Sunday, 12 May 2013

تمرد.. سحب الثقة

ولو اني ما منحتش مرسي اي ثقة، ولا غير مرسي، وافخر اني عملت كل حاجة غلط في حياتي الا اني انتخب واحد اخوانجي.. لا في شعب ولا في شورى ولا في رئاسة
ومع ذلك وقعت اهو على استمارة سحب الثقة هنا.. وبالنسبة للي عصروا لمون، وانا بالمناسبة متعاطفة معاهم ومتفهمة موقفهم.. فباب التوبة مفتوح للذين عملوا السوء بجهالة، وممكن توقع على الاستمارة، وتكفر عن خطيئتك بإنك تسحب على الاقل عشر نسخ وتمضي عليها الناس.
ممكن كمان لو تليفونك فيه نت مش بالمنافيللا زي تليفوني تنزل تمضي الناس برقمهم القومي على تليفونك وده حيضمن لك انك تاخد اكبر عدد من الموقعين.
واظن كمان كل من ساعد مرسي في انه يجتاز مرحلة الاعادة ملزوم انه يساعد في ان الاستمارة دي توصل للعدد اللي هم عايزينه واللي هو 15 مليون. سواء كتاب كبار، او مقدمين برامج، او نشطاء.
في كذا حاجة لازم نتكلم فيها في موضوع الاستمارة دي واهميتها:
أولا:
الناس اللي حتتكلم عن الوضع القانوني للاستمارة، هو ايه كان الوضع القانوني للتوقيعات اللي اتجمعت لسعد باشا زغلول تحت الاحتلال؟ ايه الوضع القانوني لثورة يناير نفسها اللي مشت مبارك؟ وايه التكييف القانوني لرحيل مبارك؟ هو بشكل عام مافيش وضع قانوني لاي حاجة في مصر، مصر نفسها في اللي هي فيه دلوقت وضعها مش قانوني، صدقني. الارادة الشعبية لها قوة القانون والدستور كمان. 
ثانيا: 
الحملة دي مهمة في كونها سلمية وبتدفع في اتجاه تأمين البلد والحفاظ على أمنها القومي، لاني زي ما قلت قبل كده، وباكررها تاني، الاخوان ما عندهمش اي مانع من اشعال حرب اهلية في البلد، وكل شوية يسلطوا الجهاديين يهددوا الناس ان لو مرسي مشي حننزل بالسلاح... ولاد القرعة اللي كانوا هربانين وقعدنا نشحت لهم عشان يرجعوا البلد وقعدوا يتمسكنوا ويقولوا احنا مرضى ومافيناش حيل نعمل حاجة، قال سلاح قال.. السلاح ده تحطه فييييييي عينك.. آه.. والمصريين ما بيحبوش كده، وعندهم هسهس من ان الوضع يقلب لسوريا، وبصراحة انا كمان زيهم... سلاح ايه بقى؟ احنا ما بنحبوش السلاح ده.. فأنت لو سبت الناس فريسة لتهديدات الجهاديين، وفي نفس الوقت انت ما بتقدمش لهم اي بديل غير انك تنزل مظاهرة تقلب في الاخر بان الاخوان ينزلوا لك فتجري وراهم بالطوب كده هم حيقعدوا في البيت ويستنوا فرج ربنا، والحقيقة معاهم حق، حد في الدنيا يدفع بلده لحرب اهلية الا اذا كان خاين؟ لكن حاجة زي دي حتشجع الناس انهم يتخذوا اجراء ايجابي يضمن لهم تماسك البلد.
ثالثا:
دي مش اول مرة نجمع توقيعات، احنا قاومنا الاحتلال الانجليزي بالتوقيعات والاكتتابات ونجحت، واكتر مقاومتنا ضد الاحتلال كانت سلمية بالاعتصامات والتوقيعات والاضرابات والعصيان المدني، ودي الطريقة اللي مشينا بيها كل احتلال جالنا واللي مشينا بيها مبارك.. بإننا نزهقهم ونوقف لهم البلد لحد اما يمشوا.. احنا اصلا حبسنا زكريا عزمي وفتحي سرور وصفوت الشريف بميت الف توقيع.. والتوقيعات دي تسهل بعد كده اي تصعيدات ثورية سلمية
رابعا:
ما تشغلش بالك كتير بردود افعال الاخوان والاسلاميين بشكل عام، طبيعي انهم يعملوا رد فعل، امال يعني عايز تجمع توقيعات ضدهم وهم يقعدوا ساكتين؟ ليه يعني ماسك عليهم صور؟ ثم دول مش مبارك، دول فاهمين كويس ان التوقيعات دي بتجيب نتيجة ولها قوة القانون ومهمة وبتهددهم فعلا.. انت ناسي انهم هم نفسهم شاركوا في جمع توقيعات ضد مبارك؟ طبيعي انهم يعملوا حملة توقيعات مضادة، وطبيعي انهم ينزلوا يضربوا اللي بيعمل حملة التوقيعات، وطبيعي ان داخليتهم تقبض على الشباب وهم بيجمعوا التوقيعات، وممكن يركتبوا حماقات كتير... كويس.. ده كله كويس، كويس قوي، وحيخسرهم، ويصغرهم، ويهيفهم زيادة ماهم هايفين
لانهم لما يعملوا حملة توقيعات مضادة وهم ماسكين السلطة حيظهروا قدام الناس انهم مرتبكين ومش عارفين يعملوا ايه
لما يقبضوا على الناس او يضربوهم ده حيكره الناس فيهم زيادة وحيزيد اقبال الناس على التوقيعات
وبالعكس ردود افعالهم العصبية دي حتخلي الناس تثق في حملة التوقيعات لانهم ممكن الاول يقولوا لك: يعني التوقيعات دي حتعمل حاجة؟ لكن لما يشوفوا الاخوان بيعملوا ردود افعال عصبية حيحسوا انها حتعمل حاجة
واول الحماقات اللي ارتكبت ان حملة حازمون عايزين يعملوا حملة توقيعات لحازم قوامها 50 مليون توقيع هههههههههههههههههههههههههه
اذا كان كل اللي له حق التصويت، يعني معاه بطاقة، عددهم كله على بعضه 50 مليون، وايه حازم ده اللي بيستخدموه بعبع؟ يعني هم مش مكسوفين انهم يتعاملوا مع ابو اسماعيل على انه العو؟ "لو مشيتوا مرسي حنجيب لكوا العو".
كل ده كويس.. ومش عايزة حد ينجر لمعارك جانبية، ولو هم حيلجأوا للعنف يا رييييييييييييت.. خليهم يغلطوا، واحنا ما نغلطش، اول ما يلجأوا للعنف من طرف واحد حيتحاصروا والناس تتعامل معاهم بوصفهم مجرمين.
خامسا:
ما تشغلش بالك برضه بالاشاعات، يعني مثلا حتلاقي ان الاخوان مطلعين اشاعات ان اللي بيجمعوا توقيعات دول بيجبروا الناس على التوقيع، وبيهددوهم، وبيسرقوا بطايقهم، وبيدفعوا لهم فلوس.. الخ الخ الخ.. دمااااااااااااااااااااغك... دماغك خالص، الناس كلها عارفة مين اللي بيدفع فلوس وزيت وسكر ومين اللي بيهدد عيانا بيانا.
دي ارقام حملة تمرد انا عايزاك دلوقت وانت قاعد تسجل، وتطبع اللي في اللنك ده عشر نسخ، واذا كان الانسان العادي حيطبع 10 نسخ، فاللي عصر لمون حيطبع 20 نسخة، واللي شجع الناس تعصر لمون حيطبع 50 نسخة على الاقل... كفر عن خطيئتك، ايا كان مكانك، وتمضي الناس عليه وتبعت للحملة، واذا كانت الحملة في عز ضعفها لمت 2 مليون، احنا نقدر نعدي ال15 مليون، لكن ما تتوقعش ان المهمة حتبقى سهلة، حتبقى صعبة، وحيبقى فيه اعتقالات، وحيبقى فيه ناس تنزل تضرب الشباب في الشارع، وحيبقى فيه تشويه، وحيبقى فيه حملات مضادة... عااااااادي.. عادي، ياما دقت على الراس طبول.. يعني هم اتخن من المدرعة المرتبكة؟
وده لنك تاني للتواصل مع حركة تمرد

17 comments:

Hesham Emara said...

تلأكدى من اللينك بتاع الاستماره لان بعض من اخوانا الشياطين بيحاولوا يزوروا

Hesham Emara said...

تأكدى ان الرابط بتاع الاستماره صحيح لان بعض من اخوانا الشياطين بيحاولوا يزوروا...الشباب بتاعه تمرد دول لو كان معاهم شويه فلوس كانوا خلصوا 20 مليون فى اسبوع وحرقنا دم البعدا

killer 300 said...

ال 15 مليون دول
عباره عن
12 مليون انتخبوا شفيق
+
3 مليون سهل يتلموا من اي فئه من الفئات الي قولتي عليهم
--------------------------------
عشان التوكيلات دية يبقي ليها قوي
لازم يتوفر فيها شرطين
1) انها تبقي تحت اشراف قضائي يثبت صحة كل توكيل حتي لا يشكك فيها أحد " مهو مش يبقي كل الأنتخابات و الأستفتائات المعارضه " الثأريه " شككت فيها لدرجة الأدعاء انها تمت تحت اشراف منجدين - و لما نيجي نلم استمارات سحب الثقه تبقي بدون اي اشراف قضائي خالص و بعدها نطالب الناس تصدقها "
2) ان تحقق هذه الأستمارات نسبة 50 % + 1 ممن لهم حق التصويت من واقع كشوف الناخبين - بمعني ان التوكيلات تحقق 25 مليون مش بس 15 مليون
وقت ما التوكيلات دية تحقق الشرطين دول يبقي كده هم فعلا بيعبروا عن راي الأغلبيه من الشعب - غير كده تبقي " عبط "
طبعا كالعاده انتي مش هتنشري تعليقي - شكرا

muhammed said...

بخصوص اللي بيسرقوا البطاقات من الناس ويوقعوا سرقه من غير استئذان
فأنا احب اقول ان عمي من الاخوان المسلمين، وعندما بأت الجمعيه الوطنيه
في جمع توقيعات ايام مبارك بقيادة سيدنا البرادعي. عرضت عليه انه يوقع
لكن مرضيش..
ولما جماعة الاخوان شاركت في الحمله لما لقوا الموضوع جد، راح لابويا ولم بيانات اسرتي كلها بزعم انه هيقدم لابن عمتي في الطيران، ولما فوجئ اننا
موقعين كلنا اتصل عشان يقول انه اخد بياناتنا عشان التوقيعات...
وهو ده منهج الاخوان.. خرفان في الطاعه.. وحراميه في التنفيذ

Nawara Alantsar said...

انا صلحت اللنكات كلها واخدتها من الحملة نفسها.. شكرا

أبو أمك said...

يعني ولا فيه فلوس, ولا زيت ولا سكر
طب وتكلفة طباعة العشر نسخ دي على مين ؟
وحشتيني

Safaa Abdu said...

أرى أنه هناك واقع مرير ودائرة سحرية لن تنتهي بسهولة دون التنبه الى أن الأطراف التي كانت تحمل مشروعا ما بالاساس اقتصادي هو جزء من اليسار المصري قد تم تهميشه بالكامل والجميع يحاول تهميشه بالكامل
الاستمرار بالتعامل مع الدين للبنك الدولي ولصندوق النقد كقضاء وقدر يزعلني بشدة
فهي ليست مصر عبد الناصر بخطابه لتأميم قناة السويس اذ تطرق بحديثه عن البنك الدولي وقارنه بدليسبس
لا يمكن الاستمرار بالخنوع للكثير من الاتفاقيات وعقود البيع الغير قانونية التي تمت بعهد مبارك ونجله جمال
كما أن اتفاقيات العولمة (التي منعت الدول الصغيرة من حق الجمارك) بمعظمها خاصة التي وقعت بمؤتمر الدوحة (الذي هرب من اضطرابات مظاهرات سياتل وبراغ) تم توقيعها خارج ارادة الكثير من الشعوب
برأيي الثورة المصرية لا يمكنها ان تتوقف لحدود بلدها فهي ام الدنيا
وشباب العالم نظر مبهورا لشباب مصر على أمل أن يصنع ما فشل بالحصول عليه وهو الغاء الديون الافريقية والغاء البيعات الغير شرعية للاقتصاد الوطني والتمرد على صندوق النقد
وحينها ستسترد الثورة المصرية هيبتها أمام الشباب العالمي الذي لا يأبه لتفاصيل الأخوان التافهة ولا غيرها وانما للجوهر المصري الشبابي العريق

un4web said...


مشكور


مدير موقع صحة اون لاين

محمد قنديل said...

لينك الإستمارة مش شغال
و بتطلع الرسالة دي
حملة "تمرد" .. استمارة سحب الثقه من محمد مرسي عيسي العياط
The form "حملة "تمرد" .. استمارة سحب الثقه من محمد مرسي عيسي العياط" is no longer accepting responses.
Try contacting the owner of the form if you think this is a mistake.

أنا صحيح مش حأوقع عليها بس قلت أعرفك إنها مش شغالة

Sutty and Betty said...

دولة الإخوان
=======
إذا استعصت مهمة أخونة الدولة، وحال الرفض الشعبي دون تحقيقها؛ تُرى ماذا يمنع قيام دولة الإخوان في ظل مشروع قانون جديد يبيح للرئيس تخصيص أراضي معينة لأغراض معينة كيفما شاء أو بالأحرى كيفما شاء المرشد أو نائبه خيرت الشاطر دون رقيب أو حسيب، واستدعي هنا المخاوف التي أثارها مقال المستشار طارق البشري في الشروق قبل بضعة أيام.

هل هذا الوقت مناسب لنتناسى أننا بصدد قطيع يأتمر بأمر يميني متطرف يعتبر مصر ديار كفر والمجتمعة ضالاً؟ هل هذا الوقت مناسب لنتناسى كيف يرنون إلى إنشاء دولة سيد قطب التي كثيرا ما حلموا بها على أية قطعة يقررون دون استئذان سلبها من مصر الوطن؟

ترى ما يمنع المرشد من إصدار توجيه عام - وما أكثر توجيهاته - لكافة منتسبي "جماعة الإخوان المسلمون" ثم اعضاء "جمعية الإخوان المسلمون" ثم أعضاء "حزب الحرية والعدالة" ثم أعضاء حزب الوسط" ثم محبي حركة "قضاة من أجل مصر" ثم الأهل والعشيرة ومن شايعهم ومن والاهم ليستقلوا أتوبيساتهم التي لا يجدون عناء في الترتيب لها متجهين إلى إقليم قناة السويس والاستيلاء عليه لخلق واقع جديد ودولة جديدة على غرار استيلاء حماس على السلطة في غزة في 2006؟ الأمر لن يستغرق أكثر من 4 ساعات، حتى ينهمر الإخوان من كل صوب وحدب تلبية لنداء مرشدهم يلي ذلك مباشرة الإعلان عن إنفصال الإقليم وسيناء في ظل دولة الإخوان الذين عجزوا عن الاندماج في صفوف الشعب المصري، ولن استغرب وقتها أن يعلن عن القيادة المشتركة لدولة الإخوان في قطاع غزة وسيناء وإقليم القناة وليس إخوان الأردن عنهم ببعيد.

ومن السهل تهجير سكان القناة الرافضين لهذا المخطط واستيعاب المواطنين الذين يبدون استعدادهم للقبول بالوضع الجديد، لكن المعضلة التي ستواجه الجيش المصري والأجهزة السيادية هي عدم القدرة على مواجهة الزحف أو منعه فعندها سيكثر حديث الإخوان عن تقييد العسكر لحرية الانتقال، ناهيك عن عجز الجيش عن الإتيان بعمل عسكري مضاد، فإن فعل ستتعالى الصرخات الإخوانية قائلة: "انظروا إنهم يقتلون المصريين!"

Sutty and Betty said...

دولة الإخوان
=======
إذا استعصت مهمة أخونة الدولة، وحال الرفض الشعبي دون تحقيقها؛ تُرى ماذا يمنع قيام دولة الإخوان في ظل مشروع قانون جديد يبيح للرئيس تخصيص أراضي معينة لأغراض معينة كيفما شاء أو بالأحرى كيفما شاء المرشد أو نائبه خيرت الشاطر دون رقيب أو حسيب، واستدعي هنا المخاوف التي أثارها مقال المستشار طارق البشري في الشروق قبل بضعة أيام.

هل هذا الوقت مناسب لنتناسى أننا بصدد قطيع يأتمر بأمر يميني متطرف يعتبر مصر ديار كفر والمجتمعة ضالاً؟ هل هذا الوقت مناسب لنتناسى كيف يرنون إلى إنشاء دولة سيد قطب التي كثيرا ما حلموا بها على أية قطعة يقررون دون استئذان سلبها من مصر الوطن؟

ترى ما يمنع المرشد من إصدار توجيه عام - وما أكثر توجيهاته - لكافة منتسبي "جماعة الإخوان المسلمون" ثم اعضاء "جمعية الإخوان المسلمون" ثم أعضاء "حزب الحرية والعدالة" ثم أعضاء حزب الوسط" ثم محبي حركة "قضاة من أجل مصر" ثم الأهل والعشيرة ومن شايعهم ومن والاهم ليستقلوا أتوبيساتهم التي لا يجدون عناء في الترتيب لها متجهين إلى إقليم قناة السويس والاستيلاء عليه لخلق واقع جديد ودولة جديدة على غرار استيلاء حماس على السلطة في غزة في 2006؟ الأمر لن يستغرق أكثر من 4 ساعات، حتى ينهمر الإخوان من كل صوب وحدب تلبية لنداء مرشدهم يلي ذلك مباشرة الإعلان عن إنفصال الإقليم وسيناء في ظل دولة الإخوان الذين عجزوا عن الاندماج في صفوف الشعب المصري، ولن استغرب وقتها أن يعلن عن القيادة المشتركة لدولة الإخوان في قطاع غزة وسيناء وإقليم القناة وليس إخوان الأردن عنهم ببعيد.

ومن السهل تهجير سكان القناة الرافضين لهذا المخطط واستيعاب المواطنين الذين يبدون استعدادهم للقبول بالوضع الجديد، لكن المعضلة التي ستواجه الجيش المصري والأجهزة السيادية هي عدم القدرة على مواجهة الزحف أو منعه فعندها سيكثر حديث الإخوان عن تقييد العسكر لحرية الانتقال، ناهيك عن عجز الجيش عن الإتيان بعمل عسكري مضاد، فإن فعل ستتعالى الصرخات الإخوانية قائلة: "انظروا إنهم يقتلون المصريين!"

hamza massaoui said...

http://www.download-1link.com/2013/05/download-visual-studio-for-free.html

Unknown said...

لما مرسي يمشي مين هيجي مكانه؟ مفيش إجماع علي حد ... يبقي البلد هتخرب أكثر ماهي خربانة ... و حسبي الله و نعم الوكيل

Unknown said...

لما مرسي يمشي مين هيجي مكانه؟ مفيش إجماع علي حد ... يبقي البلد هتخرب أكثر ماهي خربانة ... و حسبي الله و نعم الوكيل

dina engaz said...

الصحيفه الصادقه مدير موقع

dina engaz said...

الصحيفه الصادقه مدير موقع

محمود بركات said...

الله