الا انا عمالة اقرا في كتاب عن الارمن والاتراك
وصلت لحد تلتينه كده
وما قدرتش امسك نفسي وما اتكلمش عليه لحد ما اخلصه
الكتاب اصلا اللي عامله الارمن
ومترجم عن الارمنية
الحقيقة انا كان عندي واحدة صاحبتي ارمنية
كنت باموت فيها وفي مامتها
وكانت بتكره الاتراك زي ما انا باكره الاسرائيليين كده
وانا يعني الاتراك ما يفرقوش معايا قوي
بس كنت باستغرب يعني واقول لها مافيش شعب كله وحش
دول غير اسرائيل لان اسرائيل مش شعب
ده كيان وسخ عمل استدعاء لكل العناصر الوسخة اللي في العالم
وقال لهم يا حبايب ربنا تعالوا استوطنوا عندنا
بس هي كانت بتزعل من كلامي ده
وتتشال وتتحط
فكنت باسكت..خصوصا ان مامتها بتطبخ حلو وما عنديش استعداد
اضحي باكل طنط مارو عشان الاتراك
ياعم يغوروا
الكتاب اللي انا باقراه ده واللي عامله مجموعة من الباحثين الارمن
بيفسر لي آني كان مالها ومال الاتراك
فعلا هم بالنسبة لهم زي اسرائيل
لدرجة ان كل الابحاث اللي قريتها في الكتاب لحد دلوقت
كتابها بيؤكدوا ان حركة البانتوركية
او الاتاتوركية
هي حركة صهيونية ماسونية توسعية امبريالية
بجد مش باهرج كاتبين كده
ماشي يعني طول عمرنا بنسمع الناس اللي بتتكلم عن اتاتورك
على انه من يهود الدونمة والكلام ده
بس اول مرة اسمع الكلام ده من ناس مش عرب
عشان بقى عمالين تقولوا علينا نظرية المؤامرة
والعرب مسيطر عليهم نظرية المؤامرة
اهو كتاب اهو مترجم عن اللغة الارمنية
واللي كاتبه مجموعة من الارمن ابا عن جد
ونظرية المؤامرة واكلة دماغهم لدرجة اني شكيت في امي
وحسيت ان اختي زينب ممكن تكون مدسوسة عليا
وكل شوية يقولوا كلام شبه: والكاتب البانتركي المشهور اللي مسمي نفسه مش عارف ايه اغلو وكل الناس فاكراه اغلو وهو الحقيقة كوهين وامه من يهود الضاهر
لسة فاضل لي تلت الكتاب
بس لحد دلوقت
اللي قدرت اجمعه من الكتاب
ان القوى الامبريالية العالمية تشكلت في صيغة الصهيونية
وانها هي اللي خلقت البانتركية
وهي اللي زقت مصطفى كمال الشهير باتاتورك اي ابو الترك
وان بتوع الاتحاد والترقي اسمهم كوهين وياكوف وحنا
ومستخبيين في اسامي تانية
وان الاتراك بيصطنعوا تاريخ مالوش وجود
وان الطورانية مالهاش علاقة بالاتراك
وان قطعة الارض التابعة للاتحاد السوفيتي واللي سموها اذربيجان
ما اسمهاش اذربيجان
اسمها اجفانك
وهم سموها كده توطئة لاحتلال اذربيجان الاصلية التابعة لايران
وان الاتراك عندهم مخطط توسعي وعايزين يخلو كل الناس تتكلم تركي
وانهم بيدعوا انهم من سلالة الحيثيين والطوران وده مش صحيح
وان مافيش في تاريخ المنطقة حاجة اسمها اتراك
وان الاتراك دول مش موجودين اساسا
وان مافيش حاجة اسمها تركيا
(والله قالوا كده)
وان العلمانية والباناسلامية والبانتركية والليبرالية
كل دول صنيعة الماسونية الصهيونية
بس ما جابوش لسة سيرة الشيوعية
لحد دلوقت
لو جابوا سيرتها ح ابقى اقول لكوا
آه وان اللي عمل مذبحة الارمن هم بتوع الاتحاد والترقي
لانهم كانوا هم اللي مراكز قيادية في الفترة دي
وان السلطان عبحميد ده راجل اهبل وهم اللي اوغروا صدره ع الارمن
لان هرتزل هو اللي اقنع بتوع الاتحاد والترقي انهم يدبحوا الارمن
وان هرتزل كان عايز يخلص ع الارمن وعلى نفوذهم
في المنطقة لانهم كانوا تجار وكانوا بينافسوا اليهود
في سيطرتهم على اقتصاد المنطقة
وانه وعد بتوع الانتحار والترزي انه ح يوصلهم
للحكم ويئلش عبحميد ويدعمهم بالمال
ويقنع العالم كله بانه يساندهم
لو خلصوه من ام الارمن دولم
وان الصهاينة هم السبب في ان الارمن
ما اخدوش حقهم لحد النهاردة
وهم اللي بيأثروا على قرارات مجلس القمل
والقلل المنتحرة
والحقيقة اللي كاتبين الابحاث
جايبين اشارة لمراجع
بس الله اعلم
كل شيء جايز
والنبي صعبوا عليا
لا حول ولا قوة الا بالله
ده الظلم بيطير العقل يا اخي
10 comments:
ايه يا ست نواره الكلام الكبير ده
طبعا اي واحد بيكتب عن ظلم حاضل له فهو بيهول الامور اكتر بكتير وده بيكون غضب عنوا ده مش معناه اني مش موافقك علي الي اتقال انا موافقك 100 % علي الكتاب بيقولوا ان كل حاجه في الاخر بتصب في بروتكولات حكماء صهيون بجد اي مصيبه في العالم ده وراها صهااينه انا حددت صهاينه مش يهود والي اقصدوا بكده ان هتلاقوا في الاخر بيحاولوا يضعفوا كل الدول القويه الي حوالين ارض الميعاد الي بيدعوها علشان يسهل ليهم دخولها سواء بقي كانت ايران وسوريا ومصر والعراق وتركيا ونظريه المؤامره مش وليده النهارده نظريه المؤامره بقالها مئات السنين انما انكارها ده في حد ذاته بيكون بشكل سياسي بحب لطرمخه الامور بس موضوع بقي ان مفيش اتراك من الاساس ده حاجه معرفهاش يعني مدرستش علم الاجناس وانا لو تركي منا هقول مفيش حاجه اسمها ارمان :) يعني الموضوع معقد علي العموم معاكي كتاب رائع ويا ريت لو اتكلم عن الشيوعيه والعلمانيه المجرده من الدين والمجتمع تتكلمي عنها فورا لانوا هيكون موضوع خصب للمناقشه
شكرا يا نواره
اه نسيت اقول لك
ما فعلا المؤرخين الاتراك البانتركيين
بيقولوا مافيش حاجة اسمها ارمن
!!!!!!!!!!!!!!!!!!!!!!
هههههههههههه
يا سيدي العفو
انا قلت اسليكوا معايا
مش عارفة حكاية مافيش حاجة اسمها اتراك اساسا
امال الموجودين دول ايه يعني
طلعوا من خاتم سليمان؟
اتاتورك انا باكرهه لانه ديكتاتور ونصاب وابن ستين في سبعين ومش بعيد يكون تعاون فعلا مع هرتزل لان وقتها الحركة الصهيونية كانت نشطة
ولا زالت يعني
بس وقتها كان يهمهم ان كل الناس تساندهم
حتى مصطفى لطفي المنفلوطي وطه حسين
ونصبوا على ناس كتير
اه هو اتكلم عن العلمانية
وقال انها صنيعة الماسونية والصهيونية
زي الحركات الاسلامية
والليبرالية
والعنصرية
والقومية
يعني ما سابش بصراحة
تحس ان الصهاينة دول معاهم جن مثلا
وللا مسخرين عفاريت
انا مش ضد نظرية المؤامرة
بس زي ما انت قلت
الظلم بيخلي الانسان يهول الامور
المشكله الرهيبه فعلا الي في الصهيونيه
انهم قدروا يخططوا صح وماشيين علي مخططاتهم يعني عارفين مثلا انهم هيقضوا علي مصر وانها هتكون كعكه الانتصار بالفتنه الطائفيه وده الي مايكل منير واعواتنه قاعدين في امريكا بيمهدولوا وقبلها وقبلها غيرهم كتير وكمان مننساش ان موضوع العلمانيه ده اصلا كان مخطط ليه ؟؟
علشان ينسي الانسان تعاليمه الدينينه يكون ترابطه بالدنيا وبملزاته اكتر من انشغاله بدينه وطبعا هيكون ده اسهل مدخل يدخلوا منوا للقضاء علي اي مجتمع متدين (نسبيا ) زي المجتمع المصري الي من ايام الفراعنه لو مفيش ملك طلع قال انوا اله يعبدوا اي حاجه قناعه منهم بالتدين وان لازم يكون فيه اله
عامه تعليق ممتاز علي الكتاب ومستني منك تتكلمي عليه بعد ما تخلصيه كلوا
آه يا نوارة لو بس إنتي تكتبيلنا كتاب كامل عن تاريخ المنطقة لكن بنفس الأسلوب دا ولا فصيح و لا هم يحزنون (بالرغم من أني من المتعصبين للفصحى و المشفقين عليها) لكن أنا مستعد اخونها بس الكتاب يكون عن بلاد عربستان من المحيط المهروش إلى الخليج المهووس و هاتك يا مسخرة...و سلميلي على عمي الفاجومي و قوليلو واحد صاحبي ألماني شافني مرة باضحك زي المجنون فسألني فقلتله أنو دا (وريته الصورة) يضحكك و لو كنت تستنى الدور على باب جهنم، فأصر أخونا الألماني إني أترجملو بعض من قصائد عمنا...بس أترجم كيف؟؟؟ و هي دي الألماني لغة ضحك...ورطتني يا عمي يا نجم...بس باحبك و الله و باجيبلك زباين كمان (:
زكرياء
لمؤرخين الاتراك البانتركيين هم اللي اخترعوا البنطلون البنتاكور والا دول حاجة تانية
الدنيا حر والدماغ بتلسع ....خودي وش واتفرجي علي ميلودي او مزيكا و اشربي كباية شاي واسبرينة ونامييييي
زكرياء
والنبي فكرة
مجهول
يا مجهول يا مجهال يا جهل
بانتركي
pan-turkey
يعني القومية التركية
وبتتقال بمعنى القوميين المتشددين
pan-islamist
pan-germanic
pan-turkey
ما سمعتش عنها مش عيب
بس ما تتريقش على حاجة انت مش عارفها
قول مش عارف وخلاص
والله يا جبهة التهييس إنك فعلا مهيسة (للآن لا أعرف معنى كلمة تهييس فإن كان معناها وحش فسامحيني)
أول مرة في حايتي اللي امتدت على أربعة عشرة قرنا أقرأ عرضا عن كتاب دون ذكر إسم الكتاب والكاتب.
تحياتي
وأنا من على هذا المنبر أسجل بأسم نواره أختراع جديد أسمه ( الأخونه في التهييس)
والأخونه هي الفعل من أخوان مسلمين
شدى حيلك يا أختاه فالنصر قادم لكم إنشاء الله
وبأذن الله نحرق مصر عليكم قبل ما يحكمها عاكف والعريان وبقية طقم الفاشيست
السلام عليكم ورحمة الله وبركاته
والله يا ست نوارة اني بحبك بتقولي البديهيات والمصايب اللي نحن صارلنا سنين بنعرفها وبنعيشها بس بطريقة شووووو حلوة كتير
طبعا هي المصيبة بتبقى مصيبة بس متل ما بنقول نحن بلبنان دخن عليها تنجلي ارجل عليها تنجلي او شو ما بدك تقولي قولي والله قلبتي علي مواجعي مهو انتي مش عارفة اليهود الاشرار اللي مش حلوين شو عملوا فينا ( طبعا مش لحالهم اكيد نحن ساعدناهم)اليهود اجو لقوا الناس عايشين مرتاحين وما كان في حرامية ولا في ظلمة ولا في غني وفقير قاموا خربوا الدنيا وصارت حياتنا بسببهم جحيم
يعني بس يروحوا اليهود بترجع ايامنا حلوة والدنيا ربيع والجو بديع
بالنسبة لموضوع تركيا انا معاكي باللي صار بس كمان كل شي صار اله اسباب وفلسفة وبس بدنا نتفلسف بنحكي كتير خديها مني اللي ملتي ناشونال انا ستي تركية وبابا لبناني وماما عراقية وستي امها ايرانية وزوجي خليجي وامه باكستانية والدنيا عجب وشو ممكن ينتج من هالخليط يااااااااااااااااااالطيف
برجع بقلك والله بحبك وكلامك كله صح وموزون عالنكلة( مع اني بختلف معاكي احيانا بس حتى الكلام المش حلو اللي بتقوليه احيانا بتقوليه بطريقة حلوة ) كيف بقدر ما حبك بدي حبك وحب كل من يحبك واحب الورد جوري علنه بلون خدك
احبك
Post a Comment