جمال مبارك اتحفظ التحقيق معاه؟

ويا ترى ده خبر ولا بالون اختبار برضه؟ 
انا كنت في الميدان النهاردة والعدد طبعا ما كانش كبير زي ما كلنا توقعنا
بس يوم 27 لازم يبقى كبير
ويبقى كبير قوي
اكبر مما نتخيل.. والا حنبقى بنحكم على ثورتنا بالاعدام، وبصراحة الاخوان اللي عمالين يستندلوا دول بيلفوا الحبل حوالين رقبتهم
فيه ايه؟ ايه حالة النوم دي؟ ما نفوق بقى شوية
احنا في خطر
سوزان مبارك وفتحي سرور وجمال مبارك ومرتضى منصور وابراهيم كامل والغمراوي وكل عصابة القناع الاسود بيتسرسبوا
فلوس ايه اللي بتحاكموهم عليها؟ احنا اللي بينا وبينهم فلوس ولا دم؟
وموقعة الجمل ايه الطناش اللي عليها ده؟
وماحدش يفتح بق امه في موضوع السولار واكل العيش والكلام الفارغ ده، ما تحطوش على لسان الناس كلام هم ما قالوهوش، انا اللي بانزل في البلاعات مش انتوا، والناس بتقول: الثوار المجلس العسكري خدهم في حضنه وسابونا
ما بيقولوش اكل العيش.. بيقولوا اخدوا مكاسب واحنا نأبنا طلع على شونة
والاخوان اذا كانوا فاكرين انهم ظبطوا مع الجيش وحيضحكوا عليه وعلى امريكا وعلى الدنيا كلها وعلى اساس كده عاملين نفسهم ميتين لازم يعرفوا انهم اول ناس حيتعمل لهم مدبحة لو النظام السابق اعاد انتاج نفسه، وهو بالفعل بيعيد انتاج نفسه
نفوق بقى شوية
انا تعبت وزهقت واعصابي باظت وما بانامش وما باكلش وامي زعلانة مني وصحابي زعلانين مني وقرايبي زعلانين مني ومش باشوف ابويا.. النهاردة كان فرح اعز اتنين صحاب ليا في الدنيا وما حضرتش فرحهم اللي انا كنت مستنياه اكتر منهم هم الاتنين.. عشان يا قاعدة في الشارع، يا قاعدة قدام الجزيرة، يا باتخانق
ايه وجع القلب ده؟ ايه القرف ده؟ 
ومجلس رئاسي مدني ايه اللي بيتكلموا عنه دلوقت وحيفرق الناس؟ انا شخصيا موافقة عليه، بس المطلب ده مش كل الناس موافقين عليه، ولو الاخوان ضحكوا عليكوا وقالوا لكم نازلين وانتوا حاطين المطلب ده اعرفوا انهم كدابين ومش اول مرة يكدبوا يعني، ولو انتوا ضحكتوا على نفسكم وافتكرتوا انكم تقدروا تنزلوا بشكل مؤثر من غير الاخوان يبقى انتوا بتخدموا الخطة اللي بتتنفذ ضد الثورة وخلاص بقى اللعب على المكشوف
والله العظيم تلاتة
والله العظيم تلاتة
والله العظيم تلاتة
لو عصابة القناع الاسود خرجوا، والنظام اعاد انتاج نفسه، ورجع ابوك عند اخوك النظام حيرجع اسوأ من الاول، واشرس من الاول، واهو قاس القوة على الارض وعرف ان الاخوان مؤثرين وحيقضي عليهم تماما عشان ما يفوقوش عليه تاني، وحتبقى جماعة الاخوان دي اسم مكتوب في التاريخ، ده غير الانتقام من الفقرا اللي ابتدا دلوقت، ظباط الشرطة سارحين على سواقين الميكروباص وسكان العشوائيات يضربوهم ويبهدلوهم وياخدوا منهم اتاوات ويقولوا لهم: مش عملتوا ثورة؟ خلي الثورة تنفعكوا يا ولاد... وحكاية الفتنة الطائفية دي واكلة مع الناس قوي مش عارفة ليه؟ وكفاية بقى.. كفاية بقى خيانات، اللي بيشارك في الفتن دي خاين خاين خاين زيه زي جاسوس اسرائيلي، وباقولها اهو: اللي بيشارك فيها سواء بالفعل او رد الفعل الاتنين خونة
ووالله العظيم تلاتة
والله العظيم تلاتة
والله العظيم تلاتة
لو الخطة دي نجحت ما سايبة الشارع وحاحط نفسي قدام اول دبابة اشوفها ومش حاتحرك من قدامها لحد ما تشيلوني عشان تدفنوني وده عهد عليا.. ولو ما عملتش كده تفوا عليا كل ما تشوفوا وشي انا دلوقت اهو ما عنديش اي رغبة في الحياة.. بعد كل الناس اللي ماتت دي ما عنديش اي رغبة في الحياة.. ولو الثورة دي ضاعت حاموت نفسي
جمال مبارك اللي بيخدم اسرائيل حيخرج؟ والتحقيق معاه بيتحفظ؟ ومبارك قال لفريد الديب اتنازل عن الفلوس عشان يخرج؟ والثوار هم اللي بيتحاكموا محاكمات عسكرية؟ ومرتضى منصور مرشح نفسه للرئاسة؟ تخيل بقى لو مرتضى منصور رئيسك
ايه النوم ده؟ حاولع في نفسي.. حاموت نفسي 
حاموت نفسي.. امن الدولة بيشتغل بكامل طاقته
يوم سبعة وعشرين لازم يبقى مليوني.. لازم يبقى مليوني
ولازم نطبع ورق ونوزعه في كل حتة
كل واحد بيقرا البوست ده يطبع 10 ورقات على الاقل ويوزعها على ناس ما يعرفهمش في الشارع، مش كفاية تقول لناس من قرايبك وصحابك، لازم تقول لعشرة من معارفك وعشرة ما تعرفهمش عشان ييجوا.. ده فرض عين عليك، وحسبي الله ونعم الوكيل فيك لو ما عملتش كده
حتموتوني 
ودي المطالب
اولا: المطالب السياسية
1- تقديم مبارك للمحاكمة بتهمة الخيانة العظمى، على اثر اعتراف المشير بإعطاء مبارك الامر للقوات المسلحة بقتل المتظاهرين
2- اشراف قضائي وحقوقي على جهاز الامن الوطني ومحاكمة كل الضباط المتورطين في قتل المتظاهرين وتعذيبهم
3- حل جهاز الامن المركزي او ادماجه في الجيش انشالله يشتغلوا مزارعين
4- اقالة يحيى الجمل ومحاكمة عمر سليمان في ليلة واحدة بقى، هي ايه الحكاية؟
ثانيا: المطالب الاقتصادية:
1- وضع حد ادنى واقصى للاجور واعادة توزيع الثروات لانقاذ البلاد من الازمة الاقتصادية والتحكم في الاسعار
2- فرض الضريبة التصاعدية 
3- محاكمة كافة رجال الاعمال الفاسدين ومصادرة اموالهم
ثالثا: الحريات
1- الغاء احالة المدنيين الى قضاء عسكري 
2- اعادة محاكمة كل المحكوم عليهم باحكام عسكرية بعد تحويلهم الى المحاكم المدنية
3- حظر فض الاعتصامات بالقوة بشكل كامل
دي مطالب اجماع وطني، وتمس الناس بشكل مباشر، ما يقعدش كل واحد نفسه في حاجة يقولها لي في التعليقات
وماحدش يجيب سيرة المجلس الرئاسي المدني لاني باقولكم اهو الاخوان مش حينزلوا بكامل طاقتهم، وده مش مطلب اجماع وطني... ولو الاغلبية عايزاه حيبان في الهتاف في الميدان، بس ما يتحطش في المطالب.. انا عن نفسي عايزاه، بس الناس مش تحت امري عشان كل حاجة انا عايزاها يعملوها، ومش حافرق الناس واشتتهم عشان حاجة انا عايزاها وهو مش رأيهم
اللي نفسه في حاجة يطلبها من ربنا في الروضة الشريفة، لكن ما يقولش مطالب تفرق الناس وتشتتنا عشان يزايد على امنا بالثورية ويعمل لنا مجنون
لا بقى.. طول عمرنا علمونا واحنا صغيرين كده ان المجنون بيأدي اداء الامن والامن بيأدي اداء المجنون ودايما كان الامن اللي بيتحشر وسطنا هو اكتر واحد بيزايد علينا في الثورية عشان يورطنا في مصايب ويفرق صفنا ويشكك الناس في بعض ويكرههم في بعض
قديمة قوي وللاسف كل البهايم واقعين فيها
----------
انا اسفة يا مالك ويا فاطمة اني ما حضرتش الفرح
:'(
كنت فاكرة اني حييجي يوم واعرف ارتاح شوية
شوفتوا القمر بقى

هرمنااااا هرمنااااااااااااااااااااا ومستنينكم في الميادين بكرة

تحديث:



تحديث:
اوعى.. اووووعىىىى... اوعى نختلف، دي الطريقة اللي عرفوا يسيطروا بيها علينا
اننا مسكنا في بعض
نرجع للاجماع الشعبي، وانا اللي بالف في الشارع وبانزل البلاعات
انزلوا البلاعات واسألوا الناس، الآتي هي قضايا الاجماع الشعبي:
1- اللي في شرم يروح طرة
2- واللي اخد اخلاء سبيل يرجع السجن
3- وموقعة الجمل يتحقق فيها
4- والاقتصاد احنا نصلحه ولا الحوجة للسعودية والامارات والكويت
5- وما ننضربش تاني ولا نتهان واللي اخد حكم عسكري يطلع... يطلع
6- والانتخابات ما تتأجلش
انا سألت ناس في الشارع بنفسي وده اللي انا وصلت له، اسألوا انتوا كمان.
وحننزل الميدان بكرة بقضايا اجماع شعبي ان شاء الله. ما نطرحش قضايا خلافية. اذا كان المجلس الرئاسي - اللي انا شخصيا بقيت معاه دلوقت - حيعمل خلاف، بلاش. نتكلم عن اللي يجمعنا.
اوعى الفرقة
-------

العفو عند المقدرة

بلال فضل

زهقنا من جس النبض، قرفنا من بالونات الاختبار، هرمنا من الغموض، سئمنا من عدم المصارحة، ورمنا من الاستهانة بدماء الشهداء.

لماذا لا يخرج أحد من حكام هذه البلاد ليقول لنا صراحة: نحن لن نحاكم حسنى مبارك ولا زوجته ولا ابنيه ولا كبار رجاله، لأنهم جميعاً أخذوا الوقت اللازم لتستيف أوراقهم وحساباتهم وليس هناك ما يدينهم، وبما أنه ليست لدينا قوانين تُحاكم الفساد السياسى، ولسنا راغبين فى استصدارها ولا حتى راغبين فى محاكمتهم طبقاً لما هو موجود من مواد قانونية تحدث عنها رئيس محكمة جنايات الإسكندرية منذ شهر ولا حياة لمن تنادى، فكل ما هنالك أن هناك بعض كباش الفداء ستسقط، بعضها سمين مثل حبيب العادلى، وبعضها هزيل مثل مدير تلك المؤسسة أو رئيس ذلك الاتحاد.

قولوا لنا ذلك لكى نعود فى التو واللحظة إلى الميادين والشوارع، وننال الشهادة التى كنا نحلم بها، أنا آسف لأن حماسة اللحظة جعلتنى أقع فى الكذب، نعم، كذبت وأعترف لكم الآن بأننى لم أحلم بالشهادة عندما شاركت فى يوم الخامس والعشرين من يناير والأيام التى تلته، فقد كنت خائفا بشدة، وكنت راغبا بجنون فى أن أشهد هذه البلاد وقد تغيرت إلى الأبد، نعم كنت أحب الحياة وأكره الموت، لكننى وأقسم بالله العظيم بعد أن رأيت خيرة أبناء مصر يسقطون إلى جوارى شهداء وجرحى ويضحون بأرواحهم من أجل مصر، أحب الموت الآن وأكره الحياة يوماً واحداً فى ظل ثورة مقطومة لأسباب لا أعلمها ولا أريد أن أعلمها. كل ما أعلمه أن الله سيلعننا جميعاً لو فرطنا فى حق هذه البلاد وسمحنا لها أن تعيش يوماً واحداً فى ظل نظام شبه صالح أو شبه عادل أو شبه مستقيم.

لن نسألكم عن عفو لم تأخذوا رأينا فيه، سنسألكم لماذا تتباطأون فى وضع حسنى مبارك وزوجته فى المكان الذى يليق بكل فاسد وظالم وسارق ومنتهك لحق الناس؟

ومن قال لكم إن غاية المراد من رب العباد هو أن نحاسب لصوصا بعد أن منحناهم الوقت الكافى لإخفاء المسروقات؟ أنا لا أتحدث باسم أحد، أتحدث عن نفسى فقط، أنا لم أخرج يوم 25 يناير حاملا أدويتى فى جيبى مستودعا الله زوجتى وبناتى لكى أشعر الآن بالنصر فقط لأن حسنى وزوجته أعادا كذا مليون إلى خزانة الدولة، أنا أصلا لم أبلع أبداً شعار (عيش حرية كرامة إنسانية) الذى وجدت من حولى يهتفون به، بل هتفت من أعماق قلبى ومن أول لحظة أصابنى فيها دور الهتاف صارخا (يسقط يسقط حسنى مبارك)، ليس لأن بينى وبينه ثأرا شخصيا، فقد نشأت ونموت وترعرعت وكان يفترض أن أموت فى عهده هو وابنه، بل هتفت بسقوطه لأنه رجل أهان هذا البلد العظيم الذى عرفت عظمته من كتب التاريخ، فأنا من جيل لم يشهد تلك العظمة فى الواقع، هتفت ضده من أعماق قلبى لأننى تذكرت مئات المرضى الذين كنت أراهم يرقدون إلى جوار والدتى فى معهد الأورام المنهار، لأن خيالات ضحايا العبارة الغارقة ومراكب الموت ومسرح بنى سويف وقطار الصعيد ستظل تطاردنى حتى أموت، لأن دموع المعذبين فى زنازينه كانت ستلعننى لو لم أهتف بسقوطه، لأن كل لحظة قضيتها فى بلاد الله التى تقدمت وتطورت واحترمت كرامة الإنسان كانت ستلعننى لو لم ألعنه.

العفو!، أى عفو؟ يا سادة العفو عند المقدرة، ونحن لم نعد قادرين على التحمل بصراحة، ولذلك عفواً لن أسألكم: هل ستعفو عن مبارك وعن رجاله أمهات الشهداء؟ هل ستعفو عنهم ابنتا طارق الأقطش؟ هل ستعفو عنهم أم زياد بكير؟ هل ستعفو عنهم زوجة أحمد بسيونى؟ لن أعدد لكم أسماء الشهداء ولن أذكركم بصورهم، أنا آسف، لن أفعل ذلك، لأننى موقن بحتمية محاكمة مبارك ورجاله ولست محتاجا من أجل ذلك إلى كل تلك الدماء الطاهرة التى لا يساوى مبارك وكل رجاله نقطة واحدة منها، لقد كاد مبارك يزهق روح مصر ومصر فوق الجميع وأغلى من الجميع، لقد أهان رجال مبارك كرامة مصر، وكرامة مصر فوق كل اعتبار، إذا كنتم حقا حريصين على اقتصاد البلاد واستقرارها وأمنها، فاعلموا أن مصر أغلى من حسنى مبارك ورجاله ونسائه، إذا كانت لديكم اعتبارات خفية فقولوها لنا لأننا زهقنا من هذا الملل، لا تطلبوا منا أن ننظر إلى الأمام وأنتم تجبروننا كل يوم على أن ننظر إلى الخلف بقلق وترقب، لا تحرموا أحلامنا من فرصتها فى أن ترى النور كاملة قبل أن تطالبونا بأن نسير خلفكم.

لقد وقفنا ضد كل من يريد أن يوقع بيننا وبينكم تحت أى مسمى أو أى سبب، لأننا ندرك أنكم العمود الصلب الوحيد الذى نجا من تهشيم مبارك والذى لا تستغنى عنه مصر أبدا، ولذلك نرجوكم ألا تجعلوا تلك الوقيعة تحدث بفعل قرارات متعجلة قد يزينها من يبدو أنهم حسنو النية، اتركوا هذا الملف الشائك للشعب والشعب وحده، اجعلوه حقا للرئيس المنتخب والبرلمان المنتخب القادمين، اتركوا مبارك ورجاله يواجهون مصيرهم الذى سيقرره الشعب، والشعب وحده.

أنا لا أتحدث باسم أحد، أنا أتحدث عن نفسى فقط، وما أعرفه أنه إذا كانت مصر تحتاج إلى ثورة ثانية وثالثة ورابعة من أجل أن تصبح وطنا يتمتع بحرية كاملة وعدالة كاملة وتغيير شامل، فوالله العظيم ثلاثة، وحياة شهداء ستة أكتوبر وثمانية وعشرين يناير، سأمنحها روحى ودمى وحريتى، فلست أغلى من الذين استُشهِدوا أو جُرِحوا أو اعتُقِلوا قبل الثورة وأثناءها وبعدها، أنا ببساطة مثل كل الذين رأيتهم فى الميدان، لست طالب ثأر، بل طالب عدل، والعدل لا تصنعه الغرف المغلقة، بل يولد فى قاعات المحاكم المفتوحة للناس التى تمنح عدالة كاملة، وليس عدالة إلا ربع كالتى كان يمنحها نظام مبارك بمزاجه وقتما يشاء ويحجبها عمن يشاء.

هل أنا وحدى الذى يفتقد التحرير ياجدعان؟

-------------

لا مش لوحدك.. انا نازلة بكرة الميدان انشالله ابقى لوحدي خالص، مش مهم

لو حد يذكر اني قلت قبل كده: مجلس رئاسي مدني على جثتي.

مش مهم جثتي على فكرة، انا بعد اللي ماتوا جنبي ودمهم غرق هدومي ما عنديش اي رغبة في الحياة، والله العظيم تلاتة ما عندي اي رغبة في الحياة، وبشكل مستمر صايباني حالة ندم وشعور بالذنب اني عايشة، ودايما ابص للسما واقول: انت زعلان مني ولا ايه؟ اشمعنى هم وانا لا؟

بعد اذنكم، حفاظا على ثقتي في كتاب التربية الوطنية اللي اخدته في المدرسة، وحفاظا على تصوراتي عن ظابط الجيش المصري اللي قريت عنه في الكتب وفي شهادات الظباط الاسرائيليين نفسهم وفي وثائق ويكيليكس واغاني نصر اكتوبر اللي كل ذكرى نصر باقعد اسمعها وانا واقفة عشان ما يصحش اسمعها وانا قاعدة، حتى لو قاعدة لوحدي في الاودة

امشوا.. امشوا قبل ما اكرهكم.. انا لسه ما كرهتكوش، شفتوا انا قلبي طيب ازاي؟ قعدت مع محمد عفت امبارح، ومع البنات والشباب اللي كانوا عند السفارة، وحكوا كل حاجة، ووجعوا لي قلبي، ومع ذلك لسه ما كرهتكوش، انا زعلانة ومجروحة، ومش بازعل ولا اتجرح غير من اللي باحبه، ما تكرهونيش فيكم عشان انا وغيري لو كرهناكم حنعاملكم زي ما عاملنا الشرطة، ما توصلوش الامور بينا لكده

امشوا.. اي مجلس رئاسي مدني منتخب حينفع.. لو جبنا فرقة شباشب حتنفع لأن الشعب حيعرف يمشيها ويتحكم فيها ومش حيبقى بين الشعب وبينهم غير الشغل وان كنتوا اخوات اتحاسبوا، لكن انتوا كده بتحطونا في مزنق احنا مش عايزينه، ليه تخلوا الاختيار: نحافظ على الجيش المصري والمؤسسة العسكرية المصرية وفخرنا بيها ولا نحافظ على كرامتنا؟ ليه تحطوا الاختيار كده؟ ما تضطروناش لحاجات احنا مش عايزينها واكيد انتوا مش عايزينها

ومافيش داعي للاستخفاف بذكائنا، اذا كنتوا لامين حواليكم شوية اغبيا ببرانيط، احنا مش اغبيا، ومش ببرانيط، ومش بنطنش عشان احنا عبط وبريالة، احنا تعمدنا نعمل عبط، وكنا عارفين انكم كنتوا نازلين تموتونا واحنا اخدناكم بالحضن عشان نحتوي الموقف، والشعب ساس الموقف بمهارة، واللي اتقال له انزل على ركبك ده تتشال جزمته على الروس... خصوصا على راس اللي حلف يمين انه يموت عشانا وساب المدني هو اللي يموت ووقف يتفرج. ما تخلوناش نقلب في اللي احنا تعمدنا نسكت عنه، مش عشان عينا مكسورة، ولا عشان اغبيا وسذج، عشان بنحب بلدنا ونفوت بمزاجنا لما نحب... عشان نحافظ على بلدنا... ومش حنفوت بعد كده، برضه عشان نحافظ على بلدنا.. وحد الله ما بيني وبينك غير حب الوطن يا حكومة

احترمونا شوية

وابقوا على اللي فاضل جوة المصريين ناحيتكم.. سيبكم من العيال الظييطة على النت اللي نفسه يبقى ثوري حتى لو حيشتم مصر ذاتها ولما يخلص شتيمة حيندار على امه وابوه وبعدين حيشكك في نسب نفسه بس عشان يشتم امه، مصر مش الفيس بوك ولا التويتر، ولا الفيس بوك والتويتر هم اللي عملوا الثورة، دي اخرتها؟ بعد البوس والاحضان دي كلها تنزلوا الشرطة لسواقين الميكروباص تهينهم تاني وانتوا واقفين في ضهرهم تحموهم من الشعب؟ الشرطة عمرها ما كانت حتفتح فينا لولا وقفتكم في ضهرهم.. ليه كده؟ المواطن المصري العادي بيحبكم.. انا اللي بالف في الشارع، والمواطن المصري العادي زعلان زعلان زعلاااااااااااااااان جدااااااااااااااا منكم

ما تختبروش صبر المصريين

احنا راجعين الميدان... ورجعتنا للميدان بكرة عشان نحافظ عليكم ونقول لكم روحوا مكان ما جيتوا وانتوا لابسين اكاليل النصر واحنا مسامحينكم على اللي فات قبل ما الجراح توسع اكتر من كده وتتملي غرغرينة وما ينفعهاش غير البتر ويبقى فات المعاد

والله الموفق.. والبوستعان

تحديث:
ميدان التحرير الآن 



تحديث:
النائب العام بيقول مش انا.. والمجلس العسكري بيقول مش انا.. امال مين؟

احنا عندنا جمعتين كده

جمعة حنبتديها بالادب.. اللي هي يوم 20 مايو

جمعة "احنا باديين بالادب" اعتراضا على الافراج عن كل من:

مرتضى منصور، فتحي سرور، سوزان مبارك، زكريا عزمي، وحكاية الاعتذار وكلام يحيى الجمل عن قانون المصالحات

واحنا عارفين ان القانون ده والافراجات دي جاية من السعودية رأسا.. ولو احنا عملنا ثورة عشان السعودية تبقى هي الباب العالي كده لازمنا ثورة تانية.. بس احنا مش حنقول كده، احنا حنقول، سيبكم من السعودية والامارات والكويت اللي بتقول ادونا مبارك وخدوا عشرة مليار دولار كأننا رقاصين ومستنيين النقطة... مش عايزين نبص في خلقهم اساسا

بالنوسبة للحجة بتاعة الاقتصاد

احنا مستعدين لتدشين حملة تبرعات لانقاذ الاقتصاد الوطني، قولوا لنا عايزين كام واحنا رقبتنا من مليار لترليون، وحتشوفونا حنعمل ايه؟

شريطة تحقيق المطالب الاتية:

1- اعادة اعتقال كل من افرج عنهم.. احنا في قانون طوارئ، ولا ايه؟

2- محاكمة مبارك عن جرائم القتل

3- فتح ملف كنيسة القديسين بشكل عاجل وفوري والتحقيق فيه.. والموضوع ده حيقضي على الطائفية خالص

ثبت براءة الاسلاميين من تفجير كنيسة القديسين، وتم الافراج عن كل المتهمين في القضية

طب الكنيسة دي انفجرت لوحدها؟ فيه بلاغ متقدم ان العادلي هو اللي فجرها، والصحف الاجنبية بتقول انه فجرها بناء على تعليمات من مبارك اللي اخد بدوره تعليمات من اسرائيل اللي كانت عايزة تضرب غزة

القضية لو اتحلت واتعمل فيها حكم مافيش حد حيتكلم عن فتنة طائفية تاني ابدا، لا المسيحيين حيتهموا المسلمين، ولا المسلمين حيقعدوا يدوروا للمسيحيين على اي غلطة عشان ما يحسوش انهم هم متهمين لوحدهم

ماهو خلينا نبقى صرحا، المسلمين بيعملوا كده في المسيحيين عشان حاسين انهم متهمين لوحدهم، والشهادة لله المسيحيين مش مقصرين في الموضوع ده، وكل ما بيتهموهم اكتر، كل ما المسلمين بينكشوا عليهم شعرهم اكتر، فالتانيين بينكشوا شعرهم عليهم راخرين لانهم بني ادمين مش كنب يعني.. وهكذا

حلوا لنا الموضوع ده من جدوره.. الاتنين اهبل من بعض وحيبوسوا بعض ويعيطوا لما كل واحد فيهم يعرف ان التاني مش متهم

4- تقديم مبارك الى محاكمة عسكرية بتهمة الخيانة العظمى

المشير طنطاوي في خطابه لدفعة الشرطة المتخرجة حديثا قال بالنص "طلب منا اننا نفتح النار على المتظاهرين وكان قرارنا بالاجماع لأ مش حنفتح النار على المتظاهرين" لا والشرطة صقفوا.. صقفوا للجيش عشان ما فتحش علينا النار وهم اللي نالوا لوحدهم شرف فتح النار علينا

5- الافراج عن كافة المعتقلين في حادث السفارة الاسرائيلي

6- الافراج عن كافة النشطاء اللي اتقبض عليهم في المحاكمة العسكرية.. خصوصا 
عمرو البحيري
7- وقف المحاكمات العسكرية للمدنيين بشكل فوري

شوفوا الادب؟

شوفوا الاخلاق؟

شوفوا الاحترام؟

عدانا العيب؟ اذا كان على الفلوس بنقول لكم رقبتنا... اعلنوا عن حملة تبرعات وشوفوا المصريين بقى، وبالسلامة استثمارات الخليج الى غير رجعة

دي جمعة الادب

جمعة 27 بقى حتبقى جمعة قلة الادب.. اديني قلت اهو

ماذا تفعل لو كنت حرامي

تحديث:
لقد فقعنا في الوخ.. زكريا عزمي خرج بكفالة ميتين الف جنيه
كده بانت خلاص يا شباب
احنا نازلين الجمعة 20 مايو.. انتوا مش نازلين؟ انا نازلة لوحدي

تحديث:
تم التصديق على الحكم على عمرو البحيري بخمس سنين
انزل على ركبك
لا مش حننزل على ركبنا... ومصر مش مومس عشان تبقى المحاكمات ضد الفاسدين هي اللي بتقطع عيشها.. لو محاكمة الفاسدين حتقطع عيشها، يبقى عيشها كان حرام، وربنا يرزقها من الحلال مدام تابت توبة نصوحة


تحديث:
جمعة رفض الاعتذار 20 مايو... كله اتند وهات معاك 10 وانت جاي 
تحديث:
اخلاء سبيل سوزان مبارك مقابل 24 مليون جنيه.. جنيه... جنيييييه
دول تاخدوهم تشربوا بيهم بتوع الكسب المشروع شاي.. واحنا حننزل مليونية نلم لها تبرعات مدام طلعت غلبانة وفقيرة
احنا اتاكلنا على قفااااااااااااانااااااااااااااااااااااا
يا مصريين احنا اتاكلنااااااااااااااااااااااااااااااااا على قفااااااااااااااااااااااناااااااااااااااااااااا
تحديث:
على فكرة.. احنا لو فضلنا في التوتر ده انا حادخل العناية المركزة، والشعب مش حيبقى له نبض عشان كل شوية تجسوه، ورجالة مصر.... عليه العوض ومنه العوض فيهم.. انا عارفة، مبارك طول عمره بيغير منهم عشان عنده مشاكل
جهاز الكسب غير المشروع افرج عن سوزان مقابل التنازل عن فلوسها؟ واللي برة؟ 
طيب ومبارك اللي عايز يتنازل عن "املاكه" بروح اهله عشان ياخد اخلاء سبيل هو كمان، طيب وجرائم القتل
مش حينفع كده.. مش حينفع، اساسا كده كده احنا حناخد الفلوس دي، قانون ايه ده اللي بيخلي الناس ترجع الفلوس اللي سرقتها وتطلع تبرطع في الشارع؟
وبعديييييييييييييييييييييييين
قلنا لكم رقبتنا سدادة.. عايزين كام؟



تحديث:
الجزيرة: معلومات مؤكدة عن ضغوط كبيرة من دول الخليج لاطلاق سراح مبارك
طيب يا شباب
البلد محتاجانا
يا مجلسنا العسكري... ما تمشيش ورا دول الخليج
عايزين كام؟ 
مطلوب بشكل عاجل:
المصريين في الخارج.. تدوا نني عينيكم لمصر
المصريين في الداخل.. تجوع عيالك عشان مصر
حنعمل حملة تبرعات لانقاذ الاقتصاد المصري... وفكك من دول الخليج وحاكم لنا مبارك
كام واحد رقبته سدادة؟ جربونا تعرفونا
تحديث:
هاه... يا مسهل

واحنا في انتظار خبر نفي التسجيل الصوتي لمبارك، او خبر قبول اعتذار مبارك او اساسا فكرة انه ممكن يعتذر
وحنرن لكم الشروق علقة معتبرة... هو احنا عايزين نخرب البيت يعني؟ 
واحنا عشرين مليون نزلوا في الثورة، كل واحد فيهم كان مستعد يموت عشان مصر، عندكم ازمة اقتصادية؟ عايزين كام؟ عايزين كام من الاخر كده؟ 
المصريين اللي في الخارج، اللي حيصوتوا طبعا زي ما كلنا عارفين، عايزين يعوضوا انهم ما شاركوش في الثورة، ومستعدين يشحتوا على مصر بربابة
والا انا نتذل لرجال اعمال والامارات والسعودية.. رقبتنا سدادة.. بس راعونا، احنا ام العيال برضه وحننفعكم، ماحدش حينفعكم غيرنا وربنا
وربنا كمان مرة ما حد حينفعكم غيرنا.. وقلبنا ابيض وبنعمل كل حاجة وفول اوبشن، بس ما تطلعوش زعابيبنا عشان احنا فينا اللي مكفينا
اشترونا تكسبوا... ده احنا نسوى وزننا الماظ والله العظيم، اشترونا وبيعوا مبارك واحنا من بكرة... مم بكنة الصمح.. نلم لكم الفلوس اللي انتوا محتاجينها
بس قولوا بس عايزين كام؟
----------------
تحسس وتعتذر

انا موافقة ان مبارك يعتذر لنا ويرجع الفلوس - اللي هم نص ترليون يا حرامي مش 145 مليون بروح اهلك - شريطة ان كل حرامي في السجن بالذات النشالين وهجامين البيوت والحرامية الغلابة دول، يدفعوا اللي عليهم - واتخن واحد فيهم يعني سارق سبعتلاف تلتمية اتنين وعشرين جنيه - ويكتبوا جواب اعتذار ويخرجوا من السجن حالا، ومش بس كده، والشوية اللي قضوها في السجن تتخصم من الفلوس اللي حيدفعوها

بس ده بالنسبة لقضية السرقة فقط

نمسك بقى المصابين

المصابين يتعالجوا على حساب مبارك الخاص، بعد ما يرجع الفلوس اللي عليه، ومبارك وسوزان على رأي الصحف الاسرائيلية "يتنازلوا عن ايه؟ هي كانت فلوسهم؟" ده اسرائيل اللي بتقول كده، صعبنا على الكافر. بعد ما يتنازلوا لنا عن فلوسنا، يعالجوا بقى المصابين على حسابهم من فلوسهم هم، ويدفعوا لهم تعويضات من فلوسهم هم.

كده خلصنا المصابين

نيجي بقى للقتلا

اااااه... بما ان مبارك فاكر نفسه ربنا، وفاكر نفسه فوق المحاسبة، اوكيه، يثبت لنا انه ربنا وانه فوق المحاسبة.... يحيي اللي ماتوا.

وبما انه صاحب معجزات وابو خطوة.. اكيد حيحيي لنا اللي ماتوا

خلاص كده اللي ماتوا؟

اللي اتسرطنوا بقى

ارتفاع الاصابة بالسرطان بنسبة اربعين في المية في الخمستاشر سنة اللي فاتوا

قدامه الحلول الاتية

يعالج اللي اتصابوا بالسرطان برة مصر على حسابه - زي ما هو كان بيتعالج برة مصر على حسابنا - واللي ماتوا بالسرطان يحييهم - ماهو ربنا بقى 

او.. بما انه راجل مبروك، يحط ايده على مرضى السرطان ويرقيهم والرقوة تجيب نتيجة وتشفيهم

وكذلك يحيي لنا اللي ماتوا في العبارة - ايوة... عبارة من اللي بيغرقوا دول

واللي ماتوا تحت صخرة الدويقة

واللي انضربوا في الصعيد بالنار واخدوا بصمات الجثث وفتحوا التحقيق - في التمانينيات والتسعينات عشان قالوا بس انه كان كويس واخر عشر سنين بس اللي عك فيهم.. هع

ويرجع للصعيد نفسه اللي اتكسرت

ويكلم اصحابه اللي باع لهم غازنا ببلاش يرجعوا لنا الفلوس على الاقل وبلاش يرجعوا الغاز

ويرجع لنا العمولات اللي كان بياخدها على كل بير بترول مصري بيتصدر

بالنوسبة للفضيحة بتاعة غزة... فاكرين؟ ايام ما الاطفال كانوا بيتحرقوا والناس اكلت وشنا.. احنا عايزينه يعوضنا عن الفضيحة دي، يدفع لنا فلوس مثلا تعويضات على ان الناس كانت بتتف في وشنا عالميا، ويتظاهروا قدام سفارتنا لما انا شخصيا كنت حاموت كمدا

بالنوسبة لفضيحة الجزائر.. اللي وصلت ان واحد صاحبي بعد موضوع الجزائر ده كان في لبنان وبقى يتكلم لهجة خليجي عشان الناس ما تعرفش انه مصري، وواحد صاحبي تاني كان في المغرب - اللي اساسا متخانقين مع الجزائر - وبقى يتكلم فرنساوي عشان الناس ما تعرفش انه مصري من كتر ماهو مكسوف وخايف الناس تمسح بيه البلاط

ولا هو فاكرنا زي شوية المرتزقة اللي حواليه؟ ولا هو فاكرنا زيه وكل همنا الفلوس ومبدأنا في الحياة زيه لما قالوا له السودانيين بيشتموك قالهم "هي الشتيمة بتلزق"؟ 

فيه حاجة يبدو ان لا هو ولا دلاديله ولا حتى القوات المسلحة واخدين بالهم منها:

احنا شعب اليط بطبعه، وعريان الـ... ويتأمز تأميز ويقول باب الخمارة فين، واقرع ونزهي... والثورة دي كانت عشان كرامتنا واجعانا... مش عشان جعانين، عادي، الجوع بيتقضى، كرامتنا هي اللي مش بتتقضى

وبمناسبة كرامتنا، حيعمل ايه في اللي دخلوا الاقسام بشرفهم خرجوا متمرطين؟

وبمناسبة السودان، حيعمل ايه في تقسيم السودان اللي لولاه ولولا عمر سليمان ما كانش جرا لها اللي جرالها؟ ولا هو فاكر اننا حلاليف زيه ومش سائلين في اللي حوالينا؟ ولا هو ناسي ان السودان بالنسبة لنا ايه واحساسنا بيها ايه؟

"ومصر الرياض وسودانها عيون الرياض وخلجانها، وما هو ماء ولكنه وريد الحياة وشريانها، تتمم مصر ينابيعه كما تمم العين إنسانها"

وبمناسبة ينابيعه... حيرجع لنا المية اللي باعها وخلانا دلوقت متوقعين في عرض اثيوبيا ازاي؟ خلاص... المية ترجع لنا من غير ما نتوقع في عرض اثيوبيا واحنا نسامحه.

لما امبارح كنت في الندوة بتاعة القوات المسلحة، عاملين البرزنتيشن وحاطين كل اسباب الثورة... الا السبب الرئيسي: كرامتنا.

طب وربنا.. وربنا.. وربنا كمان مرة، تلاتة بالله العظيم تلاتة بالله العظيم تلاتة بالله العظيم، قسما بأغلظ الايمان، يمين احاسب عليه امام الله، ان السبب الرئيسي اللي قوم الثورة دي هو كرامتنا

واللي مش مصدقني يقول لي ايه تفسير الآتي:

يوم 25 اول ما الناس اتجمعت في الميدان الهتاف الاول قبل الشعب يريد اسقاط النظام كان:

لسه فيكي رجالة يا مصر.. لسه فيكي رجالة يا مصر

بكام دي يا مبارك؟ بكام انك خصيتنا وحسست رجالتنا اللي اهيف واحد فيهم ضفره برقبة عشرة منك انهم مش رجالة، ولما اكتشفوا انهم رجالة قعدوا يعيطوا؟ 

يوم 28 يناير.. كربلاء المصرية:

بعد ما ضربنا الامن في ميدان الدقي بقينا ماشيين ناحية كوبري قصر النيل والهتاف كان: قنابل على مين ده احنا المصريين.

بكام دي يا مبارك؟ بكام انك كسفتنا من اننا مصريين وبقينا بندور جوة نفسنا على اي حاجة عشان نرجع ثقتنا في نفسنا؟

بكام الشباب اللي كان ماشي صف ناحية الرصاص عشان يثبت للعالم انهم رجالة، ولما الضرب يزيد والشباب غصب عنهم يجروا البنات تتقدم عشان تنغز الشباب في نخوتهم وما كانش ناقص غير يغنوا: يا قوم الام وحتام ان تقبلوا نعانق ونفرش النمارق

واول ما نلاقيهم بيجروا نقف صف وايدينا في ايدين بعض واحنا عمالين نصرخ فيهم: ما تجروووووش ما تجروووووش لو جريتوا احنا حنتقدم... ونروح ماشيين كلنا - كل الستات والبنات، بلا اي اتفاق والله العظيم بنفس الخطوة كأننا فرقة رضا - ناحية الرصاص، يروحوا راجعين الشباب على الرصاص فورا

موتنا رجالتنا الله يخرب بيتك... موتناهم عشان نشوفهم رجالة

كل الدم ده نزف عشان كرامتنا واجعانا وعايزين نثبت لنفسنا اننا عندنا رجالة.. وكان ممكن الشباب يجري وينفد بعمره، بس كرامتهم كانت اهم من حياتهم

يوم 2 فبراير بعد هزيمة بلطجية مبارك كان الهتاف:

ارفع راسك فوووق انت مصري

بكام دي يا مبارك؟ بكام انك نكست راسنا وكسرت نفسنا، ولما اكتشفنا اننا جدعان قوي، شباب وبنات، بقينا نصرخ للعالم ونقولهم: احنا رفعنا راسنا؟

يوم 11 فبراير كان الهتاف:

اهم اهم اهم.. المصريين اهم

ايه يا راجل.. ايه راجل؟ ايه يا راااااااااااااجل؟ يخرب بيت امك يا شيخ

يخرب بيت امككككك... خليت الشباب يموت نفسه عشان عايز يتأكد انه لسه راجل، خليت ستات مصر تزق رجالتها في النار عشان يشوفوهم رجالة... يخرب بيت امك

تسوى كام دي؟ 

واخدين بالكم يا قواتنا المسلحة؟

واخدين بالكم؟ احنا عملنا اللي انتوا حلفتوا يمين عشان تعملوه وما عملتوهوش.. احنا برينا بقسمكم بدالكم عشان ما يتقالش ان مصر مافيهاش رجالة

واخرتها... مدخلين لمبارك في سجنه مسجل وبتقولوا لنا سامحوه

كتر خيرنا اننا سامحناكم وانتوا بتتفرجوا علينا واحنا بننضرب يوم اتنين فبراير وانتوا ما اتدخلتوش... ما تسكتوا بقى وتبطلوا تحربوا على خرابها؟ هو لوي دراع ولا ايه؟

فتنة طائفية

فلتان امني

ازمة سولار

تهديد بكارثة اقتصادية

والمشهد الاخير: مبارك عايز يعتذر ويرجع الفلوس

لا والنبي؟

لا والنبيييييي

وبعديييييييييييييييين وبعديييييييييييييييييييين... للصبر حدوووووود 

يعني احنا جزاتنا اننا عملنا عبط؟ ادي اخرة الدلع، فضلنا نبوس ونطبطب ونحايل ونهشتك والجيش والشعب ايد واحدة، ومعلش، انزلوا لهم في مليونية عشان ترفعوا عنهم الحرج، ومعلش، ما حموناش يوم 2 فبراير ماهم كتر خيرهم جالهم امر يقتلونا وما قتلوناش، ومعلش فضونا بالقوة اصلهم ملبوخين، ومعلش ومعلش ومعلش

وبعدين.. وبعدييييين.. اتقي شر الحليم

هي حصلت؟ 

دي اخرتها؟ هو فيه كده يا ناس؟ ده انا كنت باكتب للناس في المدونة: احنا نازلين وفيه تهديدات من قناصة انهم يضربوا على قواتنا المسلحة، والعيال يكتبوا لي في التعليق: احنا نحمي قواتنا المسلحة بارواحنا، ونموت كلنا قبل ما حد فيهم يتخدش

ونحل لكم امن الدولة بايدنا وانتوا واقفين تتفرجوا على قناصتهم وهم بيضربونا ونخش نجيب لكم الوثائق ونسلمها لكم

ونأمن لكم البلد بايدينا ونعمل لجان شعبية واللي نظبطه نقبض عليه ونسلمه لكم

ونقف لكم قدام السعودية والامارات واسرائيل بنفسنا وننزل لكم مليونية ودماغنا تتقور في الشمس عشان نرفع عنكم الحرج ونجيب لكم مبارك تحاكموه

ونمسح ونكنس ونطبخ ونغسل ونعصر وننشر ونكوي ونطبق الهدوم ونستفها في الدواليب ونقول لكم: تسلم يا سيد الرجالة.. الله

الله..

جرا ايه بقى؟

جرا ايه؟

ما تلايموها بقى، ده كتييييير.. كتييييييييييييير، كده اووووووووووووووفرررررررررررررر

انا مش عايزة اسمع حس الموكوس ده في اي تسجيل صوتي

مش عايزة اسمع نفسه

والا بقى اللي دخل له التسجيل في سجنه واللي سرب له التسجيل واللي نشر له التسجيل وهو في السجن ومش قانوني انه يسجل اي حاجة ويأثر على مجريات التحقيق كلهم يتجابوا بقى

كلهم يتجابوا... اي واحد متورط في تسريب تسجيل صوتي لمبارك وهو قيد التحقيق للتأثير على مجرى القانون يتجاب مهما علا شأنه، ويتحاكم، والمحاكمة بقى تجيب محاكمة ويتفتح كل اللي احنا عاملين عبط عليه

قلتوا ايه؟

عقلكوا في راسكوا تعرفوا خلاصكوا... انا مستنية تكذيب بقى لموضوع اعتذار مبارك ده، وما عندناش مانع نتخانق مع الشروق ونقول لها يا كدابة يا كدابة يا ثورة مضادة.. وهي مش حتزعل.. هاه؟ فيه اكتر من كده؟ 

يا تطلقوا مبارك يا تطلقونا... انما تتجوزوا علينا وكمان نصرف عليكم وعليه؟ 

وبالمناسبة بقى طلعوا لنا الـ186 عيل اللي انتوا عايزين تحبسوهم عشان اسرائيل

ايه يا اخواتي ده؟ ده ولا كأن مبارك لسه بيحكم

القوافل تتمنع

واللي يتظاهر قدام سفارة اسرائيل يتحبس

الله الله الله

هي بقت كده؟ 

طااااب بقى.. احنا نازلين يوم 27 مايو الجاي، وحناخد في ايدنا الجرحى باهاليهم، واهالي الشهدا كلهم، واصحابهم وقرايبهم وجيرانهم، شوفوا بقى يعملوا كام دول

ان كان شعبك عسل ما تلحسوش كله.. 

احنا صبرنا عليكوا كتير، حقنا راجع في التحرير

محضر الجلسة لندوة المجلس الاعلى للقوات المسلحة

تحديث:
نسيت اقولكم كمان ان محمد صبحي قال: انا منزعج جدا من المطالبة بحل مباحث امن الدولة، كل دولة لازمها امن
تحديث:
اه.. نسيت اقولكم، اخو هشام طلعت مصطفى قعد يقول: انا زعلان على بلدي، ونفسي اساعدها، بس انا خايف اتحول للنائب العام.. ومن ضمن الكلام اللي قلته وانا نسيت اكتبه، اني قلت تعليقا على الكلام ده: على فكرة احنا مش عايزين نتذل لحد، وماحدش يقول لي ان القانون والعدالة بيعطلوا الاقتصاد، احنا نزلنا في الثورة عشرين مليون، ومستعدين نتطوع في اي عمل عشان نحمي اقتصاد بلدنا ولا ان رجال الاعمال الفاسدين اللي خايفين من القانون والامارات يذلونا ويجبرونا اننا ما نحاكمش الفاسدين، وعلى فكرة احنا مش بنقبض بالدولار ولا بناكل كنتكاي
وحسين عبد الغني قال اللي عايز يشتغل بالقانون اهلا وسهلا بيه، اللي مش عايز بالسلامة
بسم الله الرحمن الرحيم يا رب ما انساش اي حاجة ابدا

ابتدت بأن اللواء محمود نصر عضو المجلس العسكري قال: نود التأكيد على ان المجلس العسكري يعترف بشرعية ثورة 25 يناير، واستعرض الحالة الاقتصادية بالارقام، واخد وقت بتاع ساعة كده، وفيه بريزينتيشن ان شاء الله احاول اخدها منهم عشان انشرها، وقال ان فيه ازمة اقتصادية، بس انا متفائل بروح الثورة، لكن عندنا مشاكل آنية، واحنا مجتمعين مع حضراتكم عشان نسمع اقتراحاتكم وافكاركم غير التقليدية لحل الازمة الاقتصادية الحالية، احنا جيش.. دي اول مرة نحكم بلد، ومحتاجين مساعدتكم، ما اتحطيناش في الموقف ده قبل كده.

بعدين اتكلم حسب الله الكفراوي الكلام بتاعه ده، وقعد يترحم على السادات، والحقيقة ما خلصش كلام، وبعدين اتكلم بعديه واحد مش فاكراه، وقال كلام مش مهم ابدا ابدا ابدا، البتة يعني، بعدين د. ابو العلا ماضي اتكلم في مقترحات اقتصادية، وبعدين واحد مش عارفاه قعد يحط خطة خمسية ويتكلم في التفاصيل، فالدكتور جلال امين اتغاظ وقال ده كلام مش مهم ابدا، راح اللوا ما صدق وقال فعلا كلام مش مهم، واحنا عندنا في القوات المسلحة لما بنقول حنتكلم خمس  دقايق يبقى هم الخمس دقايق مش تلت ساعة، احنا مش طالبين خطة خمسية، عارفينها احنا الخطط دي، احنا عايزين حلول آنية تسعف الحالة الاقتصادية بشكل آني. بعدين اتكلم طلعت السادات واعوذ بالله.. اعوذ بالله وربنا، تقولش السادات يبعث من جديد؟ رغي رغي رغي، ورايش كله.. وفاكر نفسه بيتكلم في مجلس الشعب وقعد يقول: افتح يا راجل.. افتح.. اه وربنا قال كده، راح اللوا بص له وهو مش فاهم كده، راح قايل: افتح لي الاستثمارات، خلاص.. الحبيب العدلي مشي، ما تقعدش تاخد فلوس من المستثمرين، افتح افتح افتح.. هو حيجيبه من برة؟ وواحد من الاخوان اتكلم وقعد يقول في ارقام ويشكك في الارقام اللي طرحها المجلس العسكري فاللواء قال له الارقام دي دقيقة وممضي عليها وانا حاجيب لك التقرير. وعماد اديب كان قاعد جنبي قال: هو ده بقى اقتصاد الاخوان.. مافيش فكر خالص! 

كل ده وانا رايحة وجاية على واحد كده اكتشفت انه مدير الاوتيل في الاخر، وقلت له انا مفوضة من حوالي 250 واحد على المدونة والتويتر اني اوصل صوتهم للمجلس هنا، ولازم اتكلم ودول مش بيسكتوا، راح مقعدني قدام عشان ييجي الدور عليا بدري، اصلهم كانوا بيتكلموا بالدور، ورحت باعتة للواء ورقة بالمعنى ده، وقلت له يا تخليني اقرا النقط اللي معايا يا اكتبها لك في ورقة، راح باصص لي وانا رافعة ايدي وقال: دي نوارة؟ نصقف لها يا جماعة عشان دي من شباب الثورة العظيمة ماحدش صقف غير حسين عبد الغني وجلال امين وابو العلا ماضي. فيه حد تالت اتكلم برضه عارفين مين؟ عميد كلية الاعلام اللي بلال فضل شطفه على اون تي في، قعد يقول لازم تواجهوا الاعتصامات الفئوية بكل حسم وحزم، وبعدين عادل حمودة اتكلم بعده وقال: انا اللي كشفت فساد داماك، لكن احنا محتاجين دلوقت ان اي رجل اعمال دفع رشوة لمسئول المسئول هو اللي يتحاسب ورجل الاعمال ما يتحاسبش والا الاستمثارات حنخسرها، قام اللواء قال: والله انا عارف الكلام ده، بس الناس مصرة على المحاكمات، واحنا ما نقدرش نتدخل في القضاء، لكن مثلا الامارات لما لقت اننا بنحاسب بتوع داماك قالوا بتعملوا في الناس بتوعنا كده؟ طب مافيش استثمارات، واحنا محتاجين الاستثمارات دي بشكل ملح والا الاقتصاد حينهار. وبعدين اللواء قال لي تعالي يا نوارة اطلعي هنا وكلميهم... وراح مشاور عليا وهو مبتسم: دي من بتوع الثورة، لازم نكرمها

فقلت لهم الآتي بالنص:

انا مش عايزة اتكرم ولا حاجة انا قبل ما اجي نزلت على المدونة والتويتر اني جاية هنا وفيه حوالي 250 واحد وكلوني اقول الكلام ده، وانا الثوار بيقولوا عليا "نوارة عميلة الجيش المصري" وانا مش زعلانة من اللقب ده لاني باحب الجيش، ولو اني عمري ما قعدت مع ظابط جيش غير واحد من سنتين كان بيحبني وما حصلش نصيب، الكلام عن الازمة الاقتصادية اللي كلنا عارفين اسبابها ومافيش داعي للاستفاضة فيها والشباب بيقولوا ان عشان الازمة الاقتصادية تتحل نوفر فلوس الداخلية، الامن المركزي على سبيل المثال امبارح ضرب المتظاهرين بالقنابل المسيلة للدموع والرصاص المطاطي والخرطوش، بعد غياب من يوم 28 اول ظهور للشرطة كان وهي بتحمي السفارة الاسرائيلي من متظاهرين مصريين، اذا كان الناس دي عقيدتهم ان الشعب هو العدو وان مهمتها تحمي اسرائيل يبقى ادوهم اعانة بطالة وفيه تسعة مليون عاطل مستعدين يخدموا بلدهم وولاءهم للوطن وللشعب مش لاسرائيل. امبارح اللواء فاروق لاشين المتهم بضرب المتظاهرين اثناء الثورة واللي بعد كده بقى محافظ الجيزة كان بيقود معركة ضد المصريين لحماية السفارة الاسرائيلي، والامن الوطني لسه بيشتغل ضد الناس. 

الحالة الاقتصادية عشان تتحسن لازم الناس تستعيد الثقة مع المجلس العسكري، انا عايزة اوضح ان انتوا دايما بتفهمونا غلط، ودايما بتعتبرونا بنشتمكم، احنا لو ما كانش لنا عشم في القوات المسلحة المصرية ما كناش هاجمنا ولا اتكلمنا، كنا عملنا زي ما عملنا مع الامن المركزي، احنا بصراحة بنحتقر امن الدولة والامن المركزي، لكن بنحب الجيش المصري، والاثر النفسي لتعذيب الجيش المصري للمتظاهرين اقوى بكتير من الاثر البدني، لازم تبطلوا تضربونا، ولازم الثقة ترجع، وعشان ترجع يجب الافراج عن كل المعتقلين، واعادة المحاكمات العسكرية، ورفع كل القيود عن وسائل الاعلام. 

فيه حاجات كمان بتكلف الدولة فلوس وبتساعد على انتشار الفساد وده بيهدد الحالة الاقتصادية، زي المجالس المحلية، وزي المحافظين اللي لازم يبقوا بالانتخاب، وانتخاب عمداء ورؤساء الجامعات، وعشان الامن يرجع لازم يتحاكم ضباط الشرطة المتورطين في ضرب المتظاهرين. 

(في الحتة دي طلع جوز نسوان قالوا: ما تخلصي بقى.. احنا مش عايزين نسمع الكلام ده، فاللواء محمود قال: لا.. سيبوها تكمل وتفضفض.. قلت له: انا مش بافضفض، انا جاية لك بتفويض من اكتر من 250 مواطن وانا لخصت كلامهم دي معجزة)

لازم يتم اتخاذ موقف حاسم من الشرطة، فاللواء قال لي: بس احنا مش ثوار، احنا جيش، يعني ما بنفهمش غير في ضرب الرصاص. قلت له: ليه كده يا سيادة اللواء، ده الجيش والشعب ايد واحدة. فالجدع بتاع جمعية جمال مبارك قال لي: والشرطة والشعب والجيش ايد واحدة. قلت له: لا انا اسفة، الشرطة هربت من واجبها من يوم 28 واول ظهور لها كانت بتحمي السفارة الاسرائيلية وبتضرب المصريين بالنار، تاني؟ بعد كل اللي حصل ده تاني؟ احنا مش حنقبل تاني ده يحصل. 

ولازم يبقى فيه شفافية، حضرتك قلت في كلمتك ان فيه اجندات خارجية وداخلية بتهدد الثورة وعايزة تفشلها، يا ريت تقول لنا ده مين، صارحونا، احنا في ضهركم ونعرف نحميكم، لأن عدم مصارحتكم لينا بتحطكم في موقف محرج، وبتخلي الناس تتهمكم انتوا، بالنسبة للاعتصامات الفئوية اللي كانوا بيقولوا عليها الزملا هنا عاملوها بكل حزم، الحزم الوحيد المقبول في حل الاعتصامات الفئوية هو حد اقصى وحد ادنى للاجور، بقى عايزين تتسامحوا مع رجال الاعمال اللي نهبوا مليارات وعايزين تتعاملوا بكل حسم مع عامل بياخد 400 جنيه؟ اعمل حد اقصى وحد ادنى للاجور وده مش حيكلفك لانك حتعيد هيكلة الوظائف والاجور من جوة المؤسسة وساعتها مش حتلاقي اعتصامات فئوية، لكن انا ما اقدرش اطلب من عامل بعد ما بات في الميدان 18 يوم انه يفضل يقبض 400 جنيه ويسكت. وبعدين قانون منع التظاهر ده مش عملي، وبينهك الشعب والجيش، لأن لا الشعب حيبطل يتظاهر، ولا الجيش حيبطل يضربهم طول ما فيه القانون ده، الغي القانون لانه منهك، وهو اللي بيعطل الانتاج، لان التعامل الامني بيخلي الناس تعند وتكمل اعتصام مش بتمشي، ثم طالبين نلغي التظاهر واصلا مافيش حاجة بيتم انجازها من غير مليونيات. 

الفتنة الطائفية اللي برضه بتعطل الاقتصاد مش حتتحل بالعرفي ولا بفض الاعتصامات، حتتحل بقانون دور العبادة الموحد وقوانين للمواطنة، والعدالة كمان كفيلة بانها تعيد الثقة بين الناس والجيش، مش معقولة ابراهيم كامل يبقى اول واحد ياخد براءة قدام محكمة عسكرية وعمرو البحيري ياخد خمس سنين وعايزين الناس تسمع الكلام. لازم يتم تحديد جدول زمني لتسليم السلطة لان الضبابية دي بتصيب الناس بالقلق، والناس القلقانة مش بتشتغل. واستمرار امن الدولة بيئذي البلد.. هم اللي بيعملوا الفتنة الطائفية، وهم اللي بيبعتوا البلطجية، لازم يبقوا تحت اشراف قضائي وحقوقي، واخلاء سبيل ضباط الشرطة المتورطين في التعذيب وضرب المتظاهرين عمره ما حيعيد الامن ابدا، ده حيزود الانفلات الامني. 

فيه ثروة بشرية اسمها العشوائيات، دي ممكن تدخل دخل للبلد، يعملوا ريسايكل للزبالة، مشاريع غزل ونسيج، بس هم مش عايشين في امان، هم مش بلطجية، البلطجية الهربانين من السجون هم اللي بيهجموا عليهم والشرطة العسكرية مش بتسأل فيهم والامن مش بيحميهم، فيه حاجة كمان حتفيد الاقتصاد: محاكمة اعضاء الحزب الوطني المتورطين في الفساد، الناس دي احنا محتاجين فلوسهم مش يتسابوا كده. 

الاعلام مهم جدا للتواصل مع الناس، وفيه ناس مدربة على النفاق حتى لو ما جلهاش اوامر، لازم السياسة نفسها تتغير. وما ينفعش حل مشاكل الطائفية بناس مثيري الطائفية زي محمد حسان، ويحيى الجمل دوره ايه في الحياة؟ بيعمل ايه يعني؟

(اللي في القاعة: تؤ تؤ تؤ.. بس بقى.. اللواء: سيبوها تكمل)

الحوار الوطني اعضاؤه غير منتخبين وما يمثلوش الناس، مجلس الشورى مالوش لازمة لانه مصروف على الفاضي، وزير الداخلية لازم يبقى مدني عشان يحافظ على حقوق المدنيين ما يبقاش عقلية بوليسية. 

اخيرا فيه كام حاجة لو اتعملوا الناس حترتاح والاوضاع حتتحسن:

- المخلوع يروح سجن طرة بدل ما احنا بنصرف عليه ما يروح مستشفى طرة، يعني ايه مش مناسبة له؟ ما هو اللي عاملها للناس يدوق اللي هو عمله للناس

(الناس اللي في القاعة: اففففففففففففففف تؤ تؤ تؤ) 

- اعادة هيكلة المؤسسات واجورها

- تغيير المحليات والمحافظين يبقوا بالانتخاب

- مافيش اعتصامات تتفض تاني بقى.. لا بالقوة ولا بالذوق، الاعتصام يتفض بالاستجابة للمطالب، ماحدش يمد ايده على المصريين

واللي اتقبض عليهم يطلعوا كلهم

-------------------

طبعا حتسألوني فاكرة الكلام ده كله ازاي، حاقولكم لاني كاتبة النقط على الكمبيوتر وطبعتها، فافتكرت كلام، وفيه نقط كتبتها في الجلسة افتكرت بعضها، والبعض الاخر مش فاكراه، زي ان في الاخر فيه نقطة خامسة مش فاكراها، بس فاكرة اني وانا راجعة مكاني واحدة محجبة وحاطة برنيطة على حجابها قالت لي: انتوا زودتوها قوي

اللواء محمود قال: طبعا احنا بنحييها لانها من شباب الثورة.. بس انا مش فاهم حاجة خالص، واكيد فيه ناس من الحضور ممكن يتكلموا مع الشباب ويفهموهم اكتر مني، لاني مش عارف افهم هم بيفكروا ازاي؟

!!!!!!!!!!!

بعدين قام الراجل اللي من جمعية جمال مبارك، واللي فضحه كان حسين عبد الغني، اول ما قال انا من جمعية شباب مش عارفة ايه راح حسين عبد الغني معلي صوته وقال: دي بتاعة جمال مبارك

الراجل ده قال: لازم يبقى فيه حسم وحزم في التعامل الامني.. فاللواء قال له: يعني ايه حزم بقى وحسم، فهموني عشان احنا جيش، يعني اول ما تقول حسم وحزم نفهم انك بتقول اضربوا بالنار

فقال له: اضرب بالنار

فاللواء قال له: نضرب بالنار؟

فجلال امين وحسين عبد الغني وانا وابو العلا ماضي وكام حد تانيين قالوا: لا لا لا.. وبعدين قلت له: او نجرب فيك يا استاذ.. انت اول واحد ينضرب بالنار، وحسين عبد الغني قال له: احنا مش محتاجين ناس فاشيست زيك

بعدها محمد صبحي اتكلم وقال: احنا كلنا ضد اسرائيل بس احنا مش عايزين ناس تحطنا في مواجهة مع اسرائيل زي اللي راحوا يقتحموا السفارة امبارح، راح اغلب اللي قاعدين صقفوا. وبعدين قال لازم يبقى فيه حسم وحزم، اي بلطجي يقتحم قسم اي بلطجي يعتدي على الناس اضرب بالنار فورا (تصفيق من القاعة) واي حد يعمل فتنة طائفية ياخد اعدام شنقا، ست شهور بس الفتنة دي حتخلص (تصفيق من القاعة). رحت باصة للظباط اللي واقفين ورايا وقلت لهم: انتوا عايزين تقتلونا؟ راح واحد منهم قالي: هو انت بتقتحمي قسم؟ قلت له: احيي بلطجي ولا تقتل بريء.. راح ساكت. 

بعد شوية جه مدير الاوتيل - هو ظابط جيش او مخابرات عسكرية ما اعرفش عشان لابس مدني - وقعد جنبي وقعد يرسم لي على الورقة ويقول لي انا عندي شقة، جبت كهربا بعشرتلاف جنيه، وما دفعتهمش، ده اسمه الدين الخارجي، جبت مقاول يشطب لي الشقة بميت الف جنيه، وما دفعتهمش، ده اسمه الدين الداخلي وبعدين سبت لمراتي 20 جنيه عشان تدفع فاتورة الكهربا، هو ده الاحتياطي بتاعنا. نعمل ايه؟ قلت له ايه الناس الفاشيست اللي انتوا جايبينهم دول؟ هم دول بقى اللي قلبوكوا علينا بعد ما كان الجيش والشعب ايد واحدة؟ قال لي: كل واحد فيهم كان بتاع مبارك واستفاد من مبارك ودلوقت جاي بيتكلم عن الثورة، عشان كده باحب ابوكي، عشان هو اللي شتم مبارك في وجوده، مش زي عبد الرحمن الابنودي اللي كان بيبوس ايد مبارك واول ما مشي عمل ثوري.. فماندي فهمي قالت له: طب ما انتوا اللي داعيينهم. قالها: نعمل ايه؟ احنا محتاجين مساعدة الناس، عايزين حد يحط لنا خطة كويسة عشان نجتاز المرحلة دي. قلت له: لو كان فيه خير ما كان رماه الطير، لو دول بيعرفوا يحطوا خطط ما كانش مبارك سقط.. اداني ورقة وقلم وقال لي: خدي اكتبي لي اسماء الناس اللي ندعيهم الاجتماع الجاي.. احنا خلاص ما بقيناش عارفين انتوا عايزين مننا ايه؟

كتبت كل اللي موجودين على الفون بوك بتاعي

ولما يتصلوا بيكوا روحوا

روح يا اخويا منك لها له.. روحوا واتكلموا وقولوا كل حاجة.. ده جيش مصر يعني، ولا ما يشبهش الفريدم هاوس، والمعهد الديمقراطي، والسفارة الامريكاني، وفريدريش ناومان، والسفارة التركي، وكود بينك، والبوسنة، والهند والسند وبلاد تركب الافيال، ما بتقعدوا مع طوب الارض ولما بنكلمكم بتقولوا: مش مهم انا رحت فين؟ المهم انا باقول ايه.. هو ده كان جيش اسرائيل؟ تسعين في المية من اللي راحوا الاجتماع ده راحوا عشان يلحسوا الجزم يمكن المجلس العسكري يرمي لهم عضمة يقرقشوا فيها، وكل اللي نازل عليهم: اضربوهم، احرقوهم، موتوهم، انسفوهم... لو نص العدد ده كان ناس عندها ربع انسانية السياسة اللي مضايقانا حتتغير، ذنب اللي حيموت بعد كده في رقبتكم لو ما رحتوش.. اديني باقولكم، الاغلبية اللي بترضى تروح بتحرض على قتلنا وش

انا كتبت كل اللي اعرفهم.. واللي حتجيله دعوة ومش حيروح حسبي الله ونعم الوكيل فيه، واللي حيروح ومش حيقول كل اللي في بطنه حسبي الله ونعم الوكيل فيه

حسين عبد الغني اتكلم كلام رائع، وركز على نقطة اساسية: انا شايف ان كل اللي بيتكلموا مسميين الثورة "الكارثة اللي حصلت" مافيش كارثة حصلت.. فيه ثورة عظيمة حصلت، ومافيش ازمة، ومافيش مصيبة حتحصل، الشرطة بتعاقب الشعب، وده مش مقبول.. راحت برضه واحدة كده طالعة لوحدها وقالت له: بس بقى.. خلص

راح شاخط فيها وقالها: هو انت مديرة الجلسة ولا سيادة اللوا؟ 

وراح مكمل كلامه، وقال ان فض الاعتصامات بالطريقة دي مش مقبول، واننا بنحب القوات المسلحة، لكن لو سمحتوا اسمعونا، كده الرصيد خلص، واذا ما كانش عقول ثورية هي اللي تدير المرحلة دي البلد مش حتمر بامان، ماحدش يعند مع الناس. 

جلال امين قال نفس الكلام تقريبا، بس قال ان ده مش وقت الحد الادنى للاجور، لكن ممكن نرفع الاجر بشكل مؤقت لحين استصدار قانون بالحد الادنى للاجور. 

اه نسيت.. ابو العلا ماضي اتكلم عن الضريبة التصاعدية. 

وبعدين قالوا لنا تعالوا على الغدا:

رحنا على الغدا، لقيت اللواء محمود بيقول فين نوارة؟ انا عايز اقعد جنبها.. انا جاي اقعد جنبك بقى عشان افهم انتوا بتفكروا ازاي؟ اصل احنا عايزين نفهمكم، هو انتوا ليه مش كلكم حاجة واحدة؟ فيه ستميت ائتلاف، واحنا مش عارفين نكلم مين، يعني انت مثلا تبع مين؟ قلت له انا مش تبع حد، قال لي: شوفتي؟ اهو احنا بقى مش عارفين نتعامل كده.. كل شوية حركة وائتلاف وحزب لما دوخنا

قلت له: بس دي حاجة كويسة.. دي حرية

قال لي: ماشي.. بس احنا مش فاهمين منكم حاجة، وعلى طول انتوا زعلانين

فمدير الاوتيل الظابط قال له: هم بيحبوا بلدهم، وعايزينها احسن بلد، بس الظاهر فيه مشكلة تواصل بينا وبينهم، يعني مثلا انا باشوف ناس بتعمل كروت ويكتب فيها: فلان الفلاني.. ثورة 25 يناير. 

(حقة فيه حد بيعمل كده؟)

وبعدين جات الولية ام برنيطة وقعدت تاكل في دماغه لحد ما احد الظباط قالها: هو عايز ياكل.. فراحت باصة لي ومتخانقة معايا تاني وقالت لي: انتوا زودوتها.. وراحت باصة للواء وقالت له: دول عايزين يمشوا البلد على كيفهم، هم مين عشان يتكلموا نيابة عن الشعب، وتبص لي: لعلمك يا حبيبتي، انا باحضر هنا من زمان.. والظباط واقفين يضحكوا وانا مذهولة، قلت لها: انت بتحرضي علينا؟ قالت لي: ايوة باحرض عليكم

وبعدين قلت للواء: لو سمحت كفاية ضرب، وبلاش اعتقالات، وافرجوا عن المعتقلين.. فقال لي: حاضر... واللي اخدوا محاكمات عسكرية حتتعاد محاكمتهم وحتى الظباط اللي اعتصموا، المفروض ياخدوا اعدام، بس مش حنديهم اعدام عشان البلد في حالة استثنائية. قلت له: ده فيه تلاتة منهم ماتوا. قال لي: والله العظيم مافي حد مات منهم، والله العظيم ما في حد مات منهم، والله العظيم ما في حد مات منهم.. وبعدين برضه اتلمت عليه شوية نسوان قعدوا ياكلوا في دماغه، لقيت ظابط صغير كده، مش حاقول رتبته، اولا عشان مش بافهم في الرتب، ثانيا مش حاقول كان على كتفه ايه عشان ما يتئذيش، ثالثا: الشهادة لله مز يعني، حرام يروح في داهية

مال عليا وشوشني وقال لي: انت عارفة اللي حصل مع العيال بتوع سفارة اسرائيل امبارح؟ دول مقبوض على شوية منهم ومتوجه لهم تهم انهم حاولوا يقتحموا السفارة واتلاف منشآت عامة وممكن يروحوا في داهية

قلت له: مش صحيح، دول عشان يقتحموا السفارة لازم يطلعوا في الاسانسير، كل اللي عملوه انهم زقوا الحاجز، وكانوا بيتكلموا مع الجيش عشان ينكس لهم علم اسرائيل وهم بيتكلموا فوجئوا بالامن المركزي بيضرب 

فقال لي: طيب كلمي اللواء محمود عنهم.. وخدي منه وعد يطلعهم

قلت للواء محمود: انا مش حاكل الا لما انت تقعد، اول ما قعد قلت له: فيه عيال مقبوض عليها امبارح، يعني ما بقاش الا يتحاكموا عشان اسرائيل.. قال لي: ما كانوا حيخربوا الدنيا امبارح. قلت له: لا مش صحيح.. طلعوهم لو سمحت.. فقال لي: ربنا يسهل ان شاء الله

وبعدين جات ست كده قعدت تاكل في دماغه وعايزة تعمل معاه حوار، قال لها: لا.. انا مش قادر اتكلم انا بالنسبة لي نوارة اهم عشان عايز افهم شباب الثورة.. فضلت تكاكي وتاكل في دماغه وتشتمني انا وشباب الثورة في وشنا

وبعدين هنج خالص وبقى شكله تعبان، فقلت له شكلك تعبان مش حينفع نتكلم، فمدير الاوتيل قال له: هي كتبت لنا قائمة بالناس اللي ندعيهم وربنا يسهل، هي مش عاجبها اللي حضروا النهاردة وبتقول انهم ثورة مضادة.

وبعدين سلمت عليهم ومشيت

بس خلاص

-------

احنا حنعمل ايه؟

حنعمل حشد لقضايا الاجماع الوطني.. ما عادش ننزل الجمع باعداد قليلة ابدا

نمسك قضايا الاجماع الوطني قضية قضية

ونرجع الجمع لقوتها تاني.. غلطنا جدا اننا سبنا الشارع

وغلطنا جدا اننا فتحنا مواضيع بعيدة عن الاجماع الوطني تخلي شكلنا عار في الميدان

وغلطنا جدا اننا كنا مش بنروح نقابلهم ونقولهم اللي في نفسنا

وانا من ضمن اللي غلطوا

بس طبعا مش عشرين مليون حيقابلوهم

لكن على الاقل مليون واحد ينزلوا في قضايا الاجماع الوطني 

ونعمل مؤتمرات شعبية

مؤتمرات شعبية ومليونيات.. مارشات عسكرية وقرآن

وربنا يستر

بس على فكرة.. البلد مليانة زبالة.. وياما زبالات لابسة بدل وبرانيط

عايزين ايه من الجيش؟

بسرعة كده

انا كنت في النمسا لمدة يوم ونص باحضر احتفال مصريين النمسا ببعض المصابين، هم بيعالجوا المصابين المصريين، وعالجوا ناس مصابة في عينيها، وانا عندي كونتاكتس ليهم اي حد شايف ان فيه حالات محتاجة علاج برة يا ريت يقول لي.

تاني حاجة

انا جات لي دعوة لحضور ندوة عاملها المجلس العسكري مع الاعلاميين عشان يتكلموا عن ثورة 25 يناير

كل اللي نفسكم فيه بقى اكتبوه هنا لو سمحتوا، عشان حاعمل زي ما عملت مع وزير التعليم العالي وانقل كل الكلام اللي انتوا كاتبينه والنقط اللي انتوا حاطينها وانقلها كلها ان شاء الله

قبل كده ما كنتش باقابل اي حد من طرف الجيش

بس انا حاسة ان التوقيت ده انا محتاجة اقابلهم واقول كل اللي في نفسنا بوضوح وعلى بلاطة

يالا.. اكتبوا اللي نفسكوا فيه

صلاة الفجر بكرة في التحرير: الكنيسة والازهر... هم الاخوان فين؟

تحديث:

اخيرا... الجزيرة مباشر والبي بي سي حينزلوا يصوروا صلاة الفجر في ميدان التحرير.. ما تكسفوناش بقى

بكرة صلاة الفجر ان شاء الله حتبقى كالآتي:

- التجمع حد اقصى الساعة 1:45 دقيقة عشان صلاة الفجر حتبقى ان شاء الله الساعة تلاتة ونص، وفيه ناس كتير حتبقى موجودة من قبل كده

- امام صلاة المسلمين حيبقى الدكتور صفوت حجازي، وفيه شيوخ ازهريين جايين ان شاء الله

- المسيحيين بقى.. عسسسسسسللللللل

مبدئيا شبرا كلها جاية ان شاء الله... 5 كنائس من شبرا جايين، واللي موجودين في ماسبيرو جايين علينا في التحرير ان شاء الله

الصلاة ستكون لـ:

دعم الانتفاضة/ الوحدة الوطنية/ االتأكيد على مطالب الثورة

تصدقوا ان الاخوان لحد دلوقت ما قالوش اذا كانوا جايين يصلوا ولا لا.. اصل يعني لما بييجوا بيعلنوا، وفيه ناس قالت الاخوان عاملين دعوة لصلاة الفجر في المساجد!

هم قبل كده كانوا متعودين يصلوها فين؟

يا سبحااااان الله على 

صلاة فجر

وعشان فلسطين

واللي حاضرها 5 كنائس من شبرا والاخوان مش حاضرين؟ هو انتوا ايه اللي حصل لكم؟ ايه اللي حصلكم؟ وامبارح من الاخوان ثقة يعني بس مش حاقول اسمه قال لي يا نوارة دول ما كانوش عايزين يعملوها عشان فلسطين وانا اللي اتخانقت معاهم؟ وواحد منهم فعلا يقول لي في وشي "هو ده وقت فلسطين"؟ ينفع  الكلام ده كده؟ هو التحالف مع اخوات كاميليا وعبير ورحاب ونفيسة بيعمل ده كله؟

ما كانش العشم ابدا على فكرة

لا انا زعلت بجد... زعلت واتصدمت... يا رب يكون اللي قالوا لي الكلام ده يكونوا فاهمين غلط لأنهم مش متعودين يكدبوا

الائتلاف حاضرين... واللي اعرفهم من الائتلاف حاضرين وداعيين يساريين وليبراليين ههههههههههههههه هو ايه اللي بيحصل؟ كل الناس دي جاية تصلي ونسيت اللي كان في النص؟ 

يالا.. ان شاء الله حتبقى لحظة حلوة.. والتحرير ارض مبروكة والدعوة فيها مجابة، والغايب هو الخسران

وعلى فكرة يعني.. اللي خايف من الجيش، الجيش مش حيعترض خالص.. خالص يعني، بالعكس بقى، بس انا مش مصدقة ان فيه ناس خايفة من الجيش اصلا.. معقول؟ معقول؟

لالالالالالا اكيد انا فاهمة غلط او اللي قال لي فاهم غلط

ع التحرير انا رايح اصلي... مهما جرالي ومهما حصلي

ايد واحدة.. ايد واحدة :) مبروووووك

احب انوه ان ائتلاف شباب الثورة اللي انتوا نازلين فيهم شتيمة دول هم اللي اجتمعوا بعصام شرف امبارح والنهاردة واكلوا دماغه عشان يصدر بسرعة قانون دور العبادة الموحد وتجريم التمييز الطائفي

مبروك

:)

ربنا يخلي لنا كاميليا وعبير وتريزة وابو يحيى وابو انس وابو زبعبع وابو ريالة... لولاهم ما كانش ربنا كرمنا كده

هه؟ حد عايز اخته تاني؟ 

انا عندي ليكم خبر، كاسي نبيل اسلمت وخاطفينها ومخبينها في مثلث برمودا.. يالا بسرعة روحوا كلكم هاتوها

انا مبسوطة قوي :) عمالة اعيط من الفرحة، مش مصدقة ان اليوم ده جه.. قانون دور العبادة الموحد؟ ياااااااااااا ربيييييييييييييييييييييي الحمد لله.. حلم ولا علم؟

---------

انا كلمت ناصر من ائتلاف شباب الثورة، والدكتور صفوت حجازي، ومحمد جبريل عشان نعمل مليونية الفجر في التحرير

وعرفت امبارح من بولس على التويتر ان فيه صلاة باكر وترانيم ان شاء الله

يالا بقى.. الحاضر يعلم الغايب

مليونية صلاة الفجر يوم الجمعة الجاية عشان فلسطين

تحديث:
اقروا بقى الكلام العنب اللي حينفعنا في حياتنا
تحديث:
الشيخ جبريل عامل مليونية فجر في عمرو بن العاص، بس انا حاحاول اوصل له عشان يعملها في التحرير احسن
تحديث:
اسكندرية اجدع ناس
تحديث:
وفي اليوم ده فيه ناس رايحة رفح
هاااااييييل.. اللي حيروحوا رفح كام؟ الف الفين تلاتة عشرة؟ 
عايزين بقى مليون واحد بيصلي الفجر في التحرير من اللي مش رايحين رفح
بحيث دولم يبقوا رايحين رفح... وناس تانية بتصلي في التحرير في ضهرهم، في الفجر
دي احسن فرصة لقتل الفتنة الطائفية
واحسن فرصة للعودة للاجماع الوطني
واحسن فرصة للتأكيد على مطالب الثورة...
-----------
أظن فيلم النسوان والمسلمين والمسيحيين ده خلصنا منه بعد ما طلع ان اللي دبروه واحد مسلم وواحد مسيحي ايد واحدة اسم الله عليهم، ومقبوض عليهم الاتنين دلوقت وبيتشمطوا

دماغنا بقى شوية من الوش ده

اي حمار بديل وبردعة في البلد دي خلاص عرف ان اللي عمل احداث امبابة كان عاملها عشان يفشل مشاركة مصر - التي لا يستهان بها ابدا - في الانتفاضة التالتة

مشاركة مصر حتبقى مليونية صلاة الفجر يوم 13 مايو

هم كاتبين مساجد... مساجد ايه؟ هو فيه مسجد في مصر يساع مليون؟ ده اولا

ثانيا: انت حيجيلك عيال مش بيركعوهاش ويمكن جايين من غير وضوء اساسا عشان يخوفوا اسرائيل من منظرهم وهم بيصلوا، يعني العيال دي جاية تخوف اسرائيل... مين حيصورهم جوة المسجد؟ 

التحرير... التحرير... مليونية صلاة الفجر في التحرير.. والتجمع يبدأ من الساعة 2 بالليل. واللي جاي حيبقى مسلمين ومسيحيين

بالنسبة لاسكندرية ما يتخافش عليهم.. بالنسبة للسويس ما يتخافش عليهم.. بالنسبة لاي محافظة تانية ما يتخافش عليهم

وبصراحة لو الصعيد عرف يعمل مليونية واحدة في صلاة الفجر يبقى معجزة.. ولا بلاش لتقلب بخناقة في اخر اليوم... خليكم خليكم، انا عارفة انكم بتزعلوا من الكلام ده، بس بصراحة.... ولا بلاش... طب ما تورونا نفسكم يعني، اعملوا مليونية صلاة فجر، مسلمين ومسيحيين، وما تمسكوش في بعض اخر اليوم وبعدها يبقى لكم حق تزعلوا لما اتكلم انا كده.. وساعتها حادور بميكروفون اقول انا اسفة يا صعيد

المسيحيين كمان عندهم صلاة الفجر، ومش بيصلوها برضه زي اغلب الشباب المسلم المصري ههههههههههههههههههههههههه والنبي احنا مسخرة

النداء دلوقت موجه الى كل من:

1- الاخوان المسلمين اللي اختفوا في ظروف غامضة... مش عارفة ساكتين اليومين دولم ليه؟ مافيش يا عيني غير صفوت حجازي اللي عمال يصلح ده، ويكلم ده، ويهدي ده.. وسايبينه لوحده

2- ائتلاف شباب الثورة

3- مينا زكري يكلم الكنائس عشان قداس الفجر

4- يسري فودة بالاسم

5- الجزيرة مباشر مصر

6- ابراهيم عيسى ومحمود سعد وبلال فضل بالاسم

7- صفحة خالد سعيد.. اللي هو وائل غنيم بالاسم

مليونية صلاة الفجر للمسلمين والمسيحيين في التحرير، ويتحشد لامها بقى من دلوقت وبسرعة، كل مرة نحشد من يوم الاربع كده؟

مليونية كله ييجي يصلي... مسلمين ومسيحيين ييجوا يصلوا، انتوا ما بتفلحوش الا وانتوا بتصلوا، عشان بتبقوا ساكتين ما بتقولوش كلام من مخكم.. بتقولوا كلام ربنا بس

المليونية دي للاهداف التالية:

1- دعم الانتفاضة التالتة 

2- وحدة وطنية

3- التأكيد على مطالب الثورة

4- واهم حاجة... مصر ما عادتش تعيد تاني على اسرائيل في "عيدها القومي" زي ايام المخلوع

مافيش انقاذ للبلد غير اليوم ده.. لو سمحتوا اهتموا شوية، ووزعوا على قد ما تقدروا، ونزلوها في كل حتة

اديني خلصت ضميري من ربنا واللي يكسل بقى الذنب في رقبته.. انا كده براءة يا رب

ملحوظة اخيرة:

الدول العربية كلها عاملة مليونية صلاة الفجر.. حيبقى شكلنا عاااااااار لو اكبر تعداد سكان في العالم العربي فشل يعمل مليونية وتيجي الدول اللي تعدادها خمسة وعشرة مليون يفلحوا ويعملوها... لو حصل ده ما ترجعوش بقى تتنططوا على الناس تاني