حنعمل ايه دلوقت؟

تحديث:
صفوت حجازي راح عند السفارة الامريكية وبيقول مافيش مسيحيين معتصمين هناك
تحديث:
دلوقت العيال على التويتر بيقولوا نروح بكرة الصبح عند كنيسة امبابة كلنا، وخاصة المسلمين طبعا، وبالذات السلفيين، ونروح نعمل وقفة للوحدة الوطنية عشان ننق الموقف
قلتوا ايه؟ شوروا عليا... انا عداد دماغي زير
تحديث:
يا جماعة موضوع تسرب الغاز ده حقيقة ولا خيال؟ ايه الليلة الصعبة دي؟ دي اصعب من ليلة الجمل
تحديث:
مستشفى امبابة بحاجة للتبرع بالدم العاجل.. الناس حتموت لان المستشفى مش مجهزة 
تحديث:
احنا مش ناقصين خرا بقى.. حد يروح يعفق العيال دي من قفاهم ويجرهم على بيوتهم بقى مش طالبة هبل ع المسا
-----------
خلاص اتخانقنا، ولطمنا، وعيطنا، وشتمنا في بعض، وانا شخصيا على التويتر قلت لهم مش طايقة اسلامي دلوقت ماحدش يكلمني

بس خلاص.. راحت السكرة وجات الفكرة

احنا حنضيع

شقانا وتعبنا حيروح

الشباب اللي زي الورد اللي ماتوا، مسيحيين وسلفيين وبني ادمين.. كله مات، وكلهم دمهم حيروح، كلنا تعبنا، وكلنا نمنا في الشارع، وكلنا شقانا حيروح.. حيروووح

حنعمل ايه؟ لازم نعمل حاجة بقى

انا مش عارفة حنعمل ايه؟ بس لازم نعمل حاجة

اولا: اي سلفي مش موافق على اللي حصل ده يقول انا مش موافق.. وكفاية بقى جري ورا النسوان المسيحيات.. ايه الهيجان ده؟ 

ثانيا: اي مسيحي خايف على البلد يوضح ما ينجرش لفتن طائفية ويعملها مسلم ومسيحي، وسلفي واخواني وعلماني، كل الناس دي كانت مع بعض في الميدان وكل الناس دي مات منها ناس، لازم يضبط نفسه

فيه حاجة ضرورية:
فيه واحد ساكن في شارع الوحدة وانا اثق في كلامه لانه مش اسلامي اساسا، قال لي انه شاف حريقة شارع الوحدة بتاعة الكنيسة وقال لي ان الحريقة دي ما كانش فيها سلفيين خالص، وان العيال المقتحمين عيال بلطجية مش من امبابة، عشان هو ساكن هناك طول عمره
وبيقول لي المطافي ما جاتش غير بعد ساعة، والشرطة والجيش ما اتدخلوش 
يعني المؤكد ان الحريقة بتاعة شارع الوحدة مش عاملها السلفيين
بس الهجوم على الكنيسة الاولانية كان من مجموعة رايحة "تنقذ الاخت" من جوة الكنيسة، دول تقريبا بتوع ائتلاف المسلمين الجدد، فالظاهر بقى لما نزلوا يجروا ورا النسوان كالعادة - بعد ما كاميليا قلبتهم - فحد استغل الموضوع ده وراح حرق الكنيسة
مين الحد ده اللي بعت ناس تحرق الكنيسة
هذا ما سنعرفه في الحلقة القادمة

ثالثا:.. مش عرافة... شوروا عليا

لازم نعمل حاجة دلوقت، فيه اسعاف ضروري... مش وقت فش غل دلوقت، ننقذ البلد وبعدين نتحاسب

واللي عمل كده يتقبض على ميتين اهله ويتشمط في الشارع قدام كل الناس

والجيش ملزوم قدامنا يلم الموضوع ده.. يا يمشي

هو المجلس العسكري ايه نظامه؟ وناوي على ايه بالظبط؟

تحديث:
مجموعة من الشباب المسلم توجهوا الى كنيسة امبابة ويقفون الآن لحماية الكنيسة. 
تحديث:
انا سامعة من البث المباشر على النت المسيحيين وهم بيهتفوا: الجيش والشعب ايد واحدة، يا رب يا رب.. هو عمل معاهم حاجة كويسة.. يا رب يكون عمل حاجة كويسة، اصلي مش هاين عليا اقلع الدبلة
تحديث:

بكرة فيه مسيرة من دار القضاء العالي لحد ماسبيرو الساعة اربعة، كلنا رايحين ان شاء الله

تحديث:
اهم.. اهم ولاد الوسخة اهم راحوا كنيسة امبابة واتهجموا عليها
طب بقى دول مافيش عتب عليهم لأنهم دلاديل وبيتحركوا باجهزة
العتب على المجلس العسكري والاخوان... كده خلصت يا معلم.. خلصت
احنا عايزين مجلس رئاسي - اللي قبل كده قلت على جثتي، دلوقت قعاد المجلس العسكري هو اللي على جثتي - والاخوان يوضحوا موقفهم دلوقت.. السلفيين بيتهجموا على كنائس الناس وحيعملوا لنا فتنة طائفية وشهود عيان بيقولوا فيه ضرب نار
فيه ضرب نار
لاااااا كده خلصت... كده خلصت يا معلم.
النهاردة ايه في ايام ربنا؟ 
السبت؟ الحشد ليوم الجمعة الجاية، من دلوقت، مش تيجوا الاربع تحشدوا، من دلوقت، عايزين مجلس رئاسي. 
اه.. انا قلت على التويتر:
1- نقل مبارك لمستشفى السجن
2- محاكمة سوزان وعمر سليمان واحمد شفيق
3- اعادة هيكلة الشرطة بالكامل
4- الافراج الفوري عن كل المحتجزين واعادة محاكمة اللي اتحكم عليهم في قضايا عسكرية واحالتهم لمحاكم مدنية
بس مدام الحكاية وصلت لضرب نار يبقى الجيش يمشي
اللي مش عارف يحمي البلد من فتنة طائفية وصلت لضرب نار يمشي.. زي ما مشينا مبارك بالظبط، ومشيناه عشان فيه كنيسة انفجرت، ولا هم مش واخدين بالهم ان كنيسة القديسين هي اللي خربتها؟
يالا بقى ايفينت وانا حاكلم الائتلاف دلوقت
------------
كاميليا شحاتة طلعت من هنا على قناة الحياة، وفجأة لقيت واحد كاتب يقول مسلمة محبوسة في كنيسة امبابة رجاء الحشد، وبعد شوية لقيت واحد بيقول السلفيين متجميعن بالسيوف عند كنيسة امبابة

ما اعرفش معاهم سيوف ولا لا.. بس شفت واحد سلفي فعلا على التويتر بيقول رجاء الحشد

خير؟ 

الشرطة العسكرية فين؟

والمجلس العسكري فين؟

وايه حكاية كاميليا اللي ظهرت فجأة، دي كاميليا نفسها بتقول بيشغلوكوا بيا عن القضايا الاهم.. بصوا لمصر

اه.. ايه بقى؟

ايه؟ المجلس العسكري ايه نظامه؟ مطنش يعني.. 

مطنش؟

مطنش ولا هو اللي محرك الموضوع بقى؟

ماهو هالله هالله ع الجد والجد هالله هالله عليه، سوزان مبارك مش بيتحقق معاها، ومبارك نفسه مش بيتحقق معاه، وقاعد في مستشفى شرم الشيخ مع ان رئيس الطب الشرعي الجديد قال يقدر يتنقل مستشفى السجن، ومرتضى منصور خرج، وموقعة الجمل اتحولت من النيابة العامة، وعمر سليمان اتقدم بشأنه قضايا والنائب العام قال مش اختصاصنا، وبعدين قالوا اتحول للنيابة العسكرية وبعدين رجعوا قالوا لا مافيش حد بيحقق مع عمر سليمان، وبعدين الشرطة رجعت وبتمارس بلطجة على سكان العشوائيات وبياخدوا منهم اتاوة وبينتقموا منهم ويقولوا لهم: مش شاركتوا في الثورة؟ خلي الثورة تنفعكم.. والعمال طالع ميتين ابوهم وشكل الحد الادنى للاجور مش حيتفعل

والسلفيين دول ما بيتحركوش من دماغهم ابدا.. ابدا.. عمرهم.. عمرهم في حياتهم ما اتحركوا من دماغهم، لازم لهم جهة توجههم، ومش حيهيجوا الهياج ده الا فيه حد دافعهم، والاخوان مش حيقرنوا لهم كده الا يكونوا عاملين صفقة

وبصريح العبارة بقى، بلا سعودية بلا نيلة

الموضوع ده واقف وراه المجلس العسكري وش... ايه؟ اييييييييييه؟ ايييييييييييييييييييييييييه؟

مين اللي علمكوا تعملوا الحركات دي؟ ايييييه؟ ايه حكايتكوا؟ 

وعصام شرف كان بيعمل ايه في السعودية؟ وليه السعودية رصدت مليار ريال لدعم الحركة السلفية في مصر؟ عمالة عيني عينك كده؟ وده من ورا المجلس العسكري برضه؟ ومن ورا عصام شرف برضه؟

لا عدم اللا مؤاخذة

ان كنتوا اخوات اتحاسبوا

مش انا حبيبة الجيش؟

خد دبلتك اهي... يا الليلة دي تتلم، يا تطلقني 

عاجل.. عناية المجلس العسكري، ومجلس الوزراء

انا وصلني الميل ده:

29 يناير وبعد حدوث الانفلات الأمنى احنا كلنا خرجنا من المعتقل لانه مينفعش نقعد بدون مياه ولا نور ولا أمن ..وبعدها فى فبراير تم الافراج عن كل المعتقلين السياسيين وتم نشر اسمائنا على موقع وزاره الداخليه..عملنا بطاقات الرقم القومى دون ادنى مشاكل.. ولكن حدث ان زميلى كان ماشى على كمين فالبصدفه كشفوا على اسمه على كومبيوتر وزارة الداخليه ولقوا مكتوب ( هروب ) فاتكلبش وفضل اسبوع محتجز فى ظروف صعبه مع المجرمين لغايه متعرض على وكيل النيابه .. قام وكيل النيابه قال ( يرجع الى محبسه )!!! ده بعد متم الافراج اساسا عننا كلنا وخلاص بدانا نستنشق نسيم الحريه.
نحن لا نعرف الان هل كل المعتقلين الذين (هربوا) من المعتقلات بعد الانفلات اتعمللهم قضايا هروب ولا الداخليه عملت لاسماء عشوائيه او بالأحرى لابناء سيناء حيث اعتادت على عاملتهم كمواطنين من الدرجه الثانيه.
اسماء المعتقلين فى سجن طره شديد الحراسه ( العقرب) الذين تم القبض عليهم دون وجه حق وقضوا 40 يوما حتى الان فى السجن .. وكل جهه بترمي مسئوليتها على الجهه التانيه:
عرفات مزيد مسلم فريج ( معتقل سياسى منذ 8 سنوات )
سلامه عوض الله سليمان وديان ( معتقل سياسى)
وشكرا مقدما

انسانية كاميليا شحاتة!

طبعا احنا سيبنا اشغالنا، واعمالنا، وحالنا ومحتالنا، واللي ورانا، وبنتكلم عن كاميليا شحاتة دلوقت حاليا، وعايز اختي، وانت فين يا خالتي؟ واللي يتجوز امي اقوله يا عمي

مش ورانا حاجة غيرها

وامبارح كان فيه مظاهرة عند الكاتدرائية، سألتهم: هم انتوا مسيحيين ولا سلفيين احسن بقيت اتلخبط.. فضحكوا

لما ضحكوا بقى عرفت انهم مسيحيين

طب واقفين ليه؟

اصل السلفيين شتموا البابا بشتايم وحشة الاسبوع اللي فات

فقلت لهم وانتوا داخلين لبعض مظاهرات من الاسبوع للاسبوع؟ فضحكوا تاني... انت جاي تتظاهر ولا جاي تهرج؟ 

لا.. انت جاي تهرج، عشان هم شكلهم كده قالوا لهم اتظاهروا، هم مش بيتظاهروا من معاميق قلبهم، زي ايام ماسبيرو كده لما كنت باروح لهم اقولهم المظاهرة دي طائفية، قوم يقولوا لي: والله معاكي حق، المفروض نروح التحرير ونتظاهر مسلم ومسيحي، عموما، كلمي ابونا عشان ياخدنا! 

بس الشهادة لله.. المظاهرات دي مجرد ردود افعال

هيييييه... والله وجه اليوم على السلفيين اللي بقوا بيتكلموا فيه بكلام كفري والعياذ بالله.. زي انهم مثلا يقولوا: دي قضية حرية عقيدة.. دي قضية سيادة قانون.. دي قضية حقوق انسان

الله الله الله يا عبد الله... جامد قوي الكلام ده، وشكلكم قمر وانتوا بتقولوا الكلام ده

همممم.. ولو ان مافيش اي دليل مادي واحد انها قضية حرية عقيدة، أو حقوق انسان، أو سيادة قانون، لأن القانون مافيهوش ابو يحيى

وولو ان النيابة نفسها تجاوزت القانون لما خاطبت الكنيسة عشان تجيب لها مواطنة، مع ان المفروض ده دور الشرطة، والكنيسة غير ذات صفة، ولو ان فيه تناقض ما بين موقف النيابة نفسها، وموقف المطالبين بسيادة القانون، والكلام عن ضرورة ان الكنيسة في حد ذاتها ما تدخلش وفي نفس الوقت يخاطبوها كأنها جهة ذات صفة عشان تجيب لهم مواطنة، وانا مش فاهمة على اي اساس الكنيسة تجيب لهم المواطنة دي، ماهو يا الشرطة تروح تجيب كاميليا بنفسها عشان تمثل قدام النيابة، يا النيابة توجه اتهام للانبا اغابيوس بانه اختطف كاميليا والشرطة تروح تقبض عليه.. يعني ايه الكنيسة تسلم اي حد؟ هي مالها؟ ده في قانون ايه؟ ما هو يا الكنيسة متهمة، وفي الحالة دي مافيش حاجة اسمها الكنيسة متهمة، فيه افراد بيعملوا في الكنيسة متهمين ولازم يتقبض عليهم من قبل الشرطة، يا الكنيسة كنيسة وبس مش شغلتها تسلم ناس، هي ايه صفتها تسلم وتستلم؟ 

بس حنمشي قضية كاميليا قضية انسانية وحرية عقيدة وسيادة قانون.. كده بدون ادلة غير شهادة ابو يحيى

وانا مستعدة انضم لحملة كاميليا سيدة العصر والاوان... بس عشان تبقى قضية انسانية بقى فيه شروط:

1- الاخوة اللي راحوا يروعوا الناس قدام دار عبادتهم ويتظاهروا قدام جهة ليست ذات صفة مع ان القضية في ايد النيابة عايزة اشوفهم بيتظاهروا قدام سجن طرة للافراج عن المقبوض عليهم في قضايا "التشيع". اييييووون.. اييييوووووننن... ايه؟ هو التشيع ده مش حرية عقيدة برضه؟ يعني ايه يتقبض على ناس بتهمة التشيع مش فاهمة يعني؟ مافيش في القانون المصري تهمة اسمها التشيع، ومع ذلك، فيه ناس كتير اتقبض عليها بتهمة "التشيع". 

2- هم هم نفس الاخوة الاربعتلاف واحد اللي جم باتوبيسات سياحية يروعوا الناس قدام دار عبادتهم ويقولوا على البابا شنودة نجس... عايزة اشوفهم بيروحوا يتظاهروا قدام مجلس الدولة عشان يطالبوا بحق البهائيين في انهم يتكتبوا في البطاقة: بهائي. مش: --.. كأنه لفظ قبيح. وقالك يتكتبوا شرطة عشان احنا "مش معترفين بيهم". يعني ايه مش معترفين بيهم مش فاهمة؟ نمتوا مع الشغالة في الحرام وحملت خلفت بهائي؟ طب نعمل دي ان ايه. قالوا: لا.. اصل لو اعترفنا بيهم (اسمعوا بقى بتوع الانسانية) حيطلبوا معبد يصلوا فيه، ويمكن يطلبوا ان عيالهم في المدرسة ياخدوا دروس دين بهائية وما يحضروش مع المسلمين والمسيحيين! سامعين بتوع الانسانية وحرية العقيدة وسيادة القانون بيقولوا ايه؟ حق ان الانسان ياخد اودة يصلي فيها ويعلم ابنه ديانته... ده حق، مش مكرمة من سيادتكم، ومش مستني سيادتكم "تعترفوا" بيهم. هم بني ادمين، ولهم وجود، ومكونين من خلايا ولحم ودم، ومعتقدين في اعتقاد معين، والاعتقاد ده حقهم يتكتب في البوطاقة عدم اللا مؤاغزة، ولو عايزين مكان يصلوا فيه من حقهم، ولو عايزين يعلموا ولادهم ديانتهم من حقهم. وحكاية ان عددهم الفين واحد دي حاجة تحرق الدم فعلا.. لأن عدد كاميليا: 1 فرد. ولو اضفنا عليها الاخت تريزة والاخت وفاء بقوا: عدد 3 مزز. 

3- هم هم نفس الاخوة الاربعتلاف واحد ياخدوا بعضهم على مشايخ السلفية ويتظاهروا قدام بيوتهم ويطالبوهم بالاعتذار عن فتاويهم ايام الحرب على لبنان سنة 2006 لما قالوا على الاطفال الرضع اللي كانوا بيموتوا في جنوب لبنان "روافض" وحرام تدعوا لهم عشان "حزب الشيطان" و"حسن نصر اللات" اخطر على الامة من اسرائيل. اهي دي بقى لا حرية عقيدة، ولا سيادة قانون، دي ارواح.. ارواح اطفال وستات وناس بريئة، وهان عليهم يقولوا عليهم روافض، وهان عليهم يكرهوا الناس فيهم وهم بيموتوا، وهان عليهم يحرموا على الناس حتى الدعاء لهم بالنصر ومنظر الطفل الرضيع اللي راسه طايرة بيتذاع على كل القنوات. 

4- هم هم نفس الاخوة الاربعتلاف واحد ياخدوا بعضهم ويتظاهروا تاني قدام مجلس الدولة عشان كاميليا برضه، بس كاميليا أم اندرو وماريو اللي قلبها اتحرق وولادها اتخطفوا منها بحكم المحكمة، وفوق ده كله اتجبروا على ديانة هم مش عايزينها، وعلى العيشة مع راجل بيكرهوه، والقاضي قال في حيثيات الحكم "لأن الاسلام هو الدين الافضل"! 

5- هم ذات نفس الاربعتلاف واحد دولم، يشرخوا على الصعيد ويعملوا مظاهرة عشان اللي قطعوا ودن الواد يتحاكموا، واظن القضية دي اولى، لأن قضية كاميليا قدام النيابة، وقضية سلوى مقبوض على اللي قتلوها، لكن المقطوع ودنه اللي عملوا فيه العملة دي ما اتقبضش عليهم

في هاذوها الحالة

انا مدينة لفرقة كاميليا للانشاد الديني بالاعتذار، وابقى فعلا اسأت فهمهم، ويبقوا فعلا بيسعوا لدولة قانون وعدالة ومساواة، وبيستخدموا قضية كاميليا لتطبيق سيادة القانون، وحانزل اركب معاهم الاتوبيس السياحي والف معاهم على الشوارع وانام فيها كمان، انا اصلا باحب نومة الشارع

اما اذا تحججت فرقة كاميليا للانشاد الديني بان الروافض اخطر على الامة من اسرائيل، والبهائيين مؤامرة ماسونية، وفعلا الدين الاسلامي هو الدين الافضل، وايه يعني دي حتة ودن؟ 

يبقى حماسهم لقضية كاميليا - اللي تاني مافيش اي ادلة على ادعاءاتهم فيها الا شهادة ابو يحيى وشهادة ابو محمد وشهادة ابو جلمبو - هو حماس طائفي، وتبقى القضية دي قضية طائفية

واظن هم هم نفس الناس دي بنفسهم حكموا على اصحاب القضايا الطائفية لما قالوا ان ثورة البحرين انها ثورة طائفية، وبناء عليه، فيحل لملك البحرين انه يقتلهم، ويحط جرحاهم في التلاجات، وبعد ما يستنفد كل طاقة جيشه وشرطته، يستدعي لهم قوات اجنبية تدخل تضربهم... ويستاهلوا، اصل مظاهراتهم مظاهرات طائفية

حكمتم بنفسكم على نفسكم.... بالشفا

الللللللللعععععععععععععببببببببببببب... مظاهرات في جزيرة العرب

اوعى اوعى...

الا دي بقى.. 

الا دي.. حقة يا عيال.. حقة لو الجزيرة العربية نورت، مش الارض تنور، ده المجرة كلها تنور... 
نور للأمم بجد بقى

ترجع لنا بقى.. ترجع لنا بالسلامة، ترجع للانسانية بقى وتنور علينا، اوعى.. دي حتبقى نجمة الشاشة الاولى، وحتاكل الجو من مصر حتى

قولوا يا رب

اوعى اسمع حد يقول العدد قليل.. الله يرحم سلم النقابة، انتوا حتتنططوا على الناس؟ احنا كنا نحلم؟ ده ولا في الاحلام.. بس ادعوا لهم، وقولوا يا رب
ملحوسة طائفية قذرة على جنب: دول مش شيعة

انا مبسوطة قوي من الصورة دي :)

مش باحط انا صور لنفسي عشان ما اضايقكوش.. انتوا مالكوش ذنب ههههههههه

بس الصورة دي ليا وانا في الكتدرائية ومتاخدة من المصري اليوم، هم شالوها بعد شوية وحطوا صورة البابا شنودة طبعا، بس الظاهر اللي اخدها صعب عليه انه ما ينزلهاش قال ينزلها شوية ههههه

ما اعرفش كنت باعمل ايه ساعتها، بس الصورة معبرة قوي، المصور شاطر

:)

في الكتدرائية :)

واللي يتغاظ يتفقع... وما يبقاش يآنسنا في المدونة هنا تاني، ولا احطها لهم على المدونة على طول؟ هي ايه اللزقة دي؟

احنا مش لازم ننسى وقفة الناس الحلوة دي جنبنا

الفلسطينيين... يا عيني

واقفين دلوقت رافعين اعلام مصر وعمالين يقولوا شكرا ام الدنيا.. حاجة توجع القلب، عشان اساسا المصالحة دي ماهياش حاجة فظيعة ولا حاجة، ومش اول مرة تحصل، ما السعودية صالحتهم قبل كده وما قالولهاش شكرا ابو الدنيا، بس هم مش بيحبوا يكسفوا ايدنا

فاكرين ايام مبارك لما اسماعيل هنية طلع تهنئة بفوز المنتخب المصري وقال لنا الف مبروك وبالمناسبة السعيدة دي افتحوا لنا المعبر؟

احنا بقى مش لازم ننسى وقفة الناس الحلوة دي جنبنا، ده كانوا هم تقريبا الوحيدين في العالم اللي عندهم امل فينا، ومن كتر املهم كنت باقولهم: الاخوة الفلسطينيين اللي مستنيين مصر على الغدا... كلوا انتوا واحنا لما نيجي حنسخن وناكل

بس الشهادة لله ما سمعوش كلامي، فضلوا مجوعين نفسهم وعمالين يقولوا ده مصر دي.. دي حتبقى عروسة، بكرة تشوفوا، ده اجدع ناس المصريين دول

فاحنا كده بقى عايزين ناخد خطوات جادة، لإن الثورة بتاعتنا ممكن يحصل لها انتكاسة ويرجع لنا نظام زي نظام مبارك واوسخ لو فضلنا محاطين بجو عدائي، وفضلوا اعداء الثورة في المنطقة اقويا، وحبايبها ضعفا

لازم حبايب الثورة يبقوا اقويا لان ده حيأثر علينا بشكل مباشر، انا طبعا مقدرة ان السادات زرع ثقافة متخلفة تخلي الناس مش عارفة تربط ما بين الشأن الخارجي والداخلي

طيب.. هي اولا فلسطين مش شأن خارجي، ثانيا.. اي كيان دولة بالاساس شأن خارجي، واي حاجة لها علاقة بالشأن الداخلي، من اول البطالة والفقر وسعر الطماطم، حلها في الشأن الخارجي اساسا، لإن الدولة المضغوط عليها من قوى خارجية مش بتعرف تبقى دولة محترمة، واديكوا شفتوا، مبارك كان حيفلت من المحاكمة بسبب ضغوط خارجية، ولولا اننا بنتحرك في سكة تقوية علاقتنا الخارجية بحبايب الثورة ما كانش بقى عندنا ورقة ضغط نقاوم بيها الضغوط الخارجية، ولسه فيه ضغوط علينا عشان مبارك ما يتحاكمش، ولسه احنا بنحاول نقوي شبكة علاقتنا الخارجية بحبايب الثورة عشان نعرف نحاكمه.. وهكذا

المهم يعني، مافيش حد يبقى ساكن في امان وتبقى الشقة اللي على يمينه والشقة اللي على شماله مولعين

معلش مضطرة اشرح البديهيات دي، ومنه لله السادات مطرح ما راح

دلوقت اسأل اي ظابط جيش صاحبك ده من اللي بتسأله دايما وتيجي تقول لي ظابط جيش صاحبي قال لي، عشان تعرف احنا بقالنا 30 سنة ما حاربناش ليه

بقالنا 30 سنة ما حاربناش عشان فيه مقاومة فلسطينية مشكلة حائل ما بينا وبين اسرائيل، ولو المقاومة دي - لا قدر الله - انكسرت، ولو تمكنت اسرائيل من السيطرة على الفلسطينيين تماما، اسرائيل كده راجعة سينا راجعاها مافيش كلام

يعني اكذوبة ان مبارك هو اللي ما خلناش نحارب دي تبقوا تتغطوا بالليل كويس عشان ما تحلموش بيها، والكلام ده عارفه الجيش كويس، من اكبر راس لحد ظابط الجيش صاحبك 

امبارح خالد مشعل قال لازم فيه آلية جديدة لمواجهة الاحتلال، مش معناها نعلن الحرب، بس السلام فشل، ولازم نلاقي طريقة جديدة

الراجل بيتكلم صح

وده امن قومي مصري مافيش كلام

شعب فلسطيني قوي وموحد = أمن قومي مصري ودور مصري اقليمي قوي = مصر قوية اقتصاديا وسياسيا = طفرة في القضية الفلسطينية

هي دايرة

هو كده، شئنا ام ابينا، توأم ملتصق حنعمل ايه؟ عشان كده اسرائيل مش عايزة مصر تبقى ديمقراطية 

دلوقت المصالحة دي ماهياش القشطة قوي ولا حاجة، وممكن تفشل، والفلسطينيين فرحانين يا عيني مش عشان هم عبط ولا عشان هم مش فاهمين ان المصالحة دي هشة، بس عشان جاية من وش مصر وهي كانت واحشاهم وعايزين اي حاجة من ناحيتها يمسكوها ويقعدوا يشموا فيها

مافيش بقى حاجة تضمن اننا حطينا رجلنا على الطريق الصحيح غير الاقتراح اللي قاله تميم البرغوثي في الندوة بتاعته هنا في القاهرة:

انتخابات يشارك فيها كل الفلسطينيين في الداخل وفي الشتات، مش بس الضفة وغزة

هو الاقتراح ده ممكن يلاقي اعتراض من اسرائيل لو تضمن عرب 48، ولو ما اتضمنوش حيبقى ظلم لهم، بس يستحملوا شوية

ممكن كخطوة اولى يبقى فلسطينيين الضفة وغزة وفلسطينيين الشتات، في الحالة دي مافيش فصيل حينفرد بتمثيل الشعب الفلسطيني، وحيبقى قيادة توافقية ماحدش حيقدر يعترض عليها، وفي الحالة دي مصر تدي كل الدعم للقيادة التوافقية دي، وما يبقاش فيه فصيل حاسس بالظلم، وممكن مصر تتولى التنسيق بين الفصائل او حتى تحط آلية للتنسيق لو هم مش طايقين بعض خالص يعني

كده مصر ضمنت انها امان من ناحية اسرائيل لانها حتبقى بنت حائط سد بينها وبين اسرائيل من البشر الفلسطيني المتوحد ما تقدرش اسرائيل تخترقه عشان تعمل فينا اللي كانت بتعمله ايام المخلوع

تقوم مصر يبقى عندها وقت ومجال تقوي نفسها، قوم لما مصر تبقى قوية تعرف تسند الحائط البشري الفلسطيني من ضهره كويس، فهو يقوى، يقوم يقومي موقف مصر، قوم مصر تبقى اقوى فتقويه، يبقى زي فرعين معشقين في بعض كل واحد فيهم شايل التاني

كده تمام من الناحية الشرقية يبقى امنا نفسنا، وده حينعكس علينا اقتصاديا بقوة، نقدر بقى ننمي سيناء، ونستغل كل الموارد اللي فيها واحنا حاسين بامان، لو زرعنا مليون فدان في سيناء خريطة المطر حتتغير، والاقتصاد يحصل فيه طفرة، وده مش حينفع يحصل طول ما الفلسطينيين ضعفا واسرائيل نايمة مشتحة ودراعها فارد على سيناء، قوم لما احنا ننمي سيناء، يبقى فيه فرصة ان الفلسطينيين ما يبقوش تحت رحمة الاقتصاد الاسرائيلي ويتذلوا له، يبقى تنمية سيناء تنمي مصر وتسند الفلسطينيين اقتصاديا، قوم هم يبقى وضعهم احسن في مواجهة اسرائيل، قوم يشكلوا حائط سد اقوى بينا وبينها، قوم احنا ننطلق اكتر في التنمية الاقتصادية من غير مخاوف ولا ضغوط، اديني عمالة الت واعجن اهو واشرح بالتفصيل عشان ما يجيش ابن ... سادات يقول لي: احنا مالنا ومال فلسطين، قوم نبقى اقويا سياسيا، ومستقلين بالقرار، وادي شرف بيحاول مع دول حوض النيل

فاضل بقى الناحية الغربية

تونس عندها مشاكل

مشاكلهم شبه مشاكلنا صحيح وده بيخلق مشكلة تالتة ان احنا الاتنين ممكن نقعد نندب جنب بعض: اه والنبي ياختي، انت حتقولي لي؟

بس كده مش حينفع، احنا لازم ننسق مع بعض، انا لساني اتدلدل

مش حكومة شرف اللي حتنسق مع الحكومة التونسية لان الحكومة التونسية مش قد كده، ومخترقة

التنسيق المرة دي لازم يبقى بين النشطاء والثوار من البلدين، احنا نساعدهم في حاجات وهم يساعدونا في حاجات

تقوم لما احنا الاتنين نحقق تقدم نزنق القذافي في النص ونأمن شره، لانه مؤذي قوي الراجل ده، ربنا يخلصنا منه على خير

لازم نوجد وسائل للتواصل ما بينا وبين النشطاء التونسيين بحيث هم يطرحوا مشكلتهم ونشوف ممكن نساعدهم فيها ازاي، واحنا نطرح مشكلتنا ونشوف هم يساعدونا ازاي

فيه مشكلة اساسية دلوقت بتواجه تونس، ان الاسلاميين والعلمانيين بينهم مشاكل، وفيه تسريبات ان فيه تهديدات بانقلاب عسكري لو الاسلاميين نجحوا، والاسلاميين في تونس حينجحوا طبعا لانهم مش شبه الاسلاميين بتوعنا، مخهم نور كده ومتفتحين، فما فيش حجة لحد يسقطهم

والخلاف ده غلط، مدام الاسلاميين في تونس متفتحين يبقى فيه مجال ان العلمانيين ينسقوا معاهم ويعملوا برلمان ائتلافي

حد يعقلهم لان لو حصل بينهم مشادات جامدة الجيش حيتدخل والجيش مش حلو يتدخل في الفترة دي والجيوش بقى بتتعلم من بعض واحنا حنتئذي في الليلة دي كده 

هم ايه اللي حصلهم خدوا عين؟  دول كانوا اسياد العاقلين

بالنسبة لنا احنا ممكن يساعدونا هم في موضوع الفتنة الطائفية ده، الاسلاميين اللي عندهم ممكن يعقلوا لنا كتائب كاميليا شحاتة للانتاج الفني، ولو نسقوا مع بعض يبقى حلو، ولو ان دي فيها اذية على حزب النهضة، يعني التنسيق ما بين الاسلاميين المصريين والتوانسة حيبقى في صالح الاسلاميين المصريين، والاسلاميين التوانسة حيتفضحوا عندهم فضيحة المطاهر انهم بيتعاملوا مع مجانين مصريين

بس مش لازم يتعاملوا مع مجانين، يتعاملوا مع العاقلين اللي عندنا وفي نفس الوقت كل فصيل في بلده ينسق مع الفصائل التانية عشان تعدي، مش حينفع اي فصيل سياسي ينفرد بالبرلمان في اي من البلدين، والاسلاميين لو حريصين على بلادهم فعلا يسعوا لبرلمان ائتلافي، سواء في مصر او تونس... أم الصبي هي اللي ما ترضاش سليمان يقسم لها ابنها نصين، لازم الاسلاميين في البلدين ينسقوا مع العلمانيين عشان البرلمانين يبقوا اتئلافيين، ولازم العلمانيين يبطلوا الاسلاموفوبيا اللي عندهم

ولو انه صعب

اذا كنت انا في الاسبوع الاخير ده اصابتني اسلاموفوبيا من تحت راس فرقة كاميليا للانشاد الديني... بس معلش، فيه ناس عاقلة وينفع الكلام معاها

لو تونس فشلت - لا قدر الله - احنا حنفشل. وش كده مافيش كلام، لان ده حيدي امل لكل الصراصير انها تطلع علينا، كمان الانظمة الاستبدادية مع بقايا الانظمة البائدة بينسقوا مع بعض لحد دلوقت

ما ننسق احنا مع بعض كمان

عاجل: كله يتجمع قدام الكاتدرائية الساعة 6

دلوقت طنط شاهندة كلمتني وقالت لي ان فيه ناس من الكنيسة اتصلوا بيها وقالوا لها ان البابا تلقى تهديدات بالقتل اثناء القائه للوعظ بتاعه النهاردة الساعة ستة في الكاتدرائية

طبعا ان شاء الله خير

بس احنا عايزين بقى نوئد الفتنة الطائفية دي من جذورها عشان وجع الدماغ

طبعا انا مقدرة ان مافيش وقت، وان الحشد حيبقى صعب، لكن مش مستحيل، احنا النهاردة عايزين نقف نحرس الكاتدرائية الساعة ستة

الحقوا بقى الحاضر يعلن الغايب عشان مش قدامنا وقت كبير

وطنط شاهندة رايحة ورايح معاها ناس كتير 

شير بقى في الخير

النهاردة - والعياذ بالله - 4 مايو

تحديث:
ايه ده؟ فيه ناس بتسأل دي قصيدة مين؟
مش عارفين ان دي قصيدة تميم البرغوثي؟
تحديث:
شارع سوزان مبارك في المقطم بقى اسمه شارع الشهيد كريم بنونة.. دافعين تمنها دما، يا أمة الكرما، شعبك كأنه سما، والدنيا دي مطره
-------
وبهاذوها المناسبة احب اعبر عن نفسي

وحانشر القصيدة اللي انا اصلا ناشراها هنا

<<<<<

والشروق العبط ما كانوش منزلينها كلها فأنا بقى قعدت اتملاها واصححها عشان تبقى مظبوطة

انا بقى باحب القصيدة دي مش عشان باتفلحس واقيم الشعر اللي فيها، انا مين اصلا اقيم شاعر الزمان

انا بس عمري في حياتي ما حد قال كل اللي انا نفسي اقوله كله كله وكل اللي جوايا ومش عارفة اعبر عنه وحاجات حاسة بيها ومش عارفة اصيغها وحاجات كانت جوايا زي الدمل ومش عارفة هي ايه بقى؟ ها؟ ايه؟ هو انا حاسة بحاجة كده، بس ايه ده اللي انا حاساه؟ وليه عملت كذا مثلا في اليوم الفلاني؟ وكده.. دي حتى عاملة زي يومياتي، وقعد اقرا كل بيت فيها كذا مرة، واقول بقى انا لازم كل بيت اكتب عليه بوست، واقول انا البيت ده يوم ايه اكتر حاجة كنت حاساه، بس لقيت اني حابقى هرمنااااا، هرمنااااا على ما اخلصه، ثم اصلا ماهو قايل، انا حاقول في المتقال ليه؟
عمري يعني ما حد قعد يتكلم ويقول كل الكلام اللي في دماغي كله بالطريقة دي، وانا عمري ما اتكلمت وقلت كل اللي في دماغي كده واحساسي، مع اني مش بابطل كلام، وبالعة راديو، ويمكن عشان كده بالعة راديو، عشان فيه كام حاجة في الجوانيات عمالة الف وادور حواليها ومش عارفة اقفشها قوم لقيت بقى القصيدة دي تقول مثلا في بيت حاجة قعدت اكتب فيها بوستات وانا مش عارفة اكتبها، وبعدين الناس ما تفهمش انا باقول ايه؟ ولا حاسة بايه؟ ويردوا على حاجة تانية خالص، اقوم اتعصب قوي، واتنرفز، واشتمهم جامد من الغيظ، هم ليه بقى مش حاسين بيا؟ 

واحس كده بقى اني لوحدي، واني مهما ارغي ما حدش فاهم مالي، وافضل كده اعيط، واتلكك عشان اعيط، واقعد مع الناس وابقى حاسة اني لوحدي برضه، وفيه اود كده لا انا عارفة افتحها ولا حد عارف يقول لي ايه بقى؟ 

قام جه ربنا عمل الثورة

وراح ربنا مملي تميم البرغوثي القصيدة دي

قمت انا قعدت اعيط.. بس فرحانة، عشان حسيت ان الاود اتفتحت وشفتها، وحسيت بقى اني مش لوحدي كده ولا حاجة، وده حتى فيه اهو حد حاسس انا حاسة بايه؟ وحتى الحتة اللي بيتكلم فيها عن نفسه عاملة بالظبط زي ما انا حاسة بس مش عارفة اقول

ويخيروني العيال في حب اب وام.. وللمصادفة انا برضه قرشية، فكأن بقى هو هو نفس الحكاية بالظبط، فانا بقى فرحت كده، عشان حسيت اني بردانة كده والقصيدة بلوفر جه على مقاسي واحسن من بلوفر شفيق

وانا مش عارفة ليه في يوم ميلاد مبارك عايزة انزل له القصيدة دي، عشان يعرف انا حاسة بايه؟ لانه واضح انه مش حاسس انا حاسة بايه؟ تصدقوا انا بعد ده كله مش عايزة منه حاجة غير يحس قد ايه هو ظلمنا. بس لو حس انه هو ظلمنا انا حارتاح. ولو حس انه عمل لي في جوانياتي الحاجات اللي في القصيدة، احس بالراحة بس.

ولا انا عارفة اتكلم واوصل الكلام اساسا.. اذا كان اصلا اللي بيدخل المدونة مش فاهم انا مالي

المهم يعني.. ايه الرغي ده كله؟ كل ده عشان اقول القصيدة دي بتعبر عني في كل حرف فيها؟ ما انا راخرة انسانة عيانة بالكلام بجد.. ما اسكت شوية، ما الراجل اتكلم بدالي اهو وجه يشرح نفسه قام شارحني.. بارغي ليه انا دلوقت؟

طب خدوا القصيدة بقى:

يا شعب مصر اللى سابقة ضحكته غضبه
ما يطلع الصبح إلا وصحبتك سببه
يا مخلص الأرض من وحشتها فى الأكوان
يا حجة الشمس تفضل طالعة ساعة كمان
مستأذنة وهى مش عادتها الاستئذان
متونسة بالميدان وبعشرته ونسبه
يا شعب يا مصلي قدام العساكر صف
يجري الجريح من ورا لقدام
لا خاف ولا خف
تدوس عليه العربية تحوله لميت الف
يا للعجب يقتلوه ويتوقعوا هربه
يا للعجب يقتلوه ويتوقعوا غيابه
اللي اتقتل لسه واقف هو واصحابه
ما بهدل الامن غير من ماتوا واتصابوا
والصبح ما نور الا اما الشموس غربوا
اضرب عليا انا مش جاري يا قناص
من امتى خوفنا يابن الكلب ضرب رصاص
كل اللي شاف الشهيد بقى تاره تاره الخاص
الدم صاحي وعنيد ولا تقبلوش تربه
يا شعب ياللي دفع تمن الشوارع دم
احفظ اسامي اللي ماتوا في الشوارع صم
الشارع اللي اصطفى وقصر الامارة لم
ملوك قليلة الرباية ركبوا واتركبوا
شعب بغزالة اتخنق قلب التاريخ في يومين
لابس عباية جحا وهو صلاح الدين
بيكرم الانبيا ويهزأ السلاطين
والفجر خيله وحبات الرمال عربه
يا شعب مصر اكم فرعون وفرعونة
ضربتهم ضرب سجادة في بلكونة
ضرب الملوك تربية صالحة ومضمونة
ما يبقوا بني ادمين الا اذا اضربوا
ضرب الملوك مصلحة
ضرب الملوك تأديب
محلى المماليك وهي بتجري في السراديب
ولولا ضرب شجرة الدر بالقباقيب
مابين اغا وباش اغا كان التتار غلبوا
بعدين مبارك سادات فاروق ماحدش دام
هو احنا شعب كده ما بيعيشلناش حكام
عقبال جيرانا وحبايبنا كمان يا سلام
لو كل من له رئيس نصحى نلاقيه قلبه
يا مصر لسه ولسه الثورة بلة ريق
ما ينتهيلك طريق الا ويبدا طريق
يا شعب مصر تعالى نتفق يا شقيق
رج الملك قبل ما تنعم عليه بلقبه
رجه كده شوفه ان كان الملك شغال
واسأل عليه المكوجي واسأل عليه البقال
واهم حاجة في صفاته انه يكون يتشال
متربي عال لما يمشي يلتزم ادبه
بتكون في احسن حالاتك وانت مش محكوم
بتبقى رايق ولا ظالم ولا مظلوم
بعدين ده ايه الغبي ده اللي يهددك بالشوم
يا مخلي الف احتلال ينزل على ركبه
يا شعب انت اللي كارم كل من حكمك
الدولة دي عارفة تحكم بس من كرمك
كشر لها وهي حتجيلك تبوس قدمك
مافيش حاجة اسمها مليون راجل اتغصبوا
سايق عليك النبي ما تقول كفاية يا شيخ
الملحمة لما تخلص يبدأ التاريخ
وبكرة جاية حروب فيها بكا وصريخ
وبكرة نصرك يخض الشمس من لهبه
سايق عليك النبي ما تقول كفاية كده
من النهاردة انتصاراتك حتبقى كده
يا شعب مصر اللي رجالته وبناته كده
حلال عليه لبن العصفورة لو طلبه
سايق عليك النبي ما تقول كده كفاية
إفرح وكمل وما تقولشى كده كفاية
الثورة دى بداية زى الهجرة والميلاد
الثورة دى بسملة كمل بقى الآية


مع كل مرة قراية حسنها يزداد
والآية تجرى تسلم أختها الراية
من غير نهاية وحتى الوقف مش معتاد
وبكرة أيامنا تبقى حكاية ورواية


عن ناس يباتوا حفايا يصبحوا أسياد
خمسة وعشرين يناير يا شباب حصل ايه
لو قلنا يعنى على الساعة تلاتة الفجر
فى حد فينا طِوِل أو جد حاجة عليه
أو جاب سلاح أو ملايكة بشروه بالنصر
كان اختلف فينا إيه عن أى يوم قبليه
نمنا غلابة، صحينا احنا ولاة الأمر
كان عرش مصر ف أُوَضْنا واحنا ناسيينه
راميين هدومنا على شماله وعلى يمينه
طردنا عنه الحرامى غصب عن عينه
ونزلنا ع الميادين بإدينا شايلينه
بقوا الملوك فى الشوارع والعبيد فى القصر
وف يوم وليلة اكتشفنا ان احنا والنبى مصر
ومصر مش حد تانى غيرنا يعنى يا بيه
وكل واحد سأل طب كنا ساكتين ليه
وشعب مين اللى كانوا الزُّطِّ حاكمينه
بدولة شومة ومختومة بختم النسر
وكل واحد قرا اللى كان على جبينه
رفع بدمه يمينه هْدية وهداية
لو كانت الأنبيا ع المية مَشَّاية
لاجلك يا مصر مشينا باسمين ع الجمر
يا مصر وافتكرى أصل الدنيا نسايه
الملك ده حقنا ومفيش فراعنة جداد
إفرح وكمل وما تقولشى كده كفاية
الثورة ده بداية زى الهجرة والميلاد


مش بس مصر اتغيرت من وقفة الميدان
فيه مساحة ضلمة نورت فى طبيعة الإنسان
فيه حاجة ف طبيعة البشر زى السمع زى البصر
زى اكتشاف القدرة ع الطيران
فيه حاجة كت ضايعة وبانت
خلت الأمة استعانت
عالشقا بالله فهانت
هذه الدنيا على الفتيان
ارقينا وارقيهم يا عم الشيخ
فى حاجة خلت يشمك التاريخ
ينزل عن الوجه الجميل فيبان
والخلق كانوا مدركين
لكنهم مش كلهم متأكدين
لحظة ما شافوا بعضهم جوة المظاهرة
اصبحت واضحة وظاهرة نعمة الرحمن على المستضعفين
وصلت رسالة ربهم من كل زهرة كل زفرة
كل نفرة كل زحمة في كل حارة او خناقة في الاشارة
كل كلمة حق
او ضحكة ولد او بنت
كانت دعوة مستورة الى العصيان
فى حاجة أصلا فى الطبيعة تدعو للثورة على السلطان
شوف الشجر رغم الحجر طارح ثمر زى الخبر وبتعلنه الأغصان
شوف الهوا حب اللِّوا فبقوا سوا هبَّة لها ألوان
شوف القمر يفضل قمر تحت الحصار
رغم اقتناعه إنه هايموت قبل ما يشوف النهار
تحصل مفاجأة تطلع الشمس ف حضوره
يختلط نورها بنوره
تشبهه ما تقولش واحدة من ولاده
هى معناه وامتداده
واخدة منه الموهبة والبغددة
وعشان كده
لغة يقولوا عنهم القمران
شوف النجوم ما لهاش نظام حاكم
تكسر كلمة العالم
يبص ويبقى مش فاهم
وهو شايفها ماشية بكيفها فى الأكوان
يا سما هويتك
انت بيتي وقلبي بيتك
تشبهيني واشبهك بالمعنيين
الشبهة يعني والشبه يام النجوم الفلتانين
وباموت انا في فلتانك الامني
لإنه عبقري وفني
وفيه منطق من الموجود في كل جنان
وبرضه باحبه بس كده عشان فلتان


فيه حاجة غامضة بتكتشف
هى اللى بتخلى الحصان اللى اتحدف
من بطن أمه ولسه مش عارف يقف
يقزح ويجرى ويعرف انه حصان
فيه حاجة بتخلى السجين المستكين فى كل حين اشطر من السجان
فيه حاجة بتخلى القوى عيِّل قوى وبيتلوى من نكتة الغلبان
فيه حاجة بتخلى عيون الخلق ما تنامشى
وبتخلى المدن تمشى
وتخرج زى كلمة حق من غير قصد مابترجعش لو طلعت
وم الأسمنت والأسفلت يفلت فلت نهر مقدس الجريان
فليحذر السلطانُ زحف الغابة
والورد إذ يستأنس الدبابة
داب الحديد من لمسته دوبان
فيه حاجة خلت خطة الموت ترتبك
عابس وعايز يشتبك
خاف من ضحية جاية ناوية تاخده بالأحضان
وإذا بهذا الفجر يا اخواننا اتولد بيننا
وكنا احنا بنستنى وهو كمان بيستنا
واتاريه بس عايز إذن منا وهو فى يميننا
فلما أذنا خد منا وعطانا أمان
يا فجر يا سابق صياح الديك
يا شعب يا مشبك إيديك فى إديك
وكأنها خط الثلث فى آية القرآن
إديت لآدم معنى تانى زاد على كل المعانى
وربنا قال هو ده قصدى وده غرضى
كده بالظبط لا زيادة ولا نقصان
يا مصر وانت لسه في البدايات
بكرة اللي جاي اعظم م اللي فات
يا مصر قومي وبصي في المرايات
كان كل واحد في الميدان جايب معاه مراية
رافعها للسما
اشكال والوان كلها مرفوعة في العالي
صبحت مراية واحدة بتلالي
وبقت يا مصر الارض صورة للسما
لعبة بازل متكاسرة الاجزاء
لما البشر يتجمعوا تبان السما ع الارض
واما البشر يتفرقوا تلقي السما بتنفض
تبقى سما متوزعة جوه الشقق
وتمر ليلة من التوجس والقلق
وننام ونصحى تاني يوم
ترجع سما لما البشر يتجمعوا مع بعض
يا مصر حقك تملكي بدل السما اتنين
واحدة هدية وواحدة تانية صانعها مصريين
يا مصر لو دققتي حتلاقي البراق
بيجر عربية فواكه في الحواري الضيقة
شوفي الصحابة والحواريين على القهوة
بيتناقشوا بحرارة
والسما على مد ايدهم مستشارة طيعة ورقيقة
شوفي المساجد كت تشاور ع السما
صبحت تشاور ع البشر وتقول اهما يا سما
بصي وشوفي
وابقي قول لكل صوفي
وهو طالع لك طريق المعرفة اتغير
يوصل م السما للارض
لا يتوه ولا يحير
وشوفي الخلق وسط الموت تقابله وهي بتهزر
فيتلخبط ويتبعتر
وسر الدنيا يتفسر
ونعدلها ونوزنها
باقول يا مصر قومي وبصي في المرايات
في سما الولاد هم اللي عاملينها
بيشوفوا بعض في وش بعض
كأن انا انت وهو انا واحنا الكل
احنا ف مرايا بعض بنصبح صباح الفل
افدي بروحي كل واحد في المرايا طل
افدي الشهيد اللي بيتبسم
الفجر توب على قده متكسم
والله اعلم مين من الاتنين في صاحبه حل
افدي اللي سهران ع الخيم في الطل
وافدي اللي واقف يشتغل في الضل
وافدي اللي شايل للعناد اشارات
يهدي التاريخ صوب الميدان لو ضل
وافدي اللي واقف هاري نفسه كلام
وافدي اللي يتريق على الحكام
وافدي اللي رايح جاي ما بيتعبش
وافدي اللي جنبه حط فرشة ونام
وافدي طويل البال ما يتعصبش
وافدي المصاب اللي شوية وطاب
وافدي المصاب بهوى التراب وما طابش
وافدي اللي صاب البلطجي وما اتصابش
وافدي المقام العالي في التحرير
دولة بلا امرا وشعب امير


اعلم يا هذا الجيل ان الوطن بشره
لو مصر مالهاش نيل كان شعبها حفره
مش وصلوا بحرين وبنوا جبال اتنين
وف ظرف أسبوعين على خوفهم انتصروا
والخوف ده شىء معروف بيفرعن الحلوف
رزق الملوك الخوف من غيره يندثروا
رزق الملوك بقشيش من خوفنا شعب وجيش
ومفيش ملك بيعيش لو شعبك افتكره
ناس لسة فى العشرين نازلين على الميادين
بيهزأوا السلاطين من غير ما يعتذروا
يا شعب يا مجنون
علم شعوب الكون
اللي اخترع فرعون
قادر يجيب خبره
يا سادة الايام يا رافعين الهام
من بكرة بر الشام نادر لكم شجره
نادرها تين وزتون فى القدس ينتظرون
جيش ع الغلابة حنون وعلى العدا ضرره
دافعين تمنها دما
يا امة الكرما
شعبك كأنه سما
والدنيا دي مطره


يا مصر حمد الله ع السلامة


مطر ونازل بدون غمامة
مطر يا سيدي نازل وطالع
كأنه مدنا والارض جامع
والارض دي مظاهرة في الشوارع
تسقي السما جدعنة وشهامة
مطر وطالع يقول لربه
الامهات اللي في مصر ربوا
ويا بنات مصر قوموا حبوا
اجمل ما في الراجل الكرامة
مطر وطالع ع الفجر يدن
طلعت بنات مصر حلوة جدا
في الحرب والدنيا نار ومعدن
طايرة وشايلة السما اليمامة
خمسة وعشرين من شهر واحد
الفين وعشرة وزادوا واحد
كنا ملايين وكنا واحد
حددنا موعد يوم القيامة


قلت لصحابى انزلوا وانا بعيد عنهم
وقلت من بات فى بيته سلم اصحابه
وانا اللى غبت وهمه اللى هنا اتصابوا
نزلوا الشباب الميدان وانا بعيد عنهم
كسروا الشباب البيبان وانا بعيد عنهم
خرج الشباب م البيوت وأنا بعيد عنهم
دخل الشباب فى الموت وانا بعيد عنهم
يا موتى قوم امتحنى أعتذر منهم
اشمعنى يا كلب تستثنينى من بينهم
يوم الخطر قبلها ما كنت اجبنهم
يا موت تعالى اعوض غربتى ومنفاى
يا موت تعالى أحاسبك ع القديم والجاى
يا موت تعالى ونتقاسمك أنا وعداى
ولا تطال عزوتى وانا بعيد عنهم


بس الحكومة قالت لي انت مش مصري
انت فلسطيني يعني اجنبي حصري
طيب يا بيه يعني بلاد الشام بلاد اروام؟
اعيد كلام قلته ميت مرة ده يبقى كلام؟
مش ام هاشم بلدها السيدة زينب؟
مش الحسين في الحسين ولا لازم له جواز؟
ولا حيختار مابين مصر وعراق وحجاز؟
والمرسي والشاطبي جم م الاندلس الاتنين
من مرسية وشاطبة لو كانوا مش باينين
في اسكندرية اجانب ولا مصريين
اسماءنا هي بلادنا يا حسن يا حسين
اسماءنا زي العلم زي اللغة والدين
اسماءنا هي الوطن له دمنا لو عاز
واسمي خلالي في الارض العريضة ملاذ
وعزوة في كل دار تنطق حروفه تمام
وف كل دار ليا صحبة وليا اهل عزاز
كان نفسي يا مصر يتأكد كلامي بدم
والدم يا مصر برضه ع المحبة قليل
قالوا لي بتحب مصر قلت مش عارف
هو الهوى يبقى جارف لما اقول جارف؟
واقعد أألف أغاني عن جمال النيل
وحكاية الشرب ميت مرة وهرم ونخيل
ولا الهوى الحق هو اللي يهد الحيل
واولى شيء في الهوى يا مصر شيل الهم
ياللي تحب النبي ايدك معانا وشيل
الحب اتقل من اسمه واسمه نفسه تقيل
وفي التباس المحبة ع المحبة دليل
ما تعرف اللي اصابك عشق ولا تعب
والشوق بيقلب مع الحرمان ساعات بغضب
والصبر بس اما يخلص يبقى صبر جميل


يا اهل مصر
وانا اهلي في مصر عرب
اهلي عزازمة وعشايرة الخال وخال الخال
ما بين شراقوة وصعايدة بدو في الحالتين
قولوا لي دولا عرب او دولا مصريين
او دولا الاتنين سوا في الحل والترحال
بعدين انا اسمي تميم وحاروح من اسمي فين؟
مش فيه في مصر قريش؟
قالوا البراغتة قريش
من بيت عدي بن مرة والنسب عمري
حطوا الحدود والعشيرة واحدة في البلدين
وسلك شائك فرق من قالوا ليه او ليش
وكنت اطنش لو ان البحث ده نظري
لكن ده فيه دم سال
واسأل رفح وعريش
واسأل ملوك ترهن الاقصى برغيف العيش
واسأل حدود تحرم المسلم من الحرمين
واسأل في غزة الوف في الحرب متحاصرين
ويخيروني العيال في حب اب وام
انا ابن رضوى ومريد
اسمي تميم من تم
وكل دار للعرب لي فيها خال او عم
واللي يقول غير كده بيني وبينه الدم
مين اللي يثبت ومين يجري يلم الديل
شد الكلام عمته واختار اعز جواد
ورد قاصد بلاده والهوى رداد
وابن الاصول اللي ما يبدل ببلاد ببلاد
والغربة مرة ولو كانت هدومها جداد
في مصر بعد السفر وجد الكلام معناه
واهل مصر صحابي واولياء الله
يا اوليا لسه في العشرين وفي التلاتين
يستنجدوا المؤمنين في المأزمة بيكم
يا فارجين الكرب بين العرب عناوين
منعني عنهم مطار القاهرة واسمي
واني لو جيت يقولوا اجنبي مسكناه
مسكنا واحد اهو له مديح في حزب الله
يتهموا اصحابي بيا مش انا بيهم
واضر لي ستة سبعة اكون في وسطيهم
ع بال ما خلص الكلام ده النصر كان مضمون
القلب فرحان ولكن اتعبه منفاه
وهده بعده عن اللي عاش بيستناه
ما فضلش غير انحني حبا واقول الله
الله افردني عنهم وجمعهم
لكي اراهم على بعد واسمعهم
قد فاز فوزا عظيما من قضى معهم


لما تشوف الشهيد تبقى السلامة خجل
وتبقى عايز تقول له يا أخى آسف
طب قول لى بس اعمل ايه، لو يعنى فيها عمل
اللقمة دى لك نصيب فيها باشيلهولك
واشيل نصيبك من القاعدة وكاسات الشاى
لكن نصيبك فى أنفاسى أشيله إزاى
وازاى أشيللك نصيبك من فرحنا الجاى
ساعات ألاقينى باطلب خط محمولك
بعمل فى نفسى كده ليه، لسه مش عارف
وروح على القهوة أسأل، هو جه وسأل
من قال لك الموت طبيعى يبقى مش شايف
الموت ده شىء مش طبيعى الموت ده أصله خلل
الأصل فينا الخلود وهييجى يوم نلقاه
ما تحسبوش الشهيد اداكوا بس حياة
ما موتوش هو وحده اللى برصاصة رماه
ده طخ ابنه اللى لسه ما اتولدش معاه
وطخ أولاد ولاده لآخر الأيام
موت معاه بشرية كاملة محتملة
عدوا بقى فيها كام شاعر وكام رسام
وكام طبيب عبقرى بين الأطبة إمام
وفيلسوف له على حكم الليالى كلام
وبنت نظرتها تشفى القلب من داؤه
فى شعب كامل رحل ما عرفش أسماؤه
في جسم كل شهيد فيه مصر مكتملة
فخلوا مصر اللى فاضلة تعيش كما شاؤوا
---------
عرفتوا بقى قصدي؟
طب انقلوا مبارك بقى مستشفى طره حرام عليكم يعني.. وابتدوا التحقيق معاه، انتوا سايبينه ليه؟

طب ماهو بن لادن ميت مبتسم اهو

تحديث:
اداء السي اي ايه بعد اعتزال عمر سليمان بقى في النازل جدا
ايه ده؟
تحديث:
عمار على التويتر جاب لي الصورة دي وبيقول لي ان الصورة بتاعة بن لادن دي مزورة 

اهو
ده المصدر

الله يرحمه

اضرب عليا انا مش جاري يا قناص

هو حد لقى الشاب ده؟

هو الجدع ده ما بيطلعش من دماغي ابدا، الواد لا فكر يطلع في الاعلام، ولو مات ما فكرش اهله يقولوا ده ابننا
انا بس عايزة اقول له شكرا عشان قلت للناس كلها ان رجالة مصر رجالة
ومنك لله عشان احرجتني لاني كنت بارقع بالصوت لما القناصة بيضربوا
والنبي يا جماعة لو حد لقاه يقول لي
لو هو مش عايز يعلن عن نفسه، انا نفسي اشوفه، واوعده اني مش حاقول لحد عليه، بس عندي فضول اعرف مين البني ادم ده
نسيت اقول حاجة
انا مش بيعدي يوم مش باقرا واسمع قصيدة يا شعب مصر بتاعة تميم.. تصدقوا حفظتها على طولها ده؟ 
وعمري ما كنت اتصور ان الثورة تتعمل قصيدة حية كده، ده كل ده وهو كان بعيد، امال لو كان قاعد معانا كان عمل ايه؟ 

وائل غنيم وقف الامريكان دقيقة حداد على الشهداء :)

اولا مبروك لوائل غنيم

ثانيا هو اللي شرف الجايزة مش هي اللي شرفته

ثالثا: هو وقف الامريكان دقيقة حداد على الشهداء؟ ههههههههههههههههههههههههههه والله جدع

رابعا: اتكلم حلو قوي، وقالهم انا مش باعرف اتكلم :)

الفيتيون اهو

عسسسسسسسسسسسسسسسسسسسسسل... احسن حاجة في كلامه انه بيتكلم حلو وهو فاكر انه مش بيعرف يتكلم، وانه بيفهم وهو فاكر نفسه مش بيفهم :)
مبروك للجايزة، مش لوائل
:)

شرف الاخوان زي عود الكبريت

هم الاخوان المسلمين بيلعبوا مع السلفيين ليه؟ والموضوع ابتدا يتطور وبقوا يلعبوا عروسة وعريس قدامنا لما حياءنا اتخدش

احنا مش قلنا كخ كده كخ؟

حتندموا ندامة الكسعي لما غدت منه مطلقة النوار

فيه اخطار واضرار كخ كخ كخ

1- الاخوان عاملين زي النشافة، لما بيلزقوا في حد بيطبع عليهم ويبقوا شبهه، وفي الحالة دي الوسطية اللي بيتكلموا عنها، وهي مكسبهم الوحيد قصاد السلفية، حيخسروها

2- اذا لم يتماهى الاخوان مع السلفية الناس طبيعي حتروح للاكثر راديكالية عشان هي دي بقى الثورية والاخوان حيضطروا يزايدوا في الراديكالية عشان يكسبوا مقاعد في البرلمان، دلوقت السلفيين محتاجين عدد الاخوان، بس لو فضل الاخوان يدعموا الخطاب السلفي، في البرلمان السلفيين حيبقى لهم اليد العليا ويبقوا يقابلوني بقى ساعتها لو عرفوا يسيطروا عليهم، ويخرجوا من ذل مبارك يخشوا على ذل السلفيين، والسلفيين حيحسوا بالخطر من الاخوان فحيتغدوا بيهم قبل ما الاخوان يتعشوا بيهم

3- انتوا بتئذوا السلفيين كده، وبتدعموا الخطاب الاعلامي الناري ضدهم، السلفيين لما بطنهم بتتملي بيتكرعوا تكريعة تجيب لآخر الشارع، ولما حيلاقوا عدد الاخوان وراهم ودنهم حتتخن واهم راحوا يتهجموا على الكاتدرائية امبارح، ويقول لك احنا ما مارسناش عنف، مع ان فعل التظاهر قدام دار عبادة للترويع ده في حد ذاته عنف، واذا كانوا ما عندهمش تقدير سليم لما هو عنيف وما هو غير عنيف، يبقى التطور الطبيعي للحاجة الساقعة حيبقى خارج سيطرة الاخوان... انتوا ما بتتعلموش؟ مش كفاية اللي حصل مع الجهاد؟

4- وبتئذوا نفسكم كمان، دي اول تجربة لكم وانتوا مش محظورة، ولما الناس تشوفكم اول ما خرجتم من اطار المحظورة لاطار اللا محظورة بتتحالفوا مع ناس بتتظاهر قدام الكاتدرائية يبقى بتدعموا كل خطاب مبارك اللي كان ضدكم طول تلاتين سنة، واول حاجة الناس حيقولوها: اهم بانوا على حقيقتهم اهم.. لا وسطيين ولا نيلة

5- لون السلفية مش لايق عليكم.. السلفية بيليق عليها الوان تانية، وغالبا بيبقوا احسن لما بيبقوا لوحدهم كده، ادوهم للجيش واتحالفوا انتوا مع حد تبانوا جنبه انكم ناس طيبة ومتسامحة وكل المخاوف اللي كان بيبثها مبارك ضدكم طلعت كدب

ولما باقول ادوهم للجيش انا مش باهزر، هم لازم يتحركوا في اطار قيادة، وقيادة حكومي كده، غير كده عيارهم بيفلت، ولما عيارهم بيفلت بيجيبوا ضرف اللي هم متحالفين معاه قبل ما يجيبوا ضرف نفسهم

انتوا بتليقوا على اليساريين، بيخلوكوا تتكلموا في قضايا كويسة وقريبة من الناس، وبتقدموا خطاب مجتمعي كويس، واليساريين بيكسبوا ان قضيتهم بتتروج، وانتوا بتكسبوا ان شكلكم بيبقى حلو

اديني جبت لكم من الآخر اهو، وبمنتهى الوضوح والصراحة عشان انا ما احبلكمش الاذية

برضه كنتوا جدعان في الميدان

والله الموفق