Wednesday, 12 June 2013

دليل المتظاهر الجديد

احنا المرة دي نازلين مع مجموعة تعل قوي يا عيال.. 
بصوا.. عشان بس ما تنزلوش مزاجكوا متعكر اكتر ماهو ، هم مش افظع من الاخوان ولا حازمون اللي اتدبسنا في النزول معاهم قبل كده، يعني مثلا دمهم مش تقيل، اقفال شوية بس ممكن لو خدت واديت معاهم في الكلام تجيب نتيجة لانه ما بيسمعش كلام مسئول ولا ماشي ورا حد، هم ميزتهم انهم على باب الله زينا... بس العبط اللي هم فيه محتاج صبر 
مبدئيا الاخ والاخت المتظاهرين الجدد.. حضراتكو يمكن لو كنا قابلناكوا من سنتين ونص كنا عشنا مع بعض  قصة حب جميلة، لكن الحقيقة انتوا لازم تراعوا انكوا نازلين من بيوتكوا لسه فريش، بينما احنا طلع ميتين اللي جابونا على مدى سنتين ونص، ده غير ان حضراتكوا برضه اتفرجتوا كتير على القناة الاولى، وقعدتوا تقولوا علينا بلطجية، وطول السنتين ما سمعناكوش بتشتموا في الاخوان خالص اللي كانوا متحالفين مع المجلس العسكري، كنتوا بتشتموا فينا احنا وتقولوا علينا عملا وجواسيس وفريدم هاوس وماسونية وخربتوا البلد وحرقتوا المجمع العلمي والمسيحيين ضربوا الجيش وبتوع محمد محمود بلطجية وانتوا تغنوا والاخوان يطبلوا لكوا ويروجوا كلامكوا وما كنتوش على خلاف معاهم في حاجة.. لحد ما اختلفتوا على المرشح وده لانكوا مستكبرين ان واحد خارج من السجن يمسك البلد، وبعدين مسكوا الحكم فالبلد كده داخلة في حيط، فحضراتكوا قررتوا تنزلوا كتر خيركوا.. طبعا كل ده في الخلفية فمش حتلاقي نفوسنا صافية من ناحيتكوا يعني عشان نبقى واضحين مع بعض وما تطالبوناش نصفى من ناحيتكوا زي ما نزلنا نحتفل بسقوط شفيق كده وما كناش صافيين للاخوان وقعدنا نشتمهم في وشهم اول ما شوفناهم داخلين محمد محمود.. معلش اتعاملوا معانا على اننا حالات واقبلونا زي ما احنا كده لانكوا محتاجينا.. لكن احنا نصفى؟ صعب، لان انتوا طول ما احوالكوا كانت كويسة ما كنتوش مهتمين ابدا بان في ناس تعبانة في البلد... احنا بقى كانت احوالنا كويسة وكنا تعبانين عشان كان في ناس تعبانة في البلد.. كمان حضراتكوا على نياتكوا وبتتفرجوا على القناة الاولى كتير وما انتوش عارفين مثلا ان الاخوان على اتصال بالمجلس العسكري وامريكا من 2005 على اساس انهم يبقوا بديل مبارك لو الناس رفضت جمال، وان مبارك هو اللي كان سايبهم يتغلغلوا في العشوائيات والقرى والنجوع ويعملوا مليارات من جوه السجن، وان المجلس العسكري كان كل شهر يعمل لنا مدبحة عشان يخلي الجو للاخوان ويستعدوا للانتخابات بينما حضراتكوا كنتوا بتشتمونا، وان وصول الاخوان للحكم وفشلهم ده مصلحة احسن ما كانوا يفضلوا يتسولوا ويقولوا انهم مظلومين، وان الاسلام السياسي ده سؤال اجباري كان ضروري الاجابة عليه عشان نخلص بقى ونخلص الى الابد، لا عبد الناصر ولا السادات ولا مبارك عرفوا يقضوا على الاخوان... بعون الله شوية البلطجية اللي ريحتهم غاز دول هم اللي عرفوا يقضوا عليهم: مش انتوا عندكوا مشروع.. اتفضل وريني نفسك، ورانا نفسه.. ويا ريته ما ورانا.. بس بس.. البس البس بلاش فضايح.... معلش، انتوا ما تعرفوش الحاجات دي، انتوا اللي تعرفوه انكوا عايزين تعيشوا كويس وتاكلوا وتشربوا وتودوا الولاد النادي، ولما كان ده متوفر ايام مبارك كان مش مهم عندكوا ابدا ان فيه ناس بتاكل من الزبالة ولا اطفال نايمة تحت الكوبري ولا ان مبارك عميل اسرائيل، والمجلس العسكري والاخوان حلفاء امريكا.. مش احنا، واحنا لا ماسون ولا امريكان ولا فريدام هاوس، اللي بياخد فلوس من امريكا هم المجلس العسكري والاخوان وكان مبارك.. كل ده ما تفكروش فيه ومش مهم مدام انتوا عايشين مبسوطين

طبعا الاخوان دلوقت مش حيخلوكوا لا انتوا ولا غيركوا تاكلوا ولا تشربوا ولا تعيشوا، فحل من اتنين، يا تهاجروا يا توقعوا تمرد وتنزلوا معانا... واحنا شاكرين قوي انكوا ما هاجرتوش وقررتوا تنزلوا معانا

طيب... طبعا احنا ممتنين ان فيه ناس اخيرا قررت تنزل تسعف البلد معانا.. بس زي ما قلت لكوا، احنا مش احنا اللي كنا من سنتين ونص، من سنتين ونص كنا نازلين عندنا امل وخطط لمصر واقبال على الحياة او الممات مش مهم المهم اننا عندنا امل... دلوقت حضرتك بعد خيبات امل كتير، النفسية مش هي النفسية، بنعمل الواجب اللي علينا، بس ما تنتظروش يعني نبادلكوا الهيبرة وكدزه. بشكل عام احنا في كل الاحوال ميتين.. يعني انا مثلا بشكل  شخصي، واحدة من الناس سواء الاخوان قعدوا حتحبس، او الاخوان مشيوا اللي حييجي ورا الاخوان حيحبسني  اساسي.. ليه؟ لاني ما بسكتش لحد، يعني ماحدش بيشوفني بمصلحة ويسكتني وخلاص، انا بقى والصنف اللي انتمي له في كل الاحوال مش بندور على مكسب، لكن البلد لازم تاكل وتشرب وتفضل هي مصر دي المربع اللي مرسوم على الخريطة بكل حدوده متكاملة ومتماسكة وبيجري في نصها نهر النيل.. ومع استمرار الاخوان في الحكم ده مش حيتحقق، المربع يمكن يتقسم مثمنات ومثلثات ومخمسات، وكلها كام شهر ومافيش نيل، وطبعا مافيش اكل

بس حضراتكوا اذا كنتوا نازلين يبقى تسمعوا الكلام شوية، معلش، اتظاهر منك بيوم يعرف عنك بسنة

يعني:
1- موضوع انكوا تفضلوا تحرجموا على الجيش والشرطة باعتبارهم المخلص اللي حيقف جنبكوا ده تنسوه خالص... الجيش والشرطة مؤسستين تابعتين للدولة، وفي الدول الاستبدادية اللي شبهنا تابعين للحاكم، الجيش يهمه فلوسه وحاجته ومشاريعه ومعونته اللي بتوصل، والشرطة يهمها سلطاتها وتسمع كلام اللي في السلطة عشان يحبها.. وطبعا الاتنين ما يتنوش كلمة لامريكا
امريكا بقى بالجيش بالاخوان بالشرطة بابليس نفسه مالهمش سلطان على شعب قرر ينزل باعداد غفيرة ويصبر
يصبر
يصبر
يصبر
ماشي يا امور انت وهو؟ يعني مافيش حاجة اسمها مش عارفة اودي ولادي التمرين منكو لله خربتو البلد.. ماهي الثورات يعني خراب للبلد، او بالاحرى خراب للنظام اللي حاكم البلد
مافيش حاجة اسمها يالا بقى خلصونا عشان عجلة الانتاج
مافيش حاجة اسمها تلزقوا في ودننا: انتوا عايزين ايه دلوقت؟ انتوا عايزين ايه دلوقت؟ انتوا عايزين ايه دلوقت؟
لو كنا ما مشيناش يوم 11 فبراير وفضلنا بنفس العدد لحد ما نعمل دستور ومجلس رئاسي مدني زي ما كان مكتوب في مطالب الثورة ما كانش كل ده حصل لنا.. بس زن حضراتكوا ووساخة الاخوان اللي نزلوا يقولوا الشعب يريد اخلاء الميدان لدرجة ان تلاتين واحد شالوني هيلا بيلا ورموني برة الميدان.. يالا بقى.. العايط في الفايت نقصان عقل
ملحوظة كمان: لما نزلنا الاتحادية وطبعا الناس اللي حاطين برفان خدوا بعضهم ومشيوا وفضلنا كام واحد بس، ظابط شرطة قال: مشيوا.. شعب خ***ت... بصراحة معاه حق

2- الموضوع مش صعب... المهم نحافظ على الكتلة الحرجة ليل نهار، ونقسم نفسنا نبتشيات زي ايام ال18 يوم، والاخوان مش حيستحملوا 18 يوم.. انا باقولكوا، بس مش حيستحملوا 18 يوم لو العدد في الشوارع كبير ليل نهار وموقفين لهم البلد... لكن احتفالات كاس افريقيا ونروح دي.. يارب انشالله ننزل كل يوم، هم خسرانين ايه؟ الشعب فرحان وبيتفسح

3- في حال ما اذا الناس مشيت وما فضلش الا ال150 200 واحد بتوع كل مرة، واللي تقريبا نصهم مات فحتى ما بقوش مية وخمسين ميتين، الاخوان مش بس حيقعدوا، دول حيتوحشوا وماحدش حيعرف يكلمهم تاني بعد كده.. حشدتوا ضدنا وجمعتوا توقيعات وبرضه ما عرفتوش تمشونا.. وطبعا مش حيقبضوا عليكوا انتوا.. هو انتوا بيجرالكوا حاجة؟ احنا اللي حنتشعلق من رموشنا زي كل مرة، ماهو احنا اصلنا ملطشة، مبارك يضرب، مجلس عسكري يضرب، اخوان يضرب... بس مش مهم احنا نتشعلق من رموشنا لان ده قدرنا حتى لو الاخوان مشيوا، المهم ان حيبقى عصر قمعي الى ابعد الحدود، حتبقى حاجة اوسخ من ايران والسعودية مجمعة، زايد عليهم الجوع والفقر والعطش... ده غير ان الناس حيبقى عندها يأس تاريخي، حتبقى حاسة انها عملت اقصى ما في وسعها وفشلت
والحقيقة انها ما عملتش اقصى ما في وسعها
اذا ما كناش نوقف البلد ونقعد في الشارع بكتلة حرجة لا تقل ان مليون واحد في الشارع ليل نهار يبقى استمارات تمرد دي نبرمها ونحطها فييييييي عينا.. آه، ويبقى نزولنا كرنفال

4- معلش.. لو حصل ضرب ما تمشوش.. مش باقول اتصدروا في الضرب، بس اقفوا في ضهر الشباب ما تمشوش وتسيبوهم بحيث يبقى وراهم ناس... زي ايام محمد محمود كده فاكرينها؟
لا وانتوا حتفتكروها ازاي انتوا نزلتوها؟
طيب ايام محمد محمود كان اللي بيواجه بتاع 300 400 واحد، نصهم مات، ودلوقت نص نصهم مات.. بس الميدان بيتراوح من ما يقرب من مليون لحد اقل وقت كان بيبقى 50 الف.. فاللي بيواجه حاسس ان وراه ناس... واللي بيضرب حاسس ان بيضرب كتله حرجة وان فيه خطورة ما يقدرش يكسح اللي بيواجهوه
اقفوا ورا وما تمشوش

5- كام حاجة كده لازم تعرفوها عشان التغييب بس: 
مش الجيش اللي مشى مبارك ولا الجيش اللي حمى الثورة. الناس فضلت في الشارع بكتلة حرجة وباصرار واستمرار ووقفوا البلد خالص وده اجبر الجيش انه يمشي مبارك والا يبقى بيجازف بان البلد تنهار.. 
ماحدش جاب الاخوان وسلمهم البلد الا المجلس العسكري، والشرطة حتفضل تحمي الرئيس لحد ما احنا في الشارع بكتلتنا نقرر نخليه مش رئيس
الجيش والشرطة والامريكان مش بيحبوا حد ولا بيكرهوه، هم بيحبوا مصلحتهم.. لو حسوا ان الاخوان مش في مصلحتهم حيبيعوهم، ماحدش يقدر يوصل لهم الاحساس ده غير تواجدنا المستمر في الشارع

6- يا ريت ما تقلوش ادبكوا علينا... عشان ما نسيبكوش انتوا والاخوان ونقعد في بيوتنا.. وزي ما تيجي تيجي احنا في كل الاحوال ميتين ميتين.. وانتوا والاخوان مش بتوع مواجهات، بس الداخلية في صف الاخوان، ومع اول فسية.. مش قنبلة، حتجروا
فمعلش احنا عاصرين عليكوا غيط لمون بحاله فما تطلعوش قرفنا وتفضلوا تقولوا لنا جبتوا لنا الاخوان ونجيب الجيش ونفتح السجون والطراش ده
اللي جاب الاخوان هو الجيش اللي انتوا عايزين تجيبوه.. والسجون لو اتفتحت مش حيخشها اللي انتوا مستتقلين دمه بس.. انتوا كمان حتخشوا.. 
ما تقرفوناش كتير.. انتوا محتاجينا في المواجهات.. امال مين اللي حيموت؟ انتوا لا سمح الله؟ اذا كنتوا كرهتوا الثورة عشان مش عارفين تودوا العيال التمرين.. حتموتوا؟
----------
اخيرا:
الزملاء الثوار....... معلش
الصبر..
حنعمل ايه يعني؟ ما هو لو ما عملناش كده الاخوان حيخلوا مافيش مصر اساسا، وبعدين اجيب لكوا شعب منين يعني؟
ماهو ده شعبكوا.. يا بيحب عم الشيخ ولاغي عقله وبيسمع كلامه، يا بيحب المجلس العسكري وفيلم ابناء الصمت... واحنا مش كتير
احنا مش كتير
رمانة ميزان اه... بس عمالين نخس
وعلى فكرة ده الطبيعي في كل المجتمعات، البني ادمين يا اما دوجمة يا اما مصلحة... الناس اللي عايشة عشان تخلي الانسانية اسعد دي بيبقوا النسبة الضئيلة، وبيبقوا عصابيين كمان ومخهم لاسع.. امال يعني حيخش في مدرعة وهو مخه طبيعي؟
واللي احنا بنعمل ده اسعاف لبلد بتحتضر...
الصبر

32 comments:

Shaheer Sherif said...

youtube: الإزدهار

الدنيا هتبقى أحلى يا زميل الكفاح

Shaheer Sherif said...

youtube: الإزدهار

مصر أول بلد ستزدهر, بس بعد ما نخلص

Shaheer Sherif said...

youtube: الإزدهار

مصر أول بلد ستذهر, بس لما نخلص من الخونة

gabriel said...

انت رائعة يانوارة, صدقينى انت فخر لكل مصر

moataz zaghlol said...

تسلم ايدك....... جبتي من الاخر

moataz zaghlol said...

تسلم ايدك ....... جبتي من الاخر
و لازم نستحمل اللي مش عايز يفهم ان لا العسكر و لا الشرطة عمرهم ما هيكونوا مع الشعبو اخرها تهريب المغير في عربية شرطة

المعرفة والثقافة القانونية said...

بس ياريت النشطاء يتفقوا على حاجة واحدة لان كل واحد فيهم قارة لوحده

المعرفة والثقافة القانونية said...

بس ياريت النشطاء يتفقوا على حاجة واحدة لان كل واحد فيهم قارة لوحده

Mohammed Saaied said...

الله يسمحك يا نواره - ضحكتيني و بكتيني في نفس الوقت - ربنا معانا و مع البلد دي و مش هنسبها و مش هيسبها

Mohammed Saaied said...

الله يسمحك يا نواره - ضحكتيني و بكيتني في نفس الوقت - متقلقيش ربنا معانا و مع البلدي و مش هنسيبها و ربنا مش هيسبها

nogoodfind said...

لازم طبع دليل المتظاهر الجديد وتوزيعه علي كل واحد بيمضي استمارة تمرد يمكن نتطلع شعب بيفهم علي غير العادة. يمكن

shero said...

جامده جدا

أيمن غازي said...

تمام كلام زي الفل بس عاوز أقلك حاجة كل واحد مات طلع مكانه 10 دي حقيقه وكل واحد اتصاب فيه مكانه 2 ده غير ان الاخوان خلقت طبقة جديدة مستبيعة

hussienamar said...

عاش الثورة مستمرة لأن اليأس خيانة

‎Mohamed Ahmed Abdullah Anan said...

بصراحة استاذه نوارة انا من ضمن معارضى احداث يناير لان الثوريه وخلافه مش من افكارى ولعلمك انتخبت الفريق شفيق مرتين واكيد ممن تسمونهم فلول ومن كارهى لقب النشطاء وممن قالو للاخوان لالالالا ومن زمان من قل يناير لكن بجد بعد ما قريت ا التدوينه وكلامك اللى فيه كتيرمما اتوافق
عليه ارسل اليكى احترامى
اسقاط الاخوان واجب وطنى ودينى

oelsafey said...

الاخت العزيزة نوارة كعادتها تحفانا بمقال جديد رائع لكنها نست او تعمدت انها تنسى الاعتراف فى المقال.
تعترف باية يا عم انا اقولكم لازم تعترف بان المتظاهريين الجدد اللى بتقول عليهم دول بيفهموا اكتر منها و اكتر من اللى ماتوا فى محمد محمود و غيرة و على الاقل هم لسة محدش ضحك عليهم و خلاهم عصروا لمون و عشمهم بالرومانسيية الثورية انة حيحقق لهم كل املهم و بعدين خلى بيهم و مش بس كدة دة كمان رافض يعترف بالجنين يا ابن الاية يا ندل .
ايضا لازم تعترفى يا نوارة انتى و اللى معاكى انكم وقفتم ضد شفيق خافيين على نفسكم من السجن مش خايفيين على مصر و النتيجة اية دومة اتسجن و لسة كلكم عارفيين انكم حتتسجنوا قريب بسش لما السجان يفضى لكم ف 30 يونية فرصتكم اللى ممكن تنقظكم من السجن او على الاقل تاجلة .
خلوا عندكم دم شوية بقى وما تتصدروش المشهدالتانى وماتعملوش فيها ان انتم الخبرة خبرة فى خراب البلد بالغباء بتفكرينى بمكانيكى كل ما حد يروحلة يبوظ ماتور عربيتة و لما يسالوة انت ف6اتح لية يقولم انا خبرة مبوظ 10 مواتير قبل كدة طب صلحت حاجة يا عم يقول الماتور الجاى مين فدائى بقى حيديك موتور تانى .
فالمتظاهر الجديد هوه اللى فى قلب علة من ناحيتكم و مش رافض و جودكم اكيد بل محتاجكم كمان بس ماتستعبطوش بقى و عاملينها بجميلة و انكم حتستحملوة و تقلبى الاية و تطلعية انة نازل علشان مش عارف يودى ولادة النادى لان مرسى ما قفلش النوادى ولا حتى قفل شارع الهرم. واسف على الاطالة

oelsafey said...

الاخت العزيزة نوارة كعادتها تحفانا بمقال جديد رائع لكنها نست او تعمدت انها تنسى الاعتراف فى المقال.
تعترف باية يا عم انا اقولكم لازم تعترف بان المتظاهريين الجدد اللى بتقول عليهم دول بيفهموا اكتر منها و اكتر من اللى ماتوا فى محمد محمود و غيرة و على الاقل هم لسة محدش ضحك عليهم و خلاهم عصروا لمون و عشمهم بالرومانسيية الثورية انة حيحقق لهم كل املهم و بعدين خلى بيهم و مش بس كدة دة كمان رافض يعترف بالجنين يا ابن الاية يا ندل .
ايضا لازم تعترفى يا نوارة انتى و اللى معاكى انكم وقفتم ضد شفيق خافيين على نفسكم من السجن مش خايفيين على مصر و النتيجة اية دومة اتسجن و لسة كلكم عارفيين انكم حتتسجنوا قريب بسش لما السجان يفضى لكم ف 30 يونية فرصتكم اللى ممكن تنقظكم من السجن او على الاقل تاجلة .
خلوا عندكم دم شوية بقى وما تتصدروش المشهدالتانى وماتعملوش فيها ان انتم الخبرة خبرة فى خراب البلد بالغباء بتفكرينى بمكانيكى كل ما حد يروحلة يبوظ ماتور عربيتة و لما يسالوة انت ف6اتح لية يقولم انا خبرة مبوظ 10 مواتير قبل كدة طب صلحت حاجة يا عم يقول الماتور الجاى مين فدائى بقى حيديك موتور تانى .
فالمتظاهر الجديد هوه اللى فى قلب علة من ناحيتكم و مش رافض و جودكم اكيد بل محتاجكم كمان بس ماتستعبطوش بقى و عاملينها بجميلة و انكم حتستحملوة و تقلبى الاية و تطلعية انة نازل علشان مش عارف يودى ولادة النادى لان مرسى ما قفلش النوادى ولا حتى قفل شارع الهرم. واسف على الاطالة

ادينى النهضه بسرعه ارجوك محتاج الجرعه said...

يا ست انتى فاهمه اى كلمه من اللى انتى كتباه دا حاسس انك كنت بتنامى على روحك وانتى بتكتبى مش عارف اجمع كلمتين على بعض دى اكيد اضغاث احلام وتخاريف قبل النوم

Mohamed Azmy said...

مصر فعلا هاتزدهر ان شاء الله .. بس بعد ما احنا نموت كلنا !!

Mohamed Azmy said...

ان شاء الله مصر فعلا هاتزدهر ... بس بعد مانموت كلنا !

إسلام جمال خوجه said...

عشان كنا رجالة ووقفنا وقفة رجالة :D

Islam Salem said...

مقال حلو يا نوارة ، و تحية ليكى لأنك مش بتقصى الأطراف التانية اللى كانت ضد الثورة مع اننا مش طايقينهم بس أعتقد أى خلاف و فرقة ف الوقت ده مش لصالح البلد و هيصب أكيد فى مصلحة الأاخوان

Abeer MustafA said...

بنت ابوكي يسلم ايديكي وعنيكي وتسلم عافيتك وقلبك المخلص لمصر

omar said...

الله يفتح عليكييا نوارة الثورة :)

ابو سفيان said...

نازل يا حره

ابو سفيان said...

نازل يا حره

Egymat said...

الله المستعان يا نوارة الانتصار
بالبني آدمين اللي زيك.. الغلابه بيكسبوا حروبهم
اسأل الله لكِ الستر.. كل الستر.

يا بختك يا عم أحمد :)

Mohab Elariny said...

تسلم ايدك ..... فعلا ابن الوز عوام ... وطنيتك ليست بغريبه فمن تربت على صوت الشيخ امام يغنى روائع احمدفؤاد نجم ﻻ يكون سوى مصرى و بيحب مصر

عم مينا said...

ضحكتيني وكأبتيني في نفس الوقت

عم مينا said...

ضحكتيني وكأبتيني في نفس الوقت

be happy said...

بحب طريقتك الساخره فى طرح المواضيع بس انا معترضةة على المضمون بالنسبه للناس اللى انتى بتتكلمى انهم اول مرة ينزلو ومش عايزه تقوليها صريحه انهم الفلول فانا احب اشرحلك حالتى وصنفينى بعدها انتى انا من اللى كانو رافضين الثوره مش عشان انا فلول لان تعريف كلمة فلول هو المنتفعين من وجود النظام ف الحكم انا يا ستى ولا منتفعه ولا اى نيلة ولا عمرى شوفت من البلد اى منفعه والحمد لله بس لما الثوره قامت كان اعت اضى ان احنا مش مهيئين للحريه ان احنا محتاجين نشتغل على الارض سنة واتنين نعد اجيال تقدر وتفهم يعنى ايه حريه بس طبعا اتقالى يا فلول وساعتها ركنت ف جمب واخدت قرار انى مسي هشارك ف نصرة اى طرف على الاخر وهتفرج جت الانتخابات وكان الاقىب لوحده بيتقال عليها فلول انها تصوت لشفيق محصلش واديت صوتى لحمدين وحمدت ربنا بعدها انه منجحش وف الاعادة قاطعت لانى واخده عهد انى مش هنصر حد من النظام السابق .ولا الاخوان وفضلت اتفرج وانهاردة عرفت ان خلاص وقت الفرجه انتهى خدتو فرصتكو كامله وضيعتهو يبقى مين نازل وقلب معبى من التانى وعلى فكره لا بروح نادى ولا الثوره بتضرنى ف حاجه غير ان قلبى بيتحرق على بلدى يا اخت نواره بلاش نصنف بعض ونقسم دا خبره ودا مبتدأ ودا ثوار ودا من الاحرار يا على لان دا طريق محتاج كل ايد الاخوان مش سهلين وغبائهم هيخليهم يتهورو وهيعملو بغشوميه مش هيصد قدامها غير الاتحاد ونرجع زى زكان لا عمرنا كنا بنسمع سلفى وعلمانى ولت اى تصنيف الاتحاد قوه

be happy said...

بحب طريقتك الساخره فى طرح المواضيع بس انا معترضةة على المضمون بالنسبه للناس اللى انتى بتتكلمى انهم اول مرة ينزلو ومش عايزه تقوليها صريحه انهم الفلول فانا احب اشرحلك حالتى وصنفينى بعدها انتى انا من اللى كانو رافضين الثوره مش عشان انا فلول لان تعريف كلمة فلول هو المنتفعين من وجود النظام ف الحكم انا يا ستى ولا منتفعه ولا اى نيلة ولا عمرى شوفت من البلد اى منفعه والحمد لله بس لما الثوره قامت كان اعت اضى ان احنا مش مهيئين للحريه ان احنا محتاجين نشتغل على الارض سنة واتنين نعد اجيال تقدر وتفهم يعنى ايه حريه بس طبعا اتقالى يا فلول وساعتها ركنت ف جمب واخدت قرار انى مسي هشارك ف نصرة اى طرف على الاخر وهتفرج جت الانتخابات وكان الاقىب لوحده بيتقال عليها فلول انها تصوت لشفيق محصلش واديت صوتى لحمدين وحمدت ربنا بعدها انه منجحش وف الاعادة قاطعت لانى واخده عهد انى مش هنصر حد من النظام السابق .ولا الاخوان وفضلت اتفرج وانهاردة عرفت ان خلاص وقت الفرجه انتهى خدتو فرصتكو كامله وضيعتهو يبقى مين نازل وقلب معبى من التانى وعلى فكره لا بروح نادى ولا الثوره بتضرنى ف حاجه غير ان قلبى بيتحرق على بلدى يا اخت نواره بلاش نصنف بعض ونقسم دا خبره ودا مبتدأ ودا ثوار ودا من الاحرار يا على لان دا طريق محتاج كل ايد الاخوان مش سهلين وغبائهم هيخليهم يتهورو وهيعملو بغشوميه مش هيصد قدامها غير الاتحاد ونرجع زى زكان لا عمرنا كنا بنسمع سلفى وعلمانى ولت اى تصنيف الاتحاد قوه