مش آني شفت البورنامج بتاع البت هويدا بت ابويا الشيخ طه
تسلم تربيتك يا بويا الشيخ طه
خلفت بت توزن شنبات الكفر كلاتهم
أمال آه بجىىىىىىىى
آني بجى باتحدتت وياكم واني دمعتي على خدي
جلت استنى شوية
بس انتوا عارفين اني لوك لوك لوك لوك
البت هويدا بت ابويا الشيخ طه
وجالت لك واني ح اجعد كده اتفرج
واهل الكفر كلاتهم تحت رحمة الباشا والولية الفاجرة مصالح
جالت لك لا
من سكت على ظلم الناس يستاهل ضرب المداس
راحت البندر جابت من هناك اختراع
بيجولوا عليه كامارا
حاجة كده عاملة زي بسم الله الرحمن الرحيم
وتشوف تساويرك فيها وتشوف نفسك وانت بتتحرك
البت شهروزة بتجول لي ان دهون
اللي بيطلع في الصورة بيبجى بسم الله الرحمن الرحيم اللي ملازم كل نفر فينا
العفريت بتاعه يعني
المهم جيت لكوا في الكلام
البت هويدا بت ابويا الشيخ طه
اصلها طول عمرها بت راجل بصحيح
وبتحب اهل الكفر كلاتهم
ويصعب عليها الغلبان والفجير
مش زي ناس
نسيوا اهلهم واصلهم
واتلهوا بحشو كروشهم
جابت لك الكفر من شرجه لغربه
الغلابة كانوا خايفين يا ولداه
بس زي ما تجول كده
جلبهم انشرح لوشها السمح
جعدوا يفضفضوا بكلام وحديت
يشيب العجل في بطن امه
وجابت برضك ناس من الغفر عشان يحكوا ويتحدتوا
كلامهم كان مااااااااااسسسسسسسسسسسخخخخخخخخخخخخخخخ
الا الخازوج ان فيهم واحد
اسمه فؤاد باشا علام
الا الراجل ده كل الكفر بيحكي عليه حكاوي
وانه من زبانية جهنم اللي مسرحهم الباشا
وان ايتها نفر من الكفر بيهر على روحه لمن يلمحه
قوووووووووووووووووووووووووووم برضك
اكمن البت هويدا حقانية
جالت لك ينكن ما يكونش حداهم خبر وللا حاجة
بس هم الصراحة حداهم اخبار
ومسخوا في الكلام قوي خالص
البت هويدا بت ابويا الشيخ طه
زينة الرجال
اللي خلف بت بميت شنب
البت دارت تلف ع الغلابة
خبرك ايه يا واد
سووا فيكي ايه يا به
وبعيد الشر عن اهل الكفر
جابت الواد محمد ابن ابويا الشيخ بدوي
واد راجل صحيح
كان الغفير عايزه يشتغل وياه مرشد
بس هو جالك ابدا
مسكه الغفير وفين يوجعك
لحدت ما جاله شلل في دراعاته
لمن شفته وشفت العزة والكرامة اللي كاسية عنيه
افتكرت الحكاية اللي كان شيخ الكتاب بيحكيها لنا في الجامع
عن راجل جدع وزنده صلب
اسمه جعفر
قالك فضل يحارب الكفار لحدت ما جطعوا له درعاته جوي خالص
قام ربك عطاه في الجنة بدالهم جناحات
بس جعفر ده كان بيحارب الكفرة
مش شيخ الغفر اللي عمل فيه كده
بس ابويا شيخ الكتاب
جال لي يا بت يا مهيسة
اللي يبيع النخوة والمرجلة ويصغر نفسه
ويستقوى ع الضعيف
يبجى كافر وستين كافر كمان
امال
اني جاعدة من ساعة ما شفت البت هويدا بت ابويا الشيخ طه
وهي دايرة في الكفر كلاته
تسمع وتحن على اهالي الكفر
واني عمالة افكر
نفسي اجيب واحد من الغفر
اللي بيعذبوا اهالي الكفر
واجول له : تعالى هنا يا كافر زي ما ابويا شيخ الكتاب بيجول عليك
مالك يا ولا
هلبت ما كسوة الغفير نستك اصلك اياك؟
لاهو انت ناسي انك فلاح وابن فلاح
نسيت ربك يا ولا
نسيت ناسك واهلك اللي لولاهم ما كانش المخبوز نزل جوفك؟
لاهو انت ناسي يا ولا انت الباشا ولا هو باشا ولا حاجة؟
وانو لوما عليه الاتاوة اللي بياخدها من عرق الفلاحين
كان زمانه رجع لاصله
فلاح غلبان زيه زي بجية الخلج اللي بيفتري عليهم؟
لاهو انت ناسي يا ولا ان كل خيط في كسوة الغفير اللي انت لابسها
من عرج اهل الكفر اللي انت بتذلهم؟
وكل لجمة بتدخل جوفك من شجاهم؟
وان مساكن الغفر دهين مبنية بزنودهم وانت جاعد على....وللا بلاش
وان الكارتة اللي بتيجي تاخدك لحدت السرايا اللي سرجها الباشا من الفلاحين
كل مسمار فيها من فلوسنا؟
انتوا نسيتوا اصلكوا يا لمامة؟
احنا الهوارية الاصلا
والبت هويدا اللي عاملين عليها بليكة
اكمنها ارجل منكوا كلكوا
البت دهين هوارية ابا وام
امال
يا حلاوة يا ولاد
ده الجوالب نامت والانصاص جامت صحيح
ما انتاش خايف من ربك يا ولا؟
ما حداكش ضنا تخاف من انتجام ربنا فيه؟
تصدج بايه؟
جول لا إله إلا الله
وللا نسيتها يا ولا
تصدج باللي خلجك
والختمة الشريفة انت ما انتاش راجل
ولا هواري
ولا بيني ادم من اساسه
يا شبعة من بعد جوعة
شجينا عليك ووكلناك
وعلمناك
ولبسناك
وسكنكاك
وعملناك حارس علينا
وجلنا ابننا ومنا
طلعت ابن حرام يا ولا
طلعت نبتة ابليس
جيت الدنيا في ساعة شيطان
اخص على شنبك
لاهو احنا بنعرج في الارض
ونوكلك عرجنا
لجل ما تفضحنا رجالة ونسوان يا ناجص
يا دون
يا واطي
يا....هاااااااااااااااااااااا
- مين هناك؟
- يوه شيخ الغفر؟
- إيوة يا به بتعملي آه الساعة دي؟ وماشية تبرطمي تجولي آه؟
-آني؟ والختمة ما برطمت
ابرطم ليه؟
مجنونة وللا مجنونة؟
وللا يعني كنت مجنونة؟
- خشي في عبي يا به..أني شايفك وانت بتلكي مالك يا به؟ راكبك عفريت وللا آه؟
- ولا ح اخش في عبك ولا دياولو
آني داخلة الدار
كنت طالعة اشوف الفراخ
حوروووم؟
- لا ما حرمش..خشي دارك بجى
- حاضر
لا مؤاخذة
البت هويدا بت ابويا الشيخ طه راجل صحيح
يكين اني مهيسة
وخايفة شيخ الغفر ياكل مني العسلية اللي جابتها لي البت شهروزة
15 comments:
على فكره انتى اخلى مهيسه فى الدنيا بس انا عاوز اعرف ليه مش بتكتبى للسينما
ازيك ياختي يانواره
انا شايف انك متحامله على شيخ الغفر
وهو ياولداه
بينفذ اوامر اسياده
ولا انتي حتعملي ذي اللي سلبو الامير ومسكو كلبه وسجنوه
الحكاية يلستي ان الحاكم الانجليزي لمصر ويدعي اللمبي حضر في مرة حفل تخريج طلبة كلية الملكة فيكتوريا بالاسكندرية وقال في كلمته اننا مش حنقدر نحطم الناس دول للابد لازم نجيب ناس منهم يحكموهم علي مزاجنا
وراح جايب اتنين ممرضات انجلزيات واحدة منهم خلفت مرات شيخ الغفر السابق ولما مات راحت امريكا وعاشت كالملوك باموال الصعلوق
والثانية خلفت بنت جوزتها لطيار صغير
فجاه اصبح كبير الطيارين
وبعدين بقي ........
اقول ايه
يجعله عامر
سامى
أهم حاجه كل واحد يخلى باله من العسليه بتاعته.
أحسن اللى هيخدوا منه السليه بتاعته هو حر بقى
:)
نوارة
انا كمان شوفت البرنامج على الجزيرة
والله البت هويدا ديه فعلا عملت المستحيل علشان تعمل البرنامج ده
انا اللى مستغربه الظباط دول ملهمش اهل ملهمش اب وام ربوهم ملهمش مشاعر بتحس معندهمش اخوات واقارب مش متجوزين وعندهم عيال
الظباط ديه مش حاسة ان الناس ديه مصريين زيهم الناس ديه بنى ادمين زيهم
ايه الحكاية بالظبط ايه اللى يخلى ظابط يعذب واحد بالمنظر ده ويبهدله كده
الظباط ديه مفروض تفتكر ان فى ربنا يوم القيامة هيحاسبهم
وياخد بحق المظلوم
اياك ودعوة المظلوم فلا يوجد حجاب بينها وبين الله
hana5oud balna men la3'le3'na walla el 3salia wala amou25za el mo25eraa !!!!
انتي مش مهيسة انتي واعية
بس للأسف أهل الكفر كلهم خايفين يواجهوا الباشا وشيخ الغفر
مع إن زي ما انتي قولتي لبسهم من عرقنا وأكلهم من عرقنا
يعني احنا اصحاب الكفر
قولي يا رب
انا شفت الفيلم علي الجزيره والله حاجه تحزن ... ناس معندهاش دم والا اخلاق ولا ذمه ..بقيولوا ربنا فوق وأنا تحت!!! ربنا ياخودهم كلهم
تحياتي يا نواره
المقدرش يشاهد الفيلم الوثائقى
فى استطاعتة المشاهدة
http://7ntklm.blogspot.com/2007/04/blog-post_755.html
ادينى غيرت الإسم علشان ماأخدش حيائك
شوفى بقى ياحاجة0
أنا شوفت الفيلم بتاع أوختك هويدا طة
ودة كان فى الأعادة الساعة الرابعة فجرا بالأمس أنا ومراتى ......واللة الولية قعدت تعيطلى طول الليل وخيم جو من الإكتئاب على البيت "مع إن الولية مالهاش فى السياسة خااااالص
وكمان شوفتى الراجل اللى كان عمال يبرر ويدافع عن الداخلية
وهو إسمة بباوى هو الراجل دة جنسيتة إيييييييية بالظبط
ويبقى سؤال ....
لماذا يكرهوننا؟؟
الراسل
اللى مش مخصى
مبسوطة يااختى
انا كنت عارفة انك مهيسة بس مش كنت عارفة انك مهيسة من كنت كتر ما انت واعية........تعرفى ان التهييس هو الحل الوحيد
أختى العزيزة نوارة
انا معنديش كلام أقولة بعد الفيلم غير ان الواحد منا ياختى يلبس حزام العفة( ملابس داخلية حديد يعنى ) و هو داخل القسم زى بتوع العصور الو سطى علشان محدش ضامن حاجة فى الزمن دة
أولا بتتكلمى صعيدى على فلاحى وده مش عيب نمشيها
ثانيا الحاج زعلان منك عشان مخدتيش بالك إن الفيلم ماجابش حبقة العوطلى بتاع العزبة ده بقى كان لزمن يخش التاريخ، يفرك لا مؤاخذه الاعضاء الحساسة بتاع الشب من دول يقر الواد على طول ولا يحرقه ولا يكويه ولا يعلقه العالم خايفه ع العدة زى عادل إمام رغم إن البلد مفهاش اتصالات وبقت خارج نطاق ا لخدمة
لامؤاخذه أصلى مانمتش ودماغى الظاهر مفوخره م الفيلم بتاع بنت ابو طه
تيجى نعمل طلب جماعى بنزع الجنسية المصرية عن الظباط بتوع التعذيب ونعمل بيها حملة شعبية
فكره بنص جنيه أهى
وربنا يستر علينا من فتح المندل بتاعك وتنبؤاتك يا مهيصه
عمك ابو جمال
اللى انتى مطنشاه
الحل نرمي العسلية
مهو لو كل واحد رمي العسلية
شيخ الغفر حيحتار ومش حيعرف يعمل ايه علشان يخوفنا
لازم كل ما حد يتعذب ولا يعملوا فيه حاجة يتكلم
لازم نحسسهم ان احنا مش خايفين
احنا كلنا مش حبة بس
اول هام
اني ما عرفش ازاي بيكتبو السيما
بس اني باتفرج على الافلام لمن بانزل البندر في العيد
تاني هام
اني اعرف اللمبي
ضحكني موت لمن اتفرجت علاه في السيما
شوفته في الصندوج اللي جابه ابويا الحاج على الدشاوي وجالي التساوي اللي عمالة تتحرك دهين بتاجي من كل حتة في الدنيا
يعني اللي بيجولوا عليه الدش دهون ممكن
ممكن يجيب لك تساوي من ابعد حتة في بلاد الله
ده حتى ممكن يجيب من اسوان
تالت هام
ايوة امال
العسلية لو راحت ما بتجيش تاني وللا آه
رابع هام
لغاليغنا ما بجتش تهمهم لمن عرفوا ان العسلية اغلى من اللغاليغ
خامس هام
طمبتسك قسم لحام
ساتت هام
ربنا ياخدنا ويريحنا
سابع هام
مشكرين منك على الوصلة
تامن هام
هههههههههههههههههههههههههههههههههههههههههههههههههههههههههههههههههههههههههههههههههههههههههههههه
تاسع هام
امااااااااال اني واعية جوي ولافة الخمسة جنيه تحويشة العمر على وسطي الدبان الازرج ما يعرفلوش طريج جرة
بس اياك تجولي لهم اني مخبية الفلوس فين يا به
عاشر هام
ووينكن نجدر نعمل ملابس داخلية اسمنت مسلح
حداشر هام
اني ما باتحددت صعيدي على فلاحي
لو كت من الشرجية كت علمت ان الشراجوة بيتحدتوا بلغوة جريبة جوي من الصعيدي
حتى بيجولوا علينا صعايدة بحري
لاهونت فاكرني من المنوفية زيك يا حاج ابو جمال؟
فشر
اتناشر هام
نرمي العسلية ازاي يعني؟
ونمشي كده من غير عسلية؟
يا فضيحتي
مصر هي امي
انا بقى سبت للاخر
عارف ليه
عشان ارد عليك شوية كده
بتقول ايه يا خويا؟
مالهمش اخوات ولا عيال؟
ناقص تسألني مش خايفين من ربنا؟
وشوية شوية ح تقول لي: يتقبل لهم صلاة ازاي دول وهم بيعملوا في الناس كده؟
يا راجل حرام عليك
انا ناقصة
الاهى يخرب مطنك
اه ديه ؟؟؟؟؟؟؟
انا شفت البرنامج
دعائى المشهور
الهى ينور جبرهم بحريجه
Post a Comment