كن مع الثورة

بالنسبة للي عاملين ثوار وبيقولوا مش حننزل مع الفلول:

والله اذا ما كنتوش اخوان خلايا نايمة، وانا اشك في ذلك، فحضراتكوا ناس خونة وانانية... انتوا خايفين الاخوان لو مشيوا ييجي نظام يعمل فيكوا مصيبة

طيب انا اقولكوا... انا ما عنديش اي مشكلة ييجي نظام يشنقني في ميدان عام، بس يأمن منابع النيل، ويرجع سينا، ويأمن قناة السويس
وللاسف السبب في ان مطالبي تدنى كده هم الاخوان اللي انتوا بتدافعوا عن استمرارهم، ولما تقول مش نازل عشان فيه فلول نازلين تبقى بتدافع عن استمرار الاخوان

احنا كان مطلبنا عيش حرية عدالة اجتماعية، بعد سنة ونص من الحكم العسكري بقى مطلبنا: خرج المعتقلين يا مرسي وعيد المحاكمات، بعد سنة من حكم الاخوان بقى مطلبنا: دوروا لنا على مصر ورجعوها تاني.. وقعت منا في البلاعة

انما انتوا ما اتئذيتوش من الاخوان، وغالبا مش حتتئذوا لانكوا غالبا اخوان.... او مش اخوان بس بتحترموهم... ويمكن لو جه نظام تاني نعيد الكرة من جديد والمرة دي امن الدولة والمخابرات عارفة اساميكوا وشوشكوا فانتوا خايفين على نفسكوا، طبعا دي خيالاتكوا المريضة، ان شاء الله مش حيحصل لمصر غير كل خير، انما موقفكوا بيبين وساختكوا.. ومش مهم البلد دي تنقرض باستمرار حكم الاخوان فيها.. صحيح احنا مالنا؟ هي كانت بلدنا؟

انا ما عنديش ادنى ثقة في اللي عامل ثوري وبيقول مش نازل يوم 30/6 ولا حاوقع تمرد عشان في فلول نازلين

وعندي تصور شبه يقيني انهم اخوان، بصرف النظر ان فيه منهم ناس نزلت معانا اشتباكات فعلا، ممكن نازلين يراقبونا، او ده دورهم يندسوا وسطنا زي الواد ده... بس هم اخوان، والا ايه معنى الكدب والتضليل ده؟
هم عارفين كويس قوي ان فكرة تمرد والحركة كلها والتوقيعات اللي عاملها مجموعة من الشباب ثوار عارفينهم بالاسم وبالاشتباكات اللي شاركوا فيها من اول الثورة ومن قبل الثورة كمان، ممكن نستخرج منهم الغاز في حال ما اذا حصلت ازمة من كتر ما شموه، وفي منهم محمود بدر اللي عصر لمون على مرسي، وبقية زملاؤه قاطعوا
وهم عارفين كويس ان الشباب دول هم اللي حددوا معاد 30/6 وانه لاقى قبول عند الناس
وعارفين كويس ان اللي نازل وهو انتخب مرسي اضعاف اللي نازل من اللي انتخبوا شفيق، ولو ان ضميري ما يسمحليش اصف كل من انتخب شفيق بانه فلول
فلول دي يعني من فلول النظام السابق، بمعنى مستفيد بشكل مش شريف من النظام السابق، وكان له يد في استمراره بشكل او بآخر... انما واحدة قاعدة في البيت مع عيالها وبتشتم في اللي خربوا البلد عشان مش عارفة تودي عيالها التمرين دي فلول في ايه؟ دي حمارة بس.. ايه اللي عملها فلول؟
الحاجة التالتة اللي هم عارفينها وبيضللوا الناس فيها ان الاخوان مافيش فيهم فايدة
هم ليه حاطين تنظيم الاخوان الدولي اللي ماسك السلطة في كفة وشوية ناس غير منظمين كان لهم وجهات نظر مبنية على الفرجة على القناة الاولى في كفة تانية وهم عارفين ان ده ظلم بين... الناس دي على الطراش اللي كانت بتقوله طول السنتين ونص مافيش في ايدهم حاجة يعملوها عشان يئذوا بيها حد، ولا يقتلوا حد، ولا يحرضوا على حد
الناس دي اللي كانت بتدافع عن المجلس العسكري من البيت على اكاونت الفيس بوك، مش هي اللي راحت عملت صفقة مع المجلس العسكري عشان تستلم منه السلطة ولا هي اللي خرجته خروج آمن وادته قلادة
الناس دي اللي كانت بتقول منكوا لله خربتوا البلد مش عارفين نروح مارينا، مش هي اللي نزلت ناس بدقون يوم ماسبيرو يمشوا مع الجيش عشان يبينوا ان الموضوع خناقة ما بين مسلمين ومسيحيين، واللي نزل يوم ماسبيرو شاف الناس اللي بدقون اللي كانوا ماشيين مع تشكيلات الجيش، ومش هم اللي قالوا لمحمد حسان يطلع على التلفزيون يكدب ويقول ان المسيحيين بيضربوا الجيش
الناس دي مش هي اللي حرضت علينا واحنا في محمد محمود، واللي اقنع الناس دي ان اللي في محمد محمود بلطجية هم الاخوان نفسهم، ثم الناس دي مش هي اللي جرجرتنا على محمد محمود وخلعت ابتداءً... افتكروا كده اللي اتسبب في احداث محمد محمود كلها كان حازم ابو اسماعيل اللي جرنا وخلع منا.. واللي طلع انه هو وحركته اخوان.. مش اللي قاعدين في البيت يقولوا منكوا لله خربتوا البلد
الناس دي اخرها شوية رغي خايب، وندالتهم في انهم ما نزلوش طول السنتين اللي فاتوا.. والحمد لله.. دول كانوا حينزلوا في اشتباكات دول؟ ده احنا دلوقت بنقنعهم انه لما يحصل اشتباكات ما يروحوش.. بس يقفوا ورا الشباب
واللي عاملين ثوار وبيقولوا مش نازلين مع الفلول بيطرحوا ايه المقابل؟ استمرار حكم الاخوان؟
ده على اساس انهم ثوار؟
الاخوان اللي كانوا سبب مباشر في قتل صحابنا طول فترة الحكم العسكري؟ 
هم الاخوان امتى كانوا ثوار ولا حتى كانوا حلفاء ثورة؟ دول نزلوا عشر ايام بس في الثورة عشان يطلعوا اللي لهم في السجن وشكرا، واتفقوا بعد كده مع المجلس العسكري انه يصفي القوى الثورية في الشارع عشان يخلى لهم الجو في الانتخابات
طب معلش بقى 
العيش والملح والاشتباكات مش اغلى من بلدي
اللي عامل ثوري وبيقول مش نازل عشان الفلول علموا على وش امه.. ده اخوان وش
عشان ده ما بيعملش حاجة غير انه عايز الاخوان يستمروا في الحكم
والاخوان ما ينفعش يستمروا في الحكم عشان مصر تستمر، ما يا تختاروا مصر يا تختاروا الاخوان
والكلام بتاع احنا اصلنا مش جاهزين ببديل للاخوان وحييجوا الفلول.. طب انت جاهز ببديل لمصر لما الاخوان يستمروا؟
واحد سايق اتوبيس ودايس بنزين وحينط بالاتوبيس من على حافة الجبل... اديله فرصة لما نقع من فوق حافة الجبل وبعدين اجيب غيره؟

الاخوان مش نافعين لا باليمين ولا بالشمال ولا من فوق ولا من تحت.. خالص.. ولو كان الاخوان مش نافعين وزي قلّتهم كنا سيبناهم يكملوا المدة وشوفنا غيرهم، انما المصيبة البعدا كل يوم قالبين حتة في البلد خرابة جديدة... افتتاح الخرابات، من اهم انجازات الرئيس مرسي والفنان محمد بديع والمطرب خيرت الشاطر... بيفتتحوا كل يوم خرابة جديدة في مصر، كل ما كان عمران، ولو بقوة الدفع الذاتي، يسعوا وراه لحد ما يخربوه... طب في كل ده كله سيبك من الاكل والغلا والكوى والسولار والبنزين وقطع الكهربا والمية... كل ده نستحمله، ما نستحملوش ليه؟ استحملنا اوسخ منه

ونستحمل الشعور المرير لما احنا يتقبض علينا ونتقدم لمحاكمات وجنايات وكمان يتهم جزء منا بالارهاب، ومن مين.. من عاصم عبد الماجد، في نفس ذات الوقت اللي علاء وجمال مبارك وحسن عبد الرحمن يطلعوا براءة... ويبقى البغل احمد المغير ابو شومة "فنان" وتبقى رشا عزب اللي ما شافتش بيتها الا طشاش من قبل ما تقوم الثورة وهي يا في مظاهرة يا في مشرحة يا في مستشفى يا على المعبر تبقى هي البلطجية اللي عايزة دولة ظلامية! اه وربنا احمد المغير قال على رشا انها عايزة دولة ظلامية، ولما رشا قالت له ما تبص على نفسك وعلى الكلام الخرا اللي بتقوله ريهام السهلي قالت لها من غير الفاظ تخدش الحياء! يعني انت يا ريهام مش مخدوش حياءك تطلعي المغير في التلفزيون على مرأى ومسمع من الاطفال والقصر والمراهقين والعذراوات ومخدوش حياءك من كلمة "خرا" اللي هي اقل توصيف لكل اللي احنا فيه؟ طيب لو كانت قالت كاكا؟ لو كانت قالت براز؟ خلاص.. نبقى نقول براز يا ولاد

احنا نستحمل ده كله، ونستحمل وساخة اكتر من كده، ونستحمل نبقى مأكلوين مذمومين، والجدعان اللي بيتمرمطوا عشان اللي قاعد في البيت يعيش عيشة احسن ما طلبش شكر.. بس بتشتموا ليه؟ ومع ذلك نستحمل.. ونستحمل خوض في الاعراض، وافتراءات، وكوابيس وشوش صحابنا اللي ماتوا.... كل ده نستحمله وماله

نستحمله يا اخوان الشياطين.. ياللي لو قلت عليكوا كفرة الكفرة تزعل.. في ناس كفرة محترمين، اشتمهم ليه؟

لكن نستحمل ازاي ان حدود مصر يتلعب فيها؟ وان سينا تضيع منا؟ وان قناة السويس تخرب؟ والاهم من كل ده نستحمل ازاي النيل يروح؟
ده مرسي كل اما يتكلم اثيوبيا تطلع قرار ناقص تختم بيه: وربنا ما انتوا شايفين بق مية يا مصريين عشان تبقوا تنتخبوا بغل زي ده

ولما نقولهم النيل راح يقولوا لنا ده مبارك الخاين الوحش هو سبب المشكلة، ما احنا مشينا مبارك الخاين الوحش.. هو انتوا اللي يهمكوا تنفوا التهم عن نفسكوا ولا يهمكوا اننا نشرب؟ ما انتوا حتتوكسوا معانا ولا قطر حتبعت لكوا كراتين مية معدنية؟

احنا حاولنا مع الاخوان بكل الوسائل والطرق والكباري.. مافيش فايدة

يعني الاخوان اذا حدث كذب واذا وعد اخلف واذا عاهد غدر واذا خاصم فجر... وبلعناها

اوساخ وما نزلوش في الثورة كلها عن اخرها غير عشر ايام كل هدفهم فيها كان يطلعوا المساجين بتوعهم ويخشوا الانتخابات ومتشكرين على كده... وسكتنا

عملوا الفعل الفاحش مع المجلس العسكري على قارعة الطريق قدامنا كلنا وخونونا وكفرونا وشتمونا واحنا واقفين قصاد المدرعات والرصاص وشتموا صحابنا المتمددين في المشرحة.. وقلنا عند الله

خدوا السلطة بالغش والخداع والوعود الكاذبة.. وقلنا حسبنا الله

حنثوا باليمين اللي اقسموا عليه... وقلنا لا حول ولا قوة الا بالله

لكن كل يوم طالع بمصيبة تضرب الامن القومي في مقتل؟ وانت يا مرسي اول ما مسكت الحكم ما مسكتش ليه ملف اثيوبيا واول حاجة تعملها انك تروح وتحل المشكلة وتطول وتقصر وتعمل كل ما في وسعك عشان تحل المشكلة دي بشكل ناجع ونهائي ليه بدل ما قضيت سنة كاملة تطرقع بالقبقاب عشان تغيظ ضرايرك وده كل هدفك في الحياة؟
طب مش بلاش سؤال ليه ما حاولتش يا مرسي تحل، لانه سؤال متخلف.. طب ليه يا مرسي بتعقد؟ ليه؟
طب اثيوبيا قفشت علينا وحولت مجرى النيل.. ليه يا مرسي تستفز الناس وتذيع على الهوا لقاء يخليها تقول لو ضربتوا سدنا حنضرب لكوا السد العالي، طب ما خدتش بالك، ليه يا مرسي تعمل بعدها مؤتمر تهدد فيها الناس تهديد اهبل تقول بالدم بس اثيوبيا حلوة مافيش كلام وتهديدات كده لا تحارب ولا تخلا من النجاسة وتخلي الناس تعمل اجتماع توافق بيه بالاجماع على اتفاقية عنيتيبي؟ طب ما تسكت يا مرسي.. مش عارف تحل اسكت، بتعقدها ليه؟ اللي حييجي بعدك حيحل العك ده ازاي؟
وبعدين نقولهم ما ينفعش كده ونعترض ينزلوا يضربونا.. نقولهم طب امشوا يقولوا لنا رصاص حي... وانت تقولي نستنى لما نحضر بديل وما ننزلش احسن فيه فلول نازلين
تمرد حركة ثورية اللي اسسها ثوار، واللي دعا ليوم 30/6 هم الثوار... ولو فيه ناس حست بغلطها انها قعدت في البيت سنتين ونص من حقهم ينزلوا ومش من حقك تقصيهم كأنك ملكت الشارع وعامل لي كأن الاخوان هم اللي ثوار
ثم انت اخوان حضرتك
اللي بيقول كده اخوان
لو شفتوه في المعركة تفوا لي عليه

اخيرا:

الكلام اللي كاتبه مالك عدلي ده مهم جدا وحيحط النقط على الحروف بالنسبة ل30/6 يا ريت تقروه وتوزعوه على اوسع نطاق

خاف يا عيد

بصوا والنبي الاهبل ابن الامريكانية وتاجر العملة بيقول ايه؟

يامي يامي يامي يامي... تصدق اتخضيت؟

والنبي من ايام الاتحادية وصوت الرصاص الحي وحشني.. خصوصا انكوا غشم وبتضربوا بعض بيه

والرصاص الحي ده اجمد من رصاص الامن المركزي ولا من رصاص الجيش؟

ويا ترى الرصاص ده حتطلقه من الشاحن، ولا حتشوطه برجلك اللي فيها كرامب

وبيقولك: خلاص تقرر!

احنا ربنا رازجنا بابن امريكانية تاخين ورغاي يا مولانا ربنا ما يوريك

نفسي اعرف "تقرر" دي يعني ايه؟ عملوا اجتماع الافيال هو والمغير وخريت وقرروا ياكلوا كرنب ويبهدلونا معاهم؟

طيب يا ريت تآنسنا يوميها بس واحتياطي كده حنبقى جايبين معانا شواحن عشان لو نسيت شاحنك، ورباط ضاغط عشان رجلك... ولا حضرتك بتشتغل في المظاهرات كتاليست.. يعني مجرد عامل مساعد على التظاهر لكن لا تتظاهر؟

---------

الا بهذه المناسبة السعيدة متقدمة للجنايات ومتهمة باني فاعل رئيسي ضربت 125 واحد وكام ضابط شرطة وحرقت التوحيد والنور ومسجد بلال ومسجد الحمد وعدد اتوبيسيات وسيارات شرطة، وادلة الثبوت اللي النائب الخاص اداني بيها وعلى اساسها حولني جنايات تويتة كاتبة فيها: ولما انتوا غلابة كده امال بترغوا وتهددونا بحرب اهلية ليه!

فاعتبر النائب الخاص ان ده اكبر دليل على اني قتلت كل الشعب

والبغل ده طالع يقول حنستخدم رصاص حي لحسم الامور وماحدش بيسحب رخصه حتى... 

وهو ده تطهير القضاء اللي عايزه الاخوان

كل سنة واحنا طيبين بيك يا سيدنا الحسين

في هاذوها الظرف اللي مزاجي فيه متعكر، مناسبة سعيدة: النهاردة خمسة شعبان، عيد ميلاد سيدنا الحسين

كل سنة وانت طيب يا جدو

:)

أحب الله من أحب حسينا

يالا بالمرة الاخوان والسلفيين يتضايقوا عشان بنجيب سيرة سيدنا الحسين... مش عارفة بيتضايقوا من سيرته كده ليه؟ بس بالعند فيهم المصريين بيحبوا اهل البيت وحيفضلوا يحتفلوا بموالدهم دايما.. واهل البيت حيفضلوا معانا واللي مش بيحبهم هو اللي حيمشي

D:

دليل المتظاهر الجديد

احنا المرة دي نازلين مع مجموعة تعل قوي يا عيال.. 

بصوا.. عشان بس ما تنزلوش مزاجكوا متعكر اكتر ماهو ، هم مش افظع من الاخوان ولا حازمون اللي اتدبسنا في النزول معاهم قبل كده، يعني مثلا دمهم مش تقيل، اقفال شوية بس ممكن لو خدت واديت معاهم في الكلام تجيب نتيجة لانه ما بيسمعش كلام مسئول ولا ماشي ورا حد، هم ميزتهم انهم على باب الله زينا... بس العبط اللي هم فيه محتاج صبر 

مبدئيا الاخ والاخت المتظاهرين الجدد.. حضراتكو يمكن لو كنا قابلناكوا من سنتين ونص كنا عشنا مع بعض  قصة حب جميلة، لكن الحقيقة انتوا لازم تراعوا انكوا نازلين من بيوتكوا لسه فريش، بينما احنا طلع ميتين اللي جابونا على مدى سنتين ونص، ده غير ان حضراتكوا برضه اتفرجتوا كتير على القناة الاولى، وقعدتوا تقولوا علينا بلطجية، وطول السنتين ما سمعناكوش بتشتموا في الاخوان خالص اللي كانوا متحالفين مع المجلس العسكري، كنتوا بتشتموا فينا احنا وتقولوا علينا عملا وجواسيس وفريدم هاوس وماسونية وخربتوا البلد وحرقتوا المجمع العلمي والمسيحيين ضربوا الجيش وبتوع محمد محمود بلطجية وانتوا تغنوا والاخوان يطبلوا لكوا ويروجوا كلامكوا وما كنتوش على خلاف معاهم في حاجة.. لحد ما اختلفتوا على المرشح وده لانكوا مستكبرين ان واحد خارج من السجن يمسك البلد، وبعدين مسكوا الحكم فالبلد كده داخلة في حيط، فحضراتكوا قررتوا تنزلوا كتر خيركوا.. طبعا كل ده في الخلفية فمش حتلاقي نفوسنا صافية من ناحيتكوا يعني عشان نبقى واضحين مع بعض وما تطالبوناش نصفى من ناحيتكوا زي ما نزلنا نحتفل بسقوط شفيق كده وما كناش صافيين للاخوان وقعدنا نشتمهم في وشهم اول ما شوفناهم داخلين محمد محمود.. معلش اتعاملوا معانا على اننا حالات واقبلونا زي ما احنا كده لانكوا محتاجينا.. لكن احنا نصفى؟ صعب، لان انتوا طول ما احوالكوا كانت كويسة ما كنتوش مهتمين ابدا بان في ناس تعبانة في البلد... احنا بقى كانت احوالنا كويسة وكنا تعبانين عشان كان في ناس تعبانة في البلد.. كمان حضراتكوا على نياتكوا وبتتفرجوا على القناة الاولى كتير وما انتوش عارفين مثلا ان الاخوان على اتصال بالمجلس العسكري وامريكا من 2005 على اساس انهم يبقوا بديل مبارك لو الناس رفضت جمال، وان مبارك هو اللي كان سايبهم يتغلغلوا في العشوائيات والقرى والنجوع ويعملوا مليارات من جوه السجن، وان المجلس العسكري كان كل شهر يعمل لنا مدبحة عشان يخلي الجو للاخوان ويستعدوا للانتخابات بينما حضراتكوا كنتوا بتشتمونا، وان وصول الاخوان للحكم وفشلهم ده مصلحة احسن ما كانوا يفضلوا يتسولوا ويقولوا انهم مظلومين، وان الاسلام السياسي ده سؤال اجباري كان ضروري الاجابة عليه عشان نخلص بقى ونخلص الى الابد، لا عبد الناصر ولا السادات ولا مبارك عرفوا يقضوا على الاخوان... بعون الله شوية البلطجية اللي ريحتهم غاز دول هم اللي عرفوا يقضوا عليهم: مش انتوا عندكوا مشروع.. اتفضل وريني نفسك، ورانا نفسه.. ويا ريته ما ورانا.. بس بس.. البس البس بلاش فضايح.... معلش، انتوا ما تعرفوش الحاجات دي، انتوا اللي تعرفوه انكوا عايزين تعيشوا كويس وتاكلوا وتشربوا وتودوا الولاد النادي، ولما كان ده متوفر ايام مبارك كان مش مهم عندكوا ابدا ان فيه ناس بتاكل من الزبالة ولا اطفال نايمة تحت الكوبري ولا ان مبارك عميل اسرائيل، والمجلس العسكري والاخوان حلفاء امريكا.. مش احنا، واحنا لا ماسون ولا امريكان ولا فريدام هاوس، اللي بياخد فلوس من امريكا هم المجلس العسكري والاخوان وكان مبارك.. كل ده ما تفكروش فيه ومش مهم مدام انتوا عايشين مبسوطين

طبعا الاخوان دلوقت مش حيخلوكوا لا انتوا ولا غيركوا تاكلوا ولا تشربوا ولا تعيشوا، فحل من اتنين، يا تهاجروا يا توقعوا تمرد وتنزلوا معانا... واحنا شاكرين قوي انكوا ما هاجرتوش وقررتوا تنزلوا معانا

طيب... طبعا احنا ممتنين ان فيه ناس اخيرا قررت تنزل تسعف البلد معانا.. بس زي ما قلت لكوا، احنا مش احنا اللي كنا من سنتين ونص، من سنتين ونص كنا نازلين عندنا امل وخطط لمصر واقبال على الحياة او الممات مش مهم المهم اننا عندنا امل... دلوقت حضرتك بعد خيبات امل كتير، النفسية مش هي النفسية، بنعمل الواجب اللي علينا، بس ما تنتظروش يعني نبادلكوا الهيبرة وكدزه. بشكل عام احنا في كل الاحوال ميتين.. يعني انا مثلا بشكل  شخصي، واحدة من الناس سواء الاخوان قعدوا حتحبس، او الاخوان مشيوا اللي حييجي ورا الاخوان حيحبسني  اساسي.. ليه؟ لاني ما بسكتش لحد، يعني ماحدش بيشوفني بمصلحة ويسكتني وخلاص، انا بقى والصنف اللي انتمي له في كل الاحوال مش بندور على مكسب، لكن البلد لازم تاكل وتشرب وتفضل هي مصر دي المربع اللي مرسوم على الخريطة بكل حدوده متكاملة ومتماسكة وبيجري في نصها نهر النيل.. ومع استمرار الاخوان في الحكم ده مش حيتحقق، المربع يمكن يتقسم مثمنات ومثلثات ومخمسات، وكلها كام شهر ومافيش نيل، وطبعا مافيش اكل

بس حضراتكوا اذا كنتوا نازلين يبقى تسمعوا الكلام شوية، معلش، اتظاهر منك بيوم يعرف عنك بسنة

يعني:

1- موضوع انكوا تفضلوا تحرجموا على الجيش والشرطة باعتبارهم المخلص اللي حيقف جنبكوا ده تنسوه خالص... الجيش والشرطة مؤسستين تابعتين للدولة، وفي الدول الاستبدادية اللي شبهنا تابعين للحاكم، الجيش يهمه فلوسه وحاجته ومشاريعه ومعونته اللي بتوصل، والشرطة يهمها سلطاتها وتسمع كلام اللي في السلطة عشان يحبها.. وطبعا الاتنين ما يتنوش كلمة لامريكا

امريكا بقى بالجيش بالاخوان بالشرطة بابليس نفسه مالهمش سلطان على شعب قرر ينزل باعداد غفيرة ويصبر

يصبر

يصبر

يصبر

ماشي يا امور انت وهو؟ يعني مافيش حاجة اسمها مش عارفة اودي ولادي التمرين منكو لله خربتو البلد.. ماهي الثورات يعني خراب للبلد، او بالاحرى خراب للنظام اللي حاكم البلد

مافيش حاجة اسمها يالا بقى خلصونا عشان عجلة الانتاج

مافيش حاجة اسمها تلزقوا في ودننا: انتوا عايزين ايه دلوقت؟ انتوا عايزين ايه دلوقت؟ انتوا عايزين ايه دلوقت؟

لو كنا ما مشيناش يوم 11 فبراير وفضلنا بنفس العدد لحد ما نعمل دستور ومجلس رئاسي مدني زي ما كان مكتوب في مطالب الثورة ما كانش كل ده حصل لنا.. بس زن حضراتكوا ووساخة الاخوان اللي نزلوا يقولوا الشعب يريد اخلاء الميدان لدرجة ان تلاتين واحد شالوني هيلا بيلا ورموني برة الميدان.. يالا بقى.. العايط في الفايت نقصان عقل

ملحوظة كمان: لما نزلنا الاتحادية وطبعا الناس اللي حاطين برفان خدوا بعضهم ومشيوا وفضلنا كام واحد بس، ظابط شرطة قال: مشيوا.. شعب خ***ت... بصراحة معاه حق

2- الموضوع مش صعب... المهم نحافظ على الكتلة الحرجة ليل نهار، ونقسم نفسنا نبتشيات زي ايام ال18 يوم، والاخوان مش حيستحملوا 18 يوم.. انا باقولكوا، بس مش حيستحملوا 18 يوم لو العدد في الشوارع كبير ليل نهار وموقفين لهم البلد... لكن احتفالات كاس افريقيا ونروح دي.. يارب انشالله ننزل كل يوم، هم خسرانين ايه؟ الشعب فرحان وبيتفسح

3- في حال ما اذا الناس مشيت وما فضلش الا ال150 200 واحد بتوع كل مرة، واللي تقريبا نصهم مات فحتى ما بقوش مية وخمسين ميتين، الاخوان مش بس حيقعدوا، دول حيتوحشوا وماحدش حيعرف يكلمهم تاني بعد كده.. حشدتوا ضدنا وجمعتوا توقيعات وبرضه ما عرفتوش تمشونا.. وطبعا مش حيقبضوا عليكوا انتوا.. هو انتوا بيجرالكوا حاجة؟ احنا اللي حنتشعلق من رموشنا زي كل مرة، ماهو احنا اصلنا ملطشة، مبارك يضرب، مجلس عسكري يضرب، اخوان يضرب... بس مش مهم احنا نتشعلق من رموشنا لان ده قدرنا حتى لو الاخوان مشيوا، المهم ان حيبقى عصر قمعي الى ابعد الحدود، حتبقى حاجة اوسخ من ايران والسعودية مجمعة، زايد عليهم الجوع والفقر والعطش... ده غير ان الناس حيبقى عندها يأس تاريخي، حتبقى حاسة انها عملت اقصى ما في وسعها وفشلت

والحقيقة انها ما عملتش اقصى ما في وسعها

اذا ما كناش نوقف البلد ونقعد في الشارع بكتلة حرجة لا تقل ان مليون واحد في الشارع ليل نهار يبقى استمارات تمرد دي نبرمها ونحطها فييييييي عينا.. آه، ويبقى نزولنا كرنفال

4- معلش.. لو حصل ضرب ما تمشوش.. مش باقول اتصدروا في الضرب، بس اقفوا في ضهر الشباب ما تمشوش وتسيبوهم بحيث يبقى وراهم ناس... زي ايام محمد محمود كده فاكرينها؟

لا وانتوا حتفتكروها ازاي انتوا نزلتوها؟

طيب ايام محمد محمود كان اللي بيواجه بتاع 300 400 واحد، نصهم مات، ودلوقت نص نصهم مات.. بس الميدان بيتراوح من ما يقرب من مليون لحد اقل وقت كان بيبقى 50 الف.. فاللي بيواجه حاسس ان وراه ناس... واللي بيضرب حاسس ان بيضرب كتله حرجة وان فيه خطورة ما يقدرش يكسح اللي بيواجهوه

اقفوا ورا وما تمشوش

5- كام حاجة كده لازم تعرفوها عشان التغييب بس: 

مش الجيش اللي مشى مبارك ولا الجيش اللي حمى الثورة. الناس فضلت في الشارع بكتلة حرجة وباصرار واستمرار ووقفوا البلد خالص وده اجبر الجيش انه يمشي مبارك والا يبقى بيجازف بان البلد تنهار.. 

ماحدش جاب الاخوان وسلمهم البلد الا المجلس العسكري، والشرطة حتفضل تحمي الرئيس لحد ما احنا في الشارع بكتلتنا نقرر نخليه مش رئيس

الجيش والشرطة والامريكان مش بيحبوا حد ولا بيكرهوه، هم بيحبوا مصلحتهم.. لو حسوا ان الاخوان مش في مصلحتهم حيبيعوهم، ماحدش يقدر يوصل لهم الاحساس ده غير تواجدنا المستمر في الشارع

6- يا ريت ما تقلوش ادبكوا علينا... عشان ما نسيبكوش انتوا والاخوان ونقعد في بيوتنا.. وزي ما تيجي تيجي احنا في كل الاحوال ميتين ميتين.. وانتوا والاخوان مش بتوع مواجهات، بس الداخلية في صف الاخوان، ومع اول فسية.. مش قنبلة، حتجروا

فمعلش احنا عاصرين عليكوا غيط لمون بحاله فما تطلعوش قرفنا وتفضلوا تقولوا لنا جبتوا لنا الاخوان ونجيب الجيش ونفتح السجون والطراش ده

اللي جاب الاخوان هو الجيش اللي انتوا عايزين تجيبوه.. والسجون لو اتفتحت مش حيخشها اللي انتوا مستتقلين دمه بس.. انتوا كمان حتخشوا.. 

ما تقرفوناش كتير.. انتوا محتاجينا في المواجهات.. امال مين اللي حيموت؟ انتوا لا سمح الله؟ اذا كنتوا كرهتوا الثورة عشان مش عارفين تودوا العيال التمرين.. حتموتوا؟

----------

اخيرا:

الزملاء الثوار....... معلش

الصبر..
حنعمل ايه يعني؟ ما هو لو ما عملناش كده الاخوان حيخلوا مافيش مصر اساسا، وبعدين اجيب لكوا شعب منين يعني؟
ماهو ده شعبكوا.. يا بيحب عم الشيخ ولاغي عقله وبيسمع كلامه، يا بيحب المجلس العسكري وفيلم ابناء الصمت... واحنا مش كتير
احنا مش كتير
رمانة ميزان اه... بس عمالين نخس
وعلى فكرة ده الطبيعي في كل المجتمعات، البني ادمين يا اما دوجمة يا اما مصلحة... الناس اللي عايشة عشان تخلي الانسانية اسعد دي بيبقوا النسبة الضئيلة، وبيبقوا عصابيين كمان ومخهم لاسع.. امال يعني حيخش في مدرعة وهو مخه طبيعي؟
واللي احنا بنعمل ده اسعاف لبلد بتحتضر...
الصبر

بالراحة شوية/ الثورة الاسلامية/ الشرطة/ لنكات مهمة

خلاص بقى.. الشنا على الراجل وشردنا له بما فيه الكفاية

قال كلام مالوش لازمة في اجتماع الحوار الوطني، وبعدين غلط غلطة كبيرة قوي قوي قوي قوي لما قبل يبقى وسيط بين الاخوان والفلول

واتهاجم على التصرف ده واتألش عليه بما فيه الكفاية... خلاص

ما تبقوش كده اذا خاصم فجر، ايمن نور ده رشح نفسه قدام مبارك وقت ما كان الترشيح قدام مبارك عملية انتحارية، اللهم الا الحاج الصباح والناس اللي كانت بتترشح وتقول انا حنتخب الرئيس مبارك

واتحبس خمس سنين وهو مريض بلا اي مبرر واتهموه بالتزوير في حاجة كل الاحزاب كانت بتعملها لانها روتين، زي ما بتغمز الساعي بعشرين جنيه عشان يخلص لك ورق في اي مصلحة حكومية، وما حدش يقولي ما خيرت الشاطر ومرسي اتحبسوا، عشان هم مسكوا سلطة، لما يبقى ايمن نور يمسك سلطة ويفشل ويصمم يكمل بغلاسة والناس مش عايزاه ابقوا قطعوه ستين حتة وانا اقف اشفي.. لكن هو مش سلطة، هو حيالله رئيس حزب وسياسي مرموق وغلط وهاجمناه عليها والموضوع خلص، وفي ده كله ما تنسوش برضه انه قدم تضحيات وما اخدش تمنها، لما يبقى ياخد تمن تضحياته سلطة يبقى لكوا حق تشردوه

انا مختلفة معاه في كل حاجة خصوصا في افكاره فيما يخص التعامل مع الاخوان وامريكا، هو متسامح معاهم قوي... عمل مصيبة انه يوفق بين الاخوان والفلول.. بس ربنا مش رايد لهم الستر والحمد لله اتكشفوا

خلاص بقى.. ما تمسكوش في الراجل هبد والرقع.. وهو قال اعتزلت العمل السياسي.. يا ريت كل سياسي يتعرض للهجوم يبقى حسيس كده.. طب ده احنا مبهدلين مرسي والمرشد مش عايز يخليه يعتزل

----------

خلينا في المهم... الحمد لله تمرد قربت على 15 مليون، ولو اني زعلانة انهم اعلنوا قبل ما يكملوها ويروحوا للدستورية.... لان ده حيهيج عليهم الوحوش الكاسرة. شفتوهم ياعيني امبارح في المؤتمر؟ مؤتمر الوحوش الكاسرة الهابلة... وشفتوا الراجل اللي بيغني؟ طب شوفتوا مرسي وهو بيقول: "ولأجل من اجل ذلك ولأجل هذا"... انا عايزة احفظها العبارة دي.. كل ما اجي اقولها اتلخبط وارجع لها تاني.. اصلي كتبتها وراه اول ما قالها 

المهم دلوقت اخر تهديد لهم: 

لو اسقطوا مرسي حنعلن ثورة اسلامية ونطبق الشريعة

سؤال: هي الناس دي مدركة بتقول ايه؟

ده كده كأنهم بيقولوا لنا ان الاسلام والشريعة دي عقوبة وحاجة وحشة نتهدد بيها... طب ولما هي حاجة وحشة انتوا رافعين شعارها ليه؟ ولو هي حاجة حلوة وعشان كده رافعين شعارها.. طب المفروض تطبقوها على اللي بتحبوهم ولا بتكرهوهم؟ انت لو شايف الاسلام والشريعة حاجة كويسة كنت قلت: لو عملتوا ثورة عليا انا حالغي الشريعة الاسلام واحرمكوا منهم... مش العكس

وحاجة كمان.. حازم ابو اسماعيل قال انه حيقتحم مدينة الانتاج الاعلامي ويعلن مرسي رئيسا

D:

بحبهم قوي.. شوفتوا الارهابيين بتوعنا حلوين ازاي؟ في ارهابيين في الدنيا كمالو كده غير عندنا؟

--------------

ظباط الشرطة وقعوا تمرد وكانوا بيهتفوا النهاردة ضد مرسي في جنازة شهيد الشرطة الله يرحمه

متشكرين قوي.. مش عايزين منكوا حاجة غير تبطلوا تضربونا

منين بتوقعوا ضد مرسي ومنين لما بتجيلكوا الاوامر تحموا مقر الارشاد بتنزلوا فينا ضرب كأنكوا اسرائيل واحنا فلسطين؟

حلوا عنا شوية.. لو عايزين تخدمونا فعلا، لا توقعوا تمرد ولا تتظاهروا... بس تاخدوا اجازة يوم 30 يونيو، ولو ما نفعتش الاجازة لما تجيلكوا اوامر تضربونا ما تضربوناش... بطلوا تضربونا بقى.. ولو انت جبان وخايف تكسر الاوامر، يبقى ياريت لما تضرب ما تبقاش تضرب بذمة واخلاص وتفاني كده كأنك بتضرب في جوز امك انا مش فاهمة الغل اللي جواكوا وانتوا بتضربوا ده سره ايه؟... على الاقل لو خلاص مش قادر تكسر الاوامر يبقى اضربنا كده وكده واحنا حنعمل نفسنا موجوعين

ايه اللي مخلي الظباط قالبين على مرسي كده.. اكيد مش عشان احنا صعبانين عليهم 

بس عشان كلام زي ده وارد جدا يكون حقيقة.. بصراحة انا مصدقاه، هو الراجل ده اداؤه سكندلينا شوية، بس بيقول حاجات كتير بتحصل

طيب يعني مدام هم اللي بيسلموكوا ويموتوكوا... بتموتونا احنا ليه؟ احنا مالنا احنا؟ 

----------

ده مقال مهم لعزمي بشارة بيعرف ايه هي الفاشية... وطول ما انت بتقرا تحس انها منطبقة على واحد صاحبي انت ما تعرفوش

ودي تلات مقالات مهمة لخالد الحروب عن ضرورة حل جماعة الاخوان المسلمين الجزء الاول الضرورة الوطنية والجزء التاني الضرورة الاقليمية والجزء التالت الضرورة التنظيمية

--------- 

للمرة المليون ومش حازهق من اني اقولها: احذروا الناس اللي في النص.. احذروا الناس اللي في النص.. احذروا الناس اللي في النص.. دول اخوان والاخوان حيستخدموهم كبوابة طوارئ يعاودوا الدخول منها لما ينطردوا

ارجوكوا... ده كتاب مهم عن طائفة الحشاشين الاسماعيلية مهم قوي تقروه بتاع برنارد لويس وترجمة المرحوم محمد العزب موسى.. لازم تقروه عشان تعرفوا الاخوان بيشتغلوا ازاي.. تقريبا حسن الباندا قرا عن الحشاشين الاسماعيلية وقرر يعمل تنظيمه شبههم

جزء مهم جدا من طائفة الحشاشين: الناس اللي مش منهم بس "محايدين".. دول مش بس بيبقوا اعضاء، دول بيبقوا قيادات مفتاحية... 

خلوا بالكوا من الناس اللي في النص

انا النمساوي ملك الليل

وتقريبا دومة ميمو يااااض

هو انا مش فاهمة القضية بتاعتنا ماشية ازاي؟ ولا فاهمة طبيعة تطورها ونموها... حاسة ان فيه كيماويات في الموضوع

القضية ابتدت بضبط واحضار خمسة واستدعائي انا لسماع شهادتي في قضية المقطم، ولما علاء عبد الفتاح راح يشوف ايه الحكاية ما اتوجهلوش تهمة لا تحريض ولا ضرب ولا حاجة.. سألوه عن علاقته بالاميرة جومانة، واخد اخلاء سبيل

القضية دي غابت وظهرت علينا فجأة في ثوبها الجديد حيث تم احالتنا جميعا الى الجنايات، والتعامل مع دومة المحبوس وحازم عبد العظيم والشاعر وعيد بوصفهم هاربين، والتعامل معايا انا وعلاء بوصفنا حاجة تانية مش عارفين هي ايه، مع ان دومة كان مقبوض عليه يبقى هارب ازاي، والتلاتة التانيين ما راحوش يتحقق معاهم لكنهم ما هربوش هم قعدوا في البيت وقالوا تعالوا خدونا، والشرطة ما حاولتش تروح تاخدهم ومثلا اتشعلقوا على المواسير

طب علاء واخد اخلاء سبيل وانا شاهدة.. ازاي نتحول جنايات؟

قالوا ان تهمتنا جميعا محرضين..

بعدين فجأة، وبدون سابق مقدمات اتضح اننا فاعلين اساسيين مش محرضين

ومحسوبتكوا المتهم التامن في القضية، حيث اني ضربت 125 اخوانجي، وحرقت التوحيد والنور، واتلفت مسجد بلال ومسجد الحمد وعدد من الاتوبيسات وسيارات الشرطة، وضربت ظباط شرطة

واذا كان دي تهم المتهم التامن فلك ان تتخيل المتهم الاول عمل ايه؟ انا مش عارفة بقية الزملا ايه نظامهم، بس عرفت ان حازم عبد العظيم طلع مازنجر زيي كده برضه

الجلسة حتبقى في دورة اول يوليو.. وحنخش المحكمة نقول: انا النمساوي ملك الليييييييل... وانا ميمو ياااااااااض

سؤال بريء: الاخوان مش مكسوفين من نفسهم ولو بينهم وبين نفسهم كده؟ بجد وربنا

ويحضرني هنا مقولة محمد النفس الزكية لعمه جعفر بن الحسن لما طلب منه يدعي ان ربنا يخرجهم من السجن فقال له: يا عم.. إن لنا منزلة في الجنة لا نبلغها الا بمظلمتنا هذه، وإن لجعفر المنصور موقعا في النار لا يبلغه الا بمظلمته لنا هذه.. فإن شئت صبرت وإن شئت دعوت الله.

فعمه قال له: بل نصبر

تام ترارام تام تام

انا قلت استنى شوية وبعدين اكتب بوست عن موضوع الفلول ومشاركتهم في الثورة ال.... هي دي الثورة الكام يا ولاد؟ التالتة دي ولا الرابعة.. كتروا، بقوا عاملين زي عبورات مرسي، الراجل ينجح في الانتخابات يقول ده العبور التاني، يحضر مؤتمر يقول ده العبور التالت، يخش الحمام يقول  ده العبور الرابع

بس احنا نقدر نقول ان دي الثورة التالتة، الاولى على مبارك، والتانية على العسكر، والتالتة على الاخوان

المهم انا كان ليا وجهة نظر في الموضوع ده وقلت اخش اكتبه.. بس ما اقدرش اتعرض لهاذوها الموضوع دون المرور على الخبر ده

ايه ده؟ ايه ده يا ولاد ده؟ ايه الهلاوس دي؟ العيال بتوع الاخوان بيقولوا للقيادات احنا خايفين قالوا لهم ما تخافوش حينزل لنا جند من السما! هو من حيث جند من السما فنحس مرسي اجدع جند من السما ضده.. طب والله العظيم راجل نحس والطبيعة كلها رافضاه، وايام الرسول ايه؟ وصحابة ايه؟ ده على اساس اننا قريش؟ مش باقولكو الناس دي عايشة في مسلسل على هامش السيرة ما خرجتش منه؟

وهم الاخوان بيشبهوا نفسهم بالصحابة؟ هم الصحابة كانوا فشلة وكدابين ومنافقين وحانثين بالعهود ويظهروا غير ما يبطنوا وخونة وخايبين ومش عايزين يعترفوا انهم خايبين؟ هم الصحابة كانوا اندال واوساخ وعملوا صفقة مع ناس بتقتل الابرياء بشكل دوري كل شهر؟ هم الصحابة لما بنت تتعرى قدامهم يقولوا عليها ايه اللي نزلها؟ هم الصحابة لما ناس اتسجنوا عشان بيدافعوا عنهم ينزلوا يتظاهروا ضد الحكم العسكري يطلعوا بيان يقولوا عليهم: جمعة الوقيعة بين الجيش والشعب؟ هم الصحابة بيخوضوا في اعراض الناس بالباطل وبيضربوا الستات؟ هم الصحابة والناس واقفة تموت في محمد محمود يبعتوا يهددوهم بحرب اهلية ويطلع الكبير بتاعهم يقول: اللي خالفوا اوامري وراحوا محمد محمود رجعوا اعتذروا لي وقالوا لي  احنا شوفنا مهازل! مهازل ايه اللي شافوها يا بديع في محمد محمود والناس ما بين قتيل وجريح؟ هم الصحابة لما ناس تنضرب عشان بتدافع عن جزء منهم يقولوا احنا ما نعرفش مين دول؟ هم الصحابة نزلوا شايلين شوم على النسوان اللي كانوا بيتداروا ورا ضهرهم في العباسية؟ هم الصحابة بيخونوا الامانة؟ هم الصحابة بيقعدوا هم في التكييف ويطلعوا ينبروا على الناس عشان عندها تكييفات ويقطعوا عنهم النور؟ هم الصحابة يخونوا البلد ويبعتوا معلومات سرية لمؤسسات اجنبية؟ هم الصحابة لما يتولوا امور الناس بدل ما يشوفوا حيأكلوا الناس ويشربوهم ازاي ويهتموا بالقضايا الملحة يقعدوا يرازوا في معارضينهم كأنهم ضرايرهم وبعدين يقولوا اتفاجئنا بالنيل اصل كنا مشغولين في الثورة؟ مشغولين في الثورة ولا مشغولين تسلطوا المغير يضرب النسوان؟ هي الناس دي مصدقة نفسها وشايفين نفسهم صحابة ودعوة ربانية وملايكة حتنزل لهم؟ يا رب تنزل عليهم زبانية تديهم بالجزم 

ابسط قواعد الامانة اني لما احس اني مش كفء في عمل اتنحى عنه مش اقاوح وارمي فشلي على غيري... يا.. صحابة.. هأ

----

عود لموضوع الفلول

الاضحوكة التانية اني كنت ناوية اقول ان الفلول انواع، وانك لو تقصد الفلول هم بتوع الحزب الوطني والمستفيدين من النظام السابق فدول فلول فعلا ولازم ما نقبلهمش وسطنا.. خصوصا يعني واحد زي ملك الفياجرا اسطورة الترامادول سيد سرنجة.. او عمرو موسى اللي راح قابل خريت الشاطر والشاطر عمل له كمين وفضحه، مع انها فضيحة للشاطر اللي طول النهار يقول على موسى فلول

وكنت حاقول في نوع تاني من البشر ناس عادية بس تخوفت من الثورة الاول، مش مستفيدين من النظام ولا حاجة، واحدة ابوها ظابط جيش متقاعد وميت وبتحب الجيش عشان كده، واحد ما عرفش يروح مارينا لما الثورة قامت، واحد سواق تاكسي حاله وقف بعد الثورة فانتخب شفيق.. وكنت حاقول ما تقولوش عليهم فلول.. بس لقيتهم بيقولوا على نفسهم فلول 

اه وربنا

واحد بيقول الفلول غير مرحب بيهم، فواحدة قالت له: انا فلول ونازلة!

اوختشي.. كلمة فلول دي كلمة وحشة.. الا اذا كنت حضرتك مثلا بنت عمر سليمان، او عضو سابق في الحزب الوطني، او في امانة السياسات، او من نواب القروض، او واحدة حرامية ما، او جوزك ظابط شرطة بيعذب الناس وبيموتهم في الاقسام، او حماكي طنطاوي

اذا كنت من الناس اللي اصلا ما نزلتش في الثورة في الاول وكانت بتقول الكلام الوسخ بتاع منكو لله خربتوا البلد وتشكر في المجلس العسكري، اللي وضح لكل الناس انه هو اللي باع البلد للاخوان وانه مجلس خاين، وانتخبتي شفيق عشان خايفة من الاسلاميين وبعدين قررتي تبقي ايجابية وتحلي الوحلة اللي الناس فيها وتنزلي فده ما يعملش منك فلول.. ده يعمل منك عبيطة بس

وعادي كلنا عبط بشكل او بآخر

هو طبعا الواحد بيصعب عليه نفسه قوي.. مش انا بس.. عدد كبير، يعني واحد صعبان عليه نفسه قوي وعمال يحذر من مشاركة الفلول

وبيقول ان الاعتماد على الفلول زي عصر اللمون، وهو معاه حق فعلا.. طب بس احنا نعمل ايه؟ اولا ما تخليش الاخوان يبتزونا بان الفلول راكبين علينا، لانهم هم نفسهم ركبوا علينا.. والاخواني اللي يقولك نازل معاكوا فلول، قول له: ما انتوا نزلتوا معانا قبل كده.. حنعمل ايه يعني؟ حنطردهم؟

اذا كنت تقصد فلول من اساطين النظام زي سيد سرنجة وموسى وغيرهم، فدول احنا مش ماشيين وراهم، ولا احنا ماشيين ورا جبهة الانقاذ اساسا.. جبهة الانقاذ لما كنا عند الاتحادية خذلتنا وطلبت اقالة قنديل! ودلوقت تو ما عرفت ان الاخوان نظامهم سقط.. واحنا دايما سابقين عليهم، وكون جبهة الانقاذ تبقى ماشية في ديلنا ده مش وحش.. مش احسن ما احنا اللي نمشي في ديلها وهي لامة فلول؟

اذا كنت تقصد اللي كانوا قاعدين في البيت يشتمونا واحنا بندفن صحابنا.. فدول مش فلول، دول مهاطيل، طبعا حاجة تضايق، بس ده مش معناه نشتمهم ولا نطردهم، هم ما عملوش جرايم ولا سرقوا ولا قتلوا عشان نمشيهم، والا كنا مشينا الاخوان من اول يوم 28 يناير.. ده شارع، واحنا مش ملاك الشارع ولا حتى الثورة عشان نمشي ناس ونجيب ناس... احنا حننقي؟ ناس معترضة على حكم ما من حقها تنزل تعبر عن نفسها.. انت حتفتشهم وتقولهم انتوا فلول ولا ثوار؟ ولا حتشمهم لو ريحتهم برفان يبقوا فلول لو ريحتهم غاز يبقوا ثوار.... وطبعا لو ريحتهم حلبة او شرابات يبقوا اخوان مدسوسين

دي حاجة صعب التحكم فيها، وما ينفعش نعمل فيها حاجة

انا متفهمة تخوفات الثوار من اننا نلف في حلقة مفرغة... بس احنا لازم نكمل طريقنا، ومافيش رجوع لورا، والتخوفات بتاعة ان العسكر يرجع تاني مش حتحصل.. والنظام القديم مش حيرجع تاني، خلاص.. المرحلة اللي خلصناها مش حنرجع لها ومش مفروض نتخوف اننا نرجع لها.. المفروض نبص قدامنا ونخلص المرحلة اللي احنا فيها دي لانها خطرة ولازم باسرع وقت تتحل.. احنا موحولين وحلة سودا، والعسكر مش عايز يمسك البلد، لانه مش حيستفيد حاجة ده دماغه حتتوجع وهو كده مبسوط بنفسه وبحاله وبفلوسه وبعيشته مش عايز هو يحكم البلد، ولا امريكا عايزاه يحكم البلد عشان شكلها ما يبقاش وحش قدام الناخبين بتوعها... فده تخوف اظنه مبالغ فيه

موضوع ان لو حصل انتخابات مبكرة شفيق هو اللي حينجح.. ده احتمال، طب بس نعمل ايه يا ولاد طيب؟ حنعمل ايه؟ ماهو مرسي اهو الناس نجحته وعصروا لمون عليه قطع مية وكهربا حرفيا عن البلد.. واحتمال شفيق يا اخي ما ينجحش قول يا رب وربنا يسترها معانا

النقطة التالتة واللي انا متفهماها جدا، ان الثوار صعبان عليهم نفسهم.. يعني هم يتبهدلوا ايام مبارك وايام العسكر وايام الاخوان وكل شوية حد عامل ضهرهم مطية وياخدها على الجاهز؟ ماهو زي ما الاخوان اندال وسابونا ننضرب سنة ونص وهم متحالفين مع العسكري اللي كان بيضربنا مخصوص عشان يستنزفنا ويخلي الساحة للاخوان حسب اتفاقه مع امريكا.. ماهو برضه لما يحصل ضرب الفلول دول حيخلعوا ويسيبونا نشم غاز لوحدنا برضه.. ماهو ده اللي كان بيحصل في الاتحادية.. 

والله انا حاسة بموضوع الصعبانية دي.. انا ساعات نفسي بتصعب عليا قوي، يعني انا واحدة من الناس طلع ميتين امي في الثورة.. طلع ميتين امي.. بكل المقاييس، وما كسبتش اي حاجة غير الشتيمة وقلة الادب من كل الاطراف.. وجات لي مراحل كتير نفسي اتسدت وبقيت اقول انا اشوف اللي ورايا ونفسي بدل المرمطة عشان شوية ناس قلالات اصل الواحد ما بياخدش من وراهم غير البهدلة واخرتها لا حمد ولا شكرانية وكمان شتيمة واتهامات باطلة واللي يقولي انت السبب في كل اللي احنا فيه، واللي يقول لي بقى معاكي فلوس، مع اني ما فلستش وفلوسي قلت الا بعد الثورة، واللي يقولي معاكي فلوس بادعي له من قلبي يبقى معاه قد اللي معايا.. طيب ده انا وانا لا استشهد لي ابن، ولا عيني طارت، ولا ماشية على عكاز، وما قعدتش في السجن الا اسبوعين، ولا اتكهربت في لاظوغلي، اتضربت بس.. لكن الحمد لله ما اتكهربتش.. امال بقى اللي اتحبس بالشهور، واللي اتكهرب، واللي عينه طارته، واللي عينيه اللي اتنين طاروا، واللي مش قادر يمشي، واللي واللي واللي.... دول احساسهم ايه بقى لما بعد البهدلة دي كلها ينزل مظاهرة جنبه سيادة الباشا لابس ومشيك وريحته مهفهفة وبيهتف جنبه؟ وهاذوها الباشا كان بيقول عليه بلطجية من سنة... هي حاجة تحرق الدم... قوي.. خصوصا انه لسه قايم من ضربة ان الاخوان الاندال اللي هو قعد سنة ونص ينضرب ويدفن صحابه من تحت راسهم عشان العسكري يمهد لهم نجاحهم في الانتخابات من غير ما يبقى فيه منافسة هم اللي خدوا الحكم وكمان بيزايدوا عليه بالثورة، لا وايه؟ بيقولوا عليه فلول عشان في ناس فلول نازلين معاه.. حاجة فظيعة.. فظيعة.. فظيعة وانا حاسة باحساسكوا كلكوا والله العظيم.. لما الاخواني يقول لاحمد حرارة يا فلول ولما احمد حرارة يمشي جنب واحد كان بيقول عليه بلطجي في مظاهرة، وحتختم في الاخر يا تنتصر الثورة دي ان شاء الله وبأمر الله تعالى وفجأة حرارة يلاقي اللي كان بيقول عليه بلطجي محمول على الاعناق، او لا قدر الله بعد شر الف بعد الشر ربنا ما يكتبها علينا ابدا ما تنتصرش والاخوان يطلعوا يقولوا انتصرت الثورة على الفلول.. اللي هم احمد حرارة ومالك مصطفى واحمد عبد الفتاح ورضا عبد العزيز وام خالد سعيد وابو جيكا وام كريستي وخطيبة الحسيني ابو ضيف

انهيار يعني

بس مهلا مهلا... (بايخة قوي مهلا مهلا دي.. اخوانجي فشخ) يا شباب انت بتعمل لله ولا بتعمل عشان الناس تشكرك.. الناس ولاد كلب مبدئيا.. دي القاعدة عشان نبقى واضحين مع بعض، وانت صعبان عليك ان الروس تتساوى واحيانا انت اللي بتتشتم والنطع اللي كان قاعد في بيته هو اللي بياخد كل الشكرانية.. بس ده عند الناس لان الناس ظلمة اصلا، الحياة دار ظلم، بس الخير لازم يفضل كده يعافر ويقاوح، يعني حنشوف الظلم ونسكت؟

اولا انت مش لازم تضايق من حاجة.. استمرارك على نهج واحد وتغير الركيبة عليك يقول انك متسق مع نفسك وانك مش بتعمل مواءمات ولا انك ماشي ورا مصلحتك انت ماشي ورا الصح وبس.. انت ضد الظلم وفقط، الظلم ده لما كان مبارك والاخوان لهم مصلحة ركبوا عليك، الظلم ده لما بقى الاخوان والفلول لهم مصلحة ركبوا عليك.. لكن انت ماشي زي القطر على خط واحد مش بتغيره ودي حاجة تخليك تحترم نفسك.. واذا كان الناس ولاد كلب دلوقت، التاريخ بيكتب.. هو حيقع من الضحك، بس حيكتب

واذا كانت الروس اتساوت هنا وساعات روس المصلحجية عليت عليك.. عند ربنا الروس مش متساوية يا زميل.. عند ربنا كل واحد واخد مقامه صح.. 

وانت تزعل على نفسك ليه؟ وتصعب عليك نفسك ليه؟ وانا مش باقولك انت بس كده، انا باقول لنفسي... تزعل ليه؟ ماهو انت لو عايز حاجة كنت اخدتها من الاول.. انت اخترت الطريق الصعب، انت اخترت تعرض حياتك وعينك وامنك للخطر مش عشان اي حاجة غير عشان انت بتحب الحق وبتكره الظلم.. تزعل ليه لما تنور وتزهزه لناس ما تشوفش وشها الا ساعة جمع الغنايم، ما لو عايز الغنايم كنت مديت ايدك اخدت.. وهم بياخدوا الغنايم عشان هم عايزينها.. يبقى ايه اللي يزعلك لما ده اختيارك

واحمد ربنا ان ماحدش بيقولك شكرا هنا

عشان الشكر عند ربنا يبقى مضاعف.. وانت لو بصيت في حياتك كده الناشفة اللي مليانة كوابيس ووشوش صحابك الميتين وكلام الناس الجارح واللوم والتقريع المستمر، حتلاقي  ربنا من عنده بيجبر بخاطرك في حاجات كتير قوي.. من غير ما تتحوج لبني ادم، والموضوع مالوش علاقة بنشطاء مشهورين والله... اي شاب عنده 18 سنة كان بينزل من يوم 25 ولحد يوم 30 وفي عيلته فلول ولا اخوان ولا حتى كنبة بياخد في جنابه كلام ولوم وتقريع، مبدئيا بيتعاملوا معاه على انه رئيس عموم الثورة، ويفضلوا يقولوا له: وانتوا ناويين على ايه؟ وانتوا عايزين ايه؟ وبعدين يفضلوا يشتموه ويلوموه ويحسسوا الواد ابو 18 سنة ده ان هو اللي مسئول عن كل الفياضانات والزلازل اللي حصلت في الكون

وفوق ده كله لو اتسجن ابوه يشتمه وهو في السجن ويقول للمحامي بتاعه: انا ابني قليل الادب وما عرفتش اربي

معلش... معلش والنبي.. والنبي ما تزعل.. وما تنكرش خير ربنا عليك، انا واثقة ان دايما ربنا بيجبر بخاطرك في حاجات بينك وبينه وبيفكرك دايما انه بيحبك وبيقولك ما تزعلش

احنا مالناش دعوة مين بيعمل ايه؟ ولا بيقول ايه؟ ولا بيهبب ايه؟ احنا حنفضل ماشيين على قضبان القطر نعمل الصح وبس

يعني ماهو من اول لحظة واحنا شايفين الاخوان بيركبوا علينا.. كنا نخلي مبارك يعني؟ من اول لحظة واحنا شايفين صفقة العسكري مع الاخوان.. كنا نخلي الحكم العسكري يعني؟ 

طيب انت خايف من ركوب الفلول... نخلي الاخوان يعني؟ حنروح من ربنا فين لو خليناهم؟ والفقرا؟ والضعفا؟ والجعانين؟ والعطشانين؟ والمحبوسين؟ والمصابين؟ والمقتولين؟ نسيب كل دول ونتخلى عنهم عشان خايفين لناس تنزل معانا غير مرغوب فيهم؟ حنروح من ربنا فين؟ حنروح من ربنا فين؟

جانب الضعيف هو دايما الامان

جانب الضعيف هو دايما الصح

------------

سيبنا بقى من موضوع الفلول ده وياريت بقى نفتكر جميعا الناس اللي في النص.. هذه الكائنات الرخوة، اللي عادة بيبقوا اكس اخوان، او تربية اخوان بس مش في الجماعة.. وتلاقيهم ماسكين العصايا من النص وعمالين يقولوا لك: اصل الطرفين بلا بلا بلا

طرفين ايه يا ناقص يا رمة يا عرة البشر انت وهي؟ طرف معاه سلطة وسلاح وامكانات، وطرف اعزل مش معاه الا صوته وتقولي استقطاب والطرفين غلطانين؟ تصدق انك راجل او ست رمة؟ ولا الاسلوب اللزج ده بتاع حبو بعض يا ولاد، وعارفين الكلام الدمث المهذب بلزوجة اللي يخليك عايز تتطرش في وش اللي بيتكلم.. وعامل او عاملة لي فيها عقلانيين.. عقلاني ايه يا روح خالتك في ناس ماتت وناس اتحبست وناس اتصابت وناس الاخوان عذبوهم في الاتحادية منهم شاب فقد قدرته على الزواج بسبب تعذيبهم.. لو ده ضناك ما كنتش قلت الطرفين والاستشيكتاب.. استشيكتاب ايه يا حيلتها.. 

اهو الصنف الوسخ ده بالنسبة لي انجس من مبارك ومن مرسي ومن خريت ومن بدين ومن نتنياهو نفسه

بل انجس من ابليس.. عشان كل من سبق ذكرهم لهم مواقف واضحة ومحددة وباينة

انما الاخوة اللي في النص بتوع حاذنبكوا انتوا الاتنين دول مافيش انجس منهم

والغريب ان معظمهم فعلا يا اكس اخوان يا تربية اخوان يا متعاطف مع الاخوان... فعلا، جماعة الاخوان مركز تفريخ النفاق والمنافقين

اهم الناس اللي في النص دول اخطر من الناس اللي بتنزل بالكلب اللولو في المظاهرة وحاطين نقركوا من نقرهم ومسمينهم فلول وهم مسميين نفسهم كده بعبطهم 

عارفين ليه؟ لان دي الناس اللي عايزة تكسب على طول، دي الناس اللي نطبق عليهم:

"الذين يتربصون بكم، فإن كان لكم فتح من الله قالوا ألم نكن معكم، وإن كان للكافرين نصيب قالوا ألم نستحوذ عليكم ونمنعكم من المؤمنين"

والحقيقة ان الاخوان لعبوا الدور ده في صراع الثوار مع العسكري

ودلوقت في ناس مش اخوان بس بيحترموهم برضه بيلعبوا الدور ده.. حاسبوا منهم

عشان دول ممكن يبقوا الورقة الاخيرة للاخوان لو حسوا انهم لازم يمشوا، ويبقى الناس اللي في النص دي هي البوابة اللي الاخوان حيخشوا منها تاني

-------

اخيرا... بصراحة مصر نكتة.. حتى في مصايبها، تحس انك بعد ما تقرا اي خبر في الجرنال او اي مقال او اي تعليق او تصريح لاي مسئول او شخصية عامة تبقى عايز تقول:

تام ترارارام تام تام

تحضيرا ل30/6.. الرهان على غباء العدو

تحديث: اهو عمرو عبد الهادي اعترف ان الميل ده مبعوت من ميله وقال "الهاكرز" هو اللي بعت الميل وانا في كل ده كله مش هاممني انه كداب اخر ستميت حاجة.. اللي خانقني انه بيقول "هاكرز" وبعدها يقول "هو" زي اللي بتقول انا بشتغل مودلز واللي بيقول انا باشرب كانز واحنا من موقعنا هنا بنشكر الاستاذ هاكرز على الميل ده مش قلت لكو الرهان على غباء العدو؟ المتخلف بعت سند اوول فوصل بالغلط لناس ما كانش المفروض يشوفوا الميل وبعدين قالك الهاكرز ضاع الهاكرز بصباع.. ربنا يديم عليهم الغباوة ويزيدها ويبارك فيها ويجعلها دايما في مصلحتنا

الايميل اللي فوق ده نشرته دينا يوسف وبتقول انه وصلها على ايميلها من جبهة الضمير
طبعا حيطلع لنا ناس بيتناصحوا، وانا بقيت اكرههم قوي قوي قوي الناس دي، عشان الحاجة بتبقى باينة وهم بيبقوا عايزين يسفسطوا، حيطلعوا ويقولوا طب وايه الدليل على ان الميل ده وصلها فعلا، وايه الدليل على ان عمرو عبد الهادي بعته فعلا.. وكل الهلاوس دي
طبعا لو كانت جلسة الحوار الوطني اتفرغت ونزلت في جرنال وما كنتوش سمعتوها بودانكوا كنتوا برضه ضيعتوا وقتنا في ايه الدليل ومين قال وايه اللي يضمن وبلاش هري ولازم تتأكدوا واصل لما بتقولوا الكلام ده بيخلي ناس ما تتعاطفش معانا وكل الطراش ده بتاع الناس اللي حاطة ايدها في المية الساقعة وغالبا ما بينزلوش لا هم ولا اللي هم خايفين عليهم ليبطلوا يتعاطفوا معانا، ابوهم على ابو اللي بطل يتعاطف معانا احنا دفنا صحابنا وهم قاعدين دفيانين.. كل ده عشان تغفيلنا وعشان ما حطيناش كل الاحتمالات قدامنا، مش لازم يبقى في دليل.. لازم نحط كل الاحتمالات ونخليها واردة في اذهاننا...
الكلام المكتوب ده وارد جدا، ووارد جدا ان عمرو عبد الهادي اللي مرة قال في تصريح انتوا مش حتعرفوا قيمة مرسي الا "لما نجيب لكوا ابو اسماعيل"! انه يكون بالهطل اللي يخليه يبعت الكلام ده في ميل، واللي يعمل اجتماع سري على الهوا يهذي فيه ممكن يبعت ميل بالطريقة دي ويوصل للناس.. المهم الخطة دي واردة بنسبة 99%.. ولما نحط حاجات في الحسبان وما تحصلش احسن من لما ما نحطش حاجة في الحسبان ونتفاجئ بيها زي ما بيحصل لنا بقالنا سنتين لما ورمنا 

تحذير:
عرفت دلوقت ان الاخوان ناويين يوم 30/6 يندسوا وسط المتظاهرين ويكتبوا او يرفعوا شعارات شتيمة في الاسلام والرسول، وعرفت كمان ان بالفعل الاخوان عملوا اكاونتات على الفيس بوك والتويتر بيعملوا فيها هاشتاج تمرد ويشتموا في الاسلام والرسول عشان يبينوا ان اللي بيتمردوا دول كفار وكدزه
بائسين... يعني مش كفاية حيخسروا الدنيا، وكمان بتخسروا الاخرة؟ على فكرة اللي بتعملوه ده حرام، والشتايم اللي بتكتبها دي ربنا حيحاسبك عليها بصفتك ومافيش غاية تبرر لك الوساخة دي
المهم.. التحذير ده وجب التنويه عنه لانه جالي من كذا مصدر واي حد تشوفه بيعمل كده اعمل معاه السلمية
------------
بصوا انا محرجة قوي اتكلم عن تحضيرات تلاتين ستة وانا عارفة اني مش حاحضرها لاني حابقى في الجنايات والله اعلم هم حيعملوا فينا ايه؟ بس شكلهم ناويين على حبسنا.. فحاسة اني يعني باعمل جنرال كازوزة وانا اغلب الظن حابقى في الحبس ومش حاحضر مع الناس لكن رجعت وقلت اهو اساهم بكلمة وانا يعني مش حابقى في مارينا ده انا حابقى في الحبس

:)

بالنسبة لتلاتين ستة انا ان شاء الله متفائلة جدا على عكس بقية الايام اللي نزلناها قبل كده وكنت بانزلها عشان باعمل الواجب مش عشان عندي امل 

ليه بقى المرة دي متفائلة؟ لان الاخوان والاسلاميين بشكل عام ناويين يتغابوا، او هم ابتدوا يتغابوا فعلا ويمعنوا في الغباوة.. وزي ما كان مبارك عن جدارة مفجر الثورة ضده، الاخوان المرة دي بقى يا ولاد مش بيركبوا على الثورة.. ده هم اللي بادعين الثورة ضدهم من اساسها

سيبك من انهم استدعونا للجنايات انا وعلاء ودومة وحازم عبد العظيم وكريم وعيد وغيرنا.. طبعا السلوك ده حيسخن الناس عليهم، مش عشان احنا ناس مهمين، بالعكس، عشان احنا ناس مش مهمين

الاخوان من غير ما يحسوا وجهوا اهانة لكل الناس اللي ضدهم ووصلوا لهم رسالة انهم بيقولوا لهم: انتوا شوية خرفان واحنا لما نقبض على الروس بتاعتكوا (بتصورهم يعني) حتتلموا.. ودي اهانة بالغة، خصوصا ان في اخبار ان الاخوان بيتصلوا بالكنيسة عشان تمنع المسيحيين ينزلوا 30/6! منتهى الاستفزاز والاستهتار وجر الشكل والتسخين.. كده اللي ما كانش ناوي ينزل حينزل... طبيعي يبقى الرد عليهم: احنا لا احنا خرفان، ولا ماشيين ورا حد، ولا دول الروس بتوعنا، ولا غيرهم، ولا انتوا ولا عشر جماعات من عينتكوا يعرفوا يقعدونا في البيت لو لنا مزاج ننزل.. ومافيش مانع من شوية ذكورية: هو انا حرمة زي نوارة اللي بتنزلني يا روح امك؟ او شوية عنجهية: هو علاء اللي مربي شعره ده اللي بيتحكم فيا يا روح خالتك؟ هو انا خروف زيك.. الخ

فكده كتر خيرهم.. يعني جم على الوجيعة لكل الناس لان اي مصري بطبيعته بورمجي وما يحبش يبان قفا ولا ماشي ورا حد... في شوية حاجات كده في نفساويات المصريين ما يعرفهاش الا حد مصري، وفي شوية زراير كده في نفسية المصري ما ينفعش تدوس عليها الا لو انت قررت تجر شكله، وزراير تانية تسخنه، زي مثلا انه ينزل في ثورة عشان تونس مش احسن مننا، خصوصا ان تونس دي بتنافسه في الكوره، طبعا دي تفصيلة ماحدش يحس بيها ولا يحسبها الا حد مصري، وانتوا زي ما انتوا عارفين دول مش مصريين.. دول عايشين في مسلسل على هامش السيرة وما خرجوش منه

وموضوع الكنيسة ده حرقة دم لغير المسيحيين لابعد الحدود... سيبك من انها اهانة للمسيحيين اللي خلاص اتعودوا على حرقة الدم في زمن الاخوان، بس المسلمين حيتغاظوا قوي لان برضه الاخوان بيوجهوا لهم اهانة انهم مستهترين بيهم وبحجمهم وبصوتهم، وبيوصلوا للناس احساس ان الاخوان دول مافيش فيهم فايدة، عايشين في وهم ان اللي ضدهم شوية مسيحيين على شوية نشطاء ماسون وخلاص كده، ومش عايزين يواجهوا ولا يسمعوا.. عاملين زي اللي متجوز واحدة بتقوله انا بكرهك يقولها: انت بتحبيني بس انت اللي مش واخدة بالك.. ده هي حماتي هي اللي بتكرهني

فكده اول خطوات الغباوة نشكرهم عليها وعلى الحشد التاريخي

ده غير بقى حرق مقر تمرد... انا لو مكان حملة تمرد ابعت لهم جواب شكر.. والله العظيم ما باهرج

لا في غباوة كده؟ بجد وربنا؟

انا بقى اللي ضحكني اكتر واحد من حملة تمرد قال: احنا عندنا مقرات سرية

D:

افتكرت سنية في وجهة نظر وهي بتقوله: يا عررررففففةةةةةةةة اوعى تقولهم على مكان الورق يا خوووووويااااااا.. ماهو احنا فينا دقة عبط الحقيقة

لا احنا فينا دقات عبط كتير... واحنا لو مش عبط كنا اتفتشنا في ثورتنا كده واحنا واقفين؟

تاني غباوة بيعملوها الاخوان التهديد والوعيد بتاعهم 

وبعدين هم مرعبوين وركبهم بتخبط في بعضها.. ودي اوحش طريقة تتعامل بيها مع الخوف.. انك تهدد.. اتعلم كده سواء في الحياة السياسية او الحياة الشخصية، لما تبقى خايف ما تهمبكش في الكلام ولا تكتر، ولا كمان تطلع تجري، لما تخاف اثبت واتعامل مع خوفك بالعقل.. انما التهليل ده حيضحك عليك الناس ويستنزف طاقتك ويشل مخك 

هو انا بنصحهم ولا ايه؟ ههههههههه عموما عادي يعني هم مش بيسمعوا نصايح، ما انا ياما كنت باقصد انصحهم باخلاص وبحسن نية ولا عمرهم سمعوا.. الحمد لله يعني.. لو يستاهلوا الخير كان ربنا رزقهم بيه.. المهم

الاخوان بقى مثلا مرة يقولوا لنا كل نفس ذائقة الموت.. ودي حقيقة كلنا نعلمها، وزي ما هي سارية عليهم هي سارية علينا

ومرة يبايعوا مرسي بالدم.. ودي حركات بلدي قوي.. واستنزاف طاقة

ومرة يقولوا لنا احنا محضرين مفاجئات وحنبهدلكوا وحنعمل ونسوي فيكوا.. اللي محضر مفاجئات وناوي يعمل ويسوي ما بيقولش على فكرة

واخيرا.. وتكليلا للرعب اللي هم عايشين فيه، قالوا احنا حنضطر نستخدم العنف عشان اتهددنا.. قالوا مين اللي هددكوا؟ قالوا: نوارة

والله العظيم تلاتة.. ورحمة شرف مرسي وخريت مع بعض.. قالوا نوارة هددتنا وعشان كده مضطرين ندافع عن نفسنا

قالوا لهم نوارة؟ نوارة هددتكوا بايه؟ قالوا: هددتنا بالقتل

عليا انا

D:

انا هددتهم بالقتل... طب بعيدا عن شناباتهم ودقونهم وكروشهم وعيبتهم ان واحدة ست، طريحة الفراش بقالها ما يقرب من شهر، وحتتحبس قريب، تخوفهم وما يتكسفوش يقولوا دي هددتنا بالقتل 

انا ما هددتهمش بالقتل الحقيقة ههههههههههههههههه انا مش متعودة اهدد بحاجة ما اعملهاش

اللي حصل اني كتبت على التويتر الاخوان يمشوا بالذوق وبانتخابات مبكرة بدل ما يوصل الامر انهم يتدبحوا في الشوارع يمشوا بالذوق احسن ما يمشوا بالعافية... او بالدم حاجة كده مش فاكراها

طيب انا مصدقة فعلا ان الاخوان خافوا من التويتين الخايبين بتوعي دول وفعلا افتكروني ان انا اللي بهددهم بالقتل مش باستشرف الواقع واللي حيحصل... لانهم بالجبن ده.. هم كده بيخافوا من العزل والستات والاطفال.. والا ما كانوش ضربوهم.. وحبسوهم

هم الاخوان متخيلين ان احنا بنئذيهم لما بنجمع ضدهم توقيعات وبننزل نطالبهم بانتخابات مبكرة؟

هم الاخوان متخيلين انهم لو خلصوا على كل الافندية في البلد بتوع التوقيعات والمظاهرات والصوصو نونو هم عارفين مين اللي حيواجههم بعدنا؟ 

والله العظيم والله العظيم والله العظيم الاخوان دول لو عندهم ذرة مخ مش بس يشكرونا اننا بنمشيهم بالذوق، دول يبوسوا ايدينا ورجلينا ويعرفوا انهم مدينين لينا بحياتهم

في راق تاني من الشعب المصري، اوسع، واعمق، واكبر، واقوى، ومستني اما يشوف الافندية حيعملوا ايه وحيحلوها ازاي؟ لو الافندية دول فشلوا يحلوها.. هم بقى حيتصدروا ويحلوها، ولو اتصدروا هم مش كويس على الاسلاميين خالص.. ده مش كويس على اي حد، انا بنفسي مش حاعرف امشي في الشارع بحجابي ده.. كل واحد بدقن حتتنف له في الشارع

هم مدركين هم عاملين ايه؟ النهاردة اشترينا الخضار بتاع اكل يومين.. يومين بس، عارفين بكام؟ واحنا بنوفر.. 68 جنيه.. ده غير الكهربا المقطوعة، والمية المقطوعة، واللي لسه حتتقطع اكتر واكتر.. وهم خايبين وسرقاهم السكينة ومعيشين نفسهم في خيالات ان ماحدش بيعاديهم غير اعداء الاسلام اللي هم احنا.. والكنيسة طبعا

انا لولا بس اني بحب البلد دي كنت دعيت ربنا ان الاخوان يموتونا كلنا عشان يواجهوا مصيرهم ويعرفوا ان الله حق ويترحموا علينا

وايوه باكررها تاني، الاخوان يمشوا بالذوق احسن ما يمشوا بالدبح

ومش احنا اللي حندبحهم.. واكيد مش انا هههههههههه.. لاننا لو كنا بندبح كنا دبحنا من زمان، وياريتنا كنا بنعرف ندبح من الاول، يمكن لو كنا بنعرف ندبح ما كناش وحلنا البلد الوحلة دي.. ولسه مستمرين فيه احنا مش عايزين البلد تروح لمصير سوريا مهما كان.. احنا مش خونة للبلد زيكوا يا اخوان، دي بلدنا وبنحبها وحنحافظ عليها من الدم والنار اللي انتوا عايزينهم.. ويا ريتكوا قد الكلام يعني هههههههه غلابة قوي

بس في ناس تانية الجوع عضها خلاص وفاض بيهم ومش حيحصل طيب لو ما لحقناهمش.. وهم دول اللي حيدبحوكوا في الشارع

فانا والله ما كنتش باهددهم انا كنت بانصحهم لوجه الله واعرفهم اننا بننقذهم من ناس ما بتعرفش تتفاهم ولا تحب تتفاهم خصوصا لما تحس ان التفاهم قلة رجولية مع ناس ما تستاهلش التفاهم

هم لازم يعترفوا انهم فشلوا ويمشوا بالراحة من غير مشاكل.. لان ماحدش حيحصل له مشاكل غيرهم، وهم عارفين كده كويس وخايفين قوي... وخوفهم شالل تفكيرهم ومخليهم يطبشوا

وعموما مصلحة.. يا رب يطبشوا كمان وكمان

بالنسبة لنا احنا بقى....

على فكرة الناس اللي نازلة كوم، والملايين اللي بيتفرجوا علينا ومستنيين يشوفوا "الافندية" حيحلوها زي ما وحلوها ولا لا كوم تاني...

السيدة في ضهركوا ما تكسفونا... 

عشان تبقوا عارفين، زي ما دي اخر فرصة للاخوان يخرجوا وروسهم فوق كتافهم، دي اخر فرصة لينا نحاول نحلها بتحضر وبشغل السيس بتاعنا ده

الغلابة خلاص... روحهم بقت في مناخيرهم، وحاسين ان كل حاجة خسروها، وسايبينا لما يشوفوا اخرنا وبعدها عليهم وعلى اعدائهم بقى

بمعنى

يعني حضراتكوا مش الناس تنزل يوم يومين تلاتة وبعدين رمضان داخل واحنا رايحين نشتري حاجة رمضان ومرحب شهر الصوم مرحب وسلامو عليكو

مش نعمل زي المرة اللي فاتت والناس تبقى على باب الاتحادية وشوية ال...... مش عارفة اقول ال ايه، اللي بيقولوا عليهم قيادات المعارضة يتكلموا عن "تغيير حكومة قنديل" وشغل الخواجات ده

ما تخيبوش امل الناس اللي بتبص علينا.. قصدي عليكو.. انا حابقى خلف القضبان وحتجيبوا لي البرنامج وحقول لا تنحرف ولو الاخوان سرقوا ثورتك اشكرهم وبوس ايد شعر ودقن

او خيبوا املهم بقى وواجهو مصيركوا مع الاخوان... الاخوان واخدين البلد على حاجة كده شبه الشدة المستنصرية واوسخ.. على الاقل في الشدة المستنصرية كان النيل قليل بس كان فيه نيل.. احنا كلها كام شهر والنيل حيبقى بح.. وحنبقى زي الخليج اللي كانوا نازلين نبر على نيلنا.. اهو طار، على الله يكونوا اتبطوا بقى

ولو دخلنا على حاجة شبه الشدة المستنصرية اللي حينزل يثبت الناس عشان ياكل مش حيبص لك ويشوف انت اخوان ولا ثوري، وهو في سكته عشان يخش الاتحادية غصبانية واقتدار حيكسر عربيتك المية تمانية وعشرين، ومش بعيد يشرح وش مراتك عشان ياخد منها النوباين

الا هل بلغت؟

اللهم فاشهد

تمرد.. سحب الثقة

ولو اني ما منحتش مرسي اي ثقة، ولا غير مرسي، وافخر اني عملت كل حاجة غلط في حياتي الا اني انتخب واحد اخوانجي.. لا في شعب ولا في شورى ولا في رئاسة

ومع ذلك وقعت اهو على استمارة سحب الثقة هنا.. وبالنسبة للي عصروا لمون، وانا بالمناسبة متعاطفة معاهم ومتفهمة موقفهم.. فباب التوبة مفتوح للذين عملوا السوء بجهالة، وممكن توقع على الاستمارة، وتكفر عن خطيئتك بإنك تسحب على الاقل عشر نسخ وتمضي عليها الناس.

ممكن كمان لو تليفونك فيه نت مش بالمنافيللا زي تليفوني تنزل تمضي الناس برقمهم القومي على تليفونك وده حيضمن لك انك تاخد اكبر عدد من الموقعين.

واظن كمان كل من ساعد مرسي في انه يجتاز مرحلة الاعادة ملزوم انه يساعد في ان الاستمارة دي توصل للعدد اللي هم عايزينه واللي هو 15 مليون. سواء كتاب كبار، او مقدمين برامج، او نشطاء.

في كذا حاجة لازم نتكلم فيها في موضوع الاستمارة دي واهميتها:

أولا:

الناس اللي حتتكلم عن الوضع القانوني للاستمارة، هو ايه كان الوضع القانوني للتوقيعات اللي اتجمعت لسعد باشا زغلول تحت الاحتلال؟ ايه الوضع القانوني لثورة يناير نفسها اللي مشت مبارك؟ وايه التكييف القانوني لرحيل مبارك؟ هو بشكل عام مافيش وضع قانوني لاي حاجة في مصر، مصر نفسها في اللي هي فيه دلوقت وضعها مش قانوني، صدقني. الارادة الشعبية لها قوة القانون والدستور كمان. 

ثانيا: 

الحملة دي مهمة في كونها سلمية وبتدفع في اتجاه تأمين البلد والحفاظ على أمنها القومي، لاني زي ما قلت قبل كده، وباكررها تاني، الاخوان ما عندهمش اي مانع من اشعال حرب اهلية في البلد، وكل شوية يسلطوا الجهاديين يهددوا الناس ان لو مرسي مشي حننزل بالسلاح... ولاد القرعة اللي كانوا هربانين وقعدنا نشحت لهم عشان يرجعوا البلد وقعدوا يتمسكنوا ويقولوا احنا مرضى ومافيناش حيل نعمل حاجة، قال سلاح قال.. السلاح ده تحطه فييييييي عينك.. آه.. والمصريين ما بيحبوش كده، وعندهم هسهس من ان الوضع يقلب لسوريا، وبصراحة انا كمان زيهم... سلاح ايه بقى؟ احنا ما بنحبوش السلاح ده.. فأنت لو سبت الناس فريسة لتهديدات الجهاديين، وفي نفس الوقت انت ما بتقدمش لهم اي بديل غير انك تنزل مظاهرة تقلب في الاخر بان الاخوان ينزلوا لك فتجري وراهم بالطوب كده هم حيقعدوا في البيت ويستنوا فرج ربنا، والحقيقة معاهم حق، حد في الدنيا يدفع بلده لحرب اهلية الا اذا كان خاين؟ لكن حاجة زي دي حتشجع الناس انهم يتخذوا اجراء ايجابي يضمن لهم تماسك البلد.

ثالثا:

دي مش اول مرة نجمع توقيعات، احنا قاومنا الاحتلال الانجليزي بالتوقيعات والاكتتابات ونجحت، واكتر مقاومتنا ضد الاحتلال كانت سلمية بالاعتصامات والتوقيعات والاضرابات والعصيان المدني، ودي الطريقة اللي مشينا بيها كل احتلال جالنا واللي مشينا بيها مبارك.. بإننا نزهقهم ونوقف لهم البلد لحد اما يمشوا.. احنا اصلا حبسنا زكريا عزمي وفتحي سرور وصفوت الشريف بميت الف توقيع.. والتوقيعات دي تسهل بعد كده اي تصعيدات ثورية سلمية

رابعا:

ما تشغلش بالك كتير بردود افعال الاخوان والاسلاميين بشكل عام، طبيعي انهم يعملوا رد فعل، امال يعني عايز تجمع توقيعات ضدهم وهم يقعدوا ساكتين؟ ليه يعني ماسك عليهم صور؟ ثم دول مش مبارك، دول فاهمين كويس ان التوقيعات دي بتجيب نتيجة ولها قوة القانون ومهمة وبتهددهم فعلا.. انت ناسي انهم هم نفسهم شاركوا في جمع توقيعات ضد مبارك؟ طبيعي انهم يعملوا حملة توقيعات مضادة، وطبيعي انهم ينزلوا يضربوا اللي بيعمل حملة التوقيعات، وطبيعي ان داخليتهم تقبض على الشباب وهم بيجمعوا التوقيعات، وممكن يركتبوا حماقات كتير... كويس.. ده كله كويس، كويس قوي، وحيخسرهم، ويصغرهم، ويهيفهم زيادة ماهم هايفين

لانهم لما يعملوا حملة توقيعات مضادة وهم ماسكين السلطة حيظهروا قدام الناس انهم مرتبكين ومش عارفين يعملوا ايه

لما يقبضوا على الناس او يضربوهم ده حيكره الناس فيهم زيادة وحيزيد اقبال الناس على التوقيعات

وبالعكس ردود افعالهم العصبية دي حتخلي الناس تثق في حملة التوقيعات لانهم ممكن الاول يقولوا لك: يعني التوقيعات دي حتعمل حاجة؟ لكن لما يشوفوا الاخوان بيعملوا ردود افعال عصبية حيحسوا انها حتعمل حاجة

واول الحماقات اللي ارتكبت ان حملة حازمون عايزين يعملوا حملة توقيعات لحازم قوامها 50 مليون توقيع هههههههههههههههههههههههههه

اذا كان كل اللي له حق التصويت، يعني معاه بطاقة، عددهم كله على بعضه 50 مليون، وايه حازم ده اللي بيستخدموه بعبع؟ يعني هم مش مكسوفين انهم يتعاملوا مع ابو اسماعيل على انه العو؟ "لو مشيتوا مرسي حنجيب لكوا العو".

كل ده كويس.. ومش عايزة حد ينجر لمعارك جانبية، ولو هم حيلجأوا للعنف يا رييييييييييييت.. خليهم يغلطوا، واحنا ما نغلطش، اول ما يلجأوا للعنف من طرف واحد حيتحاصروا والناس تتعامل معاهم بوصفهم مجرمين.

خامسا:

ما تشغلش بالك برضه بالاشاعات، يعني مثلا حتلاقي ان الاخوان مطلعين اشاعات ان اللي بيجمعوا توقيعات دول بيجبروا الناس على التوقيع، وبيهددوهم، وبيسرقوا بطايقهم، وبيدفعوا لهم فلوس.. الخ الخ الخ.. دمااااااااااااااااااااغك... دماغك خالص، الناس كلها عارفة مين اللي بيدفع فلوس وزيت وسكر ومين اللي بيهدد عيانا بيانا.

دي ارقام حملة تمرد انا عايزاك دلوقت وانت قاعد تسجل، وتطبع اللي في اللنك ده عشر نسخ، واذا كان الانسان العادي حيطبع 10 نسخ، فاللي عصر لمون حيطبع 20 نسخة، واللي شجع الناس تعصر لمون حيطبع 50 نسخة على الاقل... كفر عن خطيئتك، ايا كان مكانك، وتمضي الناس عليه وتبعت للحملة، واذا كانت الحملة في عز ضعفها لمت 2 مليون، احنا نقدر نعدي ال15 مليون، لكن ما تتوقعش ان المهمة حتبقى سهلة، حتبقى صعبة، وحيبقى فيه اعتقالات، وحيبقى فيه ناس تنزل تضرب الشباب في الشارع، وحيبقى فيه تشويه، وحيبقى فيه حملات مضادة... عااااااادي.. عادي، ياما دقت على الراس طبول.. يعني هم اتخن من المدرعة المرتبكة؟
وده لنك تاني للتواصل مع حركة تمرد

جزاء سنمار

قريت خبر القبض على احمد ماهر من المطار، وافتكرته تهييسة او اشاعة لحد لما لقيت الوطن والمصري اليوم وكل المواقع كاتبة ان ماهر اسمه كان على قوائم ترقب الوصول وهو راجع من امريكا اتقبض عليه في المطار... 

انا مش عارفة اقول ايه.. اي كلام حيتقال حيبقى حاجة مش حتعبر عن الاحساس اللي جوايا.. قعدت على التويتر اتف على مرسي وبعدين دخلت نمت وانا نايمة حلمت اني باكلم واحدة صاحبتي في التليفون وعمالة ازعق واقولها: احمد ماهر يتقبض عليه من المطار زي المهربين؟ احمد ماهر اللي لولاه كان زمان شفيق رئيس جمهورية دلوقت مرسي يحبسه كده؟ البلد دي لو فيها رجالة وناس بتعرف ربنا وبتخاف منه مرسي ما يقعدش فيها النهاردة قبل بكرة.. وفضلت ازعق لحد اما صحيت على صوتي.. صحيت لقيت خبر ان احمد اخد اربع ايام على ذمة التحقيق والتهم الموجهة له التحريض على التجمهر وقطع الطريق العام ومقاومة السلطات اثناء ضبطه واهانتهم

بصوا، انا في اللحظة دي مش حادي حد امل، ولا حاقوله بكره احسن، ولا حاطلب منه الصبر، انا صابرة وناوية اكمل صبر ان شاء الله لان انا اصلا زملكاوية وواخدة على الصبر.. لكن اللي مش عايز يصبر او مش قادر يصبر مش حاقدر الومه، ولا حاشحته كمان

انا مش ندمانة على حاجة، اقصد مش ندمانة اني حشدت ليوم 25 ونزلت فيه ووقفت قدام المجلس العسكري وقدام الاخوان.. ده انا حتى مش ندمانة اني دافعت عن الاخوان ايام مبارك... انا عملت الواجب، ووقت ما كنت باعمل الواجب ما كانش عندي امل ولا حاجة، كنت باعمل الواجب عشان ده واجب ولازم يتعمل، يمكن بعد الثورة بقى عندي امل، بس انا رجعت لمرحلة اني اعمل الواجب عشان ده واجب.. وحافضل اعمله

لكن انا كمان لازم اعبر عن نفسي، انا حاسة بخزي، وخذلان، وطعن في الضهر، ومرارة، واحساس كده بحتمية انتصار الشر في نهاية المطاف، وان الاعمال النبيلة دايما ما يحصدش نتائجها غير الناس الخسيسة، وإن دي سنة الحياة، يموت احسن ناس، عشان يبكيهم رفقاؤهم، واللي خانوهم يحصدوا ثمرة مجهودهم، وقاعدة عشان اخفف عن نفسي اقرا كتاب مقاتل الطالبيين اللي بيرصد قتل سلسال سيدنا النبي وابو طالب.. طبعا حد حيقولي عشان تخففي عن نفسك تقري تاريخ قتل اهل البيت؟ جدا... على فكرة وانت كمان لو مكتئب وحاسس بالخذلان والخزي زيي لازم تقراه.. انت كمان لو جات لك لحظة قلت فيها وانا كان عليا من ده كله بايه؟ لازم تقراه اهو حمله لانه حيديك امل.. اه وربنا زمبؤلك كده..

هو صحيح انت حتقعد تقرا في ناس كل شوية حد يستغيث بيها تروح جري تغيثه فيطلع اللي بيستغيثوا دول اندال او عاملين لهم كمين، وكل شوية حد يكدب عليهم، وهم ما يرضوش يكدبوه عشان عيب.. افرض طلع صادق؟ يعني اخد ذنب اني كدبت صادق؟ ودايما قبل ما يتقتل اي حد فيهم، ربنا يمكن كل واحد فيهم من قاتله، بس هو ما يرضاش يقتله، ما يرضاش يقتله عشان ما بيحبش القتل غيلة وغدر، او عشان اترجاه وهو اشفق عليه، او عشان ما كانش ساعتها رافع سلاح عليه وهو مش عايز يعتدي في القتل، او عشان توسم ان لو اداله فرصة يعيش يمكن يتوب ويشوف الحق.. فتكون النتيجة، ان المعفي عنه اللي الاخ ما رضاش يقتله هو بالذات اللي يقتل هذا الشخص اللي عفا عنه... ده ملخص سير اهل البيت بالتسلسل، والغريب ان كل واحد فيهم بيعمل اللي ابوه وجده عمله بالظبط، ولما واحد قال لسيدنا زيد بن علي زين العابدين ما معناه: هو انتوا يا اخي ما بتتعلموش من اللي بيتعمل فيكوا؟ قال له برضه ما معناه: احنا بنعمل الصح.. وابويا وجدودي ما غلطوش في حاجة عشان اتعلم انا.. هم صح وانا باقتدي بيهم

وعلى فكرة برضه على طول الناس كانت بتلوم عليهم، اللي منهم يتصالح يقولوا له يا مذل المؤمنين، يا جبان، يا متخاذل ياللي عصرت لمون منك لله انت السبب في اللي احنا فيه.. ييجي حد منهم يقول خلاص بالاها عصر اللمون نتخانق.. يقوموا يخلعوا منه ويلاقي نفسه لوحده وبعد اما يموت يفضلوا هم هم نفس الناس يقولوا عنه: وهو ايه اللي وداه هناك؟ اه وربنا وربنا وربنا زمبؤلك كده.. مش مصدقني اقرا الكتاب.. وبرضه الناس تفضل تقولهم انتوا السبب، منكوا لله خربتوها.. انت بقى لما تقرا الكتاب ده حالتك حتتحسن كتير، لانك حتحس انك مش لوحدك، واهي ناس اهي.. اظن بقى دول احسن ناس في الدنيا كلها في الاولين والاخرين بعد سيدنا النبي والانبيا مافيش حد احسن منهم.. صح؟ اهم برضه حصل لهم اكتر من اللي بيحصل لك، وبنفس الطريقة، وبرضه بيعملوا الواجب والمبدأ حتى لو هم عارفين النتائج، وبرضه بيغيثوا اللي بيستغيث بيهم حتى لو هم عارفين انهم اندال وكدابين وامهم امريكانية، وبرضه ماشيين بمبدأ من خدعنا خدعنا له، ولما حد يقولهم: فلان ده كداب، يقولوا له عيب ما تكدبش الناس، لما يتبين كدبه ابقى كدبه انما من غير دليل ما تظلمش، وبرضه الناس طول الوقت تلوم عليهم وتقولهم انتوا السبب.............................. وبرضه عمرهم في حياتهم ما وصلوا للسلطة، ولو ربنا عارف ان السلطة فيها خير ما كانش ضن بيها على اهل بيت نبيه

طبعا مالكش دعوة بالسلفيين اللي حيقعدوا يقولوا لك ابو الفرج شيعي وكل الهلاوس بتاعتهم دي.. خليهم كده يقعدوا يطاردوا اشباح في خيالهم لحد اما يتجننوا زيادة ماهم مجانين، وقالك حزب النور لقى بؤرة شيعية مكونة من تلاتين واحد في معبد الكرنك وفي الاخر طلعوا ناس من قبيلة الجعافرة اللي مكونة حوالي نص الصعيد وممكن الموضوع يقلب بغم لان الصعايدة في الحاجات دي مش حيتفاهموا وياخدوا ويدوا في الكلام... المهم، ابو الفرج ده لا سني ولا شيعي، وما كانش بيستحمى اصلا عشان خاطر يتوضى ويصلي حتى، ده كان راجل صايع، الله يرحمه بقى، ومالوش غير في اللت والعجن في سير النسوان وفتنة الغلمان، بس كان من جهابذة الثقافة في وقته وجليس الخلفاء وكتب كتاب تأريخي، حتلاقي في النص كده مش قادر يقاوم ميوله للت في سير النسوان بس عموما دي بتبقى جملة او جملتين، حكاية او اتنين في وسط الاحداث التاريخية اللي بيسردها واللي موجودة عند الطبري وابن كثير وابن سعد في الطبقات، لان دي احداث ما يقدرش يزور فيها، وهو عمل الكتاب ده لإنه جزء من منجزه الثقافي ولإن دي شغلانته اللي بياكل منها عيش

مش قصدي انكد عليك.. انا عايزاك بس تعرف انك لازم تفضل تعمل واجبك، وتعمل الصح يا حزلئوم، ومالكش دعوة بالنتائج.. احنا كنا بنقف خمسين واحد على سلم النقابة، وساعات كنا بنبقى عشرة، ومرة ظبطت عمر اسد ومعاه اتنين صحابه هم التلاتة عاملين وقفة على سلم النقابة، وكان بيبقى قدامنا قد عددنا 1000 مرة عساكر امن مركزي، وما بطلناش ولا يأسنا، مش عشان كان عندنا امل ولا حاجة، عشان ده واجبنا اللي عملناه وحنفضل نعمله، وعشان انت مش لازم تندم انك عملت الواجب، وعشان مش لازم يوجعك ان لما قرايبك وجيرانك يبقوا عارفين انك "الواد او البت بتوع المظاهرات" فيفضلوا يقولوا لك: عاجبكوا كده؟ انتوا السبب في اللي احنا فيه... لان اللي بيقولك كده ما عملش حاجة، وبيلومك عشان عملت حاجة، واللي يقولك انتوا السبب قول له: انا اتسببت في الحاجة الوحشة اللي حصلت.. حضرتك بقى ما اتسببتش ليه في حاجة احسن؟ ولا انت قاعد في البيت مستنينا نغلط عشان تلومنا؟ وانت ما غلطتش في حاجة.. انت عاملت ضميرك، وفي كل الاحوال انت كسبان، لو مت تبقى شهيد، لو اتصابت يبقى جزء منك سبقك للجنة، لو اتحبست يبقى ارتاحت من وشوش عكرة قارفاك في عيشتك باللوم والتقريع.. وانا عايزاك تعرف ان ناس احسن منك وحصل لهم اوحش من اللي حصل لك، وفي جملة جميلة قوي في الكتاب ده بتوصف الناس اللي من اهل البيت اللي حبسهم ابو جعفر المنصور - وبالمناسبة العباسيين استغلوا اهل البيت عشان يوصلوا للسلطة وبعد كده قتلوهم وحبسوهم زي واحد صاحبي انت ما تعرفوش - الجملة بتقول: كانوا صبرا.. كسبيكة الذهب، كلما اوقد عليها النار ازدادت خلاصا

اذا كان احمد دومة اتحبس ولما الاخوان حبوا يشوهوا سمعته ما لقوش حاجة يقولوها غير: ده كان اخوان وسابهم.. كويس انهم عارفين ان الانتماء للاخوان معرة يتعاير بيها الانسان، واذا كان احمد ماهر اللي ساند مرسي بكل قوته، واللي فعلا لولا ان ستة ابريل ساندت مرسي في الاعادة كان زمان شفيق هو اللي رئيس دلوقت، واذا كان احمد ماهر كل الناس لامته، وبعضهم نبذوه، واتهموه في شرفه الوطني، وقالوا له يا خاين يا عميل يا امنجي يا اخوان خلايا نايمة ياللي اتفقت مع الامريكان عشان تجيبوا الاخوان ياللي طمعان في وزارة... واحمد حيطمع في وزارة من الاخوان ليه؟ لو كان طمعان في وزارة ما خدهاش من مبارك ولا المجلس العسكري ليه؟ اللي فاكراه ان ستة ابريل قالوا احنا حندعم مرسي رغم اننا عارفين ان المجلس العسكري حينجح شفيق، يعني هم وقتها كانوا معتقدين انهم بيراهنوا على الحصان الخسران، وللتذكرة، اكتر حد قدم شهداء في العباسية كانت ستة ابريل.. بس حازمون الانطاع نسيوا.. اذا كان جو الاسطورة مقبوض عليه، اذا كان جيكا وكريستي انتخبوا مرسي وقتلهم.. اذا كان علاء عبد الفتاح اتمرمط ايام مبارك عشان بيدافع عن الاخوان، وهو في محبسه ايام المجلس العسكري انتخب الاخوان في مجلس الشعب، ولما خرج عمل مسيرة تسليم السلطة لمجلس الشعب والاخوان ضربوه وعصر لمون وانتخب مرسي واخرتها يعملوا له ضبط واحضار عشان الاميرة جومانا... اذا كنت انت قاعد مستني دورك في القتل او الاصابة او الاعتقال... ما تزعلش... احسن منك وحصل لهم كده، وفي الاخر، مين اللي الناس خلدت اسمه؟ مين اللي ناس عملته ولي بتتبارك بيه؟ يعني انت حتموت ومرسي هو اللي حيعيش؟ ما كلنا ميتين... وكلنا مقابلين ربنا

"هذا يوم ينفع الصادقين صدقهم"

يا بخت من بكاني وبكي عليا

الا انا قرفانة قوي.. وقرفي مش حينفع اعبر عنه على التويتر.. لاني عايزة اخد اكبر عدد من البشر غسيل ومكوى

بصوا.. انا قرفي نابع من ان تلات اربع مشاكلنا نابعة من غباوتنا والربع الباقي نابعة من استغلال اعداءنا لغباوتنا

مش كل حاجة حسن نية وطيبة

اه معظم الثوار، او كل الثوار اللي ينفع يتقال  عليهم ثوار بجد، نزلوا على باب الله، ومالهمش في المؤامرات وشايلين شنطتهم على الاعتصامات والناس عمالة تلعب البخت على قفاهم، ومالهمش اطماع في فلوس ولا سلطة

دي حقيقة

بس مش كل الاطماع فلوس وسلطة.. في اطماع ذاتية، ومش كل المشاكل هبل.. في جزء من المشاكل غباوة، وانانية، وذاتية، وفيها لاخفيها، واصرار على المزايدة عشان فرد يطلع كويس قدام نفسه في مقابل مصلحة مجموع، ومش كل حاجة الاخوان متآمرين فيها او بخطة المجلس العسكري او امن الدولة مدبرها

انا مش بانكر دور اي من الجهات المذكورة في افشال الثورة.. لكن صدقوني احنا موفرين عليهم مجهود كتير بعيوب فينا مش عايزين نعترف بيها

ما تيجوا نقرا المشهد بشكل تاني، سهل قوي اننا نشتم الاخوان، الاخوان عاملين في نفسهم بلاوي مخلية حصى الارض يشتم فيهم، وبعد اللي عملوه عند دار القضاء بقى ناقص المرشد نفسه يهتف يسقط يسقط حكم المرشد، وعشان نبقى منصفين، كل الخصم اللي اتخصم من الاخوان كان بجهدهم الحقيقة... المنافسين ما بذلوش اي جهد الا في انهم يخصموا من نفسهم هم كمان.. ورجع الناس تاني ما تثقش في حد ولا في نفسها وبقى عند الناس العادية احساس بالفشل والخزي والخذلان، وبقوا حاسين انهم مهما بذلوا اقصى طاقتهم مافيش امل وده اللي مخليهم متنحين ومكسلين ومستسلمين

ماشي.. الاخوان كدابين، منافقين، نصابين، جبنا، فيهم خسة وندالة تدرس في الجامعات والمعاهد العليا

لكن الاخوان كمان فيهم مميزات مش فينا وعشان كده لحد دلوقت المعركة إيفن.. مش حاقول هم كاسبينها، لانهم مش كسبانين اي حاجة، كل يوم بيخسروا، وبيخسروا ناس، لكن لما بيخسروا ناس الناس دول بتقعد في البيت، مش بتروح لحد تاني

الاخوان في انتخابات مجلس الشعب اخدوا خمستاشر مليون، في الرئاسة اخدوا خمسة في الاول وفي الاعادة اخدوا 13، في الاستفتاء اخدوا 10.. ولو عملت انتخابات دلوقت الاخوان مش حياخدوا مليون على بعضه... بس اللي بيبطل ينتخب الاخوان مش بيروح ينتخب حد تاني.. بيقعد في البيت.. زي ايام مبارك بالظبط

وبصراحة معاه حق

حينتخب مين طيب؟

حينتخب ناس ذواتهم وغرورهم وصورتهم في المراية اهم عندهم من اي حاجة؟ والجديد بقى المزايدة بالموضوعية، والتكالب على الزهد.. او التزهد، ماهو زي ما الاخوان بتتكالب على المناصب والمكاسب في ناس بتتكالب على ان كل واحد فيهم يبان زاهد اكتر من التاني، ومش زاهد ويسيبها لغيره؟ لا ده زاهد وبيزايد على غيره: ازاي تاخد موقف تزايد بيه على اي حد وتستموت عليهم.. ازاي تعمل فضيحة بجلاجل لاي حد بلا اي مبرر وتترصد له على الساقطة واللقطة عشان تبقى ثوري مظبوط.. ازاي نفرج الناس علينا ونخلي اللي ما يشتري يتفرج ونشمت الكلاب فينا... ازاي تاخد مواقف غلط ونقع في الكمين الغلط عشان نثبت اننا موضوعيين.. ازاي اطلع ميتين ام اي حد مني وله افضال على الثورة وافرح الناس فيه عشان اثبت اني مش تبع حد..  انا افهم ان الحاجات دي بتتعمل بحسن نية مرة.. مرتين.. تلاتة.. انما لما تبقى اسلوب حياة يبقى فيه مشكلة، قشطة جدا، كل دي حركات مراهقة زي اللي بتدلق جاز على نفسها عشان تهدد اهلها انها حتولع في نفسها.. لعبنا كتير والله، وزايدنا على بعض كتير

ممكن بقى نفوق لنفسنا شوية

هو حضرتك عمرك سمعت ان اخوانجي بيتخانق مع اخوانجي؟ عمرك شوفت حد فيهم بيزايد على التاني؟ عمرنا سمعنا واحد اخوانجي متكحرت بيقر على الشاطر ويقول معاه فلوس وجابها منين؟

طيب اذا كانوا هم فعلا خرفان.. فبرضه احنا ذاتيين، وكل واحد بيفكر في نفسه

ماشي انت بتقول على الاخوان خرفان عشان هو مستعد ينزل في اي حاجة في اي حتة ويضرب اي حد ما يعرفوش ولا يعرف هو عمل ايه اساسا بس عشان مسئوله قال له انزل.. ايوه، عنده من الايثار اللي حوله لانسان آلي مش بني ادم.. وانا مش باقول انك تبقى انسان آلي... بس كمان حضرتك وحضرتي وحضرته وحضرتها.. ما احناش اينشتاين يعني ولا كل واحد عايش في دور رئيس جمهورية نفسه وهاتك يا تشليت في خلق الله لحد ما بقى الثوار متفرقين ومش عارفين اصلا هم عايزين ايه؟

هم عايزين يعتصموا.. مبدئيا كده عشان نبقى على مية بيضا.. وعايزين يزايدوا.. وكل واحد عايز يثبت لنفسه ان عنده نقاء ثوري اكتر من اي حد تاني

فالنقاء الثوري ده يخليك لوحدك ومتشتت

اللي بقوله ده مش جديد... وبقوله من زمان، بس مش بالمفتشر عشان ما اشمتش الاعادي.. وعشان انا عارفة ومتأكدة من حسن النية، وعشان انا شايفة بعينيا ان الناس اللي بتعمل كده ما كلتش حاجة تشرب عليها مية.. بس انتوا عارفين ايه اللي زاد قرفي؟؟

موقف كنت اخدته زماااااااااااااان واغلب الناس غلطتني.. واخيرا، وبعد طول انتظار، وصلتني معلومات مؤكدة ان موقفي ده كان صح، وان اغلب الناس اللي غلطتني دي كانت بس عايزة تزايد وتعمل ثورية.. وفي ناس من اللي هاجموني وصلتهم نفس المعلومات وسكتوا عشان مش عايزين فضايح.. طب مش عايزين فضايح في الموقف ده وانا معاكوا ومش حاعمل فضايح بس عشان اطلع نفسي صح لان ماحدش حيستفيد من ده.. بس ليه العقل والحكمة دول مش في كل حاجة بقى؟ وانا مش حاقولكوا ايه الموقف ده.. حاسيبكوا كده مغشوشين ومخدوعين.. تستاهلوا 

والله ما انا قايلة

بس.. هه..  خليكوا كده لحد لما تشوفوا بعينيكوا وتتأكدوا بنفسكوا، ومدام المعلومات دي وصلتني يبقى هي في طريقها ليكوا

انا ممكن اعرف هي الناس بتعمل كده ليه؟

مش عايزة اتك قوي على الناس عشان انا عارفة انهم قدموا تضحيات ومخلصين ومتفانيين ومبهدلين روحهم.. بس عايزة اعرف بيعملوا كده ليه؟

ليه احضر اجتماع يبوظ عشان اتنين كانوا بيتخانقوا مين اللي دعا للمظاهرة اللي قبل اللي فاتت الاول؟

ليه عمالين نفرج الناس علينا ونشتم في بعضينا؟ معلش... ليه؟ هاه؟ هاه؟ هاه؟ واول حاجة تحصل مع اي خلاف: انت بعت القضية.. انت اشتروك.. انت زيك زي الاخوان.. انت شربت شاي بالياسمين.. على طول كده؟ الاتهام جاهز على طول؟
مافيش التماس اعذار؟ مافيش انك تفتكر للشخص ده مواقف عملها قبل كده؟ صحيح احنا خدنا على قفانا كتير واتغشينا في ناس.. لكن ده مش مبرر اننا يا اما نفوت قوي يا اما نتشكك قوي

انتوا عارفين انا ساعات بازعل قوي ان الاخوان طلعوا وحشين كده.. كان نفسي يطلعوا كويسين، وكان نفسي ان الاخلاص والتفاني دول يبقى لمصلحة البلد مش لمصلحة الجماعة.. مش عشان انا ساذجة ولا عبيطة، بس عشان نستريح احنا... ساعات اقعد كده واقول: يعني كان جرا ايه يا اخوان لو كنتوا اتقيتوا ربنا فينا بدل ما اتحوجنا لقفا اللي ما كناش نطيق نبص في وشهم؟ وبدل ما الناس عمالة تناكف في بعض واول ما الحاجة تخرب يقولوا مؤامرة؟

لا بقى مش مؤامرة.. اللي حاصل في حزب الدستور مثلا وفي جرنال التحرير مش مؤامرة ولا حاجة.. الانقسامات والناس اللي عمالة تمسك في شواشي بعض مش مؤامرة ولا حاجة.. الخناقة اللي اتنشرت لجبهة الانقاذ مش مؤامرة ولا حاجة.. مافيش طرف متآمر.. ولا عملاء الاخوان وامن الدولة تدخلوا لتقويض الكيان من الداخل والكلام الخايب ده.. دي غباوة

في حزب الدستور الخناقة على اللايحة، وناس تقول استنوا لما سنة تعدي باللايحة دي وبعدين نغيرها وفقا للقانون وناس تانية تقولهم لا احنا في ثورة يالا نغيرها دلوقت.. وراحوا معتصمين، واللي ماسكين في اللايحة مصغرين مخهم واللي عايزين يغيروا اللايحة مش عايزين يتفاهموا والناس عمالة تعمل شغل عظبجية على بعض.. حلو كده يعني؟ جميل لما الناس تتفرج عليكوا؟ ما تقعدوا وتتخانقوا وتشتموا بعض وتحدفوا الكراسي على بعض من غير ما حد يسمع بيكوا ولا يشوفكوا وانتوا بتعملوا كده، لازم الناس تسمع بيكوا وتتفرج عليكوا وتشتمت فيكوا؟ لازم الناس الحيرانة تفقد الثقة فيكوا وتقول اذا كانوا بيعملوا كده في بعض امال لو مسكوا البلد حيعملوا فينا ايه؟ ما كل الناس بتختلف.. ايه حكاية الاعتصامات دي وفرجة العالم؟ هو انت مش عارف مين معاك ومين عليك؟ بقى بعض الثوار يعصروا لمون على الاخوان اللي عملوا اللي عملوه فينا في محمد محمود ومش عارفين يعصروا لمون على بعض؟ وكل ما الناس تتجمع في كيان يختلفوا والكيان يتقسم ونفضل نقول: ستة ابريل الاولانية ولا التانية؟ كفاية الاولانية ولا التانية؟ بظرميط الاولانية ولا التانية؟ وحيبقى بقى حزب الدستور الاولاني ولا التاني؟ وليه التخوين؟ وليه الشتيمة؟ تتفها تنزل في عبك يا اخي

وبالنسبة لجرنال التحرير ابراهيم عيسى عين 30 وما عينش 7... وبصرف النظر عن التفاصيل هو قالهم حاعينكوا في شهر سبعة وهم قالوا عايزين عقد وهو قالهم انتوا ما بتشتغلوش وهم قالوا له كده طب احنا حنعتصم! الله.. واحنا ليه نعرف كل التفاصيل دي؟ وليه نعرف قالهم ايه وقالوا له ايه ومشي لا ماشيش لا راجع لا مش راجع.. هو اصلا ليه الدبكة والقلبان ده كله؟ وناس تقول ماهو عين 30 ما السبعة يستنوا لشهر يوليو... طيب هو عين 30 ما كانش جرا حاجة لو كانوا بقوا 37.. هم يعني السبعة دول اللي حينقصوا دخل الجرنال بمرتباتهم؟ طب هو ما عينهمش.. ما كانش جرا حاجة لو كانوا استنوا لشهر سبعة.. طب هو ما عينهمش وهم ما استنوش وقرروا يعتصموا.. ما كانش جرا حاجة لما يبقى خلاف اداري واعتصام جوه الجرنال من غير شتايم وحملة وتخوين ونلاقي صحفيين بيشتغلوا مع كناسة رؤساء التحرير في الارض بيزايدوا على ابراهيم عيسى؟ والعدو يشمت، والنجس يمسح نجاسته في جرنال التحرير عشان يطلع ثوري، طب وده وقته؟ اذا كنت انا وانا باكتب دلوقت قلت كناسة رؤساء التحرير وما رضتش اكتب اسامي لانه مش وقته اشتم حتى كناسة رؤساء التحرير مدام فاتحين باب للمعارضة وما حبكش اعمل معاهم معركة جانبية، يا سيدي ابراهيم عيسى مفتري وظالم، ولو اني مش شايفة كده انا شايفة انه ركبه العند في حاجة ما كانتش متساهلة كل العند.. بس حافترض انه مفتري وظالم.. ده وقته يتعمل حملة عليه؟ ما افتكرتلوش انه اول واحد كتب لمبارك: انك ميت؟ ما افتكرتلوش انه يوم 25 كان من الصبح معانا وقال لنا احنا قاعدين ماحدش يروح وقت ما كان رئيس جمهوريتكوا مستخبي هو وجماعته مستنيين يشوفوا الدنيا رايحة فين؟ مش فاكر له انه شوكة في حلق مرسي وجماعته ومش منيمهم الليل وممشيهم يكلموا نفسهم؟ وقته دلوقت القلبان ده؟ وانت راخر يا ابراهيم ما كنت تعينهم يعني.. هي جات على التلات شهور دول؟ بس هو لحد دلوقت ما غلطش في حد... عشان عيب، يتفها تنزل في عبه.. واللي غلطوا فيه برضه تفوها ونزلت في عبهم
ملحوظة:
انا مش عايزة حد يخش يشرح لي مشكلة حزب الدستور ومشكلة جرنال التحرير من وجهة نظره ويقولي انت فاهمة غلط... لاني ما كنتش عايزة افهم اساسا عن المشاكل دي، وما كنتش عايزة اسمع عنها، وما كانش مفروض حد يسمع عنها انشالله تكونوا خزقتوا عينين بعض.. وانا اخدت المثالين دول كمثال لحالات كتير بس دول اقرب مثالين جم في دماغي

ونفسنة بقى

ودي بقى عنصر آخر لفشل الثورة: النفسنة.. ومش عيب الناس تنفسن على بعض خصوصا ان اغلب شباب الثورة سنهم صغير ودي طبيعة الفترة العمرية بتاعتهم

بس تفتكروا يعني الاخوان مافيش بينهم نفسيات؟ مافيهمش واحد ظالم التاني؟ مافيهمش واحد معترض على اداء التاني؟

اكيد لا.. طيب عمرنا شوفنا غسيلهم الوسخ؟

ابدا..

ليه؟

عشان هو بالنسبة له الحفاظ على الجماعة اهم من اي حاجة، اهم من طموحه، ومن شكله قدام الناس، ومن شغله، ومن الاضواء متسلطة عليه ولا متسلطة على زميله اللي اصغر منه... يعني اكيد يعني في من شباب الاخوان عيال بتنفسن على المغير عشان الجماعة ملمعاه اكتر منهم، وممكن يكون بيقول لنفسه اشمعنى هو يعني اللي عاملينه رئيس مراجيح مولد النبي وانا اللي ساهمت اكتر وتعبت اكتر ويمكن اتحبست ويمكن اتضربت ويمكن ضربت ابقى ولا كأني موجود... بس هو بيبلع ده كله عشان مصلحة الجماعة

عشان كده زعلانة ومتغاظة منهم انهم طلعوا وحشين.. طب هي مصر وحشة يعني؟ طب جرا ايه لما الاخلاص ده كله يبقى لمصر مش للجماعة يعني؟ مش كنا استريحنا

انتوا عارفين.. انا باشتغل دلوقت مع مجموعة.. تصوروا ايه؟ تصوروا خايفة اكتب هي مجموعة ايه ولا بتعمل ايه ولا بتشتغل على ايه لبعدين الناس تيجي المجموعة دي والعدد يزيد وتبتدي الاجتماعات تتحول من شغل الى مزايدات وتنظيرات ونفسنات وخناقات؟ والله.. اي والله ولا ليكوا عليا يمين، مع ان المفروض المجموعة دي معمولة عشان تكبر وتتوسع.. بس احنا اي حاجة بتكبر وتتوسع بنعملها بتخرب.. واوعى حد يقولي مؤامرة
انا مش فاهمة اذا كان الواحد مفهم نفسه انه مدام ما بيطلعش بفلوس ولا منصب يبقى هو كده في السليم يبقى لازم يراجع نفسه.. عشان ممكن يكون ركبنا العجب وبقينا نتصنع الزهد
نساع بعضينا عشان الامور تمشي... ولا انتوا مش واخدين بالكوا من اللي حاصل؟
الناس نفسيتها تعبت ورجعت زي ايام مبارك في اليأس واسخم... ليه كده؟ احنا كنا ما صدقنا راقوا ورجعت لهم ثقتهم في نفسهم