ ازاي يعمل كده؟
ولما المسئولين المصريين شايفين الناس واقفة بجرحاهم ما فتحش من جانب واحد ليه؟
الامن المصري لما تراجع وقف على خط متقدم شوية عشان يمنع الناس انها تدخل
يعني فيه اصرار من الامن المصري انه ما يشتبكش..طيب ما انتوا بتعرفوا تبقوا طيبين اهو امال بتعملوا فينا كده ليه؟
دي جملة اعتراضية بس مش قصدي منها اي حاجة لبعدين ما يكدبوش خبر ويضربوهم...بالعكس كتر خيرهم يعني انهم ما سودوش وشنا وما عملوش مع الفلسطينيين اللي عملوه مع السودانيين
طيب اذا كانت القيادات الفلسطينية مهبوشة واستخبوا ورا الحريم بمنتهى الوساخة بالطريقة دي.....ارجو من القيادات المصرية انها تفتح من جانب واحد انقاذا للموقف
ارجو من رئيس الجمهورية انه يتدخل بنفسه لفتح المعبر للجرحى والستات والاطفال بس يدخلوا بس عشان يتعالجوا
الله يخليكوا بس عشان الجرحى
الامن المصري رجع عربيات الاسعاف اللي فيها جرحى ومرضى
يا اخوانا ما ينفعش كده
يا سادة يا مسئولين ما ينفعش كده اهالي الجرحى مش ح يسكتوا وبالتالي الامن مش ح يسكت
الله يخرب بيتكوا اسرائيل مانعة الادوية والمساعدات الانسانية
الله يخرب بيتكوا
الله يخرب بيتكوا
الله يخرب بيتكوا

عاجل النسوان فتحوا المعبر

عااااااااجل الستات زقوا الباب وفتحوا المعبر وبيحاولوا يدخلوا دلوقت الحمد لله رجال الامن المصريين مش بيستخدموا العنف بس فيه بعض الشباب رشقوا رجال الامن المصريين بالحجارة قامت الستات اتدخلت وضربوا العيال اللي رشقوا رجال الامن بالحجارة وبعدوهم عن المظاهرة وربنا ستر
الحمد لله لحد دلوقت الامن المصري ابن حلال وطيب صحيح رافعين العصيان بس ما استخدموهاش
ارجو ان يتم الحفاظ على المعاملة السلمية المحترمة ما بين الفلسطينيين ورجال الامن المصري....ارجو كمان ابعاد كل الشباب والرجالة عشان لما بيدخلوا في حاجة بيخربوها اي استخدام للعنف ضد الامن المصري ح يدي مسوغ لضرب المدنيين والستات المعتصمات والجرحى هم اللي ح يدفعوا التمن ما حدش يرضى ده
ارجو من القيادات الفلسطينية الاتصال بالقيادات المصرية عشان يفتحوا المعبر بدل ما يحصل مواجهة ما بين الامن المصري والفلسطينيات لا الفلسطينيين عايزين يقتحموا ولا عايزين يواجهوا بعنف وواضح كمان انه ولا عناصر الامن المصري عايزة ولا ناوية تستخدم العنف ضد نساء وجرحى فلسطينيات...هم بيستخدموه ضدنا احنا في مصر بما انهم حرين في الشعب بتاعهم يعني لكن لحد دلوقت الامن متمسك بضبط النفس امام الفلسطينيين
الموقف حرج ومحرج....
نهيب بالقيادات من الجانبين التدخل لرفع الحصار عن جرحى ونساء غزة ورفع الحرج عن الامن المصري اللي فجأة لاقي نفسه بينمع جرحى على شفا الموت ونساء ضعيفات محتاجين المساعدة
ارجو التدخل العاجل دي مسألة انسانية
دول ستات واطفال وجرحى دخلوهم يا ناس وما تحطوش قواتنا في الحرج ده
حرام عليكوا
ارجو التدخل العاااااااااااااجل قبل ان تتطور لاشتباكات الكل يبقى فيها خسران
ما تفرجوش علينا العالم
اتوسل اليكم

عاجل: مظاهرة حاشدة على معبر رفح

دلوقت النساء الفلسطينيات واقفين على معبر رفح وعمالين يقولوا افتحوا لنا المعبر معتصمين بالجرحى بتوعهم
2000 ست وطفل وجريح على المعبر دلوقت
الشرطة الفلسطينية ضربت طلق في الهوا عشان تفرق الناس بس ما عرفتش...في الاول افتكروا ان الامن المصري هو اللي عمل كده وانهم اصابوا حد بس الحمد لله غسلنا ايدينا من دمهم زي هيرودس ما غسل ايديه وقال لهم عايزين تموته يبقى بعيد عني
!!!!!!!!!!!!!!!!!
مافيش اصابات برصاص فلسطيني ولا عربي بس فيه حالات اغماء واختناقات والستات لسة واقفة على المعبر في البرد ده وبيقولوا مش ح نتحرك الا لما تفتحوا الباب عايزين ننقل جرحانا من غزة لمصر....انا شايفة دلوقت عساكر الامن المركزي واقفين عند المعبر عشان يحوشوا الستات من اقتحام المعبر...وبيطبطبوا على الستات اللي بينطوا من الصور ويرموا نفسهم جوة مصر
:))...وقته ده يا عم الحجز؟ قال يعني بيعقلوهم عشان يرجعوا تاني انت ما صدقت يا سيد؟ عموما احسن ما التحرشات تقلب معاهم بسادية ويضربوهم خصوصا ان عشرات الستات اغمى عليهم من البرد والزحمة والاسعاف كانت بتيجي تاخدهم
اسرائيل رفضت ادخال اي مساعدات او ادوية من خلال معبر بيت حانون
طيب ما مصر ممكن تدخلهم عشان تنقل جرحاهم ومرضاهم وما ترضاش ترجعهم غزة تاني....ولا كان له لازمة الصور ده اصلا

Monday, 21 January 2008

ماكانش ناقصنا غير رغدة مع تامر امين

اكيد مامي فرخة عشان تجيب الصفار والبياض ده كله
واكيد الجملة دي بتتردد في ذهنك لما بتشوف تامر امين في البيض بيضك
وما كانش ناقصنا غير السيدة المناضلة الشاعرة الممثلة اللواء الطبيبة المهندسة المصون رغدة ام عيون جريئة تطلع لنا مع تامر امين وتناضل في سبيل الدفاع عن سيادة مصر في تعذيبها للمواطنين
مواطيني وانا حرة فيه اغسله واكوية افرده واتنيه
السيدة رغدة - ودي غير السيدة في ضهرك - طالعة مع السيد تامر امين تقول لنا طيب ما يروحوا يشوفوا جوانتامانو
لا مش انا اللي غلطت هي قالت جوانتامانو
وتامر امين قال انا مش عاجبني الرد اساسا ان فيه تعذيب وللا مافيش المفروض نقول لهم وانتوا مالكوا؟ احنا في الاتحاد الاوروبي عشان يحاسبونا؟ وللا الاتحاد الاوروبي ناوي يضم مصر ليه عشان كده بيحاسبها؟ هو احنا حاسبناهم عن التعذيب اللي عندهم واللي في ابو غريب وجوانتانامو
طيب يا سيد ويا سيدة يام الشموع القايدة...حاسبوهم والمعونة اللي بتبعتوها لهم اسحبوها حضرتك
لما احنا بتوع السيادة والريادة والقيادة والزيادة والبيادة والعيادة والحيادة بنمد ايدنا ليه للعال والدون ونشحت منهم؟
ولما الحكومة بيتها وهي حرة فيه يوقع محفظته مطرح ماهو عايز ليه عاملة زي المنادي ابو فوطة صفرا اللي واقف للي رايح واللي جاي يعمل سلام سلاح: كل سنة وانت طيب ياباشا
ده الحكومة المصرية مرة قالت لامريكا الحرب على الارهاب اتسببت لنا في اضرار اقتصادية عايزين اربعة مليار دولار
والانتحار الاورومبي نازل كع للحكومة المصرية اللي راحت باعت غازنا حاجة ببلاش كده وسابت العالم كله يسلخ نفسه بحديد عز اللي محتكر الحديد وقضت على زراعة القطن وبتبيعنا حتة حتة وبتاخد فوق البيعة معونة من امريكا واوروبا وانشالله نطفحها لو كنا بنشوف منها حاجة واظن برضه ان الانتحار الاورومبي وامريكا عارفين اننا ما بنشوفش منها حاجة وبيدوا الحكومة دي فلوس لخدمة مصالحهم
يعني عايزين ياخدوا فلوس من الناس وما يسألهمش انتوا بتعملوا ايه بالفلوس؟
احنا عن ذات نفسيتنا - الشعب يعني - انشالله ينزل لنا بالسم الهاري ما شفنا ابيض ولا اسود لا من الحكومة ولا من اللي بيأبجوا الحكومة ده غير كمان الضرايب اللي بندفعها وهي ما يقرب من نص دخلنا
يعني لامؤاخذة لو كانوا اشتغلوا رقاصات ما كانوش لموا كل النقطة اللي لموها دي وعايزين ببجاحة وغلاسة وتباتة ورخامة واستبضان يعذبونا عشان مزاجهم الخاص
وولاد السادية مش بس بيعذبوا الناس في اقسام الشرطة
كمان مسلطين علينا تامر امين ورفعوا حالة الاستنفار التعذيبي للون الاحمر وحطوا مع تامر امين رغدة عشان تبقى قوة قتل ليست واحدة ولا اثنتان بل قوة قتل ثلاثية
وطالعة الست صفار وبياض تقول لنا يعني المعارضة مش سامعين صوتهم دلوقت اللي بيهللوا على كل حاجة
هللوا عليكي في فضيحة يا شيخة
كابتن تامر احنا مش ح ندخل الاتحاد الاوروبي...بس بالنسبة لك انت روح الاتحاد الاوروبي يمكن يموتوا من الفقعة ونخلص منهم
وللا انت شغلتك تفقع المصريين بس
=========
البيان ده وصلني من الدكتورة عايدة سيف الدولة وانا كمان باضيف توقيعي عليه
ليست السيادة في تعذيب المواطنين

منذ عدة أيام أصدر البرلمان الأوروبي (المنتخب) قرارا يلفت نظر الحكومة المصرية لكل ما وقعته وصادقت عليه ووافقت عليه من اتفاقيات مع الاتحاد الأوروبي والتي تضمنت التزام الحكومات الأوروبية والمصرية باحترام حقوق الإنسان في مختلف المجالات.. القرار يوجه نقدا دبلوماسيا، رقيق اللهجة، لعدم التزام الحكومة المصرية بما تعاقدت عليه ويطالبها بالالتزام بشروط العقد.. قامت الدنيا ولم تقعد وارتفعت الأصوات، حكومية وبرلمانية، تشجب وتدين وتهدد بالمقاطعة وتدافع عن السيادة المصرية!! بل وتهدد بفضح انتهاكات أوروبا لحقوق الإنسان الخاصة بالمسلمين والأقليات في البلاد الأوروبية.. رغم أن حق "الفضح" ذلك منصوص عليه في الاتفاقية كحق للطرفين مجرد عتاب بين طرفين تربطهما اتفاقيات تجارية ومالية وأمنية تجب كل اتفاق على احترام حقوق الإنسان..
فأي سيادة تلك التي يدافعون عنها.. إن سيادة الدولة مرهونة باحترامها لحقوق مواطنيها.. والسيادة لا تعني حرية القبض والاعتقال والتعذيب وملاحقة أصحاب المعتقدات الدينية المختلفة.. إلا إذا كانت الحكومة قد قررت، سرا، أن تخصخص شعبها بحيث أصبحت تتعامل معه وكأنها تملكه..
الغريب أن الحكومة المصرية تشعر بالإهانة حين ينبهها حلفاءها إلى ضرورة احترام حقوق المصريين حفظا لماء الوجه.. لكنها لا تشعر بالإهانة حين تطالب بإغلاق معبر رفح أو إغلاق الأنفاق "السرية" التي تربط ما بين مصر وغزة.. ولا تشعر بالإهانة وانتهاك السيادة حين يتعلق الأمر بحماية الحدود الإسرائيلية والهرولة إلى ملاقاة الرئيس الأمريكي وحجب الدعم والكهرباء والأموال عن غزة وعدم الاعتراف بالحكومة الفلسطينية المنتخبة بناء على أوامر البيت الأبيض.. ولم تشعر بالإهانة وانتهاك السيادة حين فتحت قناة السويس أمام آلة الحرب الأمريكية لتضرب العراق.. ولا تشعر بالإهانة وانتهاك السيادة وعلم الدولة الصهيونية لازال يرفرف في سماء الجيزة علي حين تقطع الكهرباء عن قطاع غزة كمحاولة جديدة لخنقه بعد أن عجز الحصار والتجويع والقتل والقصف عن إجبار الشعب الفلسطيني على القبول بسياسة الأمر الواقع..
إن غضب الحكومة المصرية من قرار البرلمان الأوروبي يشير إلى أن الحكومة المصرية تعتقد أنها حرة التصرف في شعبها.. وتهديدها بفضح الانتهاكات الجارية في أوروبا هو في واقع الأمر إعلان للتواطؤ واعتراف ضمني بما تقترفه الحكومة المصرية من جرائم، تقايض على عدم فضحها.. ونحن العاملين في مناهضة التعذيب نعلم اختطاف المشتبه فيهم عبر مطارات أوروبا لتعذيبهم في مصر هو أحد أفظع تلك الانتهاكات.. لكن من يفضح من؟ من صدر لنا الضحايا.. أو من قام بتعذيبهم بالنيابة.
إننا ، أيضا ندافع عن السيادة.. لكننا لا ندافع عن سيادة الدولة ولا عن سيادة النظام بل ندافع عن سيادة المواطن في هذه المنطقة المنكوبة بحكامها.. سيادة المواطن المصري في أن يعيش حياة خالية من التعذيب والقمع والاعتقال والملاحقة.. وسيادة المواطن الفلسطيني في أن يقاوم وأن يناضل من أجل استعادة الأرض المسلوبة.. وسيادة المواطن العربي عموما من المحيط إلى الخليج في أن يتحرر من طغيان الحكام والتبعية سوءا بسواء.
السيادة اليوم هي في إطلاق سراح المعتقلين وفي إنهاء التعذيب ورفع حالة الطوارئ وإلغاء القوانين الاستثنائية وأن ينتزع المواطنون حقهم في حرية التنظيم والتعبير والاعتقاد والحرية السياسة والعدالة الاجتماعية
السيادة اليوم، وغزة تئن تحت الحصار وأطفالها يموتون في المستشفيات، هي في قطع العلاقات مع الدولة الصهيونية وطرد سفيرها وإغلاق سفارتها وبحث كافة سب الدعم وتقديمه للشعب الفلسطيني المحاصر في أرضه.
فالسيادة هي سيادة الشعوب وليست سيادة حكامها..
الموقعون حتى الآن

· مركز النديم للعلاج والتأهيل النفسي لضحايا العنف
· مركز هشام مبارك للقانون
· الجمعية المصرية لمناهضة التعذيب
· مؤسسة حرية الفكر والتعبير
· البرنامج العربي لنشطاء حقوق الإنسان،
· الجمعية المصرية للنهوض بالمشاركة الاجتماعية
· الشبكة العربية لمعلومات حقوق الإنسان
· مركز الأرض لحقوق الإنسان
· المركز المصري للحد من البطالة
· مركز ماعت للدراسات الحقوقية والدستورية



وانا بازود توقيعي
نوارة نجم
واللي عايز يزود توقيعها يكتب في التعليق على المدونة وانا ح ابعته للدكتورة عايدة

Saturday, 19 January 2008

حسن نصر الله والمشاكل الفرويدية


آه طلع النهاردة وسط الناس وكانت مفاجئة، ده مهدد بالقتل ومرة واحد اسرائيلي كتب في هاآرتز في اول الحرب
(قبل ما يتلبوا العلقة)
ان الحرب مش حتاخد اسبوع وبس ديتها: أن يخرج نصر الله رأسه الكبير ليتلقى رصاصة تخلص العالم منه ومن شره
دي غير الاغنية اللي طلعوها مخصوص لنصر الله والمطرب الاسرائيلي بيقول فيها من قلبه: ياااااا كككككككككككلببببببببببب
طبعا حسن نصر الله ده حياتي ربنا يخليهولي انا شخصيا يعني
ومش كل حد باحبه الناس بتحبه ومش كل حد باكرهه الناس بتكرهه انا باكره ناس كتير الناس بيحبوهم وكل واحد حر يحب اللي هو عايزه
بس انا لفت نظري ان الناس اللي بتكره حسن نصر الله بتكرهه بشكل فرويدي بحت وعندي ادلة على الكلام ده
اولا: لما تكره شخصية سياسية مش من الطبيعي ان لما تيجي سيرته تتشنج بالطريقة اللي بيتشنج بيها كارهي حسن نصر الله ويعملوا زي المطرب الاسرائيلي بتاع ياااااااااا ككككككككككككككللللللللللللببببببببببببببببب
طيب المطرب الاسرائيلي معذور ده عدو بلده وراقعهم علقتين ورا بعض
لكن بيني ادم زيي وزيك، ممكن يكون مختلف مع حسن نصر الله او حتى ضد فكرة المقاومة من اساسها يا سيدي ما جراش حاجة
ليه بيتشنج ويتشال ويتحط ووشه يحمر ويبث كل الكراهية من قلبه؟ مع ان الناس دي عادة بتكره كل اشباه حسن نصر الله او اللي واخدين خطه ومع ذلك ما بيتشنجوش لما بيجيبوا سيرة احمدي نجاد ولا حتى الوية الناصر صلاح الدين مثلا
اشمعنى حسن نصر الله اللي لما تجيب سيرته يبقى كأنك قلت له أمك مؤمنة بتعدد الازواج وابوك آنسة؟
ثانيا: ما شفتش حد بيكره حسن نصر الله الا الرجالة.....اكيد فيه ستات بتكرهه بس انا شخصيا ما شفتهمش، ممكن لان معظم صحابي رجالة وممكن لان من المصريين ماحدش بيكرهه غير الرجالة
مما يثير الشكوك
ثالثا: يركز المهاجمين لحسن نصر الله - من الرجال بالذات - على الناحية الجنسية بشكل مبالغ فيه، يعني واحد صاحبي من اللي بيكرهوه لدرجة انه لما بيسمع حد بيكلم حد عليه بيتجنن من غير سبب فضل يشتم فيه بالكلام الخرا بتاع ده بتاع ايران ده بتاع سوريا وبالرغم من اني ما قلتلوش ما انت بتاع امريكا وواخد الجنسية الامريكية ومتجوز امريكانية، والله ما رضيت اقول له كده عشان ما ازعلوش صاحبي يعني، الا انه بص لي بتحدي وراح قايل لي: وايه رأيك بقى اني متأكد انه مالوش في النسوان....وتلاقيه...وتلاقيه كمان بياخد فياجرا....وعارفة...و...و....وايه
آه واكيد بيشتري ادوية الانلارجمنت اللي بتيجي اعلاناتها على الميلات
كل ده ووشه بقى لونه زي قوطاية وابتدى يتفتف من كتر العصبية مع اني ما فتحتش معاه موضوع حسن نصر الله
كل الحكاية انه سمع الساعي بيقول لواحد زميلنا اسمه حسن: حسن بيه نصر الله ازيك
ودي كانت اخر كلمة اي حد غيره قالها ومن لحظتها ولحد ما مشينا وهو عمال يشتم في حسن نصر الله ويؤكد ان حسن نصر الله مالوش في النسوان وكان ح يموت في ايدينا من الغيظ
مرة واحد تاني صاحبي قال لي وهو برضه وشه احمر وبيتفتف من الغيظ: لعلمك اكيد فيه علاقة شاذة بينه وبين اولمرت
لا....فيه علاقة شاذة بينه وبين لحود....وتلاقيه بتاع نسوان ورجالة كمااااااااان....هه...بس
!!!!!!!!!!!
طيب يا اخوانا ماهو مافيش حد يقدر يفسر الغيظ ده كله والحرقة دي كلها وكل الاتهامات الجنسية اللي مالهاش اي اساس غير في امنياتهم الشريرة غير الاخ سيجموند فرويد

ثم ان حسن نصر الله مش طالب ايد اي واحدة من صاحبات او زوجات صحابي دول عشان يبقوا متخوفين من تهديدات حسن نصر الله الذكورية لهم

مرة واحدة صاحبتي كانت بتتطلق ولما حد بيسألها تقول لهم بيعاملني وحش وبيهملني
اللي فاكراه كويس ان كل صاحباتنا المتجوزين كانوا متغاظين منها قوي وبيشتموها وبيقولوا لها في وشها: يا سلام؟ انت فاكرة نفسك احسن مننا؟ ما كلنا مستحملين ما تستحملي
ومن وراها قالوا عليها انها اكيد بتخون جوزها وشايفة لها شوفة تانية

ومرة باقول على نانسي عجرم امورة فواحدة قالت لي دي عاملة عمليات تجميل...فقلت لها طيب ما تعملي انت كمان عمليات تجميل وتورينا جمالك فقالت لي دي ماشية مع محمد نصير
:))
والله كلنا نفسيات يعني
طيب ما انا باكره هيفاء وهبي وعارفة اني باكرهها عشان هي هيفاء وهبي ومش عشان صوتها وحش ولا حاجة
بس اول مرة اشوف ناس بتكون وجهات نظر سياسية على اساس صراعات ذكورية بحتة
بس سيبك انت
النهاردة كان زي القمر ودقنة البيضا كأنها فضة منورة
ووشه في اللبس الاسود كأنه بدر التمام بينور السما الضلمة
ربنا يخليهولنا
ده سيد الرجال
p:
شوفتوه وهو بيقول عندنا ايدين ورجلين وروس
مش اللي يقول لي انا ما اقدرش اتبرع بالدم عشان اعصابي بتتعب
جتها نيلة اللي عايزة خلف

Friday, 18 January 2008

ينفع كده يعني؟

يعني اللي بيحصل في غزة ده ينفع يعني؟
ينفع؟
ينفع كده يعني؟
ينفع ابن الوسخة بوش ييجي يقعد يومين في كل بلد ويقعد في مصر ساعتين يتف علينا ويمشي؟
ايه اللي جابه اصلا؟ واستقبلناه ليه؟ وجه تف تفه ومشي ليه؟ هل مثلا اتزنق وحب يدخل الحمام وما لقاش حتة غير عندنا؟
ده احنا حتى عندنا ازمة مية ومجاري
ينفع كده يعني؟
ينفع الفلسطينيين ما يتصلوش ببعض غير لما اسرائيل تعمل لهم مذبحة؟
يعني هم لما مش بيلاقوا حد يقتلهم بيقتلوا بعض ولما اسرائيل توفر عليهم وتموتهم يبتدوا يتصالحوا؟
ينفع كده يعني؟
ينفع جودت الملط يقول فيه 22 نقطة سلبية قصاد 12 نقطة ايجابية في سياسة الحكومة الحالية
يقوموا يردوا عليه ويقولوا له لعلمك ال22 نقطة السلبية دول في اصلهم نقاط ايجابية يعني المفروض كنت تقول فيه
34 نقطة ايجابية؟
ينفع كده يعني؟
فيه تهييس في الدنيا اكتر من كده؟
ايها الاخوة المواطنون انا باتنازل عن لقب زعيمة التهييس الذي منحتموني اياه لحكومة نظيف
ينفع مقدمة مسلسل مكتوب عليها: كلمات سيد حجاب الحان عمار شريعي تبقى كده
(هز راسك معايا يمين وشمال كدهو)
صلات النبي صلات النبي
صلات النبي صلات النبي
صلوا صلوا ع النبي
صلوا صلوا ع النبي
صلات النبي صلات النبي
صلات النبي صلات النبي
صلوا صلوا ع النبي
صلوا صلوا ع النبي
ما تصلوا صلوا ع النبي
!!!!!!!!!
الف صلاة ع الحبيب بس فين الاغنية؟

تقرير مركز الحرية حول أحداث السيدة زينب

تقرير عن قضية مظاهرة السيدة زينب

محضر التحريات : -
محرر بمعرفة النقيب / محمود محمد طلعت الضابط بمباحث أمن الدولة ، فى 8/1/2007 الساعة 12 ظهرا .. اثبت فيه :
وردت الينا معلومات من مصادرنا السرية أكدتها التحريات الدقيقة والمستمرة والتى أكدت قيام بعض العناصر الإثارية المناهضة بالتحرك فى الأوساط الجماهيرية والقطاعات المختلفة لحشد العناصر المرتبطة بها لتصعيد نشاطها الإثارى على الساحة السياسية وذلك باتوزيع المنشورات وتنظيم المظاهرات أمام المنشأت الحيوية لبث اخبار كذابة عن احوال المعيشة وارتفاع الأسعار بغرض اثارة الفتنة وتكدير الأمن العام والتحرض على ازدراء نظام الحكم . ومن هذه العناصر التى تم رصدها : -
-1- جورج إسحاق
-2- ابو المعالى محمد فائق
-3- محمد حسن السيد
-4- كمال أبو عيطة
-5- محمد عبد القدوس
-6- ساهر جاد
-7- عبد الحليم قنديل
-8- كريمة الحفناوى
-9- كمال خليل
-10- أكرم حلمى
-11- ضياء الصاوى
-12- محمد عبد السلام عويضة
-13- همام أحمد زايد
-14- فيكتور نجيب
-15- على السيد الفيل
-16- عبد العزيز الحسينى
-17- عصام الشريف
-18- فتحى عصام عليوة
-19- محمد مجدى قرقر
هذا وقد أكدت التحريات أن هذه العناصر اتفقت فيما بينها على حشد العناصر المرتبطة بها وتنظيم مظاهرة بميدان السيدة زينب يوم الخميس الموافق 17 يناير 2008 لبث اخبار وداعيات كاذبة عن غلاء المعيشة وارتفاع الاسعار بغرض تحريض القطاعات الجماهيرية على أزدراء نظام الحكم .
أذن النيابة : -
عرض على نيابة أمن الدولة العليا وتأشر عليه من المستشار المحامى العام الأول لنيابة أمن الدولة العليا بتاريخ 8/1/2008 : -
نأمر باتخاذ الإجراءات وضبط المتهمين وفقا لحالة التلبس .
محضر الضبط :
حرر بمعرفة العقيد /طارق ابو النجا نائب مأمور قسم السيدة زينب بتاريخ 17/1/2008 الساعة 6 مساء وأثبت به الآتى : -
بناء على محضر التحريات المحرر بمعرفة النقيب محمود محمد طلعت الضابط بمباحث أمن الدولة والذى اثبت فيه ورود معلومات من مصادره السرية أكدتها التحريات باعتزام بعض العناصر الإثارية المناهضة تنظيم مظاهرة بميدان السيدة زينب يوم 17/1/2008 بغرض التحريض على أزدراء نظام الحكم وبث دعايات كاذبة عن غلاء المعيشة وارتفاع الأسعار ، وبناء على الأذن الصادر من السيد المستشار المحامى العام الأول لنيابة أمن الدولة بضبط المتحرى عنهم حال تلبسهم بارتكاب الجريمة تم تكثيف الخدمات الأمنية بمنطقة السيدة زينب والشوارع المتفرعة لمراقبة حالة الأمن العام وحماية المنشأت العامة .
وحوالى الساعة الثالثة ظهرا فوجئنا ببعض التجمعات من هذه العناصر الإثارية التى تجمعت وبدأت فى ترديد هتافات معادية للسيد رئيس الجمهورية ومعادية للنظام ،وقاموا بقطع الطريق العام والتجمع فيه وترديد هتافات تتضمن اهانة للسيد رئيس الجمهورية وتبث اشاعات واخبار كاذبة عن سوء أحوال المعيشة وغلاء الأسعار وتحريض المارة على الانضمام لهم مما أدى الى تعطيل حركة المواصلات العامة وعليه قامت قوات الأمن المتواجده بتوجيه النصح والارشاد لهم بالتفرق والانصراف وعقب ذلك تم امتثال بعض المتظاهرين وانصرافهم وفر الباقين ، وتم ضبط مجموعة امتنعت عن الامتثال للنصح وأصرت على التجمع وتعطيل حركة المرور . وعليه تم ضبط المجموعة المتظاهرة وبمواجهتهم اعترفوا بالتنسيق مع العناصر الواردة بمحضر التحريات على تنظيم والاشتراك فى هذه المظاهرة للاغراض الواردة بمحضر التحريات . والمتهمين الذين تم ضبطهم هم : -
-1- صفاء المويلحى
-2- عبد النبى حامد
-3- عمرو يوسف
-4- فتحى المتناوى
-5- بيتر ألفريد
-6- محمد السعيد
-7- محمد العجمى
-8- أسامة كامل
-9- محمد عادل
وقد تم ضبط المتهمين والتحفظ عليهم وجارى عرضهم على النيابة العامة .
تحقيقات النيابة :
عرض المتهمين على نيابة السيدة زينب رفق محضر التحريات ومحضر الضبط ودون وجود ثمة احراز ، وقد تولت النيابة التحقيق والذى بدأ فى حدود الساعة التاسعة مساء وانتهى فى حدود الساعة الثالثة فجرا .
الإتهامات :
-1- تعمد تعطيل حركة المواصلات العامة وتعريض سلامة وسائل النقل البرى للخطر
-2- الاشتراك فى تجمهر بطريق الاتفاق حال كونه المتهمين اكثر من خمسة اشخاص بغرض ارتكاب جريمة وهى تعطيل حركة المواصلات العامة واثارة الفتن وبث الشائعات الكاذبة والتى من شأنها تكدير السلم والأمن العام
-3- الاشتراك فى الجهر العلنى بغرض اثارة الفتن وبث الشائعات الكاذبة والتى من شأنها تكدير الأمن العام وإلحاق الضرر بالمصلحة العامة
التحقيقات :-
أنكر المتهمين التهم المنسوبة اليهم وانكروا الاعتراف المنسوب اليهم بمحضر الضبط وقرروا أنه تم ضبطهم بمعرفة اشخاص ترتدى الزى الملكى اثناء تواجدهم بمنطقة السيدة زينب .
الدفاع :
دفع المحامون الحاضرون مع المتهمين ببطلان القبض لانتفاء حالة التلبس ، كما دفعوا بخلو الاوراق من ثمة أدلة أدانة باستثناء أقوال مرسلة لمحرر المحضر .
قرار النيابة :
إخلاء سبيل جميع المتهمين بضمان محل إقامتهم

التقرير إعداد
أحمد حلمى المحامى
سيدة عبد الفتاح المحامية
= =
مركز الحرية للحقوق السياسية
ودعم الديمقراطية
http://freedomcenter.blogspot.com/

Thursday, 17 January 2008

أول مسرحية تدوينية عربية في التاريخ

صاحب الفكرة عبده البرماوي بوظهولي، شارك في الكتابة الفقيرة الى الله، لا ده مش اسم واحدة ده انا نوارة تهييس لا مؤاخذة واعوذ بالله من كلمة انا
ابتدينا انا وعبده البرماوي بوظهولي، ومستنيين مدونين كتير تنضم لينا ويشاركوا في كتابة المسرحية لو الفكرة عجبتهم
شروط الالتحاق باول مسرحية تدوينية عربية
1- انك تكون مدون او نفسك تبقى مدون المهم تعرف تتعامل مع النت
2- انك تبعت لنا رغبتك في المشاركة عشان نضيفك
3- انك لما تكتب الفصل اللي ح تكتبه ما تنزلوش على طول على المدونة لازم تبعته لبقية الناس اللي معاك لان هي دي الفكرة
ان لما حد فينا يكتب الكل يقرا قبل ما ننزلها للناس واللي عنده اضافة او تعديل بنتناقش فيها مع بعض لحد ما نوصل للشكل النهائي للفصل


احنا نزلنا الفصل الاول وقد تم كتابة مسودة الفصل الثاني ونحن بصدد مناقشته قبل ما ننزله

للاطلاع على المسرحية

http://ma-3a-leek.blogspot.com/

وللمشاركة معنا يمكنك ترك بريدك الالكتروني في احد التعليقات واحنا نبعت لك انفيتيشن
او يمكنك مراسلتنا على الميل التالي

bermawy@gmail.com

ملحوظة عبده البرماوي بوظهولي قال لي انه مش عايز حد يعرف انه في الليلة دي فما حدش يقول بقى ده سر

عاجل اعتقال عدد كبير من الناس والمدون جيمي هود في مظاهرة السيدة زينب

تحديث:
الاخبار دي وصلتني من خالد البلشي ووائل عباس
وصل الان تسعة ممن تم اعتقالهم اليوم فى مظاهرة كفاية ضد الغلاء فى ذكرى احداث 18 و19 يناير الى مجمع نيابات الجلاء
وهم فى انتظار وكلاء النيابة للتحقيق معهم
و هذه هى الاسماء المتاحة لدينا الان

عمر سعيد صحفى بجريدة البديل
والمدون محمد عادل
والصحفى بيتر الفريد
والحاج فتحى
ومحمد العجمى مدرس ثانوى
وسوف نوافيكم ببقية الاسماء لاحقا
يوجد معلومات عن وجود 15 معتقلا اخر مازالوا فى عربات الترحيلات

خالد البلشى
تحديث
مازال عمر سعيد الصحفي بجريدة البديل محتجز في نيابة الجلاء، جيمي بيقول لي فيه ناس بتقول ملفه كبير...ما اعرفش يعني ايه، بس هو بيقول لي هو اللي كان ماسك ملف العمال والظاهر ما صدقوا يقع في ايديهم
تحديث:
تم اطلاق سراح كل المحتجزين، لسة مكلمة جيمي دلوقت وهم رموهم في الصحرا وفي البرد ده زي المرة اللي فاتت، ساعة ما كان بيكلمني وفاتح الموبايل كان بيتقبض عليه لفوا بيهم بالعربية زي المرة اللي فاتت، كانوا عربيتين مليانين ناس وبعدين طلعوهم على طريق القطامية ورموهم في الصحرا وهم بيحاولوا يركبوا اي مواصلة دلوقت
جيمي قال لي انهم لما لقوه فاتح الموبايل ضربوه
======
دلوقت اتصل بيا عبد البرماوي ومحمد الشرقاوي وقالوا لي ان عدد كبير من الناس تم اعتقالهم ومنهم المدون جيمي هود وانه تم القبض على المسيري واطلاق سراحه بعدها بشوية
جيمي كان اتصل بيا العصر ولما جيت ارد ما ردش عليا بس سمعت خناقة بينه وبين ناس وهو كان فاتح الموبايل وبيسمعني بس انا ما ميزتش الكلام غير واحد بيقول ابعد الموبايل ده.....هات الموبايل ده....وجيمي بيقول خلاص يا عم الموبايل مافيهوش حاجة
دلوقت عبده بيقول انهم بيرموهم في الصحرا زي المرة اللي فاتت والشرقاوي بيقول انهم في طريق الجامعة

هابي تاسوعا وعاشورا

وصوما مقبولا وعاشورا ومهلبية، انا اكتب الآن وأنا أعاني من آثار الصوم لاني مدخنة وماما عمالة تعايرني وتقول لي انت شكلك عامل كده ليه؟ هاهاهاها عشان القهوة والسجاير....احسن احسن ....الللللل انا مش بادخن وعشان كده مش حاسة بحاجة لالالالالالااااااااااالاااا
فيه أم كده في الدنيا؟
وبكدا يا اطفال انصح كل انسان انه لا يتورط في التدخين عشان ما يبقاش شكلك عامل زيي كده
التدخين وحش والعاشورا حلوة
اوعوا تكونوا مش ح تاكلوا عاشورا
يارب المغرب يدن بقى

Tuesday, 15 January 2008

فرقت ايه اوباما من الولية؟

يعني فيه حاجات رئيسية لاي مرشح عمرها ما ح تتغير، زي ان اوباما والولية هيلاري الاتنين حاطين في برنامجهم دعم وتسليح اسرائيل من المهام الرئيسية في السياسات الخارجية، زي ان اوباما بيقول ح نمشي من العراق بس....بس لو فيه قاعدة ح نحط احنا كمان قاعدة وقاعدتنا قصاد قاعدتهم، طبعا هيلاري عاشقة اسرائيل في الضلمة، بس مين قال ان اوباما - بالرغم من سوء علاقة الامريكان السود باليهود - مش ملتزم بقوانين الشركة الرأسمالية اللي هو مرشح نفسه لرئاسة مجلس ادارتها؟
صحيح جورج بوش اهبل ابن هابلة بس الامريكان انتخبوه، طيب والامريكان لو ما كانوش انتخبوه؟ كانوا انتخبوا ال جور وتاني مرة كان كيري...طيب ايه الفرق؟
ايه الفرق؟
ما كلهم شايفينا ارهابيين، قوانين الشركة بتقول كده، هم مختلفين في وسيلة التعامل معانا بس، يعني يفعصونا وللا كفاية بس يمخمضونا؟
وكلهم حالفين على مصحف ان اسرائيل من حقها تتسلخ نوويا وان ايران لازم تنزع ملابسها بس مختلفين في طريقة العلاج وطريقة العلاج دي مالهاش اي علاقة بالانسانية ولا العدالة لها علاقة بالفلوس والمكاسب
طيب والنبي الناس اللي بتحب امريكا عشان الافلام والبرجر والكوكا احب اقول لهم بصراحة المشكلة في امريكا نفسها مش في مين اللي بيحكمها
والله العظيم المشكلة في امريكا نفسها
واحنا مافيش اغبى مننا بنحاول نلاقي معاها حل زي ما بنحاول نلاقي مع اسرائيل حل مع ان مش احنا اللي عملنا المشكلة
ولما اقول كده لواحد يتشنج كأني باقول له مراتك بتخونك: لا ما تقوليش كده....ما تقوليش كده....ما تقوليش كده
اصل الكلام ده ارهابي اصل الكلام ده ح يوصلنا لحارة سد
والاعجب بقى: اصل الكلام ده عنصري!!!!!!!!!!!!!!!!!!!!! هئ هئ هئ
كان صدقوا ان شركة الولايات المتحدة متعددة الجنسيات دي بلد بجد واللي فيها دول شعب بجد، مش موظفين: والله كل شركة رأسمالية متعددة الجنسيات فيها مديرين ادارات اوساخ وفيها موظفين صغيرين وسعاة وبتاع البوفيه غلابة وطيبين بس ايه يعني؟ في الاخر هي شركة متعددة الجنسيات بتسيء استغلال الناس والبيئة والاخلاق والعلم عشان تكسب فلوس وبس
هو الواحد لما يقول الحقيقة يبقى بيوصل لحارة سد؟ حارة سد حارة سد نعمل ايه يعني؟ مش هي دي الحقيقة؟
انما ح تعملوا ايه في زيارة السيد رئيس مجلس الادارة لشرم الشيخ؟
الا هو جاي مصر وللا جاي شرم الشيخ؟

عاجل: استشهاد 11 من يينهم ابن محمود الزهار في اجتياح اسرائيلي

دلوقت حالا الخبر جاي على الجزيرة 11 استشهدوا من بينهم نجل محمود الزهار و40 جرحى في حالات حرجة، بركات زيارة بوش او اجتياح بعد زيارة بوش لشرقي غزة.
ملحوظة الحي ده حي سكني
ملحوظة تانية ماحدش رضي يستضيف ساركوزي مع رفيقته غيرنا بما في ذلك الهند اللي قالت له احنا ما بنستقبلش غير راجل ومراته دي تبقى لك ايه
يعني مافيش قرنية غيرنا
ده غير انتظارنا لزيارة بوش....الحقيقة ان مش مهم الدولة بتعمل ايه، الغريب ان فيه ناس بني ادمين زينا كده مواطنين مصريين شايفين المقاومين ارهابيين وشافين الاجتياحات في غزة احسن او على الاقل طظ واحنا مالنا واهلا وسهلا بضيف مصر الكبير
عشان لما اقول ان الشعب نفسه بيعاني من خنوثة وكام قرن على راسه بتزعلوا مني