بيان اسر الشهداء المعتصمين بميدان التحرير

نظرا لما نشهده من تعتيم اعلامي وتضليل متعمد تجاه كل ما يتعلق بقضية شهداء ومصابي الثورة - وهي القضية التي فجرت الثورة المصرية – ولأن حتى الآن لم يحاسب القتلة بل تتم ترقيتهم ومكافأتهم وليس هذا فحسب بل وتطلق يديهم للممارسة الضغوط والتهديدات بشتى الطرق والأساليب مرورا بأحداث البالون وثلاثاء الغاز.. لذلك كله نحن معتمصون منذ ٢٤ يونيو وحتى الآن على أمل أن نجد من شرفاء مصر من يحمينا من البلطجية الذين يمارسون بلطجتهم في ثياب العمل الرسمي.


إن محاولة تصدير قضية دم شهداء هذه الثورة المباركة باعتبارها قضية مادية نسعى من خلالها لتحقيق بعض المكاسب أو تشويه ملامحها عبر إلصاق تهمة البلطجة بالشهداء وترويج أن الضباط القتلة كانوا يدافعون عن أنفسهم وعن مقار عملهم، هو تضليل وتزييف للحقائق التي تشهد عليها الكاميرات والوثائق. وعليه فإننا نؤكد نحن أهالي شهداء ٢٥ يناير على أن مطالبنا هي التالية:


١- حبس الضباط المسئولين والقيادات المتهمين بقتل خيرة أبنائنا وأخوتنا وذلك لمنعهم من الاستمرار في التأثير علي الشهود وطمس الأدلة وترويع أهالي الشهداء والشهود


٢- الاسراع في إحالة بقية قضايا قتل المتظاهرين التي لم تحال الي المحاكم الجنائية وتقصير مدة تأجيلات القضايا المنظورة بالفعل وسرعة تفريغ الدوائر


٣- تكوين فريق متفرغ من أكفأ رجال النيابة العامة يختص بالتحري وجمع الأدلة والمعلومات المتعلقة بالقضايا التي أحيلت من قبل


٤- اصدار بيان رسمي من وزارة الداخلية يتضمن اعتذارا رسميا للشعب المصري عامة ولأهالي الشهداء خاصة عن الممارسات التي حدثت تجاه هذا الشعب ويقر بأن شهداء ٢٥ يناير ليسوا بلطجية


٥- تشكيل لجنة دائمة من أهالي الشهداء ومحامييهم ورئاسة الوزراء وأعضاء من فريق النيابة العامة تكون مهمتها تذليل كافة العقبات التي تحول دون سرعة الفصل في هذه القضايا


٦- بث محاكمات المتهمين بقتل الثوار على محطات التليفزيون بثا مباشرا دون تعليق ذلك علي إذن القاضي أو أي جهة أخرى


٧- تكريم شهداء الثورة والمصابين ومساواتهم بشهداء الحرب وإعطائهم وسام الدولة


٨- إقالة وزير الداخلية والنائب العام لعدم قيامهما بواجبهما نحو دماء الشهداء وملاحقة قاتليهم


أخيرا، نؤكد أن مطالبنا ليست مستحيلة وليست مخالفة للقانون فأصل القانون هو إقامة العدل وأداء الحقوق ونحن فقط نطالب بحق دماء أبنائنا


أسر شهداء ومصابي ٢٥ يناير
٢٢-٧-٢٠١١

فليقل خيرا او ليصمت

اللي مش قادر يعتصم مع اهالي الشهدا ينزل ساعة في اليوم يصور فيديو معاهم ويرفع على اليوتيوب، ياخد صور ولادهم وينشرها، يسمع مطالبهم ويرجع ينشرها، يتطوع ساعة في تأمين الميدان، مش قادر ينزل الساعة، ينشر مطالب الاعتصام واهالي الشهدا على صفحته وبين الناس، مش قادر ينشر، على الاقل يسكت ويرحمنا بدل ما ينشغل انه يشتم في الاعتصام عشان يبرر لنفسه هو ليه ما نزلش

اهم احتياجات الاعتصام:

نشر مطالب اهالي الشهداء، وصور الشهداء، وتصوير فيديو ونشره مع اهالي الشهداء لان فيه بعض العناصر بتحاول تخطف الاعتصام منهم

التطوع لتأمين البوابات ولو ساعة في اليوم

عايز تعمل كده مش حتتعب... مش عايز................ نقطنا بسكاتك، هو حد رفعك بالمسدس وقالك ليه ما نزلتش؟ ولا شكلك وحش قدام نفسك وبتقول العنب حصرم؟

مين ده اللي حيتعمل له جنازة عسكرية؟

مين ده اللي حيتعمل له جنازة اساسا؟ مين اللي حيموت اساسا.. طب على الله نسمع انه مات.. على الله

هااااا؟ حتبيعوا سامح سيف اليزل احسن وتضرب صاحبك لو هم كتير ولا هااا؟

كده يا مجلس يا عسكري؟ علم مصر يتنكس عشان خاين مصر وقاتل المصريين وشباب مصر هم اللي ينزلوا على ركبهم ويتقالهم: علم اسرائيل مش حينزل لباسك هو اللي حينزل؟ 

صبااااح التحية العسكرية

واهو ده اللي اتعلمنا على ايديه القهر وقوة غليانه

ااااه.. انا باعترف يا شباب.. انا كلت على قفايا بالقوي، كلت بالكف السخن على قفايا.. مولع نار قفايا دلوقت، ودي مش اول مرة اكل على قفايا، بس اللي جرب واداني على قفايا قبل كده عارف كويس لما باتلفت له باعمل ايه؟ وكتاب الله بيندم انه اتولد اساسا

والله العظيم تلاتة

بورسعيد.. المدينة الباسلة

بورسعيد بتتعرض على مدى تلات ايام لهجوم كاسح من البلطجية على اعتصامهم هناك، وآخرتها دخلوا عليهم بطلق النار والسيوف، دول داخلية داخلية مافيش كلام، والحاكم العسكري خلع منهم وقالهم ماليش فيه، والاعلام مطنشهم تقولش بورسعيد دي في اسرائيل؟ لا والنبي، ده انا ناسية ان المخلوع بعت طيارة انسانية لاسرائيل، وباينه المخلوع ما خلعش ولا ايه

لمتابعة اخبار بورسعيد رجاء الدخول هنا

طب انا لولا نومتي في التحرير كنت سافرت بورسعيد، مافيش اعلامي يهزها شوية ويسافر؟ 

الفيديوهات اهي

قال له ما عندناش تعليمات نحمي ثوار

طب على الله

 تحديث:
اتفضلوا.. ادي اخرة النومة في الشارع مخي ساح.. البلوجر عامل نظام جديد جيت انشر التعليقات بدل ما انشرها مسحت التعليقات اللي كنت نشرتها... انا اسفة لاصحاب التعليقات دي غلطة... مسحت ميت تعليق جاتني خيبة
------------
انا مش فاضية اكتب بوستات عشان انا في الميدان بايتة من يوم 8 يوليو، بس بارجع استحمى بس هههههه

بس وجدت انه من الضروري اقول كلمتين كده:

الاوشاعات كترت، وبقالهم من اول الاعتصام عمالين يرجوا اشاعات ان الجيش حيحتل ميدان التحرير بالقوة وحيضربنا ويكسرنا ويموتنا.. يامي يامي يامي... على الله يعملها

اولا: عشان يطلع اللواء الرويني انه بيقول كلام مش صحيح

ثانيا: عشان العشرين مليون اللي روحوا عشان وراهم شغل ينزلوا له تاني... وهو العشرين مليون نزلوا الا لما الامن ضربنا يوم 28؟ 

حتى لما تحب تتخض من اشاعات ابقى اعقلها شوية والنبي، الناس اللي في الميدان روحها في مناخيرها ومستبيعة على عمرها وسبب نزلتها من بيوتها ونومتها في الشارع هو حرقتها على الشهدا، وبيقولوا: يا نجيب حقهم يا نموت زيهم.. اللي حيدوس لهم على طرف هو الخسران

تميم البرغوثي: الشهداء أولا

من جريدة الشروق

انا حاخد المقال كده زي ما هو كالعادة يعني

الشهداء أولا

تميم البرغوثي

ما هى رتبة الضابط الذى صاح فى الناس عند السفارة الإسرائيلية «كُلُّه على رُكَبُه»؟ ما هى رتبة الضابط الذى صاح فى ميدان التحرير الأسبوع الماضى يسب شعب مصر كله بأمه، فيهين كل أم فى مصر بشرفها؟ ما هى رتبة الضابط الذى كان يرقص بسيفين فى نفس الميدان طربا على سقوط ألف جريح؟ ما هى رتبة المسئولين عن تعذيب الناس فى الأقبية ووضعهم فى زنازين كالعُلَب لا يستطيعون فيها الوقوف أو النوم؟ ما هى رتبة الذين يعلقون الناس من أرجلهم حتى يتجمع الدم فى رؤوسهم؟ ما هى رتبة القادة الذين أمروهم بهذا كله؟ ما هى رتبة من اشترى أدوات الصعق بالكهرباء وقنابل الغاز والرصاص المطاطى والمتفتت والرش؟ من الذى كتب التقارير ظلما فى العباد وأرشد الناس إليهم؟ ومن الذى أدار جهاز المعلومات ذاك ووجهه لإرعاب شعب كامل؟ من الذى فجر الكنائس ثم اتهم الناس زورا بتفجيرها ثم قتلهم من التعذيب؟ من الذى يأخذ الناس من بيوتهم ويقول لأمهاتهم: «سنرجعهم غدا صباحا» ثم لا يرجعون؟ من الذين قتلوا شهداء هذه الثورة؟ أعنى الذين صوبوا البندقية على عين الفتى الأعزل وهم آمنون على سطح بناية ما، ثم أطلقوا الرصاصة ثم تبسموا راضين من حسن تصويبهم وإتقان عملهم؟ من الذى كان على سطح البناية يرى تزاحم الشباب على الفتى الشهيد بعضهم يحمله وبعضهم ينظر إلى الأعلى ضاربا بيده على صدره ينادى قناصا لا يراه: «إضرب هنا، إضربنى أنا»، فيضربه ذلك القناص ويتبسم مرة أخرى لأن مهارته أثبتها التكرار؟ من الجنود الذين وقف أمامهم رجل فى الإسكندرية فاتحا صدر سترته يريهم أنه أعزل فقتلوه لأنه أعزل؟ هل من المعقول أن هذه كلها حالات فردية؟ أألف شهيد كلهم قتلوا فى حالات فردية؟ هل آلاف المفقودين والفاقدين خربت حياتهم وحياة أهلهم فى حالات فردية؟


●●●




أيها الناس، إن هذه الوزارة، وزارة الداخلية، أتعبت الجميع، ولا يكفى لإصلاحها أن يسن لها قانون أو أن يشرف عليها قاض أو يوضع لها وزير داخلية جيد. إن هؤلاء الضباط كبارهم وصغارهم الذين يشتمون الناس سيتآمرون حتى على رؤسائهم حتى يحافظوا على سلطتهم المطلقة فى القتل والتعذيب والترهيب. إنهم يعتقدون أنهم لن يستطيعوا التعامل مع الناس بدون «هيبة» والهيبة عندهم هى أن يخاف المواطن من الضابط، هم يظنون الشعب المصرى لا يحكم إلا بالخوف، فإن أمرهم وزيرهم بغير ذلك لم يطيعوه. ألم يعلن السيد وزير الداخلية منتصف الأسبوع الماضى أنه أمر قوات الأمن بالانسحاب من ميدان التحرير فى أول الليل، فلم ينسحب أحد منهم إلا عند ظهر اليوم التالى وبعد سقوط ألف جريح؟ فإن كان الوزير صادقا فعليه أن يقيل ثم يحاكم الضباط الذين عصوا أوامره، وإن لم يكن أصدر الأمر أصلا أو أصدر أمرا علنيا وآخر سريا فالمصيبة أعظم.


لا أمان لهؤلاء الناس بأعيانهم، أعنى أن المشكلة ليست فى هيكل المؤسسة فقط بل فى كل من هؤلاء الضباط بأشخاصهم الذين يحتقرون الناس ويعتبرون مطالبتهم بحقوقهم تبجحا يعاقبونهم عليه.


إنهم قوة احتلال، وككل قوة احتلال تحتقر الواقعين تحت الاحتلال ولا تراهم بشرا مساوين لها فى الآدمية. لم تكن هذه الوزارة أبدا مصدرا للأمن، قال مستشار رئيس الوزراء إن مستوى الجريمة فى مصر واحد قبل الثورة وبعدها أى فى وجود الشرطة وغيابها، لم يكن الأمن إلا أمنا سياسيا إذن، يعنى كان احتلالا.


إن الاحتلال الإسرائيلى فى فلسطين حين كان يقتل الأطفال كان يتذرع بالأمن ويسميهم بالمخربين، وكانت هناك فرق من الجيش الإسرائيلى، تسمى فرق المستعربين، تلبس اللباس المدنى لتهاجم المتظاهرين فيظهر الأمر على أنه شجار بين مدنيين لا مظاهرة سياسية ضد الاحتلال. ألا يذكركم هذا بالبلطجية فى شيء؟ يسمون المتظاهرين المطالبين بحقوقهم بلطجية كما كانت إسرائيل تسميهم بالمخربين، ويطلقون عليهم البلطجية الحقيقيين الموظفين عند أجهزة الأمن. ويقتلون الطفل الفلسطينى لهوا ثم لا يحاكمون قاتله فإن حاكموه غرموه قرشا واحدا ثمنا لحياة كاملة أهدرها ثم تراه فى الشارع يطلق النار من جديد ويسب الناس بأمهاتهم. ألا ترون الشبه؟


●●●




أيها الناس، إن الخلاف القائم بين القوى السياسة عن الدستور أولا أو الانتخابات أولا خلاف خطير على الجميع. بداخلية كهذه لو أجريت الانتخابات فإنها ستزوَّر ولو كتب الدستور فإنه سيُنتهك. لا بد من مبادرة يتبناها الجميع لتطهير هذه الوزارة، ولا أراها تطهر إلا ببناء وزارة جديدة من الأساس، فيقال كل من عذب إنسانابريئا كان أومدانا. ولا بد من نيابة مستقلة للشكاوى فى قضايا التعذيب، ولا بد من إلغاء كل أجهزة الأمن السياسى التى ورثت جهاز أمن الدولة المنحل وإقالة كل العاملين فيها أو إحالتهم على التقاعد. ولقد تقدمت جمعيات حقوقية عدة بمشاريع فى هذا الصدد. إن كانوا لا يطيعون وزيرهم فكيف نأمنهم، ليسحب سلاحهم وزيهم الرسمى الذى يظلمون به العباد.


سيستفيد من ذلك كل مصرى، سيستفيد منه الأخوان المسلمون والليبراليون والاشتراكيون والقوميون والمستقلون والباعة المتجولون وسائقو سيارات الأجرة والتجار والفلاحون والعمال والعاطلون، أبعد الثورة يسبون الناس بأمهاتهم ويرقصون بالسيوف على جراحهم ويسمونهم بلطجية وهم البلطجية؟


إننى أدعو أن تكون هذه الجمعة القادمة جمعة لتطهير الداخلية جمعة لضحاياها من شهداء وجرحى، بل إن كل من خاف من لجنة فى آخر الليل هو من ضحايا الداخلية لأنه لا يدفع الضرائب ليخاف بل ليأمن. كما أتمنى أن يشارك فيها كل الأطراف السياسية فى البلاد وعلى رأسهم من كان متشككا فى أهدافها، ليست هذه جمعة الدستور أولا ولا الانتخابات أولا، هذه جمعة الشهداء والجرحى جمعة تطهير الداخلية جمعة لنشعر بالأمان الحقيقى، فالمصرى يخاف من الشرطى أكثر من خوفه من اللص، بل إن أكبر اللصوص هم الذين كانوا فى حماية الأمن.
----------------------




يا رب تعيش الف سنة

ما نفسيش اقول حاجة تاني بقى.. انا حاخليه هو يتكلم بعد كده بدل ما انا عاملة زي اللمبي كده

ده سي ممدوح.. مش ممكن يبقى من اعداء الوطن

انا الشهادة لله ما باحبش فيلم البريء، بس كنت باخاف اقول، باحب الاغاني بس، لكن مش باحب الفيلم، مباشر كده، وشخصية احمد سبع الليل مبالغ فيها، ومعمول شخصيات ابيض واسود كده، بس افتكرت النهاردة المشهد بتاع: يا باشا ده سي ممدوح، مش ممكن يبقى من اعداء الوطن

وانا داخلة التلفزيون النهاردة، واحد من امن التلفزيون وقفني وقال لي: استاذة نوارة، هم ليه بيقولوا عليكي في الاعلام انك عدوة البلد؟ مع اني يعني مش حاسس انك بتكرهي البلد ولا حاجة... قلت له قالوا فين؟ قال لي: بيقولوا انا باسمع.. قلت له: زي ما كانوا بيقولوا علينا بناخد خمسين يورو

قال لي: طب يا استاذة والنبي عايز اسألك هو ليه مبارك اتساب شهرين على ما هرب فلوسه وبعدين حاطينه في شرم الشيخ ومش بيتحاكم؟ وليه جمال وعلاء بيتسئلوا على الفلوس؟ هو احنا اللي بينا وبين الناس دي فلوس؟ وليه الشرطة راجعة اسخم من الاول وبتضرب في الناس؟ وليه العادلي ما اتحاكمش بسرعة على الشهدا؟ وليه النائب العام ماشي ببطء كده؟ وليه ضربوا اهالي الشهدا؟ وليه ضربوا العيال عند السفارة؟ وليه مش عارفين يجيبوا الفلوس لحد دلوقت؟ وليه الظباط اللي قتلوا الناس مش مقبوض عليهم؟ دلوقت مافيش عيل صغير في البلد مش عارف ان الداخلية هي اللي مسرحة علينا البلطجية.. طب ليه بقى مسرحين علينا البلطجية؟ وليه بقى هم سايبينهم؟ وليه اللواءات اللي في الداخلية اللي بيعملوا كده مش بيتقبض عليهم؟ 

قلت له: ما انا باسأل نفس الاسئلة دي عشان كده بيقولوا عليا عدوة البلد.. حاسب بقى ليقولوا عليك كنتاكي

حقيقة ما حدث في التحرير يوم 3 يوليو

انا مش حاتكلم.. انا حاسيب الفيديوهات هي اللي تتكلم وانتوا تحكموا

يوم الجمعة 8 يوليو... للداخلية.. بلطجية

الداخلية.. بلطجية..

اه وربنا بلطجية، بس بلطجية بينضربوا، هههههه يا عيني، فاشلين حتى في البلطجة، لا وجايين جايبين لنا كنابل تلات انواع، واحدة بتطلع دخان اسود، وواحدة بتطلع دخان ابيض، وواحدة بتطلع دخان من غير لون وكلنا عاملين دماغ بقالنا فترة والناس يا اما عندها صداع مستديم، يا اما دوخة مستديمة، يا اما عينينا بتدمع ومناخيرنا بتحرقنا، يا اما عندنا اكتئاب وحالتنا النفسية مش تمام، يا اما جميع ما سبق

كمان واحنا بايتين في الميدان بيقعدوا يضخوا علينا غاز... والله، زي عمر سليمان لما رش مبيد على الفلسطينيين في النفق، هم برضه بيرشوا فليت علينا في الميدان، ويوم 29 او 30 مش فاكرة كنا قاعدين وفجأة كلنا عينينا دمعت وقعدنا نعطس.. اه، 29، ومالك عدلي مناخيره ساحت وعينيه باظت واقول له يا مالك بيضخوا علينا غاز زي عمر سليمان، يقول لي: بفيش حاجة يا شيخة، باتخافيش، ايه البرادويا دي؟ بلاش بقى دظرية البؤابرة، با يبكد بد اثار ابارح؟

اه.. بد اثار ابارح.. قال ايه؟ واحنا قاعدين كده الغازات بتطلع بواقيها من الارض مع الهوا قوم تخلينا كلنا يغمن علينا بالطريقة دي... مالك عدلي، اعرفكم، كل ده عشان ما يتبناش نظرية المؤامرة، مؤامرة ايه ما كلنا قاعدين في الميدان فجأة نكح 

اجرام رسمي نظمي فهمي.. بيتعاملوا مع الشعب على انه حشرات

الشاهد

يوم الجمعة لازم يبقى للداخلية... السجين ده بتاعي، مش كل واحد نفسه في حاجة يحطها في المطالب كأن فتحوا له باب الكعبة وبيلحق يفتكر كل اللي عايزه من ربنا

بصوا، من الاخر كده الشعب ده مايص ومش بيحب الهبد والرقع، بيحب يفك حتة حتة وهو باله طويل، خلاص نمشي على الموجة بتاعته عشان ما نزهقوش

الموجة التانية من الثورة بتاعة اصحاب الثورة الحقيقيين... الغلابة

هي الفكرة كده من اولها، اهالي الشهدا الغلابة معتصمين عشان ما اخدوش لا حق ولا باطل وكمان ولا حتى بيطلعوهم في التلفزيون ولا بينزلوا صور عيالهم عشان شكلهم مش الا فرانكا وفيه وعي شديد عندهم بالموضوع ده وحازز في نفسيتهم 

ما تشغلوش بالكم خالص بالناس اللي بتقول بلطجية، الموجة دي مش بتاعتهم، انا قابلت واحدة في الميدان شيك كده وبتبص حواليها وتقول مش ده الميدان بتاعنا ولا هم دول الناس بتوعنا

ايه ياخويا الناس بتوعهم؟ وهم الناس بتوعهم كانوا حيعرفوا يعلموا على الداخلية كده؟ الناس بتوعها اول ما الداخلية بتضرب بيطلعوا يجروا، من يوم 28 يناير بالمناسبة

وماله الشعب مش عاجبها في ايه؟ ما هو ده الشعب، بيلبس كده وشكله كده

على رأي محمود سعد: يا ريت تبلغونا بماركة بنطلون وتي شيرت شباب الثوار عشان نعرف نميزهم عن البلطجية

ما انا بابات في الميدان والشباب زي الفل، عيال ولاد بلد وغلابة بس، لكن بينظموا المرور، وبيكنسوا الميدان، وكمان ابتدوا يبيضوا يا عيني، ههههههههههههههههههههههههههههههه، كل ما التلفزيون يشتم المتظاهرين يشتغلوا لهم نقاشين عشان يثبتوا انهم ناس كويسة

وعندهم اخلاق، وبيحترموا الستات.. ولما كنا في المسيرة اللي لحد مجلس الوزرا وحبوا يدخلوا على مجلس الشعب لما حشرت نفسي في الاول وقلت لهم ارجعوا اول ما شافوا واحدة ست راحوا راجعين على طول.. طبعا يسري الشرقاوي لو شاف المنظر ده حيقول عليا الزعيمة، وتوفيق عكاشة حيقول ان انا الماسون الاكبر ودول المواسين الصغنين اللي تبعي، بس هي الحكاية مش اكتر من انهم شافوا ست بتقولهم ارجعوا فاتكسفوا وخافوا عليا لما لقوني رامية نفسي على بوابة مجلس الشعب

معلش.. اصلهم بلتجية، واحنا بقى عايزين نعمل نكابة للبلتجية

مطالب الناس دي هي اللي لها الاولوية، وهم لهم تار مع الداخلية.. وانا شخصيا بيني وبين الداخلية مناخيري، انا بقيت مدمنة غاز بكل الانواع دلوقت حاليا، يبقى خلوا العنوان واضح وبين ومفهوم، يعني ايه الثورة اولا؟ هم مالهم هم بالكلام ده؟ الكلام ده تقولوه على التلفزيونات وحزب الكنبة يتفرج عليكم ويمصمص شفايفه، الناس اللي شربت الغاز وقاعدة معتصمة دلوقت مالهاش الا حاجتين:

دم عيالهم، وحقهم من الداخلية

بس كده... يبقى اللي انضرب واتصاب وقدم شهدا هو الاولى يفرض مطالبه:

تطهير الداخلية واعادة هيكلتها:

1- كل اللواءات اللي اشتغلوا ايام العادلي يتم اقالتهم

2- سحب القنابل من الشرطة.. شرطة ايه دي اللي معاها قنابل.. شوية شوية حيبقى لها طيران بقى

3- عساكر الامن المركزي يرجعوا الجيش والامن المركزي يتقسم وحدات مكافحة شغب ويبقى سلاحه شوية عصيان وطلق صوت بالكتير قوي، والعصيان ما تبقاش كهربا كمان، الله، ما الشرطة العسكرية اللي شغلتها تقمع اي تمرد داخل الجيش مش معاها قنابل، وتبقى شغلانة وحدات الامن المركزي دي انها تحمي المظاهرات ويلبسوا اي لون تاني غير اللون الاسود المكئب ده، يلبسوا اصفر زي بتوع انجلترا ويقفوا كده يتشتموا وما يردوش زي ما الانجليز بيقعدوا يشتموا في قوات مكافحة الشغب والتانيين يبقوا واقفين ساكتين كده يا عيني

4- الامن الوطني يتحل.. كل اللي اشتغلوا في امن الدولة ما يشتغلوش تاني في الشرطة اصلا، هم دول نافعين ببصلة؟ ناس تفجر لنا كنيسة وتقتل لنا 24 شهيد، وكمان يستعبطوا ويقبضوا على السلفيين ويعذبوهم وواحد فيهم يستشهد في ايدهم وينفع الناس دي تشتغل؟ ده جهاز عدو للوطن، وماحدش يقول لبعدين يعملوا عصابات، هم عصابة بالفعل، وحيعملوا ايه اوحش من تفجير كنيسة مش فاهمة؟ ايه في الدنيا اوحش من كده؟ ده موضوع القديسين هو اللي خربها وجاب اخر الناس (ونرجع نطرح السؤال السرمدي: تفجير القديسين ما بيتحققش فيه ليييييييه؟ مين اللي متورط فيه وخايفين اسمه يجي؟)، ما هم دلوقت عصابة بقوة القانون وبالمناصب والعلاقات والسلاح، لما يفقدوا كل ده حيبقوا زيهم زي اي عصابة تانية خايبة، يتقبض عليهم، ايه محسن السكري يعني؟ حتة واد صايع اخره يقتل فنانات ويتقفش عشان سايب ادلة دامغة عليه الغبي، ده كان ناقص يسيب لهم الكارت بتاعه جنب الجثة، قول يا رب كلهم يبقوا محسن السكري، وبعدين امبارح مينا بيقول لي اصلهم عارفين معلومات كتير ففي ناس بتقول انهم حيشتغلوا جواسيس

الله.. ماهم بيشتغلوا جواسيس فعلا، وجواسيس بمرتب بياخدوه مننا، يا جدعان مش في مدينة نصر العيال طلعوا ورق انهم بيتعاونوا مع السي اي ايه والموساد وبيراقبوا تليفونات كل المسئولين بما فيهم المشير نفسه؟ راح فين الورق ده؟ كلته القطة؟ وبرضه شغلهم كجواسيس وهم في مناصبهم حيسهل عليهم الشغلانة اكتر.. لما يفقدوا كل آلياتهم من علاقات وحصانة ومعلومات متجددة حيبقى موقفهم اضعف ويروحوا يشتغلوا جواسيس.. هي جات عليهم يعني؟ ربنا بيسترها، اكتر من جاسوس حكمنا تلاتين سنة واهو قاعد في شرم ياكل حيسمون على حسابنا والحرس الجمهوري بيحرسه وناقص ياخدوا له الشعب يسيق له الفيلا ويغير له مية البيسين؟ 

ام الفزع المصري الشهير ده، والله العظيم يا مصريين ما فيكم عيب غير موضوع الفزع والهلع ده، عاملين زي الام المجنونة اللي خايفة تحمي ابنها لياخد برد لحد ما عفن وجاله جرب، طب الجرب ولا البرد؟ بس لو تبطلوها تبقوا كاملين من كله... البني ادم بيبقى اخطر وهو في منصبه ومعاه سلاحه وقانون بيحميه وحصانة شغله والناس بيقولوا له يا باشا... وهم مش جوزنا عشان نقول: خليهم تحت عينا احسن ما يسافروا وما نعرفش بيعملوا ايه ولا قاعدين مع مين.. هم مش حيبقوا تحت عينا، هم حيفضلوا كده متحكمين فينا، لا.. ينزلوا بقى من فوقينا ويبقى زينا زيهم وفارس لفارس، عايزين يشتغلوا مجرمين عايزين يشتغلوا جواسيس عايزين يشتغلوا حلاقين براحتهم، المهم ما يبقاش في ايدهم مصارين البلد واسرارها وسلاح وحصانة وكمان احنا اللي نقبضهم فلوسهم اللي بيخربوا لنا البلد بيها

مش عايزاهم انا الامن الوطني دول.. وماحدش يقول لي عشان الارهاب

احنا ما عندناش ارهاب، احنا عندنا جهاز بندفع له مرتب عشان يعمل لنا تفجيرات في البلد ويفجر لنا شرم وطابا والحسين وكنيسة عشان يجدد قانون الطوارئ، واكتشفنا ان احنا ناس زي الفل وشمعتنا قايدة، وبعدين ما عندنا مخابرات والامن القومي دي شغلته اساسا

مخابرات.. هههههههههههههههههههههه.. يا عيني.. بيقفشوا سياح يقولوا عليهم جواسيس وكمبيوترات يقولوا عليها اجهزة تنصت، معلش معلش، نستحملهم، ونعمل لهم لجان شعبية تساعدهم، برضه في وشنا، وانتوا ما يرضكوش ادهم صبري حاله يميل كده

المهم اهم موجودين المخابرات يا عيني.. نساعدهم انهم ينموا قدراتهم وبلاش الامن الوطني ده خالص

5- القناصة

يا ميت ندامة.. احنا فين هنا؟ فيه بلد محترمة يبقى عندها سلاح قناصة شغلته ينشن على الشعب؟ وكمان احنا اللي بندفع لهم مرتباتهم؟ فيه ايه يا جدعان؟ انتوا ماسكين علينا صور ولا ايه؟ ندفع لكم فلوس عشان ترموا علينا قنابل وندفع لكم فلوس عشان تتجسسوا علينا وتعذبونا وندفع لكم فلوس عشان تنشونا من فوق الاسطح وندفع لكم فلوس عشان تتعاونوا مع السي اي ايه والموساد.. طب نحضر لكم الحمام الاول ولا تتعشوا الاول؟ 

6- يغيروا لبسهم... ده بقى مطلب شعبي.. واهالي الشهدا انا اتكلمت معاهم وهم مش طايقين يشوفوهم بلبسهم ده، مش قادرين، كل ما بيشوفوا البدلة دي بيتجننوا وتجيلهم هيستيريا

واهالي الشهدا هم اصحاب البلد دي

نعيد ونكرر: اللي بيدفع ضرايب بيطالب بحقه في البلد... اللي بيدفع ابنه ولا اخوه ولا ابوه ولا جوزها دول اصحاب البلد اصلا واحنا ضيوف عليهم، واللي دافع عينه ولا رجله ولا اي اصابة سببت له عاهة مستديمة ده صاحب البلد دي واحنا ضيوف عليه، صحاب البيت اللي دافعين فيها دم هم اللي يحددوا شكل الستاير والانتريه واودة النوم ولون الحيطة وعايزين الشبابيك شيش ولا الوميتال.. البلد دي بلدهم هم، واي فتافيت تتبقى منهم يوزعوها زي ما يحبوا واحنا نبوس ايدنا وش وضهر ونشكرهم على كرمهم

ولو عايزين تسموا الجمعة اي اسم يبقى الشهداء اولا

واي حد يفتح بقه معاك ويقول لك عجلة الانتاج وخربتوا البلد قول له ربنا يدوقك اللي اهالي الشهدا فيه يا بطني يا جعان.. انت بتسأل على مرتبك وفلوسك واكلك ودول بيسألوا على دم.. تحب ربنا يحرق قلبك زيهم عشان تبطل اكل وتحس بغيرك؟

ايه حكاية الاكل دي؟ ما ياكلوا بكرة.. هم حيموتوا من الجوع يعني؟ ماحدش بيجوع في مصر.. وبعدين ما يجوعوا، احنا 66% عندنا بيعانوا من البدانة.. خسوا شوية، فيه دم سال.. 

فيه دم سال

العزا منصوب وانت بتسأل على العشا؟ 

وانا مش فاهمة ياخويا اللي يضرب تحية عسكرية للشهدا، واللي بيعلقوا صورهم، واللي متعاطفين مع اهالي الشهدا، وفي نفس الوقت بيدافعوا عن الداخلية.. يا جدعان انتوا تعرفوا حد قتل الناس غير الداخلية؟ يعني ينفع تتعاطف مع اطفال غزة وتدافع عن اسرائيل؟ ما هو يا اطفال غزة يا اسرائيل... يا شهداء مصر يا الداخلية

7- ودي اهم نقطة: كل من اصدر امر بضرب المتظاهرين، وكل من اطلق النار على المتظاهرين يتم التحفظ عليه فورا، لانهم بيروحوا يهددوا اهالي الشهدا، وبيقولوا لهم حندفع على الراس ميت الف جنيه، يا اما ابنك التاني ده مش حتعرف له طريق جرة

لازم تعرفوا ان الداخلية بشكلها الحالي اللي هو نفسه شكل الداخلية ايام مبارك مالهاش عدو غير اهالي الشهدا لان دول وجودهم في الحياة بيدين الداخلية كلها

يعني ما عادش فيها كسوف ياما اعملي معروف، الموضوع مافيهوش توفيق راسين في الحلال

يا انت مع الشهدا يا انت مع الداخلية... ما ينفعش شغل حسني مبارك ده اللي كان بيقول انا محايد وهو قاعد يخدم في اسرائيل.. طبيعي، الحياد في صراع بين ظالم ومظلوم لازم يخليك في صف الظالم، امال هي تبقى ازاي؟

8- امبارح زياد العليمي اقترح ان يبقى فيه جهة قضائية مختصة بشكاوى المواطنين ضد الشرطة

هييييييييييييه

لما نخلص الشرطة بقى نبقى نشوف النيابة.. حاكم ساعات وكلاء النيابة يبقى لهم صحاب ظباط شرطة وبيجاملوا بعض، ده غير ان مبارك عمل سياسة معينة كده انه بقى يحول ظباط الشرطة على النيابة بحيث يملا النيابة بظباط الشرطة السابقين، فيبقى اللي بيقفشك ظابط شرطة واللي بيحقق معاك ظابط الشرطة.. والحمد لله ان مالوش سلطان على الاخرة كان عمل الملكين اللي بيسألوك في القبر ظباط شرطة 

وهذا نداء لكل مواطن: يا انت مع الشهدا يا انت مع الداخلية

وللمجلس العسكري: يا انت مع الشعب يا انت مع الداخلية

ولعصام شرف: روح يا حاج... انت تعبت.. نردها لك في الافراح

على فكرة.. تونس عينت ناشط حقوقي وزيرا للداخلية

يخربببب بييييييت الاجوان اللي عمالة تجيبها فينا... لا بقى.. يا حكم يا مرتشي، احنا نبات في الشارع وهم اللي ينجزوا؟

يا غربة الغلبان فيكي يا مصر

فيه طفل من اطفال الشوارع كان في المعركة ضد الداخلية يوم 28 واخد قنبلة في وشه واستشهد.. شهود العيان بيقولوا كان في الصفوف الامامية وكان بيقاتل ببسالة 

ماحدش عارف اسمه، ماحدش عارف له اهل... وطبعا ما حدش عرف يكرمه التكريم اللي يستحقه.. قال وانا قليلة الادب قليلة الرباية عديمة الاحساس الحلوفة قاعدة باكتئب قال.. ده انا رمة

الولد ده حقه يرجع قبل اللي لهم اهل... حاسبوا من زعل ربنا على الغلابة

ومن قتل مظلوما فقد جعلنا لوليه سلطانا فلا يسرف في القتل إنه كان منصورا

والغلبان ده وليه ربنا... تخيل لما السلطان يبقى لصاحب السلطان، وتخيل لما النصر يبقى لواهب النصر ويقتص للعيل ده

وبيقولوا فيه واحد كمان مات، عيل برضه

اوعوا من زعل ربنا على الغلبان.. اوعوا من زعل ربنا على الغلبان

هو انا ما اعرفش اكتئب شوية؟

نوارة ايه اللي اتقبض عليها؟ مافيش حاجة انا مكتئبة ولاسباب شخصية بحتة وعايزة اغطس شوية

بعد اذنكم يعني.. ومالهاش اي علاقة بالثورة عشان ما حدش يقعد يشيلني ذنب اني باكئب الناس

مافيش حاجة، ما حصليش حاجة.. وعشان تبقوا فاهمين اللي عايز يعمل ما بيهددش... الخبر ده هدفه بس انه يهتكوا كده قال يعني لما تسمعوا ان واحدة بنت وبنت شاعر مشهور وكمان كان الناس بتقول عليها عميلة الجيش حيقبضوا عليها يبقى تخافوا وكده عشان دول ناس جبارة ومالهمش عزيز... معلش.. سامحوهم.. ما يعلموش انكم تخوفوا عفاريت الدنيا كلها

هو اللي ما يتهتش من موت صاحبه جنبه في الشارع حيتهت لما نوارة يتقبض عليها؟ ما تولع نوارة بجاز وسخ هي كانت من بقية اهله؟ 

بقى دي اشكال بتخاف ولا بتتهت والنبي؟ ده انتوا عيال سو وربنا مش حيوقع في ايدكم غير اللي هو غضبان عليه، بس ما تقلقوش.. وانا قايلة اني حاختفي شوية عشان مكئوبة.. مش عايزة انا بقى شغل جورج اسحاق ده يختفي ويسمع ان الناس بتقول مقبوض عليه ويسكت.. اديني باقول اهو.. انا تعبانة وعايزة ابقى لوحدي شوية.. وزي القردة مافياش حاجة

اجبرتوني افتح التليفون وانا مش عايزة.. هو كنتوا اشتريتوني؟ انا حاقفل التليفون اهو

لجنة الوساخ الوطني

يامي يامي يامي... لجنة الوساخ الوطني اوصت بالقبض على المحرضين وخصت بالذكر نوارة نجم... اللي هي أنا

طب ربنا ينفخ في صورة غبائهم ويعملوها.. ويا ريت يعملوها معايا انا بالذات، عشان اشوف غلاوتي بقى عند اللي انا باحرضهم ولا بس فالحين تبربشوا لي وتقولوا لي يا آنسة في الميدان؟ 

ايه بقى القبض على محرضي الانترنت دي؟ ايه الجملة اساسا؟ انتوا اتجننتوا؟ ده ولا يوم من ايامك يا مخلوع... محاكمات عسكرية ومتاحف وعذرية واخرتها القبض على "المحرضين"؟ ايه ايه ايه؟ احنا فين هنا؟ ده المخلوع عمره ما عملها

وقابضين على عيل ناشط عنده القلب اللي هو لؤي نجاتي ومسمينه بلطجي؟ 

طب احنا بقى بلطجية ومحرضين واجندات وماسون وشعب ابن تيت واللي عاجبه ع الكحل يتكحل اللي مش عاجبه يترحل، وحنقدم بلاغ في لجنة الوساخ الوطني دي عشان بتحرض على النشطاء، ايه مالكم؟ مش عارفين تحكموا البلد ليه؟ نشطاء ايه اللي بلطجية ومحرضين وماسون ووقيعة بين الشرطة والشعب على اساس ان الشرطة والشعب كانوا سمن على عسل قبل كده

وايه الجمل دي:

واوضت اللجنة بضرورة الفحص الأمنى لمثيرى الشغب، والتعاون الكامل بين هيئات الدولة وجهاز الشرطة والمجتمع المدنى المنظم بضرورة التنبؤ بالأحداث التى تهدد الاستقرار، والمتزامنة مع القرارات والأحكام القضائية التى تقضى على الفساد، وفى القضاء على فلول منظومة الفساد والنظام البائد
!!!!!!!!!!!!!!!!!!!!!!!!!!!!!
حضارتكم النظام البائد... ولا مش واخدين بالكم؟
والفحص الامني ده بيتعمل ازاي راخر.. زي فحص العذرية كده؟ وجهاز الشرطة ده بتتعاونوا معاه ازاي يعني اكتر من ان كل قيادات العادلي بتشتغل في اماكنها وكل قتلة الثوار بيشتغلوا في اماكنهم ومافيش حد اتحاسب غير نجم الشاشة الاوحد امين الشرطة السني اللي بقى بطل تليفونات الفضائيات وخليتوه هو اللي قتل المتظاهرين لوحده، وهو عذب الناس لوحده، وهو اللي اكل الجبنة..
بالنوسبة لضرورة التنبؤ بالاحداث.. ايوووةةةة.. انا عايزاكم تتنبأوا بالاحداث كده، زي ما تنبأتوا بيها لما سيبتوا علينا كلاب الداخلية تضرب فينا بغازات لسه كلنا بنعاني من حرقان في الانف والعين ودوخة بسببها لحد دلوقت
والمحامي احمد ابو خليل قال لي انه قال للظابط انتوا ليه بتصعدوا انتوا تقدروا تلموا الموضوع قام الظابط قال له: لازم يحصل ضرب جامد.. دي اوامر
ثم اسمع بقى يا معلم:
وأشارت إلى أهمية كشف وتجريم التمويلات مجهولة المصدر ومن الجهات الأجنبية تحت زعم الديمقراطية،
اييييييييييووووووةةةة
انا معاكم.. كده صح.. واول تجريم يبقى للمعونة الامريكية.. ماهو عدم اللا مؤاغزة، ما تجيش تجرم لي مركز بياخد تمويل من مؤسسة تحت السلم في تنزانيا والمعونة الامريكية واكلة البلد.. مش عايزينها احنا بقى المعونة
وايوة بعد اذنك حضرتك احنا حنحل الداخلية.. الداخلية الموجودة دي مش نافعة
دي تتحل ويتبني مكانها جهاز امني يخدم المواطن مش يقبض على "المحرضين" اللي هم المواطنين، بحيث المواطن لما يشوف ظابط شرطة يبقى زي الافلام كده الامريكاني يجري عليه لما يخاف، مش يجري منه من كتر الخوف
ويالا بقى.. حطوا ايدكم في الكوبس خلي الثورة تعرف تحشد اكتر من الاول عشان ننضف ونخلص
انا بس عندي مشكلة.. تليفوني مش عايز يسكت.. يا عيال ما تخافوش يا عيال، احضر الشنطة، وتجيبوا لي زيارات كنتاكي، احنا ناس اجندات ومش مقامنا ناكل عيش وحلاوة
وانا مش احسن من اللي اتعرضوا على النيابة على العسكرية ودخلوا السجن الحربي وسموهم بلطجية وهم تفتهم اطهر حاجة في البلد دي
---------

اه نسيت.. بمناسبة التحريض

احنا النهاردة عندنا جمعة الشهيد

وعندنا مسيرة الساعة اربعة عصرا من مسجد عمر مكرم لمجلس الوزرا

وانا باحرضكم جميعا انكم تنزلوا الجمعة دي، وتمشوا في المسيرة دي، وباسخنكم اخر حاجة وباقولكم ان الشنب اللي حيقعد في بيته وفيه دم ناس سال وما اتاخدش حقه يبقى يمسح كلمة ذكر من البطاقة وما يحطش انثى عشان ما يجيبلناش احنا الكلام، ممكن يحط كانجرو

فيديوهات/ التحرير

انا جيت استحمى واريح شوية ونازلة اهو ودول اتنين فيديو صورتهم يوم 28 بالليل

دي شهادة احد المصابين اللي كانوا معتصمين في ماسبيرو

ودي مطالب اهالي الشهداء اللي وزعوها علينا امبارح:


1- مطلوب ضم جناية حسني مبارك وجميع جنايات قتل المتظاهرين واصابة الثوار بالقاهرة الكبرى لجناية حبيب العادلي الى القضية رقم 1227 لسنة 2011
2- مطلوب تفرغ هيئة المحكمة المختصة بقضايا قتل واصابة الثوار بعد ضمهم ولحين الفصيل فيهم
3- حبس جميع الضباط وامناء الشرطة المتهمين بقتل اواصابة الثوار احتياطيا لوقف تأثيرهم على الشهود
4- مطلوب توسيع دائرة الاتهام بقتل واتصابة الثوار لتشمل:
- احمد نظيف رئيس مجلس الوزراء السابق
- انس الفقي وزير الاعلام السابق
- طارق كامل وزير الاتصالات السابق
- حاتم الجمبلي وزير الصحة السابق
5- مطلوب نقل وقائع جلسات المحاكم مباشرا على التلفزيون المصري لما له من اهمية
- تحقيق لمبدأ الشفافية
- المردود الايجابي على الاقتصاد المصري
- انهاء حالة الاحتقان الشعبي في هذا الشأن
6- صرف معاش استثنائي فوري لجميع مصابي الثورة مع علاجهم على نفقة الدولة بالداخل والخارج
-----------
امبارح مالك عدلي بيقول لي العيال اللي كانت بتشتبك مع الداخلية عن الوزارة عمالين يهزروا مع بعض وبيجروا ناحية الرصاص وهم بيهرجوا ويقولوا: يالا بقى نستشهد احنا عملنا ذنوب كتير في حياتنا... ويقول لي اقول للعيل فيهم ياد ارجع شوية يقول لي: لا انا رايح اخد طلقة، انا جاي اموت.. ويروح ضاحك ويقول له: اصل عملت ذنوب في حياتي
وزي ما احنا عارفين دي طبيعة اي بلطجي في الدنيا
وانا كبلطجية ماسونية حافضل قاعدة مع ائتلاف شباب بلطجية ثورة 25 يناير زملائي
ده فيديو برضه صورته يوم 28 لائتلاف بلطجية الثورة

يالا.. اشوفكم هناك بقى
اه نسيت.. المدون والناشط لؤي نجاتي اترحل على السجن الحربي بوصفه احد البلطجية اللي هجموا على ماسبيرو!!!!!!!!!!!!!
انبي تعوض عليا عوض الصابرين يارب



بيقول حنموتكوا يا ولاد "المتنـ.." هههههههههه حيموتونا؟ على اساس ما عملوهاش قبل كده؟ وعلى اساس احنا اصلا بنخاف من الموت؟ هم مش جربونا ولقونا مستبعيين على عمرنا؟ ما يجربوا حاجة تانية؟ يجيبوا لنا بون بون زي ما شفيق قال

احنا في الميدان...

بالمختصر كده عشان الحق انزل تاني

ناس جات لاهالي الشهدا قالت لهم فيه تكريم في مسرح البالون، فيه بعض من اهالي الشهدا راحوا عشان التكريم، اول ما اكتشفوا انه كمين واتضربوا واتقبض على سبعة منهم، الخبر وصل لاهالي الشهدا المعتصمين في ماسبيرو، راح حوالي ستين واحد عند الداخلية يتظاهروا، بمجرد وصولهم عند الداخلية راحت الشرطة ضاربة عليهم قنابل مسيلة للدموع، انا معايا فيديوهات وشهادات بس مش عندي وقت انزل حاجة، لو ربنا كتب لي عمر حانزلها، لو ما كتبش تليفوني حاديه لاي حد ينزل منه الفيديوهات

ما كانش فيه بلطجية امبارح في الميدان... انا من اللي كانوا في الميدان لو بتعتبروني بلطجية كل اللي هناك زيي، وعلاء سيف ومالك مصطفى ومالك عدلي وسلمى سعيد وامينة وليلى حسن سليمان، انا باقولكم الاسامي دي عشان كل الناس عارفة انهم مش بلطجية، وكل ما حافتكر حد من صاحبي حاقولكم، ما شفتش انا بلطجية خالص امبارح وكل الناس اللي اعرفهم امبارح كانوا في الميدان، وايوة الناس حدفت طوب على الداخلية لان الداخلية بتضربنا بقنابل ريحتها فظيعة ورصاص وسلطت علينا بلطجية، واول ما العيسوي قال الداخلية حتنسحب قلت لهم يبقى حيبعت بلطجية فزعقوا لي وقالوا لي ما تخوفيش الناس - على اعتبار ما كان من المعتاد في الحالات اللي زي دي - بس اخوف مين، الناس مش خايفة

انا حاروح واحنا محتاجين ادوات طبية، سرنجات ومشارط ومقصات وانتي بايوتيك وشاش وقطن وكده عشان المستشفى الميداني

واحنا قاعدين ومطلبنا حل الداخلية القائمة واعادة بناء داخلية جديدة

الامن المركزي يتلغي، والمجندين اللي بيقضوا جيشهم في الحرب على الشعب يرجعوا الجيش عشان يخدموا الوطن، مش ياكلوا ويشربوا على حسابنا ويضربونا، الشعب مش هو العدو، ماحدش يقضي فترة جيشه في ضرب الشعب، ما يرجعوا الجيش يعملوا حاجة مفيدة، انشالله يعملوا شاي وقهوة للظباط ارحم من القرف اللي بيعملوه ده، وظباط الامن المركزي اللي شغالين في الاصل في الداخلية يخدموا في قطاع الامن، يحفظوا الامن مش يضربونا، ومش ظابط امن يطلع يقول لنا في الميكروفون: "يا شعب ابن متنـ.. احنا حنعلمكم الادب ونربيكم.." وبعد ما ينضرب يقول: الله الله.. هي دي سلمية الثورة يا شباب؟

هههههههههههههههههههههههههه الله... طب كنت عامل سبع ليه بس؟

الامن الوطني يتحل ويشغلوهم في المطار ولا في المرور ولا في اي داهية تشيلهم، يشوفوا لهم لقمة حلال انشالله يدوهم حتة ارض يزرعوها... اللي عمل الكمين ده لاهالي الشهدا هو الامن الوطني

ام القنابل المسيلة للدموع اللي جايبينها من امريكا يضربونا بيها دي تتصادر منهم، وامريكا القذرة باعتة لهم شحنة جديدة لقنابل غريبة كده لون الغاز بتاعها اسود، اوباما يضحك في وشنا ويبعت للداخلية قنابل جديدة تضربنا بيها؟

احنا الداخلية دي ما عادتش تنفعنا ولا عاد ينفع تبقى موجودة في البلد، يا احنا يا هم في البلد دي

ووزير الداخلية يبقى مدني... مين اللي ادا الامر لضرب الناس بالقنابل المسيلة غير العيسوي؟ ده الضرب كان عند وزارة الداخلية.. العيسوي يمشي، وما يجيش اي ظابط شرطة وزير

دي مطالبنا وده اخرنا معاهم... وادي احنا بنقول للمجلس العسكري اهو.. زي ما كان الاختيار يا مبارك يا الشعب وهم اختارونا، هم دلوقت قدام اختيار تاني، يا الداخلية يا الشعب

وكده كده الداخلية دي حنمشيها تكلم نفسها.. فاحسن يختاروا الشعب بقى ويعملوها بجميلة... الداخلية دي مش نافعة، وعشان نروح لازم يصدروا قرار فوري باعادة هيكلة الداخلية، والغاء التجنيد في الامن المركزي وحل الامن الوطني 

لو مش عارفين ازاي يعيدوا هيكلة الداخلية... يرجى الاتصال على الشعب.. احنا عندنا خطة كاملة متكاملة لاعادة بناء الداخلية عشان تبقى حاجة محترمة

كلمة اخيرة: 

متشكرين قوي للقوى السياسية القذرة اللي قاعدة تتخانق على الدستور والانتخابات واتخلت عنا واحنا بننضرب وقبلت يتقال علينا اننا بلطجية وكمان بيروجوا للكلام ده... مش حننسى جميلهم اللي على راسنا ده ابدا، احنا حننسل الدستور والانتخابات على راسكم دول

مافيش لا دستور ولا انتخابات في ام البلد دي.. فيه شعب، وميدان، وابقوا خلوا اللي بتعملوه ده ينفعكم... والله العظيم قيادات القوى السياسية كلها من اقصى اليمين لاقصى الشمال حتقضي بقية خدمتها في شرم جنب مبارك... يالا بقى، خليكوا في كوزكوا لما نعوزكوا.. واحنا مش عايزينكم، احنا ما نزلناش نموت عشان انتوا تقسموها، ده بعينكم، انتوا عبارة عن مباركات بس على صغير، وعلى فكرة قواعد القوى السياسية من الشباب كلها معانا في الميدان، يعني هم اصلا عيالكم كده كده حيقلبوكوا

البلد دي بلدنا، وحتتعمل زي ما شعبها عايزها، مش زي ما الاوامر بتيجي من برة مع القنابل المسيلة للدموع... وابقوا روحوا اقعدوا مع الامريكان تاني يا عالم ناقصة، وماحدش يسألني تقصدي مين... كل قيادات القوى السياسية قعدوا مع الامريكان.. 

نتقابل في الميدان... كرسي العرش بتاع الشعب

تابع التذكرة: 29/1 الذين استجابو في ساعة العسرة.. واهل مصر صحابي وأولياء الله

تحديث:

اه... نسيت اقولكم كمان ان من ضمن الحاجات اللي فاجئتني وخلتني احب الجيش بعد ما كنت خايفة منه، اني وانا باقول للاتنين ظباط: غمض عينيه افتكرته نام طلع مات.. دوروا وشهم الاتنين وقعدوا يعيطوا والعساكر اللي كانوا على العربية وطوا راسهم وعيطوا

بصراحة بالنسبة لي واحد لابس ميري وعنده دم وبيعرف يحس ناهيك بقى عن انه يعيط دي معجزة بعد ما قعدت يوم كامل قدام حلاليف بيقتلوا الناس ومافيش اي تعبير على وشهم كأنهم روبوت مش بني ادمين زي اسرائيل لما بتضرب في الفلسطينيين

فيه فيتيون جديد نزل بس اكيد مش انا اللي مصوراه هههههههه مافيهوش الشلل الرعاش بتاعي، انتوا عارفين بصمتي
شوفتوا الولي ده:





ده فيديو واحد يوم 29، انا رحت يوم 29 اجيب عربيتي من عند مسجد مصطفى محمود، ما اخبيش عليكم كان جسمي كله لسه بيترعش بعد ما واحد فضل يطلع في الروح جنبي، وبعد ما هدومي غرقت دم، يوم 28، كانت الناس على آخر اليوم بتقول: واحد اتنين الجيش المصري فين.. الشرطة بتضرب فينا، عايزين الجيش يحمينا

وبصراحة اكتر، لو تراجعوا فيديوهات يوم 28 حتلاقوني ما كنتش باسرسع معاهم، ده الهتاف الوحيد اللي ما قلتوش، ولما فاطمة عابد قالت لي حاسة ان الجيش حينزل قلت لها بعد الشر، ولما لقيتهم بيهتفوا الهتاف ده رقعت بالصوت وقلت لهم: اسكتوا.. انتوا عارفين لو نزل حيعمل فينا ايه؟ ده جيش مبارك.. ممكن يضربنا

الناس كلها هبوا فيا، وكنت حانضرب.. تاني، بعد ما انضربت من الامن، المتظاهرين كانوا حيضربوني، وقالوا لي: ما تقوليش كده، ده جيش مصر.. الجيش معانا

بعد ما خلصنا، عربيات الامن انسحبت وشوية منها ركن على جنب، الظباط اختفوا واللي فضلوا العساكر، واحنا ماشيين بنت تفت عليهم وقعدت تصرخ في وشهم: يا اسرائيليين يا اسرائيليين.. اتفو عليكم.. اتفو عليكم يا كلاب... الاسرائيليين احسن منكم.. تقتلوا اهلكم وناسكم؟

انا كنت متنحة، ورجليا بتترعش، والشباب فضلوا يهدوا البنت وواحد قالها: سيبيهم خلاص.. اخدوا نصيبهم، ما تهينيش واحد مهزوم

والله العظيم.. نفسي الاقيه الواد ده.. ده كده عيل صغير، وشكله من اللي تشوفهم في الشارع تحس ان مالوش في حاجة خالص وبيتفرج على افلام احمد السقا ويسمع تامر حسني وامينة.. قالها كده باللفظ: ما تهينيش واحد مهزوم

بعدها مشيت في الشارع لوحدي رايحة على البيت.. امشي واقع.. امشي واقع.. لحد ما عربية جيش معدية والناس عمالة تصقف لهم في الشارع شافوني.. وانا بصراحة كل ده مرعوبة لسه منهم، مش عارفة حيعملوا ايه، راح نازل منها اتنين ظباط جيش وقوموني وسندوني ودي كانت اول مرة اعيط، من الصبح ما نزلتش دمعة.. انا.. انا ام قويق.. ما عيطش خالص طول اليوم، بس اول ما ظباط الجيش قوموني انفجرت في العياط، وقعدت اقولهم: واحد مات جنبي.. واحد مات جنبي.. فضل يطلع في الروح كتير.. كنت عايزة اجيب له الاسعاف.. عينيه خضرا.. بس لما غمض افتكرته نام.. طلع مات.. مات
وقعدت اهذي بهيستيريا كده

قعدوا يطبطبوا عليا ويقولوا لي: بس بس.. اهدي.. انت ساكنة فين؟ قلت لهم آخر الشارع ده.. قالوا لي تعالي حنوصلك.. بصراحة خفت تاني.. مش حاكدب يعني.. قلت لهم لا.. خلاص انا حاعرف امشي، كان شباب واقفين في الشارع الظاهر لاحظوا اني لسه مش مآمنة قوي، قالوا لهم: ما تقلقش يا فندم، احنا حنوصلها

فالظابط قالهم: دي مش عارفة تمشي، تيجي تركب معانا 

قالوا له: معلش.. هي اصلها مش قادرة تشوف حد بميري.. احنا عارفين انكم جيشنا ونازلين تحمونا وانتوا مش زي الشرطة.. بس هي فعلا مش قادرة، احنا معاها ما تخافوش عليها

ايه ده بقى؟ ايه ده؟ ملايكة دول ولا ملهمين ولا بينزل عليهم وحي؟ والله ولا اعرفهم العيال دي ولا شفتهم تاني ولا فاكرة اشاكلهم خالص، عرفوا منين اني مش قادرة اشوف ميري؟ ايه الحساسية والنباهة دي؟ ده لو قلب الام مش حيحسوا بيا كده

انا بصراحة من الموقف ده حبيت الجيش قوي، وده يمكن الفرق بيني وبين اللي زعلانين من الجيش دلوقت

هم كانت توقعاتهم من الجيش اعلى من الواقع، وانا توقعاتي كانت ادنى من الواقع كتير، فكل واحد فينا مشاعره كانت تابعة لتوقعاته مش لتقدير محايد للموقف

لإني كنت متوقعة انهم حيقتلونا وما قتلوناش فحبيتهم.. ولانهم كانوا متوقعين ان الجيش حيبقى العصا السحرية في ايدهم وما بقاش عصا سحرية فكرهوهم

تاني يوم رحت اجيب العربية او اتفقدها لانهم قالوا فيه انفلات امني وقلت اكيد العربية اتكسرت... رحت لقيت العربية زي الفل، بس فضلت متنحة كده، ومش عارفة سوقت ازاي، رجليا كانت بتترعش على الدبرياج

بس وانا ماشية لقيت الشباب بينظموا المرور.. ولقيت مظاهرة في الشارع، وما كنتش اتوقع ابدا بعد اليوم العصيب ده ان حد ينزل مظاهرة تاني في الشارع، توقعت انهم حيريحوا اليوم ده وينزلوا الاحد، ولما شفتهم افتكرت الذين استجابو في ساعة العسرة، لما الرسول قالهم تعالوا نظهر القوة تاني يوم احد فمشيوا بجراحهم وطلعوا عشان يظهروا القوة

يا اوليا لسه في العشرين وفي التلاتين، يستنجدوا المؤمنين في المأزمة بيكم، يا فارجين الكرب بين العرب عناوين:

هو فيديو واحد... معلش.. انا اسفة يا اوليا، اليوم ده ما كنتش مع الاوليا، كنت ولية

تحت امرك يا.. يا دكتوووووور

احنا اول شعب دكتور في الدنيا.. جامعة سان فرانسيسكو منحت الدكتوراه الفخرية للشباب المصري وتسلمها نيابة عنا محمود ساندمانكي، ومن هنا ورايح احنا مش حنكلم بعض غير بدكتور

ما عادش حد بقى يقول: انا مش شباب الثورة دي تاني والنبي احسن بتنقطني، حضرتك تعرف نفسك اما بالدكتور فلان، او لو مش مع الثورة تبقى الفلول فلان

يبقى البلد دي فيها دكاترة وفلول، بالنسبة للفلول، المفروض ان المجلس العسكري يبقى عنده تقدير سليم للامور ويتضامن مع الدكاترة اللي نزلوه بنفسهم وقالوا له واحد اتنين الجيش المصري فين... ويخلص لنا على الفلول واحنا حنغني له الاغنية دي

وبالنسبة لمبارك.. بما اننا ضكاطرة، فاحنا عملنا قونصولطو وقررنا ان مبارك صحته زي البمب ويقدر يروح طرة يمسح الكبينيهات
وبخصوص تأجيل محاكمة العادلي، يا ريت تيجوا دوغري معانا وتفهمونا انكم ناويين تأجلوا الحساب ليوم الحساب وربنا احسن من الكل عشان نعصركم تنزلوا غوغاء صغيرين
احنا ضكاطرة ونفهم في الصحة اكتر منكم، تأجيل المحاكمات ده بيتسبب في تسلخات خطيرة قد تؤدي الى مرض الايدز وتعرض المريض للذبحة الصدرية... وبعد كده اي روشتة نكتبها تتصرف دوغري، ما توجعوش قلبنا بقى، وما تقطعوش كورس الدوا اللي احنا كاتبينه من نصه، عارفين احنا الطريقة دي... ما خلصتش كورس الدوا ليه؟ يقولك ما انا بقيت كويس.. ماهو انت كده حتتنكس
كان كابير السوايدة قال اننا نستاهل جايزة نوفل.. فين؟ ولا هو كلام وخلاص؟ احنا بنتكلم كلام علمي هنا وما نحبش بقى كلام في الهوا كده
بعد ما خدنا الضكطرة عايزين جايزة نوفل عشان بقى نعرف نتفرغ لشغلنا وابحاثنا ونعرف نساعد طلبة المؤهلات العليا اللي حوالينا ونبتكر لهم طريقة لاستئصال الاورام الاستبدادية تبقى احسن وتوفر جهد احسن ده اليمن وسوريا وليبيا والبحرين الورم عندهم عضال
وبعدين فين الدكتوراه بتاعة تونس؟ دول مقدمين عليها من بدري، هو ده خيار وفقوس.. لما ناخد جايزة نوفل حندي الدكتوراه لتونس ونعمل لنا جايزة باسمنا ونديها لهم ولا الحوجة للخواجات بقى... ادونا فرصتنا بقىىىىىىىىىىىىى
وبعد الفحص اتضح ان حالة ابناء مبارك اسفين يا ريس خطيرة محتاجين عملية تحويل نوع وزرع مخ، احنا جربنا في القرد وطلع فيه تشابه كبير بينه وبين ابناء مبارك وان شاء الله ربنا يوفقنا نسبة نجاح العملية - 90 وان شاء الله نعمل لهم العملية وتنجح ويفيصوا
والله الموفق

التذكرة: 28 يناير/ كربلاء المصرية... يا شعب ياللي دفع تمن الشوارع دم، احفظ اسامي اللي ماتوا في الشوارع صم

ده يوم 28 يناير.. برضه اللي صورته

اوعى وشك.. الشلل الرعاش على اصله، ما عرفتش اصور اللي فرفر جنبي لاني كنت باشيل بطارية الموبايل وارجعها قال ايه كده بقى الشبكة حترجع.. حترجع اعمل بيها ايه؟ اطلب الاسعاف

ايييييييييييييه الغباوة اللي انا فيها دي؟ مخي كان فين ساعتها؟ البطارية مالها ومال الشبكة، ثم اسعاف ايه اللي حطلبها في المقتلة دي؟ 

بس حتسمع صوتي وانا باسرسع، مش حتقول ابدا اني روحت وهدومي غرقانة دم جرحى وناس ماتت.. ما تفهمش ايه الهلاهوطة اللي كانت نازلة عليا دي.. ما اعرفش كانت سرقاني السكينة ولا ايه؟

المرة الجاية ابقوا فكروني بحاجتين: اولا ما اسرسعش وانا باصور، ثانيا لما الضرب يبتدي ما ابطلش تصوير

انا مسمية اليوم كربلاء المصرية، وتميم قال لي ما تسميهوش كده، سميه بدر المصرية.. الا هو عدد اللي مات من الشرطة قد ايه؟ قلت له هو احنا كان معانا حاجة نموتهم بيها؟ احنا كنا بنرفع ايدينا ونقول لا اله الا الله فكانوا بيضربوا علينا
فيه حكاية تانية بقى، بما اني باحكي حكاياتي الشخصية ومغامراتي مع امي.. امي كانت كوميدية جدا في المرحلة دي
فيه يوم عمر عفيفي طلع وهبش مخ كل الامهات.. فجأة لقينا امهاتنا بتتصل بينا كلنا، انا وفاطمة وبنات كتير، وولاد كمان، وبيقولوا لنا الكلام اللي عمر عفيفي قاله.. امي اتصلت بيا: يا نوارة.. الراجل التخين بيقول ان اسرائيل حتيجي تضربكم دلوقت
قلت لها: يا ماما بيخرف..
قالت لي: وافرضي ماب يخرفش؟
قلت لها: افرضي يا ماما.. حاعمل ايه يعني؟ حاسيب الميدان؟
سكتت شوية وقالت لي: لا طبعا.. ما تسيبيش الميدان.. صليتي العصر؟ 
قلت لها: اه 
قالت لي: كويس.. تصلي بقى اول ما الادان يدن عشان احنا مش ضامنين ايه اللي حيحصل
قلت لها: يا ماما لو مت وعليا صلاة او اتنين وانا ميتة شهيدة اكيد ربنا حيسامحني
قالت لي: وليه نجازف؟ ما تصلي صلاة الخوف...
صوتها كان بيترعش، قلت لها: انت بتعيطي يا ماما؟
قالت لي: واعيط ليه؟ هي حاجة وحشة انك تروحي الجنة؟ انا جدعة لعلمك..
ههههههههههههه امي حبيبتي

نسيت احكي لكم بقى على بابا.. كان يوم 25 يناير، اتصل بيا وانا في الشارع على الضهر كده وقال لي: ايه نوارة انت فين؟
قلت له: يا بابا انا في وسط البلد
قال لي: بتعملي ايه؟
قلت له: بنحرر مصر..
فسكت حبة كتير.. وبعدين راح قافل من غير ما يقول لي حاجة
ام زينب بتقول لي انه قعد يعيط بعد ما قفل معايا.. ما اعرفش عيط ليه؟ باقول له بنحرر مصر.. يقوم يعيط؟ ولا عيط على هبلي ساعتها ولا ايه؟ 


يوم 28 بقى... كل الناس بلا استثناء واحد كانت نازلة تموت... تموت بس، مافيش حاجة تانية في دماغها.. وكل واحد كان فاكر ان اللي مستعد يموتوا زيه مش كتير.. وما كانش فاكر ان كل دول عايزين يموتوا

انا مش حاتفرج تاني عشان تعبت قوي وانا بانزلهم.. اتفرجوا انتوا بقى واتعبوا زيي: 

يا موتي قوم امتحني اعتذر منهم، اشمعنى يا كلب تستثنيني من بينهم، يوم الخطر قبلها ما كنت اجبنهم، يا موت تعالى اعوض غربتي ومنفاي، يا موت تعالى احاسبك ع القديم والجاي، يا موت تعالى ونتقاسمك انا وعداي، ولا تطال عزوتي وانا بعيد عنهم

فإن الذكرى تنفع المؤمنين: 25/1 يوم الإخلاص.. والخلق كانوا مدركين لكنهم مش كلهم متأكدين

انا كنت صورت فيديوهات في الثورة، مش دايما كنت باقدر اصور، مش دايما كنت بابقى عايزة اصور، احيانا كنت باعمل حاجة او ببساطة الشحن قاطع

غير اني باصور وحش، تصويري سريالي

ما فتحتش الفيديوهات من ساعتها، كل ما احاول افتحها يجيلي انهيار بمعنى الكلمة وما اقدرش اكمل، النهاردة واحد على التويتر انب لي ضميري وقال لي نزليهم.. ده واجب وطني، فتحتهم، ونوة عياط وصويت افتحت... المشاهدة اصعب كتير من المشاركة، انا ما كنتش باعيط وانا في الشارع، بس الفرجة جابت لي اكتئاب وتعب

المهم.. انا شايفة اننا محتاجين نشوف يومياتنا تاني في الثورة.. عشان الظاهر نسينا

ما تنسوش يا مصريين... انا اتفرجت على الفيديوهات وجالي اللي جالي، فكرت اخد مهدئ وانام، وبعدين لقيت نفسي اتمليت غل تاني، قلت لا، انا مش حاخد مهدئ، ومش حانام، انا حافضل بالحالة دي لحد ما اجيب حق شقانا وتعبنا على الاقل اذا ما كناش حنجيب حق الشهدا

اجيب حق قلق امي اللي يوم تمانية وعشرين وانا نازلة قعدت تقول لي: خلي بالك بقى من نفسك، لو لقيتي حاجة خطر ارجعي على طول.. مش شطارة انك تتصابي ولا تتحبسي.. انت بتعملي دور و..

قلت لها: ماما... انا نازلة واحتمال تسعين في المية ارجع لك جثة.. واحتمال عشرة في المية ما يلاقوش جثتي

سكتت شوية وبعدين قالت: وانت احسن من مين؟ اكتبي إن الذي فرض عليك القرآن.. يمكن ترجعي.. لا إله إلا الله

محمد رسول الله
بس يوم 25 كان مختلف خالص.. يوم 25 ده يوم الاخلاص، يوم ما كل واحد فينا كان نازل وفاكر ان هو الوحيد اللي نازل وان الباقيين خافوا من تهديدات الداخلية
وما كانش حد فينا جواه لوم على الباقيين اللي كان متأكد انهم مش نازلين.. لإن اكيد خايفين ولهم حق.. بس كل واحد فينا قال في نفسه، هم معاهم حق يخافوا.. لكن انا زهقت واتخنقت.. ويا رب ما ارجع بيتنا تاني

وحياة قلق امي عليا وهي مالهاش غيري ما سايباك يا مبارك، لا انت، ولا داخليتك، ولا حزبك الوطني، ولا دلاديلك، ولا اللي بيحموك كمان

ابتدينا اولنا يوم 25.. يوم ما قلنا يا مبارك يا مبارك جدة جدة في انتظارك.. خبز حرية كرامة وطنية.. يا محمد قول لبولس بكرة مصر تحصل تونس.. الكلام ده كان الساعة واحدة الضهر.. قبل ما نقول اسقاط النظام الساعة خمسة العصر

نعتذر عن تصويري السيريالي... وعن صوتي المسرسع :)

استفتحنا: ارقينا وارقيهم يا عم الشيخ، فى حاجة خلت يشمك التاريخ، ينزل عن الوجه الجميل فيبان

اقتراح محسن بركات: جمعة 8 يوليو يكون شعارها "المصريون اولا" ها؟

ما تنسوش يا مصريين.. ما تنسوش


الزميل على التويتر اقترح ان عنوان جمعة 8 يوليو تبقى: المصريون اولا

وتبقى المطالب لها علاقة بحياتهم المباشرة

يعني مثلا الحد الاقصى للاجور في مؤسسات الدولة عشان يتم التحكم في الاسعار واعادة بناء داخلية جديدة والغاء الامن الوطني، ده رجع يتصل بالناس تاني من برايفيت نمبر زي زمان

وانا مش فاهمة الغاء الامن الوطني مستحيل ليه؟ انا عارفة ان المصريين قلبهم ... بس انا باقول لهم لو كان الـ... بينفع كان نفع نفسه

ثم هم حيتوزعوا على بقية الاجهزة، جوازات بقى مرور اي داهية

مش عايزينه احنا، اهم غيروا اسمه ومافيش لا اشراف قضائي ولا حقوقي عليه، وبعدين ليه الفلوس دي كلها، ما يروحوا اجهزة تانية ويحلوا ده

مافيش حاجة عدلة حتتعمل في البلد دي طول ما الداخلية شغالة بنفس الطريقة القديمة، الداخلية دي لازم يتعمل لها اعادة هيكلة، الداخلية والامن الوطني بالتحديد هم المسئولين عن الخطاب المضاد للثورة، وهم المسئولين عن البلطجية، وهم المسئولين عن تعطيل بقية الوزارات انها تعمل اي حاجة مفيدة تمس الناس في حياتهم وتحسسهم ان فيه ثورة في البلد

وبعدين راجعين بنفسية منتقم مع ان هم الفئة الوحيدة في البلد دي اللي استفادت من الثورة، هم اللي مرتباتهم زادت مية في المية، وعبء الشغل قل من عليهم، واخدوا حوافز ومكافأة زيادة، ومافيش اي ضرر وقع عليهم خالص بالعكس، كله جاي عليهم بفوايد.. بس قالك: نفسيتهم تعبانة، شيل الشرطة من الارض، ادي الشرطة لابوه، يا عيني الشرطة بتعيط

وكذا حد منا انا واصحابي قابلنا ظباط شرطة صغيرين، نقيب او رائد، وقالوا لنا في الشارع: قياداتنا بتقول لنا احنا عايزين البلد تخرب.. وبيقولوا لنا سيبوا البلطجية واقرفوا الناس العادية

ده كلام شباب من جهاز الشرطة نفسه، مش ممكن كل دول متواطئين على الكذب، والعيال فيه منهم عنده استعداد يدلي بشهادته في الاعلام، وفيه شباب في الشرطة كتير مستعدين يتعاونوا ضد قياداتهم وبيقولوا احنا عايزين نشتغل كويس ومش عايزين الناس تكرهنا ولا عايزين نرجع للوضع السابق.. عيال صغيرة ولسه ما لحقوش يستلذوا طعم الفساد وعايزين يعيشوا في اطار كويس ويشتغلوا على نضافة

يبقى لازم ناخد موقف

قلتوا ايه في اقتراح محسن بركات؟

شالوا الدستور اولا الحمد لله.. حطوا ايه بقى؟

كويس انهم شالوا الدستور اولا ويا ريت ينشروا الكلام ده في كل الصحف عشان نبقى واضحين مع بعضينا بالذات في المصري اليوم والشروق والاهرام اللي نشروا انها عشان الدستور اولا، وكمان يبلغوا قناة التحرير، ابراهيم عيسى كمان يبلغوه ان يوم 8 يوليو مش عشان الدستور اولا والكل يبطل يتكلم في ان يوم 8 يوليو عشان الدستور اولا.. بتاتا قطعيا تماما، ويتوضح ده في كل حتة

قشطة

ايه بقى؟ ايه المطالب يعني؟ 

فكروا في مطالب والحقوا عشان نشتغل فيها لاني انا شخصيا روحي في مناخيري وخلقي ضيق اليومين دول ومزاجي مش عال العال يعني، فما بقاش فيا خلق للمناهدة والمحايلة كتير، وزهقت من كتر ما بابعتر دلع يمين وشمال لحد ما الناس تتمرع عليا، فمن هنا ورايح بقى مافيش دلع

خلصوني.. ايه ام المطالب في الليلة دي، بعد الشكر على الغاء مطلب الدستور اولا