Saturday, 20 April 2013

يا بخت من بكاني وبكي عليا

الا انا قرفانة قوي.. وقرفي مش حينفع اعبر عنه على التويتر.. لاني عايزة اخد اكبر عدد من البشر غسيل ومكوى
بصوا.. انا قرفي نابع من ان تلات اربع مشاكلنا نابعة من غباوتنا والربع الباقي نابعة من استغلال اعداءنا لغباوتنا
مش كل حاجة حسن نية وطيبة
اه معظم الثوار، او كل الثوار اللي ينفع يتقال  عليهم ثوار بجد، نزلوا على باب الله، ومالهمش في المؤامرات وشايلين شنطتهم على الاعتصامات والناس عمالة تلعب البخت على قفاهم، ومالهمش اطماع في فلوس ولا سلطة
دي حقيقة
بس مش كل الاطماع فلوس وسلطة.. في اطماع ذاتية، ومش كل المشاكل هبل.. في جزء من المشاكل غباوة، وانانية، وذاتية، وفيها لاخفيها، واصرار على المزايدة عشان فرد يطلع كويس قدام نفسه في مقابل مصلحة مجموع، ومش كل حاجة الاخوان متآمرين فيها او بخطة المجلس العسكري او امن الدولة مدبرها
انا مش بانكر دور اي من الجهات المذكورة في افشال الثورة.. لكن صدقوني احنا موفرين عليهم مجهود كتير بعيوب فينا مش عايزين نعترف بيها
ما تيجوا نقرا المشهد بشكل تاني، سهل قوي اننا نشتم الاخوان، الاخوان عاملين في نفسهم بلاوي مخلية حصى الارض يشتم فيهم، وبعد اللي عملوه عند دار القضاء بقى ناقص المرشد نفسه يهتف يسقط يسقط حكم المرشد، وعشان نبقى منصفين، كل الخصم اللي اتخصم من الاخوان كان بجهدهم الحقيقة... المنافسين ما بذلوش اي جهد الا في انهم يخصموا من نفسهم هم كمان.. ورجع الناس تاني ما تثقش في حد ولا في نفسها وبقى عند الناس العادية احساس بالفشل والخزي والخذلان، وبقوا حاسين انهم مهما بذلوا اقصى طاقتهم مافيش امل وده اللي مخليهم متنحين ومكسلين ومستسلمين
ماشي.. الاخوان كدابين، منافقين، نصابين، جبنا، فيهم خسة وندالة تدرس في الجامعات والمعاهد العليا
لكن الاخوان كمان فيهم مميزات مش فينا وعشان كده لحد دلوقت المعركة إيفن.. مش حاقول هم كاسبينها، لانهم مش كسبانين اي حاجة، كل يوم بيخسروا، وبيخسروا ناس، لكن لما بيخسروا ناس الناس دول بتقعد في البيت، مش بتروح لحد تاني
الاخوان في انتخابات مجلس الشعب اخدوا خمستاشر مليون، في الرئاسة اخدوا خمسة في الاول وفي الاعادة اخدوا 13، في الاستفتاء اخدوا 10.. ولو عملت انتخابات دلوقت الاخوان مش حياخدوا مليون على بعضه... بس اللي بيبطل ينتخب الاخوان مش بيروح ينتخب حد تاني.. بيقعد في البيت.. زي ايام مبارك بالظبط
وبصراحة معاه حق
حينتخب مين طيب؟
حينتخب ناس ذواتهم وغرورهم وصورتهم في المراية اهم عندهم من اي حاجة؟ والجديد بقى المزايدة بالموضوعية، والتكالب على الزهد.. او التزهد، ماهو زي ما الاخوان بتتكالب على المناصب والمكاسب في ناس بتتكالب على ان كل واحد فيهم يبان زاهد اكتر من التاني، ومش زاهد ويسيبها لغيره؟ لا ده زاهد وبيزايد على غيره: ازاي تاخد موقف تزايد بيه على اي حد وتستموت عليهم.. ازاي تعمل فضيحة بجلاجل لاي حد بلا اي مبرر وتترصد له على الساقطة واللقطة عشان تبقى ثوري مظبوط.. ازاي نفرج الناس علينا ونخلي اللي ما يشتري يتفرج ونشمت الكلاب فينا... ازاي تاخد مواقف غلط ونقع في الكمين الغلط عشان نثبت اننا موضوعيين.. ازاي اطلع ميتين ام اي حد مني وله افضال على الثورة وافرح الناس فيه عشان اثبت اني مش تبع حد..  انا افهم ان الحاجات دي بتتعمل بحسن نية مرة.. مرتين.. تلاتة.. انما لما تبقى اسلوب حياة يبقى فيه مشكلة، قشطة جدا، كل دي حركات مراهقة زي اللي بتدلق جاز على نفسها عشان تهدد اهلها انها حتولع في نفسها.. لعبنا كتير والله، وزايدنا على بعض كتير
ممكن بقى نفوق لنفسنا شوية
هو حضرتك عمرك سمعت ان اخوانجي بيتخانق مع اخوانجي؟ عمرك شوفت حد فيهم بيزايد على التاني؟ عمرنا سمعنا واحد اخوانجي متكحرت بيقر على الشاطر ويقول معاه فلوس وجابها منين؟
طيب اذا كانوا هم فعلا خرفان.. فبرضه احنا ذاتيين، وكل واحد بيفكر في نفسه
ماشي انت بتقول على الاخوان خرفان عشان هو مستعد ينزل في اي حاجة في اي حتة ويضرب اي حد ما يعرفوش ولا يعرف هو عمل ايه اساسا بس عشان مسئوله قال له انزل.. ايوه، عنده من الايثار اللي حوله لانسان آلي مش بني ادم.. وانا مش باقول انك تبقى انسان آلي... بس كمان حضرتك وحضرتي وحضرته وحضرتها.. ما احناش اينشتاين يعني ولا كل واحد عايش في دور رئيس جمهورية نفسه وهاتك يا تشليت في خلق الله لحد ما بقى الثوار متفرقين ومش عارفين اصلا هم عايزين ايه؟
هم عايزين يعتصموا.. مبدئيا كده عشان نبقى على مية بيضا.. وعايزين يزايدوا.. وكل واحد عايز يثبت لنفسه ان عنده نقاء ثوري اكتر من اي حد تاني
فالنقاء الثوري ده يخليك لوحدك ومتشتت
اللي بقوله ده مش جديد... وبقوله من زمان، بس مش بالمفتشر عشان ما اشمتش الاعادي.. وعشان انا عارفة ومتأكدة من حسن النية، وعشان انا شايفة بعينيا ان الناس اللي بتعمل كده ما كلتش حاجة تشرب عليها مية.. بس انتوا عارفين ايه اللي زاد قرفي؟؟
موقف كنت اخدته زماااااااااااااان واغلب الناس غلطتني.. واخيرا، وبعد طول انتظار، وصلتني معلومات مؤكدة ان موقفي ده كان صح، وان اغلب الناس اللي غلطتني دي كانت بس عايزة تزايد وتعمل ثورية.. وفي ناس من اللي هاجموني وصلتهم نفس المعلومات وسكتوا عشان مش عايزين فضايح.. طب مش عايزين فضايح في الموقف ده وانا معاكوا ومش حاعمل فضايح بس عشان اطلع نفسي صح لان ماحدش حيستفيد من ده.. بس ليه العقل والحكمة دول مش في كل حاجة بقى؟ وانا مش حاقولكوا ايه الموقف ده.. حاسيبكوا كده مغشوشين ومخدوعين.. تستاهلوا 
والله ما انا قايلة
بس.. هه..  خليكوا كده لحد لما تشوفوا بعينيكوا وتتأكدوا بنفسكوا، ومدام المعلومات دي وصلتني يبقى هي في طريقها ليكوا
انا ممكن اعرف هي الناس بتعمل كده ليه؟
مش عايزة اتك قوي على الناس عشان انا عارفة انهم قدموا تضحيات ومخلصين ومتفانيين ومبهدلين روحهم.. بس عايزة اعرف بيعملوا كده ليه؟
ليه احضر اجتماع يبوظ عشان اتنين كانوا بيتخانقوا مين اللي دعا للمظاهرة اللي قبل اللي فاتت الاول؟
ليه عمالين نفرج الناس علينا ونشتم في بعضينا؟ معلش... ليه؟ هاه؟ هاه؟ هاه؟ واول حاجة تحصل مع اي خلاف: انت بعت القضية.. انت اشتروك.. انت زيك زي الاخوان.. انت شربت شاي بالياسمين.. على طول كده؟ الاتهام جاهز على طول؟
مافيش التماس اعذار؟ مافيش انك تفتكر للشخص ده مواقف عملها قبل كده؟ صحيح احنا خدنا على قفانا كتير واتغشينا في ناس.. لكن ده مش مبرر اننا يا اما نفوت قوي يا اما نتشكك قوي
انتوا عارفين انا ساعات بازعل قوي ان الاخوان طلعوا وحشين كده.. كان نفسي يطلعوا كويسين، وكان نفسي ان الاخلاص والتفاني دول يبقى لمصلحة البلد مش لمصلحة الجماعة.. مش عشان انا ساذجة ولا عبيطة، بس عشان نستريح احنا... ساعات اقعد كده واقول: يعني كان جرا ايه يا اخوان لو كنتوا اتقيتوا ربنا فينا بدل ما اتحوجنا لقفا اللي ما كناش نطيق نبص في وشهم؟ وبدل ما الناس عمالة تناكف في بعض واول ما الحاجة تخرب يقولوا مؤامرة؟
لا بقى مش مؤامرة.. اللي حاصل في حزب الدستور مثلا وفي جرنال التحرير مش مؤامرة ولا حاجة.. الانقسامات والناس اللي عمالة تمسك في شواشي بعض مش مؤامرة ولا حاجة.. الخناقة اللي اتنشرت لجبهة الانقاذ مش مؤامرة ولا حاجة.. مافيش طرف متآمر.. ولا عملاء الاخوان وامن الدولة تدخلوا لتقويض الكيان من الداخل والكلام الخايب ده.. دي غباوة
في حزب الدستور الخناقة على اللايحة، وناس تقول استنوا لما سنة تعدي باللايحة دي وبعدين نغيرها وفقا للقانون وناس تانية تقولهم لا احنا في ثورة يالا نغيرها دلوقت.. وراحوا معتصمين، واللي ماسكين في اللايحة مصغرين مخهم واللي عايزين يغيروا اللايحة مش عايزين يتفاهموا والناس عمالة تعمل شغل عظبجية على بعض.. حلو كده يعني؟ جميل لما الناس تتفرج عليكوا؟ ما تقعدوا وتتخانقوا وتشتموا بعض وتحدفوا الكراسي على بعض من غير ما حد يسمع بيكوا ولا يشوفكوا وانتوا بتعملوا كده، لازم الناس تسمع بيكوا وتتفرج عليكوا وتشتمت فيكوا؟ لازم الناس الحيرانة تفقد الثقة فيكوا وتقول اذا كانوا بيعملوا كده في بعض امال لو مسكوا البلد حيعملوا فينا ايه؟ ما كل الناس بتختلف.. ايه حكاية الاعتصامات دي وفرجة العالم؟ هو انت مش عارف مين معاك ومين عليك؟ بقى بعض الثوار يعصروا لمون على الاخوان اللي عملوا اللي عملوه فينا في محمد محمود ومش عارفين يعصروا لمون على بعض؟ وكل ما الناس تتجمع في كيان يختلفوا والكيان يتقسم ونفضل نقول: ستة ابريل الاولانية ولا التانية؟ كفاية الاولانية ولا التانية؟ بظرميط الاولانية ولا التانية؟ وحيبقى بقى حزب الدستور الاولاني ولا التاني؟ وليه التخوين؟ وليه الشتيمة؟ تتفها تنزل في عبك يا اخي
وبالنسبة لجرنال التحرير ابراهيم عيسى عين 30 وما عينش 7... وبصرف النظر عن التفاصيل هو قالهم حاعينكوا في شهر سبعة وهم قالوا عايزين عقد وهو قالهم انتوا ما بتشتغلوش وهم قالوا له كده طب احنا حنعتصم! الله.. واحنا ليه نعرف كل التفاصيل دي؟ وليه نعرف قالهم ايه وقالوا له ايه ومشي لا ماشيش لا راجع لا مش راجع.. هو اصلا ليه الدبكة والقلبان ده كله؟ وناس تقول ماهو عين 30 ما السبعة يستنوا لشهر يوليو... طيب هو عين 30 ما كانش جرا حاجة لو كانوا بقوا 37.. هم يعني السبعة دول اللي حينقصوا دخل الجرنال بمرتباتهم؟ طب هو ما عينهمش.. ما كانش جرا حاجة لو كانوا استنوا لشهر سبعة.. طب هو ما عينهمش وهم ما استنوش وقرروا يعتصموا.. ما كانش جرا حاجة لما يبقى خلاف اداري واعتصام جوه الجرنال من غير شتايم وحملة وتخوين ونلاقي صحفيين بيشتغلوا مع كناسة رؤساء التحرير في الارض بيزايدوا على ابراهيم عيسى؟ والعدو يشمت، والنجس يمسح نجاسته في جرنال التحرير عشان يطلع ثوري، طب وده وقته؟ اذا كنت انا وانا باكتب دلوقت قلت كناسة رؤساء التحرير وما رضتش اكتب اسامي لانه مش وقته اشتم حتى كناسة رؤساء التحرير مدام فاتحين باب للمعارضة وما حبكش اعمل معاهم معركة جانبية، يا سيدي ابراهيم عيسى مفتري وظالم، ولو اني مش شايفة كده انا شايفة انه ركبه العند في حاجة ما كانتش متساهلة كل العند.. بس حافترض انه مفتري وظالم.. ده وقته يتعمل حملة عليه؟ ما افتكرتلوش انه اول واحد كتب لمبارك: انك ميت؟ ما افتكرتلوش انه يوم 25 كان من الصبح معانا وقال لنا احنا قاعدين ماحدش يروح وقت ما كان رئيس جمهوريتكوا مستخبي هو وجماعته مستنيين يشوفوا الدنيا رايحة فين؟ مش فاكر له انه شوكة في حلق مرسي وجماعته ومش منيمهم الليل وممشيهم يكلموا نفسهم؟ وقته دلوقت القلبان ده؟ وانت راخر يا ابراهيم ما كنت تعينهم يعني.. هي جات على التلات شهور دول؟ بس هو لحد دلوقت ما غلطش في حد... عشان عيب، يتفها تنزل في عبه.. واللي غلطوا فيه برضه تفوها ونزلت في عبهم
ملحوظة:
انا مش عايزة حد يخش يشرح لي مشكلة حزب الدستور ومشكلة جرنال التحرير من وجهة نظره ويقولي انت فاهمة غلط... لاني ما كنتش عايزة افهم اساسا عن المشاكل دي، وما كنتش عايزة اسمع عنها، وما كانش مفروض حد يسمع عنها انشالله تكونوا خزقتوا عينين بعض.. وانا اخدت المثالين دول كمثال لحالات كتير بس دول اقرب مثالين جم في دماغي
ونفسنة بقى
ودي بقى عنصر آخر لفشل الثورة: النفسنة.. ومش عيب الناس تنفسن على بعض خصوصا ان اغلب شباب الثورة سنهم صغير ودي طبيعة الفترة العمرية بتاعتهم
بس تفتكروا يعني الاخوان مافيش بينهم نفسيات؟ مافيهمش واحد ظالم التاني؟ مافيهمش واحد معترض على اداء التاني؟
اكيد لا.. طيب عمرنا شوفنا غسيلهم الوسخ؟
ابدا..
ليه؟
عشان هو بالنسبة له الحفاظ على الجماعة اهم من اي حاجة، اهم من طموحه، ومن شكله قدام الناس، ومن شغله، ومن الاضواء متسلطة عليه ولا متسلطة على زميله اللي اصغر منه... يعني اكيد يعني في من شباب الاخوان عيال بتنفسن على المغير عشان الجماعة ملمعاه اكتر منهم، وممكن يكون بيقول لنفسه اشمعنى هو يعني اللي عاملينه رئيس مراجيح مولد النبي وانا اللي ساهمت اكتر وتعبت اكتر ويمكن اتحبست ويمكن اتضربت ويمكن ضربت ابقى ولا كأني موجود... بس هو بيبلع ده كله عشان مصلحة الجماعة
عشان كده زعلانة ومتغاظة منهم انهم طلعوا وحشين.. طب هي مصر وحشة يعني؟ طب جرا ايه لما الاخلاص ده كله يبقى لمصر مش للجماعة يعني؟ مش كنا استريحنا
انتوا عارفين.. انا باشتغل دلوقت مع مجموعة.. تصوروا ايه؟ تصوروا خايفة اكتب هي مجموعة ايه ولا بتعمل ايه ولا بتشتغل على ايه لبعدين الناس تيجي المجموعة دي والعدد يزيد وتبتدي الاجتماعات تتحول من شغل الى مزايدات وتنظيرات ونفسنات وخناقات؟ والله.. اي والله ولا ليكوا عليا يمين، مع ان المفروض المجموعة دي معمولة عشان تكبر وتتوسع.. بس احنا اي حاجة بتكبر وتتوسع بنعملها بتخرب.. واوعى حد يقولي مؤامرة
انا مش فاهمة اذا كان الواحد مفهم نفسه انه مدام ما بيطلعش بفلوس ولا منصب يبقى هو كده في السليم يبقى لازم يراجع نفسه.. عشان ممكن يكون ركبنا العجب وبقينا نتصنع الزهد
نساع بعضينا عشان الامور تمشي... ولا انتوا مش واخدين بالكوا من اللي حاصل؟
الناس نفسيتها تعبت ورجعت زي ايام مبارك في اليأس واسخم... ليه كده؟ احنا كنا ما صدقنا راقوا ورجعت لهم ثقتهم في نفسهم

25 comments:

محمد نور الدين said...

كل مساء و النوارة بألف خير
من الأيديولوجيا المهزومة إلى العقل المهزوم، انطباعات عائد من مصر
انطباعات واحد يحب مصر وأهل مصر عاد مهموما حزينا من مصر. الانطباعات موجودة على صفحتي على الفيسبوك
لا يضر النوارة إذا عملت إطلالة تسعدني و تشرفني

محمد نور الدين said...

كل مساء و النوارة بألف خير
من الأيديولوجيا المهزومة إلى العقل المهزوم، انطباعات عائد من مصر
انطباعات واحد يحب مصر وأهل مصر عاد مهموما حزينا من مصر. الانطباعات موجودة على صفحتي على الفيسبوك
لا يضر النوارة إذا عملت إطلالة تسعدني و تشرفني

محمد نور الدين said...

لقد نسيت أن أذكر النوارة هناك مقال على صفحتي بخص أستاذك إبراهيم عيسى بعنوان الجزائر بين الشعراوي و الغزالي أو عندما يهذي إبراهيم عيسى

مواطن مصري said...

مفيش حد بيفشل المشروع المدني غير افعال الثوار المزايدات و التخوين و النفسنة و المصالح الشخصية على حساب المصلحة العامةوالأسلامين بيستغلو دة
الأسلامين عندهم مبدأ أنصر اخاك ظالما او مظلوم و الولاء و البراء و احنا لأ
التيار المدني بيستنى على المختلف معاك في الفكرة على الغلطة الواحدة
و يسحيها فالأعلام ونظهر اننا مش عارفين نتفق على هدف واحد

مواطن مصري said...

الأسلامين عندهم مبدأ أنصر اخاك ظالما او مظلوم و الولاء و البراء و احنا لأ
التيار المدني بيستنى على المختلف معاك في الفكرة على الغلطة الواحدة
و يسحيها فالأعلام ونظهر اننا مش عارفين نتفق على هدف واحد

samy qaid said...

احلى حاجة ان الكل عامل مش من هنا

––––•(-• Anonymous •-)•–––– said...

الله عليكى بجد :)

حصاوي said...

اه والله يا نوارة كلامك جه عالجرح .. انا سبحان الله لسه كنت بفتكر عضو سابق في جماعة الاخوان طلع مرة مع ابراهيم عيسى وقاله ان الاخوان لو راجل اتخانق مع مراته وحب يطلقها ما بيروحش لاهلها .. بيروح مكتب الارشاد ؟؟ تخيلي ؟؟ عشان مشاكلهم ماتتطلعش بره !

Unknown said...

سلم لسانك وقلمك ياريت كلنا نفكر كده يمكن نعرف نتحد ونتقدم للامام شوية

اسامة حلبي said...

بصي يا حجة نوارة المشكلة الكبري ان للاسف اعتقدنا اعتقاد خاطئ ان الثورة بلا قائد " اهم مكسب للثورة " وده سبب عدم تحقق اهداف الثورة . زي جيش كبير عمال يبرطع شرق وغرب في كل اتجاه وللاسف مع قوته مش قادر يكسب اي ارض جديدة لانه بلا عقل بلا قائد يرسم الخطط ويتابع تنفيذ الاهداف ويبث الحماس , البلد محتاجة زعيم يا نوارة محتاجة قائد .. وللاسف الحوادث اكبر من الرجال

Safaa said...

كل الاحترام على النقد البناء
برأيي الثورة المصرية ما كانت لتكتمل بارغام الدول (الاستعمارية الكبيرة) مبارك على التنحي لولا دخول النقابات العمالية على اضرابات الثورة ,
الوعي الطبقي المصري هو وعي متجذر وقوي
(من المهم التنويه لاشاعة روجت لها الجزيرة وهو أن دين مصر للبنك المركزي يعادل ثروة أل مبارك)
ما تلك الاشاعة الا ضربة لأي محاولة لهجوم الثورة على العولمة والبنك المركزي التي تعتمد اتفاقياتهم على أمور تم التوقيع عليها من وراء ظهر شعوبها المستضعفة
لذا برأيي دون العودة لحالة البناء ما هو البديل العملي المطروح.. ستبقى الأمور على ما هي عليه للأسف

AMR ALSAYED said...

زى الفل

صلاح أبو لاوي said...

مساء الخير نوارتنا العظيمة
أنا صلاح أبو لاوي كنت في زيارة الوالد شاعرنا الكبير احمد فؤاد نجم قبل أيام وأعطتني زينب ايميلها ويبدو أنها كتبته بشكل خاطئ فلا تصل إليه الرسائل.
أرجو مراسلتي على ايميلي التالي :
ss.abulawi@gmail.com
أو على الخاص على صفحتي على الفيس بوك
https://www.facebook.com/profile.php?id=100001996381967&ref=tn_tnmn

killer 300 said...

ليه زعلانه من تطبيق نفس قواعدكم عليكم
يعني البلكيمي كذب بقي كل التيار الأسلامي كذاب
نائب الصحراوي اتقفش بقي كل التيار الأسلامي زناه
الأخوان و السلفيين رئيهم مخالف ليكم
فبقوا خونوا و عملاء
و الحمد لله كلكم غلط
حزب النور فكر بطريقه مختلفه عن باقي التيار الأسلامي
بعض الأسلاميين تقريبا كفروه
و حزب النور داير تقطيع في الي خرجم منه و انضموا لحزب الرايه
فأنتي زعلانه ليه انكم و قعتم تحت نفس القاعده
التخوين و الطعن و التشويه
محضرتك كلنا مصريين و كلنا فينا نفس الداء
و محدش حاول يعالج الداء ده من بعد الثوره
و انتم اول من بدأ
لما خونتم التيار الأسلامي وقت ما أختلف معاكم حول التعديلات الدستوريه
التعديلات الي انا صوت عليها ب " لأ " لكن انتم روجتم لفكرة الصفقه الأخوانيه العسكريه السلفيه
و نسيتم كلكم ان السياسه هي معركة اختلاف اراء و وجهات نظر و من يكثب ثقة الشارع هو المنتصر
فضلتم تشككوا الناس بكل و اي حاجه
و بعدها زعلانين ان الناس بتشك فيكم !!!!
و تفتكري حتي لو كانت الخلافات دية تمت في " الغرف المغلقه " مكنتش هتوصل للناس
اذا كان جرائد " المعارضه " الثورجيه الحزب وطنيه سابقا
بتنشر اخبار فاضل فيها بس تقول هو لباس مرسي ماركة جيل و لا الأمبراطور
فهتيجي عند خلافاتكم انتم و الأعلام هيكتم يعني ؟؟

the greatest geologist that ever known said...

انتى عارفه يا رفيقه نواره. كلامك صح بخصوص نشر الغسيل الوسخ و فتور الناس و فقدهم الامل فى كل الاشخاص فى الساحه. ده بيفتح مجال للعسكر و الاخوان يلعبوا بينا الكورة.بس ام الحل ايه بجد. محدش عارف بجد.لازم بجد خطوه جديه لتجميع كل اللى اتششتوا بعد حداشر فبراير ..لان كده اوفر اوفر

سكوت هنصوت said...

يعز مقدارك ويسلم فمك يا نوارة يا بنت الطيبين... انا كنت قربت ارجع من القرف الثوري... وام المزايدات الي ملهاش نهاية ولا حصر... واتهامات التخوين والعمالة الي بتتوزع مع سلامو عليكو...بقت حاجة تقرف..صدق الشافعي نعيب زماننا والعيب فينا...

Egy N said...

Nice Ya Nawara, Thanks for sharing :)


غريبة

mymasr said...

السلام عليكم وعيد سعيد يا اعظم نوارة انتصار.. معلومات خطيرة جدااااا قد تفيدكم...

تم ارسال احمد سبايدر ومجموعة من البلاك بلوك وبضع مئات من سلاح بلطجية الداخلية لم يرصد عددهم بعد الى سوريا ضمن شبيحة بشار الاسد خلال الشهور القليلة السابقة وتستطيعى من فيسبوك احمد سبايدر تتاكدى ومن غيره ..

يقومون الان بعمليات قذرة ويصرف عليهم عشرات الالاف تاتى من الامارات وعدة دول داعمة لبشار الاسد .. ومن عدة دول يوجد ارسال شبيحة لدعمه
والهدف ..
بعد انتصار بشار يعود البلطجية مدربين .. ومعهم دعم من قوات بشار وغيره ممن انتهى عملهم بجيش بشار لتبدا مرحلة اغتيال الثورة .. اعمال عنف كبيرة باسم الثوار تتبناها جماعات تشبهت بالثوار كالبلاك بلوك خاص انهم بداوا يعدوا الارضية باعمال عنف محدودة التاثير انتظار لعودة جيوشهم مدربة ..
وبهذه الطريقة يقدروا يحققوا نفس خطة رومانيا في اغتيال الثورة وقياداتها .. فرق بينهم فطرف يصارع الاخر ويندس بينهم الفلول ليعيثوا الارهاب ويغتالوا من له القدرة على اعادة توحيد الصف وابراز من يستطيع ان يزيد الفجوة ولو برشوته .. ثم انتخابات ياتى بها رئيس مزور من الفلول ويعلنى حماية الثورة واعدام الارهابيين .. الاسلاميين .. اعدام او سجن مليشيات البلاك بلوك وغيرها التى اكتشفوا طبعا ان قياداتها ماهم الا اسماء محفوظ ونواره نجم واسلام لطفى وزياد العليمى وهكذا ..
انظرى في الامر فبيدك فعل ما ليس بيدى وخبرتك تقدر من كل الشعب

اخوكى محمد عبدالوهاب

mymasr said...

السلام عليكم وعيد سعيد يا اعظم نوارة انتصار.. معلومات خطيرة جدااااا قد تفيدكم...

تم ارسال احمد سبايدر ومجموعة من البلاك بلوك وبضع مئات من سلاح بلطجية الداخلية لم يرصد عددهم بعد الى سوريا ضمن شبيحة بشار الاسد خلال الشهور القليلة السابقة وتستطيعى من فيسبوك احمد سبايدر تتاكدى ومن غيره ..

يقومون الان بعمليات قذرة ويصرف عليهم عشرات الالاف تاتى من الامارات وعدة دول داعمة لبشار الاسد .. ومن عدة دول يوجد ارسال شبيحة لدعمه
والهدف ..
بعد انتصار بشار يعود البلطجية مدربين .. ومعهم دعم من قوات بشار وغيره ممن انتهى عملهم بجيش بشار لتبدا مرحلة اغتيال الثورة .. اعمال عنف كبيرة باسم الثوار تتبناها جماعات تشبهت بالثوار كالبلاك بلوك خاص انهم بداوا يعدوا الارضية باعمال عنف محدودة التاثير انتظار لعودة جيوشهم مدربة ..
وبهذه الطريقة يقدروا يحققوا نفس خطة رومانيا في اغتيال الثورة وقياداتها .. فرق بينهم فطرف يصارع الاخر ويندس بينهم الفلول ليعيثوا الارهاب ويغتالوا من له القدرة على اعادة توحيد الصف وابراز من يستطيع ان يزيد الفجوة ولو برشوته .. ثم انتخابات ياتى بها رئيس مزور من الفلول ويعلنى حماية الثورة واعدام الارهابيين .. الاسلاميين .. اعدام او سجن مليشيات البلاك بلوك وغيرها التى اكتشفوا طبعا ان قياداتها ماهم الا اسماء محفوظ ونواره نجم واسلام لطفى وزياد العليمى وهكذا ..
انظرى في الامر فبيدك فعل ما ليس بيدى وخبرتك تقدر من كل الشعب

Mohd Morsy said...

سأحكي لكي عن حلم تفسريه كما تشاءين حلمت أن مثل ما يكون حصلت عملية قتل لعدد من الأشخاص من المؤيدين لمرسي وكنت جالس بجوار أحد المصابين وحضرت انتي وكنتي تبكين بشدة وبتقولي أنا أسفة ماكنتش عارفة انهم كده ثم كأنك استغربتي وجودي وقلتي لي لماذا انت هنا من أمتى وانت مؤيد للناس دي قلتلك منذ انتخابات الرئاسة واختيار الشعب ليهم (بتصرف) حيث لا اتذكر العبارات جيدا
مع العلم بأني كنت من أشد المعارضين للأخوان وانتخبت ابو الفتوح في المرحلة الأولى وفي الثانية مرسي ثم بدأت في التعاطف مع مرسي انحيازا لاختيار الشعب ومعلومة لكي أنا كنت من أشد المعجبين بك وكنت اتمنى لو اتصور معاكي انا وأولادي حيث أعمل بالخارج أم الآن فلست متأكدا
أقسم لك ان ما ذكرته أعلاه صحيح بالكامل

Mohd Morsy said...

سأحكي لكي عن حلم تفسريه كما تشاءين حلمت أن مثل ما يكون حصلت عملية قتل لعدد من الأشخاص من المؤيدين لمرسي وكنت جالس بجوار أحد المصابين وحضرت انتي وكنتي تبكين بشدة وبتقولي أنا أسفة ماكنتش عارفة انهم كده ثم كأنك استغربتي وجودي وقلتي لي لماذا انت هنا من أمتى وانت مؤيد للناس دي قلتلك منذ انتخابات الرئاسة واختيار الشعب ليهم (بتصرف) حيث لا اتذكر العبارات جيدا
مع العلم بأني كنت من أشد المعارضين للأخوان وانتخبت ابو الفتوح في المرحلة الأولى وفي الثانية مرسي ثم بدأت في التعاطف مع مرسي انحيازا لاختيار الشعب ومعلومة لكي أنا كنت من أشد المعجبين بك وكنت اتمنى لو اتصور معاكي انا وأولادي حيث أعمل بالخارج أم الآن فلست متأكدا
أقسم لك ان ما ذكرته أعلاه صحيح بالكامل

Mohd Morsy said...

سأحكي لكي عن حلم تفسريه كما تشاءين حلمت أن مثل ما يكون حصلت عملية قتل لعدد من الأشخاص من المؤيدين لمرسي وكنت جالس بجوار أحد المصابين وحضرت انتي وكنتي تبكين بشدة وبتقولي أنا أسفة ماكنتش عارفة انهم كده ثم كأنك استغربتي وجودي وقلتي لي لماذا انت هنا من أمتى وانت مؤيد للناس دي قلتلك منذ انتخابات الرئاسة واختيار الشعب ليهم (بتصرف) حيث لا اتذكر العبارات جيدا
مع العلم بأني كنت من أشد المعارضين للأخوان وانتخبت ابو الفتوح في المرحلة الأولى وفي الثانية مرسي ثم بدأت في التعاطف مع مرسي انحيازا لاختيار الشعب ومعلومة لكي أنا كنت من أشد المعجبين بك وكنت اتمنى لو اتصور معاكي انا وأولادي حيث أعمل بالخارج أم الآن فلست متأكدا
أقسم لك ان ما ذكرته أعلاه صحيح بالكامل

dalia s said...


لا الله الا الله
مدير موقع قوت القلوب

dalia s said...


لا الله الا الله
مدير موقع قوت القلوب

tamer abdellatif said...

الثوار......مين بقى الثوار دلوقت؟ حد فاكر مين ثائر و مين حائر؟ حضرتك الثوار دي كلمة اي حد بيقولها على نفسه و مفيش معاه دليل اثبات و لا نفي!!! لانهم فرادى و ليسوا جماعة واحدة مفيش عقل مفكر و لا قيادة موحدة...و ده خلى كل كلب معدي يقول انا من الثوار!!حتى المتشردين في ميدان التحرير بقوا ثوار و جابوا العار للثورة بتاعة البنات اللي بتتباع و تبيع نفسها في التحرير....الاعتراف بالحق فضيلة حضرتك.....الجماعة حققت النجاح بالتماسك و الاصطفاف صف واحد و خصوصا وقت العواصف و الاعاصير....و السم الذي لا يقتلني يزيدني قوة......السياسة عايزة ناس تفهمها مش ماشيين يلطشوا الناس في الشوارع و يشتموهم على الفضائيات!!! الاخوان عبروا كل التحديات بالتماسك الداخلي و قوة المجموع علشان دي خبرة السنين و رصيدهم الزمني كبير...مش عيب نتعلم من اخطاءنا بس الاول نعترف بيها مش كده؟؟؟ اكبر خطأ هو التشتت و النرجسية بينما الخرفان بتموت علشان المجموع او الجماعة.....سر قوتهم مش سر ولا حاجة!!! من و احنا في ابتدائي قالو لنا الاتحاد قوة و التفرق ضعف....طيب حد اتعلم حاجة من دي؟؟؟ حد سأل نفسه ان الجيش اللي الناس بتطالب انه ينزل علشان "يلم" الاخوان لما ينزل هيعمل ايه؟؟؟ هيلم "الثوار" و محدش هيقدر يقرب من الجماعة طبعا....الجماعة عاشت في السجن و اتربت في السجن ويمكن عمرهم ما حلموا بانهم يكونوا في يوم رؤساء و يمكن اخرهم وزير او عضو مجلس مثلا!!!!!!!! قرف بقرف بقى